NASA 逐工一幅天文圖 APOD Taigi

Kah 鵜鶘星雲做伙 peh 起來 ê 烏暗結構是啥物？這个星雲規个看起來，敢若是 一隻鵜鶘，而且敢若欲飛去另外一个無仝鳥仔 ê 星座：天鵝座。毋閣 鵜鶘星雲 內底是一个去予新形成 ê 恆星 照予光，嘛去予烏暗塗粉 創垃圾 ê 所在。Kah 薰煙差不多平大粒 ê 塗粉粒 是 ùi 少年恆星 較冷 ê 大氣 做出來--ê、較簡單 ê 碳素複合體，毋閣會去予 恆星風 kah 爆炸 kā 伊吹予散。正爿有 ùi HH 555 噴出來--ê、足引人注目 ê Herbig-Haro 天體 ê 噴流。In 去予塗粉包 tī 內底，有 一光年 遐爾長。這寡噴流會 kā 塗粉 雲柱 破壞去。咱嘛看會著其他雲柱 kah 噴流。這張相片 ê 色彩是 為著科學目的漆--ê，主要是欲強調 星雲內底 較少 ê 重元素。是講星雲主要 ê 成份是較輕 ê 元素，親像是 水素 kah 窒素。鵜鶘星雲 (包括 IC 5067 kah IC 5070) 離咱有 2000 光年 遠，而且用細台望遠鏡就會當 tī 天津四 ê 東北方揣著伊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221011/ 影像：Adriano Almeida 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221011.html Powered by Firstory Hosting

太陽 一陣一陣 ê 太陽風 kah 爆發 ê 帶電粒子，造成 tī 2014 年 12 月彼陣，有幾若暗攏看會著極光。極光 這馬來到最近 11 年內，太陽活動 上強 ê 時陣。這張相片 有翕著戲劇性 ê 極光，伊迒過加拿大北方 Yellowknife 庄仔頭附近 ê 夜空。這个 極光 光甲 使人敬畏，干焦感光 1.3 秒鐘就看會著矣。同齊翕 ê 影片 有通看著天頂 ê 極光 咧跳舞，觀光客看著極光歡喜甲咧 慶祝。相片正爿 ê 尖箍圓形體 是 tipi，是美洲原住民徛起 ê 布篷。相片中央 ê 遙遠夜空，是 獵戶座。極光可能會 tī 紲落來幾若年愈來愈強，這是因為 咱 ê 太陽 欲閣來到 伊 ê 極大期 矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221009/ 影像：Kwon, O Chul (TWAN) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221009.html Powered by Firstory Hosting

彗星 C/2017 K2 (PanSTARRS 彗星) ê 近日點是 tī 12 月 20，伊這馬當咧飛過去。伊掃過咱地球南半球 ê 天空，留予天文觀星者一个線索。PanSTARRS 彗星 是 ùi 遙遠 ê Oort 雲 頭一擺飛來--ê。這張是 9 月 21 翕--ê 深空影像，伊就 tī 倒爿頂懸遐，有 青色 ê 彗鬚 kah 差不多半度長 ê 白色塗粉尾溜。這張天星滿滿 ê 相片內底閣有另外一粒 彗星 73P/Schwassmann-Wachmann 3 tī 天蠍座，伊 kah 倒爿下跤 ê PanSTARRS 彗星差不多有 1 度遠。天文學家估計講，這粒頭一擺來揣咱 ê 彗星 C/2017 K2 (PanSTARRS 彗星) 進前蹛 tī Oort 雲 已經 300 萬年矣，伊綴雙曲線軌道咧行。是講 咱其實 kah 彗星 Schwassmann-Wachmann 3 較熟講！伊是週期性彗星，綴一个長株圓軌道咧行。伊 ê 週期是 5.4 年，軌道範圍是 ùi 木星軌道外口到地球軌道附近。PanSTARRS 彗星 tī 9 月 21 翕相 這暗才拄 ùi 咱 ê 天頂飛過，這陣伊離地球才 20 光分遠爾爾。彗星 Schwassmann-Wachmann 3 離咱差不多是 7.8 光分遠，伊自 1995 年就開始解體矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221008/ 影像：Jose J. Chambo (Cometografia) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221008.html Powered by Firstory Hosting

木星 tī 地球天頂是 kah 太陽 無仝爿。頂個月底，木星行到欲倚近日點 ê 所在。近日點就是天體 tī 伊長株圓軌道面頂行到離太陽上近彼點，木星 ê 近日點是明年初。時到 木星就會倚咱地球足近--ê，按呢欲看太陽系內底上大粒 ê 氣態巨行星就會變做足讚--ê。這張 遮爾清楚 ê 木星影像 是 9 月 27 彼工 tī 美國 Arizona 州 Florence ê 後埕，用細台望遠鏡翕--ê。這是 kā 影片影格疊出來 ê 相片，有通看著 踅 這粒大行星、一輾一輾 ê 環形風。暗帶 kah 光區 一逝一逝迒 tī 這粒氣態行星，閣有 咧轉踅 ê 長株圓風暴 kah 有名 ê 大紅斑。加利略衛星 ê 木衛三 Ganymede 就 tī 這張相片 ê 正爿下跤遐。太陽系上大粒 ê 衛星 kah 伊 ê 烏影就 ùi 南方 ê 木星雲頂懸 飛過。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221007/ 影像：Andrew McCarthy 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221007.html Powered by Firstory Hosting

NGC 4631 是一个大閣媠 ê 捲螺仔星系。伊是 側向星系，離咱有 2500 萬光年遠，是 tī 北方星座 獵犬座 遐。這个星系看起來敢若是一个小可仔彎彎 ê 栓仔，對一寡人來講這有成一隻宇宙魚仔，另外一寡人就 kā 伊叫做海翁星系。毋管按怎，伊 ê 大細差不多 kah 咱 ê 銀河 平大。Tī 這張遮爾清楚 ê 相片 內底，黃色 ê 星系核、烏暗 ê 塗粉雲、明亮 ê 藍色星團、kah 紅色 ê 恆星形成區攏足明顯--ê。海翁星系頂懸彼个較細 ê 長株圓星系 NGC 4627，是伊 ê 星系伴。咱會當 tī 這張深空相片內底看著 較暗 ê 恆星流，這是較細 ê 星系伴 tī 古早以前 kah 海翁星系相拄幾若擺，造成伊 ê 結構去予破壞了後 ê 殘骸。咱嘛知影講，海翁星系噴出 ê 星系暈是燒氣體造--ê，會發出 X-光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221006/ 影像：Michael Sherick 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221006.html Powered by Firstory Hosting

你若是 kā 一台太空船駛去挵一粒小行星，會發生啥物代誌？這台就是頂禮拜去挵小行星 Dimorphos ê NASA DART 太空船，你會當看著 足濟雲煙。挵伊 ê 目的是欲 保護咱 ê 地球，看小行星 ê 路線是毋是會 小可仔改變。若是會當，按呢太空中 ê 大石頭就欲挵著 地球。影片內底 ê 雲煙實在是有夠光，大部份 ê 人攏 無想著 會按呢，所以這變做是一个研究主題矣。有一个可能是講，這粒 170 公尺闊 ê 小行星 Dimorphos 主要是 一堆細粒石頭 ê 組合，去 hŏng 挵過了後煞散開。這支縮時攝影影片 是 tī 南美 ê 東南海岸，屬於 法國 ê Reunion 島 面頂 ê Les Makes 天文台，開 20 分鐘久 ê 時間翕--ê。伊是 地面有咧追蹤這个衝擊實驗 ê 其中一个天文台，上開始彼个光點是小行星 Dimorphos ê 兄弟：小行星 Didymos。最近翕著 ê 相片表示，雙小行星系統 Didymos kah Dimorphos 嘛開始 出現 kah 彗星仝款 ê 尾溜。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221005/ 影像：Les Makes Observatory, J. Berthier, F. Vachier, A. Klotz, P. Thierry, T. Santana-Ros, ESA NEOCC, D. Föhring, E. Petrescu, M. Micheli 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221005.html Powered by Firstory Hosting

咱若是斟酌看這粒水晶球，會當拍開啥物款 ê 謎題？這粒球其實是 木星 ê 月娘，晶體是冰，月娘毋若足垃圾，而且破去 無法度修復。而且，一般 ê 推測是講，木衛二 Europa 破去 ê 冰原下底有海洋會當 支持性命生存。木衛二 Europa kah 地球 ê 月娘 差不多 平大粒，表面有 一逝一逝 ê 痕跡。這張相片 是 幾若工前 翕--ê，彼陣踅木星 ê 機器人 太空船 Juno 才拄 ùi Europa 表面 325 公里懸 ê 所在飛過。Europa 會有地下 海洋，這馬認為是因為伊踅木星 ê 軌道是有小可仔 長株圓。因為受著木星引力改變，予伊 規粒變形，這个變形 kā 伊內部加溫，才會形成海洋。研究 Juno 特寫 相片，毋若會當提供人類閣較了解木衛二 Europa kah 早期太陽系，而且會當幫贊咱了解 性命是毋是會當 tī 宇宙其他所在生存。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221003/ 影像來源 kah 許可：NASA, JPL-Caltech, SwRI, MSSS 資料處理：Andrea Luck 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221003.html Powered by Firstory Hosting

人類敢有法度對抗 欲挵著地球 ê 小行星？會當！大粒 小行星 ê 毀滅性 衝擊，捌 tī 地球 發生過幾若擺，有當時仔會造成地球生物 ê 大滅絕。為著欲保護地球 tī 未來莫去予小行星 舂著，NASA 昨昏做一个新 ê 行星防衛機制 ê 實驗。In kā 雙小行星改道實驗 (DART) 機器人太空船 駛去挵 小行星 Dimorphos。伊是小行星雙星系統內底較細粒彼粒，大細差不多 170 公尺大。Tī 這支影片 內底，這个衝擊實驗是成功--ê。理論上，這个實驗若是較早做咧，就算咱用太空船細力 kā 小行星踢一下，嘛有法度 kā 較大粒 ê 小行星 踢離開地球。咱會當 tī 這支縮時攝影影片內底看著 DART 先飛過倒爿 ê 大粒 小行星 Didymos，紲落來才飛到 細粒小行星 Dimorphos。是講這支影片 tī DART 挵著小行星 ê 時陣就煞矣。毋閣 太空船 kah 全球 ê 望遠鏡 監看 Dimorphos 軌道改變 ê 工課 才 拄 開始。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220927/ 影片：NASA, JHUAPL, DART 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220927.html Powered by Firstory Hosting

是啥物物件會當 kā 中子星 當做炮彈按呢射出去？是超新星啦！差不多 1 萬年前，tī 銀河系內底 生出 超新星殘骸 CTB 1 ê 超新星，毋若毀滅一粒大質量恆星，而且 kā 新形成 ê 中子星 ê 核心，脈動星，炸掉矣。這粒脈動星 一秒鐘踅 8.7 擺。會揣著伊，是利用一款會當下載到家己電腦 ê 軟體 Einstein@Home，連到 踅地球--ê NASA Fermi Gamma-Ray 天文台 資料庫搜揣資料，才發現--ê。這粒 脈動星 PSR J0002+6216 (簡稱 J0002) 一秒鐘行 1000 公里，早就已經脫離 超新星殘骸 CTB 1，而且伊 ê 速度緊甲 會當離開咱 ê 銀河系。Tī 這張相片內底，咱會當看著 脈動星 ê 路線拖到超新星殘骸 ê 倒爿下跤遐。這張影像 是 kā VLA kah DRAO 電波天文台 翕著 ê 電波影像，kah 踅地球 ê NASA IRAS 紅外線 天文台 ê 資料庫影像 鬥做伙，產生 ê 合成影像。咱已經知影講超新星就敢若是炮台，咱嘛知影 脈動星就敢若是炮彈，毋閣咱猶毋知超新星是按怎 kā 脈動星搩出去--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221002/ 影像來源：F. Schinzel et al. (NRAO, NSF), Canadian Galactic Plane Survey (DRAO), NASA (IRAS) 資料合成：Jayanne English (U. Manitoba) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221002.html Powered by Firstory Hosting

夜空是毋是咧 tùi Shasta 受氣？Tī 一寡古早時代 ê 傳說 內底，這是天頂 kah 地下 ê 神 tī 遐咧相拍。是講 tī 美國 加州 這个 大火山 咧噴火 ê 時陣，有當時仔天頂嘛足鬧熱--ê。這款戲劇性 ê 深空天景 會當 tī 六月底 ê 時陣翕著。倒爿天頂是咱 銀河系 ê 中央帶，前景是去予雪崁牢 ê 山。正爿天頂是媠甲親像一幅圖 ê 夜空，遐有現代星座 ê 天蠍座 kah 蛇夫座。咱會當 tī Shasta 山正爿看著較光 ê 柑仔色恆星 心宿二 kah 多彩 ê 蛇夫座 ρ 雲 複合體，正爿頂懸遐是 蛇夫座 ζ 外圍 ê 紅色發射星雲。這張 tī 地球 翕--ê 組合影像是 tī 藍色時間 翕--ê 兩張全景圖。其中追蹤天景彼張是較晏翕--ê，是用仝一台 kha-mé-lah 踮仝一个所在翕--ê。免幾若百萬年，心宿二、一寡 蛇夫座 ρ 系統 內底 ê 恆星、kah 蛇夫座 ζ 應該攏會爆炸，變做 超新星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220928/ 影像：Ralf Rohner 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220928.html Powered by Firstory Hosting

你若是逐工 觀測月娘，就會看著伊去予日頭照著 ê 部份，逐工會小可仔無仝。月相 ê 變化 ùi 月眉 到 月圓 閣轉來到 月眉，這規个月相循環差不多是 29.5 工。這个 7x4 ê 望遠鏡影像距陣，是 月相 28 暗 ê 連紲變化。Ùi 倒爿頂懸 到 正爿下跤，是 ùi 7 月 29 天欲暗彼陣，到 8 月 26 透早彼陣，按呢差不多是一个完整 ê 月相。月眉 前後 24 點鐘無翕，因為彼陣 ê 月相是月眉，kah 太陽較倚，真歹看著。為著欲 tī 地中海天氣上好 ê 時陣翕著月相，有當時仔嘛是需要做一擺 ê 公路旅行，才有法度完成這个月相循環 ê 攝影計畫。月相前半段是前半暝翕--ê，後半段是後半暝抑是透早翕--ê。所有 ê 影像攏有調整到仝款 ê 大細，按呢才有法度予你利用這个距陣，tī 一个月相週期內底追蹤月娘 tī 仝款視寸尺 ê 變化。另外閣有一个好處，咱會當 tī 月相距陣圖內底，揣著 離近地點上倚 彼工 ê 月娘。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221001/ 影像：Tunc Tezel (TWAN) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221001.html Powered by Firstory Hosting

這个全球 ê 合作計畫，是 kā 9 月 22 春秋分點 這工無仝所在翕著--ê 相片，排列做這張引人注目 ê 拼鬥圖。這攏總有 24 ê 攝影師提供相片，是 tī 全世界 24个航海時區 翕--ê。全球 24 ê 航海時區較無一般咱咧用 ê 城市時區遐爾複雜。航海時區 ê 範圍就是 地球經度差 15 度、時間差一點鐘遮爾簡單。Ùi 正爿頂懸開始 ê 頭一張相片，是 比 協調世界時 (UTC) 加 12 點鐘 ê 航海時區翕--ê 日出。Tī 這个時區 ê 攝影師是 tī 紐西蘭 ê 基督城。咱若是徙 tùi 下跤去，就會行到西爿。咱若是徙 tùi 倒爿去，UTC 時區 ê 數字愈細，日出 ê 時間就較晏。若無，你閣有全球 tī 2022 年 9 月春秋分點翕 ê 日出 影片通看。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220930/ 影像：Luca Vanzella 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220930.html Powered by Firstory Hosting

衝擊實驗 15 工 前，DART 太空船內底裝一台細台衛星伴，主要是欲用來紀錄這个歷史上 行星防衛技術 ê 演示。這台「輕型意大利 小行星成像 立方衛星」是意大利太空總署提供--ê，嘛叫做 LICIACube，有紀錄著衝擊過了 ê 影像。這張影像上正爿遐有翕著物件噴出來，這是 DART 衝擊實驗挵著 小行星 Dimorphos 幾若分鐘內，tī 80 公里遠 ê LICIACube 翕著 ê 影像。小行星 Dimorphos ê 直徑有 160 公尺長，伊是踅 直徑 780 公尺長 ê 小行星 Didymos 咧行 ê 衛星，這馬離咱地球差不多有 1100 公里遠。小行星 Didymos 就 tī LICIACube 影像中央倚正爿遐。紲落來幾若禮拜，地面望遠鏡會繼續觀測 踅小行星 Didymos ê Dimorphos ê 小變化，看 DART 衝擊實驗是毋是有 kā 咱 ê 目標挵歪去，才有法度 判斷 這个實驗是毋是有效率。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220929/ 影像：ASI / NASA 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220929.html Powered by Firstory Hosting

地球有偌濟成份是水？實際上，足少--ê。雖罔講 海洋 佔地球表面 70 葩，in kah 地球半徑比起來其實是 足淺--ê。這張插圖 有畫予咱看，咱若是 kā 地球表面 kah 附近所有 ê 水，攏收集做一粒 水球，會變做啥款。這粒水球 ê 半徑是干焦 700 公里爾爾，比咱 地球 ê 月娘 半徑 ê 一半閣較細。毋閣是比土星 ê 月娘，土衛五 Rhea，較大淡薄仔。Rhea kah 咱 太陽系 內底其他衛星仝款，主要是水冰組成--ê。這粒大粒水球邊仔較細粒 ê 水球，是 地球 表面所有液態淡水。上細粒 ê 水球，是地球表面 ê 淡水湖 kah 河川。這寡 水 是按怎來到 地球--ê？是毋是閣有大量水藏 tī 地表下底？攏是咱欲研究 ê 主題。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220926/ 插圖來源：Jack Cook, Adam Nieman, Woods Hole Oceanographic Institution 資料來源：Igor Shiklomanov 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220926.html Powered by Firstory Hosting

這个鴟鴞星雲 ê 塗粉雕塑這馬當咧蒸發。較強 ê 恆星光 kā 較冷 ê 宇宙山脈 吹薄了後，賰--ê 予雕出來--ê 雲柱，可能會 hŏng 一寡想像，叫是講彼是一陣 神祕 ê 野獸。這張 相片是 鴟鴞星雲 內底幾若支 引人注目 ê 塗粉雲柱 ê 其中一支。這支去 hŏng 講，伊有成一个巨型 仙女。是講這个仙女有 10 光年 懸，而且會噴出比 普通 ê 火 閣較燒 ê 輻射。這个 較大 ê 鴟鴞星雲 M16，實際上是巨型 ê 氣體 kah 塗粉 ê 蒸發殼。這內底是咧脹大 ê 閬空，閬空內底是壯觀 ê 恆星托兒所，這馬當咧形成 開放星團。這个較大 ê 雲柱離咱有 7000 光年遠，差不多會 tī 10 萬年內底就會 蒸發了了。這張相片 是踅地球--ê Hubble 太空望遠鏡 翕--ê，這組色彩是為著科學目的，重新配色--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220925/ 影像：NASA, ESA, The Hubble Heritage Team (STScI/AURA) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220925.html Powered by Firstory Hosting

2022 年 9 月 23 拜五 世界協調時 1:03，是太陽 tī 地球天頂路線 kah 天球赤道交叉，向南方行去 ê 時陣。天文上就是按呢咧定義 逐年 九月 ê 春秋分點。這个時陣開始，tùi 咱這个 美麗地球 ê 北半球來講就是秋天，tùi 南半球來講就是春天。這工 ê 日時 kah 暗暝差不多是平長。是講，你若是欲慶祝 天文定義 ê 換季，你會當欣賞日出，嘛會當欣賞這个佛光。這个雲造成 ê 烏影投影，會 tī 日出抑是日落、晨昏交界 ê 時陣，產生戲劇性 ê 景色。因為透視效應，平行 ê 烏影敢若是 ùi 日出 ê 方向射過來--ê。這工閣是 tī 春秋分點前後，所以 遐 就 tī 地平線 正東 ê 方向。這張相片是 9 月 15 這工 tī 意大利 Petacciato 庄頭附近 ê 地中海海岸翕--ê。有翕著日出這陣 ê 天景 kah 海景，包括天頂 ê 佛光 kah 海面 ê 反射。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220924/ 影像：Donato Lioce 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220924.html Powered by Firstory Hosting

你若是 tī 咱 ê 宇宙內底旅行，壯麗 ê 星際塗粉雲看起來就親像是去予 恆星風 kah 輻射雕塑出來 ê 藝術品。馬頭星雲 這个名號了袂䆀，伊就藏 tī 大型閣複雜 ê 獵戶座星雲 (M42) 內底。這是一个 家己 欲用細台望遠鏡較無遐爾好揣，毋閣若是揣著會足歡喜 ê 天體。這張 tī 紅外線波段 有 精美細節 ê 相片，是踅地球行 ê Hubble 太空望遠鏡 翕--ê。這个 烏暗分子雲 差不多離咱有 1500 光年 遠，伊嘛去予編做 Barnard 33。咱會看著伊，主要是因為伊 ê 後壁有光，彼是 ùi 附近 ê 大質量恆星 獵戶座 σ 來--ê。馬頭星雲 ê 形體會 tī 紲落來幾若百萬年沓沓仔改變，落尾會去予 高能恆星光 破壞去。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220921/ 影像來源：NASA, ESA, Hubble 資料處理：Alexandra Nachman 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220921.html Powered by Firstory Hosting

這張足清楚 ê 近紅外線相片是 James Webb 太空望遠鏡 翕--ê，中央有翕著 有環 ê 冰巨行星，海王星。這个暗淡 ê 遙遠世界是 離太陽上遠 ê 行星，差不多是地球到太陽距離 ê 30 倍遠。毋閣 tī 這个精彩 ê Webb 影像內底，這粒行星 暗甲親像是幽靈仝款，這是因為大氣層內底 ê 甲烷 kā 紅外線吸收了了。海王星表面大部份會吸收甲烷，伊頂懸 ê 懸雲，tī 這張相片內底嘛足明顯--ê。海王星上大粒 ê 衛星 海衛一 Triton 就 tī 這張 Webb 影像倒爿頂懸 ê 繞射光尖 遐。因為伊 ê 表面是堅凍 ê 窒素，所以伊比海王星反射太陽光閣較光。這張相片內底有 去 hŏng 揣著 海王星 14 粒衛星 ê 其中七粒，嘛包括海衛一 Triton。海王星 ê 環無遐爾光，伊就 tī 這張新翕--ê 太空行星肖像內底。這个複合環系統，是頭一擺翕甲遮爾清楚。頂擺翕著伊--ê，是 1989 年 8 月 ê 航海家 2 號太空船。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220923/ 影像：NASA, ESA, CSA, STScI, NIRCam 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220923.html Powered by Firstory Hosting

你若是逐工仝一个時間 tī 外口仝一个所在 kā 太陽翕一張相，毋知太陽 tī 天頂 ê 位置會無仝無？欲回答這个問題，上緊 ê 方式是看 日行軌跡，就是 tī 一冬內仝一个所在仝一个時間翕--ê 合成相片。這張日行軌跡 是 tī 英國 蘇格蘭 Outer Hebrides 群島 Callanish 庄附近，kā 每幾若工就 tī 中晝翕--ê 相片合成--ê。前景是 Callanish 岩石陣，是 西元前 2700 ê 一組岩石箍仔，彼陣猶是人類 ê 青銅時代。咱毋知影這陣 Callanish 岩石陣 按呢排，是毋是有啥物天文意義。日行軌跡會生做這个 8 字形，是因為 地球自轉軸趨一个角度，而且地球踅 太陽 ê 軌道 是 長株圓--ê。到 冬夏至點 ê 時陣，太陽會出現 tī 日行軌跡上懸點抑是上低點。這張相片是冬至彼陣翕--ê，所以太陽會出現 tī 上低點。到 春秋分點 ê 時陣，太陽會出現 tī 日行軌跡 ê 中央點，毋閣毋是 tī 交叉點。這禮拜五 世界時 半暝 1:04（美洲 是拜四）是 秋分點，這工 ê 日時 kah 暗時平長。Tī 足濟文化內底會 tī 春秋分點 這工 慶祝 換季。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220918/ 影像：Giuseppe Petricca 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220918.html Powered by Firstory Hosting

天頂彼寡紅色雲絲是啥物？In 是真罕得看著 ê 爍爁，叫做 紅色精靈，是 35 年前才發現--ê。研究結果 表示，紅色精靈 是足強 ê 正電 雲對地爍爁。是 100 公尺大細 ê 電離空氣球 用 10 葩 光速 ê 速度 ùi 80 公里懸 ê 所在射落來，產生 ê 雷擊。In 隨就 產生一陣 peh-升 ê 電離空氣球。這張影像 是頂個月 tī 捷克共合國 Moravia 北爿 ê Jeseniky 山 翕--ê。遮離 紅色 精靈 差不多有 200 公里遠。紅色精靈 ê 出現，干焦 幾若分之一秒 ê 時間爾爾，而且愛 tī 邊仔有 足強雷暴 出現 ê 時陣才看較有。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220912/ 影像：Daniel Ščerba 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220912.html Powered by Firstory Hosting

這張彩色肖像 ê 頂懸，是這个 坎坎坷坷月球 ê 南極區。這工是 8 月 20，月球行到下半月。這張是 kā 影片 ê 影格資料 kah 相片影像疊做伙--ê。這是 tī 澳洲 南 Wales 省 ê Springrange 翕--ê，拄仔好有翕著 中國 天宮太空站 ê 凌月現象。這張 國際太空站 ê 凌月現象，是一目𥍉就無--去矣。因為 伊 ùi 這个去予日光照甲遮爾光 ê 月盤 面頭前飛過，毋免一秒鐘 ê 時間。伊踅地球軌道咧行 ê 懸度是 400 公里懸。是講，月娘離地球是 40 萬 公里遠。較光彼爿 ê 彩色月球表面是 kā 幾若張影格影像 疊做一張--ê。月球表面 ê 化學成份無仝，咱目睭是看無。毋閣相片是有按照月球表面 ê 化學成份 kā 漆做無仝色。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220825/ 影像：Lucy Yunxi Hu 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220825.html Powered by Firstory Hosting

自由女神 星雲是發生啥物代誌？遮當咧形成 明亮 ê 恆星 kah 產生 趣味 ê 分子。這个 tī 恆星形成區內底 ê 複雜星雲 叫做 RCW 57。伊毋若有成自由女神，嘛有成 咧飛 ê 超人、抑是 咧哭 ê 天使。用數位處理 ê 方式 kā 相片內底 ê 恆星提掉，閣 重新配色。內底有展示 烏暗星際塗粉 中足實密 ê 雲丸、去予恆星 kā 水素氣體 離子化 ê 發光氣體、kah 去予死亡恆星噴出來 ê 大型氣體箍仔。這个 tùi NGC 3576 較細節 ê 研究，包括 NGC 3582 kah NGC 3584，有看著其中 33 粒大質量恆星演化到上尾階段 ê 模樣，嘛確實有揣著複合碳分子，叫做 多環芳烴 (PAHs)。PAHs 去 hŏng 認為講，伊是 ùi 恆星形成區 內底較冷 ê 氣體製造出來--ê。而且 PAHs tī 50 億年前 做太陽 ê 星雲 內底出現，tùi 地球 發展性命 來講，是真重要 ê 一步。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220920/ 影像：Chris Willocks 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220920.html Powered by Firstory Hosting

這張美麗 ê 相片是有層次--ê。下跤第一層是 西班牙 Barcelona 省 Manlleu ê 美麗庄頭。這張 6 分鐘 ê 感光，予車燈成做一巡一巡 ê 光跡。第二層是歐洲有名 ê Pyrenees 山脈內底 ê Serra de Bellmunt 山。第三層是 ùi 典型 ê 鐵砧雲 發出 ê 巨型爍爁風暴。較長時間 ê 感光，會當翕著足濟錯綜複雜 ê 雷公爍爁。上頂層上遠--ê 是天頂遙遠 ê 恆星。這是用幾若分鐘 ê 感光時間翕--ê，予恆星 tī 天頂拖出 光跡。會產生這个光跡，是因為地球咧自轉，所以這个 光跡 ê 曲度 就表示 in kah 地球 ê 天北極 離偌遠。這張相片是 tī 六月初 日頭落山了後翕--ê，這个 爍爁 風暴隨就無去矣。是講只要 地球繼續自轉，這寡恆星就會 tī 未來 幾若十億年，一直繼續 踅天北極。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220919/ 影像：Marc Sellés Llimós 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220919.html Powered by Firstory Hosting

這是 kā 毅力號探測車 ê Mastcam-Z 相機 tī 2022 年 8 月 4 號翕 ê 相片鬥出來 ê 拼鬥影像。火星面頂這个 扇形三角洲，是幾若十億年前河水 流 tùi Jezero 隕石坑 造成--ê。Kah 車平大台 ê 機器人，這馬猶咧繼續探索這个所在。Tī Jezero 隕石坑 三角洲內底 保留落來 ê 沉積岩，應該是火星面頂上適合揣古早微生物是毋是捌 tī 遐出現 ê 地點。遮進前才有探測車來挖過標本，分別是野貓嶺 kah Skinner 嶺，就 tī 這張相片 倒爿下跤 kah 正爿頂懸。Ùi 這寡所在提著 ê 標本，有封 tī 超級清氣 ê 標本管內底，未來會利用別个火星任務 kā in 提 轉來地球。Tī 火星面頂利用機器人探索，是 ùi 1997 年 ê 探路者 任務 kah 火星全球探勘者 任務 開始--ê。這 25 年來一直繼續有機器人踮這粒紅色行星面頂探索，包括 軌道衛星、登陸器、探測車、kah 一台地球送過去 ê 直升機。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220917/ 影像：NASA, JPL-Caltech, MSSS, ASU 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220917.html Powered by Firstory Hosting

蜘蛛星雲 嘛號做 劍魚座 30，伊 ê 直徑有超過 1000 光年長，是 tī 咱 ê 衛星星系 大麥哲倫星系 內底，一个大型 ê 恆星形成區。伊離咱有 18 萬 光年遠，是規个本星系群內底，上大、上激烈 ê 恆星形成區。這隻宇宙蜘蛛實在是有夠壯觀--ê，這是 kā 地面望遠鏡翕著 ê 大範圍夜空 資料組合起來 ê 合成相片。Tī 蜘蛛星雲 (NGC 2070) 內底，有 ùi 中央 少年大質量星團強輻射、恆星風、超新星衝擊。伊嘛去 hŏng 編做 R136，會當提供能量予星雲發光、雕出這个蜘蛛雲絲。蜘蛛星雲附近，有另外一个恆星形成區，內底有少年星團、雲絲、kah 去 hŏng 歕出來 ê 氣波雲。實際上，這張相片內底 ê 正爿下跤，有一粒目前離咱上近 ê 超新星，SN 1987A。這張豐富視場有 2 度闊，嘛會使講是 4 粒月娘 ê 大細，就 tī 南方 ê 劍魚座 遐。毋閣咱若是 kā 蜘蛛星雲囥較近咧，比論講囥踮 1500 光年遠 ê 所在，差不多是到咱銀河系 獵戶座星雲 恆星形成區 ê 距離，按呢天頂就會有一半攏是伊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220916/ 資料處理：Robert Gendler 資料來源：Hubble Tarantula Treasury, European Southern Observatory, James Webb Space Telescope, Amateur Sources 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220916.html Powered by Firstory Hosting

Tùi 北半球 ê 居民來講，九月 ê 月圓 就是收冬月。這張 望遠鏡景色 是 9 月 9 號翕--ê。這粒 日落光反射溫暖色調 ê 月娘就 tī 一个歷史久長 ê 庄頭 Castiglione di Sicilia ê 天頂。收冬月 是秋分前後 ê 月圓日，這是一个傳統節日。這當陣上重要 ê 代誌，是慶祝、講古、kah 唱歌。根據傳說，這个名予了袂䆀。雖罔講秋季是欲煞矣，日時 ê 時間嘛愈來愈短。毋閣做穡人猶是會當 ùi 天色欲暗到天光進前，利用月圓時 ê 月光 來採收。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220915/ 影像：Dario Giannobile 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220915.html Powered by Firstory Hosting

大蝎虎星雲是天頂上大 ê 星雲之一，是講咱以前哪會無啥注意著？伊 kah 仙女座星系 ê 角寸尺差不多平大，咱會當 tī 四跤蛇星座（蝎虎座） 揣著伊。咱若是用雙筒千里鏡，欲揣 發射星雲 是有較困難，因為伊 足暗--ê。毋閣就算是用大型天文望遠鏡嘛真歹揣，因為伊 ê 角寸尺傷大矣，差不多有 3 度 闊。這个星雲去 hŏng 編做是 Sharpless 126 (Sh2-126)，伊 ê 深度、闊度、雲波、kah 美麗，會當利用 kha-mé-lah 長時間感光 kā 翕落來欣賞。這是一張組合相片，是 kā 今年六、七月彼陣 tiàm 西班牙 IC 天文台 開 6 暗 ê 時間，用 5 種無仝色光 ê 濾光片，攏總翕 10 點鐘久 ê 時間，疊出來 ê 影像。Tī 大蝎虎星雲內底 發紅光 ê 水素 氣體，是去予 蝎虎座 10 這粒足光 ê 恆星激發--ê。伊就 tī 這个發紅光 ê 星雲中央，彼粒上光 ê 藍光星。這寡恆星 kah 星雲 離咱有 1200 光年 遠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220914/ 影像來源 kah 版權：Jarmo Ruuth, Telescope Live 文稿：Ata Sarajedini (Florida Atlantic U., Astronomy Minute podcast) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220914.html Powered by Firstory Hosting

航海家一號 kah 航海家二號 是 1977 年發射--ê，是一个 拜訪太陽系外部行星 ê 偉大旅程。伊是 ùi 地球發射 ê 太空船 內底，運作上長，嘛飛上遠 ê 太空船。In 兩台攏已經 飛到太陽圈外口矣。太陽圈 ê 定義就是太陽風 kah 太陽磁場影響會著 ê 範圍。航海家一號 kah 航海家二號飛向其他恆星 ê 旅程，已經是 第 45 冬矣。而且是目前為止，探索星際太空 唯二 ê 兩台太空船。In 這馬 kah 太陽 ê 距離分別是 22 光時 kah 18 光時。逐台太空船攏有載 12 英尺大、淋金水 ê 銅唱盤，內底有記錄聲音、相片、kah 留話。做 這塊金唱盤 ê 目的，是欲 kah 別个所在 ê 文明講，地球面頂 ê 性命 kah 文化是生做按怎。這寡記錄 tī 媒材 ê 資訊，會當 tī 星際旅行保存 十億年 遐爾久。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220909/ 影像：NASA, JPL-Caltech, Voyager 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220909.html Powered by Firstory Hosting

毋知你上佮意 ê 行星 ê 自轉是啥物款--ê？伊敢是踅足緊--ê？伊 ê 自轉方向是墜直--ê？坦平--ê？抑是踅倒爿--ê？這支影片 有 kā NASA 翕--ê 太陽系 八粒行星 影像畫做動畫，按呢咱就會當看著 in 排做一排做伙自轉，咱嘛較好做比較。Tī 這支 縮時攝影影片 內底，地球 ê 一工，就是地球自轉一輾，才幾若秒爾爾。木星 自轉 ê 速度較緊，金星 自轉毋若較慢（是講你敢看有），而且是踅倒爿--ê。動畫頂半爿是岩石質 ê 太陽系內行星，大部份應該是 tī 太陽系形成早期 kah 其他天體有 激烈 ê 相挵，造成自轉方向改變。這寡行星 ê 自轉 kah 趨角是按怎變做這馬按呢，是一个 研究主題。這會當 ùi 現代 電腦模擬 kah 最近發現--ê 幾若百粒 系外行星 ê 分析，得著啟發。系外行星就是 踅其他恆星咧行 ê 行星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220911/ 影片：NASA 動畫：James O’Donoghue (JAXA) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220911.html Powered by Firstory Hosting

這个 180 度 ê 夜空全景圖，是 tī 八月 ê 寒天暗暝翕--ê。咱 ê 銀河系 就 tī 地平線面頂，成做一个彎弓橋。Tī 半暝左右，銀河中心會行到「天頂點」附近。前景是清氣 ê Traful 湖，就 tī 南美洲 阿根廷 Neuquen 市遐。黃道光 是 太陽系黃道面 面頂 ê 塗粉，去予日光反射 ê 光。咱會當 tī 烏-mih-mà ê 所在，看著這个黃道光。這條 tī 天頂較暗 ê 黃道光，ùi 遠方 ê 雪山山尖，迵 tùi 銀河 ê 中心去。綴銀河 ê 彎弓橋行，一直向倒爿去，咱就會當揣著南半球 ê 恆星標誌，半人馬座 α kah 半人馬座 β。Tī 地平線附近，反射平靜山湖、較光 ê 彼粒星，是織女星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220910/ 影像：Gerardo Ferrarino 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220910.html Powered by Firstory Hosting

咱地球面頂 愛好天星 ê 迷眾，看著這寡 宇宙雲 ê 外形，可能認會出 in 是啥物。倒爿彼个去予烏暗塗粉帶閘光 ê 發射星雲，因為伊看起來親像是一个大陸 ê 形體，所以才會去予號做 北美洲星雲。伊 tī 星表目錄內底去予編做 NGC 7000。正爿彼个 tī 北美洲星雲東岸外口 ê 是 IC 5070。伊看起來敢若是一隻鳥仔 ê 外形，所以 才會去予叫做 鵜鶘星雲。這兩个不哩仔光 ê 星雲，互相 ê 距離是 1500 光年。In 是仝一个 大型複雜 恆星形成區 ê 一部份，就 chhāi tī 另外一个較有名 ê 獵戶座星雲 ê 附近。Tī 這个距離，視野 3 度闊差不多是 80 光年長。這張詳細 ê 宇宙肖像 是用狹頻資料組合出來--ê。主要是欲強調較光 ê 游離邊界 kah ùi 水素原子、酸素氣體 發出 ê 特徵光。咱 tī 烏-mih-mà ê 所在，用雙筒千里鏡就會當看著這个星雲。北天 ê 熱天 暗暝 有一隻天鵝 tī 天頂咧飛，彼就是天鵝座。咱若是 ùi 東北爿看去，就會當看著天鵝座內底 上光 ê 天津四。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220908/ 影像：Frank Sackenheim 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220908.html Powered by Firstory Hosting

咱附近 ê 恆星形成區中央有大質量星團，內底有一寡目前咱所知影 上大上高溫 ê 恆星。In 就叫做 NGC 2070 星團，這寡恆星是大型 ê 蜘蛛星雲 ê 一部份。這張相片是新 ê Webb 太空望遠鏡 ê 兩種 紅外線波段 翕--ê。主要 ê 影像 是 tī 近紅外線波段。這是 NGC 2070 中央 ê 星群，叫做 R136，這个光 tùi 人類 來講，敢若是有傷紅。毋閣，你若是 kā 你 ê 滑鼠 ùi 影像面頂趨過，你就會當看著這个星團 tī 中紅外線 ê 影像，這个光是較倚 電波波段。因為 R136 內底 上光 ê 恆星發出 ê 光有較濟攏 tī 近紅外線，所以這張相片才會看起來 遮爾出眾。伊是 tī LMC 內底 ê 星團。星團內底 ê 大質量恆星，會發出 粒子風 kah 高能光。雖罔講 這寡恆星是 ùi 氣體雲做出來 ê，毋閣落尾 in 猶是會 kā 氣體雲蒸發去。這張 Webb 翕 ê 相片 是昨昏發表--ê。咱看會著 R136 ê 細節 kah 伊邊仔 ê 環境，這是人類以前毋捌看過--ê。這寡細節會當幫贊人類閣較了解恆星是 按怎出世、按怎演化、kah 按怎死亡--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220907/ 影像：NASA, ESA, CSA, STScI, Webb ERO Production Team 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220907.html Powered by Firstory Hosting

是講，毋知有偌濟烏雲有彩色 ê 內裡？這張相片內底，tī 烏雲後壁--ê，是一个有 虹彩 ê 頭巾雲。彼是一陣差不多平大粒 ê 水滴，因為 tùi 無仝色光 ê 日光 做伙 產生 繞射 ê 量無仝，才會產生按呢 ê 現象。這張相片 是頂個月 tī 中國 雲南省 普洱市 翕--ê。嘛有翕著 tī 頭巾雲頂懸彼个無四常 ê 雲 波。這款 頭巾雲 實在是真罕得看著，伊就崁 tī 一般 積雲 面頂。會變做這形，是因為較低 ê 雲 peh 懸 ê 過程會 擴大。是講，伊落尾嘛有可能發展做 暴風雨。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220906/ 影像：Jiaqi Sun（孙嘉琪） 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220906.html Powered by Firstory Hosting

這个絕壁是恆星創造出來--ê。尤其這个 ùi 開放星團 NGC 3324 內底 ê 恆星吹出來 ê 破壞性恆星風 kah 高能光，會 kā 龍骨座星雲 北爿 內底 烏暗星際塗粉雲山 ê 一部份 侵蝕去。這張遮爾清楚 ê 相片 是最近 James Webb 太空望遠鏡 翕--ê，伊是目前為止 發射 到太空 ê 上大台天文望遠鏡。咱會當看著相片頂懸有幾若粒恆星。Webb ê 大塊鏡 kah 伊 tī 紅外線波段 會當穿透塗粉 ê 能力，予伊有法度翕著 塗粉迷人 ê 細節、藏 tī 塗粉內底 ê 幾若百粒星、kah 一寡 遠方 ê 星系。Tī 龍骨座內底有 khih-khih ê 絕壁，這部份 就叫做 Gabriela Mistral 星雲。因為咱若是 ùi 另外一个方向看，伊看起來就親像是一个 有名 ê 智利詩人 ê 面。這个星雲絕壁 tī 7600 光年 遠 ê 所在，就 tī 龍骨座 ê 方向遐。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220905/ 影像：NASA, ESA, CSA, STScI 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220905.html Powered by Firstory Hosting

愛看著發藍光 ê 沙，是愛經過足濟過程。這款 kā 海湧照予光 ê 藍光，是 生物發 ê 光。這个超現實主義 ê 景色，是 2018 年中 tī 美國 Oregon ê Meyer's Creek 海岸 翕--ê。前景 ê 海岸有 足濟火山，薄薄 ê 雲霧 kā 地平線 ê 光散射去。Tī 倒爿地平線放射出來 ê 光線，是 Oregon 海岸 高速公路 (US 101) 面頂咧走 ê 車 ê 車燈。正爿地平線發出 ê 柑仔色光，是漁船 ê 電火。咱閣看會著遙遠夜空 ê 銀河系 光帶，ùi 烏色岩石後壁沓沓仔 peh 起來。這張是 kā 16 張影像疊做伙 ê 相片，這是為著欲 降低 雜訊，予 背景 ê 銀河 較清楚咧。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220904/ 影像：Rudy Montoya 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220904.html Powered by Firstory Hosting

8 月 25 這工，咱日時會當 tī 天頂看著日頭 kah 月娘。咱嘛仝款會看著 國際太空站 ISS。Tī 中國北京順義區 中晝 11:02 ê 時陣，ISS ùi 月球面頭前飛過。這陣 ê 月娘是下月眉。另外 tī 順義區西南爿 40 公里遠 ê 豐臺區 嘛看著 ISS ùi 太陽盤面頭前飛過。這个凌日 ê 過程才 29 秒鐘爾爾。這幅圖 kā 凌日 kah 凌月 ê 相片囥做伙。這兩張相片分別是 tī 彼兩个所在翕--ê。是 kā 影片內底 ê 影格影像，疊疊咧、處理理咧，才組合做這幅圖。欲協調翕出這兩張相片，愛用無仝設備，予太陽 kah 月球看起來平大。這个 ISS ê 大細，ùi 凌月 現象算出來--ê，是 435 公里。Ùi 凌日 現象算出來--ê，是 491 公里。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220903/ 影像：Wang Letian (Eyes at Night), Jin Ma (Beijing Planetarium) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220903.html Powered by Firstory Hosting

這个望遠鏡景色 是一个光 iàⁿ-iàⁿ ê 發射線區。Ùi 遮看出去，是咱銀河盤面頂 有足濟星雲 ê 天鵝座。這个發紅光 ê 星際氣體塗粉雲，一般人攏 kā 叫做鬱金香星雲。伊嘛有 tī 天文學家 Stewart Sharpless 1959 年編 ê 目錄 內底，叫做 as Sh2-101。這个複雜美麗 ê 鬱金香星雲差不多有 70 光年闊。這蕊花就開 tī 8000 光年遠 ê 所在。Tī 天鵝座上邊仔 ê OB3 星協 內底有 O 型星 HDE 22701。這寡少年高能 ê 恆星發出紫外光輻射，kā 鬱金香星雲內底 ê 原子 離子化，驅動發射線。這个視野內底閣有 微類星體 天鵝座 X-1，是天頂上強 ê X-光 天體之一。Tī 這个宇宙鬱金香花葉 ê 正爿，咱會當看著較暗較藍 ê 衝擊波，彼是 ùi 藏 tī 星雲內底 ê 烏洞 噴出來 ê 噴流 驅動--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220901/ 影像：Peter Kohlmann 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220901.html Powered by Firstory Hosting

這個月初，有記錄表示太陽面頂出現足長 ê 太陽絲。咱會當 tī 相片中央看著蛇形 ê 太陽絲，就是彼个較光--ê，彎彎曲曲 ê 弧形結構。這規條是比 太陽 半徑 ê 一半閣較長，差不多有超過 35 萬公里。太陽絲是 太陽磁場 tī 太陽表面較懸 ê 所在 聚集燒氣體 組成 ê 結構。所以咱若是 ùi 邊仔看，伊就變做是一个 咧 peh-升 ê 日珥。咱閣會當 tī 太陽邊界看著一个無仝--ê、較細 ê 日珥。這張相片 是假色影像，而且是倒反色--ê。按呢做，毋若會當強調 太陽絲 ê 結構，而且嘛會當看著 敢若是 地毯 材質 ê 太陽 色球層。倒反頂懸 ê 光點實際上是 太陽烏子，差不多是 kah 地球平大粒。一般講來，太陽絲 會當擋幾若點鐘久，落尾伊會崩塌變做高溫 電漿，落轉去太陽。是講，有當時仔，in 會 爆炸 噴出粒子 到 太陽系，有一寡仔會驅動地球產生 極光。這張相片 內底 ê 太陽絲是 9 月初出現--ê，而且會 擋 一禮拜久。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220913/ 影像：Alan Friedman (Averted Imagination) 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220913.html Powered by Firstory Hosting

是啥人 tī 火星面頂做出這个奇怪 ê 山崙？無人知影。Siccar 角 tī Gale 隕石坑 內底，kah 伊邊仔 ê 地形比起來是有較尖，伊是一个袂䆀 ê 觀景點。Tī 火星 面頂走傱 ê 好奇號 機器人探測車，進前捌來過這个奇怪 ê 山崙仔。Siccar 角 毋若有出眾 ê 外形，tī 較淺色 ê 岩石頂懸閣有較深色 ê 岩石。深色岩石看起來較少年，表示講這个 tī 一般岩石層 ê 地質順序 有斷去，毋閣這个過程咱 並無了解。這个 火星山 ê 名，是用地球 ê Siccar 角 號名--ê。彼是一个 tī 蘇格蘭 足出眾 ê 地點，kā 兩个無仝 ê 岩石層連起來。好奇號 會繼續 tī 火星面頂探索 Gale 隕石坑，揣看有性命ê線索無。仝這个時間，2300 公里遠 ê 所在有伊 ê 姊妹伴 毅力號 探測車 當咧探索 Jezeor 隕石坑。毅力號閣有一台 會飛 ê 偵察兵 獨創號 咧協助伊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220831/ 影像來源：NASA/JPL-Caltech/MSSS 資料處理 kah 許可: Kevin M. Gill 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220831.html Powered by Firstory Hosting

這張木星 ê 新相片當咧發光。這是新 ê James Webb 太空望遠鏡 (Webb) 翕 ê 高解析度 紅外線 木星 影像。咱會當看著咱進前毋知 ê 部份，比論講 浮懸較光 ê 雲（嘛包括 大紅斑）kah chhāi 低較暗 ê 雲 有啥物無仝。這張 Webb 影像 嘛會當清楚看著 木星 ê 塗粉環，南北極較光 ê 極光，閣有木星 ê 衛星，木衛五 Amalthea kah 木衛十五 Adrastea。有大火山 ê 木衛一 Io，伊頂懸 ê 帶電粒子 ùi 磁場漏仔送到 木星 ê 南極，就變做 咱看著 ê 極光。有一寡天體是遮爾光，予光 tī Webb ê 光學系統 附近出現 繞射效應，產生 光巡。Webb 是 tī 地球邊仔 踅太陽咧行 ê 太空望遠鏡。伊 ê 鏡是超過 6 公尺闊，是 目前為止 發射出去 ê 天文望遠鏡內底上大--ê，是 Hubble 收集光線能力 ê 15 倍大。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220830/ 影像來源：NASA, ESA, CSA, Jupiter ERS Team 資料處理：Ricardo Hueso (UPV/EHU) & Judy Schmidt 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220830.html Powered by Firstory Hosting

Tī 獵戶座內底彼个有名 ê 馬頭星雲，毋是孤單--ê。較深 ê 感光影像 kā 咱講，相片正爿中央這个咱熟似 ê 烏暗區，是吸收 塗粉 kah 發光氣體 大型複合體 ê 一部份。這張 壯觀 ê 相片 kā 咱詳細介紹這个錯綜複雜 ê 宇宙壁毯。這內底 ê 氣體 雲絲，是 恆星風 kah 古早時代 ê 超新星 創作、雕出來--ê。馬頭星雲 ê 倒爿彼个柑仔色--ê，就是 火舌星雲。為著欲強調塗粉 kah 氣體，大部份 ê 恆星 已經用 數位方式 kā 徙走矣。毋閣猶是有留一寡仔，親像是火舌星雲頂懸 ê 參宿一。伊是 獵戶座皮帶，就是排規排 ê 彼三粒星內底，上正爿彼粒。馬頭星雲 就 chhāi tī 獵戶座 ê 方向遐，離咱有 1500 光年 遠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220829/ 影像：George Chatzifrantzis 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220829.html Powered by Firstory Hosting

對一寡人來講，這个看起來敢若是車輪。實際上，因為伊看起來敢若欲湠出去 ê 款，按呢中央 ê 星系 kah 相連氣體看起來就親像是輪仔 ê 鋼條，所以正爿彼个星系就叫做 車輪星系。毋閣對別人來講，這个看起來親像是星系 kah 星系之間足複雜 ê 交互作用，咱這馬猶毋是蓋清楚到底發生啥物代誌。車輪星系 kah 倒爿彼兩个星系是 仝一陣--ê，in 離咱差不多 5 億 光年遠，就 tī 玉夫座 遐。較大彼个星系，伊 ê 框有 10 萬 光年 闊。是幾若个恆星形成區組成--ê，內底攏是足光、足大質量 ê 恆星。車輪星系 ê 環形結構，是重力去 hŏng 破壞 ê 結果。有一个較細 ê 星系 ùi 較大 ê 星系中央迵過，壓縮星際氣體 kah 塗粉，產生 恆星形成 波，kā 物質捒出去，就親像是水窟仔表面產生 水波 仝款。這張 車輪星系 相片，是最近用 Webb 太空望遠鏡 翕--ê。咱會當看著 新 ê 細節：毋若會當看著新 ê 恆星做出來，閣會當看著星系 中心烏洞 附近 ê 運動情形。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220824/ 影像來源：NASA, ESA, CSA, STScI, Webb ERO Production Team 老師 kah 學生：Ideas for utilizing APOD in the classroom 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220824.html Powered by Firstory Hosting

有細膩 ê 計畫，才有法度翕出這張 hŏng 放袂記 ê 夜景。代先，會揀這工，是因為這是 今年英仙座流星雨 拄開始 ê 時陣。閣來，會揀暗暝這个時間，是因為 光-iàⁿ-iàⁿ ê 月娘 這陣猶未 peh--起來。若無，伊會傷光，干焦看伊就飽矣。這个前景就敢若親像是一幅圖，會揀遮，是因為 法國 Le Dramont 這爿 ê 地中海 是岩石海岸。而且 tī 這个時間，金仔 島 會出現 tī 銀河 系 中央帶 欲落去 ê 方位。萬事攏安排好勢了後，天氣嘛誠配合，這个看起來 敢若超現實 ê 夜景，就 tī 15 分鐘內底完成。毋閣有一項你 看袂著。這暗，天文攝影師嘛 kā in 老爸 chhōa 來矣。雖罔講 in 老爸 tùi 現代天文攝影技術無遐爾熟，毋閣伊以前捌 教伊 ê 囡仔認捌這个夜空。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220823/ 影像：Julien Looten 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220823.html Powered by Firstory Hosting

咱 ê 地球敢是愈來愈熱？Kah 過去 2 億 5000 萬年比起來，地球這馬是 tī 較寒 ê 時期，應該是比平均較低 攝氏 4 度左右。毋閣氣候資料 kā 咱講，過去 120 冬來，地球平均溫度已經 peh 懸 1 度左右矣。這个 視覺化 ê 影片，是 kā 地球最近 全球暖化 ê 情形，用圖形術語 ê 方式描述出來。溫度資料是 ùi Goddard 太空研究所 做--ê 表面溫度分析計畫 來--ê。已經有足濟資料表示講，地球最近 ê 暖化趨勢，是造成 海平面變懸、落雨模式改變、極區 ê 冰溶去 ê 原因。這馬是真少人無同意全球暖化當咧發生，政府間氣候變化專門委員會 (IPCC) 嘛認為講，人類已經製造暖化潮，而且這个現象 可能會繼續落去。這款現象會 tùi 足濟 地方農業，甚至全球經濟造成影響。雖罔講目前咱猶 無簡單 ê 解決辦法，毋閣有一寡 地質工程 計畫應該是有通鬥相共。這嘛包括 製造人造雲 來阻擋日光照 tī 地球表面 ê 量，予地球溫度莫遐爾懸。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220822/ 影像：NASA’s Scientific Visualization Studio 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220822.html Powered by Firstory Hosting

娘仔殼星雲內底有新 ê 星團。這个美麗 ê 星雲編做 IC 5146，差不多有 15 光年闊。這个 4000 光年遠 ê 天鵝座 tī 北天夏季夜空 peh 甲懸懸懸。伊遮爾出眾，就 kah 其他恆星形成區仝款。紅光是 水素氣體 去予少年高溫 ê 恆星激發--ê。目睭看袂著 ê 分子雲 邊仔，有 反射塗粉 ê 星光。實際上，星雲中心彼寡較光 ê 恆星干焦幾若十萬歲爾爾。伊會予星雲能量去發光，嘛會 kā 分子雲閬空內底，形成恆星 ê 塗粉 kah 氣體 掃清氣。這張相片是 tiàm 加拿大 Ontario 省 Ayr 鎮 用細台望遠鏡開 29 點鐘久 ê 時間感光--ê。所以咱會當 tī 這个美麗厚塗粉 ê 恆星托兒所 邊仔，翕著 深空 ê 彩色景色。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220827/ 影像：David Jenkins 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220827.html Powered by Firstory Hosting

毛蟹星雲 ê 核心有一粒 kah 城市平大、有磁性 ê 中子星，伊一秒鐘會自旋 30 擺。伊就叫做 毛蟹星雲脈動星，是 tī 星雲核心 這寡咧轉踅氣體 ê 中央 上光彼點。毛蟹星雲 中心彼搭 ê 發光氣體、閬空、kah 捲踅 ê 雲絲，實在是足壯觀--ê，這差不多有 12 光年闊。這張相片 是 kā 三个波段 ê 影像疊做一張--ê。Hubble 太空望遠鏡 ê 可見光 是茄仔色--ê，Chandra X-光太空天文台 ê X-光 是藍色--ê，Spitzer 太空望遠鏡 ê 紅外線 是紅色--ê。毛蟹星雲脈動星就親像是一台 宇宙發電機 仝款，伊會 予毛蟹星雲動力 產生發射線，ùi 四箍圍仔 ê 物質驅動 震波，kā 轉踅 ê 電子加速。這粒 會自旋 ê 脈動星，是大質量恆星 爆炸 了後崩塌 ê 核心。伊 ê 質量比 太陽 較大，毋閣伊 ê 密度 kah 原子核 仝款。毛蟹星雲脈動星 ê 外層，是做恆星 ê 氣體脹大 ê 殘骸。是講，地球人 tī 1054 年 ê 時陣，就捌看過 超新星爆炸矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220821/ 影像：NASA: X-ray: Chandra (CXC), Optical: Hubble (STScI), Infrared: Spitzer (JPL-Caltech) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220821.html Powered by Firstory Hosting

C/2017 K2 (PanSTARRS) 彗星 這馬 tī 天頂掃過天蠍座，是天文觀測者追蹤 ê 目標。伊這馬當咧飛 tùi 近日點 ê 方向去，會 tī 12 月 19 這工到伊 ê 近地點。彗星 ùi 8 月 18 開始，就 tī 咱 ê 深空 出現 青色 ê 彗鬚、長長白白 ê 塗粉尾溜、kah 較短 ê 離子尾溜矣。這張視野 2x3 度闊 ê 相片，有一部份是反射藍光、厚塗粉 ê IC 4592 星雲。IC 4592 嘛叫做 藍色馬頭星雲，伊離咱有 400 光年遠，毋閣 彗星離咱才 17 光分爾爾。咱頭一擺看著 C/2017 K2 彗星 ê 時陣，伊猶 tī 土星軌道後壁，當咧飛到咱 ê 內太陽系。伊是 ùi 遙遠 ê Oort 雲 來--ê 人客，是一位會當提供咱早期太陽系資訊 ê 訪客。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220820/ 影像：Rolando Ligustri (CARA Project, CAST) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220820.html Powered by Firstory Hosting

木星來矣！木星是太陽系內底上大粒 ê 行星。NASA ê 機器人太空船 Juno，是踅木星咧行 ê 太空船，伊 ê 運行軌道是搝長--ê。這支影片是 2018 前半年 翕--ê。是 ùi 近木軌道 11，就是 Juno 第 11 擺飛過木星 彼陣翕--ê。Juno 頭一擺飛到木星附近，是 2016 年中彼陣。這支加強色彩 ê 縮時攝影影片，是 kā 4 點鐘內底 ê 影像 kah 36 張 JunoCam 翕 ê 相片鬥出來--ê。這支影片 上開始，是 Juno 飛到木星附近 彼陣，木星 就 ùi Juno 北方出現。等 Juno 足倚木星 ê 時陣，差不多是 木星雲頂 3500 公里懸 ê 所在，太空船就翕著這粒大行星 足濟細節矣。Juno 飛過踅木星雲 ê 光區 kah 暗帶，閣有一大堆 tī 木星表面 捲踅 ê 圓形風暴。In 大部份攏比 地球 ê 風颱 較大。等飛過 近木點 了後，木星 會愈來愈遠，紲落來咱會看著 木星南方 彼寡無四常 ê 雲。等 Juno 提有夠伊欲愛 ê 科學資料，伊就會落落去 木星 內底。時到伊 ê 儀器就會暴露 tī 超高能輻射 ê 環境內底。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220828/ 影像：License: NASA, Juno, SwRI, MSSS, Gerald Eichstadt 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220828.html Powered by Firstory Hosting

土星是太陽系內底，咱用目睭 就會當直接看著--ê、上遠 ê 行星。這張遮爾出眾 ê 天文影像投影是 ùi 1993 年開始翕土星，翕到 2022 年為止，按呢土星踅太陽一輾，算一个土星年。你會當看著這个有環 ê 氣態巨行星 tī 一个土星年內底，按怎 tī 黃道面 面頂 行踏。這是用 29 个 地球年，逐年翕一張影像，落尾才 kā 鬥做這張相片。相片分做頂面 kah 下面兩張全景圖，主要是 tùi 黃道方向翕，閣 kah 銀河盤交叉。1993 年 ê 土星就 tī 頂半張圖上正爿 ê 摩羯座遐，逐年向倒爿徙過去。伊 tī 2022 年閣轉來到摩羯座，就 tī 下半張圖上倒爿遐。這个一致 ê 影像表示講，土星 tī 2000 - 2005 kah 2015 - 2019 之間有變較光，應該是因為美麗 ê 土星環 tī 這个時期 踅過來向咱地球這爿。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220819/ 影像：Tunc Tezel (TWAN) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220819.html Powered by Firstory Hosting

英仙座流星雨 逐年攏有，流星上濟彼工差不多是 tī 8 月 13 前後。流星是地球 ùi 週期性彗星 Swift-Tuttle 彗星 tī 天頂留落來 ê 石霎仔流 之間行過，看起來就敢若是 tī 北天熱天 ê 夜空咧落雨仝款。Tī 這張合成相片內底，月娘 tī 相片頂懸是遮爾光。毋閣就算是 月圓前後這幾工，伊猶是袂 kā 這个有名 ê 流星雨光巡閘去。這張相片是 kā 幾若張 tī 天光進前 2 點鐘 tùi 英仙座流星 短時間感光 ê 相片疊做伙--ê。流星雨 ê 輻射點是 tī 英雄星座，英仙座 遐。前景是西班牙 Girona 市 Sant Llorenc de la Muga 庄 ê 一个中世紀塔。英仙座流星雨 tī 中世紀就去 hŏng 看著矣。Tī 天主教傳統文化內底，是 kā 當做是聖人 ê 目屎。西方 ê Lawrence 節，逐年攏會 tī 英仙座流星雨上強這工附近慶祝。月圓這工，月球 kah 太陽拄仔好是 tī 地球兩爿。相片正爿頂懸遐，閣有土星咧閃閃爍爍。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220818/ 影像：Juan Carlos Casado (Starry Earth, TWAN) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220818.html Powered by Firstory Hosting