NASA 逐工一幅天文圖 APOD Taigi

小行星敢會危險？有一寡會。毋閣毋管是佗一年，大部份危險 ê 小行星挵著地球 ê 機會是足少 ê。過去因為有發生一寡 kah 小行星挵著地球有關 ê 生物大滅絕事件，這馬人類已經 kā 這當做是一件真重要 ê 代誌：揣出 未來會影響 地球性命 ê 小行星，kā 編做目錄。這張相片是 1000 粒 潛在威脅 小行星 (PHAs) ê 軌道。這寡資料有記錄著 超過 140 公尺闊、離地球 750 萬公里近（差不多是地球到月球 ê 20 倍距離）、leh 滾踅 ê 巨型 岩石 kah 冰角。雖罔講 tī 紲落來 100 年猶袂有小行星 挵著地球，毋閣 毋是所有 PHAs 攏有揣著。而且 tī 過去 100 年，足濟軌道嘛變做足歹預測 ê。這款寸尺 ê 小行星若是 挵著地球，to̍h 會 引起足危險 ê chu-ná-mih。為著欲揣出救地球 ê 策略，NASA ê 雙小行星重新定向測驗 (DART) 太空船，按算欲 tī 今年發射。是講較細粒 ê 石頭 kah 冰角 逐工攏會挵著地球，毋閣 in 無啥物危險，有當時仔閣會產生 難忘 ê 火流星 kah 流星戲。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210829/ 影像：NASA, JPL-Caltech 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210829.html Powered by Firstory Hosting

恆星是按怎製造出來 ê？大部份是 tī 星系盤中心 ê 大型分子雲 內底形成 ê。這个過程 ê 開始、影響、kah 限制，是 ùi 前一代恆星 ê 恆星風、噴流、高能恆星光、kah 超新星爆炸 決定 ê。這支影片 展示這寡複雜交互作用 ê 現象。這是用 STARFORGE 電腦模擬兩萬倍 太陽 質量 ê 氣體雲 ê 演化結果。Tī 這支 縮時攝影 ê 視覺化影片 內底，較光 ê 所在表示較密 ê 氣體，色水代表氣體 ê 速度（茄仔色表示較慢，柑仔色表示較緊），光點代表新 製造 ê 恆星 ê 位置。影片 拄開始 ê 氣體雲有 50 光年 闊，了後才開始因為重力聚集起來。兩百萬年了後，頭一粒恆星形成。毋閣新製造 ê 大質量恆星有噴出 予人印象足深 ê 噴流。這个電腦模擬 tī 430 萬年 ê 時陣 凍 leh。伊開始 踅無仝 ê 角度，予咱會當看著伊 ê 3D 結構。恆星形成 到今猶有足濟咱毋知 ê 代誌，包括 噴流是毋是會影響紲落來製造 ê 恆星質量，嘛是咱想欲知影 ê 問題。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210623/ 影像：Michael Y. Grudić (Northwestern U.) et al., STARFORGE Collaboration 音樂：Prelude, Op. 28, No. 4 in E Minor (Frédéric Chopin) 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210623.html Powered by Firstory Hosting

揣著北斗星了後，繼續揣離 khat-á 較遠 ê 柄 彼爿，一直到拄著上光彼粒星為止。了後，kā 你 ê 望遠鏡 tùi 西南爿徙一屑屑仔，你 to̍h 會看著 這對予人讚嘆 ê 交互星系。伊 是第 51 个去予收 tī 彼个有名 ê Charles Messier 星表內底 ê。這可能是 上早期 ê 捲螺仔星雲。這个有完整捲螺仔結構 ê 大型星系，嘛予人編做 NGC 5194。伊 ê 捲螺仔手骨 kah 塗粉帶， ùi 伊 ê 星系伴（頂懸）NGC 5195 掃過。這對離咱有 3100 光年遠，嘛正式 tī 較細 ê 星座 獵犬座 ê 視角邊界內底。雖然講 M51 看起來較暗 koh 霧霧，毋閣 親像這款深空影像 會當展示顯目 ê 色光 kah 星系 ê 潮汐屑仔。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210902/ 影像：Josep Drudis 音樂：PiSCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210902.html Powered by Firstory Hosting

這張詳細 ê 望遠鏡影像，是月球南部彎彎曲曲 ê 高地。面頂是月球 ê 南部。這是 7 月 20 翕 ê。這張月景 ê 特色是，有少年 kah 老 ê 大隕石坑 Tycho kah Clavius。Tycho 才差不多 1 億歲爾爾，伊是中央附近直徑 85 公里闊、有較尖 ê 坑仔墘 ê 隕石坑。隕石坑中央 2 公里懸 ê 山頭，有一半去予太陽照予光，有一半 去予烏影閘去。這是衝擊事件造成 ê Tycho 隕石坑。伊噴--出來 ê 石屑仔，到今猶是會當予這个隕石坑 tī 十五暝彼陣，變甲遮爾 出眾。這是因為這个時陣會造成明顯 ê 輻射光巡系統，tī 月球向咱這爿，湠到規半爿。阿波羅 17 號 ê 降落地點，差不多離 Tycho 隕石坑 有 2000 公里遠。實際上，一寡 tī 遮收集 ê 標本，可能是 ùi Tycho 隕石坑來 ê。月球向咱這爿，有一个上老上大 ê 隕石坑 Clavius。伊 ê 直徑是 225 公里闊，to̍h tī Tycho ê 正南爿（面頂）。Clavius 隕石坑 家己 ê 輻射系統，是 ùi 伊本底 ê 衝擊事件產生 ê，毋閣足久以前 to̍h 已經變無去矣。這个較老 ê 隕石坑，伊 ui--去 ê 坑仔墘 kah 光滑 ê 山跤，已經予較細 ê 隕石坑崁--去。這寡較細 ê 隕石坑，是 Clavius 隕石坑形成了後 ê 衝擊事件才產生 ê。紅外線平流層天文台 tī 2020 年發表 ê 觀測結果表示，伊 tī Clavius 隕石坑揣著水。是講少年 ê Tycho 隕石坑 kah 老 ê Clavius 隕石坑，攏是科幻史詩「2001 太空漫遊」內底 ê 月球地點。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210805/ 影像：Eduardo Schaberger Poupeau 音樂：PiSCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210805.html Powered by Firstory Hosting

超大質量烏洞是按怎產生能量足強 ê 噴流？為著欲揣著這个答案，事件視界望遠鏡 (EHT) kā 厝邊 活跳星系，半人馬座 A，ê 中央區顯像出來。這規組一格一格 ê 主題插圖 攏是 半人馬座 A。Ùi 上大尺度（幾若个月球闊 ê 天區）到這馬會當看著 ê 上細尺度（月球面頂 一粒 goo-lú-huh 球大細 ê 天區）攏有。這張新 ê 影像面頂 ê 兩條噴流，實際上是 一條噴流 ê 兩爿。這个 新發現 ê 噴流邊界光度加強現象，並無解決 噴流是按怎產生 ê 謎題。毋閣有暗示講，這个粒子噴流是去予較強 ê 壓力 kā 箍牢 ê，可能 kah 磁場 有關。EHT 是 全球 ê 電波望遠鏡組合，ùi 美國 Hawaii 加州理工學院 ê 次毫米波天文台、智利 ê ALMA 天文台、到 法國 ê NOEMA 天文台，等等。EHT 會繼續觀測大質量恆星、厝邊 烏 洞、kah in ê 高能環境。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210804/ 影像：Radboud University; CSIRO/ATNF/I.Feain et al., R.Morganti et al., N.Junkes et al.; ESO/WFI; MPIfR/ESO/APEX/A. Weiss et al.; NASA/CXC/CfA/R. Kraft et al.; TANAMI/C. Mueller et al.; EHT/M. Janssen et al. 音樂：PiSCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210804.html Powered by Firstory Hosting

冥王星 ê 色彩是比咱看著 ê 閣較濟。伊是咱太陽系內底上有名 ê 矮行星。這張是 2015 年 7 月 新視野號機器人太空船 飛過冥王星 ê 時陣 翕 ê 彩色懸解析度影像資料。這是用數位合成來 加強色彩 ê 影像，會當 tī 這个古早世界看著異常少年 ê 表面。這張 強化色彩 ê 影像 毋若干焦 媠 爾爾，嘛有 科學用途。會當予無仝化學成份 ê 表面看起來無仝。比論講，這个 tī 正爿下跤淺色心形 ê Tombaugh 區 to̍h 按 無仝地質 分做兩區。上倒爿彼爿是 Sputnik 高原，看起來是異常光滑。到冥王星了後，新視野號太空船會繼續駛。伊 tī 2019 年 行過 Arrokoth 小行星 了後 to̍h 有 夠額 ê 速度完全走離 咱 ê 太陽 系。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210801/ 影像：NASA, Johns Hopkins Univ./APL, Southwest Research Inst. 音樂：PiSCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210801.html Powered by Firstory Hosting

地球 kah 月球真罕得出現 tī 仝一張相片內底。這个上壯觀 ê 景色是差不多 tī 30 年前，彼陣欲去木星 ê 加利略太空船 拄飛過咱 ê 行星系統。這是 加利略機器人 太空船 ùi 15 倍 地球到月球 距離遠 ê 所在，看 咱 ê 月球 趨過咱 ê 地球。這支影片 是 kā 52 張 加強色彩 ê 歷史影像 疊做一張 ê。雖罔然講咱 ê 月球 tī 地球 邊仔 看起來足細粒 ê，毋閣太陽系內底無其他行星 有 相對 遮爾 大粒 ê 衛星 。太陽 tī 正爿足遠 ê 所在，kā 地球 kah 月球 ê 半爿照予光，嘛看會著會自轉 ê 地球面頂有 白色 ê 雲、藍色 ê 海洋、kah 咖啡色 ê 大陸。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210905/ 影像提供：NASA, JPL, Galileo Project 影像處理 kah 版權：Gordan Ugarkovic 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210905.html Powered by Firstory Hosting

這毋是哈伯太空望遠鏡 最近翕 ê 遠方星系雲。這个發光 ê 氣體塗粉雲 tī 8 月 29 透早，予太空海岸 ê 觀星者目睭褫金金看甲。這張速翕 是透早 3:17 tī Florida 州 Titusville ê 太空景色公園翕 ê。這是 SpaceX 獵鷹 9 號火箭發射 3 分鐘了後翕 ê。伊當 leh 執行 CRS-23 任務，這个任務主要是欲提供國際太空站補給。伊有翕著浮 tī 太空 ê 光煙 kah 廢氣。這是 ùi tī 夜空 peh-升、脫離 ê 第一節 kah 第二節火箭噴--出來 ê。下跤 ê 光點是第二節火箭，伊繼續 leh 踅 低地球軌道。面頂 ê 光點是火箭第一節，這馬當 leh 推捒燃燒。第一節火箭推捒轉來，嘛第一擺降落 tī 上新 ê 自主無人船，煞-loài 才閣駛去大西洋。這是一擺短短 ê 重力降落行動。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210904/ 影像：Dennis Huff 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210904.html Powered by Firstory Hosting

這寡宇宙雲已經 tī 1300 光年遠 ê 所在開花，to̍h tī 會當產生足濟恆星 ê 仙王座 遐。NGC 7023 閣叫做尾蝶花星雲，毋若伊會予人想著 花 ê 星雲。這个 深空望遠鏡影像 展示 ê 尾蝶花星雲 ê 色光 kah 對稱性，to̍h 去予邊仔 ê 星際塗粉箍 tī 內底。Tī 尾蝶花星雲內底，厚塗粉 ê 星雲材料內底是一粒高溫少年 ê 恆星。這个較光 ê 反射星雲 ê 主要色光是藍色，是塗粉粒反射恆星光 ê 特性。反射星雲 ê 中央雲絲 發出 微微 ê 紅光。這是光致發光，是塗粉粒 kā 目睭看袂著恆星 ê 紫外光輻射，足有效率 kā 轉做 可見光 ê 紅光。紅外線 觀測 表示講，這个星雲有親像 PAHs 這款複雜 ê 碳分子。尾蝶花星雲 厚塗粉 ê 藍色花葉，差不多有 6 光年闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210903/ 影像：Satwant Kumar 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210903.html Powered by Firstory Hosting

這張清楚 ê 影像，是火星任務第 180 工火星日（8 月 22）用毅力號探測車 ê 避障 kha-mé-lah 翕外口 Jezero 隕石坑內底落甲規四界 ê 岩石。相片倒爿下跤彼个，是探測車會翻頭 ê 頭前輪，伊 ê 直徑是 52.5 公分。中央彼个是 外號叫做 Rochette ê 大岩石。毋閣，設計任務 ê 人，拄著 Rochette 是無欲閃。毅力號顛倒去予指示講，愛 kā 伊 2 公尺長 ê 機器手骨伸--出去，kā 岩石表面研研咧。看是毋是會當用探測車 ê 鑽仔，提著比鉛筆較厚 ê、品質穩定 ê 標本。毅力號收集 ê 標本，未來會有新 ê 火星任務 kā in 提--轉來。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210828/ 影像：NASA, JPL-Caltech 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210828.html Powered by Firstory Hosting

這幅圖 to̍h 親像是英國童話「To̍h 是按呢 ê 故事」內底一篇「象仔囝」故事 ê 銀河版插圖。象管星雲 to̍h tī 懸閣遠 ê 仙王座 遐，彎彎曲曲迵過發射星雲 kah 少年星團 複合體 IC 1396。倒爿 ê 宇宙象管超過 20 光年長，嘛叫做 vdB 142。這幅詳細 ê 望遠鏡特寫經過數位處理了後，已經 kā 看會著 ê 恆星 徙走矣。按呢 to̍h 會當看著去予風掃--出來 ê、足光 ê 山龍，kā 低溫 ê 星際 塗粉 kah 氣體 ê 閬空照--出來。這个烏暗、虯做伙 ê 雲 內底有做新恆星 ê 原始材料，嘛會當 kā 原恆星藏 tī 內底。這个較暗 ê IC 1396 星團複合體，差不多有 3000 光年遠。伊 tī 天頂是足大一區 ê，有 5 度遐爾闊。毋閣 這幅無恆星 ê 影像 干焦 1 度闊爾爾，這个角寸尺差不多是兩粒月娘遐爾闊。是講 tī 彎彎曲曲 ê 象管星雲倒爿下跤 ê 烏暗形體，有一寡人 kā 號做 宇宙車隊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210827/ 影像：Robert Eder 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210827.html Powered by Firstory Hosting

雲 若是 城堡，敢袂感覺真趣味？房間內底 ê 椅仔面頂 洗好 ê 衫 若是 超級英雄，敢袂感覺真趣味？火星 面頂 ê 岩石 台地 若是人面 ê 行星間紀念碑，敢袂感覺真趣味？雲 實際上是浮 tī 天頂 ê 水滴 kah 冰滴。毋閣洗好 ê 衫，是棉仔、羊毛、抑是塑膠材料做 ê 衫。有名 ê 火星岩石台地，若是 ùi 閣較清楚 ê 影像 來 kā 看較詳細 leh，to̍h 會知影用「火星 ê 人面」來 kā 號名，實在是真自然 ê 代誌。毋閣 真實世界敢 to̍h 會較無聊？無人知影是按怎 一寡雲會落雨。無人知影火星面底敢 捌發展性命。嘛無人知影是按怎房間內底 ê 椅仔面頂洗好 ê 衫 鼻起來敢若是 sà-suh。所以講，科學 探索 毋若會當解答謎團，閣會當發展新 ê 智識、解答閣較大 ê 謎團，kah 解說閣較深 ê 疑問。To̍h 親像 人類探索 咱 ê 宇宙仝款，應該會真趣味。雖然講發現新世界 ê 工課 才拄仔開始。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210704/ 影像：NASA, Viking 1 Orbiter 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210704.html Powered by Firstory Hosting

這个大行星盤毋是上出名 ê。踅恆星 PDS 70 ê 大行星形成盤 ê 影像遮爾清楚 koh 遮爾趣味。這幅圖予人討論上濟 ê，嘛毋是正爿彼粒 tī 大行星盤 內底 ê 行星。行星 PDS 70c 是一个新形成 ê 行星，伊 ê 寸尺 kah 質量，kah 木星 差不多。是 行星 PDS 70c 邊仔霧霧彼塊 引起注意。這塊霧霧 ê，以前猶是 厚塗粉 ê 行星盤。這馬已經形成衛星，而且是第一擺予人揣著。這張 影像 是 tī 智利 北部高海拔 Atacama 沙漠 ê 66 台 電波望遠鏡 Atacama 大型毫米波陣列 (ALMA) 翕 ê。根據 ALMA ê 資料，天文學家推算，系外行星形成衛星 ê 時，若是伊 ê 行星盤半徑 kah 地球軌道差不多，可能會當一工形成三粒 kah 月娘 大細差不多 ê 衛星。這 kah 咱 木星 ê 四大衛星 有成。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210824/ 影像：ALMA (ESO/NAOJ/NRAO); M. Benisty et al. 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210824.html Powered by Firstory Hosting

這是一个抑是三个星系？這張 哈伯影像 是大質量星系團 Abell 3827。伊 ê 正爿，看起來足無四常 ê，彎彎曲曲、閣有三个中心。有一个 較詳細 ê 分析 表示，這是仝一个背景星系 ê 三个影像，而且上無猶閣有四个影像才著。咱看著 ê 光，是背景一个藍光星系發--出來 ê。光 ùi 幾若條無仝 ê 光路 迵過星系團複雜 ê 重力到遮，to̍h 親像遠方 ê 光 ùi 幾若條無仝 ê 光路迵過紅酒杯仔 ê 頷頸 仝款。研究 像 Abell 3827 這款星系團 kah in ê 成員 星系是按怎 kā 遠方 ê 光拗彎去，會當予咱 知影 質量 kah 烏暗物質 ê 分佈狀況。Abell 3827 足遠 ê，伊 ê 紅移是 0.1。伊 ê 光是 13 億年前 發--出來 ê，比 恐龍 tī 地球賴賴趖彼陣閣較早。所以，星系團 ê 中心星系，經過一改 星系互食 了後，這馬 tī 星系團中央合併做 一个巨型星系。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210823/ 影像：ESA/Hubble & NASA, R. Massey 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210823.html Powered by Firstory Hosting

是按怎星系噴--出來 ê 噴流看起來敢若是幽靈？而且，是按怎 in 看起來敢若 leh 跳舞？這个 ùi 兩个主人 星系（中央頂懸 kah 倒爿下跤）中央 ê 超大質量烏洞 噴--出來 ê 虯毛虯毛 koh 蓬鬆蓬鬆 ê 噴流，以前毋捌看過。這是天文學家用 澳洲平方公里陣列探路者 (ASKAP) 電波望遠鏡 追蹤星系演化 ê 時陣，ùi 產生 ê 影像資料發現 ê。Tī 處理 宇宙巡天計畫 ê 演化影像 進前，干焦看著 無定型 ê 光斑。落尾，kah 發射出來 ê 相對能量 比較了後，發現講，發光 ê 搝長結構是踅磁場線 ê 電子流。Kah 電波資料 疊 tī 光學影像（暗能量巡天計畫）面頂了後，確定講這个 電子 流是 ùi 活跳星系 ê 中心 來 ê。一般來講，活跳星系核 (AGN) 應該是產生 直 ê 噴流。有一个主要 ê 假說是講，會產生這款異常優美 ê 外形，是 ùi 大尺度 星系間 ê 星際風 來 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210901/ 影像：Jayanne English & Ray Norris, EMU-ASKAP, DES 文稿：Jayanne English (U. Manitoba) 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210901.html Powered by Firstory Hosting

你看著 ê 月娘一般攏是暗殕色抑是暗 金色。毋閣這張用望遠鏡 tī 月圓時翕 ê 多彩 月景，是刁故意 kā 本來 to̍h 看會出 差別 ê 色彩 調甲差足濟 ê。這个色彩 ê 差別是欲用來 kah 月球表面 真正 ê 化學成份做比較。藍色色調是 鈦足濟 ê 所在，柑仔色 kah 茄仔色是鈦 kah 鐵 較少 ê 所在。咱足熟似 ê 寧靜之海 抑是 靜海，是正爿頂懸 ê 藍色區域。正爿下跤彼个 ùi 85 公里闊 ê 輻射形隕石坑 Tycho 伸出來 ê 線，to̍h 迒過柑仔色 ê 月球南部高地。這個月初 ê 月圓會使當做是 季節性 ê 藍月。因為這較特別，是北半球熱天（抑就是南半球寒天）ê 時，四改月圓 ê 第三改。這張是 272 張 ê 合成相片。你會當看著 月娘 一直是藍色 ê，毋閣袂藍甲 按呢。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210831/ 影像：Robert Fedez 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210831.html Powered by Firstory Hosting

一粒球落 tī 地球、木星、抑是天王星，是佗位會落較緊？這个動畫展示 tī 太陽系內底幾个有名 ê 天體 面頂，假設無 空氣阻力 ê 影響，若是有一粒球 ùi 表面 1 公里懸 ê 所在落-loài，會是按怎。引力 kah 天體 ê 質量有關。若是較大質量 ê 天體，引力 to̍h 較大。毋閣 引力 嘛 kah 天體距離有關。距離愈短，球 to̍h 落愈緊。Kā 質量 kah 距離 ê 影響合起來，可能會予你看著一个意外 ê 現象：天王星 ê 質量雖然是 地球 ê 14 倍以上，球落 tī 伊面頂，比落 tī 地球面頂較慢。會發生這款現象，是因為天王星 ê 密度足低 ê。低到伊 ê 雲離伊大部份 ê 質量較遠。雖然講 落-loài ê 球 會加速，毋閣你若是 tī 球頂，你袂感覺球 leh 加速。這是因為你 tī 自由落體 ê 狀況。上開始講著 ê 三粒行星 ê 問題，tī 影片 內底演予你看。一粒球落 tī 木星 ê 速度，是比 落 tī 地球 抑是 天王星 較緊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210825/ 影像：James O’Donoghue (JAXA) & Rami Mandow (Space Australia) 文稿：James O’Donoghue 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210825.html Powered by Firstory Hosting

這三張相片是 8 月 15 tī 菲律賓 Cebu 市翕 ê 太陽系 氣態巨行星，木星。Tī 這工，拄仔好望遠鏡看著 一寡精彩景色 ê 詳細狀況，是木星加利略衛星 ê 凌木現象。上面頂彼張，是 Io tī 上正爿去予木星 ê 烏影閘去。毋閣其他三粒大粒 ê 木衛出現 tī 木星 一條一條雲帶盤面 ê 頭前。較光 ê Europa kah 較暗 ê Ganymede tī 較倚倒爿遐。In ê 烏影 to̍h 照 tī 氣態巨行星 ê 雲頂。Callisto tī 木星正爿下跤 ê 邊仔。三粒衛星 tī 木星表面產生這个三重凌木現象。中央彼張，Europa kah Ganymede ê 烏影 tī 中央看會著。毋閣 Ganymede ùi Europa 頭前行過，kā 伊閘牢矣。下跤彼張，是凌木現象真罕得看著 ê 木衛食。Ganymede ê 烏影 to̍h 落 tī Europa 面頂。Ùi 地球 ê 角度來看，加利略衛星會閘來閘去、食來食去。這款現象 6 年出現一改，差不多是 木星 tī 伊春分附近 ê 時陣 會當看著。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210821/ 影像：Christopher Go 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210821.html Powered by Firstory Hosting

Tī 北方星座 仙王座 ê 方向 這个 10 度闊 ê 視場內底，有湠開 ê 發射星雲 IC 1396 kah SH2-129 相濫 ê 發光星際氣體，kah 塗粉烏雲。伊是去予中心 ê 藍色恆星 IC 1396（倒爿）激發 ê。伊有幾若百光年闊，離咱有 3000 光年遠。Tī 中央正爿下面是一个奇妙 ê 烏暗外形，內底有一个交纏 ê 烏暗雲，to̍h 叫做 象管星雲。伊有幾若十光年遐爾長，內底有恆星形成 ê 基本物質，嘛有藏 原恆星 tī 內底。這幅圖正爿 ê 發射光是 SH2-129，伊有幾若个光節 kah 掃轉來 ê 雲脊，to̍h chhāi tī kah 地球差不多遠 ê 所在。因為按呢，伊閣有一个較有名 ê 名，to̍h 叫做 飛行夜婆星雲。Tī 飛行夜婆星雲內底，除了這个皇家宇宙動物園，閣有最近變有名 ê Ou4，大花枝星雲。伊是較暗 ê 藍色發射光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210723/ 影像：Patrick Hsieh 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210723.html Powered by Firstory Hosting

這个足光 ê 英仙座流星，用一秒鐘 60 公里緊 ê 速度，ùi 地球大氣 犁過。伊 ê 軌跡，綴這个有足濟恆星 ê 銀河 leh 行。這个 ùi 正爿行到倒爿 ê 流星，是 8 月 12 tī 葡萄牙夜空翕 ê。彩色軌跡是 ùi 天津四（天鵝座 α）開始，到牛郎星（天鹰座 α）煞。這兩粒攏是北方 ê 夏季大三角 ê 恆星。實際上，英仙座流星 tī 足短 ê 時間內底，變甲比地球暗暝上光 ê 兩粒恆星閣較光。這粒流星 ê 軌跡上開始是發青光，這是足光 ê 英仙座流星雨真四常 ê 現象。Ùi 週期性彗星 Swift-Tuttle 留落來 ê 宇宙沙粒行足緊 ê，緊到有法度 tī 海拔 100 公里懸 ê 所在 kā 酸素原子激發，發出青色 ê 特徵發射線。紲落來 in to̍h 會 tī 白色閃光中蒸發。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210819/ 影像：Miguel Claro (TWAN, Dark Sky Alqueva) 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210819.html Powered by Firstory Hosting

環形星系 (M57) 比你 ùi 細台望遠鏡看著 ê 閣較複雜。上明顯 ê 中央環 差不多有 1 光年 闊。毋閣這張 足長時間感光 ê 影像，是 ùi 三台無仝 ê 大型望遠鏡影像資料組合--起來 ê，欲 探索 離 星雲 中央 ê 恆星足遠 ê 發光氣體 ê 環形雲絲。這个 組合影像 有 ùi 酸素發--出 ê 紅光，tī 可見光 kah 紅外線 攏有。這个環形星雲是搝長 ê 行星形星雲，是像 太陽 ê 恆星 tī 演化過程 kā 外層大氣擲--出去，落尾變做 白矮星。這个 環形星雲 離咱 2500 光年遠，to̍h tī 音樂星座 天琴座 遐。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210818/ 影像提供：Hubble, Large Binocular Telescope, Subaru Telescope 影像組合 kah 版權：Robert Gendler 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210818.html Powered by Firstory Hosting

這看起來敢若是 紙糊 ê 月娘 ùi 帆布做 ê 日頭頭前駛過。毋閣彼毋是紙枋做 ê 雲。這 毋是假 ê 景色。這張相片 ê 柑仔色天色 是真 ê。是這個月初發生 [日食][solar eclipse] ê 時陣，kā 兩張無仝感光 ê 相片，數位組合起來 ê。第一擺 ê 感光 是用一般望遠鏡翕ê。翕著過分感光 ê 日頭 kah 無夠分感光 ê 月娘。第二擺 ê 影像是用 [太陽望遠鏡][solar telescope t] 翕 ê。翕著背景太陽 ê 色球層 ê 詳細狀況。這个 親像帆布布料 ê 太陽是 ùi 水素 發射 ê 一个足 特殊 ê 紅影 顯影來 ê。幾若个日珥會使 tī 太陽外沿看著。這張影像是 tī 中國 內蒙古 Xilingol 日頭落山進前翕 ê。實際上，月球 是足密 ê 岩石做 ê，太陽 是足燒 ê 氣體做 ê，雲 是 浮 tī 天頂 ê 水滴 kah 冰滴做 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210628/ 影像：Wang Letian (Eyes at Night) 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210628.html Powered by Firstory Hosting

除了 土星 環，環形星雲 (M57) 嘛是足有名 ê 環形天體。毋閣這个經典外形，是 按 咱 ê 角度來看。這張最近翕 ê 影像，是這个 擴散 星雲 ê 3-D 結構。這一部份是 ùi 足清楚 ê 哈伯影像 來 ê。影像顯示這个星雲是一个較厚 ê、像甜箍麭 ê 環，kā（美國）跤球形 ê 發光雲 箍 tī 內底。這个 ùi 地球 看 ê 環面，親像是 àⁿ-頭看跤球 ê 長軸。是講這个已經研究足濟 ê 行星形星雲 ê 發光物質，毋是 ùi 行星來 ê。伊是 ùi 這个在生 ê 時陣親像太陽 ê 恆星擲--出來 ê 氣體外殼。伊 ê 性命已經行到上尾 ê 坎站，這馬干焦賰一个光點 tī 星雲內底。Ùi 中央恆星發--出 ê 強烈 紫外光，kā 氣體內底 ê 原子離子化。這个 環形星雲 差不多有 1 光年 闊，離咱有 2500 光年遠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210817/ 影像提供：NASA, ESA, Hubble Legacy Archive 資料處理：Judy Schmidt 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210817.html Powered by Firstory Hosting

這个夜空無四常。銀河系 ê 中央帶 tī 相片倒爿看會著，是真四常。大部份 ê 烏暗夜空是 銀河 ê 一部份。Tī 正爿頂懸看著 ê 足光 ê 流星 ，嘛真四常。足濟頂禮拜翕著 ê 英仙座流星雨 相片，攏有翕著流星。是講這个 英仙座流星 干焦一部份 較光。出現 tī 這个夜空正爿下跤 ê 紅色 精靈，嘛真四常。紅色精靈 最近幾若十年予人注意著了後，這款爍爁 ê 相片 才開始愈來愈濟。出現 tī 影像中央面頂 ê 新星，嘛真四常。新星 蛇夫座 RS 是 頂禮拜 發現 ê，伊會 幾若 年 一改。光到 直接用目睭 to̍h 看有。上無四常 ê 是這寡現象攏 tī 仝一暗、仝一个夜空翕著。這个 無四常 ê 夜空 to̍h tī 墨西哥 Zacatecas ê 天頂。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210816/ 影像：Daniel Korona 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210816.html Powered by Firstory Hosting

彗星 ê 塗粉頂禮拜落 tī 地球。這个逐年攏有 ê 英仙座流星雨，kā 咱 ê 夜空劃幾若巡。這幅圖是 tī 英仙座流星 上濟彼暗，kā 幾若張踮仝一个所在翕 ê 相片合成 ê。其實流星來 ê 時陣 無需要攑 雨傘，因為流星 tī 地球高層大氣 to̍h 已經 蒸發 了了矣。合成影像內底有足濟攏是 一張一張翕 ê 英仙座流星，毋閣前景這張是 tī 中國 甘肅省 酒泉市 附近翕 ê。背景有足濟恆星，咱 銀河 系 ê 中央帶嘛直直 chhāi tī 遐，木星 kah 土星 to̍h tī 伊 ê 倒爿。雖然講 彗星 ê 塗粉粒 是互相 平行 leh 行，毋閣 流星雨 看起來敢若是 ùi 天頂仝一个點輻射出來 ê。這个 輻射點 to̍h tī 英仙座。這幅圖 ê 視野搝遮爾長，天空 ê 彎曲度 嘛會使 ùi 仝名 ê 英仙座流星 ê 軌跡看--出來。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210815/ 影像：Luo Hongyang 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210815.html Powered by Firstory Hosting

這張長長 ê 望遠鏡影像 是綴著咱 ê 銀河盤 ùi 有豐富星雲 ê 天鵝 座方向去看。這个星雲一般是叫做鬱金香星雲。Tī 中央面頂上光 ê 發光雲是 ùi 星際氣體 kah 塗粉來 ê。伊 tī 1959 年 天文學家 Stewart Sharpless 編 ê 天體目錄內底揣會著，編做 Sh2-101。這个美麗 ê 鬱金香星系有 70 光年闊，伊 to̍h 開 tī 8000 光年遠 ê 所在。這是用哈伯色盤來顯像 ê，星雲 leh 發光 ê 是，紅色 ê 硫磺，青色 ê 水素、kah 藍色 ê 酸素。Ùi 少年高能恆星來 ê 紫外光輻射 to̍h tī 天鵝座 OB3 星協 ê 邊仔。包括有 O 型星 HDE 227018，伊 kā 鬱金香星雲內底 ê 原子 離子化，發出發射光。Tī 這个視場內底是微類星體 天鵝座 X-1。伊 tùi 咱地球來講是上強 ê X-光天體之一。這个較暗 ê 藍色彎曲衝擊波前小可仔看有，是烏洞吸積盤內底 ê 噴流 kā 驅動 ê。伊 to̍h tī 這个宇宙鬱金香花葉 ê 面頂，to̍h 是這幅影像頂懸 ê 所在。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210729/ 影像：Carlos Uriarte 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210729.html Powered by Firstory Hosting

這个 捲螺仔星系 to̍h 算毋是上完美 ê，上無嘛足食相 ê。M74 這个 華麗 ê 正向星系，是一个有幾十億粒恆星 ê 島宇宙，離咱有 3200 萬光年遠，to̍h tī 雙魚座 ê 方向。M74 去予分類做 Sc 星系。伊優美 ê 捲螺仔手骨，是一个 宏偉 ê 設計，會當 ùi 藍光星團 kah 烏暗 ê 宇宙塗粉 帶追蹤著。這个清楚 ê 組合相片 是 ùi 哈伯太空望遠鏡 ê 先進巡天 kha-mé-lah ê 影像資料建構出來 ê。M74 ê 盤面差不多有 3 萬光年闊。這張相片有記錄酸素原子發射 ê 感光，而且紅光嘛 kā 星系 ê 大型恆星形成區標--出來。M74 比 Messier 星表 內底大部份星系 ê 表面光度較低，所以伊有當時仔嘛叫做 幻影星系。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210813/ 影像提供：NASA, ESA, Hubble, HLA 資料處理：Mehmet Hakan Ozsarac 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210813.html Powered by Firstory Hosting

是啥物驅動土星 ê 極光？為著欲揣著這个答案，科學家 kā 幾若百張 Cassini 太空船 為著別款目的翕 ê 土星 紅外線影像排排咧。看是毋是會當 ùi 內底揣著足額 ê 極光影像來看 in ê 關連性 kah 製造 動畫。若是會當製造動畫，to̍h 會當展示 土星極光 ê 變化 毋是干焦因為太陽 ê 角度無仝爾爾，嘛 kah 行星轉踅有關係。閣有，一寡 極光 ê 變化 敢若是 kah 土衛引起 ê 土星 磁層 ê 波動有關。這張 是 2007 年翕 ê，是 紅外線 ê 土星三色假色影像。藍色是土星環反射太陽光，紅色是行星發出 較低能量 ê 光。土星 南極有一輾極光，是青色 ê。最近才 發現 講，土星 ê 極光會 kā 土星大氣層加溫。了解土星 ê 極光，嘛是一款予咱閣較了解 地球極光 ê 方式。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210627/ 影像：NASA, Cassini, VIMS Team, U. Arizona, U. Leicester, JPL, ASI 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210627.html Powered by Firstory Hosting

這个美麗 ê 三裂星雲 其實是一个宇宙研究主題。伊嘛叫做 M20，離咱有 5000 光年遠，tī 厚星雲 ê 人馬座方向遐。這是一个 tī 咱銀河盤 ê 恆星形成區，三裂星雲展示三種無仝款 ê 天文星雲：紅色 發射星雲 是酸素原子發出 ê 光，藍色 反射星雲 是塗粉反射恆星 ê 光，烏暗星雲 是厚塗粉雲 ê 剪影。毋閣紅色發射區去予閘光 ê 塗粉帶分做三爿，所以才會叫做 三裂星雲。這張是有名 ê 哈伯太空望遠鏡 tī 這區翕 ê 特寫相片。Tī 發射星雲中央 ê 倒爿下跤，有去予新誕生 ê 恆星雕出來 ê 條仔雲 kah 噴流。三裂星雲差不多有 40 光年闊。伊 tī 咱天頂看起來差不多 kah 月娘欲平大。毋閣伊傷暗矣，目睭無法度直接看著。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210812/ 影像：Mike Selby 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210812.html Powered by Firstory Hosting

雲底當時看起來會親像氣泡？一般來講，雲底是平 ê。這是因為澹溼溫暖 ê 空氣 tī peh-升 冷卻 ê 過程會 tī 特別 ê 溫度 凝 做水滴，這通常是 tī 特別 ê 懸度形成 ê。水 滴結愈大粒，to̍h 會產生袂透光 ê 雲。若是拄著一寡狀況，to̍h 會產生有大粒水滴抑是 冰 滴 ê 雲 橐仔。這寡水滴抑是冰滴是 ùi 清氣 ê 空氣蒸發閣 lo̍h-lòe。這款 雲橐仔 可能會 tī 雷雨 附近 ê 掣流 空氣出現。若是邊仔有 太陽光 kā 照，to̍h 會出現予人特別 注目 ê 奶仔雲。這張相片 ê 奶仔 雲干焦出現幾若分鐘久爾爾。是 2012 年 tī 加拿大 Saskatchewan 省 Regina 一个風暴出現了後翕 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210811/ 影像：Michael F Johnston 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210811.html Powered by Firstory Hosting

火 tī 太空看起來是按怎？若是有 地球重力 ê 影響，加溫氣體 to̍h 會 peh-升、脹大，予火舌變做 淚珠形。毋閣若是 tī 有 注空氣入去 ê 國際太空站 (ISS) 面頂 ê 微重力 環境，火舌 to̍h 會變做 球形。火是愛一直提著酸素才會繼續燒。毋閣 太空火舌 愛拄著無仝方向隨機浮 tī 太空 ê 酸素 分子才會繼續燒。所以才會產生這个球包。這張 tī ISS 燃燒集中架 翕 ê 影像，是 球形火舌內底包一簇一簇 高溫發光 ê 烏煙黗。若是無酸素，比論講像 tī 太空按呢 真空 ê 狀況，火 to̍h 會隨花--去。有足濟 kah 火 有關係 ê 化學反應攏足複雜 ê。Tī 微重力 ê 環境 做試驗，毋若會當 幫贊人類 了解火，嘛會當知影按怎拍 火。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210810/ 影像：NASA 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210810.html Powered by Firstory Hosting

這兩張圖是 ùi 鬥有 水素 alpha 濾鏡 ê 安全太陽望遠鏡 ê 錄影影像組合來 ê。看會著 6 月 6 號（頂幅）kah 18 彼工，太陽盤 kah 太陽邊仔 ê 大型日珥 清楚詳細 ê 細節。這是 ùi 中國北京提著 ê 影像，in 展示國際太空站 kah 中國新 ê 天宮號太空站 ùi 光亮 ê 太陽頭前行過 ê 形影。國際太空站 tī 下幅圖 ê 中央附近，伊行過太陽盤倒爿 ê 明亮活動區 AR2833，這馬 tī 大型太陽環絲 ê 下跤。中國太空站是 tī 頂幅圖內底 ê 中央正爿遐，tī 太陽活動區 AR2833 下跤。你會當看著一个較細 ê，ùi「+」kah「-」外形組合出來 ê 烏影。這兩張 凌日軌道 ê 相片，是用仝款 ê 設備、仝款 ê 像素比例，離國際太空站有 492 公里遠 ê 所在翕 ê。中國太空站 to̍h tī 離 kha-mé-lah 400 公里遠 ê 所在。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210626/ 影像：Wang Letian (Eyes at Night) 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210626.html Powered by Firstory Hosting

啥物是看流星雨上好 ê 方式？這个問題可能 tī 這禮拜 to̍h 愛知影矣。因為一年一改 ê 英仙座流星雨 上濟 ê 時陣 to̍h 隨欲來矣。這改好哩佳哉嘛是有一个烏暗 ê 夜空，to̍h 親像舊年這張 英仙座流星 ê 合成相片 按呢。相片倒爿有足濟較暗 ê 流星嘛攏看會著，這是 tī Slovakia 足暗 ê 暗暝翕 ê，比正爿較清楚。正爿是 tī Czech 共和國 較無遐暗 ê 暗暝翕 ê。利用 銀河系 ê 光帶 kā 兩爿 ê 座標 影像接起來。流星雨 ê 輻射點 to̍h tī 倒爿 ê 英仙 座 看會著。總講一句，真濟較暗 ê 流星 tī 較光 ê 夜空 to̍h 看無。雖然講咱這馬猶會當用一寡較俗 ê 方式來 解決 這个問題，毋閣 光害 kā 咱地球 ê 烏暗夜空變甲愈來愈少矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210809/ 影像：Tomas Slovinsky (Slovakia) & Petr Horalek (Czech Republic) 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210809.html Powered by Firstory Hosting

Tī 地球 ê 人通常是攑頭看流星雨。毋閣太空人 Ron Garan tī 2011 年 8 月 13 翕 ê 這張 出眾 ê 相片，是 àⁿ-頭看 ê 英仙座流星。Ùi Ron Garan tī 海拔 380 公里懸 ê 踅地 國際太空站 面頂 ê 視角 來看，英仙座流星 ê 光巡是 tī 下底。In 是 ùi Swift-Tuttle 彗星落落來、掃過 ê 塗粉，去予加溫 燒出白光 ê 結果。這寡 發光 ê 彗星塗粉 粒，用一秒鐘 60 公里緊 ê 速度，迵過地球面頂 100 公里懸、厚厚 ê 大氣層。Tī 這幅圖內底，流星閃光 to̍h tī 中央倚正爿，tī 地球發光邊界弧 kah 青光 氣輝 層 ê 下底，拄仔好 tī 足光 ê 大角星 下跤。你有想欲 攑頭看 流星雨無？你足好運 ê！2021 年 英仙座流星雨 變上濟 ê 時陣，to̍h tī 這禮拜。今年 to̍h 算是 足暗 ê 流星，嘛會當 tī 晴和 ê 夜空下，踮烏暗 ê 所在看著。因為月娘無-tī--lih。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210808/ 影像：NASA ISS Expedition 28 Crew, Ron Garan 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210808.html Powered by Firstory Hosting

這幅望遠鏡影像內底，宇宙塗粉罩 tī 有足濟恆星彼搭，to̍h tī 南冕座，澳洲王冠 ê 北方邊界附近。比 500 光年較近 ê 塗粉雲 kā 銀河 內底較遠 ê 背景星 ê 光攏閘牢 矣。若是 ùi 雲估計 ê 距離來算，這幅圖面頂到下跤是 2 度闊，超過 15 光年長。正爿面頂是一陣 古錐 ê 反射星雲，編號是 NGC 6726, 6727, 6729, kah IC 4812。有一个特別 ê 藍光是 ùi 足燒 ê 恆星 反射 宇宙塗粉來 ê。這个塗粉嘛 kā 這區 猶咧形成 ê 恆星 閘牢咧。Tī 藍色發射星雲面頂，有一个較細 ê 天體 NGC 6729，to̍h 踅 tī 少年 變星，南冕座 R ê 邊仔。伊 ê 正爿是紅光 ê 弧 kah 環。這是 HH 天體，kah 高能、新誕生 ê 恆星有關。壯觀 ê 球形星團 NGC 6723 to̍h tī 這幅圖 ê 倒爿下跤。雖罔講 NGC 6723 是 這陣天體 ê 一部份，伊內底較老 ê 恆星是離咱 30000 光年遠，比 南冕座塗粉雲 內底 ê 少年恆星閣較遠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210806/ 影像：Vikas Chander 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210806.html Powered by Firstory Hosting

這个爍青光 ê，to̍h 綴銀河 ê 方向 leh 走。伊留 一條尾溜，愛 30 分鐘才會無去。這工是 8 月 12，伊離 英仙座 ê 方向較遠，表示伊較有可能是 ùi 迵過 地球大氣 ê 彗星 Swift-Tuttle ê 彗核來 ê。所以這應該是逐年攏有 ê 英仙座流星雨 ê 一部份。這粒火球 tī 2018 年行過天頂 ê 時陣，去予天文攝影師 tī 中國 湖北省宜昌 ê 山谷面頂翕著。流星 ê 光跡嘛去予 攝影機 翕著，光跡上尾 ê 部份 to̍h tī 火星 ê 倒爿下跤。後禮拜 to̍h 是 2021 年英仙座流星雨 又閣上濟 ê 時陣。今年 ê 月娘 會 tī 日頭 落山了後，隨綴日頭 lòe--去。按呢會當予咱 tī 地球 晴和 ê 暗暝看著 足濟 ê 英仙座流星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210803/ 影像：Dandan Huang 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210803.html Powered by Firstory Hosting

有光有聲 ê 哈伯深空視場 https://apod.tw/daily/20210802/ 你敢捌聽過哈伯深空視場？毋管你捌抑是毋捌，你可能毋捌 聽過這款 ê。請你 tī 這幅影像面頂徙動你 ê 滑鼠，來聽看覓 leh！哈伯深空視場 (HUDF) 是 2003 到 2004 年開創 ê，是用 哈伯太空望遠鏡 tùi 一个看起來啥物攏無 ê 太空區域長時間感光。按呢 to̍h 會當看著 tī 這內底遙遠、暗淡 ê 星系。HUDF 是上有名 ê 一个天文影像之一，tī 遮咱用一个較活潑 ê 方式，聲波距離，來展示予逐家看。你 kā 滑鼠徙到一个星系，伊 to̍h 會展示 訊息 予你看，內底有伊大概 ê 紅移。因為 紅移 會 kā 光 ê 頻率徙到較紅 ê 光譜 彼爿去，tī 遮 咱 to̍h 用 kā 音調徙到較低 ê 聲音譜 彼爿來表示。愈遠 ê 星系，伊 ê 宇宙紅移 to̍h 愈大（to̍h 算講伊看起來是藍色 ê），伊 ê 音調彈--起來 to̍h 會愈低。HUDF 內底 ê 星系，平均距離是 106 億 光年 遠，聽--起來是 升 F 調。按呢 tī 遮，你會當揣著 上遠 ê 星系 是佗一个？ ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像提供：NASA, ESA, Hubble 聲音化：G. Salvesen (UCSB) 資料：M. Rafelski et al. 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210802.html Powered by Firstory Hosting

愛會記得 NEOWISE 彗星 https://apod.tw/daily/20210731/ 這是舊年 7 月才翕 ê。你若是有看著 北斗星，你 to̍h 會當 tī 你 ê 夜空揣著 NEOWISE 彗星。日落了後，北方 ê 住民會當用目睭直接看著這粒彗星。伊 to̍h tī 這塊有名 ê 天頂碗公下底，kah 西北爿 ê 地平線面頂。這粒彗星看起來敢若是一粒霧霧 ê 恆星拖一條尾溜。毋閣這條尾溜比頂遍記錄著 ê 較短。頂遍是 2020 年 7 月 23 彗星倚地球上近彼陣，tī Czech 共和國翕著 ê 難忘天景。C/2020 F3 (NEOWISE) ê 相片，定定看會著這粒彗星較闊 ê 塗粉尾溜，kah 較暗、分較開 ê 藍色離子尾溜，湠到 目睭看袂著 ê 所在。世界各國 ê 觀星者實在是 真歡喜看著 NEOWISE 彗星。伊是 ùi 別个太陽系來的人客。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Petr Horalek / Institute of Physics in Opava 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210731.html Powered by Firstory Hosting

土星光下 ê 土衛 Mimas https://apod.tw/daily/20210730/ 有半爿面一直面對土星 ê 土衛 Mimas，to̍h ùi 烏影彼爿 kā 咱睨。伊 to̍h tī 差不多全烏 ê 世界內底，產生這个 戲劇性、反射太陽光 ê 月眉形影。這个拼鬥影像是 tī 2017 年 1 月 30，Cassini 太空船上尾一改 倚近伊 ê 時陣翕 ê。Cassini ê kha-mé-lah 囥 tī 面對太陽 ê 方向，離 Mimas 干焦 45000 公里近 ê 所在。這是其中一个上懸解析度 ê 影像，是一个冷冰冰、隕石坑滿滿是、直徑 400 公里闊 ê 衛星。有半爿一直面對土星，是因為伊 kah 土星同步自轉 ê 結果。有一个強化影像會當看著這半爿，是土星反射太陽 ê 光去照著 Mimas ê 影像。為著欲看著這个影像，你會當 tī 這張影像面頂徙動你 ê 滑鼠（抑是 點這个連結）。其他 Mimas ê Cassini 影像，閣有 tī 這粒細粒衛星面頂較大 ê、不祥 ê Herschel 隕石坑。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Cassini Imaging Team, SSI, JPL, ESA, NASA 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210730.html Powered by Firstory Hosting

Fleming 三角精靈 https://apod.tw/daily/20210727/ 伊 ê 外形看起來亂糟糟。這个交纏 ê 雲絲是 ùi 衝擊波形成 ê 發光氣體。伊 to̍h tī 地球夜空 ê 天鵝座方向看會著，是 面紗星雲 ê 一部份。面紗星雲 是大型 ê 超新星殘骸，是大質量恆星死亡爆炸了後，產生 ê 一个脹大 ê 雲。Ùi 超新星爆炸來 ê 光 應該是 tī 5000 年前 to̍h 行到地球矣。這个 發光 ê 雲絲 親像是 ùi 邊仔看著床單面頂長長 ê 皺痕。影像內底清楚看著發紅光 ê 離子化水素原子 kah 發藍光 ê 離子化酸素原子。面紗星雲 嘛叫做 天鵝環，編號是 NGC 6979，差不多是 月娘 視角 ê 6 倍大。這个雲煙差不多有 30 光年 長，估計伊到地球 ê 距離是 2400 光年遠。伊嘛叫做 Pickering 三角形，是 哈佛大學天文台 台長號 ê。伊閣有一个名，是用發現者 天文學家 Williamina Fleming ê 名 kā 號 ê，to̍h 叫做 Fleming 三角精靈。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Anthony Saab 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210727.html Powered by Firstory Hosting

月眉形 ê 海王星 kah 海衛 Triton https://apod.tw/daily/20210725/ 航海家 2 號太空船 恬恬仔飛過外部 太陽系，伊 ê kha-mé-lah 煞同齊翕著 海王星 kah 海衛 Triton ê 月眉月相。這張有 氣態巨行星 kah 伊 厚雲衛星 ê 優雅相片 是 tī 1989 年 in 倚上近 了後翕 ê。這無可能是 tī 地球 翕 ê，因為 海王星 無法度 tùi 地球展示月眉月相。這个 kah 一般無仝 ê、足讚 ê 地點，予咱看袂著 海王星 平常時 ê 藍色色調。因為 tī 遮看著 ê 太陽光去予散射去矣，所以伊嘛變甲較紅，to̍h 親像 欲日落 ê 日頭 仝款。雖然講 海王星 比 天王星 較細粒，毋閣伊 ê 質量較大。海王星有幾若个 烏環 ，閣會發出比伊 ùi 太陽吸收著 閣較濟 ê 光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：NASA, Voyager 2 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210725.html Powered by Firstory Hosting

孤張感光 ê 仙女座星系 https://apod.tw/daily/20210625/ 你會當看偌遠？離咱有 250 萬光年遠 ê 仙女座星系，是咱直接用目睭 to̍h 看會著 ê 上遠 ê 天體。夜空內底其他 ê 住民，親像是恆星、星團、星雲，差不多幾若百抑是幾若千光年遠爾爾。Tùi 太陽系來講 in 已經有夠遠矣，毋閣 in 猶 tī 咱 ê 銀河系 內底。仙女座星系又閣叫做 M31，是 銀河外 ê 星系。這張精心設計 ê 深空夜景，是 tī 葡萄牙南部一个老礦場，M31 to̍h tī 煙筒管 ê 頭殼頂。這个影像是追蹤天景 ê 孤張感光，所以前景才會因為 kha-mé-lah ê 振動煞小可仔霧霧。毋閣 仙女座星系看起來是有夠大。這个星系較光 ê 中心區，一般來講用目睭是攏看有。外沿 ê 捲螺仔手骨 to̍h 較暗，tī 天頂 ê 大細差不多有 4 粒月圓遐爾闊。是講時間差不多賰 50 億年左右爾爾，仙女座星系 kah 銀河系 to̍h 會合併。到時仙女座星系內底 ê 恆星 to̍h 會湠到咱 規个夜空。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Miguel Claro (TWAN, Dark Sky Alqueva) 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210625.html Powered by Firstory Hosting

太空 ê 邊界 https://apod.tw/daily/20210724/ 太空是 ùi 佗位開始算？若是欲講太空旅行，按呢太空 to̍h ùi Karman 線 開始算，to̍h 是 100 公里懸 ê 所在。一般是 ùi 地球平均海面以上 80 公里懸 ê 所在畫一條線開始算。毋閣物理上並無 一條線來界定 大氣層結束，太空開始。實際上，Karman 線差不多是 tī 頂層中氣層 kah 下層熱氣層交界附近。夜光雲 是高緯度 ê 熱天幻影，是 tī 中氣層頂懸，差不多海拔 80 公里懸 ê 所在形成 ê。伊嘛叫做極地中氣層雲。北極 kah 南極 ê 極光帶會發光，是因為有高能粒子 tī 熱氣層激發原子。極光帶 會湠到海拔 80 公里到 600 公里懸 ê 所在。這是 ùi 飛到海拔 10 公里懸 ê 平流層航空 領域 ê 駕駛艙速翕 ê 相片。內底有翕著星空下 ê 夜光雲、北極光，閣有 遠方 ê 地球地平線 kah 太空 ê 邊界。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Ralf Rohner 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210724.html Powered by Firstory Hosting

環星系 AM 0644-741 https://apod.tw/daily/20210728/ 正爿 ê 大型藍色星系外沿彼輾是一个 直徑 15 萬 光年 闊 ê 巨型環形結構。伊內底有新形成、足光 ê 大質量恆星。AM 0644-741 嘛叫做 環星系。這个環是 kah 巨型 ê 星系相碰產生 ê。兩个 星系相碰 ê 時陣，in 會互相迵過，毋閣內底 ê 恆星真罕得相拄。大型星系 ê 環型結構，是較細 ê 入侵星系迵過了後，產生 重力破壞 ê 結果。Tī 這个時陣，星際氣體 kah 塗粉會壓縮，產生 恆星形成 ê 衝擊波，ùi 衝擊點向外送出去，to̍h 親像水池仔表面行過 ê 水痕仝款。這幅圖內底 ê 其他星系是背景星系，kah AM 0644-741 無交葛。前景較光 ê 恆星是 tī 咱 ê 銀河系內底。毋閣 tī AM 0644-741 ê 正爿面頂，有一个去予伊 ê 引力掠牢、較細 ê 入侵星系，to̍h tī 這幅 哈伯太空望遠鏡 影像 ê 頂懸。環星系 AM 0644-741 離咱有 3 億光年遠，to̍h tī 南天星座飛魚座 ê 方向。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像提供：NASA, ESA, Hubble, HLA 影像處理：Jonathan Lodge 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210728.html Powered by Firstory Hosting

CG4：破去 ê 彗星雲球 https://apod.tw/daily/20210726/ 氣體敢有法度 kā 星系掠著？按呢問 to̍h 毋著矣！這張相片 內底奇怪「生物」ê「跤爪」是一个叫做 彗星雲球 ê 氣體雲。毋閣這个雲球 已經破去 矣。彗星 雲球 ê 特徵是有 厚塗粉 ê 頭部 kah 搝長 ê 尾溜。這个特徵予彗星 雲球 tī 視覺上看起來敢若親像是 彗星，毋閣實際上 in 兩个差足濟 ê。雲球 較捷是恆星誕生 ê 所在，頭部彼搭有足濟少年 ê 恆星。這款天體 ê 頭部會破去 ê 原因，到今猶毋知。雲球倒爿 ê 星系 足大、足遠 ê，伊只是 拄仔好疊 tī CG4 附近爾爾。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Nicolas Rolland & Martin Pugh 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210726.html Powered by Firstory Hosting

彩色 ê 色光：環形星雲 kah 邊仔 ê 恆星 https://apod.tw/daily/20210721/ 毋知你敢會當看著這个環面頂所有 ê 色光 kah 伊邊仔 ê 恆星？這馬有技術做會到。這張影像 展示用類 稜鏡 繞射光柵 技術翕著 ê 環形星雲 (M57) kah 邊仔 ê 恆星。環形星雲 干焦看幾擺爾爾，因為伊主要發出 ê 色光較少。兩款上光 ê 發射色光是 水素（紅色）kah 酸素（藍色）。In to̍h tī 影像中央倒爿，giōng-欲疊做伙。這張影像 ê 中央正爿，是定定看會著 ê 多色合成圖標。另外一方面，恆星發出大部份 ê 光，攏 tī 可見光 ê 光譜 範圍內底。Kā 這寡恆星 ê 色光 疊做伙，to̍h 會產生一條連紲光巡。這 to̍h 是恆星出現 ê 時陣，邊仔閣有彩色光巡 ê 原因。Kā 天體無仝 ê 色光拆開，是 科學上足有路用 ê 做法。因為咱會當知影這个天體是 ùi 啥物 元素 組成 ê，伊 ê 運動速度有 偌緊，伊 ê 距離有 偌遠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Robert Vanderbei (Princeton U.) 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210721.html Powered by Firstory Hosting

月光下 ê 愛神 kah 戰神 https://apod.tw/daily/20210716/ 這張相片是 7 月 11 tī 地球 ê 剛果民主共和國 Lualaba 省翕 ê。金星，是用羅馬 ê 愛神號 ê 名。火星，to̍h 是戰神 ê 意思。In kah 月光 to̍h 做伙 tī 這个安靜 ê 天景內底。這是 tī 日頭落山無偌久，西爿猶閣有微光彼陣感光 ê。嘛有翕著 少年 ê 新月，是 地光 kah 月球本來烏暗 ê 彼面照予光。月娘 to̍h 繼續行。金星這粒 暗頭仔星 猶 tī 西爿爍咧爍咧。伊是地球天頂第三光 ê 天體，排 tī 日頭 kah 月娘後壁。Tī 7 月 13 這工，金爍爍 ê 金星頭頂，有火星離伊閣較近，距離差不多是一粒月娘 tī 天頂 ê 大細。火星 tī 暗頭仔這陣沓沓仔散步，離較光 ê 金星愈行愈遠。毋閣 in 兩粒攏 tùi 足光 ê 恆星軒轅十四 ê 方向行倚。軒轅十四是獅仔座 ê Alpha 星，伊 to̍h tī 這張相片 ê 頂懸。紲落來這幾工 tī 暗頭仔 ê 天頂，會有 金星 kah 紲落來 ê 火星來揣咱𨑨迌。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Shi Huan 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210716.html Powered by Firstory Hosting

M27：啞鐘星雲 https://apod.tw/daily/20210712/ 咱 ê 太陽 紲落來會變做啥物？咱太陽 ê 未來，頭一个暗示 tī 1764 年 to̍h 有人無意中揣著矣。彼陣，Charles Messier 當咧編一个星表。內底是一寡 boăi kah 彗星相濫 ê 擴散天體。Messier 星表 內底第 27 个天體，叫做 M27 抑是啞鐘星雲。伊是一个 行星形星雲，是天頂上光 ê 行星形星雲 之一。用雙筒望遠鏡 ùi 狐狸 ê 星座（狐狸座） ê 方向 to̍h 看會著。光線 ùi M27 到咱愛開 1000 年 ê 時間。相片 內底 ê 色光是 ùi 水素 kah 酸素 來 ê。咱知影講，差不多閣 60 億年，咱 ê 太陽 to̍h 會 kā 伊 ê 氣體殼㧒出去，變做一粒行星形星雲，to̍h kah M27 仝款。中央賰 ê 部份，to̍h 會變做一粒會發出 X-光、燒燙燙 ê 白矮星。毋閣 tī 18 世紀 ê 科學，猶無法度了解 M27 ê 物理 kah 重要性。To̍h 算是到今，行星形星雲 猶是 留足濟謎團 落來，包括 in 複雜 ê 形體 是 按怎 產生 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Bray Falls & Keith Quattrocchi 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210712.html Powered by Firstory Hosting

M82：有星系風 ê 星爆星系 https://apod.tw/daily/20210709/ M82 是一个有星系風 ê 星爆星系。實際上，M82 內底爆發 ê 恆星形成運動，有連紲 ê 超新星爆炸 kah 大質量恆星強力 ê 恆星風，才會產生這个巨型噴流。星系中心區 有星系風 ê 證據，to̍h tī 這个清楚 ê 望遠鏡速翕內底。這張組合影像 kā 原子氣體 ê 長噴流絲發射光，用紅色色調 kā 強調出來。星系風內底有一寡氣體，會 幫贊大質量恆星製造 重元素。這寡重元素，落尾會離開恆星，走入去 星際空間。M82 是因為 kah 附近 ê 大 星系 M81 倚傷近，才變 kah 遮爾活潑。伊強烈 ê 恆星形成爆發階段，應該會連紲爆 1 億年左右。因為 M82 有搝長 ê 外形，才予伊又閣叫做大管薰星雲。伊 to̍h tī 大熊座 北爿邊仔附近 1200 萬光年遠 ê 所在。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Team ARO, Alentejo Remote Observatory 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210709.html Powered by Firstory Hosting

Ùi 近地點 kàu 遠地點 https://apod.tw/daily/20210708/ 2021 年 ê 遠日點 發生 tī 7 月 5 號。彼是地球長株圓軌道面頂，離太陽上遠彼點。是講，地球 kah 太陽 ê 距離毋是用來決定季節 ê。季節是 ùi 地球自轉軸 ê 趨度 決定 ê，所以 7 月 tī 北半球猶是熱天，tī 南半球猶是寒天。毋閣 7 月 5 號這工 ê 太陽，確實 ùi 地球來看是上細粒 ê。這張組合相片是 kā 兩張用仝一支望遠鏡 kah kha-mé-lah 翕 ê 太陽相片綴予齊齊。倒爿彼半張是 tī 2017 年，欲到近地點（1 月 2 號）彼陣翕 ê。近地點 to̍h 是地球軌道面頂，離太陽上近彼點。正爿彼半張是拄仔好 tī 遠地點進前翕 ê。太陽 tī 近地點 kah 遠地點 ê 視直徑變化，比 3 葩閣較加淡薄仔。若無這張相片，to̍h 會較歹注意著。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Richard Jaworski 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210708.html Powered by Firstory Hosting