NASA 逐工一幅天文圖 APOD Taigi

大龍骨座星雲 是奇怪 ê 恆星 kah 有代表性 ê 星雲 in 兜。伊是用伊 徛起 ê 星座 號名 ê。伊是一个足大 ê 恆星形成區，比 大獵戶座星雲 閣較大、閣較光，毋閣無啥人知影。這是因為伊 tī 南半球，毋閣 大部份 ê 人類 攏蹛 tī 北半球。這張相片 展示足清楚 ê 龍骨座星雲 上北爿 ê 影像。上倒爿有踅 tī 活跳跳 ê Wolf-Rayet 星 WR23 外口 ê 半圓形雲絲，彼是 咱看著 ê 龍骨座星雲 ê 一部份。中央倒爿 ê 是 Gabriela Mistral 星雲，內底 ê 發光氣體是 IC 2599 發射星雲，中央是較細 ê 開放星團 NGC 3324。相片中央 面頂是較大 ê 星團 NGC 3293，伊 ê 正爿是較暗 ê 發射星雲 Loden 153。雖罔講 上有名 ê 是 龍骨座，毋閣，伊無 tī 遮。影像 正爿下跤彼粒較光、爍咧爍咧、已經差不多矣，是 龍骨座 η 星。伊以前是 天頂上光 ê 恆星之一。毋閣咱這馬認為講，閣過幾若百萬年了後，伊應該會變做 超新星 爆炸。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220131/ 影像：Roberto Colombari 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220131.html Powered by Firstory Hosting

雖罔講 木星 是 2 月 2 號欲暗仔彼陣 天頂唯一一粒看會著 ê 行星，毋閣伊 kah 太陽系 上光 ê 衛星（咱 ê 月娘），攏 tī 西爿地平線面頂 ê 晨昏光 內底。這張相片是 tī 墨西哥 Cancun 市 日落了後翕 ê 。Tī 這个望遠鏡視野內底正爿頂懸，有咱太陽系上大粒 ê 氣態巨行星。這張速翕嘛翕著咱 ê 月娘，這馬拄仔好是伊頂月眉 ê 時期。月盤實在是有夠大 ê 啦！這个 咱熟似 ê 月面 這馬是去予 地球 ê 反照光，照甲遮爾光。毋閣木星邊仔 kah 伊 排規排 ê 四粒光點，是木星 ê 加利略四大衛星。Ùi 面頂 到 下跤是：木衛三 Ganymede，木星，木衛一 Io，木衛二 Europa，kah 木衛四 Callisto。木衛三 Ganymede，木衛一 Io，kah 木衛四 Callisto，是比咱 ê 月球閣較大粒。毋閣 木衛二 Europa 這粒水世界，是比咱 ê 月球較細粒淡薄仔。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220204/ 影像：Robert Fedez 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220204.html Powered by Firstory Hosting

蛇夫座 RS ê 雙星系統到今猶繼續產生壯麗 ê 爆炸現象。差不多 20 年一改，雙星內底 ê 紅巨星 to̍h 會倒夠額 ê 水素 氣體到伊 ê 星伴 白矮星，予伊 ê 表面產生一改燦爛 ê 熱核爆炸。In 差不多有 5000 光年 遠。In 產生 ê 新星 爆炸予 蛇夫座 RS 雙星系統變光到幾若倍，用目睭 to̍h 看有。紅巨星 to̍h tī 這幅圖 ê 正爿 頂懸，白矮星 to̍h tī 倒爿彼个足光 ê 吸積盤 ê 中央。雙星 互相踅對方 leh 行 ê 時陣，氣體 to̍h ùi 紅巨星 走去 白矮星。天文學家 推算，閣 10 萬年了後，這个雙星系統會 tī 白矮星 累積夠額 ê 物質。等超過 Chandrasekhar 極限 了後，to̍h 會產生能量閣較強、上尾一改 ê 超新星 爆炸。Ùi 這個月頭開始，你 to̍h 會當看著 蛇夫座 RS 閣變做 足光 ê 新星 爆炸 矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210822/ 影像：David A. Hardy & PPARC 音樂：P!SCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210822.html Powered by Firstory Hosting

這是用 kha-mé-lah kā 三工無月娘 ê 夜空相片合成 ê 夜景。是 ùi 8 月 11 到 13，地球行過 彗星 Swift-Tuttle ê 厚塗粉軌跡 彼陣翕 ê。這是 tī 匈牙利 Magyaregres 庄翕 ê。前景是一張無追蹤 ê 長時間感光，背景是足濟張 leh 追蹤恆星 ê 英仙座流星。Kah 背景恆星 比--起來，流星 ê 軌跡尾溜 逐年攏指向仝一个輻射點，英仙座。伊敢若是一个英雄，徛 tī 田庄 ê 地平線面頂。是講彗星 ê 塗粉粒是綴平行 ê 軌跡 leh 行。輻射效果是透視造成 ê。因為平行軌跡 敢若會 tī 這个恆星滿滿 ê 夜空遠方 相拄。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210820/ 影像：Balint Lengyel 音樂：P!SCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210820.html Powered by Firstory Hosting

你較愛佗一爿 ê 天景？倒爿 ê 夜空是極光，是 太陽 擲出來 ê 粒子 kah 地球頂層大氣 相挵 ê 時陣 發出 ê 光。正爿 ê 夜空是 光柱，是 ùi 天頂落落來 ê 幾若百萬細粒 冰晶，反射地球 ê 光。中央彼个是天文攝影師，伊 leh 問你愛佗一款？光柱 是坦徛 ê 柱仔，因為浮 tī 天頂 ê 冰晶 大部份是 kah 地面平行，in ê 色光是 ùi 地面 ê 燈火來 ê。青色 ê 極光 kā 天頂 kah 地面 罩牢牢。這个 青光 是發光 ê 酸素，毋閣伊有透光，所以你會當看著後壁 ê 天星。背景一點一點 ê 是較遠 ê 天星，嘛有一寡仔是 tī 足好認 ê 獵戶座 內底 較光 ê 恆星。這張相片是兩個月前 tī 挪威 Kautokeino 附近翕 ê 孤張感光 ê 相片。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220208/ 影像：Alexandre Correia 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220208.html Powered by Firstory Hosting

歡迎來到咱 ê 地球，這是太陽這粒恆星 ê 第三粒行星。地球 是 球形 ê，伊主要 ê 組成成份 是岩石。地球表面 有 70 葩是水。伊有一重 薄薄 ê 大氣層，主要 ê 組成成份是 窒素 kah 酸素。地球去 hŏng 叫做是 藍色大理石。這張相片 是 1972 年 阿波羅 17 號太空船 翕 ê，翕著 非洲 kah 南極洲。這是目前為止 上濟人分享 ê 地球相片。地球 有一粒大衛星，月球。伊 ê 直徑差不多是地球 ê 1/4。毋閣 ùi 地球面頂看，月球 kah 太陽 ê 角寸尺差不多是平大。地球面頂有 足濟液態水，予伊有當支持伊面頂 濟濟款 ê 性命形態。包括一寡較懸智慧 ê 生物，比論講 海豬 kah 人類。歡迎你來阮 ê 地球 𨑨迌。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220206/ 影像：NASA, Apollo 17 Crew 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220206.html Powered by Firstory Hosting

倒爿彼粒是 金星，伊是天頂上光 ê 行星。Tī 1 月 29 這工，伊 ê 視寸尺干焦是月娘 ê 1/30 爾爾。毋閣 in 若是 tī 日出進前 peh--起來，in 就會看起來攏是 月眉形。In 若是 tī 東南爿 ê 地平線面頂出現，in 發光 ê 部份就干焦佔盤面 ê 12 葩。這兩張月眉形 ê 相片， 是去予差不多仝角度 ê 太陽照著 ê。In 放大 ê 比例無仝，毋閣 in 攏是 ùi 細台望遠鏡翕 ê 影片來 ê，是 kā 影片 ê 影格 疊做一張 ê。金星看起來 kah 月娘一部份 ê 月相 欲仝，是因為伊是內行星。伊會 tī 暗頭仔 kah 透早出現，這个變化 ê 週期是 584 工。是講月娘 完成一个完整 ê 月圓週期是 29 工半。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220203/ 影像：Juan Luis Cánovas Pérez 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220203.html Powered by Firstory Hosting

銀河中心是發生啥物代誌？若是欲用光學望遠鏡就真歹講，因為 可見光 會去予銀河中心 ê 星際塗粉閘著，煞看無。毋閣若是用其他波段，比論講 電波波段，就會當看著 銀河中心。而且你閣會當看著一个 足趣味 ê 活跳區。這張相片 是最近用 MeerKAT 電波陣列望遠鏡 翕 ê 銀河中心 ê 影像。MeerKAT tī 南非，伊攏總有 64 个電波接收盤。這張相片 ê 闊度是 4 粒 月娘（2 度）遐爾大。翕著 ê 影像是遮爾豐富、遮爾深、閣遮爾清楚。這張影像實在是有夠清楚 ê。內底有足濟 咱已經知影 ê 天體，包括有足濟人馬座 ê 天體，這是因為銀河中心 to̍h tī 人馬座 ê 方向。Tī 咱銀河中心 ê 人馬座 A，to̍h 踮這張相片 ê 中央，遐有一粒 超大質量烏洞。相片內底閣有其他天體，毋閣咱較無遐爾清楚。比論講有一个 銀河弧，to̍h tī 人馬座 A ê 倒爿，閣有足濟雲絲結構。MeerKAT 電波陣列望遠鏡 ê 目的 是欲揣 中性水素 ê 電波發射源。彼是 ùi 較少年 ê 宇宙 抑是 較遠較短 ê 電波爍光 來 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220202/ 影像提供：Ian Heywood (Oxford U.), SARAO 色水處理：Juan Carlos Munoz-Mateos (ESO) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220202.html Powered by Firstory Hosting

月海 Mare Orientale tī 拉丁文內底是東海 ê 意思。伊是月球面頂頭一个會注意著 ê 大型特徵。若是 ùi 地球 ê 角度 來看，欲看著月球面頂上少年 ê 大型隕石坑盆地，實在是足困難 ê。毋閣，若是利用月球 ê 天平動現象，to̍h 是等月球趨到某一个角度 ê 時陣，to̍h 會較好揣著東海。東海 to̍h tī 這張清楚 ê 望遠鏡景色 ê 頂懸中央，伊 to̍h 勼 tī 月球西爿 ê 邊仔。這个 隕石坑盆地 是 3 億年前去予小行星挵出來 ê，直徑差不多有 1000 公里闊。隕石坑盆地內底有仝心圓特徵，月殼表面有水波痕。遮攏是太空船欲翕月球 ê 時陣較好揣 ê 目標。是講，是按怎月球 ê 東海是 tī 月球 ê 西爿邊仔 leh？這是因為月球上有名 ê 這个東海，是 1961 年進前號 ê 名。彼當陣 leh 標 東爿 kah 西爿 ê 習慣 kah 這馬是顛倒反。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220128/ 影像：Tom Glenn 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220128.html Powered by Firstory Hosting

Ùi 土衛三 Tethys 這个堅凍 ê 衛星 來 kā 看，會當看著土星系統內底 ê 奇幻景色：土星環 kah 烏影。你最近敢 捌去過 土衛三 Tethys？若是無，按呢這个 翕著 土星環 壯麗景色 ê Cassini 太空船 就欲 chhōa 咱來去矣。這張是 2005 年翕 ê。土衛三 Tethys tī 相片中央，太陽光 ùi 倒爿下跤來。Tethys 是一粒直徑 1000 公里闊 ê 衛星，伊踅中央彼粒氣態巨行星 ê 軌道半徑是 比 5 倍土星半徑 較短淡薄仔。土衛三 Tethys 離土星差不多有 30 萬公里遠，遮已經是 土星環較光部份 ê 外口矣，毋閣伊猶 tī 較暗較蔫 ê E 環 內底。這內底有五粒較大粒 ê 衛星，土衛三 Tethys 就是 其中一粒。伊是 tī 1980 年代去予人發現 ê。有兩粒足細粒 ê 衛星：土衛十三 Telesto kah 土衛十四 Calypso，去予土衛三 Tethys 鎖甲穩觸觸，綴 Tethys ê 軌道 leh 行。土衛十三 Telesto 綴 tī 土衛三 Tethys ê 頭前 leh 行，土衛十四 Calypso 綴 tī 土衛三 Tethys ê 後壁 leh 行。In to̍h 成做 踅土星 ê 三重奏。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220123/ 影像：Cassini Imaging Team, SSI, JPL, ESA, NASA 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220123.html Powered by Firstory Hosting

太陽表面 ê 氣體是按怎浮 tī 表面 ê leh？太陽表面 phok--出來 ê 彎曲 磁場，會 kā 離子氣體掠牢，予 in 浮 tī 大形 ê 箍箍仔結構內底。這款壯麗 ê 電漿 橋，就 tī 太陽邊界 ê 外圍，to̍h 是 咱看著 ê 日珥。1999 年，這款有清楚細節 ê 壯麗影像 去予 SOHO 太空天文台 ê 超 紫外光 影像望遠鏡 (EIT) 記錄起來。你看著 ê 光，to̍h 是 離子氦 ê 發射線。你會當看著 高溫電漿 tī 太陽面頂 10 萬公里懸 ê 所在，脫離 磁場 ê 限制，ùi 太陽表面走出去，行入去太空內底。這 to̍h 是高溫 ê 日珥。這个遮爾大 ê 事件 應該愛好好仔注意，因為 in 會影響踮 1 億公里遠 ê 地球 面頂 ê 通訊 kah 電力系統。2020 年代後期，咱 ê 太陽會行到 太陽極小期，彼是 11 年一个週期。是講太陽這馬 ê 表面活動 是愈來愈強。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220130/ 影像：NASA, ESA, SOHO-EIT Consortium 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220130.html Powered by Firstory Hosting

咱銀河系內底 ê 恆星 to̍h tī 這个目睭看會著 ê 視野內底四界攏是。這張是 8 月 13 半暝了後 tī 波蘭 Busko-Zdroj ê 夜空感光 30 秒鐘翕著 ê 英仙座流星 ê 彩色光跡。逐年攏有英仙座流星，這是 tī 流星上濟彼陣看著 ê。流星光 ùi 倒爿下跤到正爿頂懸。宇宙沙噴甲四界攏是，這攏是週期性彗星 Swift-Tuttle ê 沙塗。In ê 速度是一秒鐘 60 公里緊，迵過地球大氣層 ê 時陣會蒸發。Tī 這幅圖中央倚正爿頂懸，比銀河系恆星閣較遠 ê 所在，有一个 島宇宙 叫做 M31，嘛叫做仙女座星系。仙女座星系 是直接用目睭 to̍h 會當看著 ê 上遠 ê 天體，有 2500 萬光年遠。毋閣咱目睭拄開始看著 ê 流星軌跡，離咱地球表面才 100 公里 遠爾爾。軌跡尾溜指向 ê 流星雨 輻射點 是 tī 英仙座，to̍h tī 這幅圖 ê 倒爿下跤。綴這粒足光 ê 英仙座流星 ê 軌跡到倒爿下跤，會當看著英仙座 ê 雙星團 NGC 869 kah NGC 884 ê 恆星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210814/ 影像：Marzena Rogozinska 音樂：P!SCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210814.html Powered by Firstory Hosting

是按怎天頂 ê 心宿二 kah 蛇夫座 ρ 星 ê 附近，有遮爾濟塗粉、閣遮爾多彩？這寡色光是天體 kah 物理機制做伙影響 ê 結果。一寡足幼 ê 塗粉去予頭前 ê 恆星光照著，產生藍色 ê 反射星雲。氣體雲內底 ê 原子去予恆星 ê 紫外光 激發，產生紅色 ê 發射星雲。這寡透光 ê 塗粉雲 kā 恆星 ê 光閘著矣，所以 in 看起來 有較暗。心宿二 是一粒 紅巨星，嘛是夜空中 上光 ê 恆星。伊 kā 這張相片 倒爿下跤彼區 黃紅色 ê 雲 照甲 光-iàⁿ-iàⁿ。蛇夫座 ρ 星 系統 to̍h tī 倒爿頂懸彼个藍色 反射星雲 ê 中央。較遠 ê 球形星團 M4 to̍h tī 心宿二 ê 正爿頂懸遐。這寡恆星雲 ê 色彩是比 人 目睭看著 ê 閣較 精彩。實際上，in ê 發射光是分佈 tī 規个 電磁波頻譜 內底。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220126/ 影像：Mario Cogo (Galax Lux) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220126.html Powered by Firstory Hosting

Leonard 彗星是欲去佗位？若是 ùi 彗尾來看，有人可能會想講 Leonard 彗星 欲飛去正爿下跤。毋閣較完整 ê 3D 分析講，伊其實是 直直離開 kha-mé-lah ê 方向。所以 ùi 這个角度來講，塗粉尾溜 其實是拖到 kha-mé-lah 這爿向，干焦有法度 tī 彗星頭附近看著較短 ê 黃白光。藍色 ê 離子尾溜，是 太陽風 kā 離子歕離開 太陽 ê 方向，in to̍h 順順仔 tùi 太陽磁力線 ê 方向行。是講太陽磁場實在是有夠複雜 ê，有當時仔 太陽磁力線會重連，按呢會 kā 彗星 ê 離子尾溜斷做幾若丸。這支一點鐘久 ê 縮時攝影影片，是舊年 12月 ê 時陣 tī 泰國 翕 ê。你會當 tī 這支影片內底看著其中一丸。Leonard 彗星 已經離 咱太陽系 愈來愈遠矣，這馬是愈來愈暗矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220125/ 影片提供 kah 版權：Matipon Tangmatitham (NARIT) 文字：Matipon Tangmatitham 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220125.html Powered by Firstory Hosting

夜空有一个奇怪 ê 面容，去予恆星光照甲爍咧爍咧。人看著這个彎彎曲曲 ê 形體，就 kā 號做 尪姨頭星雲。實際上，這个遮爾迷人 ê 望遠鏡景色，看起來敢若是 尪姨 tùi 獵戶座 彼粒 足光 ê 超巨星 參宿七 硞硞看。尪姨頭星雲 較正式 ê 名是 IC 2118，伊差不多有 50 光年 闊，而且是 一堆星際塗粉粒 反射 參宿七 發出 ê 光。尪姨頭星雲 kah 參宿七 邊仔塗粉發出 ê 藍光，毋若是因為 參宿七 有較強 ê 藍光，嘛是因為 塗粉粒散射 藍光 比 紅光 閣較有效率 。仝款 ê 物理機制 造成 地球 日時 ê 天頂 看起來 是藍色 ê，是講 tī 地球大氣 內底 ê 散射物，是 窒素 分子 kah 酸素 分子 按呢。參宿七 kah 尪姨頭星雲，和 踅 tī in 附近 ê 氣體 kah 塗粉，就差不多 tī 800 光年 遠 ê 所在。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220124/ 影像：José Mtanous 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220124.html Powered by Firstory Hosting

拜一是一月 ê 月圓時，伊 tī 日落 ê 時陣 peh--起來。這張相片是 tī 意大利 Sardinia 島 ê 首府 Cagliari 附近翕 ê。相片內底予人注意著 ê 是 tī 東爿地平線附近翕 ê 月娘，伊 ê 色調是較溫暖 ê。是講 tī 這爿月娘 面頂彼个咱熟似 ê 圖樣是光暗無仝 ê 組合。較光 ê 是月球 ê 懸地，較暗 ê 是月海。傳統來講這款圖樣攏是 幻影，予人視覺上 ê 錯覺。比論講月娘看起來親像是一个人 ê 面，敢若面頂有人仝款，抑是講有咱熟似 ê 兔仔。毋閣這个時陣，規陣鳥仔成做一个隊伍 做伙飛過來。視野內底翕著 ê 這个景色，to̍h 成做這幅圖內底另外一个幻影。有人講這張美麗 ê 相片，敢若是一个去予 月光 迷著 ê 舞者。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220122/ 影像：Elena Pinna 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220122.html Powered by Firstory Hosting

這張媠噹噹 ê 相片是 tī 智利 Andes 山脈 ê 地面望遠鏡，南雙生仔天文台 翕 ê。伊 ê 雷射 導星 kah 調適 光學 ê 技術，kā 這張相片 ê 恆星噴流 翕甲足清楚 ê。MHO 2147 雙生仔噴流 是新恆星 形成 ê 時陣 噴出來 ê。伊 to̍h tī 銀河系中央 ê 方向、人馬座 kah 蛇夫座 ê 交界，差不多 tī 1 萬光年遠 ê 所在。中央 ê 恆星是去予 厚-tut-tut ê 低溫塗粉閘牢矣。毋閣伊 ê 紅外線影像猶是會當看著彎彎曲曲 ê 噴流。若是用規个系統 ê 距離來 kā 推算，這个噴流迒過天頂差不多 5 光年闊 ê 範圍。這个噴流是 ùi 這粒 leh 轉踅 ê 少年恆星 驅動 ê。按照噴流幌頭 ê 方向來看，應該是因為歲差造成 ê 影響。這粒少年恆星是多星系統 ê 一部份。伊 ê 自轉軸會沓沓仔踅，to̍h 親像干樂仔 leh 踅仝款。這是受著伊 ê 厝邊星伴 重力影響 ê 結果。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220121/ 影像：International Gemini Observatory / NOIRLab / NSF / AURA Acknowledgments: L. Ferrero (Universidad Nacional de Córdoba) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220121.html Powered by Firstory Hosting

NGC 7822 星雲內底應該是有足濟高溫少年 ê 恆星 kah 氣體塗粉做 ê 宇宙柱仔雲。伊 to̍h tī 北天星座仙王座內底 ê 巨型分子雲邊仔，是一个離咱差不多 3000 光年遠、leh 發光 ê 恆星形成區。這个星雲有較光 ê 邊界 kah 烏暗 ê 外形。Tùi 這幅用 望遠鏡翕 ê 彩色天景 來講，實在是足出眾 ê。這張影像內底有 狹頻 濾鏡 ê 觀測資料，kā 酸素原子、水素原子、kah 硫磺原子 ê 發射線，用做藍色、青色、kah 紅色色調。發射線 kah 色光 ê 組合就是咱熟似 ê 哈伯色盤。原子發射線 是去予恆星形成區中央 ê 高溫恆星 ê 高能輻射 kā 激發出來 ê 。足強 ê 恆星風 kah 輻射，毋若 kā 實密 ê 柱仔雲形體 雕出來，閣 kā 修修 leh。而且閣 tī 這个製造恆星 ê 星雲區中央，掃出一个 幾若光年闊 ê 特殊 閬空。這个柱仔雲會因為 重力崩塌，繼續做新 ê 恆星出來。毋閣等到柱仔雲去予侵蝕了了，to̍h 無法度 tī 這个 恆星原料場 閣製造新 ê 恆星矣。用 NGC 7822 ê 距離來估算，這个視野差不多有 40 光年闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220120/ 影像：Mark Carter 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220120.html Powered by Firstory Hosting

M31 仙女座星系 是咱用目睭 to̍h 看會著上遠 ê 天體。伊離咱有 2 百 50 萬 光年 遠，是一个大細 超過 20 萬光年闊 ê 大捲螺仔。雖罔講這个 tī 仙女座 內底 ê 仙女座星雲有淡薄仔暗，咱猶是會當直接用目睭 to̍h 看著。這張媠甲擋袂牢 ê 望遠鏡影像 是 kā 踅地球 leh 行 ê 哈伯太空望遠鏡 kah 地面望遠鏡 Subaru kah Mayall ê 影像資料疊做一張 ê。影像 ê 對比足明顯 ê，有黃色 ê 核心、暗色彎曲 ê 塗粉帶、伸長 ê 捲螺仔手骨、kah 手骨面頂 ê 藍色星團 kah 紅色星雲。閣 50 億年，仙女座星系可能 to̍h 會 看較清楚 矣。到時陣咱規个天頂會攏是伊，因為伊 to̍h 欲 kah 咱 銀河系 合 做一个矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220119/ 影像：影像提供：Subaru (NAOJ), Hubble (NASA/ESA), Mayall (NSF); 資料處理 kah 版權：R. Gendler & R. Croman 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220119.html Powered by Firstory Hosting

這个夜空有足濟發光 ê 圖標。上倒爿遐有一个咱熟似 ê 獵戶座，伊上有名 ê 部份就是 獵戶座星雲。獵戶座上好認 ê 就是獵戶座 皮帶 面頂彼三粒星。伊 kā 獵戶座分做兩爿，而且兩爿攏有一部份去予 Barnard 環 箍牢 ê。Tī 相片中央倒爿彼粒，是夜空內底上光 ê 天狼星。迒過相片中央 ê 是 咱銀河系 ê 中央帶。Tī 上正爿頂懸彼兩个上光 ê，是咱銀河系 ê 衛星星系：大麥哲倫星系 (LMC) kah 小麥哲倫星系 (SMC)。Tī 上正爿有厚雲 ê 地平線面頂，是 南十字座。伊有四粒星，予伊看起來敢若是 南方 ê 十字架。這張相片是 kā 連紲 18 張感光相片疊做伙 ê。這 18 張是舊年上尾彼工 tī 澳洲 東部 用仝一台 kha-mé-lah、tī 仝一位翕 ê。前景 ê 玄武岩柱媠甲親像一幅圖。這是 Bombo 採礦場 ê 一部份，後壁是 寬闊 ê 太平洋。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220118/ 影像：Lucy Yunxi Hu 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220118.html Powered by Firstory Hosting

Tī 大恆星形成區獵戶座星雲 ê 南方，有一个足光 ê 藍色反射星雲 NGC 1999。伊 tī 獵戶座分子雲複合體 邊仔 1500 光年遠 ê 所在。NGC 1999 會發光，是一粒藏 tī 星雲內底 ê 變星 V380 Orionis kā 照予光 ê。這个望遠鏡景色 tī 天頂 差不多是兩粒月娘 ê 闊度。Tī 正爿中央 ê 星雲內底，有一个向邊仔 ê 暗色 T-型標誌。拄仔開始 ê 時陣，這个烏暗外形去予人叫是講這是一个藏 tī 遐 ê 塗粉雲剪影。毋閣 紅外線資料 表示講，這个形體應該是去予星雲內底 能量較強 ê 少年恆星 歕出來 ê 閬縫。實際上，這區四界攏是 能量較強 ê 少年恆星，會產生 較狹 猶是 較闊 ê 噴流 kah 足光 ê 衝擊波。伊去予編做 Herbig-Haro (HH) 天體，是用天文學家 George Herbig kah Guillermo Haro ê 姓 號 ê。衝擊波彼位 ê 紅色色調有較厚 。HH1 kah HH2 tī NGC 1999 ê 正爿下跤。HH222 嘛叫做 水沖星雲，伊 tī 相片正爿頂懸遐，看起來干焦是著傷流血仝款。這个衝擊波，是 恆星噴流 用一秒鐘幾若百公里 ê 速度 kā 邊仔 ê 物質捒出去，才會產生 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220127/ 影像：Vikas Chander 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220127.html Powered by Firstory Hosting

有當時仔星際空間內底 ê 暗塗粉 特殊 ê 形態實在是足優雅 ê。比論講上南爿 ê 變色杜定座 就是按呢。咱知影講暗塗粉會 kā 後壁 ê 恆星 抑是 星雲 ê 可見光閘著，所以 in 平常時是 傷暗看無。毋閣 這張 4 點鐘久 ê 感光 內底，大部份看著 ê 是 塗粉 家己 ê 光，咖啡色色調是伊較強 ê 紅光 kah 近紅外線 ê 部份。Tī 中央正爿有一粒較藍較光 ê 恆星，是 變色杜定座 β 星。伊本底就是一粒發藍白光 ê 恆星，伊邊仔 ê 塗粉 to̍h 拄仔好反射伊 ê 藍光。相片內底 ê 恆星 kah 塗粉 攏是 tī 咱銀河系內底。毋閣有一个較明顯 ê 例外：Tī 變色杜定座 β 星下底 ê 白色光點 是 tī 遠方 ê IC 3104 星系。星際塗粉 大部份是 tī 巨恆星 較冷 ê 大氣層內底產生，才去予恆星光、恆星風、抑是 恆星爆炸（比論講 超新星）kā 捒出去 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220117/ 影像：Jarmo Ruuth, Telescope Live, Heaven’s Mirror Observatory 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220117.html Powered by Firstory Hosting

咱若是來看 1990 年代後半木星系統 ê 資料，就會發現 加利略太空船 有記錄著 木衛二 Europa 足精彩 ê 影像。這粒衛星 ê 表面冰層下底有一重足深 ê 全球性海洋。這張加利略四大衛星 ê 木衛二 Europa ê 影像資料已經 重新處理過。這擺有改善資料校正 ê 方式，才有法度產生彩色影像。按呢產生 ê 色彩 kah 咱目睭看著 ê 較 相-siâng。木衛二 Europa 表面足長 ê 彎曲痕跡，暗示講遐有地下水。木星 ê 衛星踅木星 ê 長株圓軌道 leh 行。木衛二 Europa 面頂 ê 潮汐作用提供能量，予伊 ê 海洋保持液體 ê 形態。毋閣閣較 趣味 ê 是，就算是無太陽光，伊嘛是會當提供支持性命 ê 能量。所以 木衛二 Europa 就變做是 地球 以外上有可能有性命 ê 所在。毋知啥物款生物會當 tī 深閣暗 ê 地下海洋生存發展咧？是講地球家己嘛是有 tī 極地生存 ê 蝦仔 就是。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220115/ 影像：NASA, JPL-Caltech, SETI Institute, Cynthia Phillips, Marty Valenti 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220115.html Powered by Firstory Hosting

這張是 超新星殘骸 Simeis 147 ê 細節影像，看會著面頂有複雜 ê、規虯 ê、扭曲 ê 雲絲。你若是綴面頂 ê 線路行，按呢你可能會揣無路。伊嘛予編做 Sharpless 2-240，猶閣有另外一个較有名 ê 名是意大利麵星雲。你若是 ùi 金牛座 kah 御夫座 ê 邊界 看過去，to̍h 知影伊 tī 天頂 ê 視野是 3 度闊，差不多是 6 粒月娘 ê 大細。若是用伊 ê 距離 3000 光年來推算，這个恆星屑仔雲差不多是 150 光年大。這張相片是 ùi 狹頻濾鏡 提著 ê 影像資料 kā 組合起來 ê。內底較紅 ê 發射線是 ùi 去予離子化 ê 水素原子，較暗 ê 青藍色是 雙離子化 ê 酸素原子。In 是 leh 追蹤 受著衝擊 ê 發光氣體。超新星殘骸進前估算 ê 距離差不多是 4 萬年，意思是講這粒大質量恆星爆炸了後，上早發出 ê 光 行到地球已經是 4 萬年前 ê 代誌矣。毋閣這个脹大 ê 殘骸毋是唯一 ê 產物。這个宇宙災難 閣有留 一粒自旋 ê 中子星 抑是 脈動星 落來。毋管是留佗一款，攏是 ùi 原底彼粒恆星 ê 核心來 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220113/ 影像：Jason Dain 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220113.html Powered by Firstory Hosting

彗星若是倚近 kā 看，會是啥物模樣？雖罔講咱無法度真正到彗星遐，毋閣咱會使用細台望遠鏡翕彗鬚 kah 彗尾內部，按呢可能會當予咱一寡想法。會叫做 離子尾溜 這个名，就表示講伊 ê 組成成份是 離子氣體。這寡氣體是去予太陽發出 ê 紫外光 激發，才閣去予 太陽風 歕出來 ê。太陽風是有結構 ê。是去予太陽複雜 多變 ê 磁場 雕出來 ê。多變 ê 太陽風 kah 各種 ùi 彗核 kiat--出來 ê 氣體噴流 相濫 ê 影響，產生彗尾 ê 複雜結構。綴太陽風 ê 方向來看，Leonard 彗星 尾溜 ê 結構是離開太陽 ê 方向，伊 ê 形體 嘛綴時間變來變去。藍色 ê 離子尾溜主要是 ùi 重組 ê 一氧化碳 分子來 ê。彗星頭 邊仔 青色 ê 彗鬚主要是 ùi 少量 重組 ê 雙原子碳 分子來 ê。雙原子碳會 tī 50 點鐘 ê 時間內底去予太陽光破壞去，這就是 是按怎伊 ê 青光 袂走到離子彗尾遐。這張相片是 1 月 2 號 tī 澳洲 Siding Spring 天文台 翕 ê。Leonard 彗星 上媠 ê 模樣愛 ùi 地球 ê 南半球來 kā 看。伊這馬已經 踅過太陽，欲離開 太陽系 矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220112/ 影像：Blake Estes (itelescope.net) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220112.html Powered by Firstory Hosting

四分儀座流星雨這个名是 ùi 一个 去予人放袂記 ê 星座 來 ê，伊逐年攏會為北半球 ê 觀星者表演一擺。這个流星雨 tī 天頂 ê 輻射點 是踮一个這馬已經無咧用 ê 四分儀座。彼位離北斗星袂傷遠，to̍h 踮現代星座 牧夫座 kah 天龍座 交界 ê 所在。實際上北極星是 tī 這幅圖中心 ê 下底，北斗星群（嘛叫做 牛犁）踮伊面頂，正爿是流星雨 ê 輻射點。這張相片是 2022 年 1 月 4 號流星雨上濟彼陣，用差不多幾若點鐘 ê 時間翕了了後，才 kā 疊做這張全景夜空圖。綴天頂 ê 光巡行到輻射點，就知影這个是四分儀座流星雨。前景 ê 陣列望遠鏡是踮中國內蒙古 Mingantu 觀測站 ê 中國電波太陽翕相光譜儀 望遠鏡。產生四分儀座流星雨 ê 塗粉來源，tī 2003 年 ê 時陣認為講，可能是 ùi 一粒小行星來 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220108/ 影像：Cheng Luo 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220108.html Powered by Firstory Hosting

土星 ê 衛星是去予人按怎矣？免緊張啦！土衛五 Rhea 是去予土星環閘著一部份 niă 啦。2020 年，有一台 Cassini 機器人太空船踅土星 leh 行。伊 ùi 太陽系 內底 上有名 ê 土星環 邊仔，翕著 這个角度 ê 相片。你看--著 ê 土星環，較外口 ê 是較薄 ê F 環，較內底 ê 是較厚 ê A 環 kah B 環。雖罔講 土衛十 Janus 看起來敢若是 浮 tī 土星環面頂，毋閣其實伊是 tī 土星環 ê 外口。伊 是土衛內底較細粒 ê 衛星，干焦 180 公里闊爾爾。離 kha-mé-lah 較遠 ê 彼粒是 土衛五 Rhea，有 1500 公里闊，伊面頂有足濟隕石坑。土衛五 Rhea ê 頭頂干焦有法度 ùi 土星環 ê 環溝仔 看著。Cassini 太空船 經過 10 外冬 ê 探索 kah 研究，tī 2017 年 ê 時陣 kā 伊 ê 燃料用煞 矣。伊落尾 飛入去土星 ê 大氣層，to̍h 按呢 熔--去 矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220104/ 影像：NASA, ESA, JPL, Cassini Imaging Team 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220104.html Powered by Firstory Hosting

這是啥物雲？這款 leh 退後 ê 烏跤雲，一般人 kā 叫做雷雲，伊甲別个雲有淡薄仔無仝。因為伊 tī 倚咱這爿有一寡 較奇怪 ê、一簇一簇 ê 奶仔雲，仝一个時間 tī 較遠彼爿當 leh 落雨。這張相片是 2013 年中 tī 加拿大 ê 南 Alberta 省 翕 ê。這个雲這馬當 leh 徙 tùi 東爿較遠遐。是講日頭是 ùi 西爿落去，會走 tùi kha-mé-lah 後壁去。Tī 這張相片內底，日落 ê 色彩掖甲規个天頂攏是。予本底 tī 天頂 to̍h 足媠 ê 雲，染做閣較出色 ê 柑仔色 kah 粉紅仔色。背景 ê 天頂是變甲愈來愈暗 ê 紺色。正爿較遠彼搭，有一粒 peh--起來 無偌久 ê 頂 膨 月。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220116/ 影像：Alan Dyer (The Amazing Sky) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220116.html Powered by Firstory Hosting

NGC 1566 是一个 島宇宙，內底有幾若十億粒恆星。伊 to̍h tī 南天 ê 劍魚座 遐，差不多 6000 萬光年遠 ê 所在。伊閣有一个名號做西班牙舞者星系，ùi 咱銀河系 ê 方向來看，伊是正面向咱 ê。這个捲螺仔星系是一个華麗 ê 大設計。伊有兩个優雅 ê 捲螺仔手骨，攏總超過 10 萬光年闊。捲螺仔手骨面頂有較光 ê 藍色星團、粉紅仔色 ê 恆星形成區、kah 捲踅 ê 宇宙塗粉 帶。NGC 1566 星系中心 ê 爍光，予伊成做一个離咱上倚、嘛上光 ê Seyfert 星系。這个星系中心可能有一粒 超大質量烏洞，tùi 踅 tī 伊外口 ê 恆星、氣體、塗粉，造成破壞性 ê 影響。Tī 這張遮爾清楚 ê 南天星系影像內底，閣有一寡足光 ê 星，其實 in 攏是咱銀河系內底 ê 恆星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220114/ 影像：Mark Hanson and Mike Selby 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220114.html Powered by Firstory Hosting

你可能捌看過獵戶座皮帶，毋閣毋是親像這款 ê。影像面頂這三粒上光 ê 恆星，ùi 倒爿到正爿是 獵戶座 皮帶 ê 三粒星，參宿三、參宿二、kah 參宿一。視野內底其他 恆星 已經用數位方式 kā 徙走矣。按呢才有通予箍 tī 發光氣體 kah 暗塗粉 邊仔 ê 星雲看較會出來。有一寡仔星雲 ê 形體是足趣味 ê。比論講 馬頭星雲 kah 火舌星雲，in 攏 tī 正爿下底 ê 參宿一附近。這張深空影像 是頂個月 tī 美國 德州 Marathon ê Marathon 夜空公園 天文台翕 ê。伊 ê 視野有 5 度闊，是開 20 點鐘久 ê 時間感光 ê。了後才閣處理過，看若是離這寡 氣體 kah 塗粉較倚 ê 時陣，看起來會是按怎。這个有名 ê 獵戶座星雲 to̍h tī 這幅彩色影像 ê 正爿頂懸。這規區是 tī 1500 光年 遠 ê 所在，是咱 研究上濟 ê 恆星形成區。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220111/ 影像：Matt Harbison (Space4Everybody), Marathon Remote Imaging Observatory 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220111.html Powered by Firstory Hosting

Leonard 彗星 是 2021 年上光 ê 彗星。這兩張相片是 tī 智利 Atacama 沙漠 ê 天頂翕 ê，彗星 to̍h tī 這兩張相片 ê 倒爿下跤遐。一月 3 號是 Leonard 彗星 ê 近日點，伊這馬當 leh 飛過去，彗尾嘛愈來愈長，愈來愈看會著。這是 kā 闊幅鏡頭翕 ê 幾若張相片疊做一張 ê（用烏白相片是欲予這个對比閣較明顯）。按呢翕，是為著欲追蹤複雜 ê 離子尾溜。是講，這个尾溜迒過天頂 60 度闊，實在是有夠長 ê 啦！木星嘛足光 ê，tī 正爿下跤 ê 地平線附近爍咧爍咧。這款物質是 ùi Leonard 彗星 ê 核心 蒸發出來 ê。這差不多有 1 公里闊，內底有足濟沙塗、岩石、kah 冰。這寡物件去予太陽光照甲面頂 ê 離子氣體 leh 發光，產生長長 ê 尾溜。最近幾若禮拜 彗核 受著太陽風 kah 磁場 ê 影響，有當時仔會突然間爍一下。這嘛造成彗尾產生無規則、彎彎曲曲 ê 尾溜。Leonard 彗星到近日點猶閣有幾若工，伊會繼續 遮爾活跳跳。彗星這馬 tī 太陽系黃道面 ê 南爿，掃過南天 ê 顯微鏡座。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211230/ 影像：Daniele Gasparri 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211230.html Powered by Firstory Hosting

Leonard 彗星 ê 尾溜是按怎會搖咧搖咧？這支 縮時攝影影片 是 彗星 C/2021 A1 (Leonard 彗星) ê 離子尾溜 tī 頂個月初 10 工內 ê 變化。NASA ê 日地關聯天文台 (STEREO) 太空船 是一組兩台 ê 天文台太空船：STEREO-A kah STEREO-B。行 tī 地球頭前彼台叫做 STEREO-A，伊會走較緊。行 tī 地球後壁彼台叫做 STEREO-B，伊會走較慢。兩台離地球 ê 距離差不多是仝款 ê，in 做伙踅太陽咧行。這支影片是 STEREO-A 翕 ê。影像 ê 視野是 29 度闊，逐格影像攏有 kā 紲落來彼張扣掉。按呢產生 ê 新影像，才看會著有變化 ê 部份。影片看會著足清楚 ê Leonard 彗星 ê 離子 尾溜。伊伸甲有夠長 ê，去予 太陽風 歕甲 搖咧搖咧。太陽風就是 ùi 太陽 噴出來 ê、速度足緊 ê 離子流。影片翕煞了後，Leonard 彗星 繼續行 tùi 太陽去。到伊 倚太陽上近 ê 時陣，差不多是 tī 水星 kah 金星軌道之間。落尾伊活落來矣！規粒好好！無 弄家散宅！毋閣這馬伊欲離開 太陽系 矣！煞變甲愈來愈暗！ ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220110/ 影像提供：NASA, NRL, STEREO-A 資料處理：B. Gallagher 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220110.html Powered by Firstory Hosting

木星 ê 大紅斑會變做啥款？木星 這粒氣態巨行星是太陽系內底上大粒 ê 行星。伊 ê 質量是 地球 ê 320 倍大。木星是目前咱知影太陽系內底有上大、上久風暴系統 ê 行星。就是倒爿你看著 ê 彼粒 大紅斑。大紅斑 大到比地球閣較大，就算講伊這馬變較細粒矣，猶是較大。若是 kah 歷史記錄比起來，這个 風暴 干焦 150 年前 ê 1/3 大爾爾。NASA ê 外行星大氣遺產 (OPAL) 計畫，最近一直咧用 哈伯太空望遠鏡 監看這个風暴。這張哈伯 OPAL 影像 是 2016 年 ê 木星，毋閣色調有處理過，才會予紅色變較明顯。咱 ùi 現代 大紅斑資料知影，風暴區是愈來愈細，毋閣伊嘛 tī 坦徛方向變 較懸淡薄仔。無人知影這粒 大紅斑 未來會變按怎，嘛毋知是毋是會繼續 變閣較細。若是按呢，大紅斑有一工可能會 完全變無去。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220109/ 影像提供：NASA, ESA, Hubble, OPAL Program, STScI 資料處理：Karol Masztalerz 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220109.html Powered by Firstory Hosting

2021 年 12 月 4 號是 2021 年上尾改 ê 日食。有一隻公 ê Adelie 徛鵝歡喜甲吱吱叫，才有這張剪影相片。是講這款叫聲是有較特別，一般來講是公 ê 徛鵝欲佔地盤抑是欲 宣佈大代誌 ê 時陣才會按呢。這寡徛鵝 ê 地盤是 tī 南極洲 ê Cape Crozier，是 Adelie 徛鵝上大 ê 住所。這个所在已經 予研究人員研究 25 冬矣。舊年 12 月 ê 日食，tī 地球 上南爿 ê 大陸 去予 月球烏影閘著 上濟 ê 時陣，有 80 葩遐爾濟。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220107/ 影像：Annie Schmidt (Point Blue Conservation Science) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220107.html Powered by Firstory Hosting

有當時仔，落--落來 ê 冰晶予太氣層變做一个大透鏡，產生日頭 kah 月娘邊仔一輾 ê 光弧 kah 光暈。2012 年寒天 ê 一个拜六暗，tī 西班牙 Madrid 附近 ê 天頂毋若出現一粒足光 ê 月娘，閣有四重足罕得看著 ê 月暈。這張相片 中央上光彼粒 to̍h 是月娘。月光去予落--落來 ê 六角形冰晶 屈折 了後，to̍h 會 tī 離月娘 22 度闊 ê 所在產生這个足罕得看著 ê 22 度月暈。Tī 這个 22 度光弧水平方向閣較外口 ê 所在，有一輾閣較罕得看著 ê 外接月暈，是 柱仔形冰晶 造成 ê 現象。閣較罕得看著 ê 是，有一寡月光去予閣較遠 ê 冰晶 屈折去，煞 tī 離月娘 46 度遠 ê 所在，產生第三重敢若虹 ê 光弧，to̍h 親像是這張 寒天天頂 ê 景色仝款。而且，這个 離月娘 46 度遠 ê 圓箍仔月暈，大部份嘛攏看會著。所以才會講，翕著這張 四重月暈 ê 相片，尤其是翕著月娘 ê，實在是真無簡單。這張背景是一个足有名 ê 冬季天景，有 天郎星、kah 獵戶座皮帶、kah 參宿四。In 攏 tī 內底彼輾光弧 kah 外口彼輾光弧之間揣會著。月暈 kah 光弧會當擋幾若分鐘到幾若點鐘遐爾久。你若是看著這个現象，猶會赴-lih 樓頂招樓跤、阿母招阿爸、厝邊招隔壁、朋友招親情，鬥陣做伙 來去欣賞這个 特別 ê 天景。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220102/ 影像： 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220102.html Powered by Firstory Hosting

日頭落山了後 tī 教堂後壁 ê 天體毋是 月眉。彼是月眉形 ê 金星啦！伊離咱有 4000 萬公里遠，差不多是太陽 2 葩 ê 光度。這張是 1 月 1 號 tī 匈牙利 Veszprem 西爿天頂，用 kha-mé-lah 鬥 望遠鏡鏡頭翕 ê 一組相片。這个本底足光 ê 金星 tī 暗頭仔看起來煞無遐爾光。伊到 2022 年初猶是 暗頭仔星。毋閣伊看起來嘛愈來愈大粒，用望遠鏡看 是愈來愈薄。In 會 tī 1 月 9 號 行到「下合」，就是內行星行到地球 kah 太陽中央，tī 遐 in ê 光度會去予太陽光食去。是講月眉形 ê 金星會隨閣出現。伊會 tī 月中 ê 時陣，tī 日頭欲 peh--起來進前 ùi 東爿出現，變做足光 ê 透早星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220106/ 影像：Tamas Ladanyi (TWAN) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220106.html Powered by Firstory Hosting

日頭敢會一直 tī 仝一个方向 peh--起來？袂呢！其實逐個月日頭 peh-起來 ê 方向攏無仝。這張影像 是 2021 年 tī 加拿大 Alberta 省 Edmonton 市 逐個月日頭 peh--起來 ê 方向。翕相 ê kha-mé-lah 攏 tùi 東爿翕，倒爿是北爿，正爿是南爿。你若是 同齊看這支影片 to̍h 知，上面頂彼張是 2020 年 12 月翕 ê，上下底彼張是 2021 年 12 月翕 ê。雖罔講 日頭總是 ùi 東爿 peh--起來，毋過伊會 tī 12 月 ê 冬節 peh-到東爿上南彼位，tī 6 月 ê 夏節 peh-到 東爿上北彼位。Tùi 真濟國家來講，冬節 是官方換季 ê 日子。比論講，若是 較倚北爿 ê 國家，冬節就是寒天 ê 頭一工。寒天 ê 時陣，若是欲 tī 地球表面 kah 大氣層 利用太陽能 kā 加溫，抑是欲 kā 太陽能儉--起來，攏足無效率 ê，所以 寒天 才會遮爾冷。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220105/ 影像：Luca Vanzella 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220105.html Powered by Firstory Hosting

這个天文相片計畫是 kā 2021 年規年 ê 月圓相片鬥做這張合成相片。這寡相片是咱較熟似 ê 這爿面 ê 月球，in 攏是 tī 月相 上圓上光 ê 時陣翕 ê。這 月份 是照排 ê，上面頂彼條相 to̍h 是一年 ê 開始。這相片是 tī 印度 ê Kolkata 市 翕 ê，是用仝一台 kha-mé-lah kah 鏡頭翕 ê。逐條相片攏是 kā 逐擺 ê 月圓相片按照仝款 ê 像素比例鬥做這張 ê。這寡一條一條 ê 相片看起來敢若是無排好勢，毋閣這就是欲 kā 你講，月圓 ê 角寸尺是會改變 ê。這愛看月球 kah 地球 ê 距離是毋是有變。逐條相片攏有標示講，這是 佗一個月？這個月 ê 月圓叫啥物名？Kah 地球 ê 距離是幾公里？角距離是偌濟？這个角距離 ê 單位是角分，是一度 ê 1/60。上大粒 ê 月圓是 tī 近地點附近，是 tī 5 月 kah 地球倚上近 ê 時陣。上細粒 ê 月圓是 tī 遠地點附近，是 tī 12 月 kah 地球離上遠 ê 時陣。5 月 kah 11 月 ê 月圓有趨 tùi 地球 ê 烏影下底，就是 2021 年彼兩擺發生月食 ê 時陣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220101/ 影像：Soumyadeep Mukherjee 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220101.html Powered by Firstory Hosting

這張縮時攝影圖內底，有 JWST 太空望遠鏡 tī 天星滿滿 ê 夜空咧行，這馬拄 ùi 獵戶座頭前行過。伊飛過月球了後，繼續 tùi 伊 ê 終點飛去。這張是 tī 12 月 28 號翕 ê。這个縮時攝影是每 10 分鐘翕一張，攏總翕 12 張。Kā in 對予齊齊了後，閣疊一張有足濟背景星 ê 深空彩色相片，才產生這張動畫。JWST 太空望遠鏡 12 月 25 發射了後過 2 工半，to̍h 已經飛超過月球軌道 ê 懸度矣。紲落來伊會 ùi 地球 ê 重力脊 飛到踅 L2 點 ê 暈輪軌道。L2 點 是 地球-太陽 系統 ê Lagrange 點 ê 其中一點。Lagrange 點 tī 太空中是一个足方便 ê 所在。假設太空中有一粒大天體（比論講地球）踅另外一粒大天體（比論講太陽）leh 行，Lagrange 點 to̍h 是這个系統內底 引力 kah 向心力平衡 ê 所在。Tī 遮 ê 物件會 kah 這兩粒大天體做伙行。所以，若是有一个質量較細 ê 物件，比論講太空船，to̍h 較愛留踮這位。L2 點是 5 个 Lagrange 點 ê 其中一點。伊 tī 地球-太陽 ê 連線頂懸，差不多離地球 150 萬公里遠 ê 所在。JWST 太空望遠鏡會 tī 明年 1 月 23 飛到 L2 點，這 ê 時陣已經是發射了後 ê 第 29 工矣。伊這馬已經離開地球表面重力範圍。你嘛會當 tī 線頂追蹤伊 ê 進度，看伊複雜 ê 安搭過程。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211231/ 影像：Malcolm Park (North York Astronomical Association) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211231.html Powered by Firstory Hosting

鳥仔 袂飛遮爾懸。飛龍機 嘛袂飛遮爾緊。自由女神 嘛無遮爾重。除了 人類 以外，其他 物種 嘛無法度知影 發生啥物代誌，毋閣 1000 年前 ê 人 嘛是毋知。發射 火箭 到太空是一件 予人足歡喜、閣真有挑戰性 ê 工課。這個月 ùi Florida 州 ê Kennedy 太空中心 發射 一台 SpaceX ê Falcon 9 號 火箭。這張相片 to̍h 火箭送出去 ê X-光偏振儀探測相機 (IXPE) 翕 ê。IXPE 是一台欲觀測高能天體 ê 相機，欲看 中子星、烏洞、kah 遙遠星系 ê 中心。伊 ê 目的是欲了解是啥物款 ê 物理 kah 幾何結構 產生、控制這寡天體 ê。30 萬公斤 ê 火箭 kā IXPE ùi 基座升懸到 地球 面頂，踅地球 leh 行。Tī 遐 ê 空氣實在是薄到予人無法度喘氣。是講這馬地球 ê 火箭，是 幾若工 to̍h ùi 某一个所在 發射 到太空去。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211222/ 影像：Jordan Sirokie 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211222.html Powered by Firstory Hosting

天頂這兩條光巡，佗一个是彗星？雖罔講 in 看起來攏足成彗星 ê，毋閣較低彼粒才是真正 ê 彗星。彼粒是 Leonard 彗星，看會著伊 ê 彗鬚 kah 彗尾。伊是一粒 kah 城市平大 ê 石頭冰，伊 踅 太陽 leh 行，這馬行到 內太陽系 來矣。Leonard 彗星 最近才拄行到離 地球 上近 kah 離 金星 上近 ê 所在。後禮拜伊會行到離太陽上近 ê 所在。這粒彗星這馬猶閣會當用目睭直接看著。紲落來這幾若禮拜，伊會產生 長長 ê 尾溜，逐工看起來會攏無仝。另外，較面頂 ê 光巡是 Ariane 五號火箭 ê 噴射煙。伊兩工前才 kā JWST 太空望遠鏡 擲去-lih 地球面頂。這張 孤張感光 ê 相片 是 tī 泰國 翕 ê。前景 ê 尖塔是 Doi Inthanon 國家公園 面頂 ê 寶塔。到目前為止，JWST 是 NASA 上大上有力 ê 太空望遠鏡。伊會 行到 地球-太陽 系統 ê L2 點，kah 地球做伙踅太陽行。目前 按算 欲 tī 2022 年熱天開始做科學觀測。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211227/ 影像：Matipon Tangmatitham (NARIT) 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211227.html Powered by Firstory Hosting

這寡大卵形是 tī 佗位看著 ê？In 是 木星 表面 leh 轉踅 ê 風暴雲。是頂個月 ùi NASA ê Juno 太空船 翕著 ê。攏總來講，較懸 ê 雲是較淺色 ê。下底卵形中央彼寡白點是上輕 ê 雲，in 較細。是講這寡雲有 50 公里闊，輕罔輕，嘛無蓋細。In 懸甲 tī 卵形結構下底產生烏影。這張相片 有加強色彩 kah 光暗對比。大卵形 一般攏是 tī 高壓 區 出現，in 有 1000 公里闊，會擋幾若年。Tī 木星 上大粒 ê 卵形是 大紅斑（無 tī 相片內底），伊已經擋幾若百年以上矣。利用 Juno 太空船 ê 影像來研究 木星雲 ê 動力，會當 幫贊咱閣較了解 地球面頂 ê 風颱 kah 颶風 是有 gŏa-nī 危險。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211229/ 影像提供：NASA/JPL-Caltech/SwRI/MSSS 資料處理 kah 許可: Kevin M. Gill 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211229.html Powered by Firstory Hosting

這粒彗星是 12 月 21 tī Namibia 共和國 烏-mì-mà ê 夜空翕著 ê。伊 ê 尾溜 迒過望遠鏡視野 ê 三度闊。這粒彗星叫做 Leonard 彗星 (C/2021 A1)，是今年上光 ê 彗星。幾若工前伊 ê 光度衝足懸 ê，用目睭直接看 to̍h 看會著。你若是用雙筒望遠鏡來 kā 看，會當看著較大丸，按呢會較好揣。日頭落山了後，你會當 tī 西爿地平線遐揣著。這張清楚 ê 影像展示足濟細節 ê。有青色 ê 彗鬚，閣有 kah 太陽風 ê 磁場產生 交互作用 ê 離子彗尾。Leonard 彗星 tī 12 月 12 ê 時陣倚地球上近， tī 12 月 18 ê 時陣倚金星上近。紲落來，Leonard 彗星會行 tùi 近日點去，伊會 tī 明年 1 月 3 號倚太陽上近。因為 Leonard 彗星 tī 12 月下旬 日頭落山了後 ê 暗暝 出現，所以伊這馬煞變做 2021 年 ê 聖誕彗星矣！ ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211225/ 影像：Rolando Ligustri (CARA Project, CAST) and Lukas Demetz 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211225.html Powered by Firstory Hosting

這張引人注目 ê 相片 是 ùi 哈伯遺產資料庫 提著 ê 影像資料。這个 Stephan 五重奏 是頭一个去予辨識出來 敆做堆 ê 星系群。In 差不多有 3 億光年遠，毋閣五粒內底干焦有四粒是 tī 仝一个宇宙距離牽做伙 ê。毋閣，另外彼个嘛是一看著知。這陣交互星系：NGC 7319, 7318A, 7318B, kah 7317, 看起來是有較黃。In 攏有去予拗彎 ê 箍箍仔 kah 尾溜，這是因為 in 受著會破壞結構 ê 潮汐力 ê 影響。毋閣主要 ê 藍色星系 NGC 7320 是離咱較近，干焦 4000 萬光年遠爾爾。伊 kah 這陣交互星系毋是仝一陣 ê。Stephan 五重奏是 tī 飛馬座 內底。用四个交互星系 ê 距離來估算，in ê 範圍差不多是 50 萬光年闊。Tī 正爿頂懸後壁，天文學家閣揣著另外一个星系 NGC 7320C，差不多嘛是 3 億光年遠。按呢會予 這陣交互星系閣變做五重奏。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211218/ 影像提供：NASA, ESA, Hubble Legacy Archive 資料處理 kah 版權：Bernard Miller 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211218.html Powered by Firstory Hosting

日頭發生啥物代誌？有當時仔伊看起來 to̍h 親像是經過一个足大 ê 透鏡。毋閣這支影片 ê 太陽是迵過幾若百萬塊細片透鏡，to̍h 是 冰晶 啦！水 tī 大氣 內底結凍了後，會變做細細片 ê 六角形冰晶。這寡 冰晶 大部份攏是 倒平平 落 tùi 塗跤去。觀測者 會當 tī 日頭 peh--起來 抑是日頭落山彼搭，揣著足濟冰晶。落 tī 日出日落連線 面頂 ê 冰晶，攏會變做一个微型透鏡，反射太陽光到 咱 ê 目睭，產生 幻日現象，這是一款 專業術語。這支影片 是 tī 2017 年 tī 瑞典 中部 ê Vemdalen 趨雪場 翕 ê。中央 ê 是 太陽，毋閣倒爿 kah 正爿有兩个足光 ê 幻日 leh 發光。除了這，猶閣有 22 度闊 ê 日暈、kah 足罕得看著 ê、閣較暗 ê 46 度日暈。這嘛是 太陽光反射 大氣內底 ê 冰晶 產生 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211228/ 影像：Håkan Hammar (Vemdalen Ski Resort, SkiStar) 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211228.html Powered by Firstory Hosting

咱這馬閣有一台新 ê 太空望遠鏡矣！這台叫做 JWST 太空望遠鏡，伊毋若比 哈伯太空望遠鏡 ê 鏡面 大 5 倍以上，而且閣會當比 哈伯太空望遠鏡 提著閣較好 ê 紅外線 影像。這張相片 是昨昏 tī 地球頂懸 ê JWST 太空望遠鏡。伊才拄 ùi Ariane 五號火箭 ê 頂節火箭擲出來。這台火箭是 ùi 南美洲 ê 法屬 Guiana 發射 ê。後個月 JWST 會行到 太陽-地球 系統 ê L2 點 附近，彼是一个會 kah 地球仝步踅太陽 ê 點。Ùi 這馬開始到紲落來 5 個月 ê 時間，JWST 會沓沓仔 kā 伊 摺起來 ê 鏡面 kah 規組 ê 精密科學 儀器 拍開，看 in 是毋是會當正常運作。若是無問題，JWST 就會 ùi 2022 年熱天開始，研究 宇宙中 ê 星系 kah 銀河系 內底 ê 系外行星，就是 踅其他恆星 leh 行 ê 行星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211226/ 影像：Arianespace, ESA, NASA, CSA, CNES 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211226.html Powered by Firstory Hosting

你敢猶閣 leh 替天文學家鬥揣一个袂䆀 ê 禮物？恁遐 ê 夜空若是有夠烏、地平線若是有夠清氣，按呢 太陽系 可能已經 kā 你買好矣。伊會 tī 日頭落山了後，送三粒行星 kah 一粒彗星來。這張速翕相片是 12 月冬節彼暝，tī 土耳其 Kirazli 庄頭 ê 天頂翕 ê。正爿地平線是西南爿，面頂上光翕粒是金星。金星 ê 倒爿頂懸有一粒 tī 雲內底爍咧爍咧 ê，是土星。Ùi 兩粒星連過去，上倒爿頂懸彼粒是木星，是太陽系內底 ê 氣態巨行星。今年來到內太陽系 ê 人客是 Leonard 彗星 (C/2021 A1)，伊這馬 tī 地平線附近。這粒彗星是有較暗，毋閣伊 kah 金星 閣有 土星 鬥做一个等邊三角形。彗星這幾工 光甲 目睭直接看 to̍h 看有，毋閣若是有雙筒望遠鏡 會閣較好。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211223/ 影像：Tunc Tezel (TWAN) 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211223.html Powered by Firstory Hosting

12 月 ê 冬節到矣！這是北半球寒天 kah 南半球熱天 ê 頭一工。夏節、冬節、春分、kah 秋分 這寡季節 ê 天文標記，是按照太陽逐年 tī 黃道面 kah tī 地球天頂 ê 位置來決定 ê。這擺 ê 冬節點 發生 tī 今仔日 15:59 世界時 ê 時陣，這當陣 ê 太陽是 tī 上南爿，赤緯 -23.5 度 ê 所在，赤經 座標是 tī 天球 18 點 ê 所在。這予 太陽落 tī 銀河系中心 附近 ê 人馬座 方向。實際上，你若是會當 tī 較暗 ê 背景星 kah 星雲之下看著今仔日 ê 冬節太陽，按呢你看著 ê 景色可能 to̍h kah 這幅組合 ê 全景圖有小可仔 相-siâng。是講這實在是真無簡單 ê，尤其是 tī 日時。為著這个目標，咱 tī Namibia 共和國 烏趖趖 ê 夜空 翕 咱 ê 銀河，才 kā 鬥做這張全景圖。內底足光彼粒是太陽，是 tī 2015 年 12 月 21 翕 ê 速翕。這是用數位方式 kā 疊 tī 今仔日北半球冬節 ê 位置，差不多是 tī 銀河系 ê 中心附近。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211221/ 影像：Stefan Seip (TWAN) 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211221.html Powered by Firstory Hosting

這張相片本底是欲翕彗星。應該是講，這本底是欲翕 2021 年上光 ê Leonard 彗星 翕規組 ê。毋閣 宇宙 總是有伊家己 ê 想法。Tī 無夠一秒鐘 ê 時間內底，有一粒足光 ê 流星，咱 kā 叫做火流星，伊 ê 軌跡 拄仔好出現 tī Leonard 彗星 ê 下底。這粒 流星 ê 爍光 是比彗鬚 ê 青光閣較青。流星 ê 核心差不多 kah 溪邊 ê 石頭平大粒，毋閣彗星 ê 核心 to̍h kah 一个城市平大 矣。流星 ê 青光 是 ùi 流星 ê 核心蒸發出來 ê 鎂，毋閣 彗星 ê 青光 可能是 ùi 彗星 ê 核心噴出來 ê 雙原子碳。這張相片是 10 工前 tī 美國 加州 ê Sacramento 河 kah Lassen 山 翕 ê 夜景。火流星出現 tī 今年 雙生仔座流星雨 ê 前半場，閣過幾若工 to̍h 是流星上濟彼工矣。Leonard 彗星 這馬已經變甲愈來愈暗矣，頂禮拜是目睭會當看上清楚 ê 時陣，這馬已經 徙到南方 ê 天頂 矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211220/ 影像：Cory Poole 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211220.html Powered by Firstory Hosting

行星排規排毋是巧合。這是因為這寡 行星 leh 踅太陽 ê 軌道 攏 kah 黃道面 差無蓋濟。你若是 úi 黃道面內底看，就親像 tī 地球面頂 看仝款，所有 ê 行星看起來 to̍h 敢若排做 一排。毋閣，三粒上光 ê 行星 攏 tī 仝一个方向，這 to̍h 是巧合矣。這个巧合是這個月初去予翕著 ê。相片 是 tī 意大利 Chiuduno 市 日頭落山了後翕 ê。Úi 正爿到倒爿是 金星、土星、木星，猶閣有 月娘、kah 遠方 ê 天王星 攏 排做一排。雲 tī 天頂一巡一巡行到 日落 彼搭。這個月 tī 天頂 ê Leonard 彗星 會愈來愈暗，毋閣你若是拄著無月娘 ê 暗暝，猶是會當 tī 天頂看著這寡行星排規排。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211219/ 影像：Antonio Finazzi 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211219.html Powered by Firstory Hosting