NASA 逐工一幅天文圖 APOD Taigi

大閣媠 ê 捲螺仔星系 NGC 7331，定定 hŏng 講伊 kah 咱 銀河系 是足成--ê。NGC 7331 就 tī 北天 飛馬座 方向 差不多 5000 萬光年遠 ê 所在。伊真早就 hŏng 認為是一个捲螺仔星雲，嘛是一个足光 ê 星系。毋過伊煞無去予收 tī Charles Messier tī 18 世紀編 ê 足有名 ê 目錄內底。是講這个星系盤 tī 咱 ê 視線方向看起來是 坦倒--ê，所以利用望遠鏡長時間感光 ê 影像，看起來就感覺足有層次--ê。這款效應 tī 這張清楚 ê 影像 內底是閣較明顯，因為 tī 這个島宇宙後壁，猶有幾若个星系 tī 遐。上顯目 ê 背景星系 ê 視寸尺 差不多是 NGC 7331 ê 1/10，表示講 in ê 距離嘛差不多有 10 倍遠。In kah NGC 7331 tī 天頂排 kah 遮爾密，只是拄仔好爾爾。這組引人注目 ê 星系就 tī 銀河盤頂懸，in 嘛叫做 鹿舐星系群。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230914/ 影像：Ian Gorenstein 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap230914.html Powered by Firstory Hosting

Tī 光學望遠鏡下底看著--ê 星系 NGC 4632 有藏一个祕密。伊 ê 邊仔有一輾 水素 冷氣體，kah 伊 ê 捲螺仔星系盤方向差 90 度。這款南北極方向 ê 星系環叫做極環。毋過 NGC 4632 是頭一个 uì 電波 望遠鏡 巡天計畫揣著 極環 ê 星系。這張有翕著氣體環 ê 組合影像，是 kā 懸敏感度 ê ASKAP 電波望遠鏡 kah SUBARU 光學望遠鏡 ê 觀測資料 疊出來--ê 結果。利用 虛擬現實技術，天文學家會當 kā 星系盤 kah 星系環分--開。相片內底 ê 色水變化，是用來追蹤伊 ê 軌道運動。是講這款 極環 是按怎出現--ê？In 可能是星系 kah 伊 ê 星系伴 產生 引力交互作用 ê 時陣，去予 搝 出來 ê 物質。嘛有可能是 水素氣體 綴 宇宙網結構 ê 雲絲 行，煞 tī 星系邊仔吸積做星系環。有一寡 tī 遮 ê 物質會因為引力收縮，變做恆星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230913/ 影像來源：Jayanne English (U. Manitoba), Nathan Deg (Queen’s University) & WALLABY Survey, IDIA/Vislab, CSIRO/ASKAP, NAOJ/Subaru Telescope 文稿：Jayanne English (U. Manitoba) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap230913.html Powered by Firstory Hosting

這張速翕是 Hubble 太空望遠鏡 翕--ê 40 億光年遠 ê 大質量星系團 Abell 370。這个星系團上顯目--ê 是 2 个巨型長株圓星系 kah 滿四界 ê 光弧。實際上，這寡較暗--ê、四散--ê 藍色光弧，kah 影像中央下底 kah 倒爿 彼寡 足明顯 ê 龍形光弧，攏是 Abell 370 後壁 ê 星系。In ê 距離是 2 倍遠。本來看袂著 ê 光，這馬是去予星系團內底 以 超大質量 ê 烏暗物質 主導 ê 重力 kā 加強、扭曲去。這款效應就叫做重力透鏡，會當提供線索，予咱會當 影--著 早期宇宙 ê 星系。這款扭曲 時空 ê 結果，就是 愛因斯坦 100 冬前預測 ê 重力 透鏡 效應。相片內底 ê 光針，是 銀河內底 ê 前景星。正爿下跤 tī 這寡恆星後壁--ê，是 Abell 370，就 tī 海怪星座，海翁座 ê 方向遐。伊是 Frontier Fields 計畫內底欲翕--ê 6 个星系團內底 上尾一个。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230912/ 影像：NASA, ESA, Jennifer Lotz and the HFF Team (STScI) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap230912.html Powered by Firstory Hosting

這張相片就算是無彗星 tī 遐，嘛是足媠--ê。Tī 這張 日出 相片內底，頂懸是優雅 ê 深藍色，閣有小可仔發白光 ê 恆星，地平線附近是 hŏng 感覺爽快 ê 黃咖啡色。前景是 Slovakia 共和國 西部 ê 青色山崙，較遠 ê 是 Zadňa hura 山 kah Veľká hora 山，kah 沿路一寡小鎮。正爿 ê 金星 實在是 傷過媠，因為有大氣踅 tī 伊邊仔，成做一輾彩色 ê 大氣華。毋過閣較吸引人--ê，猶是 彗星。這張組合相片 倒爿彼粒，是昨昏早 天欲光進前翕--ê Nishimura 彗星。最近全球透早攏看會著 足光 ê 彗鬚 kah 長長 ê 離子 尾溜，予足濟透早翕 ê 全景相片攏變甲足媠--ê。明仔載，彗星 C/2023 P1 (Nishimura 彗星) 會經過伊 kah 地球上倚彼點。後擺欲閣行遮爾倚，是愛閣等 434 年矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230911/ 影像：Petr Horálek / Institute of Physics in Opava 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap230911.html Powered by Firstory Hosting

這是啥物雲？是 弧形雲 ê 其中一款雲，叫做 捲𩛩雲 (捲軸雲)。這款真罕得看著--ê 長雲，一般來講攏是出現 tī 冷鋒頭前。尤其是 向前推捒 ê 風暴 頭前若是有 下降氣流，就會造成較澹較燒熱 ê 空氣 peh 升，等伊溫度降到 露點 以下，就會堅做 雲。這个現象若是 tī 大範圍 綴 鋒面 出現，就有可能會形成 捲𩛩雲 (捲軸雲)。捲𩛩雲 (捲軸雲) 實際上可能真正有 空氣 綴 雲 ê 長水平軸 leh 踅。一般講來，科學家認為 捲𩛩雲 (捲軸雲) 袂變做 捲螺仔風。捲𩛩雲 (捲軸雲) kah 弧形雲 ê 另外一款雲，涼棚雲 (灘雲)，無仝。伊 kah 伊 ê 母雲 烏跤雲 (積雨雲) 是完全分開--ê。這張相片 是 2007 年 tī 美國 Wisconsin 州 Racine 市 翕--ê，彼陣有風暴欲來，捲𩛩雲 (捲軸雲) 就湠到足遠 ê 所在 去。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230820/ 影像：Megan Hanrahan (Pierre cb), Wikipedia 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap230820.html Powered by Firstory Hosting

這个人是 tī 遐 leh 創啥？2012 年 ê 時陣，咱會當 tī 美國西部幾若州 kah 北太平洋 狹狹 ê 全食帶 內底，看著金環日食（日環食）。金環 日食 是月娘 離 地球 傷遠矣，煞無法度 kā 規粒太陽攏閘去，所以太陽才會 tī 月盤後壁出現一輾火環。為著欲翕著這款 無四常 ê 太陽活動，有一个骨力 ê 攝影師 ùi Arizona 州 駛車到 新墨西哥州，看會當揣著上讚 ê 翕相地點無。等伊撨好勢，食日 ùi 半公里遠 ê 山脊拄欲落去 ê 時陣，有一个人煞無拄好行到鏡頭內底。是講真感謝這位意外 ê 人客，毋過攝影師猶是毋知這位走到鏡頭內底，產生 剪影 ê 人是 siáng。這个人敢若是提一个圓圓 ê 物件，欲看日食 ê 款。這張相片 是 當地時間 2012 年 5 月 20 暗時 7:36 ê 時陣 tī Albuquerque 附近 一个公園 翕--ê。後個月，10 月 14，會有另外一个狹狹 ê 全食帶 迒 tī 北美洲 kah 南美洲 頂懸。天氣若是袂䆀，應該有機會閣看著 另外一个日環食。仝一个時間，美洲大陸頂懸若是無雲，tī 遐 ê 人攏有機會看著 日偏食。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230910/ 影像：Colleen Pinski 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap230910.html Powered by Firstory Hosting

Nishimura 彗星 leh 發光。講較精確 leh，是 彗星 C/2023 P1 (Nishimura 彗星) 倚近太陽 ê 時陣 leh 發光。這粒 彗星 是頂個月才發現--ê，伊已經行到地球軌道內底矣，這馬是光甲直接用目睭就看會著。後禮拜這粒彗星會行到 kah 地球 上倚 ê 所在。毋過欲行到 kah 太陽上倚 ê 所在，愛閣一禮拜，9 月 7 號彼工。科學家推測講，Nishimura 彗星 頂擺來咱 內太陽系 坐 ê 時陣，有留一寡 噴出來 ê 冰 kah 塗粉，這可能就變做 長蛇座 Sigma 流星雨，伊 ê 高峰期是發生 tī 逐年 ê 12 月。若是按呢生，這擺彗星閣轉來，就會 留閣較濟 彗星屑仔，按呢這个 流星雨 就有可能會變閣較活跳。相片內底 ê Nishimura 彗星 是 4 工前 tī 美國 新墨西哥州 Edgewood 市 翕--ê。有翕著 kah 太陽風 交互作用 產生 ê 長離子尾溜。咱會當 tī 紲落來幾若工 ê 日出進前，tiàm 東爿地平線附近，抑是 tī 後禮拜 日落了後，tiàm 西爿地平線附近 揣著 這粒彗星。伊 ê 彗鬚 會一直遮爾光，伊 ê 尾溜嘛會繼續 發光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230909/ 影像：Peter Kennett 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap230909.html Powered by Firstory Hosting

恆星若是死亡，就會創出星雲。咱會當 tī 飛懸懸 ê 天鵝座 內底揣著 2 个 ùi 恆星死亡了後創出來 ê 氣體塗粉雲，in 就 浮 tī 咱 銀河 盤 ê 豐富星場內底。這張 望遠鏡視野 內底，有翕著 雪文泡星雲，嘛會使叫做茶箍泡星雲（倒爿下跤）kah 月眉星雲（正爿頂懸）。2 个星雲攏是恆星性命演化到上尾階段形成--ê。月眉星雲 嘛叫做 NGC 6888。伊會生做按呢，是因為伊中心彼粒光爍爍 ê 大質量 Wolf-Rayet 星，WR 136，產生 ê 強烈恆星風，kā 伊 ê 外層氣體殼擲出來。WR 136 用足緊 ê 速度 燒伊 ê 燃料。伊 ê 性命是足短--ê，這馬已經行到上尾 ê 坎站矣，煞落來就會變做壯觀 ê 超新星 爆炸矣。雪文波星雲 是 2013 年發現--ê。伊應該是 行星形星雲，是 kah 咱太陽仝款、長歲壽 ê 低質量恆星，演化到上尾擲出來 ê 氣體殮布。落尾伊會沓沓仔演化變做低溫 ê 白矮星。2 个星雲攏 tī 5000 光年 遠 ê 所在，較大 ê 月眉星雲有 25 光年 闊。閣差不多 幾若百萬年了後，2 个星雲攏會無--去。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230904/ 影像：Abdullah Al-Harbi 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230904.html Powered by Firstory Hosting

這个叫做 Messier 17 ê 恆星工場，是去予恆星風 kah 輻射 kā 雕出來--ê，伊就 tī 5500 光年遠 ê 人馬座 內底，遮有足濟星雲。Tī 這个距離， 1/3 度闊 ê 視野 差不多是 30 光年闊。這張清楚 ê 彩色組合影像，主要是欲翕 這寡較暗 ê 氣體塗粉雲 ê 細節，相片 ê 背景是 銀河 中央 ê 恆星。Tī M17 內底，有 ùi 宇宙雲 kah 塗粉做出來 ê 高溫大質量恆星。In 所產生 ê 恆星風 kah 高能光，沓沓仔 kā 賰 ê 星際物質 吹走，產生這款海綿質外形 kah 彎彎曲曲 ê 形體。M17 嘛叫做 Omega 星雲，抑是 天鵝星雲。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230908/ 影像：Kim Quick, Terry Hancock, Tom Masterson (Grand Mesa Observatory) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230908.html Powered by Firstory Hosting

16 世紀 ê 葡萄牙航海家 Ferdinand Magellan kah 伊 ê 船員，tī in 頭一擺踅地球旅行 ê 時陣，有足濟時間研究南半球 ê 夜空。結果 in tī 天頂揣著 2 个霧霧、敢若雲 ê 天體。南半球 ê 觀星者 kā in 叫做 大小麥哲倫星雲，咱這馬知影講 in 是咱銀河系 ê 衛星星系。這張清楚 ê 星系肖像 翕--ê 就是 大麥哲倫星雲，伊就 tī 劍魚座 方向 16 萬光年遠 ê 所在。伊有 15 萬光年闊，是銀河系上大 ê 衛星星系，嘛是現代 上近 ê 超新星 SN 1987A in 兜。中央頂懸 ê 紅斑是 劍魚座 30，嘛叫做 蜘蛛星雲，是一个大型 恆星形成區，大細差不多有 1000 光年闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230907/ 影像：Chris Willocks / Telescope.Live 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230907.html Powered by Firstory Hosting

頂個月 ê 月圓是兩倍 ê 無四常。頭一个無四常 ê 理由是因為伊是 藍月。照現代 ê 定義來講，藍月 是一个 曆日月 內底第二擺月圓。2023 年有 13 擺 ê 月圓，其中一個月有 2 擺，就是 8 月 ê 時陣。頭一个月圓是 8 月 1 號，叫做 鱘龍魚月 抑是 神魚月。第二个 無四常 ê 理由是因為第二个月圓是 超級月娘。照現代 ê 定義來講，超級月娘 是月球 tī 月圓時 行到伊 kah 地球上倚附近，按呢伊 看起來就會比平常時較大粒嘛較光。這張相片內底是 2023 年 ê 超級藍月，就出現 tī 意大利 Sicily 島 Syracuse 市 歷史久長 ê 城堡 kah 燈塔 後壁。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230905/ 影像：Kevin Saragozza 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230905.html Powered by Firstory Hosting

週期性 彗星 73P，嘛叫做 Schwassmann-Wachmann 3 號彗星，已經崩 2 擺以上矣。這粒彗星是 ùi 早期太陽系留落來 ê 冰 kah 塗粉做--ê 宇宙舒芙蕾。伊 tī 1995 年 行到太陽附近 ê 時陣，頭一擺去 hŏng 看著伊 崩做幾若塊。毋過 2006 年閣轉來 ê 時陣，伊煞崩做幾若十塊，散 tī 天頂幾若度闊 ê 範圍。彗星 是磕袂著就崩去 ê 物件，熱能、重力、噴氣 造成 ê 壓力，攏有可能 tī in 倚 太陽 ê 時陣，崩做 壯觀 ê 景色。這張清楚 ê 影像是 2006 年 Hubble 太空望遠鏡 翕--ê。有紀錄著 崩做幾若十塊 ê 彗星 ê 其中一塊：碎片 B。伊後壁閣綴一大陣細塊彗星屑仔，逐塊攏有伊家己 ê 彗鬚 kah 彗尾。這張相片翕--著 ê 彗星 是 tī 離 地球 3200 萬公里遠 ê 所在，按呢相片翕--著 ê 範圍差不多有超過 3000 公里。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230903/ 影像：NASA, ESA, H. Weaver (JHU / APL), M. Mutchler and Z. Levay (STScI) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230903.html Powered by Firstory Hosting

是啥物物件 tī 遐咧發光？這个答案 愛看你是咧講海？抑是咧講天？Tī 海 lih，這个特別 ê 藍光是 生物發出 ê 光。講較詳細咧，發光 ê 是一款 夜光蟲，伊是單細胞浮游生物，是因為去予海湧波浪拍 kah 精神起來，才會發光。In 就是一般咱咧講 ê 藍色目屎。浮游生物 用 in 發 ê 光 來阻擋 這寡 欲食 in ê 生物。這个 tī 2 月中 出現 tiàm Maldives 島 ê 現象是遮爾強烈，連天文攝影師嘛講，這是一个 青藍色 ê 仙境。毋過咱若是看 tùi 天頂去，應該會看著咱較熟似 ê 恆星 kah 星雲 leh 發光。Ùi 去予燈火照 kah 足光 ê 青色植物 後壁 peh 起來 ê 白色光帶，是有幾若十億粒 恆星 ê 銀河系 中央盤。咱閣會當 tī 天頂看著 ê 是，倒爿 ê 半人馬座 ω 星團，kah 中央彼个有名 ê 南十字 星群。相片內底有一寡發紅光 ê 星雲，包括 tī 正爿中央 較光 ê 船底座星雲，kah 正爿頂較大範圍 ê Gum 星雲。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230529/ 影像：Petr Horálek / Institute of Physics in Opava, Sovena Jani 音樂：P!SCO - 鼎鼎 聲優：草莓大福 翻譯：An-Li Tsai (NCU) 原文：https://apod.nasa.gov/apod/ap230529.html Powered by Firstory Hosting

室女座星系團 佔 這規幅 望遠鏡 視野 差不多有 4 度闊。室女座星系團 tī 差不多 5000 萬光年遠 ê 所在，是 kah 咱本星系群 上倚 ê 大型星系團。室女座星系團內底特別光 ê 長株圓星系，是中央下跤 ê M87，倒爿頂懸 ê M84，kah 倒爿下跤 ê M86，in 攏是 Messier 目錄 內底 ê 天體。M84 kah M86 去 hŏng 認為是 Markarian 鍊仔 ê 一部份。鍊仔就是這張相片倒爿 排做一條 ê 彼陣星系。鍊仔中央彼搭有一對足趣味 ê 交互作用星系，NGC 4438 kah NGC 4435，in 就叫做 Markarian ê 目睭。是講 大型長株圓星系 M87 是 室女座星系團內底上顯目--ê。伊是頭一粒用咱地球 ê 事件視界望遠鏡 揣著 ê 超大質量烏洞 in 兜。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230526/ 影像：Abdullah Alharbi 音樂：P!SCO - 鼎鼎 聲優：草莓大福 翻譯：An-Li Tsai (NCU) 原文：https://apod.nasa.gov/apod/ap230526.html Powered by Firstory Hosting

1716 年 ê 時陣，英國天文學家 Edmond Halley 講，「這看起來干焦是夜空內底 ê 一个光點爾爾，毋過 tī 無月娘 ê 暗暝，天氣若是有清，咱就會當直接用目睭看著伊」。是講，咱這馬較袂講 M13 是 武仙座 內底 ê 大型球形星團矣，咱會直接講伊是北天上光 ê 球形星團。咱若是有 像這款遮爾清楚 ê 望遠鏡影像，就會當看著這个星團內底有 幾若十萬粒足壯觀 ê 恆星。這个星團就 tī 2 萬 5000 光年遠 ê 所在，內底 ê 恆星攏櫼櫼 tī 直徑 150 光年 ê 範圍內。Tī 星團 中心附近，3 光年立方 ê 範圍內底就有 100 粒恆星矣。咱來做一个比較較好了解，kah 咱太陽 上倚 ê 恆星 是 tī 4 光年遠 ê 所在。這張影像紀錄 ê 輝度 kah 星團實密 ê 程度有關，星團核心 ê 部份就足光--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230901/ 影像：Serge Brunier, Jean-François Bax, David Vernet OCA/C2PU 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap230901.html Powered by Firstory Hosting

這毋是 James Webb 太空望遠鏡 最近翕--ê 遙遠星系 ê 星雲。這个出現 tī 8 月 26 透早 足光 ê 氣體塗粉雲，予觀星者看甲霧嗄嗄。這張速翕是 SpaceX 載人 7 號任務 獵鷹 9 號火箭 發射了後 2 分鐘翕--ê。這个任務 是 SpaceX 公司 送商業組員去國際太空站 ê 第 7 擺輪調任務。相片有翕著 ùi 第一節 kah 第二節火箭脫離 ê 時陣噴--出來 ê 雲煙 kah 廢氣。Tī 烏 mih-mah ê 夜空中看起來煞足光--ê。相片中央附近 彎彎曲曲 ê 藍色環中央，有 2 粒足光 ê 光點。較下跤彼點是第二節火箭，內底有飛龍號太空船，欲載 4 个組員去太空。較頂懸 ê 光點是 獵鷹 9 號 ê 第一節推進器。伊這馬當 leh 調整方向，欲飛轉來地球，按算降落 tī Cape Canaveral ê 一號降落區。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230831/ 影像：Michael Seeley 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230831.html Powered by Firstory Hosting

8 月 1 號 日落了後，月娘就隨 peh 起來矣。這工 ê 月球行到月球軌道 近地點附近，近地點就是月球 kah 咱地球上近彼點。這張戲劇性 ê 月出相片，是 tī 意大利 Sicily 島 Ragusa 翕--ê。月娘 就 ùi 東爿地平線 ê 厚雲後壁出現，伊是比平常時 ê 月盤閣較光。相片內底這粒 tī 地球夜空 閃閃爍爍 ê 月娘，是 2023 年 ê 第二擺超級月娘。伊猶 tī 近地點附近，會 tī 8 月份閣一个暗暝 出現，誠做 2023 年 ê 第三擺超級月娘。就是今仔日，日落了後，這粒 tī 8 月份 第二擺出現 ê 月圓，就隨 peh 起來矣。有一寡人知影伊叫做藍月，毋過日光散射 tī 月娘頂懸，予伊看起來較紅講，毋是藍色--ê。這其實是西方文化 kā 一個月內底 ê 第二擺月圓 定義做 藍月，這差不多 2、3 年才會發生一擺。這是因為一擺完整 ê 月相週期是 29.5 工，差不多是一个曆日月。咱下暗會當 tī 光爍爍 ê 土星邊仔揣著 八月藍月。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230830/ 影像：Gianni Tumino 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230830.html Powered by Firstory Hosting

這是一幅媠甲擋袂牢 ê 景色。Ùi Alps 山脈 ê Tschirgant 峰，你毋但會當看著附近 ê 庄頭 kah 遠方 ê Tyrolean 山頭。天氣若是袂䆀，你閣會當看著 恆星、星雲、kah 銀河系 ê 光帶。毋過 tùi peh 山 peh 甲 giōng 欲忝死 ê 人 來講，這暗會遮爾有價值，是因為這暗閣是 2018 年 ê 英仙座 流星 雨 上濟 ê 時陣。In ê 願望總算有達成，雲散去了後，才會有這个遮爾媠 ê 夜空出現，閣有 無遐爾光 ê 流星。而且 kha-mé-lah 有囥予好勢，才會翕著幾若張袂䆀 ê 相片。忽然間，天頂出現一粒足 光 ê 彩色 流星趨 tuì 正爿去，趨到 墜直 ê 銀河帶 附近。是講足好運--ê，kha-mé-lah 嘛有翕著這个景色。所以攝影師隨閣翕一張新--ê 相片，這擺有翕著一位 觀星者 徛 tī 山頂附近。伊翕了了後，才 kā 全部 ê 影像用 數位技術 kā 疊做一張。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230716/ 影像：Nicholas Roemmelt (Venture Photography) 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap230716.html Powered by Firstory Hosting

是按怎這个捲螺仔星系 M66 無對稱？一般講來，氣體、塗粉、新形成 ê 恆星 ê 密度波 是 踅 捲螺仔星系 ê 中心 leh 行，星系應該會誠做 對稱 ê 形體。M66 ê 捲螺仔手骨 kah 星系核 會徙位，可能是伊進前捌發生 kah 其他星系產生交互作用，引潮力 kā 附近 ê 厝邊星系 M65 kah NGC 3628 搝過來。這張星系相片 是 James Webb 太空望遠鏡 tī 紅外線 翕--ê。伊有 10 萬 光年 闊，chhāi tī 3500 光年 遠 ê 所在，是 獅仔座三生仔 內底上大粒 ê 星系。M66 kah 足濟 捲螺仔星系 仝款，攏有長閣複雜 ê 塗粉帶。Tī 伊 ê 捲螺仔手骨頂懸，有足濟 光爍爍 ê 恆星 kah 星系間塗粉。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230829/ 影像來源：NASA, ESA, CSA, JWST 資料處理：Brian Tomlinson 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230829.html Powered by Firstory Hosting

咱來看這个編號 NGC 281 ê 宇宙雲，毋過你有可能會 kā 開放星團 IC 1590 看落勾去。這个少年、大質量恆星 ê 星團 是 tī 這个星雲內底 生出來--ê。伊落尾會激發這个星雲，予星雲發光。Tī NGC 281 肖像內底 這个顯目 ê 形體，是去予 星團內底 高溫恆星 強烈、高能 ê 恆星風 kah 輻射能 kā 侵蝕，雕出 塗粉柱 kah 實密 ê Bok 雲球，才會變做你看著 ê 剪影。這區若是活較久 leh，塗粉結構就有可能變做未來 ê 恆星形成區。NGC 281 chhāi tī 差不多1 萬光年遠 ê 仙后座，會遮爾古錐叫做 小精靈星雲，是因為伊 ê 形體。這張清楚 ê 組合影像是 ùi 幾若張狹頻波段 ê 資料來--ê。影像內底 ê 紅色、青色、kah 藍色，是 ùi 星雲內底 ê 水素原子 kah 酸素原子發射線 合成 來--ê。照科學家估計 ê NGC 281 距離來看，這幅圖有超過 80 光年 闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230828/ 影像：Craig Stocks 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230828.html Powered by Firstory Hosting

注意看這張壯麗夜景 ê 對角線方向，地平線頂懸有銀河弧，銀河 內底 有霧霧 ê 恆星光 kah 烏暗星雲。這張 媠甲 hŏng 袂喘氣 ê 拼鬥圖 有 100 度闊，伊 ê 前景是 阿根廷 Patagonia 地區 敧敧曲曲 ê 地形。咱是徛 tī 銀河 內底 leh 看這个景色，毋過這張相片嘛看會著 銀河外口 ê 兩个不規則衛星星系，大 小 麥哲倫星雲。這个景色嘛有翕著 2007 年 ê 大彗星，McNaught 彗星 ê 闊彗尾 kah 光爍爍 ê 彗鬚。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230827/ 影像：Miloslav Druckmuller (Brno University of Technology) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230827.html Powered by Firstory Hosting

金星 kah 月娘仝款，嘛有相位 ê 變化，予太陽照著 ê 彼半球嘛有 盈虧。這組 望遠鏡系列影像，展示了金星 tī 2023 年做咱地球 暗頭仔星 ê 時陣，沓沓仔變化 ê 情形。金星是 tī 地球 kah 太陽之間 ê 內行星軌道 leh 行。伊看起來會愈來愈大粒，是因為伊倚咱地球愈來愈近。伊 ê 月眉相 遮爾狹，是因為這粒內行星行到咱 kah 太陽 ê 視線方向。Tī 8 月 13 ê 時陣，金星行到 下合 ê 位置，就是行到 地球 kah 太陽 連線 ê 附近，毋過這擺金星是 ùi 太陽 ê 南方 8 度左右 ê 所在行過。這馬 ê 金星已經 tī 天欲光 ê 時陣出現 tī 東方地平線頂懸，變做咱地球 ê 透早星 矣。Tī 8 月 21，NASA ê Parker 太陽探測器 完成伊 tùi 金星 ê 第 6 擺 重力輔助飛行。伊利用這擺機會，飛到 閣較倚太陽 ê 所在去。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230826/ 影像：Roberto Ortu 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230826.html Powered by Firstory Hosting

有環 ê 土星 會 tī 2023 年 8 月 27 行到「土星衝」ê 位置，就是 tī 地球天頂看著太陽 kah 土星 差 180 度。這粒離太陽第 6 遠 ê 行星 tī 這工 會上光，嘛是咱上好觀測 ê 角度。毋過咱猶是無法度直接用目睭看著伊美麗 ê 環系統。是講，這个系列相片是 ùi 內行星 地球 ê 角度來翕土星 kah 土星環。1 年翕 1 張，攏總有 6 張望遠鏡影像。這粒氣態巨行星 ê 環平面 tī 2018 年 ê 時陣 是正面向咱，到 2023 年 ê 時陣 已經是側面向咱矣（ùi 頂懸到下跤）。土星 ê 北半球 嘛 ùi 熱天 行到 秋分。Tī 這組清楚 ê 行星肖像內底，土星北半球 ê 六角雲 kah 大型 風暴 系統 嘛 tī 2018 年 ê 影像內底看甲足清楚--ê。Tī 2023 年 ê 時陣，冰衛星 土衛三 Tethys 發生 凌土現象，就是 ùi 土星面頭前行過，伊 ê 烏影就投影 tī 土星南半球 ê 雲帶。土星南極 是 冷閣藍，這馬才拄欲結束伊 10 年長 ê 寒天 kah 暗暝。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230825/ 影像：Andy Casely 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230825.html Powered by Firstory Hosting

Tī 無月娘 ê 暗暝，足濟 地球居民 就會當看著一年一擺 ê 英仙座流星雨。這是 8 月 13 天欲光進前 tī Iran 共和國 Shiraz ê 山坡草埔看著--ê 北半球熱天 ê 銀河 kah 綴伊行 ê 英仙座流星。這張設計好 ê 組合影像，是 一年一擺 流星雨 上濟 ê 時陣，差不多是 當地時間 透早 2:00 到 4:30 翕--ê。流星雨 ê 輻射點就 tī 英雄星座，英仙座內底。毋過這無 tī 這張夜空景色內底，是 tī kha-mé-lah 視野頂懸較遠 ê 所在。是講北半球熱天暗暝 猶看會著 幾若个咱熟似 ê 星群。Ùi 天津四、織女星、kah 牛郎星 幾若粒較光 ê 恆星組成 ê 夏季大三角，就迒 tī 銀河 ê 光帶 頂懸。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230824/ 影像：Ali Hosseini Nezhad 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230824.html Powered by Firstory Hosting

伊是 ùi 外太空 來--ê。這个「伊」，其實是 kah 沙平大粒 ê 彗核，應該是幾若年前 ùi 踅 太陽 ê Swift-Tuttle 彗星 噴--出來--ê。毋過伊家己猶繼續踅太陽 leh 行。地球行過彗星軌道 ê 時陣，彗星屑仔就會挵著 地球大氣，按呢就會變做流星。這粒 流星崩去矣，氣體噴出來發出 ê 光，是照伊 ê 組成元素決定--ê。這張影像是 頂禮拜 英仙座流星雨 上濟彼暗 tī 西班牙 Castilla La Mancha 翕--ê。 媠甲擋袂牢 ê 流星痕跡就 干焦 出現 tī 50 張相片內底 ê 其中這張，內底閣有翕著 仙女座星系。是講相片內底一點一點--ê 是恆星，彼逐粒是攏比流星較遠。Kah 恆星相比，仙女座星系 (M31)，當然是較遠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230823/ 影像：Jose Pedrero 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230823.html Powered by Firstory Hosting

進前無人注意過這个星雲。一般講來，新發現 ê 星雲 ê 視寸尺會較細，而且攏是 專業天文學家 用大型天文望遠鏡 揣著--ê。毋過這个 開喙豆星雲 是 頂真 ê 業餘天文愛好者 揣著--ê。而且，這个星雲暗罔暗，是 kah 咱月娘 ê 視寸尺差不多平大。現代 ê 業餘天文愛好者 若是有細台天文望遠鏡，就會使 利用 tùi 天頂 進行長時間感光，提著比專業天文望遠鏡 閣較大區 ê 影像。按呢 in 毋但會當揣著 某一个天體四箍圍仔 猶毋捌揣著--ê 大片發射區，嘛會使揣著 過去完全毋捌揣著--ê 天體，親像 星雲。這張開喙豆星雲影像 ê 藍色是 酸素 發射線，紅色是 水素 發射線。咱這馬 tùi 中央彼粒高溫恆星 ê 性質 是 無蓋了解。毋過伊若是一粒 白矮星，這个星雲就有可能去 hŏng 標做 行星形星雲。這張相片 是 7 月初 ê 時陣 tī Namibia 共和國 暗暝 開超過 70 點鐘 ê 感光時間 翕出來 ê 合成影像。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230822/ 影像：Bray Falls & Chester Hall-Fernandez 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230822.html Powered by Firstory Hosting

鳥仔 袂飛遮爾懸。飛龍機 嘛袂飛遮爾緊。自由女神 ê 雕像無遐爾重。除了 人類 以外，無任何 物種 會當了解這馬是 發生啥物代誌，連 1000 年前 ê 人類 嘛無法度。發射欲去太空 ê 火箭，是一件大代誌，會 引起人類 tùi 宇宙 ê 尊敬、挑戰人類描述這件代誌 ê 能力。這張相片是頂禮拜翕--ê。是印度太空研究組織 ê LVM3 火箭 ùi 印度 Sriharikota 島 ê Satish Dhawan 太空中心 發射 ê 情形。Ùi 停咧 開始，這台 60 萬公斤重 ê 火箭，kā 仝款嘛足重 ê 月船三號 捒出地球。月船三號 ê 任務 按算欲 tī 8 月底到月球，而且會留一台 機器人探測車 tī 月球南極 遐。欲去太空 ê 火箭，這馬 幾若工 就 ùi 地球某一个所在 發射。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230719/ 影像：Sruthi Suresh (Space Group) 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap230719.html Powered by Firstory Hosting

Nishimura 彗星敢會光甲咱會使直接用目睭看著？一般講來，彗星 ê 預測是足困難--ê，無人知影伊未來會按怎。毋過這馬這个時期應該是會使臆看覓 leh。這粒彗星是 10 工前 Hideo Nishimura 用一般 ê 數位 kha-mé-lah 開 30 秒 ê 感光時間翕了後 揣著--ê。Ùi 彼陣開始，這粒 C/2023 P1 Nishimura 彗星就愈來愈光，而且伊 ê 路線應該是會飛到 內太陽系。等這粒彗星飛倚太陽 ê 時陣，伊一定會變甲足光--ê。而且咱真有可能 tī 9 月初 ê 時陣，直接用目睭看著伊。毋過有一个問題，時到 這粒彗星 ê 視角度會 kah 太陽傷倚，按呢咱干焦會當 tī 日出 抑是 日落 前後 看著伊。這粒彗星會行到 水星 軌道內底，kah 太陽是足倚--ê。按呢伊 ê 彗核真有可能會 崩去。這張相片 ê Nishimura 彗星 是 3 工前 tī 美國 加州 ê 六月湖 翕--ê，有翕著青色 ê 彗鬚 kah 狹狹 ê 彗尾。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230821/ 影像：Dan Bartlett 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230821.html Powered by Firstory Hosting

這張加強對比 ê 彩色影像，是冥王星 ê 北部。咱斟酌來看 伊北部 堅凍 ê 坑谷 。提來 建構影像 ê 資料是 ùi 2015 年 7 月 新視野號太空船 來--ê。彼陣是伊頭一擺飛過 這粒 離太陽 60 億公里遠 ê 冥王星。這區 這馬叫做 Lowell Regio 區，這个名是 ùi Percival Lowell 來--ê，伊是 起 Lowell 天文台 ê 人。Lowell 上有名 ê 代誌，就是 推測 火星頂懸有運河。伊開始搜揣火星頂懸 ê 運河，落尾 Clyde Tombaugh 煞 tī 1930 年 ê 時陣，發現冥王星。這張冥王星影像 ê 北極 是 tī 中央倒爿頂懸。倒爿淺藍色 ê 坑谷，差不多有 70 公里闊，直直迵 tùi 南方去。黃色是較懸 ê 所在。新視野號 ê 測量結果 決定講，除了窒素冰以外，Lowell Regio 區 閣有足濟甲烷冰。是講，冥王星 ê 名 是 太陽系內底，唯一一粒由 11 歲 chău 囡仔號名--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230818/ 影像：NASA, Johns Hopkins Univ./APL, Southwest Research Institute 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230818.html Powered by Firstory Hosting

這張清楚 ê 望遠鏡視野中央有兩个大型星系合併，產生這款 宇宙級 ê 攬牢牢。這組交互作用系統 去 hŏng 編做 Arp 93，伊就 tī 寶瓶座 方向 2 億光年遠 ê 所在。這兩粒星系分別是 NGC 7285 (正爿彼个) kah NGC 7284 (倒爿彼个)。兩粒光爍爍 ê 星系核 距離猶差 2 萬光年，毋過 in 之間 因為 引力交互作用 產生 ê 大片 潮汐流，是伸 tùi 影像下底 20 萬光年遠 ê 所在去。交互作用星系看起來攏 足特別--ê，毋過咱這馬已經知影 in tī 宇宙內底其實是足四常 ê 天體。實際上，咱兜附近嘛有。大型捲螺仔星系 仙女座星系，就當 leh 倚近咱 ê 銀河。Arp 93 真有可能就是 咱 kah 仙女座星系 tī 未來 變做 宇宙級攬牢牢 ê 結果。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230816/ 影像：Mike Selby, Observatorio El Sauce 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230816.html Powered by Firstory Hosting

Tī 北方星座 仙王座 方向 12 度闊 ê 視野 內底，有星際氣體 kah 烏暗塗粉雲 相濫發光 ê 大片發射星雲 IC 1396 kah Sh2-129。相片倒爿彼个幾若百光年闊、3000 光年遠 ê 星雲，是 去予中央恆星 IC 1396 激發--ê。這个星雲有趣味 ê 烏暗形體，包括 tī 中央正爿下底 彼个 彎彎曲曲 ê 烏暗雲，象管星雲。伊有幾若十光年長，是恆星形成 ê 原始材料，咱這馬知影講 這內底有 原恆星。正爿 ê Sh2-129 chhāi tī 差不多遠 ê 距離，伊內底較光 ê 雲丸 kah 向後壁去--ê 發射雲脊，予伊提著 飛行夜婆星雲 這个名。最近才 tī 飛行夜婆星雲內底 揣著--ê，是 發出小可仔藍光 ê Ou4，大花枝星雲，拄仔好替 這个皇家宇宙動物園 添丁。相片正爿下底邊仔閣有 一个 因為 伊 ê 烏暗外形 才號名做 海馬星雲，伊 ê 編號是 Barnard 150。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230817/ 影像：Yann Sainty 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230817.html Powered by Firstory Hosting

這日頭看起來敢若 毋是遐爾平靜。伊 會噴出 太陽風，就是 無穩定 ê 高能 電子 流 kah 質子 流。閘電粒子會改變 地球磁層 ê 形體，而且粒子 ê 路線改變了後，會 kah 地球大氣 內底原子相挵，產生 極光，像相片倒爿 ê 青光 就是。地球本身 ê 地質活動力 算強--ê，地表有袂少 火山。比論講，冰島 ê Fagradalsfjall 火山，就相片中央 leh 噴 柑仔色燒氣體彼搭就是。冰島是地球面頂 地質活動上濟 ê 所在。相片上正爿 leh 衝白煙 ê 是 Svartsengi 地熱發電廠，就是創出彼个有名 ê 人造 藍色內海仔 ê 所在。這張相片 有翕著 天頂三項無仝款 ê 現象，包括自然現象 kah 人造現象。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230815/ 影像來源 kah 版權：Wioleta Gorecka 文稿：Natalia Lewandowska (SUNY Oswego) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230815.html Powered by Firstory Hosting

環形星雲 (M57) 是比細台望遠鏡看著--ê 閣較複雜。這个有名 ê 星雲，中央彼輪圓箍仔 tī 可見光是真好揣，差不多有 1 光年 闊。毋過這張是 James Webb 太空望遠鏡 tī 紅外線 翕--ê，而且有 閣較深 ê 感光。這張經過數位加強閣指定色水 ê 影像，予這寡氣體絲看起來 親像是 宇宙眼 ê 目睭毛。這寡長長 ê 雲絲可能是 環頂懸較實密 ê 氣體丸 kā 內底發出 ê 高能光 閘牢，產生 ê 烏影。環形星雲是一个搝長 ê 行星形星雲，是 太陽 這款恆星 演化做白矮星 ê 過程中，kā 外層大氣擲--出去 ê 氣體雲。中央有卵形結構 ê 環形星雲 就 chhāi tī 2500 光年遠 ê 樂器星座，天琴座 遐。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230814/ 影像來源：NASA, ESA, CSA, JWST 資料處理：Zi Yang Kong 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230814.html Powered by Firstory Hosting

M51 是 Charles Messier 編 ê 彼个有名 ê 目錄內底 第 51 个天體，伊是一對交互作用星系。伊嘛去予編做 NGC 5194，應該是 頭一个科學家揣著--ê 捲螺仔星雲，是一个有捲螺仔結構 ê 大型正向星系。伊 ê 捲螺仔手骨 kah 塗粉帶 ùi 伊 ê 星系伴 NGC 5195（正爿彼个）頭前掃--過。Tī 這个望遠鏡視野內底 ê M51，若是直接用目睭看，是暗暗霧霧。伊 kah 咱 ê 距離差不多有 3100 萬光年，就 chhāi tī 獵犬座 的邊界內底。是講這張深空影像 有翕著這組星系對足驚人 ê 細節，包括媠甲會觸舌 ê 色光 kah 拖甲長長 ê 潮汐屑仔。這張影像是一陣 用地面望遠鏡翕相 ê 天文攝影師 ê 合作作品。In kā 10 工感光時間 ê 影像疊做伙，製作出這幅 M51 星系 ê 經典肖像。這張影像內底有 118 點鐘 ê 狹頻資料，嘛有翕著足大片 ê 紅光雲，這是 tī M51 系統內底 揣--著 ê 離子化水素氣體。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230811/ 影像：The Deep Sky Collective - Carl Björk, Thomas Bähnck, Sebastian Donoso, Jake Gentillon, Antoine and Dalia Grelin, Stephen Guberski, Richard Hall, Tino Heuberger, Jason Jacks, Paul Kent, Brian Meyers, William Ostling, Nicolas Puig, Tim Schaeffer, Felix Schöfbänker, Mikhail Vasilev 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230811.html Powered by Firstory Hosting

這个美麗 ê 星雲 是 tī 1500 光年遠 ê 所在。Tī 這个望遠鏡景色內底，伊 ê 形體 kah 色光，予人感覺伊看起來 敢若是花眉仔卵。這个宇宙雲有 3 光年闊，就 tī 南方星座 天爐座 ê 邊界內底。NGC 1360 是行星形星雲，是卵形--ê，毋過伊毋是恆星拄開始 ê 階段。伊是一粒 較老 ê 恆星，是恆星演化到上尾一个足短 ê 階段。實際上，咱會當 tī 這張圖 ê 中心看著一粒中心恆星，伊是一个雙星系統，應該是有 2 粒演化尾期 ê 白矮星 組成--ê。In ê 紫外光輻射 足強--ê，這 tī 可見光看袂著。輻射能 kā 包 tī 白矮星外口 幾若層氣體內 ê 原子 ê 電子 擲出去。NGC 1360 顯目 ê 青藍色，是電子 kah 雙離子化酸素原子 複合 ê 時陣 產生 ê 強輻射光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230805/ 影像：Dong Liang 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230805.html Powered by Firstory Hosting

8 月 1 號 ê 月娘 tī 日頭落山了後隨 peh 起來，這工是月圓日。近地點是月娘行到 kah 咱地球上倚 ê 時陣。這工 ê 月娘會比平常時 ê 月盤閣較光，kā 地球 ê 夜空照 kah 足光--ê，是 2023 年第二光 ê 超級月娘。Ùi 意大利 Sicily 島 Ragusa 市頂懸看，因為 超級月光 kā 天頂照 kah 足光--ê，透過雲層，煞產生戲劇性 ê 月娘 雲縫光。2023 年後一擺月圓會 出現 tī 8 月 ê 暗暝。8 月 30、31 ê 月娘 tī 日頭落山了後就會 peh 起來。這 tī 一個月內底 ê 第二擺月圓就叫做藍月。藍月 是每 2、3 年出現一擺，因為月相差不多愛一個曆日月（29.5 工）才是一个完整 ê 周期。毋過今年 8 月 ê 藍月會出現 tī 近地點，按呢就會變做 2023 年 ê 第三个超級月娘矣！ ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230804/ 影像：Gianni Tumino 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230804.html Powered by Firstory Hosting

這張足清楚 ê 近紅外線相片是 James Webb 太空望遠鏡 翕--ê，中央有翕著 有環 ê 冰巨行星，海王星。這个暗淡 ê 遙遠世界是 離太陽上遠 ê 行星，差不多是地球到太陽距離 ê 30 倍遠。毋閣 tī 這个精彩 ê Webb 影像內底，這粒行星 暗甲親像是幽靈仝款，這是因為大氣層內底 ê 甲烷 kā 紅外線吸收了了。海王星表面大部份會吸收甲烷，伊頂懸 ê 懸雲，tī 這張相片內底嘛足明顯--ê。海王星上大粒 ê 衛星 海衛一 Triton 就 tī 這張 Webb 影像倒爿頂懸 ê 繞射光尖 遐。因為伊 ê 表面是堅凍 ê 窒素，所以伊比海王星反射太陽光閣較光。這張相片內底有 去 hŏng 揣著 海王星 14 粒衛星 ê 其中七粒，嘛包括海衛一 Triton。海王星 ê 環無遐爾光，伊就 tī 這張新翕--ê 太空行星肖像內底。這个複合環系統，是頭一擺翕甲遮爾清楚。頂擺翕著伊--ê，是 1989 年 8 月 ê 航海家 2 號太空船。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230819/ 影像：NASA, ESA, CSA, STScI, NIRCam 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230819.html Powered by Firstory Hosting

這个浮 tī 空中 ê 環，其實 kah 星系平大。實際上，伊是一个星系，上無嘛是星系 ê 一部份。這个足媠 ê 草帽仔星系，是 室女座星系團 內底 上大粒 ê 星系。Tī 可見光影像內底，烏暗 塗粉 帶 kā 草帽仔星系 中央閘去矣，毋過 tī 紅外線煞光爍爍。這張 tī 紅外線 波段發光 ê 相片，是踅地球 leh 飛 ê Spitzer 太空望遠鏡 翕--ê 紅外線波段 假色 影像，kah NASA ê Hubble 太空望遠鏡 可見光 影像 疊做伙 ê 結果。影像經過數位處理了後有較清楚。草帽仔星系 嘛 叫做 M104，差不多有 5 萬 光年 闊，就 tī 2800 萬光年遠 ê 所在。M104 用細台望遠鏡就看會著，伊就 tī 室女座 ê 方向遐。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230813/ 影像：R. Kennicutt (Steward Obs.) et al., SSC, JPL, Caltech, NASA 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230813.html Powered by Firstory Hosting

Kā 夜空當做 畫布，tī 面頂畫圖 是足好耍 ê 代誌。你會當用一款有創意 ê 攝影技術，就是 tī 翕相 leh 感光 ê 時陣，小可仔出力敲望遠鏡，按呢就會予恆星 ê 光點 tī 數位影像看起來敢若 leh 跳舞。這个結果會出現一條恆星畫 ê 海湧線（若是雙星畫 ê 就是兩條海湧線），而且閣會當看出恆星是啥物色。這張藝術拼鬥圖有翕著 北天星座 牧夫座、北冕座、蛇夫座、kah 后鬃座 ê 恆星 畫出來 ê 彩色線，這就叫做 Ghirigori。遮有 25 粒恆星畫出無仝款多彩 ê 海湧線，in 是佗一粒星，有標 tī 圖 ê 邊界。是講，恆星是啥物色，kah 伊 ê 溫度有關係。白色 ê 恆星 kah 咱太陽 ê 溫度差不多，藍色恆星 ê 溫度較懸，黃色 kah 紅色恆星 ê 溫度是 比太陽 較低。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230812/ 影像：Paolo Palma 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230812.html Powered by Firstory Hosting

火星日 第 872 工 ê 任務（地球時間 8 月 3 號），嘛是獨創號直升機第 54 擺飛。這張清楚 ê 影像 就是伊飛過這粒紅色行星 表面 彼陣翕--ê。這隻火星直升機 leh 飛 ê 時陣，是飛 tī Jezero 隕石坑 頂懸。若是 ùi 坑底開始算，是差不多 5 公尺懸 ê 所在。相片 上倒爿 kah 上正爿邊仔，有獨創號直升機 ê 停車跤。Tī 正爿頂懸附近，咱看會著毅力號 火星探測車 行過 ê 跤跡。這擺 ê 飛行 計畫，是時間足短 ê「彈出去」計畫。這是獨創號 第 54 擺飛行，攏總飛無 25 秒。伊進前 tī 7 月 22 進行第 53 擺飛行，結果煞 意外降落。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230810/ 影像：NASA, JPL-Caltech, Ingenuity 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230810.html Powered by Firstory Hosting

這禮拜是一个看流星 ê 好時機。逐年 ê 英仙座流星雨 高峰期，是彗星 ê 塗粉 落到地球，tī 夜空畫出一巡一巡，就親像 leh 落雨仝款。這張合成影像是 tī 斯拉夫共和國 ê Poloniny 暗空公園 翕--ê 2018 年 英仙座流星雨。前景 ê 天文台圓厝頂是 tī Kolonica 天文台 ê 範圍內底。就算 彗星 ê 塗粉粒 是平行徙動，毋過 流星雨 ê 流星 看起來確實是 ùi 仝名 ê 英仙座 內底 仝一點輻射出來--ê。這个輻射效應是 透視 造成--ê，就親像 火車 ê 鐵枝路 仝款。視覺上，平行 ê 鐵枝路會 tī 遠方會合。英仙座流星雨 按算會 tī 拜六半暝 來到 最高峰。是講 月眉 干焦會 tī 暗暝 足晏 ê 時間 peh 起來，按呢天頂若是無雲，天色就會比平常時閣較烏，所以今年咱應該 看會著 足濟較無遐爾光 ê 流星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230809/ 影像：Petr Horálek / Institute of Physics in Opava 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230809.html Powered by Firstory Hosting

月娘下底彼个是啥毋？是木星，kah 伊上大粒 ê 衛星。六月中 ê 時陣，全世界 ê 觀星者 攏 leh 欣賞 月木合相，彼陣 月娘 ùi 木星面頭前行過。這張 是 tī 西班牙 Morón de la Frontera 翕--ê 孤張感光相片。倒爿 ê 月眉，去予日光照甲過度感光。正爿是月球 ê 暗暝，是 地球反照光 照--ê。月球下底 ùi 正爿排到倒爿 ê 對角線，是足光 ê 木星大粒衛星，加利略衛星：木衛四 Callisto、木衛三 Ganymede、木衛一 Io（真歹看著，因為伊傷倚木星矣）kah 木衛二 Europa。實際上，Callisto，Ganymede，kah Io 攏比咱 ê 月球較大，干焦 Europa 較細。NASA ê 機器人太空船 Juno 這馬當 leh 踅 木星行，而且伊 tī 一禮拜前才 近距離飛過 Io。你下暗若是 攑頭看 夜空，你會閣看著兩粒足光 ê 天體。In tī 天頂 ê 角度差是足細--ê，因為 下暗 又閣是另外一擺 ê 月木合相 矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230808/ 影像：Jordi L. Coy 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230808.html Powered by Firstory Hosting

這粒星是發生啥物代誌？無人知影。獅仔座 CW 是 上近 ê 炭素星，伊看起來是柑仔色--ê，因為伊大氣內底 ê 炭素 是 ùi 恆星 家己 ê 核融合 產生--ê。而且 獅仔座 CW 嘛去予包 tī 炭素足濟 ê 星雲內底。是啥物原因造成 星雲 遮爾複雜，到今猶毋是蓋了解。毋過伊 ê 殼 kah 光弧 結構確實是有 趣味。這張影像 是 Hubble 太空望遠鏡 翕--ê，有詳細翕出伊 ê 複雜。炭素星 ê 低表面重力 有 加強 in kā 炭素 kah 炭素化合物 擲去太空中 ê 能力。有一寡炭素落尾會形成 較烏 ê 塗粉，這 tī 較少年 ê 恆星形成區 ê 星雲 kah 星系盤 內底 定定看著。人類 kah 所有活 tī 地球 ê 性命攏是以炭素做底--ê，而且咱身上上無有一寡炭素，可能 tī 像炭素星這款 欲死矣 ê 恆星 大氣層內底循環。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230717/ 影像：ESA, NASA, Hubble, T. Ueta (U. Denver), H. Kim (KASI) 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap230717.html Powered by Firstory Hosting

鵜鶘星雲沓沓仔 leh 改變。伊正式 ê 名是 IC 5070。伊 kah 大型 北美洲星雲 之間，去予一个 攏是烏暗 塗粉 ê 分子雲 kā 分--開。是講，kah 鵜鶘星雲 有關 ê 研究是足濟--ê，因為伊是一个活動力足強 ê 區域，內底有 恆星形成活動 kah 演化氣體雲 相濫做伙。這張圖 是三款特殊 ê 色光合成--ê：是 ùi 硫磺、水素、酸素 發出 ê 光。這會當幫贊咱了解這區內底 ê 交互作用。少年高能恆星 ê 光 沓沓仔 kā 冷氣體 變做 燒氣體。兩團氣體之間 ê 邊界 就叫做 電離鋒面，就是正爿柑仔色 leh 發光 ê 部份。特別厚 ê 冷氣體 鬚 猶 tī--lih。幾若百萬年了後，這个去予烏暗星雲 LDN 935 包起來 ê 鵜鶘 星雲，可能袂閣叫做 鵜鶘星雲。因為 恆星 kah 做恆星 ê 氣體 達成平衡了後，tī in 彼位 留落來 ê 物件，會 kah 進前看著 ê 完全無仝。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230807/ 影像：Abe Jones 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230807.html Powered by Firstory Hosting

是啥物創作這條特別 ê 太空彩帶？這个答案是：一擺上 激烈 ê 爆炸。這古早時代 ê 人嘛捌 看過。西元 1006 ê 時陣，豺狼座 內底有一粒 恆星爆炸，伊 ê 光行到咱地球，tī 咱天頂變做一粒「客星」。伊 tī 天頂有超過 2 年 ê 時間，是比 金星 閣較光。這粒超新星這馬 ê 編號是 SN 1006，tī 7000 光年遠 ê 所在，而且伊留足濟超新星殘骸落來。這寡殘骸 湠甲愈來愈開，到今是變甲愈來愈暗。這張相片 是這个超新星 殘骸 湠開 ê 一部份，主要是一重 薄薄、向外徙動 ê 衝擊波前，kā 四箍圍仔氣體 ê 溫度變懸、離子化。是講 超新星殘骸 SN 1006 這馬 ê 直徑差不多是 60 光年 長。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230806/ 影像：NASA, ESA, Hubble Heritage (STScI/AURA) 感謝：W. Blair et al. (JHU) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230806.html Powered by Firstory Hosting

世界協調時間 7 月 29 透早 tiàm Canaveral 角 5 號發射台 翕 ê 這張相片內底，有紅石火箭 kah 金星太空艙。除了紅石火箭，8 分鐘長 ê 感光嘛有翕著 SpaceX 獵鷹重型火箭 發射 ê 弧形軌跡。獵鷹火箭有裝重型 通訊衛星，這台重 9 噸，是歷史紀錄上重--ê。伊按算欲飛到 3 萬 5400 公里懸 ê 地球仝步軌道去。紅石火箭 ê 歷史記錄，就是 tī 1961 年 5 月彼擺 ê 發射，kā 太空人 Alan Shepard 送去 次軌道，差不多飛到海拔 187 公里懸 ê 所在。畫面頂懸附近，獵鷹火箭有一組 2 个會當重複使用 ê 雙爿推進器，in 會 kah 火箭分開，進行目𥍉仔久 ê 燃燒。In 會做伙轉來 地球，降落 tī 遠方 ê Canaveral 降落區 1 號 kah 2 號遐。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230803/ 影像：Matt Haskell 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230803.html Powered by Firstory Hosting

愛欣賞冰島 ê 美麗，毋過嘛驚有野獸出現。美麗--ê 是 天頂 ê 極光，伊是青色 ê 大型 捲螺仔 極光。咱會當 tī 足媠 ê 雲中央看著伊，邊仔是 足光 ê 月娘，背景有足濟天星。野獸 是紮電 ê 粒子波，是 極光 製造出來--ê，這有一工有可能會破壞咱 ê 文明。1859 年 ê 時陣，全球攏看會著 明顯 ê 極光。受著 太陽爍光 影響 ê 日冕物質噴出事件 (CME) 會產生 紮電粒子脈衝波，這 tùi 地球 磁層 ê 影響是足大--ê，會引發 Carrington 事件。這个 ùi 太陽來 ê 攻擊，會出足大力 來 壓縮 地球 ê 磁場，造成 電報 leh 用 ê 電線 產生 高電流 kah 火屎，kā 足濟 電報員 驚著。今仔日若是 Carrington 級--ê 事件 影響著咱地球，按呢可能會發生 咱毋捌拄過 ê 超大規模 ê 全球電力網 kah 電子設備 ê 損害。這張極光圖是 2016 年 ê 時陣 tī 冰島 Thingvallavatn 湖 翕--ê 天色。Tī 遮，地球表面 分做 歐亞枋塊 kah 北美 枋塊，斷層有一部份就浸 tī 湖水內底。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230730/ 影像：Juan Carlos Casado (Starry Earth, TWAN) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230730.html Powered by Firstory Hosting

這个壯麗 ê 捲螺仔星系是 Messier 64，伊定定去 hŏng 叫做 烏目睭星系，抑是叫做 睏美人星系，因為伊 tī 望遠鏡內底看起來有 烏烏 ê 目睭皮。這張是 Hubble 太空望遠鏡翕 ê 影像，伊翕著 ê 捲螺仔星系中心區，差不多有 7400 光年闊。M64 就 tī 北天星座 后鬃座 方向 1700 萬光年遠 ê 所在。這寡量足大 ê 塗粉雲，kā M64 中央區 閘著一部份，kah 少年 ê 藍光星團、恆星形成區發紅光 ê 水素 濫濫做伙。毋過壯觀 ê 塗粉雲 毋是 這个星系 唯一特別 ê 部份。觀測結果 kā 咱講，M64 實際上是兩个仝圓心、倒剾踅 ê 系統。M64 內底所有 ê 恆星攏 kah 星系中心區 ê 星際氣體踅仝一个方向。毋過中心區外口 一直到 4 萬光年遠 ê 氣體，煞 踅 無仝方向。伊有 塗粉箍出來 ê 目睭 kah 奇怪 ê 轉踅，這可能是兩个星系 tī 幾若十億年前合併 ê 結果。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230720/ 影像來源：NASA, ESA, Hubble, HLA 資料處理：Jonathan Lodge 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap230720.html Powered by Firstory Hosting

是按怎 火衛一 Pobos 遮爾烏？Phobos 是 火星 ê 兩粒衛星內底，上大粒、上內底彼粒，嘛是 太陽系 內底上深色 ê 衛星。伊主要 ê 成份是冰 kah 烏石頭。伊無四常 ê 軌道 kah 色彩，暗示講伊可能是去予火星掠著 ê 小行星。Phobos kah 火星 是足倚--ê。這張指定色彩 ê 相片 是 2021 年底 ESA ê 機器人太空船 火星快車號 翕--ê，彼是一台踅火星 leh 行 ê 太空船。Phobos 是一粒 表面攏是隕石坑 kah 拋荒 ê 衛星，伊 上大个隕石坑 是 tī 較遠彼爿。像這張影像來看，Phobos 去 hŏng 認為講 伊 ê 表面可能有崁 1 公尺厚、較鬆 ê 塗粉。Phobos leh 行 ê 軌道 kah 火星傷倚矣，tī 一寡所在，一工內 會看著伊 peh--起來 kah lŏe 兩擺，毋過 tī 其他所在就會完全 看袂著伊。Phobos 踅 火星 ê 軌道是愈來愈細輾，閣差不多 5000 萬年，伊就會 解體，變甲碎糊糊，落 lŏe 火星表面。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230731/ 影像來源：ESA, DLR, FU Berlin, Mars Express 資料處理 kah CC BY 2.0 License: Andrea Luck 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230731.html Powered by Firstory Hosting

是按怎這个大管薰星系 leh 衝紅煙？這个叫做 M82 ê 星爆發星系 是去予 最近 ùi 伊邊仔行過 ê 大型 捲螺仔 星系 M81 kā 激--ê。毋過這無法度完全解說 這粒天體 是按怎 會有發紅光 ê 氣體 kah 塗粉 噴--出來。有證據 暗示講，這寡氣體 kah 塗粉是去予 足濟恆星 聯合製造 ê 粒子風 kā 擲出來，做伙形成星系級 ê 超級星系風。塗粉粒 去 hŏng 認為講是 ùi M82 ê 星際媒介物 來--ê，而且實際上 in ê 寸尺 kah 大管薰 ê 薰粒 大細是差不多大。這張拼鬥相片 上明顯 ê 部份是 水素 離子氣體 發出足強 ê 特殊 紅光，咱才看會著氣體塗粉雲絲 ê 細節。這个雲絲湠到超過 1 萬 光年 遠 ê 所在去。這个 1200 萬光年遠 ê 大管薰星系 是 紅外線 波段 上光 ê 星系，而且咱嘛會當用細台 望遠鏡 tī 可見光波段 tiàm 大熊座 方向 揣著伊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230802/ 影像來源：NASA, ESA, Hubble 資料處理 kha 版權：Harshwardhan Pathak 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230802.html Powered by Firstory Hosting