NASA 逐工一幅天文圖 APOD Taigi

馬頭星雲 是天頂一个足有名 ê 星雲。你會當 tī 這張相片 上正爿 ê 柑仔色 發射星雲 遐，看著較暗彼塊烏雲。這个 馬頭 看--起來是烏 ê，這是因為伊是一塊袂透光 ê 塗粉 雲，to̍h chhāi tī 較光 ê 發射星雲 頭前。To̍h 親像 地球大氣層 ê 雲仝款，這塊宇宙雲嘛拄仔好看--起來 親像是一項物件。幾若千年了後，雲 ê 內部運動 to̍h 會改變伊 ê 外形矣。發射 星雲 ê 柑仔色 是 因為 電子 kah 水素 原子 ê 質子 復合 造成 ê。影像 ê 倒爿下跤是 火舌星雲，伊嘛是一个柑仔色 ê 星雲，內底有足複雜 ê 暗塗粉雲絲。咱閣看會著兩个較有名 ê 反射星雲：上倒爿 ê 圓形星雲 IC 432，kah 馬頭星雲倒爿下跤 ê 藍色 星雲 NGC 2023。In ê 色光主要攏是 反射 in 中央恆星 ê 光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211103/ 影像：Wissam Ayoub 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211103.html Powered by Firstory Hosting

今年英仙座流星雨 ê 爆發，實在是予觀星者有夠歡喜 ê。照預測來看，流星雨 上濟彼暗應該是 8 月 12 抑是 13。毋閣 tī 北美 ê 觀星者繼續看，煞 tī 一工後 意外翕著英仙座流星雨大爆發。In 報講，tī 8 月 14 半暝拄開始彼陣，一分鐘有幾若粒流星，甚至有當時仔是一秒鐘 to̍h 有幾若粒。Tī 這幅組合圖內底，流星雨 ê 輻射點是 tī 烏暗夜空 較懸天頂 ê 所在。這張是 tī 加拿大 Ontario ê Westmeath Lookout 8 月 14 6:50 UT（北美東部夏令時間 半暝 2:50）到 9:00 UT（北美東部夏令時間 透早 5:00）翕 ê 流星軌跡。Tī 這場予人讚嘆 ê 英仙座流星雨大爆發內底，有詳細紀錄著 282 粒英仙座流星 ê 軌跡。是講逐年 ê 英仙座流星雨，攏是因為地球行到 週期彗星 109P/Swift-Tuttle 留--loài ê 厚塗粉 ê 彗星殘骸彼位。2021 年大爆發可能是因為 意外拄著 英仙座雲絲 造成 ê。英仙座雲絲 to̍h 是彗星殘骸區較闊較密 ê 塗粉帶。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210924/ 影像：Pierre Martin 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210924.html Powered by Firstory Hosting

咱已經看著這粒超新星三擺矣！毋知當時會看著第四擺？一粒遙遠 ê 恆星變做 超新星 爆炸了後，咱若是運勢袂䆀，to̍h 會看著伊一擺。像這粒 AT 2016jka（嘛叫做「超新星安魂曲」），爆炸 ê 恆星拄仔好 chhāi tī 星系團 MACS J0138 中心 ê 後壁。比較伊 ê 哈伯太空望遠鏡 影像了後，咱發現講咱會看著伊三擺。倒爿這張是 2016 年翕 ê，tī 下跤附近有圓箍仔箍--起來 ê 三粒 超新星。正爿彼張是 2019 年翕 ê，tī 圓箍仔內底已經看無彼三粒矣，因為這三粒已經暗甲 giōng-欲 無--去矣。毋閣，電腦 tùi 星系團透鏡 建立 ê 模型 表示，仝這个 超新星 ê 第四粒對應影像應該愛出現 tī 正爿這張相片 頂懸 ê 圓箍仔遐。毋閣愛等到當時咱才看會著咧？上厲害 ê 模型預測講，伊會 tī 2037 年閣爆發一擺，毋閣這有兩年 ê 精差，因為 星系團透鏡 ê 質量分佈 kah 恆星爆炸 ê 光度歷史 猶無確定。16 冬了後 ê 地球人，若是有較精確 ê 預測 kah 較敏感 ê 監測，可能會當翕著第四粒對應影像，嘛有可能會同齊學著閣較濟星系團 kah 超新星 ê 智識。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211102/ 影像提供：NASA, ESA, Hubble 資料：S. A. Rodney (U. South Carolina) et al. 影像處理：J. DePasquale (STScI) 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211102.html Powered by Firstory Hosting

咱 ê 宇宙是毋是有足濟好兄弟？這張 暗物質 圖 看起來可能是按呢。這个看袂著 ê 暗物質 產生 ê 重力，to̍h 是目前用來解說這寡現象 ê 主要理路：星系是按怎會轉踅遐爾緊？星系是按怎會踅星系團遐爾緊？重力透鏡是按怎會 kā 光線拗彎甲遐爾厲害？可見物質 是按怎會 tī 現此時 ê 宇宙 kah 宇宙 微波背景 攏揣有？美國自然史博物館 內底 ê Hayden 天象館 ê 太空-Sió「烏暗宇宙」內底，嘛用這張影像來強調，四界攏是 ê 暗物質是按怎創治咱 ê 宇宙。這張 詳細 ê 電腦模擬圖 烏色 ê 部份，是暗物質 ê 複雜雲絲。伊 tī 宇宙內底 四界攏是，to̍h 親像是 蜘蛛網 仝款。毋閣柑仔色、一簇一簇、較散 ê 部份，是咱較熟似 ê 重子 物質。這寡模擬 ê 統計結果 kah 天文觀測 ê 結果有合。雖罔講 暗物質 實在是足奇怪 ê，而且咱到今 猶毋知 伊 ê 形體 到底是生做啥款？毋閣上驚人 ê 是，伊已經毋是這个 宇宙內底上奇怪 ê 重力 來源矣。這馬逐家煞 kā 目標囥 tī 暗能量，這是一个閣較齊齊 ê 反重力 來源，應該是規个宇宙脹大 ê 主要原因。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211031/ 影像：Tom Abel & Ralf Kaehler (KIPAC, SLAC), AMNH 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211031.html Powered by Firstory Hosting

你若是 kā 這張看做怪物 ê 面，千萬毋通驚惶！這只是幻想性錯覺，一般人 ê 經驗攏是 ùi 光 kah 影 ê 花樣看著人 ê 面。實際上，這个使人震撼 ê 視覺影像，是 北極光 ê 180 度全景影像，是用數位方式產生 ê 鏡像，to̍h 親像是 kā 有墨水 ê 紙 對拗仝款。用來產生這張圖 ê 原始畫面，是 tī 9 月一个暗暝，踮 瑞典 Jamtland 一个迒過水沖 ê 吊橋中央翕 ê。因為 最近太陽活動 引起地磁風暴 ê 關係，煞落來幾若工，極光真有可能 tī 地球高緯度 ê 所在變足活潑 ê。毋閣明仔暗你若是 tī 恁厝邊隔壁遐 看著怪物 ê 面，應該是去拄著萬聖節啦！ ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211030/ 影像：Göran Strand 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211030.html Powered by Firstory Hosting

這寡 幽靈形體 浮 tī 皇家星座 仙王座 ê 夜空，kah 厚塗粉、寬闊 ê 星雲濫做伙。是講，這款形體是宇宙塗粉雲 去予 較暗 ê 恆星反射光 照--出來 ê。In 毋是 tī 恁兜厝邊 遐爾近 ê 所在，是 tī 閣較遠 ê 所在。In tī 銀河盤 ê 面頂、tī 仙王座閃焰 分子雲複合體 ê 邊仔墘，差不多離咱有 1200 光年遠。Tī 這个視場，天星滿滿。伊 ê 正爿有去予編做 vdB 141 抑是 Sh2-136 ê 天體，嘛叫做 幽靈星雲。這个大細比 2 光年較闊，嘛比其他大部份較光 ê 幽靈幻影閣較光。星雲內底 有 tī 恆星形成 早期階段，恆星 實密 ê 核心 崩陷 ê 信號。這个奇怪色調 ê 塗粉是反射 NGC 7023 內底 高溫少年恆星 ê 藍光。伊嘛叫做尾蝶花星雲，to̍h tī 這幅圖 ê 中央倒爿遐。Tùi 這个烏暗背景來講，伊實在是足出眾 ê。Tī 這幅闊幅望遠鏡影像內底，這个足𠢕生 ê 星際塗粉場 tī 天頂差不多有 7 粒月娘 ê 闊度。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211029/ 影像：Leo Shatz 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211029.html Powered by Firstory Hosting

你有看著夜婆星雲無？伊 to̍h tī 面紗星雲 東半爿 ê 宇宙特寫 出現。面紗星雲 本身是一个大型超新星殘骸。這个殘骸是 ùi 大質量 恆星 死亡爆炸 了後，產生 ê 脹大 ê 雲屑仔。面紗星雲是 圓箍仔形，tī 天鵝座 方向，差不多有 3 度闊。NGC 6995 私底下嘛叫做 夜婆星雲，干焦半度闊，to̍h 是 月娘 tī 天頂 ê 大細。面紗星雲離 地球 有 1400 光年遠，用這个距離來估算，伊差不多 是 12 光年闊。這幅組合影像 ê 影像資料是 ùi 狹頻 濾鏡來的。超新星殘骸 ê 水素原子 發射線是紅色 ê，酸素 原子 ê 強發射線是藍色 ê。面紗星雲 ê 西半爿 tī 另外一个 季節 ê 幻影叫做「尪姨 ê 掃帚」星雲。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211027/ 影像：Howard Trottier 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211027.html Powered by Firstory Hosting

咱來看咱太陽系 上大粒行星 leh 轉踅 ê 美麗模樣。木星神祕 ê 大氣有足濟趣味 ê 特徵，比論講 暗帶 kah 光區，咱會當用較濟時間來 kā 伊了解一下。咱若是 tùi 伊斟酌 kā 看，to̍h 會當發現中央雲帶 踅 ê 速度，比雙極 ê 雲 有小可仔較緊淡薄仔。上有名 ê 大紅斑 上開始是看無，毋閣那踅伊 to̍h 出現矣。一寡 較細 ê 風暴系統 有當時仔嘛會出現。木星 遮爾大粒，伊踅一輾干焦愛開 10 點鐘爾爾。毋閣咱 ê 地球 遮爾細粒，煞愛開 24 點鐘才會完成一改 ê 自轉。這个懸解析度 ê 縮時攝影影片 是 這個月初 tī 法國 巴黎 一間公寓 ê 露台，用中尺度望遠鏡 開 5 暝 ê 時間翕 ê。水素 氣體 kah 氦 氣 是無色 ê，是這寡元素 組成木星大部份 ê 大氣。所以 木星雲 ê 色彩 是 to̍h 一寡微量元素造成 ê，to̍h 變做是一个研究主題。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211026/ 影像：JL Dauvergne 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211026.html Powered by Firstory Hosting

這條迵 tùi 咱銀河中心 ê 路敢會迵過 紀念碑谷？無一定愛！毋閣若是會，to̍h kā 翕--一張啊。這張相片內底 ê 這條路是 美國 163 號高速公路，Navajo 國家 保護區 ê 山形 to̍h 出現 tī 地平線面頂。銀河系 ê 光帶 ùi 天頂延伸落來，拄仔好 kah 地面上 ê 路 相迵。塗粉雲絲 kā 銀河 閘暗去，毋閣天頂猶閣有幾若十億粒天星、幾若款色光 ê 雲，嘛包括 內海仔星雲 kah 三叉星雲。這張組合相片是用仝一台 kha-mé-lah tī 美國 猶他州 ê Forest Gump Point 翕 ê。前景是 9 月日頭落山了後 ê 藍色時間 翕 ê，背景是 kā 幾若點鐘了後翕 ê 4 張相片拼做一張 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211025/ 影像：Michael Abramyan 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211025.html Powered by Firstory Hosting

萬聖節 ê 起源 kah 天文有關，自古早時代 to̍h 開始矣。Ùi 西元前 5 世紀開始，萬聖節 to̍h 是用來慶祝 換季日。換季日是 春分秋分（日時 kah 暗暝平長彼工）kah 夏節冬節（北半球上短彼工/南半球上長彼工）ê 中央彼工。毋閣用 現代曆日 來看，雖然萬聖節是後禮拜，真正 ê 換 季日 是 閣晏一禮拜。另外一个 換季日是 竹鼠日。現代萬聖節 ê 慶祝活動，有保留 古早時代 利用 穿差來嚇驚 過身 ê 人 ê 魂魄，予 in 緊走 ê 風俗。這幅 哈伯太空望遠鏡 翕 ê 鬼頭星雲，kah 這个古早時代 to̍h 有 ê 節日有四配。嘛 kah bàng-kà 內底 ê 幽靈 有合。NGC 2080 實際上是大麥哲倫星雲內底 ê 恆星形成區。大麥哲倫星雲 是咱 銀河系 ê 衛星星系。鬼頭星雲 (NGC 2080) 差不多有 50 光年 闊，疊這色嘛拄仔好勢。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211024/ 影像：Mohammad Heydari-Malayeri (Observatoire de Paris) et al., ESA, NASA 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211024.html Powered by Firstory Hosting

Kā 你 ê 3D 目鏡提來囥 tī 小行星 101955 Bennu 面頂看。這个小小 ê 太陽系世界差不多是 帝國大樓（比 500 公尺閣較短）ê 大細。伊敢若是一个干樂仔，粗耙耙 ê 表面有落甲規四界 ê 大岩石。這幅 3D 圖是 2018 年 12 月 3 號 OSIRIS_REx 太空船 用面頂 ê PolyCam kha-mé-lah tī 離小行星 80 公里遠 ê 所在翕 ê 3D 浮雕。OSIRIS_REx 太空船 tī Bennu 小行星 ê 岩石表面 提著標本 了後，已經 tī 今年 5 月離開小行星，這馬已經 tī 轉來地球 ê 路-lih 矣。這台機器人太空船按算欲 tī 2023 年 9 月 ê 時陣 kā 標本提轉來地球。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211023/ 影像：NASA, GSFC, U. Arizona - Stereo Image Copyright: Patrick Vantuyne 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211023.html Powered by Firstory Hosting

地球這條暗暝 kah 日時 ê 交界線當時會變做坦徛 ê？To̍h 是今仔日啦！今仔日是地球 ê 秋分，是一冬內底日時 kah 暗暝差不多平長彼工。這條 kā 地球日時 kah 暗暝分開 ê 晨昏線，tī 春分 kah 秋分 ê 時陣會變做坦徛 ê，而且會 kā 北 極 kah 南 極 連--起來。這支 縮時攝影影片 tī 12 秒鐘內底展示地球一冬 ê 模樣。這是 ùi 地球同步軌道 ê Meteosat 9 號 軌道衛星，逐工 tī 仝一个 當地時間 記錄 ê 紅外線影像。這支影片是 ùi 2010 年 9 月 ê 秋分，晨昏線變坦徛彼工開始記錄 ê。地球 ná 踅太陽 leh 行，晨昏線嘛愈來愈趨，予北半球日時 ê 太陽光愈來愈短，北半球 to̍h 變做寒天。時間 leh 過，影片 ê 一半行到 2011 年 3 月 ê 春分。晨昏線嘛 趨 tùi 另外一爿，予南半球 變做寒天，北半球變做熱天。這支翕一冬 ê 影片 tī 9 月 ê 秋分 結束。這是地球踅太陽幾若十億擺旅行 ê 其中一擺，伊會閣繼續踅落去。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210922/ 影像：Meteosat 9, NASA, earthobservatory, Robert Simmon 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210922.html Powered by Firstory Hosting

是按怎咱有法度看著規粒月娘？月娘 tī 月眉相彼陣，干焦一部份直接去予 太陽 照著。賰 ê 部份會發光，是因為 地球光 ê 反照。這嘛叫做 地光，抑是 da Vinci ê 光。這是因為太陽照著地球 ê 光，反射到 月球無去予太陽照著 ê 彼爿。Tùi 地球來講，月球若是 tī 月眉相附近，to̍h 表示這陣 tùi 月球 來講，地球是 giōng-欲 倚 月圓相。這陣 ê 地光 to̍h 差不多是上光 ê 時陣。這張相片是 kā 這個月初用 HDR 連紲翕 ê 影像疊做伙 ê。內底有沓沓仔 peh-懸 ê 月娘，寬寬仔行過 金星，to̍h 是相片中央上光彼粒。金星面頂有 房宿三（予編做 蠍仔座 δ）。Tī 上倒爿彼粒紅色恆星是 心宿二。這个 天體-sió to̍h tī 雲頂演出。前景是 Palazzolo Acreide 市 ê 燈火，是 tī 意大利 Sicily 島 面頂一个有 久長歷史根源 ê 城市。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211018/ 影像：Dario Giannobile 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211018.html Powered by Firstory Hosting

大部份 ê 星系有一粒核心。毋閣這个看起來有四粒？這个奇怪 ê 現象予 天文學家 認定講，這个 星系 ê 四粒核心根本 to̍h 是假 ê。中央 ê 四葉仔 其實是 ùi 後壁 ê 類星體 發出 ê 光。前景星系 ê 重力 場 kā 後壁較遠 ê 類星體 發出 ê 光 拗彎去，才會一个影變四个影。類星體 一定是 排 tī 大質量星系中心 ê 後壁，才會 產生這个幻境。這款現象 to̍h 叫做 重力透鏡。毋閣這个較特別 ê，to̍h 叫做 愛因斯坦十字。是講嘛真奇怪！愛因斯坦十字 ê 影像，無仝部位 ê 相對光度有小可仔無仝。有當時仔嘛會因為 前景星系內底 一寡恆星 ê 微重力透鏡 效應 ê 影響，煞予一寡部位變較光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211017/ 影像：J. Rhoads (Arizona State U.) et al., WIYN, AURA, NOIRLab, NSF 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211017.html Powered by Firstory Hosting

Tī 水瓶座 方向 700 光年遠 ê 所在，有一粒 類太陽恆星 已經行到性命上尾 ê 坎站矣。伊 tī 上尾幾若千年 ê 時間內底，產生 捲螺仔星雲 (NGC 7293)。這是一个足濟人研究 ê 厝邊 行星形星雲，因為伊是恆星演化 上尾階段 ê 典型代表。這攏總開 90 點鐘久 ê 時間感光，才有法度產生 這張闊幅 ê 星雲相片。Kah 狹頻影像資料敆做伙了後，你 to̍h 會當看著 捲螺仔星雲 較光 ê 內底區 差不多 3 光年以內 ê 明顯 細節。狹頻影像資料 ê 水素原子發射線是紅色 ê，酸素原子發射線是青藍色 ê。捲螺仔星雲中心 ê 白點，是行星形星雲 高溫 ê 中心恆星。拄開始看著 這个星雲 ê 時陣，咱叫是講伊是一个真簡單 ê 星雲。毋閣咱這馬知影捲螺仔星雲有異常 複雜 ê 幾何結構。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211014/ 影像：Ignacio Diaz Bobillo 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211014.html Powered by Firstory Hosting

這个宇宙氣波去予大質量恆星 ê 高溫、高速恆星風吹 kah 遮爾大。伊去予編做 Sharpless 2-308，tī 大隻狗（大犬座）方向 5000 光年遠 ê 所在，比一粒月娘 tī 天頂 ê 寸尺閣較闊。按照這个距離來推算，這个直徑 差不多是 60 光年長。產生這个氣波 ê 大質量恆星是 Wolf-Rayet 星，to̍h 是星雲 中央附近 上光彼粒。Wolf-Rayet 星 ê 質量比太陽閣跤大 20 倍，伊應該是大質量恆星演化過程中，變做超新星進前 一个較短 ê 階段。Wolf-Rayet 星 ê 高速恆星風 tī 演化早期，會掃過行較慢 ê 物質，製造氣波形體 ê 星雲。這个 去予風歕出來 ê 星雲差不多有 7 萬歲 矣。這幅深空影像 ê 狹頻濾鏡有翕著較暗 ê 發射線。影像內底上主要 ê 部份是發光 ê 離子化 酸素原子，tī 遮 kā 標做 藍色 ê。SH2-308 看起來 真古錐 ，伊嘛叫做海豬頭星雲。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211021/ 影像：Nik Szymanek 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211021.html Powered by Firstory Hosting

有一个任務若是行到木星遐爾遠，毋閣毋是欲看木星，會按怎？Lucy 計畫 是想袂 ùi 這馬踅木星 leh 行 ê Juno 太空船，搜揣 ùi 木星無一定揣會著 ê 太陽系 起源 ê 線索。木星足大 ê，大到伊 ê 引力會 kā 足濟小行星 牽牢 ê，綴 tī 木星頭前抑是後壁，做伙踅 太陽 leh 行。這寡 Trojan 小行星 是 tī 規个太陽系內底形成 ê。有一寡可能是幾若十億年前 to̍h 已經去予木星 牽牢 矣。飛過 Trojan 小行星，會當予咱研究這寡太陽系 ê 化石。In 可能會當提供咱太陽系 早期歷史 ê 特別線索。Lucy 這个名是 ùi Beatles 樂團一條有名 ê 歌 內底來 ê，伊其實是 tī 非洲發現 ê 南方古猿 ê 骨骸化石。Lucy 太空船 按算欲 tī 2025 到 2033 年之間探索 8 粒小行星。這張相片是頂禮拜 tī 美國 Florida 州 Cape Canaveral 發射 Atlas 五號 火箭 ê 時陣，反射 Lucy 太空船 ê 形影。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211020/ 影像：John Kraus 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211020.html Powered by Firstory Hosting

這粒恆星大球是按怎來 ê？Palomar 6 是 咱銀河系 留落來 ê 200 个 球形星團 ê 其中一个。這款球形恆星球是比 咱 ê 太陽 閣較老，嘛比咱 銀河盤 內底大部份恆星閣較老。Palomar 6 差不多是 125 億歲遐爾老，老甲 kah 咱 ê 宇宙欲平老，嘛 限制 規个宇宙 ê 年歲。Palomar 6 內底有 50 萬粒恆星，離咱有 2 萬 5 千 光年 遠，毋閣離咱 銀河中心 袂蓋遠。這个距離 tùi 這張清楚 ê 哈伯太空望遠鏡 影像來講，差不多是 15 光年闊。經過 足濟研究，嘛包括用哈伯影像了後，這馬有一个 kah 源頭有關 ê chhōa-頭假說 是講，Palomar 6 是 ùi 踅 銀河中央 ê 核球 內底 ê 恆星產生 koh 留到這馬 ê，毋是 ùi 較遠 ê 銀暈 來 ê。是講咱這馬揣著 ê 其他 球形星團，大部份攏是 ùi 銀暈來 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211019/ 影像：ESA/Hubble kah NASA, R. Cohen 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211019.html Powered by Firstory Hosting

這幅有創意 ê 視覺作品內底，攏是 tī 地球天頂看著 ê 月娘 ê 自然色。遮 ê 月盤攏是 tī 無仝時間翕好了後，才 kā in tī 畫框內底 一格一格排予好勢。月球多變 ê 色調，主要是因為逐擺地球 ê 大氣條件無仝，而且 月球、地球、太陽 ê 幾何 排列 嘛會變，按呢造成反射太陽光 ê 結果嘛會無仝。Tī 這內底，上暗 ê 月盤是 地光反照 ê 色光。地光反照是地球海洋反射太陽光了後，才閣照 tī 月球較暗彼爿。這 tī 500 年前，Leonardo da Vinci to̍h 有解說過矣。毋閣你若是離電腦螢幕較遠咧，抑是你注意看邊仔較細張 ê 版本，你可能會當看著 da Vinci 彼張上有名 ê 藝術品。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211016/ 影像：Gianni Sarcone kah Marcella Giulia Pace 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211016.html Powered by Firstory Hosting

Tī 7000 萬光年遠 ê 所在，有一个華麗 ê 捲螺仔星系 NGC 289，伊比 咱 ê 銀河系 閣較大。伊 ê 角度看起來 giōng-欲 完全正向。伊有一个足光 ê 核心 kah 彩色 ê 中央盤，煞予伊 ê 藍色捲螺仔手骨看起來有較暗。這寡 較肥 ê 手骨 ùi 星系中心掃到 10 萬光年遠 ê 所在。這是一幅清楚 ê 望遠鏡星系肖像。正爿下跤 ê 捲螺仔手骨，敢若是去 拄著 一个較細 ê、霧霧 ê 長株圓星系伴。伊 kah 巨大 ê NGC 289 有交互作用。這幅圖 ê 前景 閣有足光 ê 恆星。In 攏是咱銀河系內底 ê 恆星，to̍h tī 玉夫座 ê 方向遐。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211015/ 影像：Mike Selby 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211015.html Powered by Firstory Hosting

無毋著！你會當看著 2D ê 四角形色彩。毋閣你敢會當看較深 leh？咱若是來算 這幅圖 內底有偌濟塊色斑，你可能會估計講，這个 2D 數位影像內底應該差不多有 60 塊（橫 ê）x 50 塊（直 ê）x 256个（可能 ê 色），攏總是 768,000 个位元。毋閣，kah 直覺無仝，用猶未證明 ê 全像原理 來看，2D 圖內底可能會當 kā 3D 空間 ê 訊息攏包 tī 內底。這个原理 是 ùi Planck 長度 衍生來 ê。來到 Planck 長度 ê 尺度，會 ùi 本底 古典引力 主導 ê 世界 行入去 量子力學 主導 ê 世界。這个長度是 kan-na 會當儉 差不多 1 位元訊息 ê 面積 ê 一維長度。這个極限是物理學家 Gerard 't Hooft tī 1993 年 頭一擺提出 ê。伊 ùi 可能 差傷遠 ê 推測 歸納產生 ê 結果講，烏洞 紮 ê 訊息毋是按伊包 tī 內底 ê 體積決定 ê，是按 事件視界 ê 表面積決定 ê。這个詞「全像」是 ùi 「全像 投影類比」來 ê。是 kā 光線投影 tī 平面創造出來 ê 3D 影像。毋閣愛注意！有一寡人 看 這張圖 可能會想講內底毋若 kan-na 768,000 个位元，嘛毋是 2,563,000 位元 ê 排列。In 可能會講 內底有 一个 3D ê 茶鈷。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211003/ 影像：Caltech 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211003.html Powered by Firstory Hosting

恆星 tī Lynds 暗星雲 (LDN) 1251 內底產生。這个厚塗粉 ê 分子雲浮 tī 銀河盤面頂，離咱差不多有 1000 光年遠。伊是暗星雲複合體 ê 一部份，tī 仙王座閃焰 區 ê 方向揣會著。Tùi 這个足暗 ê 星際雲做 ê 天文探索內底，ùi 規个光譜 看起來，有能量足強 ê 衝擊波 kah 噴流是 kah 新形成 ê 恆星有關。內底嘛有 藏 tī 影像內底發紅光 ê 發散 HH 天體。遠方 ê 背景星系嘛藏 tī 影像內底，差不多是 tī 厚塗粉彼區 ê 後壁。這个迷人 ê 景色 tī 天頂差不多是 2 粒月娘 ê 闊度。若是欲 ùi 估計 ê LDN 1251 距離來推算，嘛會使講伊有 17 光年闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210920/ 影像：Cristiano Gualco 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210920.html Powered by Firstory Hosting

這看起來敢若是一个大型 ê 宇宙問號。毋閣上大 ê 問題是欲按怎 ùi 較光 ê 氣體 kah 較暗 ê 塗粉 來解說星雲 ê 恆星形成 歷史。Tī 北方仙王座方向 ê 巨型 分子雲 邊仔，有發光 ê 恆星形成區 NGC 7822，to̍h chhāi tī 3000 光年 遠 ê 所在。Tī 星雲內底，較光 ê 邊界 kah 較暗 ê 外形，tī 這張彩色細節 ê 天景攏足出眾 ê。這是 9 張 ê 拼鬥圖，是用細台望遠鏡 tī 德州 開 28 暗 ê 時間翕 ê。伊嘛有敆 狹頻 濾鏡 ê 影像資料，kā 酸素原子、水素原子、kah 硫磺原子 ê 發射線用藍色、青色、kah 紅色來表示。這款 發射線 kah 色彩 ê 組合，這馬已經是逐家攏知 ê 哈伯色盤。原子發射線是中心高溫恆星 強力輻射 驅動 ê。強風 kah 強輻射會雕塑、侵蝕 厚密 ê 雲柱，煞落來會 tī 這个幾若光年闊、會產生新恆星 ê 星雲 掃出一个 典型 ê 閬空。恆星會因為 重力崩塌，繼續 tī 雲柱內底 形成。毋閣等雲柱予侵蝕了了了後，to̍h 無 材料 繼續做新 ê 恆星矣。按照 NGC 7822 ê 距離來推算，這个視場有超過 40 光年 闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211013/ 影像：Yizhou Zhang 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211013.html Powered by Firstory Hosting

火流星是按怎會遮爾光？咱愛先知影 火流星 是異常明亮 ê 流星。國際天文聯合會 kā 比 視星等 -4 閣較光 ê 流星，定義做火流星。這个光度差不多比所有 ê 行星閣較光，嘛光到 咱會注意著 伊會照出烏影。天文攝影師 leh 翕這張 長時間感光相片 ê 時陣，拄仔好翕著這粒流星。伊生目睭毋捌看過遮爾光 ê 流星。這是 火流星 無毋著！這個月初，這粒太空石頭當 leh 碎--去。Kan-na 2 秒鐘 ê 時間，伊 to̍h tī 天頂產生足光 ê 光巡，kā 暗暝變甲敢若日時仝款。這張相片 ê 前景是 加拿大 Alberta ê Louise 湖。為著欲予前景 ê 湖較明顯 leh，攝影師有 kā 火流星 ê 光度放較暗 leh。雖罔講 火流星 真罕得看著，毋閣足濟人攏真好運，有看著 in。你若是看著 火流星，你嘛會當 kā 國際流星組織通報。若是有超過一个人有記錄著 火流星 ê 影像，無定著 to̍h 會當 追蹤 伊是 ùi 太陽系 佗一粒天體 噴--出來 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211012/ 影像：Hao Qin 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211012.html Powered by Firstory Hosting

華麗 ê 捲螺仔星系 M33 毋若干焦伊發光 ê 水素氣體爾爾。伊嘛叫做 三角星系，tī 300 萬光年遠 ê 所在，是本星系群主要 ê 成員之一。M33 lang-lang ê 捲螺仔手骨 to̍h 絞入去伊 ê 核心。大型 HII 區 綴著 捲螺仔手骨 ê 方向 leh 行，是目前已經知影 ê 上大 ê 恆星托兒所，to̍h 是 產生短歲壽毋閣大質量恆星 ê 所在。明亮 ê 大質量恆星 kā 邊仔 ê 水素氣體 離子化了後，發出強烈 ê 紫外光輻射，上尾產生特徵 ê 紅光。星系 ê 彩色影像是 ùi 闊頻影像資料來 ê。H-alpha 濾鏡 是記錄狹頻影像資料 ê，伊 kan-na kā 上強 ê 水素發射線 送過來。為著欲強調這幅望遠鏡影像內底 ê HII 區，to̍h kā 闊頻 kah 狹頻影像敆做伙。有編號 ê HII 區特寫 to̍h tī 影像雙沿 ê 插入圖。用逐張插入圖 ê 獨立編號 to̍h 會使揣著伊是 tī 三角星系內底 ê 佗一位。比論講，大型 HII 區 NGC 604 to̍h tī 正爿插入圖 ê 第 15 號彼位。Tī 這幅 M33 圖 內底，遐差不多是 tī 星系中心 ê 4 點鐘方向。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210930/ 影像：Luca Fornaciari 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210930.html Powered by Firstory Hosting

這个 tī 北方 英仙座 ê 美麗星場有 3 粒月娘遐爾闊（1.5 度闊）。內底有足有名 ê 一對開放星團，英仙座 η kah χ。In 嘛去予編做 NGC 869 (頂懸) kah NGC 884。兩个星團攏是 tī 7000 光年遠 ê 所在，內底攏有比太陽較少年、較高溫 ê 恆星。兩个星團互相離幾若百光年遠爾爾。按照 內底 逐粒恆星 ê 年歲來看，兩个星團攏是 1300 歲，表示講 in 是仝一个 恆星形成區 ê 產物。雙星團若是 tī 較暗 ê 所在，用目睭 to̍h 看有，所以一直攏是 雙筒望遠鏡愛看 ê 目標。這張充滿活力 ê 望遠鏡景色，是用幾若條 gih-tah ê 弦 tī 彩色恆星影像面頂，產生 繞射光點。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211008/ 影像：Jack Groves 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211008.html Powered by Firstory Hosting

獵戶座星雲內底 ê 暗塗粉流是按怎產生 ê？M43 是 獵戶座分子雲 複合體 ê 一部份。伊定定出現，毋閣較罕得予人知影。顛倒是伊邊仔 ê M42 較有名。M42 tī 正爿面頂遐，嘛包括 台形 星 團 內底足濟較光 ê 恆星。M43 是恆星形成區，看起來有複雜交纏 ê 暗塗粉流。是講，伊主要是發光 ê 水素 組成 ê。這規个 獵戶座區 離咱有 1600 光年 遠。Tùi 可見光 來講是袂透光 ê。這張媠甲親像一幅圖 ê 暗 塗粉 區，是 tī 大質量 低溫度恆星 ê 外層大氣 產生 ê。是去予 質子 kah 電子 外部 ê 強粒子風 捒出來 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211006/ 影像：Jari Saukkonen 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211006.html Powered by Firstory Hosting

南極 ê 日出是有較無仝。這个景色逐家攏足愛 ê。連紲幾若個月 ê 暗暝，紲落來是連紲幾若個月 ê 日時。Tī 地球兩極，日頭愛開 幾若禮拜 才 peh--起來，毋閣 tī 中 緯度 kan-na 開幾若分鐘爾爾。極地 ê 日出 會按呢，是因為地球踅 太陽 公轉 ê 時陣 趨一爿，毋是因為 地球自轉 ê 關係。地球極地 ê 空氣有夠薄 ê。Tī 遮愛等到 春分，才會閣看著日頭。毋閣 地球大氣 ê 透鏡效應 kah 太陽盤 ê 寸尺，會予日頭 ê 頭殼頂 早 2 禮拜出現。這張是兩禮拜前，tī 地球南極 寬闊 ê 冰凍世界 翕 ê。彼陣日頭 peh-到地平線面頂上懸 ê 所在。真正 ê 南極 是 tī 通信塔倒爿幾若公尺遐。這个極地日出實在是特別出眾，因為日頭 peh--起來 ê 時陣，戴一頂 發青光 ê 帽仔。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211005/ 影像：Martin Wolf (U. Wisconsin), IceCube Neutrino Obs., NSF; ht: Alice Allen 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211005.html Powered by Firstory Hosting

這兩个巨型 ê 星系互相 kā 對方搝開。Kā 叫做「雙鼠星系」是因為 in 攏有長長 ê 尾溜。是講兩个 捲螺仔星系 敢若已經互相迵過矣。會產生兩條 長長 ê 尾溜，是因為兩个攏 tī 星系 較近 kah 較遠 ê 部份 產生 ê 引力差。因為這个距離傷遠，宇宙交互作用 to̍h 敢若是慢動作，超過幾若億萬年。NGC 4676 tī Bernice ê 頭鬃 ê 星座 (后鬃座) ê 方向揣會著，離咱有 3 億 光年 遠，可能是 彗鬚星系團 ê 成員之一。這張相片 是 tī 2002 年用 哈伯太空望遠鏡 先進巡天 kha-mé-lah 翕 ê。這兩隻 星系鳥鼠 可能會 tī 紲落來 ê 十億年內底，一擺閣一擺相挵，按呢 to̍h 袂繼續互相搝開。落尾，兩个星系會 黏 做一个。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211004/ 影像提供：NASA, ESA, Hubble 資料處理 kah 版權: William Ostling (The Astronomy Enthusiast) 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211004.html Powered by Firstory Hosting

金星是暗暝上光 ê 天星。Tī 南半球早春 ê 暗暝，金星會出現 tī 西爿地平線附近。為著欲創作這幅組合景色，翕相 ê 人 tī 9 月 25 踮巴西南部 ê Cascavel 用追蹤天景 kah 固定前景 ê 方式感光。日落了後，金星 to̍h 出現矣。伊浸 tī 黃道光 ê 光錐內底，太陽光 to̍h ùi 太陽系黃道面 內底 ê 塗粉散射--出來。實際上，毋管是 tī 地球北半球抑是南半球，黃道光 ê 光弧若是 kah 地平線 切 ê 角度傷崎，伊 tī 春分彼陣日落了後（抑是秋分彼陣日出進前）to̍h 會變足明顯 ê。日落了後 ê 暗暝，黃道光射 tùi 厚恆星 ê 星場 kah 銀河中心彼个有巨型星際塗粉雲 ê 核球。Ùi 銀河中心 ê 核球 行 tùi 銀河 tī 地平線 ê 方向，你 to̍h 會看著離太陽上近 ê 恆星系統，半人馬座 α。伊離咱 kan-na 4.37 光年遠爾爾。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211002/ 影像：Rodrigo Guerra 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211002.html Powered by Firstory Hosting

你敢捌看過巨型爍爁噴流？伊實在是真罕得看著，毋閣伊 ê 能量足強 ê。巨型爍爁噴流 是一款爍爁 ê 放電現象，是這世紀才予人發現記錄著 ê。伊會出現 tī 雷暴 kah 閣較懸 ê 地球 電離層 之間。相片內底 是噴流中央節到面頂節 ê 部份，是頂禮拜用 翕爍爁 kah 流星 ê kha-mé-lah tī 美屬 波多 黎各 翕 ê。這个噴流 tī 無夠 1 秒鐘 ê 時間內底噴 70 公里遐爾遠。巨型爍爁噴流 kah 平常時咱知影 ê 雲到雲 抑是 雲到地 ê 爍爁 無仝。巨型爍爁噴流 ê 下跤節看起來 kah 藍色噴流 有成，彼是另外一款 雲到天 ê 衝擊形式。噴流 ê 面頂節看起來 kah 頂層大氣 ê 紅色精靈 有成。巨型爍爁噴流 ê 機制 kah 引發 方式是一个 研究主題。毋閣咱這馬已經知影講，噴流會當減少 地球大氣 tī 無仝部份之間 電荷失平-pāng ê 現象。一个欲揣 巨型爍爁噴流 較好 ê 方法，是去一个會當看較清楚 ê 所在 觀測 遠方高能 ê 雷暴。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210929/ 影像：Frankie Lucena 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210929.html Powered by Firstory Hosting

土星 ê 環會當予咱知影土星 ê 季節。地球台灣時間這禮拜四是 秋分（世界協調時是 tī 拜三）。Tī 這工，地球赤道 是趨 tùi 太陽去。因為 土星環 踅土星 赤道 leh 行，所以土星自旋軸若是有指向 太陽，ùi 太陽 ê 方向來看，這寡環會變甲 足明顯 ê。毋閣 土星 自旋軸若是指向另外一爿，to̍h 是 春分抑是秋分 彼陣，按呢毋管是 ùi 太陽看抑是 ùi 地球看，側向 ê 土星環 to̍h 會 足歹看著。這幅 土星組合圖 是 kā 2004 到 2015 年 ê 土星影像疊做伙 ê。這是為著欲予咱看著這粒 巨行星 ùi 南半球熱天 到 北半球熱天 ê 影像。土星 頂個月離咱地球 實在是有夠近 ê。這個月 這个有環 ê 巨行星猶是 足光 ê，tī 暗時差不多攏看會著。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210919/ 影像：Damian Peach/SEN 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210919.html Powered by Firstory Hosting

因為過節、講古、kah 唱歌出名 ê 十五暝叫做豐收之月。Tùi 北半球 ê 居民來講，彼是秋分 ê 傳統名。Ùi 地球 Rhode 島 ê Saunderstown kā 看，這粒豐收之月 ùi 天色拄暗彼陣 peh--起來，一直 peh 到 Newport 橋面頂，煞拖一條寬闊 koh 溫暖色調 ê 光巡。這是一張 22 分鐘 ê 孤張感光，是 tī 9 月 20 用較厚 ê 濾鏡 kah 數位 kha-mé-lah 翕 ê。Tī 秋分了後 2 工，北半球 to̍h 會變做秋天矣。實際上，ùi 夏節到秋分 這个季節內底，豐收之月是 第四个月圓時。拄仔好是天文內底 leh 講 ê 北半球熱天結束 ê 時間。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210923/ 影像：Mike Cohea 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210923.html Powered by Firstory Hosting

這是一張上有名 ê 月球相片，毋閣是數位處理了後顛倒反 ê 結果。阿波羅 11 號 tī 1969 年降落 tī 月球了後隨翕足濟張相，內底嘛有 Neil Armstrong 翕 ê Buzz Aldrin 上有代表性 ê 相片。原始相片 毋若翕著一个 壯麗青荒 ê 未知世界，嘛翕著反射 tī Aldrin 太空帽仔面殼 ê Armstrong 家己。用現代數位技術來 kā 處理了後，to̍h 看會著這張相片 內底，Aldrin ê 太空帽仔面頂 ê 球形反射 是顛倒反 ê。這 to̍h 是這張 有名 ê 相片，毋閣這馬是 ùi Aldrin ê 角度來看。因為 這張相片 是 Armstrong 翕 ê，所以這是 50 年前 tī 月球自翕 ê。這个原始 ê 面殼反射影像 to̍h tī 倒爿彼區。是講正爿頂懸彼个,是 地球 tī 月球天頂 ê 模樣。獵鷹號登陸器 ê 停車跤用紙箔包牢 leh，嘛翕甲足清楚 ê。幾若年了後，準備欲閣 kā 人類送去 月球。這嘛包括 NASA chhōa-頭 ê 國際合作計畫，Artemis 計畫。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210927/ 影像提供：NASA, Apollo 11, Neil Armstrong 影像處理：Michael Ranger 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210927.html Powered by Firstory Hosting

是按怎球形 ê 恆星會產生這款四角星雲？無人知影。這粒叫做 MWC 922 ê 恆星，可能是 多恆星系統 ê 一部份，伊 to̍h 出現 tī 紅四角星雲 ê 中央。這个影像 是 kā 加州 Palomar 山 ê Hale 望遠鏡 kah 夏威夷 Mauna 山 ê Keck-2 望遠鏡 ê 紅外線 感光影像敆做伙 ê。Tùi 這个 四角星雲 ê 研究，有一个主流 ê 假說是講，中央 恆星 抑是恆星 發展 到尾期，會 kā 氣體用圓錐體 ê 方式擲--出去。Tùi MWC 922 來講，這款圓錐體必須愛 tī 屈尺角 ê 角度才有法度 ùi 伊邊仔看著。這个 圓錐體 假說若是講會通，嘛會當解說影像內底 ê 徑向輻射光，in 可能是綴 圓錐體 雲牆 ê 方向射--出來 ê。按照研究者 ê 推測，這个 圓錐體 ùi 其他角度來看，to̍h kah 超新星 1987A ê 巨大環欲仝欲仝。這可能暗示講，恆星 MWC 922 有一工嘛會變做仝款 ê 超新星 爆炸。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210926/ 影像：Peter Tuthill (Sydney U.) & James Lloyd (Cornell U.) 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210926.html Powered by Firstory Hosting

正爿 ê 氣波星雲 to̍h chhāi tī 開放星團 M52 中央，這个宇宙組合 看--起來實在是拄拄仔好。毋閣這个組合 tī 其他方面 to̍h 毋是蓋好。氣波星雲 嘛叫做 NGC 7635，干焦 10 光年闊爾爾。伊藏 tī 星際塗粉 kah 氣體 ê 複合體內底，是去予孤粒 O 型恆星 ê 恆星風歕--出來 ê。另外一方面，M52 是 一个厚恆星 ê 開放星團，內底有幾若千粒恆星。這个星團差不多有 25 光年闊。In tī 仙后座 ê 北爿邊界。氣波星雲 kah 伊邊仔 ê 星雲複合體 ê 距離，照估算差不多是 11,000 光年遠。毋閣 星團 M52 是干焦 5000 光年遠爾爾。這幅闊幅望遠鏡視野 tī 天頂差不多是 1.5 度闊，按呢差不多是 3 粒月娘 ê 闊度。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210925/ 影像：Lorand Fenyes 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210925.html Powered by Firstory Hosting

Tī 木星出現爍光矣！幾若工前，幾若个團隊 leh 監看太陽系 上大粒行星 ê 時陣，注意著 2 秒鐘長 ê 光爆現象。這款爍光 以前嘛捌看過，是 1994 年彼改足有名 ê 連紲 相碰。彼改 ê 彗星 Shoemaker-Levy 9 號 ê 彗星屑仔 去碰著木星了後，煞 tī 木星留幾若個月 ê 烏斑。木星 上無 有 7 改去 hŏng 碰著 ê 記錄，差不多攏是 業餘天文學家 發現 ê。Tī 這支影片 內底，因為地球大氣層無穩定，煞予木星影像嘛 爍咧爍咧。忽然間，有一个爍光出現 tī 中央倒爿遐。土衛 Io kah 伊 ê 烏影 tī 正爿 看會著。咱可能 無法度知影 是啥物去挵著 木星。毋閣若是 ùi 咱已經知影 ê 厝邊 太陽系 來想，to̍h 應該知影彼可能是一塊岩石敆冰。伊 ê 寸尺 可能 kah 巴士平大台，應該是 ùi 足久以前經過 ê 彗星 抑是 小行星 落 loài ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210917/ 影像：T. Humbert, S. Barré, A. Desmougin & D. Walliang (Société Lorraine d’Astronomie) 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210917.html Powered by Firstory Hosting

M16 嘛 叫做鴟鴞星雲，是一个干焦 2 百萬歲 ê 少年星團，邊仔去予塗粉 kah 發光氣體 ê 新生雲 圍--leh。這區美麗 ê 詳細影像 是採用哈伯色盤 ê 色光。這个 宇宙雕塑，是因為有哈伯太空望遠鏡 tùi 這个恆星形成複合體特寫，才變有名 ê。In 去予叫做 象管 抑是 創生之柱。Ùi 中央生出來 ê 密密 koh 厚塗粉 ê 雲柱，有幾若光年長。In 會因為重力收縮 形成恆星。星團內底 ê 高能輻射 會侵蝕雲柱尾節 ê 物質。落尾會 kā 藏 tī 內底 ê 新恆星暴露出來。Ùi 中央倒爿較光 ê 發射雲脊延伸出來 ê，是另外一个厚塗粉 ê 恆星形成柱。伊 to̍h 叫做 鴟鴞星雲 ê 仙女。M16 tī 7000 光年遠 ê 所在，tùi 雙筒望遠鏡 抑是 細台望遠鏡 來講是一个真好揣 ê 目標。In to̍h tī 分做頭尾兩爿 ê 巨蛇座 尾（蛇 ê 尾溜）方向，tī 天頂 厚星雲 ê 所在。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210909/ 影像：Martin Pugh 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210909.html Powered by Firstory Hosting

咱美麗地球 ê 迷眾 可能會注意著這个 宇宙雲 ê 外形。倒爿有去予烏暗、閘光 ê 塗粉帶箍出來 ê 明亮發射區，去予編做 NGC 7000。這區敢若是一塊大陸 ê 外形，予伊提著這个有名 ê 名，北美洲星雲。正爿拄仔好是北美洲星雲 ê 東岸，嘛叫做 IC 5070，伊 ê 鳥仔形 面模 予人 kā 伊叫做 鵜鶘星雲。這兩个較光 ê 星雲差不多 tī 1500 光年遠 ê 所在，in 攏是仝一个 大型複雜 ê 恆星形成區 ê 一部份。差不多是 tī 彼个有名 ê 獵戶座星雲附近。Tī 這个距離，3 度闊 ê 視野差不多是 80 光年長。這幅厚工 ê 宇宙肖像 是 kā 狹頻 影像敆做伙 ê。主要是欲強調較光 ê 電離鋒面，閣有水素原子、硫磺原子、酸素原子 ê 特徵發射光。這个星雲會當 tī 烏暗 ê 所在，用雙筒望遠鏡看著。Ùi 東北爿看，有一粒足光 ê 星天津四，to̍h tī 天鵝座內底。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210916/ 影像：Andrew Klinger 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210916.html Powered by Firstory Hosting

地球面頂 ê 氣旋是攏按怎 leh 行？氣旋 tī 大西洋叫做 颶風，tī 太平洋叫做風颱。這幅圖 是 ùi 1985 年 到 2005 年 所有主要 ê 風暴路線。地圖展示 氣旋 通常 tī 海面出現，這是合理 ê，因為溫暖 ê 海水蒸發了後會予 in 能量。Ùi 地圖閣看會著氣旋袂 kah 地球赤道 交叉，嘛真少倚近赤道。因為 科氏效應 tī 赤道 ê 作用是零，氣旋愛有科氏力才有法度循環。科氏力 嘛造成 氣旋 照弧形路線走離赤道。這款長期趨勢嘛是一个 研究主題。有證據表示，平均來講，颶風 tī 過去 30 冬 tī 北大西洋 變甲 閣較強矣，而且 in ê 強度 看起來是會愈來愈強。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210915/ 影像提供：National Hurricane Center, NOAA, NASA 資料處理：Nilfanion (via Wikipedia) 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210915.html Powered by Firstory Hosting

這是 ùi 佗一爿 peh-khì-lih Sharp 山？9 月初，好奇號機器人探測車 繼續 peh-khì-lih Gale 隕石坑 內底 ê 中央山領。伊是為著欲揣閣較濟 古早時代 ê 水 ê 線索，kah 未來火星是毋是會當 提供生物生存 ê 證據。這是最近 火星早起時，探測車欲開始鑽空探索進前，翕著這張 360 度 ê 全景圖。這一部份嘛是為著欲 kā 好奇號 tī 地球 ê 人類團隊鬥相共，予 in 畫火星 ê 地景 kah 設計未來可能欲行 ê 路線。水平方向壓縮 ê 影像有一个迒過火星 ê 美麗遠景 去予翕著，內底有 一重一重 ê 山崙、紅色 ê 岩石地表、殕色 ê 流沙、kah 厚塗粉 ê 大氣。中央倒爿 ê 山叫做 Maria Gordon 坎，是 leh 紀念一个 有名 ê 蘇格蘭地質學家。目前 ê 計畫 是欲指揮好奇號 tī 探索 路線中，行倚到 Gordon Notch ê 正爿，研究 煞了後 to̍h 離開遐。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210914/ 影像提供：NASA, JPL-Caltech, MSSS 資料處理 kah 許可：Elisabetta Bonora & Marco Faccin (aliveuniverse.today) 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210914.html Powered by Firstory Hosting

這幅哈伯太空望遠鏡影像內底，有一陣明亮、閃爍 ê 恆星 chhāi tī 北天英雄 ê 星座 英仙座 ê 前景、tī 咱銀河系 ê 內底。影像清楚對焦 tī 遠方 ê UGC 2885，彼是一个差不多離咱 2 億 3200 萬光遠 ê 巨型捲螺仔星系。Kah 銀河系直徑 10 萬光年來比，伊差不多有 80 萬光年闊，有 1 兆粒恆星遐爾濟。按呢差不多是銀河系內底恆星 ê 10 倍濟。UGC 2885 ê 研究，有一部份 是欲了解星系是按怎生到遮爾大粒。伊嘛是「趣味 ê 宇宙旅行」ê 研究目標，是天文學家 Vera Rubin tùi 捲螺仔星系 leh 轉踅 ê 領頭研究。伊 ê 研究是頭一个會當證明講 暗物質 是 咱宇宙 主要 ê 成份。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210918/ 影像：NASA, ESA, B. Holwerda (University of Louisville) 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210918.html Powered by Firstory Hosting

這个鏡內底是啥？這張相片是 南半球 ê 暗暝，夜空內底有三个 足光 ê 星系 實在是真好揣。Ùi 倒爿開始是 小麥哲倫星雲 (SMC)、大麥哲倫星雲 (LMC)、kah 咱 銀河系 中央帶 ê 一部份。In 攏反射 tī 這个淺淺 ê 水池仔內底。是講這个 愛耍 ê 天文攝影師，是 tī 鏡內底排出啥物景色？是 銀河中央 附近 ê 塗粉雲 kah 木星。這張合成相片是 精心設計 ê。是 2019 年中 tī 巴西 南部 ê Mostardas，用仝一台 kha-mé-lah tī 仝一个所在、仝一暝翕著 ê 幾若張相片 組合起來 ê。這張相片 tī 2021 年 ê 國際暗天協會「掠著夜空」比賽 ê「迵到夜空」組 提著第一名。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210913/ 影像：Egon Filter 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210913.html Powered by Firstory Hosting

是咧！你 ê 樹仔敢有法度按呢？這張相片 是 tī 附近樹仔 ê 樹枝暗爿 kah 遠方極光 ê 視覺巧合。這个 極光 是遮爾美麗，因為伊配合 樹枝 ê 形體。結果攝影師看到戇去，煞袂記得翕相。若是撨到一个角度，極光看起來 to̍h 親像是樹仔 ê 葉仔。好咧佳哉！Tī 極光變做 另外 一組 形體 進前，攝影師已經回神，kā 這个 美麗 ê 瞬間 翕起來。一般來講，極光是 太陽能量 爆發引起 ê。是高能 電子 kah 地球大氣層 tī 150 公里懸 ê 所在相碰產生 ê 。這个地球 kah 天空 ê 特別合作，是 tī 2017 年 3 月 tī 冰島 看著 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210228/ 影像：Alyn Wallace 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210228.html Powered by Firstory Hosting

土星 tī 地球 ê 夜空 猶是遮爾光。伊美麗 ê 望遠鏡景色 kah 美麗 ê 土星環定定予伊 tī 天星晚會 內底成做主角。毋閣這个遮爾美麗 ê 土星環 kah 土星暗暝，是無可能 tī 倚太陽這爿 ê 望遠鏡翕著，是愛 ùi 另外彼爿才有法度翕。因為倚太陽這爿干焦有法度看著 土星 ê 日時。事實上，這張土星影像是 Cassini 太空船 翕 ê。這是土星去予薄薄 ê 太陽光照甲親像新月 kah 無照著光 ê 土星暗暝。In ê 烏影 to̍h 投射 tī 闊 koh 複雜 ê 土星環系統。Cassini 是地球送去 ê 機器人太空船，伊踅土星 13 冬了後，tī 2017 年 9 月 15 駛入去這粒氣態巨行星 ê 大氣層。這張宏偉 ê 拼鬥影像是 kā Cassini 闊幅 kha-mé-lah tī 伊 落入去土星 進前 2 工記錄 ê 相片組合起來 ê。咱無機會閣看著土星 ê 暗暝矣，除非閣有 另外一台 ùi 地球送去 ê 太空船 踅土星 leh 行。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210911/ 影像：NASA, JPL-Caltech, Space Science Institute, Mindaugas Macijauskas 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210911.html Powered by Firstory Hosting

這張望遠鏡影像內底 足暗 ê 彗星 67P，ùi 9 月 7 號開始掃過金牛座 ê 背景星 kah 閣較暗 ê 遠方星系。差不多 tī 5 年前，這粒 4 公里闊 ê 雙丸彗核，變做是 ùi 地球送過去 ê 機器人太空船 上尾 ê 安息地。這是歷史有名 ê Rosetta 彗星任務收煞了後 ê 收尾任務。Tī Rosetta 太空船踅木星 ê 任務收煞，離開木星軌道了後，67P 彗星 這馬轉來到 週期 6.4 年 ê 軌道。伊後一擺 ê 近日點（to̍h 是離太陽上近彼位），是 tī 11 月 2 號。11 月 12 是彗星 ê 近地點（to̍h 是離地球上近彼位），kah 地球 ê 距離差不多是 0.42 天文單位。雖然講 11 月底到 12 月應該是彗星上光 ê 時陣，毋閣到時猶是愛用 望遠鏡 才看有。9 月 7 號 Rosetta 任務 ê 目標彗星，會 離咱美麗 ê 地球 0.65 天文單位，差不多是 5.4 光分遠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210910/ 影像：Rolando Ligustri (CARA Project, CAST) 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210910.html Powered by Firstory Hosting

是啥物 kā 仙女座星系圍--leh？Tī 太空中，仙女座 (M31) 去予幾若个較細 ê 衛星星系 kā 圍--leh。若是搝較遠來 kā 看，伊是 倚近 本地星系團。咱 ê 銀河系嘛是其中一个成員。毋閣 tī 天頂，咱銀河系 ê 氣體雲看起來敢若 kā M31 圍--leh。這 kah 地球大氣層 內底 水做 ê 雲 kā 月球 圍--leh，敢若有相-siâng。是講，仙女座星系 ê 氣體雲 傷暗矣，煞看無。若是軁入去這張 趨 45 度、搝長 ê 影像 內底，to̍h 會當看著有史以來 tùi 寬闊 ê 仙女座天區 上長時間感光 ê 影像。這張影像 tùi 水素氣體發出 ê 光 特別敏感，有展示較暗、較毋捌看過 ê 雲 足濟細節。毋閣這張影像毋若翕著按呢。影像頂懸是 三角座星系 (M33)，是 本地星系團 第 3 大 ê 星系，嘛是用目睭 to̍h 直接看有 ê 上遠 ê 天體。M33 下跤彼粒，較光較紅 ê，是銀河內底 ê 恆星，仙女座 β。這張影像是 kā tī 德國 Pulsnitz ùi 2018 到 2021 年內底 幾若擺 長時間感光 ê 相片，用數位合成 ê 方式疊做一張 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210908/ 影像：Stefan Ziegenbalg 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210908.html Powered by Firstory Hosting

這是一个星系抑是兩个？遮爾濟 ê 恆星、氣體、kah 塗粉 tī NGC 520 攪攪做伙，予人認為講，這內底應該是摻著兩个無仝 ê 盤形星系 ê 殘骸。Ùi 哈伯太空望遠鏡 翕著 ê 詳細 影像 看起來，NGC 520 有一个決定性 ê 結構是，伊有 複雜交織 ê 塗粉帶，而且是坦敧 chhāi tī 相碰星系 ê 自轉軸方向閣繼續延伸落去。Kah 這欲相仝 ê 相碰，可能會 tī 幾若十億年了後，發生 tī 咱 ê 盤形 銀河系 kah 咱 ê 大型盤形厝邊星系 仙女座星系 (M31) 之間 ê 相碰。NGC 520 ê 相碰應該是 tī 3 億年前。NGC 520 嘛叫做 Arp 157，tī 1 億 光年 遠 ê 所在，大細有 10 萬 光年 闊。你會當用細台望遠鏡 tī 魚仔 星座（雙魚座）ê 方向揣著。雖然講 NGC 520 內底 ê 恆星速度行 足緊 ê，毋閣 in ê 距離傷遠，所以星系內底 leh 相戰 ê 兩爿，tī 咱猶在生 ê 時陣，無法度改變星系 ê 外形。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210907/ 影像提供：NASA, ESA, Hubble 資料處理 kah 版權：William Ostling (The Astronomy Enthusiast) 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210907.html Powered by Firstory Hosting

這張相 愛 ùi 松柏 開始看。這个構圖是欲翕一欉松柏 kah 背景 ê 銀河系 中央帶。這个 2 個月前想 ê 計畫有成功。In 攏出現 tī 上讚 ê 所在。毋閣 遮有 3 張全景圖 翕著閣較濟物件。多彩 ê 恆星、背景 ê 光點、閣看會著倒爿面頂 足光 ê 牛郎星。Tī 倒爿較遠 ê 所在，地平線面頂有翕著較近 ê 土星。正爿頂懸有翕著 tī 地球大氣層 面頂 踅地球 leh 行 ê 人造衛星。伊 ê 光巡是感光 25 秒鐘久 留--loài ê。是講 地球 ê 大氣層 竟然 看會著，to̍h 是 迵過相片頂懸 ê 青色氣輝。路尾，拄仔好有翕著 火金蛄。毋知你敢有看著？火金蛄 to̍h tī 相片較下跤 ê 所在，tī 露西亞 Primorsky Krai 起起落落 ê 山坡 頭前 ê Milogradovka 河 面頂 leh 飛。In 爍咧爍咧發出黃光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210906/ 影像：Anton Komlev 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210906.html Powered by Firstory Hosting

這个雲是發生啥物代誌？遠方捲雲 ê 冰晶 to̍h 親像是浮 tī 天頂 ê 細片 稜鏡。伊 ê 環地平線弧 kah 地平線 平行，外形敢若是火舌仝款，所以有人私底下 kā 叫做 火虹。若是欲看著 環地平線弧，太陽 上無愛 tī 天頂 58 度懸、捲雲愛 tī 下跤，to̍h 親像是這幅圖內底 ê 毛捲雲按呢。足濟扁扁 ê、六角形 ê 冰晶是組成捲雲 ê 原料。In 愛 照水平方向排好勢，才會當用仝款 ê 方式好好仔 反射太陽光。所以這款 環地平線 弧 較罕得 看著。這个火虹 是這個月初 tī 美國 西 Virginia 州 ê North Fork 山 附近 翕 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210830/ 影像：Christa Harbig 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210830.html Powered by Firstory Hosting