NASA 逐工一幅天文圖 APOD Taigi

鉛筆星雲 ê 超新星衝擊波 https://apod.tw/daily/20210414/ 這个超新星 ê 衝擊波用時速 50 萬公里緊 ê 速度 kā 星際空間掃予空。Tī 這張有清楚細節 ê 彩色組合圖 中央 kah 面頂有薄、光、閣有花樣 ê 雲絲。伊是 tī 宇宙中發光氣體真久長 ê 波痕，是側面向咱 ê。伊予編做 NGC 2736，伊搝長 ê 形體予伊得著這个足有名 ê 名，鉛筆星雲。這个 鉛筆星雲 有 5 光年長，800 光年 遠。毋過這干焦是 Vela 超新星殘骸 ê 小小一部份。Vela 超新星殘骸本身 ê 直徑有 100 光年長。自恆星延展 ê 屑仔雲 是 ùi 1 萬 1 千年前 爆炸 ê。上開始，這个 衝擊波 是用時速幾仔百萬年 ê 速度 leh 運動，了後才慢落來，kā 邊仔 ê 星際物質掃甲清清氣氣。Tī 這張狹頻 ê 闊幅 影像，紅色 kah 藍色分別表示 離子化 ê 水素 kah 酸素原子 ê 特徵發射光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Greg Turgeon & Utkarsh Mishra 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210414.html Powered by Firstory Hosting

參宿一 kah 火舌星雲 https://apod.tw/daily/20210412/ 是啥物 kā 火舌星雲照予光？Tī 獵戶 座 方向，離咱 1500 光年遠 ê 所在，有一个星雲。伊發出 ê 光 kah 塗粉 烏帶 tī 倒爿 to̍h 親像一葩燒滾滾 ê 火。毋閣，這葩火 足緊提著 酸素，並毋是產生這个發光 火舌 ê 原因。Tī 這幅圖上倒爿彼粒足光 ê 恆星，是 參宿一。伊是 獵戶座皮帶 siōng 東爿 ê 恆星。Kah 參宿一無仝，火舌星雲發出高能 ê 光，kā 火舌 內底 ê 電子 ùi 這片水素雲 ê 氣體激發。若是 電子 kah 離子化 ê 水素 重新複合，to̍h 會產生真濟 ê 色光。這張 火舌星雲 (NGC 2024）ê 影像是用三種 可見 光 帶 翕 ê。細節 ê 部份是 長時間 感光 ê 影像，這是 ùi 水素發出 ê 光。火舌星雲 是 獵戶座分子雲複合體 ê 一部份。伊是一个恆星形成區，內底閣有彼个有名 ê 馬頭星雲。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： 影像：Team ARO 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210412.html Powered by Firstory Hosting

烏洞合併 ê 時陣https://apod.tw/daily/20210411/烏洞相碰 ê 時陣會發生啥物代誌？這个極端 ê 狀況，其實 tī 真濟合併星系 kah 多星系統 ê 中心發生。這支 影片 是烏洞合併到上尾階段 ê 電腦動畫。伊嘛 kā 重力透鏡 效應 tùi 背景 星場 ê 影響展示予你看。烏色 ê 區域是 烏洞二重奏 ê 事件地平線。Tī in 外口彼輾，有背景星 leh 踅箍仔，in 彼 to̍h 是兩粒烏洞共同 ê 愛因斯坦環。所有 ê 背景星，毋若干焦 看會著 tī 愛因斯坦環 外口有影像，嘛看會著 tī 愛因斯坦環 內底有超過一个以上 ê 影像伴。落尾，兩粒 烏洞 to̍h 合併 矣。咱這馬知影烏洞合併上尾 ê 階段，會產生一个足強 ê 重力輻射，提供予咱一个 新 ê 方式 來 了解 咱 ê 宇宙。———這是 NASA Astronomy Picture of the Day ê 台語文 podcast原文版：https://apod.nasa.gov/台文版：https://apod.tw/今仔日 ê 文章：影像：Simulating Extreme Spacetimes Collaboration音樂：PiSCO - 鼎鼎聲優：阿錕翻譯：An-Li Tsai (NCU)原文：https://apod.nasa.gov/apod/ap210411.html Powered by Firstory Hosting

獨創號 ê 3D 影像https://apod.tw/daily/20210408/Tī 4 月 5 號這工，當 leh 進行火星日第 45 工任務。毅力號探測車面頂 ê 彩色立體攝影機 Mastcam-Z to̍h tùi 火星 ê 獨創號直升機 搝近 kā 翕一張矣。To̍h 是這張 3D 特寫（kā 你 ê 3D 紅／藍目鏡提來看 to̍h 知）。這是獨創號欲 展示伊 ê 科技 進前幾工翕 ê。伊準備欲 tī 薄薄 ê 火星大氣層，進行伊 tī 地球以外 ê 行星，第一擺 ê 動力飛行。試驗飛行 to̍h 排 tī 4 月 11，禮拜以後。咱會當看著獨創號 tī 火星表面 ê 烏影，伊 to̍h 用伊 ê 四支停車跤，家己一个停 tī 探測車輪仔 ê 跤跡邊仔。這台實驗直升機 ê 太陽能枋有充電電池。伊會當 tī 火星 足寒 ê 暗暝 繼續保持直升機 ê 溫度，而且閣會當予直升機動力去飛。電池 to̍h tī 直升機彼兩支 1.2 公尺（4 英尺）長、反向踅 ê 車葉仔面頂。———這是 NASA Astronomy Picture of the Day ê 台語文 podcast原文版：https://apod.nasa.gov/台文版：https://apod.tw/今仔日 ê 文章：影像：NASA, JPL-Caltech, MSSS, ASU音樂：PiSCO - 鼎鼎聲優：阿錕翻譯：An-Li Tsai (NCU)原文：https://apod.nasa.gov/apod/ap210408.html Powered by Firstory Hosting

醋山天頂 ê 火星 kah 畢宿星團https://apod.tw/daily/20210406/Tī 這个 kng-liu-liu ê 山頭，敢干焦有這欉孤單 ê 樹仔爾爾？上開始可能會叫是是按呢，毋閣咱來 kā 看較遠 leh！遐有一个 足無閒 ê 宇宙 等你來發現。實際上，咱代先會注意著 tī 樹仔倒爿彼粒 火星。這粒紅色行星，這馬是 NASA 毅力號探測車 ê 新厝。伊會當 tī 這個月 日頭落山 ê 時陣，tī 西爿 ê 地平線頂面看著。Tī 樹仔 ê 正爿是 畢宿星團。伊是一个足光 ê 星團，主要是由七粒藍色恆星組成 ê。這張相片 是 kā 幾若張無仝背景 kah 前景 ê 相片疊做一張 ê。逐張攏是 tī 頂個月初，開幾若點鐘久 ê 時間，tī 加拿大 Nova Scotia 省 Milford ê 醋山 ê 仝一位翕 ê。彼當陣，火星行足慢 ê。一暝過一暝，伊 to̍h 行 tī 遙遠 ê 七姊妹仔星團 頭前。後擺火星欲像今年三月按呢，tī 天頂行倚到 畢宿星團附近，to̍h 愛等到 2038 年 矣。———這是 NASA Astronomy Picture of the Day ê 台語文 podcast原文版：https://apod.nasa.gov/台文版：https://apod.tw/今仔日 ê 文章：影像：Kristine Richer音樂：PiSCO - 鼎鼎聲優：阿錕翻譯：An-Li Tsai (NCU)原文：https://apod.nasa.gov/apod/ap210406.html Powered by Firstory Hosting

面紗星雲：恆星爆炸了後 ê 煙光https://apod.tw/daily/20210405/像這款煙光 tī 咱銀河內底 ê 恆星攏會當看著。差不多 tī 7000 年前，有一粒恆星演化變做 超新星爆炸，賰 ê 殘骸 to̍h 是這个 面紗星雲。彼陣，脹大 ê 雲 to̍h kah 月眉形 ê 月娘 giōng 欲平光。彼當陣 ê 人，有幾若禮拜攏看會著這个光。這件代誌 tī 人類拄開始有 歷史記載 ê 時陣有記錄著。這个 超新星殘骸，現此時嘛叫做 天鵝環。伊已經 giōng 欲消失去矣！這馬 to̍h 愛用細台望遠鏡 tùi 天鵝 ê 星座（天鵝座） ê 方向 去看 才看會著。面紗 星雲 賰落來 ê 部份猶閣足大 ê。所以 to̍h 算是伊離咱有 1400 光年 遠, 伊猶是有五粒 月圓 遐爾大。這張影像 是 哈伯太空望遠鏡 kā 六張影像拼鬥起來 ê。這个闊度干焦有 2 光年闊，是脹大 ê 超新星 殘骸 ê 小小一部份爾爾。Tī 完整 ê 面紗星雲 影像內底，to̍h 算是 足頂真 ê 讀者 嘛無一定會當 分辨伊 ê 雲絲。———這是 NASA Astronomy Picture of the Day ê 台語文 podcast原文版：https://apod.nasa.gov/台文版：https://apod.tw/今仔日 ê 文章：影像：ESA/Hubble & NASA, Z. Levay音樂：PiSCO - 鼎鼎聲優：阿錕翻譯：An-Li Tsai (NCU)原文：https://apod.nasa.gov/apod/ap210405.html Powered by Firstory Hosting

NGC 3521： Tī 氣波內底 ê 星系https://apod.tw/daily/20210402/華麗 ê 捲螺仔星系 NGC 3521 是一个 tī 獅仔座 方向，離咱干焦 3500 萬年遠 ê 星系。Tùi 地球 ê 夜空來講，NGC 3521 是有較光，會使真簡單 to̍h 用細台望遠鏡揣著。毋閣伊煞定定去予業餘天文 ê 攝影落勾去。大部份 ê 人攏較愛翕獅仔座內底其他 ê 捲螺仔星系，像 M66 kah M65。毋閣，這張宇宙畫像遮爾媠，實在真歹無 kā 注意著。這个星系有 5 萬光年闊，伊 ê 運動產生 特徵 ê 花樣。伊 ê 不規則捲螺仔手骨面頂，縖一條 lè-sù，面頂有塗粉、粉紅仔色 ê 恆星形成區、kah 少年 ê 藍色星團。值得注意 ê 是，這張深空影像嘛看會著 NGC 3521 tī 一个足大 ê 氣波殼內底。這个殼可能是潮汐殘骸，是去予衛星星系搝散 ê 恆星流。這个衛星星系，是 tī 足久以前 kah NGC 3521 進行合併 ê。———這是 NASA Astronomy Picture of the Day ê 台語文 podcast原文版：https://apod.nasa.gov/台文版：https://apod.tw/今仔日 ê 文章：影像：讓受 - Eric Benson，處理 - Dietmar Hager音樂：PiSCO - 鼎鼎聲優：阿錕翻譯：An-Li Tsai (NCU)原文：https://apod.nasa.gov/apod/ap210402.html Powered by Firstory Hosting

M64：邪眼星系https://apod.tw/daily/20210329/有啥人知影是啥物款 ê 邪惡藏 tī 星系眼中央？哈伯知影！捲螺仔星系 M64 嘛知影！In 會 kā 咱鬥揣。Messier 64，又閣叫做邪眼星系抑是睏美人星系。伊中央彼粒目睭，看起來有淡薄仔邪氣。這是因為 tī 星系中央，伊 ê 恆星 kah 星際氣體攏踅仝一个方向，毋閣 tī 星系外沿煞 kah 內底踅倒反。這張 足詳細 ê 影像，是用踅地球 leh 行 ê 哈伯太空望遠鏡 翕 ê。看會著 tī M64 中心倚咱這爿，去予足濟塗粉雲 kā 閘著。面頂有 kah 恆星形成 敆做伙 ê 紅光水素氣體，敢若有祕密 tī 內底 ê 款。M64 離咱有 1700 萬 光年 遠。To̍h 是講，咱 chit-má 看著 ê 光，是 人類 kah 烏猩猩 ê 共同祖先 猶閣 tī 地球四界賴賴趖 ê 時代發出 ê 光。這粒塗粉滿滿是 ê 星系眼 kah 伊 奇怪 ê 轉踅方向，可能是 tī 十億年進前，兩粒無仝 ê 星系合併 ê 結果。———這是 NASA Astronomy Picture of the Day ê 台語文 podcast原文版：https://apod.nasa.gov/台文版：https://apod.tw/今仔日 ê 文章：影像：ESA/Hubble & NASA & the PHANGS-HST Team；感謝：Judy Schmidt音樂：PiSCO - 鼎鼎聲優：阿錕翻譯：An-Li Tsai (NCU)原文：https://apod.nasa.gov/apod/ap210329.html Powered by Firstory Hosting

泰坦：Kā 土星閘牢 ê 衛星https://apod.tw/daily/20210109/To̍h 親像地球仝款，土星上大粒 ê 衛星泰坦 嘛去予土星鎖牢，tùi 土星同步自轉矣。這張 拼鬥影像 是 2012 年 5 月 ê 時陣 Cassini 太空船 tī 土星 ê 後壁面翕 ê ，to̍h 是 tī 永遠看 袂著有環 ê 氣態巨行星 ê 彼爿面。泰坦是 太陽系 內底唯一一粒有厚厚 ê 大氣層 ê 衛星。嘛是太陽系內底，除了地球以外，唯一一粒定定 tī 表面有液體，而且 kah 地球仝款，是一个有 落雨 kah 蒸發循環 ê 所在。Tī Cassini 太空船面頂看，這粒直徑 5000 公里闊 ê 衛星 kā 土星 ê 環 kah 雲閘牢矣！你閣看會著泰坦高層大氣 ê 雲霧。Tī 中央附近 ê 暗沙崙區叫做 香格里拉。Cassini 太空船送去泰坦 ê Huygens 探測船，是 登陸 太空船 內底 離地球上遠 ê。伊上尾 to̍h tī 影像中央下跤 ê 倒爿安息。———這是 NASA Astronomy Picture of the Day ê 台語文 podcast原文版：https://apod.nasa.gov/台文版：https://apod.tw/今仔日 ê 文章：影像：NASA, JPL-Caltech, Space Science Institute音樂：PiSCO - 鼎鼎聲優：Gaga翻譯：An-Li Tsai (NCU)原文：https://apod.nasa.gov/apod/ap210109.html Powered by Firstory Hosting

NGC 1365：壯麗 ê 宇宙島https://apod.tw/daily/20210108/NGC 1365 這个棍螺仔星系差不多有 20 萬光年闊，是一个壯麗 ê 宇宙島。伊離 天爐座 干焦有 6000 萬光年遠，是咱足熟 ê 天爐座星系團 內底 真重要 ê 成員。佇這張遮爾媠閣 清楚 ê 彩色影像 內底，會當佇中央星系棍 ê 尾溜附近 kah 捲螺仔手骨 ê 所在，看著明顯閣反紅 ê 恆星形成區。嘛會當佇星系上光 ê 核心，看著塗粉暗帶 ê 詳細狀況。佇核心 ê 中央，有一粒超大質量烏洞。天文學家認為 NGC 1365 彼个明顯 ê 棍仔，是 星系演化 足重要 ê 角色，kā 氣體 kah 塗粉搝去恆星形成區滾絞，上尾攏予 中央彼粒烏洞 食食去。———這是 NASA Astronomy Picture of the Day ê 台語文 podcast原文版：https://apod.nasa.gov/台文版：https://apod.tw/今仔日 ê 文章：影像：Mike Selby, Leonardo Orazi音樂：PiSCO - 鼎鼎聲優：DD翻譯：An-Li Tsai (NCU)原文：https://apod.nasa.gov/apod/ap210108.html Powered by Firstory Hosting

小麥哲倫星雲https://apod.tw/daily/20210105/啥物是小麥哲倫星雲？伊其實是一个星系。葡萄牙 ê 航海家 麥哲倫 kah 伊 ê 船員，看著這箍 tī 南半球細塊又閣霧霧 ê 物件 ê 時陣，攏感覺 in 足奇怪 ê。麥哲倫這陣人 tī 十六世紀初，第一擺環遊 地球 ê 時陣，to̍h 已經有真濟時間來研究這个無熟似 ê 南半球夜空矣。對南半球 ê 觀星者 來講，這兩个現現 [立在] tī 遐 ê 奇怪 ê 天體，tī 西方文化 內底 to̍h 共號做麥哲倫 ê 雲。Tī 過去 ê 100 冬 內底，研究人員 kā 咱講，這款雲是 不規則矮星系，是咱 銀河 ê 衛星星系。這个 小麥哲倫星雲 差不多有 1 萬 5 千光年闊，而且內底閣有幾若億粒星。伊 to̍h tī 杜鵑 座，離咱差不多有 21 萬光年遠。伊比 銀河其他 ê 衛星星系 閣較遠，包括 to̍h 人馬座矮星系 kah 大麥哲倫星雲。這个 清楚 ê 影像 ê 正爿頂懸，是 tī 伊頭前 ê 球形星團，to̍h 號做 杜鵑座 47。———這是 NASA Astronomy Picture of the Day ê 台語文 podcast原文版：https://apod.nasa.gov/台文版：https://apod.tw/今仔日 ê 文章：影像：José Mtanous音樂：PiSCO - 鼎鼎聲優：Zhen-Kai Gao翻譯：An-Li Tsai (NCU)原文：https://apod.nasa.gov/apod/ap210105.html Powered by Firstory Hosting

M16：鴟鴞星雲 ê 內部https://apod.tw/daily/20201228/遠遠仔看，這規个形體看起來 to̍h 親像是一隻 鴟鴞。毋閣倚近 kā 看，這个 鴟鴞星雲 有一搭 較光 ê 所在，會使講是這區大 塗粉 烏殼中央 ê 窗仔門。Ùi 這个窗仔門看去，煞看著一个光映映 ê 工場，當咧製造規陣 開放星團。Tī 這个閬空，新 ê 恆星產生 ê 時陣，猶閣賰一寡 柱仔雲 kah 圓仔雲，in ê 成份 是暗塗粉 kah 冷 分子氣體。Tī 遮，已經看會著一寡少年 閣光 ê 藍光星 矣！In ê 光 kah 恆星風 kā 賰 ê 雲絲 kah 用氣體 kah 塗粉造 ê 雲牆，那燒那吹出去。這个鴟鴞 發射星雲 予標做 M16，離咱有 6500 光年 遠，大細有 20 光年闊，用 雙筒望遠鏡 uì 巨蛇 座 ê 方向去看 to̍h 看會著矣。這幅圖 是累積 12 點鐘久 ê 感光，koh 敆三種特別 ê 發射線：硫磺（紅色）、水素（黃色）、酸素（藍色）ê 影像合成 ê。———這是 NASA Astronomy Picture of the Day ê 台語文 podcast原文版：https://apod.nasa.gov/台文版：https://apod.tw/今仔日 ê 文章：影像：Nicolas Paladini音樂：PiSCO - 鼎鼎聲優：楊孟澤翻譯：An-Li Tsai (NCU)原文：https://apod.nasa.gov/apod/ap201228.html Powered by Firstory Hosting

鑽入、迵過、超越土星環https://apod.tw/daily/20210404/有四粒衛星 tī 這張影像 內底，你敢有法度 kā in 攏總揣著？代先咱來看 tī 背景上遠彼粒 Titan，伊是 土星 上大粒 ê 衛星，嘛是 太陽系 內底上大粒 ê 衛星之一。Tī 這粒永遠厚雲 ê 世界，頂面 ê 烏-sûn，是 北極極冠。紲落來咱來看 tī 前景上明顯 ê Dione 衛星，伊足光 ê。伊面頂攏是石坑 kah 長長 ê 冰崖。Tī 倒爿突出來尖尖 ê，是土星幾若个 展延 ê 環，包括彼个有深色 Encke 溝 ê A 環。Tī 正爿較遠 ê 彼粒是 Pandora 衛星，伊干焦 80 公里闊爾爾。伊會當 kā 土星 ê F 環 箍牢 ê。第四粒衛星 tī 佗位？你若是 tī 土星環內底 ê Encke 溝 看較詳細 leh，你 to̍h 會揣著一个點，伊其實是 Pan 衛星。雖然講這粒土星上細粒 ê 衛星干焦 35 公里闊爾爾，毋閣 Pan 衛星有大到會當 kā Encke 溝 內底 ê 粒子掃甲清氣溜溜。經過十外冬 ê 探索 kah 發現，Cassini 太空船 tī 2017 年 kā 伊 ê 燃料用欲煞矣。伊 to̍h 行落去土星 ê 大氣層，上尾 to̍h tī 內底 熔去。———這是 NASA Astronomy Picture of the Day ê 台語文 podcast原文版：https://apod.nasa.gov/台文版：https://apod.tw/今仔日 ê 文章：影像：Cassini Imaging Team, ISS, JPL, ESA, NASA音樂：PiSCO - 鼎鼎聲優：蔡老師翻譯：An-Li Tsai (NCU)原文：https://apod.nasa.gov/apod/ap210404.html Powered by Firstory Hosting

M87 中央烏洞 ê 偏振光https://apod.tw/daily/20210331/咱來再生 Carl Sagan ê 名言：「你若是欲造一个烏洞噴流，to̍h 愛先生一个磁場。」這个影像 是 tī 電波波段 偵測著 ê 內在自旋方向（偏振）。這个偏振是 ùi 一个踅烏洞 ê 足強 ê 磁場 產生 ê。這个烏洞 to̍h 是 長株圓星系 M87 中心 ê 超大質量烏洞。電波波段 ê 資料 是 ùi 事件地平線望遠鏡 (EHT) 偵測著 ê。伊是一組 kā 全世界 ê 電波望遠鏡資料敆做伙 ê 望遠鏡。這个偏振結構，是用電腦 kā 算出來 ê 流線圖。這馬 kā 疊 tī EHT tī 2019 年頭一擺發表 ê 彼个有名 ê 烏洞影像 面頂。這規个 3D 磁場實在是 足複雜 ê。初步 ê 分析結果表示，有一部份 ê 磁場 kah 一寡 吸積物質 同齊踅烏洞 leh 行，to̍h kah 當初時預測 ê 相-siâng。毋閣，閣有另外一个組成部份，敢若 ùi 烏洞 ê 坦徛方向離開。這个組成部份可能會當用來解說，物質是按怎袂落落來，顛倒噴出去變做 M87 ê 噴流。———這是 NASA Astronomy Picture of the Day ê 台語文 podcast原文版：https://apod.nasa.gov/台文版：https://apod.tw/今仔日 ê 文章：影像：Event Horizon Telescope Collaboration文稿：Jayanne English (U. Manitoba)音樂：PiSCO - 鼎鼎聲優：蔡老師翻譯：An-Li Tsai (NCU)原文：https://apod.nasa.gov/apod/ap210331.html Powered by Firstory Hosting

Andes 山脈面頂 ê 紅色精靈爍爁https://apod.tw/daily/20210330/Tī 天頂 ê 紅色雲絲是啥物？In 是真罕得看著 ê 一款爍爁。是差不多 30 年前才確認 ê，to̍h 號做 紅色精靈。最近 ê 研究發現，綴 tī 足強 ê 雲對地正電爍爁 ê 雷擊後壁，可能會有 紅色精靈 ùi 100 公尺大 ê 離子空氣 球生出來。In ùi 80 公里懸 ê 所在，用 10 葩 光速 ê 速度，ùi 天頂瀉落來。Liâm-mi 一陣離子氣體球 to̍h 衝去天頂。這張影像 是 智利 ê Las Campanas 天文台 tī 今年 ê 年頭，tùi 阿根廷 ê Andes 山脈 ê 天頂翕--ê。紅色精靈 出現 ê 時間，是 比一秒鐘閣較短。In 會當 tī 足強 ê 暴雷 ê 邊仔看著。———這是 NASA Astronomy Picture of the Day ê 台語文 podcast原文版：https://apod.nasa.gov/台文版：https://apod.tw/今仔日 ê 文章：影像：Yuri Beletsky (Carnegie Las Campanas Observatory, TWAN)音樂：PiSCO - 鼎鼎聲優：蔡老師翻譯：An-Li Tsai (NCU)原文：https://apod.nasa.gov/apod/ap210330.html Powered by Firstory Hosting

SuitSat 一號：一領自由浮 tī 太空 ê 太空衫https://apod.tw/daily/20210328/有一領太空衫 tī 15 年前浮 tī 國際太空站 外口。毋閣伊啥物代誌攏無做。逐家攏知影伊是去予 太空站 ê 船員 kā 捒出去 ê。這領衫號做 SuitSat 一號，是一領露西亞 ê Orlan 牌太空衫。內底櫼一大堆 舊衫 kah 一台會發射微弱信號 ê 電波發射機，予囥 tī 太空，踅地球 leh 行。Tī 電波信號意外變 弱進前，這領衫 攏總踅地球兩擺。毋閣 SuitSat 一號 猶是繼續每 90 分鐘踅地球一輾，一直到幾若禮拜後，tī 地球大氣層 燒去為止。這張相片 是這領無性命 ê 太空衫，tī 2006 年 ùi 太空站 浮出去 ê 時陣翕 ê。———這是 NASA Astronomy Picture of the Day ê 台語文 podcast原文版：https://apod.nasa.gov/台文版：https://apod.tw/今仔日 ê 文章：影像：ISS Expedition 12 Crew, NASA音樂：PiSCO - 鼎鼎聲優：阿錕翻譯：An-Li Tsai (NCU)原文：https://apod.nasa.gov/apod/ap210328.html Powered by Firstory Hosting

探索蝶鬚星系https://apod.tw/daily/20210327/Tī 南天 ê 烏鴉座 方向 6 千萬光年遠 ê 所在，有兩个足大 ê 星系當 leh 相碰。這兩个星系去予人編做 NGC 4038 kah NGC 4039。To̍h 算是 tī 這个已經相碰幾若億年 ê 災難現場，內底 ê 恆星嘛真罕得拄著。毋閣，星系內底大量 ê 分子氣體雲 kah 塗粉雲 定定會 tī 宇宙殘骸 ê 中央附近驅動 激烈 ê 恆星形成。這个予人感覺意外 ê 美麗景色有超過 50 萬光年闊。看會著內底有一寡新 ê 星團 kah 一寡物質，ùi 這幅圖中央 ê 事故現場，去予 重力潮汐力 擲到足遠 ê 所在。這張 遮爾清楚 ê 影像是 ùi 地面望遠鏡翕 ê。內底有狹頻資料，會當 tī 中央 ê 恆星形成區 看著 ùi 原子氣體發出 ê 特徵紅光。這規个外形拖出一个弓形結構，所以這對星系才會號做蝶鬚星系。———這是 NASA Astronomy Picture of the Day ê 台語文 podcast原文版：https://apod.nasa.gov/台文版：https://apod.tw/今仔日 ê 文章：影像：Bernard Miller音樂：PiSCO - 鼎鼎聲優：阿錕翻譯：An-Li Tsai (NCU)原文：https://apod.nasa.gov/apod/ap210327.html Powered by Firstory Hosting

Medusa 星雲https://apod.tw/daily/20210326/這个看起來有編織花樣 kah 蛇紋 ê 發光氣體雲絲，予伊得著這个足紅 ê 名：Medusa 星雲。伊嘛予人號做 Abell 21。這个 Medusa 星雲是一个足老 ê 行星形星雲。伊 to̍h tī 雙生仔座方向，離咱有 1500 光年遠。To̍h kah 神話 內底 ê 名仝款，這个星雲嘛有一个戲劇性 ê 轉變。Tī 行星形星雲 時期，其實是像太陽這款低質量恆星 演化 到上尾 ê 階段，ùi 紅巨星 轉變做燒滾滾 ê 白矮星。Tī 這个過程中，kā 伊 ê 外層氣體幌掉。Ùi 燒滾滾 ê 恆星發出 ê 紫外光 輻射，to̍h kā 星雲照予光。Tī 發光 ê 月眉形氣體中央彼粒足暗 ê 恆星，to̍h 是 Medusa 星雲演化尾期 ê 恆星。Tī 這張深空 ê 望遠鏡景色 內底，較暗 ê 雲絲嘛真清楚。伊 to̍h 湠到彼个較光 ê 月眉形氣體 ê 正爿 kah 頂懸去。Medusa 星雲差不多有超過 4 光年闊。———這是 NASA Astronomy Picture of the Day ê 台語文 podcast原文版：https://apod.nasa.gov/台文版：https://apod.tw/今仔日 ê 文章：影像：Josep Drudis音樂：PiSCO - 鼎鼎聲優：蔡老師翻譯：An-Li Tsai (NCU)原文：https://apod.nasa.gov/apod/ap210326.html Powered by Firstory Hosting

好奇號：火星日第 3048 工https://apod.tw/daily/20210325/Tī 毅力號 登陸火星進前，猶閣有一台好奇號。事實上，好奇號探測車 tī 2012 年 4 月 5 號 ê 時陣，完成第一擺 ê 天空吊車試驗，成功登陸火星。2021 年 3 月 2 號是好奇號 tī 這粒紅色行星，火星 ê 表面第 3048 工矣。這張 360 度全景圖，是好奇號探測車甲板面頂 ê Mastcam kā 好奇號 tī 火星 3048 工翕 ê 149 張相片 拼接起來 ê。內底有 23 張 結冰 ê 、薄薄 ê、懸懸 ê 雲，浮 tī 火星 ê 天頂。這个厚雲 ê 天色，是 kā 火星幾若工 ê 景色記錄起來，才用數位技術 kā 拼接起來 ê 全景圖。Tī 中央 ê，是一个幾若層 ê 、幾若-sûn ê Mercou 山。Tī 遠方倒爿 ê 彼粒山是 Sharp 山。伊是 ùi Gale 石坑底生出來 5 公里懸 ê 山。———這是 NASA Astronomy Picture of the Day ê 台語文 podcast原文版：https://apod.nasa.gov/台文版：https://apod.tw/今仔日 ê 文章：影像提供：NASA/JPL-Caltech資料處理：Elisabetta Bonora & Marco Faccin / aliveuniverse.today音樂：PiSCO - 鼎鼎聲優：阿錕翻譯：An-Li Tsai (NCU)原文：https://apod.nasa.gov/apod/ap210325.html Powered by Firstory Hosting

木星 ê 極光 kah 爍爁https://apod.tw/daily/20210324/是按怎木星 ê 兩極有遮濟爍爁？其實 伊 kah 地球 仝款，嘛有極光 kah 爍爁。Kah 地球無仝 ê 是，木星 ê 爍爁 一般會 tī 兩極附近發生。毋閣 地球大部份 ê 爍爁 是 tī 赤道發生--ê。為著欲了解 in 有啥物 無仝，NASA 這馬有一台踅木星 leh 行 ê Juno 太空船，已經觀測著足濟極光 kah 爍爁 ê 現象 矣。這張 影像 是 Juno ê 恆星參考元件 kha-mé-lah tī 2018 年 5 月 24 翕 ê。看會著木星北部 雞卵形 ê 極光 kah 幾若个光點 kah 光-sûn。正爿 ê 插圖是一个引人注目 ê 事件，是 木星 ê 爍爁 閃光。這是離咱上近 ê 木星 極光 kah 爍爁 ê 影像之一。Tī 地球（比木星離太陽閣較近），太陽 ê 光度有夠，會當家己予地球赤道產生比兩極閣較高溫 ê 大氣溫度，煞來驅動 亂流、風颱、kah 爍爁。毋閣 tī 木星 to̍h 毋是按呢矣。木星大氣 ê 溫度主要是 ùi 木星內部 來 ê（是木星形成賰 ê 能量）。這馬 ê 假設是講，太陽光 對木星赤道 ê 大氣加溫閣較強，煞予高層 大氣 ê 溫度變化變較少。所以 tī 赤道爍爁產生 ê 風颱才會變較少。———這是 NASA Astronomy Picture of the Day ê 台語文 podcast原文版：https://apod.nasa.gov/台文版：https://apod.tw/今仔日 ê 文章：影像：NASA, JPL-Caltech, SwRI文稿：Natalia Lewandowska音樂：PiSCO - 鼎鼎聲優：阿錕翻譯：An-Li Tsai (NCU)原文：https://apod.nasa.gov/apod/ap210324.html Powered by Firstory Hosting

Tī Duddo 石頭箍仔面頂 ê 火星https://apod.tw/daily/20210323/這寡石頭是 tī 遮 leh 創啥？有一个閣較有名 ê 石頭箍仔，叫做 Duddo ê 五粒石頭，to̍h tī 英格蘭 ê Northumberland。In to̍h tī 小可仔趨趨 ê 山坡地面頂，彼个開放 ê 空間。Tī 闊莽莽 ê 野外 行過一塊仔路 了後，to̍h 會 kā 你𤆬到一个 kah 人 平大粒 ê、奇怪 ê 石頭 ê 所在。In kah 邊仔 ê 石頭完全無仝。這寡軟 砂岩 ê 表面一溝一溝、一空一空，去予風吹甲嚴重 含梢。To̍h 敢若 4000 年前 to̍h kā 伊囥 tī 遮仝款。毋閣是按怎會囥 tī 遮？無人知影。這張影像是 kā 兩張 tī 仝一位翕 ê 連紲影像合成 ê。這是 tī 舊年十月一个天頂全天星 ê 暗暝翕 ê。彼當陣，地球 ùi 火星 ê 邊仔行過。所以這粒 紅色行星才會特別大 閣特別光。火星 tī 日頭落山 ê 時陣猶閣看會著。毋閣紲落來幾若個月，伊會愈來愈 倚近地平線。———這是 NASA Astronomy Picture of the Day ê 台語文 podcast原文版：https://apod.nasa.gov/台文版：https://apod.tw/今仔日 ê 文章：影像：Ged Kivlehan音樂：PiSCO - 鼎鼎聲優：蔡老師翻譯：An-Li Tsai (NCU)原文：https://apod.nasa.gov/apod/ap210323.html Powered by Firstory Hosting

Ùi 御夫座 kàu 獵戶座https://apod.tw/daily/20210322/Ùi 御夫座 kàu 獵戶座之間 ê 夜空有啥物？這幅影像 內底有足濟有名 ê 恆星 kah 星雲。這是 ùi 34 張獨立 ê 影像開超過 430 點鐘久 ê 時間感光，閣用數位合併 ê 方式 kā 疊做一張 ê。Ùi 倒爿頂懸 ê 御夫座（戰車 ê 運將）ê 方向開始，是媠甲親像一幅圖仝款 ê 火炎星星雲 (IC 405)。紲落來 ê 光弧，是咱 ê 銀河系，ùi 倒爿 ê 雙生仔座開始，湠 kàu 正爿 ê 牛犅座。內底有名 ê 星雲有 肚胿仔星雲、意大利麵星雲、猴頭星雲、海䖳星雲、圓錐星雲、kah 玫瑰星雲。Tī 影像 ê 正爿頂懸區 ê 獵戶座（拍獵--ê）方向，你會當看著 獵戶座 λ 環，伊是 Barnard 環 ê 半圓。猶閣有 馬頭星雲 kah 獵戶座星雲。Tī 獵戶座內底 kah 伊附近 有名 ê 恆星，ùi 倒爿 kàu 正爿是，柑仔色 ê 參宿四（拄仔好 tī 影像中央 ê 正爿），藍色 ê 參宿五（to̍h tī 伊 ê 面頂），獵戶座皮帶 ê 三粒星：參宿三、參宿二、kah 參宿一。彼粒足光 ê 參宿七，to̍h tī 正爿頂角。這个長長 ê 天景 袂 tī 天頂傷久，毋閣 到年中進前，攏會當 tī 暗頭仔看著這个景色。———這是 NASA Astronomy Picture of the Day ê 台語文 podcast原文版：https://apod.nasa.gov/台文版：https://apod.tw/今仔日 ê 文章：影像：Alistair Symon音樂：PiSCO - 鼎鼎聲優：阿錕翻譯：An-Li Tsai (NCU)原文：https://apod.nasa.gov/apod/ap210322.html Powered by Firstory Hosting

Antikythera 機械https://apod.tw/daily/20210321/無人知影 tī 2000 年前，咱敢有技術會當製造這款機械？相片內底 ê Antikythera 機械，這馬予人認為是人類史上 頭一台 電腦。伊是 tī 海底一隻 àu--khì ê 希臘 船頂予人揣著 ê。因為伊足複雜 ê，煞予人 kā 伊研究幾若十冬。到今，這台猶有幾若个部份，無人知影 伊 ê 功能是啥物。毋閣，ùi 這台機械 ê X-光 影像來 kā 看，伊內底有足濟 kah 時鐘相-siâng ê 齒輪。這上主要 ê 作用是欲製造一个好紮 ê、手發動 ê、以地球為中心 ê 太陽系儀。這台會當提來預測恆星 kah 行星紲落來欲行去佗位，嘛會當預測 月食 kah 日食 當時會發生。看會著 Antikythera 機械 上大 ê 齒輪芯已經腐蝕去矣！這粒芯有 13 公分闊。毋閣這 規台機械 有 33 公分懸，kah 一本冊欲平大。最近，現代 ê 電腦模擬 這台面頂欠缺 ê 零件。予咱會當 ùi 這台古早時代 遮爾厲害 ê 機械，做一台閣較完整 ê 複製品。———這是 NASA Astronomy Picture of the Day ê 台語文 podcast原文版：https://apod.nasa.gov/台文版：https://apod.tw/今仔日 ê 文章：影像：Marsyas, Wikipedia音樂：PiSCO - 鼎鼎聲優：蔡老師翻譯：An-Li Tsai (NCU)原文：https://apod.nasa.gov/apod/ap210321.html Powered by Firstory Hosting

獅仔座三重奏https://apod.tw/daily/20210320/Tī 三月 ê 春分 kah 北半球春天 ê 暗頭仔，會當看著這个足紅 ê 星群。In to̍h 是有名 ê 獅仔座三生仔。這三个華麗 ê 星系，to̍h tī 這个特別 ê 獅仔座 內底，拄仔好 tī 仝一个天文視野內底會當看著。To̍h 算是一般民眾用普通 ê 望遠鏡來 kā 看，in 嘛會使分出 NGC 3628（正爿），M66（倒爿面頂），kah M65（下跤）。In 攏是較大 ê 捲螺仔星系，毋閣看起來有淡薄仔無仝。因為 in ê 星系盤 tùi 咱 ê 視線方向來講，是敧無仝款 ê 方向。NGC 3628 嘛叫做美國割包星系。伊是一个足迷人 ê 側向星系，有一條塗粉烏帶 kā 伊蓬鬆蓬鬆 ê 星系盤切做兩爿。M66 kah M65 ê 星系盤攏趨有夠，予人看會著 in ê 捲螺仔結構。這三个星系 ê 引力交互作用有留一寡仔線索落來。包括潮汐尾溜 kah 彎曲 無平 ê 星系盤，閣有 kā 捲螺仔手骨伸出來 ê M66。這个華麗 ê 景色 tī 天頂有 1 度闊（兩粒月圓 ê 闊度）ê 範圍。若是用三重奏 ê 估算距離 3000 萬光年來 kā 算，這幅圖有超過 50 萬光年闊。毋免講，tī 遐彼粒足光 ê 前景星，是 tī 咱 ê 銀河內底。———這是 NASA Astronomy Picture of the Day ê 台語文 podcast原文版：https://apod.nasa.gov/台文版：https://apod.tw/今仔日 ê 文章：影像：Francis Bozon音樂：PiSCO - 鼎鼎聲優：蔡老師翻譯：An-Li Tsai (NCU)原文：https://apod.nasa.gov/apod/ap210320.html Powered by Firstory Hosting

Tī 中央 ê 紅外線波段內海仔https://apod.tw/daily/20210319/Tī 這張影像內底，紅外線影像看會著滿滿滿 ê 恆星。中央彼个內海仔星雲有 4 光年闊。可見光影像 主要會當看著發光 ê 氣體 kah 烏暗 ê 塗粉雲。毋閣 ùi 哈伯太空望遠鏡 ê 資料 建構出來 ê 紅外線影像，嘛會當看著恆星形成區 ê 中心，有四散 ê 新恆星。拄仔好 kah 咱銀河中心這个密密密 ê 背景星相比並。這个嘩嘩叫 ê 恆星托兒所，是去予一粒大質量 koh 少年 ê 恆星 Herschel 36 箍起來 kah 驅動 ê。伊 to̍h 是視野中央附近，彼粒足光 ê 恆星。Herschel 36 其實是幾若粒大質量恆星組成 ê 系統。是講，若是質量超過太陽 30 倍 ê 恆星，伊 ê 歲壽 to̍h 會比 1 百萬年閣較短。Tī 這个系統內底上大質量 ê 恆星，應該會當活 5 百萬年遐爾久。Kah 伊比起來，已經 5 0 億 歲 ê 太陽，紲落來會演化變做紅巨星。毋閣按呢伊 ê 歲壽 to̍h kan-na 賰 50 億年爾爾。這个內海仔星雲，嘛叫做 M8。伊 tī 4000 光年遠 ê 所在，to̍h tī 人馬座 ê 邊仔內底。———這是 NASA Astronomy Picture of the Day ê 台語文 podcast原文版：https://apod.nasa.gov/台文版：https://apod.tw/今仔日 ê 文章：影像版權：NASA, ESA, Hubble資料提供：MAST資料處理：Alexandra Nachman音樂：PiSCO - 鼎鼎聲優：蔡老師翻譯：An-Li Tsai (NCU)原文：https://apod.nasa.gov/apod/ap210319.html Powered by Firstory Hosting

英仙座分子雲 ê 星粉https://apod.tw/daily/20210318/這个星粉雲 to̍h 浮 tī 深空內底，tī 英仙座分子雲 方向 850 光年遠 ê 所在。Tī 這幅差不多有 2 度闊 ê 望遠鏡視野內底，看會著有足明顯反射光 ê 星雲。這个光是 ùi 藏 tī 雲內底 ê 少年恆星發出來 ê。Tī 中央有特徵藍色 反射星雲 NGC 1333，tī 正爿面頂是反射星雲 vdB 13 ，tī 中央面頂附近是罕得看著 ê 黃色反射星雲 vdB 12。恆星是 ùi 分子雲內底 形成 ê。In 大部份攏 tī 可見光波段去予掖甲四界攏是 ê 塗粉閘去。毋閣 tī NGC 1333 內底，咱猶是看會著 HH 天體發出 ê 紅色發射線。伊是 ùi 最近形成 ê 恆星產生 ê 噴流 kah 去予衝擊波激發 ê 發光氣體。這个混沌 ê 環境可能 kah 咱 ê 太陽 tī 45億年前形成 ê 時陣相仝。若是按照咱估計 ê 英仙座分子雲 ê 距離來 kā 算，這个宇宙景色差不多有 40 光年遐爾闊。———這是 NASA Astronomy Picture of the Day ê 台語文 podcast原文版：https://apod.nasa.gov/台文版：https://apod.tw/今仔日 ê 文章：影像：Kerry-Ann Lecky Hepburn, Stuart Heggie音樂：PiSCO - 鼎鼎聲優：阿錕翻譯：An-Li Tsai (NCU)原文：https://apod.nasa.gov/apod/ap210318.html Powered by Firstory Hosting

Ùi 金星 13 號看著 ê 金星表面https://apod.tw/daily/20210317/你若是徛 tī 金星，會當看著啥物？這張影像是 ùi 金星 13 號翕 ê。伊是一台 蘇聯 ê 登陸船。Tī 1982 年 3 月， 這台登陸船降落 ê 時陣，用 la̍k-khá-sàng kah 空氣擋仔，通過金星厚厚 ê 大氣層。這个青荒 ê 地景 to̍h tī 金星赤道 附近 ê Phoebe Regio 區，有平-pho-pho ê 岩石，闊莽莽 ê 地形，kah 空瑯瑯 ê 天色。Tī 倒爿下跤，有一台太空船 ê 穿透儀。這台是提來做科學測量--ê。Tī 儀器正爿彼塊淺色 ê，是彈出來 ê 鏡頭蓋 ê 一部份。這台強化 ê 金星太空船，會當 tī 氣溫 差不多 450 度，氣壓 是地球 ê 75 倍 ê 金星，擋兩點鐘久。雖然講 金星 13 號 ê 資料, tī 40 年前 to̍h 軁過內部 太陽系, 傳轉來地球。毋閣，處理數位資料，kah 合併 異常 ê 金星影像，到今猶閣 leh 進行中。最近 kā ùi ESA ê 金星高速 衛星太空船 ê 紅外線資料 分析了後，發現 chit-má tī 金星面頂，應該是有活 火山 tī lih。———這是 NASA Astronomy Picture of the Day ê 台語文 podcast原文版：https://apod.nasa.gov/台文版：https://apod.tw/今仔日 ê 文章：影像：Soviet Planetary Exploration Program, Venera 13資料處理 kah 版權：Donald Mitchell & Michael Carroll (有提著使用 ê 允准)音樂：PiSCO - 鼎鼎聲優：蔡老師翻譯：An-Li Tsai (NCU)原文：https://apod.nasa.gov/apod/ap210317.html Powered by Firstory Hosting

Messier 81https://apod.tw/daily/20210312/Messier 81 是 tī 地球天頂上光 ê 一个大閣 媠 ê 星系，伊 kah 咱 ê 銀河欲平大。 伊閣叫做 NGC 3031，嘛叫做 Bode 星系，是 tī 18 世紀予人發現 ê。 這个 大捲螺仔星系，會當 tī 北爿 ê 星座，大熊座（大隻熊），揣著。 Tī 這个 清楚閣詳細 ê 望遠鏡 景色內底，看會著 M81 光閣黃 ê 核心， 藍色 ê 捲螺仔手骨，粉紅仔色 ê 恆星形成區，kah 大片 ê 宇宙塗粉帶。 有一寡塗粉帶迒過星系盤（tī 倒爿中央），kah 其他有明顯 捲螺仔 特色 ê 星系無仝。 這个 突出 ê 塗粉帶，可能是 M81 kah 無 tī 這張影像內底 ê 厝邊星系 M82 互相倚近，才產生這个 掰袂離 ê 結果。 Tī M81 ê 大捲螺仔下跤，有一个較暗 ê，無規則 ê 衛星矮星系， Holmberg 9 號。 檢查 M81 內底 ê 變星，會當予 咱知影伊 ê 距離。 伊離咱有 1180 萬光年遠，是銀河外口 ê 星系。——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章：影像：Wissam Ayoub音樂：PiSCO - 鼎鼎聲優：彪彪翻譯：An-Li Tsai (NCU)原文：https://apod.nasa.gov/apod/ap210312.html Powered by Firstory Hosting

黃道光 kah 火星https://apod.tw/daily/20210311/三月 7 號日頭落山了後，tī Illinois 田庄仔 ê 夜空，有一條若有若無 ê 光帶猶閣 tī 這幅圖 ê 西爿 ê 地平線面頂。 這張相片是 tī 一个老農村翕–ê。 彼搭較光 ê，是黃道光。 Tī 地球北半球春天 ê 時陣，等日頭落山了後，to̍h tī 西爿看會著。 Tī 這个晴和 ê 暗暝，這條黃道光，敢若欲 kā 火星 kah 昴宿星團食去。 In to̍h tī 這間囥粟仔 ê 舊倉庫厝頂，這个天星滿滿是 ê 夜空 相拄。 黃道光是太陽光 tī 太陽系黃道面內底，去予星際塗粉粒 kā 散射造成 ê。 當然，太陽系 ê 行星攏行 tī 黃道面 附近，to̍h tī 黃道光帶內底。 毋過，黃道光 kah 火星可能足有關係 ê。 最近有一台 ùi 地球飛去 木星 ê Juno 太空船。 用伊提著 ê 星際塗粉 ê 資料 來 kā 分析，發現產生黃道光 ê 塗粉，可能是 ùi 火星來 ê。——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章：影像：Joshua Rhoades音樂：PiSCO - 鼎鼎聲優：彪彪翻譯：An-Li Tsai (NCU)原文：https://apod.nasa.gov/apod/ap210311.html Powered by Firstory Hosting

NGC 1499：加州星雲https://apod.tw/daily/20210310/加州皇后 ê 神祕島敢有 tī 太空中？可能無。 毋過這个分子雲拄仔好 kah 美國 加州 ê 外形有相-siâng。 咱 ê 太陽 to̍h 蹛 tī 銀河 ê 獵戶座手骨 內底，離 加州星雲 干焦差不多 1000 光年遠爾爾。 這个是發射星雲 ê 代表，嘛號做 NGC 1499，伊差不多有 100 光年 遐爾長。 Tī 這張 影像 內底，加州星雲上明顯 ê 光 to̍h 是紅色特徵光。 這是 水素 原子 kah 失去足久 ê 電子重新合併了後，閣去予高能 ê 恆星光 kā 離子化 了後，才發出 ê 色光。 這粒提供高能恆星光 ê 恆星，會 kā 大部份 ê 星雲氣體離子化。 伊 to̍h 是星雲正爿彼粒光閣高溫 ê 藍色恆星，英仙座 ξ。 Tùi 天文攝影師來講，加州星雲是一个定定 leh 翕–ê 目標。 伊會當用闊幅望遠鏡 tī 夜空 ê 英仙座 方向 揣著，離 畢宿星團 袂傷遠。——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章：影像：Yannick Akar音樂：PiSCO - 鼎鼎聲優：彪彪翻譯：An-Li Tsai (NCU)原文：https://apod.nasa.gov/apod/ap210310.html Powered by Firstory Hosting

IC 1318: Tī 氣體 kah 塗粉內底 ê 蝶仔星雲https://apod.tw/daily/20210316/Tī 鵜鶘星雲附近 ê 天鵝 座內底，有蝶仔形 ê 氣體雲 kah 邊仔 ê 雞母星。 這粒星叫做 天津一，to̍h tī 這張影像 ê 正爿。 Tī 這張高解析度影像 ê 中央，是編號做 IC 1318 ê 蝶仔星雲。 這个 tī 光氣體 kah 暗塗粉 中央錯綜複雜 ê 圖樣，是 星際風、輻射壓力、磁場、kah 重力之間複雜 ê 交互作用形成 ê。 Tī 這張望遠鏡影像 會當看著 IC 1318 ê 特徵發射線。 In 是離子化 ê 硫磺 原子、水素 原子、kah 酸素 原子，to̍h 是影像內底紅色、青色、kah 藍色 ê 所在。 這三色是 chit-má 上衝 ê 哈伯色盤。 這幅圖是蝶仔星雲 ê 一部份，有 100 光年 闊，離咱有 4000 光年遠。——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章：影像：Alan Pham音樂：PiSCO - 鼎鼎聲優：阿錕翻譯：An-Li Tsai (NCU)原文：https://apod.nasa.gov/apod/ap210316.html Powered by Firstory Hosting

火流星 ê 光 kah 聲https://apod.tw/daily/20210315/是哩！毋知你敢捌聽過流星 ê 聲？ 一般來講，流星實在是 傷遠 矣！ 咱是無法度聽著伊 ê 聲欸。 毋閣，一粒 流星 會當產生一个 離子化 ê 軌跡，伊會當 ùi 遠方反射電波信號過來。 你若是徛 tī 適當 ê 所在，可能 to̍h 會當 tī 你 ê la-ji-ò͘ 聽著一塊仔 遠方廣播電台送過來 ê 聲，毋是 kan-na 靜態影像 爾爾。 Tī 這支 影片 內底，大粒流星 ê 軌跡，反映做聲音，ùi 遠方 ê 電波發射器送過來，去予敏感 ê 電波接受器掠著。 仝一个時間，這个 光-sûn 嘛去予 全天攝影機 翕著。 Tī 影片內底，四粒 火流星 明亮 ê 光跡 迒過天頂。 第一个火流星 ê 痕跡 tī 美國 新墨西哥州 Lamy ê 所在翕著。 紲落來，tī 每一幅靜態影像，即時影片嘛翕著每一粒 流星行過 天頂。 這馬 kā 影像 kah ùi 電波反射 ê 聲音記錄敆做伙。 Kā 流星 ê 軌跡投影 tī 地球，會當揣著伊 kah 地球 相挵 ê 地點（若是有）。 毋閣若是 kā 伊 ê 軌跡 投影轉去 天頂，to̍h 會揣著 伊 ê 老爸老母，彗星抑是小行星。——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章：影像：Thomas Ashcraft (Radio Fireball Observatory)音樂：PiSCO - 鼎鼎聲優：阿錕翻譯：An-Li Tsai (NCU)原文：https://apod.nasa.gov/apod/ap210315.html Powered by Firstory Hosting

Tī 瑞典天頂看起來敢若旗仔 ê 極光https://apod.tw/daily/20210314/伊干焦出現一目-nih，to̍h 親像一支 50 公里懸 ê 長長 ê 旗仔。 Tī 2015 年三月中，能量足強 ê 日冕物質噴出現象 直接 tùi 地球磁場 ê 閬空送過去。 予地球產生一个 tī 最近幾若年來，上強 ê 地磁風暴。 這个結果煞予咱 tī 地球磁極 附近幾若个國家 ê 天頂，看會著 足闊 ê 極光現象。 這張影像是 tī 瑞典 ê Kiruna 城鎮翕–ê。 Tī 遮 ê 天頂有特別直 ê 極光 kha-tián。 這个 青色 ê 發射光是 tī 地球大氣層 ê 低層，紅色 ê 發射光是 tī 頂層幾若公里懸 ê 所在。 是講咱猶毋知影這个足罕得看著 ê 茄仔色極光，是 ùi 佗位來–ê。 毋過咱可能會 tī 比青色極光閣較低海拔 ê 所在，看著反常 ê 藍色極光。 閣 tī 頂層疊閣較懸 ê 紅色極光。 是講，這馬才拄仔過 太陽極小期。 紲落來，地球頂懸有 極光 ê 彩色 暗暝 嘛會愈來愈濟。——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章：影像：Mia Stålnacke音樂：PiSCO - 鼎鼎聲優：阿錕翻譯：An-Li Tsai (NCU)原文：https://apod.nasa.gov/apod/ap210314.html Powered by Firstory Hosting

超級 kha-mé-lah ê 目標 Ma’azhttps://apod.tw/daily/20210313/Tī 火星面頂 一改 ê 雷射聲 聽起來是啥物款–ê？ 這無需要去問禪師。 咱 kan-na 需要來聽一下仔 火星面頂第一个拍出 ê 雷射聲波記錄 to̍h 知影。 毅力號任務 tī 第 12 个火星日（3 月 2 號）彼工，to̍h 用探測車桅尾彼台超級 kha-mé-lah 儀器，ùi 3.1 公尺遠 ê 所在 tùi 一粒叫做 Ma’az ê 石頭拍 30 改 ê 信號。 伊 ê mài-khù kā 超級 kha-mé-lah ê 高速雷射銃發出 ê 無連紲 ê 聲音記錄起來。 一寡石頭去予雷射銃拍甲蒸發去，煞來 tī 火星薄薄 ê 大氣層內底產生衝擊波。 這款聲音會當提供目標物 ê 物理結構 ê 線索。 這台 超級 kha-mé-lah tùi Ma’az 區域特寫 ê 範圍有 6 公分闊。 Ma’az tī 美國原住民 Navajo ê 語言 內底，to̍h 是火星 ê 意思。——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章：影像：NASA / JPL-Caltech / LANL / CNES / CNRS音樂：PiSCO - 鼎鼎聲優：阿錕翻譯：An-Li Tsai (NCU)原文：https://apod.nasa.gov/apod/ap210313.html Powered by Firstory Hosting

毅力號 360 度影像：奇怪 ê 石頭 kah tī 火星走揣生物https://apod.tw/daily/20210309/彼敢是 化石？ 看 毅力號探測車 最近翕–ê 一寡影像，敢若 leh 揣寶物仝款。 無一定你會變做第一个揣著 石化 ê 骨頭，有 古早時代植物 印記 ê 岩石，抑是真正揣著生物捌活 tī 火星 ê 證據 ê人。 毋過，雖然講咱嘛是有可能會揣著像骨頭這款物件。 大部份 ê 外星生物學家 認為，咱閣較有可能用 毅力號 ê 化學分析儀 揣著 古早時代 ê 單細胞 微生物 ê 生物化學殘骸。 上主要 ê 原因 是，多細胞有機物 ê 演化愛用足濟酸素，這馬 tī 火星 早-to̍h 已經用煞 矣。 猶就是講，無人知影 會揣著啥物！ 所以你會使用你佮意 ê 方式來耍這幅毅力號影像。 這是 會當搝近看 ê 360 度影像。 是毅力號降落 tī Jezero 石坑 ê 所在，tī 影像內底看會著岩石 kah 山嶺。 就算是 NASA ê 科學家 嘛 leh 研究毅力號 ê 影像。 你若是有看著啥物 奇怪 ê 物件，請 kā 伊鋪 tī 社交媒體 頂懸。 若是 科學家感覺你 ê 眼光袂䆀，按呢 NASA 可能嘛會注意 著你。——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章：影像：NASA, JPL-Caltech, ASU, MSSS音樂：PiSCO - 鼎鼎聲優：阿錕翻譯：An-Li Tsai (NCU)原文：https://apod.nasa.gov/apod/ap210309.html Powered by Firstory Hosting

NEOWISE 彗星 ê 三條尾溜https://apod.tw/daily/20210308/是啥物予 NEOWISE 彗星產生這个特別 ê 紅色尾溜？是 鈉！ Tī 2020 年熱天 ê 時陣，NEOWISE 彗星出現媠甲 予人感動 ê 景色。 有白色 花逝 ê 塗粉尾溜 kah 藍色 貓貓 ê 離子尾溜。 一寡 tùi 色光較敏感 ê 影像會有特別 ê 紅色尾溜。 分析了後知影, 這个第三條尾溜 ê 色光，是 ùi 鈉發射來–ê。 Tī 7 月初 ê 時陣，NEOWISE 彗星 去予較光 ê 太陽光照予燒。 氣體內底有足濟 ê 鈉原子，可能會 ùi 彗星核釋放出來。 紲落來會 ùi 紫外光 提著電子，閣去予 太陽風 吹出來。 這个影像 是 7 月中 tī 法國 Brittany 翕–ê，看會著紅色 ê 尾溜。 彗星 ê 鈉元素尾溜 以前捌看過，毋過 足罕得看。 這个尾溜 tī 7 月底 to̍h 消失矣。 現此時 彗星 C/2020 F3 (NEOWISE) 已經 失去光彩，伊 ê 尾溜攏無去矣。 伊這馬已經行倚到 木星 軌道附近，欲轉去外部 太陽系 ê 路 lih。 後一擺閣轉來 ê 時陣，已經是 7000 年以後 ê 代誌矣。——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章：影像：Nicolas Lefaudeux音樂：PiSCO - 鼎鼎聲優：阿錕翻譯：An-Li Tsai (NCU)原文：https://apod.nasa.gov/apod/ap210308.html Powered by Firstory Hosting

Tī 紅外線 ê 鴟鴞星雲 ê 柱仔雲https://apod.tw/daily/20210307/新 ê 恆星 tī 鴟鴞星雲內底產生矣！ Tī 實密 ê 氣體 kah 塗粉 ê 柱仔雲 內底，重力收縮產生新 ê 恆星。 這寡新形成 ê 足光 ê 恆星，in 足強 ê 輻射 kā 邊仔 ê 物質滾予燒。 這个影像 是 ùi 哈伯太空望遠鏡 tī 近紅外線翕–ê。 近紅外線 會 kā 大部份厚塗粉雲看予透，毋閣 這款柱仔雲 tī 可見光 看袂透。 這个 遮爾大 ê 結構 有幾若 光年 闊，去予人叫做是 創生之柱。 鴟鴞星雲 kah 開放星團 M16 鬥陣，離咱有 6500 光年 遠。 伊 tùi 細台望遠鏡來講是一个真簡單 ê 目標。 是 tī 分做頭尾兩爿 ê 巨蛇座 尾（蛇 ê 尾溜）ê 方向，厚-tut-tut ê 星雲 ê 所在。——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章：影像提供：NASA, ESA, Hubble, HLA; 資料處理：Luis Romero音樂：PiSCO - 鼎鼎聲優：阿錕翻譯：An-Li Tsai (NCU)原文：https://apod.nasa.gov/apod/ap210307.html Powered by Firstory Hosting

火山爆發頭頂 ê 天星https://apod.tw/daily/20210303/Etna 火山 已經爆發幾若十萬年矣！ Tī Italy Sicily 島 ê 這个火山，會產生一公里懸 ê 火山熔岩噴泉。 Etna 火山毋但是 地球 面頂 活動力上強 ê 火山 之一，嘛是上大 ê 火山之一。 伊 ê 山盤 有 50 公里闊，懸度有 3 公里懸。這張相片 是頂禮拜翕–ê，火山 ê 熔岩衝懸，燒滾滾 ê 熔岩 to̍h ùi 火山外口流落來。 衛星 ê 痕跡 出現 tī 火山 ê 頭殼頂，古早時代 ê 天星 to̍h 點 tī 遠方 ê 天頂。 這个火山爆發是遮爾強，附近 ê 機場嘛愛關起來，才袂予飛龍機飛倚去這个危險 ê 熔岩噴泉。 這張影像 ê 前景 kah 背景是用仝一台 kha-mé-lah tī 仝一个所在 連紲翕的。——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章：影像：Giuseppe Vella音樂：PiSCO - 鼎鼎聲優：蔡老師翻譯：An-Li Tsai (NCU)原文：https://apod.nasa.gov/apod/ap210303.html Powered by Firstory Hosting

獨創號：Tī 火星 ê 細台直升機https://apod.tw/daily/20210302/你若是會當 tī 火星 leh 飛，會是啥款？ NASA 可能 tī 頂個月 毅力號登陸 ê 時陣達成這个目標。 這台探測車有 kah 一台會飛–ê 細台朋友，叫做 獨創號，小名是 Ginny。 Ginny 是一台 kah 烘麭–ê 彼台平大–ê 直升機。 伊有四支躼跤 kah 兩支閣較長（1.2 公尺長）ê 車葉仔。 雖然講 Ginny 遮爾細台，毋過伊是 仝型飛龍機 內底 ê 第一个，猶無人 kah 伊會比–leh。 等 in tī 四月份安搭好勢了後，kah-車平大台 ê 毅力號（小名是 Percy）to̍h 會離開，予 Ginny 較大 ê 空間，開始伊 歷史上第一擺飛。 Tī 這張藝術插圖 內底，Ginny ê 長車葉仔 會予伊 會當飛懸 到 火星薄薄 ê 大氣層 kah 探索毅力號附近 ê 動力。 雖然講 獨創號 飛袂遠，毋過伊是未來太陽系飛行機器人 ê 原形。 將來 in 毋但會飛過 火星，閣會飛過 泰坦。——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章：影像：NASA, JPL-Caltech, Mars 2020 - Perseverance音樂：PiSCO - 鼎鼎聲優：蔡老師翻譯：An-Li Tsai (NCU)原文：https://apod.nasa.gov/apod/ap210302.html Powered by Firstory Hosting

毅力號開始行矣！https://apod.tw/daily/20210306/到火星 Jezero 石坑了後，毅力號 tī 3 月 4 號 to̍h 開始四界踅踅咧。這个清楚 ê 影像 是 ùi kah 車平大台 ê 探測車面頂 ê Navcam kha-mé-lah 翕–ê。會當看著 車輪 tī 火星塗行過 ê 痕跡。為著欲予毅力號 tī 這粒紅色行星面頂運作順利， 第一擺先駛差不多有33 分鐘久。這个短短 ê 試驗是成功 ê。毅力號向前徙 4 公尺，踅 150 度，閣倒退攄 2.5 公尺。這馬停 tī 另外一个新–ê 停車位，to̍h 叫做 Octavia E. Bulter 登陸點。雖然講探測車第一擺出門 kan-na 行 6.5 公尺，毋過 未來應該 逐工攏會當行 200 公尺以上。——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章：影像：NASA, JPL-Caltech, Mars 2020音樂：PiSCO - 鼎鼎聲優：阿錕翻譯：An-Li Tsai (NCU)原文：https://apod.nasa.gov/apod/ap210306.html Powered by Firstory Hosting

有淡薄仔親像火星https://apod.tw/daily/20210305/這个行星 ê 表面 有淡薄仔親像 火星。 毋過 伊真正是地球啦！ 這个數位拼接細粒行星計畫 ê 360 度拼接圖，是 tī 智利 San Pedro ê Atacama 沙漠翕–ê。 Tī 地平線面頂，圓厝頂內底 ê 望遠鏡，to̍h 利用這个所在有名 ê 烏暗閣清楚 ê 夜空咧翕。 這是 tī 12 月初翕–ê。 華麗 ê 銀河 弧 to̍h 180 度 迒 tī 這个細粒行星 ê 地平線面頂。 天頂閣有明顯 ê 獵戶座。 Tùi 北半球 ê 觀星者來講，有一个熟似 ê 星座 倒頭栽，伊 to̍h 是獵戶座。 伊 tī 12 月 ê 時陣，會 kah 南半球 ê 大小麥哲倫星雲相對面。 毋過這个紅色行星，其實是 tī 這个細粒行星 ê 个夜空 內底，上光 ê 黃色燈塔。——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章：影像：Robert Barsa音樂：PiSCO - 鼎鼎聲優：阿錕翻譯：An-Li Tsai (NCU)原文：https://apod.nasa.gov/apod/ap210305.html Powered by Firstory Hosting

Ti 金牛座 ê 火星https://apod.tw/daily/20210304/Eng-暗你會當 tī 天頂 看著火星。 伊這馬 sī 毅力號探測車 in 兜。 現此時這粒紅色行星，拄仔好行到金牛座 ê 所在，to̍h tī 七姊妹仔，mā 會使講是昴宿星團，ê 附近。 事實上，這个 深空、闊幅 ê 景色，是 tī 3 月 3 號火星 kah 昴宿星團相拄頭 ê 時陣翕 ê。 Tī 影像中央 ê 火星，親像是一个 tī 天頂發黃光 ê 燈塔。 伊離美麗 ê 藍色星團干焦差不多 3 度 ê 角距離遠爾爾。 Kah 火星 ê 色光抑是光度會比並 ê 是，金牛座 ê Alpha 星，畢宿五。 伊是一粒紅巨星，to̍h tī 這幅圖 ê 倒爿下跤。 伊 kah 較遠 ê 畢宿星團 仝一个視線方向，是伊 ê 前景星。 另外閣有一寡仔較暗 ê，毋知你 ê 目睭敢看會著。 有一个烏閣厚塗粉 ê 星雲，to̍h tī 大質量 ê Perseus 分子雲邊仔。 閣有一个 tī 正爿頂懸足足足紅 ê NGC 1499，加州星雲。——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章：影像：Petr Horalek / Institute of Physics in Opava音樂：PiSCO - 鼎鼎聲優：阿錕翻譯：An-Li Tsai (NCU)原文：https://apod.nasa.gov/apod/ap210304.html Powered by Firstory Hosting

飛過金星https://apod.tw/daily/20210225/有一个探索內部太陽圈 kah 日冕 ê 任務 tī 2020 年 7 月 11 ê 時陣，用 NASA Parker 太陽探測儀 面頂 ê 闊幅 kha-mé-lah 翕著這張 遮爾媠 ê 景色。這是金星 tī 離咱 1 萬 2 千 4 百公里遠 ê 所在翕 ê 景色。這个太空船當咧進行七擺 飛過太陽系內行星 重力輔助飛行 ê 第三擺。重力輔助飛行是利用倚近金星 ê 方式，改變探測船 ê 運行軌道，予伊上尾會當 tī 2020 年尾行到離太陽表面 6 百萬公里近 ê 所在。予人感覺趣味 ê 是，側面 kha-mé-lah 敢若是 ùi 雲內底偷偷仔看，煞予咱看著一个烏影。彼搭 to̍h tī 金星表面 上大 ê 高原 Aphrodite Terra。行星外沿 ê 光邊，應該是 tī 頂層大氣受著激發 ê 酸素原子重新組合做分子，才發出 ê 夜光。Tī 這張影像內底 ê 光-sûn kah 抓痕，應該是高能帶電粒子 kah 塗粉 tī kha-mé-lah 附近反射太陽光造成 ê。地球 ê 觀星者 可能會注意著 tī 這張影像正爿下跤幾若粒熟似 ê 天星，in to̍h 是獵戶座 ê 皮帶 kah 劍。——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章：影像：NASA, JHUAPL, Naval Research Lab, Guillermo Stenborg and Brendn Gallagher音樂：PiSCO - 鼎鼎聲優：彪彪翻譯：An-Li Tsai (NCU)原文：https://apod.nasa.gov/apod/ap210225.html Powered by Firstory Hosting

哈伯 hip–ê 捲螺仔星系 M66https://apod.tw/daily/20210224/看著老朋友 ê 新造型總是會感覺心適。 這張遮爾媠 ê，用 哈伯太空望遠鏡 hip–ê 厝邊 ê 捲螺仔星系 M66，to̍h 是按呢。 這个中央有一个細支星系棍 ê 捲螺仔星系，是 獅仔座三生仔星群 ê 成員之一。 這是一个離咱 3000 萬光年遠 ê 星系群，內底有三个星系。 這个獅仔座三生仔 tùi 細台望遠鏡來講，是一个足有人緣 ê 目標。 因為 M66 kah 伊 ê 星系伴，M65 kah NGC 3628，攏 tī 附近，互相 ê 角距離 差不多 kah 月圓 ê 大細欲平闊。 這張 M66 ê 影像 是 哈伯 hip–ê，是為著欲 揣出 恆星形成 kah 分子氣體雲 之間 ê 關連。 看會著真清楚 ê 影像，有 足光 ê 藍光星，tī 外沿捲螺仔手骨閃閃爍爍 ê 粉紅仔色離子水素雲，閣有內底藏足濟 恆星形成 ê 塗粉烏帶。——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章：影像提供：NASA, ESA, Hubble, Janice Lee資料處理 kah 版權：Leo Shatz文稿：Karen Masters音樂：PiSCO - 鼎鼎聲優：彪彪翻譯：An-Li Tsai (NCU)原文：https://apod.nasa.gov/apod/ap210224.html Powered by Firstory Hosting

NGC 2244：玫瑰星雲 ê 星團https://apod.tw/daily/20210221/Tī 玫瑰星雲 ê 中心有一个足光 ê 開放星團 kā 星雲照甲足光 ê。伊 to̍h 是 NGC 2244，內底 ê 恆星是一百萬年前才 ùi 外圍 ê 氣體形成 ê。這張 tī 一月翕 ê 影像是 kā 足濟張感光 ê 影像敆特別色光 ê 影像疊起來 ê。硫磺是豬肝紅，水素是青色，酸素是藍色。有翕著中心區域足濟詳細 ê 影像。Ùi 星團 ê 成員星吹出來 ê 高溫恆星風，沓沓仔 kā 星團中心 ê 氣體 kah 塗粉絲吹予空，kā 外沿已經有夠複雜 ê 環境舞佮閣較複雜。這个玫瑰星雲 ê 中心，量起來差不多有 50 光年闊。離咱有 5200 光年遠。用雙筒望遠鏡 tùi 麒麟座 to̍h 會當看著。——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章：影像：Don Goldman音樂：PiSCO - 鼎鼎聲優：阿錕翻譯：An-Li Tsai (NCU)原文：https://apod.nasa.gov/apod/ap210221.html Powered by Firstory Hosting

火星毅力號 ê 火星第零工https://apod.tw/daily/20210219/Tī 經過 203 工 ê 行星間旅行，閣經過驚惶 七分鐘，毅力號總算是登陸火星矣！確定伊有成功登陸 tī Jezero 石坑了後，南加洲 ê NASA 噴射推進實驗室（JPL）控制中心 to̍h tī 太平洋時間 2 月 18 中晝 12:55（台灣時間 2 月 19 透早 4:55）宣佈這个好消息。Kah 車平大台 ê 火星探測車登陸了後，tī 火星第零 工 ê 任務，to̍h 是隨用伊頭前倒爿彼支避障 kha-mé-lah 翕第一張低解析度 ê 相片。這台送去紅色行星 ê 探測車，雄心 pu̍t-pu̍t。伊 kha-mé-lah 面頂 ê 保護蓋猶袂提落來，咱會使 tī 規个火星表面 ê 影像內底，看著毅力號 ê 烏影。——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章：影像：NASA, JPL, Mars 2020音樂：PiSCO - 鼎鼎聲優：阿錕翻譯：An-Li Tsai (NCU)原文：https://apod.nasa.gov/apod/ap210219.html Powered by Firstory Hosting

瑞士 ê Alps 山，火星 ê 天空https://apod.tw/daily/20210218/這張是 tī 2 月 6 號翕 ê。這个白雪雪 ê 山頭是 tī 地球瑞士中部 ê Melchsee-Frutt 附近。這个 tī 下晡反紅 ê 天色 kah 反藍 ê 日光，kah 火星 ê 天色 仝款。當然，兩个世界 攏是仝一粒太陽。Ùi 火星來看，太陽看起來 kan-na 有 tī 地球看起來 ê 一半光，寸尺嘛 kan-na 賰三份二。Tī 火星表面足細粒 ê 塗粉粒 to̍h 浮 tī 火星薄薄 ê 大氣層內底，這 to̍h 是 kā 火星變紅 ê 氧化鐵。In 會吸收藍光，所以 火星 ê 天空 才會反紅。毋閣，tī 較細粒、較暗 ê 火星太陽附近，向前行 ê 散射猶是會 kā 太陽光變較藍淡薄仔。一般來講，地球厚厚 ê 大氣層會大力散射藍光，所以天空才會是藍色 ê。毋閣 tī 2 月 6 號，有 足厚 ê 塗粉雲 ùi Sahara 沙漠，吹過地中海，來到瑞士 ê Alps 山，kā 太陽變暗。予這下晡 ê 天色，變甲 kah 火星 ê 天空仝款。隔轉工，to̍h 賰白雪崁 tī 紅色 ê 沙塗面頂矣！——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章：影像：Jens Bydal音樂：PiSCO - 鼎鼎聲優：阿錕翻譯：An-Li Tsai (NCU)原文：https://apod.nasa.gov/apod/ap210218.html Powered by Firstory Hosting

太陽光柱 kah 頂切線弧https://apod.tw/daily/20210217/這毋是一个一般 ê 太陽光柱。兩禮拜前 ê 一工，tī 美國 Rhode Island 洲 Providence 城，有一个 kha-mé-lah sàng tī 日頭 peh 起來了後，ùi 伊 ê 窗仔看出去，煞突然掣一趒！這个予人驚甲戇去 ê 景色是 太陽光柱 產生 ê，面頂 to̍h 親像 kā 葵扇展開 按呢。太陽光柱是 ùi 太陽 發出來 ê，實在是真罕得看著。咱知影伊是太陽光 反射 ùi 地球大氣層 落落來、leh 振動 ê 六角盤仔 形 冰 造成 ê。另外一方面，咱嘛知影頂 切線弧 是太陽光屈折落落來 ê 六角柱仔 形 冰 造成 ê。去拄著 太陽光柱 kah 頂切線弧 相連 ê 景色實在是足無簡單 ê。拄開始 ê 時有做一寡仔分析，看到底是發生啥物代誌。一个主流 ê 理論是講，太陽光柱 嘛會 tī 落落來 ê 柱仔冰內底，用足複雜 kah 特殊 ê 方式製造出來。是講，無講你袂相信，這款 真罕得看著 ê 現象，竟然有法度閣看著一擺。這是因為 kha-mé-lah sàng 反應緊，kha-mé-lah to̍h 囥佇伊 手機仔 邊仔，才翕著 ê。——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章：影像：Mike Cohea音樂：PiSCO - 鼎鼎聲優：阿錕翻譯：An-Li Tsai (NCU)原文：https://apod.nasa.gov/apod/ap210217.html Powered by Firstory Hosting

毅力號：七分鐘到火星https://apod.tw/daily/20210216/欲安全降落火星有偌困難？這件代誌困難到 登陸失敗 比成功閣較濟。後一擺企圖登陸是 tī 這禮拜四（2021 年 2 月 18）。上主要 ê 問題是，火星 ê 大氣層 實在是厚甲無法度當做伊無。你若 boăi chhap 伊，伊 to̍h 會 kā 你 ê 太空船 熔去。另外一方面，大氣層傷薄，la̍k-khá-sàng 無啥路用，太空船會摔歹去。所以，tī 這个影片 內底 ê 說明有講，毅力號登陸器會拍開一个足大 ê la̍k-khá-sàng 來減速。紲落來閣會用火箭。若是攏有順利，上尾 to̍h 會用 天空吊車 浮 tī 地面頂懸，才 kā kah 車平大台 ê 毅力號探測車 用索仔 kā 降 lŏe 地面。這聽起來敢若淡薄仔痟痟。毋閣 2012 年 好奇號探測車 嘛是用差不多仝款 ê 方式 kā 伊 囥 tī 火星面頂。Ùi 大氣層入去，到碰著地面，差不多愛 7 分鐘久 ê 時間。所有 ê 協調攏愛 ùi 車頂 ê 電腦來控制。因為火星傷遠矣啦！無法度進行高速 ê 互動通訊。這个時陣，tī 地球 ê 人 干焦會使等。等到咱聽著登陸成功 ê 消息為止。頂禮拜，阿聯酋 (UAE) ê 希望號太空船 已經開始踅火星運轉矣。一工後，中國 ê 天文一號任務 嘛開始矣。In 可能會 tī 紲落來幾若個月安排 in 家己 ê 探測船登陸火星。——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章：影像：NASA, JPL音樂：PiSCO - 鼎鼎聲優：阿錕翻譯：An-Li Tsai (NCU)原文：https://apod.nasa.gov/apod/ap210114.html Powered by Firstory Hosting

Tī 兩台星際飛龍機頭頂 ê 月娘https://apod.tw/daily/20210222/Tī 月球 ê 彼爿面有啥物？有 星際飛龍機。In 是 SpaceX 開發 ê 一款會當發射閣轉來地球 ê，會當重複使用 ê 火箭。伊代先做貨機 leh 用，上尾是欲 kā 人類 ùi 地球 送去太空。相片內底 ê 兩台火箭是 SN9 kah SN10。這是一月 tī 德州 Boca Chica ê 發射台翕 ê。兩台火箭 to̍h tī 月圓 ê 下跤。星際飛龍機 tī 伊 sṳ-tián-lè-sù ê 外殼內底裝一台用 液態甲烷發動 ê iăn-jín。SN9 tī 二月初做 發射試驗，結果袂䆀。Kan-na 一个內部火箭 tī 動力減弱 ê 階段失敗爾爾。SN10 會繼續 地面試驗。而且會 tī 二月底進行發射試驗。——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章：影像：John Kraus音樂：PiSCO - 鼎鼎聲優：彪彪翻譯：An-Li Tsai (NCU)原文：https://apod.nasa.gov/apod/ap210222.html Powered by Firstory Hosting