NASA 逐工一幅天文圖 APOD Taigi

天頂有一个足大--ê、用天星做 ê 星門，你一工會經過伊兩擺。這个星門實際上是咱 ê 銀河系，是地球 ê 自轉予你叫是講，你是去 hŏng 捒 tùi 伊下底過--ê。咱 銀河 ê 中央帶 是一條 tī 天頂去 hŏng 搝長--ê、暗暗 ê 光帶，你愛 離開繁華 ê 夜都市，到燈光無閃閃爍 ê 所在，才看會著。毋閣你若是 tī 像這款 烏暗 ê 所在，翕一張 長時間感光 ê 闊幅相片，按呢欲看著銀河 ê 中央盤，就變做是一件真簡單 ê 代誌。這是一張 數位合成相片，是 tī 仝一暗用仝一台 kha-mé-lah 翕幾若張相片才 kā 鬥做一張--ê。因為這是用 立體投影 ê 方式，銀河才會看起來干焦是一个 大型 ê 圓形入口。咱 ê 銀河 就 親像是一个彎弓形 ê 星門。Tī 星門內底彼个較暗 ê 光帶是 黃道光，彼是日光反射 太陽系 內底 ê 塗粉 造成 ê 光。前景是 智利 ê 高原沙漠。遐 ê 地形坎坎坷坷，面頂閣有 仙人掌 kah 焦--去 ê 石頭。遮離 El Sauce 天文台 kah 當咧起 ê Vera Rubin 天文台 袂講蓋遠。是講 Vera Rubin 天文台按算欲 tī 2024 年 開始日常運作。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220817/ 影像：Maxime Oudoux 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220817.html Powered by Firstory Hosting

咱 ê 地球敢捌 ùi 流星風行過？有呢！而且咱定定看著 in 成做 流星雨 ê 形。所有流星 ê 寸尺差不多攏 kah 沙 平大粒。In 是 ùi 踅太陽咧行 ê 彗星抑是小行星落落來 ê 石霎仔，會繼續以長株圓軌道踅太陽行。咱 ê 地球 kah in 是踅 仝一粒太陽，所以咱 tī 太空中，會去拄著這寡仝款 踅太陽咧行 ê 石霎仔流。In 若是出現 tī 地球天頂，因為時間咧行，所以 in 就會成做一个 流星風。這寡流星會 kā 地球大氣層 照予光，毋閣 in ê 性命嘛定定到遮就結束矣。咱 ùi in ê 光跡 倒揣轉去，會當 tī 天頂揣著一點，就叫做 輻射點。這張合成相片 是 tī 7 月底 寶瓶座 δ 南流星雨 上濟彼陣，踮突尼西亞 Zriba El Al 古早以前 ê 庄仔 Berber 庄，開超過 2 工 ê 時間翕--ê。輻射點就 tī 相片正爿遐。是講 幾若工前，咱地球才拄仔拄著另外一个 閣較有名 ê 流星風上強彼工，就是 英仙座流星雨。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220816/ 影像：Makrem Larnaout 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220816.html Powered by Firstory Hosting

土衛一 Mimas 是土星 ê 細粒衛星，伊 ê 直徑才 400 公里闊，毋閣伊有一个直徑 130 公里大 ê Herschel 隕石坑，是規个太陽系內底上大 ê 隕石坑。Cassini 機器人太空船 tī 2010 年踅土星咧行。伊飛過這粒小型 冰世界 1 萬公里近 ê 時陣，有紀錄著 這个不得了 ê 景色：遮爾細粒 ê 衛星，有遮爾大 ê 隕石坑。這个影像資料利用假色加強對比，而且較倚咱這爿、去予舂甲較深 ê 地形，有用小可仔無仝色做記號。按呢會當予 Herschel 隕石坑，展示閣較清楚 ê 地景。無仝色應該是地表 ê 組成成份無仝，這可能是因為 土衛一 Mimas 以前 捌去予舂甲糜糜卯卯。是講 土衛一 Mimas 若是拄著 比挵出這个直徑 130 公里大 閣較大 ê 衝擊事件，可能會予這粒 土星 ê 細粒衛星，規粒 毀滅去。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220813/ 影像：Cassini Imaging Team, ISS, JPL, ESA, NASA 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220813.html Powered by Firstory Hosting

踮西班牙 La Palma 島 ê Roque de los Muchachos 天文台，是歐洲北方天文台成員之一。伊內底有一台 MAGIC 望遠鏡，主鏡是直徑 17 公尺闊 ê 多鏡片 望遠鏡。Tī 2021 年 8 月 11 這工，望遠鏡 ê 鏡面反射天星滿滿 ê 夜空景色。MAGIC 望遠鏡 ê 全名是 Major Atmospheric Gamma Imaging Cherenkov，大型大氣 Gamma-光 顯像 Cherenkov 型望遠鏡系統。這台望遠鏡會當看著高能 gamma-光 挵著地球頂層大氣 ê 時陣，予空氣中 ê 粒子流產生 tī 光學波段 短短 ê 爍光。咱 ê 目睭是會當沓沓仔看清楚烏暗所在 ê 景色。這款 kā 一塊一塊細塊鏡鬥做伙 ê 望遠鏡，會當提供咱足讚 ê 夜空景色。鏡內底反射 ê 景色，是咱銀河系內底 ê 恆星 kah 星雲。是講 tī 細塊鏡組成 ê 望遠鏡後壁，較低地平線 ê 方向，是英仙座。這工拄仔好去拄著逐年攏會出現 ê 英仙座流星雨，所以才會翕著這个戲劇性 ê 夜景。除了望遠鏡，閣有 ùi 英仙座流星雨 輻射點 射出來 ê 流星光巡。今年 ê 英仙座流星雨 拄著 流星上濟彼工，會閣 tī 8 月 13 彼幾工，毋閣 英仙座流星 會去拄著月圓時，按呢欲看清楚流星是有較拚。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220811/ 影像：Urs Leutenegger 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220811.html Powered by Firstory Hosting

咱若是離開地球會看著啥物？這个詳細景色捌去予 信使號太空船 翕過。信使號太空船是欲去 水星 ê 太空船，伊飛去水星 ê 過程中，捌 tī 2005 年 幌轉來地球。佇這个 縮時攝影 影片內底，咱看會著地球那飛遠，那咧自轉。去予太陽照予光 ê 彼爿地球是 遮爾光，背景星煞看無啥有。信使號 機器人 太空船 這馬當咧踅 水星，伊最近才 完成水星表面 ê 頭一張全球地圖。有當時仔，信使號太空船 會 看倒轉來 咱 ê 地球。信使號太空船是少數地球製造，毋閣 永遠袂轉來 地球 ê 物件。信使號上尾 ê 任務，會踮 水星表面 墜落。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220809/ 影像：NASA/JHU Applied Physics Lab/Carnegie Inst. Washington 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220809.html Powered by Firstory Hosting

天頂 ê 北美洲星雲 會當做地球 ê 北美洲大陸 袂當做 ê 代誌：做恆星！而且，kah 去予地球限制 ê 大陸比起來，這个較光--ê、看起來親像是 中美洲 kah 墨西哥 ê 星雲，實際上是氣體、塗粉、kah 新恆星 ê 燒眠床，咱 kā 叫做是 天鵝座雲牆。這張 主題相片 內底 看會著恆星形成雲牆，伊去予 光閣少年 ê 恆星 照予光、閣去予侵蝕去，而且閣有 一部份藏 tī 伊產生 ê 烏暗 塗粉 內底。相片內底 ê 北美洲星雲 (NGC 7000) 有 15 光年 闊，伊離咱有 1500 光年遠，就 chhāi tī 天鵝 ê 星座 (天鵝座) 內底。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220815/ 影像：Johan Bogaerts 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220815.html Powered by Firstory Hosting

Messier 16 (M16) 嘛叫做鴟鴞星雲，伊是一个 200 萬歲 ê 少年星團，tī 會生出新恆星 ê 塗粉 kah 發光氣體雲內底。這張相片有記錄著這區 ê 美麗細節，伊面頂 ê 色彩，是用多彩 ê Hubble 色盤疊出來--ê。Hubble 太空望遠鏡 tùi 這區恆星形成複合體 ê 特寫，予這个 宇宙雕塑 變做足出名--ê。這个景色就親像是 象管，嘛會當叫做 創生之柱。這个 ùi 中央生出來--ê，厚塗粉、幾若光年長 ê 柱仔雲，是當咧進行重力收縮，未來會形成新恆星 ê 區域。星團內底 ê 高能輻射會 kā 伊附近 ê 物質侵蝕去，落尾會予內底 ê 新恆星顯露出來。Ùi 中央倒爿 有較光發射線 ê 塗粉山龍延伸出去 ê 柱仔雲，是另外一个厚塗粉 ê 恆星形成區，伊就叫做 鴟鴞星雲的仙女。M16 離咱有 7000 光年遠，是一个用雙筒千里鏡 抑是 細台天文望遠鏡 就會當看著 ê 目標。伊就 tī 天頂 厚星雲、去予分做頭尾兩爿 ê 巨蛇座尾（蛇 ê 尾溜）遐。這張鴟鴞星雲 ê 望遠鏡肖像差不多有 70 光年闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220812/ 影像：Charles Bonafilia 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220812.html Powered by Firstory Hosting

1716 年，英國天文學家 Edmond Halley 注意著「Tī 天頂無月娘 ê 晴和暗暝，咱會當用目睭直接看著這款霧霧 ê 天體」。是講，M13 這馬去 hŏng 認為是武仙座內底 大牌--ê，就叫做大球形星團。伊是北天上光 ê 球形星團。若是有親像這款遮爾清楚 ê 望遠鏡景色，咱就會當翕著這个美麗星團內底，幾若百萬粒恆星矣。這个星團離咱有 2 萬 5000 光年遠，星團內底 ê 恆星就攏櫼 tī 直徑 150 光年闊 ê 區域內底。咱行到 星團核心差不多 3 光年闊 ê 立方體內底，就會當揣著 100 粒恆星。予你做一个參考，kah 咱太陽上倚 ê 恆星，離咱就愛 4 光年遠矣。這張影像內底 上光 ê 部份，差不多就是實櫼 ê 星團核心。這張半中闊視野 ê 背景有足濟遙遠星系，嘛包括 tī 倒爿頂懸 ê NGC 6207。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220804/ 影像：Joan Josep Isach Cogollos 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220804.html Powered by Firstory Hosting

恆星是 ùi 實密烏暗 ê 分子雲 內底生出來--ê。毋閣紲落來，恆星會 kā 這寡分子雲，變做巨大閣複雜 ê 塗粉雕塑。恆星提來雕塑分子雲 ê 家私，是 高能光 kah 高速 恆星風。這寡產生 ê 熱量，會 kā 烏暗分子 塗粉 雲蒸發，嘛會造成四箍圍仔 ê 水素 氣體四散閣發紅 光。這張相片 內底是一个欲完成 ê 新開放星團，叫做 IC 1590。伊就 tī 發射星雲 NGC 281 內底 複雜 ê 星際塗粉結構 邊仔。根據 NGC 281 ê 外形，伊閣有一个名，就叫做 小精靈 星雲。倒爿頂懸 ê 塗粉雲去予分類做 Bok 雲球，這是因為伊未來可能會發生 重力崩塌 形成新恆星。小精靈星雲離咱有 1 萬 光年 遠，就 chhāi tī 仙后座 ê 方向遐。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220810/ 影像：Douglas J. Struble (Future World Media) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220810.html Powered by Firstory Hosting

Tī 宇宙深空這个紛亂 ê 內海仔星雲 內底，有發光星際氣體 kah 烏暗塗粉雲 組成 ê 山龍。內海仔星雲 嘛叫做 M8，這个恆星形成區離咱有 5000 光年遠。是講伊 tùi 觀星團 來講是一个足熱門 ê 目標。伊 tī 人馬座 ê 方向，就 tī 咱銀河系 ê 中心。伊有足明顯 ê 紅色發射線，是離子化 ê 水素原子 kah 游離電子複合，發出 ê 光。內海仔星雲這个驚奇 ê 深空景色，差不多有 100 光年闊。中央正爿彼个足光、足實櫼、漏壼形 ê 氣體，是去予 大質量少年恆星 ê 極端恆星風 kah 高能輻射 kā 氣體離子化，雕出這个形體--ê。雖然 這張相片 有 kā 開放星團 NGC 6530 內底足濟粒恆星 攏用數位處理 kā 刣掉矣，毋閣實際上，in 猶 浮 tī 星雲內底。In 才拄 tī 內海仔星雲內底形成，差不多才幾若百萬歲爾爾。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220808/ 影像：Sameer Dhar 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220808.html Powered by Firstory Hosting

彼个 ùi 仙女座星系面頭前捽過 ê 青色光跡是啥物？是流星啦！這張相片是 tī 2016 年翕--ê，本底是欲翕 仙女座星系。是講彼當陣 嘛是 英仙座 流星 雨 上濟 ê 時，有一粒深空 ê 細粒星石，拄仔好 ùi 咱 銀河系 遙遠 ê 星系伴 面頭前捽過。這粒細粒 流星 干焦開一秒鐘 ê 時間就行過 10 度闊 ê 天區。流星入來到 地球大氣層 是足猛--ê，予 伊 tī 天頂爍 幾若擺。流星會發 青光，是因為有一部份 ê 氣體蒸發 發光--ê。雖罔講這个時陣 翕著--ê 流星應該是 英仙座流星，毋閣 ùi 相片內底流星軌跡方向來判斷，敢若較成是 寶瓶座 δ 南流星雨。這个 流星雨 上濟 ê 時間，應該是 tī 幾若禮拜進前才著。無拄好，英仙座流星雨 上濟 ê 時陣是幾工後，時到會去拄著月圓，夜空會足光--ê。按呢 今年 ê 流星 愛比夜空閣較光 才看會著。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220807/ 影像：Fritz Helmut Hemmerich 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220807.html Powered by Firstory Hosting

Kā 你 ê 3D 目鏡提來，囥佇這粒 貓-chiù-chiù ê 火星衛星，火衛一 Phobos，ê 相片頂懸。這張相片是用 ESA 火星快車號太空船 頂懸 ê 高解析度立體 kha-mé-lah tī 2004 年翕--ê。是 ùi 火星衛星表面 200 公里懸 ê 所在翕--ê。這張迷人 ê 立體浮雕景色，是 火衛一 Phobos 面對火星彼爿。這粒衛星看起來就親像是小行星，相片有 kā 伊去予挵甲糜糜卯卯 ê 表面翕出來。這寡 神祕 ê 窟仔 有幾若百公尺闊，可能 kah 倒爿彼个大隕石坑，Stickney 隕石坑，去 hŏng 挵出來有關。Stickney 隕石坑差不多有 10 公里闊，是講 火衛一 Phobos 上闊 ê 部份嘛才 27 公里爾爾。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220806/ 影像：G. Neukum (FU Berlin) et al., Mars Express, DLR, ESA 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220806.html Powered by Firstory Hosting

美麗 ê 三叉星雲會提來做 宇宙對照 ê 研究。伊嘛叫做 M20，chhāi tī 厚星雲 ê 人馬座方向，離咱差不多有 5000 光年遠。三叉星雲是咱銀河盤面頂 ê 一个恆星形成區。伊有三種無仝款 ê 天文星雲：紅色 發射星雲主要是水素原子 ê 發射線，藍色 反射星雲 主要是塗粉反射恆星光來--ê，烏暗星雲 是厚塗粉 ê 剪影。毋閣紅色發射區去予閘光 ê 塗粉帶分做三片，所以伊才會得著三叉星雲 這个名。這張是有名 ê Hubble 太空望遠鏡 tùi 這區 ê 特寫。Tī 發射星雲中心 正爿頂懸 ê 雲柱 kah 噴流，是新形成 ê 恆星 kā 雕出來--ê。三叉星雲差不多有 40 光年闊。伊傷暗矣，咱目睭無法度直接看著。伊 tī 咱 ê 天頂差不多 kah 月娘平大。這个望遠鏡景色拄仔好有翕著開放星團 M21，就 tī 相片正爿下跤邊仔遐。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220805/ 影像：Vikas Chander 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220805.html Powered by Firstory Hosting

是啥物 tī 貓眼星雲邊仔產生這个無四常 ê 雲暈？無人知影。咱知影 ê 是，貓眼星雲 (NGC 6543) 是天頂上出名 ê 行星形星雲 之一。雖罔講相片 中央 彼个足光 ê 對伨結構 hŏng 印象足深 ê，毋閣這張相片主要是欲予逐家看伊 ê 外層雲暈，這差不多有 3 光年 闊。行星形星雲 以早去 hŏng 認為講，伊是像太陽這款恆星行到 性命 上尾 ê 坎站。毋閣最近有揣著一寡行星形星雲有 脹大 ê 雲暈，這可能是 咱猶毋是蓋清楚 ê 恆星演化 早期，拄 kā 邊仔 ê 物質褪掉 ê 款。是講 行星形星雲這个階段，去 hŏng 認為講 會擋 1 萬年左右。天文學家估計講，貓眼星雲 雲暈 ê 外層雲絲彼部份，可能有 5 萬到 9 萬歲。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220803/ 影像：Bray Falls 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220803.html Powered by Firstory Hosting

是按怎土星哪會遮爾大粒？毋是啦！相片內底--ê，是 月娘 去予 地球 ê 雲閘 tī 頭前啦！月娘這馬是月眉形--ê，毋閣咱會看著規粒月娘，是因為伊反射 地球光，嘛叫做 殕光。太陽 直接 kā 月球 ê 腹肚底照予光，成做一个 月眉形。這就表示講，太陽這馬一定是 tī 地平線下底，這張相片是 tī 日出進前翕--ê。這張 會予人看兩擺 ê 相片是 tī 2019 年 12 月 24 翕--ê。兩工後，月娘會 ùi 日頭面頭前趨過，產生 日食。前景 ê 電火是 ùi 瓜地馬拉 ê 小鎮來--ê，伊 to̍h tī Pacaya 大火山 ê 後壁。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220802/ 影像：Francisco Sojuel 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220802.html Powered by Firstory Hosting

Tī 龍骨座星雲內底，恆星 kah 塗粉咧比賽，結果是恆星贏矣！講較詳細咧，是新做出來 ê 大質量恆星，發出高能光 kah 恆星風，kā 做伊 ê 塗粉 蒸發、散射去。這是 龍骨座星雲 內底，一个叫做 神祕山 ê 所在。面頂彼个雲柱看起來是烏烏 ê 塗粉組成--ê，毋閣其實大部份攏是 ùi 清氣 ê 水素 氣體組成--ê。這款塗粉雲柱其實是比空氣閣較薄。毋閣 in 出現 ê 時陣看起來會親像是 山脈，是因為較少量 ê 星際 塗粉 袂透光。這張相片是 Hubble 太空望遠鏡 翕--ê，中央彼區是龍骨座，大細差不多是 3 光年 闊，離咱差不多有 7500 光年遠。閣幾若百萬年，這寡恆星就會 完全勝利，kā 邊仔規个塗粉山攏 蒸發 了了。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220801/ 影像來源：NASA, ESA, Hubble 資料處理：Javier Pobes 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220801.html Powered by Firstory Hosting

Kā 你 ê 3D 目鏡 提來，咱來 ùi 月球軌道來看這个立體景色。這个 3D 浮雕影像是 ùi 兩張相片做出來--ê (編號是 AS11-44-6633 kah AS11-44-6634)。相片是 太空人 Michael Collins tī 1969 年 參加 阿波羅 11 號任務 ê 時陣翕--ê。阿波羅 11 號有配 peh 升節火箭，to̍h 叫做 鴟鴞號。伊紲落來會愈飛愈懸，tī 7 月 21 這工 kah 踅月球 ê 指揮艙會合。坐 tī 鴟鴞號 內底--ê 是 Neil Armstrong kah Buzz Aldrin，in 是頭一組 tī 月球面頂行路 ê 人。月球表面 較暗 較平彼區是 Smythii 海，伊是 tī 月球面對地球彼面 ê 上東爿，就 tī 月球赤道下底。Tī 月球地平線後壁彼粒，是 咱美麗 ê 地球。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220730/ 影像來源：Apollo 11, NASA 立體影像：John Kaufmann (ALSJ) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220730.html Powered by Firstory Hosting

是按怎這个星系有一个藍星閃閃 ê 環？這是美麗 ê 島宇宙 Messier 94，伊就 tī 北天星座 獵犬座 ê 方向，離咱干焦 1500 光年遠爾爾。對 地球 ê 天文學家來講，這个星系足搶市--ê。伊是一个正向 ê 捲螺仔星系，大細有 3 萬 光年 闊，伊 ê 捲螺仔手骨掃過大星系盤 較倚外口彼爿。毋閣 Hubble 太空望遠鏡 ê 視野 無遐爾大，干焦會當翕著 M94 中央區 7000 光年闊 ê 範圍爾爾。這張 特寫 看會著星系中心實櫼閣金金 ê 星系核、內部 明顯 ê 塗粉帶，kah 少年大質量恆星組成 ê 藍色光環。環內底 ê 恆星應該攏比 1000 歲閣較少年，表示講 M94 這个 星爆 星系，這馬去予星際氣體激著，當咧進行速度足緊 ê 恆星形成活動。這个有藍色恆星 ê 圓箍仔波，應該是去予內底咧轉踅--ê、長株圓分佈 ê 物質 ê 引力 kā 驅動了後，向外口湠出去--ê。因為 M94 離咱算近--ê，所以 天文學家 會當對星爆環 ê 細節，看較詳細咧。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220731/ 影像：ESA/Hubble & NASA 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220731.html Powered by Firstory Hosting

SOFIA 是 平流層紅外線天文台，是 ùi 一台波音 747SP 飛龍機改--ê。內底有囥一台 大台 ê 反射式望遠鏡，欲飛到平流層去 lih。地表 ê 大氣層 kā 99 葩 ê 紅外線攏擋 tī 外太空。這台飛龍機有通載觀測設備，peh 到地球大氣層頂懸，予研究者會當 ùi 地球任何所在做觀測。Tī 7 月 17 ê 科學任務 內底，天文台飛入去到南極 ê 極光區。紐西蘭 Otago 博物館館長，嘛是天文學家 Ian Griffin，tī 天文台面對南方 ê 時陣，ùi 右舷 翕著這个景色。老人星 tī 南方暗暝 ê 南極極光 kha-tián 頂懸，閃閃爍爍。天文台這擺 飛到 紐西蘭 ê 上南爿，差不多是南緯 62 度 ê 所在。是講真不幸，等伊停踮教堂 ê 時陣，天氣煞變甲足害--ê，SOFIA 煞去予創歹去，愛修理。所以本底 tī 南半球 ê 一寡任務只好取消矣！ ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220729/ 影像：Ian Griffin (Otago Museum) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220729.html Powered by Firstory Hosting

這張設計好勢 ê 夜空景色內底，有一欉老欉樹仔，伊 ê 枝骨伸甲長長長，敢若欲去摸著地球 ê 北天極 矣。這張是 tī 中國 新疆 西北爿 Yiwu 沙漠 ê 楊樹樹林 翕--ê。是 kā kha-mé-lah 固定 tī 三跤馬頂懸，連紲 tùi 天頂感光，成做縮時攝影 ê 合成相片。美麗 ê 天星軌跡成做光弧，證明講地球逐工攏綴伊家己 ê 自轉軸咧踅。咱若是 kā 自轉軸搝較長咧，伊就會指向 夜空 內底 這寡仝心圓弧 ê 中心。Tī 北極 足光 ê 彼粒北極星，是北半球 ê 夜空攝影師 kah 天文導航者 ê 好朋友。因為北極星 kah 天球 ê 北極點是足倚--ê。你當然嘛會當 ùi 這張光批內底 樹仔椏伸出去 ê 方向 揣著伊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220728/ 影像：Jeff Dai (TWAN) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220728.html Powered by Firstory Hosting

這張望遠鏡景色 ê 頂懸是南方，有翕著 月娘晨昏線 kah 月球南方坎坎坷坷 ê 高地。這張月景是 7 月 7 號翕 ê，拄仔好拄著 頂半月 ê 月相。太陽光 ùi 正爿較低角度 ê 方向照過來。Tī 這區 較少年 ê Tycho 隕石坑 kah 較老 ê Clavius 隕石坑 ê 天色嘛欲光矣。Tī 中央倚倒爿下跤，有較懸 坑仔墘--ê，是較少年 ê Tycho 隕石坑。伊差不多才 1 億歲爾爾，直徑有 85 公里闊。中央 ê 山尖有 2 公里懸，這个隕石坑 ê 坑仔墘，反射較光 ê 太陽光。另外較暗 ê 烏影區，是較平 ê 地表。這个 ùi 隕石挵著產生 ê Tycho 隕石坑 噴出來 ê 石屑仔，會 tī 月圓前後，變做一个 足出眾 ê 隕石坑。In tī 月球倚地球這面，產生足清楚 ê 放射形光巡。這个光巡系統差不多有規爿月娘遐爾大。實際上，阿波羅 17 號 ê 登陸地點，離 Tycho 隕石坑 差不多才 2000 公里遠。Tī 遮有揣著一寡物質，可能是 ùi Tycho 隕石坑噴出來 ê 物件。Tī 月球倚地球這爿，有一个上老上大 ê 隕石坑，叫做 Clavius 隕石坑。伊 ê 直徑有 225 公里闊，就 tī Tycho 隕石坑 ê 南方（這張相片 ê 頂懸）。Clavius 隕石坑 上早以前去予隕石挵出來 ê 放射形系統，嘛 tī 足久以前就 ui--去矣。較老隕石坑 ê 坑仔墘較無完整，本底較平 ê 地表，tī Clavius 隕石坑形成了後，嘛因為有新 ê 隕石落落來，這馬已經去予較新較細 ê 隕石坑疊 tī 頂懸矣。這个 tī 烏影區 較老 ê Clavius 隕石坑內底，較少年隕石坑 ê 坑仔墘，反射月球面頂透早 ê 貓霧光，產生幾若條狹狹 ê 光弧。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220716/ 影像：Eduardo Schaberger Poupeau 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220716.html Powered by Firstory Hosting

這張設計好勢 ê 望遠鏡景色是 tī 6 月 13 翕--ê，有記錄著 ùi Slovania 共和國東爿 ê Lubovna 城堡 peh--起來 ê 月圓。攝影師離城堡 ê 牆圍有 3 公里遠，毋閣離月娘有 35 萬 7000 公里遠。這當陣 ê 月娘是 tī 近地點，就是 tī 伊長株圓軌道面頂 離地球上倚彼位。有一寡人會 kā tī 近地點附近 ê 月圓，叫做超級月娘。這是因為平常時月圓 kah 咱 ê 平均距離是 38 萬 5000 公里遠。所以天頂這粒月娘 tùi 地球來講，就比平常時 ê 月娘較光，嘛 較大粒。是講任何 tī 地平線附近 ê 月圓，攏會因為伊 ê 光線 ùi 實密、清楚大氣層 ê 較長路線迵過，去予屈折去。大氣層 ê 屈折會 tī 薄薄 ê 雲頂，產生青色 ê 爍光。到 7 月 tī 近地點 ê 月圓時，雲底就會產生紅光做邊界。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220715/ 影像：Petr Horalek / Institute of Physics in Opava 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220715.html Powered by Firstory Hosting

這粒月娘實在是引人注目。一般講來，月出 彼陣是恬 chih-chih。月娘是 地球上大粒 ê 姊妹仔伴，伊閣幾若分鐘就會規粒出現 tī 地平線面頂。毋閣伊這馬 猶閣霧霧，等咧伊就會 peh 到夜空頂懸去矣。是講一禮拜前，就算月娘干焦去予 日頭 照著一半，伊踮遮沓沓仔 peh 起來，嘛是一場精彩 ê 演出。因為遮是 丹麥 Nykøbing Mors ê Limfjord 峽灣，月娘 ùi 地平線附近 peh 起來，到去 hŏng 散射 ê 雲下底。結果就踮遮翕著這張孤張感光 ê 相片。月光迵過雲內底 ê 閬縫，煞產生這个 佛光。這个佛光會 ùi 地平線附近射出來，向天頂 規个 湠開，甚至 會崁 tùi 天頂另外一爿去。Tī 咱月娘 後壁 ê 天星是 ùi 咱 ê 銀河系 來--ê。倒爿頂懸閣有咱銀河上大 ê 姊妹仔伴，仙女座星系。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220727/ 影像：Ruslan Merzlyakov (astrorms) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220727.html Powered by Firstory Hosting

這个景色值得你較早 peh 起來。編號 C/2020 F3 ê 彗星 (NEOWISE 彗星) tī 兩年前 ê 這個月，天猶未光就 peh--起來矣。彼陣 ê 北天追星者，歡喜甲 透早就 peh 起來看。這粒彗星，是這世紀 足罕得 會當 直接用目睭 就 看會著 ê 彗星。Tī 7 月 8 號 日出進前，仝這个攝影師 才拄用戲劇性 ê 方式，翕著這粒彗星。這粒 內太陽系 ê 意外人客，煞變做咱所知影 2020 年 ê 大彗星。這支影片 有詳細翕著 NEOWISE 彗星 tī 意大利 阿得里亞海 天頂 peh 懸 ê 模樣。這支 縮時攝影影片，是 kā 30 分鐘內翕 ê 240 張相片，鬥起來 ê 成果。彗星 peh--起來 ê 過程，會經過前景 光 iàⁿ-iàⁿ ê 夜光雲，kah 背景 遙遠 ê 恆星。是講，咱無想到 NEOWISE 彗星 會光到 2020 年 8 月。伊 ùi 彗核 噴出來 ê 離子尾溜 kah 塗粉尾溜，差不多有 5 公里長。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220726/ 影像來源 kah 版權：Paolo Girotti 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220726.html Powered by Firstory Hosting

毋知你敢有法度揣著月娘？這款簡單 ê 任務通常是足困難達成--ê。是講，月娘有一半時間攏 tī 地平線以上，月相 ùi 月眉到月圓攏有可能。這張相片是 5 月底 ùi 西班牙 Sant Martí d'Empúries 鎮 翕--ê，是 tī 透早 ê 地中海 面頂。你會 揣袂著 月娘 ê 其中一个原因，是因為這馬 ê 月相足倚 新月，去予 太陽 照著發光 ê 彼半爿，ùi 地球看較袂著。另外一个原因，是因為月娘這馬 tī 地平線附近，月光愛迵過較長 ê 地球大氣層 才會到咱遮。按呢本底就 較暗 ê 月眉，就閣較看袂著矣。月眉 干焦會 tī 日頭附近出現，所以干焦會 tī 日出抑是日落才看會著。月娘全部 ê 月相 走一輾，差不多愛 一個月。這個月上薄 ê 月眉，就是 新月，閣 3 工就會出現矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220725/ 影像：Mohamad Soltanolkotabi 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220725.html Powered by Firstory Hosting

土星 tī 紅外線會當看著遮爾濟細節。雲帶內底有足清楚 ê 大型結構，嘛包括 搝長 ê 風暴。紅外線 影像閣有一个 hŏng 注意著 ê 結構，就是 土星 ê 北極區有一个無四常 ê 六角雲圖樣。六角 雲逐爿 ê 長度，差不多 kah 地球直徑平長。咱無料想講會看著這个 六角雲。伊 ê 起源 kah 存在，是一个 研究主題。土星上有名 ê 土星環 kā 土星箍起來，環 ê 烏影就投影 tī 赤道 下面。這張相片是 Cassini 機器人太空船 tī 2014 年，用幾若个紅外線波段 翕--ê。Cassini 任務 tī 2017 年 9 月有一个戲劇性 ê 結局：太空船愛 飛入去 巨大 ê 土星環內底。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220724/ 影像來源 kah 版權：NASA, JPL-Caltech, SSI 資料處理：Maksim Kakitsev 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220724.html Powered by Firstory Hosting

毋知你最近敢捌看過別个世界 ê 全景圖？這張是阿波羅 11 號 ê 登陸地點，就 tī 彼个壯麗閣青荒 ê 月海，寧靜海 遐。是原始相片 ê 高解析度掃描相片 鬥出來 ê 全景圖。相片是 Neil Armstrong tī 1969 年 7 月 20 鴟鴞號登月小艇 登陸月球了後無偌久，ùi 窗仔翕出去 ê 景色。全景圖 上倒爿彼張 (編號 AS11-37-5449)，是人類頭一擺 tī 地球以外 ê 世界翕 ê 相片。倒爿 ê 前景有一个推進器 ê 煙筒管，是 tī 南方。正爿有鴟鴞號 ê 烏影，出現 tī 西爿。予你做一个參考，正爿彼个較大較淺 ê 隕石坑，伊 ê 直徑差不多是 12 公尺闊。相片是登陸月球了後差不多點半鐘，太空人 踏 tī 月球塗跤 進前，ùi 登月小艇 ê 窗仔翕--ê。翕相 ê 目的是欲紀錄登陸地點用--ê，若是欲提早離開 ê 時陣就用會著矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220723/ 影像：Neil Armstrong, Apollo 11, NASA 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220723.html Powered by Firstory Hosting

是按怎木星有環？木星主要 ê 環 是 1979 年 NASA 航海家 1 號 太空船飛過木星 ê 時陣翕著--ê。毋閣環是按怎來--ê，彼陣咱猶毋知。等到 NASA 加利略 太空船 tī 1995 年到 2003 年 踅木星咧行 ê 時陣，有證實一个假說。講，木星環 是 流星體 挵著木星附近 ê 細粒衛星，才產生--ê。比論講，若是有一粒細粒流星體 挵著木星足細粒 ê 衛星 Metis。這粒流星體會鑽入去衛星內底、蒸發、爆炸，kā 產生 ê 塗粉擲入去 踅木星 ê 軌道。這張 木星相片是 James Webb 太空望遠鏡 tī 紅外線波段 翕--ê。這毋若看會著 木星 kah 木星雲，嘛看會著木星環。咱嘛看會著木星 ê 大紅斑 (GRS)，就是正爿較淺色彼丸。木星上大粒 ê 衛星 木衛二 Europa 就 tī 倒爿彼个 繞射光尖 ê 中心。木衛二 Europa ê 烏影，就 tī 大紅斑 ê 邊仔。這張相片內底有幾若个特徵，咱到今 猶毋是蓋清楚。比論講木星正爿邊界，敢若有一重 kah 木星 分開 ê 雲層。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220720/ 影像來源：NASA, ESA, CSA, STScI 資料處理 & 許可：Judy Schmidt 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220720.html Powered by Firstory Hosting

美麗 ê 捲螺仔星系 Messir 74 (嘛叫做 NGC 628) 就 chhāi tī 雙魚座 ê 方向，離咱有 3200 萬光年遠。M74 有兩支足大支 ê 捲螺仔手骨，這个島宇宙差不多有 1000 億粒恆星 tī 內底。長期以來，攏因為伊 ê 宏偉結構，煞去予天文學家 kā 伊當做是捲螺仔星系 ê 模範。這張是最近 ùi James Webb 太空望遠鏡 ê 公開觀測資料 處理 ê 影像，M74 ê 中央區清楚甲予人掣一趒。這張彩色 ê 合成影像是 ùi Webb 太空望遠鏡 ê 兩个儀器 NIRcam kah MIRI 來--ê。In 是 近紅外線 kah 中紅外線波段 ê kha-mé-lah。Tī 這个有宏偉結構 ê 捲螺仔星系影像內底，看會著較冷 ê 恆星 kah 塗粉結構，這攏是以前 ê 太空望遠鏡 看袂著--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220722/ 影像來源：NASA, ESA, CSA, STScI 資料處理 kah 版權: Robert Eder 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220722.html Powered by Firstory Hosting

恆星是做伙生出來--ê。天頂 上有名 ê 一陣星叫做 昴宿星團，伊是一个 足光 ê 星團，咱用 目睭直接 就看會著。昴宿星團離咱有 450 光年 遠，是 1 億年前形成--ê，而且會閣活 2.5 億歲。咱 ê 太陽 應該嘛是 ùi 星團 內底生出來--ê。毋閣伊已經 45 億歲矣，伊 誕生彼陣 ê 星伴，早就已經無去矣。相片內底 ê 昴宿星團 就 tī 天頂。前景是 tī 美國 加州 Yosemite 國家公園 內底，一粒足有名 ê 岩石，叫做 半爿圓厝頂。這張相片 是 kā 28 張翕著 ê 前景，kah 174 張翕著 ê 天星背景疊做一張。In 攏是 tī 2019 年 10 月 ê 仝一暝，踮仝一个所在，用仝一台 kha-mé-lah 翕--ê。天文攝影師 事先有算好，愛開偌久時間 來翕 昴宿星團 kah 半爿圓厝頂岩石。毋閣伊意外拄著這區咧 失電，結果 背景 ê 夜空 煞規个變甲異常烏暗。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220719/ 影像：Dheera Venkatraman 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220719.html Powered by Firstory Hosting

是講，你敢會當 kā Webb kah Hubble ê 影像合做一張？你當然嘛會當。今仔日這張影像 就是欲予你看這个出眾 ê 結果。最近才發射 ê James Webb 太空望遠鏡 (就簡單叫做 Webb) 有比 Hubble 太空望遠鏡 (就簡單叫做 Hubble) 閣較大塊 ê 鏡。伊主要是欲翕 紅外線波段 ê 影像，看袂著藍光，上加到柑仔色光爾爾。顛倒來講，Hubble ê 鏡是比 Webb ê 鏡較細塊，而且無法度看到 Webb 遐爾紅 ê 紅外線波段。毋閣伊會當翕著 藍光 影像，甚至 紫外光 影像。所以咱會當 kā Webb kah Hubble 觀測資料鬥做伙，產生一張無仝色光、較闊頻 ê 影像。這張影像內底有 Stephan 五重奏 ê 四个 星系，紅色 ê 部份是 Webb ê 影像。嘛有 日本 tī Hawaii ê 地面望遠鏡 Subaru 翕 ê 部份。Webb, Hubble, kah Subaru ê 影像資料是公開自由使用--ê，世界上任何人攏會當家己提去處理。甚至會當產生 趣味、科學上嘛有路用 ê 多望遠鏡拼鬥影像。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220718/ 影像來源：Webb, Hubble, Subaru; NASA, ESA, NOAJ 資料處理 kah 版權：Robert Gendler 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220718.html Powered by Firstory Hosting

這張相片是 tī 意大利 Sicily 島 ê 北方，開一暗 ê 時間翕 ê。攏總翕 139 張，逐張攏是 20 秒鐘長。相片 中央 有一叢老樹仔，就 chhāi tī 這粒 咧轉踅 ê 行星面頂。這張遮爾精彩 ê 縮時攝影相片，是用數位 kha-mé-lah 鬥魚眼鏡頭，固定 tī 三跤馬面頂翕--ê。所以天星才會踮這个烏暗 ê 夜空 畫出這寡光巡。是講按呢會當予咱足緊就揣著這粒 行星 ê 天北極。地球 自轉軸 ê 方向指向倒爿頂懸 ê 天頂遐，就 tī 彼寡去予天星畫出來 ê 仝心光弧 ê 中心。銀河嘛 tī 遐。銀河盤迒過規張闊幅景色，ùi 北爿到東爿（相片 ê 倒爿到正爿）產生一个闊闊、霧霧 ê 光帶。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220708/ 影像：Marcella Giulia Pace 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220708.html Powered by Firstory Hosting

南環星雲是一个 行星形星雲，去予編做 NGC 3132。伊是一个離咱地球 2500 光年遠，欲死的類太陽恆星 ê 殮布。這張是 James Webb 太空望遠鏡 翕 ê 相片，無想到會當看著遮爾濟細節。內底有氣體 kah 塗粉組成、予人呵咾甲會觸舌 ê 宇宙天景，伊 ê 直徑是半光年長。Tī 這張 NIRCam 影像中心附近 足光彼粒恆星，是欲死的恆星 ê 星伴。這个互踅系統內底，較暗彼粒恆星，tī 過去幾若千年 ê 時間內，已經演化到 kā 星雲氣體塗粉殼擲出來 ê 階段矣。這粒較暗 ê 恆星就 tī 繞射光尖 ê 8 點鐘方向遐，落尾伊會演化做白矮星。這兩粒恆星 ê 互踅運動，就是造成南環星雲複雜結構 ê 原因。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220714/ 影像：NASA, ESA, CSA, STScI, NIRCam 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220714.html Powered by Firstory Hosting

這是目前為止 上深空、上清楚 ê 紅外線宇宙影像。是 James Webb 太空望遠鏡 面頂 ê NIRCam，開 12.5 點鐘久 ê 感光時間，tùi 南方星座飛魚座方向翕 ê 早期宇宙 景色。是講，相片內底有六條 繞射光針 ê 恆星，攏是咱銀河系內底 ê 恆星。這款 繞射 花樣，是 Webb 望遠鏡 ê 特徵。因為伊直徑 6.5 公尺 ê 主鏡，是 ùi 18 塊細塊六角鏡 鬥做一塊，做伙觀測--ê。視野內底幾若千个星系，攏是遠方 ê 星系團 SMACS0723-73 內底 ê 成員，差不多是 25 億光年遠。深空視野內底 ê 光弧，看起來敢若是 ùi 閣較遠 ê 星系來--ê。星系團 ê 主要質量是烏暗物質。影像去予 星系團 kā 扭曲 kah 放大--ê，這就叫做 重力 透鏡效應。Webb ê NIRISS 儀器表示講，kā 有光尖 ê 恆星後壁兩个無仝 ê 光弧資料 做分析，發現講這寡光弧攏是 ùi 仝一个背景星系來 ê 影像。而且這寡光，是愛開 95 億年 ê 時間，才行到 James Webb 太空望遠鏡。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220713/ 影像：NASA, ESA, CSA, STScI, NIRCam 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220713.html Powered by Firstory Hosting

這馬又閣是北天 夜光雲 ê 季節矣！夜光雲 是 細粒冰晶組成--ê，干焦會 tī 頂層大氣 拄著 特殊條件 ê 時陣形成。咱應該會 tī 熱天欲煞進前 ê 日落彼陣看著，彼陣日光會 ùi 地平線下底照過來。夜光雲 是目前咱知影 上懸 ê 雲，嘛是地面上觀測會著 ê 極區中氣層雲。雖罔講 ùi 2007 年開始，NASA ê AIM 衛星 就咧觀測 夜光雲，毋閣咱猶是有足濟無了解 ê 代誌，所以這到今猶是一个 足衝 ê 研究主題。這張相片翕--ê，是 tī 法國 巴黎 天頂 湠開 ê 夜光雲 波。今年，已經有 幾若个北方 ê 地點 報 講，有看著特別活跳 ê 夜光雲矣！ ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220712/ 影像：Bertrand Kulik 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220712.html Powered by Firstory Hosting

你會當看著上老 ê 物件是啥物？這个答案 tùi 直接用 目睭 看 ê 人來講，是 250 萬 光年 遠 ê 仙女座星系。250 萬光年遠 ê 意思是講，伊 ê 光子行到地球 ê 時陣，已經 250 萬歲矣。大部份蹛 tiàm 天頂 ê 居民，親像是 恆星、星團、kah 星雲，in ê 光 是 ùi 幾若百年 抑是 幾若千年前發出--ê。這是因為 in 大部份攏蹛 tiàm 咱 銀河系 內底。照距離來看，仙女座星系 ê 光，嘛是你會當看著 ê 天體內底，上遠 ê 一个。這張相片是頂個月 tiàm 摩洛哥 ê Sahara 沙漠 翕--ê。這幅 放大圖 中央 ê 主角，就是仙女座星系，嘛叫做 M31。這張相片是 kā 3 張背景 kah 1 張前景鬥做伙 ê 合成相片。是用仝一台 kha-mé-lah，tiàm 仝一位，tī 仝一暝翕--ê。毋閣前景是 tī 仝一暝 ê 藍色時間 翕--ê。仙女座星系 ê 衛星星系 M110，伊就 tiàm M31 星系核 ê 倒爿頂懸遐。咱會當直接用目睭看著咱銀河 ê 厝邊星系，實在是 足 siak-phāⁿ ê 一件代誌。若是閣用 kha-mé-lah tùi 伊 長時間感光，就會當 kā 足濟較暗 毋閣 媠甲予人袂喘氣 ê 細節，攏翕--出來。最近 ê 觀測資料表示講，咱銀河系 會 tī 紲落來幾若十億年 ê 時間，kah 這个大細差不多 ê 仙女座星系 相挵了後合併。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220711/ 影像：Jordi Coy 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220711.html Powered by Firstory Hosting

Tī 3000 光年遠 ê 所在，有一粒欲死--去 ê 恆星 kā 伊 ê 發光氣體殼擲出去。這張相片 是 Hubble 太空望遠鏡 翕 ê 貓眼星雲 (NGC 6543)，是目前咱知影 ê 行星形星雲 內底 上複雜--ê。這張 貓眼星雲 相片實在是有夠複雜--ê，伊有半 光年 闊。天文學家懷疑講，tī 伊 中心 ê 天體，可能是一組 雙星系統。這款形體 ê 天體攏叫做「行星形星雲」，毋閣會按呢號名，其實是一个 誤會。雖然講這款天體 tī 細台天文望遠鏡內底看起來是圓--ê，kah 行星欲仝欲仝。毋閣咱若是用懸解析度 ê 大型天文望遠鏡 kā 看，就會看著恆星外圍有一个 恆星繭，這是 恆星演化 到上尾坎站 ê 時陣，去予歕出去 ê 氣體殼。天文學家若是 tùi 貓眼星雲硞硞 kā 看，毋若會看著閣較清楚 ê 結構，嘛會看著太陽閣 50 億年，仝款會演化到 行星形星雲 ê 階段。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220710/ 影像來源：NASA, ESA, Hubble, HLA 資料重新處理 kah 版權：Raul Villaverde 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220710.html Powered by Firstory Hosting

木星頂懸這寡圓點是啥物？中央倚正爿上大--ê，是上大上遠 ê 大紅斑，是一个 tī 木星 頂懸使性地 ê 風暴系統。這个風暴系統，Giovanni Cassini tī 357 冬前 就有注意著。咱這馬猶毋知是按怎 大紅斑是紅色--ê。倒爿下跤這粒，是木星上大粒 ê 月娘：木衛二 Europa。這張是 航海家太空船 tī 1979 年翕--ê。相片支持現代 ê 假說，講，木衛二 Europa 有一个地下海洋，所以遐是一个 揣外星生物 ê 好所在。毋閣正爿頂懸彼个大 烏點 是啥物？彼是另外一粒木星衛星，木衛一 Io ê 烏影：。航海家 1 號發現講，木衛一 Io 有足濟火山活動，所以咱 tī 伊頂懸揣袂著 隕石坑。航海家 1 號 tī 1979 年 ê 時陣飛過木星，翕著 16 張相片。這馬有人 kā 這寡觀測資料重新處理，合併做 這張影像。45 冬前 ê 8 月，航海家 1 號 ùi 地球發射，開始 tī 咱 太陽系 內底進行 上偉大 ê 探險 ，一直到今。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220717/ 影像來源：NASA, Voyager 1, JPL, Caltech 資料處理 kah 許可:_ Alexis Tranchandon / Solaris 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220717.html Powered by Firstory Hosting

飛踮地球天頂 ê 土星，是 6 月透早 ê 行星連珠 內底，足光 ê 一粒星。伊 tī 6 月 24 這工，kah 地球低軌道人造衛星 國際太空站 ISS 做伙翕--一張。這張相片是 tī 美國加州 Temecula 市 一間學校 ê 停車場翕--ê。Tī 這工，這粒有環 ê 土星 kah 國際太空站 ISS，做伙去予 高速攝影機 翕著，就是這張影格 ê 影像。是講，土星 ê 星等是 +0.5 星等，太空站是比伊閣較光，是 -3 星等。這个輝度 ê 差別，有 tī 影片 ê 影格影像忠實表現出來。Tī 這張遮爾有挑戰性 ê 影像內底，踅地球咧行 ê ISS 是離地球 602 公里遠。毋閣土星是離學校停車場 14 億公里遐爾遠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220709/ 影像：Tom Glenn 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220709.html Powered by Firstory Hosting

這張 tī NGC 6914 附近 ê 彩色天景，是欲用來研究內底 ê 恆星、塗粉、kah 發光氣體。這个 星際星雲複合體 離咱有 6000 光年遠，伊就 tī 北天星座 天鵝座 咧飛，嘛是 tī 銀河盤 ê 面頂。這規張宇宙畫布攏是紅色 ê 水素 發射星雲 kah 厚塗粉 ê 藍色 反射星雲。烏色剪影 ê 部份，就是閘光 ê 星際塗粉。Tī 天鵝座 OB2 星協內底 ê 大質量、高溫、少年恆星發出 ê 紫外光輻射，kā 星協內底 ê 原子 水素氣體 離子化去，產生質子 kah 電子 複合 ê 特徵紅光。Tī 天鵝座 OB2 內底 ê 恆星嘛因為反射塗粉雲，產生足強 ê 藍色恆星光。這个超過 1 度闊 ê 望遠鏡視野，按照 NGC 6914 ê 距離來推算，差不多是 100 光年遐爾闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220707/ 影像：Giorgio Ferrari 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220707.html Powered by Firstory Hosting

咱 ê 天頂就 kah 溪流仝款，足濟恆星嘛 tī 天頂流動。這个證據，這馬就 tī 這張 最近 ùi ESA Gaia 衛星天文台 提著 ê 觀測資料建構出來 ê 天空圖內底。這內底有 銀河 2600 萬粒恆星 ê 運動路線。藍色是恆星向咱倚 過來，紅色是恆星離開咱。彼寡線是 恆星 tī 天頂 ê 運動路線。倒爿較藍彼區 kah 正爿較紅彼區表示講，銀河系內底恆星 ê 整體運動是 踅銀河中心咧行。毋閣，圖中央彼區，是 太陽相對 銀河中央棍仔 ê 剛性轉踅運動。看起來敢若 kah 銀河整體運動是倒爿 ê。了解 這寡 恆星運動 ê 細節，會當 幫贊咱 閣較了解咱 銀河系 複雜 ê 歷史 kah 咱太陽 ê 起源。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220706/ 影像來源 kah 許可：ESA, Gaia, DPAC 文稿：Ata Sarajedini (Florida Atlantic U., Astronomy Minute podcast) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220706.html Powered by Firstory Hosting

欲 kā 星系藏踮星系團後壁實在是無可能 ê 代誌。附近若是有一个星系團，伊 ê 引力就親像是一个 巨型 ê 透鏡，會 kā 彼附近仝款 遙遠 ê 星系 影像 搝甲完全變形。這張相片 就是按呢。這是最近才 kā Hubble 太空望遠鏡 觀測過 ê 影像 重新處理過--ê。這个星系團叫做 GAL-CLUS-022058c，內底有幾若个星系，利用 重力透鏡效應 kā 背景星系 ê 影像拗彎做影像中央柑仔色 ê 光弧。因為 伊 ê 形體遮爾奇怪，去 hŏng 叫做是 熔去的 愛因斯坦環，內底會當揣著四个 ùi 仝一个背景星系來 ê 影像。一般講來，前景星系團內底大部份 ê 質量 分佈愛平均，才有法度產生遮爾滑溜 ê 光弧。所以星系團 ê 質量分佈，應該毋是干焦你目睭看著 ê 部份爾爾。分析這寡 重力弧 ê 位置，會當提供天文學家估計星系團內底 烏暗物質 分佈 ê 情形，嘛會當推測恆星 tī 這寡早期星系內底是按怎開始形成--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220705/ 影像來源：ESA/Hubble & NASA, S. Jha 資料處理：Jonathan Lodge 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220705.html Powered by Firstory Hosting

月圓若是踮 地平線附近，定定看起來會較大、較脹。這其實是一个足有名 ê 月娘錯覺。這張縮時攝影相片，有照順序展示月球 ê 角寸尺。照按呢 kā 看，伊 ê 角寸尺並無因為伊 peh 起來抑是落落去就無仝，毋閣月色就有改變。記錄 ê 影格 差不多是 60 秒鐘翕一張。這張相片嘛展示予咱看，太陽 tī 地平線附近是按怎會變甲遐爾紅。這張合成相片是踮 意大利 Sardinia 島 Cagliari 城 翕--ê，彼工是 6 月 草莓月 ê 後一工。這工 ê 月圓會去 hŏng 叫做是超級月娘，是因為伊 ê 角寸尺 kah 平常時比起來，有小可仔較大淡薄仔。這粒 超級草莓月娘 拄 ùi 魔鬼馬鞍山 ê 後壁 peh 起來。會按呢號名，是因為這粒山 tī 相片倚正爿、月娘 下底，有一个看起來大甲 無正常、欲 kah 月娘平大 ê 窟仔。視線迵過地球 厚塗粉大氣層 ê 長度若愈來愈短，月色就會 ùi 草莓色變做蜂蜜色 kah 鵝仔黃色。這个色光 ê 改變拄仔好有合北半球 6 月月圓 ê 名，叫做 草莓月 抑是 蜜月。2022 年會有四个超級月娘，第三个就叫做 雷霆 超級月娘，會 tī 後個月出現。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220704/ 影像：Lorenzo Busilacchi 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220704.html Powered by Firstory Hosting

這粒衛星 ê 死期已經註定好矣！火星 這粒紅色行星是用 羅馬戰神 ê 名 號--ê。伊有兩粒細粒衛星，火衛一 Phobos kah 火衛二 Deimos。這兩个名是 ùi 希臘文 ê 驚 kah 惶 來--ê。這兩粒 火星 ê 衛星，可能本底是 ùi 火星 kah 木星之間 ê 主小行星帶來 ê 小行星，嘛有可能是 ùi 咱太陽系 閣較遠 ê 所在來 ê 天體，落尾去予火星掠牢矣。這張 予人呵咾甲會觸舌 ê 彩色相片，是 火星探測軌道衛星 翕--ê，伊會當看著 10 公尺細 ê 物件。相片內底 ê 火衛一 Phobos 是較大粒 ê 衛星，是一粒面頂有足濟隕石坑、親像是小行星 ê 天體。毋閣 火衛一 Phobos 踅火星 ê 軌道 傷倚矣，伊 kah 火星地表 ê 距離才 5800 公里爾爾，按呢 引潮力 會 kā 伊搝落來。是講，咱 ê 月娘 kah 地球 ê 距離是 40 萬公里遠。差不多閣 5000 萬年，火衛一 Phobos 應該會去予搝甲碎糊糊，變做一輾衛星屑仔。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220703/ 影像：HiRISE, MRO, LPL (U. Arizona), NASA 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220703.html Powered by Firstory Hosting

北半球 ê 6 月 21 這工是夏節，就是一冬內，日頭行到 赤緯上北爿彼位。這張相片是日時踮波蘭 Proboszczow 庄翕--ê。夏節這工，日頭會行到天頂彼 3 个 8 字型，嘛叫做日行軌跡，上頂懸彼位。毋閣，欲建構出這張精彩 ê 相片，並毋是用數位感光 ê 方式翕--ê。這是用一款叫做日軌攝影 ê 技術翕--ê。是 kā 一台 針空顯影 kha-mé-lah 固定 tī 向南 ê 方向，ùi 2021 年 6 月 26 到 2022 年 6 月 26 ê 期間內，直接踮仝一張相片紙面頂感光顯影。三條日行軌跡是 tī 逐工 ê 中歐時間 中晝 11:00, 12:00 kah 下晡 1:00 三个時間，用針空顯影技術 tī 相片紙面頂短時間感光 ê 結果。兩爿 ê 虛線，是逐工日頭踮天頂一部份 ê 軌跡，每一个光點是閬 15 分鐘。這張翕規冬 ê 日軌攝影相片，有當時仔 拄著雲，會 kā 日頭閘去，就是相片產生烏暗閬縫彼位。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220702/ 影像：Dawid Rycabel (Pinholove) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220702.html Powered by Firstory Hosting

這張光批內底 ê 光巡，是 ùi 踅太陽公轉 ê 行星 tī 晴和 ê 夜空畫出來 ê 光跡。這張縮時攝影相片，是 6 月 24 彼工踮中國北京紫禁城附近翕--ê。攝影師 kā kha-mé-lah 固定 tī 三跤馬頂懸，連紲感光欲 3 點鐘久 ê 時間，才構成這張相片。連紲感光開始了後，天頂就搝出光弧。無偌久，下月眉 ùi 東爿地平線出現，煞變做這張相片內底，天頂上光 ê 光巡 kah 湖面上強 ê 倒照影。這工，太陽系八大行星 攏 行到黃道面附近，成做八星連珠，tī 日出進前踮天頂畫出 in ê 光跡。土星是這工頭一粒 peh 起來 ê 行星。伊就 tī 相片上正爿頂懸遐，giōng 欲走出去矣。太陽系上內底 ê 行星，水星，才 tī 日頭欲出來進前 peh 起來，所以伊 ê 光跡上短。伊就踮上倒爿地平線附近遐，tī 天拍殕光 ê 時，嘛猶看會著。天王星 kah 海王星較暗，較歹揣。雖罔講 in kah 其他天星 ê 光跡攏濫濫做伙，毋閣這張相片猶是有 kā 太陽系 八大行星 ê 光跡攏標出來。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220701/ 影像：Zheng Zhi 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220701.html Powered by Firstory Hosting

這張闊幅相片是 2022 年 6 月 20 翕--ê。視野內底 ê 彗星 C/2017 K2 (嘛叫做 PanSTARRS) 就 kah 開放星團 IC 4665、閣有明亮 ê 恆星 蛇夫座 β，做伙出現 tī 恆星滿滿 ê 銀河邊界。PanSTARRS 這粒彗星，是頭一擺 ùi 太陽系 遙遠暗淡 ê Oort 雲，行到內太陽系來--ê。伊 5 年前頭一擺去予咱注意著，彼當陣是 2017 年 ê 5 月。伊是目前為止咱所知影 活動力足強 ê 彗星內底 上遠--ê。上開始 ê 時陣，伊是 tī 離太陽 24 億公里遠 ê 所在去予咱發現--ê。彼差不多是 tī 天王星軌道 kah 土星 軌道之間 ê 距離。Hubble 太空望遠鏡 ê 觀測表示講，這粒彗星有一粒足大粒 ê 彗核，直徑差不多比 18 公里較短淡薄仔。等到 7 月 14，彗星 C/2017 K2 會行到離地球上近彼位。12 月 ê 時陣，伊會離太陽上倚。時到咱就會當用 細台天文望遠鏡 看著伊矣。咱已經會當看著伊膨獅獅 ê 彗鬚 kah 長-liù-liù ê 彗尾矣。伊這馬離咱干焦 2 萬 9000 萬公里遠，差不多是 16 光分 ê 距離。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220630/ 影像：Jose J. Chambo (Cometografia) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220630.html Powered by Firstory Hosting

毋知你敢有法度製造一个會當活 1000 年 ê 行星系統？你會當耍這个遊戲「超級行星相挵」，看會當抑是袂當。你愛生出 10 粒 行星，踮中央恆星附近點落去就會生一粒出來。倒爿 ê 菜單會當予你按照行星 ê 質量來揀行星 ê 形態。Ùi 質量較細到較大是：地球、超級地球、冰巨行星、巨行星、棕矮行星、kah 矮恆星。逐粒行星毋若去予行星系統內底，像太陽這款恆星 ê 引力縛牢--ê，嘛去予其他行星 ê 引力縛牢--ê。耍愈久你 ê 分數會愈懸，而且你囥 ê 行星若是愈密，抑是囥較濟粒 tī 性命四序區 內底，你嘛會提著 獎勵分數。你若是有法度耍到 1000 年，抑是行星去予引力 kā 擲出去，這个遊戲就會結束矣。最近這幾冬，有 足濟系外行星系統 去予科學家揣著。這个 超級行星相挵 ê 展示予咱看講，有一寡行星系統會較穩定。等你耍這个 超級行星相挵 ê 遊戲幾若擺了後，你可能會開始憢疑。到時你應該有理由相信講，咱 ê 太陽系 tī 行星系統形成 ê 過程，應該是有 幾若粒行星 phàng 見去矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220619/ 影像：Stefano Meschiari (U. Texas at Austin) & the SAVE/Point Team 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220619.html Powered by Firstory Hosting

是哩！毋知你敢捌同齊看過太陽系八大行星？這个真罕得看著 ê 太陽系朝會點名，會當佇 6 月 透早時 看著。這張 魚眼全景相片，是幾若工前踮 智利 San Pedro de Atacama 鎮 附近翕--ê。這張毋若翕著行星連珠，嘛翕著 chhāi 佇火星 kah 金星中央 ê 月娘。太陽系 全家福相片內底 ê 成員攏 chhāi 佇 黃道面 頂懸，in 照順序 ùi 倒爿到正爿是：地球、土星、海王星、木星、火星、天王星、金星、水星、kah 地球。為著欲強調海王星 kah 天王星 ê 位置，有 kā in 撨較光咧。水星下底 ê 火山是智利 ê Licancabur 火山。7 月彼陣，水星 會行到太陽光 ê 範圍內。毋閣幾若工後，伊就會 ùi 欲暗仔彼爿出現。等到 8 月 ê 時陣，土星 會 離太陽愈來愈遠，落尾就袂 tī 天欲光彼陣出現，顛倒會 tī 天欲暗彼陣出現。後擺閣 拄著八星連珠，應該愛等到 2122 年 才看有矣！ ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220629/ 影像：Alexis Trigo 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220629.html Powered by Firstory Hosting

這是月球 ê 佗一部份？攏毋是呢！因為這是 水星。水星表面是 較老 ê 地表，kah 咱月球 仝款，攏去予大粒隕石 摃甲糜糜卯卯。水星干焦比咱 月球 較大淡薄仔，毋閣伊比 太陽系 內底所有 衛星 ê 密度攏較懸，質量嘛較大。這是因為伊主要 ê 成份是 鐵。實際上，太陽系內底嘛干焦地球 ê 密度比水星 ê 較懸。因為 水星 自轉週期 ê 3 倍拄仔好是公轉週期 ê 2 倍，而且水星 ê 長株圓軌道 嘛較長，所以咱若是去到水星做客，就會當看著 日頭 peh 起來了後，佇天頂停咧，閣倒轉去伊 peh 起來彼爿地平線，閣停咧，閣隨 ùi 另外一爿地平線落去。Ùi 地球來看，水星離太陽遮爾倚，所以咱干焦有法度佇 日落了後、抑是日出進前 短短仔 ê 時間內，看著伊。這張相片 是頂禮拜 歐洲 ESA kah 日本 JAXA 合作 ê BepiColombo 太空船 飛過 ê 時陣翕--ê。太空船 kā 能量釋放出去，準備欲 ùi 2025 年開始 踅太陽系上內底 ê 行星 行。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220628/ 影像：ESA, JAXA, BepiColombo, MTM 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220628.html Powered by Firstory Hosting