NASA 逐工一幅天文圖 APOD Taigi

御夫座 AE 這粒星 是毋是燒起來矣？無啦！雖罔講 御夫座 AEs 嘛叫做火焰星，四箍圍仔 ê 星雲 IC 405 叫做 火焰星雲，而且星雲看起來就敢若是捲螺仔 火舌，毋過遐其實 無火。一般咱咧講 火 ê 定義，是講分子 tī 足短 ê 時間內掠著 酸素，這干焦會發生 tī 酸素濟有賰 ê 環境。像恆星這款能量較懸、酸素較少 ê 環境，火就 無遐爾重要。這粒足光 ê 恆星，御夫座 AE，就 tī 火焰星雲 ê 中心附近。伊 ê 溫度是懸甲會發出藍光，光 ê 能量懸甲 kā 週邊氣體 ê 電子 踢予走。質子 重新 kā 電子掠牢 ê 時陣，就會發光，這就是你看著 tī 伊四爿 ê 發射星雲。這張相片 是三禮拜前翕--ê。火焰星雲 就 tī 這張合成影像 ê 中央，倒爿是紅色 ê 肚胿仔星雲，正爿是有藍色彗尾 ê ZTF 彗星。火焰星雲是 tī 1500 光年 遠 ê 所在，大細有 5 光年 闊。咱會當用細台望遠鏡 tī 車夫 ê 星座，御夫座遐 揣著伊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230301/ 影像：Thomas Röell 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230301.html Powered by Firstory Hosting

西元 185 年彼陣，中國天文學家 有紀錄著一粒 出現 tī 南門星官 ê 新恆星。這个天區 tī 現代星圖內底，是屬於 半人馬座 α kah β 彼區。彼馬有幾若個月，是會當直接用目睭看著這粒新恆星。這粒應該是目前歷史上上早 有紀錄 ê 超新星。這張深空望遠鏡景色 看會著發射星雲 RCW 86 ê 外形。Kah 天星滿滿 ê 背景 比--起來，咱看會出來 這應該就是恆星爆炸 ê 殘骸。這張影像是 智利 ê Cerro Tololo 美洲天文台 ê 闊幅 烏暗能量相機 翕--ê。有翕著 去予 猶咧 脹大 ê 衝擊波捒--出來--ê、皺襞襞 ê 離子氣體殼 ê 完整外形。太空影像 暗示講，RCW 86 內底有足豐富 ê 鐵元素，毋過中子星抑是脈動星 ê 殘骸內底 to̍h 無，表示講原底彼粒超新星應該是 Ia 型--ê。Kah ùi 大質量恆星 核心崩塌 變做 超新星爆炸 無仝，Ia 型超新星 是 白矮星 熱核爆炸 來--ê。這个過程會 ùi 雙星系統 ê 星伴 吸積物質過--來。是講，因為這个超新星殘骸 ê 方位是 tī 咱 銀河 盤 附近、比規粒月娘較大、閣足暗--ê，所以咱直接用目睭看是揣無。RCW 86 離咱有 8000 光年遠，大細差不多有 100 光年大。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230303/ 影像：CTIO/NOIRLab/DOE/NSF/AURA, T.A. Rector (Univ.of Alaska/NSF’s NOIRLab), J. Miller (Gemini Obs./NSF’s NOIRLab), M. Zamani & D. de Martin (NSF’s NOIRLab) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230303.html Powered by Firstory Hosting

捲螺仔星系 NGC 3169 看起來就敢若是一粒敨--開 ê 宇宙膨紗球。伊就 tī 7000 萬光年遠 ê 一个暗淡星座，六分儀座 內底，是 tī 較光彼粒軒轅十四 ê 南方。因為 倒爿 ê NGC 3169 kah 隔壁 ê NGC 3166 產生 重力交互作用 ê 關係，NGC 3169 本底虯--起來 ê 捲螺仔手骨煞去予搝--開，變做闊尾 ê 潮汐尾溜。落尾這兩个星系會合併做一个，這是 本地宇宙 內底較光 ê 星系足四常 ê 運命。咱會當 tī 這張深空 ê 星系群 彩色相片內底，看著去予搝--出來 ê 恆星弧 kah 雲煙。這是當咧進行重力交互作用 足明顯 ê 證據。這張望遠鏡影像有 20 角分闊，若是照這陣天體 ê 距離來估算，按呢差不多是 30 萬光年闊。相片正爿閣有一个 較細、反藍 ê 星系 NGC 3165。NGC 3169 ùi 電波波段 到 X 光 波段 攏足光--ê。伊 ê 中心 有 一粒活跳星系核，是超大質量烏洞 in 兜。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230302/ 影像：Mike Selby & Mark Hanson 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230302.html Powered by Firstory Hosting

是按怎咱看著 ê 薄月眉，干焦會出現 tī 地平線附近？因為 幾何 上，會出現這款薄月眉 ê 月相，是愛 月娘 tī 太空中行到倚 日頭 ê 方向才有可能。月眉這个月相，毋是因為伊去予 地球烏影 閘著矣。咱看著遮爾少 ê 部份，是因為干焦這面去予日光照著。而且，月眉 上厚 ê 部份總是出現 tī 日頭 ê 方向。暗頭仔彼陣，薄月眉 會 tī 日頭落山了後隨綴伊落去，紲落來規暝攏看袂著伊。雖罔講規暝攏無看著月娘，毋過 tī 透早時，月眉會 tī 日頭 peh--起來進前先 peh--起來。這張相片是兩禮拜前，tī 日出進前，月眉出現 tī 地平線附近 翕著--ê。月娘就 tī 希臘 古老 ê Poseidon 廟寺 遺蹟 ê 遠方。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230228/ 影像：Elias Chasiotis 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230228.html Powered by Firstory Hosting

是啥毋物件造成這个奇怪 ê 光線 ùi 地平線下底湠出來？是踅太陽 leh 行 ê 塗粉帶。逐年 tī 某一个時間，內太陽系 一條會 反射日光 ê 塗粉帶，會 tī 日落過了 抑是 日出進前 變甲足明顯--ê。這條就叫做 黃道光。塗粉是 ùi 木星家族 ê 彗星 來--ê，會沓沓仔踅入去 太陽。這張 HDR 影像 是 二月中 tī 西班牙 Sierra Nevada 國家公園 翕--ê。有翕著 黃道光 這條光帶，就 tī 暗頭仔足光 ê 兩粒行星，木星 (頂懸彼粒) kah 金星 (下跤彼粒) 頭前。黃道光 後壁是咱 ê 烏暗夜空，內底 嘛包括 足出眾 ê 昴宿星團。木星 kah 金星 會 tī 夜空 中 沓沓仔換位。而且 in 會 tī 紲落來幾若工，行到視角上兩粒上倚 ê 位置。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230227/ 影像：Ruslan Merzlyakov (astrorms) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230227.html Powered by Firstory Hosting

2 月 22 日落 ê 時陣，西爿天頂有月眉、金爍爍 ê 金星、kah 木星，攏 tī 黃道面出現。咱 tī 地球會當看著 天頂 這个美麗 ê 天景「合」。毋過 踮 一寡 所在，木星會無--去一站仔，去予月盤閘去。這張 踮 烏拉圭 Sacramento 殖民市 Plata 河 天頂翕--ê 相片，有翕著太陽系內底 ê 頭人，氣態巨行星。免偌久，伊就會去予 月盤 烏暗彼爿 閘去矣。Tī 這个 恬 chih-chih ê 河川 kah 天景內底，金星嘛無咧 kah 你客氣，伊就 tī 這个晨昏交界 ê 時陣，踮地平線附近爍咧爍咧。後禮拜暗頭仔天頂 ê 金星 kah 木星，會 互相行閣較倚。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230225/ 影像：Fefo Bouvier 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230225.html Powered by Firstory Hosting

這粒柑仔色 ê 大球是毋是欲 ùi 林木線 ê 山頭滒--落來？無啦！因為這粒柑仔色 ê 大球其實是 太陽。這張相片是 12 工前翕 ê，是咱太陽系 ê 中心恆星 ùi 咱地球 ê 山頭 peh--起來，閣有美麗 ê 清楚前景。太陽盤有揣著 5 粒太陽烏子，這 ùi 過去幾若冬 ê 太陽活動來看，tī 太陽活動極小期 有 5 粒烏子實在是足濟 ê。因為有足濟工根本 to̍h 揣無烏子。遮是 西班牙 Perter ê Sierra del Cid 山。若是 tùi 這粒山特寫，毋若會看著松柏 ê 面模，嘛會看著人 ê 剪影。這 拄仔好 翕著 kha-mé-lah sàng ê 三兄弟。這張設計好勢 ê 孤張感光相片是 tī 透早翕 ê，樹仔 kah 三兄弟差不多 tī 3.5 公里遠 ê 所在。暗濾鏡 kā 平常時 光映映 ê 太陽 閘予暗，才有法度 kā 較暗 ê 太陽烏子 細節 chhiau--出來。閣幾若分鐘，太陽 to̍h ùi 山頭 peh--起來。太陽烏子會綴太陽公轉，差不多一禮拜 ê 時間 to̍h 會消失 tī 視野內底。毋閣這張相片，這馬已經 永遠留 tī 遮 予逐家欣賞矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210921/ 影像：Jordi Coy 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210921.html Powered by Firstory Hosting

飛馬座 51 離咱 kan-na 50 光年遠爾爾。伊 to̍h 標 tī 這張 8 月 ê 速翕相片內底。這張相片是 tī 法國 Haute-Provence 天文台一个霧霧 ê 暗暝翕 ê，天文台圓厝頂 ê 頭頂有足濟足光 ê 恆星。26 年前，1995 年 10 月，天文學家 Michel Mayor kah Didier Queloz tī 這个天文台宣佈講 in 有一个大發現。In 用精確 ê 光譜儀揣著 飛馬座 51 有 一粒行星踅伊 leh 行。這是第一擺揣著 踅 類太陽恆星 ê 系外行星。Mayor kah Queloz 用光譜儀 量 恆星 徑向速度 ê 變化，這是因為引力 搝 踅軌道 leh 行 ê 行星造成 ê 規則幌動。這粒行星叫做 飛馬座 51 b，伊 ê 質量上無有木星 ê 一半以上，軌道週期是 4.2 工。這表示講，伊到伊母星 ê 距離，比水星到太陽 ê 距離閣較近。In ê 發現足緊 to̍h 證實矣。Mayor kah Queloz 落尾嘛 tī 2019 年提著 Nobel 物理獎。飛馬座 51 b 這馬予人認定是一款叫做 熱木星 ê 系外行星 ê 原型。伊 tī 2015 年予正式 號做 Dimidium，tī 拉丁文是一半 ê 意思。自伊去予人發現了後到今，已經有超過 4000 粒 系外行星予人揣著矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211009/ 影像：Josselin Desmars 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211009.html Powered by Firstory Hosting

無啦！ZTF 彗星袂去挵著火星啦！彗星 C/2022 E3 (ZTF 彗星) 嘛叫做青色彗星，因為伊有足光 ê 青色彗鬚。伊前幾工才拄 ùi 這粒 較遠 ê 行星 頭前行過，毋過無 kā 閘著。這張就差不多彼陣翕--ê。相片內底有翕著天頂這兩粒天體，kah 地球上 ê 美麗山尖，這是 Alps 山脈 tī 意大利 足有名 ê Matterhorn 山。前景 kah 背景攏是 tī 仝一暗、仝一台 kha-mé-lah、仝一个地點翕--ê。彗星 青色彗鬚 ê 倒爿是 白色 ê 塗粉尾溜，頂懸是淺 藍色 ê 離子尾溜。柑仔色 ê 火星 就 tī 一大陣背景星 ê 頭前，烏暗星雲 Barnard 22 就 tī 伊 ê 正爿下跤。雖罔講咱一直到紲落來幾若個月 ê 暗暝 攏 看會著 火星，毋過 欲轉去 外 太陽系 ê ZTF 彗星 已經開始 愈來愈暗 矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230213/ 影像：Donato Lioce 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230213.html Powered by Firstory Hosting

揣著北斗星 了後，綴這个北斗 ê 湯匙仔柄揣出去，離湯匙仔上遠 ê 所在，你會當揣著上尾彼粒較光 ê 星。了後，kā 你 ê 望遠鏡小可仔徙 tùi 西南爿，你就會當看著這个雙雙對對 ê 交互作用星系，伊就是 Charles Messier 目錄內底 第 51 个天體。伊可能是 原始 ê 捲螺仔星雲。這个大星系有完美 ê 捲螺仔結構，伊嘛去予編做 NGC 5194。咱會當清楚看著伊 ê 捲螺仔手骨 kah 塗粉帶，ùi 伊 ê 星系伴，倒爿 ê NGC 5195，面頭前掃過。這組星系互相 ê 距離差不多是 3100 萬光年遠，in 就 chhāi tī 一个較細的星座，獵犬座 ê 邊界。咱若是用望遠鏡直接看，M51 看起來是霧霧閣暗暗。毋閣 這个遮爾顯目 ê 深空影像，予咱看著交互星系 ê 細節，包括色彩 ê 變化 kah 潮汐屑仔。這張是用 90 點鐘 ê 狹頻資料疊出來 ê 影像。咱會當看著 M51 系統 內底，離子化 ê 紅色水素氣體 組成 ê 大型發光雲。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220902/ 影像：Fabian Neyer 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap220902.html Powered by Firstory Hosting

宇宙佇足細 ê 尺度看起來有偌無仝？佇足大 ê 尺度看起來有偌無仝？這支彼个時代有名 ê 科學短片，予咱看著這个壯觀 ê 比較。這支「十 ê 次方」影片，是 1960 年代正式製作、囥佇 YouTube 頂懸。是 ùi 佇 Chicago 附近 leh 野餐 ê 毯仔 到 室女座星系團。每 10 秒，這支影像就搝遠一擺，來看 10 倍 大平方 ê 景色是啥物。了後這支 9 分鐘 ê 影片就開始回送，每 2 秒搝近 10 倍來看，一直到看著一粒質子為止。10 ê 平方 實際上是照 Kees Boeke 佇 1957 年出版 ê「宇宙觀」這本冊來--ê。1960 年代尾期閣有一支以動畫為主 ê 影片「宇宙變焦」嘛是按呢。改變觀看宇宙 ê 觀點是足 迷人--ê，嘛足有教育意義--ê。這个部份有用 較現代 ê 電腦技術 kā 重新製作，包括開始彼幾若分鐘 ê 電影「接觸未來」。這支影片 ê 創作者 Ray 佮 in 尪 Charles Eames 攏足有遠見 ê 精神，而且嘛 開創一條流行路。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221204/ 影像：Charles & Ray Eames (Eames Office) 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap221204.html Powered by Firstory Hosting

大閣媠 ê 捲螺仔星系 NGC 7331 定定去 hŏng 提來 kah 咱 ê 銀河 做比較。NGC 7331 離咱差不多有 5000 萬光年遠，就 chhāi tī 北天星座 飛馬座 遐。伊早期去 hŏng 認為是一个 捲螺仔星雲，雖罔講伊嘛足光--ê，毋閣伊煞無去予編入去 18 世紀彼个 有名 ê Charles Messier 星表內底。因為這个星系盤 趨 tùi 咱 ê 視線方向，所以咱若是用望遠鏡長時間感光，翕出來 ê 影像定定會 hŏng 感受著宇宙是有偌深。這張 Hubble 太空望遠鏡 ê 特寫相片，有 4 萬光年遐爾闊。這个星系實在是有夠壯觀 ê 啦！伊 ê 捲螺仔手骨內底，有烏暗閘光 ê 塗粉帶、藍光閃閃 ê 大質量少年星團、kah 紅光爍爍 ê 活跳恆星形成區。星系中央發黃光 ê 區域，有足濟較老、較冷 ê 恆星。捲螺仔星系 NGC 7331 kah 咱 ê 銀河仝款，tī 伊 ê 中心有一粒超大質量烏洞。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220922/ 影像：ESA/Hubble & NASA/D. Milisavljevic (Purdue University) 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap220922.html Powered by Firstory Hosting

咱若是飛入去獵戶座內底會看著啥物？這个予人感覺激動 ê 獵戶座星雲 動態視覺化影片，是用真正 ê 天文觀測資料，配專業 ê 電影渲染運算技術做出來 ê。這个數位模型 ê 成果發表 是 ùi Spitzer 太空望遠鏡 提來 ê 紅外線 觀測資料。你會當 kah 這个 應該 tī 1500 光年遠、真出名 ê 恆星托兒所來一擺近距離 ê 接觸。這个影片 ê 展示角度 是 tī 這區巨大 分子雲 內底，去予雲牆圍起來 ê 一光年闊 ê 山谷內底行徙。獵戶座山谷 尾仔是行到 四角形星團 ê 閬縫，是去予足強能量 ê 恆星風 kah 中央大質量恆星 ê 輻射 雕出來 ê 空間。這 規个獵戶座星雲 有 40 光年 闊，伊 kah 太陽 攏 tī 咱銀河系內底仝一个 捲螺仔手骨 內底。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20210707/ 影片來源：NASA, Spitzer Space Telescope, Universe of Learning 視覺化：F. Summers (STScI) et al. 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap210707.html Powered by Firstory Hosting

咱來想像一下，咱來到一粒 100 倍 太陽質量、1 百萬倍太陽光度、30 倍太陽表面溫度 ê 恆星。這款恆星叫做 Wolf Rayet 星 (嘛叫做 WR 星)，是法國天文學家 Charles Wolf kah Georges Rayet kā 號名--ê。這張相片中心 ê 恆星 WR 40 就是這款星，伊就 tī 船底座遐。WR 40 kah 咱 ê 太陽 相比，伊燒較緊，嘛較緊死。In 足緊就 kā 核心 ê 水素 用了了，紲落來 繼續 tī 核心進行 較重元素 ê 核融合，落尾會利用高速 恆星風 kā 外層氣體捒出去。以 WR 40 ê 例來講，伊 kā 伊 ê 大氣 用 1 秒鐘 100 公里緊 ê 速度 捒出去，這寡外層氣體落尾就變做湠開 ê 卵形星雲 RCW 58。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230208/ 影像來源 kah 版權：Mike Selby & Mark Hanson 文稿：Natalia Lewandowska (SUNY Oswego) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230208.html Powered by Firstory Hosting

迵過短短 400 光年 ê 宇宙塗粉雲 了後，咱會拄著這个 古錐 ê 昴宿星團。伊嘛叫做 七姊妹仔星團，是一个開放星團，上出名 ê 部份就是伊反藍 ê 反射星雲。伊就 chhāi tī 咱銀河系 ê 獵戶座手骨彼搭，tī 金牛座 ê 方向遐。七姊妹仔星團 內底 ê 恆星 kah 塗粉雲 無直接 ê 關係。In 只是 tī 咱 ê 視線方向經過仝一个宇宙空間爾爾。這个星團暗甲用目睭直接看，會看無。加利略頭擺看著 這个 ê 星團是 ùi 伊做--ê 望遠鏡看著--ê。咱 ùi 彼馬開始就知影 in 是較實密 ê 一陣恆星。Charles Messier kā 這个位置 ê 星團編 tī 伊彼个上有名、毋過毋是彗星 ê 星表內底，伊是第 45 號天體。Tī 希臘神話內底，「昴」是扛一粒天球 ê Titan 族天神 Atlas kah 海洋女神 Pleione ê 七个查某囝。In ê 名 kah in 老爸老母 ê 名攏 tī 這个星團內底，是 星團內底上光 ê 9 粒星。這个做過資料處理，嘛做過色差校正 ê 天文影像，是開超過 9 點鐘 ê 時間感光--ê。有翕著有光針 ê 恆星 kah 星際塗粉絲 ê 細節。昴宿星團 ê 大細差不多有 20 光年闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230105/ 影像：Stefan Thrun 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230105.html Powered by Firstory Hosting

月圓 ê 時陣，月娘若是忽然間暗去，你會看著啥物？這个答案就記錄 tī 這支 2011 年 踮 Tajikistan 共和國 翕--ê，戲劇性變化--ê 月全食 縮時攝影 影片 內底。月全食 ê 時陣，地球行到月球 kah 太陽中央，所以月娘才會忽然間暗去。毋過 月球袂完全無去，這是因為地球 ê 大氣會 屈折 一寡太陽光。這支影片 開始 ê 時陣，看起來敢若是 tī 日時 ê 日光，毋過實際上這是暗暝，而且這个光線是月圓時 ê 月光。月娘 去予食去了後就變暗去矣，這个時陣咱就會當看著背景 ê 天星反射 tī 湖面。上壯觀--ê，是發生月食彼陣，天頂 煞忽然間變做 攏是天星，上光 ê 所在就是天星上濟 ê 銀河盤 遐。影片放送第二擺 ê 時陣，是 kā 景色搝近來看，上落尾 ê 影像是 鴟鴞星雲、天鵝星雲、三叉星雲、kah 內海仔星雲 附近 ê 食月。月食開始差不多兩點鐘了後，月娘就 ùi 地球烏影下底出來矣，月圓時 ê 月光就 隨 變做天頂上光 ê 天體矣。下暗抑是明仔載，愛看你 kah 國際換日線 差偌濟，你若是踮 亞洲 ê 東北爿、抑是 北美洲 ê 西北爿，就會閣看著一擺 月全食。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221107/ 影像：Jean-Luc Dauvergne (Ciel et Espace) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221107.html Powered by Firstory Hosting

這敢真正是彼个有名 ê 昴宿星團？昴宿星團 上有名 ê 標誌是伊 ê 藍色恆星，這張圖是伊 ê 紅外線 影像，伊週邊 ê 塗粉是比內底 ê 恆星閣較光。這張影像是 kā 三款紅外線信號 漆做 咱看有 ê 色彩（紅色 24 micron，青色 12 micron，藍色 4.6 micron）。底圖是 NASA ê 軌道衛星，闊幅紅外線巡天探測衛星 (WISE) 太空船 翕--ê。昴宿星團 ê 編號是 M45，偏名叫做 七姊妹仔星團。無拄好，這馬伊 ê 頭前 有雲飄過。昴宿星團內底 ê 大質量恆星發出 ê 光 kah 風 會 kā 細粒 塗粉粒 歕走，賰 ê 塗粉會裂開，變做 雲絲，就像圖按呢。昴宿星團 就 tī 金牛座 ê 方向，離咱差不多有 450 光年遠。 照這个距離來估算，這張影像差不多有 20 光年 闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230219/ 影像來源：NASA, WISE, IRSA 資料處理 kah 版權：Francesco Antonucci 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230219.html Powered by Firstory Hosting

In 兩个攏 leh 落落去。水是 美國 加州 ê Yosemite 水沖，當 leh 落落去地球。ZTF 彗星 當 leh 落落去 太陽。這張 宇宙雙水沖 相片，是頂個月底翕--ê。彼馬 ê 彗星 C/2022 E3 (ZTF 彗星)，才拄過伊 kah 地球上倚彼工。水沖天頂 ê 柑仔色恆星是 北極二。除了意外拄著 ê 烏熊 以外，這張相片 是一張 設計過--ê 景色，有月光照著 ê 前景，kah 長時間感光 ê 背景。所有 ê 安排是欲予人看著真實景色 ê 深度感光版本。ZTF 彗星 這馬欲飛轉去 外太陽系 矣，所以伊會 愈來愈暗。不而過，伊 ê 路線 是重力決定--ê，所以咱猶是會使 kā 當做伊欲落落去太陽。只是講，伊是 leh 倒退攄。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230221/ 影像：Tara Mostofi 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230221.html Powered by Firstory Hosting

NGC 1365 離咱 干焦 5600 萬 光年遠爾爾，是南天星座 天爐座 方向 ê 大型棍螺仔星系，差不多有 20 萬光年大。伊差不多是咱銀河 ê 兩倍大。這張遮爾清楚 ê 影像 是用 James Webb 太空望遠鏡 ê 紅外線儀器 (MIRI) 翕--ê，有看著 tī 紅外線波段 大捲螺仔星系 驚死人 ê 細節。Webb 太空望遠鏡 ê 視野 包括 NGC 1365 六萬光年闊 ê 範圍，是欲探索星系核 kah 拄生出來--ê、足光 ê 星團。Ùi 星系中心 ê 星系棍仔 踅出來 ê 捲螺仔手骨 頂懸，有足濟少年恆星。這張影像內底，由 塗粉絲 kah 氣泡組成 ê 複雜雲網，就是這寡恆星製造出來--ê。天文學家懷疑講，NGC 1365 星系棍 ê 重力場，應該是星系演化過程中，一个足重要 ê 角色。伊 kā 氣體 kah 塗粉送入去 恆星形成 ê 捲螺仔旋 內底，落尾這寡物質會飼予 活跳星系中心 ê 超大質量烏洞 食。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230218/ 影像來源：NASA, ESA, CSA, Janice Lee (NOIRLab) 資料處理： Alyssa Pagan (STScI) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230218.html Powered by Firstory Hosting

這个無四常 ê 天景，看起來敢若是咱熟似 ê 景色，毋過有一寡是咱真罕得看著--ê。這个弓形結構，是咱熟似 ê 銀河系 中央帶 投影 tī 天頂 ê 景色。攝影師 ê 任務是 tī 這个媠甲親像一幅圖 ê 中世紀莊園 kā 這个弓形結構 翕出來。予人料想袂著 ê 是，今年 1 月 ê 某一个暗暝，前景 ê 天空煞出現無啥人看過 ê 美麗 輝光。這寡條紋就叫做 氣輝，是 地球大氣層 內底較懸層 ê 氣體 去予日光激發，發出較暗 ê 光。這寡光帶迒過規个天頂，in 彎曲 ê 形體 是因為 kha-mé-lah ê 超級闊幅鏡頭造成--ê。前景是 法國 西南部 ê Château de Losse 莊園。Tī 這个咱熟似 ê 夜空 內底，遙遠 ê 背景天體 包括有：發白光 ê 恆星 天狼星、發柑仔色光 ê 火星、發藍光 ê 昴宿 星團、發紅光 ê 加州星雲、kah 正爿彼个長長 ê 仙女座星系。這个任務 ê 原始目標是有成功：頂懸彼个 弓形光帶，就是咱 ê 銀河。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230215/ 影像：Julien Looten 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230215.html Powered by Firstory Hosting

咱銀河內底 ê 心臟 kah 靈魂星雲，是毋是 tī 仙后座 內底？可能毋是呢！毋過咱會當 tī 這个方向揣著這組小名叫做 心臟 kah 靈魂 ê 發射星雲。心臟星雲 ê 正式名稱是 IC 1805，就是相片正爿頂懸彼个。伊 ê 外形會予人想著彼个有代表性 ê 心形符號。這个外形應該有合今仔日 ê 情人節！靈魂星雲 ê 正式名稱是 IC 1871，就是相片倒爿下跤彼个。Tī 這个三色圖 內底，兩个星雲 攏是 tī 紅光較光，這是 能量較懸 ê 水素 發出來 ê 光。這組星雲 ê 光 差不多愛行 6000 年才會到咱遮。這兩个大細加加起來差不多有 300 光年 大。研究 恆星 kah 星團，像 心臟 kah 靈魂 星雲內底 ê 恆星 kah 星團，會當幫贊咱了解大質量 恆星是按怎形成、是按怎 影響 in ê 環境。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230214/ 影像：Juan Lozano de Haro 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230214.html Powered by Firstory Hosting

Tī 2022 年 7 月 15 翕--ê 彗星 C/2017 K2 (PanSTARRS)，誠拄好去 拄著 Messier 天體，球形星團 Messier 10，in 就做伙出現 tī 這張闊幅望遠鏡景色內底。M10 是 18 世紀一个專門揣彗星 ê 專家 Charles Messier 揣著 ê 第十粒毋是彗星 ê 天體。M10 差不多離咱有 1 萬 4000 光年遠。PanSTARRS 彗星 tī 7 月 14 這工 行到離咱上倚 ê 所在，這當陣伊 kah 咱美麗地球 ê 距離干焦 15 光秒遠爾爾。C/2017 K2 這粒彗星 ê 彗鬚 kah 彗尾 予 21 世紀 ê 彗星觀星者看甲有夠滿意。伊應該猶是 咱用細台天文望遠鏡 就會當踮 北天熱天 ê 夜空 看著 ê 彗星。這粒 PanSTARRS 彗星是頭一擺 ùi 太陽系遠方 ê Oort 雲 遐飛過來--ê。伊是 tī 2017 年 5 月飛過土星軌道彼陣，予咱發現--ê。伊是彼陣咱所知影 來到太陽系內部 ê 彗星內底，上遠閣活動力上強 ê 彗星。伊 tī 12 月 19 彼工離咱 ê 太陽上倚，彼陣伊 kah 太陽 ê 距離是 1.8 天文單位，比火星軌道閣較遠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220721/ 影像：German Penelas Perez 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap220721.html Powered by Firstory Hosting

M44 是咱太陽系附近 ê 星團之一，伊離咱干焦 600 光年遠爾爾。伊嘛叫做 蜂岫星團 抑是 鬼宿星團。伊內底 ê 恆星攏足少年 ê，差不多有 6 億歲，太陽是 45 億 歲。M44 ê 歲數，佮 佇金牛座內底的 畢宿星團 差不多，in 佇太空 ê 運動方式嘛差不多。所以 in 兩个 去 hŏng 認為講，是 ùi 仝一个大分子雲生出來 ê。M44 chhāi 佇哩 巨蟹座 內底，是一个 15 光年闊 ê 開放星團，內底差不多有 1000 粒恆星。這个闊度佇天頂 ê 角寸尺，差不多是 3 粒月娘 (1.5 度) 遐爾闊。M44 自古早時代就通人知，咱用目睭直接看就看會著。這个星團 tī 18 世紀編 ê Charles Messier 星表內底，排第 44。伊去予編入去星表進前，hŏng 講做是一个較暗 ê 星雲、抑是 天頂 ê 雲霧。一直到天文望遠鏡出現了後，咱才有法度知影星團內底，其實是一粒一粒 ê 恆星。對有雙筒千里鏡 ê 現代觀星者來講，這个星團是一个有名 ê 觀測目標。這張星團 ê 團體相片，是用天文望遠鏡 速翕 ê。星團內底一寡 較黃、較冷 ê 紅巨星，就四界 chhāi 佇較藍、較光、較燒 ê 主序帶恆星之間。相片內底彼寡 繞射光尖，表示講 in 是星團內底較光 ê 恆星。這个形是 ùi 望遠鏡 物鏡面頂 ê 十字線來 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220430/ 影像：Drew Evans 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap220430.html Powered by Firstory Hosting

這張恆星踅天北極 ê 仝心弧 相片，是 1 月 31 tī 西班牙 Lleida 城 Àger 市 用數位相機固定 tī 三跤馬頂懸，感光三點鐘久 翕著--ê。Tī 這工，彗星 C/2022 E3 (ZTF 彗星) 行到 地球天頂 上北爿附近。彗星差不多行到 kah 地球天北極差 10 度遠 ê 所在，看起來就敢若 踅北極 leh 行。只要徛 tī 地球北緯 10 度以北 ê 所在，天頂 ê 彗星就會 tī 地平線以上袂落落去。這張星軌圖內底，地球自轉軸指向 ê 天北極，就 tī 倒爿遐。北極星 ê 軌跡，是北極附近彼條，差無到 1 度遠、短短 ê 仝心弧。ZTF 彗星 ê 光跡 tī 正爿，伊 ê 視運動 主要 是反應地球 ê 自轉，kah 其他恆星仝款。伊會 tī 2 月 1 號行到離地球上倚 ê 所在。這幾工彗星 tī 天頂 ê 運動 對 背景星來講，是有較明顯。ZTF 彗星 ê 闊幅尾溜，差不多攏集中做一條青色 ê 光弧，kah 恆星 ê 光跡濫做伙，掃過天頂 ê 長頷頸星座，鹿豹座，抑是麒麟鹿座遐。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230203/ 影像：David Ibarra Gomez 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230203.html Powered by Firstory Hosting

有 7 粒行星踅這粒足低溫度 ê 矮星 TRAPPIST-1 咧行。In 離咱才 40 光年 遠爾爾，這个系統內底大部份 ê 行星攏是 2016 年彼陣 用 摩洛哥 Atlas 山頂 ê 凌星行星佮原行星小望遠鏡 (TRAPPIST) 揣著了後，閣用其他天文望遠鏡，親像是 NASA ê Spitzer 紅外線太空望遠鏡 確認--ê。TRAPPIST-1 ê 行星 應該攏是 kah 地球差不多大細 ê 岩石行星。因為這粒恆星有 遮爾濟粒 類地行星 踅伊 leh 行，所以遮就變做是一个上大 ê 寶庫矣。雖罔講 in ê 母星是一粒細粒閣暗 ê 恆星，毋過因為 in ê 公轉軌道 kah 母星是足倚--ê，所以 in ê 表面溫度懸甲 毋但會揣著冰、甚至有可能揣著液態水。這是 tùi 性命 來講足重要 ê 成分。因為 in kah 地球是 遮爾倚，所以 in 就變做科學家 未來欲用天文望遠鏡 探索 合蹛區 ê 系外行星 大氣 上重要 ê 候選天體 矣。這張插畫有 kā 這 7 粒 系外行星 攏畫出來。這是一張 ùi 這个系統內底上遠彼粒行星 TRAPPIST-1h 看--著 ê 想像圖。這粒行星有岩石 ê 地景，表面有崁一重冰。而且，背景 ê 景色內底，拄仔好有一粒 內行星 ùi 伊 ê 母星面頭前行過。這粒柑仔色 ê 母星毋是蓋光，大細 kah 木星 差不多大。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230201/ 影像：Michael Carroll 音樂：P!SCO - 鼎鼎 聲優：草莓大福 翻譯：An-Li Tsai (NCU) 原文：https://apod.nasa.gov/apod/ap230201.html Powered by Firstory Hosting

ZTF 彗星 ê 形體是足特別--ê。這粒這馬當咧拜訪 內太陽系、足光--ê 彗星，毋但已經出現定定看會著 ê 塗粉尾溜、離子尾溜、kah 有青色氣體 ê 彗鬚，嘛出現足罕得看著、足特別 ê 倒反彗尾。實際上，這條倒反彗尾並毋是出現 tī 彗星 ê 頭前。只是講，彗星 ê 頭 看起來是 疊 tī 彼條 拖 tī 後壁、扇形塗粉尾溜 ê 頂懸。這粒 大垃圾雪球 就是 彗星 C/2022 E3 (ZTF 彗星)，伊這馬已經行過離 太陽 上近彼點，明仔載就會行過離地球上近彼點矣。這張 ZTF 彗星三視圖 ê 主圖，是頂禮拜 tī 西班牙 Cáceres 市 一个好天 ê 暗暝，用肉眼看著 ê 彗星。面頂彼張插圖，是用 雙筒千里鏡 看著 ê 彗星，下跤彼張插圖是用 細台望遠鏡 看著 ê 彗星。這粒彗星 tùi 蹛 tī 北天較懸緯度 ê 人來講，是規暗攏 看會著。毋過紲落來這幾若禮拜，伊會愈來愈暗，若是無認真觀測，伊會 隨無去。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230131/ 影像：Javier Caldera & Miguel Gracia 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230131.html Powered by Firstory Hosting

遮 ê 恆星攏走 tùi 佗位去矣？這个過去 去 hŏng 認為是 天頂有一空 ê 所在，天文學家這馬知影講，這其實是一个烏暗 分子 雲。遮有足厚 ê 塗粉 kah 分子氣體，kā 背景恆星發出 ê 可見光 攏吸收去矣。這个奇怪 ê 烏暗區，予 分子雲 內部變做是宇宙內底上冷上 孤單 ê 所在。這寡 烏暗吸收星雲 上引人注目--ê，是一个 tī 蛇夫座 內底叫做 Barnard 68 ê 星雲，就是咧講 這張相片。中央 ê 部份無恆星，表示講 Barnard 68 離咱無偌遠。咱量伊 ê 距離差不多是 500 光年遠，大細是半 光年 闊左右。咱這馬 猶毋知 像 Barnard 68 這款 分子雲 是按怎形成--ê，毋過咱知影這寡雲 應該 是 做新恆星 ê 所在。實際上，科學家 已經發現 Barnard 68 這馬應該是咧崩塌、欲形成新 ê 恆星系統 ê 款。咱會使利用 紅外線 來看雲內底 有啥物物件。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230129/ 影像：FORS Team, 8.2-meter VLT Antu, ESO 音樂：P!SCO - 鼎鼎 聲優：草莓大福 翻譯：An-Li Tsai (NCU) 原文：https://apod.nasa.gov/apod/ap230129.html Powered by Firstory Hosting

咱銀河系內底是揣無這款星團。拄影著這張影像 ê 時陣，會感覺講 這張相片 實在是予人感覺足驚喜--ê。這張相片是 Hubble 太空望遠鏡 翕著 ê 星團 NGC 1850。伊 ê 寸尺 kah 外形 hŏng 聯想著 tī 咱 銀河系 銀暈 內底 賴賴趖、古早時代 就有 ê 球形 星團。毋過 NGC 1850 內底 ê 恆星攏傷少年矣，按呢這款星團就 kah 咱銀河內底 ê 星團 無仝。而且，NGC 1850 是一个 雙星團。第二位成員就 tī 這个大陣星團中心倚正爿遐，是一个實密 ê 星團。這个大陣星團內底 ê 恆星，照估計差不多才 5000 萬歲爾爾。實密星團內底 ê 恆星是閣較少年，才 400 萬歲爾爾。NGC 1850 kah 咱 ê 距離才 16 萬 8000 光年 爾爾，伊就 tī 大麥哲倫星雲 ê 星系外沿附近。影像倒爿規片咧發光 ê 氣體絲，較成是咱銀河內底 ê 超新星殘骸。In 會經過較劇烈 ê 恆星爆炸 階段。這暗示講，in 是較短命 ê 懸質量 恆星，是最近才出現 tī 這區。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230220/ 影像來源 kah 版權：NASA, ESA and P. Goudfrooij (STScI) 資料處理：M. H. Özsaraç (Türkiye Astronomi Derneği) 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230220.html Powered by Firstory Hosting

球形星團 以前 sī 銀河系 上主要 ê 成員。古早古早 以前，咱銀河 拄形成 ê 時陣，內底差不多有幾若千个球形星團。今仔日干焦賰無夠 200 个。Tī 咱銀河過去 ê 歷史，有足濟球形星團 因為一直相拄、抑是行過 銀河中心 附近，煞去予搝散去。賰 ê 星團遺跡 sī 比 地球 ê 化石 閣較老，嘛比 咱銀河內底任何結構 閣較老。這會當幫贊咱 揣出 宇宙原始年歲 ê 範圍。咱 銀河系 內底 ê 少年球形星團 實在 sī 足少--ê，因為 這个環境 無法度形成較濟球形星團。這張影像 sī 用 Hubble 太空望遠鏡 去看 已經 130 億歲 ê NGC 6355。伊 sī 目前行過 銀河中心 附近、猶無去予拆散 ê 球形星團。球形星團內底 ê 恆星攏 集中 tī 影像中心，而且較光 ê 藍色恆星 sī 足明顯--ê。其他 tī 影像內底較暗、較紅 ê 恆星，只是拄仔好出現 tī NGC 6355 ê 方向附近爾爾。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230130/ 影像：ESA/Hubble & NASA, E. Noyola, R. Cohen 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230130.html Powered by Firstory Hosting

50 冬前 ê 1972 年 4 月 20，阿波羅 16 號 ê 登月小艇 獵戶座 登陸 tī 月球倚咱這爿 ê 中南部 ê Descartes 高地。太空人 Ken Mattingly tī 貼心 ê 指揮服務船 Casper 面頂踅月球咧行 ê 時陣，獵戶座 共 John Young 佮 Charles Duke chhōa 到 月球表面。In 兩个會 tī 月球面頂 3 工 左右。這是 kā 幾若張相片 (編號 AS16-117-18814 到 AS16-117-18820) 組合起來 ê 全景圖，是 tī 第三擺、嘛是上尾擺 tī 月球表面探索 ê 時陣 翕 ê。倒爿遠方彼台 to̍h 是登月小艇。頭前彼台是 電子登月探測車。Duke 當咧操作 kha-mé-lah，Young 當咧 kā 高增益通訊天線 撨 tùi 天頂 地球 ê 方向。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220421/ 影像來源：Apollo 16, NASA 全景圖組合：Mike Constantine 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap220421.html Powered by Firstory Hosting

M24 kah 有名 ê Charles Messier 星表內底 ê 其他深空天體 比起來，伊毋是一个較光 ê 星系、星團、嘛毋是星雲。Ùi 咱附近會閘光 ê 星際塗粉雲中央 ê 閬縫看過去，會當看著 咱銀河系 ê 人馬座 捲螺仔手骨 面頂，一寡較遠 ê 恆星。你若是用 雙筒千里鏡 抑是用 細台天文望遠鏡 tùi 這个恆星雲 硞硞 kā 相，你 to̍h 親像是 ùi 一个 300 光年闊 ê 窗仔 看出去。內底 ê 恆星 離咱地球 ê 距離，是比 1 萬光年閣較遠。M24 有當時仔會叫做人馬座恆星雲，伊內底 ê 恆星 kā 這个華麗 ê 星空 照甲有夠光。這个望遠鏡景色是 tī 人馬座內底，伊 ê 闊度差不多是 3 度闊 抑是 6 粒月娘闊。這幅景色 ê 中央頂懸，有 看起來較烏 ê B92 kah B93，閣有其他塗粉雲 kah 發光星雲，做伙指向銀河中心。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220407/ 影像：Gabriel Rodrigues Santos 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap220407.html Powered by Firstory Hosting

雲底當時會出現這款一包一包 ê 形體？一般來講，雲底應該是平--ê 才著。這是因為較澹較溫暖 ê 空氣 peh 懸了後會冷卻，到某一个溫度就會 堅 做水滴，這通常會發生 tī 足懸 ê 所在。水滴若是 變較大滴，雲就會變無透光。毋過 tī 一寡狀況下，雲 橐仔內底會有較大粒 ê 水滴 抑是 冰珠。雲橐仔若是蒸發，in 就會落到清氣 ê 空氣內底。這款 雲橐仔 會 tī 雷雨 附近 ê 掣流氣體內底 出現。尤其是 日光 若是 ùi 側爿照過來，咱就會看著 足明顯 ê 奶仔雲。相片內底 ê 奶仔雲 是 2004 年 6 月 tī 美國 Nebraska 州 Hastings 市 ê 天頂 翕著--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230212/ 影像：Jorn Olsen Photography 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230212.html Powered by Firstory Hosting

這兩个顯目 ê 星雲是 1 月 21 tī 智利 Atacama 沙漠天頂翕--ê ，in 實際上是 tī 咱銀河系外口。In 是 大 小 麥哲倫星雲，是用 16 世紀葡萄牙探險家 Ferdinand Magellan ê 名去號--ê。伊是地球上頭一个環遊世界 ê 人。這組 南半球天頂上有名 ê 寶石，是咱銀河上光 ê 衛星星系。較大 ê 星雲離咱有 16 萬光年遠，較細 ê 星雲離咱有 21 光年遠。兩个星雲攏是不規則矮星系。只要有深度闊幅 ê 視野，就會看著 in 內底 ê 棍仔形結構。闊幅深度 ê 感光，閣會當看著大小麥哲倫星系 內底較暗、厚塗粉 ê 星系卷雲，kah in 之間 引潮力 引起 ê 交互作用留落來 ê 印記。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230211/ 影像：Felipe Mac Auliffe López 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230211.html Powered by Firstory Hosting

你若是會當徛 tī 系外行星 LHS 475 b 頂懸，你會看著啥毋？無人知影。毋過這張利用地球 ê 人工智慧 (AI) iăn-jín 畫 ê 相片 是足趣味--ê，會當予你想像一下。科學家 ùi 踅地球 ê TESS 衛星望遠鏡 提著 ê 資料，推測講有 系外行星 ê 存在。毋過一直到今年才 ùi 飛 tī 地球附近 踅太陽 ê James Webb 太空望遠鏡 (JWST) 提著 ê 資料，證實這件代誌，嘛才通做進一步 ê 研究。咱這馬已經知影 ê 是，LHS 475 b 是一粒 kah 咱地球 質量差不多 ê 行星。伊 ê 母恆星是一粒 細粒 ê 紅矮星，離咱有 40 光年遠。伊踅母恆星 ê 軌道離母恆星是足倚--ê。這張 AI 畫 ê 插畫，畫出一个 kah 地球足成--ê、坎坎坷坷 ê 地景，毋過這个世界攏是 熔岩。後壁彼粒是紅色 ê 母恆星，tī 遠方 peh 起來。Webb 望遠鏡 ê 觀測資料猶未公佈，毋過 LHS 475 b 應該是有一重大氣層。Webb 望遠鏡 ê 其中一个科學目標，就是欲追蹤進前已經發現--ê、遙遠 ê 系外行星，看遐是毋是有可能 發展性命。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230124/ 影像：DeepAI’s Fantasy World Generator 音樂：P!SCO - 鼎鼎 聲優：草莓大福 翻譯：An-Li Tsai (NCU) 原文：https://apod.nasa.gov/apod/ap230124.html Powered by Firstory Hosting

咱這馬敢猶看會著彗星？會使喔！就算 彗星 C/2022 E3 (ZTF 彗星) 這馬變較暗矣，只要你知影 伊 tī 佗？當時看？猶原是看會著。幾何上，ZTF 彗星 已經行過離 太陽 上倚 kah 離 地球 上倚 ê 所在，這馬欲轉去 外太陽系 矣。照伊踅太陽 ê 軌道來看，頂個月伊 sī 出現 tī 北極星、北斗星、kah 小北斗 附近，這個月會一直 tī 北半球天頂。這張相片 ê ZTF 彗星 sī 伊 1 月底 行到 大小北斗 之間 ê 時陣翕--ê。彼馬 ê 離子尾溜 湠甲超過 10 度 長。這馬 ZTF 彗星 已經無法度直接用目睭看著矣。毋過你會使 用雙筒千里鏡 抑是細台望遠鏡，閣 kah 一張 好用 ê 觀星圖，按呢就揣會著伊矣。後禮拜欲 看彗星 上好 ê 時間愛等日頭落山了後、月娘 peh 起來 進前。閣幾工，彗星會 tùi 火星面頭前 行過。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230207/ 影像：Petr Horalek / Institute of Physics in Opava 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230207.html Powered by Firstory Hosting

玫瑰星雲 ê 中心有一个足光 ê 星團 NGC 2244，kā 這个星雲照甲遮爾光。NGC 2244 ê 恆星 sī ùi 週邊氣體 誕生--ê，in 才幾若百萬歲爾爾。這張相片 sī 1 月中 用 多重感光 ê 方式，kā 中央區一寡特別元素發出 ê 光 疊出來--ê。紅色 sī 硫磺，青色 sī 水素，藍色 sī 酸素。按呢才看會著詳細 ê 細節。星 團內底吹出來 ê 高溫粒子 風，沓沓仔 kā 本底足 複雜 氣體 塗烌 絲 ê 星團中心 歕出一空。玫瑰星雲 中心 ê 部份差不多有 50 光年 闊，離咱有 5200 光年遠。咱會當用雙筒千里鏡，tī 釘仔馬 ê 星座，麒麟座 遐揣著伊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230206/ 影像：Lyman Insley 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230206.html Powered by Firstory Hosting

這張彩色宇宙帆布 ê 中央 是 NGC 2626，是 tī 銀河南方、美麗 ê 藍光反射星雲。伊就 tī 帆船分子雲脊 ê 塗粉分子雲 複合區內底。邊仔有閘光 ê 塗粉雲，週邊是 發出紅光水素發射線 ê 大型 H II 區（水素離子區） RCW 27。RCW 27 是 tī 帆船分子雲脊 ê 塗粉分子雲 複合區內底。NGC 2626 是 發藍光 ê 星際塗粉雲，因為伊會反射藏 tī 星雲內底 ê 少年高溫恆星。是講，天文 探索 會 tī 恆星形成區內底揣著足濟少年恆星，kah 相關 ê 星雲。NGC 2626 離咱差不多有 3200 光年遠。照這个距離來算，咱 tī 天文望遠鏡 視野內底看著 ê 帆船分子雲脊，差不多有 30 光年遐爾大。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230204/ 影像：Mike Selby & Mark Hanson 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230204.html Powered by Firstory Hosting

彗星 C/2022 E3 (ZTF 彗星) 飛過 地球北天 ê 時陣，已經無遐爾光矣。這張相片就是伊 kah 另外一粒 彗星 C/2022 U2 (ATLAS 彗星) ê 合影。這張相片是 2 月 6 號 tī 德國 ê Bavarian 樹林翕--ê。這个天星滿滿 ê 天區是 tī 御夫座 ê 方向，視野有 2.5 度闊。這兩粒彗星是 tī 2022 年 ê 巡天計畫「ZTF 凌星觀測儀器」kah「ATLAS 小行星攏地球 ê 最後警報系統」ê 時陣 揣著--ê。ZTF 這粒 長週期彗星 頂個月才行到近日點，這馬已經欲離開太陽矣。ATLAS 彗星是閣較暗，伊 1 月 29 才接近咱這粒 ê 美麗地球。伊彼陣 kah 地球 ê 距離是 4.6 光分。是講 ZTF 彗星 tī 2 月 2 號彼陣 kah 地球 ê 距離是 2.4 光分。ZTF 彗星進前猶會當用目睭直接看，伊 ê 尾溜實在是生了袂䆀。毋過這粒 ATLAS 彗星，就無遮爾媠 ê 尾溜矣。這兩粒彗星攏有足明顯 ê 青色彗鬚，這是雙原子炭分子去予日光激發產生 ê 螢光。ZTF 彗星這馬是雙筒望遠鏡上好 ê 觀測目標，因為伊紲落來會迒過地球 ê 天頂。Eng 暗伊會出現 tī 明亮 ê 火星附近。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230210/ 影像：Stefan Bemmerl 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap230210.html Powered by Firstory Hosting

天文學家有當時仔會 kā 編號 1970 這逝 ê 天體 放袂記。比論講，這陣 tī 獵戶座內底 ê 美麗反射星雲 NGC 1977，NGC 1975，kah NGC 1973，就因為 chhāi tī 獵戶座星雲 這个 會發出豐富閣美麗光線 ê 恆星托兒所附近，所以定定會予人無注意著。這寡反射星雲 kah 獵戶座大分子雲，會當 tī 獵戶座星雲複合體 北爿 ê 獵戶座寶劍揣著。In 離咱有 1500 光年遠，會發出特別 ê 藍光。這是 星際 塗粉 反射 少年高溫恆星 產生 ê 光。Tī 這張清楚 ê 彩色影像內底，較倚中央--ê 是這陣 反射星雲，較倚下底--ê 是獵戶座星雲 ê 一部分。NGC 1977 迒 tī 這个視野中心較倚下跤遐，較倚正爿頂懸--ê 是 NGC 1973，較倚倒爿頂懸--ê 是 NGC 1975，攏去予中央彼个發紅光 ê 烏暗區分開。這个紅光主要是 ùi 水素原子發出來--ê。這个烏暗區若是做一擺看，就親像是一个咧走 ê 查埔人，所以伊就叫做 走標星雲。咱若是用獵戶座塗粉分子雲 估算 ê 距離 來看，這个咧走 ê 查埔人應該有 15 光年大。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230202/ 影像：Daniel Stern 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap230202.html Powered by Firstory Hosting

這个寒冷 ê 山景 kah 夜景是 tī 地球 ê Etna 火山，山頂有 像彗鬚 ê 雪煙 噴出來。這張影像是 kā tī 1 月 23 這个冷吱吱 ê 暗暝翕--ê 幾若張 獨立 感光 ê 相片疊做伙--ê。有翕著 tī Etna 雪山 山腹 天頂彼粒 會當用目睭直接看著 ê ZTF 彗星。是講 日光若變較強，抑是太陽風變較強，會予彗星 ê 青色彗鬚 kah 闊尾 ê 塗粉尾溜變較明顯。這禮拜 ê 拜六禮拜，ZTF 彗星會迒過北天 ê 北極星 kah 北斗星 之間。是講 tī 較暗 ê 所在，你干焦會看著 霧霧、無連紲 ê 結構。毋過就算干焦是按呢，這嘛是一件足重要 ê 代誌。因為你是直接用你 ê 目睭 leh 看 一位 ùi 遙遠 Oort 雲 來 ê 人客。是講 這幾工，你若是會當用雙筒千里鏡抑是細台天文望遠鏡 kā 看，你會閣較享受 ZTF 彗星 ê 景色。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230128/ 影像：Dario Giannobile 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230128.html Powered by Firstory Hosting

這張 tī 美國加州 六月湖 ê 暗暝翕 ê 望遠鏡影像，是 北方夜空 目前 ê 主角，彗星 C/2022 E3 (ZTF 彗星)。是講 ZTF 彗星 這幾工已經變甲 愈來愈光 矣，伊會 tī 2 月 1 號這工行到離地球上倚彼點。這張相片是 tī 1 月 23 翕--ê，這个時陣 ê 地球，差不多是行到 kah 長週期彗星 ZTF 彗星 ê 軌道面交叉前後。ZTF 彗星 tī 伊 ê 軌道 leh 行 ê 時陣，伊較闊、較白 ê 塗粉尾溜攏是彎曲--ê，而且這个 扇形 ê 尾溜是向離開太陽 ê 方向拍開。地球 ê 視角 tī 行到 kah 彗星 軌道面 交叉前後 ê 時陣，會看著 扇形 ê 塗粉尾溜出現 tī 青色彗鬚 ê 兩爿。按呢會予 ZTF 彗星 看起來閣有一條引人注目 ê 倒反彗尾（倒爿彼个彗尾）。受著太陽活動 ê 影響，彗星較狹 ê 離子尾溜嘛伸 tùi 正爿 ê 對角方向去。這條尾溜 ê 長度差不多佔視野範圍 ê 3 度闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230127/ 影像：Dan Bartlett 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230127.html Powered by Firstory Hosting

活跳星系 NGC 1275 是 咱附近較大 ê 英仙座星系團 中心足重要 ê 成員。這个活跳星系 tī 可見光波段看起來是足猖狂--ê，而且嘛是足強 ê X-光 kah 電波 發射源。NGC 1275 吸積 規个星系 ê 物質，落尾這寡物質攏去飼星系核心 ê 超大質量烏洞。這張彩色組合相片是 Hubble 太空望遠鏡 tī 2006 年提著 ê 觀測資料。伊有特別標示 星系殘骸 kah 發光 ê 氣體 雲絲，有一寡仔有到 2 萬光年遐爾長。是講星系相挵應該會 kā 這寡雲絲毀滅，毋過 in 一直 tī NGC 1275 內底無消去。到底是啥物 kā 這寡雲絲留 tī 遮？觀測結果 表示會產生這寡結構，是星系中心 ê 烏洞活動 kā 物質捒出來，閣去予磁場縛做伙--ê。NGC 1275 嘛叫做 英仙座 A，伊有 10 萬光年闊，離咱有 2 億 3000 萬光年遠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230126/ 影像：NASA, ESA, Hubble Heritage, A. Fabian (University of Cambridge, UK) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230126.html Powered by Firstory Hosting

彗星 C/2022E3 (ZTF) 這馬已經愈來愈光矣，免用望遠鏡就看會著矣！1 月 19 ê 時陣，咱就會使 tī 西班牙 Salamanca 附近 20 公里遠、無啥物光害 ê 田園天頂，用目睭直接看著 這粒彗星。當然望遠鏡影像 會當看較詳細咧，包括彗星美麗 ê 青色彗鬚，較短 ê 塗粉尾溜、kah 較長 ê 離子尾溜。較暗 ê 離子尾溜 是受著 最近太陽活動 ê 影響。這位 ùi 遙遠 Oort 雲 來 ê 人客，會 tī 1 月 12 彼工踅過太陽。伊這馬行到 北天邊界 牧夫座附近 ê 恆星遐。紲落來 ZTF 彗星會 離開太陽，毋過伊猶是足光--ê。伊會 tī 2 月 2 號行到離咱上倚 ê 所在，時到伊 kah 咱地球離無 2.4 光分。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230121/ 影像：Óscar Martín Mesonero (Organización Salmantina de la Astronáutica y el Espacio) 音樂：P!SCO - 鼎鼎 聲優：草莓大福 翻譯：An-Li Tsai (NCU) 原文：https://apod.nasa.gov/apod/ap230121.html Powered by Firstory Hosting

咱會當 ùi 這張 James Webb 太空望遠鏡 (JWST) 最近 翕--ê 紅外線多彩影像 看著星系團 MACS0647 造成 ê 重力透鏡效應。前景 ê 大質量星系團，kā 背景遙遠星系 tī 視線方向發出 ê 光彎曲去。背景星系 MACS0647-JD 看起來是去予星系團 ê 透鏡效應 彎曲 三擺。MACS0647-JD 頭先 用 Hubble 太空望遠鏡 發現 ê 時陣，去 hŏng 認為是一个變形體。毋過用 Webb 太空望遠鏡 看 ê 時陣，煞發現這个天體其實是 一對、或者是一陣細陣 ê 星系群。這張 MACS0647-JD 內底 ê 天體，色彩攏無仝款，表示這寡星系可能是無仝年歲，抑是有無仝款 ê 塗粉 成份。這寡新影像翕著 ê 星系實在是足少--ê，in 是 tī 大霹靂 發生了後 幾若億年 ê 時間內 產生 ê 星系。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230118/ 影像來源：NASA, ESA, CSA, Dan Coe (STScI), Rebecca Larson (UT), Yu-Yang Hsiao (JHU) Processing: Alyssa Pagan (STScI) Text: Michael Rutkowski (Minn. St. U. Mankato 音樂：P!SCO - 鼎鼎 聲優：草莓大福 翻譯：An-Li Tsai (NCU) 原文：https://apod.nasa.gov/apod/ap230118.html Powered by Firstory Hosting

這粒細粒 ê 雪球行星 浮 tī 天星滿滿 ê 夜空，光就 ùi 伊 ê 地平線照出來。這粒行星其實是 地球。這張是 tī 8 月 21 翕--ê。是利用數位方式，kā 南極點 囥 tī 全景圖 ê 中心，扭曲做這張相片。範圍是包括 南極洲 ê Amundsen-Scott 南極研究站 外口 360x180 度 ê 大細。地球上南爿 ê 研究站就 tī 相片頂懸 ê 地平線附近。天色差不多欲光矣。是講這个暗暝已經有 6 個月遐爾長矣。下底是有紀念性 ê 南極標誌，有 12 支國旗 chhāi tī 遐，是當初時簽南極條約 ê 國家。彼个光-iàⁿ-iàⁿ--ê，是 tī 澳洲天頂 ê 大片極光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220826/ 影像：Aman Chokshi 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220826.html Powered by Firstory Hosting

咱這馬知影太陽系以外已經有超過 4000 粒行星。這款行星就叫做 系外行星。NASA 系外行星資料庫 記錄著--ê 系外行星數量，tī 頂個月才拄達成這个里程埤。這支影片 kā 1992 年 一直到 2019 年確定有揣著 ê 系外行星，按照時間順序，用聲音 kah 色彩 kā 標出來。這規張夜空圖，頭一个注意著 ê 部份，是去予 櫼做 大 U ê 銀河系 中央帶。粉紅仔色--ê，是因為母恆星 ê 徑向速度 產生變化，造成伊 ê 色光產生小可仔變化，才揣著 ê 系外行星。茄仔色--ê，是母恆星 ê 輝度 tī 凌星 過程中，小可仔變暗，才揣著 ê 系外行星。柑仔色--ê，是 直接顯像 ê 系外行星。青色--ê，是 微 重力透鏡效應 kā 背景星 ê 光 放大，才揣著 ê 系外行星。行星若是踅家己 ê 母恆星較緊，就會 彈較懸 ê 聲調。已經退休 ê Kepler 踅地衛星，是頭一个揣系外行星 ê 太空望遠鏡。伊干焦踮天頂某一區揣。這 4000 粒系外行星，有一半攏是伊揣著--ê。毋閣猶咧運作 ê TESS 任務 揣著閣較濟，規个天區攏揣會著 踅厝邊 上光彼粒 恆星咧行 ê 行星。揣 系外行星，毋若會當幫贊人類 閣較了解宇宙其他所在，是毋是 有可能有性命，嘛會當幫贊咱 了解 地球 佮 太陽系，是按怎形成--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220814/ 資料來源：NASA Exoplanet Archive 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220814.html Powered by Firstory Hosting

今年你生日 ê 時陣，彼工 ê 月相會生做啥款？這實在是 足歹臆 ê，因為 月娘逐工看起來 攏無仝。月球 有半爿是去予 太陽 照予光 ê。伊踅 地球 leh 行 ê 時陣，彼半爿會踅出來變光，閣踅出去愈暗。這支動畫 影片 ê 影像是 NASA 踅月 月球探測軌道太空船 翕 ê。主要是欲予你看 2022 年 12 個月 ê 月相是按怎。一改 ê 月圓週期 表示講咱 ê 月娘經過一个完整 ê 週期，包括所有 ê 月相。一个完整 ê 月圓週期 是 29 工半，無夠 一個月。逐改 ê 月圓週期 會因為太陽光反射 月球 ê 角度無仝，所以看著 ê 特徵嘛 攏無仝。毋閣其實 月娘 逐改攏是用仝一面看 地球。逐暗較看袂出來 ê 變化是 月球 視寸尺 ê 改變，彼逐工干焦差一屑屑仔爾爾。伊會微微仔幌頭，這款現象就叫做 天平動，會 tī 月球 踅伊 長株圓軌道 ê 時陣發生。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220201/ 資料：Lunar Reconnaissance Orbiter 動畫：NASA’s Scientific Visualization Studio 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220201.html Powered by Firstory Hosting

相片中央彼兩个星系是 tī 北天 ê 大熊座遐。毋過實際上 in 是離足遠--ê，有 1200 萬光年遐爾遠。正爿彼个有大支捲螺仔手骨、黃色星系核 ê 捲螺仔星系是 M81。伊嘛叫做 Bode 星系，有 10 萬光年遐爾大。倒爿彼个大管薰外形 ê 不規則星系是 M82。過去這十億年來，這對星系 ê 引力一直 leh 相戰。Tī 宇宙內底，星系互相接近 ê 連紲過程中，每一个星系 ê 引力 會一直影響著另外一个星系。In 上尾一擺互踅持續 1 億年矣。真有可能是因為按呢去加強 M81 ê 密度波，造成 M81 ê 捲螺仔手骨變較大支。M82 有足活潑 ê 恆星形成區，而且相挵 ê 氣體雲會產生足強 ê 能量，所以這个星系會 發出 X-光。閣紲落來幾若百萬年，兩个星系 ê 引力會繼續相搝，落尾會合併做 一个星系。這个系外星系 ê 景色嘛包括其他 kah M81 有交互作用 ê 成員。有 倒爿下跤 ê 大捲螺仔星系 NGC 3077，kah 正爿頂懸 ê NGC 2976。這幅闊幅相片是 tī 奧地利 Alps 山 ê 夜空翕--ê。相片 ê 前景攏是累積光通量 ê 星雲。這寡暗暗 沙沙 ê 星際雲，是反射咱銀河盤頂懸 ê 恆星光造成--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230120/ 影像：Andreas Aufschnaiter 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230120.html Powered by Firstory Hosting

星系團是按怎形成--ê？因為咱 ê 宇宙變化傷慢矣，咱看無。所以這个電腦模擬做出來 ê 快速變化，會當予咱參考看覓咧。最近有一項成果，是 ùi IllustrisTNG ê TNG50 做出來--ê，彼是一个比有名 ê Illustris 模擬 閣較厲害 ê 版本。這支影片 第一部份是追蹤宇宙氣體（大部份是 水素）自宇宙早期到今，演化做 星系 kah 星系團 ê 過程。影片內底用較光 ê 色彩標示運動較緊 ê 氣體。等宇宙演化到較夠分 ê 時陣，氣體就會綴 引力井 去，紲落來星系就會形成，了後星系開始轉踅，閣來星系 kah 星系相挵 kah 合併，仝這个時間，星系中心 ê 烏洞 嘛開始形成，kā 踅伊咧行 ê 氣體用足懸速度 kā 擲出去。影片 第二部份轉去追蹤恆星。咱看會著一个星系團 kah 潮汐尾溜、恆星流，攏合合做一个。較意外 ê 是，TNG50 模擬 ê 烏洞噴流，比咱 真正 ê 宇宙 閣較複雜、嘛較濟細節。研究 氣體是按怎 tī 早期宇宙 合併，會當幫贊咱閣較了解咱 地球、太陽、太陽系 ê 源頭是按怎來--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220529/ 影片來源：IllustrisTNG Project 視覺化：Dylan Nelson (Max Planck Institute for Astrophysics) et al. 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220529.html Powered by Firstory Hosting

對一寡人來講，這个烏暗 ê 形體看起來就親像是神話內底 ê 惡魔。科學上來講，Lynds 烏暗星雲 (LDN) 1622 ê 背景是足暗 ê 發光水素氣體，愛用望遠鏡 tùi 這區長時間感光 才看會著。相對來講，tī 這張影像 中央倚正爿頂懸 彼个較光 ê 反射星雲 vdB 62，是較好揣。LDN 1622 是 tī 咱銀河盤附近、倚 Barnard 環 ê 天區。Barnard 環是一个大型雲箍仔，踅 tī 獵戶座皮帶 kah 獵戶座 寶劍外圍。這區是一个豐富閣 複雜 ê 發射星雲。照 LDN 1622 閘光 ê 塗粉 外形來看，in 應該是 tī 仝款遠 ê 所在，差不多有 1500 光年 遠。若是按呢，這 2 度 闊 ê 視野差不多有 60 光年闊。少年恆星 就 藏 tī 這片烏暗雲後壁，毋過咱會當用 Spitzer 太空望遠鏡 翕--ê 紅外線 影像 看著 in。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230125/ 影像：Joshua Carter 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230125.html Powered by Firstory Hosting