NASA 逐工一幅天文圖 APOD Taigi

日頭逐工 tī 天頂 leh 行 ê 路線敢會相 siâng？袂呢！一冬內，日頭 tī 天頂行 ê 路線逐工攏會無仝，而且熱天行 ê 路線比寒天行 ê 路線閣較長。相片內底 ê 日頭路線 是 ùi 中晝翕到日落。3 條線是 3 工 ê 路線，ùi 上頂懸到上下底是：夏至、春秋分、冬至。這張相片 是 2020 年 到 2021 年 tī 意大利 Sicily 島 ê Gatto Corvino 庄附近翕--ê。日頭 tī 天頂 ê 路線 kah 出現 ê 長短，是 決定地球季節 上重要 ê 原因。太陽 kah 地球有偌近，就較無遐爾重要。實際上，地球是 tī 一月份 ê 時陣 kah 太陽上倚，彼陣是北半球 ê 寒天。今仔日是 夏至，所以 今仔日 ê 日頭 tī 天頂 ê 路線，tùi 蹛 tī 地球 北半球 ê 人來講，是今年上長--ê。毋過 tùi 南半球 ê 人來講，是今年上短--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230621/ 影像：Marcella Giulia Pace & Giuseppe De Donà 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap230621.html Powered by Firstory Hosting

地球無任何一个海洋比這个鯊魚星雲閣較大。是講，這隻 食肉--ê 幻影 袂造成危險，因為伊是星際氣體 kah 塗粉 組成--ê。親像 這款 烏暗塗粉，看起來敢若是大管薰 ê 煙，是 tī 大質量 恆星 ê 低溫大氣內底 製造 出來--ê。大質量恆星 ê 氣體去予擲出去了後，重力會重新閣 kā in 搝做伙。紲落來，in 會 kā in ê 高能光 kah 高速 恆星風 當做雕刻 ê 家私，kā 生 in ê 雲 雕出 複雜 ê 結構。In 產生 ê 熱能，會 kā 較厚 ê 分子雲 蒸發，kā 四箍圍仔 ê 水素氣體 解體，發出紅光。Tī 這寡 大型雲 leh 散去 ê 過程中，咱人類就會當開始 想像，看 in ê 形體 是毋是 kah 一寡咱定定看會著 ê 物件 有相-siâng。這 kah 咱 leh 看咱地球 ê 雲仝款，毋過地球 ê 雲是水組成--ê。鯊魚星雲 才 15 光年大爾爾，就 tī Aethiopia 王 ê 星座（仙王座）ê 方向 650 光年 遠 ê 所在。伊內底閣包括 一寡較細 ê 塗粉星雲，像 烏暗星雲 Lynds 1235、Van den Bergh 149 kah 150 等等。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230614/ 影像：Stephen Kennedy 音樂：P!SCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap230614.html Powered by Firstory Hosting

遮有 太陽 所有 看會著 ê 色光，是日光迵過 像 稜鏡 這款家私 ê 時陣產生--ê。這个 光譜 是 McMath-Pierce 太陽天文台 做--ê。先講一下，咱 白色 ê 太陽 其實會發出 全部 ê 色光，毋過伊 tī 黃色 kah 青色 是 上光--ê。這張光譜 內底一逝一逝較暗 ê 部份，是 太陽表面 抑是 頂懸 ê 氣體 吸收 下底 leh 發射 ê 日光。無仝氣體會 吸收無仝色光，這會當幫贊咱了解太陽 ê 組成氣體是啥物。舉一个例，日素 就是 1870 年 先 tī 太陽光譜內底揣著，後來 才 tī 地球 揣著 ê 元素。今仔日咱已經有法度知影大部份 ê 光譜吸收線 是 ùi 佗一个元素來--ê，毋過 猶有一寡毋知。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230611/ 影像：Nigel Sharp (NSF), FTS, NSO, KPNO, AURA, NSF 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230611.html Powered by Firstory Hosting

貓眼星雲 (NGC 6543) 是天頂上有名 ê 行星形星雲之一。逐家熟似 ê 貓眼星雲 tī 這張 hŏng 印象足深 ê 闊幅景色內底，其實是星雲 中央 較光彼區。這幅闊幅 ê 深空影像是 kā 兩台望遠鏡 ê 影像資料合併 ê 結果，咱嘛看會著星雲外部 足暗 ê 暈。照估算 ê 距離 3000 光年來看，這个較暗 ê 外部暈差不多有 5 光年闊。行星形星雲長期以來，一直去 hŏng 認為是 類太陽恆星 演化到 性命 上尾 ê 階段。最近，有一寡行星形星雲攏有發現 這款 暈，可能是恆星演化早期階段 擲出來 ê 物質形成--ê。行星形星雲 這个階段去 hŏng 認為講會擋 1 萬年左右，毋過天文學家估計外部暈 ê 雲絲 ê 年歲，差不多有 5 萬歲到 9 萬歲。Tī 相片倒爿有一个捲螺仔星系 NGC 6552，kah 這个行星形星雲 ê 距離是差 5000 萬光年左右。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230525/ 影像：Jean-François Bax, Guillaume Gruntz 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap230525.html Powered by Firstory Hosting

這幅深空視野拼鬥圖 leh 展示一个 hŏng 足讚嘆 ê 景色，這是 James Webb 太空望遠鏡 ê NIRCam 紀錄 loài ê 星系團 Abell 2744。Abell 2744 嘛叫做 Pandora 星系團，伊敢若是 3 个無仝 ê 大質量星系團合併 ê 結果。伊就 tī 玉夫座方向 35 億光年遠 ê 所在。這个大型星系團 因為 內底攏是烏暗物質，所以伊就 kā 時空扭曲去，這个 重力透鏡 效應嘛 影響著 閣較遠方 ê 天體。比 Pandora 星系團閣較紅 ê 天體，有足濟攏是受著透鏡效應 ê 影響，in 大部份攏是早期宇宙 ê 遙遠星系。受著透鏡效應扭曲 ê 影響，in ê 影像 去予搝長、拗彎，變做弧形。是講影像內底這寡 特別 ê 繞射光針，是銀河內 ê 前景星。照目前估計 ê Pandora 星系團 距離來看，這个宇宙盒仔差不多有 600 萬 光年大。毋過免驚！你閣會當看 這支 2 分鐘 ê 影片，來探索這个迷人 ê 天區。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230609/ 影像來源：NASA, ESA, CSA, Ivo Labbe (Swinburne), Rachel Bezanson (University of Pittsburgh) 資料處理：Alyssa Pagan (STScI) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230609.html Powered by Firstory Hosting

咱 ê 銀河中心 有一粒烏洞。咱本底是知影講，tī 銀河中心附近，有足濟粒恆星 踅一个 足大質量 ê 實密天體 咧行，叫做 人馬座 A*。毋閣昨昏發表 ê 事件視界望遠鏡 (EHT) ê 電波影像，確實證明講，伊就是咱銀河中心 ê 烏洞。這是咱 頭一擺提著 銀河中心烏洞 ê 直接觀測證據。佮 愛因斯坦 ê 廣義相對論 預測 ê 結果仝款，這粒 400 萬太陽質量 ê 烏洞有足強 ê 重力場，會共光線拗彎去，tī 中央產生一个看起來敢若是烏影 ê 烏暗區，去予看起來敢若是光環 ê 結構 箍 tī 內底。這是 太空望遠鏡 佮 地面望遠鏡 同齊 tùi 銀河中心 做 ê 觀測。按呢會當予 事件視界望遠鏡 (EHT) 翕著較闊 ê 烏洞影像 佮 提著重要 ê 烏洞訊息。大張圖 是 Chandra 太空望遠鏡 ê X-光影像資料 佮 Hubble 太空望遠鏡 ê 紅外線影像資料。這張差不多是 7 光年闊。放大 ê 細張插圖是 事件視界望遠鏡 (EHT) 翕 ê 銀河中心 ê 電波影像，這干焦 10 光分闊爾爾。咱 ê 銀河中心，離咱有 2 萬 7000 光年遠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220513/ 影像來源：X-ray: NASA/CXC/SAO, IR: NASA/HST/STScI 插圖：Radio (EHT Collaboration) 音樂：P!SCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap220513.html Powered by Firstory Hosting

三裂星雲 ê 中心是發生啥物代誌？三裂星雲 會叫這个名，就是因為中央有三條足明顯 ê 塗粉帶。下底有無透光 ê 塗粉山，規个星雲內底嘛有其他烏暗塗粉絲迵過。中心有一粒大質量恆星，kā 三裂星雲 照予光。三裂星雲嘛叫做 M20，伊才 30萬歲爾爾，是目前咱知影上少年 ê 發射星雲。這个 恆星形成星雲 就 tī 9000 光年 遠 ê 射手座（人馬座）遐。相片翕著 ê 範圍差不多有 20 光年 闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230605/ 影像：Martin Pugh 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230605.html Powered by Firstory Hosting

咱 ê 太陽未來敢會變做按呢？真有可能喔！想欲知影咱 太陽 ê 未來，頭一个線索是 1764 年發現--ê。彼 ê 時陣，Charles Messier 當咧 kā 一寡 kah 彗星會相濫 ê 霧霧的天體，編做目錄。第 27 粒 Messier 天體，咱 kā 叫做 M27 抑是 啞鐘星雲，是一个 行星形星雲。伊是天頂上光 ê 行星形星雲 之一，咱會當用 雙筒千里鏡 tī 狐狸 ê 星座（狐狸座）內底揣著伊。咱到 M27 ê 距離差不多有 1000 光年遠。相片內底 ê 色光 是 ùi 硫磺（紅色）、水素（青色）、kah 酸素（藍色）發射出來--ê。咱知影講 差不多閣 60 億年，咱 ê 太陽 就會 kā 伊 ê 外層氣體殼擲--出去，變做 行星形星雲，就親像 M27 仝款。中央賰 ê 部份會變做溫度足懸 ê 白矮星，發出 X-光。毋過欲了解 M27 ê 物理 kah 特性，是超過 18 世紀 會當理解 ê 科學範圍。就算是這馬，行星形星雲 嘛猶是有 足濟神祕 ê 部份 咱毋知。親像是這款 複雜 ê 外形 到底是 按怎 產生--ê？咱嘛足想欲知影。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230530/ 影像：Patrick A. Cosgrove 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230530.html Powered by Firstory Hosting

咱銀河系內底 ê 大質量恆星，有足精彩 ê 人生。In ùi 大範圍 ê 宇宙雲開始崩塌，紲落來 tī in ê 核心 kā 核反應爐點予著，製造出重元素。幾若百萬年了後，這寡 豐富 ê 物質 會噴轉去星際空間，驅動新 ê 恆星形成活動。這个咧脹大 ê 殘骸雲 仙后座 A，就是其中一个例，伊是恆星性命週期 ê 上尾一个階段。超新星爆炸會產生超新星殘骸。咱 tī 地球天頂 上早看著 超新星爆炸發出來 ê 光，差不多是 350 年前。毋過 ùi 伊遐發出來 ê 光，其實是愛行 1 萬 1000 年才會到咱遮。這張假色影像是 X 光 kah 可見光影像資料 ê 組合影像。X 光影像資料是 ùi Chandra X 光天文台來--ê，可見光影像資料是 ùi Hubble 太空望遠鏡來--ê。咱會當看著超新星殘骸內底 溫度猶足懸 ê 雲絲 kah 雲丸。照目前估計 ê 仙后座 A ê 距離來看，伊 ê 大細差不多有 30 光年大。高能 X 光 tī 幾个特定元素 產生 ê 發射線，有用無仝色 kā 標出來。紅色是 sir-lí-khóng，黃色是硫磺，青色是 kha-lu-siú-muh，茄仔色是鐵。按呢會當幫贊 天文學家 探索 咱銀河內 ê 恆星物質，是按怎循環再生--ê。猶繼續咧脹大 ê 外層衝擊波，是藍色色調--ê。中心附近 較光 ê 光點 是中子星，伊是大質量恆星 核心崩塌了後，賰落來 ê 密度足懸 ê 恆星核。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230601/ 影像來源：X-ray - NASA, CXC, SAO; Optical - NASA,STScI 音樂：P!SCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap230601.html Powered by Firstory Hosting

媠閣大範 ê 捲螺仔星系 M101 是 Charles Messier's 彼个有名 ê 星表內底上尾一个天體，毋過伊絕對毋是上普通 ê 一个。這个星系 ê 大細差不多有 17 萬光年大，伊足大--ê，差不多是咱銀河系 ê 2 倍大。M101 嘛是 19 世紀 用 Rosse 伯爵上大台 ê 望遠鏡 Leviathan of Parsontown 觀測著 ê 原始 捲螺仔星雲 之一。這是 kā Hubble 太空望遠鏡 tī 20 世紀 kah 21 世紀 紀錄 ê 51 擺感光 kah 地面望遠鏡 ê 觀測資料組合起來 ê 相片。這張組合相片主要是 M101 中央 4 萬 光年闊 ê 範圍。M101 是 Hubble 公佈 ê 捲螺仔星系內底，解析度上懸 ê 其中一个。這張清楚 ê 影像 有翕著 正向盤仔形星系 hŏng 足注意 ê 特色，包括恆星、塗粉，kah 一寡 M101 後壁 ê 背景星系。M101 嘛叫做風吹星系，差不多 tī 2500 萬光年遠 ê 所在，咱會當 tī 北方 ê 大熊座 內底揣著伊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230602/ 影像來源：NASA, ESA, CFHT, NOAO 感謝：K.Kuntz (GSFC), F.Bresolin (U.Hawaii), J.Trauger (JPL), J.Mould (NOAO), Y.-H.Chu (U. Illinois) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230602.html Powered by Firstory Hosting

有當時仔咱會看著 月娘 ùi 咱 太陽系 內底其中一粒行星面頭前趨過，這就叫做掩星。發生 tī 這個月初 ê 掩星現象，閘 ê 就是木星。這張相片 就是 木星 去予月娘閘牢了後，重新 ùi 月娘 後壁 出現 ê 時陣翕--ê。這陣月娘 ê 月相已經來到 下月眉，閣 2 工就欲 初一 矣。咱 ê 月娘 總是有一半去予日頭照著，毋過等到下月眉 ê 時陣，咱 tī 地球 看，嘛干焦看會著彼半爿月娘 ê 一部份爾爾。Tī 這張相片內底，月娘就排 tī 美國 加州 Hamilton 山頂 彼个有名 ê Lick 天文台 後壁。是講誠拄好，Lick 天文台 是發現木星 ê 衛星 木衛五 Amalthea ê 所在，是 Galileo 觀測著 木星四大衛星了後，上尾一粒用目睭揣著 ê 衛星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230524/ 影像來源 kah 版權：Rick Whitacre 文稿：Natalia Lewandowska (SUNY Oswego) 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap230524.html Powered by Firstory Hosting

這粒小行星 有一粒衛星。1993 年彼陣，欲去 木星 ê Galileo 機器人太空船 tī 行星間長途旅行 ê 時陣，拄著兩粒 小行星，就 kā 翕起來。太空船翕著 ê 第二粒小行星叫做 243 Ida，煞發現講伊 竟然 有一粒衛星。Tī 這張 處理過 通看較清楚 ê 影像內底，咱會當看著正爿有一粒細細粒 ê 天體。伊就是 Ida ê 衛星，叫做 Dactyl，才 1.6 公里大爾爾。相對來講，這粒 馬鈴薯形 ê Ida 就較大粒，伊有 60 公里長，25 公里闊。Dactyl 是頭一粒科學家揣著 ê 小行星衛星。毋過咱這馬已經知影講，有足濟粒小行星 攏有衛星。Ida kah Dactyl ê 名攏是 ùi 希臘神話 來--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230528/ 影像：NASA, JPL, Galileo Mission 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230528.html Powered by Firstory Hosting

木星頂懸 ê 大風暴 kah 咱地球 ê 是無仝。Tī 地球頂懸 ê 大 風颱 kah 大型 捲螺仔風 會 出現 tī 低壓區。毋過 tī 木星頂懸上大 ê 逆捲螺仔風風暴，煞出現 tī 高壓區。地球 頂懸 ê 大型風暴會擋幾若禮拜，毋過 木星 頂懸 ê 大型風暴是會擋幾若年。地球頂懸 ê 大型風暴寸尺，差不多 kah 一个國家平大，毋過木星頂懸 ê 風暴是 kah 地球 ê 大細會比並--ê。這兩款風暴攏會產生 爍爁。這張 木星雲 ê 合成相片是 kā 機器人 太空船 Juno 翕 ê 影像資料組合起來--ê。相片是 Juno tī 2020 年 8 月 ê 時陣 衝到這粒大粒行星附近 翕--ê。咱會當看著較近 ê 木星雲有一个 白卵形 ê 捲螺仔雲，邊仔閣有足濟較細 ê 捲螺仔雲，湠到足遠 ê 所在去。木星頂懸較淺色 ê 雲，一般攏比 較深色 ê 雲 較懸。雖罔講 in 無仝款，毋過研究 tī 遮爾遠 ê 木星頂懸 ê 風暴雲，會當 提供咱一寡線索，幫贊咱 閣較了解咱地球 頂懸 ê 風暴 kah 其他天氣模式。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230523/ 影像來源：NASA/JPL-Caltech/SwRI/MSSS 資料處理 & 許可: Kevin M. Gill 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap230523.html Powered by Firstory Hosting

航海家 2 號太空船 tī 1989 年 飛到 外太陽系 欲出去 ê 時陣，翻頭看 tùi 太陽 ê 方向，揣著離太陽上遠 ê 海王星 kah 伊 ê 衛星，海衛一 Triton，兩粒攏成做月眉形。這張 冰巨行星 kah 伊 上大粒衛星 ê 優雅相片，是 航海家太空船 飛到上倚 海王星彼點過了，才翻頭翕--ê。這个景色無法度 ùi 地球翕著，因為咱無可能 tī 倚太陽這爿看著 上遠彼粒行星 ê 月眉形。駛到 日球層、甚至出去了後，太空船就 離開翕相 ê 好所在矣，海王星就毋是咱熟似 ê 藍色 矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230527/ 影像：NASA, Voyager 2 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230527.html Powered by Firstory Hosting

無啥物宇宙景色 kah 這个 獵戶座大星雲 仝款，會當予人激發想像。這張清楚 ê 望遠鏡景色 是 tī 1 月 ê 時陣 tī 美國 西 Virginia 州 一个足寒 ê 暗暝翕--ê。規幅影像攏是獵戶座星雲。伊對目睭來講是一个 足暗 ê 天體，是離咱上倚 ê 恆星形成區。獵戶座星雲嘛叫做 M42，伊發光 ê 氣體就踅 tī 高溫 ê 少年恆星 邊仔。伊差不多有 40 光年闊，就 tī 大型星際 分子雲 邊仔，離咱有 1500 光年遠，kah 咱太陽攏 tī 銀河系仝一條捲螺仔手骨頂懸。像厚塗粉 ê 藍色反射星雲 NGC 1977 kah 頂懸 ê 星雲 這款 tī 咱 厝邊 ê 顯目星雲，其實只佔咱銀河 內底豐富恆星形成物質 ê 一部份爾爾。天文學家 tī 這个開足濟時間研究 ê 恆星托兒所內底，閣有揣著足濟 紅嬰仔太陽系。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230310/ 影像：Abraham Jones 音樂：P!SCO - 鼎鼎 聲優：草莓大福 翻譯：An-Li Tsai (NCU) 原文：https://apod.nasa.gov/apod/ap230310.html Powered by Firstory Hosting

相對論太空公司製造 ê 人族一號火箭 ê 零件大部份攏是 3D 列印做--出來--ê。伊提來燒 ê 低溫火箭燃料，是液態甲烷 kah 液態酸素 ê 合成物，叫做 液氧甲烷。這是 人族一號火箭 tī 3 月 22 暗暝 ùi 美國 Cape Canaveral 發射 ê 特寫相片。這張夭壽媠 ê 相片，有翕著 9 管 Aeon 一號 iăn-jín 噴出足強 ê 藍色廢氣 kah 做伙落--落來 ê 冰角。這擺飛，算是有成功。這隻創新火箭有達成 ê 任務是：有 kā 主 iăn-jín 禁 khiài，嘛有 kā 無仝節火箭分--開。毋過第二節火箭點火了後發生問題，所以就無飛到按算欲飛入去 ê 軌道。是講，人族一號火箭 無按算欲 飛去火星。毋過伊用 ê 燃料是液氧甲烷，是 ùi 甲烷 kah 液態酸素 合成--ê，而且這會當 tī 火星頂懸揣著原料 kā 做--出來。按呢就會使 tī 火星頂懸製造 液氧甲烷，予欲轉來地球 ê 火箭提來做燃料使用。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230406/ 影像：Relativity / John Kraus 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230406.html Powered by Firstory Hosting

5 月初 ê 時陣，有一大陣 宇宙塗粉粒 tī 夜空飛過。這是 週期性彗星 哈雷彗星 留落來 ê 屑仔 流。地球逐年行過 這寡屑仔流 ê 時陣，就會產生 寶瓶座 η 流星雨。毋過，今年 5 月 ê 時陣，寶瓶座 η 流星雨上濟 ê 時陣，會因為拄著月圓，煞看無遐爾明。是講舊年 5 月，出現 哈雷彗星 塗粉流 彼站仔 ê 透早，無去予月光影響著。這張組合相片是 kā 2022 年 4 月 28 到 5 月 8 號之間 tī 智利 San Pedro de Atacama 天頂 紀錄落來 ê 寶瓶座 η 流星雨影像。攏總有翕著 90 粒左右 ê 流星，in ê 輻射點 是 tī 寶瓶座。弧形 ê 銀河中心 tī 天袂光進前，迒過南半球天頂。Ùi 地平線 peh 起來、薄薄 ê 光帶是黃道光，這是太陽系黃道面頂懸 ê 塗粉去予日光散射產生 ê 光。行 tī 黃道頂懸，kah 黃道光做伙出場 ê 行星，是 足光 ê 金星、木星、火星、kah 土星。是講最近科學家發現講，火星本身 嘛有可能是製造黃道塗粉 ê 來源之一，這寡塗粉會 tī 地球天頂產生 黃道光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230512/ 影像：Petr Horalek / Institute of Physics in Opava 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230512.html Powered by Firstory Hosting

恆星死亡了後 ê 藝術價值，是毋是會當予 in 受著閣較濟 ê 關注？確實是按呢，恆星死亡了後會製造閣較濟藝術品。像咱 太陽 抑是 這張相片內底 M2-9 這款低質量恆星，會 ùi 普通 恆星 變做 白矮星，過程中會 kā 伊 ê 外層氣體殼擲出去。脹大 ê 氣體定定會產生 hŏng 印象足深 ê 形體，咱 kā 叫做 行星形星雲，伊會 tī 幾若千年 ê 時間內沓沓仔消失去。蝶仔星雲 M2-9 是一个 行星形星雲，kah 咱 ê 距離是 2100 光年，伊 ê 色彩是足有代表性--ê。伊 ê 一對翼 表示講，伊經過一个奇怪 ê 過程，毋過干焦按呢猶無法度解說規个過程。相片中央彼 兩粒恆星 是 tī 一个差不多 10 倍 冥王星 軌道大細 ê 氣體盤內底 leh 互踅。死亡 恆星 擲出去 ê 氣體殼 kā 氣體盤衝破，產生這个 雙極結構 ê 外形。是講咱 tùi 造成 行星形星雲 ê 原因 kah 外形 ê 物理過程，到今猶毋是蓋了解。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230416/ 影像來源 kah 版權：Hubble Legacy Archive, NASA, ESA 資料處理：Judy Schmidt 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230416.html Powered by Firstory Hosting

這張 Hubble 太空望遠鏡 影像 ê 視野 中心 是 球形星團 NGC 2419，伊有實櫼 ê 恆星分佈，就 tī 較歹揣 ê 天貓座 方向遐。這幅影像邊仔有兩个較光 ê 光針，其實是咱銀河系內底 ê 恆星。NGC 2419 本身是有夠遠，伊 kah 咱 ê 距離差不多有 30 萬光年。相對來講，銀河系 ê 衛星星系，大麥哲倫星雲，kah 咱 ê 距離才 16 萬光年爾。NGC 2419 kah 其他像 半人馬座 Ω 這款大型球形星團有成，伊本身是足光--ê。是講伊看起來會遮暗，是因為伊足遠--ê。因為伊傷遠矣，所以欲 研究 抑是比較 伊 kah 其他 tī 銀河系 銀暈 內底賴賴趖 ê 球形星團 ê 性質，就變甲足困難--ê。NGC 2419 有當時仔嘛叫做「星際流浪者」，伊看起來是比咱銀河系閣較遠。咱若是 量 星團 tī 太空中 ê 運動就會知影講，伊以前應該是 人馬座 長株球矮星系 ê 成員。人馬座矮星系 是另外一个較細 ê 衛星星系，伊以前應該是 kah 較大 ê 銀河系來回產生交互作用，才去予搝碎去。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230413/ 影像：ESA/Hubble, NASA, S. Larsen et al. 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230413.html Powered by Firstory Hosting

附近有一粒恆星爆炸矣，人類 ê 望遠鏡當 leh 踅過去觀測伊。這粒超新星去 hŏng 號名做 SN 2023ixf，是日本天文學家 Koichi Itagaki tī 3 工前發現--ê。伊隨 tī 2 工前 用 ZTF 望遠鏡 ê 自動影像揣著伊 ê 位置。SN 2023ixf 出現 tī 好看頭 ê 風吹星系 M101 內底，kah 咱 ê 距離差不多有 2100 萬光年遠。伊是過去 5 冬內 kah 咱上倚 ê 超新星，10 冬內 第二倚 ê 超新星，15 冬內 tī M101 內底揣著 ê 第二粒超新星。高速追蹤觀測已經指出 SN 2023ixf 是 第二型超新星，是大質量恆星 kā 伊 ê 核燃料用煞了後，核心崩塌產生 ê 爆炸。這張影像是 2 工前 ê 捲螺仔星系，有強調 超新星 ê 出現，一個月前仝這个星系 ê 影像就無超新星 tī 遐。SN 2023ixf 可能會變閣較光，tī 紲落來幾若個月，咱攏會當用望遠鏡看著伊。研究像這款 kah 咱足倚 koh 遮爾少年 ê 第二型超新星，會當予揣著 大質量恆星 kah in 是按怎爆炸 ê 新線索。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230522/ 影像：Craig Stocks 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap230522.html Powered by Firstory Hosting

Messier 63 是 tī 北天一个足光 ê 捲螺仔星系。伊 kah 附近 彼个忠心 ê 星座獵犬座 ê 距離，差不多是 3000 萬光年左右。伊嘛去予編做 NGC 5055，這个雄偉 ê 島宇宙 差不多有 10 萬光年大，kah 咱 銀河 ê 大細是差不多。這个星系有明亮 ê 星系核 kah 雄偉 ê 捲螺仔手骨，所以伊才會提著一个足奅 ê 名，日頭花星系。這張感光特別深 ê 相片，嘛有翕著較暗 ê 弧形 恆星流，流 tùi 星系暈 內底去。這个恆星流 ùi 星系中心延伸出去，一直到 18 萬光年遠 ê 所在。這敢若是 M63 ê 衛星星系 去予潮汐力 搝甲弄家散宅 ê 殘骸。M63 ê 其他衛星星系嘛會當 tī 這張出色 ê 闊幅影像 內底揣著。像一寡較暗 ê 矮星系，嘛會 tī 紲落來幾若十億年 ê 時間內，變做 M63 ê 恆星流 ê 一部份。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230519/ 影像：Sophie Paulin, Jens Unger, Jakob Sahner 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230519.html Powered by Firstory Hosting

人類 ê 探險，上遠是到佗位？這支影片 是 kā 誠實 ê 太空影像 kah 想像 ê 太空空間 合做這支視覺化影片。內容是會信--ê，上無 tī 咱 太陽系 ê 部份是合理--ê。影片 內底較奇幻 ê 部份，是模擬未來人類 浮 tī 太空中 迵過 土星環、用附近 ê 太空船探索 木星、tī 重力足低 ê 天王星 衛星 頂懸 ùi 山崁 跳落去 ê 情形。雖罔講 未來會按怎，無人知影。毋過毋管是宇宙漫遊 抑是 探索未知 ê 世界，tùi 人類來講，攏是 身體 上 kah 智力 上 ê 考驗。這攏是展現 人類精神力 ê 一部份，嘛是過去一直 支持人類活落去 ê 力量。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230326/ 影片：Erik Wernquist 文字 kah 聲音：Carl Sagan 音樂：P!SCO - 鼎鼎 聲優：草莓大福 翻譯：An-Li Tsai (NCU) 原文：https://apod.nasa.gov/apod/ap230326.html Powered by Firstory Hosting

這張透過 狹頻濾鏡 翕 ê 宇宙速翕，視野範圍差不多是一粒月娘 ê 大細，就 chhāi tī 天鵝座 ê 邊界內底。相片內底上明顯 ê 部份是這个圓箍仔形星雲 較光 ê 邊緣。這是離子化 ê 硫磺氣體、水素氣體、kah 酸素氣體 發出 ê 光。這个複雜 leh 發光 ê 弧形結構，是藏 tī ùi 氣體 kah 塗粉組成 ê 星際雲內底。這个發光弧其實是氣泡 ê 一部份，嘛會使講是氣體殼 ê 一部份，伊是 Wolf-Rayet 星 WR 134 ê 恆星風 吹出來 ê 結構。WR 134 就是相片中央 leh 發光彼粒星。科學家估計 WR 134 差不多是 tī 6000 光年遠 ê 所在，所以這幅圖應該有超過 50 光年闊。大質量 ê Wolf-Rayet 星 ê 外層氣體殼，會去予能量足強 ê 恆星風 kā 褪掉。In leh 燒 核燃料 ê 速度是緊甲驚死人。這款大質量恆星演化到上落尾，會以 壯觀 ê 超新星爆炸做結束。這个恆星風 kah 上落尾 ê 超新星，會增加星際物質 重元素 ê 成份，這 tùi 做後一代恆星 是有足大 ê 幫贊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230518/ 影像：Craig Stocks 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230518.html Powered by Firstory Hosting

是按怎太陽表面有一葩較烏？這張是 太陽烏子 ê 特寫相片，是太陽表面 naih--lòe ê 部份，伊 ê 溫度較低、kah 太陽表面其他所在比起來較無遐爾光。太陽複雜 ê 磁場 會製造這寡低溫區，是因為這搭阻止了高溫物質走入來烏子內底。太陽烏子 有可能比地球閣較大，一般講來是會活一禮拜左右。活跳區 AR 3297 有一部份會 tī 5 月初 ê 時陣出現 tī 太陽 表面。較倚下面彼个大型 ê 太陽烏子頂懸有一條足明顯 ê 光橋，是浮 tī 頂懸 ê 高溫氣體組成--ê。Tī 這張懸解析度相片內底，咱嘛會當清楚看著 太陽表面 規片 ê 氣泡，面頂攏是一包一包獨立 ê 高溫氣體包。這款氣體包咱 kā 叫做 米粒組織。太陽米粒組織 ê 大細差不多有 1000 公里大，毋過干焦會 擋 15 分鐘久爾爾。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230517/ 影像：Mark Johnston 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230517.html Powered by Firstory Hosting

大部份 ê 相片攏無完整紀錄 太陽 日冕 ê 壯觀景色。若是會當 tī 日全食 ê 時陣 親目睭看著 日冕，實在是 世界讚！人類 ê 目睭 會當調整看著日冕 ê 特徵 kah 光暗 ê 範圍，一般 ê kha-mé-lah 是無法度。好佳哉咱這馬是 數位 時代。這幅圖是用 數位處理 ê 方式 kā 2023 年 4 月 tī 澳洲 Exmouth 翕 ê 長時間感光 kah 短時間感光 ê 日全食相片疊做伙，閣加強日冕較暗、湠開 ê 部位。咱會當清楚看著太陽日冕 ê 高溫氣體 kah 磁場一直 leh 互相交纏、互相透濫，產生 一重一重足複雜 ê 氣體 kah 散光。一箍一箍 ê 淺粉紅仔色日珥，就出現 tī 太陽 ê 邊緣。相片是 tī 日全食發生進前 幾若秒 kah 過了 幾若秒翕--ê。有翕著背景太陽 出現一目𥍉 ê Baily 珠仔 kah 璇石手指。後擺 ê 日全食 會 tī 2024 年 4 月 ê 時陣 ùi 北美洲 行過。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230516/ 影像：Reinhold Wittich 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230516.html Powered by Firstory Hosting

咱若是 ùi 較遠 ê 所在看過去，就會看著這規个形體敢若是一隻 鴟鴞。毋過咱若是搝近看這个 鴟鴞星雲，就會看著 較光 ê 部份 其實是大型烏暗 塗粉 殼 中央 ê 窗仔。Ùi 這个窗仔，咱會看著一个去 hŏng 照予光 ê 工場，這其實是規个 開放星團 當 leh 形成新 ê 恆星。Tī 這个空間內底，新 ê 恆星當咧形成，邊仔閣有 ùi 烏暗塗粉 kah 冷 分子氣體 中生出來 ê 懸懸 ê 雲柱 kah 圓圓 ê 雲球。咱已經看會著幾若粒 leh 發藍光 ê 少年恆星，in 那燒那發出光、產生恆星風，kā tī 氣體塗粉內底做出來 ê 雲絲 kah 雲牆捒予開。鴟鴞 發射星雲 ê 編號是 M16，就 tī 6500 光年 遠 ê 所在，大細差不多有 20 光年闊，用雙筒千里鏡 向 大隻蛇星座（巨蛇座）ê 方向就揣會著。這張相片 是 長 時間感光 ê 深空影像，閣敆三種專有 ê 發射光：黃光 ê 硫磺、紅光 ê 水素、kah 藍光 ê 酸素。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230515/ 影像：Gianni Lacroce 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230515.html Powered by Firstory Hosting

你會當看偌遠？咱用目睭會當直接看--著--ê 上遠 ê 天體是 M31，大 仙女座星系，伊離咱有 200 萬 光年 遠。你身軀邊若是無望遠鏡，這个大型 捲螺仔星系 看起來就無遐爾清，看起來就干焦是仙女座星座 內底一个暗暗霧霧 ê 星雲。毋過咱若是 kā 望遠鏡影像用數位合成 ê 方式鬥做一張，咱就會當看著離咱上倚 ê 厝邊大星系。這張 hŏng 呵咾甲會觸舌 ê 望遠鏡影像，是開 15 點鐘久 ê 感光時間翕--ê。內底有較光 ê 白色星系核，較暗 ê 咧捲踅 ê 塗粉帶，足光 ê 藍色捲螺仔手骨，kah 明亮 ê 紅光發射星雲。毋過咱是按怎知影這个捲螺仔星雲真正有遮遠--ê？這个問題愛看 1920 年 彼个有名 ê Shapley 佮 Curtis ê 大辯論。M31 ê 距離 是 1920 年代觀測才確定落來--ê。觀測 會當看著一款恆星，伊 ê 光度是會改變--ê，就是這个改變予咱有法度估算距離。這个結果證明講 仙女座星系 kah 咱 銀河系 是足成--ê。這个結論表示講，這个宇宙 是比 咱想像--ê 閣較大。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230322/ 影像：Abdullah Al-Harbi 音樂：P!SCO - 鼎鼎 聲優：草莓大福 翻譯：An-Li Tsai (NCU) 原文：https://apod.nasa.gov/apod/ap230322.html Powered by Firstory Hosting

北落師門 是一粒足光 ê 恆星，kah 咱地球 ê 距離 是 25 光年，tī 南魚座 ê 方向遐。天文學家 tī 1980 年代 ê 時陣，頭一擺 注意著 伊有超額 ê 紅外線輻射。了後，太空 kah 地面望遠鏡 ê 觀測結果 開始知影 講，這个紅外線輻射源是厚塗粉 ê 石屑仔盤。這是行星系統 ê 證據，中央是一粒高溫、少年 ê 恆星。這張清楚 ê 紅外線影像 是 James Webb 太空望遠鏡 ê MIRI kha-mé-lah 翕--ê。有翕著以前毋捌翕著 ê 北落師門 ê 石屑仔盤 足清楚 ê 細節，包括 tī 外部環 ê 大型塗粉雲，這可能是天體相挵 ê 證據。嘛有翕著內部環 kah 環溝仔，這个形體應該是藏 tī 雲內底，咱猶看袂著 ê 行星 leh 維持--ê。倒爿下跤是 圖 ê 比例尺，單位是 天文單位 AU，就是地球到太陽 ê 平均距離。北落師門 ê 外部踅星塗粉環 到 中心恆星 ê 距離，是咱太陽系 Kuiper 帶 到太陽 ê 兩倍遠。Kuiper 帶踅 tī 海王星軌道外口，主要 ê 成員是冰組成 ê 細粒天體 kah 石屑仔。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230511/ 影像來源：NASA, ESA, CSA 資料處理：András Gáspár (Univ. of Arizona), Alyssa Pagan (STScI) 科學目的：A. Gáspár (Univ. of Arizona) et al. 音樂：P!SCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap230511.html Powered by Firstory Hosting

這張 有創意 ê 縮時攝影天景，是 kā 16 擺 ê 感光 轉做 花瓣，展示 ùi 日時到暗暝 ê 時間變化。Ùi 頂懸開始、倒剾方向來看，天色是 ùi 天拄暗 轉做紺色，這看起來就親像是一蕊花。每一張感光攏是 tī 4 月 22 暗頭仔 翕--ê。欲按怎翕，有先算過，按呢翕出來 ê 光線 kah 色彩才會齊勻。彼工 tī 西爿地平線附近，月眉 kah 金星是天頂上光 ê 指標天體。花瓣 ùi 頂一瓣到後一瓣，這兩粒天體那就踅入去花 ê 中心。這蕊暗頭仔花 中央剪影 ê 部份，是 意大利 Sicily 島 Argimusco 高原 ê 大粒岩石。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230506/ 影像：Dario Giannobile 音樂：P!SCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap230506.html Powered by Firstory Hosting

Tī 太空中自由飛是啥物款 ê 感覺？Tī 挑戰者太空梭 ê 貨艙 100 公尺遠 ê 所在，Bruce McCandless 二世 實現伊 ê 夢想：比過去任何一个人攏飛閣較遠。相片 內底 ê 太空人 McCandless tī 載人機動設備 (MMU) ê 引導下，自由浮 tī 太空中。Tī 1984 年 ê 太空梭 任務 41-B 中，McCandless kah NASA 太空人 Robert Stewart 是 頭一組 體驗 這款「無 縛索仔 ê 太空散步」ê 人。MMU 是利用 窒素 ê 噴射流 leh 運作，伊主要 ê 工課是欲鬥 安搭 kah 回收衛星。MMU ê 質量超過 140 公斤，tī 地球 是足重--ê，毋過浮 tī 踅地軌道 ê 時陣，就 kah 其他物件仝款，會失重。是講，MMU 後來去予 SAFER kha-báng 推進設備 取代矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230514/ 影像：NASA, STS-41B 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230514.html Powered by Firstory Hosting

雖罔講這个色彩毋是遐爾清楚，毋過土衛十二 Helene 毋管 tī 佗一款光線下底，攏是一个謎。這張頭一擺 翕甲遮爾清楚 ê 土星 衛星，是踅土星 ê Cassini 機器人太空船 tī 2012 年 ê 時陣，衝 到 伊 kah 這粒 細細粒衛星 ê 距離賰無一粒地球直徑 ê 時陣翕--ê。雖罔講有翕著定定 看著 ê 隕石坑 kah 山崙，這張 相片 閣有 翕著 傷平 ê 地形 kah 一逝一逝 ê 地形。行星天文學家 這馬當 leh 檢查 這寡 Helene ê 詳細相片，就是為著欲 收集線索，通好研究這粒 30 公里大 ê 太空冰山 ê 起源 kah 演化。Helene 實在是足特別--ê，因為伊踅土星 leh 行 ê 時陣，是行 tiàm 土星 ê 大粒衛星，土衛四 Dione ê 頭前。伊行 tiàm 一个叫做 Lagrange 點 ê 穩定引力井 彼位。目前有 4 粒 土星衛星 攏行 tiàm Lagrange 點，Helene 就是其中一粒。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230430/ 影像來源：NASA, JPL-Caltech, SSI 資料處理：Daniel Macháček 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap230430.html Powered by Firstory Hosting

Tī 這張 hŏng 讚嘆 ê 相片內底，咱美麗 ê 地球 tī 烏暗 ê 太空中，現出彎彎、去予太陽照著 ê 月眉形。Ùi 這个咱無熟似 ê 角度來看，地球是遮爾細粒，就親像是一張 遙遠行星 ê 望遠鏡影像。規个地平線攏出現 tī 視野內底。Kah 地球較近距離 ê 影像，愛 tī 低地球軌道才有機會看著，所以國際太空站 頂懸 ê 太空人 實在是真享受。太空站 90 分鐘踅地球一輾，壯觀 ê 雲、海洋、陸地就 tī 下底咧絞，遠方閣有月眉形 ê 地球邊緣 tī 遐。是講 這張數位修復相片 ê 景色，到今為止干焦 24 个人類看過，就是 1968 年 到 1972 年期間，阿波羅太空人 往回月球 ê 時陣看著 ê 景色。原始相片 AS17-152-23420 是阿波羅 17 號欲轉來地球 ê 太空人 tī 1972 年 12 月 17 翕--ê。目前，這是 人類 ùi 行星 ê 角度翕 ê 上尾一張地球相片。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230513/ 影像來源：Apollo 17, NASA 影像修復：Toby Ord 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230513.html Powered by Firstory Hosting

這是 tī 月球南極 ê Shackleton 隕石坑 。隕石坑 內底直徑 21 公里 ê 山尖，是照會著光 ê 部份，毋過坑底就是 永暗區 矣。這張有翕著 Shackleton 隕石坑 坑墘 kah 坑底 ê 影像 是 NASA ShadowCam Kha-mé-lah 翕--ê，這是一台鬥 tī 2022 年 8 月發射 ê 韓國月球揣路者軌道衛星 (KPLO) 頂懸 ê 儀器。烏影 Kha-mé-lah 是設計欲來翕月球表面 ê 永暗區，伊 ê 敏感度是比 月球探測軌道衛星 ê 狹頻角度 Kha-mé-lah 較懸 200 倍。因為這寡所在無去予日光直接照著，所以咱想講遮可能會是 水冰 抑是 其他揮發物質 ê 倉庫。這可能是古早時代 kah 彗星相挵 紮--來--ê，這 tùi 未來 ê 月球任務是足有路用--ê 物件。是講，這个永暗區嘛是會因為 附近 ê 月球地形 反射日光，才會照著光。Tī 這張 有足詳細細節 ê 烏影 Kha-mé-lah 影像 內底，有一个箭頭 指出 一粒 ùi Shackleton 隕石坑 坑墘 kō 落來 ê 石頭。這幅圖 ê 比例尺就 tī 圖 ê 上下底。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230505/ 影像：NASA, ShadowCam, Korea Aerospace Research Institute, Arizona State University 音樂：P!SCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap230505.html Powered by Firstory Hosting

這位觀星者 tī 過去這 10 冬 ê 夢想就是欲翕一張親像這款 ê 相片。這位追夢者知影講，埃及 西部沙漠 內底 ê 白沙漠國家公園 是一个媠甲親像一幅圖 ê 所在，內底有足濟去予風沙雕出來 ê 超現實 白堊紀形體。追夢者知影講，tī 好天無月娘 ê 暗暝，天頂是 暗眠摸，按呢咱就會當看著 銀河系 中央帶 hŏng 印象足深 ê 色彩 kah 細節。所以伊就邀請一位 閣較有經驗 ê 天文攝影師，tī 這个沙漠開 3 禮拜 ê 時間，研究 看愛按怎翕，才會使翕出計畫影像 ê 每一葩，落尾通組合出 in ê 夢想相片。In tī 3 月中開超過 3 暗 ê 時間，用仝一台 kha-mé-lah、tiàm 仝一个地點翕出這張影像 ê 底圖。最後組合出來 ê 精彩成果，就是這張影像。前景彼个人就是追夢者，伊穿伊 ê 傳統衫 Bedouin galabyia 徛 tiàm 遐，感覺足驕傲--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230510/ 影像：Amr Abdulwahab 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230510.html Powered by Firstory Hosting

你敢有法度 tī 今仔日 ê 影像內底揣著兩个地球烏影？敢若有淡薄仔困難。欲揣著頭一个烏影進前，咱先來看 大氣 ê 部份，頂層是粉紅仔色--ê，下層是藍色--ê。這是因為頂半層是 直接去予日光照著，毋過下半層毋是。這兩層中央 ê 茄仔色 區 是 金星帶，是講金星干焦會出現 tī 天頂另外一爿，較倚 太陽 邊仔。下層大氣 ê 藍色 是因為地球 kā 日光閘牢，產生地球 頭一个烏影。這馬咱來揣第二个地球烏影，是 tī 佗位咧？咱來看月球一下。你有注意著倒爿下底有 奇怪 ê 物件 無？這區看起來較暗，因為這嘛 tī 地球烏影下底，這就是地球 ê 第二个烏影。講較詳細咧，這粒 月娘 是 月食 ê 時陣翕--ê。這張時機掠準準 ê 相片 是 2018 年 7 月 tī 意大利 Sicily 島 Sampieri 庄 翕--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230509/ 影像：Marcella Giulia Pace 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230509.html Powered by Firstory Hosting

這个 捲螺仔星系 就算無 100 分，上無嘛是上食相--ê。華麗 ê 正向 星系 NGC 1566 是一个內底有幾若十億粒恆星 ê 島宇宙。伊 chhāi tī 4000 萬光年遠 ê 所在，就 tī 海豬仔星座 (劍魚座) ê 方向。NGC 1566 去 hŏng 分類做 偉大設計 ê 捲螺仔星系，有兩條足明顯足優雅 ê 捲螺仔手骨，頂懸有較光 ê 藍色星團 kah 較暗 ê 宇宙塗粉帶。Hubble 太空望遠鏡 有翕足濟 NGC 1566 ê 影像，就是為著欲研究伊 ê 恆星形成、超新星、kah 捲螺仔星系 無四常 ê 活跳中心。有一寡影像 儉 tī Hubble 遺產資料庫 內底，任何 骨力 ê 業餘者 攏會使自由下載、組合、處理數位資料，創出這張主題影像。NGC 1566 ê 中心爍光，予這个捲螺仔星系成做一个 tùi 咱來講上近上光 ê Seyfert 星系。這是一款中心有一粒 超大質量烏洞，會 kā 伊 四箍圍仔 ê 恆星 kah 氣體破壞去 ê 星系。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230508/ 影像來源：ESA, NASA, Hubble 資料處理：Detlev Odenthal 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230508.html Powered by Firstory Hosting

咱 ê 太陽有一工敢會變做按呢？螺旋星雲 是一个離咱上倚 ê 上光 ê 行星形星雲，這是一款類太陽恆星性命結束 ê 時陣 製造 ê 氣體雲。咱拄仔好徛 tī 一个袂䆀 ê 角度 leh 看這个去予 擲到太空中 ê 恆星外層大氣，所以咱看伊就敢若 leh 看一个螺旋體。中心 ê 恆星核殘骸 註定會變做 白矮星。伊發出 ê 光是 強甲 會 kā 進前擲出去 ê 氣體激發，發出 螢光。螺旋星雲 有一个技術名稱叫做 NGC 7293，就 tī 貯水 ê 星座 (寶瓶座) ê 方向 700 光年 遠 ê 所在，伊 ê 大細差不多有 2.5 光年大。這張 相片是 用 tī 美國 Hawaii 歇睏 火山 山頂 ê 加拿大-法國-夏威夷 望遠鏡 (CFHT) 翕--ê。螺旋星雲 內沿 ê 特寫，展示了足複雜 ê 氣體結，毋過 咱猶毋知這寡物件 ê 來源是啥。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230507/ 影像：CFHT, Coelum, MegaCam, J.-C. Cuillandre (CFHT) & G. A. Anselmi (Coelum) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230507.html Powered by Firstory Hosting

這敢是外星人？可能毋是，毋過 tī 地球頂懸所有 ê 生物內底，水熊蟲 可能是上倚外星人--ê。這是因為咱知影講，水熊蟲 就算是無食無啉幾若十冬，嘛猶活會落去。In tī 溫度 giōng 欲 絕對零度 到 水沸點以上 ê 範圍會當活咧，tī 氣壓 0 以上 到 比 海底 壓力閣較懸 ê 範圍會當活咧，直接 tī 危險 ê 輻射 下底嘛活會落去。這寡 極端生物 ê 生存適應能力是遮爾強，這捌 tī 2011 年 踅地球 ê 太空船外口 試驗過。水熊蟲 會遮爾耐操，一部份是因為 in 有法度修復 in 家己 ê DNA，而且 in kā in 身軀內底 ê 水 減到賰幾葩 嘛猶會擋。有一寡 微型水熊蟲 差一點仔就變做外星生物矣。Tī 2011 年 ê 時陣，in 按算欲坐火箭到火星 ê 衛星 火衛一 Phobos ，到 2021 年才送轉來到月球。毋過 2011 年 ê 發射 煞失敗，2021 年 ê 登陸 摔歹去矣。Tī 地球大部分 ê 所在，水熊蟲 是比 人類 閣較普遍。這張 加強色彩 ê 電子顯微鏡相片 內底，有一隻 毫米長 ê 水熊蟲 tī 青苔 頂懸咧爬。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230521/ 影像：Nicole Ottawa & Oliver Meckes / Eye of Science / Science Source Images 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap230521.html Powered by Firstory Hosting

星系是足媠--ê。星系 內底，干焦引力就會當 kā 足濟恆星、塗粉、星際氣體、恆星殘骸、kah 烏暗物質攏搝做伙。這張相片 是一个差不多 1200 萬光年遠 ê 星系，伊是天頂第五光 ê 星系，編號是 NGC 5128，毋過伊較 hŏng 會記 ê 名是 半人馬座 A。半人馬座 A 這个彎曲 ê 形體，是一个 長株圓星系 kah 一个 捲螺仔星系 合併 ê 結果。半人馬座 A 內底有一个 活跳星系核，中心是一粒 超大質量烏洞。這粒烏洞 ê 質量差不多是咱太陽 ê 5500 萬 倍左右。中心這粒烏洞噴出速度足緊 ê 噴射流，tī 電波 波段 kah X 光 波段攏看會著。噴射流 ê 雲絲是紅色--ê，就 tī 相片倒爿頂懸遐。Ùi 事件視界望遠鏡 提著 ê 新--ê 觀測資料 表示講，噴射流 ê 四箍圍仔是有較光。毋過是按怎會按呢，科學家 這馬猶毋是蓋了解，所以這就變做一个足衝 ê 研究主題矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230503/ 影像來源 kah 版權：Marco Lorenzi, Angus Lau & Tommy Tse 文字：Natalia Lewandowska (SUNY Oswego) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230503.html Powered by Firstory Hosting

咱若是來看 1990 年代後半木星系統 ê 資料，就會發現 加利略太空船 有記錄著 木衛二 Europa 足精彩 ê 影像。這粒衛星 ê 表面冰層下底有一重足深 ê 全球性海洋。這張加利略四大衛星 ê 木衛二 Europa ê 影像資料已經 重新處理過。這擺有改善資料校正 ê 方式，才有法度產生彩色影像。按呢產生 ê 色彩 kah 咱目睭看著 ê 較 相-siâng。木衛二 Europa 表面足長 ê 彎曲痕跡，暗示講遐有地下水。木星 ê 衛星踅木星 ê 長株圓軌道 leh 行。木衛二 Europa 面頂 ê 潮汐作用提供能量，予伊 ê 海洋保持液體 ê 形態。毋閣閣較 趣味 ê 是，就算是無太陽光，伊嘛是會當提供支持性命 ê 能量。所以 木衛二 Europa 就變做是 地球 以外上有可能有性命 ê 所在。毋知啥物款生物會當 tī 深閣暗 ê 地下海洋生存發展咧？是講地球家己嘛是有 tī 極地生存 ê 蝦仔 就是。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230520/ 影像：NASA, JPL-Caltech, SETI Institute, Cynthia Phillips, Marty Valenti 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230520.html Powered by Firstory Hosting

是按怎火星頂懸有遮爾濟平平 ê 岩石？火星 頂懸有一寡平原 kah 山崙 ê 頂懸有足濟岩石，kah 咱地球比起來，看起來是有較平。其中一个理由，應該就是火星 kah 地球頂懸攏足捷看著 ê 侵蝕作用。火星頂懸 ê 二酸化炭素 風，tùi 有較大粒 火星沙塗 ê 所在吹過 ê 時陣，就敢若沙紙仝款。這寡沙會製造無仝程度 ê 侵蝕，予 一寡岩石 表面變甲較光滑，嘛會予一寡長期 chhāi tī 遐 ê 石頭 ui 去。這張相片 是頂個月 NASA 好奇號探測車 tī 火星翕--ê，內底有 幾若粒山，山頂攏是這款較平 ê 岩石。這台機器人探測車已經 tī 火星頂懸行十年矣，而且幫贊咱 了解咱 ê 厝邊行星足濟細節，比論講過去較澹 較有風 ê 環境是生做按怎。好奇號翕 這寡相片 了後，紲落來會較細膩行過石頭 kah 滑溜 ê 沙，去 peh 一个叫做 標誌環谷 ê 所在。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230502/ 影像來源 kah 版權：NASA, JPL-Caltech, MSSS 資料處理：Neville Thompson 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230502.html Powered by Firstory Hosting

明亮 ê 長株圓星系 Messier 87 (M87) 是超大質量烏洞 in 兜。2017 年 ê 時陣，伊 ê 影像頭一擺去予地球 ê 事件視界望遠鏡 翕著。這幅 Spitzer 太空望遠鏡 紅外線影像內底 ê 藍色大型星系，是離咱 5500 光年遠 ê 巨人，M87 室女座星系團。雖罔講 M87 看起來就敢若是雲，無啥物特殊，毋過 Spitzer 影像確實有記錄著 ùi 星系中央噴出來 ê 相對論噴射流。咱會當 tī 這幅圖正爿頂懸 ê 插入圖看著，噴射流是湠到幾若千光年遐爾長。正爿 較光 ê 噴射流 當 leh 倚近咱 ê 視線方向。另外一方面，噴另外一个方向 ê 噴射流，雖罔講咱看袂著，毋閣伊產生 ê 衝擊波，kā 一个較暗 ê 弓形物質照予光。正爿下跤 ê 插入圖就是文章內底講著--ê 歷史性 ê 烏洞影像。伊 to̍h tī 這个大型星系 kah 相對論噴射流 ê 中央。雖罔講這張 Spitzer 影像 ê 解析度猶無夠懸，毋閣咱猶是有法度知影 烏洞是驅動 活跳星系 M87 中心 ê 相對論噴射流 所需要 ê 大量能源 ê 源頭。是講踅 tī 超大質量烏洞 四箍圍仔 ê 物質，落尾攏會落入來烏洞內底。事件視界望遠鏡翕著 ê M87，這馬已經有加強處理過矣。按呢咱就會當 清楚看著這粒有名 ê 超大質量烏洞 矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230504/ 影像：NASA, JPL-Caltech, Event Horizon Telescope Collaboration 音樂：P!SCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap230504.html Powered by Firstory Hosting

大型 ê 船底座星雲 in 兜 有奇怪 ê 恆星 kah 標誌性 ê 星雲。這个星雲是照伊 徛起 ê 星座號名--ê。這个大型恆星形成區是比 大型 ê 獵戶座星雲 較大嘛較光。毋過伊較無遐爾有名，這是因為伊 tiàm 南天，毋過 大部份 ê 人攏蹛 tiàm 北半球。這張影像 內底有翕著足濟 船底座星雲 上北爿 ê 細節。影像倒爿下跤是 Gabriela Mistral 星雲，內底有 發射星雲 IC 2599，伊 ê 發光氣體是踅 tī 較細 ê 開放星團 NGC 3324 外沿。影像中央頂懸 是較大 ê 星團 NGC 3293，伊 ê 正爿是發射星雲 Loden 153。毋過 船底座 上有名 ê 成員 是無出現 tī 遮。伊 tī 影像正爿下跤 較出去 ê 所在，是較光、無穩定、而且注定欲死亡 ê 恆星，叫做 船底座 η。這粒以前捌是 天頂上光 ê 恆星，毋過這馬科學家預測講，伊會 tī 未來幾若百萬年 ê 時間內，用 超新星 爆炸 ê 方式結束伊 ê 性命。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230501/ 影像：Carlos Taylor 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230501.html Powered by Firstory Hosting

你過去這兩工敢有看著極光？有足濟無蹛踮北極區 ê 人有看著喔！極光報告 講，極光毋但出現 tī 美國 北部，像 Alaska 州，嘛出現 tī 美國南部，像 Texas 州 kah Arizona 州。這擺 ê 大型極光，嘛有湠到 歐洲 kah 亞洲。相片內底 hŏng 印象足深 ê 紅色極光，是 chăng 暝 tī 西班牙 中部 Cáceres 庄 附近翕--ê。極光報告嘛有報講，極光出現 tī 西班牙南部 一寡所在。極光其實是 幾若工前 太陽表面發生強烈 ê 日冕物質噴出事件 (CME) 引起--ê 地球現象。CME 產生 ê 粒子湠到規个 內太陽系，了後 kah 地球 磁層 相激。這个時陣，電子 kah 質子 綴 地球北極 ê 磁力線 那捲那踅入去，kah 地球大氣層 ê 酸素、窒素相挵，產生這極光 美景。因為太陽活動比以前攏較強，所以咱未來嘛有 機會 tiàm 南天 看著 北極光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230425/ 影像：Lorenzo Cordero 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230425.html Powered by Firstory Hosting

是啥物咧驅動這个特殊 ê 星雲？CTB-1 是一个咧脹大 ê 氣體殼，伊是 仙后座 內底一粒懸質量恆星 tī 一萬年前爆炸了後留落來 ê 物質。這粒恆星應該是 kā 恆星核附近 透過 核融合 產生 穩定壓力 ê 元素燒了了，才會爆炸。按呢產生 ê 超新星殘骸，因為看起來 足成是一粒腦，所以 to̍h kā 叫做腦髓星雲。因為伊 kah 邊仔 ê 星際氣體 相碰，產生熱量，所以猶繼續佇 可見光 咧發光。是講，是按怎這个 星雲 嘛會佇 X 光 發光呢？這个問題 到今猶是一个謎。有一个假設是講，有一粒活跳跳 ê 脈動星 佇仝一个時間製造出來，伊用高速 ê 恆星風 kā 星雲推捒出去。最近 有一粒脈動星，就根據這个假設，佇 電波波段 去予人揣著。伊敢若是 tī 超新星爆炸 ê 時陣，去 hŏng 用一秒鐘 1000 公里緊 ê 速度 擲出來 ê 信號。雖然講，腦髓星雲 看起來 kā 咱 ê 月娘 欲平大，毋閣伊實在是傷暗矣！這張影像 是 tī 加拿大 Alberta 省 ê 七人庄 開幾若點鐘久 ê 感光時間才提著欸。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230424/ 影像：Kimberly Sibbald 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230424.html Powered by Firstory Hosting

水是發生啥物代誌？這張相片是紀錄 龍絞水 較好 ê 一張相片。龍絞水 就是一款發生 tī 水面頂懸 ê 絞螺仔風。一般講來，龍絞水是 tī 較溫暖 ê 水面頂懸 形成--ê，伊是那自旋那咧衝懸 ê 澹空氣柱仔。龍絞水 kah 絞螺仔風 仝款攏足危險--ê，而且伊 ê 風速是緊甲一點鐘超過 200 公里。有一寡 龍絞水 tī 離 雷公雨 較遠 ê 所在形成，甚至會 tī 天氣袂䆀 ê 所在出現。龍絞水 嘛有可能是會透光--ê，而且干焦 tī 水面 頂懸 開始形成 奇怪圖樣 ê 時陣，才看會著。這張相片 是 2013 年 7 月 ê 時陣 tī 美國 Florida 州 ê Tampa 灣附近翕--ê。Florida 海岸 ê 大西洋，會當講是世界上 龍絞水 出現上濟 ê 地區，一年內會形成幾若百粒。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230423/ 影像：Joey Mole 音樂：P!SCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap230423.html Powered by Firstory Hosting

可見光波段 ê NGC 1333 看起來是一个 反射星雲，主要是藍色色調，這是星際塗粉反射恆星光 ê 專有色。伊 kah 咱 ê 距離才 1000 光年遠爾爾，是一个 tī 英雄星座（英仙座）方向，大型恆星形成分子雲邊界 ê 星雲。這張 Hubble 太空望遠鏡 特寫 翕 ê 範圍，若是照 NGC 1333 估計 ê 距離來算，嘛才 1 光年闊爾爾。相片有翕著塗粉區內底足清楚 ê 細節，kah 明顯對比 ê 紅色發射光。這个紅光是 ùi Herbig-Haro 天體、噴射流、kah 去予新恆星輻射衝擊著 ê 發光氣體 來--ê。實際上，NGC 1333 內底有幾若百粒恆星攏比 100 萬歲閣較少年。若是用 可見光望遠鏡 看，就會發現 in 大部份攏藏 tī 滿四界 ê 星塗 內底，煞看無。這个花 kô-kô ê 環境，可能 kah 咱太陽 tī 45 億年前欲形成 ê 環境差不多欲仝。Hubble 這幅 hŏng 注目 ê 恆星托兒所影像，是為著欲慶祝太空望遠鏡發射 33 週年才發表--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230422/ 影像來源：科學 - NASA, ESA, STScI, 資料處理 - Varun Bajaj (STScI), Joseph DePasquale (STScI), Jennifer Mack (STScI) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230422.html Powered by Firstory Hosting

這張組合影像 是 kā ùi 2022 年 8 月中 前後一禮拜 到 2023 年 3 月底 翕--著 ê 相片疊做伙 ê 結果。這組相片是咧追蹤 紅色火星 tī 天頂 ê 逆行軌跡。逆行軌跡是 ùi 正爿下跤 到 倒爿頂懸 tī 天頂散步 ê Z 字形 路線。Ùi 地球夜空來看，這个軌跡有經過 昴宿星團 kah 畢宿星團，就 tī 金牛座 ê 方位。雖罔講咱每兩冬就會看著火星 tī 天頂行出這个 Z 字形，毋過實際上火星踅太陽咧行 ê 時陣並無倒退攄。顛倒是，這个倒退攄，抑是講這个逆行運動，是背景恆星咧反應地球本身 ê 軌道運動。Tī 地球外口 ê 行星離太陽較遠，踅太陽 ê 速度嘛較慢。相對來講，地球 kah 太陽較倚，伊踅太陽 ê 速度就較緊。所以逐擺地球逐著 離太陽較遠 ê 行星 ê 時陣，咱就會看著行星 ê 逆行運動。這粒 tiàm 北半球夜空足懸 ê 紅色行星，這陣行到火星衝 ê 相位，就是火星、地球、太陽排做一條線，毋過火星 kah 太陽 tī 地球 ê 無仝爿。你會當 tī 這張影像中央附近揣著 12 月 8 號這工 ê 火星。伊這工上光，因為這工是伊 kah 太陽上倚 ê 時陣。咱若是斟酌看火星附近，應該閣會看著一位來到 內太陽系 ê 人氣人客，ZTF 彗星 (C/2022 E3)。其中有兩工有翕著伊，2 月 10 號 kah 2 月 16。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230415/ 影像：Tunc Tezel (TWAN) 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230415.html Powered by Firstory Hosting

4 月 20 這工，月球 ê 烏影 tùi 地球南半球頂懸走過去。這條 狹狹 ê 路線，大部份攏是行海路，tī 烏影下底 ê 人就會看著日食。這擺 ê 日食真罕得看著，因為有 ê 所在會看著日全食，有 ê 所在會看著日環食，所以這工 ê 日食就叫做全環食，嘛會使叫做 複合日食。月球本影掃過澳洲西部 ê 西北角半島 ê 時陣，遮 ê 人就會看著日全食，毋過全程才 62 秒爾爾。這幅圖 ùi 頂懸格 到 下跤格，是 日全食 過程中，干焦會出現一目𥍉 ê 無仝階段：開始 ê 食既，中期 ê 食甚、kah 結束 ê 生光。Tī 開始 ê 食既 kah 結束 ê 生光 這兩个時間點，咱會當看著 ùi 月球邊界迵過來 ê 太陽日珥 kah 日光珠。中央彼格 食甚，愛 tī 日全食發生 ê 時陣才較看會著。而且 tùi 咧逐日食 ê 人來講，上精彩 ê 部份就是活跳太陽 壯麗 ê 日冕。是講「食」 應該是成對--ê。毋過 5 月 5 號 後一擺月圓 ê 時陣，月球煞袂經過地球 ê 本影區，按呢就干焦賰半影月食矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230421/ 影像：Gwenaël Blanck 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230421.html Powered by Firstory Hosting

這張清楚 ê NGC 3628 望遠鏡景色內底，有一个蓬鬆蓬鬆 ê 星系盤，中央去予烏暗 ê 塗粉帶切做兩爿。是講這幅雄偉 ê 側向捲螺仔星系 肖像，予一寡天文學家 想著 伊閣有一个流行 ê 偏名，號做美國割包星系。NGC 3628 下底附近有一个較細 ê 星系，應該是伊 ê 衛星星系。伊閣有一條足暗毋過搝甲足長 ê 潮汐尾溜。這條搝甲長長 ê 尾溜有 30 萬光年長，超過這幅圖倒爿 ê 範圍。Tī 本地宇宙內底，NGC 3628 kah 伊厝邊兩个大型捲螺仔星系 M65 kah M66 是一組--ê，in 就叫做 獅仔座三生仔。發生 tī 宇宙厝邊之間 ê 重力 交互作用，可能是製造潮汐尾溜 ê 原因，嘛是造成捲螺仔星系盤 噴出物質 kah 變形 ê 原因。這个美麗 ê 島宇宙 差不多有 10 萬光年闊，kah 咱 ê 距離有 3500 萬光年遠。伊就 tī 北方 ê 春季星座，獅仔座遐。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230414/ 影像：Mike Selby & Mark Hanson 音樂：P!SCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap230414.html Powered by Firstory Hosting