NASA 逐工一幅天文圖 APOD Taigi

獵戶座星雲：哈伯影像 https://apod.tw/daily/20210629/ 真少宇宙景色 kah 獵戶座星雲 仝款，會當激發咱 ê 想像力。伊嘛叫做 M42，這个星雲 ê 發光氣體 to̍h 圍 tī 高溫少年 ê 恆星外沿，是 tī 離咱干焦 1500 光年遠 ê 大型星際 分子雲 ê 雲邊內底。獵戶座星雲 提供咱一个上好 ê 機會來研究 恆星是按怎誕生 ê。伊 tī 離咱上近 ê 大型 恆星形成區 內底，而且因為星雲內底 較活潑 ê 恆星 kā 邊仔會閘著咱視線 ê 氣體 kah 塗粉雲歕開，才會當予咱近距離觀察 恆星誕生 kah 演化 ê 過程。這張獵戶座星雲是歷史上上清楚 ê 影像，是 ùi 哈伯太空望遠鏡 ê 影像資料建構出來 ê。這 規个獵戶座星雲 有 40 光年 闊，伊 kah 咱 ê 太陽 攏 tī 銀河內底仝一个 捲螺仔手骨 內底。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像提供：NASA, ESA, Hubble Legacy Archive 資料處理：Francisco Javier Pobes Serrano 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210629.html Powered by Firstory Hosting

NGC 7814：有超新星 ê 細頂草帽仔星系 https://apod.tw/daily/20210722/ Kā 你 ê 望遠鏡 tùi 飛足懸 ê 飛馬座 看，你會當看著咱這个 寬闊銀河系 ê 恆星 kah 遙遠 ê 星系。NGC 7814 to̍h tī 這幅美麗視場 ê 中央，伊 ê 視角 差不多 kah 月娘 平闊。NGC 7814 有當時仔嘛叫做細頂草帽仔星系，因為伊 kah 另外一个較有名 ê M104，草帽仔星系 足成 ê。草帽仔星系 kah 細頂草帽仔星系攏是側向 ê 捲螺仔星系。In 攏有寬闊 ê 銀暈 kah 銀核，毋閣 in ê 外形攏去予 in ê 薄星系盤 kah 足狹 ê 塗粉帶分做兩爿。實際上，NGC 7814 離咱 4000 萬光年遠，伊差不多有 6 萬光年闊。這个 細頂草帽仔星系，kah 彼个較有名 ê 草帽仔星系差不多平大。伊看起來較細較暗，只是因為伊較遠爾爾。這个 tī 7 月 17 翕著 ê 望遠鏡影像，有一个新發現 ê 超新星，to̍h tī 銀核 ê 倒爿。伊 去予編做 SN 2021rhu，是 Ia 型 ê 超新星，會使用來校正 宇宙 距離 ê 大細。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：CHART32 Team 音樂：PiSCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210722.html Powered by Firstory Hosting

雷神 Thor ê 頭盔 https://apod.tw/daily/20210720/ 雷神 Thor 毋若有 專屬 ê 日子（拜四），嘛是天堂 ê 頭盔。咱一般攏 kā NGC 2359 叫做 雷神 Thor ê 頭盔。伊是一个帽仔形 ê 宇宙雲，閣有兩支翼股。雷神 Thor ê 頭盔有 30 光年闊，tùi 北歐神 來講嘛是有夠大 ê。實際上，這个宇宙崁蓋較成是一个 星際氣泡，是去予氣泡中心一粒明亮、大質量恆星 ê 高速恆星風吹出來 ê。中心恆星是 Wolf-Rayet 星，伊是 足燒 ê 巨恆星，是 超新星 前期足短 ê 演化階段。NGC 2359 離 咱有 15000 光年遠，to̍h tī 大犬 座 ê 方向。這張 遮爾清楚 ê 影像 是濫幾若款無仝 ê 觀測資料，有寬頻 kah 狹頻 濾片 ê 資料。內底毋若有 一般看著 ê 影像，嘛有 星雲 雲絲 ê 清楚結構。雷神 Thor ê 頭盔 中心 ê 恆星，閣紲落來幾若千年了後，應該會 爆炸，變做壯觀 ê 超新星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Bernard Miller 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210720.html Powered by Firstory Hosting

樹林仔內底 ê 夜景：銀河 ê 窗仔門 https://apod.tw/daily/20210719/ 這位 kha-mé-lah sàng 進前 to̍h 一直想欲翕這張相片。伊知影 tī 頭殼頂 ê 天體 是上光 ê，因為 in ê 光較袂去予 大氣層內底 ê 空氣 散射去。伊嘛知影咱 銀河系 ê 核心，會 tī 今年這陣 tī 澳洲 南部 半暝 ê 時陣，直直 peh 到天頂。按照伊心內 ê 構圖，伊勇敢行入去 Kuipto 森林內底。遮有懸 kah 看起來是 輻射形 ê 杉仔，kā 大部份 ê 天空閘牢矣，毋閣無遮爾清氣。伊 to̍h kā 這个去予樹林仔箍起來 ê 窗仔門景色，kah 遠方 ê 天景組合做伊心內 ê 構圖。伊攏總翕 16 張相片，內底有樹林仔 kah 銀河系。心宿二 是 咱銀河中心盤 倒爿翕粒上光 ê 柑仔色恆星。半人馬座 Alpha 星 是影像中央正爿上光 ê 恆星。咱 銀河中心 to̍h tī 心宿二下跤。閣幾若點鐘了後，地球自轉 to̍h 會予銀河盤 peh--起來向倒爿行去，毋閣隨 to̍h 會去予樹林仔閘去。毋閣 kha-mé-lah sàng 心內 ê 構圖已經翕著矣，to̍h tī 遮。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Will Godward 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210719.html Powered by Firstory Hosting

仙女座星系 ê 紫外光影像 https://apod.tw/daily/20210718/ 仙女座星系 tī 紫外光看起來是啥款？伊 ê 星系中心主要是少年藍色恆星 leh 踅。仙女座星系 離咱干焦 250 萬光年爾爾，伊嘛叫做 M31，伊真正是咱厝邊 ê大星系。這个星系有 23 萬光年 闊。這張華麗 ê 影像，是 NASA ê 星系演化探索計畫 (GALEX) 衛星太空望遠鏡 tī 2003 年翕 ê。這是 捲螺仔星系 ê 紫外光影像。仙女座 ê 捲螺仔手骨 tī 可見光影像 足明顯 ê。毋閣伊 tī 紫外光看起來較成是一个環。這个環內底有足強 ê 恆星形成活動。這應該是仙女座星系 kah 伊較細粒 ê 厝邊星系，長株圓星系 M32，tī 2 億年前相碰 ê 證據。仙女座星系 kah 咱 ê 銀河系 攏是 本底星系團 內底上大質量 ê 成員。閣幾若十億年了後，in 可能 to̍h 會相碰。彼 ê 時陣，咱 ê 太陽 大氣會脹大 到 kā 地球食去。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：NASA, JPL-Caltech, GALEX 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210718.html Powered by Firstory Hosting

天蠍座 ê 烏塔 https://apod.tw/daily/20210715/ Ùi 這个尾溜有足-kheh ê 星場 ê 蛛形星座 天蠍座 ê 剪影來看，這个宇宙塗粉雲予人聯想到一个 不祥 ê 烏塔。實際上，這个 華麗 ê 望遠鏡影像 差不多有 40 光年闊，內底 ê 烏暗星雲，有幾若簇 ê 塗粉 kah 分子氣體 崩塌，形成恆星。Tī 這幅影像面頂，一簇一簇 ê 嘛叫做 彗星雲球。In 是去予 NGC 6231 內底有足燒恆星 ê OB 星協 發出 ê 強烈紫外光輻射掃做堆 ê 雲。這款能量足強 ê 紫外光，嘛激發雲球邊仔 ê 水素氣體 產生紅光。藏 tī 塗粉內底較燒 ê 恆星，tī 較藍 ê 反射星雲 彼搭。NGC 6231 這个烏塔，kah 伊 ê 星雲伴，離咱差不多有 5000 光年遠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像資料：Martin Pugh 影像處理：Rocco Sung 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210715.html Powered by Firstory Hosting

GW200115：烏洞 kah 中子星合併 ê 模擬動畫 https://apod.tw/daily/20210714/ 烏洞若是毀滅中子星，毋知會發生啥物代誌？分析指出，這款現象會產生重力波事件，to̍h 親像 tī 2020 年 1 月彼陣，LIGO 實驗室 kah 室女座 天文台偵測著 ê GW200115 事件仝款。為著欲閣較了解這个特別 ê 事件，to̍h 利用電腦模擬來產生這个 視覺化影片。這个視覺化影片 ùi 烏洞（質量差不多是太陽 ê 6 倍）kah 中子星（質量差不多是太陽 ê 1.5 倍）互相轉踅開始，閣發出愈來愈濟 ê 重力輻射。重力波 發射線 ê 美麗圖樣是藍色 ê。這个雙 捲螺 踅足緊 ê，一直到中子星完全去予 烏洞 食去為止。Tī 相碰 ê 過程，中子星並無碎--去，光嘛差不多無走--去。這 kah 觀測結果相-siâng，無看著光學 ê 對應物。落尾這粒烏洞 liang 一時仔 爾爾，伊發出 ê 重力波嘛綴烏洞做伙恬--去。這个 30 秒 ê 縮時攝影影片 可能有較短，毋閣伊已經是實際上合併時間 ê 1000 倍長矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像： 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210714.html Powered by Firstory Hosting

Alphonsus kah Arzachel https://apod.tw/daily/20210717/ Eng-暗，kā 你 ê 望遠鏡提來看 頂月眉。綴著晨昏線，就是暗暝 kah 日時 交界 ê 烏影線，你可能會揣著兩个足大 ê 隕石坑，敢若是 貓頭鳥 leh kā 你睨。倒爿 ê Alphonsus kah 正爿 ê Arzachel 是古早時代相碰產生 ê 隕石坑。In to̍h tī 月球雲海 ê 東北爿。這个較大 ê Alphonsus ê 直徑有超過 100 公里闊。隕石坑中央有 1.5 公里懸 ê 山頭。低角度 ê 太陽 kā 山頭明亮 ê 太陽光 kah 烏影照甲閣較明顯。為著欲揣著適合阿波羅太空船 ê 登月地點，游騎兵 9 號 太空船 tī 1965 年欲落-lǒe 隕石坑中央山頭 ê 東北爿（倒爿）進前，to̍h 先 kā Alphonsus ê 特寫相片送轉來地球。Tī Alphonsus kah Arzachel 中央 ê Alpetragius，是較細 ê 隕石坑。伊 ê 下底足深 ê，中央山頭煞傷大。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Noel Donnard 音樂：PiSCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210717.html Powered by Firstory Hosting

土星 ê 衛星 Iapetus：3D ê 彩繪衛星 https://apod.tw/daily/20210713/ 土星 ê 衛星 Iapetus 是發生啥物代誌？這个 奇怪 ê 世界 有足濟部份是較暗 ê 咖啡色，其他部份是較光 ê 白色。較暗物質 ê 組成成份猶毋知，毋閣 紅外線 光譜 表示伊有可能有 碳 ê 成份 tī--lih。Iapetus 閣有一个特別 ê 赤道脊，予伊看起來敢若是一粒 核桃。為著欲了解這粒彩繪衛星，NASA tī 2007 年直接送 Cassini 機器人太空船 到踅土星 ê 軌道去，予伊會當衝到離 Iapetus 2000 公里 近 ê 所在來 kā 看。這張是 Iapetus ê 3D 影像。Tī 南部有一个巨型 ê 隕石坑，差不多有 450 公里闊，敢若是疊 tī 另外一个差不多平大 ê、較老 ê 隕石坑 面頂。較暗 ê 物質 看起來有足濟攏崁 tī Iapetus ê 上東爿，予隕石坑 kah 高地看起來攏差不多平暗。認真檢查 了後，發現這个較暗 ê 表面物質通常是 tùi 著衛星赤道，而且伊比一公尺較薄。目前 主流 ê 假說 是講，這个較暗 ê 物質，大部份是垃圾冰溫度變懸 昇華 了後，賰 ê 物質。這个 較暗 ê 表面物質，上開始可能是 ùi 其他衛星 落過來產生 ê 流星殘骸，累積、崁 tī 這粒衛星表面 ê 結果。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：NASA, ESA, JPL, SSI, Cassini Imaging Team; 3D Rendering: NASA’s VTAD 音樂：PiSCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210713.html Powered by Firstory Hosting

水星 kah Da Vinci ê 光 https://apod.tw/daily/20210710/ 七月 8 號透早起床 ê 人，會當 tī 東爿地平線彼搭 ê 月娘附近看著水星。這張天光進前 ê 天景，是 彼工 tī Canary 群島 Tenerife 島 ê Teide 國家公園翕 ê。內底有足光 ê 行星、月光暝 ê 暗淡月光、kah 太陽光反射 ê 新月。閣有一粒 會隨無去 ê 內行星，伊 tī 天頂一定袂離太陽傷遠，to̍h tī 天欲光彼陣發出伊上光 ê 光。伊是水星，這馬 to̍h chhāi tī 金牛座 Zeta 星（天關）ê 下跤，tī 天牛角 ê 尾仔。是講，月娘較暗淡 ê 光其實是 地光照 ê，是月球暗暝彼面反射地光來 ê。地光 ê 描述，500 年前 ê Leonardo da Vinci to̍h 有寫過。伊是地球海洋反射太陽光，kā 月球烏暗 ê 表面照予光。前景 leh 等天光 ê 是 Teide 天文台 ê 太陽哨兵隊。這寡大型 ê 天文台圓厝頂 ùi 倒爿到正爿是，THEMIS，VTT，kah GREGOR 太陽望遠鏡。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Gabriel Funes 音樂：PiSCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210710.html Powered by Firstory Hosting

土星 kah 伊 ê 六粒衛星 https://apod.tw/daily/20210706/ 土星有幾粒衛星？這馬已經揣著 82 粒矣。上細粒 ê 根本無夠一公里闊。這幅圖內底有上大粒 ê 六粒 衛星，是 13 張 tùi 較光 ê 行星短時間感光，kah 13 張 tùi 較光 ê 衛星長時間感光 ê 組合圖。這是頂個月 開 兩禮拜 ê 時間翕 ê。In 比月球較大，嘛比 金星 閣較大淡薄仔。土星上大粒 ê 衛星 Titan ê 直徑是 5150 公里闊。伊踅土星這粒 有環母行星 ê 完整運行軌道，差不多攏有翕著。土星第一粒予人知影 ê 衛星是 Titan，伊是 1655 年 荷蘭天文學家 Christiaan Huygens 發現 ê。毋閣 最近發現 ê 幾若粒新 ê 衛星 是 tī 2019 年發現 ê。Tī 軌道上正爿彼粒是土星第三大 ê 衛星，Iapetus。畫出來 ê Iapetus 軌道半徑實在是足大 ê，所以 tī 遮干焦看會著一部份爾爾。這個月 土星會 chhōa 木星 行過夜空，tī 日頭落山了後 ùi 東南爿 peh--起來，到 天光 進前攏看會著。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Mohammad Ranjbaran; MR Thanks: Amir Ehteshami 音樂：PiSCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210706.html Powered by Firstory Hosting

電腦模擬：第一批恆星 ê 形成 https://apod.tw/daily/20210630/ 第一批恆星是按怎形成 ê？為著欲揣著這个答案，才有有這个 SPHINX 電腦模擬來解說 tī 早期宇宙 ê 恆星形成 過程。一寡結果 to̍h 展示 tī 這个影片 內底。這是 ùi 幾若百萬年前 ê 大霹靂 開始，時間 to̍h 標 tī 倒爿頂懸。大霹靂 了後一億年，物質 to̍h tī 宇宙內底湠到 傷平均 矣，這个時陣無法度生出新 ê 恆星。除了 背景輻射 以外，宇宙是足暗 ê。真緊，一寡內底有豐富 水素 氣體 ê 物質 to̍h 開始合成 第一批恆星。Tī 這个 縮時攝影影片 內底，茄仔色是氣體，白色是光，金色是高能輻射，伊 kā 水素 離子化，分解做紮電 ê 電子 kah 光子。這个金色區域嘛會當追蹤上大質量恆星，in ê 一生上尾會變做 能量足強 ê 超新星 才會收煞。這个圓箍仔插圖內底，是中央區域 形成星系 ê 特寫。這个模擬有繼續落去，一直到宇宙年歲 5.5 億歲為止。為著欲評估 SPHINX 模擬 ê 精確度 kah in 用 ê 假設，這个模擬結果毋若會提來 kah 這馬 ê 深空觀測做比較，嘛會提來 kah NASA 按算欲用 ê JWST 望遠鏡 閣較直接觀測 早期宇宙 ê 計畫做比較。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Harley Katz (U. Oxford) et al. 音樂：PiSCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210630.html Powered by Firstory Hosting

來揣月娘 https://apod.tw/daily/20210711/ 月娘 tī 佗位？伊 to̍h 藏 tī 相片內底。這馬拄仔好是十五暝，這 規粒月娘 應該是足好揣 ê。毋閣連 kha-mé-lah sàng 遮爾金 ê 目睭 to̍h 攏揣無，to̍h 算伊知影月娘 tī 佗位。其實是愛用伊 ê kha-mé-lah 長時間感光 才勉強看有啦！你這馬可能 歡喜 講你已經揣著矣！毋閣伊是毋是足歹揣 ê？有一个原因是，因為這張相片是 tī 月全食 彼工翕 ê。彼當陣地球 ê 烏影 kā 月球 閘著，煞予月娘比平常時 ê 十五暝閣較暗。另外一个原因是，這張 tī 美國 Colorado 州翕 ê 相片，才拄 tī 日出進前翕 ê。月娘 tī 天頂拄仔好 tī 日頭 ê 相對面。這表示講，日頭這馬 tī 地平線下底，毋閣猶是會當 kā 天頂 小可仔照予光。上尾一个原因是，月娘 tī 地平線面頂 2 度懸 ê 所在爾爾。這个時陣，tī kha-mé-lah kah 地平線之間 厚厚 ê 大氣，kā 足濟 背景月娘 ê 光線散射出去。這張是 tī 2012 年翕 ê 相片，12 分鐘了後，日頭 to̍h peh-起來地平線面頂偷看，月娘 to̍h lòe--去矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Jimmy Westlake (Colorado Mountain College) 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210711.html Powered by Firstory Hosting

IC 4592：藍色馬頭反射星雲 https://apod.tw/daily/20210705/ 你敢有看著馬頭？毋閣你看著 ê 毋是 tī 獵戶座 內底彼个有名 ê 馬頭星雲，是一个閣較暗 ê 星雲。愛用閣較深 ê 顯像才會當看著 咱熟似 ê 形式。這幅圖 內底 ê 分子雲複合體 ê 主要部份是一个 反射星雲，伊 ê 編號是 IC 4592。反射星雲實際上是 ùi 足幼 ê 塗粉 組成 ê。一般來講 in 是有較暗，毋閣 in 看起來嘛有較藍。這是反射附近較高能恆星發出 ê 可見光。Tī 這幅圖內底，發射光主要 ê 來源是 tī 馬 眼 ê 一粒恆星。這粒恆星是 天蠍座 Nu 星群 ê 一部份，是蠍仔星座（天蠍座）內底足光 ê 恆星系統內底 ê 其中一粒。你閣會當看著第二 反射星雲是 IC 4601，伊 to̍h tī 這幅圖中央倚正爿彼兩粒恆星 ê 外圍。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Adam Block, Steward Observatory, University of Arizona 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210705.html Powered by Firstory Hosting

AR2835：色球層內底 ê 島嶼 https://apod.tw/daily/20210702/ 太陽表面足光 ê 彼層是 色球層，內底 ê 太陽烏子 kah 行星欲平大。太陽烏子 to̍h tī 高溫發光 ê 電漿 海內底泅，tī 有磁場 ê 所在停落來，是電漿海內底 ê 烏暗 島嶼。Tī 太陽活跳區內底揣著 ê 太陽烏子看起來有較暗。這是因為 in ê 溫度小可仔較低，干焦 4000 K 爾爾。Tī in 邊仔 ê 太陽表面溫度是有 6000 K。這陣太陽烏子 to̍h tī 活跳區 AR2835 內底。上大 ê 活跳區 AR2835 這馬 當-leh 行過太陽表面。這个景色 to̍h tī 七月 1 號用望遠鏡翕著伊 ê 特寫。這个視場有 15 萬公里闊，比地球直徑閣較大。太陽活跳區 有足強 ê 磁場，一般攏是表示遐有太陽閃焰 kah 日冕 ê 噴出物，kah 會影響 地球 附近 太空氣候 ê 太陽風暴。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Michael Teoh, Heng Ee Observatory, Penang, Malaysia 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210702.html Powered by Firstory Hosting

哈伯太空望遠鏡翕 ê 肚胿仔星系 https://apod.tw/daily/20210621/ 是按怎這个星系有遮爾長 ê 尾溜？這張 予人讚嘆 ê 遠景 是 哈伯遺產資料庫 ê 影像。一个遙遠星系成做這个壯麗 ê 背景，伊是去予搝開 ê 捲螺仔 星系 Arp 188，肚胿仔星系。這个 宇宙肚胿仔 離咱有 4.2 億光年遠，to̍h tī 北天星座 天龍座 ê 方向看會著。這个 予人注目 ê 尾溜有 28 萬 光年 長，內底閣有大質量、明亮 ê 藍色星團。一款講法是講，有一个閣較密 ê 入侵星系 行過 Arp 188 頭前，to̍h ùi 這張影像 ê 正爿迵到倒爿，才去予肚胿仔星系 ê 重力 hiù-去到 後壁。Tī 這改 ê 近距離接觸，潮汐力 kā 捲螺仔星系 ê 恆星、氣體、kah 塗粉 拖--出來，才會產生這个壯觀 ê 尾溜。這个 入侵 星系，估計是 tī 肚胿仔星系後壁 300 光年遠 ê 所在，to̍h tī 正爿面頂彼个前景 ê 捲螺仔手骨遐。Kah 伊 ê 地球 名仝款，肚胿仔星系 ê 年歲愈大，伊 ê 尾溜 to̍h 會沓沓仔變無--去。落尾，尾溜內底 ê 星團 to̍h 會變做這个大捲螺仔星系 ê 細衛星星系。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Hubble Legacy Archive, ESA, NASA; Processing: Amal Biju 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210621.html Powered by Firstory Hosting

毅力號 kah 獨創號 ê 自翕 https://apod.tw/daily/20210701/ Tī 火星日第 46 工（2021 年 4 月 6 號），毅力號探測車 tī 火星伸出一支機器手骨自翕。Tī 手骨尾節 ê WATSON kha-mé-lah 是設計來翕火星岩石 kah 表面細節 ê 特寫，毋是欲來做 kah 朋友歡喜做伙 ê 速翕。落尾是需要 團隊合作 kah 幾若禮拜 ê 火星時間，來設計一系列 ê 感光 kah kha-mé-lah ê 運動 來翕毅力號 kah 伊 ê 環境。這 62 張相片煞會當組合做一張真清楚 ê 拼鬥影像，是歷史上上複雜 ê 火星探測車自翕。Tī 這个版本 ê 自翕，探測車 ê Mastcam-Z kah SuperCam 儀器當 leh 看 WATSON kah 探測車伸長 ê 手骨。離毅力號差不多 4 公尺遠 ê 所在，有另外一台機器人，是 火星獨創號直升機。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：NASA, JPL-Caltech, MSSS 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210701.html Powered by Firstory Hosting

Messier 99 https://apod.tw/daily/20210624/ 這个有偉大設計 ê 捲螺仔星系 Mesier 99，ùi 真正 ê 宇宙尺度來看，實在是真壯觀。這是最近處理過 ê M99 星系 ê 完整肖像，伊有 7 萬光年闊。這个清楚 ê 景色是 kā 哈伯太空望遠鏡 ê 紫外光、可見光、kah 紅外線影像資料敆做伙 ê。伊 tī 差不多 5000 萬光年遠 ê 所在，to̍h tī 美麗 ê 后鬃座遐。這个正面捲螺仔星系，是厝邊 ê 室女座星系團 ê 成員之一。伊嘛予編做 NGC 4254。伊 kah 室女座星系團 ê 另外一个成員 ê 近距離接觸，可能是造成伊有彼个清楚、藍色捲螺仔手骨外形 ê 原因。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：NASA, ESA, Hubble, Janice Lee; Processing & Copyright: Leo Shatz 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210624.html Powered by Firstory Hosting

火環日食 ê 惡魔角 https://apod.tw/daily/20210618/ 這个 tī 六月 10 號 翕 ê 大西洋日出望遠鏡影像，是因為 大氣反射 kā 太陽盤面搝平 kah kā 伊 ê 外形扭曲 ê。這个景色是 tī 初一 ùi 美國東岸 New Jersey 州 Belmar 記錄這改 ê 食季發生 ê 金環日食。月娘 kā 一部份 ê 日頭閘著，才會予日頭變做月眉形，賰 ê 部份煞看起來親像是惡魔 ê 角（嘛有可能是一隻 會飛 ê 船）。毋閣 tī 月相到環食 ê 時陣，這个食日看起來 to̍h 親像是天堂 ê 火環。六月 ê 金環日食是 隨綴 tī 五月 ê 月全食後壁來 ê。當然，這改 ê 月全食看著 ê，是一粒超級紅 ê 血色月食。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Madhup Rathi 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210618.html Powered by Firstory Hosting

扭曲 ê 日出帶食 https://apod.tw/daily/20210606/ 是哩！毋知你敢捌看過這款日出？Tī 日偏食這工 ê 日出，日頭 tī 遮先拄著厚雲，了後干焦是分做兩塊 peh--起來。Kha-mé-lah sàng 講，這个景色是伊這世人拄過 上使人讚嘆 ê 日出。這个 去予大氣紅化 ê 太陽，伊頂懸附近 ê 烏色圓盤 是 月球，毋閣下跤彼个尖尖 ê 烏影嘛是。這是因為 地球大氣 內底有有一个 逆溫層，遮 ê 空氣溫度實在是異常 ê 溫暖。這 to̍h 親像是一粒 大型 ê 鏡頭，才會產生 第二个影像。Tùi 一般 ê 日出 抑是 日落來講，這款較罕得看著 ê 大氣光學 現象 to̍h 叫做 Etruscan 花矸效應。這張相片 是 2019 年 12 月 tī 卡達 ê Al Wakrah 翕 ê。Tī 地球 東爿狹細範圍內底 ê 一寡觀星者，會當看著 完整 ê 金環日食。Tī 遐，月球完全去予背景 ê 太陽箍 tī 內底，to̍h 親像是一輾 火箍仔。Tùi 有萬全準備 ê 觀星者來講，後一擺 ê 日食，嘛是日環食，會 tī 四工後，6 月 10 號 彼工出現。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Elias Chasiotis 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210606.html Powered by Firstory Hosting

雲頂 ê 極光 https://apod.tw/daily/20210530/ 極光一般來講會 tī 雲 ê 面頂出現。極光 是 ùi 太陽噴出來 ê 快速運動粒子 碰著 地球磁層 產生 ê。Tī 遐，踅 地球磁場 ê 帶電粒子，會碰著 地球大氣層 較懸所在 ê 原子 kah 分子。像 酸素 原子，若是去予這款相碰激發了後，to̍h 會發出青色 ê 極光。低層 ê 極光 會發生 tī 100 公里懸以上 ê 所在。是講大部份 ê 雲干焦會出現 tī 10 公里懸以下 ê 所在。這張 2015 年 tī 冰島 Dyrholaey 翕 ê 相片，to̍h 看會當清楚看著雲 kah 極光 ê 相對懸度。Tī 遐， 有一位天文攝影師，為著欲翕著這个 媠甲親像一幅圖 ê 燈塔 面頂 ê 極光，決定忍受 強風 kah 彼陣 ê 烏陰天。結果 tī 路 lih 煞翕著這張有搝長 透鏡雲 ê 相片。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Daniele Boffelli 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210530.html Powered by Firstory Hosting

Juno 太空船翕 ê 木衛 Ganymede https://apod.tw/daily/20210614/ 這个太陽系內底上大粒 ê 衛星看起來是按怎 ê？這是 木星 ê 衛星 Ganymede，比 水星 kah 冥王星 閣較大。伊 ê 表面有一重冰層，面頂有較光、較少年 ê 隕石坑，疊 tī 較老、較暗、較貓面 ê、有 山溝 kah 山龍 ê 地形頂面。是按怎會產生這个山溝地形，是一个 研究主題。有一个主要 ê 假設是 kah 冰層 ê 枋塊徙動有關。Ganymede 予人認為有一重比地球海洋閣較厚 ê 海洋層，可能閣有性命 tī 遐。To̍h 親像 地球 ê 月球 仝款，Ganymede 嘛 用仝一面 kah 伊 ê 母行星，木星，相對面。這張影像 是頂禮拜 NASA 機器人太空船 Juno 經過 這粒巨型衛星頭頂 1000 公里懸 ê 時陣翕 ê。這个倚近，予 Juno 踅木星 ê 週期 ùi 53 工 減到 43 工。Juno 太空船會繼續 研究這粒 巨型行星 ê 懸重力、異常 ê 磁場、kah 複雜 ê 雲結構。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：NASA/JPL-Caltech/SwRI/MSSS; Processing & License: Kevin M. Gill; 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210614.html Powered by Firstory Hosting

月全食 ê 月華 https://apod.tw/daily/20210609/ 這粒月娘看起來足奇怪欸！這暗是十五暝，毋閣今年這个時間，又閣叫做 花月。毋閣這毋是伊奇怪 ê 理由。月圓 逐個月 攏會拄著。這粒月娘是一粒 超級月娘，意思是講月圓時，是月球踅伊小可仔 長株圓 軌道 ê 時陣，行到上倚地球彼陣。較奇怪 ê 是，這粒超級月娘有淡薄仔較大，嘛比平常時十五暝 ê 月娘較光，所以伊才會叫做超級花月。月娘這馬拄仔好拄著 月全食。食月看起來 干焦較奇怪、較暗、無平光，而且定定是紅色 ê，有當時仔會叫做血紅色。所以，這粒月娘嘛叫做超級花血月。這粒月娘頭前有薄雲。這寡雲 tī 月娘邊仔產生一个 微微 ê 月華，予伊看起來毋若變較奇怪，閣 變彩色 ê。這粒月娘是感光足久 ê 影像，所以才會 tī 正爿下跤，看著背景遠方 ê 銀河系 心臟。這粒月娘、月影、銀河、kah 這个色光是頂個月 tī 澳洲 New South Wales 省 Cassilis 翕 ê 孤張影像。（事後有 kā 兩張較淺 ê 影像疊做伙，才看會著較清楚 ê 銀河。） ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Helmut Eder 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210609.html Powered by Firstory Hosting

HD 163296：恆星形成過程產生 ê 噴流 https://apod.tw/daily/20210622/ 恆星形成 ê 時陣是按怎產生噴流 ê？無人有答案。雖然講少年恆星系統 HD 163296 最近 ê 影像敢若有揣著一寡希望。影像 ê 中心恆星這馬當 leh 形成，毋閣伊已經有 踅伊 leh 行 ê 盤面 kah 噴出 ê 噴流 矣。這个盤面是用 電波 波段看 ê，是用 tī 智利 ê Atacama 大型次毫米波陣列 (ALMA) 望遠鏡翕--ê。盤面 ê 溝仔 是 足少年 ê 行星 之間因為重力作用產生 ê。這个噴流是用 可見光 波段看 ê，嘛是用 tī 智利 ê 超大望遠鏡 (VLT) 翕--ê。伊 ùi 盤面中心噴出 ê 氣體速度有夠緊 ê，主要 ê 成份是 水素。這个系統是地球到太陽距離 (AU) ê 幾若百倍。這寡新 ê 觀測細節會當用來 解說 支持 ê 理論是講，噴流 上無有一部份是 ùi 轉踅 ê 盤面中心 ê 磁場 產生 kah 塑形 ê。未來 tùi HD 163296 抑是 其他類似 ê 恆星形成系統 ê 觀測，會當幫贊咱了解 in ê 詳細狀況。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Visible: VLT/MUSE (ESO); Radio: ALMA (ESO/NAOJ/NRAO) 音樂：PiSCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210622.html Powered by Firstory Hosting

德州天頂 ê 超級胞雷暴 https://apod.tw/daily/20210613/ 彼敢是雲？抑是宇宙人 ê 太空船？這是一个異常、有當時仔閣真危險 ê 雷暴雲，to̍h 叫做 超級胞。超級胞 會產生有破壞性 ê 捲螺仔風、霜仔角、爆降 氣流、抑是 西北雨。毋閣，有當時仔 in 干焦看起來較壯觀爾爾。一个超級胞內底藏一个 中型氣旋。伊是一个 peh-升空氣柱，邊仔去予下降氣體箍牢 leh。超級胞 ê 雲會發生 tī 地球真濟所在，尤其 tī 美國 ê 捲螺仔道 特別濟。遮 是 2013 年 四个 超級胞 ê 縮時攝影。In to̍h tī 德州 Booker 市 ê 天頂 leh 捲踅 kah 行徙。影片有翕著 風暴中心 附近拄仔才形成 ê 新雲，tī 塗跤 leh 捲踅 ê 沙塗，tī 雲頂 leh 爍 ê 爍爁。In 攏絞絞做伙，成做一个壯觀 ê、敢若雕塑品仝款 ê 複合體 leh 捲踅。幾若點鐘了後，to̍h 親像影片上尾按呢，風暴欲煞 ê 時陣，西北 雨 to̍h 開始落矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Mike Olbinski 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210613.html Powered by Firstory Hosting

水上日食 https://apod.tw/daily/20210612/ 「食」ê 出現是成對 ê。一年會出現兩改，發生 tī 食季，一季 差不多 34 工，彼當陣太陽、月球、kah 地球差不多排仝排。月娘初一十五 ê 月相 差兩禮拜，拄仔好會產生月食 kah 日食。偏食通常會 tī 每一个食季出現。毋閣有當時仔 tī 仝一个食季，月娘初一十五行到 giōng 欲排仝一條線，這个時陣 to̍h 會產生成對 ê 日全食 kah 月全食（抑是一个全食 kah 一个環食）。這改 ê 食季，tī 5 月 26 十五暝彼工 ê 月全食 發生了後，紲落來 ê 初一，確實 tī 地球北爿 ê 烏影軌跡 產生一个金環日食。這張相片 to̍h 是這改 ê 日食，是 6 月 10 號 tī 美國東北爿 Connecticut 州 Stratford ê 釣魚碼頭翕 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Elliot Severn 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210612.html Powered by Firstory Hosting

Tī Stonehenge 天頂 ê 日出夏至 https://apod.tw/daily/20210620/ 今仔日太陽行到地球上北爿 ê 天頂。這个點 to̍h 叫做「至點」。Tī 真濟文化內底，這工開始換季。地球 北半球是 ùi 春天變做熱天，地球 南半球 是 ùi 秋天變做寒天。閣較正確來講，地球一寡所在 ê 至 是 今仔日，另外一寡所在 ê 至 是明仔載。這張相片是 2008 年 tī 英國 Stonehenge ê 夏至 彼工翕 ê。拄仔好翕著親像是 kah 一幅圖仝款 ê 日出畫面，內底閣有雲霧、樹仔、雲、四千五百年前 ê 石頭、kah 45 億歲 ê 大粒電火球。就算是 kā 地球自轉軸 幾若千年 ê 進動現象 算入去，太陽 按照天文路線 嘛是仝款會 peh-到 Stonehenge ê 天頂去。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Max Alexander, STFC, SPL 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210620.html Powered by Firstory Hosting

北方熱天 ê 微光天色 https://apod.tw/daily/20210619/ Tī 北方愈倚夏至，暗時 to̍h 愈短，日時 to̍h 愈長。夜光抑是夜光雲會開始出現，這 tī 懸緯度熱天 ê 時，定定會看著。Tī 六月 14 這工，這寡 浮 tī 地球表面 80 公里懸，giōng 欲到太空 ê 冰雲，當 leh 反射太陽光。遮是加拿大 Manitoba 省 ê 森林北方，雖然講日頭是 tī 地平線下底，毋閣半暝 ê 微光天色，猶是會當用孤張感光翕著。前景 ê 多重感光是 leh 追蹤飛低低 ê 火金蛄 ê 閃光。In 是熱天暗暝 另外一个會隨無去 ê 光芒。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Justin Anderson 音樂：PiSCO - 鼎鼎 聲優：Tsai-Wen Lin 翻譯：An-Li Tsai (NCU) 原文：https://apod.nasa.gov/apod/ap210619.html Powered by Firstory Hosting

NGC 6888：月眉星雲 https://apod.tw/daily/20210617/ NGC 6888，又閣叫做 月眉星雲，ùi 中心明亮大質量恆星 歕出來 ê 恆星風，差不多有 25 光年闊。這張是天文攝影三人組 (Joe, Glenn, Russell) 合作發表 ê 清楚宇宙氣波影像。In 合作用望遠鏡收集超過 30 點鐘 ê 狹頻影像資料，是 kā 光 ê 影像資料 ùi 水素 kah 酸素 原子 分離出來 ê。酸素原子產生 ê 青藍色調，敢若是罩 tī 皺痕 kah 雲絲面頂仝款。Tī 星雲內底看會著 NGC 6888 中央 ê 恆星，是去予分類 tī Wolf-Rayet 星（WR 136）內底。這粒有足強 恆星風 ê 恆星，當 leh kā 伊 ê 氣體擲--出去。逐年噴--出來 ê 物質差不多 kah 1 萬 ê 太陽質量欲仝。星雲 ê 複合結構應該是強烈 ê 恆星風 kah 恆星早期噴--出來 ê 物質產生交互作用 ê 結果。這粒恆星用足驚人 ê 速度 kā 伊 ê 燃料燒--去，已經來到伊性命 上尾 ê 坎站矣。紲落去應該是會變做足壯觀 ê 超新星爆炸。NGC 6888 to̍h tī 有 足濟星雲 ê 天鵝座內底，離咱有 5000 光年遠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Joe Navara, Glenn Clouder, Russell Discombe 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210617.html Powered by Firstory Hosting

天蠍座 ê 強化影像 https://apod.tw/daily/20210616/ 若是 天蠍座 用目睭直接看 to̍h 遮爾媠，人類 to̍h 會 tùi 伊較有印象。天蠍座較有名 ê 部份是 tī 黃道 星座 彼幾粒較光 ê 恆星，毋閣 in 較少去予人注意著。為著欲提著這款壯觀 ê 影像，愛有一台較好 ê kha-mé-lah，一个 有夠暗 ê 天色，kah 一寡複雜 ê 影像處理。這張數位強化影像顯示足濟 予人讚嘆 ê 特色。影像正爿 ê 對角線是咱 銀河系 盤面 ê 一部份。遐看會著有足光恆星 ê 大片雲，kah 有烏暗複雜 塗粉 ê 搝長雲絲。影像倒爿坦徛 peh-升 ê 是塗粉烏帶，to̍h 叫做 烏溪。Tī 倒爿幾若个 較光 ê 恆星 是 天蠍座一部份 ê 頭殼 kah 跤爪，嘛包括彼粒較光 ê 恆星心宿二。經過 17 點鐘久 ê 感光了後，to̍h 變做目睭看會著 ê 足濟紅色 發射星雲，藍色 反射星雲，kah 烏暗雲絲矣。年中 ê 時陣，天蠍座 會 tī 南天日落了後出現，伊足好揣 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Stefan Lenz 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210616.html Powered by Firstory Hosting

祝融號：火星面頂 ê 新探測車 https://apod.tw/daily/20210615/ 火星這馬有新 ê 探測車矣。Tī 五月中，中國 ê 天文一號 任務 kā 祝融號探測車 送到 紅色行星。Tī 中國，火星又閣叫做火行星，祝融號探測車 ê 名 tī 中國神話 內底是火神 ê 意思。祝融號降落 tī 北爿 ê 烏托邦平原，是目前太陽系內底已經知影上大 ê 隕石盆地。根據回報，伊嘛是一个有 較濟地下冰 ê 地區。Kah 其他足濟 科學儀器 比起來，祝融號紮 ê 迵地雷達，會當探測埋 tī 地下 100 公尺深 ê 冰。相片內底是 kah 車平大台 ê 祝融號，to̍h chhāi tī 伊 ê 降落基地邊仔。這張相片 是用裝 tī 探測車面頂 ê 遙控 kha-mé-lah 速翕 ê。祝融號 計畫 ê 90 工任務，欲研究 ê 內容包括火星 烏托邦平原 ê 地質、塗肉、kah 大氣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：China National Space Administration 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210615.html Powered by Firstory Hosting

飛過日食 https://apod.tw/daily/20210611/ Tī 6 月 10 號初一彼工，月球 ùi 太陽面頭前行過。這工拄仔好是月球 經過遠地點 ê 兩工後，to̍h 是伊行到長株圓軌道上遠彼陣。這工 ê 月球看起來有較細，才來產生這个金環日食。這个金環日食雖然出現 ê 時間真短，毋閣足壯觀 ê。你會當看著明亮 ê 太陽盤變做一个火環。這是 ùi 迒過地球北方 ê 狹細烏影帶內底看著 ê 景色。Tī 美國東岸透早 ê 天頂，會當看著 華麗 ê 日偏食。日頭 kah 月娘同齊 peh--起來。這張數位組合相片是 tī 食甚左右翕 ê 連紲影像，是 ùi 麻州 Boston 南爿 ê Quincy 海岸翕--ê。這个意外翕著 ê 連紲影像是日出彼陣，有一隻鳥仔飛過有月球剪影 ê 太陽產生 ê 波動路線。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Zev Hoover, Christian Lockwood, and Zoe Chakoian 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210611.html Powered by Firstory Hosting

圓形 ê 日暈 https://apod.tw/daily/20210610/ 你敢有想欲看著 kā 日頭箍牢 ê 環？Tī 全世界 ê 日時欲看著這个景色，攏是 真簡單 ê 代誌。這是薄懸卷雲內底 無仝方向排列 ê 冰晶 產生 ê 22 度闊 ê 圓形日暈，是比虹較捷看著。這張影像是 5 月 29 tī 意大利 羅馬 附近，用智慧型手機仔 翕 ê。你若是較細膩 kā 日頭閘 leh，差不多用一个指頭仔尾，按呢你 to̍h 會當看著 平常時看會著 ê 日暈環。這个日暈 ê 特徵角度，差不多愛 kā 你 ê 手骨伸長，指頭仔拍開，ùi 大頭拇 kah 尾指 ê 角度欲仝。若是欲看 火環日食，是有較困難。今仔日（6月10號）拄仔好會當看著這个特殊 ê 環形日食，嘛叫做 火環。你若是徛 tī 月球產生 ê 狹細烏影帶內底，to̍h 有法度看著。這个烏影帶迒過加拿大、格陵蘭、北極、kah 露西亞東爿。毋閣日偏食會當 tī 較闊 ê 範圍 看著，包括亞洲北爿、歐洲、kah 美國 ê 一部份。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Vincenzo Mirabella 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210610.html Powered by Firstory Hosting

Ùi Juno 太空船 看著 ê 木星雲 ê 面 https://apod.tw/daily/20210608/ 你 tī 木星雲敢有看著啥物？Ùi 上大範圍來 kā 看，木星 面頂有 較光 ê 雲區 kah 咖啡紅 ê 雲帶 交織，踅木星 leh 行。Peh-升區氣體 大部份攏是水素 kah 氦 組成 ê，通常會綴高壓區 轉踅。顛倒是，下降帶氣體通常踅低壓區轉踅，to̍h 親像是 tī 地球面頂 ê 捲螺仔風 kah 風颱。雲帶風暴會形成大型長時間 ê 白卵形 kah 搝長 ê 紅斑。NASA ê 機器人 太空船 Juno tī 2017 年 ê 近木軌道六，to̍h 是 tī 伊連紲兩個月踅木星 leh 行 ê 時陣，第六擺飛過 巨行星彼陣，翕著大部份木星雲 ê 特徵。毋閣絕對毋是這寡雲予你 tùi 這張圖 感覺趣味，是 in ê 排列 較趣味。是有一个面 tī 遮，偏名 to̍h 號做 Jovey McJupiterFace，木星面。這个面連紲幾若禮拜攏 tī--lih，一直到邊仔 ê 風暴雲踅走為止。Juno 這馬已經完成 33 擺 ê 木星 軌道運行矣。昨昏才 飛倚到 木衛 Ganymede 附近，伊是咱太陽系上 大粒 ê 衛星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：NASA/JPL-Caltech/SwRI/MSSS/Jason Major 音樂：PiSCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210608.html Powered by Firstory Hosting

仙后座內底一个足光 ê 新星 https://apod.tw/daily/20210607/ 仙后座內底彼粒新 ê 光點是啥物？是新星啦！雖然講 新星 定定出現 tī 宇宙內底，毋閣這粒叫做 Cas 2021 抑是 V1405 Cas ê 新星，頂個月 tī 地球 ê 天頂變足足足光 ê，光到 直接用目睭 to̍h 看有。新星 Cas 2021 上早是 tī 三月中變光 ê，閣較予人想袂到 ê 是，伊 tī 五月中連紲一禮拜，又閣 變閣較光矣。這粒新星隨閣變暗去，轉去到五月初 ê 光度。毋閣這馬又閣小可仔變較光矣，而且用雙筒望遠鏡 to̍h 看會著。箭頭比 ê 彼搭，to̍h 是這粒新星出現 ê 所在。伊 to̍h tī 仙后座 ê 方向，離 氣波星雲 袂傷遠。新星是 ùi 白矮星演化來 ê。白矮星是 雙星系統 內底 ê 其中一粒，伊 ùi 伊 ê 星伴 吸積物質，落尾產生 熱核爆炸，ùi 白矮星 表面 噴出來。毋閣這个爆發 ê 詳細狀況，咱這馬猶毋是真清楚。新星 ê 產生袂毀滅本底 ê 恆星，而且 有一寡仔會閣再爆發。這張影像 是 tī 美國 Michigan 州 Detroit 市 翕--ê，是 kā 14 點鐘久 ê 影像疊做伙 ê。專業天文學家 kah 業餘天文學家會繼續監看 新星 Cas 2021，嘛會 用假說來解說 造成這个現象 ê 詳細理由。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Chuck Ayoub 音樂：PiSCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210607.html Powered by Firstory Hosting

Tī 火星閃爍 ê 雲 https://apod.tw/daily/20210605/ 這是 ùi 火星好奇號探測車 ê Mast kha-mé-lah 翕 ê 相片。Chhāi tī 前景 ê 是 已經風化--去、閣有一重一重 ê Mercou 山。這張影像是 kā 21 張獨立影像鬥做一張 ê，有記錄著 三月 19 tī 火星 ê 日頭落山了後 ê 景色。彼工嘛是 好奇號探索這粒紅色行星 第 2063 工 ê 火星日。Tī 火星 ê 暗頭仔 kah 暝尾，高海拔 ê 雲 猶 tī 面頂 leh 爍-leh 爍-leh。這是反射 已經落-lǒe 當地地平線下跤 ê 太陽光，to̍h 親像是地球 ê 夜光雲 仝款。雖然水冰雲是浮 tī 火星薄薄 ê 大氣層面頂，毋閣這寡 煙雲嘛是 chhāi tī 極端海拔 ê 所在，所以 in ê 成份嘛有可能是 ùi 堅凍 ê 二酸化炭素 kah 乾冰冰晶組成 ê。好奇號 ê Mast kha-mé-lah 嘛翕著多彩 ê 真珠母 雲，煞 替火星 ê 天頂 增加袂少色彩。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：NASA, JPL-Caltech, MSSS 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210605.html Powered by Firstory Hosting

血色 ê 魔月 https://apod.tw/daily/20210604/ Tī 五月 26，這个孤張 ê 感光，翕著 出現 tī 地球烏影下底 ê 花月。透早拍殕光 ê 天色，嘛開始沖 tùi 西爿 ê 天頂去。月全食欲煞 ê 時陣已經行到地平線附近矣。食月盤 to̍h kah tī 加州中心 ê 尖山石陣國家公園 光遛遛 ê 橡樹 相對面。地球烏影並毋是全烏 ê。去予大氣層散射 ê 太陽光淺淺仔罩過來。地球本影予全食 ê 月娘 看起來變較紅，嘛產生一个戲劇性 ê 流行偏名，to̍h 叫做血月。雖然是按呢，這个剪影看起來 to̍h 親像是一个粗-pè-pè ê 可怕面容，煞予 月全食 ê 景色變做閣較恐怖。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Chirag Upreti 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210604.html Powered by Firstory Hosting

半人馬座 Omega https://apod.tw/daily/20210603/ 球形星團 半人馬座 Omega 嘛叫做 NGC 5149，離咱有 15,000 光年遠。這个星團內底差不多有 1 千萬粒比太陽閣較老 ê 恆星，to̍h 櫼 tī 直徑 150 光年闊 ê 範圍內底。Tī 咱銀河系 ê 銀暈內底，有 200 球左右 ê 球形星團 leh 泅。這个是內底上大上光彼球。雖然講大部份 ê 星團內底 ê 恆星年歲 kah 組成成份攏仝款，毋閣這个神祕 ê 半人馬座 Omega 煞展示出 tī 星團內底，嘛是會使有 無仝 ê 恆星種類、無仝年歲 ê 分佈、kah 無仝 ê 化學豐度。實際上，半人馬座 Omega 可能是 一个較細粒 ê 星系 kah 銀河合併了後 ê 殘核。Tī 這張 清楚 ê 彩色 望遠鏡景色 內底，半人馬座 Omega ê 紅巨星（黃色色調）實在是真好揣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Ignacio Diaz Bobillo 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210603.html Powered by Firstory Hosting

有恆星、氣體、kah 磁性 ê 銀河中心 https://apod.tw/daily/20210602/ 咱 ê 銀河中心是發生啥物代誌？為著欲揣出這个答案，一个新 ê 用 電波 kah X-光翕 ê 詳細全景組合圖，會當 探索 銀河盤 面頂 kah 下跤。這張 Chandra 踅地衛星天文台 翕 ê X-光 影像，有柑仔色（高溫），青色 (較高溫)，kah 茄仔色 (上高溫)。閣 kah MeerKAT 陣列 翕 ê 殕色 ê 高解析度 電波 影像疊做伙。銀河內底 ê 交互作用有足濟種，嘛真複雜。銀河 猛獸，親像是 脹大 ê 超新星殘骸、新恆星 ê 高溫恆星風、異常強烈 ê 相碰磁場、kah 銀河中心 ê 超大質量烏洞，攏 tī 宇宙內底 1000 光年 闊 ê 範圍相戰。較薄 較光 ê 光巡 是磁場相碰區內底 扭曲 kah 新接做伙 ê 磁場。這會產生銀河內部 ê 太空氣候變化，to̍h kah 咱太陽產生 ê 能量形態欲仝。繼續做觀測 kah 研究，毋若會當予咱 閣較了解 咱銀河 ê 歷史 kah 演化，嘛會當予咱了解其他 ê 星系。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：X-ray: NASA/CXC/UMass/Q.D. Wang; Radio: NRF/SARAO/MeerKAT 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210602.html Powered by Firstory Hosting

行過獵戶座頭前 ê 衛星 https://apod.tw/daily/20210601/ 這寡迵過獵戶座 ê 光巡是啥物？In 是一堆踅地球運行 ê 衛星反射太陽光產生 ê。用目睭看是一條 浮 tī 天頂 ê 連紲光點。這寡愈來愈濟 ê 通訊衛星，包括 SpaceX 星鏈 衛星，造成真濟天文學家 ê 困擾。正面來講，星鏈 kah sio-siâng ê 衛星星群 會使予日頭落山了後 ê 天頂較活潑，予衛星 ê 全球通訊較緊，嘛會使 tùi 目前通訊服務較少 ê 庄跤所在提供 數位服務。負面來講，這寡 低軌道踅地衛星 予 一寡深空天文顯影計畫變較歹處理。尤其觀測計畫是需要 tī 日頭落山了後到暝尾進前提觀測影像 ê。未來計畫欲 tī 較懸軌道進行觀測 ê 衛星陣列，可能 會影響著 tī 暗時愛一直觀測深空宇宙 ê 大型地面望遠鏡。這寡迵過獵戶座 ê 光巡毋是 ùi SpaceX 星鏈來 ê，是 ùi 踅閣較懸 ê 地球同步軌道 衛星來 ê。這張相片 是 tī 2019 年 12 月翕 ê，是 kā 65 張 感光 3 分鐘 ê 數位相片疊做伙 ê。有一寡影像是針對背景 ê 獵戶座星雲 感光，其他 ê 主要是 leh 翕行過 ê 衛星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Amir H. Abolfath 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210601.html Powered by Firstory Hosting

Mimas：有大隕石坑 ê 細粒衛星 https://apod.tw/daily/20210531/ 毋管是 siáng kah Mimas 相碰，攏會 kā 伊挵甲 giōng 欲碎--去。這是 土星 一粒上細粒 ê 球形衛星面頂，其中一擺 上大相碰產生 ê 隕石坑。分析了後發現，若是閣較強一點仔 ê 相碰， to̍h 會 kā Mimas 規粒挵碎。這个大隕石坑是 tī 1789 年 tī Mimas 發現 ê，叫做 Herschel，是用 William Herschel 爵士 ê 名號--ê。這粒有 130 公里闊 ê 隕石坑 to̍h tī 遮。低質量 ê Mimas 產生 ê 表面重力，拄仔好強到有法度結做一粒 球形天體，嘛拄仔好弱到有法度產生這款大型 ê 表面結構。Mimas 大部份 ê 成份是水冰 kah 一寡岩石。所以講伊是一粒大粒 ê 垃圾雪球，實在是真鬥搭。這張影像是 Casiini 機器人太空船 tī 2010 年 踅土星 leh 行 ê 時陣，飛過 Mimas 上近彼陣翕 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：NASA, JPL-Caltech, Space Science Institute, Cassini 音樂：PiSCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210531.html Powered by Firstory Hosting

冥王星 ê 地景 https://apod.tw/daily/20210115/ 踮這个足細、足遠 ê 世界，這个有光有影、有雄偉 ê 山脈佮冰原 ê 地景，to̍h 一直湠到地平線上尾彼爿。這張相片是佇 2015 年 7 月 14，新視野號太空船上倚近冥王星 ê 15 分鐘了後，越頭看冥王星 ê 時陣，úi 1 萬 8 千公里遠 ê 所在翕 ê。這个變化萬千、低角度、欲倚晨昏時陣 ê 景緻，看會著倒爿頭前這个 khâm-khâm-khia̍t-khia̍t ê Norgay 山。嘛看會著地平線彼爿 ê Hillary 山。這兩 ê 山去予正手爿彼个平平平 ê Sputnik 平原 分做兩爿。佇相片 ê 背景微微仔發光 ê 是 冥王星薄縭絲 ê 大氣層。遮有一个熟似 ê 奇怪現象，有氮冰佮乾冰 ê 冰地，閣有生到 3500 公尺（1 萬 1 千英尺）懸 ê 冰山。遮 ê 山佮地球頂懸彼寡 雄偉 ê 山脈 giōng 欲平懸。這張冥王星 ê 地景有 380 公里（230 英里）遐爾闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：NASA, Johns Hopkins Univ./APL, Southwest Research Institute 音樂：PiSCO - 鼎鼎 聲優：Tsai-Wen Lin 翻譯：An-Li Tsai (NCU) 原文：https://apod.nasa.gov/apod/ap210115.html Powered by Firstory Hosting

巴西古早時代 ê 星座 https://apod.tw/daily/20210112/ 咱 ê 夜空有真濟故事。每一个歷史文化，攏會 kā 一寡 in 上有歷史 ê 傳說，寄託佇 天星 ê 身上。每一代看著遮 ê 星座，聽著星座 ê 故事，to̍h kā 遮 ê 故事傳落來。佇這張影像內底，是咱 較無熟似 ê 老人星座，這是主要蹛佇 巴西 ê 南美洲 原住民 Tupi 人 真熟似 ê 星座。老人座若是用咱 ê 星座來看，伊 ê 頭殼是咱 ê 畢宿星團，伊 ê 跤是 獵戶座 ê 皮帶。佇 Tupi 人 ê 傳說 內底，伊 ê 另外一跤去予伊彼咧無歡喜 ê 某斬斷去矣。所以伊另外一跤才會斷佇 ê 柑仔色 ê 參宿四 彼位。上倒爿 ê 昴宿星團，會使 kā 當做是伊頭殼頂 ê羽飾。佇 這張影像，這个跛跤 ê 老人拄仔好佮頭前這个跛另外一跤 ê 人做伴。夜空 ê 傳說 實在是真重要，伊毋但記錄 文化遺產，嘛記錄 人類 ê 智慧佮想像力。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Rodrigo Guerra 音樂：PiSCO - 鼎鼎 聲優：Tsai-Wen Lin 翻譯：An-Li Tsai (NCU) 原文：https://apod.nasa.gov/apod/ap210112.html Powered by Firstory Hosting

月球塗粉 kah 電火布 https://apod.tw/daily/20210529/ 是按怎月球面頂遮爾厚塗粉？Tī 地球， 石頭經過風 kah 水 ê 風化作用了後，會產生沙塗。Tī 月球久長 ê 歷史內底一直去予微隕石砲擊，kā 本來 ê 岩石表面挵甲產生一重 月球粉塗抑是表岩屑仔。毋閣 tùi 阿波羅太空人 kah in ê 設備來講，坱埃四界軁，閣細粒，又閣著一直來，實在是有夠麻煩。1972 年 12 月，tī 月球表面 ê 阿波羅 17 號 太空人 Harrison Schmitt kah Eugene Cernan 需要拍拚 修理探測車 ê 其中一个塗帕仔，才有法度 kā 車輪噴出來坱蓬蓬 ê 塗粉 擋 leh，袂去影響著 in kah 狗齒仔。這張相片看會著去予塗粉崁牢 ê 探測車車輪 kah 塗帕仔。太空人用備用地圖、鋏仔、kah 殕色 ê 電火布 kā 塗帕仔補起來，實在是真巧 ê 做法。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Apollo 17, NASA 音樂：PiSCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210529.html Powered by Firstory Hosting

月食 kah 銀河 https://apod.tw/daily/20210527/ 昨昏是 五月份月圓時，月球趨過地球烏影 ê 日子，又閣是近地點。煞予 tī 太平洋附近 國家 ê 觀星者 tī 這暝歡喜甲。這張 縮時攝影 ê 月全食連紲影像，是 tī 北美洲西爿翕 ê。月娘 to̍h ùi 坎坎坷坷 ê Sierra Nevada 山脈沉落去。這个向西沉落地平線 ê 月娘，是用兩款無仝 ê 感光方式翕 ê。一款是針對這个 去予食去 ê 紅色月娘 感光 ê。另外一款是針對烏暗夜空 kah 銀河這條湠--開 ê 恆星光帶感光 ê。了後才 kā 兩款感光方式 ê 相片疊做一張。逐張相片攏是 5 分鐘翕一張。是綴著月偏食月相 ê 變化，用固定好 ê kha-mé-lah 翕 ê。這張相片 ê 前景是加州 Owen 山谷 ê 電波天文台，伊 ê 電波望遠鏡盤仔指向天頂。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：John Kraus 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210527.html Powered by Firstory Hosting

龍骨座 AG 星 ê 爆發雲 https://apod.tw/daily/20210526/ 是啥物產生這个特別 ê 雲？Tī 這張 2021 年 ê 哈伯影像 中央是 龍骨座 AG 星，伊是一粒超巨星，to̍h tī 南天 ê 龍骨座內底，離咱有 2 萬光年遠。這粒恆星發射 ê 能量是太陽 ê 一百萬倍，予 龍骨座 AG 星 成做咱 銀河系 內底上光 ê 恆星之一。龍骨座 AG 星 kah 伊 ê 厝邊星 龍骨座 Eta 星，攏是真罕得看著 ê 強藍光變星 (LBV) 這類 ê 恆星。這款星足稀罕 ê，而且 in 有 足猛 ê 爆發。Tī 龍骨座 AG 星 邊仔 ê 星雲，應該是這款 爆發 發生上無一擺以上 ê 殘骸。這个星雲有 5 光年 闊，估計差不多有 10 ê 太陽質量 ê 氣體，而且上無嘛有 1 萬歲矣。這个哈伯影像 是紀念哈伯太空望遠鏡 發射 31 週年。這是頭一擺翕著完整 ê 星雲，提供逐家一个新 ê 角度來看伊 ê 結構 kah 塗粉量。這寡 LBV 代表 ê 是一寡 超巨星 較晏較短 ê 性命階段。毋閣欲解說 in 是按怎恬袂落來，實在是無簡單。因為欲 解說 大質量恆星是按怎運作 ê，tùi 人類來講是一个真大 ê 挑戰。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：NASA, ESA, STScI; Processing: Judy Schmidt; Text: Anders Nyholm 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210526.html Powered by Firstory Hosting

月全食時陣 ê 月娘 https://apod.tw/daily/20210525/ 月全食 ê 時陣月娘看起來會是啥款？這个縮時攝影影片 是 kā 2018 年 1 月 31 彼工 5 點鐘久 ê 月食影像，用數位處理 ê 方式來保持 月球 ê 光度，閣 kā 伊固定 tī 影片中央。咱會先看會著 月圓，因為 月食 干焦會發生 tī 月圓 ê 時陣。背景有足濟恆星行過，因為 月食 ê 時陣，月球踅 地球 leh 行。煞落來咱會看著地球 圓形 ê 烏影 行過月球。烏影邊界 ê 淺藍色色調是 kah 地球天空是按怎是藍色 ê 欲仝。烏影 中心 ê 深紅色色調是 kah 日頭袂落海 ê 時陣是按怎看起來是紅色 ê 欲仝。明仔載，蹛 tī 南亞、太平洋、美國西南爿 ê 人，應該會當看著 血色 ê 超級月娘 月全食。Tī 遮講--ê 血色，是 leh 形容 月全食 ê 月娘 有較紅。超級月娘 是 leh 形容伊 ê 角大細有較大。這是因為伊 tī 踅地球 小可仔長株圓軌道 leh 行 ê 時陣，行到離地球較近 ê 所在。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Wang Letian & Zhang Jiajie 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210525.html Powered by Firstory Hosting

M13：Tī 武仙座 ê 大球形星團 https://apod.tw/daily/20210520/ Tī 1716 年，英國天文學家 Edmond Halley 記錄講，「雖然這是一个真細 ê 光斑 ，毋閣若是夜空恬靜、月娘 tī--lih ê 時陣，你用目睭 to̍h 看會著。」當然這馬逐家攏知影 M13 是武仙座內底 ê 大球形星團，是一个 tī 北天足光 ê 球形星團。像這款清楚 ê 望遠鏡景色，to̍h 看會著 tī 這个壯觀 ê 星團內底，有 幾若十萬粒恆星。Tī 離咱 2 萬 5 千光年遠 ê 所在，這个星團 ê 恆星 to̍h 櫼 tī 一个 150 光年闊 ê 區域內底。若是 倚近 到這个星團 ê 核心，你 to̍h 會當看著 100 粒恆星櫼 tī 一个干焦 3 光年闊 ê 立方體內底。想看覓咧！離咱太陽上近 ê 恆星 to̍h 愛 4 光年遠矣！這張影像內底，明顯較光 ê 恆星範圍，to̍h 是星團 ê 核心。Tī 這張中等闊 ê 視場內底，有遠方 ê 背景星系，包括著正爿下跤 ê NGC 6207。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Martin Dufour 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210520.html Powered by Firstory Hosting

Tī Uluru 天頂 ê 爍爁 kah 獵戶座 https://apod.tw/daily/20210511/ Tī Uluru 後壁是發生啥物代誌咧？Uluru 是 聯合國世界遺址，是 tī 澳洲 中部足特別 ê 山。伊有 350 公尺懸，是 tī 平地雄雄生出來 ê。Uluru ê 成份是 沙岩。伊是 tī 過去 3 億年 ê 時間內底，較軟 ê 岩石去予侵蝕 ê 時陣 沓沓仔形成 ê。這張影像 ê 背景是 tī 5 月中翕 ê，看會著一陣雷公雨。Tī Uluru kah 雷公雨 後斗閣較遠彼搭，是 天星滿滿是 ê 夜空，閣看會著明顯 ê 獵戶座。Uluru 區 自 22,000 年前 to̍h 有人蹛矣！遐 ê 原住民 長久以來攏認為，這个 現代星座獵戶座 ê 恆星 若是出現 tī 夜空，彼个有 爍爁風暴 ê 熱天 to̍h 隨欲來矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Park Liu 音樂：PiSCO - 鼎鼎 聲優：Tsai-Wen Lin 翻譯：An-Li Tsai (NCU) 原文：https://apod.nasa.gov/apod/ap210511.html Powered by Firstory Hosting

阿波羅 17 號：月眉形 ê 地球 https://apod.tw/daily/20210429/ Tī 這張予人讚嘆 ê 相片內底，看會著 咱美麗 ê 地球 tī 烏墨墨 ê 太空內底，反射太陽光，成做這个月眉形 ê 形影。Tī 這个咱無熟似 ê 景色內底，地球真細粒，to̍h 親像是 望遠鏡影像 內底，一粒遠方 ê 行星。這規个地平線攏 tī 咱 ê 視野內底。欲看較倚近地球 ê 角度，to̍h 愛 ùi 低地球軌道來看才有法度。這干焦 tī 國際太空站 面頂 ê 船員 才會當享受這个景色。太空站每 90 分鐘踅地球一輾。雲、海洋、大陸 ê 景色，to̍h ùi 下底行過。一部份行星 ê 弓形外沿，to̍h tī 遠方。毋閣這張數位復原影像 展示 ê 景色，到今干焦有 24 ê 人看過。In 是 阿波羅太空人 tī 1968 到 1972 年之間，去月球旅行閣轉來 ê 時陣看著 ê。原始相片 AS17-152-23420 是阿波羅 17 號欲轉來 ê 時陣，由機組人員 tī 1972 年 12 月 17 彼工翕 ê。目前來講，這是 人類用手 tùi 這个角度 ê 地球翕 ê 上尾一張相片。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Apollo 17, NASA; Restoration - Toby Ord 音樂：PiSCO - 鼎鼎 聲優：Tsai-Wen Lin 翻譯：An-Li Tsai (NCU) 原文：https://apod.nasa.gov/apod/ap210429.html Powered by Firstory Hosting