Monitor

Bekommerde inwoners snoer kragte saam om 'n uiters sensitiewe omgewing, Kenmarekloof, aan die Gautengse Wesrand te bewaar. Daar is 'n toename in hawelose kinders in Prieska in die Noord-Kaap. 'n Onkruid met die wetenskaplike naam, Amaranthus Palmer, bedreig somergewasse.

Eskom wil hierdie winter beurtkrag in die aand toepas - ons vra antwoorde van Eskom se bedryfshoof, Jan Oberholzer. 'n Ekonoom verduidelik wat die ekonomiese impak van kragtekorte is.

'n Militêre ontleder bespreek die skietstilstand tussen Israel en Hamas. Die Kerkstraat-bomontploffing 38 jaar gelede word onthou.

Inwoners van die Renosterberg-munisipaliteit sê dienslewering gaan agteruit nadat 'n administrateur verlede jaar aangestel is. Ons praat met die hoofsekretaris van die Evangeliese Alliansie in Suid-Afrika, eerwaarde Moss Nthla, oor die konflik tussen Israel en die Palestyne. 'n Studie deur die Steve Biko Sentrum vir Bio-etiek wys dat swak bestuursvaardighede onder taxibestuurders nie noodwendig die wortel van kwaad is wat padveiligheid betref nie.

Boere verwelkom die DA se versoek om die Oos-Kaap tot 'n droogterampgebied te verklaar. Kontaksport by skole is weens Covid-19 opgeskort. Gesondheidspraktisyns in die privaatsektor vra die regering om die administrasiefooi, wat mense vir die Covid-19-inenting moet betaal, te verhoog.

Die Joodse gemeenskap vra die Suid-Afrikaanse regering om ewewigtig te wees in sy veroordeling van die konflik in die Midde-Ooste. Buitelandse besoeke aan Suid-Afrika neem met 80% af.

Nog 'n plaasaanval, dié keer suid van Warden in die Vrystaat, skok die plattelandse bevolking. Boewe in Pretoria strooi spykers op die pad om motoriste tot stilstand te bring en te beroof. In die toekoms gaan mense meer betekenisvolle, sinvolle en bevredigende werk vereis.

Die voorsitter van die Veediefstal Inligtingsentrum op Ermelo, Cecilia Beukes, sê daar is 'n reuse toename in veediefstal in Mpumalanga. Opkomende boere in Gauteng loop ook toenemend deur onder veediewe. Die struggleveteraan en teoloog, dr. Allan Boesak, sê die Suid-Afrikaanse regering moet alle diplomatieke bande met Israel verbreek.

Honderde ouer mense word teen Covid-19 ingeënt. 'n Tienerseun sterf tydens diensleweringsbetogings in die Mangaung Metro. Boko Haram was vanjaar verantwoordelik vir meer as 100 aanvalle op burgerlike en militêre teikens.

Verskeie opposisiepolitici sê hulle sal hulle nie laat inent nie. Ons wonder hoekom, en vra 'n kenner of dit so 'n goeie idee is. Die sekretarisgeneraal van die Verenigde Nasies, António Guterres, vra dat die gevegte tussen Israel en Palestina onmiddelik gestaak moet word.

Oudpresident Jacob Zuma kry sy langverwagte dag in die hof, maar dit word dalk net weer uitgestel. Die nuuspublikasie, Noseweek, moet dalk sy deure sluit.

Die Verkiesingskommissie wil meer jong mense aanspoor om te registreer vir die komende plaaslike regeringsverkiesing. 'n Voormalige president van die Suid-Afrikaanse Instituut vir Siviele Ingenieurs reageer op die regering se besluit om Kubaanse ingenieurs in te voer om die land se waterstelsels reg te ruk. Leon van Nierop raak liries oor die nuwe Afri-Kaapse fliek, Barakat.

Die Wes-Kaap ondervind 'n oplewing van Covid-19-infeksies. Die Moslemgemeenskap vier vandag Eid al-Fitr. Portugal gaan soldate in Mosambiek oplei om terreur in die Cabo Del Gado provinsie te probeer hok slaan.

Ons sit ons gesprek oor stedelike verval voort, en praat met die vorige burgemeester van Johannesburg, Herman Mashaba, om 'n beter begrip van die situasie te kry. Die Nasionale Khoisan-raad sê hoewel hulle bly is oor die nuwe Khoi en San Tradisionele Leierskapswet, is daar steeds leemtes.

Die ergste gevegte in jare ontwrig die lewe van Israeli's én Palestyne. Motoriste in Pretoria kry raad oor wat om met korrupte en intimiderende metropolisiebeamptes te doen. Gevangenes wat weens die pandemie uit oorvol tronke vrygelaat is, word weer gearresteer, maar dié keer vir erger misdade.

Vrese van 'n volskaalse oorlog in Israel. Kommer oor die verval van sekere woonbuurte in Johannesburg.

Die geskorste ANC sekretarisgeneraal word 48 uur gegee om jammer sê. Bewerings dat die Tshwane-metropolisie motoriste terroriseer vir omkoopgeld.

Die nasionale uitvoerende komitee van die ANC het gister die uitkomste van sy spesiale vergadering oor die naweek bekend gemaak. Ons ontleed die gebeure en besluite wat daar geneem is. Ons vind uit hoe die vergadering tussen Solidariteit en die Minister van Water en Sanitasie verloop het oor die invoer van Kubaanse ingenieurs.

Kenners meen dat ons nog nie die derde vlaag van Covid-19 ingaan nie. Njozi, die jagluiperd, gaan moeiliker kan ontsnap noudat sy baie nouer gemonitor word. Die vullisprobleem in die Mangaung Metro gee inwoners meer as 'n kopseer. Die ANC sê sy adjunk-sekretarisgeneraal, Jessie Duarte, sal die pligte van die geskorste sekretarisgeneraal, Ace Magashule, oorneem.

Ons bespreek die woelinge in die ANC. Ons praat met Carl Niehaus en 'n politieke ontleder. Plantkundige Ernst van Jaarsveld vertel van 'n ekspedisie na Angola.

Hulp aan inwoners in die Overberg ná hewige storms. Die Vryheidsfront Plus het 'n prokureursbrief aan die stadsbestuurder van die Manguang-metromunisipaliteit gestuur waarin oplossings geëis word oor vullisverwydering.

Die oor-en-weer skorsery van senior leiers in die ANC het onleders aan die bespiegel oor die toekoms van die regerende party. Die Instituut vir Rasseverhoudinge meen president Cyril Ramaphosa is meer lojaal aan ANC-kaders as aan landsburgers. Leon van Nierop lek sy lippe af vir die watertand-kosmaakfliek, Love Sarah, wat vandag in teaters begin.

Die aanranding van die Vrystaatse boer, Gert Terblanche, kon 'n wraakaanval gewees het. Meer inligting oor twee versekeringsmaatskappye se inisiatief om slaggate reg te maak, kom aan die lig. Daar is glo 48-duisend slaggate in Johannesburg. Die soektog na 'n jagluiperd wat uit die Rietvlei Natuurreservaat in Pretoria ontsnap het, kan weke duur.

'n Bohaai oor olie-ontginning in Namibië en Botswana. Ongelukkigheid oor nuwe ontwikkelings langs die Suid-Kaapse kus.

Die ANC skors en muilband Ace Magashule. Ons praat hieroor met 'n politieke ontleder. Die ANC in Johannesburg kom onder skoot vir sy hantering van die sogenaamde slaggat-pandemie.

Die G7-lande se Ministers van Buitelandse Sake vergader vir die eerste keer in twee jaar in Londen om internasionale knelpunte te bespreek. Slegs 24% van swart kandidate wat Desember se eksamen vir geoktrooieerde rekenmeesters afgelê het, het geslaag. 'n Sosiale media krisisbestuurder verduidelik hoekom al hoe meer mense hulle sosiale media rekeninge sluit.

Inwoners van Olifantshoek in die Noord-Kaap is al vir langer as 'n week sonder water. Die Wes-Kaapse regering wil meer as 720 000 ouer mense teen Covid-19 inent. Die drukgroep, The Green Connection, is ontevrede met die regering se plan om kragskepe te gebruik om bykomende elektrisiteit aan Suid-Afrika te verskaf.

Hoe vry is die media in Suid-Afrika en die res van Afrika? Ons praat met 'n kenner. Navorsing wys nuwe neigings in vakansiegangers se gedrag.

Vrystaat se slaggate eis nog 'n lewe. Uiteenlopende reaksie op die jongste aanbevelings oor leeus.

Die regering hoop om binne die volgende paar weke 'n strategiese ekwiteitsvennoot vir die Suid-Afrikaanse Lugdiens te vind. 'n Langverwagte verslag deur 'n hoëvlakpaneel oor die bestuur, teel, jag en handel van wilde diere is vrygestel. Die DA versoek die Gautengse polisiekommissaris, Elias Mawela, om 'n taakspan saam te stel om die toenemende voorvalle van veediefstal in die provinsie te ondersoek. En marienebioloë het 25 duisend vate gifstof in die see aan die Suid-Kaliforniese kus gevind.

Die oorsaak van die brand by 'n pakhuis in Fordsburg in Johannesburg is nog nie vasgestel nie. Ethiopië wil weer sy reservoir op die Nylrivier opvul, maar die Soedanese regering is baie ontevrede met hierdie besluit. Die voormalige Suid-Afrikaanse rugbyspeler, Lindani Myeni, se oorskot is uiteindelik terug in sy tuisdorp, Richardsbaai, in KwaZulu-Natal. En SABC 2 het 'n aantal SAFTA-benoemings losgeslaan.

Amerika se ontrekking uit Afghanistan begin op 1 Mei - ons kyk na die betekenis en gevolge hiervan. Ons fokus op die Amerikaanse president, Joe Biden, se eerste 100 dae in sy amp. Ons vind uit waarom 'n gebrek aan 'n stoel, 'n groot herrie in Ankara veroorsaak het en wat die gevolge van Sofagate sal wees.

Die eerste gesondheidswerker in Suid-Afrika is 'n jaar gelede aan Covid-19 dood. Oranië het vandeesmaand sy dertigste bestaansjaar gevier - ons kyk na hoe dit van toeka tot nou verander het. President Cyril Ramaphosa het sy getuienis voor die Zondo-kommissie afgehandel - ons kry reaksie op die afgelope twee dae se onthullings en erkennings.

Die ANC se president, Cyril Ramaphosa, sê aanstellings in staatsinstellings moet op 'n deursigtige wyse gedoen word, sodat staatskaping nooit weer in Suid-Afrika sal plaasvind nie. Twee politieke wetenskaplikes ontleed Ramaphosa se getuienis by die Zondokommissie. Ons gesels met RSG se stasiehoof, Magdaleen Krüger, wat aftree na 'n loopbaan van 32 jaar by die SAUK.

Die Wes-Kaapse leier van die DA, Bonginkosi Madikizela, het bedank. Nog 'n betoging in Kimberley oor swak dienslewering. Die Vereniging van Suid-Oos Asiese State poog om Mianmar se strydende partye bymekaar te bring om die voortslepende konflik te besleg.

Die regering pak die tweede fase van sy Covid-19-inentingsveldtog - dié keer is die kandidate mense bo 60. 'n Nuwe boek oor betogings in Suid-Afrika waarsku dat gemeenskappe se geduld met die gebrek aan dienslewering opraak. 'n Skoonmaker van die Universiteit van die Wes-Kaap vang graad op die ouderdom van 47.

Alle oë is vandag op die Staatskapingskommissie gerig waar president Cyril Ramaphosa sal getuig. Wetenskaplikes meen dat die Wonderwerk-grot naby Kathu in die Noord-Kaap dalk die oudste woonplek in die menslike geskiedenis kan wees.

Die Britse mediese vakjoernaal, THE LANCET, spreek sy kommer uit oor die gebrek aan sielkundige bystand aan vroue wat miskrame ervaar. Die voormalige kabinetsminister Malusi Gigaba se vervreemde vrou, Norma, het voor die Staatskapingskommissie getuig. Sommige partye in die Parlement sê hulle het begrip dat openbare ampsdraers geen verhoging vir 2020/2021 moet kry nie. En 'n springkaanplaag veroorsaak groot skade aan gewasse in die Oos-Kaap.

Sommige inwoners van Kimberley in die Noord-Kaap eis dat die burgemeester moet bedank. Die lugvaartekonoom, dr. Joachim Vermooten, bespreek die moontlike oorsake van die stand van sake by die laekoste lugdiens, Mango. Die DA se provinsiale struktuur in Limpopo is onder administrasie geplaas. En ons praat oor die impak van die Covid-pandemie op ons vryheid en regte.

Politieke partye sê die ANC-veteraan en sakeman, Tokyo Sexwale, se bewerings oor 'n fabelagtige internasionale fonds en die diefstal daarvan moet indringend ondersoek word. Die bekende menseregteprokureur Richard Spoor bied aan om oudpresident Jacob Zuma met sy korrupsieverhoor gratis in die hof te verteenwoordig. 'n Joodse rabbi red 'n afskrif van die Torah uit een van die geboue op die kampus van die Universiteit van Kaapstad tydens verlede week se brande.

Die regering se besluit om waterdeskundiges uit Kuba in te voer, word skerp gekritiseer. Die DA eis antwoorde by minister Blade Nzimande oor die besluit om Afrikaans en die Khoe- en Santaalfamilie glo as uitheems te klassifiseer. Die Suid-Afrikaanse dokumentêre rolprent, My Octopus Teacher, wen 'n Oscar!

'n ANC raadslid in die Oos-Kaap is skuldig bevind aan verskeie misdade, maar is nie haar werk kwyt nie. Ons kry reaksie van ontleders en kyk na die probleem wat oral kop uitsteek in die land. Daar heers steeds kommmer oor die Gautengse onderwys departement se inmenging by skole. Ons vind meer uit van die eerste Tesla elektriese motor in Suid-Afrika, en die toetse wat dit ondergaan om te bepaal of so motor hier verkoop kan word.

Die ANC veteraan, Tokyo Sexwale, beskuldig die Reserwebank van die onwettige oorplasing van geld na ander bankrekeninge. Studente van die Universiteit van Kaapstad keer terug na hulle koshuise ná die brande. Kaapstad maak intussen gereed vir sy winterreënvalseisoen. Suid-Afrikaners ly honger as gevolg van die Covid-19-pandemie.

Privaatinstansies en die publiek dra by om studente van Ikeys te help nadat hulle die koshuise weens die groot brand moes ontruim. Ons kyk ook na die onskatbare erfenis wat in die brand by die universiteit verwoes is. En die Suid-Afrikaanse Olimpiese span kry velskoene!

Onwettige bewoners van HOP-huise in Olievenhoutbosch in Pretoria betoog teen hulle uitsetting deur die munisipaliteit. Reaksie stroom in van regoor Amerika na die skuldigbevinding van die voormalige polisiebeampte, Derek Chauvin, aan die moord op George Floyd.

Tussenverkiesings word vandag in 14 munisipaliteite gehou. Die VN se Wêreldvoedselprogram sê 31-miljoen mense in Wes- en Sentraal Afrika ly honger weens konflik, stygende voedselpryse, en Covid-19. 'n Oudiovisuele woordeboek word vir die N!UU taal geskep. Die Ditsobotla plaaslike munisipaliteit gaan die sekuriteit by die Lichtenburg begraafplaas in Noordwes opskerp nadat die brons borsbeeld van die boeregeneraal Koos de la Rey gesteel is.

Inwoners van Beaufort-Wes in die Wes-Kaap is gekant teen die hidroelektriese boor vir skaliegas in die gebied. Die FAK het 'n kunstenaar opdrag gegee om 'n replika te skep, om die brons borsbeeld van generaal Koos de la Rey te vervang. 'n Plaasboer van Mpumalanga, Fritz Louw, het 'n klag by die Openbare Beskermer ingedien oor die swak toestand van die R36-pad.

Ontleders is dit eens dat oudpresident Jacob Zuma al hoe meer binne die ANC geïsoleer word. NASA se Mars-helikopter maak ruimtegeskiedenis. 'n Aanlynplatform geskep om leerlinge te help om gepaste beroepskeuses te maak.

Inwoners van Vredehoek in Kaapstad is omgekrap na Sondag se verwoestende brand. Ons ontleed die burgemeesterstryd in Kaapstad. Die misdaadromanskrywer Deon Meyer voel geëerd nadat die Franse regering hom tot ridder slaan.

Die gesondheisprodukte-beheeraad, Sahpra, sê die tydelike staking van inentings met die Johnson & Johnson-entstof moet opgehef word. 'n Voorstel dat laerskoolleerders weer voltyds skool moet bywoon, word deur die departement van basiese onderwys oorweeg. 'n Kaapse regisseur se rolprent, Love and Monsters, is vir 'n Oscar-toekenning benoem. Switserse en Walliese wetenskaplikes is besig om nuwe veevoer vir beeste te ontwikkel om metaangasuitlatings aansienlik te verminder.