NASA 逐工一幅天文圖 APOD Taigi

是啥物物件 ùi 太陽面頭前行過？伊看起來敢若是月娘，毋閣毋是 地球 ê 月娘，因為伊毋是圓 ê。伊是火星 ê 月娘，火衛一 Phobos。這支影片 是一個月前 毅力號探測車 tī 火星表面 翕 ê。火衛一 Phobos 有 11.5 公里闊，伊 ê 直徑干焦是 月球 ê 150 分之一爾爾。毋閣伊 kah 火星 ê 距離，嘛比月娘 kah 地球 ê 距離，閣較近 50 倍。講實在 ê，火衛一 Phobos 離火星傷近矣！按呢 伊 可能會 tī 未來 5000 萬年內，去予 火星 ê 引力搝甲挵家散宅、摔入去火星。免偌久，低軌道 ê 火衛一 Phobos tī 火星造成 ê 日食，就會比月娘 tī 地球 造成 ê 日食，走閣較緊。這支影片 是照實際 ê 時間長短咧放送 ê。火衛一 Phobos ùi 太陽面頭前行過 ê 時間，就 kah 影片放送 ê 時間仝款，攏是 40 秒。這支影片 ê 攝影師，就是 毅力號機器人探測車 (Percy)。伊這馬繼續 tī 火星 ê Jezero 隕石坑 內底探索，毋若欲 tī 現此時這个焦燥 ê 世界 揣水 ê 歷史，嘛欲揣 古代微生物 ê 性命 證據。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220509/ 影像：NASA, JPL-Caltech, ASU MSSS, SSI 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220509.html Powered by Firstory Hosting

大部份的星系攏無環，是按怎這个星系就有？愛先講一下，NGC 1512 中心附近彼箍光環是 核心環。彼是踅星系中心的環，伊會遐爾光，是 拄做好的恆星 咧發光。毋閣，大部份的恆星，會和伊邊仔的氣體佮 塗粉，踮較遠的所在，踅星系中心行，就是這張相片較外口彼輾。這个環的名，佮直覺顛倒，叫做內環。星系中心的星系棍是 chhāi 橫的。你若是倚較近共看，就會看著 內環 佮 湠--開的 中央棍仔 是相連的。咱認為講，這款有環的結構，是因為 NGC 1512 本身無對伨的結構，產生內外物質徙動的一个 長期演化。這寡星系的 重力 毋是對伨的。伊有一个恆星滿滿的星系棍，氣體佮塗粉會 ùi 內環 行到 核心環，予核心環的 恆星 形成率變甲較懸。一寡捲螺仔星系 閣有第三个環，是一輾佇閣較外口 踅 星系咧行的外環。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220508/ 影像：NASA, ESA, Hubble Space Telescope 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220508.html Powered by Firstory Hosting

2 月有幾若工會當 tī 美國 Yosemite 國家公園，看著足難得看--著 ê 紅水沖。彼當陣河水 ùi 面頭前流過，天氣嘛足配合 ê，日落 ê 方向嘛拄拄仔好。攝影師攏會 ùi 山跤揣一个上好 ê 地點來翕。這个國家公園 季節性 ê 馬尾水沖，會 tī 適當 ê 時機，去予 El Capitan 岩壁 ê 烏影孤立出來。紲落來，紅色 ê 日光會繼續照 tī 這个水沖。免偌久，就會出現這个戲劇性、紅記記 ê 紅水沖，毋閣干焦會出現一時仔爾爾。是講，馬尾紅水沖 嘛會當 tī 有月光 ê 時陣看--著。毋閣欲利用月光 ê 反射，就閣較困難矣。紅水沖效應會 tī 月娘較光彼工，tī 月落彼陣，踮西爿地平線 ê 方向看--著。這張相片是 4 月 15 透早，月娘欲落去進前翕 ê。這个隨會無--去 ê 馬尾紅水沖，是 光-iàⁿ-iàⁿ ê 膨月共照予光 ê。這陣 ê 天頂嘛有夠清，拄仔好予這个攝影計畫，通順利進行。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220507/ 影像：Tara Mostofi 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220507.html Powered by Firstory Hosting

這幅宇宙天景，有翕著 NGC 3572 內底 少年恆星邊仔 leh 發光 ê 氣體 kah 烏暗 ê 塗粉雲。美麗 ê 發射星雲 kah 星團，tī 遙遠南天夜空 ê 龍骨座內底 起帆。NGC 3572 內底 ê 恆星，主要是 tī 這幅望遠鏡景色 倚中央頂懸遐。這个星團 ê 距離，估計是 9000 光年遠。照按呢算，伊 ê 大細差不多有 100 光年闊。咱看--著 ê 星際氣體 kah 塗粉，攏是星團內底原生分子雲 ê 一部份。星雲內底 較實密 ê 物質流，去予恆星風 kah 輻射侵蝕去，離開活動力較強 ê 少年恆星。遮應該是一个當咧形成恆星 ê 地點。這个外形予人想著 肚胿仔星系 IC 410，彼是一个北天觀星者較熟 ê 星系。紲落來幾若千萬年到幾若億年，星團內底 ê 氣體 kah 恆星，會受著 引潮力 kah 超新星爆炸 ê 影響湠--開。超新星爆炸，就是星團內底 ê 大質量恆星，用爆炸結束 in 短短 ê 一生。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220506/ 影像：Carlos Taylor 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220506.html Powered by Firstory Hosting

華麗 ê 捲螺仔星系 NGC 3521 離咱干焦 3500 萬光年遠爾爾，伊就佇北天 ê 春季星座 獅仔座 遐。NGC 3521 佇天頂足光 ê，用細台天文望遠鏡就會當看著伊。毋閣大部份 ê 天文攝影師攏較愛翕其他星系，親像是 獅仔座 ê 捲螺仔星系 M66 佮 M65。毋閣講實在 ê，咱 無可能 假影 看袂著 這个多彩 ê 宇宙肖像。這个星系 ê 大細差不多有 5 萬光年闊。伊有 無連紲、無規則外形 ê 特殊 捲螺仔手骨，面頂有塗粉綴咧、有粉紅仔色 ê 恆星形成區，閣有 藍色少年恆星 ê 星團。佇這幅 NGC 3521 ê 深空影像，咱閣看會著伊藏佇一个較暗 ê 大型氣泡外殼內底。這个外殼應該是潮汐殘骸，是 ùi 足久以前佮 NGC 3521 合併 ê 衛星星系 內底，搝長 ê 恆星流。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220505/ 影像：Mark Hanson and Mike Selby 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220505.html Powered by Firstory Hosting

咱這馬透早，猶看會著行星連珠。木星、金星、火星、kah 土星，ùi 四月中開始到今，會 tī 透早踮天頂排做一逝，這是規世界攏看會著 ê 景色。這張相片 有翕著天頂幾若粒行星，是頂個月 tī UNESCO 聯合國教科文組織 世界遺產 ê 現場，Djoser 樓梯金字塔 翕 ê。這个金字塔 tī 埃及 ê Saqqara 大墓地，是 西元前 27 世紀起--ê。伊是目前為止咱所知影 上老 ê 金字塔。這是兩張相片合成 ê，前景是日落進前 ê 藍色時間 翕 ê，背景是踮仝一位，毋閣是隔轉工 ê 透早翕 ê。是講，早起時 ê 行星連珠，其實是 沓沓仔咧改變。頂個月底，木星 kah 金星換位 矣。這個月底，木星 kah 火星嘛會換位，兩粒行星 ê 角距離會 比 1 度閣較近。這張媠甲親像一幅圖 ê 行星連珠，只是巧合爾爾。Tī in ê 世界內底，猶是繼續踅 太陽 咧行，就 kah 過去幾若十億冬仝款。這是比這个 古早時代起--ê Djoser 金字塔，閣較早就有 ê 代誌。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220504/ 影像：Osama Fatehi 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220504.html Powered by Firstory Hosting

太陽是發生啥物代誌咧？兩工前，南美一寡所在發生 日偏食。日偏食就是日頭有一部份去予月娘 閘去 矣。這張 迵過雲 ê 日偏食相片，是日頭 tī 阿根廷 Patagonia 日落彼陣翕 ê。Tī 這張趨趨 ê 相片內底，地球是 tī 正爿。這擺 ê 日食，是月娘有一部份行到 地球 kah 太陽之間。雖罔講這張相片 予人印象足深 ê，毋閣因為日偏食造成環境變暗 ê 影響，是比日頭去予厚雲閘著 ê 影響閣較少。差不多閣兩禮拜，全 南美 kah 一部份 ê 北美 就會看著月全食 矣！月全食就是地球行到 月球 kah 太陽之間。差不多閣兩冬，北美 就會看著 日全食 矣！ ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220502/ 影像：Aixa Andrada 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220502.html Powered by Firstory Hosting

佇 NGC 3628 這張清楚 ê 望遠鏡影像內底，咱看會著膨獅獅 ê 星系盤，去予烏暗 ê 塗粉帶破做兩爿。這張華麗 ê 側向捲螺仔星系 肖像，予一寡天文學家 想著，伊閣有一个較有名 ê 偏名，叫做美國割包星系。NGC 3628 下跤閣有一个較細 ê 星系，應該是伊 ê 衛星星系。伊閣有一條足暗，毋閣伸足長 ê 潮汐尾溜。這條搝長 ê 尾溜差不多是 30 萬光年長，超過這幅圖倒爿頂懸 ê 範圍。NGC 3628 佮 伊兩个 厝邊星系，大捲螺仔星系 M65 佮 M66，去 hŏng 鬥做一組，叫做 獅仔座三生仔，in 三个是佇仝一个本地宇宙 ê 環境內。這三个厝邊星系 ê 重力交互作用，應該就是造成潮汐尾溜 ê 原因。而且這嘛是造成捲螺仔星系盤面頂有大片 ê 爍光，造成星系盤扭曲 ê 原因。這个迷人 ê 島宇宙 就佇北天 ê 春季星座 獅仔座 內底。伊差不多有 10 萬光年闊，離咱有 3500 萬光年遠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220429/ 影像：Wilhelm Michael Kasakow, Olaf Guillaume 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220429.html Powered by Firstory Hosting

4 月 24 天欲光進前，這粒佇天頂 光-iàⁿ-iàⁿ ê 天琴座流星，綴銀河中央盤 ê 方向咧行。無偌久，伊 ê 反射光就投影佇中國雲南省念湖 ê 湖面。這个 逐年攏看會著 ê 天琴座流星雨，是目前咱知影上老 ê 流星雨。逐年四月底 ê 時陣，咱美麗 ê 地球會行過 長週期彗星 Thatcher 佇伊軌道留落來 ê 塗粉。這个時陣就是天琴座流星雨 ê 活跳期。順這粒 火流星 ê 軌跡，倒轉去揣伊來 ê 方向，就會揣著 流星雨 ê 輻射點。這个輻射點就佇天琴座，佇北天春季天頂較懸 ê 所在，無佇這幅圖內底。佇這个天星閃閃爍爍 ê 夜空，下半月才拄 peh--起來，月光就按呢投影佇恬靜 ê 湖面。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220428/ 影像：Jeff Dai (TWAN) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220428.html Powered by Firstory Hosting

Kā kha-mé-lah 固定 tī 三跤馬面頂，翕幾若張短時間感光 ê 相片了後，kā 這寡相片按照 恆星 ê 位置對齊，才提著這張美麗 ê 夜空相片。這張相片是 tī 西班牙東北角 ê Albany`a 田庄 翕 ê。Tī 這張天星滿滿 ê 夜空相片中央，是獵戶座內底彼三粒足光 ê 恆星。獵戶座皮帶 上東爿（倒爿）彼粒是 參宿一。伊 to̍h chhāi tī 霧霧光光 ê 火舌星雲 kah 彼个有烏暗外形、有名 ê 馬頭星雲 ê 邊仔。咱用目睭直接看，就看會著 tī 獵戶座皮帶 彼三粒星 下底 ê 獵戶座大星雲。這是離咱 ê 美麗地球 上近 ê 大型恆星托兒所，干焦 1500 光年遠爾爾。咱會當 tī 相片內底看著暗暗彎彎 ê Barnard 環，伊看起來是 kā 獵戶座較光 ê 恆星 kah 星雲 箍 tī 內底。這是這是北方 ê 春天，所以咱熟似 ê 北方寒天 星座，這馬欲落去矣。獵戶座 ê 正爿下跤是西爿 ê 地平線，遐附近 有一粒足光 ê 藍巨星 參宿七，去磕著松仔 ê 樹椏。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220416/ 影像：Juan Carlos Casado (Starry Earth, TWAN) 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220416.html Powered by Firstory Hosting

佇你揤這粒開關進前，未來猶有兩種宇宙通揀。等你揤這粒開關了後，你就會活 tī 唯一 ê 一个宇宙矣。遮是彼个有名 ê Schrödinger 的貓咪仔 ê 網路實驗。你若是 kā 這幅圖內底太空人 提咧 ê 彼張圖 ê 紅色開關揤落去，這幅圖會有兩款結果：一款是太空人提著一隻活--ê 貓咪仔，一款是太空人提著一隻死--去 ê 貓咪仔。你揤落去彼陣，你大腦 ê 腦波 kah 你 ê 電子設備會 tī 毫秒短 ê 時間內鬥空好勢，產生一个應該是 量子力學 主導 ê 隨機結果。有一寡人相信講，你個人發起 ê 量子決定，會 kā 宇宙分做兩个，活--ê 貓咪仔 kah 死--去 ê 貓咪仔 會 tī 較大 ê 多重宇宙 內底 ê 無仝宇宙同齊存在。另外一寡人相信講，你揤開關彼陣，就會用一款你進前無法度預測 ê 方式，kā 兩个可能 ê 宇宙 合做 一个矣。閣有一寡人相信講，宇宙 是古典、確定 ê。所以你揤開關彼陣，袂 kā 宇宙分做兩个，干焦會 kā 自開始就決定 ê 結果揤出來爾爾。咱 逐工一幅天文圖 相信講，毋管這件代誌是偌爾 白痴，你猶是會揤這粒開關。毋管出現佗一个結果，你應該攏會思考一下仔人生。抑是兩下仔！ ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220424/ 影像：NASA, Erwin Schrödinger’s cat 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220424.html Powered by Firstory Hosting

是按怎天頂發出這款光？敢若是有足大 ê 虹 tī 天頂一輾一輾疊出去按呢？這是 氣輝 啦！其實空氣隨時攏 leh 發光，是咱看袂著。毋閣，若是有風暴倚近，可能會 tī 地球大氣 造成明顯 ê 波紋。這款 重力波 to̍h 親像是 kā 石頭擲入去平靜 ê 水 內底產生波動仝款，伊是 tī 空氣內底產生波動。紅色 ê 氣輝 可能是 tī 87 公里懸 ê OH 分子 去予太陽 ê 紫外光 激發，發出 ê 光。毋閣柑仔色 kah 青色 ê 氣輝 可能是 閣較懸 ê 鈉 kah 酸素 原子 發出 ê 光。這个攝影師幾若年前 tī 中國 駛車到 青海省 Keluke 湖 附近 ê 時陣，本底是注意著 銀河系 美麗 ê 中央帶。伊 kā 車停 leh，落來翕相。結果伊 ê kha-mé-lah 敏感度袂䆀，翕出來 ê 相片 竟然 煞看會著 足明顯 ê 氣輝帶，而且規个天頂攏有。這張相片有用數位加強 ê 方式 kā 色光變甲閣較顯目。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220313/ 影像：Xiaohan Wang 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220313.html Powered by Firstory Hosting

木星表面彼个大烏點是啥物？彼是 木衛三 Ganymede 的烏影。伊是 木星 上大粒的衛星。木衛 若是行到木星四大衛星佮太陽之間，in 就會佇木星表面 產生烏影。這就和 月娘行到 地球佮太陽之間仝款。佮佇地球仝款，你若是 chhāi 佇 木星表面的烏影 遐，木衛就會共太陽完全閘去，按呢你就會看著 日全食 矣。毋閣佮地球無仝的是，木衛的烏影 會定定出現。閣較無四常 的是，太空船離 in 有夠近的，才會記錄著這張 高解析度 的 影像。Juno 太空船 佇二月底彼陣飛到 木星 附近，所以離太空船較近的木星雲佮木衛的烏影才會看起來 遮爾大。木星是 太陽系 上大粒的行星。Juno 太空船已經佇木星面頂，揣著足濟新的發現，嘛包括最近 高速擴大的圓形極光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220427/ 影像來源：NASA/JPL-Caltech/SwRI/MSSS 資料處理 kah 許可：Thomas Thomopoulos 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220427.html Powered by Firstory Hosting

彼毋是彗星喔！Tī 昴宿星團 下跤翕粒，是水星。對 太陽系上內底翕粒行星 長時間感光，會看著一个料想外 ê 物件：一條尾溜。水星 薄薄 ê 大氣層 內底有少量 ê 鈉元素，會去予太陽光激發發光。太陽光嘛會共 水星表面 ê 分子放出來，捒去較遠 ê 所在。尤其是 ùi 鈉元素 發出 ê 黃光，是有較光。這張深空相片是頂禮拜 tī 西班牙 La Palma 翕 ê，咱看會著水星 kah 伊 ê 鈉尾。毋閣這是有鬥濾光片翕 ê，會予發出鈉元素 ê 黃光 透過來。頭一擺 預測 水星有尾溜是 tī 1980 年代，頭一擺去 hŏng 揣著 是 tī 2001 年。有一隻 ùi 2011 到 2015 年 踅水星咧行 ê NASA 信使號機器人太空船，對水星 做足濟觀測，提著足濟尾溜 ê 細節。是講，一般咱講著 尾溜，攏是咧講 彗星 ê 尾溜較濟。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220503/ 影像：Sebastian Voltmer 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220503.html Powered by Firstory Hosting

烏洞看起來是生做啥款？為著欲揣著這个答案，地球各地 ê 電波望遠鏡 做伙合作，互相協調時間來觀測烏洞。咱觀測 ê 這粒 烏洞，是目前咱知影 tī 天頂 有上大 事件視界 ê 烏洞。若是孤一粒烏洞，就是干焦 烏-mih-mà 爾爾。毋閣伊是一个引力怪獸，邊仔有發光氣體踅伊咧行。歷史上頭一張 解析成功 ê 烏洞影像，是 M87 星系 中心 烏洞 邊仔 ê 區域。觀測 ê 解析度比烏洞 ê 事件視界 較細，按呢咱拄仔好會當看著烏洞 ê 事件視界。相片 中央烏烏彼區，毋是事件視界。伊是 烏洞 ê 烏影，是中央區 ê 發射氣體去予中央烏洞 ê 重力食去矣。烏洞烏影 ê 寸尺 kah 外形，是 事件視界邊仔 ê 發光氣體、強力 重力透鏡效應造成 ê 屈折、kah 烏洞自旋，做伙決定 ê。事件視界望遠鏡 (EHT) 共 烏洞烏影 解析了後，就有法度證明 Einstein 進前講過 ê 重力理論：就算是 tī 極端區域，重力猶是有咧作用。而且這擺 ê 觀測嘛予咱 清楚 ê 證據，講 M87 ê 中心有一粒自旋烏洞，伊 ê 質量有 60 億 ê 太陽質量遐爾大。這張影像是 tī 2019 年 ê 時陣發表 ê，EHT 這馬有 愈來愈濟望遠鏡 加入，嘛觀測 愈來愈濟烏洞。EHT 毋若會追蹤烏洞 ê 偏振光，這馬嘛開始觀測 咱 銀河系 中心 烏洞 kah 伊附近 ê 區域矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220501/ 影像：Event Horizon Telescope Collaboration 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220501.html Powered by Firstory Hosting

這个世界因為行星連珠煞精神起來。佇 地球 天欲光進前，東爿 ê 天頂有咱熟似 ê 行星排做一逝。佇地球北半球，這寡 排規排 ê 行星 差不多攏 排橫的。毋閣佇 地球南半球，這寡排規排 ê 行星煞攏排直的。這張相片 是佇 澳洲 南部 ê 雪梨歌劇院 翕 ê。這寡排直的 ê 行星是 5 工前 ê 影像。這寡透早就看會著 ê 行星，ùi 頂懸到下底是：土星、火星、金星、kah 木星。到四月底，金星 kah 木星會沓沓仔 換位，按呢 in ê 角距離就會變較細。紲落來到五月底，這兩粒行星 換位 了後，木星就會行倚到火星附近。到六月彼陣，水星嘛會加入，變做五星連珠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220426/ 影像：Prasun Agrawal 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220426.html Powered by Firstory Hosting

佇 銀河 上光 ê 所在，有一个星雲當咧發生 足奇怪 ê 代誌。這个星雲就是 NGC 3372，伊嘛去 hŏng 叫做 龍骨座大星雲，是大質量恆星 kah 變化星雲 in 兜。佇 這幅圖 中央下跤彼个較光 ê 結構，是 鎖匙空星雲 (NGC 3324)，內底有幾若粒這款大質量恆星。這張影像 內底這規个 龍骨座星雲 有 300 光年 闊，就佇離咱 7500 光年遠 ê 龍骨座 內底。龍骨座 η 星 是龍骨座星雲內底，上活潑 ê 恆星。伊捌是 1830 年代，天頂上光 ê 恆星，毋閣了後就 隨變暗--去 矣。龍骨座 η 星 這馬應該 lih-欲 倚 超新星爆炸 ê 階段矣。伊 ê X-光 影像嘛 kā 咱講，龍骨座大星雲 大部份 ê 區域，一直攏是 製造超新星 ê 工場。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220425/ 影像：Ignacio Javier Diaz Bobillo 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220425.html Powered by Firstory Hosting

魔鬼塔是按怎來 ê？這是 tī 美國 Wyoming 州 ê 特殊 大岩石，伊 ê 起源到底是啥，到今猶 leh 冤。有一个主要 ê 假說是講，這是以前一寡無機會流到地表變做火山 ê 熔岩煙流，𠕇--去了後煞變做這款岩石。這个理論 閣講，以前 tī 這个密度較懸 ê 火山頷頸外口，捌包一輾較輕 ê 岩石，毋閣這馬已經去予侵蝕了了矣。賰 ê 部份 to̍h 變做這个 壯觀 ê 石塔。美洲原住民 kā 伊叫做 熊的旅館 抑是 殕色的大喇叭。這个實密 ê 岩石有地球面頂上長 ê 六角 柱 形體，有超過 180 公尺懸。相片面頂較懸彼塔，有 銀河系 ê 中央帶 迒過天頂。咱嘛看會著足濟有名 ê 天體。Tī 石塔 ê 正爿，有烏巡 ê 薰吹星雲，kah 紅色 ê 內海仔星雲。前景 有青色 ê 草仔 kah 樹仔，石塔 ê 倒爿地平線附近，有雲。Kah 其他足濟國際地標無仝，魔鬼塔 是會使 peh ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220413/ 影像：MaryBeth Kiczenski 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220413.html Powered by Firstory Hosting

華麗 ê 捲螺仔星系 Messier 104 會出名，是因為伊 lih-欲 完全 側向 ê 外形，kah 會閘光 ê、厚-tut-tut ê 塗粉環。伊有一个足大粒 ê 中央核球，內底攏是恆星。頭前 ê 宇宙塗粉，予這个星系看起來敢若是一頂帽仔 ê 外形。所以這个星系才有一个閣較有名 ê 偏名，叫做草帽仔星系。這張有名星系 ê 清楚影像，是 ùi 超過 10 點鐘久 ê Hubble 太空望遠鏡 ê 影像資料來 ê。因為 M104 ê 中央核球足光 ê，按呢一寡較暗 ê 細節就看較無。Kā Hubble 影像處理了後，就有法度看著這寡較暗 ê 細節。草帽仔星系嘛叫做 NGC 4584，咱會當 tī 規个光譜 攏看著伊，而且 伊 ê 中央 有一粒超大質量烏洞。M104 離咱有 2800 萬光年遠，大細有 5 萬光年闊。伊是 室女座星系團 南爿 上大 ê 星系。仝款，視野內底彼寡十字形 ê 背景星，攏是咱銀河系內底 ê 恆星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220423/ 影像來源：NASA, ESA, Hubble Legacy Archive 資料處理 kah 版權：Ignacio Diaz Bobillo 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220423.html Powered by Firstory Hosting

佇 本地星系群 內底，這个上大上媠 ê 恆星形成區，是去予大質量恆星、磨蝕風、厚-tut-tut ê 塗粉、kah 高能光 kā 雕出來 ê。這个恆星形成區叫做 N11，咱會當佇 大麥哲倫星雲 (LMC) ê 正爿頂懸 揣著伊。LMC 是 銀河 ê 厝邊，銀河是 LMC ê 母星系。是講，銀河是逐家足愛翕 ê 目標。這幅圖 是為著欲做研究翕 ê，所以本底是用 Hubble 太空望遠鏡翕 ê，落尾才閣 為著藝術性重新處理過。頂懸彼區叫做 NGC 1763，毋閣這規个 N11 發射星雲是 LMC 內底第二大 ê，上大 ê 是 蜘蛛星雲。咱嘛會當 tī 這幅圖內底，看著實櫼 ê 烏暗塗粉球 內底有拄做出來 ê 少年恆星。最近一寡利用 Hubble 資料 tùi LMC 內底 ê 變星做 ê 研究，會當幫贊咱 重新校正 咱觀測會著的宇宙 ê 距離尺度。毋閣這个結果，佮用四界攏是 ê 宇宙微波背景 算出來 ê 尺度，有小可仔無仝。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220412/ 影像來源：NASA, ESA 資料處理：Josh Lake 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220412.html Powered by Firstory Hosting

咱美麗地球 ê 表面，有 壯麗 ê 海洋 kah 雲色。Tī 日時 轉變到 暗暝 ê 時陣，咱袂看著 in 面頂有一條明顯 ê 界線。顛倒是，這个烏影線抑是晨昏線是湠--開 ê。咱會當看--著 ê，是伊沓沓仔轉做烏暗色，就 kah 咱 tī 天欲光 抑是 天欲暗彼陣 ê 經驗 相-siâng。太陽 ùi 這幅影像 ê 正爿照過來，雲頂反射 ê 紅光，是太陽光行過厚塗粉 ê 對流層了後，賰較紅 ê 波段，反射--轉來 ê 結果。對流層就是地球大氣層上豐富 ê 上低層。若是 ùi 懸海拔層看，就會清楚看著 tī 日時彼爿 ê 頂層，有 去予散射 ê 藍色 太陽光，消失 tī 烏暗 ê 太空中。這張相片是 2001 年 6 月 ùi 國際太空站翕 ê。伊是 tī 離地表 390 公里懸 ê 所在，踅地球咧行。當然 你嘛會當 tī 厝 ê 看地球這馬 ê 狀況。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220422/ 影像：ISS Expedition 2 Crew, Gateway to Astronaut Photography of Earth, NASA 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220422.html Powered by Firstory Hosting

你若是比日頭閣較早 peh--起來，按呢你應該會當看著這个趣味 ê 天景。有四粒行星 排做一逝，tùi 西爿地平線 ê 方向去。這寡行星實在是有夠光 ê。就算是市內 ê 光害 遮爾嚴重，猶是看會著。這張相片是 tī 美國 Niú-iok 市翕 ê，頭前彼个地標是 RFK (Triborough) 橋。這寡行星 ùi 倒爿到正爿是：木星、金星、火星、kah 土星。行星 tī 天頂 排做一逝，這是因為 in 攏 tī 仝一个 盤面 踅 太陽 leh 行。這个盤面就叫做 黃道面，是 太陽系 早期形成 ê，面頂有所有 ê 行星，嘛包括 地球。這个早起時 ê 四星連珠 現象，會 tī 四、五月一直看著。到六月 ê 時陣，水星 嘛會加入，變做五星連珠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220420/ 影像：Stan Honda 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220420.html Powered by Firstory Hosting

這隻大雞母 ê 雞卵，可能會孵出一粒恆星。這張用科學色彩表現 ê 相片，是去予編做 IC 2944 ê 發射星雲，毋閣伊明顯 ê 外形予伊提著一个名，叫做 走路雞星雲。這張相片下底，有較細、較暗 ê 分子雲，內底有足濟閘光 ê 宇宙塗粉。In 叫做 Thackeray 雲球，因為這是 Thackeray 發現 ê。「雞卵」是 重力 聚集、會當形成 新 恆星 ê 所在。是講 in ê 未來猶毋知，因為 in 嘛會去予附近少年恆星 ê 強輻射風，侵蝕了了。這寡一搭一搭 ê 發光氣體、有反射塗粉 ê 複雜區域、kah 大質量 ê 高能恆星，做伙 組成 開放星團 Collinder 249。Ùi 咱估算這个星雲 ê 距離 6500 光年遠 來算，這个華麗 ê 天景有 60 光年闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220419/ 影像：Stefan Steve Bemmerl 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220419.html Powered by Firstory Hosting

公視「村裡來了個暴走女外科」第四集內底，小劉醫師用著一款手術叫做「王蟲縫法（王蟲紩法）」，是臺大病院婦產部 ê 施景中醫師發明–ê。這款紩法，會當佇產婦生產過程拄著性命危險 ê 時陣，莫 kā 產婦 ê 子宮提掉，閣有法度 kā 產婦 ê 命救轉來。施景中醫師解說 講，這款紩法 ê 英文叫做 Nausicaa sutures，會按呢號名是因為 Nausicaa 是希臘神話「Odyssey」內底一个國王 ê 查某囝，這个名有「重生」ê 意思，有一粒小行星嘛號做這个名。確實！有一粒小行星就叫做 192 Nausikaa，伊行佇火星佮木星之間 ê 小行星帶內底。伊 ê 直徑才 100 公里闊，差不多 ùi 台北到苗栗 ê 距離。伊 ê 視星等差不多是 8 等，佮海王星差不多平光。毋閣咱無法度用目睭直接看著，愛用天文望遠鏡才看會著。天文學家利用觀測提著 ê 光度資料，模擬出伊 ê 3D 模型，就親像這張相片按呢。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê Bonus： https://apod.tw/bonus/20220517_192nausikka/ 影像：Wikipedia - 192 Nausikaa 音樂：P!SCO - 鼎鼎 聲優：蔡老師 Powered by Firstory Hosting

你無法度用望遠鏡看著 Leonard 彗星這條 超級長 ê 彗尾，因為伊傷長矣啦！你嘛無法度用雙筒望遠鏡看著彗尾，因為猶是傷長！嘛袂當用目睭直接看著，因為伊傷暗矣！你若是 tī 城市內底嘛看無，因為 天頂傷光矣！毋閣你若是 tī 一个烏-mih-mà ê 所在，會當用 kha-mé-lah tī 倚地平線 ê 所在翕著。彗星今仔日離太陽上近，拄仔好 tī 水星 kah 金星 中央。是講 彗星 若是猶活咧，你可能猶有機會。這張相片 是頂個月 tī 西班牙 Canary 群島 ê La Palma 島 翕 ê。是 kā 兩張 深空闊幅 kha-mé-lah 翕 ê 影像鬥出來 ê。紲落來，Leonard 彗星 若是有活咧，彗核賰 ê 部份就會離開 太陽系，永遠袂閣轉來！ ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220103/ 影像：Jan Hattenbach 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220103.html Powered by Firstory Hosting

你袂當 踮銀河面頂行。毋閣你會當 tī 這个烏墨墨 ê 夜空內底 認捌伊。Tùi 目睭來講，tī 烏暗無月娘 ê 暗時，這个迒 tī 天頂無夠光 ê 光跡，to̍h 親像是一條天堂路。發光 ê 天體光帶內底，是足濟暗淡、遙遠天星 ê 光。光帶中央去予閘光 ê 星際塗粉雲切做兩爿。這條光帶 to̍h chhāi tī 咱 ê 銀河 盤內底。伊叫這个名是因為伊看起來親像是一條牛奶路。Ùi Galileo 時代開始，銀河 to̍h 去予望遠鏡觀星者看足濟矣，內底有 一大陣算袂清 ê 恆星 kah 宇宙奇蹟。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210703/ 影像：Rolf Weisenfeld 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210703.html Powered by Firstory Hosting

這个任務本底是欲記錄 暗時 tī 天頂 leh 飛 ê 鳥仔，毋閣落尾煞變做 leh 記錄這个美麗 ê 夜空。這張闊幅 ê 拼鬥相片 是 2020 年 tī 葡萄牙 Mértola 市 ê 金色 草埔 翕 ê。Tī 這个暗摸摸 ê 所在，咱隨有法度看著天頂彼个 tī 夜空發光、媠甲予人讚嘆 ê 彎弓橋：就是咱 銀河 系 ê 中央帶。毋閣這个夜空毋若按呢爾爾。天頂閣有薄雲，就親像是金色 ê 光帶。火星 tī 上倒爿遐，土星 kah 木星 嘛同齊出現，攏 tī 上正爿遐，kah 火星相對面。相片頂懸遐，閣會當揣著一粒足光 ê 織女星。較遠、較暗 ê 仙女座 是 tī 倒爿，就 tī 銀河 彎弓 ê 下底。這個月有幾若粒行星，會 tī 暗頭仔彼陣，踮天頂排做一逝。這寡行星有：木星、金星、火星、kah 土星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220418/ 影像：Miguel Claro (TWAN, Dark Sky Alqueva) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220418.html Powered by Firstory Hosting

Kā 你 ê 3D 目鏡提來，踮火星表面徙動看覓咧。這个 3D 彩色影像是 tī 7 月 24，火星獨創號直升機第十改 tī 這粒紅色行星面頂飛 ê 時陣翕 ê。獨創號 ê 彩色 kha-mé-lah 翕兩張影像。兩張攏是 tī 12 公尺懸 ê 所在翕 ê，毋閣有小可仔搝開幾若公尺來提供立體視覺。這是提來建構彩色浮雕 ê 技術。獨創號 ê 立體影像是火星 毅力號 探測車科學團隊要求欲做 ê。團隊想欲 tī 毅力號第一改 ê 科學活動期間到 Jezero 隕石坑內底 ê 山龍 參觀。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210807/ 影像：NASA, JPL-Caltech, Ingenuity 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210807.html Powered by Firstory Hosting

若是有一个逐家攏看袂著 ê 宇宙之謎，毋知你會按怎叫？像這个 奇怪 ê 電波箍仔，伊 ê 簡稱是 ORCs。ORC-1 代表 5 个神祕天體，in 干焦會當 tī 電波頻率 看會著。這是 2019 年 用 澳洲 新 ê SKA 探路者 電波陣列望遠鏡觀測 ê 時陣，無意中發現 ê。影片內底上尾彼張影像，是 2021 年 南非 MeerKAT 電波陣列望遠鏡 ê 觀測資料。按呢咱 to̍h 會當看著閣較清楚 ê 細節。電波觀測資料是青色 ê，to̍h 疊 tī 暗能量巡天計畫 ê 光學/紅外線 觀測影像 面頂。這个 ùi 動畫藝術家生出來 ê 插圖，才拄 kā ORC 起源 ê 其中一个概念舞予清楚。Tī 星系中心，若是有兩个 超大質量烏洞合併，in 發--出 ê 震波 to̍h 會產生電波輻射 ê 箍仔。這个箍仔 會愈來愈大，大到 kā 影片畫面攏櫼滿矣！Kā 這支影片 搝 較遠來看，按呢咱 to̍h 會當追蹤 ORC 脹大到 100 萬 光年 闊 ê 狀況。好咧佳哉，SKA 望遠鏡 會當 kā 咱鬥量 這个電波箍仔 kah 其他有可能 ê 科學現象。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220330/ 插圖：Sam Moorfield 觀測資料：CSIRO, HST (HUDF), ESA, NASA 影像：J. English (U. Manitoba), EMU, MeerKAT, DES (CTIO) 文字：Jayanne English 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220330.html Powered by Firstory Hosting

這个視野中心 ê 恆星 to̍h 叫做 2MASS J17554042+6551277。這實在是有夠歹讀 ê，毋閣這就是伊 ê 名，是用座標來做伊 ê 目錄編號。愛好遙遠宇宙 ê 迷眾，應該已經慣勢伊尖尖 ê 形體矣。這个繞射圖樣是 18 塊 六角鏡 鬥--出來 ê James Webb 太空望遠鏡 (JWST) 產生 ê。Kā 摺--起來 ê 望遠鏡拍開了後，逐塊細塊鏡會 調整到紅外線波段需要 ê 繞射極限，予 in 有法度當做是一塊直徑 6.5 公尺闊 ê 主鏡 來運作。Ùi 這个 Webb 望遠鏡 ê 近紅外線 kha-mé-lah (NIRcam) 翕 ê 相片看會出來，in 對齊 ê 精確度已經到目前 ê 物理極限 矣。2MASS J17554042+6551277 離咱才 2000 光年遠爾爾，猶 tī 咱 ê 銀河系內底。毋閣 tī Webb 望遠鏡 leh 做對齊評估 ê 影像內底，背景彼寡星系可能有幾若十億光年遠，彼 to̍h 比咱銀河閣較遠 矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220319/ 影像：NASA, STScI, JWST 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220319.html Powered by Firstory Hosting

一般講來，國際太空站 (ISS) 干焦會當 tī 暗時才看會著。ISS 踅地球咧行 ê 時陣，咱看伊就是沓沓仔 tī 夜空 leh 飛。伊看起來就敢若是天頂 ê 一个 光點 爾爾，咱差不多一個月會看著伊一改。ISS 干焦會當 tī 日落了後 抑是 日出進前看會著。因為伊看起來會金爍爍，攏是因為伊反射太陽光。ISS 若是飛到地球 ê 烏影區，咱 to̍h 看袂著伊矣。咱唯一有法度 tī 日時看著 ISS ê 機會，是伊 ùi 太陽面頭前飛過 彼陣。毋閣伊飛足緊 ê，kha-mé-lah 愛用足短 ê 感光時間，才有法度翕著 ISS 擋 tī 太陽 面頭前 ê 剪影。這張相片就是按呢翕 ê，是這個月初 tī 中國 北京 翕 ê 系列相片，翕 ê 時機袂䆀。這組系列相片翕了了後，才閣 kah 另外一組相片 合做一張。另外彼組是 tī 差不多仝一个時間翕 ê，毋閣這組有特別翕這粒無閒刺鑿 ê 太陽 活動，kah 伊表面 ê 紋理。太陽活動是包括 tī 太陽邊界 特別紅 ê 太陽日珥、太陽表面 ê 太陽絲、kah 烏烏 ê 太陽烏子。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220411/ 影像：Wang Letian (Eyes at Night) 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220411.html Powered by Firstory Hosting

是啥物物件欲轉來矣？這張相片是 國際太空站 面頂 ê 太空人，tī 2010 年彼陣，頭一擺 ùi 這个距離看著 ê 景色。彼个物件無偌久就隨變大，變做 烏色 ê 剪影 矣。等伊飛較倚了後，咱就看會出 這个 剪影 其實是一隻太空船。落尾，咱總算知影這是 奮進號太空梭。伊連鞭就欲停踮 踅地球咧行 ê 太空站矣。這張相片，是 奮進號 飛倚到地球地平線進前去予翕著 ê，咱閣看會著一重一重 ê 地球大氣層。綴 tī 太空梭後壁彼層藍色 ê，是 中氣層。白色彼層是 平流層，柑仔色彼層是地球 ê 對流層。這寡一重一重薄薄 ê 大氣層，攏 kā 加加 leh，嘛比 地球 半徑 ê 2 葩閣較薄。In 用無仝方式 leh 維持咱 ê 性命，比論講 酸素 會當予咱喘氣，大氣層 kā 危險 ê 輻射 擋 tī 外太空。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220417/ 影像：NASA, Expedition 22 Crew 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220417.html Powered by Firstory Hosting

這款 去予風雕出來 ê 岩石，to̍h 叫做風稜石。咱會當 tī 火星 Gale 隕石坑 Sharp 山跤，寬闊毋閣有小可仔崎 ê 平原 看著伊。好奇號探測車 tī 第 3415 工 (2022 年 3 月 15) ê 火星任務內底，用 Mastcam 翕幾若張相片，才閣用數位方式 kā 鬥做一張。相片內底有翕著一个叫做 鱷魚的尻脊骿 ê 岩石，伊看起來粗皮粗皮，敢若是有鱗仝款。探測車進前捌行到 鱷魚的尻脊骿 ê 岩石遐，結果伊 ê 車輪煞歹去。為著欲予探測車繼續 peh-山，好奇號團隊決定探測車愛翻頭，行另外一條路。好奇號自 2014 年 to̍h 開始 peh Gale 隕石坑 中央彼个 5.5 公里懸 ê 山。伊那 peh，to̍h 那會當研究 火星幾若十億年前，由水形成 ê 沉積層。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220415/ 影像：NASA, JPL-Caltech, MSSS 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220415.html Powered by Firstory Hosting

這張 彩色 ê 高解析度相片 內底，有一个美麗 ê 島宇宙 Messier 96，伊 ê 捲螺仔手骨踅伊 ê 星系核 leh 行。M96 是一个捲螺仔星系，較暗 ê 捲螺仔手骨伸到離較光 ê 中央區較遠 ê 所在，差不多有 10 萬光年遠。這个大細差不多 kah 咱 ê 銀河欲平大。咱已經知影 M96 離咱有 3800 萬光年遠，伊是 獅仔座 I 星系群 ê 主要成員之一。背景星系 kah 較細 ê 獅仔座 I 星系群 ê 成員，攏會當 tī 這幅圖內底揣著。上趣味 ê 是，這个捲螺仔星系中心一點鐘方向 ê 外部捲螺仔手骨後壁，有一个 giōng-欲完全側向 ê 星系。這个 tī 後壁 ê 側向捲螺仔星系，差不多是 M96 ê 1/5 大。伊 光-iàⁿ-iàⁿ 中央核球，去予伊家己 ê 烏暗塗粉雲閘牢矣。這个背景星系若是 kah M96 實際 ê 寸尺差不多大，按呢伊 ê 距離應該會比 M96 閣較遠 5 倍。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220414/ 影像：Mark Hanson and Mike Selby 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220414.html Powered by Firstory Hosting

這張月球表面 ê 相片敢是 tī 顯微鏡下底翕 ê？毋是呢！這是用闊幅 kha-mé-lah 翕 ê 多重光照圖。為著欲產生這張圖，月球探測軌道太空船 tī 6 个月球日（地球 ê 6 個月）ê 時間內底，khêng 1700 張影像，以 月球南極 為中心，kā 無仝角度 ê 相片重複疊去-lih。落尾 這張圖，就是重重疊疊 ê 結果。表面每一點，其實是去予 太陽 照著 ê 時間比例。Tī 光照圖中央附近，有一个直徑 19 公里 ê Shackleton 隕石坑 底，伊完全攏 tī 烏影內底。月球南極 to̍h tī 時鐘 9 點方向 ê 隕石坑 ê 邊仔。月球南北極 ê 隕石坑底會永遠 tī 烏影 內底，毋閣山頂會 一直去予太陽光 照著。這張圖 tùi 未來欲起 ê 基地 來講實在是真好用。去予烏影閘暗去 ê 隕石坑 底，會當提來做 保存水冰 ê 水庫。照會著 太陽光 ê 山頂，會當提來做儉太陽能 ê 好所在。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220410/ 影像：NASA, Arizona State U., Lunar Reconnaissance Orbiter 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220410.html Powered by Firstory Hosting

Tī 這个視野內底，黃道星座摩羯座 ê 方向，有一寡較暗 ê 恆星 tī 黃道面 去予散射去。中央上光彼兩粒毋是恆星，in 是行星，是火星 kah 土星。這張 望遠鏡速翕 是 tī 4 月 4 號早起時翕 ê，有翕著透早迷人 ê 合相。這兩粒行星 ê 距離干焦 1/3 度爾爾。這一看就知影比一粒月娘 ê 視闊度閣較細。毋知你敢會當 kā 咱講，佗一粒是佗一粒？你若是臆講火星是較紅彼粒，按呢就予你臆著矣！火星面頂較暗彼粒土星，反射太陽光，發出黃白色 ê 光。就算土星較暗，咱嘛是看會著伊上大粒上光 ê 衛星，土衛六 Titan，就 tī 伊 ê 倒爿綴牢牢。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220409/ 影像：Damian Peach 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220409.html Powered by Firstory Hosting

Earendel 敢是目前為止人類發現 ê 上遠 ê 天星？這 tī 科學上真有可能，咱 to̍h 愛 ùi Hubble 太空望遠鏡 觀測著一个大 星系團 開始講。咱會當 tī 遮看著星系團 ê 重力透鏡 效應 kā 遠方背景 ê 星系 放大 kah 扭曲。這張影像 內底 ê 紅線，就是背景星系去 hŏng 扭曲 ê 形體，目前為止咱量著伊 ê 紅移 是 6.2。紅線面頂 ê 珠珠仔，可能是一粒一粒恆星、抑是星團。星系團透鏡 產生一條 會當放大到上大 ê 放大線，會 kā 背景疊做伙 ê 天體 放大到幾若千倍。星系線 kah 上大放大線 ê 交叉點，有一粒珠珠仔，證明講伊是早期宇宙 ê 孤粒恆星。這粒恆星這馬去 hŏng 號做是 Earendel。未來 tùi Earendel 輝度 變化 ê 調查，可能會用閣較濟 ê Hubble 影像。而且，等今年 James Webb 太空望遠鏡 開始運作了後，嘛真有可能會用伊 ê 影像。Earendel ê 距離，比咱所知影宇宙中任何穩定 ê 恆星攏閣較遠。毋閣這無算爆炸產生 ê GRB 090423，伊 ê 紅移 是 8.2。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220406/ 影像來源：NASA, ESA, B. Welch (JHU), D. Coe (STScI) 資料處理：A. Pagan (STScI) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220406.html Powered by Firstory Hosting

正爿頂懸藍色彼陣星，是 昴宿星團。伊嘛叫做 七姊妹仔星團，抑是 M45。昴宿星團 是天頂 ê 開放星團 內底，上光 ê、嘛 上好揣 ê。昴宿星團 內底有超過 3000 粒恆星，in 有 13 光年闊，離咱差不多有 400 光年遠。Tī in 邊仔 ê，是壯觀 ê 藍色 反射星雲，這是一寡足幼 ê 塗粉 造成 ê。有一个傳說是講，這个星團號名了後，有一粒足光 ê 恆星煞變暗--去。倒爿下跤彼个發紅光 ê，是 加州星雲。號這个名是因為伊 ê 外形 kah 加州 足成 ê。加州星雲 比 昴宿星團 較暗，所以伊較歹揣。伊嘛叫做 NGC 1499。這片發紅光 ê 雲，其實是酸素氣體，伊離咱有 1500 光年 遠。雖罔講 in 兩个離 差不多有 25 粒月娘遐爾遠，毋閣 這張闊幅、深空 ê 組合影像，猶是有 kā in 兩个 攏翕著。咱若是對這幅深空影像 斟酌 kā 檢查咧，閣會當揣著 恆星形成區 IC 348 kah 分子雲 LBN 777 (鷹仔囝星雲)。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220405/ 影像：Neven Krcmarek 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220405.html Powered by Firstory Hosting

免緊張！彼隻車無任何危險！伊袂去予天頂彼个大捲螺仔吸去太空啦！捲螺仔光其實是 極光，會出現 tī 某一个季節。極光是太空中 ê 粒子挵著地球 ê 時陣產生 ê 現象，袂變做 真空 啦！這个 發展足緊 ê 極光，是太陽 ê 日冕物質噴出事件 (CME) 噴到 地球附近 造成 地球磁層 ê 波紋。頂層 ê 紅色 極光 tī 250 公里懸 ê 所在形成，是大氣層內底 ê 酸素原子 去予外太空 ê 粒子 直接激發 ê 紅光。下層 ê 青色 極光 tī 100 公里懸 ê 所在形成，是大氣層內底 ê 酸素 原子 kah 一階激發 ê 窒素 分子 相挵，間接激發 ê 青光。100 公里懸以下 ê 所在，有一寡仔酸素原子，這就是極光斷 tī 遮 ê 原因。Ùi 邊仔看，這个 仝心 圓筒形，畫出一个 戲劇性 ê 極光冕。這張影像是 3 月中 tī 冰島 Myvatn 湖 天頂翕 ê 一張感光 3 秒鐘久 ê 相片。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220404/ 影像：Christophe Suarez 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220404.html Powered by Firstory Hosting

咱 ê 地球 毋是恬恬 chhāi tī 遐 ê。伊是踅 太陽 leh 行 ê。太陽是踅 銀河系 中心 leh 行 ê。銀河系是踅 本星系群 leh 行 ê。本星系群是落 tùi 室女座星系團 ê 方向去。毋閣 in leh 行 ê 速度，是比 規陣天體 相對 宇宙微波背景輻射 (CMBR) leh 行 ê 速度，閣較慢。這張是 COBE 宇宙背景探測衛星 tī 1993 年翕 ê 全天圖。微波光 tī 地球 ê 運動方向是 藍移，所以會較熱。毋閣伊 tī 天頂另外一个方向是 紅移，所以會較冷。這張 圖 暗示講，本星系群 用相對 原始輻射 一秒鐘 600 公里緊 ê 速度 leh 行。上開始根本 to̍h 無想到會看著 遮爾緊 ê 速度，而且到今嘛猶無法度解說是按怎會遮爾光。是按怎咱會行遮爾緊？到底是啥物物件 tī 遐 leh kā 咱影響？ ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220403/ 影像：DMR, COBE, NASA, Four-Year Sky Map 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220403.html Powered by Firstory Hosting

才無偌久，25 冬前 Hale-Bopp 彗星 踅到太陽附近的時陣，捌 tī 咱 ê 夜空產生足壯觀 ê 景色。這張相片是共彼陣 ê 原始天文相片，35mm ê 彩色幻燈片，數位化 ê 結果。這粒是 1997 年 ê 大彗星。這張壯觀 ê 影像，是佇 1997 年 4 月 1 號，彗星行過 近日點 幾若工後記錄 ê。這是用 細台望遠鏡 鬥 長焦鏡頭 感光 10 分鐘久 ê 相片，翕 ê 過程攏是手動導星。落尾翕著 Hale-Bopp 彗星 這兩條 hŏng 印象足深 ê 尾溜：白色 ê 塗粉尾溜 kah 藍色 ê 離子尾溜。相片內底 ê 離子尾溜伸足長 ê，迒過北天夜空 10 外度遐爾闊。Hale-Bopp 彗星 去 hŏng 報講，伊是一粒直接用目睭就看會著 ê 彗星。Ùi 1996 年 5 月底到 1997 年 9 月攏看會著。Hale-Bopp 彗星嘛叫做 C/1995 O1。咱這馬知影講，伊是經過 內太陽系 ê 彗星 內底，有上濟 早期太陽系 組成成份 ê 原始彗星。彗星是 ùi 遙遠 ê Oort 雲 來 ê 人客。這粒彗星後一擺閣來到近日點，會 tī 西元 4385 年彼陣。毋知你敢閣會記得 Hale-Bopp 彗星？ ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220408/ 影像：Stefan Seip (TWAN) 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220408.html Powered by Firstory Hosting

這个北極光看--起來敢若是 tī 另外一个世界，毋閣這張相片確實是 tī 地球一个清氣 ê 暗暝翕 ê。這是 3 月 31 丑時彼陣，tī 北緯 44 度翕 ê。這張相片 ê 感光時間是 5 秒鐘久，是 ùi 加拿大 Nova Scotia 省 Martinique 海岸省立公園 向北爿翕 ê。W-形 ê 仙后座 內底 ê 恆星，to̍h tī 地平線面頂、懸緯度 ê 紅色 極光 後壁，爍咧爍咧。專門觀測太陽 ê 太空船 有警告講，有可能會發生 太空風暴。所以觀測者知影講，應該會看著極光活動。這个咱知影會發生 ê 地磁風暴，是 日冕物質噴出事件 (CME) 引起 ê。這擺 ê 日冕物質噴出事件 (CME) 是 tī 活動力足強 ê 太陽活跳區 第 2975 區 噴--出來 ê。這會影響著咱 美麗地球 ê 磁層。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220402/ 影像：Jason Dain 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220402.html Powered by Firstory Hosting

這个霧霧 ê 天氣 成做大自然 ê 濾光片，予咱 tī 3 月 27 這工 ê 日落景色內底，連鞭 to̍h 看著有名 ê 建築。太陽 to̍h chhāi tī 比薩大教堂 kah 有名 ê 比薩敧塔 之間。Kah 太陽盤比--起來，遮大粒 ê 太陽烏子，看--起來嘛是烏烏一點。這是 tī 太陽活跳區 第 2975 到 2976 區 ê 大粒烏子。一工後，專門觀測太陽 ê 太空船 隨看著 活跳區 第 2975 區 噴出 活動力足強 ê 太陽閃焰，閣有 兩擺 ê 日冕物質噴出事件 (CME)。Tī 3 月 31 這工，對磁層上大 ê 影響，就是驅動 地磁風暴 kah tī 懸緯度夜空 ê 極光。3 月 30，活跳區 第 2975 區閣爆發矣！這擺產生能量較懸 ê X-級 太陽閃焰，這會予地球面頂 ê 電波信號暫時斷--去。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220401/ 影像：Antonio Tartarini 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220401.html Powered by Firstory Hosting

Tī 南方 ê 烏鴉座 方向，離咱差不多 6000 萬光年遠 ê 所在，有兩个大星系當咧相挵。這兩个星系編做 NGC 4038 kah NGC 4039。自 in 兩个相挵到今，這个災難已經幾若億年矣。毋閣 in 內底 ê 恆星，無啥會相挵。星系 ê 大型 分子氣體塗粉雲，嘛定定會 tī 宇宙殘骸 ê 中心附近，驅動 激烈 ê 恆星形成活動。這个壯麗 ê 景色有 50 萬光年闊。咱看會著新 ê 星團 kah 去予 引潮力 ùi 事故現場擲到足遠 ê 物質。這張 遮爾清楚 ê 地面望遠鏡影像，是 kā 2012 年到 2021 年之間翕 ê 相片，揀 88 點鐘久 ê 感光時間 累積--起來 ê 結果。視野內底閣有較暗 ê 潮汐尾溜 kah 較遠 ê 背景星系。這个伸長 ê 弧形結構，予這兩个星系看--起來敢若是一對，這規組 to̍h 編做 Arp 244。咱一般攏 kā 叫做是：蝶鬚星系。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220331/ 影像：Dietmar Hager, Eric Benson 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220331.html Powered by Firstory Hosting

太陽面頂彼个是啥？雖罔講 伊看起來敢若是 法國 Eiffel 塔 leh 開花，毋閣伊其實是 太陽日珥。這个日珥 其實比你想 ê 閣較大，伊 ê 懸度 差不多 kah 木星 平大。這个 大日珥 差不多 tī 10 工前出現，伊 tī 太陽表面 趖 差不多 2 工了後 to̍h 爆發，利用 日冕物質噴出事件 (CME) kā 擲到 太陽系內底。這支影片 是 美國 田那西 州 Hendersonville 市 ê 天文攝影師 tī in 兜後埕翕 ê。這是一支 1 點鐘久 ê 縮時攝影影片，伊先放送，才閣回送。彼个 CME 現象 tùi 地球 並無 影響。毋閣咱 ê 太陽最近 閣 擲 一擺 CME，毋若 發動 地球 產生 極光，閣 kā 地球大氣層 歕予較懸 leh。結果，才拄發射 ê 星鏈 通訊衛星 煞 落轉來 地球。太陽面頂 ê 活動，親像是 太陽烏子、日珥、CME、kah 閃焰，攏愈來愈濟。這寡活動攏是 太陽 活動 極小期 欲結束 ê 現象。這个週期是一个 11 冬 ê 磁力週期。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220216/ 影片：Hawk Wolinski 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220216.html Powered by Firstory Hosting

這个烏影景色 就是冥王星暗暝彼半爿。遮是一个暗淡 koh 遙遠 ê 世界。這張予人讚嘆 ê 太空視角內底，太陽 to̍h tī 49 億公里遠（差不多是 4.5 光時遠）ê 所在。這張相片是 飛足遠 ê 新視野號太空船 tī 2015 年 7 月 翕 ê。彼陣 ê 太空船離冥王星 2 萬 1 千公里遠，差不多是伊 ùi 離冥王星 上近彼位飛--出去 ê 19 分鐘後。這个 Kuiper 帶 ê 成員有戲劇性 ê 外形。Ùi 這張相片來看，咱知影冥王星 霧霧 ê 大氣層其實是蔫蔫，而且實在是 有夠複雜 ê。Tī 這張相片頂懸彼个月眉形 ê 晨昏區景色 內底，有南部地區 ê 窒素冰原，這馬叫做 Sputnik 平原，嘛有 坎坎坷坷、有水冰 ê Norgay 山脈。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220326/ 影像：NASA, Johns Hopkins Univ./APL, Southwest Research Institute 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220326.html Powered by Firstory Hosting

咱會當 tī 頭足大粒 ê 白羊座 內底揣著 Arp 78 這个 特殊 ê 捲螺仔星系。這个島宇宙是比咱銀河系內底 ê 恆星 kah 星雲 閣較遠 1 億光年，伊 ê 大細是比 10 萬光年閣較大。伊嘛叫做 NGC 772，咱 tī 這張相片內底看會著足明顯 ê 捲螺仔手骨 ê 細節。這張相片是 tī 美國 Hawaii 州 Maunakea 山頂附近 ê 大台 北雙生仔座 望遠鏡 翕 ê 足清楚 ê 宇宙相片。咱若是綴 Arp 78 ê 捲螺仔手骨方向行，仝款 會拄著塗粉帶 kah 少年藍色星團。這真有可能是星系尺度 ê 引潮力 引起 ê 交互作用。Kah 伊足倚 ê 星系伴是 NGC 770，to̍h tī 這幅圖 正爿頂懸 ê 外口遐。咱嘛會當 tī 這个 宇宙 視野內底，看著閣較遠 ê 背景星系。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220324/ 影像來源：International Gemini Observatory / NOIRLab / NSF / AURA 資料處理：T.A. Rector (Univ. Alaska Anchorage), J. Miller (Gemini Observatory/NOIRLab), M. Zamani & D. de Martin 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220324.html Powered by Firstory Hosting

這兩粒行星 tī 夜空同齊出現 ê 時陣，in 兩爿攏會看著對方，而且會擋一禮拜以上。像金星 kah 火星 這個月初 tī 天頂拄著行星 合相 ê 時陣，in 兩个差無夠 4 度闊。這張相片是幾工前翕 ê，彼當陣 ê 金星 沓沓仔 tī 暗頭仔 peh--起來。一暝一暝過去，火星 嘛沓沓仔落去矣。這張相是 kā 4 張鬥做一張 ê，是 tī 巴西 ê 庄頭 Teresópolis 翕 ê。透早 ê 天頂毋但看會著 金星 kah 火星，這馬 嘛 看會著閣較遠 ê 土星。這款 合相 只是 in tī 天頂 ê 視角度看起來足倚爾爾。實際上，金星、火星、土星是 tī 太陽系 內底無仝 ê 所在，in 會繼續 踅太陽行。後禮拜，土星 kah 火星 ê 視角度會 比 1/4 度閣較細。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220329/ 影像：Carlos Kiko Fairbairn 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220329.html Powered by Firstory Hosting

銀河上南彼搭毋若有南十字，閣有離咱太陽上近 ê 恆星系統：半人馬座 α 星。南十字 上面頂彼粒是足光 ê 黃色恆星：南十字座 γ 星。Ùi 十字架 ê 南十字座 γ 星 畫一條線到 下底 ê 藍色恆星，十字架二，會指向 南天極。拄仔好是 3 月翕 ê 這張相片 內底，小島 ê 頭殼頂遐。彼个島嶼 to̍h 是 tī 印度洋 ê Maldives 共和國 ê Madivaru 島。Kah 暗淡 ê 銀河光 相比，烏烏 ê 烏碳橐仔星雲 to̍h tī 十字架 ê 倒爿。Tī 銀河 較倚倒爿遐，有兩粒較光 ê 恆星：半人馬座 α 星（倒爿彼粒）kah 半人馬座 β 星（嘛叫做 Hadar）。半人馬座 α 星 A 是 kah 太陽 相-siâng ê 恆星。伊是三星系統 ê 其中一粒，這个三星系統閣有 kah 行星系統 (系外行星)，離咱干焦 4.3 光年 遠爾爾。若是 ùi 半人馬座 α 星 來看，咱 ê 太陽 應該是一粒 tī 明顯 ê 仙后座 內底 足光 ê 黃色恆星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220328/ 影像：Petr Horálek (ESO Photo Ambassador, Inst. of Physics in Opava) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220328.html Powered by Firstory Hosting

天頂彼是啥物？是極光啦！太陽 tī 這個月初 ê 時陣，發生大型 ê 日冕物質噴出事件 (CME)，kā 一陣 高速運動 ê 電子、質子、kah 離子擲 tùi 地球來。一部份 ê 粒子挵著地球 ê 磁層，予伊產生一个閬縫，才 tī 北半球一寡懸緯度 ê 所在產生 壯麗 ê 極光。這張相片 主要是 tī 瑞典 ê 一个樹林仔 翕 Östersund 市 ê 景色 kah 天頂 ê 極光冕。這款 爍咧爍咧 ê 青光 其實是大氣 酸素分子 重組 發--出 ê 光。對一寡人來講，這看--起來敢若是大隻 海翁。毋閣嘛真歡迎你 kā 逐家講，你感覺這看--起來親像是啥物。太陽 tī 進前幾若年實在是 恬-chih-chih，有小可仔怪怪。這个恬靜 ê 現象已經煞矣。太陽 ê 磁週期是 11 年 一个循環。咱 ê 太陽這馬已經沓沓仔來到磁週期 ê 太陽極大期 矣。像這款 遮爾媠 ê 極光，紲落來會一直看會著。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220322/ 影像：Göran Strand 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220322.html Powered by Firstory Hosting