Monitor

Die leier van die DA, John Steenhuisen, besoek Stellenbosch Universiteit ná berigte dat studente verbied is om Afrikaans by hulle koshuise, in die openbaar, en selfs op parkbanke op die kampus te praat. Die voormalige lyfwag van die eertydse Vrystaatse premier, Ace Magashule, kry 15 jaar tronkstraf vir die diefstal van 'n Pierneef-skildery.

Die Polisie se onafhanklike ondersoekdirektoraat, OPOD, begin 'n ondersoek na die dood van 'n man tydens gister se betoging by Wits-Universiteit in Johannesburg. Die verspreiding van die Covid-19-entstof, veral na armer lande, word al dringender te midde van 'n gebrekkige vervaardigingskapasiteit.

Suid-Afrika se Bruto Binnelandse Produk het verlede jaar in vergelyking met 2019, met sewe persent gedaal. Die minister van toerisme, Mmamoloko Kubayi-Ngubane, sê reisgers soek meer unieke en volhoubare ervarings, en as vakansies in die buitelug. Ons vind uit hoe vorder die inisiatief van South Africa Day om dorpe en plekke dwarsoor Suid-Afrika te vernuwe.

Nuwe wysigings aan die Kieswet kom onder die soeklig in die parlement. Anelia Dodd verbonde aan die Universiteit van Limpopo se Departement Handelsreg gee raad oor wat mense se opsies is indien jy finansieel of andersins seer gekry het weens die swak toestand van paaie. Ons praat met 'n afgetrede siviele ingenieur oor hoe om 'n slaggat reg te maak.

Meer as 'n honderd krokodille is nog soek nadat hulle in die Hazyview-omgewing in Mpumalanga ontsnap het. Bykans 100 mense word in Kaapstad weens onwettige straatrenne in hegtenis geneem.

'n Verslag oor seksuele oortredings in die weermag dui op 'n kultuur van ligte vonnisse en 'n onvriendelike slagofferomgewing. Die Verenigde Nasies gaan Suid-Afrika help om die groot agterstand van asielaansoeke teen 2024 uit te wis.

Reaksie op SANRAL se waarskuwing aan motoriste dat hulle nie hulle voertuiglisensies sal kan hernu as hulle uitstaande e-tolskuld het nie. Die uitvoerende direkteur van die Verenigde Nasies se vroueorganisasie, dr. Phumzile Mlambo-Ngucka, meen spesiale kwotas moet ingestel word om die aantal vroue in leierskapposisies te vermeerder. Die hertog en hertogin van Sussex se omstrede onderhoud met Oprah Winfrey is in Amerika uitgesaai. Verskeie opposisiepartye in die parlement dring daarop aan dat die Openbare Beskermer, advokaat Busisiwe Mkhwebane, uit haar amp verwyder word.

Verskeie universiteite begin met die registrasie van studente vir die 2021 akademiese jaar. Ons bespreek Pous Franciscus se geskiedkundige besoek aan Irak. Durban het die helfte minder besoekers in die 2020 feesseisoen gehad vergeleke met 2019. Die VN se Hoëkommisaris vir Menseregte, Michelle Bachelet, dring aan op 'n onafhanklike ondersoek na die moord op honderde burgers in Ethiopië se Tigraystreek.

Suid-Afrikaanse mediese praktisyns kla hulle word geintimideer deur die mediese skema, DISCOVERY, weens die beweerde wangebruik van mediese terapeutiese kodes. Marienebioloë is opgewonde oor haaie wat in die donker gloei.

Solidariteit kry 'n lasbrief om op die wapenvervaardiger, Denel, se bates beslag te lê. 'n Ooreenkoms om skooluniforms goedkoper te maak, word wyd verwelkom. Opposisiepartye in die Johannesburg Metroraad eis 'n ondersoek na die bedanking van die stadsbestuurder, Ndivo Lukwareni.

Nuwe navorsing wys dat mense wat die coronavirusvariant, 501Y.V2, opgedoen het, 'n vlak van immuniteit daarteen ontwikkel het. Ons praat met prof. Tess van der Merwe oor Wêreld ObesiteitsdDag en die jongste navorsing. 'n Platform is bekendgestel wat daarop gemik is om enige verdagte werksplasing na te gaan, om seker te maak dit is nie vals nie.

SKOOR gaan bewerings van rassisme teen Eskom se bestuurshoof ondersoek. Meer as 450 leerlinge in Eerste Rivier in Kaapstad, ontvang onderrig op 'n veld langs Ou Faureweg. En Human Rights Watch is min beïndruk met die Turkse president se lang verwagte Menseregte Plan van Aksie.

Wat is die politieke implikasies van 'n onafhanklike paneel se verdoemende bevindings teen die Openbare Beskermer? Die Voortrekkermonument maak planne te midde van Covid-beperkings.

Vrae oor 'n Suid-Afrikaanse militêre maatskappy in Mosambiek. Die uitmergelende droogte in die Oos-Kaap eis sy tol in die landbousektor.

Ons praat met twee misdaad- en polisiekenners oor bendegeweld in Kaapstad, wat aan die toeneem is. Boere wêreldwyd gebruik toenemend tegnologie om hulle kuddes te bestuur. Professor Shabir Madhi van Wits sê 'n derde vlaag van Covid-19-infeksies word in Mei of Junie verwag.

'n Nuwe wet wat 'n Grondhof tot stand sal bring, gaan aan die parlement voorgelê word. 'n Onafhanklike paneel het bevind dat daar prima facie bewyse is om met 'n proses te begin om die Openbare Beskermer uit haar amp te verwyder. Solidariteit Skole-ondersteuningsentrum sê die regering moet ruimte skep vir die ontwikkeling van 'n digitale strategie vir skole. Wines of South Africa reageer op die opheffing van die beperkings op drankverkope.

Gister was Uitsonderlike Siekte Dag, en vandag is Internasionale Rolstoeldag - ons praat breedvoerig oor spierdistrofie. Leon van Nierop hou die Golden Globe-toekennings dop.

Die land beweeg na 'n Vlak 1-inperking. Ons praat met die voorsitter van die Mediese Vereniging.

Moderna het 'n aangepaste entstof ontwikkel wat spesifiek die Suid-Afrikaanse variant van COVID-19 teiken. Die aptekersgroep, Pharma Valu, sê die Suid-Afrikaanse Reguleringsowerheid vir Gesondheidsprodukte het nooit 'n kennisgewing van registrasie vir Ivermektien in die Staatskoerant gepubliseer nie. Parlementslede het hulle medelye betuig met kollegas wat die afgelope jaar dood is.

'n Kenner sê al hoe meer Suid-Afrikaners word slagoffers van identiteitsdiefstal. 'n Hofstryd oor die toelating van eerstejaar studente by UNISA. Die FAK is besig met 'n projek om lewensgroot 3D-afbeeldings van die Paul Kruger-beeldgroep te maak. Venezuela se olieproduksie het sedert Desember verlede jaar toegeneem.

Politieke ontleders bespreek die begrotingsrede. Gemengde gevoelens oor die verandering van plekname in die Oos-Kaap.

Politieke partye en ekonome reageer op die begrotingsrede.

Die Minister van Finansies het min beweegruimte in sy begrotingsrede - ons kyk na wat hy kan doen, en wat hy moontlik gaan doen. 2021 is 'n plaaslike verkiesingsjaar - ons steek kers op by 'n ontleder oor hoe dit die begroting kan beïnvloed. Die afhandeling van boedels is tans stadiger as ooit.

Die Minister van Finansies lewer vanmiddag sy begrotingsrede. Ons fokus deur die loop van die program op verskeie aspekte van die begroting en wat ons kan verwag. Die DA het onlangs die Stop Kaderontplooiing Wetsontwerp in die parlement voorgelê - ons vind uit wat die wet behels en waarom dit nodig is.

Ons praat met 'n matriek wat 6 A's kry nadat hy eksamen in 'n hospitaalbed moes skryf. Onderwyskenners bespreek die laer matriekslaagsyfer.

Die DA sê in sy alternatiewe begroting dat 'n Suid-Afrikaanse kind met R67,000 rand se skuld gebore word. Die 88-jarige Frans Hugo is steeds 'n koerantman - hy het 72 jaar gelede by NASPERS begin werk.

Die kollig val op afstandsonderrig tydens die pandemie - ons praat met 'n kenner waar daar verbeter kan word, veral wat landelike skole betref. Die media het die afgelope tyd disproporsioneel aandag gegee aan sekere politieke figure, aldus 'n bekende joernalis. Het hy 'n punt beet? Die Amerikaanse deelstaat Texas word as rampgebied verklaar ná 'n ongewone winterstorm geweldige skade aan infrastruktuur gerig het.

Die langverwagte matriekuitlae word vanmiddag bekendgemaak. Die Suid-Afrikaanse Weermag het glo miljoene rand se medisyne uit Kuba aangekoop wat nie vir plaaslike gebruik goedgekeur is nie. Johannesburg se vaal geboue kry 'n groen mantel.

Die prys van elektrisiteit kan met bykans vyf keer die inflasiekoers styg. Die vrywillige likwidering van Air Namibia kan ernstige gevolge vir trofeejag in die buurland inhou.

'n Ruimtetuig land op Mars om te soek na tekens van mikrobiese organismes. Kommer oor Suid-Afrika se krimpende staalproduksie.

Ons plaas die fokus op veediefstal en kry reaksie van die polisie en praat met die nasionale veediefstalforum om te hoor hoe erg die probleem is. Ons hoor tot watter mate die land se waterinfrastruktuur verwaarloos is.

Talle gesondheidswerkers is reeds met Johnson en Johnson se Covid-19-entstof ingeënt. Drie en veertig plaasaanvalle en vier plaasmoorde het volgens Afriforum sedert die begin van vanjaar voorgekom. Eskom verduidelik waarom 'n mislukte behuisingprojek meer as R800-miljoen gekos het. 'n Jong krapvreterrob is op pad huis toe in Antarktika.

Gemengde reaksie van ANC-lede naby aan oudpresident Jacob Zuma oor sy weiering om voor die Staatskapingskommissie te verskyn. Ons praat oor 'n voorstel om Jan Smuts-rylaan in Kaapstad na die struggleleier Franklin Sonn te vernoem.

Die antwoord op Suid-Afrika se probleem met Covid-19-inenting is dalk 'n kombinasie van verskillende middels. Tagtig persent van Ivermectin-tablette wat die land binnegekom het, bevat onverklaarde middels en kan gevaarlik wees.

Oudpresident Jacob Zuma gaan van minagting van die hof aangekla word - ons praat met 'n ontleder oor of Zuma wel aan die pen sal ry. Veediefstal is landwyd 'n ernstige probleem - ons besoek boere in Mpumalanga om eerstehands te hoor hoe dit hulle raak. As jy die afgelope tyd 'n sterk swael reuk in die lug opgemerk het, moenie die gesprek misloop waarin ons uitvind waar dit vandaan kom nie.

Die Zondo-kommissie eis tronkstraf vir oudpresident Jacob Zuma nadat hy weier om voor die kommissie te verskyn. Zuma beweer op sy beurt dat sekere individue in die regbank hulle siel verkoop het vir politieke doelwitte. Ons voer gesprek oor die skole wat gister heropen het, en vra of kinders vanjaar voldoende onderrig sal ontvang.

Die Departement van Basiese Onderwys sê alles is in gereedheid vir skole om vandag te heropen. Meer as 35 000 leerders moet nog in Gautengse skole geplaas word. Suid-Afrika het die Rand 60 jaar gelede op 14 Februarie 1961 as amptelike geldeenheid aanvaar.

'n Skriftelike antwoord op 'n parlementêre vraag deur die DA het aan die lig gebring dat KwaZulu-Natal se Departement van Onderwys sy werknemers byna R600-miljoen skuld. Twee jong mans probeer die armoedesiklus onder minder gegoede Suid-Afrikaners te breek deur matriekleerlinge oor beurse in te lig. Oudpresident Jacob Zuma moet vandag voor die Staatskapingskommissie verskyn, maar sy onwilligheid is dalk 'n swak voorbeeld vir ander getuies.

Ons kry insig van 'n politieke ontleder en toekomskundige oor die Staatsrede - in hierdie gesprek plaas ons onder meer die fokus op die vier prioriteitsareas wat president Ramaphosa aangeraak het, en vra of die regering se planne voldoende toekomsgerig is? Die Weerdiens sê swaar reën word vir die volgende week in die noorde van KwaZulu-Natal en Mpumalanga verwag - ons praat met 'n weerkundige oor die baie reën en bewolkte weer wat die afgelope paar weke oor groot dele van die land voorkom. In Amerika sê die Demokrate daar móét opgetree word teen oudpresident Donald Trump.

Daar is wye reaksie op die Staatsrede wat gisteraand deur president Ramaphosa gelewer is. Ons praat deur die loop van die program met verskeie kenners en ontleders vir hulle mening oor die Staatsrede. Die Wes-Kaapse regering het reeds begin met sy eie proses om COVID-19-entstowwe te verkry. Ons kyk na die verskeie risiko's wat vanjaar soos 'n donker wolk oor Suid-Afrika sal hang.

Is daar hoë of lae verwagtinge vir vanaand se staatsrede? Mense sê hulle sê, en ons praat met kenners oor wat ons kan verwag. Navorsing deur 'n doktorsgraadstudent aan die Universiteit Stellenbosch het 'n uiters skaars plantsoort in die Suid-Kaap laat herleef.

Kaapstad en die regering word gemaan om die informele woongebiede van Nyanga te ontwikkel om nog 'n kindertragedie te voorkom. Ons praat oor die verhogings in minimumlone wat meer as inflasie is. In Amerika het 'n prokureur per abuis in die gedaante van 'n kat by 'n virtuele hofsaak verskyn.

Demokrasie verkeer wêreldwyd onder druk - ons praat met politieke ontleders. 'n Opname in 31 lande bevind dat mense glo 2021 sal in alle opsigte 'n beter jaar wees as 2020.

AgriSA vra dat die staatsrede die rol van die landbousektor baie duidelik uitspel. Die meerderheid Suid-Afrikaners raak siek van die nuwe Covid-19-variant.

Die Spesiale Ondersoekeenheid se verslag oor korrupsie met mediese toerusting-tenders laat mense na hulle asems snak, maar 'n waghondorganisasie meen politici kom skotvry daarvan af. Die WNNR hou 'n seminaar om wanopvattings oor 5G-tegnologie en samesweringsteorieë uit die weg te ruim.

Die DA wil burgerlike toesig oor gemeenskapsveiligheid in Gauteng versterk. President Cyril Ramaphosa se staatsrede sal waarskynlik 'n baie moeilike jaar vir Suid-Afrikaners weerspieël.

Pieter van den Berg bespreek die naweek se sport. Die Universiteit Stellenbosch se Woordfees het 'n plan bedink om kunstenaars skeppend te hou.

Kommer oor die doeltreffenheid van Suid-Afrika se Covid-inentingstowwe. Hulp aan die boere van Bitterfontein.

Is 'n outokraat met goeie bedoelings dalk beter as 'n demokrasie? Ons probeer 'n antwoord op dié tergende vraag vind. Baie damme loop landwyd vol terwyl nog reën verwag word. Daar is baie bespiegeling oor oudpresident Jacob Zuma en die leier van die EFF, Julius Malema, se teepartytjie.

Dele van die RICA-meeluisterwet word ongrondwetlik verklaar. 'n Fietsryer pak 'n tog van 'n duisend kilometer aan om die onafhanklikheid van die Kaap te bevorder. Adjunk-hoofregter Raymond Zondo is geskok oor die ANC se sensuur van parlementslede wat met hulle gewete stem.