NASA 逐工一幅天文圖 APOD Taigi

登陸火星：驚惶七分鐘https://apod.tw/daily/20210215/ Ùi 這禮拜四（2021 年 2 月 18）開始，火星可能 to̍h 會加一台 足厲害 ê 機器人探險家 矣！毋閣，in mā 有可能會變做一堆 新 ê 糞埽。這 to̍h 愛看 火星 2020 任務，是毋是有法度 tī 到火星新厝 ê 幾若分鐘內登陸成功，而且閣 kā 毅力號探測車安搭好勢，予伊會當正常運作。毋免講，這是 tī 紅色行星面頂上複雜 ê 登陸任務。伊 ê 連紲精密校正 ê 登陸模式，包括一个 隔熱枋、la̍k-khá-sàng、幾若擺 ê 火箭演習、kah 一个特別 ê 自動駕駛設備，號做 天空吊車。拜四（2 月 18）ê「驚惶七分鐘」sī 呼應 2012 年火星任務 好奇號探測車 ê 登陸，to̍h tī 這个影片 內底看會著。若是有成功，這台 kah 車平大台 ê 毅力號探測車 to̍h 會停 tī 火星 ê 表面。紲落來 to̍h 會當開始探索 Jezero 石坑，看這个看起來敢若袂生 ê 世界，是毋是 tī 過去、這馬、猶是未來，一个適合 生物 徛家 ê 所在。雖然講有幾若个媒體攏會報導這擺 ê 登陸，上完整 ê 登陸內容猶是愛 tī NASA 頻道 ê 網路直播才看會著。———  這是 NASA Astronomy Picture of the Day ê 台語文 podcast  原文版：https://apod.nasa.gov/  台文版：https://apod.tw/   今仔日 ê 文章： 影像：NASA, JPL 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210215.html Powered by Firstory Hosting

阿波羅 14 號欲轉來矣！https://apod.tw/daily/20210205/ 五十年前 ê 這禮拜（1971 年 2 月 7 號），阿波羅 14 號 ê 船員離開月球軌道，欲轉來地球矣！In ùi 命令船 Kittyhawk 看著這粒 拄 peh 起來 ê 地球。地球去予太陽照甲敢若新月仝款，ùi 月平線彼爿偷偷仔看過來。前景 ê 月面，石坑滿滿是。遮是月球離咱較遠 ê 彼爿面。是講，tī 太空船踅月球咧轉踅 ê 時陣，船員 to̍h 會當看著地球 peh 起來 kah 落 lŏe ê 模樣。毋閣，若是徛 tī 月球面頂看，地球 to̍h chhāi tī in ê 登陸地點 Fra Mauro 基地 ê 天頂袂振袂動。Ùi Fra Mauro 提轉來 ê 石頭標本內底，有一粒 9 公斤（20 磅）重 ê 石頭，號做 Big Bertha。伊 kah 地球揣著 ê 隕石 屑仔欲仝欲仝。Tī 阿波羅 14 號任務期間，Kittyhawk 船頂有帶一个罐仔，內底有 400-500 粒子。落尾閣 kā in 提轉來地球種，to̍h 號做 月樹。———  這是 NASA Astronomy Picture of the Day ê 台語文 podcast  原文版：https://apod.nasa.gov/  台文版：https://apod.tw/   今仔日 ê 文章： 影像提供：Apollo 14, NASA, JSC, ASU 影像重新處理：Andy Saunders 音樂：高小糕 GaoXiaoGao 聲優：高小糕 GaoXiaoGao 錄音：玉成戲院錄音室 混音：Andy Baker 翻譯：An-Li Tsai (NCU) 原文：https://apod.nasa.gov/apod/ap210114.html Powered by Firstory Hosting

阿波羅 14 號：Ùi Antares 看著 ê 景色https://apod.tw/daily/20210204/ 五十年前 ê 這禮拜五（2 月初 5），阿波羅 14 號 ê 登月小艇 Antares 登陸月球。Tī 欲結束 ê 時陣，太空人 Ed Mitchell ùi 窗仔 tùi 月球表面 連紲翕幾若張相。阿波羅月球表面期刊 ê 編輯 Eric Jones 才 kā in 組合 做這張詳細 ê 拼接圖。這个景色是登陸地點 ê 西北爿，Fra Mauro 高地。是阿波羅 14 號太空人 tī in 第二擺，嘛是上尾一擺 tī 月球面頂行路 了後翕 ê。前景彼台大台 ê，是登陸小艇 ê 設備運輸車。伊是一个有兩輪 ê、kah 人力車欲仝 ê 設備。是用來送家私 kah 標本用 ê。Tī 這張影像頂面中央 ê 地平線附近，是一粒 1.5 公尺大 ê 闊岩石，號做龜岩。Tī 龜岩下面 ê 淺石坑內底，彼支長長 ê，是採集標本 ê 機械 ê 白色手扞仔。是 Mitchell 敢若咧射標槍按呢，kā 擲 tī 遐 ê。Kah Mitchell 做伙 tī 月球 ê 行伴，是第一个 tī 太空 ê 美國人 Alan Shepard。伊嘛凊彩提一支當做是 go͘-lú-huh（golf）6 號鐵箠，摃 兩粒 go͘-lú-huh 球 咧耍。其中一粒 go͘-lú-huh 球，to̍h tī Mitchell 擲 ê 標槍下跤，彼粒白點 ê 所在。———  這是 NASA Astronomy Picture of the Day ê 台語文 podcast  原文版：https://apod.nasa.gov/  台文版：https://apod.tw/   今仔日 ê 文章： 影像：Edgar Mitchell,Apollo 14, NASA; Mosaic -Eric M. Jones 音樂：高小糕 GaoXiaoGao 聲優：高小糕 GaoXiaoGao 錄音：玉成戲院錄音室混音：Andy Baker 翻譯：An-Li Tsai (NCU) 原文：https://apod.nasa.gov/apod/ap210204.html Powered by Firstory Hosting

咱 ê 新單元 #啥人讀予你聽 頭一集邀請著台灣音樂界上蓋有名 ê #靈性暴女 Gao Xiao Gao (這裡會 tag Gao Xiao Gao) 高小糕，連紲三工登陸月球，來講天文 ê 故事。 高小糕受著《搖滾怒女》這本冊 ê 啟蒙，早期 ê 音樂表演以 Punk Style 為主，伊 ê 穿插（chhēng-chhah）刁工展現女性 ê 身材，希望敨開（tháu-khui）傳統社會 tùi 女性角色 ê 束縛，所以 tī 舞台頂 ê 高小糕，毋管是表演抑是音樂，攏精彩甲予逐家料想袂到，全世界攏有伊 ê 歌迷！ 這擺高小糕毋若是用台語紹介天文、閣家己配音樂 ，遮爾趣味 ê 組合，會發生啥物料想袂到 ê 代誌咧？------ 聲優 / 高小糕 GaoXiaoGao 配樂 / 高小糕 GaoXiaoGao 編輯 / 阿錕 混音 / Andy Baker 錄音室 / 玉成戲院錄音室 主持 / 蔡老師、阿錕 Powered by Firstory Hosting

Tī 月球揣著 ê：可能 sī 地球上老 ê 石頭https://apod.tw/daily/20210203/ 地球上老 ê 石頭，敢是 tī 月球面頂揣著 ê？這真有可能！這个故事 to̍h 愛 ùi 月球任務 阿波羅 14 號 講起。太空人 Alan Shepard tī Cone 石坑 揣著一粒大石頭，月球標本 14321 號。提轉來地球分析了後，煞發現伊面頂有一片，kah 其他月球揣著 ê 石頭比起來，閣較成 地球 ê 石頭。閣較予人掣一趒 ê 是，這片 最近予人定年 ê 結果，kā 測量 ê 精差 mā 算入去了後，知影伊已經有 四百萬 年 ê 年歲矣！比 tī 地球揣著 ê 其他石頭 閣較老。目前上主要 ê 假設是講，一粒 tī 古早時代 ê 彗星抑是 小行星去挵著地球 ê 時陣，kā 噴出來 ê 石頭擲入去太陽系內底。有一寡石頭 to̍h 落 lŏe 月球，kā 月球 ê 塗 kah 石頭趁燒 ê 時陣，熔做一球。冷卻了後，才閣碎去。這个影片 sī 月球標本 14321 號 ê 內部 X 光 掃描。看會著幾若 ê 部份有無仝款 ê 化學反應。月球 ê 石頭 會當 予咱知影 月球、地球、kah 太陽系早期 閣較完整 ê 歷史。這禮拜五（2月初 5）to̍h 是 阿波羅 14 號 登陸月球 ê 五十週年 矣！———  這是 NASA Astronomy Picture of the Day ê 台語文 podcast  原文版：https://apod.nasa.gov/ 台文版：https://apod.tw/ 今仔日 ê 文章： 影像：NASA, Astromaterials 3D, Erika Blumenfeld et al. 音樂：高小糕 GaoXiaoGao 聲優：高小糕 GaoXiaoGao 錄音：玉成戲院錄音室 混音：Andy Baker 翻譯：An-Li Tsai (NCU) 原文：https://apod.nasa.gov/apod/ap210203.html Powered by Firstory Hosting

有長花柄 ê 玫瑰星雲https://apod.tw/daily/20210214/ 玫瑰星雲 若是 號做 別个名，敢閣會遮爾甜？Tī 這个真普通 ê 新通用目錄 (New General Catalog) 內底，to̍h kā 叫做 NGC 2237。毋閣猶是無法度掩崁 這个 發射星雲 ê 華麗面容。伊 to̍h tī 這張影像 ê 頂面，tī 發光 ê 水素氣體形成 ê 長花柄 ê 頂懸。Tī 這个星雲內底有一个 開放星團 NGC 2244，內底有光 koh 少年 ê 恆星。遮 ê 恆星是 400 萬年前 tī 星雲內底形成 ê。In ê 恆星風 kā 星雲中央歕出一个閬空，去予 塗粉 kah 氣體包 tī 內底。星團內底高溫 ê 恆星發出 ê 紫外光，予邊仔 ê 星雲 發光。這个 玫瑰星雲 差不多有 100 光年 闊，tī 差不多 5000 光年遠 ê 所在。你會當用小望遠鏡 tùi 麒麟 星座（麒麟座）ê 方向去看 to̍h 看會著。———  這是 NASA Astronomy Picture of the Day ê 台語文 podcast  原文版：https://apod.nasa.gov/  台文版：https://apod.tw/   今仔日 ê 文章： 影像：Adam Block & Tim Puckett 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210214.html Powered by Firstory Hosting

立體 ê 愛神星https://apod.tw/daily/20210213/ Kā 你 ê 3D 目鏡 提咧！倚近到 編號 433 ê 小行星愛神星 ê 邊仔看。伊是每 1.8 年踅太陽一輾。這个近地小行星 ê 名，是 ùi 希臘 ê 愛神來 ê。毋閣，伊 ê 外形無成是一粒心，顛倒閣較成一塊馬鈴薯。愛神星是一个體積 40 x 14 x 14 公里大 ê 小小世界。面頂有起起落落 ê 地平線、石坑、大石頭、kah 山谷。這張 拼接影像 是 NEAR Shoemaker 太空船處理過 ê 立體浮雕影像。重點是伊予人感覺齷齪 ê 規模 kah 無浪漫 ê 外形。因為有遮爾明顯 ê 光暗對比，NEAR Shoemaker ê 3D 影像才會當提供小行星地貌 kah 結構真重要 ê 測量結果。而且嘛會當提供線索來研究太陽系內底 kah 城市平大粒 ê 石頭 ê 源頭。Tī 遮看會著上細粒 ê，是 30 公尺闊 ê 石頭。自 2000 年 2 月 14 開始，歷史上 ê NEAR Shoemaker to̍h 開一年 ê 時間踅愛神星 leh 轉踅。伊是第一个踅小行星 ê 太空船。20 年前 ê 2001 年 2 月 12，伊 to̍h 降落 tī 愛神星，這是第一个降落 tī 小行星表面 ê 事件。NEAR Shoemaker 上尾一擺 ùi 愛神星表面 送資料轉來，是 tī 2001 年 3 月 1 號。———  這是 NASA Astronomy Picture of the Day ê 台語文 podcast  原文版：https://apod.nasa.gov/  台文版：https://apod.tw/   今仔日 ê 文章： 影像：NEAR Project, JHU APL, NASA 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210213.html Powered by Firstory Hosting

捲螺仔星系 NGC 1350https://apod.tw/daily/20210212/ 這个華麗 ê 宇宙島 to̍h tī 南天星座，天爐座 內底，離咱有 85 百萬光年遠。NGC 1350 絞絚 ê 捲螺仔手骨 內底，有少年 ê 藍光星團，看起來敢若欲絞 lŏe 星系中央彼个大閣光 ê 星系核。伊看起來 to̍h 親像是一粒宇宙眼。實際上，NGC 1350 差不多有 13 萬光年闊。比咱 ê 銀河閣小可仔大一點矣。Tùi 地球 ê 天文學家 來講，NGC 1350 可能是 天爐座星系團 ê 外沿星系。毋閣 ùi 推算出來 ê 距離來看，伊應該毋是星系團 ê 成員。當然，tī 望遠鏡視野內底，彼寡足清楚 ê 前景星，是咱 ê 捲螺仔星系（銀河）ê 成員星。———  這是 NASA Astronomy Picture of the Day ê 台語文 podcast  原文版：https://apod.nasa.gov/  台文版：https://apod.tw/   今仔日 ê 文章： 影像：Mike Selby, Warren Keller 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210114.html Powered by Firstory Hosting

天鵝座 2010 - 2020 年 ê 拼接圖https://apod.tw/daily/20210211/ 星際塗粉 kah 發光 ê 氣體 畫出 銀河 盤一部份美麗 ê 天景，包括 銀河必縫 ê 北爿附近 kah 天鵝座。這張予人印象足深 ê 闊幅拼接圖，迒過天頂 28 x 18 度，是 kā 十年來 400 點鐘久 ê 影像資料疊做一張 ê。天鵝座 Alaha 星 kah 光閣燒 ê 超巨星 天津四 to̍h tī 這幅影像 ê 倒爿。Tī 天鵝座 ê 恆星 kah 發光 ê 氣體雲，櫼甲密密密。伊 mā 是這个烏閣暗 ê 北烏炭橐仔星雲、恆星形成發射區 NGC 7000（北美洲星雲）、kah tī 天津四倒爿下跤 ê IC 5070（鵜鶘星雲）in 兜。真濟 星雲 kah 星團 mā tī 這个宇宙景色內底揣會著。當然，天津四 tùi 愛看天星 ê 人來講，是北半球足有名 ê 一粒星，因為伊 to̍h tī 兩个 星群 內底。伊是 夏季大三角 ê 頂點，mā 是 北十字 ê 頂端。———  這是 NASA Astronomy Picture of the Day ê 台語文 podcast  原文版：https://apod.nasa.gov/  台文版：https://apod.tw/   今仔日 ê 文章： 影像：J-P Metsavainio (Astro Anarchy) 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210114.html Powered by Firstory Hosting

發出雷射光來馴服天空 https://apod.tw/daily/20210210/ 天星是按怎會爁光？這 to̍h 愛怪大氣層啦！大氣層內底有一寡定速運動 ê 空氣包，in ê 溫度 kah 空氣溫度有小可仔無仝。To̍h 是 in kā ùi 遠方天體行過來 ê 光路拗曲去矣！大氣亂流 tùi 天文學家來講是一个麻煩。因為伊會 kā 欲研究 ê 目標影像創霧去。這張影像內底 ê 望遠鏡 to̍h tī ESO ê Paranal 天文台。伊有鬥四座雷射光 tī 天文台內底，會當 kā 大氣亂流做校正。Kā 這个雷射光調做一色，會當 kā 浮 tī 地球大氣層頂懸、流星留落來 ê 鈉原子激發。這个發光 ê 鈉斑，伊 ê 功能 to̍h 親像是人造星仝款。Kā 伊 ê 爁光隨記錄起來，經過一个一秒鐘會變形幾若百擺 ê 鏡面了後，to̍h 會當消除大氣內底亂流 ê 影響，產生一个清楚 ê 影像。這款消除一粒星 ê 爁光，是一个發展中 ê 技術，會當 tī 一寡狀況之下，tī 地面 to̍h 會當翕著哈伯級 ê 影像。這个技術嘛應用 tī 人類視覺科學內底，會使提著足清楚 ê 視網膜影像。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像提供 kah 版權：Juan Carlos Munoz 原文文稿：Juan Carlos Munoz 音樂：PiSCO - 鼎鼎 聲優：彪彪 翻譯：An-Li Tsai (NCU) 原文：https://apod.nasa.gov/apod/ap210210.html Powered by Firstory Hosting

毛蟹星雲脈動星 ê 閃光 https://apod.tw/daily/20210209/ 這款爆炸一般來講會當毀滅咱 ê 太陽，毋閣這个爆炸煞留落來矣。伊用一秒鐘 30 輪 ê 速度 leh 自旋，伊嘛是因為踅遮爾緊才出名 ê。伊 to̍h 是毛蟹星雲脈動星，是產生毛蟹星雲 ê 超新星爆炸了後，才演化做一个會轉踅 ê 中子星。你若是斟酌 kā 看，to̍h 會 tī 這个縮時攝影影片 ê 中央面頂，看著脈動星 ê 閃光。這个影片是 kā 足濟張脈動星發光 ê 相片，閣有其他相關 ê 影像接做這个影片。毛蟹星雲脈動星 ê 閃光，上早是 1957 年一个查某人參加 tī Chicago 大學舉辦 ê 天文觀測之夜 ê 公開活動發現 ê。毋閣彼陣無人相信伊。脈動星 ê 祖先，超新星爆炸，tī 西元 1054 年 to̍h 已經有真濟人看著矣。這个脹風 ê 毛蟹星雲 to̍h 產生一个足媠 ê、脹大 ê 氣體雲，tī 足濟波段 ê 電磁波 leh 發光。這个脈動星，應該是超新星爆炸了後活落來 ê，因為伊是由痟密 ê 量子簡併物質組成 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Martin Fiedler 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210209.html Powered by Firstory Hosting

WR32 kah 龍骨座內底 ê 星際雲 https://apod.tw/daily/20210208/ 恆星 to̍h 敢若藝術家仝款。Kā 星際氣體當做畫布，一粒叫做 WR32 ê 大質量、變化多端 ê Wolf-Rayet 星，to̍h tī 這張畫布 ê 倒爿，畫出親像膨裙 ê 半圓形雲絲。另外 tī 這張影像 ê 正爿頂懸，有一个細陣星團 NGC 3324。伊吹出來 ê 風 kah 輻射，捒出一个 35 光年闊 ê 雲窗。伊 ê 正爿是一个看起來真好認 ê 人面。這區 to̍h 號做 Gabriela Mistral 星雲，是用來紀念一个有名 ê 智利詩人。遮 ê 星際雲離龍骨座大星雲差不多有 8000 光年遠。伊是一个真複雜 ê 恆星社區，內底有足濟氣體 kah 塗粉濫做伙 ê 雲。人類 tùi in ê 形體有無限 ê 想像。這張望遠鏡相片，有翕著星雲內底 ê 特徵發射線。紅色是離子化 ê 硫原子，青色是離子化 ê 水素原子，藍色是離子化 ê 酸素 原子。這三色是上濟人用 ê 哈伯色盤。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Ariel Cappelletti 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210208.html Powered by Firstory Hosting

球形星團 M53 內底 ê 藍色浪星 https://apod.tw/daily/20210207/ 太陽若是這个星團 ê 一部份，咱 ê 夜空 to̍h 會 kah 珠寶盒仝款金光閃閃。這个星團是 M53，嘛叫做 NGC 5024，是 tī 咱 ê 銀河內底 250 个 球形星團 ê 其中一个。Tī M53 內底大部份 ê 恆星攏比咱 ê 太陽較老嘛較紅。毋閣有一寡神祕 ê 恆星，in 較藍嘛較少年。這寡少年恆星 ê 產生，可能會 kah 目前 ê 假設衝突。這个假設認為，M53 內底 ê 恆星攏是 tī 差不多時間做伙形成 ê。這寡 kah 別人無仝款 ê 恆星，to̍h 叫做藍色浪星。In tī M53 內底，實在是濟甲有夠無正常 ê。經過足濟 ê 辯論，這馬認為藍色浪星 ê 產生，應該是 tī 雙星系統內底，因為星伴落過來新 ê 物質，才會產生新 ê 恆星。天文學家 kā 哈伯太空望遠鏡翕 ê 這款球形星團 ê 影像提來分析，to̍h 會使 kā 一陣親像藍色浪星這款恆星，提來推算球形星團 ê 年歲。嘛才會使 iōng 這來縮小宇宙年歲 ê 推算範圍。M53 會使 iōng 雙筒望遠鏡 tī Berenices 王后頭鬃這个星座 （后鬃座）看著。內底有超過 25 萬粒恆星。是 tī 咱 ê 銀河中心內底，上遠 ê 球形星團 ê 其中一个。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：ESA/Hubble, NASA 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210207.html Powered by Firstory Hosting

北方寒天 ê 暗暝 https://apod.tw/daily/20210206/ Tī 這个恬靜 ê 森林 kah 夜空，白雪 to̍h 親像一領毯仔仝款崁 tī 塗跤。這張拼接圖是一月底 ê 時陣，tī 地球波蘭西北爿 Siemiony 附近一个安靜 ê 田庄仔路，kā 翕著 ê 景色鬥做這張 360 度 ê 全景投影圖。這个暗暝有夠寒 ê！Tī 樹林圍起來 ê 天頂，是 tī 北方寒天 ê 銀河內底，閃閃爍爍 ê 天星 kah 星雲。Tī 子午線天頂附近 ê 彼粒星是五車二，差不多 tī 樹仔面頂 43 光年懸 ê 所在。戰車星座，御夫座 ê Alpha 星是冬季六角形星群 ê 一部份。五車二是真有名 ê 雙星系統。Tī 五車二 ê 正爿面頂，綴銀河 ê 方向行去，你可能會看著 tī 北方寒天暗暝，彼个熟似 ê 臘戶座。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Lukasz Zak 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210206.html Powered by Firstory Hosting

七彩 ê 四分儀座流星 https://apod.tw/daily/20210202/ 流星會使 sī 七彩 ê。人類 ê 目睭 sī 無法度分辨遮爾濟色光。毋閣，kha-mé-lah 會使。這張相片 sī 用 kha-mé-lah tī 美國 ê Missouri 翕 ê 四分儀座流星。Tī 這個月初，in 毋但光 kah 驚死人，閣五彩繽紛。這粒發光 ê 石頭，應該 sī 去予小行星 2003 EH1 放捒了後，tī 行過地球大氣層 ê 時陣燒出一條路 ê。流星 ê 色光通常 sī ùi 流星解體了後，產生 ê 離子元素來 ê。青藍色 ê 光一般攏是 ùi 鎂來 ê。鈣會發出茄仔色 ê 光。鎳會發出青色 ê 光。毋閣，紅色一般來講，sī ùi 地球大氣內底，高能 ê 窒素 kah 酸素 來 ê。這个遮爾光 ê 火 流星 一目[目聶] to̍h 無去矣，比一秒鐘猶閣較短。毋閣，伊留一條去予風歕出來 ê 電離軌跡，煞留幾若分鐘久 ê 光予人看著。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Nicolas Paladini 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210202.html Powered by Firstory Hosting

Tī 雪樹頭殼頂 ê 月暈 https://apod.tw/daily/20210201/ 你敢捌看過月娘 外口彼 liàn 月暈？這个定定看會著 ê 景色，是因為大部份 ê 天頂，去予內底有幾仔百萬粒 ê 冰晶屑仔 ê 薄雲罩著，才產生 ê 現象。每一粒冰晶 to̍h 親像是一个微型鏡頭。因為大部份 ê 冰晶，攏有差不多欲仝形 ê、giú 長 ê 六角形形體。光 ùi 冰晶 ê 其中一面行入去了後，反射 22 度，才 ùi 對面行出來。這个 22 度 to̍h 是月暈 ê 半徑。Kah 日時看著 ê 日暈欲仝欲仝。是講，冰晶 tī 雲內底是按怎形成 ê？這 to̍h 是一个研究主題矣。這張相片是頂禮拜 tī 瑞士 ê Östersund 翕 ê。Tī 這个鏡頭內底，有白雪雪 ê 樹仔 kah 兔仔 ê 跤跡。In ê 頭殼頂，是一个完整 ê 月暈。 Kah 月暈、日暈有關連 ê 文章：月華 kah 邊仔 ê 木星、土星 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Göran Strand 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210201.html Powered by Firstory Hosting

遠方 ê 小行星 https://apod.tw/daily/20210131/ 逐工攏有 ùi 太空掔過來地球 ê 石頭。是講，較大粒 ê 石頭嘛較罕 leh 挵著地球。逐工攏有足濟幾若公斤重 ê 太空塗粉挵著地球。較大粒 ê 挵著 to̍h 會變做發光 ê 流星。逐工攏有 kah 籃球平大粒 ê 石頭 kah 冰丸落落來地球 ê 大氣層。大部份攏足緊 to̍h 蒸發了了矣。Tùi 地球會造成嚴重威脅 ê 石頭嘛有。直徑差不多有 100 公尺遐爾大。In 差不多每 1000 年才挵著地球 一擺。遮爾大粒 ê 石頭若是掔著海，to̍h 會引起足恐怖 ê chu-ná-mih，閣有可能毀滅海岸線。若是欲予超過一公里大 ê 大粒小行星摃著 ê 機會 ē 閣較少。一般來講，愛幾若百萬年才會拄著一擺。毋過，這會造成全球性 ê 災難。其實猶有足濟小行星猶未去予人揣著。Tī 這張影像內底，有一粒畫一逝藍線 ê 小行星，to̍h 是按呢 tī 1998 年去予哈伯太空望遠鏡揣著 ê。大粒小行星 kah 地球相碰，並無啥會影響著地球 ê 軌道。反倒是相碰產生 ê 塗粉，會影響著地球 ê 氣候。有一款結果是造成全球足濟物種 ê 滅絕。這款講法，可能會減弱地球物種 sī 因為人類活動 chiah 慢慢滅絕 ê 假設。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：NASA, ESA, Hubble; R. Evans & K. Stapelfeldt (JPL) 音樂：PiSCO - 鼎鼎 聲優：Ông Huē-Bûn 錄音：玉成戲院錄音室 翻譯：An-Li Tsai (NCU) 原文：https://apod.nasa.gov/apod/ap210131.html Powered by Firstory Hosting

一萬兩千公尺懸 ê 南天景色 https://apod.tw/daily/20210130/ 這張富麗 ê 夜空影像是南天 ê 天文景色，是 tī 厚雲 ê 地球頂懸翕 ê。這个景色是 ùi 航空公司 ê 飛行甲板 tī 1 萬 2 千公尺懸 ê 所在，穩定向西飛去秘魯 ê 利馬 ê 時陣翕 ê。為著欲翕著清楚 ê 航空天文相片，to̍h 愛連紲翕足濟張短時間感光 ê 相片，才 kā 內底上好 ê 幾若張揀出來，疊做一張。闊莽莽 ê 南天銀河 ùi 倒爿頂懸 ū 烏炭橐仔星雲 kah 南十字 ê 所在，一直湠到正爿 ū 龍骨座星雲 kah Gum 星雲 ê 所在。老人星是龍骨座 ê alpha 星，嘛是地球看會著 ê 第二光 ê 星。伊 to̍h tī 銀河下跤，足好揣 ê。Kah 銀河 ê 矮星系，大麥哲倫星雲，仝款好揣。小麥哲倫星雲 to̍h tī 厚雲 ê 地平線面頂。當然，南天極嘛 tī 這張閃閃爍爍 ê 南天影像內底。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Ralf Rohner 音樂：PiSCO - 鼎鼎 聲優：Ông Huē-Bûn 錄音：玉成戲院錄音室 翻譯：An-Li Tsai (NCU) 原文：https://apod.nasa.gov/apod/ap210130.html Powered by Firstory Hosting

北美洲 ê 夜景 https://apod.tw/daily/20210129/ 這張是 tī 1 月 21 翕 ê，差不多七號左右，月光 to̍h 照著前景這个雪山 kah 夜景。這是雙獅山，是 tī 地球北美洲 Kha-ná-tà（Canada）英屬 Colombia 省溫哥華 北爿 ê 一對引人注目 ê 山頭。Tī 這對雙生仔山頭 ê 頭殼頂 sī NGC 7000 kah IC 5070 ê 發射星雲，tī 天鵝座天津四 alpha ê 倒爿。這區離溫哥華差不多 ū 1500 光年遠，sī 大型恆星形成複合體 ê 一部份。In 遮爾特別 ê 紅光 sī ùi 原子氣體發出來 ê。這區發射星雲 to̍h 根據 in ê 外形，號做北美洲星雲 kah 鵜鶘星雲。這張 ū 美麗構圖 ê 深空夜景，sī ùi 改造過 ê 數位 kha-mé-lah 鬥望遠鏡 ê 鏡頭，用長時間感光翕 ê。前景是 kā kha-mé-lah 固定 tī 三跤馬翕 ê，背景是 tòe 天頂逐 leh 翕 ê。按呢 ê 做法會使 kā 大自然 ê 詳細狀況 kah 天頂一寡用目睭無法度直接看著 ê 光度範圍 kah 色水翕出來。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 組合影像提供 kah版權：Liron Gertsman 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210129.html Powered by Firstory Hosting

M66 ê 特寫 https://apod.tw/daily/20210128/ 大閣媠 ê 捲螺仔星系 M66 to̍h tī 差不多 35 百萬光年遠 ê 所在。這个美麗 ê 宇宙島差不多 ū 10 萬光年闊，kah 咱 ê 銀河 beh 平大。這張重新處理過 ê 哈伯太空望遠鏡 ê 特寫，是 tī 星系核 ê 所在，án-ne 差不多有 3 萬光年闊。這个星系盤 ùi 咱的視線方向看去，實在 sī 趨有夠大 ê 啦！Tī 這个遮爾光 ê 星系核附近，應該 to̍h sī 痟大質量烏洞 in 兜。星系核外沿 ê 暗塗粉帶 kah 少年 ê 藍色星團 tòe 捲螺仔手骨 ê 方向掃過。彼搭 to̍h sī 一點一點、閃閃爍爍、粉紅仔色 ê 恆星形成區。M66 嘛叫做 NGC 3627，伊是獅仔座三生仔 ê 三个星系內底，上光 ê 彼个。是因為引力交纏 chiah 敆做一組 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像提供：NASA, ESA, Hubble 資料處理 & 版權：Leo Shatz 音樂：PiSCO - 鼎鼎 聲優：Dolly 錄音：玉成戲院錄音室 翻譯：An-Li Tsai (NCU) 原文：https://apod.nasa.gov/apod/ap210128.html Powered by Firstory Hosting

NGC 5775 ê 坦徛磁場 https://apod.tw/daily/20210127/ 捲螺仔星系 ê 磁場會當湠外闊？天文學者 tī 過去幾若十年 kan-na 知影 ū 一寡仔捲螺仔星系 ū 磁場。毋閣，美國國家電波天文台 (NRAO) ê 足大陣列（VLA）電波望遠鏡（to̍h 是 tī 電影「接觸未來」 內底彼 ê 有名 ê 望遠鏡）已經 tī 2011 年升級矣。想袂到竟然會發現，磁場按星系盤 ê 坦徛方向，湠到幾若千光年遠 ê 所在。這張影像 sī 坦敧身 ê 捲螺仔 星系 NGC 5775，這 sī 用CHANG-ES（厝邊星系 ê 銀暈 ê 連紲譜）巡天觀測計畫翕 ê。這張影像顯示，鬖鬖 ê 磁力線可能是捲螺仔星系內底真四常 ê 現象。Kah 鐵屑仔綴著棍仔形吸石 ê 磁場方向仝款，電子輻射嘛綴著星系磁力線 ê 方向。伊用接近光速 ê 速度 se̍h 磁力線 leh 行。影像內底一條一條 ê 線 sī ùi VLA 資料建構起來 ê。可見光 影像 sī ùi 哈伯太空望遠鏡 ê 資料 來 ê。影像內底 ê 粉紅仔色氣體 to̍h 是 新恆星形成 ê 所在。看起來 tī 遮 ê 星系風，會當 kā 星系磁場湠出去。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像提供：NRAO, NASA, ESA, Hubble 影像處理 kah 文稿：Jayanne English (U. Manitoba) 音樂：PiSCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap210127.html Powered by Firstory Hosting

NGC 1316 ê 中央：星系相碰了後 這个看起來遮爾奇怪 ê 星系，是按怎產生 ê？為著欲揣出像 NGC 1316 這款，內底 ê 恆星、氣體、塗粉 lóng 四界亂掖 ê 情形 sī 按怎發生 ê？天文學者 soah-lâi 變做偵探。檢查了後認為，NGC 1316 是一个足大 ê 長株圓星系。毋閣，毋知是按怎，伊嘛有 tī 捲螺仔星系內底才有 ê 塗粉烏帶。用哈伯太空望遠鏡翕 ê 影像 to̍h 看會著詳細情形。這會當 kā 這个遮爾大型 ê 交纏歷史，重新交代清楚。Tī 這幅深空 koh 闊幅 ê 影像，看會著相碰產生 ê 巨殼。毋閣，siāng 中央 ê 影像看會著 NGC 1316 內部幾个仔球形星團。有這款現象，to̍h 表示 tī 過去這幾十億年來，這个星系猶閣 kah 其他 ê 星系繼續 leh 相碰 ia̍h-sī 合併。Tī 這張影相 ū 足明顯 ê 塗粉烏瘤 kah 塗粉烏帶。這代表遮 siāng-bô 有一个捲螺仔星系去予食去矣。NGC 1316 to̍h 佇天爐座 ê 方向，有 5 萬光年闊，離咱有 6 千萬光年遠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像提供：NASA, ESA, Hubble 影像處理佮版權：Daniel Nobre 音樂：PiSCO - 鼎鼎 聲優：阿錕 翻譯：An-Li Tsai (NCU) https://apod.tw/daily/20210126/ 原文：https://apod.nasa.gov/apod/ap210126.html Powered by Firstory Hosting

智利火山頭頂 ê 南十字 你敢有看過南十字？伊是地球南半球 siāng 有名 ê 四粒星。這張相片 sī 這個月初 tī 智利翕 ê。南十字拄仔好 tī 爆發 ê Villarrica 火山 ê 倒爿翕著。伊 sī tī 咱太陽系內底，活動力上強 ê 火山之一。Kā 南十字內底上紅 ê 十字架一 tùi 上光 ê 十字架二連去，差不多 to̍h 會指向天頂上南 ê 所在，南天極（SCP）。Tī 這个所在，所有 ê 恆星看起來 to̍h kah 地球自轉同齊 leh 踅。Tī 現代，南天極附近無較光 ê 恆星，kah 北天極（NCP）無仝，伊附近有足光 ê 北極星。若是 kā 十字架一 kah 十字架二 ê 連線延長（差不多是 in ê 角距離 ê 4 到 7 倍），to̍h 會揣著小麥哲倫星雲。伊是 tī 咱 ê 銀河系內底，一个足光 ê 衛星星系。南十字星群 sī 南十字星座 ê 代表，in sī 一陣真明顯 ê 星，內底有四粒 iōng 目睭 to̍h 看會著 ê 造父變星。Tī 這張相片 ê 火山頭頂，看起來敢若 leh 衝烏煙 ê sī 烏炭橐仔星雲。倒爿頂懸彼區大 koh 紅 ê，sī 當咧形成新恆星 ê 龍骨座星雲。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像提供佮版權：Tomáš Slovinský 音樂：PiSCO - 鼎鼎 聲優：蔡老師 翻譯：An-Li Tsai (NCU) https://apod.tw/daily/20210125/ 原文：https://apod.nasa.gov/apod/ap210125.html Powered by Firstory Hosting

厝邊 ê 大質量捲螺仔星系 NGC 2841 NGC 2841 是一个咱熟似 ê 大質量星系。伊是一个佇北爿 ê 大熊座內底，干焦 4600 萬光年遠 ê 捲螺仔星系。這个遮爾清楚 koh 美麗 ê 宇宙島，有一个足明顯 ê 黃色星系核 kah 星系盤。佇一節一節、絞 ân ê 捲螺仔手骨內底，有塗粉帶、有粉紅仔斑 ê 恆星形成區、閣有少年 ê 藍色星團。毋閣，大部份 ê 捲螺仔星系 sī 有較分明 ê 手骨 kah 較大 ê 恆星形成區。NGC 2841 ê 直徑超過 15 萬 光年闊，比咱 ê 銀河閣較大。這張組合影像是 kā 2.4 公尺闊 ê 踅地衛星哈伯太空望遠鏡 kah 8.2 公尺闊 ê 地面望遠鏡 Subaru 望遠鏡，合併感光而成 ê。Ùi X 光 ê 影像推測，恆星風 kah 恆星爆炸產生噴懸 ê 高溫氣體，湠到 NGC 2841 ê 銀暈。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像提供：NASA, ESA, Hubble, Subaru 製作 & 版權：Roberto Colombari 音樂：PiSCO - 鼎鼎 聲優：阿錕 翻譯：An-Li Tsai (NCU) https://apod.tw/daily/20210114/ 原文：https://apod.nasa.gov/apod/ap210114.html Powered by Firstory Hosting

仙后座 A ê 輪迴 佇銀河內底 ê 大質量恆星，in ê 一生活甲有夠精彩 ê 啦！代先 ùi 宇宙雲海開始崩塌。煞落來 kā in ê 核子反應爐點予著，才會使 tī 核心製造重元素。燒幾仔百萬年了後，這寡燒出來 ê 重元素，用爆炸 ê 方式，噴轉去星際空間，閣開始製造新 ê 恆星。這个脹風 ê 雲屑仔 to̍h 是仙后座 A。這代表恆星 ê 性命週期已經行到上尾 ê 坎站矣。超新星爆炸會產生超新星殘骸。佇 350 年前，to̍h 有人佇地球看著伊發 ê 光矣。是講，這个光到地球進前，to̍h 愛先行 1 萬 1 千年才會到。這張假色影像，是 kā Chandra X 光衛星天文台 ê X 光影像 kah 哈伯太空望遠鏡 ê 可見光影像組合起來 ê。看會著殘骸內底猶閣燒滾滾 ê 雲絲佮雲瘤。用仙后座 A ê 距離來推算，這个殘骸差不多有 30 光年闊。為著欲予天文學者了解銀河內底 ê 恆星成份 sī 按怎循環 ê，這張影像 to̍h kā 幾个仔元素發出來 ê 高能 X 光發射線，用無仝色來 kā 標注。紅色是硅素，黃色是硫磺，青色是鈣，茄仔色是鐵，藍色是猶閣咧脹風 ê 爆炸波。佇中央附近 ê 光點是中子星。伊是一个痟密、ùi 大質量恆星核崩塌 ê 殘骸。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：X 光 - NASA, CXC, SAO; 可見光 - NASA,STScI 音樂：PiSCO - 鼎鼎 聲優：蔡老師 翻譯：An-Li Tsai (NCU) https://apod.tw/daily/20210123/ 原文：https://apod.nasa.gov/apod/ap210123.html Powered by Firstory Hosting

銀河環 咱 ê 銀河盤面頂，有闊莽莽 ê 宇宙塗粉、恆星、佮星雲。In to̍h 佇這張全天投影圖內底成做一个美麗 ê 圓箍仔。這張有創意 ê 全景圖，是開兩年 ê 時間，kā 地球看會著 ê 銀河景色，用做 360 度 kā 鬥起來。北半球 ê 影像是佇中國西爿收集 ê，南半球 ê 影像是佇紐西蘭收集 ê。佇這張影像頂懸，看起來敢若是佇銀河環面頂一粒 leh 發光 ê 寶石，彼 to̍h 是銀河中心 ê 銀核。銀核面頂有足光 ê 木星。木星 ê 正爿是紅巨星心宿二。這个銀河環 ê 下面是離銀心 180 度遠 ê 所在，彼搭附近是臘戶座，佇北半球寒天 ê 暗暝定定看會著。佇這張投影圖，銀河環內底包著兩个佇南半球足有名 ê 星系，to̍h 是大小麥哲倫星雲。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像提供佮版權：Alvin Wu 音樂：PiSCO - 鼎鼎 聲優：蔡老師 翻譯：An-Li Tsai (NCU) https://apod.tw/daily/20210122/ 原文：https://apod.nasa.gov/apod/ap210122.html Powered by Firstory Hosting

天頂厚-tut-tut ê 極光 佇 2017 年 6 月 25 úi 國際太空站面頂翕 ê 這張地球表面厚 tut-tut ê 青色極光，to̍h 親像佇墨西哥潤餅面頂抹一重青色 ê 莎莎醬仝款。軌道站 to̍h 佇極光 ê 面頂，差不多佇 400 公里（ 250 英里）懸 ê 所在。極光有真特別 ê 色水，這是分子佮原子佇極端海拔、低密度 ê 所在，去受著激發才發出 ê 光。主要是 úi 酸素原子 ê 發射線發出 ê 光。這个迷人 ê 光，佇較低海拔是青色 ê。毋閣，較懸 ê 紅色光帶出現佇太空站 ê 視野，實在是真罕得看著。這張相片有翕著欲經過澳洲東南角 ê 軌道站。佇相片 ê 正手爿、地平線 ê 面頂，閣有翕著大犬座，to̍h 是臘戶座 ê 大隻狗。大犬座 ê Alpha 星是天狼星，是地球附近上光 ê 恆星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Jack Fischer, Expedition 52, NASA 音樂：PiSCO - 鼎鼎 聲優：阿錕 翻譯：An-Li Tsai (NCU) https://apod.tw/daily/20210114/ 原文：https://apod.nasa.gov/apod/ap210114.html Powered by Firstory Hosting

M78 ê 闊幅相片 佇肥 chut-chut ê 臘戶座內底，有足濟星際塗粉雲佮發光 ê 星雲。內底上光 ê 是 M78，to̍h 佇這幅彩色 ê 闊幅相片 ê 中央。這張相片有包著臘戶座皮帶 ê 北爿區域。佇 1500 光年遠 ê 所在，藍色 ê 反射星雲差不多有 5 光年遐爾闊。伊 ê 藍光，主要是塗粉反射高溫閣少年 ê 恆星來 ê 。反射星雲 NGC 2071 to̍h 佇 M78 ê 倒爿。Herbig-Haro 天體 ê 發射光斑，是恆星佇形成過程中，能量足強 ê 噴流噴出來 ê 物件。佮邊仔 ê 暗塗粉帶相比，實在是有夠光 ê 。這个長時間 ê 感光，予咱看會著這區較暗、反紅光 ê 水素氣體。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Wes Higgins 音樂：PiSCO - 鼎鼎 聲優：Dolly 錄音：玉成戲院錄音室 剪輯：阿錕 翻譯：An-Li Tsai (NCU) https://apod.tw/daily/20210121/ 原文：https://apod.nasa.gov/apod/ap210121.html Powered by Firstory Hosting

渦輪星系 ê 磁場 磁場敢一定會佮星系 ê 捲螺仔手骨仝一个方向？這个用正面向咱 ê 渦輪星系 (M51) ，是佇盤仔形星系內底，一个看會著真清楚 ê 捲螺仔波形 ê 星系。咱用電波望遠鏡來 kā 看，會當看著磁場綴著捲螺仔手骨 ê 曲度。毋閣，NASA 有一台佇天頂咧飛 ê 紅外線平流層望遠鏡 (SOFIA) ，煞看著 M51 ê 磁場佇星系盤 ê 外沿交織。磁場會當佇紅外線波段，像偏光鏡原理按呢，ùi 塗粉粒 ê 排列方向推算出來。疊佇這張影像面頂 ê 線，是用演算法 kā 偏振光算出來 ê 磁場方向連起來 ê 。影像頂懸反紅 ê 恆星形成區，是用哈伯太空望遠鏡翕 ê 。是講，可能是影像頂懸彼粒星系伴 ê 引力，kā 這粒塗粉滿滿是 ê 星系拖去，產生較強 ê 亂流，kā 塗粉絞絞去，才會佇星系 ê 外沿手骨，產生這款料想袂到 ê 磁場形態。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：NASA, SOFIA, HAWC+, Alejandro S. Borlaff; JPL-Caltech, ESA, Hubble 音樂：PiSCO - 鼎鼎 聲優：蔡老師 錄音：玉成戲院錄音室 翻譯：An-Li Tsai (NCU) https://apod.tw/daily/20210120/ 原文：https://apod.nasa.gov/apod/ap210120.html Powered by Firstory Hosting

月華 kah 邊仔 ê 木星、土星 是按怎有當時仔，去予雲閘著 ê 月娘看起來是七彩 ê？這款現像 to̍h 叫做月華，是佇薄縭絲 ê 雲內底差不多平大粒 ê 水珠中央，產生光 ê 量子力學繞射。無仝色 ê 光有無仝 ê 波長，無仝色 ê 光 ê 繞射現像嘛會無仝。月華是真少數用目睭 to̍h 看會著 ê 量子力學色光效應。是講，日華有當時仔嘛真明顯。這張組合影像是頂個月佇土星佮木星大相拄進前幾工翕 ê 。頭前是意大利一个叫做 Pieve di Cdore ê 庄頭，伊 to̍h 佇 Sfornioi 山 ê 頭前。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Alessandra Masi 音樂：PiSCO - 鼎鼎 聲優：蔡老師 錄音：玉成戲院錄音室 翻譯：An-Li Tsai (NCU) https://apod.tw/daily/20210119/ 原文：https://apod.nasa.gov/apod/ap210119.html Powered by Firstory Hosting

腦髓星雲 ê 超新星殘骸 是啥物驅動這个特殊 ê 星雲？CTB-1 是一萬年前佇仙后座方向 ê 一粒大質量恆星爆炸ê時陣留落來 ê 脹大 ê 氣體殼。這个恆星應該是佇伊核心 ê 元素燒了了後才爆炸 ê 。遮 ê 元素本底是佇核融合 ê 時陣產生壓力予恆星會當穩定。這个超新星殘骸，因為看起來足成是一粒腦，所以 to̍h 叫做腦髓星雲。伊因為佮邊仔 ê 星際氣體相碰，所以猶繼續佇可見光咧發光。是講，是按怎這个星雲嘛會佇 X 光發光呢？這个問題到今猶是一个謎。有一个假設是講，有一粒活跳跳 ê 脈動星佇仝一个時間製造出來，用高速 ê 恆星風 kā 星雲推捒出去。根據這个假設，最近有一粒脈動星佇電波波段予人揣著。伊敢若是佇超新星爆炸 ê 時陣，用一秒鐘 1000 公里緊 ê 速度發出信號。雖然講，腦髓星雲看起來 kā 咱 ê 月娘欲平大，毋閣伊實在是傷暗矣！這張影像是佇美國 ê 新墨西哥洲，用兩台細台 ê 望遠鏡，開 130 點鐘久 ê 時間感光才提著欸。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Russell Croman 音樂：PiSCO - 鼎鼎 聲優：阿錕 翻譯：An-Li Tsai (NCU) https://apod.tw/daily/20210118/ 原文：https://apod.nasa.gov/apod/ap210118.html Powered by Firstory Hosting

真特殊 ê 半人馬座 A ê 噴流 這个 ùi 半人馬座 A 噴出來 ê 噴流有百外萬光年長。這个 ùi 捲螺仔星系中央 ê 痟大烏洞噴出來 ê 電漿噴流，kā 這張影像 ê 半人馬座 A 照予光。是講，烏洞是按怎 kā 食入來 ê 物件噴出去，到今逐家猶是捎攏無。噴流離開星系了後，to̍h 歕出一个足大 ê 電波氣泡，差不多會發光幾仔百萬年遐爾長。伊若是去予噴過 ê 氣體激發，這个電波氣泡 to̍h 會當佇十億年了後閣再繼續發光。X 光佇這張組合影像是藍色 ê ，微波光是柑仔色 ê 。佇這个電波噴流 ê 源頭，看會著噴流上中央 1 光年闊 ê 詳細狀況。 ------ 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：ESO/WFI (可見光); MPIfR/ESO/APEX/A. Weiss et al. (微波光); NASA/CXC/CfA/R. Kraft et al. (X光) 音樂：PiSCO - 鼎鼎 聲優：阿錕 翻譯：An-Li Tsai (NCU) https://apod.tw/daily/20210117/ 原文：https://apod.nasa.gov/apod/ap210117.html Powered by Firstory Hosting

NGC 2174 ê 雲山 這張奇幻 ê 天景 to̍h 佇 NGC 2174 ê 邊仔附近翕 ê。伊是一个離咱差不多有 6400 光年遠，佇厚雲 ê 獵戶座內底 ê 恆星形成區。遮 ê 氣體佮塗粉做 ê 雲山，是去予一陣新形成 ê 恆星 ê 恆星風佮輻射吹做這形 ê 。這陣新 ê 恆星四界掖，to̍h 佇 NGC 2174 中央 ê 開放星團內底予咱揣著。雖然講，佇這个塗粉滿滿是 ê 雲內底，恆星形成攏無停。毋閣遮 ê 雲，上尾嘛是會去予活跳跳 ê 新恆星佇幾仔百萬年 ê 時間內底吹了了。這張是佇 2014 年，用哈伯太空望遠鏡佇紅外線波段紀錄 ê 星際景緻，大細差不多有 6 光年遐爾闊。佇 2021 年欲發射 ê James Webb 太空望遠鏡，嘛已經調整好勢，準備欲佇紅外線波段來探索咱 ê 宇宙矣。 ------ 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：NASA, ESA, Hubble Heritage Team (STScI/AURA) 音樂：PiSCO - 鼎鼎 聲優：阿錕 翻譯：An-Li Tsai (NCU) https://apod.tw/daily/20210116/ 原文：https://apod.nasa.gov/apod/ap210116.html Powered by Firstory Hosting

逐工一幅天文圖 APOD Taiwanese https://apod.tw/ 是 NASA ê Astronomy Picture of the Day（APOD）正式授權翻譯 ê 台語版。第一集會介紹 APOD Taigi 是啥？是按怎有這个 project ê？ Powered by Firstory Hosting