NASA 逐工一幅天文圖 APOD Taigi

內海仔星雲 ê 南崖 https://apod.tw/daily/20210515/ 起起落落 ê 明亮山龍 kah 塗粉雲 to̍h 橫過這个 鄰近 ê 恆星形成區 M8 ê 特寫，嘛叫做 內海仔星雲。這張清楚 ê 假色組合影像是 ùi 8 公尺大 ê Gemini 南爿望遠鏡 ê 狹頻可見光資料 kah 寬頻近紅外線資料來 ê。這規个景色有 20 光年闊，有經過一个星雲區，有當時仔嘛叫做南崖。這張高解析度 ê 詳細影像 chhōa 咱探索這个有真濟新生恆星 ê 星協。In to̍h 藏 tī 明亮 ê 雲邊 kah HH 天體 ê 盡角。HH 天體 tī 恆星形成區內底足濟 ê。伊是少年恆星 tī 恆星形成 ê 過程中，kā 邊仔 ê 氣體塗粉雲 加溫了後，發出 ê 一个能量足強 ê 噴流。這个宇宙內海仔離咱有 5000 光年遠，會使 tī 人馬座 kah 咱銀河系中心 ê 方向揣著。（若是想欲知這幅圖 ê 位置 kah 比例，會使 來這爿看。這是 kā 南崖 ê 特寫影像 kah 較大區 ê 內海仔星雲 疊做伙 ê 影像。這張比例影像是 R. Barba' 做 ê。） ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Julia I. Arias and Rodolfo H. Barba' (Dept. Fisica, Univ. de La Serena), ICATE-CONICET, Gemini Observatory/AURA 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210515.html Powered by Firstory Hosting

雪梨 ê 月全食 https://apod.tw/daily/20210528/ 這張地球 ê 紅影 閘過月盤 ê 望遠鏡影像，是 5 月 26 tī 澳洲 New South Wales 州 雪梨附近翕 ê。Tī 這个焦冷、晴和 ê 秋天暗暝，有一粒 tī 近地點 ê 月圓 ùi 地球中央本影 ê 北爿邊仔趨過。這擺 ê 月食 足短 ê，全食 ê 時間干焦 擋 14 分鐘久爾爾。毋閣地球 ê 烏影並袂造成烏天暗地。顛倒是 ùi 這粒食月 ê 角度 來看，伊去予規粒地球 ê 日落 kah 日出 ê 紅光照甲紅記記。這个 紅光 是地球大氣層散射日光產生 ê。這是用 HDR 技術 kā 6 張感光相片疊做一張 ê。會當看著這个去予 地球本影 閘著 ê 月娘，大範圍光度 ê 明暗變化，閣有背景暗淡 ê 天星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Peter Ward (Barden Ridge Observatory) 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210528.html Powered by Firstory Hosting

羊仔行星 ê 爍爁 kah 月食 https://apod.tw/daily/20210524/ Tī 2011 年 6 月 15 ê 月全食，雷公雨干焦 giōng 欲 kā 這幅壯觀 ê 月全食景色拍歹去。毋閣其實無，tī 這 規个全食過程 中，暴風雲拍開了差不多 10 分鐘久。閣加上爍爁，to̍h 組合做這个美麗 ê 夜空。這是感光 30 秒鐘提著 ê 景色，嘛予咱 ùi APOD 已經 25 冬 ê 歷史 內底，想出一个較有紀念性 ê 標題（這 to̍h 愛感謝天文攝影師）。是講這个爍爁嘛出現了真拄好，kah 月食 出演 ê 皮猴戲 真四配。這个月食會當 tī 咱地球 ê 歐洲、非洲、亞洲、kah 澳洲 遮爾濟所在看著。毋閣這張相片 是 ùi 希臘 Pezi 島 ê Ikaria 翕--ê。這个所在叫做「羊仔 行星」，因為遮有 坎坎坷坷 ê 地形 kah 奇怪外形 ê 岩石。後一擺 ê 月全食 會 tī 這禮拜三 發生。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Chris Kotsiopoulos (GreekSky) 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210524.html Powered by Firstory Hosting

銀河樹 https://apod.tw/daily/20210523/ 咱先來看這个樹林仔。這是 kha-mé-lah sàng tī 西班牙 ê 城鎮 Salamanca 注意著 ê 橡樹林。In 修剪了後 看起來足特別 ê。咱紲落來來看咱 ê 銀河。這个 kha-mé-lah sàng 踮遮等到 半暝 2 點，等 銀河系 升--起來，peh 到這欉雄偉橡樹 ê 頭殼頂。Ùi 這个特別揀--過 ê 角度來 kā 看，銀河 ê 塗粉帶 干焦是 ùi 樹枝延續出去 ê 遐爾自然。落尾咱來看光 ê 部份。手電仔 to̍h 囥 tī 這欉樹仔較遠彼爿，投影出這个 剪影。是講拄仔好，其他 ê 樹仔欉嘛 tī 有較光 ê 地平線頂懸現出 sio-siâng ê 剪影。這是 tī 2015 年翕 ê 一張感光 30 秒 ê 相片，閣有經過數位處理來加強銀河 ê 部份。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像提供 kah 版權：César Vega Toledano 星座解說：Judy Schmidt 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210523.html Powered by Firstory Hosting

Markarian 鍊仔 https://apod.tw/daily/20210522/ Tī 室女座星系團 ê 中心附近，有一條叫做 Markarian 鍊仔 ê 星系鍊 to̍h 袚 tī 這个深空 ê 望遠鏡視野 內底。Ùi 這幅圖中央下跤彼兩个明顯 ê 透鏡形星系 M84 （下跤）kah M86 起碇，你會當綴著這个鍊仔一直行--去-lih 到圖 ê 正爿。Tī 中心你會當注意著一對交互作用星系 NGC 4438 kah NGC 4435。有一寡人 kā 叫做 Markarian ê 目睭。室女座星系團 是離咱上近 ê 星系團，估算到伊 ê 中心有 5 千萬光年遠。這个星系團差不多有 2000 粒星系 tī 內底。伊 tùi 咱 ê 本星系群 有足明顯 ê 重力影響。Tī 室女座星系團內底，上無有 7 个星系 tī Markarian 鍊仔內底，看起來是 同齊 leh 行徙。毋閣其他星系有當時仔嘛會出現 tī 這條鍊仔內底。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Ginge Anvik 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210522.html Powered by Firstory Hosting

彗星、海翁、kah 棍仔球桮 https://apod.tw/daily/20210513/ 彗星 ATLAS (C/2020 R4) tī 3 月 1 號 倚近太陽，tī 4 月 23 倚近地球。咱會當 tī 這張美麗 ê 望遠鏡視野內底，看著伊有一个較暗 ê 青色彗尾 kah 一个較短 ê 彗尾。這張影像是 5 月 5 號 tī 這位予人翕著 ê。彗星 to̍h tī 北方星座獵犬座（拍獵 ê 狗）ê 範圍內底。咱嘛會當 tī 差不多仝一个視線方向看著兩个有名 ê 背景星系，海翁星系 kah 棍仔球桮星系。Tī 正爿頂懸 ê NGC 4631，雖然看起來親像是一隻海翁，毋閣伊 kah 銀河欲平大，是一个坦敧身 ê 捲螺仔星系，離咱有 2500 萬光年遠。Tī NGC 4631 倒爿下跤 ê NGC 4656/7，是一組交互作用星系，in 看起來 to̍h 親像是一支拗彎 ê 棍仔 leh 運動。實際上，這个變形 koh 相濫 ê 氣體痕跡，若是用其他波段來 kā 檢查，to̍h 會看著這隻宇宙海翁 kah 棍仔球桮 tī 古早時代有真密切 ê 接觸。這个 欲轉去 ê 彗星 ATLAS，離地球干焦 7「光分」遠，應該會 tī 1000 年以內 閣再拜訪內部太陽系。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Grand Mesa Observatory, Terry Hancock / Tom Masterson 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210513.html Powered by Firstory Hosting

海䖳星雲 kah 火星 https://apod.tw/daily/20210519/ 一般來講，海䖳星雲較暗嘛較歹翕，毋閣這馬咱翕著 這張迷人 ê 景色矣！Tī 這張望遠鏡視場內底，有兩粒較光 ê 黃色恆星，雙生仔座 μ kah 雙生仔座 η，to̍h tī 倒爿海䖳星雲 ê 下跤 kah 面頂。In 是較冷 ê 紅巨星，to̍h chhāi tī 這个 天頂雙生仔 ê 跤底。海䖳星雲 to̍h 浮 tī 這幅圖中心 ê 倒爿下跤，是一个較光 ê 弓形發射雲，下跤掛幾若條鬚鬚。實際上，這个宇宙海䖳是 超新星殘骸 IC 443 氣波形體 ê 一部份，是 大質量恆星爆炸了後 脹大 ê 雲屑仔。爆炸光拄行到地球已經是 3 萬年進前 ê 代誌矣。To̍h 親像是 天文物理 海內底 ê 親情仝款，毛蟹星雲 ê 超新星殘骸，to̍h 叫做海䖳星雲。Tī 這个海內底停 一粒中子星，是恆星核崩塌 ê 殘骸。這張影像是 tī 4 月 30 翕 ê。這張望遠鏡快照嘛翕著火星。伊這馬 to̍h tī 暗頭仔 ê 天頂 行來行去。這粒紅色行星嘛 tī 視場正爿 leh 發黃光。當然，海䖳星雲離咱差不多有 5000 光年遠, 毋閣 火星這馬 離地球干焦差不多有 18 光分遠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Jason Guenzel 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210519.html Powered by Firstory Hosting

袚鍊星雲 ê 噴流 https://apod.tw/daily/20210518/ 是啥物天體會掛這條袚鍊星雲？較早 ê 分析表示，這條袚鍊 是 行星形星雲，是 恆星 行到伊性命上尾 ê 坎站噴出來 ê 氣體雲。而且，tī 袚鍊面頂彼幾粒 璇石，其實是發光氣體結 ê 光 丸。Tī 袚鍊星雲中心應該是有 兩粒恆星 leh 互相轉踅。毋閣 in 兩粒 近到 合用仝一个大氣層，才會 tī 哈伯太空望遠鏡 翕著 ê 這張影像 內底，叫是講 in 干焦一粒爾爾。倒爿頂懸 kah 正爿下跤 ê 紅光氣體雲，是 ùi 星雲中心噴出 ê 噴流 造成 ê 產物。明亮 ê 噴流到底是當時、是按怎形成 ê？To̍h 變做是一个 研究 ê 主題 矣！這个袚鍊星雲干焦 5000 歲爾爾，伊 ê 大細有 5 光年 闊，而且會當用 大台望遠鏡 ùi 天箭座 ê 方向揣著。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像提供：ESA, Hubble, NASA 資料處理：K. Noll 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210518.html Powered by Firstory Hosting

NGC 4565: 坦敧身 ê 星系 https://apod.tw/daily/20210517/ 咱 ê 銀河系敢有遮爾薄？華麗 ê 捲螺仔星系 NGC 4565 ùi 咱 ê 地球來 kā 看 to̍h 是 坦敧身 ê。因為伊遮爾狹 ê 形態，所以伊嘛叫做 繡針星系。明亮 ê NGC 4565 會予真濟觀測北天 ê 觀星團停落來看。伊 to̍h tī 彼个暗淡毋閣整齊 ê 后鬃座 彼搭。Tī 這个清楚 ê 彩色影像，看會著捲螺仔星系中心有一个 四四角角、phok--出來 ê 核心。伊去予迒 tī NGC 4565 ê 薄星系盤頂懸彼个 會閘光 ê 塗粉帶 切做兩爿。Tī 這个美麗 ê 視場內底，有 各種 其他 背景星系。伊去予人認為講，伊 ê 外形可能 kah 咱 ê 銀河系 欲仝。NGC 4565 離咱有 4000 萬 光年 遠，大細有 10 萬 光年闊。伊用細台望遠鏡真簡單 to̍h 揣會著。天文愛好者 認為講，NGC 4565 是一个真出眾 ê 天體作品，毋閣 Messier 煞 kā 伊落勾去。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：CFHT, Coelum, MegaCam, J.-C. Cuillandre (CFHT) & G. A. Anselmi (Coelum) 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210517.html Powered by Firstory Hosting

NGC 602 kah 伊 ê 遠方 https://apod.tw/daily/20210516/ 這个雲看起來 to̍h 親像一粒蚵仔，遮 ê 恆星 mā 敢若真珠仝款，毋閣 in 看起來敢若較遠 ê 款。離咱 20 萬光年遠 ê 衛星星系 小麥哲倫星雲 ê 外沿附近，有一个 5 百萬歲 ê 少年 星團 NGC 602。NGC 602 tī 這張 予人讚嘆 ê 哈伯影像 內底，去予一寡會產生新恆星 ê 氣體 kah 塗粉箍 tī 內底。美妙 ê 雲嶺 kah 予輻射掃出來 ê 外形，應該是 NGC 602 內底 ê 大質量少年恆星發出 ê 足強能量 ê 輻射 kah 衝擊波，kā 塗粉 物質食去，引起星團中心 ê 恆星形成 運動，才閣湠出去 ê。用 小麥哲倫星雲 估計 ê 距離來推算，這張影像 差不多有 200 光年闊。毋閣咱 mā 會當 tī 這个清楚 ê 彩色景色 內底，看著各種 美麗 ê 背景星系。遮 ê 背景星系 上無有幾若億光年遠，有 ê 是 比 NGC 602 閣較遠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：NASA, ESA, and the Hubble Heritage Team (STScI/AURA) - ESA/Hubble Collaboration 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210516.html Powered by Firstory Hosting

流星 kah 對日照 https://apod.tw/daily/20210512/ Tī 夜空內底，太陽 ê 相對面敢是上暗 ê 所在？無喔！實際上，tī 烏墨墨 ê 夜空 內底，太陽 180 度遠 ê 所在，看會著一个較罕得看著 ê 現象。彼是一个較暗 ê 光，to̍h 叫做 對日照（是 ùi 德國話來的，意思是「反向 ê 光」）。對日照是太陽光 tī 地球後壁散射一寡細粒 ê 行星間 塗粉 粒產生 ê。這寡塗粉粒 ê 寸尺差不多是毫米大，是 ùi 小行星 kah 行星 leh 行 ê 黃道面 面頂 ê 石屑仔來 ê。這張相片 是舊年 3 月翕--ê。是有史以來翕過 ê 對日照 相片內底，上壯觀 ê 其中一張。這是 tùi 西班牙 Canary 島 Teide 天文台 天頂這个烏墨墨 ê 夜空長時間感光翕--ê。看會著 對日照 是搝長 ê 黃道光 ê 一部份。咱閣會當注意著，背景星有 較光 ê 流星（倒爿）、北斗星（正爿頂懸）、kah 北極星（tī 正爿上邊仔）。流星落落來 ê 方向是 Teide 山，伊是西班牙上懸 ê 山。你閣看會著 tī 正手爿 ê 金字塔太陽實驗室。Tī 這工，你嘛會當 tī 飛龍機面頂看著一个 kah 對日照 欲仝 ê 現象，叫做 觀音圈。這是反射 太陽 對面 ê 空氣 kah 雲產生 ê 現象。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：J.C. Casado, StarryEarth, EELabs, TWAN 音樂：PiSCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210512.html Powered by Firstory Hosting

Tī Yacoraite ê 深空景色 https://apod.tw/daily/20210508/ Tī 這个會回甘 ê 夜景，厚塗粉 ê 銀河中心 tī 天頂 peh 起來， to̍h 迒 tī 阿根廷西北爿 老古早 ê Andean 山脈 考古遺址 Yacoraite ê 頭殼頂。地景內底這寡 向天 ê 地球住民，是 生 tī 洘旱區域 ê 大型阿根廷巨人柱仙人掌。面頂彼个無正常 ê 黃色反射星雲，是紅巨星心宿二邊仔 ê 塗粉，散射恆星光 造成 ê。心宿二是蠍仔座 ê α 星，離咱有超過 500 光年遠。伊邊仔彼个足光 ê 藍色 蛇夫座 ρ 星，to̍h 藏 tī 一般厚塗粉 ê 藍色反射星雲內底。這个深空夜景 ê 背景，是追蹤 tī 天頂 peh 起來 ê 恆星，tùi in 連紲感光 ê。伊 ê 前景是用固定 tī 三跤馬面頂 ê kha-mé-lah kah 鏡頭 tùi 地景感光 ê。Kā in 敆做伙會當產生這張予人讚嘆 ê 影像，嘛展示一个你用目睭無法度 直接看著 ê 光度 kah 色光範圍。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Franco Meconi 音樂：PiSCO - 鼎鼎 聲優：彪彪 翻譯：An-Li Tsai (NCU) 原文：https://apod.nasa.gov/apod/ap210508.html Powered by Firstory Hosting

去予風吹開 ê NGC 3199 https://apod.tw/daily/20210506/ NGC 3199 離咱有 12,000 光年遠，是一隻 tī 南天航行 ê 星座，龍骨座，內底發光 ê 宇宙雲。這个星雲 tī 狹頻假色影像 內底，有 75 光年闊。雖然講這个深空影像差不多看會著規个完整 ê 氣波形體，毋閣伊看起來趨一爿，tī 面頂邊仔彼搭較光。Tī 中央是 Wolf-Rayet 星，伊是一个大質量、高溫、短命 ê 恆星，會產生足強 ê 恆星風。實際上，咱知影 Wolf-Rayet 星會製造有 足趣味外形 ê 星雲。這是因為伊有足強 ê 恆星風，會 kā 邊仔 ê 星際物質掃開。Tī 這个案例內底，這个足光 ê 雲邊可能是恆星犁過一个齊齊 ê 物質產生 ê 弓形衝擊，to̍h 親像是船行過水面仝款。毋閣 測量 ê 結果 顯示，這个恆星並無直接徙去到較光彼爿。所以上有可能 ê 解說是講，tī 恆星邊仔 ê 物質並無齊齊。實際上，去予風吹 ê NGC 3199 較光彼爿，是一簇一簇、較密 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Mike Selby and Roberto Colombari 音樂：PiSCO - 鼎鼎 聲優：彪彪 翻譯：An-Li Tsai (NCU) 原文：https://apod.nasa.gov/apod/ap210506.html Powered by Firstory Hosting

行星形星雲 Mz3：狗蟻星雲 https://apod.tw/daily/20210425/ 這隻狗蟻敢毋是一个大球體？行星形星雲 Mz3 是一个去予像咱 太陽 仝款 ê 恆星 kā 擲--出去 ê 物質，所以一定是圓--ê。毋閣，是按怎這个 噴--出去 ê 氣體生做 狗蟻形，毋是圓 ê？這个線索可能會當 tī 這个去予用一秒鐘 1000 公里緊 ê 速度噴--出去 ê 氣體，這个 光年 長 ê 結構，閣有這个星雲中心 恆星 ê 磁性 內底揣著。另外一个可能 ê 答案，是 Mz3 閣藏一粒較暗 ê 恆星，踅 較光彼粒 leh 行。有一个可能性較懸 ê 假設 講，是中心恆星 ê 自旋 kah 磁場 leh 引導氣體。因為這个中心恆星 敢若 kah 咱 ê 太陽足仝 ê，天文學家 希望會當 閣較了解 這隻大隻太空 狗蟻 ê 歷史。按呢 to̍h 會當提供有路用 ê 見識，予咱了解咱 ê 太陽 kah 地球 ê 未來。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像： 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210425.html Powered by Firstory Hosting

火星 ê 烏托邦平原 https://apod.tw/daily/20210521/ 這張 tī 1976 年翕 ê 影像，是火星面頂 闊獅獅 ê 烏托邦平原，伊四界攏是石頭 kah 大岩石。這是 ùi Viking 2 號登陸船 ê 彩色 kah 烏白影像資料 建構出來 ê 景色。對人類目睭來講，這个景色應該是火星較倚北爿 ê 平原。若是欲知影伊有偌大，tī 中央附近彼粒明顯 ê 圓石頭差不多有 20 公分闊。Tī 這張圖正爿較遠 ê 所在，有一粒較暗 ê 角岩石，差不多有 1.5 公尺闊。Tī 視野內底閣有兩條溝仔，是登陸船 ê 標本採集手骨挖 ê。邊仔是一个落 tī 遐 ê 沙塗收集頭 ê 保護殼。正爿下跤彼个厚塗粉 ê，是登陸船 ê 其中一跤 ê 跤苴仔。Tī 2021 年 5 月 14，中國 ê 火星祝融號 探測車成功登陸 tī 火星矣。嘛 kā 伊 登陸 tī 烏托邦平原 翕著 ê 頭一張影像送--轉來。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：NASA, The Viking Project, M. Dale-Bannister (Washington University) 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210521.html Powered by Firstory Hosting

M104：草帽仔星系 https://apod.tw/daily/20210514/ M104 是一个華麗 ê 捲螺仔星系。伊有名是因為伊 giōng 欲完全 坦敧身 ê 形體縖一條足闊 ê 環，彼个環 to̍h 是會閘光 ê 塗粉帶。伊 ê 面模會當 ùi 內底彼个展延 ê 中央銀核內底 ê 恆星看出來。宇宙塗粉 帶成做一个闊邊 ê 草帽仔外形，才予這个星系提著這个較有名 ê 偏名，草帽仔星系。這張有名星系 ê 清楚光學影像是 ùi 地面望遠鏡影像資料來 ê。這改處理 ê 資料，有保存著足詳細 ê 狀況。這 tī 過去定定會因為 M104 中央銀核傷強 ê 光，煞看袂著。草帽仔星系 mā 叫做 NGC 4594，伊 tī 規个光譜 攏看會著。而且伊 ê 中央 有一粒超大質量烏洞。M104 ê 大細差不多有 5 萬光年闊，離咱有 2800 萬光年遠。伊 是室女座星系團南爿邊仔上大粒 ê 星系之一。是講，視場內底多彩明亮 ê 前景星是 ùi 咱 ê 銀河系來的。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Bray Falls 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210514.html Powered by Firstory Hosting

星團 M35 kah NGC 2158 https://apod.tw/daily/20210510/ 星團有近--ê 有遠--ê，有少年--ê 有 老--ê，有散--ê 有集中--ê。這張影像 展示 tī 仝一个星場內底 ê 兩个 開放星團 相對照。Tī 倒爿下跤 ê 是 M35，伊離咱算近 ê，差不多有 2800 光年 遠。伊是有較少年，差不多是 1.5 億歲，嘛較散，差不多是 2500 粒恆星 tī 這个 30 光年闊 ê 空間內底。較光 ê 藍光星，定定會當提來分辨少年 ê 開放星團， to̍h 親像 M35。相對來講，tī 正爿頂懸 ê NGC 2158，是比 M35 閣較遠 4 倍，閣較老 10 倍，嘛較集中。NGC 2158 內底較光 ê 藍光星已經 家己爆炸 矣，所以星團 ê 光這馬主要是一寡較老 ê kah 較黃 ê 恆星來 ê。一般來講，開放星團會 tī 咱 ê 銀河系 ê 星系盤面頂揣著，而且不管 tī 佗位內底攏會有 100 到 10000 粒恆星。In 攏差不多 tī 仝一个時間形成 ê。開放星團 M35 kah NGC 2158 攏會使用細台望遠鏡 tùi 雙生仔星座（雙生仔座）ê 方向 揣著。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：CFHT, Coelum, MegaCam, J.-C. Cuillandre (CFHT) & G. A. Anselmi (Coelum) 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210510.html Powered by Firstory Hosting

馬頭星雲 kah 獵戶座星雲 https://apod.tw/daily/20210509/ 這个烏暗 ê 馬頭星雲 kah 發光 ê 獵戶座星雲 tī 宇宙遠景成做一个對照。In to̍h 出現 tī 這个 予人讚嘆 ê 拼鬥影像 ê 兩个對角，是 tī 夜空 上簡單 to̍h 揣會著 ê 星座。In 兩个互相之間有 1500 光年遠。咱熟似 ê 馬頭 星雲看起來敢若是烏雲，kah 倒手下跤 ê 紅色發光區相比，是一个 較細 ê 破空。參宿一 是 獵戶座皮帶 內底上東爿 ê 恆星，嘛予人認為是 馬頭 倒爿上光 ê 恆星。Tī 參宿一下跤是 火舌星雲，有真光 ê 發射雲 kah 變化多端 ê 塗粉烏帶。這个壯麗 ê 發射區是 獵戶座 (嘛叫做 M42)，to̍h tī 正爿頂懸。Tī 伊 ê 倒爿隨看著一个足明顯 ê 反射星雲，有當時仔 to̍h 叫做走路 ê 人。四界攏是 ê 虯毛形 發光水素氣體 mā 真簡單 to̍h tī 這區予人 揣著。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Roberto Colombari & Federico Pelliccia 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210509.html Powered by Firstory Hosting

太空站、日珥、太陽 https://apod.tw/daily/20210504/ 這毋是 太陽烏子啦！這是 國際太空站 (ISS) tī 太陽面頭前行過 ê 時陣去予翕著 ê。若是 太陽烏子，to̍h 會有一个較暗 ê 中央 本影 kah 一个較光 ê 半影，而且 袂有天龍號太空船停 tī 遐。毋閣，ISS 是一个足複雜多變 ê 機械。伊是 人類 歷史上上大 上複雜 ê 太空船之一。而且，太陽烏子踅 太陽，ISS 踅 地球。Tùi ISS 來講，ùi 太陽面頭前行過是一件真四常 ê 代誌。伊每 90 分鐘踅地球一輾。毋閣愛 ùi 一幅 大張圖 內底提著伊 ê 位置、時間、kah 設備 ê 資訊，較無簡單。這張影像 是 kā 三張影像敆做伙，三張攏 tī 仝一位、差不多仝一个時間翕--ê。第一張影像感光傷超過矣，煞翕著太陽面頂一寡足暗 ê 日珥。第二張影像感光無夠，煞翕著 太陽色球層 ê 複雜花逝。第三張影像是上困難翕著 ê，是翕著太空站 tī 無夠一秒鐘 ê 時間內底 行過 太陽面頭前。咱若是 斟酌來看 太空站 ê 外形，to̍h 會看著停 tī 遐 ê 天龍號太空船。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Mehmet Ergün 音樂：PiSCO - 鼎鼎 聲優：彪彪 翻譯：An-Li Tsai (NCU) 原文：https://apod.nasa.gov/apod/ap210504.html Powered by Firstory Hosting

阿波羅 11 號：地球、月球、太空船 https://apod.tw/daily/20210503/ Tī 現代歷史上有名 ê 太空旅行行煞了後，差不多 to̍h 是應該愛轉來 ê 時陣矣。Tī 證明 人類 有才調超越 地球 ê 束縛了後，第一个 tī 地球以外 ê 世界行踏 ê 人類是 Neil Armstrong kah Buzz Aldrin。In kā 登月艙 飛轉來到踅月 ê 指揮服務艙 kah Michael Collins 會合。這張相片 是 tī 1969 年 7 月 21 翕，最近才 數位修復 ê。太空船升空 ê 模樣 去予 Collins 翕著，下跤有月球，遠方有地球。Tī 月球面頂這个金滑 koh 烏暗 ê 所在是 Mare Smythii，to̍h tī 月球倚地球這爿上東爿邊仔 ê 赤道下跤。Tī 這張代表性 ê 相片，逐家攏 tī lih，干焦一个無 tī 鏡頭頭前。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像提供：NASA, Apollo 11 影像修復：Toby Ord 音樂：PiSCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210503.html Powered by Firstory Hosting

龍骨座星雲 ê 雲 https://apod.tw/daily/20210502/ 是啥物造成龍骨座星雲 ê 雺霧？這幅烏暗不祥 ê 圖實際上是 分子雲。分子氣體 kah 塗粉 結幾若丸，雲厚到變做 袂透光。毋閣比起來，這寡雲 ê 密度是比 地球 ê 大氣層 閣較薄。這張是 龍骨座星雲 核心 ê 詳細影像，是氣體塗粉 雲 烏暗 kah 彩色攏特別明顯 ê 部份。是 2016 年中 tī 澳洲 Siding Spring 天文台 翕--ê。雖然講星雲主要 ê 成份是 水素 氣體，tī 這張影像內底是青色 ê。毋閣這張影像嘛用藍色 kah 紅色來追蹤成份內底有 硫磺 kah 酸素 發出 ê 光。這規个 龍骨座星雲 予編做 NGC 3372，有 300 光年闊，離咱有 7000 光年 遠，to̍h tī 龍骨 座 內底。龍骨座 Eta 星 是這个星雲內底能量上強 ê 恆星。伊是 1830 年代天頂上光 ê 恆星，毋閣了後 煞雄雄變暗去。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：John Ebersole 音樂：PiSCO - 鼎鼎 聲優：彪彪 翻譯：An-Li Tsai (NCU) 原文：https://apod.nasa.gov/apod/ap210502.html Powered by Firstory Hosting

水星紅石 3 號發射矣！ https://apod.tw/daily/20210507/ 六十冬前，tī 太空時代拄開始 彼陣，NASA 控制中心「放炮仔起鼓」，用紅石火箭 kā 水星太空人 Alan Shepard 送去太空。伊坐 ê 彼台 足狹 ê 太空艙 去予人號做自由 7 號。這个有歷史意義 ê 水星紅石 3 號（MR-3） 太空船，是 tī 美國東岸時間 1961 年 5 月 5 號早起 9 點 34，ùi Florida 州 ê Cape Canaveral 發射 ê。這規个過程有 tùi 全世界 ê 電視觀眾轉播放送。自由 7 號 是美國頭一个太空飛行，比蘇聯較晏無到一個月 ê 時間。蘇聯頭一擺 ê 人類太空探索，是由蘇聯太空人 Yuri Gagarin 進行 ê。這个 15 分鐘 ê 踅地球飛行試驗，飛到 187 公里懸 ê 懸度，上緊 ê 速度有到一點鐘 8262 公里遐爾緊。當 Alan Shepard tī 自由 7 號飛到上懸附近 ê 時陣 越頭看，伊會當看著 Florida 西海岸、Florida 中部 ê Okeechobe 湖、墨西哥灣、kah 巴哈馬 ê 面模。Shepard 較慢會 ùi 閣較遠 ê 角度來 看地球。而且伊會 tī 阿波羅 14 號任務 內底擔任指揮官，tī 月球面頂行踏。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：NASA 音樂：PiSCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210507.html Powered by Firstory Hosting

Tī 銅港天頂 ê STEVE https://apod.tw/daily/20210505/ 是啥物產生 STEVEs？STEVEs 是 Strong Thermal Emission Velocity Enhancements 強熱發射速度增強 ê 簡稱，是一款大氣現象。伊自古早 to̍h 有，毋閣最近五冬才 予人注意著，因為伊 ê 色光 kah 外形，kah 極光 無仝。因為 STEVEs 有茄仔色 kah 粉紅仔色 ê 孤逝光巡，研究伊是按怎來--ê，to̍h 變做一个足衝 ê 主題。STEVEs 可能 kah Sub-Auroral Ion Drifts 次極光離子漂流 (SAIDs) 有關。彼是一款高溫氣體 離子 ê 超音速流。有一款現象 咱這馬猶毋知 原因，to̍h 是 STEVEs 出現 ê 時陣，mā 定定看會著青色 ê 「圍閘」極光。這張 STEVE 影像 是 3 月中 tī 美國 Michigan 銅港 翕 ê。是用連紲感光 ê 方式，kā 前景 kah 背景 ê 影像敆做一張 ê。這款真光 ê STEVE 會出現幾若分鐘久，ùi 地平線到地平線，出現 ê 時間 tī 一般 ê 極光 kah 極光之間。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：MaryBeth Kiczenski 音樂：PiSCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210505.html Powered by Firstory Hosting

北方 ê 恆星：北極星 kah 邊仔 ê 塗粉 https://apod.tw/daily/20210428/ 是按怎 北極星 會號做北極星？上主要 ê 原因是，北極星是 tī 地球 自轉軸 北爿離咱上近 較光 ê 恆星。所以，當地球 leh 自轉 ê 時陣，恆星 to̍h 會踅北極星行，毋閣北極星會一直 chhāi tī 遐袂振袂動。這就是伊成做 北極星 ê 原因。因為 tī 自轉軸南爿 附近無較光 ê 恆星，所以咱這馬 to̍h 無 南極星。幾若千年前，地球 ê 自轉軸指向小可仔無仝 ê 方向。彼當陣 ê 北極星是織女星。雖然講北極星毋是天頂上光 ê 星，毋閣伊足好揣 ê。因為伊差不多 kah 北斗星 khat-á 內底 ê 兩粒星排仝排。北極星 差不多 to̍h tī 這幅 8 度闊 ê 影像 中央。是一个用 數位處理 ê 方式 kā 較暗 ê 恆星光壓制，加強 星系間星雲 (IFN) 內底較暗 ê 氣體 kah 塗粉 ê 光度。北極星是一粒 造父變星，伊 ê 表面 to̍h 沓沓仔 噗噗跳，予伊 ê 光度 tī 幾若工內變化幾若葩。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Bray Falls 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210428.html Powered by Firstory Hosting

人馬座三生仔 https://apod.tw/daily/20210426/ 這三个真光 ê 星雲定定 tī 望遠鏡 tùi 人馬座 kah 銀河中心 這个真 kheh ê 星場看著。事實上，18 世紀 ê 宇宙觀測者 Charles Messier kā 其中兩个，M8 kah M20 收入去目錄內底。M8 是中央正爿下跤上大搭 ê 星雲，M20 是這幅圖頂懸彩色 ê 彼搭。第三个是包含 NGC 6559 ê 發射線區域。伊 to̍h tī M8 ê 倒爿，去予塗粉暗帶 kā 伊 ùi 大星雲分出來。遮攏是 tī 差不多 5000 光年遠 ê 恆星托兒所內底。超過 1000 光年闊 ê M8 嘛號做內海仔星雲。M20 有一个有名 ê 外號，to̍h 叫做三叉星雲。發光 ê 水素氣體會予發射星雲看起來是紅色 ê。毋閣對照來講，三叉星雲 ê 藍色是因為塗粉 反射恆星光 來--ê。這个 闊莽莽 ê 星際景色 tī 天頂差不多有 4 度闊，嘛會使講是 8 粒月圓遐爾闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Gabriel Rodrigues Santos 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210426.html Powered by Firstory Hosting

Tī 暗暝飛過地球（二） https://apod.tw/daily/20210423/ 這是 tī 2017 年記錄 ê，是國際太空站用縮時攝影 kā 地球暗暝 ê 景色 編輯做這个影片。地球低軌道影像 ê fans 會當開始享受這个 tī 天頂 蟯蟯趖 ê 青色 kah 紅色 ê 美麗極光。這个暗暝 ê 景色迒過北美洲 ê 西北爿到東南爿，ùi 墨西哥灣到 Florida 海岸。第二段影片是歐洲城市 ê 光線，迒過地中海，飛過非洲北爿光亮 ê 尼羅河。Ùi 軌道衛星面頂看著 ê，是暴雷發生 ê 時陣出現 ê，無穩定 ê 爍爁。面頂 ê 天星 to̍h ùi 地球 ê 弓形地平線 peh--起來，ùi 地球暗淡 ê 大氣氣輝 透過來。當然，你這馬會當 tī 厝--lih 隨時看著 地球現此時 ê 活動矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影片：NASA, Gateway to Astronaut Photography, ISS Expedition 53 音樂：The Low Seas (The 126ers) 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210423.html Powered by Firstory Hosting

地球 ê 暗頭仔 kah 暝尾 https://apod.tw/daily/20210422/ Tī 咱 ê 地球 面頂，有 美麗 ê 海洋 kah 雲，並無突然間出現 ê、日時變做暗暝 ê 明顯邊界。烏影線抑是明暗界線煞顛倒是霧霧 ê，才沓沓仔變做烏暗，to̍h 是咱知影 ê 暗頭仔。太陽 ùi 這幅圖 ê 正爿開始照，雲頂反射反紅 ê 太陽光，迵過 厚塗粉 ê 對流層，to̍h 是地球大氣層上低 ê 一層。Tī 日時彼爿 ê 頂懸，看會著一个真清楚 ê 懸海拔大氣層，kā 太陽光 散射做藍色，才消失 tī 烏暗 ê 太空中。這張影像是 tī 2001 年六月 ê 時陣 ùi 國際太空站 tī 390 公里懸 ê 所在翕 ê。毋閣你這馬已經會當揣著 地球性命 ê 信號 矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：ISS Expedition 2 Crew, Gateway to Astronaut Photography of Earth, NASA 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210422.html Powered by Firstory Hosting

Tī 近地點 ê 粉紅仔色月娘 https://apod.tw/daily/20210430/ Tī 4 月 25，一粒欲月圓 ê 月娘 tī 日頭 peh--起來進前已經升--起來矣。真歡迎伊來到這个清淨 ê 藍色天色中， 櫻花 mā 開好勢 tī 這幅圖 leh 等伊。咱熟似 ê 伊 to̍h tī 蘇格蘭愛丁堡 Leith 去予翕著。一寡人 kā 伊叫做是粉紅仔月娘，四月 ê 月圓 to̍h 發生 tī 月球行到近地點 ê 時陣。這是月球踅地球 無夠圓 ê 軌道 leh 行 ê 時陣，上近 ê 所在。才會予這粒粉紅仔月娘成做今年上近 kah 上光 ê 月圓時。你若是慢一跤步 mā 免煩惱！後一擺閣看著近地點 ê 月圓會 tī 5 月 26。一寡人會 kā 伊叫做是 花月。五月 ê 月圓其實比四月 ê 月圓 離你閣較倚 158 公里，差不多是月球 tī 近地點 ê 距離較倚 0.04 葩。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Alice Ross 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210430.html Powered by Firstory Hosting

機會號：頭一擺 tī 火星面頂飛 https://apod.tw/daily/20210420/ 啥物是探索火星上好 ê 方式？可能無孤一款上好方式，毋閣有一款新 ê 示範方式予咱真大 ê 希望：用飛 ê！動力飛行 有才調搜揣範圍較大 ê 區域，而且若是有揣著趣味 ê 所在，嘛會當進行閣較詳細 ê 調查。昨昏是細台直升機 機會號 頭一擺 tī 火星展示動力飛行。Tī 這支影片 內底，毅力號探測車 to̍h 恬恬坐 tī 火星表面，kā 機會號翕 頭一張相片。幾若秒鐘了後，機會號 ê 長車葉仔開始踅。閣過幾若秒鐘了後，機會號 to̍h 開始歷史上頭一擺起飛。小可仔踅幾若秒鐘了後，to̍h 安全降落矣。有閣較濟 機會號 以前毋捌做過 ê 試驗，會安排 tī 煞落來幾若個月做試驗。飛行 毋若會當予咱 tùi 火星有 較濟 ê 了解，嘛會當 tī 紲落來幾若十年 tùi 土星 ê 衛星 Titan 有閣較濟 ê 熟似。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影片：NASA, JPL-Caltech, ASU, MSSS 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210420.html Powered by Firstory Hosting

SpaceX 載人太空船 2 號發射了後 ê 軌跡 kah 煙流 https://apod.tw/daily/20210424/ 天頂發生啥物代誌？昨昏早天欲光 ê 時陣， tī 美國 Florida 州 ê Indian 港海岸 敢若真平靜。毋閣隨 to̍h 有一台 火箭發射，kā 天頂照予光。To̍h tī 北爿， NASA SpaceX 載人太空船 2 號任務 載一台足厲害 ê Falcon 9 號 火箭，衝入去太空中。這个 縮時攝影影片 是 kā 12 分鐘 櫼做 8 秒鐘，欲予咱看 tī 遠方倒爿遮爾光 ê 發射煙流。這个 火箭升懸 到愈來愈薄 ê 大氣層，予伊 ê 煙流湠開，to̍h 親像 日頭拄 peh--起來 ê 時，kā 天頂照予光仝款。當 載人太空船 2 號 tī 地平線消失 ê 時陣，Falcon 9 號 ê 第一節火箭欲轉來，按算欲降落 tī 大西洋 ê SpaceX 駁船 面頂。咱會當看著伊降落過程產生 ê 煙流。Tī 太空中，奮進號載人太空船 按算 tī 今仔日透早，送四位太空人 tī 國際太空站（ISS）靠岸。載人太空船 2 號 ê 太空人參加 遠征 65 號任務，來幫贊進行其他任務需要 ê 藥物試驗。伊用 ê 組織晶片 是一款真細 ê 微流體晶片，會當模擬人類 ê 器官。這个試驗會 tī ISS ê 微重力 環境內底快速進行。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影片：Eric Holland 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210424.html Powered by Firstory Hosting

機會號翕 ê 毅力號 https://apod.tw/daily/20210501/ Tī 4 月 25 飛 tī 5 公尺懸 ê 機會號直升機翕著這張真清楚 ê 影像。這是伊第二擺 tī 火星表面 leh 飛。伊 ê 彩色 kha-mé-lah 是向後壁翕 ê。機會號這馬 to̍h 停 tī 毅力號探測車行過做記號 ê 基地，Wright Brothers Field kah Octavia Estelle Butler Landing，to̍h tī 這幅圖 ê 頂爿。毅力號這馬看起來 to̍h tī 倒爿頂懸 85 公尺遠 ê 所在。機會號 ê 停車跤拄仔好卡 tī 這張相片 ê 倒爿 kah 正爿。伊 tī 4 月 30 完成創紀錄 ê 第四擺飛行。機會號轉去 Wright Brothers Field 進前會收集影像資料，看是毋是有新 ê 適合降落 ê 所在。機會號 ê 第五擺飛行，會是單向 ê，to̍h 親像是 火星 ê 飛龍機，ùi 遮飛去另外一个機場。期待會出現一个新 ê 操控飛行 ê 方式。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：NASA, JPL-Caltech, Ingenuity 音樂：PiSCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210501.html Powered by Firstory Hosting

動畫：烏洞 kā 恆星拆食落腹 https://apod.tw/daily/20210427/ 恆星若是離 烏洞 傷近會按怎？烏洞會予伊弄家散宅。毋閣實際上是按怎？這毋是引力 ê 強吸引力造成 ê，是 引力差 tī 恆星無仝位 ê 作用 kā 伊搝甲碎糊糊。這支動畫影片 展示這个解體 ê 現象。代先你會看著一粒恆星倚近烏洞。恆星 ê 運行速度愈來愈緊，伊 ê 外層大氣 mā 因為愈來愈倚近烏洞，煞去予搝散。足濟恆星 ê 大氣 to̍h 按呢 tī 深空掖甲四界攏是。毋閣有一寡大氣猶閣繼續踅烏洞 leh 行，煞形成 吸積盤。紲落來，這个 動畫 chhōa 你來看烏洞 ê 吸積盤。你甚至會當看著 吸積盤較遠 ê 彼爿面，包括著 重力透鏡 ê 奇幻視覺效應。上尾，你 會當看著 tī 自轉軸方向 ê 其中一爿，去予噴--出來 ê 噴流。理論模型表示，這寡噴流毋若 kā 能量足強 ê 氣體噴--出來，閣製造能量足強 ê 微中子。這是一種 最近 才可能 tī 地球 揣著 ê 物件。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影片：DESY, Science Communication Lab 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210427.html Powered by Firstory Hosting

紅外線波段 ê 銀河中心 https://apod.tw/daily/20210419/ 咱 ê 銀河中心看起來是啥物款 ê？Tī 可見光，銀河中心 去予烏暗 ê 塗粉雲 kah 氣體雲閘牢矣。毋過 tī 這个 遮爾媠 ê 景色 是用 Spitzer 太空望遠鏡 紅外線 kha-mé-lah 翕 ê，會當透入去大部份 ê 塗粉 內底，看著 銀河中心 區域實在是足 kheh--ê！Kā 足濟張細張 ê 快照拼鬥做一張大張 ê。這張有細節 ê 假色影像 內底，較老 ê 較冷 ê 恆星是藍色色調 ê。恆星托兒所內底 少年 koh 高溫 ê 恆星，是紅色 kah 咖啡色 ê 發光塗粉雲。最近銀河上中心 ê 所在，才予人 發現可能會當 形成 新恆星。銀河中心 離咱有 2 萬 6 千 7 百光年遠，to̍h tī 人馬座 ê 方向。Tī 這 ê 距離，這幅圖有 900 光年 闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：NASA, JPL-Caltech, Spitzer Space Telescope, Susan Stolovy (SSC/Caltech) et al.; Reprocessing: Judy Schmidt 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210419.html Powered by Firstory Hosting

Tī Azores 頂懸 ê 虹氣輝 https://apod.tw/daily/20210418/ 是按怎天頂 ê 光 to̍h 親像是一个重複 ê 大虹？是 氣輝 啦！其實這馬天頂一直攏有氣輝，毋過一般來講咱較歹看著。伊其實是一款亂流，to̍h 親像是風暴，會 tī 地球大氣層 造成真明顯 ê 波痕。這款 重力波 是空氣內底 ê 震盪。伊 to̍h kah kā 石頭擲入去平靜 ê 水內底 產生 ê 波痕 sio-siâng。綴著差不多是 氣輝 ê 坦徛方向做長時間 ê 感光，會當予這个起起落落 ê 結構閣較明顯。毋過，這寡色光是按怎來 ê？深紅色 ê 氣輝可能是 ùi 87 公里懸 ê OH 分子 來 ê，是去予太陽 ê 紫外光 激發 ê。柑仔色 kah 青色 ê 氣輝 可能是 鈉 kah 酸素 原子小可仔激發 ê。這張影像 是 tī 葡萄牙 Azores peh 去 Pico 山頂 翕 ê。地表 ê 光是 ùi 大西洋 Faial 島來 ê。這个壯觀 ê 天色會當 tī 這个一條一條 ê 氣輝看著。Tī 影像中央，中央彼條光帶是咱 ê 銀河系。Tī 倒爿頂懸附近，是 M31，仙女星系。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Miguel Claro (TWAN); Rollover Annotation: Judy Schmidt 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210418.html Powered by Firstory Hosting

Tī 火舌星雲內底 https://apod.tw/daily/20210417/ 火舌星雲 是一个 tī 可見光波段特別有名 ê 影像。因為伊 tī 獵戶座皮帶 ê 恆星形成區真厚雲、密實。Tī 皮帶上東爿彼粒參宿一，離咱差不多有 1400 光年遠。參宿一是 tī 這張 Spitzer 太空望遠鏡翕 ê 紅外線影像正爿邊仔一粒真光 ê 恆星。這幅紅外線影像差不多有 15 光年闊。你會當看著星雲內底發光 ê 氣體 kah 烏暗 ê 塗粉雲。內底有足濟最近產生 ê 恆星，攏 tī NGC 2024 s,星團內底，to̍h 集中 tī 中央。Tī NGC 2024 內底 ê 恆星，in ê 年歲 ùi 20 萬歲到 150 萬歲遐爾少年。事實上，資料表示，少年恆星主要集中 tī 火舌星雲星團中間。這 kah 恆星形成上簡單 ê 模型恆星托兒所顛倒反。模型預測 恆星形成 應該是 tī 分子雲中心上厚雲 ê 所在開始。這个結果 需要一个閣較複雜 ê 模型來解說 火舌星雲內底 ê 恆星形成。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像提供：NASA, JPL-Caltech, IPAC Infrared Science Archive 影像處理：Amal Biju 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210417.html Powered by Firstory Hosting

雙烏洞 ê 雙重扭曲世界 https://apod.tw/daily/20210416/ Tī 這个足厲害 ê 電腦視覺化影像內底，咱看會著 踅雙超大烏洞吸積盤發出 ê 光，去予極端重力扭曲 ê 時空彎曲去。這个 模擬吸積盤 是用幾若色來 kā 標記，紅色是踅 20 億太陽質量烏洞 ê 吸積盤，藍色是踅 10 億太陽質量烏洞 ê 吸積盤。這會當予咱較簡單 to̍h 揣著光 ê 源頭，毋過這款方式 mā 反應現實。較燒 ê 氣體倚光譜 ê 藍光彼爿，而且踅小粒烏洞 ê 物質有較強 ê 重力效應，閣會產生較懸 ê 溫度。像這款質量，兩个吸積盤攏會 tī 紫外線 發出 大部份 ê 光。Tī 這支影片內底，特寫影像是扭曲 ê 藍色烏洞。這是 ùi 紅色烏洞看伊 ê 另外一伴。會當 tī 前景看著絞做伙 ê 紅色吸積盤。這支影片會當予咱 tī 仝一个時間看著去予藍色烏洞扭曲 ê 紅色烏洞。因為咱會當看著紅色烏洞看著 ê 藍色烏洞，嘛會當直接看著藍色烏洞，所以咱會當同齊看著兩爿 ê 藍色烏洞。Ùi 兩粒烏洞發出 ê 紅光 kah 藍光會當 tī 上內底 ê 光環看著，這个環 to̍h 是 光子環。這个環 to̍h 差不多 tī 事件地平線附近。天文學家預測，免偌久，in to̍h 會當 觀測著重力波。這是一个時空 ê 水波痕，是兩粒超大烏洞 tī 仝一个系統內底 互相轉踅 kah 合併，to̍h 親像遮內底模擬 ê 這款 sio-siâng。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 科學視覺化提供：NASA, Goddard Space Flight Center, Jeremy Schnittman and Brian P. Powell 文稿：Francis Reddy 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210416.html Powered by Firstory Hosting

人馬座彎曲 ê 磁場 https://apod.tw/daily/20210421/ 星系當 leh 相碰 ê 時陣，in ê 磁場 會發生啥物代誌 leh？為著欲揣出這个答案，NASA kā 伊 ê 747 飛龍機 SOFIA 提來看銀河 ê 厝邊星系，人馬座 A。觀測人馬座 A ê 塗粉 ê 偏振發射線，會當追蹤伊 ê 磁場。人馬座 A ê 異常外形是兩个星系相碰 kah 噴流 形成 ê。這个噴流是 ùi 氣體吸積到 中央超大質量烏洞 驅動 ê。Tī 這个合成 影像，SOFIA 資料產生 ê 磁力線 to̍h 疊 tī ESO（可見光：白色），APEX（次毫米：柑仔色），Chandra（X-光：藍色），kah Spitzer（紅外線：紅色）。這个磁場 kah 星系外沿 ê 塗粉帶 平行，毋閣 tī 星系中央是扭曲 ê。Tī 烏洞 附近 ê 重力會 kā 離子加速，mā 會 kā 磁場 加強。總講一句，相碰 毋若 kā 星系 ê 質量合做伙，mā kā 磁場放大矣。這个結果 提供一个 新 ê 觀點 來解說，tī 早期宇宙 星系 合併 真四常 ê 時陣，磁場是按怎演化 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像提供：光學：European Southern Observatory (ESO) Wide Field Imager; 次毫米波：Max Planck Institute for Radio Astronomy/ESO/Atacama Pathfinder Experiment (APEX)/A.Weiss et al; X-光 kah 紅外線：NASA/Chandra/R. Kraft; JPL-Caltech/J. Keene 文稿：Joan Schmelz (USRA) 音樂：PiSCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210421.html Powered by Firstory Hosting

佇火星 ê 沙條崙 https://apod.tw/daily/20210106/ 火星面頂 ê 沙崙是按怎變做一條一條 ê？無人知影。這張 影像 是 tī 火星 ê Kunowsky 大坑 ê 沙條崙。是最近才用 火星探測軌道衛星 ê HiRISE kha-mé-lah 翕 ê。真濟火星 ê 沙崙去予二酸化炭素霜（to̍h 是 乾冰）崁牢矣！遮一搭遐一搭，才會看起來有的所在光、有的所在暗。二酸化炭素袂溶去，毋閣會 昇華 變做氣體。二酸化炭素是一个 溫室效應物質，就算伊是固體嘛是仝款。伊會 tī 冰 ê 形態 kā 熱量擋咧，才 úi 下面 昇華，造成像 歇陣噴泉彼款 ê 爆發。Tī 火星 ê 春天，這款爆發會造成沙崙 ê 烏斑，就是解凍了後看起來 較烏 ê 沙。這張 影像 是 tī 火星 ê 秋天翕 ê，彼當陣 ê 天氣已經欲變寒矣，這款一條一條 ê 圖樣煞予人捎攏無。一个假設是講，in 是冰 ê pit-sûn。是較弱 ê 爆發抑是日夜變化 ê 熱應力 造成 ê。毋閣這个講法猶袂確定。Tī 火星無仝 ê 季節 看遮 kah 別位 ê 沙崙，會使予咱較濟 ê 線索來拍開這个奧祕。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像提供：HiRISE, MRO, LPL (U. Arizona), NASA 影像處理：Włodek Głażewski 文稿：Alex R. Howe (NASA/USRA, Reader’s History of SciFi Podcast) 音樂：PiSCO - 鼎鼎 聲優：Tsai-Wen Lin 翻譯：An-Li Tsai (NCU) 原文：https://apod.nasa.gov/apod/ap210106.html Powered by Firstory Hosting

佇冰島頂懸 ê 鳳凰極光 https://apod.tw/daily/20210103/ 看極光 ê 人攏轉去矣！佇 冰島 九月一个安靜 ê 暗暝，半暝三點半，大部份 ê 極光攏已經消失矣。忽然間煞出現一陣新爆發 ê 粒子對天頂瀉落來，閣再 kā 地球 ê 大氣層 照予光。這个時陣，雄雄煞看著天頂 親像是 予一隻 非常 大隻 ê 鳳凰 kā 夜空照予光。用準備好 ê kha-mé-lah tùi 天頂趕緊翕兩張，閣加翕一張地景。Tī 後壁 ê 山頭是 Helgafell 山，tī 頭前 ê 河川是 Kaldá 河，兩个攏離冰島首都 Reykjavik 北爿 30 外公里遠。有經驗 ê 觀星者 to̍h 認會出 tī 山頂倒爿 ê 獵戶座。昴宿星團 嘛 tī 相片中央面頂看會著。2016 年 ê 極光，干焦有一分鐘久，而且隨無去。若是無這張 數位組合相片，可能會予人當做是咧 臭彈。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Hallgrimur P. Helgason; Rollover Annotation:Judy Schmidt 音樂：PiSCO - 鼎鼎 聲優：陳威盛 翻譯：An-Li Tsai (NCU) 原文：https://apod.nasa.gov/apod/ap210103.html Powered by Firstory Hosting

木星佮土星大相拄 https://apod.tw/daily/20201230/ 是滴！毋知影你敢捌看過木星佮土星相拄 ê 影片無？這个 kā 幾若張相片組合做縮時攝影 ê 影片是佇 泰國 翕 ê。會使看著兩粒大行星互相倚近到十分一度才分開。第一段 大相拄 是五工內兩粒行星倚近 ê 模樣，嘛會使看著衛星佮雲帶。閣來第二段是遠看，是九工 ê 影像。雖然講 木星 佮 土星 遮爾無正常佇 2020 年 12 月 21 來 相倚，毋閣 in 兩粒猶閣有 十億公里 遠。這兩粒氣態巨行星是註定 每 19.86 年 就 愛相拄一擺。毋閣，佇過去 397 冬，in 毋捌 行遮爾倚過。而且閣 60 冬 嘛袂行遮爾倚。你若是 願意等 到 7541 年，你著會當看著木星對土星面頭前 行過。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 電影：Thanakrit Santikunaporn (National Astronomical Research Institute of Thailand) 文稿：Matipon Tangmatitham 音樂：PiSCO - 鼎鼎 聲優：Yu Yang 翻譯：An-Li Tsai (NCU) 原文：https://apod.nasa.gov/apod/ap201230.html Powered by Firstory Hosting

星系、噴流、kah 有名 ê 烏洞 https://apod.tw/daily/20210415/ 明亮 ê 星系 Messier 87（M87） 是超大質量烏洞 in 兜。伊 ê 影像 tī 地球這粒行星歷史上頭一擺去予翕著，to̍h 是 ùi 事件地平線望遠鏡 翕--ê。室女座星系團這个巨人，離咱有 5500 光年遠，M87 是內底上大粒 ê 星系。M87 tī 這幅 ùi Spitzer 太空望遠鏡翕 ê 紅外線影像內底發出藍色 ê 光。To̍h 算是 M87 無啥物特殊，而且伊 to̍h 親像是雲仝款，Spitzer 影像確實有記錄著 ùi 星系中央區域噴出來 ê 相對論噴流。這个現象 tī 這幅圖正爿頂懸 ê 插入圖看會著，噴流 to̍h 湠到幾若千光年遐爾長。Tī 正爿 這个明亮 ê 噴流 當 leh 倚近咱 ê 視線方向。另外一方面，噴另外一个方向 ê 噴流，雖然咱看袂著，毋閣伊產生 ê 衝擊波，kā 一个足暗 ê 弓形物質照予光。Tī 正爿下跤 ê 插入圖，to̍h 是文章內底講著 ê 這个歷史性 ê 烏洞影像。伊 to̍h tī 這个大星系 kah 相對論噴流 ê 中央。這个 Spitzer 影像 ê 解析度無夠懸。毋閣咱猶是看會著，去予落入來 ê 物質箍牢 ê 烏洞，是活潑星系 M87 足強能量 ê 源頭。這个能量，會當予 M87 中心噴出相對論噴流。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：NASA, JPL-Caltech, Event Horizon Telescope Collaboration 音樂：PiSCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210415.html Powered by Firstory Hosting

鵜鶘星雲 ê 紅 kah 藍 https://apod.tw/daily/20210301/ 鵜鶘星雲沓沓仔 leh 改變。這規个星雲 ê 正式編號是 IC 5070。伊 kah 大 北美洲星雲，是去予 塗粉 滿滿是 ê 分子氣體 分做兩爿。毋閣，鵜鶘星雲 特別趣味，因為伊是一个活動力足強 ê 區域，內底有 恆星形成 kah 一直 leh 演化 ê 氣體雲。這張相片 經過處理，現出兩款主要 ê 色水，紅色 kah 藍色。紅色主要是 tī 星際間 ê 水素 ê 發射光。活動力較強 ê 少年恆星發出 ê 紫外光，沓沓仔 kā 星雲內底 ê 冷氣體變做燒氣體。Tī 兩種氣體 ê 交界 是 電離鋒面，to̍h tī 影相中央朱紅色 ê 所在。特別是內底閣有敢若 鰇魚鬚、密實 ê 冷氣體。Ùi 這馬開始幾若百萬年了後，這个星雲可能 to̍h 袂閣叫做 鵜鶘星雲 矣。等恆星 kah 氣體 ê 活動平衡 了後，一定會看起來無仝款。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：M. Petrasko, M. Evenden, U. Mishra (Insight Obs.) 音樂：PiSCO - 鼎鼎 聲優：DD 翻譯：An-Li Tsai (NCU) 原文：https://apod.nasa.gov/apod/ap210301.html Powered by Firstory Hosting

Miú-子搖擺是真 ê，毋過原因猶毋知 https://apod.tw/daily/20210413/ 基本粒子 會搖擺偌久？這个看起來叫是是無啥重要 ê 問題，煞 tī 2001 年 ùi 美國 New York ê Brookhaven 國家實驗室 予你一个掣一趒 ê 答案。In 講， tī 物理界真捷用 ê 粒子物理標準模型，是無完整 ê。這个結果暗示，咱 ê 宇宙 應該是有閣較基本 ê 組成元件猶未去予人發現。尤其是 miú-子，伊是一款 kah 重 電子 sio-siâng ê 粒子。伊 tī 1999 年一个號做 g-減-2 ê 系列實驗量著相當大 ê 搖擺現象。Brookhaven ê 實驗結果，予全世界其他團隊想欲確定這个結果是真 ê。嘛予理論學家壓力，需要 in 來 研究這个現象。上敏感 ê miú-子 搖擺實驗 tī Illinois ê Fermi 國家實驗室（Fermilab）進行，to̍h 是你看著 ê 這張相片。In tī 頂禮拜 ê 報告 kā 咱講，Brookhaven ê 結果是真 ê。而且 in 閣量著一寡奇怪 ê miú-子搖擺運動。搖擺率 tùi 一个號做 虛擬粒子 海來講較敏感。這个奇怪 ê 海四界攏是。這个 意外 ê 搖擺率 表示講，這个海內底 ê 虛擬粒子，是一款 kah 標準模型無仝 ê 粒子。另外，這嘛 可能表示，理論預測 ê 計算有缺陷。預測通常會用 超級電腦，而且足複雜 ê。未來 tī Fermilab g-減-2 實驗 ê 計算，會 縮小精差。而且可能嘛會當 kā 咱量著 ê 宇宙 kah 咱理解 ê 宇宙 之間 ê 統計精差縮小。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像提供 kah 版權：Fermilab National Laboratory 攝影：Reidar Hahn 音樂：PiSCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210413.html Powered by Firstory Hosting

黃道光之夜 https://apod.tw/daily/20210410/ Ùi 4 月 7 號開始，有一條真強 ê 黃道光 會當 tī 這个恬靜 ê 山 kah 夜景翕著。這張全景圖是 tī 法國南部 ê Valier 山頂翕 ê。是 peh 三點鐘久 ê 山，到山頂了後，等日頭落山，向西爿 ê Pyrenees 山脈翕 ê。這支 Valier 山有 2838 公尺懸，是市中心上懸 ê 山。Tī 天頂看會著咱熟似 ê 獵戶座 kah 北方寒天 ê 銀河。In to̍h tī 西爿彎彎曲曲 ê 山脈地平線面頂。Tī 獵戶座 ê 肩胛頭面頂彼粒參宿四，是天頂三粒黃色燈塔 ê 其中一粒。伊 kah tī 參宿四下跤正爿 ê 紅巨星畢宿五，閣有紅色行星火星，拄仔好成做一个三角形。火星 tī 銀河光帶 ê 下跤閃閃爍爍，to̍h tī 這个有 明亮黃道光 ê 暗暝。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Jean-Francois Graffand 音樂：PiSCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210410.html Powered by Firstory Hosting

有一巡一巡 ê NGC 1947 https://apod.tw/daily/20210407/ NGC 1947 會使 tī 足遠 ê 南天深空，鬼頭刀星座 ê 邊界揣著。伊離咱有 4000 萬光年遠。Tī 這个去予恆星光照出來 ê 形影內底，看會著宇宙塗粉帶 to̍h 迒 tī 這个特殊星系 ê 中央足光 ê 區域面頂。一般捲螺仔星系 ê 恆星、氣體、kah 塗粉，會綴捲螺仔手骨做伙行。毋閣 NGC 1947 煞 kah in 無仝。伊 ê 塗粉 kah 氣體煞無 kā 恆星綴牢牢。有這款 較複雜 ê 無連紲運動 to̍h 表示，tī 這个星系看會著 ê 一巡一巡 ê 塗粉 kah 氣體，可能是 ùi 另外一个星系來 ê。伊 to̍h tī 這个特殊 ê 星系過去 30 億年左右 ê 演化過程中，去予 NGC 1947 食去矣。這張清楚 ê 哈伯影像 tī NGC 1947 ê 中央有 2 萬 5 千光年闊。前景 ê 銀河系恆星 kah 小可仔較遠 ê 背景星系 to̍h tī 這幅圖內底四界掖。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：ESA/Hubble & NASA, D. Rosario; Acknowledgment: L. Shatz 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210407.html Powered by Firstory Hosting

獨創號 ê 第 39 工火星日 https://apod.tw/daily/20210403/ 這張影像是第 39 工火星日（三月 30），火星 ê 獨創號直升機 暫時停 tī 毅力號探測車 ê 腹肚下跤 ê 時陣翕 ê。獨創號 ê 四支停車跤攏放落來矣。這張 ùi 塗跤翕 ê 拼接影像，是用探測車 ê SHERLOC 機器人手骨 ê WATSON kha-mé-lah 翕 ê。Tī 影像中央附近，這台實驗性 ê 直升機 to̍h 暫時停 tī 火星塗跤面頂幾若公分懸 ê 所在。咱會當看著毅力號 ê 跤跡，ùi 探測車 ê 輪仔延長到 Jezero 石坑 ê 坑仔墘，差不多 2 公里遠 ê 所在。獨創號 tī 地球有 1.8 公斤重，抑是 4 磅重。按呢差不多是 tī 火星 ê 0.68 公斤 重，抑是 1.5 磅重。伊 ê 車葉仔有 1.2 公尺長。火星大氣層 ê 密度是地球 ê 1 葩爾爾。這台飛行器準備欲 tī 火星日 第 48 工（四月 8 號）以後，進行 tī 地球以外 ê 行星，第一擺 ê 動力飛行。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：NASA / JPL-Caltech / MSSS 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210403.html Powered by Firstory Hosting

R136 星團大出 https://apod.tw/daily/20210110/ 佇 影像 中央 ê 恆星形成區附近，有一个非常大 ê 星團，內底有一寡上大質量又閣上高溫 ê 恆星。遮陣星叫做 R136 星團，是蜘蛛星雲 ê 一部份。In 是 2009 年用 哈伯太空望遠鏡 佇 可見光波段 翕 ê。蜘蛛星雲 ê 氣體佮 塗粉 雲，去予高溫星團 ê 恆星風 佮 紫外光輻射 吹甲變成 搝長 ê 形體。蜘蛛星雲 是 佇咱 ê 厝邊星系 大麥哲倫星雲 內底，離咱差不多有 17 萬 光年 遠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：NASA, ESA, &F. Paresce (INAF-IASF), R. O’Connell (U. Virginia) et al. 音樂：PiSCO - 鼎鼎 聲優：林亮君 翻譯：An-Li Tsai (NCU) 原文：https://apod.nasa.gov/apod/ap210110.html Powered by Firstory Hosting

#啥人讀乎你聽 這擺邀請著 ê 是台北市中山大同區 ê 市議員 林亮君。伊抱著 R136 星團來到 APOD 囉～～～ 林亮君自十九歲就開始做政治的工課，做了幾若冬就擱去讀研究所做「原住民族傳統智慧創作」kah「臺灣關係法」的研究，仝一个時陣嘛參加一寡社會運動 kah 補正公投法 ê 運動。因為伊有遮爾濟不同款 ê 經驗，乎伊看見台灣 ê 問題，決定欲出來參選中山大同區 ê 市議員，為咱這塊土地打拼。伊想欲用伊較少年 ê 想法 kā 中山大同區這个遮爾媠 ê 舊城推捒（thui-sak）乎逐家知影。 因為 kah 鄉親講台語較親切，林亮君 tī 選區嘛四常 tī lih 講台語，所以伊 ê 台語袂䆀。到底外表看起來誠少年 ê 林亮君，用台語來講天文 ê 故事，會有偌心適咧？ 今仔日 ê 內容有： 00:00:00 亮君自我介紹 kah 講台語 ê 時機 00:07:30 朗讀天文文章 ê 心得 00:09:22 學校會當考慮用台語來教冊，台華雙語教學 00:10:47 這篇文章是在講啥物咧？ 00:11:38 天文圖內底無仝色水代表啥物意思？ 00:18:10 咱敢有法度知影恆星 ê 未來會變做啥款？ 00:20:52 恆星形成 kah 星團 ê 關係是按怎？ 00:24:18 彗星 kah 咱 ê 關係是啥物？ 00:25:10 烏洞是啥物？ 00:33:08 星雲 ê 名是按怎決定 ê？ 00:36:46 亮君最後分享 ------ 聲優 / 林亮君 配樂 / PiSCO - 鼎鼎 編輯 / 阿錕 錄音室 / 玉成戲院錄音室 主持 / 蔡老師、阿錕 Powered by Firstory Hosting

Messier 106 https://apod.tw/daily/20210409/ 這个美妙 ê 天體 to̍h tī 大隻熊（大熊座）附近，去予 獵狗（獵犬座）ê 恆星箍 tī 內底。伊是 1781 年去予 使用公制 ê 法國天文學家 Pierre Mechain [發現]discovered ê。了後，才予伊 ê 朋友兼同事 Charles Messier 收入去 Messier 星表內底，號做 M106。近代 ê 深空望遠鏡影像顯示，伊是一粒 宇宙島，是一个差不多 3 萬光年闊 ê 捲螺仔星系，to̍h tī 離咱銀河內底 ê 恆星 2100 萬光年遠 ê 所在。伊 ê 中心有一粒足光 ê 銀核。這个予人讚嘆 ê 星系畫面，是 ùi 業餘 kah 專業 ê 天文望遠鏡影像 kā 敆做伙 ê。影像內底明顯看會著 ê，是少年 ê 藍光星團 kah 紅色 ê 恆星托兒所。In to̍h 綴著星系 ê 捲螺仔手骨 方向。你嘛看會著足明顯 ê 紅色 噴流，伊是水素氣體發出 ê 光。除了正爿下跤 ê 細粒星系伴 NGC 4248 以外，猶閣會當 tī 這幅圖內底揣著四散 ê 背景星系。M106，嘛號做 NGC 4258，是一粒鄰近 ê Seyfert 型活潑星系。In ê 光譜 ùi 電波到 X-光攏看會著。活潑星系 ê 動力，是 ùi 落落去 星系中心大質量烏洞 ê 物質提供 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像提供：NASA, Hubble Legacy Archive, Kitt Peak National Observatory 業餘資料 kah 處理 ê 版權：Robert Gendler 音樂：PiSCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210409.html Powered by Firstory Hosting

Ùi 太空站看火箭發射 https://apod.tw/daily/20210401/ 你敢捌 tī 太空看過火箭發射？咱會使 ùi 這个縮時攝影影片 斟酌來 kā 看。這是 ùi 國際太空站 面頂看著 ê 景色，有一台火箭飛到地球軌道 ê 懸度。這台 露西亞 ê Soyuz-FG 火箭，是 tī 2018 年 11 月 ê 時陣，ùi 哈薩克 ê Baikonur 太空發射中心 發射 ê。伊送一台 Progress MS-10 模組（嘛號做 71P）去-lih，內底是欲予國際太空站用 ê 物資。這个 90 秒鐘 ê 影片 內底（ùi 15 分鐘濃縮來 ê），倒爿下跤 看會著城市 ê 光 kah 地球看會著 ê 雲。嘛看會著大氣層內底，藍色 氣輝層 kah 金色 氣輝層，to̍h 迒 tī 這支影片 ê 對角方向。正爿頂懸，tī 地球後壁，閣有遠方 ê 天星。咱會當看著火箭 ê 下節 落轉來地球。頂節 ê 補給船，發射伊 ê 推進器，沓沓仔 倚近國際太空站。這間 太空實驗室 to̍h 按呢，tī 2018 年 慶祝 in 成立 20 週年 矣。蹛 tī 踅地國際太空站 ê 太空人，愛進行足濟 ê 實用勤務 kah 科學實驗。這毋若會當擴展人類 ê 智識，嘛會當增加未來 tī 地球低層軌道 ê 商業應用。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影片提供：ISAA, NASA, Expedition 57 Crew (ISS) 資料處理：Riccardo Rossi (ISAA, AstronautiCAST) 音樂：Inspiring Adventure Cinematic Background by Maryna 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210401.html Powered by Firstory Hosting