NASA 逐工一幅天文圖 APOD Taigi

Tī 天頂彼个 leh 振動 ê 是啥物？彼是一粒足暗 ê 行星，天王星，用目睭直接是看無。這是一粒氣體大行星，伊這個月初 tī 天頂 經過土星 ê 時陣，tī「衝」ê 時陣去予咱注意著。「衝」就是伊離地球上近，嘛上光 ê 時陣。這支影片 是 英國 Hertfordshire 郡 ê Bayfordbury 天文台 用四點鐘翕 ê 縮時攝影影片。內底有 天王星 kah 伊四粒上大粒 ê 衛星：Titania，Oberon，Umbriel kah Ariel。天王星 ê 視運動會經過啥物背景星，實在是地球 leh 決定 ê，愛看彼陣地球踅太陽是踅 tùi 佗位去。天王星 中央 ê 十字光，叫做 繞射釘，是光線行過用來固定 天文望遠鏡 次鏡 ê 十字結構產生 ê 繞射現象。繞射釘 ê 轉踅毋是因為 天王星 leh 踅，是因為 地球 leh 踅。煞落來這幾個月，用雙筒望遠鏡 to̍h 有法度看著天王星。毋閣，你若是欲看著伊 ê 衛星，嘛是愛用 天文望遠鏡 才看有。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211130/ 影像：David Campbell (U. Hertfordshire), Bayfordbury Observatory 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211130.html Powered by Firstory Hosting

Tī 天星滿滿 ê 夜空下底，有一个闊莽莽 ê 焦燥世界，這是中國中北部 ê Tengger 沙漠。這个闊幅 ê 全景景色，是 tī 12 月 14 這工，月娘拄落去、日頭猶未 peh--起來進前 翕 ê。這个時陣天色猶未光，北方 ê 冬季六角形 ê 天星 to̍h tī 較光 ê 銀河系邊仔。逐年攏看會著雙生仔座流星雨，tī 流星上濟這幾工，閣翕著金爍爍 ê 雙生仔座火流星。Tī 西爿地平線面頂 kah 較光 ê 五車二下底，有一个匕首形 ê 軌跡，伊 ê 尻川尾方向就是流星雨 tī 雙生仔座 ê 輻射點。是講，這个雙生仔座實在是足好揣 ê。Tī 相片中央面頂有兩粒較光 ê 是雙星，較藍 ê 彼粒是北河二，較黃 ê 彼粒是北河三。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211217/ 影像：Alvin Wu 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211217.html Powered by Firstory Hosting

這張相片是 12 月 13/14 tī 烏拉圭南部庄跤 ê 暗暝翕 ê。火金蛄 to̍h tī 月光下底爍咧爍咧。這暗 ê 天氣有淡薄仔雲。一年一擺 ê 雙生仔座流星雨 to̍h ùi 天頂落到雲內底。這張組合相片是向南方翕 ê，是 kā 點半鐘內底翕著 ê 相片疊做一張 ê。雙生仔座流星雨 ê 輻射點是 tī 北方，所以反輻射點會 tī 南方。按呢你 to̍h 會當 tī 這張相片看著 雙生仔流星 ê 光巡 攏行綴南方 ê 地平線下底去。是講流星雨 ê 輻射點 kah 反輻射點 是透視想像出來 ê。地球行過 神祕小行星 Phaethon 3200 ê 塗粉軌跡 ê 時陣，遮 ê 塗粉粒 to̍h 會產生雙生仔座流星雨，綴塗粉軌跡 ê 平行方向 leh 行。In 到地球 ê 大氣層了後，to̍h 用一秒鐘 22 公里 ê 速度 leh 行。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211216/ 影像：Fefo Bouvier 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211216.html Powered by Firstory Hosting

Leonard 彗星 tī 天頂看起來是按怎？今仔日 ê 相片是 中國 ê 起源太空公司 ê 仰望一號 太空望遠鏡 翕 ê。伊毋若翕著 足光 ê 彗星，嘛翕幾若个 太空現象。這是用光學 kah 紫外線 波段翕 ê 彗星 C/2021 A1 (Leonard 彗星)。你會當 tī 相片中央看著 5 工前開始 to̍h 出現 ê 長長 ê 尾溜。地球 to̍h tī 正爿下底遐，伊 ê 大氣層 發出 ê 光是 ùi 倒爿下底到正爿頂懸。遠方有足濟天星，毋閣 tī 倒爿頂懸遐看會著有 兩條衛星軌跡。正爿下跤到倒爿頂懸 較暗 ê 光帶是 極光。這張相片閣有翕著 流星 ê 軌跡，to̍h tī 大氣層 氣輝 遐。你若是想欲 tī 煞落來幾若工 tī 地球 看著 Leonard 彗星，你 to̍h 愛 tī 日頭落山了後、抑是日頭出來進前，向西爿 ê 地平線看才看會著。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211215/ 影像：Zhuoxiao Wang, Yangwang-1 Space Telescope, Origin.Space 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211215.html Powered by Firstory Hosting

Tùi 一寡人來講，這看起來可能有成一个 蜂岫。毋閣實際上，這張相片 是 哈伯 太空望遠鏡翕 ê 宇宙塗粉柱。伊有 2 光年 長，to̍h tī HH 666 天體 ê 內底。這个天體是一个少年 ê 恆星，伊 當-leh 發射能量足強 ê 噴流。這个結構是 tī 咱銀河系上大 ê 恆星形成區，龍骨座星雲 ê 內底。伊 tī 南天爍咧爍咧，離咱有 7500 光年遠。這个 塗粉柱 ê 外形是去予 龍骨座星雲內底較少年、較高溫、較大質量恆星 ê 恆星風 kah 輻射 kā 雕出來 ê。是講 tī 這个恆星形成區內底，有一寡新 ê 恆星猶閣 leh 做。用 紅外線 來 kā 看，to̍h 會當 迵過塗粉來看 較詳細 leh。按呢 to̍h 會當看著 兩个較狹 ê、能量較強 ê 噴流，ùi 猶藏 tī 塗粉內底、拄生出來 ê 恆星嬰仔噴出來。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211214/ 影像：NASA, ESA, Hubble 資料處理 kah 版權：Mehmet Hakan Özsaraç 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211214.html Powered by Firstory Hosting

彼粒山後壁是毋是有發生啥物代誌？有啦！彼粒山叫做 Kirkjufell，是冰島西爿 Grundarfjörður 城附近一粒足老 ê 山。Tī 足崎 ê 山 ê 頭前是 峽灣，tī 2012 年 12 月中欲翕這張相片進前才拄開始結凍。雖然講用 目睭 看是有較暗，毋閣 25 秒鐘 ê 感光煞予 背景極光 ê 美麗 色光 變甲足清楚 ê。毋閣，這張相片上重要 ê 是，伊嘛翕著 雙生仔座 流星雨矣！是講，極光若是變閣較光，流星可能就會看無。倒爿較遠 ê，是咱 ê 銀河 帶。毋閣 銀河系 內底離咱較倚 ê 恆星，是掖甲規个天頂滿滿是。下暗又閣是 雙生仔座 流星 雨 上濟 ê 時陣。又閣會當予 天文 愛好者一个 印象足深 ê 視覺體驗。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211213/ 影像：James Boardman-Woodend; Annotation: Judy Schmidt 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211213.html Powered by Firstory Hosting

這个地點袂䆀，離 地球 地理南極 3/4 英里遠 ê 所在，tī 遮會當看著 12 月 4 號 ê 日偏食。這工 ê 月相是月眉形 ê，月球 kā 太陽閘去上濟，有 90 葩遐爾濟。是講，倒爿 ê 南極望遠鏡 kah 正爿 ê BICEP 望遠鏡 ê 工作人員，to̍h peh-到 Amundsen-Scott 研究站 厝頂 ê 暗區實驗室 去看。這張是以 日食 ê 食甚 當做 中心 開始，這張縮時攝影組合相片，是每 4 分鐘翕一張 ê。翕出來 ê 太陽 to̍h 親像是 tī 足寒 ê 南極天頂 leh 行。Tī 研究站厝頂彼五个 kā 手夯起來 ê，ùi 倒爿到正爿是：Brandon Amat, Aman Chokshi, Cheng Zhang, James Bevington kah Allen Forster。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211211/ 影像：Aman Chokshi 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211211.html Powered by Firstory Hosting

Hale-Bopp 彗星，是 1997 年 ê 大彗星，因為伊比邊仔 ê 恆星閣較光。伊甚至比 市內 ê 電火 閣較光。毋閣你若是離開市內 ê 電火，to̍h 會當看著一場 足精彩 ê 表演。這張 Hale-Bopp 彗星 ê 相片是 tī 意大利 Cortina d'Ampezzo 邊仔 Dolomite 山脈 ê Val Parola Pass ê 天頂翕 ê。Hale-Bopp 彗星 有藍色 ê 離子尾溜，是 ùi 彗核來 ê 離子，是 太陽風 kā 歕出來 ê。白色 ê 塗粉尾溜是 彗核 內底較大粒粒子 ê 塗粉，in 踅彗星 leh 行，是太陽光 ê 光壓 kā 驅動 ê。Hale-Bopp 彗星 (C/1995 O1) 有 18 個月會當用目睭看 to̍h 看有。比歷史上其他 彗星 會當看著 ê 時間 閣較久。大彗星 後擺出現 ê 時陣，已經是 4385 年 後 ê 代誌矣。這個月 Leonard 彗星 變足光 ê，閣無偌久 用目睭 to̍h 看會著矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211208/ 影像：A. Dimai, (Col Druscie Obs.), AAC 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211208.html Powered by Firstory Hosting

11 月 19 這工，烏雲走--了後，Lick 天文台 36 吋 大屈折望遠鏡 ê 圓厝頂 to̍h 拍開矣！這个有年歲 ê 望遠鏡 tī 這个時陣指向天頂 ê 偏食月。為著欲予天文學家 tī 暗時看有、控制望遠鏡、kah 看清楚座標盤，天文台拍開較暗 ê 紅光，煞 kā 57 英尺長 ê 望遠鏡筒攏翕--入來，產生這張光暗分明 ê 相片。這擺 ê 月偏食會使講是 99 葩 ê 月全食。Tī 望遠鏡筒 kah 圓厝頂 ê 窗仔面頂 ê 月娘，tī 食甚階段了後，是愈來愈光。食甚 就是月娘去予地球閘上濟 ê 時陣。月光迵過薄雲，產生這个彩色 ê 月暈。Ùi 拍開 ê 圓厝頂看--出去，天頂較清較明 ê 所在有 昴宿星團，差不多離 月球 kah 地球烏影 有 5 度遠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211126/ 影像：Laurie Hatch 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211126.html Powered by Firstory Hosting

Leonard 彗星這馬已經會當直接用目睭看矣！毋閣猶是足暗 ê。伊今仔日離地球上近。若是欲看這粒彗星，上好 ê 時機就 tī 這禮拜。日頭落山了後，看 tùi 西爿地平線遐 to̍h 看會著。這馬欲看彗星是 tī 地球赤道 以北 ê 所在 看較有。毋閣到 12 月下旬，彗星 to̍h 愛 tī 地球赤道以南 ê 所在才看較有矣。這張相片是一禮拜前 tī 美國 加州 翕著 ê 彗星 C/2021 A1 (Leonard 彗星)。這張長時間感光 ê 相片，會當看著彗星 足詳細 ê 青色 彗鬚 kah 愈來愈長 ê 塗粉尾溜。彗星行到內 太陽系 以後 to̍h 離咱干焦幾若光分遠爾爾。這張拄仔好 tī 伊行到 球形 M3 星團頭前 ê 時陣 翕著。毋閣，M3 是離咱 35,000 光年遐爾遠。閣一禮拜，Leonard 彗星 to̍h 會 離金星足近 ê。伊會閣 繼續行，到明年一月初 ê 時陣，to̍h 會倚太陽上近。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211212/ 影像：Dan Bartlett 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211212.html Powered by Firstory Hosting

是啥物造成倒爿頂懸彼个奇怪 ê 捲螺仔結構？無人知影。伊 ê 外層氣體去予噴--出來，實在是有成是 雙星 系統 ê 行星形星雲 時期。這个 大捲螺仔 有 1/3 光年 闊，有捲 4-5 輾完整 ê 彎。是講遮爾整齊 ê 結構實在是毋捌看過。假使予捲螺仔氣體一个脹大率，按呢每 800 年 to̍h 應該出現一輾新 ê，這 kah 兩粒恆星互踅 ê 時間相 siâng。這个 雙星系統 叫做 飛馬座 LL，嘛叫做 AFGL 3068 抑是 IRAS 23166+1655。這張影像是 哈伯太空望遠鏡 tī 近 紅外線 波段翕 ê。這个 捲螺仔結構是按怎會發光，咱 到今猶毋知。目前有一个假說是講，這个光應該是去予內底 ê 恆星照予光 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211129/ 影像提供：NASA, ESA, Hubble, HLA 資料處理 kah 版權：Jonathan Lodge 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211129.html Powered by Firstory Hosting

Tī 北極 kah 南極熱天會拄著 極晝，這个時陣 ê 太陽會一直 tī 地平線面頂 24 點鐘無落去。這工是 12 月 4 號，是南極 ê 熱天。這是用 魚眼鏡頭 追蹤記錄 tī 聯合冰川天頂 ê 太陽 ê 縮時攝影相片，是 kā 幾若張太陽 ê 相片疊做一个圓箍仔。是講 tī 這工，聯合冰川 ê 天頂是有較暗，就算是太陽 tī 地平線面頂嘛是仝款。這張是 tī 日全食足短 ê 時間內底翕 ê。食日 to̍h tī 這張組合相片 ê 下底中央。Tī 日全食 ê 路線行過 ê 所在，月球 ê 烏影 to̍h kā 天頂 閘烏去矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211210/ 影像：Stephanie Ziyi Ye 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211210.html Powered by Firstory Hosting

這張影像是 ùi 火星探測軌道衛星 hip--ê 高解析度影像。這是毅力號 媠氣降落 tī 火星第二工 hip--ê。Tī 遮咱會使看著毅力號降落 ê 所在。軌道衛星 ê kha-mé-lah 嘛看會著 kā 毅力號送到火星表面 ê 火星 2020 任務 ê 降落火箭、隔熱枋、la̍k-khá-sàng、kah 後殼 ê 所在。Tī 影像內底每一个四角框攏是 Jezero 石坑內底 200 公尺闊的區域。毅力號 to̍h 停 tī 影像中央下面彼个四角框內底。彼搭是降落火箭 kā 探測車降落 tī 火星表面 ê 時陣，去予火箭 ê 煙筒管噴出來 ê 圖樣。等天空吊車 kā 探測車囥好了後，降落火箭 to̍h 會飛到一个安全 ê 所在，才摔落。伊上尾安息 ê 所在，是 tī ùi 倒爿算過來第二个四角框內底，彼个深色 ê V-形圖彼搭。Tī 降落過程分離出來 ê 部份，像 隔熱枋、la̍k-khá-sàng、kah 後殼，in 停 tī 地面 ê 所在，嘛去予 tī 火星軌道 hip--ê 高解析度影像標出來。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210227/ 影像：NASA, JPL-Caltech, MSSS 音樂：P!SCO 鼎鼎 聲優：P!SCO 鼎鼎 翻譯：An-Li Tsai (NCU) 原文：https://apod.nasa.gov/apod/ap210227.html Powered by Firstory Hosting

這張影像是 tī 地球拼接起來 ê。是 kā 142 張 tī 火星 Jezero 石坑下底翕 ê 影像，鬥做這張 360 度 ê 全景圖。這寡高解析度 ê 彩色影像，是用 毅力號探測車 面頂一台會當搝近翕 ê Mastcam-Z kha-mé-lah tī 火星日第三工，to̍h 是 tī 2021 年 2 月 21 翕--ê。Ùi Mastcam-Z ê 鏡頭看過，頭前是 kah 車平大台 ê 探測車 ê 甲板。Tī 探測車頭前大片淺色 ê 火星塗，是探測車 tī 2 月 18 媠氣降落 ê 時，去予降落火箭 ê iăn-jín 噴去 ê。45 公里闊 ê Jezero 石坑 ê 坑仔墘 to̍h tī 遠方 peh--khí-lâi。閣紲落來 ê 火星日，毅力號會探索 石坑內底，古早時代 ê 湖 kah 三角洲。看有法度 tī 微觀世界內底揣著生物 ê 痕跡無？而且閣愛收集標本，未來才帶轉來地球。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210226/ 影像：NASA, JPL-Caltech, MSSS, ASU 音樂：P!SCO 鼎鼎 聲優：P!SCO 鼎鼎 翻譯：An-Li Tsai (NCU) 原文：https://apod.nasa.gov/apod/ap210226.html Powered by Firstory Hosting

Tī 火星降落看起來是按怎？頂禮拜 tī 火星，毅力號探測車 入去大氣層、降落、登陸 ê 時陣，為著欲監控儀器 ê 反應，to̍h tī 面頂鬥有攝影功能 ê kha-mé-lah。這馬 kā in ê 影像送轉來地球矣。這个 3 分半鐘 ê 組合影片，是 ùi la̍k-khá-sàng 拍開開始。伊入去 火星大氣層 ê 時陣，速度 to̍h 隨變慢去。紲落來，隔熱枋 脫離，先落--lòe。Tī 毅力號降落 ê 時陣，看會著火星愈來愈大，伊 ê 表面嘛 愈來愈清楚。影片 過兩分鐘了後，la̍k-khá-sàng 脫離，毅力號發動降落火箭，kā 火星地面 ê 塗掖甲四界攏是。天空吊車 隨開始 kā 毅力號沓沓仔降--lòe，才速速飛走。這个毅力號探測車機器人 to̍h ùi 這馬開始探索這个古早時代 ê Jezero 石坑。嘛欲 tī 這个 地球 ê 厝邊行星 走揣，看過去是毋是有 生物 ê 痕跡。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210223/ 影像：NASA/JPL-Caltech, Mars 2020 Mission Team 音樂：P!SCO 鼎鼎 聲優：P!SCO 鼎鼎 翻譯：An-Li Tsai (NCU) 原文：https://apod.nasa.gov/apod/ap210223.html Powered by Firstory Hosting

#啥人讀予你聽 這擺邀請來 ê 來賓是【逐工一幅天文圖 Podcast】 背景音樂 ê 作曲家「鼎鼎」，伊其實是 P!SCO 樂團 ê Keyboard 手！ https://www.instagram.com/pisco88ding/ https://www.facebook.com/pisco88 P!SCO 樂團 12/25-26 舉辦 ê 頭一屆「般若電司音樂祭」才拄煞，實在是有夠 High ê 啦！若是無去參加 ê 人，會當去「般若電司音樂祭」ê 面冊，抑是「P!SCO 樂團」ê 面冊看音樂祭 ê 相片做伙 High 一下： https://www.facebook.com/piscoband https://www.facebook.com/morethandancefest ※※※※※※※※※※※※ 咱這集節目講 ê 主題是「火星」！內底 ê 內容到底有啥物 leh？ ★ 今年攏總有三个國家參與火星計畫，到底是佗三个？是按怎有遮爾濟？ ★ 太空船愛飛偌久才會到火星？是按怎愛飛遮爾久？ ★ 火星面頂有水無？火星面頂敢有性命？抑是有火星人？ ★ 進前敢有其他 ê 火星任務登陸火星？攏是佗一國 leh 參與 ê？ ★ 咱以後敢有可能移民火星？愛閣等偌久？ 按呢咱緊來聽鼎鼎 ê 訪問 Youtube:【啥人讀予你聽 - 佮 P!SCO 鼎鼎 做伙來講火星任務】 https://youtu.be/_2EtCB2n73o 紲落來閣來聽今仔日另外一集 podcast，鼎鼎讀 ê 文章 【毅力號：是按怎登陸火星】 https://apod.tw/daily/20210220/ ------ 主來賓 / P!SCO 鼎鼎 次來賓 / 蔡老師、阿錕 主持 / Dolly 攝影 / 彪彪、Dolly 鉸片 / Dolly 混音 / 阿錕 製圖 / 彪彪 錄音室 / 頑皮音樂影像工作室 Powered by Firstory Hosting

這張影像是太平洋時間 2 月 18（台灣時間 2 月 19 ）毅力號 欲 tī 火星登陸進前翕 ê。毅力號 to̍h 吊 tī 火箭下跤，離火星表面 kan-na 幾若公尺懸 ê 所在。這个予人緊張 ê 景色，是 ùi 入去火星大氣層開始激烈旅行 7 分鐘 了後看著 ê。這是高解析度影片 ê 一部份。這張影像是 tī 天空吊車 上尾一擺降落 ê 時陣，ùi 降落火箭翕 ê。會使看著三條搝絚 ê 機械電纜 kā 毅力號放落，in 差不多有 7 公尺長。閣有一條電纜連到 kah 車平大台 ê 探測車 ê 電腦，kā 信號傳過去（ to̍h 親像影像按呢）。Tī 毅力號下底，火星表面 ê 塗沙粉去予降落火箭 ê iăn-jín 噴甲。登陸了後，to̍h kā 電纜放開，予降落火箭會當 tī 燃料燒了進前，飛到安全 ê 距離。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210220/ 影像：NASA, JPL, Mars 2020 音樂：P!SCO 鼎鼎 聲優：P!SCO 鼎鼎 編輯：P!SCO 鼎鼎 混音：彪彪 翻譯：An-Li Tsai (NCU) 原文：https://apod.nasa.gov/apod/ap210220.html Powered by Firstory Hosting

12 月 4 號 ê 日全食，干焦一寡人看會著，in to̍h 徛 tī 月球 ê 烏影 下底。這是天體力學 決定 ê，毋是地理邊界決定 ê。這擺日全食 ê 路線足狹 ê，閣迒過地球較歹到 ê 南極大陸。毋閣猶是有一寡日食愛好者，衫穿有夠，逐到足寒 ê 南極，才會有這个榮幸 tī 遮爾清氣 ê 天頂 翕著日全食。這張是 tī 月球烏影下底 ê 聯合冰川 地面望遠鏡 tī 日全食拄欲開始進前翕 ê。有翕著太陽去予月盤烏影閘著了後，ùi 頂懸邊仔走出來 ê 光線。你嘛會當注意看太陽面頂邊仔 ê 粉紅仔色日珥。日冕是太陽 ê 外層大氣，日全食 ê 日冕實在是足壯觀 ê。按呢這張較闊 ê 太陽組合圖 to̍h 有符合咱 ê 期待。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211209/ 影像提供 kah 版權：Theo Boris, Christian A. Lockwood, David Zimmerman (JM Pasachoff Antarctic Expedition) 影像合成：Zev Hoover and Ronald Dantowitz (MARS Scientific) 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211209.html Powered by Firstory Hosting

逐改若是有兩个 烏洞相碰，to̍h 會 tī 宇宙發出足大聲 ê 重力波。人類到 7 年前才有法度聽著這个 特別 ê 聲，毋閣咱已經 tī 前三輪觀測聽著 90 擺事件矣。這張圖 是頻譜圖，是重力波頻率 kah 時間 ê 關係。這 90 擺事件是用 LIGO (美國) VIRGO、(歐洲)、kah KAGRA (日本) ê 大型探測器揣著 ê。相碰事件 ê 能量 傳到 地球 若是愈強，顯示 tī 圖內底 ê to̍h 會 愈光。這是科學界新 ê 發展，重力輻射 ê 聲 予咱發現講，烏洞 kah 中子星比咱知影 ê 閣較濟，嘛予咱一个新 ê 方式去 量宇宙 ê 脹大率。第四輪 ê 重力波觀測 會 tī 2022 年 ê 12 月，會有較懸 ê 敏感度。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211207/ 影像：Gregg RuppelNSF, LIGO, VIRGO, KAGRA, Georgia Tech, Vanderbilt U.; Graphic : Sudarshan Ghonge & Karan Jani 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211207.html Powered by Firstory Hosting

月球面頂哪會有一个奇怪 ê 烏點？這是 國際太空站 (ISS) 啦！頂個月，為著欲翕著這个 踅地球 leh 行 ê 太空站，時間愛節甲拄拄好。伊 to̍h 拄仔好行過一半發光 ê 膨月頭前。這張組合相片是 tī 美國 Arizona 州 ê Payson 翕 ê，是 kā 足濟張 ISS ùi 月球 面頭前行過 ê 1/2000 秒 影像 提來疊做一張 ê。你若是 較細膩檢查 這个 ISS 翕著 ê 影像，你 to̍h 會當看著足大 ê 太陽能枋 kah 鷹架。你會當 tī 倒爿頂懸看著較光 ê 隕石坑 Tycho。淺色 ê 地表是高原，較光滑、較暗 ê 是月海。這个線頂 工具會當 kā 你講，你這馬 ê 所在是毋是會當看著 國際太空站。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211206/ 影像：Andrew McCarthy 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211206.html Powered by Firstory Hosting

昨昏（12 月 4 號）有日全食，毋閣干焦 tī 地球尻川尾才看會著。為著欲翕著這个 特別 ê 現象，飛龍機飛到 南半球海洋 ê 雲頂翕。這張相片 足壯觀 ê。光點是太陽 ê 外層 日冕，食月 是烏點，拄仔好 行到太陽 ê 中心。倒手爿到下跤是 飛龍機 ê 翼股 kah iăn-jín，倒爿較遠 ê 所在閣有 另外一隻飛龍機 leh 看日食。食日邊仔一輾較暗 ê 叫做 烏影錐。伊會較暗是因為你看著月娘進前，愛先經過一个去予月娘閘暗 ê、厚厚 ê 大氣層。你若是 較細膩來檢查 這个食日，to̍h 會發現伊 ê 正爿是 水星。後一擺 ê 日食 會 tī 2023 年 4 月經過澳洲 kah 印尼，閣後一擺 會 tī 2024 年 4 月 經過 北美洲。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211205/ 影像：Petr Horálek (ESO Photo Ambassador, Inst. of Physics in Opava) 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211205.html Powered by Firstory Hosting

這个遮爾懸 ê 斷崖毋是 tī 行星，毋是 tī 月球，是 tī 彗星。這是太空船 Rosetta tī 彗星 CG 較暗核心 ê 一个所在發現 ê。Rosetta 是歐洲 ESA 發射 ê 機器人太空船，計畫 tī 2014 年 kah 踅太陽 ê 彗星相會。這个 斷崖 to̍h 是 tī 2014 年翕 ê。雖然講這有 1 公里遐爾懸，毋閣 彗星 CG ê 表面重力有較低，所以講若是 欲 peh--去-lih 是無蓋困難，甚至你 ùi 面頂 跳 loài 嘛無代誌。Tī 斷崖下底是較平 ê 地表，塗跤有幾若粒 大岩石，差不多有 20 公尺大。Ùi Rosetta 提著 ê 資料表示，彗星 CG 面頂 ê 水冰，kah 地球海洋 ê 水比--起來，有較無仝款 ê 氘 比例。這表示講 in 兩个 ê 來源可能無仝。Rosetta tī 2016 年 ê 時陣 結束伊 ê 任務。伊上尾 ê 任務是去挵彗星 CG。彗星 CG 無偌久進前才拄仔 kah 地球相倚，用細台望遠鏡 猶看會著。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211128/ 影像提供 kah 許可：ESA, Rosetta spacecraft, NAVCAM Additional Processing：Stuart Atkinson 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211128.html Powered by Firstory Hosting

這張 11 月 18 ê 速翕，月娘 to̍h 敢若去予地球 ê 烏影閘著仝款。這是 tī Sicily ê 暗暝，原本足光 ê 月娘去予烏雲閘著矣。月光煞變暗去，這个時陣月娘去予較懸 ê 薄雲邊仔一寡差不多細粒 ê 水滴產生繞射。結果月光變做彩色 ê，看起來 to̍h 親像是月娘 ê 日冕，月冕，仝款。這暝，月娘嘛 tī 彩色 ê 雲倒爿下跤 ê 昴宿星團出現。昴宿星團嘛叫做七姊妹仔。月娘出現 tī 遐 ê 時陣，就是發生月食 ê 時陣，天色變暗，月娘嘛變做紅色 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211204/ 影像：Marcella Giulia Pace 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211204.html Powered by Firstory Hosting

這張組合相片是 11 月 24 天光進前翕 ê，這陣 ê 彗星 Leonard (C/2021 A1) 掃過 北天兩个星系之間。青色 ê 彗鬚是彗星 ê 塗粉尾溜，拄仔好射 tī 頂懸彼个 NGC 4631，海翁星系 ê 心臟區。毋閣 NGC 4631 kah 下底 ê NGC 4656，棍仔球桮星系，是背景星系， tī 2500 萬光年遠 ê 所在。這工，彗星離咱 ê 地球有 6 光分 ê 距離。彗星 Leonard 離地球上近 ê 時陣猶未到（而且會離 金星 閣較近），伊會 tī 12 月 ê 時陣變閣較光。這粒彗星這馬用雙筒望遠鏡 kah 細台望遠鏡 已經看會著矣。這是伊上尾一擺拜訪內太陽系。伊 ê 近日點，就是伊上倚太陽彼工，會 tī 1 月 3 號。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211203/ 影像：Gregg Ruppel 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211203.html Powered by Firstory Hosting

大捲螺仔星系 定定會予人注意著。In 少年、光、閣有足媠 ê 藍色星團、kah 成對 ê 捲螺仔手骨。毋過較細 ê 星系嘛是會形成新 ê 恆星，像 厝邊星系 NGC 6822 就是，伊嘛叫做 Barnard 星系。NGC 6822 干焦 150 萬 光年遠爾爾，是 本星系群 ê 成員之一。伊 to̍h tī 人馬座 ê 星場外口，人馬座是一个有足濟恆星 ê 星座。NGC 6822 有 7000 光年闊，是一个不規則矮星系，kah 小麥哲倫星雲 欲仝欲仝。一寡較光 ê、leh 爍十字光 ê 前景星，是咱銀河系內底 ê 恆星。Tī 這張深色 ê 合成相片內底，後壁 ê Barnard 星系內底有足濟少年 ê 藍色恆星，閣有一搭一搭 ê 粉紅仔色水素光，這表示講遮是一个恆星形成 區。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211202/ 影像：Dietmar Hager, Eric Benson 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211202.html Powered by Firstory Hosting

是啥物物件 tī 月食 ê 邊界產生這个藍色 ê 布邊？這个藍色布邊是真的，毋閣真歹看著。這是頂禮拜月食 ê 時陣，tī 中國 鹽城 用 HDR 技術翕著 ê 相片。這已經用數位處理 ê 方式 kā 月娘 ê 光度調整過矣，按呢 色彩 會較明顯。正爿下跤 ê 殕色 是 月娘 本底 ê 色，是直接反射太陽光 ê 色。倒爿面頂 ê 月娘無直接去予太陽光照著，因為去予 地球 ê 烏影 閘著 矣。毋閣太陽光迵過 地球厚厚 ê 大氣層 了後，雖然有較暗，嘛是有照著月娘。按呢去照著 ê 月娘是紅色 ê，咱 kā 叫做 血月。這 kah tī 地球看著 ê 紅色日落是仝款 ê 原因。因為空氣會 kā 大部份 ê 藍光 散射，賰 ê 看著 ê 就是紅色 ê。這个無四常 ê 藍色布邊 是別款原因。這个藍色是太陽光迵過高層 ê 地球大氣，遮 ê 紅光 去予臭氧吸收去矣，煞賰 藍光。明仔載有 日全食，毋閣真不幸，干焦 tī 地球南極 附近才 看有。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211201/ 影像：Angel Yu 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211201.html Powered by Firstory Hosting

大閣媠 ê 捲螺仔星系 M101 是 Messier 星表較後尾 ê 天體，毋過毋是 上落尾彼个。伊有夠大 ê，有 1 萬 7 千 光年遐爾闊，差不多是咱銀河系 ê 二倍大。M101 是 19 世紀 Ross 爵士用 大望遠鏡，反射式 ê Leviathan of Parsontown 觀測 ê 捲螺仔星雲。到 20/21 世紀 ê 時陣，哈伯太空望遠鏡 用 51 張相片，閣摻地面望遠鏡 ê 觀測資料，kā 鬥做這張拼鬥影像。這張影像是 M101 中央 4 萬光年闊 ê 部份，是哈伯影相內底上有名 ê 捲螺仔星系。這張遮爾清楚 ê 影像看會著足明顯 ê 星系盤，閣有面頂 ê 恆星 kah 塗粉。有一寡仔是迵過 M101 嘛猶看有。M101 嘛叫做 風吹星系，chhāi tī 北天星座 大熊座 ê 邊界內底，離咱有 2500 萬光年遠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211127/ 影像：NASA, ESA, CFHT, NOAO 感謝：K.Kuntz (GSFC), F.Bresolin (U.Hawaii), J.Trauger (JPL), J.Mould (NOAO), Y.-H.Chu (U. Illinois) 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211127.html Powered by Firstory Hosting

地球 ê 中央烏影，嘛叫做本影，是圓 ê。Tī 天頂若是倚地球愈近，這个圓 ê 烏影 to̍h 愈大，若離地球愈遠，這个圓 ê 烏影 to̍h 愈細。若是 tī 月球軌道 ê 所在，這个烏影是比月球較大。毋閣 tī 11 月 18/19 ê 月食，有一屑屑仔 ê 月娘留 tī 本影 ê 外口。這張相片是 tī 1.5 點鐘 ê 時間內底，kā 這擺 99 葩 ê 月全食 翕著 ê 5 張相片疊做一張 ê。這个系列是 kā 月食 按照 去予地球 圓形 烏影閘著 ê 部份排好勢。上中央彼張是「食甚」，就是「食」發生上濟 ê 時陣。你會當看著月娘 tī 地球烏影外口猶是遮爾光，敢若是一个薄薄 ê 銀盤。是講，tī 地球烏影內底 ê 月球嘛毋是全烏 ê，你猶是會當看著紅色 ê 反射光，這是 一部份色光 ê 太陽光 去予地球大氣層 kā 散射到 地球烏影區，才產生這款現象。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211125/ 影像：Jean-Francois Gout 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211125.html Powered by Firstory Hosting

你敢捌看過昴宿星團？就算你有看過，你可能毋捌看過遮爾大閣遮爾清楚 ê。昴宿星團 可能是天頂上有名 ê 星團，因為伊內底 ê 恆星足光 ê，光到你免用雙筒望遠鏡，直接用目睭 to̍h 看會著，就算你 tī 光害足嚴重 ê 城市 嘛看會著。你若是 tī 較暗 ê 所在用較長 ê 時間感光，踅 tī 昴宿 星團 邊仔 ê 塗粉雲 to̍h 會變甲足清楚 ê。這張 相片 是 tī 美國 Florida 州翕 ê。這張 tī 天頂 ê 闊度是幾若粒 月娘 ê 大細。昴宿星團 嘛叫做 七姊妹仔，抑是 M45，伊 to̍h tī 金牛座 ê 方向差不多 400 光年遠 ê 所在。較 近代 ê 傳說 是講，其中一粒恆星 tī 星團號名了後煞變暗--去，所以干焦賰 6 粒 恆星用目睭看會著。實際上 昴宿星團 內底，目睭看會著 ê 恆星無一定是 7 粒，可能較濟粒嘛可能較少粒。主要愛看彼工 ê 天色是毋是 有較暗，嘛愛看觀測者 ê 目睭 有較清有較明 無。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211124/ 影像：Damien Cannane 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211124.html Powered by Firstory Hosting

是按怎太陽烏子面頂會遮爾燒熱？太陽烏子 應該愛比太陽表面較冷淡薄仔，因為產生 in ê 磁場會減少 對流 產生 ê 熱。所以這區 ê 溫度若是幾若百倍懸，比 太陽日冕 ê 溫度閣較懸，按呢 to̍h 有較奇怪。為著欲揣著這个答案，NASA kā 一台足敏感 ê X-光望遠鏡指向太陽。這台 to̍h 是 踅地衛星 核子光譜望遠鏡陣列 (NuSTAR)。這張相片 ê 紅色 是 紫外光 ê 太陽影像，是用 踅地衛星 太陽動力天文台 (SDO) 翕 ê。面頂疊 ê 青色 kah 藍色 是 NuSTAR tī X-光 高能波段 量著 ê 太陽烏子 面頂 ê 發射線，是 溫度足懸 ê 所在。太陽大氣 ê 加溫 機制 會當 ùi NuSTAR ê 影像來揣著答案。太陽 ê 奈米閃焰 kah 微閃焰 ê 短期 能量爆發，可能是驅動這个無四常 ê 加溫機制 ê 原因。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211123/ 影像：NASA, NuSTAR, SDO 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211123.html Powered by Firstory Hosting

月娘哪會拄仔好 tī 這棟大樓面頂？當然是 計畫好勢 ê！天文攝影師是真細膩 leh 計畫這个畫面。愛 知影 tī 佗位囥 kha-mé-lah，嘛愛知影當時翕這張相，才有法度產生這个 使人讚嘆 ê 畫面。這張相片是 tī 11 月 19 透早，月偏食 發生上濟 ê 時陣翕 ê。月食 to̍h 是 月球行過地球烏影 彼陣發生 ê 現象。這个時陣，差不多有 99.1 葩 ê 月娘 行到 地球 ê 烏影區，嘛是月球上暗 ê 時陣。這棟大樓是 智利 ê 大 Santiago 塔，是 南美洲 上懸 ê 大樓。這擺 ê 月食 攏總有 6 點鐘遐爾久，毋閣這張相片愛 tī 幾若秒鐘內底翕出來，因為 地球 足緊 to̍h 會離開大樓面頂矣。後一擺 ê 「食」會是 日全食，tī 12 月 4 號，毋閣 愛 tī 地球尻川尾才看有。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211122/ 影像：Yuri Beletsky (Carnegie Las Campanas Observatory, TWAN) 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211122.html Powered by Firstory Hosting

是按怎隔壁星系袂 tùi 背景星系產生 重力透鏡效應？伊會！毋閣兩个 星系 傷近矣！角位移 kah 兩个星系 ê 角寸尺 相比 傷細矣！這張 NGC 3314 ê Hubble 影像展示兩个 排做一排 ê 大捲螺仔星系。前景 ê 捲螺仔星系 NGC 3314a 是 giōng-欲 完全正向。伊 ê 風吹形 是少年星團造成 ê。背景 leh 發光 ê NGC 3314b，有一寡較暗 ê 捲螺仔形 ê 星際塗粉 帶，嘛會當用來追蹤伊 ê 捲螺仔結構。兩个星系攏出現 tī 長蛇座星系團 ê 邊仔。這个星系團離咱有 2 億光年遠。透鏡星系 若是較細抑是較遠，這个 重力透鏡 ê 變形 是會較明顯。背景星系可能會變形做一个 箍箍仔，kā 較近彼个箍--起來。前景星系 ê 恆星 tī 足短 ê 時間內底 kā 背景星系 ê 恆星光放大，造成透鏡星系 ê 爍光。這个現象有一工可能會當 ùi 懸解析度望遠鏡 ê 觀測內底看著。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211117/ 影像：NASA, ESA, Hubble; Processing & Copyright: William Ostling (The Astronomy Enthusiast) 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211117.html Powered by Firstory Hosting

這粒是 Leonard 彗星。Leonard 彗星 ê 編號是 C/2021 A1，是 tī 2021 年 1 月 離開 火星 ê 時陣，去予人發現 ê。伊足暗 ê，毋閣伊 ê 軌道 會當 kā 這粒 足大粒 ê 冰雪球 chhōa 來 內太陽系。伊會 tī 12 月 ê 時陣 ùi 地球 kah 金星 邊仔行過，了後才 tī 2022 年 1 月 ê 時陣傱 tùi 太陽去。彗星 足歹預測 ê，這件代誌是通人知。毋閣有人預測講，Leonard 彗星 ê 光度 tī 12 月 ê 時陣，會光到咱 直接用目睭 to̍h 看會著。一禮拜前去予人翕著 ê Leonard 彗星，已經有 青色 ê 彗鬚 kah 足長 ê 塗粉尾溜 矣。這張相片是 kā 62 張 ùi 中尺度望遠鏡翕著 ê 影像疊做一張 ê。這內底有一組是追蹤彗星，另外一組是追蹤背景星。背景是 tī 美國 加州 六月湖 附近 ê 東 Sierra 山脈 ê 夜空翕 ê。這粒 tī 北天 ê 彗星 tī 12 月中離開地球了後，會行 tùi 南天去。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211121/ 影像：Dan Bartlett 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211121.html Powered by Firstory Hosting

11 月 19 日頭落山進前，咱 tī 墨西哥 Cancun 市 厚雲 ê 天頂揣著咱 ê 月娘。這張是 長鏡頭 ê 速翕。雖罔講這是一擺長時間 ê 月偏食，毋閣月球猶是無去予地球 ê 本影 完全閘著。這擺 ê 月偏食，月球去予閘著 ê 範圍足闊 ê，煞看會著地球烏影下底較暗 ê 紅光。Tùi 天文迷眾 來講，in 知影 這个紅光 愛 tī 月全食才看會著。這个食月 tī 金牛座附近行踏。暗淡 ê 月光 嘛予咱較好揣著昴宿星團。這張相片內底，有 tī 正爿頂懸 ê 昴宿星團 彼 七粒星，kah 下底彼粒 閘著 99 葩 ê 食月。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211120/ 影像：Robert Fedez 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211120.html Powered by Firstory Hosting

NGC 281 是 tī 仙后座方向 1 萬光年遠 ê 恆星形成區。這張狹頻影像是先 kā 可見光 ê 恆星刣掉，才用數位方式疊轉去這張 無恆星 ê 影像面頂。毋閣這毋是用可見光影像資料，是用 Chandra X-光天文台 ê X-光資料（茄仔色）kah Spitzer 太空望遠鏡 ê 紅外線資料（紅色）疊 ê。Tī 這張 多波段 合併影像內底，看會著這个有足濟恆星 ê 星團 IC 1590，去予包 tī 內底。少年恆星一般來講，會 tī 可見光波段去予氣體雲 kah 閘光 ê 塗粉閘牢咧。NGC 281 差不多有 80 光年闊。愛 tī 後埕翕相 ê 天文攝影師 to̍h 用 NGC 281 tī 可見光 ê 模樣，kā 號名做 小精靈 星雲。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211119/ 影像：[Wido Oerlemans](mailto: firstnamelastname [at] hotmail [dot]) - X-ray: Chandra, Infrared: Spitzer 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211119.html Powered by Firstory Hosting

這張安排好勢 ê 長鏡頭相片是 tī 月圓彼工，月娘 peh--起來了後，kha-mé-lah sàng 徛 tī 足光 ê 月娘下底翕 ê。月圓這工一般來講，應該是月娘上光彼工。毋閣 tī 11 月 18/19 這工 ê 月圓，因為會有月偏食，大部份 ê 月娘會去予地球閘去，煞變暗。食甚 to̍h 是 月娘去予地球閘上濟 ê 時陣。這擺 ê 食甚，月娘干焦賰一屑屑仔無去予地球 ê 本影 閘著，這陣月娘 ùi 南爿 ê 地球烏影邊仔趨過。Tī 遠地點 ê 時陣，to̍h 是軌道離地球上遠彼位，月球 ê 速度會上慢。這會予 2021 年 ê 月食，成做一个長時間 ê 月偏食。北美洲大部份 ê 地區 攏會當 tī 日頭欲落山進前看著這擺 ê 月偏食。因為「食」 會雙雙對對出現，後一擺出現 ê 是 12 月 4 號 ê 日食。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211118/ 影像：Zhengjie Wu and Jeff Dai (TWAN) 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211118.html Powered by Firstory Hosting

火山面頂是發生啥物代誌？這个火山 光柱 實在是真無四常。光柱是日光引起 ê，所以才會 tī 日出 抑是 日 落 彼位延伸一管足光 ê 光柱出來。是講，嘛是有 一寡 較 多彩 ê 光柱，有當時仔會出現 tī 街仔路抑是厝頂。毋閣這个光 柱 去予 火山噴--出來 ê 岩漿 所 發--出 ê 紅光 照甲足光 ê。這个火山是 意大利 ê Etna 山，這張相片 是 tī 六月中，日頭落山幾若點鐘了後翕 ê 孤張感光相片。Tī 火山 ê 火烌雲 面頂是寒甲。煞予火山面頂 ê 捲雲 抑是 Etna 山 噴--出來 ê 水煙 產生 冰晶。這寡 冰晶 大部份是 倒 tī 塗跤，有當時仔會飛。紲落來 in 閣會反射 火山口 ê 光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211115/ 影像：Giancarlo Tinè 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211115.html Powered by Firstory Hosting

這寡流星是 ùi 佗位來 ê？按照天頂 ê 方位來看，應該是 ùi 雙生仔 座 來 ê。這就是是按怎 12 月 ê 流星會叫做 雙生仔座流星雨。因為流星雨攏是 ùi 仝一个輻射點來 ê，這个 輻射點 tī 雙生仔座 內底。毋閣 ùi 立體 ê 角度來看，這个無四常 ê 小行星 Phaethon 3200 噴出來 ê 沙塗粒，攏踅太陽 ê 軌道 leh 行。伊倚地球彼爿軌道拄仔好疊 tī 雙生仔座 ê 頭前。所以地球若是 行到這个軌道，流星屑仔 ê 輻射點 to̍h 會出現 tī 雙生仔座。這張相片是 2020 年 12 月 14 這暗翕 ê 雙生仔座流星雨。是 kā 200 外粒 足光 ê 流星 tī 天頂 行過 ê 光巡 疊做伙 ê。11 月上重要 ê 流星 雨是 獅仔座流星雨，下暗 kah 明仔暗會上濟。是講真不幸，今年 ê 流星會較暗，因為伊 上濟 ê 時陣是 tī 透早，而且閣拄著膨月，按呢會較歹 看著。毋閣，每一點鐘應該攏會看著幾若粒 較光 ê 獅仔座流星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211116/ 影像：Wang Jin 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211116.html Powered by Firstory Hosting

天頂彼个光點是啥物？這可能是咱定定會問 ê 問題。這个問題會當 ùi 幾若个簡單 ê 觀察揣著答案。比論講，伊敢有 leh 振動？抑是 leh 爍咧爍咧？若是有，而且若是你蹛 tī 市區，按呢彼个可能是飛龍機。因為飛龍機實在是濟到有賰，市區 ê 光線 嘛傷光矣，kah in 比起來，恆星 kah 衛星 傷暗，看無。若是無，而且若是你蹛 ê 所在離市區較遠，按呢彼个光點可能是 金星 抑是 火星。若是金星，伊會 tī 日出進前抑是日頭落山了後，出現 tī 地平線附近。有當時仔 tī 地平線附近，拄著 leh 飛 ê、較遠 ê 飛龍機，是有較困難講伊是飛龍機抑是 較光 ê 行星。毋閣就算是按呢，咱觀察伊 ê 動作幾分鐘仔了後，to̍h 會知影伊是毋是飛龍機矣。按呢若是猶無清楚欲按怎？這張圖表 雖然講有淡薄仔笑詼，毋閣嘛是會當予你袂䆀 ê 建議。一寡較細膩 ê 天文愛好者可能會有意見，咱嘛 鼓勵 in 提供 溫柔 ê 建議。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211114/ 影像：HK (The League of Lost Causes) 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211114.html Powered by Firstory Hosting

6.4 年 會轉來一擺 ê 週期性彗星 67P tī 11 月 7 號去予這支望遠鏡翕著。彗星 ê 塗粉尾溜掃過背景 ê 雙生仔座恆星，伸 tùi 正爿頂懸 ê 雙生仔座 υ 遐。Tī 視野 ê 倒爿頂懸外口有一粒雙生仔座 β，嘛叫做 北河三，是雙生仔座上光 ê 恆星。67P tī 2021 年 ê 近日點，to̍h 是離太陽上倚彼工，會 tī 11 月 2 號。毋閣若是近地點，to̍h 是離地球上近彼工，會 tī 11 月 12。雖罔講這个距離干焦 0.42 天文單位爾爾，毋閣伊猶是傷暗矣，目睭看無。Tùi 這粒彗星研究上濟 ê，是地球頂擺送去內太陽系旅行 ê 機器人太空船。這粒彗星這馬因為是 Rosetta 太空船 kah Philae 降落器 上尾安息 ê 所在，煞變有名矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211113/ 影像：Rolando Ligustri (CARA Project, CAST) 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211113.html Powered by Firstory Hosting

這个較細 ê 北方星座 三角座 內底有這个壯麗 ê 正向捲螺仔星系 M33。伊較有名 ê 名是 風吹星系 kah 三角星系。M33 ê 直徑超過 5 萬光年長，是 本星系群 內底第三大 ê，排 tī 仙女座 (M31) kah 咱 ê 銀河系後壁。M33 離咱銀河系 差不多 有 3 百萬光年遠，有人認為伊是仙女座星系 ê 衛星星系。毋閣蹛 tī 這兩个星系 ê 天文學家，可能會互相看著對方 ê 大捲螺仔系統。Ùi 地球來 kā 看，這張清楚 ê M33 影像 有櫳櫳 ê 捲螺仔手骨，面頂有藍色星團 kah 粉紅仔色 ê 恆星形成 區。實際上，ùi 這个星系中心 4 點 ê 方向看--去，有一个上光 ê 恆星形成區，是 NGC 604。M33 kah M31 仝款，內底 ê 變星已經量過足濟擺矣。這會當幫贊咱了解這款離咱較近 ê 捲螺仔星系，嘛會當予咱 閣較確定 宇宙 ê 大細。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211112/ 影像：Bernard Miller 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211112.html Powered by Firstory Hosting

你敢捌看過流星雨？這支影片 to̍h 是欲 tī 英仙座流星雨 上濟彼工見證這个 奇蹟。這是 tī 印度 Hanle ê Himalaya 山脈 ê 印度天文台 翕 ê。影片 拄開始，天色 to̍h 隨暗--去矣。銀河系 ê 中央盤 to̍h ùi 倒爿出現，踅地球 ê 衛星 嘛 ùi 頭頂行過。Tī 這暗 ê 流星爍光，若是比 1 秒鐘較短，是有 kā 伊 ê 時間延長。大部份來講，流星若是爍青光，應該是 ùi 蒸發 ê 鎳 來 ê。影片若行，獵戶座 to̍h peh--起來矣。流星 嘛 tī chhāi tī Himalaya 山脈 ê 2 公尺大 ê Chandra 望遠鏡 kah 有 7 支大管 ê 高能 Gamma-光 望遠鏡 (Hagar) ê 頭頂 爍咧爍咧。這支 2 分 30 秒 ê 影片 tī 日頭 peh--起來 ê 時陣結束。毋閣 tī 真正 ê 天光進前，閣有出現 黃道光，煞 予人叫是已經天光矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210928/ 影像：Vikas Chander & Dorje Angchuk 音樂：Tea Time via PremiumBeat 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210928.html Powered by Firstory Hosting

NGC 1333 tī 可見光會當看著 反射星雲，主要是星際塗粉反射恆星 ê 藍色特徵光。伊離 英仙座 干焦 1000 光年遠，tī 一个大型 ê 恆星形成 分子雲 ê 邊仔。這个望遠鏡特寫影像，是天頂兩粒月娘 ê 闊度。Tī NGC 1333 ê 距離來講，是 15 光年闊。這看會著厚塗粉區 ê 細節，閣有 ùi HH 天體、噴流、kah 新恆星 ê 衝擊波 產生 ê 紅色發射線。實際上，NGC 1333 有 幾若百粒星，年歲是比 100 萬年較少年。大部份 用可見光望遠鏡猶看無啥有，因為去予 四界攏是 ê 恆星塗粉閘牢矣。這个亂糟糟 ê 環境可能 kah 咱太陽 tī 45 億年前拄形成 ê 狀況足相 siâng ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211111/ 影像：Michael Sherick 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211111.html Powered by Firstory Hosting

逐家攏叫是講，這是一个 神話。嘛有一寡人想講這是真 ê，毋閣毋知影這个現象是按怎來 ê。探險家若是看--著，是會 感覺足驕傲 ê。這其實是 ùi 太陽來 ê 青色爍光。青色爍光 確實是真 ê，咱嘛知影這个爍光是按怎來 ê。日頭 落去到完全消失進前，會 tī 上尾爍一擺足強 ê 青光。毋閣這款現象干焦會 tī 足低、足遠 ê 地平線出現一目𥍉。青色爍光 嘛有法度 tī 日出 彼陣看著，毋閣愛有閣較好 ê 時機才看有。這个 青色爍光 ê 影片是頂個月 tī 意大利 Tuscany ê Ligurian 海邊仔 日頭欲落海 ê 時陣翕著 ê。第二段 影片 ê 青色爍光 是正常速度，第一段影片是加速版，第三段影片是 慢速版。太陽 袂變做青色 ê，這是 地球大氣層 ê 稜鏡 效應造成 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211110/ 影片提供 kah 版權：Paolo Lazzarotti 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211110.html Powered by Firstory Hosting

咱敢需要一个假 ê 宇宙？嘛是有需要啦！為著欲予咱閣較了解 咱真正 ê 宇宙。有足濟 天文計畫 想欲了解咱宇宙 ê 性質，所以 to̍h 開始利用 機器人望遠鏡 tī 暗暝翕連紲 ê 影像。紲落來有較複雜 ê 電腦演算法 會處理這寡數位影像，揣看有 恆星 kah 星系 無，才閣來量 in ê 性質。為著欲校正這寡演算法，in tī 假 ê 宇宙 內底試驗 假 ê 影像，看是毋是會當揣出這寡刁故意做記號 ê 影像。這張拼接圖 內底 假影 ê 圖，是學 NASA 逐工一幅天文圖 (APOD) 內底 ê 影像。是講這 225 張影像內底干焦一張是真 ê，毋知你敢揣 伊 有？In 已經成功產生假 ê APOD 相片，嘛已經 tī 「這毋是 APOD」ê 網站 kah Twitter 發表矣。實際上，會當幫贊咱校正資料、了解較遠 ê 宇宙天體 ê，是這寡假 ê 星系。你會當 tī 這个 「這毋是星系」ê 網站 看著一寡仔。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211109/ 影像：M. J. Smith et al. (U. Hertfordshire) 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211109.html Powered by Firstory Hosting

是按怎有當時仔會有物件 ùi 太陽大氣層噴到太空去？這是因為迵過 太陽 表面 ê 磁場 產生變化。Tī 較強磁場 ê 所在叫做 活動區，遮有一陣 太陽烏子。活動區 ê 帶電氣體會利用弓形橋抑是磁場相迵。這款氣體有當時仔會 落--轉來，有當時仔會走--去，有當時仔毋若走--去、閣會 影響著地球。這張一點鐘久 ê 縮時攝影影片 是頂個月 tī 法國 用 細台望遠鏡翕 ê，有翕著當 leh 噴--出去 ê 太陽絲。這个太陽絲實在是足大 ê！你若是想欲知影有偌大，會當 kah 倒爿頂懸 ê 地球寸尺相比。Tī 太陽絲噴--出去了後，太陽 to̍h 發出足強 ê X-級閃焰，按呢太陽表面 to̍h 會產生 太陽 chu-ná-mī。這是帶電粒子雲走入來 咱太陽系 ê 結果，毋閣這擺 較無影響著咱 ê 地球。若是有夠額 ê 太陽電漿，嘛是會影響著 地球 ê 磁層，產生一寡 較暗 ê 極光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211108/ 影片：Stéphane Poirier 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211108.html Powered by Firstory Hosting

Tùi 一寡人來講，這看--起來敢若是貓咪仔 ê 目睭。毋閣其他人可能會感覺這是一粒 tī 宇宙 ê 大型 海螺 殼。伊實際上是一粒咱熟似 ê 行星形星雲。伊足光 ê、咱嘛看會著足詳細 ê 細節。伊 kah 太陽是仝款 ê 恆星，伊行到性命上尾坎站 ê 時陣，會 tī 一个足短 ê 發光階段 kā 氣體擲--出去，才形成這款星雲。這个星雲 中央 ê 恆星欲死亡 ê 時陣，會連紲 tī 外 層 產生 一重一重 ê 球形 外殼。是按怎 產生 這个美麗、複雜、對稱 ê 內部結構，到今 猶無蓋了解。這張影像 是 kā Hubble 太空望遠鏡 ê 光學影像 kah 踅地球 leh 行 ê Chandra 天文台 翕 ê X-光影像 用 數位組合 ê 方式 敆做伙 ê。這个美麗 ê 太空雕像，有超過一半 光年 ê 長度。咱若是 斟酌看這粒 貓咪仔 ê 目睭，可能會看著咱太陽未來 ê 命運。伊會 tī 差不多 50 億年了後，變做 kah 這个 行星形星雲 仝款 ê 演化階段。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211107/ 影像提供：NASA, ESA, Hubble Legacy Archive; Chandra X-ray Obs. 資料處理 kah 版權：Rudy Pohl 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211107.html Powered by Firstory Hosting

這个攝影師有一个夢，to̍h 是欲翕一張仔內底有水沖 kah 銀河 ê 相片。這上困難 ê 是，愛有袂擺 ê 翕相地點、愛有 tùi 水沖 kah 邊仔山谷 有效 ê 人工照明、愛 kā 前景 kah 背景規个翕入去、愛煩惱 火金蛄 傷 金、愛保持 kha-mé-lah 焦燥、閣愛細膩莫去踏著毒蛇。咱來看這个翕出來 ê 結果，這是 tī 七月中 ê 暗暝翕好了後，才用數位拼接 ê 方式鬥做一張闊幅全景圖。這个水沖是 tī 中國 東爿 羅霄山脈 ê 珠簾水沖。咱 銀河系 ê 中央帶 迒過天頂，現出足濟 暗塗粉 雲絲 kah 多彩 ê 星雲。這寡蹛 tī 銀河 ê 明亮天星 kā 天頂照予光，有 夏季大三角、足光 ê 織女星，攏 tī 銀河彎弓 ê 面頂看會著。攝影師 kah 伊 ê 朋友翕 78 張 欲用來組合 ê 相片了後，to̍h 踮遐 享受這个暗暝，一直到天光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211101/ 影像：Xie Jie 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211101.html Powered by Firstory Hosting

這个 tī 背景有足濟恆星嘛足光 ê 所在，有這个因為外形 去予人建議 愛號做 海馬星雲 ê 天體，伊差不多有 1 光年闊。Ùi 北方 ê 皇家星座仙王座看，這个厚塗粉、閘光 ê 雲，in 嘛是銀河分子雲 ê 一部份，離咱有 1200 光年遠。伊嘛叫做 Barnard 150 (B150)，是天頂 182 个 暗天標記 ê 其中一个。這寡暗天標記是 20 世紀初 ê 天文學家 E. E. Barnard 編 ê。內底 有一陣低質量恆星當咧形成，毋閣 in 崩塌 ê 核心 愛 tī 長波長 ê 紅外線波段 才看會著。仙王座內底多彩 ê 恆星嘛 tī 這幅 美麗 ê 星系天景 內底。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211105/ 影像：Valerio Avitabile 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211105.html Powered by Firstory Hosting

矮星系 NGC 147 (倒爿) kah NGC 185 tī 這幅望遠鏡畫面內底徛相倚。這兩个毋是 離咱 250 萬光年遠 ê 大捲螺仔 - 仙女座星系 M31 定定講著 ê 衛星星系。In tī 天頂這幅美麗 ê 視野內底 ê 角距離比 1 度較細。按照仙女座星系 ê 距離 來推算，in 兩个 ê 距離差不多有 3 萬 5 千 光年遠。是講仙女座星系無 tī 這幅圖內底。仙女座星系較光、較有名 ê 衛星星系是 M32 kah M110。In 離 大捲螺仔 較近。NGC 147 kah NGC 185 去予人辨識做雙星系。In 是 重力穩定 ê 一組雙星系系統。毋閣最近發現著一个較暗 ê 矮星系 - 仙后座 II，敢若嘛是這个系統 ê 一部份。In tī 仙女座內底，因為重力相縛，煞形成一陣迷人 ê 小小 衛星星系群。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211104/ 影像：Dan Bartlett 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211104.html Powered by Firstory Hosting