NASA 逐工一幅天文圖 APOD Taigi

土衛六 Titan ê 表面，是按怎會閃閃爍爍、遮爾光？有一个可能：是液態海洋反射 太陽光 。土衛六 Titan 有 足濟平平平 ê 甲烷湖。若是角度有著，海洋 to̍h 會 親像鏡按呢反射太陽光。Cassini 機器人太空船 tī 2004 到 2017 年 踅土星 leh 行。這張相片 是假色相片，是 Cassini 太空船 tī 2014 年 用 會迵過雲 ê 無仝波段紅外線 翕 這粒 厚雲 ê Titan。這款反射 是 遮爾光，光到 Cassini 太空船其中一台紅外線 kha-mé-lah ê 感光已經飽矣。雖罔講 這个 太陽爍光 是有較 困擾，毋閣伊嘛是 有貢獻。反射區證明講，Titan ê 北方有較闊、較複雜 ê 海洋陣列，伊 ê 幾何圖樣 暗示講，這馬是 tī 一个有明顯蒸發作用 ê 時期。Cassini 太空船 已經飛過這粒 咱太陽系 上神祕 ê 衛星幾若擺矣。伊 kā 咱講，Titan 是一个有 活跳天氣 ê 世界。伊定定會落雨，落 ê 是 液態 gá-suh。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220327/ 影像：NASA, JPL-Caltech, U. Arizona, U. Idaho 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220327.html Powered by Firstory Hosting

你若是會當一擺看著規年 ê 天色，毋知會是啥款？彼就 kah 今仔日這幅圖足 相-siâng ê。這是 2021 年 tī 荷蘭 用 全天 kha-mé-lah 每 15 分鐘 tùi 天頂翕一張 ê 結果。Kā 這寡影像 中央 彼逝 對予齊齊，才合做這張 天色圖。上面頂是 1 月，上下底是 12 月，中央較倚倒爿彼規逝直 ê 是 半暝。按呢你看著啥物？上明顯 ê 是，日時 ê 天色攏是藍色 ê，毋閣暗暝 ê 天色攏是烏色 ê。暗暝彼區有 12 條 光帶 迒過，彼其實是月娘 ê 月光。烏色漏壼上瘦彼位其實是 夏節，這工 ê 日時上長，上肥彼位是 冬節。昨昏是 春秋分點，就是暗暝 kah 日時平長 ê 一工。咱會當 tī 這張舊年 ê 天色圖四分之三懸 ê 所在，揣著北半球 ê 春分。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220321/ 影像：Cees Bassa (Netherlands Institute for Radio Astronomy) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220321.html Powered by Firstory Hosting

半人馬座 A 是離咱地球上近 ê 活跳星系，伊離咱干焦 1100 萬光年遠爾爾。這个望遠鏡景色實在是有夠清楚。內底這个特殊 ê 長株圓星系閣叫做 NGC 5128，伊 ê 闊度有 6 萬光年闊。半人馬座 A 看起來是兩个一般星系相挵 ê 結果，這个結果產生奇幻複雜 ê 星團 kah 壯觀 ê 烏暗塗粉帶。Tī 星系中心附近 ê 宇宙殘骸，當 leh 去予一粒幾若十億倍太陽質量 ê 中央烏洞 沓沓仔食去。半人馬座 A to̍h kah 其他活跳星系仝款，這个過程可能會輻射出能量足強 ê 電波、X-光、kah gamma-光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220317/ 影像：David Alemazkour 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220317.html Powered by Firstory Hosting

球形星團 杜鵑座 47 是南天 ê 寶石。伊嘛 叫做 NGC 104，tī 咱銀河系 ê 銀暈內底 kah 其他 200 个 球形星團 做伙 leh 賴賴趖。Ùi 地球來看，第一光 ê 球形星團是 半人馬座 ω，第二光 ê to̍h 是杜鵑座 47 矣。伊離咱有 1 萬 3000 光年遠，直接用目睭 to̍h 看會著。伊 to̍h tī 小麥哲倫星雲 附近，tī 杜鵑座 ê 方向。這个實密 ê 星團是 tī 120 光年闊 ê 空間內底 櫼幾若十萬粒 恆星。星團外圍 ê 紅巨星 實在是真簡單 to̍h 揣會著，伊 tī 這幅清楚 ê 望遠鏡畫面 內底，是一粒看起來較黃 ê 天星。球形星團 杜鵑座 47 櫼做一球。咱這馬知影講，伊內底有一粒恆星，是目前 踅烏洞 ê 恆星內底 離烏洞上近 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220310/ 影像：Bernard Miller 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220310.html Powered by Firstory Hosting

這幅望遠鏡南天景色內底有 烏-mih-mà ê 烏雲 kah 光-iàⁿ-iàⁿ ê 星雲。這表示講遮有足濟少年恆星，恆星形成 ê 活動嘛 真鬧熱。In chhāi tī 干焦 650 光年遠 ê 所在爾爾，踮 變色杜定分子雲複合體 kah 本地波 ê 邊界。Tī 1946 年編 ê Cederblad 目錄內底，有少年恆星 ê 恆星形成區 去予當做是厚塗粉 ê 反射星雲。這个目錄內底閣有 C-形 ê Cederblad 110，to̍h tī 相片倒爿中央。藍色 ê Cederblad 111 to̍h tī 伊 ê 下跤。這張相片內底閣有一个足顯目 ê 部份，是 柑仔色、V-形 ê 變色杜定紅外線星雲 (Cha IRN)。彼是去予新形成 ê 低質量恆星 ê 物質流 kā 雕出來 ê 形體。這幅構圖袂䆀 ê 影像 有 1.5 度闊。用附近 ê 變色杜定分子雲 I ê 距離來推算，這差不多是 17 光年闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220217/ 資料來源：Stas Volskiy (Chilescope.com) 資料處理：Robert Eder 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220217.html Powered by Firstory Hosting

這个發光氣體看起來敢若是咧辮頭鬃，嘛親像是蛇紋，所以這个星雲才會提著一个有名 ê 名稱，號做 Medusa 星雲。Medusa 星雲嘛叫做 Abell 21，伊是一个較老 ê 行星形星雲，離咱有 1500 光年遠，tī 雙生仔座遐。這个星雲 kah 神話 內底 ê 名仝款，攏有一个戲劇性 ê 變化。若是看著 行星形星雲 這个階段，to̍h 代表伊本底是 像太陽這款低質量恆星，而且伊已經 演化 到上尾 ê 坎站矣。伊進前猶是 紅巨星，這馬已經變做高溫 ê 白矮星，而且當咧 kā 伊 ê 外殼擲--出去。高溫恆星 ê 紫外光 輻射 會提供能量，驅動星雲發光。Medusa 星雲 leh 演化 ê 彼粒恆星，是有較暗。伊 to̍h tī 發光 ê 月眉形氣體 ê 中央附近遐。Tī 這幅深空望遠鏡影像 內底，閣有一寡較暗 ê 雲絲 湠 tùi 較光 ê 月眉形氣體 ê 倒爿頂懸去。咱估計 Medusa 星雲 應該是有 4 光年闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220325/ 影像：Damien Cannane 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220325.html Powered by Firstory Hosting

這條路是迵到佗位？迵到日頭啦！足濟城鎮攏有東西向 ê 路，毋閣一年會有兩工，日頭會 ùi 路中央 peh--起來 kah 落--落去。今仔日 to̍h 是其中 ê 一工：春分抑是秋分。今仔日毋若是一工內底 暗暝 kah 日時 平長 (「對分」「點」) ê 日子，嘛是日頭拄仔好 ùi 東爿 peh--起來，ùi 西爿 落--落去 彼工。這條路是 tī 美國 Illinois 西北爿 ê 一條東西向 ê 路。相片是 tī 2015 年 3 月 ê 春分 彼陣翕 ê，彼陣 ê 日落 to̍h 落-tī 路尾遐。Tī 真濟文化內底，3 月 ê 春秋分點 這工，會當做是一季 ê 頭一工。Tī 地球 ê 北半球 就是春季，tī 南 半球就是秋季。毋知你 上愛 ê 彼條路，敢嘛是東西向 ê？下暗日落 ê 時陣，你應該影--一下就知矣！ ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220320/ 影像：Roland Christen 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220320.html Powered by Firstory Hosting

藍色 ê 反射星雲可能是代表厚塗粉 ê 區域。這張清楚 ê 望遠鏡景色 tī 天頂有超過 1 度闊，in to̍h tī 無啥光毋閣蓋奇幻 ê 麒麟座 方向。相片倒爿 ê 藍色星雲 IC 447 to̍h tī 麒麟座 R1 星雲複合體內底，離咱有 2500 光年遠。伊伸一條烏烏長長 ê 雲絲 到正爿下跤 ê IC 446 遐，kah 伊牽做伙。IC 447 內底有比太陽較高溫 ê 大質量 ê 少年恆星。In ê 光，是去予宇宙雲 內底 ê 恆星 反射出來 ê。觀測 kā 咱講，IC 446 內底嘛有一粒 少年恆星，是一粒 tī 早期演化階段 ê 大質量恆星。這个 kā 兩个恆星形成區牽做伙 ê 烏暗雲絲 kah 分子氣體，有超過 15 光年長。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220318/ 影像：Giorgio Ferrari 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220318.html Powered by Firstory Hosting

咱會當看偌遠？咱先假設講，你 ê 目睭會當看著各種無仝款 ê 輻射光，按呢逐項你看--著 ê 抑是 可能看會著 ê 範圍，to̍h 是 觀測會著 ê 宇宙。咱目前看會著上遠 ê 光是 宇宙微波背景，彼是 ùi 138 億年前 ê 宇宙來 ê。彼當陣 ê 宇宙是無透光 ê，to̍h 親像是 厚-tut-tut ê 霧仝款。有一寡仔 tī 咱邊仔 ê 微中子 kah 重力波，其實是 ùi 閣較遠 ê 所在來 ê。毋閣人類 ê 技術猶未到，無法度量著 in。這張相片 是用 愈來愈櫼 ê 尺度 來展示 觀測會著 ê 宇宙。中央有 地球 kah 太陽，邊仔是 咱 ê 太陽系，閣來是 厝邊恆星、厝邊星系、遙遠星系、早期物質 ê 雲絲、kah 宇宙微波背景。宇宙學家一般 ê 假設是講，咱這个 觀測會著 ê 宇宙，雖然干焦 leh 講咱附近 ê 宇宙爾爾，毋閣仝款 ê 物理概念，kah 規个「大宇宙」是相迵 ê。毋閣，猶是有幾若个較流行、毋閣猶是推論 ê 講法 認為 講，咱 ê 宇宙 是 閣較大 ê 多層宇宙 ê 一部份。這个多層宇宙，可能會有 無仝 ê 物理定數、無仝 ê 物理定律、較懸 ê 維度 leh 運作。嘛有可能是以咱這个宇宙做標準，毋閣 閣小可仔無仝 ê 版本。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220316/ 插圖：Wikipedia, Pablo Carlos Budassi 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220316.html Powered by Firstory Hosting

這張相片，是一條欲去天頂揣天星 ê 路。這條路是 tī 智利 La Silla 天文台 附近，頭前有 ESO ê 3.6 公尺闊 ê 望遠鏡。倒爿是 這馬當 leh 起 ê BlackGEM 望遠鏡 ê 基座，看起來敢若足 siak-pha ê。這組望遠鏡是光學望遠鏡陣列，未來會用來做 LIGO kah 其他探測器 量 重力波 ê 光學對應天體 ê 定位工課。是講，其實毋若按呢 neh！相片 ê 正爿有紅色 氣輝 kā 夜空照予光，相片 ê 中央有 銀河系 ê 中央帶 趨趨迒過去。咱會當 看著 木星 tī 相片中央 ê 銀河中央帶面頂，嘛會當看著 土星 tī 3.6 公尺闊 ê 望遠鏡面頂。閣有咱 銀河系 上大 ê 兩个衛星星系，大麥哲倫星系 kah 小麥哲倫星系，to̍h tī 相片正爿遐。這張全景相片 是 kā 2019 年 6 月 30 翕 ê 幾若張 15 秒鐘久 ê 感光相片疊做一張 ê。兩工後，La Silla 天文台 to̍h 去拄著 罕得看著 ê 日全食 矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220315/ 影像：ESO, Petr Horálek (ESO Photo Ambassador, Inst. of Physics in Opava) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220315.html Powered by Firstory Hosting

大質量恆星會歕出氣波。這張相片內底 ê NGC 7635 可能是所有恆星氣波內底上有名 ê。伊 to̍h 叫做 氣波星雲。雖罔講伊看起來足幼秀 ê，毋閣這个 氣波 ê 直徑有 7 光年遐爾長，表示講這經過一个足暴力 ê 過程。氣波 中心 ê 倒爿面頂，是一粒 O-型恆星。伊 ê 光度是比咱 ê 太陽閣較光幾若十萬倍，伊 ê 質量是比咱 ê 太陽 閣較大 45 倍。這粒恆星發出足猛 ê 恆星風 kah 足強 ê 輻射，kā 邊仔 厚-tut-tut ê 分子雲 歕出這个 發光 ê 氣波結構。這个 趣味 ê 氣波星雲 kah 伊邊仔 ê 星雲複合體，離咱有 7100 光年 遠，in to̍h tī 仙后座 遐。這張清楚、迷人 ê 宇宙氣波 景色，是 kā 進前提著 ê Hubble 太空望遠鏡 ê 影像資料 重新處理合成 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220323/ 影像來源：NASA, ESA, Hubble 資料處理 kah 版權：Mehmet Hakan Özsaraç 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220323.html Powered by Firstory Hosting

恆星是 ùi 佗位生出來 ê？有一个恆星形成區叫做「EGGs」，to̍h tī 鴟鴞星雲 (M16) ê 氣體 kah 塗粉 組成 ê 大型雲柱 尾溜 遐。EGGs to̍h 是「蒸發氣體球」ê 縮寫，遐是 水素 分子氣體足厚 ê 所在。這款氣體球一丸一丸，煞落來會產生重力崩塌，形成恆星。Ùi 新恆星上高溫上光 ê 所在發出來 ê 光，kā 雲柱 尾溜 加溫，予氣體 kah 塗粉蒸發，咱才有法度看著閣較濟 EGGs kah 少年恆星。這張相片 是 2014 年彼陣，踅地球 ê 哈伯太空望遠鏡 用 超過 30 點鐘久 ê 感光時間翕好了後，才閣予 阿根廷 一个足有經驗 ê 志願者，用現代 ê 軟體，經過數位處理 ê 結果。進前 ê 超新星 若是無 kā 會產生恆星 ê 雲柱破壞了了，等新 ê 恆星生出來了後，嘛是會 tī 紲落來 10 萬年左右 ê 時間 kā 這寡雲柱沓沓仔 破壞 了了。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220314/ 影像來源：NASA, ESA, Hubble 資料處理 kah 版權：Ignacio Diaz Bobillo & Diego Gravinese 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220314.html Powered by Firstory Hosting

北方 ê 寒天 星座 kah 銀河系 ê 光弧 to̍h tī 夜空中，地面 是美國加州 Point Reyes 國家海岸公園 ê 夜景，遠方 ê 海洋是太平洋。天郎星，to̍h 是 大犬座 ê alpha 星。伊是天頂這條內底有足濟恆星 ê 銀河弧 倒爿下跤 上光 ê 一粒星。西北方 ê 地平線 to̍h tī 這幅圖 ê 中央。獵戶座內底彼粒黃色 ê 參宿四、金牛座內底 ê 畢宿五、kah 較倚藍色 ê 昴宿星團 內底，攏 tī 銀河系 kah 地平線之間揣會著。這張相片是 3 月初彼陣翕 ê 全景圖。咱會當 ùi 這个連紲翕 ê 感光相片內底看著星雲。毋閣 in 本底其實是有夠暗，目睭直接看 是看無。Tī 北半球 ê 暗暝，天頂彼搭 闊莽莽 ê 光，是包括 tī 獵戶座 leh 發紅光 ê 半圓箍仔 Barnard 環，kah tī 昴宿星團 正爿面頂 ê NGC 1499 加州星雲。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220312/ 影像：Dan Zafra 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220312.html Powered by Firstory Hosting

你有想欲看 虹 ê 笑容無？若是 tī 日頭較低 ê 時陣，向「天頂 (頭頂)」看去，可能 to̍h 有機會看著。這張相片是 2 月 24 tī Sicily 島 Ragusa 市 ê 棕樹 頭頂翕著 ê。相片內底這款 冰暈 嘛叫做 環天頂弧。像有這款色水 ê 光弧 定定去 hŏng 叫做是虹 ê 笑容，因為 光弧 ê 方向 kah 色水 ê 順序攏是顛倒反 ê。一般咱看著 ê 虹，會綴 tī 西北雨後壁出現，伊 ê 光弧是 彎對地平線去。毋閣 若是看著 環天頂弧，「天頂」to̍h 是 tī 光弧 ê 中心矣，紅色是 tī 上外口彼輾。真正 ê 虹是水滴 kā 太陽光 ê 光路屈折去，產生彩色光 ê 光譜。毋閣 環天頂弧 是 光線行過 扁扁仔 ê 六角形冰晶 了後，屈折 kah 反射 ê 產物。這 to̍h kah 冰晶會 tī 較懸較薄 ê 雲內底，產生 幻日 ê 現象仝款。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220311/ 影像：Marcella Giulia Pace 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220311.html Powered by Firstory Hosting

這是目前為止火星面頂上奇怪 ê 石頭。這粒石頭是比一箍銀閣較細，毋閣伊面頂有幾若支手，予伊看起來敢若是一蕊花。若是講這粒石頭 真正是古早時代 火星花 ê 化石，按呢這 to̍h 是一个大發現矣！毋閣現此時，逐家 較愛用 較普通 ê 講法，來解說這个無四常 ê 結構。這馬有一个理論是講，這粒石頭是一款 結規丸 ê 現象，是 tī 岩石必開 ê 閬縫內底，產生 由水 沉積 ê 礦物。這寡 結規丸 ê 結構 to̍h 是會當 kā 物質櫼做一丸。伊會比邊仔 ê 石頭較𠕇、較實密，就算是邊仔 ê 石頭去予 侵蝕 了後，伊猶有法度留落來。這个花 ê 結構嘛有可能是 一款 晶簇 結構。這粒 細粒石頭 叫做 Blackthorn Salt，kah 進前 去予 翕著 ê 彼粒 火星 石卵 有 相-siâng。這張相片 是 好奇號探測車 二月底彼陣 tī 火星 翕 ê。Tī 火星 ê 這款石頭 實在是足趣味 ê。科學家會繼續研究 ùi 火星提著 ê 這款資料 kah 影像。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220309/ 影像：NASA, JPL-Caltech, MSSS 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220309.html Powered by Firstory Hosting

這是 siáng ê 衛星？是 地球 ê 啦！毋閣這是烏白色倒反 ê 月球！Tī 這張相片內底，光暗區 ê 像素所對應 ê 數字倒反矣，產生一个假色影像，to̍h 親像是烏白相片 ê 底片 仝款。這个 倒反色 ê 彩色 月球 相片內底，較粉色 ê 部份是真 ê。毋閣有 tī 烏白色倒反進前，用數位處理 ê 方式 kā 色彩 ê 比例 放較大咧。平常時 ùi Tycho 隕石 坑噴出來 較光 ê 輻射巡 tī 遮是石青色 ê。這个 ùi 直徑 85 公里闊 ê 隕石坑噴出 ê 輻射巡，是 南半球（下底）上主要 ê 特徵。平常時較暗 ê 月海 tī 遮是白殕色 ê。這張相片是 ùi 英國 英格蘭 ê Southend-on-Sea 提著 ê。歷史上，用 底片 記錄 ê 天文影像，攏會直接利用 底片 ê 倒反色 來檢查。因為這會當予咱 ê 目睭 較緊揣著一寡較暗 ê 細節。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220308/ 影像：Dawid Glawdzin 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220308.html Powered by Firstory Hosting

這是一个足特別 ê 日食。一般講來，是 月球 kā 太陽 閘著 矣。毋閣 tī 2021 年 ê 時陣，是 金星 kā 太陽閘著矣。這 to̍h kah 月球 kā 太陽閘著 ê 日食 現象仝款。金星那綴太陽行到仝一條線，伊 ê 相位 嘛愈變愈薄，變做 月眉形 ê。落尾 in 對有齊齊，金星 ê 相位 to̍h 變做零矣。這粒金星 烏點，行過咱 ê 母恆星。這个現象，技術上咱會當 kā 叫做 金星 ê 環食，是講伊外口有一輾足大輾 ê 火環。這張相片 是 tī 掩星彼陣翕 ê，內底 ê 三色太陽是 踅地球 ê 太陽動力學天文台 tī 紫外光 翕 ê。相片正爿 ê 烏暗區是 日冕洞。金星 to̍h 繼續踅，幾若點鐘了後，一絲絲仔月眉形 ê 金星 to̍h 閣出現矣。後一擺 ê 金星凌日，會出現 tī 2117 年。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220306/ 影像來源：NASA/SDO & the AIA, EVE, and HMI teams 數位組合：Peter L. Dove 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220306.html Powered by Firstory Hosting

這是 大捲螺仔星系 NGC 4945 ê 特寫，這个宇宙星系是一个 側向 星系，kah 咱 ê 銀河系 是差不多大。Tī 這張彩色 ê 望遠鏡影像內底，咱會當清楚看著 NGC 4945 有厚塗粉 ê 星系盤，少年 ê 藍色星系團，kah 粉紅仔色 ê 恆星形成區。NGC 4945 tī 南天 ê 大 星座 半人馬座 ê 方向，離咱差不多 1300 萬 光年遠 ê 所在，按呢差不多是咱到 仙女座星系 距離 ê 6 倍遠。仙女座星系是離咱銀河系上近 ê 星系。咱若是用光學望遠鏡來 kā 看，NGC 4945 ê 星系中心區實在是看無。毋閣 X-光 kah 紅外線 觀測表示，伊 ê 核心區 有 足明顯 ê 高能發射 kah 恆星形成活動。這粒藏 tī 星系中心、活動力足強 ê 核心，予這个華麗 ê 島宇宙成做一个 Seyfert 星系。Seyfert 星系 ê 中心，其實有一粒 超大質量烏洞。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220226/ 影像：Dietmar Hager, Eric Benson 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220226.html Powered by Firstory Hosting

你毋免用望遠鏡 to̍h 知影伊這馬咧看啥物。咱若是 kā 望遠鏡 看著 ê 景色投影到一个較大 ê 所在，應該是真利便。因為會當 kā 一粒 足光 ê 天體 傷強 ê 輝度 沖較薄咧。這款 沖較薄咧 ê 投影技術實在是真利便，咱會當 kā 用 tī 像 太陽 這款足光 ê 天體，尤其是拄著 日食 ê 時陣。這張孤張感光 ê 相片，to̍h 是 kā 這个投影技術用 tī 月圓 時 傷光 ê 月球。二月 ê 月圓出現 tī 兩禮拜前。Tī 一寡北爿國家 ê 文化內底，這款月娘 to̍h 叫做 雪月。投影 ê 儀器是 直徑 62 公分闊 ê 望遠鏡，to̍h tī 法國 Alps 山頭 ê Saint-Véran 天文台 內底。直接看月圓時 ê 月球是有較簡單，因為伊無 遐爾光。毋閣你 to̍h 無法度看著遮爾濟細節矣！後一擺 閣拄著月圓，會 tī 3 月 17。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220228/ 影像：Jeff Graphy 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220228.html Powered by Firstory Hosting

捲螺仔星系 NGC 2841 離咱有 4600 萬光年遠，會當 tī 北方星座 大熊座 ê 方向揣著。這張 深空景色 內底 ê 美麗 島宇宙，是 kā 2021 年 11 月 到 2022 年 1 月 之間，32 暗 好天 ê 時陣 翕著 ê 相片，疊做一張 ê。相片內底有明顯 ê 黃色 星系核、星系盤、佮 外圍較暗 ê 區域。毋閣塗粉帶、較細區 ê 恆星形成區、佮 少年星系團，to̍h 藏 tī 一節一節、捲 絚絚 ê 捲螺仔 手骨 內底。若是佮其他 ê 捲螺仔星系 相比，in ê 捲螺仔手骨攏較大支，嘛有較大範圍 ê 恆星形成區。NGC 2841 ê 直徑超過 15 萬光年闊，比咱 ê 銀河系閣較大。伊 ê X-光影像 kā 咱講，星系風 kah 恆星爆炸產生 ê 高溫氣體煙，攏走入去 NGC 2841 外圍 ê 星系暈 內底矣！ ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220303/ 影像：Vitali Pelenjow 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220303.html Powered by Firstory Hosting

2I/Borisov 彗星 是 ùi 銀河系 某一个所在 來 ê，伊這馬才拄來到咱 ê 太陽系。這粒彗星是業餘天文學家 Gennady Borisov tī 2019 年 8 月 30 揣著 ê。哈伯太空望遠鏡 tī 2019 年 11 月 kah 12 月 ê 時陣翕著這兩張影像，才知影講，咱揣著頭一粒星際彗星。倒爿彼張，tī Borisov 彗星 ê 視線方向，有一个 tī 遠方 ê 背景星系。伊看起來霧霧。這是因為 哈伯太空望遠鏡 kā 焦點囥 tī 這粒離地球才 3 萬 2700 公里遠 ê 高速彗星 kah 伊 ê 塗粉尾溜 遐。正爿彼張，是 2I/Borisov 彗星 才拄過 近日點 彼陣 去予翕著 ê。近日點 to̍h 是離太陽上近 ê 所在。歐洲南方天文台 ê 觀測 kā 咱講，這粒彗星 tī 2019 年 經過咱 ê 近日點 進前，可能猶毋捌 kah 捌粒 恆星 行遮爾倚過。Borisov 彗星離咱地球上近 ê 時陣，是 2019 年 12 月 28，彼陣伊 kah 咱 ê 距離才 2 萬 9000 公里遠爾爾。雖罔講哈伯影像已經足清楚矣，毋閣伊猶是無 kā 彗核解析出來。照這个結果，咱 to̍h 會當估算講，這粒彗核 ê 直徑應該是比 1 公里閣較短。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220305/ 影像：NASA, ESA, and D. Jewitt (UCLA) et al. 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220305.html Powered by Firstory Hosting

咱 ê 太陽 sī 發生啥物代誌？頂個月，咱才拄翕著 有史以來 上大 ê 太陽 日珥 kah 規个太陽盤。這張 創記錄 ê 影像，sī 踅太陽 ê 太陽 軌道 太空船 tī 紫外光波段 翕 ê。恬去 ê 太陽日珥 sī 太陽表面 ê 高溫氣體雲，sī 太陽磁場 leh 控制 ê。這个 太陽日珥 實在 sī 有夠大 ê，伊 ê 闊度 kah 太陽直徑 有通比。太陽日珥 ê 爆發 實在 sī 真歹臆，伊會利用 日冕物質噴出現象 (CME) kā 噴出來 ê 高溫氣體 擲到 太陽系 內底。CME 若是挵著地球 kah 伊 ê 磁層，可能 to̍h 會 產生足光 ê 極光。雖罔講太陽日珥 確實會產生 CME 現象，毋閣伊這擺 ê 方向毋是 tùi 地球來。咱這馬已經知影 日珥 kah 太陽磁場 ê 改變有關係，毋閣 產生 太陽日珥 ê 能量機制 到今猶是一个 研究主題。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220302/ 影像：Solar Orbiter, EUI Team, ESA & NASA; h/t: Bum-Suk Yeom 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220302.html Powered by Firstory Hosting

天鵝座 β 星 對咱 ê 目睭來講，是一粒星。伊離咱有 420 光年遠，是 北十字星群 ê 一支跤。這个有名 ê 北十字星群 to̍h tī 天鵝座 內底。毋閣你若是 kā 細台望遠鏡 鬥 目鏡 來看，就會看著伊其實是一組美麗 ê 雙星。In 發出 ê 藍光 kah 黃光，是 夜空內底 ê 珍寶。天鵝座 β 星 嘛叫做 Albireo。伊較完整 ê 名是 Albireo AB，表示講伊是兩粒足光 ê 恆星組成 ê。In tī 這張望遠鏡速翕內底 發出兩款無仝款 ê 色光。In ê 可見光 光譜圖 to̍h 插 tī 正爿。頂懸彼張插圖是 Albireo A ê 光譜，伊是 K-型巨星，比太陽較冷。伊發出 ê 能量主要是 tī 黃光 kah 紅光波段。下跤彼張插圖是 Albireo B ê 光譜，伊是 主序帶 ê 恆星，比太陽較燒。伊發出 ê 能量主要是 tī 藍光 kah 紫光。Albireo A 是一組雙星，這兩粒恆星 踅 in ê 共同質心 做伙 leh 行。毋閣這兩粒恆星實在是傷倚矣，所以用細台望遠鏡 才會分 無啥會 出來。Albireo A 佮 Albireo B 是光學上 ê 兩粒星，毋是物理上 ê 雙星系統。這是 因為 咱有量著這兩組 tī 天頂 ê 運動，其實是無仝。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220224/ 影像：Robert Eder 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220224.html Powered by Firstory Hosting

足濟捲螺仔星系 ê 中央攏有棍仔形結構。咱 ê 銀河系 嘛去予人認為講，伊有一个 大細拄仔好 ê 中央棍仔。這張相片 內底 ê 棍螺仔星系 NGC 6217，有一个足明顯 ê 棍仔形結構。相片是 2009 年翕 ê，是用踅地球 ê 哈伯太空望遠鏡 面頂 ê 先進巡天 Kha-mé-lah 翕 ê。看會著烏暗雲絲 ê 塗粉帶，有足濟足光藍色恆星 ê 少年 星團，發紅光 ê 水素氣體 發射星雲，迵過星系中心 長棍仔 ê 恆星，kah 足光 ê 活跳星系核。這个星系核內底，可能藏一粒 超大質量 烏洞。光線 ùi NGC 6217 行到咱遮愛行 6000 萬年，估計這个星系差不多是 3 萬 光年 闊。咱會當 tī 細隻熊 ê 星座（小熊座）ê 方向揣著伊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220221/ 影像：NASA, ESA, and the Hubble SM4 ERO Team 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220221.html Powered by Firstory Hosting

「緊來看喔！緊來看這个景色！地球欲 peh--起來矣講！真正是媠甲！」這句話是 50 年前 ê 太空人 講 ê。無外久，踅 月球 ê 太空船 to̍h 隨 kā 這个景色速翕起來，變做 歷史上 上有名 ê 影像之一。這張相片是 阿波羅 8 號 ê 太空人翕 ê。咱這馬 to̍h kā 這款 ùi 月球邊界 peh--起來 ê 地球景色 叫做「地出」。這張有名 ê 地出 相片，其實是 第二擺 翕著 ê。只是講，這是第一張彩色相片。真正 ê 第一張 地出 相片本底是烏白 ê。咱這馬用現代數位技術來 kā 上早以前 翕著 ê 三張 相片 處理理咧，to̍h 會當 kā 無仝解析度 ê 相片 重新組合做彩色 ê 版本。毋過免緊張！這張特寫相片，確實是這篇文章 上開始講著 ê 阿波羅 8 號 ê 太空人 Bill Anders 叫咱看 ê 景色 無毋著。感謝現代科技 ê 進步 kah 人類 ê 智慧，咱這馬會當看著無仝款 ê 版本矣！（歷史紀錄：遮有另外一張 無仝 ê 歷史烏白相片，是地球 ùi 月球邊界降落去 ê 地落 影像。彼張是閣較早 2 年 ê 踅月機器人太空船 1 號 翕 ê。） ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220227/ 影像提供：NASA, Apollo 8 Crew, Bill Anders 資料處理 kah and 許可: Jim Weigang 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220227.html Powered by Firstory Hosting

這張相片是 甲車平大台 ê 毅力號 探測車 面頂 ê Navcam 翕 ê 拼鬥影像。看會出來這張是 ùi 探測車 ê 甲板 面頂翕 ê，翕 ê 是火星 Jezero 隕石坑。這張拼鬥影像是 tī 火星任務 第 354 工火星日翕 ê。Tùi 地球人來講，毅力號降落 tī 火星 已經一年矣，差不多是地球時間 ê 2022 年 2 月 17。這台探測車 ê 質量是 1000 公斤，伊有 6 輪，是登陸火星 ê 探測車內底上重 ê。毅力號頭一年 ê 探索，已經收集 6 塊 岩心標本，以後才會提轉來地球。伊嘛是 獨創號 ê 基地，彼是火星面頂頭一台直升機。探測車閣用伊面頂 ê MOXIE（火星酸素原位資源利用實驗儀）對 這粒紅色行星 薄薄 ê 大氣 做實驗。Kā 伊內底 厚-tut-tut ê 二酸化碳素 變做 酸素。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220225/ 影像提供：NASA, JPL-Caltech 資料處理：Kenneth Kremer 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220225.html Powered by Firstory Hosting

地球 tī 暗暝看起來是按呢 neh！毋知你敢會當揣著你上愛 ê 國家 抑是 城市？有一个好消息欲報予你知，城市 ê 燈火應該會當 kā 你鬥相共。人造 燈火 kā 咱鬥報位，予咱知影 地球面頂 發展較好 抑是 人口較濟 ê 所在 tī 佗。這包括 歐洲、美國東部、kah 日本 ê 海岸。足濟較大 ê 城市攏 tī 河川 抑是 海洋 邊仔，按呢 in to̍h 有法度坐船，用較低 ê 成本來交換物件。較暗 ê 所在 to̍h 包括 南美洲、非洲、亞洲、kah 澳洲 ê 中部。這張相片 有一个名是「烏色大理石」，是 kā 踅地球 ê Suomi NPP 極地軌道 氣象衛星 tī 2016 年翕 ê 幾若千張相片，重新 處理了後才 kā 組合做這張 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220213/ 影像提供：NASA, Suomi NPP VIIRS 資料來源：Miguel Román (NASA GSFC) 資料處理：Joshua Stevens 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220213.html Powered by Firstory Hosting

遮爾大台 ê Green Bank 望遠鏡下暗會 tī 天頂發現啥物？相片倒爿下跤 ê 是 Robert C. Byrd Green Bank 望遠鏡 (GBT)，是世界 上大 ê 全指向 單接收盤 電波望遠鏡。GBT ê 中央接收盤是比跤球場閣較大。伊 tī 美國 ê 西 Virginia 州 ê 一个山頂，遐是一个 電波禁止區，袂當用電話 kah WiFi，連電磁爐嘛袂當用。GBT 毋若 tī 暗時探索咱 ê 宇宙，日時嘛 leh 看。因為 ùi 電波波段 來看，日時嘛是烏-mih-mà。這張相片是 tī 一月底翕 ê。這个構圖已經計畫幾若個月矣，是欲予 獵戶座 出現 tī 畫面 ê 正手爿。這張相片是 kā 前景 kah 背景分開翕了 了後，才閣 kā 疊做一張 ê。前景是 tī GBT 頭前幾若公里遠 ê 所在翕 ê，背景是前一暝用長時間感光翕 ê。背景 ê 深空影像 獵戶座 kah GBT 實在是 足合 ê。這是因為 tī 足濟 kah 獵戶座有關 ê 研究內底，GBT 上有名 ê 就是 kā 獵戶座分子雲複合體 無四常 ê 磁場 畫出來。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220223/ 影像：David Green 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220223.html Powered by Firstory Hosting

第一批類星體是生做啥款？咱這馬知影上近 ê 類星體，是 星系中心 有 超大質量烏洞 ê 活跳星系。氣體 kah 塗粉 去予 類星體 食去，發出強光，有當時仔是比伊 ê 母星系閣較光。毋閣，tī 宇宙早期 頭 10 億年生出來 ê 類星體，是有閣較神祕。這張插圖，是因為有最近 ê 觀測資料，藝術家才有才調度畫出早期宇宙 ê 類星體。伊可能是生做這款：中央應該有一个大質量烏洞，邊仔有氣體 kah 吸積盤 leh 踅，而且會噴出 能量足強 ê 噴流。類星體 是咱看會著 ê 上遙遠 ê 天體。伊發出 ê 訊息，予 人類 有當了解 咱早期 宇宙 是生做啥款。咱這馬已經知影這粒上老 ê 類星體 ê 紅移，是比 8 閣較細淡薄仔。自 大霹靂 開始算，伊才 7 億歲，這是這馬宇宙年歲 ê 幾若葩爾爾。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220222/ 影像：ESO, M. Kornmesser 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220222.html Powered by Firstory Hosting

Tī 這張厚塗粉 ê 望遠鏡影像 中央，有一粒柑仔色色調 ê 恆星，金牛座 T 星，伊是 金牛座 T 型變星 這个分類 ê 原型星。伊倒爿彼个黃色宇宙雲，歷史上 咱 kā 叫做是 Hind 變光星雲 (NGC 1555)。伊差不多有 650 光年遠，tī 本地泡 kah 金牛座分子雲 交界 ê 所在。恆星 kah 星雲 ê 輝度變化攏足大 ê，毋閣 in 毋是同齊發生，所以這區才會予人感覺遮爾趣味。咱這馬 知影 講，金牛座 T 型變星 是較少年 ê 恆星，干焦幾若百萬歲爾爾。In kah 咱 ê 太陽是仝類 ê 恆星，毋閣 in 是 tī 恆星形成 較早期 ê 階段。這幅圖 閣較 複雜 ê 部份是，紅外線觀測結果講，金牛座 T 星 是 多星系統 ê 成員之一。而且 kah 伊有關 ê Hind 變光星雲內底，嘛藏一粒足少年 ê 恆星。這幅圖 ê 構圖袂䆀。若是用 金牛座 T 星 ê 距離來推算，這幅圖有 8 光年遐爾闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220210/ 影像：Dawn Lowry, Gian Lorenzo Ferretti, Ewa Pasiak and Terry Felty 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220210.html Powered by Firstory Hosting

夜空彼兩條光帶是啥物？咱較捷看著 ê 是正爿彼條，彼是 咱銀河系 ê 中央光帶。咱 ê 太陽 to̍h 踅咱這个 捲螺仔星系 ê 銀河盤 leh 行。所以咱 tī 銀河內底看，這个銀河盤 踮 天頂 看起來 to̍h 會 親像是一條差不多輝度 ê 光帶。咱若是 離 市區 ê 燈火 較遠 leh，規年迵天 to̍h 攏看會著 銀河帶。咱較罕得看著 ê 是倒爿彼條，彼是 黃道光。是太陽光 反射 太陽系內底 踅太陽 leh 行 ê 塗粉，發出 ê 光。黃道光 tī 太陽附近會上光，所以你 tī 日出進前 抑是 日落了後 看較會著。若是較倚北爿，拄著三、四月 ê 暗頭仔，這條 黃道光帶 to̍h 會 tī 日落了後變甲足明顯 ê。咱一直到這世紀才知影講，黃道塗粉 是 彗星行過 木星附近 ê 時陣，落落來 ê 物質。今年欲看著像這張相片按呢，兩條光帶 踮 天頂一角 排 tī 隔壁，干焦幾若擺機會爾爾。這張相片 是 一月 ê 時陣，tī 中國 四川省 康定市 一个堅凍 ê 湖 面頂 翕 ê。相片內底閣有 仙女座星系 kah 流星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220301/ 影像：Jeff Dai (TWAN) 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220301.html Powered by Firstory Hosting

地球附近上危險 ê 恆星 是佗一粒？應該是 龍骨座 η 星，伊是一个雙星系統，差不多是太陽質量 ê 100 倍大，離地球有 1 萬光年遠。龍骨座 η 星 是一粒定時炸彈，閣 幾若百萬年 to̍h 會變做 超新星 爆炸矣，到時 規粒地球會浸 tī 危險 ê gamma-光 內底。這粒星 tī 1840 年代 ê 時陣 捌出名過，因為彼陣伊 tī 南天變足光 ê。毋閣 tī 幾若十年 ê 時間內底，伊 to̍h 變暗去矣。這粒星猶未爆炸，伊猶藏 tī 侏儒星雲內底。侏儒星雲是一个 厚-tut-tut、脹大 ê 雙球結構，伊 to̍h 包 tī 雙星系統外口。研究這款噴出來 ê 物件，會當予咱了解 kah 爆炸有關 ê 線索。咱這馬會當用 NASA 衛星太空望遠鏡 ê 觀測資料，來建構爆炸 ê 視覺化 3D 分佈。大部份 ê 結構 攏會當 tī 紅外線、可見光、kah 紫外光 看著。毋閣上外層 ê 殼有幾若百萬度 ê 溫度遐爾懸，彼干焦有法度 tī X-光波段看著。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220209/ 影片：NASA, CXC, April Hobart 文稿：Michael F. Corcoran (NASA, Catholic U., HEAPOW) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220209.html Powered by Firstory Hosting

這張相片是 tī 後埕用 細台望遠鏡翕 ê。前景 金爍爍 ê 恆星，其實是咱 銀河系 內底 ê 恆星。毋閣相片內底有兩个顯目 ê 星系，是比咱銀河系閣較遠，差不多 3 億外 光年閣較遠。In 看起來按呢彎彎曲曲，攏是因為 in 兩个倚傷近，引潮力 煞 kā in 兩个結做伙。這兩个星系實在是 足特殊 ê，in 去予人編做 Arp 273，嘛叫做 UGC 1810。毋閣咱這馬知影，這款 交互作用星系 tī 宇宙內底，其實是真四常。像咱銀河系附近，to̍h 有一个大捲螺仔星系，仙女座星系。伊離咱有 200 萬光年遠，這馬當咧倚近咱 ê 銀河系。這个特殊 ê 星系群 Arp 273，未來嘛應該會挵做伙。Tī 宇宙 ê 時間尺度 內底，這款星系相拄 ê 現象是會一直出現，落尾 in 會合併做一个星系。Arp 273 這兩个星系 ê 星系核，實在是足光 ê。Ùi 咱 ê 角度來看，這兩个星系核互相干焦離 10 萬 光年遠爾爾。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220219/ 影像：Jason Guenzel 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220219.html Powered by Firstory Hosting

這个湖是 tī 瑞典 ê Stockholm 北爿 20 公里遠 ê 所在。這工 ê 月娘是膨月，冰 tī 月光下 leh 唱歌，月光 踮 堅凍 ê 湖面 照出樹仔 ê 烏影。這个迷人 ê 夜景是 tī 二月 10 號 翕 ê。極光爍咧爍咧，敢若窗仔布，tī 夜空 leh 跳舞。是講大自然 tī 北方暗暝 ê 演出，定定有這款 小型地磁風暴 造成 ê 極光。太空天氣出現暴風雨 ê 現象，是 日冕噴出物 造成 ê 影響。日冕噴出物 是 幾若工前 日珥爆發 產生 ê 物件，伊才拄掃過咱地球 ê 磁層。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220212/ 影像：P-M Hedén (Clear Skies, TWAN) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220212.html Powered by Firstory Hosting

毛蟹星雲 ê 編號是 M1，伊毋是彗星，是 18 世紀 Charles Messier 星表頭一个天體。實際上，咱這馬已經知影 毛蟹星雲 其實是一个 超新星殘骸，是大質量恆星死亡爆炸了後 ê 雲屑仔。天文學家 tī 1054 年 ê 時陣 to̍h 有發現伊 矣。這是用 地面望遠鏡翕 ê 影像，是 kā 闊頻 kah 狹頻資料鬥做這張遮爾清楚 ê 彩色相片。狹頻資料是追蹤硫磺離子、水素離子、酸素原子 ê 發射線，是欲探索 脹大星雲 內底交纏做伙 ê 雲絲。對現代天文學家來講，其中上特別 ê 天體是 毛蟹星雲脈動星，to̍h 是相片中央上光彼粒，這是一粒一秒鐘踅 30 擺 ê 中子星。這粒恆星核心崩塌 ê 殘骸 to̍h kah 宇宙發電機 仝款，伊是毛蟹星雲 ê 動力來源，予伊 tī 電磁波頻譜產生發射線。毛蟹星雲差不多是 12 光年闊，伊 tī 金牛座 內底，離咱干焦 6500 光年遠爾爾。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211224/ 影像：Michael Sherick 音樂：P!SCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap211224.html Powered by Firstory Hosting

8 月 ê 一个暗暝，有兩个朋友 peh 到 Alps 山 tī 法國這爿 ê Plateau d'Emparis 山了後，to̍h 踮遮 享受這个風景。Tī 2400 公尺懸 ê 所在看--著 ê 天頂實在是真清楚。這幅 chhāi 直 ê 全景圖前景，去予已經 lòe--去 ê 月光照予光。全景圖 ê 倒爿邊仔爍咧爍咧 ê，是綴銀河盤咧行 ê 仙后座 kah 英仙座 ê 恆星。仙女座星系 看--起來敢若是一片較暗 ê 雲，內底有一粒較光 ê 核心。這个星系 to̍h tī 這个暗暝 chhāi tī 兩个朋友 ê 頭殼頂。仙女座星系 是 離咱上近 ê 大捲螺仔星系，伊是比咱銀河系內底 ê 恆星閣較遠。Tī 這个暗暝，銀河外 ê 星系 景色毋若按呢，天頂猶閣有一个暗暗霧霧 ê 光點，to̍h 拄仔好 chhāi tī in 兩个人中央。這个光點是 M33，就是咱熟似 ê 三角星系。三角星系是 本星系群 第三大 ê 星系，排 tī 仙女座星系 kah 銀河系後壁，伊差不多離咱有 300 萬光年遠。Tī 這暗，這兩个朋友 ê 距離干焦 3 光奈秒 近爾爾。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211106/ 影像：Martin Lefranc 音樂：P!SCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap211106.html Powered by Firstory Hosting

若是講著鬼，Mirach ê 幽靈 敢若無遐爾 恐怖。Mirach ê 幽靈 是一个暗暗霧霧 ê 星系。毋閣天文學家知影講，伊拄仔好 kah 一粒足光 ê 恆星 Mirach ê 視線方向 giōng-欲仝。Mirach 嘛叫做 仙女座 β，to̍h tī 這个星場 ê 中央。Mirach 是一粒 紅巨 星，離咱有 200 光年遠。伊比太陽較冷，毋閣比太陽較大粒，伊實際上嘛比太陽較光。Ùi 大部份 ê 望遠鏡來看，爍光 kah 繞射光尖 藏 tī Mirach 附近 ê 天體，才會予 這个暗暗霧霧 ê 星系 看起來 敢若是 反射 Mirach 恆星光 ê 結果，to̍h 親像是伊 ê 幽靈仝款。Tī 這張清楚 ê 相片 內底，Mirach ê 正爿面頂有 Mirach ê 幽靈，伊去予編做 NGC 404，離咱有 1000 萬光年遠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211028/ 影像：John Chumack 音樂：P!SCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap211028.html Powered by Firstory Hosting

內海仔星雲嘛叫做 M8，tī Charles Messier 編 ê 彼个有名 ê 星雲星團目錄內底排第八。若是 kā 你 ê 望遠鏡徙 tùi 內海仔星雲 ê 東爿，你 to̍h 會 tī 銀河中心有足濟恆星 ê 人馬座 星場，揣著這个 迷人 ê 景色。這个星雲複合體雖然 離咱真近，煞比 M8 小可仔較暗，無排 tī Messier ê 目錄內底。伊是 tī 正爿 ê 恆星形成區 NGC 6559，內底有閘光 ê 塗粉，顯目 ê 紅色發射星雲，kah 藍色反射星雲。Kah M8 仝款，tī 大型分子雲邊仔 ê NGC 6559 離咱差不多是 5000 光年遠。Tī 這个距離，望遠鏡視野差不多是 3 粒月娘闊，to̍h 是 130 光年闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211007/ 影像：Roberto Sartori 音樂：P!SCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap211007.html Powered by Firstory Hosting

天頂是發生啥物代誌？是極光啦！這个極光 是 tī 2015 年翕 ê。因為伊遮爾光 koh 發展遮爾緊，才會予 冰島 人注意著。這个極光是 ùi 太陽風暴來 ê。風暴內底有 ùi 太陽爆發出來 ê 高能粒子，幾工後 會 ùi 保護地球 ê 磁層 ê 閬縫 迵入來。雖然講 咱有法度 辨識 這个 捲螺仔花樣。毋閣有 創造力 ê 人 可能會 kā 這个複雜 ê 光 當做是 凊凊彩彩 to̍h 看會著 ê 大氣 幻影。這張相片 ê 前景是 tī Ölfusá 河，彼當陣 ê 路燈 kā Selfoss 市 ê 橋照甲 光-iàⁿ-iàⁿ。低雲後壁 ê 月娘 是十五暝左右。太陽 ê 活動 會 影響著地球 ê 極光。太陽活動極小期 按照歷史來看，會恬 11 冬。極小期結束了後，極光嘛會沓沓仔增加。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210912/ 影像：Davide Necchi 音樂：P!SCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210912.html Powered by Firstory Hosting

有當時仔天地會做伙爆發。這个多彩 ê 極光，幾若年前突然間爆發。彼當陣 青色極光 tī 地平線附近出現，顯目 ê 紅色極光帶 tī 較懸 ê 天頂爆發。這張相片 to̍h 親像一幅圖遐爾媠。較光 ê 月娘 tī 前景 leh 發光，一寡仔 咱較熟 ê 恆星 to̍h chhāi tī 遠方。這个細膩 ê 天文攝影師，有計畫欲鬥一張大張 ê 影像。伊 tī 美國 黃石國家公園 ê 白厝頂 歇陣噴泉 遐，kā 伊計畫中 ê 畫面一張一張翕起來。結果有影，半暝了後，白厝頂 歇陣噴泉 to̍h 爆發 矣。伊 kā 溫泉水柱 kah 水蒸汽 噴到天頂，噴到幾若公尺懸 ê 所在。歇陣噴泉 ê 溫泉水 去予 幾公里深、燒燙燙 ê 岩漿 滾甲變做水蒸汽，才鑽過岩石 ê 閬縫，噴到地表。差不多有一半較有名 ê 歇陣噴泉，攏是 tī 黃石國家公園 內底發生 ê。造成極光 ê 地磁風暴 會 tī 一工內消失，毋閣 白厝頂 歇陣噴泉 會繼續每 30 分鐘噴一改。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220220/ 影像：Robert Howell 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220220.html Powered by Firstory Hosting

銀河內底 ê 開放星團 其實是足少年 ê。一陣恆星 tī 銀河盤附近 做伙 pok--出來，按呢是一个星團。毋閣 銀河潮汐力 kah 引力交互作用，會 kah 星團 擲--出去，按呢星團內底 ê 恆星數量 to̍h 會 愈來愈少。這幅望遠鏡影像 ê 大細有 3 度闊，內底有 3 團 銀河系內底 ê 星團，攏 tī 南天 ê 航海星座 船尾座 ê 方向。倒爿下跤 ê M46 離咱有 5500 光年遠。正爿中央 ê M47 離咱干焦 1600 光年遠爾爾，頂懸 ê NGC 2423 離咱 2500 光年遠。M46 干焦 3 億歲爾爾，伊 ê 大細差不多是 30 光年闊，內底有幾若百粒恆星。你 ê 目睭若是袂䆀，應該會當 tī M46 星團 ê 11 點鐘方向，看著 行星形星雲 NGC 2438。毋閣星雲 中心 ê 恆星 已經幾若十億歲矣！NGC 2438 其實是前景星，只是伊拄仔好 chhāi tī M46 ê 頭前。M47 星團是一个較細較 lang ê 星團，伊閣較少年，干焦 10 光年闊爾爾。毋閣 NGC 2423 星團應該有 7.5 億年 歲 矣。是講咱這馬 已經知影，有一粒 系外行星 踅 NGC 2423 星團內底 ê 一粒紅巨星 leh 行。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220218/ 影像：Dave Doctor 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220218.html Powered by Firstory Hosting

翕風景 ê kha-mé-lah sàng kah 地球 ê 其他迷眾，攏 leh 等 這个藍色時間。這是 天欲光進前 抑是 天拄暗了後，天色交換 ê 晨昏時。太陽 to̍h tī 地平線下底，地景 kah 天景 猶浸 tī 這个美麗 ê 紺色內底。這是 8 月 21 tī 意大利 Cortina d'Ampezzo 坎坎坷坷 ê Alps 山頭 速翕 ê。日頭落山了後，這个藍色時間 ê 月圓，ùi 山頭 peh--出來，kah 太陽 相對面。規个天頂 攏是 紺色色調，tī 遮 ê 金字塔 岩山 Monte Antelao，嘛叫做 白雲巖之王，是這區 上有名 ê 山尖。月光 是黃色 ê，毋閣 tùi 一寡人來講，這陣 ê 月娘叫做藍月。這是因為有一个定義是講，tī 夏至到秋分之間，會拄著 4 改月圓，第 3 改月圓 to̍h 叫做藍月。第 4 改 月圓 會 tī 9 月 20 ê 藍色時間 peh--起來，拄仔好 to̍h tī 秋分進前。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210826/ 影像：Giorgia Hofer 音樂：P!SCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210826.html Powered by Firstory Hosting

這个恆星景色內底有 烏暗 ê 雲斑 kah 彩色 ê 雲彩。這幅深空寬闊 ê 影像迒過咱銀河系中心密實 ê 恆星場，規个範圍有超過 30 粒月娘遐爾闊。正爿霧霧 ê 星際塗粉雲，tī 20 世紀初 to̍h 去予天文學家 E. E. Barnard kā 編做目錄。遮有 B59, B72, B77, kah B78，攏是蛇夫座分子複合體 ê 一部份，離咱 kan-na 450 光年遠爾爾。In 鬥做伙 ê 外形看起來 to̍h 親像是薰吹 kah 碗，所以這个暗星雲才會去予叫做 薰吹星雲。倒爿遐有三个足光 ê 星雲鬥陣做伙 ê 所在，是恆星托兒所。In to̍h tī 人馬座 ê 方向，離咱有 5000 光年遠。Tī 18 世紀，天文學家 Charles Messier kā 其中兩个收入去伊 ê 星團星雲目錄。M8 是這个 三人組內底上大 ê，彩色 ê M20 to̍h tī 伊 ê 面頂。上倒爿是第三个有名 ê 發射區，內底有 NGC 6559。M20 去予塗粉帶分做兩爿，伊嘛叫做 三叉星雲。M8 有名 ê 外號 to̍h 叫做 內海仔星雲。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211001/ 影像：Gabriel Rodrigues Santos 音樂：P!SCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap211001.html Powered by Firstory Hosting

這幅美麗 ê 相片是 tī 金牛座 ê 方向翕 ê。這个視野有 2 度闊，差不多是 4 粒月娘 tī 天頂 ê 闊度，視野內底有滿天 ê 天星。你會當 tī 這幅圖 ê 正爿頂懸看著一个霧霧反紅 ê 天體 Messir 1 (M1)，伊嘛叫做毛蟹星雲。M1 是 18 世紀 Charles Messier 編 ê 彼个有名 ê 星表內底，第一个天體。是講伊本底是想欲揣彗星，毋閣星表內底一粒彗星 to̍h 無。這是今年 10 月 11 翕 ê 影像資料，內底有一粒彗星。倒爿下跤霧霧發青光 ê，是週期彗星 67P ê 彗鬚 kah 彗尾。伊嘛叫做 Rosetta 彗星。Tī 21 世紀，伊變做是 機器人 上尾安息 ê 所在。Rosetta 彗星這馬 欲轉來 內太陽系。伊會 tī 11 月 2 號掃過後一个近日點，抑就是離太陽上近 ê 所在。這粒彗星傷暗矣，目睭無法度直接看著。後一个近地點，抑就是離地球上近 ê 所在，會 tī 11 月 12。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211022/ 影像：Jose Mtanous 音樂：P!SCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap211022.html Powered by Firstory Hosting

這粒月球較特別 ê 部份是啥物？是 晨昏線啦！彼是一條 kā 日時 光 ê 彼面 kah 暗時 暗 ê 彼面 分做兩爿 ê 線。Tī 這个影像內底，你無法度直接看著 晨昏線。這是因為這个影像是 用 數位組合 ê 方式，kā 29 張 晨昏線區 ê 月球影像 鬥做一張 ê，所以才會看無晨昏線。實際上，晨昏線區有上長 上明顯 ê 烏影，伊產生 ê 明暗對比 kah 長短比例，會當予 2D ê 相片看起來變做是 3D ê。原始影像 kah 資料是 NASA ê 月球探測軌道衛星 tī 月球 附近翕了送轉來 ê。足濟月球 ê 隕石坑 看起來會遮爾清楚，是因為晨昏線區 ê 烏影 較明顯，in 攏投影 tùi 正爿去。這个影像會當看著足清楚 ê 細節。咱 kā 較烏彼區叫做月海，伊其實毋若比 月球 其他所在較暗，嘛較平。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220215/ 影像提供：NASA, Lunar Reconnaissance Orbiter, SVS 資料處理 kah 版權：Jai & Neil Shet 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220215.html Powered by Firstory Hosting

是啥物激發這个心臟星雲？這个遮爾大 ê 發射星雲 叫做 IC 1805，伊看起來敢若是 人類 ê 心臟。伊心形 ê 外形拄仔好 合 今仔日 ê 情人節。伊發出遮爾光 ê 紅光，主要是 ùi 激發 ê 水素 原子來 ê。伊 ê 紅光 kah 遮爾大 ê 形體，攏是去予 星雲中心 ê 一陣恆星創出來 ê。心臟 星雲 ê 心臟 有 開放星團 Melotte 15 ê 少年恆星。In 有能量較強 ê 恆星光 kah 恆星風，當咧侵蝕 幾若个 足媠 ê 塗粉 柱。開放星團 內底有幾若粒 較光 ê 恆星，in ê 質量是太陽 ê 50 倍。毋閣其他大部份 ê 恆星是較暗，in ê 質量干焦是太陽 ê 幾葩爾爾。猶閣有一粒 微 類星體，伊幾若百萬年前 to̍h 去 hŏng 踢出去矣。心臟星雲 離咱有 7500 光年 遠，伊 to̍h tī 希臘神話 Aethiopia 皇后 ê 星座，仙后座 遐。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220214/ 影像：Adam Jensen 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220214.html Powered by Firstory Hosting

捲螺仔星系 IC 342 其實是足光 ê，伊 kah 咱厝邊 ê 大型捲螺仔星系差不多欲平大。咱會當 tī 北方星座 麒麟鹿座 ê 方向揣著伊。伊有一个長頷頸仔，離咱干焦 1000 萬光年 遠 爾爾。IC 342 是一个足大 ê 島宇宙，應該 tī 夜空是一个足明顯 ê 星系才著。毋閣因為伊去予 咱 銀河 盤面頂 ê 恆星、氣體、kah 塗粉雲 閘著矣，所以伊看起來煞霧霧。是講 IC 342 ê 光去予天頂 ê 宇宙雲 閘著，所以伊才會變較暗、嘛變較紅。毋閣這張 清楚 ê 望遠鏡影像，猶是有法度翕著 IC 342 閘光 ê 塗粉、少年 ê 星團、kah tī 捲螺仔手骨面頂 發粉紅仔光 ê 恆星形成區。捲螺仔手骨 to̍h 是 ùi 星系核 踅 出來、捲踅 ê 結構。IC 342 這馬可能拄著 恆星形成 活動 ê 大爆發。而且因為伊離咱足近 ê，所以引力互相 ê 作用，會去影響著 本星系群 kah 銀河系 ê 演化。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220211/ 影像：Daniel Feller 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220211.html Powered by Firstory Hosting

天爐座星系團 是離咱上近 ê 其中一个星系團。伊 ê 名是用南方 星座 天爐座 號 ê，因為伊內底大部份 ê 星系攏會當 tī 這个星座內底揣著。伊差不多有 6200 萬光年遠，比咱 ê 厝邊星系 仙女座星系 ê 距離閣較遠 20 倍，比閣較有名 ê 室女座星系團 ê 距離閣較遠 10 葩。這幅圖 ê 視野有 2 度闊，差不多你看著 ê 發黃光 ê 點，攏是 天爐座星系團 內底 ê 長株圓星系。倒爿頂懸上光上明顯 ê 天體 是長株圓星系 NGC 1399 kah NGC 1404，毋閣毋是前景彼寡鑿目 ê 恆星。正爿下跤彼个足明顯 ê 棍螺仔星系是 NGC 1365，伊是天爐座星系團上有名 ê 成員。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220129/ 影像：Marco Lorenzi, Angus Lau, Tommy Tse 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220129.html Powered by Firstory Hosting

天星 leh 落雨呢！有一支宇宙大雨傘 tī 遐，伊到底是啥物咧？咱這馬知影講，伊其實是去予較細 ê 衛星星系 影響著，是潮汐力 kā 內底 ê 恆星分佈搝做這形 ê。中央這个主要 ê 星系是捲螺仔星系 NGC 4561，伊差不多 kah 咱 銀河系 欲平大。毋閣伊 ê 恆星 分佈 ê 範圍，一直到伊星系盤面頂 10 萬光年懸 ê 所在攏有。這是因為有一个較細 ê 星系，行到 NGC 4651 附近 ê 時陣，受著引力 ê 影響，煞踅 NGC 4651 ê 長株圓軌道，幌過來，幌過去。按呢 幾若遍了後，這个較細 ê 星系 to̍h 去 hŏng 變甲弄家散宅矣！經過幾若百萬年了後，兩个星系會沓沓仔 合併變做一个較大 ê 星系。這寡四散 ê 恆星嘛會落轉來這个較大 ê 星系，變做伊 ê 一部份。這張影像 是 美國 Hawaii ê CFHT 望遠鏡 翕 ê。這个 雨傘星系 離咱有 5000 萬 光年 遠，伊 to̍h tī 整齊 ê 北天星座 后鬃座 遐。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220207/ 影像：CFHT, Coelum, MegaCam, J.-C. Cuillandre (CFHT) & G. A. Anselmi (Coelum) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220207.html Powered by Firstory Hosting

變星 水瓶座 R 星 實際上是一組雙星系統，這兩粒 看起來是有密切 ê 共生關係。這張是太空望遠鏡翕 ê 光學 kah X-光 ê 組合影像，中央這粒離咱有 710 光年遠。這个趣味 ê 系統有一粒較冷 ê 紅巨星 kah 一粒較高溫較實密 ê 白矮星，攏踅 in 共同 ê 質量中心 leh 行。你若是用雙筒望遠鏡來 kā 看，to̍h 會發現 水瓶座 R 星 tī 一冬左右 ê 時間 沓沓仔改變伊 ê 光度。這个雙星系統 ê 可見光主要是 ùi 紅巨星來 ê。這是一粒 Mira-型 ê 長週期 變星。包 tī 較冷彼粒巨星外口 ê 物質，會去予重力搝到較細粒、較實密彼粒白矮星。落尾會 引起 熱核爆炸，kā 物質噴到太空中。天文學家 tī 過去幾若十年捌看過這款爆發。相片內底紅色 kah 藍色 ê 就是哈伯太空望遠鏡翕著 ê。這款美麗 ê 結構 差不多有 1 光年闊，這是一个較老 ê 爆發 ê 觀測證據。這个觀測資料是 ùi Chandra X-光 天文台（茄仔色）來 ê。內底是白矮星 ê 噴流 kah 伊邊仔 ê 物質相挵，產生 ê X-光 衝擊波。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220205/ 影像：X-光：NASA/CXC/SAO/R. Montez et al.; 光學：資料來源：NASA/ESA/STScI, 資料處理：Judy Schmidt (CC BY-NC-SA) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220205.html Powered by Firstory Hosting