NASA 逐工一幅天文圖 APOD Taigi

這寡活 tī 太陽 ê 怪獸 kah 咱是無仝款。In 是比咱地球 閣較大，而且是比 茶鈷 閣較燒 ê 氣體組成--ê。In 無目睭，毋過這个時期有足濟 太陽鬚。In 浮 tī 太陽表面。一般講來，in ê 形體是沓沓仔改變，差不多 1 個月左右就會 tī 太陽表面消失去。是講有當時仔，in 會 忽然間爆發，向太陽系 放出高能粒子，這會攻擊地球。相片是差不多 2 禮拜前翕--ê 超大型日珥，這是 水素發--出 ê 光。這是 tī 美國 Arizona 州 Gilbert ê 一台細台望遠鏡翕--ê。這款 怪物 形 ê 氣體雲煙，是太陽表面一直 tī 遐、毋過 一直 leh 變化 ê 磁場 kā 扞--leh。咱 ê 太陽是愈來愈倚 2025 年 ê 太陽極大期，所以 伊目前 ê 活動力是足強--ê，會繼續出現足濟 日珥、太陽絲、太陽烏子、kah 大型活跳區。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230801/ 影像：Mike Wenz 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230801.html Powered by Firstory Hosting

月球頂懸 ê 日光是足光--ê，才會 tī 月球表面 產生這个長長烏烏 ê 烏影。這是 54 年前，1969 年 7 月 20 彼陣，阿波羅 11 號 ê 太空人 Neil Armstrong 翕--ê，伊是頭一个行 tī 月球表面 ê 人。相片翕著--ê 是 登月任務 ê 登月小艇，鴟鴞號，kah 穿太空衫 ê 登月小艇 飛行員 Buzz Aldrin。Aldrin 當 leh kā 一張 長長 ê 紙箔拍開，目的是欲做 太陽風成份實驗。這張紙箔面對太陽，按呢會當掠著 太陽風向外口流出來 ê 粒子，提著太陽本身 ê 物質標本。太陽風收集器 會 kah 月球頂懸 ê 岩石 kah 月球塗肉標本 做伙送轉來地球 ê 實驗室做分析。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230729/ 影像來源：Apollo 11, NASA 影像掃描：Kipp Teague 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230729.html Powered by Firstory Hosting

James Webb 太空望遠鏡 ê NIRcam 近紅外線相機，翕著這張 ùi 一對拄形成 ê 少年恆星噴出來 ê 高速分子氣體噴流 發出 ê 紅外線影像。In 是去予編做 HH (Herbig-Haro) 46 kah 47 ê 少年恆星，就 tī 烏暗星雲內底，uì 可見光來看是袂透光--ê。這兩粒恆星是 tī NIRcam 近紅外線相機翕--ê 影像 ê 紅色 繞射光針 ê 中央。In ê 高能恆星噴射流 湠到 差不多欲 1 光年長，才 伸入去 烏暗星際物質內底。這个 少年恆星系統 袂講蓋遠，才 1140 光年遠爾爾，就 chhāi tī 船帆座 ê 方向遐。咱會當用 Webb 太空望遠鏡 ê 紅外線能力來探索 這粒足迷人 ê 天體。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230728/ 影像來源：NASA, ESA, CSA 資料處理：Joseph DePasquale (STScI) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230728.html Powered by Firstory Hosting

大粒星系是 kā 細粒星系食去，才會愈來愈大粒。就算是咱家己 ê 銀河嘛是有 leh 進行 仝一類星系互食 ê 行為，kā 傷倚、去予銀河重力搝牢 ê 一寡較細粒 ê 星系 吸入來。實際上，這款行為 tī 宇宙內底是 足四常--ê。像這對 tī 南天星座 波江座 溪邊 引人注目 ê 交互作用星系 就是這款星系。In 就 tī 5000 萬光年遠 ê 所在，這个大型變形 ê 捲螺仔星系 NGC 1532 kah 矮星系 NGC 1531 ê 引力 leh 相戰，毋過較細 ê 星系 落尾會輸去。捲螺仔星系 NGC 1532 是側向星系，大細差不多有 10 萬光年大。這張翕甲足清楚 ê 合併星系，是 chhāi tī 智利 Cerro Tololo ê 美洲洲際天文台 ê 美國國家科學基金會 ê Blanco 4 公尺望遠鏡 頂懸 鬥 ê 暗能量相機 翕--ê。科學家認為講，NGC 1532 kah 1531 這組 星系對，應該 kah 進前研究足深 ê 正向捲螺仔星系對 M51 kah 伊 ê 星系伴 欲仝欲仝。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230727/ 影像：CTIO/NOIRLab/DOE/NSF/AURA; R. Colombari, M. Zamani & D. de Martin (NSF’s NOIRLab) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230727.html Powered by Firstory Hosting

Tī 心宿二 ê 南方，厚星雲 ê 天蠍座 尾溜，有一个 發射星雲 IC 4628。這个星雲就 tī 幾若百萬粒 高溫、大質量 少年恆星邊仔。看袂著 ê 紫外光 kā 星雲照甲 kā 原子內底 ê 電子激發出來。電子落尾會 kah 原子重新組合，產生 看會著 ê 星雲光，這主要是發生 tī 水素原子 ê 反應，會發出紅色 ê 發射線。照估計 ê 距離 6000 光年來算，這區 差不多有 250 光年 闊，按呢是超過 3 粒月娘 tī 天頂 ê 範圍。這个星雲嘛去予澳洲天文學家 Colin Stanley Gum kā 編做 Gum 56，毋過愛食海產 ê 天文愛好者 tùi 這个宇宙雲 較知影 ê 名 可能是 九節蝦 星雲。這張 優雅 ê 彩色影像 是 4 月 ê 時陣 tī 智利 ê Rio Hurtado 開幾若暗 ê 時間翕--ê 新 ê 天文相片。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230726/ 影像：Daniel Stern 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230726.html Powered by Firstory Hosting

這个有名 ê 鴟鴞星雲 內底 ê 恆星柱 tī X 光波段看起來會是按怎？為著欲揣著答案，NASA ê Chandra X 光衛星天文台 就斟酌 leh 看這个有恆星形成 ê 星際雲山。結果發現，M16 內底 ê 塗粉柱 本身袂發出傷強 ê X 光，毋過有足濟 細罔細 煞蓋光 ê X 光發射源，變甲足明顯--ê。這寡發射源就是 這張影像 內底 ê 光點。這張影像是 Chandra（X 光）、XMM（X 光）、JWST （紅外線）、Spitzer（紅外線）、Hubble（可見光）、kah VLT（可見光）天文台影像資料 ê 合成相片。啥物 恆星 會製造這寡 X 光，到今猶是一个 研究主題。有一个假說是認為 in 是 高溫、新形成、低質量 ê 恆星，另外一个假說認為 in 是高溫、較老、懸質量 ê 恆星。這寡會發出 X 光 ê 高溫恆星 tī 這幅圖內底是四界攏是。進前 tī 可見光 看著 ê，去 hŏng 揣著 ê 蒸發氣體球 (EGGS)，目前 ê 溫度就無夠懸，無法度發出 X 光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230725/ X-光影像: Chandra: NASA/CXC/SAO, XMM: ESA/XMM-Newton 紅外線影像：JWST: NASA/ESA/CSA/STScI, Spitzer: NASA/JPL/CalTech 可見光影像：Hubble: NASA/ESA/STScI, ESO 影像處理：L. Frattare, J. Major, N. Wolk, kah K. Arcand 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230725.html Powered by Firstory Hosting

流星有可能有足濟色。是講 人類 ê 目睭 通常是無法度看著遐爾濟色，毋過 kha-mé-lah 是會使。這張圖 是一粒 火流星，是一粒當咧崩去 ê 流星。伊毋但是攝影師 看過 上光 ê 流星，嘛是上濟色 ê 流星。這粒流星是 7 月中 tī 奧地利 Hochkar 山頂 chhāi kha-mé-lah 欲翕銀河系中央帶 ê 時陣，順紲翕著--ê。這寡 輻射沙塗，真有可能是 彗星 抑是 小行星 tī 足久以前擲出來--ê。是講 in 嘛誠衰，煞落落來 地球 ê 大氣層。流星 ê 色光 定定是 流星 崩去 ê 時陣，放出來 ê 離子化 化學元素。青藍色 ê 通常是 ùi 鎂 來--ê，kha-lú-sìm-muh 會輻射出茄仔色 ê 光，白銅 會發出青光。毋過，紅光通常是 ùi 地球大氣層內底 ê 高能 窒素 kah 酸素 來--ê。這个遮爾光 ê 火流星 一目𥍉 就無去矣，猶無到 1 秒咧。毋過伊有留一條 去予風吹振動 ê 離子痕跡，這咱就看會著啊，差不多有 1 分鐘久。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230724/ 影像：Michael Kleinburger 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230724.html Powered by Firstory Hosting

彼是啥?無人知影 tī 2000 年前，咱敢有技術會當製造這款機械？相片內底 ê Antikythera 機械，這馬予人認為是人類史上 頭一台 電腦。伊是 tī 海底一隻 àu--khì ê 希臘 船頂予人揣著 ê。因為伊足複雜 ê，煞予人 kā 伊研究幾若十冬。到今，這台猶有幾若个部份，無人知影 伊 ê 功能是啥物。毋閣，ùi 這台機械 ê X-光 影像來 kā 看，伊內底有足濟 kah 時鐘相-siâng ê 狗齒仔。這上主要 ê 作用是欲製造一个好紮 ê、手發動 ê、以地球為中心 ê 太陽系儀。這台會當提來預測恆星 kah 行星紲落來欲行去佗位，嘛會當預測 月食 kah 日食 當時會發生。是講，咱看會著 Antikythera 機械 上大 ê 狗齒仔芯已經漚去矣！這粒芯有 13 公分闊。毋閣這 規台機械 有 33 公分懸，kah 一本冊欲平大。最近，現代 ê 電腦模擬 這台面頂欠缺 ê 零件。予咱會當 ùi 這台古早時代 遮爾厲害 ê 機械，做一台閣較完整 ê 複製品。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230723/ 影像：Marsyas, Wikipedia 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230723.html Powered by Firstory Hosting

這張是 Neil Armstrong 咧 翕 Buzz Aldrin 徛 tī 月球頂懸 ê 相片。經過數位轉換了後，就變做 tī 月球 ê 自翕相片矣。相片是 tī 1969 年 7 月 阿波羅 11 號 登陸月球 ê 時陣翕--ê。Armstrong ê 原始相片 毋但有紀錄著這个咱 無熟似 ê 拋荒、壯麗 ê 世界，嘛有紀錄著 tī Aldrin ê 弧形 遮日枋 頂懸反射伊家己 ê 影像。Tī 拍開 ê 影像 內底，ùi Aldrin 太空帽仔 反射 ê 球形變形 影像，是 顛倒反--ê。這張轉換過 ê 視角，就是 Aldrin 看著 ê Armstrong 本人。因為 Armstrong 當初時翕了這張相片，今仔日這張影像才有法度 代表一張 54 年老 ê 月球自翕相片。Tī 原始相片內底，出現 tī Aldrin 遮日枋頂懸 ê 反射影像，是 tī 倒爿。足光 毋過變形 ê 地球，就 出現 tī 月球表面有 Armstrong 影像 ê 天頂，就是正爿頂懸彼粒。用紙箔包牢 ê 獵鷹號登陸器 ê 停車跤，kah Aldrin 搝甲長長長 ê 烏影，tī 月球表面是翕甲足清楚--ê。等到 2024 年，NASA ê Artemis 2 號 任務會閣 kā 人類送轉去月球。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230722/ 影像來源：NASA, Apollo 11, Neil Armstrong 資料處理：Michael Ranger 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230722.html Powered by Firstory Hosting

銀河內底所有 ê 恆星 發出 ê 光，會去予 咱銀河盤頂懸 300 光年 ê 宇宙塗粉 反射。一寡人 kā 叫做 積分通量星雲，定定會 tī 懸銀緯區 揣著這。這款厚塗粉 ê 銀河絹雲 是足暗--ê，一般攏是 tī 銀河 ê 北極 kah 南極 較大區 ê 範圍內。研究表示講，受著恆星光 ê 反射，塗粉雲會發出 無遐爾光 ê 紅光，這是因為 星際塗粉粒 會吸收看袂著 ê 紫外光，才閣輻射出看會著 ê 紅光。 。這張足足足深 ê 闊幅影像，嘛有翕著銀河附近 ê 恆星 kah 遙遠 ê 背景星系，包括 探索 Mandel Wilson 9 這款較暗 ê 銀河絹雲複合體。伊就 tī 南天 ê 天燕座 方向，tī 地球天頂是超過 3 度闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230721/ 影像：Gabriel Rodrigues Santos 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230721.html Powered by Firstory Hosting

這張出色 ê 紅外線宇宙影像 是 James Webb 太空望遠鏡 1 冬前 開始探索宇宙 ê 時陣發表 ê。是用 James Webb 太空望遠鏡 面頂 ê NIRCam，開 12.5 點鐘久 ê 感光時間，tùi 南方星座飛魚座方向翕 ê 早期宇宙 景色。 是講，相片內底有六條 繞射光針 ê 恆星，攏是咱銀河系內底 ê 恆星。 這款 繞射 花樣，是 Webb 望遠鏡 ê 特徵。 因為伊直徑 6.5 公尺 ê 主鏡，是 ùi 18 塊細塊六角鏡 鬥做一塊，做伙觀測--ê。 視野內底幾若千个星系，攏是遠方 ê 星系團 SMACS0723-73 內底 ê 成員，差不多是 46 億光年遠。 深空視野內底 ê 光弧，看起來敢若是 ùi 閣較遠 ê 星系來--ê。 星系團 ê 主要質量是烏暗物質。影像去予 星系團 kā 扭曲 kah 放大--ê，這就叫做 重力 透鏡效應。 Webb ê NIRISS 儀器表示講，kā 有光尖 ê 恆星後壁兩个無仝 ê 光弧資料 做分析，發現講這寡光弧攏是 ùi 仝一个背景星系來 ê 影像。 而且這寡光，是愛開 95 億年 ê 時間，才行到 James Webb 太空望遠鏡。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230715/ 影像：NASA, ESA, CSA, STScI, NIRCam 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap230715.html Powered by Firstory Hosting

是按怎有一寡捲螺仔星系 ê 中央有環？捲螺仔星系 NGC 1398 ê 中心，有一輾恆星、氣體、塗粉 組成 ê 環，有一支 恆星 kah 氣體組成、迒過星系中心 ê 星系棍仔，閣有較倚外口、有花樣 ê 捲螺仔手骨。這張 tī 智利 El Sauce 天文台 翕 ê 深空影像，有翕著這个大型捲螺仔星系足清楚 ê 細節。NGC 1398 tī 6500 萬 光年 遠 ê 所在，意思是講，光離開這个星系 ê 時陣，差不多是 地球 ê 恐龍消失彼陣。這个 美麗 ê 星系，只要用細台天文望遠鏡 向 天爐座方向就看會著。中心附近 ê 環 應該是恆星形成過程中，密度波 變較闊 ê 結果。會按呢可能是伊 kah 其他星系 ê 引力 互相影響，抑是星系家己 重力無平衡 造成--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230712/ 影像：Mark Hanson 資料：Mike Selby 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230712.html Powered by Firstory Hosting

咱 3 月才開始注意著 彗星 C/2023 E1 (ATLAS 彗星)，伊是 NASA 小行星攏地球 ê 最後警報系統 揣著 ê 另外一粒彗星。ATLAS 彗星 會 tī 7 月 1 號行到近日點，就是伊 kah 太陽上倚彼位。這張望遠鏡視野 內底 ê 彗星，是幾若工後 向 北天 ê 小熊座方向翕--ê。內底有足媠 ê 青色彗鬚、較暗較狹 ê 離子尾溜、kah 背景 ê 恆星。這粒彗星猶未行到伊 kah 地球上倚彼位。8 月 18 彼工，這位欲參觀內太陽系 ê 人客，會行到 kah 咱地球差 3 光分左右 ê 距離。照伊 leh 行 ê 軌道面 kah 黃道面 之間差 ê 角度，閣有伊 ê 軌道週期 85 年來看，彗星 C/2023 E1 (ATLAS 彗星) 應該 是 哈雷型彗星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230714/ 影像：Dan Bartlett 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230714.html Powered by Firstory Hosting

Makemake (發音是 MAH-kay MAH-kay) 是 Kuiper 帶 內底第二光 ê 矮行星。伊有一粒衛星。這粒衛星有一个小名叫做 MK2，伊 ê 表面反射日光做烏碳色，差不多比伊 ê 母行星較暗 1300 倍。伊是 2016 年 Hubble 太空望遠鏡 ê 觀測計畫 去予揣著--ê。這个計畫是用揣 冥王星細粒衛星 ê 仝款技術來揣較暗 ê 星伴。Tùi Makemake kah 踅伊 ê 衛星 ê 進一步觀測，就親像是當初時觀測 冥王星 kah 伊 ê 衛星仝款，會當提來測量這規个系統 ê 質量 kah 密度，嘛會當予咱 tùi 遙遠 ê 世界有較濟 ê 認捌。Makemake ê 直徑有 1400 公里長，MK2 干焦有 160 公里闊，in ê 相對大細就 tī 這張藝術家畫 ê 想像圖內底。這張想像圖展示咱猶袂探索著 ê 太陽系邊界。這个 ùi 太陽系較倚外口看 tùi 內底 ê 景色，是太空船才有法度看著 ê 角度。太陽就 tī 銀河方向發出暗淡 ê 光。是講，太陽 kah Makemake ê 距離，是比 咱地球到太陽 ê 距離較遠 50 倍。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221231/ 插畫：Alex H. Parker (Southwest Research Institute) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221231.html Powered by Firstory Hosting

你一定有看過，毋過可能無注意著。Tī 無雲 ê 晨昏時，就是 日出 進前 kah 日落 了後彼陣，有一部份 地平線頂懸 ê 大氣層 會變 較暗，而且色會變無去。咱 kā 這叫做 金星帶，是 無日頭 ê 暗暝 kah 有光 ê 日時 之間 ê 過渡帶，tī 日頭 ê 相對面 看起來會上明顯。藍天 是日光正常反射大氣層 ê 色，毋過地平線附近 ê 天色，tī 天氣袂䆀 ê 時陣，就會 看起來較倚柑仔色抑是紅色。Tī 金星帶 ê 範圍，大氣層會反射較濟日出抑是日落 ê 光，所以 in 看起來就會較紅。這張相片內底 ê 金星帶 是 tī 喜馬拉雅山脈 ê 幾若粒山頭頂懸翕--ê，包括 ùi 正爿算過來第二个 ê 聖母峰，伊是 地球 上懸 ê 山。是講一般 袂特別講著，其實 tī 其他 相片 內底，金星帶是 定定 意外 去予 翕著。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230626/ 影像：Soumyadeep Mukherjee 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230626.html Powered by Firstory Hosting

蛇夫座 ρ 分子雲複合體是離咱上倚 ê 恆星形成區，伊 kah 咱 ê 距離才 390 光年爾爾，內底有一粒類太陽恆星，未來會形成行星系統。James Webb 太空望遠鏡 ê NIRCam 相機 kā 焦點囥 tī 咱附近 ê 恆星誕生區，翕著這張 規模足厲害 ê 紅外線影像。公開這張美麗 ê 宇宙速翕，是為著欲慶祝 Webb 探索宇宙 頭一年有成功。這幅圖 是 蛇夫座 ρ 內底無夠 1 光年闊 ê 範圍，內底差不多有 50 粒恆星。較光 ê 恆星，會有 Webb 望遠鏡 ê 繞射光針。這張影像內底 紅色 ê 部份，是水素分子衝擊波 ê 大型噴射流 ùi 拄生出來 ê 新恆星 噴出來--ê。黃色塗粉雲 ê 閬縫，是伊內底 ê 高能少年恆星雕出來--ê。Tī 這張美麗 ê 影像內底，一寡恆星附近 ê 烏影區，是去予 原行星盤 kā 閘去矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230713/ 影像來源：NASA, ESA, CSA, STScI, Klaus Pontoppidan (STScI) 資料處理：Alyssa Pagan (STScI) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230713.html Powered by Firstory Hosting

船底座 η 可能欲爆炸矣。毋過無人知影當時，可能是明年，可能是 100 萬年後。船底座 η ê 質量差不多是咱 太陽 ê 100 倍以上，所以伊是會變做 超新星 ê 候選星。歷史紀錄嘛 kā 咱講，船底座 η tī 170 年前 捌經過一擺無四常 ê 爆炸，彼當陣伊就變做是 南方天頂 上光 ê 其中一粒天星。船底座 η tī 鎖匙空星雲 內底，是目前為止咱知影 tī 會 自然發出雷射光 ê 唯一一粒 恆星。這張影像 展示 ê 是 踅 tī 這粒 leh 流浪 ê 恆星 四箍圍仔 ê 奇怪星雲 ê 詳細細節。相片內底 ê 繞射光針 是望遠鏡造成--ê。咱會當 tī 船底座 η 中心 光爍爍 ê 彩色光內底，看著這寡條紋。侏儒星雲 ê 兩瓣 kā 高溫 ê 中心區 包 tī 內底。咱閣會當 tī 影像正爿、湠--開 ê 紅色星雲遐，看著一寡奇怪 ê 輻射條紋。這兩瓣 內底攏是 氣體 塗粉 帶，會 kā 中心附近 藍光 kah 紫外光 吸收去。毋過這寡紋路，到今猶 毋是蓋了解。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230709/ 影像來源 kah 版權：NASA, ESA, Hubble 資料處理 kah 許可：Judy Schmidt 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230709.html Powered by Firstory Hosting

是按怎咱 ê 太陽 這馬會遮爾活跳跳？無人知影。太陽表面活動增加是本底就知--ê，因為 伊 這馬是愈來愈倚 2025 年 ê 太陽極大期。毋過，頂個月咱 ê 太陽 puh--出來 ê 太陽烏子，比過去 11 年 ê 太陽週期 任何一個月攏閣較濟，甚至會當算到 2002 年去。這張相片 是 kā 今年 1 月 到 6 月 用 NASA 動力學天文台衛星 逐工翕 ê 相片疊做一張--ê。這內底有足濟太陽烏子，其中較大粒 ê，tī 太陽盤頂懸會出現 2 禮拜，ùi 倒爿行到正爿。太陽週期繼續，咱就會看著太陽烏子較捷出現 tī 赤道 附近。太陽烏子是太陽表面活動 ê 其中一款，其他閣有 太陽 爍光 kah 太陽日冕噴出 (CMEs)，這會 kā 粒子擲入去 太陽系 內底。因為這寡粒子會影響太空人 kah 電子設備，所以追蹤太陽表面 ê 變化就毋是干焦為著 藝術價值 矣。是講，太陽活動 嘛會當是有足懸 ê 藝術價值，尤其伊若是咧逐發生 tī 地球大氣層 ê 極光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230711/ 影像來源：NASA, SDO 資料處理 kah 版權：Şenol Şanlı 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230711.html Powered by Firstory Hosting

恆星形成 ê 時陣是足亂--ê。恆星形成區 NGC 6559 就是 教科冊 內底 ê 一个例。咱會當看著 這張 影像內底，有發紅光 ê 水素 發射星雲、藍光 ê 塗粉 反射星雲、攏塗粉 ê 烏暗吸收星雲、kah ùi 這寡物質生出來 ê 恆星。Ùi 這个實密 ê 氣體生出來 ê 頭一粒大質量恆星，會發出 高能光 kah 恆星 風，侵蝕 生 in ê 所在，kā 解體，嘛會雕出一寡物件來。紲落來伊會 爆炸。爆出來 ê 結果是媠閣 複雜。幾若千萬年了後，塗粉會 無去，氣體嘛會飛了了，賰一个 開放星團 tī 遐。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230710/ 影像：Adam Block, Telescope Live 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230710.html Powered by Firstory Hosting

Stickney 隕石坑是火衛一 Phobos 頂懸上大 ê 隕石坑，是用 數學家 Chloe Angeline Stickney Hall，嘛是天文學家 Asaph Hall in 某 ê 名 kā 號--ê。Asaph Hall tī 1877 年 ê 時陣，發現 火星 ê 兩粒衛星。Stickney 隕石坑 ê 直徑超過 9 公里，差不多是 火衛一 Phobos 直徑 ê 一半。會攏出遮爾大隕石坑--ê，應該嘛差不多會 kā 這粒細粒衛星攏甲欲散去。這張 Stickney 隕石坑 kah 伊四箍圍仔 ê 加強色彩影像，是 火星偵察軌道衛星 tī 2008 年 3 月 ùi 火衛一 Phobos 附近 6000 公里遠 ê 所在，用 HiRISE kha-mé-lah 翕--ê。火衛一 Phobos 就敢若小行星 仝款，伊 ê 表面重力是比地球重力 ê 1/1000 閣較細。毋過伊表面一逝一逝 ê 痕跡暗示講，較散 ê 物質會沓沓仔落到隕石坑內底。隕石坑附近 ê 藍光區，可能是較新 ê 表面。是講隕石坑表面彼寡奇怪 ê 溝仔是按怎生出來--ê，實在是足神祕--ê。有可能 kah 近火衛軌道 受著 ê 潮汐力，嘛有可能 kah 隕石坑形成 ê 相挵有關。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230708/ 影像：HiRISE, MRO, LPL (U. Arizona), NASA 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230708.html Powered by Firstory Hosting

這个 美麗 ê 星空 是 tī 北天 ê 英仙座，伊 ê 視野差不多佔 3 粒月娘（1 度半）遐爾大。伊內底有一對有名 ê 開放星團，英仙座 h kah 英仙座 χ (chi)。頂懸彼个去予編做 NGC 869，下底彼个去予編做 NGC 884。兩个星團攏 tī 差不多 7000 光年遠 ê 所在，內底攏有比咱太陽較少年、較高溫 ê 恆星。這兩个星團之間 ê 距離才幾若百光年爾爾。根據 星團內底 逐粒恆星 ê 年歲來看，這兩个星團 ê 年歲攏仝款 1300 萬歲，表示講 in 兩个應該是仝一个恆星形成區 ê 產物。這个雙星團一直是 雙筒千里鏡足愛看 ê 天體之一。若是 tī 較暗 ê 所在，咱閣會使直接用目睭看著伊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230707/ 影像：Mårten Frosth 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230707.html Powered by Firstory Hosting

7 月 4 號彼工，地球 暗暝 ê 天頂 有一粒 欲倚月圓 ê 月娘 peh 起來。7 月 ê 月圓嘛叫做 雄鹿月，上圓 ê 時間點是 tī 世界協調時間 7 月 3 號 11:39。月球差不多 一個月踅地球一輾，這工月球會行到近地點，就是 kah 地球上倚彼位。這會予今年 7 月 ê 月圓 成做 超級月娘，嘛是 2023 年 4 擺超級月娘 ê 頭一擺。這个景色是 tī 7 月 4 號 ùi Florida 州 太空海岸 ê Cocoa 海邊仔看出去--ê。就算月圓時 ê 月娘是遮爾大、遮爾光、遮爾媠，伊猶原毋是上出色--ê。除了 7 月 ê 超級月出以外，猶閣有超級出色 ê 煙火表演。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230706/ 影像：Michael Seeley 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230706.html Powered by Firstory Hosting

你若是會當看著 可觀測宇宙 ê 邊界，毋知會按怎？你會當看著星系、星系、星系、kah 呃，類星體。類星體其實是遙遠 星系 光 iàⁿ-iàⁿ ê 中心區。這張 分佈圖 是為著欲予咱人類 tùi 看會著 ê 上大規模 ê 宇宙有閣較好 ê 理解，才做出來--ê。這是 ùi 2000 年 到 2020 年 ê SDSS 巡天計畫 ê 星系 kah 類星體 地圖，差不多是 可觀測宇宙 ê 邊界。這張 pizza 形 ê 影像是巡天觀測 ê 其中一區，這區包括 宇宙回溯時間（就是天體發出 ê 光行到地球 ê 時間）120 億年前、宇宙紅移 5 以內 ê 20 萬个 星系 kah 類星體。插圖 下面 ê 部份，差不多每一點攏代表一个 星系。較暗 ê 紅色光點，表示 紅移 較大，距離較遠。仝款，頂懸 ê 部份，嘛差不多每一點攏代表一个遙遠 ê 類星體，其中藍色光點是比紅色光點較近。Tī 足濟新發現 攏有清楚看著星系 kah 星系之間 ê 重力，會 kā 較近 ê 宇宙 堅凍 起來，比 遙遠宇宙 產生 閣較濟宇宙雲絲結構。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230705/ 影像來源 kah 版權：B. Ménard & N. Shtarkman 資料：SDSS, Planck, JHU, Sloan, NASA, ESA 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230705.html Powered by Firstory Hosting

天頂敢若是爆炸 ê 款。這位攝影師上開始 ê 想法，是欲翕水沖 kah 天頂 ê 極光。毋過伊 tī 袂透光 ê 雲 下底等幾若點鐘了後，已經想欲放棄矣。逐家攏走了了，干焦賰伊一个。無想到這个時陣，雲煞散去。無偌久就出現一場大型太陽磁場風暴。風暴閘來 ê 粒子，kah 地球 ê 頂層大氣 相舂，造成全面性 ê 影響。規个夜空敢若去 hŏng 漆色 仝款，看起來敢若 leh 跳舞，變做一場 精彩 ê 極光表演。地球頂懸 ê 風是遮爾透，為著欲保持 kha-mé-lah ê 穩定，伊 kā 34 擺 ê 感光結果 組合出這張相片。這是 2 月底 tī 冰島 北部翕--ê。前景是足食相 ê 眾神水沖，天頂是 活跳跳 ê 極光。幾若工前，太陽表面活動大爆發，kā 高能粒子擲出來。咱 ê 日頭這馬是愈來愈倚 太陽極大期，所以伊就會出現足濟 hŏng 印象足深 ê 表面活動。這表示講，紲落來這幾若年，地球 北極 kah 南極 應該會出現閣較濟 hŏng 印象閣較深 ê 太陽活動。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230704/ 影像：Cari Letelier 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230704.html Powered by Firstory Hosting

是按怎金星 kah 地球遮爾無仝？為著欲揣出這个答案，日本 進前發射 ê 機器人太空船 Akatsuki 號 tī 2015 年底 飛入去金星軌道。伊進前有 5 年 ê 時間是無照計畫 tī 內太陽系 內底賴賴趖。就算 Akatsuki ê 性命長度已經超過本底 ê 計畫，毋過因為太空船 kah 儀器攏運作甲好勢好勢，所以大部份 ê 任務總算是 有繼續完成。Akatsuki ê 儀器嘛叫做 金星 氣候軌道衛星，是 leh 調查咱 ê 姊妹仔行星 金星 頂懸 一寡咱猶無了解 ê 代誌，包括火山是毋是猶活跳跳、實密 ê 大氣內底是毋是會產生爍爁、風速是按怎會超過火星自轉 ê 速度 遐爾濟。這張影像 是 Akatsuki ê UVI kha-mé-lah 翕--ê。咱看會著日時彼爿 ê 金星 有 行星尺度 ê V-形雲。影像內底有三款無仝色 ê 紫外光，閣有淺藍色 ê 二酸化硫，伊 ê 量是有變較少。分析 Akatsuki ê 影像 kah 資料了後，除了 一寡發現以外，閣知影講金星有親像 地球高速氣流 仝款 ê 赤道噴流。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230703/ 影像：JAXA, Planet-C Project Team; h/t: Mehmet Hakan Özsaraç 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230703.html Powered by Firstory Hosting

這是 tī 這个長長 ê 暗暝內底上讚 ê 夜空。南極洲 ê 一寡所在，毋但 tī 寒天爾爾，日頭是會 tī 地平線頂懸幾若禮拜攏袂落去。中國 tī 南極洲 ê 中山研究站，人有當時仔會為著欲翕美麗 ê 夜空，甘願冒險留 tī 足寒 ê 所在翕。這張相片就是按呢來--ê。這是 2015 年 7 月中翕--ê，拄仔好 tī 極區暗暝 欲煞進前 翕--ê。Kā 闊幅鏡頭 向天頂翕 ê 時陣，毋但視野上下底會掠著地面 ê 景色，上頂懸仝款嘛會。前景有一个同事嘛咧翕相。咱閣會當看著 tī 較遠 ê 所在，有球形衛星 ê 接受器 kah 幾若个 風車。夜空有足濟恆星，嘛有翕著 天狼星 kah 老人星。Tī 較遠 ê 背景，地平線 kah 地平線之間 搝甲長長 ê，是咱 銀河系 ê 中央帶。相片較倚正爿頂懸遐，tī 咱巨型銀河系附近，有兩个霧霧 ê 天體，彼是 大 、小 麥哲倫 星雲，in 是 tī 閣較遙遠 ê 所在。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230702/ 影像：LI Hang 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230702.html Powered by Firstory Hosting

這个媠甲會觸舌 ê 三重星系有當時仔嘛叫做天龍星群，就 chhāi tī 北天 ê 天龍座 遐。Ùi 倒爿到正爿是：正向 捲螺仔星系 NGC 5985，長株圓 星系 NGC 5982，kah 側向 捲螺仔星系 NGC 5981。In 攏 tī 仝一个望遠鏡視野內底，in tī 天頂佔 ê 範圍是比一粒月娘 tī 天頂佔 ê 閣較大淡薄仔。雖罔講這陣星系傷細矣，無法度叫做 星系團，而且嘛無去予 編入去 實密 ê 星系群內底，毋過這寡星系攏 tī 離咱地球 1 億光年遠 ê 所在。咱若是用 光譜儀 斟酌 kā 檢查，就會看著這个引人注目 ê 正向捲螺仔星系 NGC 5985 ê 中心，有光爍爍 ê 星系核。這个核心 tī 特別波段有 足強 ê 發射線，驅動天文學家 kā 伊分類做 Seyfert 星系，這是一款活跳星系。雖罔講這陣星系無其他較實密 ê 星系群 遐爾出名，毋過 in 視覺上看起來猶是一組三隻，成做三重奏，所以對天文攝影師來講 in 就是足讚 ê 目標。Tī 這張 予人印象足深 ê 深度感光相片 內底，長株圓星系 NGC 5982 ê 四箍圍仔有暗淡 ê 星系暈 kah 清楚 ê 星系殼，這是過去星系合併 ê 證據。相片內底閣有足濟閣較 遙遠 ê 背景星系。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230701/ 影像：David Vernet , Jean-François Bax , Serge Brunier, C2PU 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230701.html Powered by Firstory Hosting

長蛇座星系團 ft. 阿錕 (20230216) 一个厭 siān ê 暗暝，我人 siān-siān，那睏那想， 是天文學課本？抑是 giōng 欲消失 ê 傳說？ 煞雄雄發現 這張速翕相片，是宇宙深空，是奇幻世界， 這个景色，予我滿心敬畏，滿心感慨。 兩粒星，親像咧徛衛兵，chhāi tī 前景， 咱 ê 銀河系，hŏng 讚嘆 ê 景色， 後壁 ê 長蛇座星系團，星系滿滿是， 一億光年遠 ê 所在，欲講一个故事。 三个大星系，有長株圓星系，有藍色捲螺仔星系， In 是主角，是巨人，大細 15 萬光年， 毋過相疊 ê 星系對，顛倒煞著我， 編號 NGC 3314，媠甲無地比。 Abell 1060，長蛇座星系團， 是咱銀河附近，三大星系團之一， 重力束縛 ê 宇宙，天體 ê 遊戲， 較大尺度 ê 星系團，攏愛照排，我無通主意。 這幅速翕相片，寸尺 1300 萬光年， 一億光年遠，宇宙級 ê 快樂， 短短影一下， 宇宙 ê 模樣， 就算是按呢，伊總是會消失，永遠袂閣出現。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230216/ 影像來源 kah 版權：Marco Lorenzi, Angus Lau, Tommy Tse 文稿：ChatGPT (apologies to Edgar Allen Poe) 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230216.html Powered by Firstory Hosting

小行星敢會危險？有一寡會。毋閣毋管是佗一年，大部份危險 ê 小行星挵著地球 ê 機會是足少 ê。過去因為有發生一寡 kah 小行星挵著地球有關 ê 生物大滅絕事件，這馬人類已經 kā 這當做是一件真重要 ê 代誌：揣出 未來會影響 地球性命 ê 小行星，kā 編做目錄。這張相片 是 1000 粒 潛在威脅 小行星 (PHAs) ê 軌道。這寡資料有記錄著 超過 140 公尺闊、離地球 750 萬公里近（差不多是地球到月球 ê 20 倍距離）、leh 滾踅 ê 巨型 岩石 kah 冰角。雖罔講 tī 紲落來 100 年猶袂有小行星 挵著地球，毋閣 毋是所有 PHAs 攏有揣著。而且 tī 過去 100 年，足濟軌道嘛變做足歹預測 ê。這款寸尺 ê 小行星若是 挵著地球，to̍h 會 引起足危險 ê chu-ná-mih。為著欲揣出救地球 ê 辦法，NASA 舊年 ê 雙小行星改道實驗 (DART) 太空船 ê 實驗有成功完成任務。是講較細粒 ê 石頭 kah 冰角 逐工攏會挵著地球，毋閣 in 無啥物危險，有當時仔閣會產生 難忘 ê 火流星 kah 流星表演。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230630/ 影像：NASA, JPL-Caltech 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230630.html Powered by Firstory Hosting

北美 Nanohertz 重力波天文台 (NANOGrav) 是一組足大型 ê 電波望遠鏡。伊監看 68 粒 脈動星，閣足細膩量 in ê 光線到地球 微微仔 ê 時間差，才會揣著 背景 有重力波 (GW) ê 證據。這款時間差 kah 無仝粒 脈動星 有關係， 表示講這是重力波造成--ê。背景 ê 重力波 可能是受著 幾若十萬 抑是 幾若百萬粒 雙超大質量烏洞 ê 影響。歐洲、亞洲 kah 澳洲 ê 團隊嘛 tī 今仔日分別報告 in ê 結果。進前，LIGO kah Virgo 探測器嘛捌量著 ùi 兩粒互踅 ê 大質量天體，親像是 恆星質量 烏洞 這款天體，合併 所產生 ê 較懸頻率 ê 重力波。這張插圖利用 tī 兩粒互踅 ê 超大質量烏洞 kah 幾若粒脈動星 揣著 ê 微微仔時間差，來強調 時空 振動 ê 結果。這寡 tī 時空留痕 ê 重力波，tī 這張插圖內底就用 扭曲 ê 格仔 來表示。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230629/ 插畫來源：NANOGrav Physics Frontier Center 文稿：Natalia Lewandowska (SUNY Oswego) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230629.html Powered by Firstory Hosting

Kah Charles Messier 做 ê 彼个有名 ê 深空星表內底 大部份 ê 天體無仝，M24 毋是一个足光 ê 星系，星團，抑是星雲。伊是 tī 附近閘光 ê 星際雲之間 ê 閬縫內底，ùi 這縫咱會當看著 tī 銀河系人馬座捲螺仔手骨內 ê 恆星。你若是用雙筒千里鏡抑是細台天文望遠鏡 看 tùi 這个閬縫，你就會當迵過這个超過 300 光年闊 ê 宇宙窗仔門，看著地球外 1 萬光年遠以上 ê 恆星。M24 有當時仔嘛叫做 小人馬座星雲，這个華麗 ê 星場 內底攏是足光 ê 恆星。人馬座 ê 範圍差不多有 3 度闊，差不多會使排 6 粒月娘 tī 遐。這个望遠鏡視野包括 中心附近 ê 烏暗標記 B92 kah B93，閣有銀河中心方向 ê 其他塗粉雲 kah 發光 ê 星雲。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230628/ 影像：Emmanuel Astronomono 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230628.html Powered by Firstory Hosting

這 2 張火星全球影像 是 紫外光波段翕 ê，是超過人類目睭看會著 ê 光譜範圍。倒爿彼張相片 kah 正爿彼張相片，分別是 MAVEN 太空船 用 紫外光影像光譜儀 tī 2022 年 7 月 kah 2023 年 1 月 ê 時陣翕--ê。相片有目睭看袂著 ê 3 段紫外光波段，包括紅色、青色、kah 藍色。咖啡色 kah 青色是用來表示這粒 紅色行星 ê 表面特徵。雲霧是白色 kah 藍色，毋過懸海拔 ê 臭氧層是足媠 ê 茄仔色。倒爿彼粒火星，下底足白 ê 部份是南極 ê 冰帽仔，毋過 tī 南半球 熱天 ê 時陣會變閣較細頂。正爿彼粒火星，頂懸北半球 ê 極區，是藏 tī 雲 kah 大氣臭氧層下底。火星大氣佮揮發物演化任務太空船 MAVEN ùi 2014 年就開始 leh 探索火星薄薄 ê 頂層大氣、電離層，閣有伊 kah 太陽、太陽風是按怎產生交互作用--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230627/ 影像：MAVEN, Laboratory for Atmospheric and Space Physics, Univ. Colorado, NASA 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230627.html Powered by Firstory Hosting

內海仔星雲中心是一个壯觀 ê 恆星形成 爆發區。咱會當 tī 影像中心附近看著 2 个以上 長長 ê 漏仔形雲，逐个差不多攏有 半 光年 長。In 是 極端 ê 恆星風 kah 能量足強 ê 恆星光 造成--ê。附近有一粒足光 ê 恆星，Herschel 36，kā 這區照甲 足光--ê。大型 ê 塗粉牆 kā 其他高溫少年恆星崁 leh、予 ín 看起來 變較紅。這寡恆星 ê 能量 流 tùi 低溫塗粉 氣體 ê 時陣，相迵 ê 兩區 會有足大 ê 溫度差，按呢就會產生 風剪，造成 漏仔形 ê 雲。這張相片 ê 大細 有 15 光年闊，是 kā 踅地球 leh 飛 ê Hubble 太空望遠鏡 翕著 ê 4 款無仝色 ê 影像，合成做一張--ê。內海仔星雲 嘛 叫做 M8，就 tī 射手座 (人馬座) 方向差不多 5000 光年 遠 ê 所在。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230619/ 影像來源：NASA, ESA, Hubble 資料處理：Francisco Javier Pobes Serrano 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230619.html Powered by Firstory Hosting

是按怎土星會出現六角形 ê 雲？無人知影。這款雲上開始 ê 時陣 是 1980 年代 航海家太空船 飛過土星 ê 時陣發現--ê。咱到今猶無人 tī 太陽系 任何所在看著這款現象。Cassini 太空船 tī 2012 年底，頭一擺用闊幅 kha-mé-lah 翕著這張 媠甲會觸舌 ê 假色影像。相片內底有翕著日光照著 ê 較遠 ê 土星北半球，kah 去予土星環包 tī 內底 ê 土星北極。這張是 ùi 近紅外線影像資料組合起來 ê 影像。紅色是低雲，青色是懸雲，按呢會當予土星雲看起來較活潑。這張影像 kah 類似 ê 影像攏顯示講，這款 六角雲 tī 航海家太空船飛過 20 偌年後，猶是真穩定。有一支土星北極 ê 影片 顯示講，這寡雲 leh 踅 ê 時陣，猶有法度保持 六角形 ê 結構。Kah tī 地球出現--ê 看起來干焦六角形 ê 六角雲 無仝，土星頂懸 ê 六角雲 ê 真正是 六个邊界攏平長。這个 六角雲 大甲會使囥 4 粒 地球 tī 內底。相片正爿頂懸，土星雲以外 ê 所在，有 引人注目 ê 藍色 土星環。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230618/ 影像：NASA, ESA, JPL, SSI, Cassini Imaging Team 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230618.html Powered by Firstory Hosting

敢干焦地球有爍爁？毋但喔！咱太陽系內底 ê 太空船捌量著其他行星 ê 爍爁，包括 火星、木星、kah 土星。嘛捌 tī 金星、天王星、kah 海王星 頂懸量著可能是爍爁 ê 物件。爍爁是紮電粒子 忽然間 ùi 一位 走去另外一位 ê 現象。Tī 地球，相挵 ê 冰 kah 水滴定定會造成 產生爍爁 ê 電分開。毋過 tī 木星 ê 情形是啥款？Ùi NASA 踅木星 ê Juno 太空船 提著 ê 影像 kah 資料，有支持 科學家進前 ê 想法。木星 ê 爍爁 嘛是 tī 有水 kah 冰 ê 雲內底生出來--ê。這張 Juno 翕--ê 相片 有翕著可見光 ê 爍光，這是 tī 木星北極 附近 ê 大型雲旋內底翕著--ê。紲落來幾若個月，Juno 太空船會 tī 木星暗暝彼爿進行幾若擺 ê 近距離掃描，按呢就會當予 機器人探測器 去提閣較濟 木星爍爁 ê 資料 kah 影像。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230625/ 影像來源：NASA/JPL-Caltech/SwRI/MSSS 資料處理 kah 許可: Kevin M. Gill 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap230625.html Powered by Firstory Hosting

這个景色是 ùi 瑞典海邊 看著 ê Baltic 海，毋過是 kā 一暗內底無仝時間 ê 影像，照時間順序櫼 tī 一張相片內底。Ùi 日出 到 日落，月光 就照 tī 這个有創意 ê 海洋 kah 天頂。隨無去 ê 雲、一直 tī 遐 ê 天星、leh 跳舞 ê 北極光，in ê 跤跡，攏留 tī 地球天頂。為著欲翕出這張縮時攝影影像，影片 tī 差不多月圓彼工，當地時間 暗時 7:04 到 透早 6:35 ê 時間內，攏總翕著 3296 張 ê 影格。相片 ê 時間變化 是 ùi 倒爿 到 正爿，逐柱像素是 ùi 彼 3296 張影格 揣著對應 ê 部位鬥去 lih，最後合成做這張 3296 像數 闊 ê 數位影像。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230616/ 影像：Bernd Pröschold (TWAN) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230616.html Powered by Firstory Hosting

M15 是 一个內底有超過 10 萬粒恆星 ê 大型星團。伊是咱銀河系早期形成活動留落來 ê 殘骸，是超過 130 億歲 ê 其中一个球形星團。這款銀河內 ê 球形星團差不多有 170 團，到今猶 tī 銀暈內 leh 賴賴趖。這張是 重新處理過 ê Hubble 影像，中心是 M15，就 tī 飛馬座 方向 3 萬 5000 光年遠 ê 所在。伊 ê 直徑差不多有 200 光年闊，超過一半 ê 恆星攏集中 tī 中心 10 光年左右 ê 範圍，是目前為止恆星櫼櫼做伙上實密 ê 所在。Hubble 太空望遠鏡 量著 M15 中心恆星 ê 運動速度是愈來愈緊，證明講有一个 大質量烏洞 tī 這个實密星團中心。咱閣知影 M15 內底有一个 行星形星雲。伊就叫做 荷仁豆一星雲 (嘛會使叫做 PN Ps 1)，就 tī 這張影像中央正爿下跤彼个藍色光點遐。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230615/ 影像來源：NASA, ESA, Hubble Legacy Archive 資料處理：Ehsan Ebrahimian 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230615.html Powered by Firstory Hosting

咱是按怎到遮--ê？咱知影咱是活 tī 踅恆星 leh 行 ê 行星 頂懸，這粒 恆星 嘛踅一个星系咧行。毋過這一切是按怎形成 ê 呢？因為咱 ê 宇宙 運動速度傷慢矣，咱看袂伊有咧振動抑是無。所以咱就用電腦模擬較緊 ê 運動速度，來幫贊咱 揣出這个答案。講較詳細咧，這支影片 是 ùi IllustrisTNG 合作計畫 追蹤 ùi 早期宇宙 (紅移 12) ê 氣體 到 今 (紅移 0) ê 模擬結果。模擬 拄開始 ê 時陣，規个空間內底 ê 氣體落到 一區相對來講 重力 較懸 ê 部份 累積起來。等幾若十億年後，這个特殊閣迷人 ê 宇宙舞蹈 會生出一粒較明確 ê 核心。這內底 ê 氣體丸，有一寡是 較細 ê 衛星星系，in 會繼續落 lŏe 中央，去予 咧轉踅 ê 星系吸收入去。一直到這支影片結束 ê 時陣，就是到咱這馬 ê 時代。毋過對 銀河系 來講，大型合併可能猶未結束。最近 ê 證據表示講，咱這个大型 ê 捲螺仔星系 會 tī 未來幾若十億年內 kah 閣較大型 ê 仙女座 盤仔形捲螺仔星系 相挵。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230531/ 影像： 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230531.html Powered by Firstory Hosting

Tī 毅力號探測車 頂懸，有一台會當翕多彩立體影像 ê 相機 Mastcam-Z。伊 tī 火星任務 火星日第 45 工（就是地球時間 ê 2021 年 4 月 5 號）ê 時陣，翕著 火星獨創號直升機 ê 3D 特寫相片。你會使 kā 你 ê 3D 目鏡提來看覓 leh。獨創號 ê 烏影投影 tī 火星表面，伊 ê 4 支跤就停 tī 探測車 ê 車輪痕跡邊仔。實驗直升機 ê 太陽能枋就 tī 獨創號 彼 2 个 1.2 公尺長、倒剾踅 ê 車葉仔 頂懸。伊這馬當 leh kā 電池充電，按呢就會當 tī 遮爾寒 ê 火星暗暝 保持溫暖，閣會使提供動力予直升機飛。Ùi 火星日 第 13 工開始，抑是地球時間 4 月 19 以後，獨創號 就變做頭一个 人類 tī 地球以外行星控制 ê 飛行器。伊到今已經 tī 火星薄縭絲 ê 大氣層內底，完成 50 改以上 ê 飛行矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230624/ 影像：NASA, JPL-Caltech, MSSS, ASU 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap230624.html Powered by Firstory Hosting

木星 ê 衛星 踅 木星 leh 行。這支影片 紀錄著 兩粒 木星上大粒 ê 衛星，木衛二 Europa kah 木衛一 Io，ùi 這粒大行星 ê 大紅斑 面頭前行過 ê 模樣。大紅斑是咱所知影 tī 太陽系 內底上大 ê 風暴。這支影片是 機器人太空船 Cassini 欲飛去土星進前，tī 2000 年彼陣 飛過木星 ê 時陣翕--ê。這兩粒衛星，較遠彼粒是 有火山 ê 木衛一 Io，較近彼粒是 攏是冰 ê 木衛二 Europa。Tī 這支縮時攝影影片內底，木衛二 Europa 行甲超過 木衛一 Io。這 足奇怪--ê，因為 木衛一 Io kah 木星 較倚，應該愛行較緊才著。這个理由是因為 飛足緊 ê Cassini 太空船 飛過 ê 時陣 改變 kha-mé-lah 翕相 ê 角度。木星是目前 NASA ê 機器人 太空船 Juno leh 觀測 ê 對象。ESA tī 4 月 發射 ê 木星冰衛星探測船 (JUICE) 這馬當 leh 飛過去。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230613/ 影像來源：NASA; ESA, JPL, Cassini Imaging Team, SSI 資料處理：Kevin M. Gill 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230613.html Powered by Firstory Hosting

月球附近彼个是啥物？是 國際太空站 ISS 啦！雖罔講 ISS 實際上有可能出現 tī 月球 附近，毋過這張相片毋是按呢，這張是出現 tī 地球 附近。ISS 是 tī 低地球軌道 leh 行，伊每 90 分鐘 踅咱這粒 大粒藍色寶石 一擺。相片內底翕著 ê，是伊 ùi 月球頭前飛過。月球 踅地球 leh 行，一輾愛行 1 個月。這个時期 ê 月相是月眉形--ê，這是因為月球 去予日光照著 ê 彼半爿，tī 地球看起來 干焦賰彎彎 ê 光帶。這張影像是三月底 tī 中國 上海 翕--ê。這毋但會當看著地球 上大粒人工衛星 ê 細節，嘛會當看著地球上大粒天然衛星 足清楚詳細 ê 隕石坑 kah 拋荒表面。閣紲落來幾若年，人類按算欲送比以前 閣較濟人 kah 機器 到 月球 去。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230612/ 影像：Tianyao Yang 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230612.html Powered by Firstory Hosting

正爿頂懸 ê NGC 6872 直徑超過 50 萬光年，是一个 足大 ê 棍螺仔星系，上無嘛有咱銀河系 ê 五倍以上。這个 大型星系 去予扭曲 kah 搝長 ê 捲螺仔手骨，予伊看起來敢若是大隻鳥仔 美麗 ê 翼股。是講伊有一个較有名 ê 外號，叫做臭頭鳥星系。伊就 tī 南天星座 孔雀座方向 2 億光年遠 ê 所在。這个變形 ê 捲螺仔手骨 頂懸有足濟 恆星形成區，會變形是因為 NGC 6872 kah 附近較細 ê 星系 IC 4970 產生重力交互作用造成--ê，就是大型星系核 頂懸彼个。孔雀星系群 內底上主要 ê 成員，大型長株圓星系 NGC 6876，就 tī leh 飛 ê 臭頭鳥星系倒爿下跤遐。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230623/ 影像：Mike Selby, Observatorio El Sauce 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap230623.html Powered by Firstory Hosting

這個月，光爍爍 ê 火星 kah 金鑠鑠 ê 金星 攏變做是日落了後 西部天頂上出眾 ê 天體。火星這粒紅色行星 tī 6 月 3 號 彼陣，行過 巨蟹座。這張相片就是 火星出現 tiàm 開放星團 Messier 44 附近恆星 ê 時陣 翕著--ê。這个無偌遠，tī 古早時代就知影 ê 星團，是用目睭就會當直接看著--ê。伊嘛叫做 鬼宿星團 抑是 蜂岫星團。蜂岫星團內底 ê 恆星攏比太陽閣較少年，伊 kah 咱 ê 距離才 600 光年遠爾爾。火星看起來是黃色--ê，才 17 光分遠爾爾。6 月 12、13 ê 時陣，會換金星 行到蜂岫星團邊仔。毋過金星傷光矣，按呢蜂岫星團會較歹用目睭直接看著。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230610/ 影像：Rolando Ligustri 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230610.html Powered by Firstory Hosting

象管星雲 to̍h 親像是英國童話「To̍h 是按呢 ê 故事」內底一篇「象仔囝」故事 ê 銀河版插圖。伊就 tī 懸閣遠 ê 仙王座 遐，彎彎曲曲迵過發射星雲 kah 少年星團 複合體 IC 1396。倒爿 ê 宇宙象管嘛叫做 vdB 142，伊 ê 長度是超過 20 光年長。這幅詳細 ê 望遠鏡特寫，有翕著伸 tùi 後壁去、足光 ê 山龍，kah 這內底 一區一區 ê 低溫 星際 塗粉氣體。這个 烏暗、虯做伙 ê 雲 內底有做新恆星 ê 原始材料，嘛會當 kā 原恆星藏 tī 內底。這个較暗 ê IC 1396 星團複合體 tī 差不多 3000 光年遠 ê 所在。伊 tī 天頂 ê 範圍是足大--ê，有 5 度遐爾闊。毋過 這幅影像 ê 視野才 1 度闊爾爾，這个角寸尺差不多是兩粒月娘遐爾闊。是講 tī 彎彎曲曲 ê 象管星雲倒爿下跤 ê 烏暗形體，有一寡人 kā 號做 宇宙車隊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230608/ 影像：Steve Cannistra (StarryWonders) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230608.html Powered by Firstory Hosting

咱知影有一个世界咧 滅亡。講較詳細咧，類太陽恆星 ZTF SLRN-2020 這馬當咧食伊其中一粒行星。雖罔講有足濟行星 落尾攏會因為踅入去中央恆星內底，結束伊 ê 性命，毋過頭一擺 直接觀測著 類木星行星去予食去，是發生 tī 2020 年 彼陣。這粒恆星 ZTF SLRN-2020 kah 咱太陽 ê 距離是 1 萬 2000 光年，就 tī 鴟鴞 ê 星座 (天鷹座) ê 方向。這支 主題動畫 頭一擺畫出這粒氣體行星 ùi 這粒迷人恆星 ê 外沿飛過去 ê 時陣，伊 ê 大氣去予搝開 ê 畫面。行星大氣有一寡去予恆星大氣吸去，另外一寡氣體去予 擲到太空去。影片結束，行星嘛完全去予恆星吞去，落 lŏe 恆星中心，造成恆星外層大氣 tī 足短 ê 時間內脹大、溫度衝懸、閣變較光。等到有一工，差不多 80 億年 以後，地球 嘛會那踅那落 lŏe 咱 太陽 內底。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230606/ 影像：K. Miller & R. Hurt (Caltech, IPAC) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230606.html Powered by Firstory Hosting

這張懸解析度景色，是北極區內底一个烏暗 koh 神祕 ê 所在，有一寡人 kā 叫做 Mordor Macula。冥衛一 Charon 是 冥王星上大粒 ê 衛星，這張 Charon ê 肖像 是新視野號太空船 tī 2015 年 7 月 14 ê 時陣飛到 Charon 上倚彼陣翕--ê。處理過 ê 藍色、紅色、紅外線組合資料，是欲加強色彩 kah 追蹤 Charon 表面特性 ê 變化。資料 ê 解析度差不多是 2.9 公里。這張 hŏng 讚嘆 ê Charon 影像是面對冥王星彼半球。相片有照著一條足清楚 ê 溝仔，是 踅 Charon 一輾 ê 斷層 kah 山谷，看起來敢若欲 kā 南半球 較平 ê 平原 kah 北半球 多變 ê 地形 分做兩爿。Charon ê 直徑是 1214 公里。這差不多是地球寸尺 ê 1/10，毋過是 冥王星 直徑 ê 一半大，所以伊就變做是太陽系內底，相對行星來講，上大粒 ê 衛星。是講，tī 倒爿頂懸彼張解析度無啥好 ê 望遠鏡負片插入圖內底，這粒衛星就出現 tī 冥王星盤面 1 點鐘方噗出來 ê 細塊烏影。就是因為按呢，Charon 才會 tī 1978 年 6 月 去予 James Christy kah Robert Harrington tiàm Flagstaff ê 美國海軍天文台發現著。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230603/ 影像：NASA, Johns Hopkins Univ./APL, Southwest Research Institute, U.S. Naval Observatory 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230603.html Powered by Firstory Hosting

咱若是會當替宇宙漆色，毋知會足趣味無？你若是有同意，請先用這幅有名 ê 天文插圖試看覓咧。你、你 ê 朋友、你 ê 爸母 抑是 囡仔，攏會使 kā 這張印出來畫，抑是 用電腦漆色。咧漆色 ê 時陣，你可能會 有興趣知影，就算 這幅插圖 tī 過去 100 年內出現 tī 足濟所在，毋過真正 ê 藝術家是啥人，逐家猶毋知。而且，這个作品 猶袂號名，毋知你敢會使替伊想一个袂䆀 ê 名？這幅插圖 頭一擺出現，是 tī Camille Flammarion 1888 年寫 ê 一本 冊 內底。這本冊 定定提來講，人類目前 ê 概念，會去予閣較大 ê 真理崁過。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230604/ 影像：毋知，可能是 C. Flammarion 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230604.html Powered by Firstory Hosting

Tī 這張 南冕座 北方邊界 ê 望遠鏡遠景中，有滿滿 ê 宇宙塗粉 kah 豐富 ê 恆星。這个恆星形成區是 分子雲複合體 ê 一部份，伊才 500 光年遠爾爾。伊 ê 大細，是另外一个閣較有名 ê 恆星托兒所，獵戶座星雲 ê 三分之一爾爾。照這个星雲估計 ê 距離來算，這張 2 度闊 ê 相片差不多有 15 光年大。Kah 明亮 ê 星雲濫做伙 ê 塗粉雲 kā 彼寡 tī 銀河 內底 遙遠 ê 背景恆星 ê 光閘牢牢。這寡藏 tī 雲內底 ê 恆星，猶繼續 tī 遐 leh 進行恆星形成。倒爿彼个是 大型烏暗星雲 Bernes 157。正爿是 一陣 足媠 ê 反射星雲，in ê 編號是 NGC 6726，6727，6729，kah IC 4812。In 特殊 ê 藍光是 ùi 高溫恆星反射宇宙塗粉來--ê。較實密 ê NGC 6729 是 tī 少年變星 南冕座 R 外圍 ê 星雲。下底 ê 弧形雲絲 kah 雲箍仔，是 kah 能量足懸 ê 新恆星 有關 ê Herbig Haro 天體。實際上，這區中央閣有 皇冠星團，是 kah 咱上倚 ê 其中一个上活潑 ê 恆星形成區。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230622/ 影像：Alessandro Cipolat Bares 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap230622.html Powered by Firstory Hosting

大部份 ê 星系攏無 恆星 kah 氣體組成 ê 環，是按怎 M94 有兩个？咱先來看，捲螺仔星系 M94 有一个內底環，是新形成 ê 恆星踅 tī 星系核 外沿 ê 結構。這予這个星系毋但 看起來足特別--ê，嘛 tī 內部發出足強 ê 光。針對伊 ê 起源，有一个主要 ê 假說是講，是 踅 M94 ê 星系棍仔，造成內底環 ê 恆星 形成 大爆發。星系棍仔 是搝長 ê 結構，主要 ê 成份是恆星。觀測結果 閣有看著另外一个環，外部環，伊較暗，色嘛無仝，無合起來，嘛較複雜。外部環是按怎形成--ê，到今猶毋知。相片 內底 ê M94 有 4 萬 5000 光年 大，就 tī 1500 萬光年遠 ê 所在。咱會當用 細台天文望遠鏡 tī 獵犬 ê 星座（獵犬座）ê 方向揣著伊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230607/ 影像：Brian Brennan 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230607.html Powered by Firstory Hosting

欲看著 瑪雅 ê 羽蛇 peh 落去 金字塔，你就愛 tī 著--ê 時間去看。Tī 春分 前後 去 墨西哥 Yucatán 半島 ê El Castillo 參觀是上好 ê 時間。欲暗彼陣，天氣若是袂䆀，金字塔 ê 烏影會成做三角形，而且會做伙合做一个幻影，就親像是 毒蛇咧爬。這个 hŏng 印象足深 ê 樓梯金字塔，嘛叫做 Kukulkan 廟。伊 ê 底座有 30 公尺懸，55 公尺闊。這是 9 世紀 到 12 世紀 之間 ê 前 Columbu 文明起--ê 一層一層 ê 四角露台。這个結構 會當用踮曆法，而且因為伊會當做 天文應用，所以嘛足有名--ê。這張合成相片是 2019 年翕--ê。有翕著 木星、土星 tī 天頂 迒過咱 銀河系 ê 中央帶。明仔載又閣拄著 春分 矣！毋但 tī Kukulkan 廟是，地球其他所在 嘛是。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230319/ 影像：Robert Fedez 音樂：P!SCO - 鼎鼎 聲優：草莓大福 翻譯：An-Li Tsai (NCU) 原文：https://apod.nasa.gov/apod/ap230319.html Powered by Firstory Hosting