NASA 逐工一幅天文圖 APOD Taigi

4 月 20 這工，月球 ê 烏影 tùi 地球南半球頂懸走過去。這條 狹狹 ê 路線，大部份攏是行海路，tī 烏影下底 ê 人就會看著日食。這擺 ê 日食真罕得看著，因為有 ê 所在會看著日全食，有 ê 所在會看著日環食，所以這工 ê 日食就叫做全環食，嘛會使叫做 複合日食。澳洲西部海岸 ê 印度洋有一隻船 載欲逐日食 ê 人 行到日全食路線 ê 中心線停 leh，按呢 in 就會當看著 62 秒鐘久 ê 日全食現象。這張船頂翕 ê 日食影像，有翕著 太陽表面 ê 氣體流 tùi 太空去，這个足壯觀 ê 外層大氣，咱 kā 叫做日冕。這張是 kā 11 張無仝感光時間 ê 相片合成 ê 結果，感光時間是 ùi 1/2000 秒到 1/2 秒攏有。這有紀錄著足大範圍 ê 太陽輝度，按呢較好追蹤 tī 日全食時期 較歹用目睭看著 ê 日冕細節。是講「食」 應該是成對--ê。毋過 5 月 5 號 後一擺月圓 ê 時陣，月球煞袂經過地球 ê 本影區，按呢就干焦賰半影月食矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230429/ 影像：Fred Espenak 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap230429.html Powered by Firstory Hosting

Kah 背景這陣足光、實密 ê 恆星相比，這个拖幾若光年長 ê 暗烏形體，因為外形 ê 關係，去 hŏng kā 叫做海馬星雲。咱會當 tī 北方 ê 皇家星座，仙王座，看著這个厚塗粉 ê 閘光星雲。這是銀河分子雲 ê 一部份，kah 咱差 1200 光年 ê 距離。伊嘛去 hŏng 編做 Barnard 150 (B150)。這个天體目錄攏總有 182 个 烏暗天體，是 20 世紀初 ê 一个天文學家 E. E. Barnard 編--ê。這內底 有一大陣低質量恆星當咧形成，毋過欲看著 in 咧 崩塌 ê 恆星核，是愛 tī 較長波長 ê 紅外線波段 才看會著。毋過免煩惱，咱猶是會當 tī 這个 有銀河 ê 美麗天景 內底，看著仙王座 ê 七彩恆星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230420/ 影像：Jeff Herman 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230420.html Powered by Firstory Hosting

有幾若暗，庄頭內底上讚 ê show 是 tī 天頂。像這暗，極光就是天頂 ê 主角。創出這个 七彩夜空 show ê 地磁風暴，是因為太陽 活動力愈來愈強。較予人意外 ê 是，因為前一工 太陽 日冕物質噴出事件 (CME) 倚地球 ê 時陣，無噴著地球，所以這个風暴會 tī 地球產生極光，是咱料想袂著 ê 代誌。前景有 2 个專門咧逐極光 ê 人，因為意外看著這个 媠甲驚死人 閣 變化速度足緊 ê 極光，煞歡喜甲。是講，毋管預測是按怎講，這个 tī 地球夜空出現 ê 極光，毋但出現 tī 遙遠 ê 北方，連 美國 南方 ê 新墨西哥州 嘛看會著。Tī 芬蘭 北部 Lapland 區 Saariselkä 庄頭 天頂翕著 ê 這張闊幅影像內底，會當看著足罕得看著、足濟細節、足濟色光、足闊範圍 ê 明亮極光。這个活跳跳 ê 極光色彩，有黃色、青色、紅色、kah 茄仔色。這是 地球大氣層 較懸層 ê 酸素 kah 窒素 原子 kah ùi 外太空走入來 ê 電子 發生反應，發出 ê 色光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230419/ 影像：Juan Carlos Casado (Starry Earth, TWAN) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230419.html Powered by Firstory Hosting

你有想欲看日全食無？若是有，你敢有朋友抑是親情蹛 tiàm 明年 4 月 ê 日全食路線 附近？若是有，按呢你可能會使安排一擺日全食旅行。明年 4 月 8 號，日全食 路線會經過 北美洲，ùi 墨西哥 西部 到 加拿大 東部，中央會經過美國，ùi 南部 ê Texas 州 入來，ùi 北部 ê Maine 州 出去。規个北美洲攏會 拄--著，上無嘛有 日偏食 通看。這張地圖 就是 全食 ê 路線圖。有足濟看過日全食 ê 人，一世人攏會 kah 逐家 分享 日全食 ê 故事。欲看日全食進前，咱會使先來看 日環食 做準備，就 tī 今年年底，10 月中彼陣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230418/ 影像：NASA, Science Visualization Studio 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230418.html Powered by Firstory Hosting

天頂彼个紅色 ê 圓箍仔是啥毋？是爍爁喔！咱一般上捷看--著 ê 爍爁，是雲 kah 雲之間 足光 ê 白色爍光。科學家 tī 最近 50 冬才揣著 出現 tī 高層大氣 ê 新款爍爁，包括 紅色精靈 kah 藍色噴射流。另外閣有一款 tī 高層大氣 ê 爍爁 叫做 白目精靈，伊較無啥人知影，嘛較歹翕著。白目精靈 去 hŏng 認為講，是 電磁脈動 ùi 含電 ê 雲 tùi 頂懸發射，kah 電離層 相挵，造成 窒素 分子發光 ê 結果。相片 內底是 紅色 ê 白目精靈 圓箍仔，伊 ê 半徑差不多是 350 公里大，tī 天頂 100 公里懸 ê 所在，是三月底 tī 意大利 Possagno 翕著--ê。欲翕 白目精靈，毋但愛足有經驗，而且愛用高速攝影技術，用 干焦 0.001 秒 ê 速度來翕，才翕會著。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230417/ 影像：Valter Binotto 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230417.html Powered by Firstory Hosting

這个去予編做 NGC 206 ê 大型星協，就 tī 咱 ê 厝邊星系 仙女座星系 厚塗粉 ê 捲螺仔手骨內底，綴星系頂懸粉紅仔色 ê 恆星形成區咧行。仙女座星系嘛叫做 M31。這个捲螺仔星系 kah 咱 ê 距離才 250 萬光年爾。這張是 仙女座星系盤西南 爿 清楚閣詳細 ê 特寫相片，NGC 206 就 tī 這張相片 ê 中央正爿彼搭。NGC 206 內底有一寡足光 ê 藍色 恆星，表示講伊猶閣足少年--ê。實際上，這寡少年懸質量恆星 ê 歲數，是猶無到 1000 萬歲。NGC 206 ê 大細差不多有 4000 光年大，是比咱銀河 盤 面頂 少年球形星團 抑是 開放星團 閣較大。這个寸尺 kah 咱附近 ê 捲螺仔星系 M33 內底 ê 大型恆星托兒所 NGC 604 kah 大麥哲倫星雲內底 ê 蜘蛛星雲 是 差不多大。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230412/ 影像：Howard Trottier 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230412.html Powered by Firstory Hosting

逃走 ê 恆星 鹿豹座 α 就親像是一隻船行過宇宙海，tī 天頂製造出這款優美弧 ê 弓形波湧 抑是 弓形震波。大質量 ê 超巨星 tī 天頂徙動 ê 速度，一秒鐘是超過 60 公里，結果就會 kā 伊行過 ê 路頂懸 ê 星際物質 櫼櫼做伙。鹿豹座 α 差不多 tī 影像 中央 6 度闊 ê 範圍。Kah 咱太陽相比，伊 ê 質量是 25 - 30 倍大，溫度是 5 倍燒 (3 萬 K)，光度是 50 萬倍光。這粒 tī 4000 光年遠、長頷頸星座 鹿豹座 方向 ê 恆星，仝款會製造足強 ê 恆星風。鹿豹座 α ê 弓形震波 kah 伊中心恆星 ê 距離 是差 10 光年遠。是講，到底是啥物咧驅動這粒 恆星 ê 運動？天文學家長期以來攏認為講，鹿豹座 α 可能是 附近星團內底 ê 高溫少年恆星 kah 星團內底其他成員 產生重力交互作用，去予擲出來--ê 星。嘛有可能是，伊 ê 大質量恆星 星伴，演化做超新星爆炸 ê 時陣，kā 伊擲出來--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230428/ 影像：André Vilhena 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap230428.html Powered by Firstory Hosting

這个星雲幾若百年前就去予觀星者注意著矣，毋過彼當陣 猶無了解 是按怎伊會生做這形--ê。伊看--起來敢若是天頂 ê 圓箍仔。除了 土星 環以外，這个 環形星雲 (M57) 應該是天頂上有名 ê 天體環矣。咱這馬知影講伊是啥物矣。而且會出現遮爾 有代表性 ê 外形，應該是因為咱看伊 ê 角度拄拄仔好。這張科學家最近鬥--出來--ê、咧脹大 ê 星雲 3D 結構圖，一部份是根據 Hubble 太空望遠鏡 ê 清楚影像 來--ê。影像 kā 咱講，這个星雲是一个密度較懸、像甜箍仔麭 ê 圓箍仔，去予包 tī 咧發光 ê 美國 跤球形 ê 星雲中央。咱 tī 地球 是看 tùi 這粒跤球 ê 長軸方向去，所以是面向圓箍仔 ê 方向咧看。是講，這个咱這馬已經知影講，這个 行星形星雲 咧發光 ê 物質，毋是 ùi 行星來--ê。這个氣體殼顛倒是 ùi 死亡恆星 ê 外層氣體搩--出來--ê。這款恆星 以前是 類太陽恆星，這馬變做是星雲中心微微仔咧發光 ê 細粒光點。中心高溫恆星 ê 紫外光 kā 氣體內底 ê 原子 離子化。環形星雲 ê 大細差不多有 1 光年 闊，離咱有 2500 光年遠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230402/ 影像來源：NASA, ESA, Hubble Legacy Archive 資料處理：Judy Schmidt 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230402.html Powered by Firstory Hosting

是按怎北極星叫做北極星？第一，北極星 是地球 自轉軸 指向北方附近 上光 ê 星。所以 地球 那自轉，天星看--起來就敢若那踅 北極星 leh 行。因為北極星看--起來就一直停 tī 仝款 ê 位置無 leh 振動，所以伊就去 hŏng 叫做 北極星 矣。是講地球 自轉軸 指向南方 彼搭無較光 ê 星，所以咱目前 無較光 ê 南極星。幾若千年前，地球自轉軸 ê 指向方向 kah 這馬無啥仝，彼馬 ê 北極星是織女星。其實 北極星 毋是 天頂上光 ê 星，伊會遮爾好揣，是因為伊 kah 北斗星 ê 湯匙頭 ê 兩粒星，差不多排仝一排。這張影像 有 8 度闊，北極星 就 tī 影像 ê 中央附近。這是一張 kā 幾若百張感光相片疊--出來 ê 數位合成影像。咱看會著規張影像攏去予 積分通量星雲 (IFN) 較暗 ê 氣體 kah 塗粉 佔牢牢，上倒爿閣有 球形 星團 NGC 188。北極星是一款 造父變星，伊 ê 表面會產生微微仔 脈動，造成這粒有名 ê 星 會 tī 幾若工內 改變伊 ê 光度 幾若葩。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230411/ 影像：Javier Zayaz 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230411.html Powered by Firstory Hosting

這个予逐家感覺趣味 ê 烏-mih-mah 星雲 就浮 tī 南方 ê 天頂。這是一个用雙筒千里鏡就揣會著 ê 迷人天體，就 tī 一个細細隻 ê 星座，胡蠅座 ê 方向遐。Kah 滿天全天星 ê 星場相比，這个厚塗粉 ê 宇宙雲 是足明顯--ê，伊就 tī 火炭橐仔星雲 kah 南十字座 ê 南方。Tī 這張長焦鏡頭 ê 視野中心附近，有一條搝長 ê 烏-mih-mah 星雲，差不多有 3 度長。伊南爿 ê 尾溜（tī 正爿頂懸遐）去予 黃色球形星團 NGC 4372 切斷矣。是講 NGC 4372 是 tī 咱銀河系 ê 銀暈內底散步 ê 天體。伊其實是 2 萬光年遠 ê 背景天體，而且 kah 烏-mih-mah 星雲 拄仔好攏 tī 仝一个視線方向。根據 烏-mih-mah 星雲 ê 外形，伊算是 tī 胡蠅分子雲內底。是講這个較有名 ê 偏名是 天文攝影師 兼 作家 Dennis di Cicco tī 1986 年決定--ê，彼陣伊 tī 澳洲咧觀測哈雷彗星。烏-mih-mah 星雲離咱有 700 光年遠，長度有 30 光年長。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230330/ 影像：Matias Tomasello 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230330.html Powered by Firstory Hosting

對一寡人來講，這看--起來敢若是一隻 大隻 雞 tī 天頂 leh 走。對另外一寡人來講，這看--起來敢若是有 恆星 leh 形成 ê 氣體雲。伊是 走路雞星雲，編號是 IC 2944，大細有 100 光年大，kah 咱 ê 距離差不多是 6000 光年。咱會使 tī 半人馬座 ê 方向揣著伊。這張影像 是開 3 暗攏總 16 點鐘 ê 感光時間翕--ê，影像 ê 色彩是 為著科學目的 分派--ê。咱閣看會著星雲發光氣體內底 ê 星團 Collinder 249。雖罔講無遐爾好揣，毋過星雲 內底是有 幾若个 無仝形體 ê 烏暗 分子雲。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230410/ 影像：Daniel Stern 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230410.html Powered by Firstory Hosting

卵星雲 ê 中央有啥物？卵星雲中央有一粒恆星 ùi 這粒宇宙卵生出來，伊 kā 氣體塗粉殼 擲出去，沓沓仔演化做 白矮星。卵星雲是快速演化 ê 前 行星形星雲，大細差不多有 1 光年，就 tī 北方 ê 天鵝座遐。較厚 ê 塗粉 kā 視線中央 ê 恆星閘牢矣，毋過較遠 ê 塗粉殼會反射中央恆星 ê 光。光 ê 偏振 是相對 逐粒塗粉粒、中央恆星、kah 觀測者 定義 ê 平面來講。光 反射 這个平面造成 ê 效應，就叫做偏振。咱若是量卵星雲 ê 偏振光角度，就會使知影藏 tī 內底彼粒天體 ê 位置。這張影像是 2003 年 Hubble 先進巡天 Kha-mé-lah 翕--ê。科學家 kā 這粒「卵」漆做「復活節卵」ê 色彩 ê 原因，是為著欲 強調 偏振 ê 方向。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230409/ 影像：Hubble Heritage Team (STScI / AURA), W. Sparks (STScI) & R. Sahai (JPL), NASA 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230409.html Powered by Firstory Hosting

Tī 實際上 ê 宇宙尺度來講，M100 真正是有夠雄偉。咱就 kā 這个星系叫做 偉大設計 ê 捲螺仔星系。這是一个超過 1000 億粒恆星 ê 大型星系，有清楚 ê 捲螺仔手骨，kah 咱 ê 銀河系 足成--ê。M100，嘛叫做 NGC 4321，是 室女座星系團 內底上光 ê 成員之一。伊離咱有 5600 萬 光年 遠，就 tī Berenice 王后頭鬃 ê 星座 (后鬃座) 遐。這張 Hubble 太空 望遠鏡 翕--ê M100 影像，是用 闊幅 kha-mé-lah 3 號 翕--ê。影像有強調 明亮 ê 藍色 星團 kah 複雜彎曲 ê 塗粉帶，這攏是這款星系 ê 特徵。對 M100 內底 ê 變星 研究，是決定 宇宙大細 kah 年歲 足重要 ê 角色。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230408/ 影像來源：NASA, ESA, Hubble 資料處理: Judy Schmidt 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230408.html Powered by Firstory Hosting

Tī 咱地球暗暝 看天頂 ê 獵戶座，會看著伊 ê 跤彼位有一粒 金爍爍 ê 藍色超巨星 參宿七。伊去予編做 獵戶座 β，就 tī 這个 深空闊幅視野 ê 中央。獵戶座 參宿七 發藍光，表示講伊是比 伊 ê 超巨星對手，發黃光 ê 參宿四 (獵戶座 α) ê 溫度閣較高。是講兩粒恆星 ê 質量攏懸甲 未來會變做 超新星，以 核心崩塌 ê 方式 結束 in ê 性命。參宿七 kah 咱 ê 距離是 860 光年，伊比太陽 ê 溫度閣較懸，半徑是太陽 ê 74 倍大。按呢差不多是到水星軌道遐爾大。這幅 10 度闊 ê 影像是 tī 一个有豐富星雲 ê 星座內底，獵戶座就 tī 伊 ê 頂懸。Tī 參宿七正爿，去予光爍爍 ê 藍光恆星照予光--ê，是 厚塗粉 ê 尪姨頭星雲。參宿七 是多星系統其中一部份，伊 ê 星伴是暗閣較濟。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230407/ 影像：Rheinhold Wittich 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230407.html Powered by Firstory Hosting

蜘蛛星雲 嘛叫做 劍魚座 30，是一个直徑超過 1000 光年大 ê 大型恆星形成區，就 tī 咱厝邊 ê 衛星星系 大麥哲倫星雲 內底。伊 kah 咱 ê 距離有 16 萬光年遠，是規个本星系群內底 上大、上激烈 ê 恆星形成區。這隻宇宙蜘蛛就 tī 這張壯觀 ê 影像中央。這張影像是 SuperBIT (超壓氣球影像望遠鏡) leh 飛 ê 時陣 翕--ê。這是一台 NASA 用氣球載--ê、直徑 0.5 公尺大 ê 望遠鏡，這馬 浮 tī 太空邊緣。這个 已經有足濟研究 ê 蜘蛛星雲 (NGC 2070) 內底，有 ùi 編號 R136 ê 少年星團中心 大質量恆星 發--出 ê 強輻射、恆星風、kah 超新星震波，激發星雲發光，捏出這寡蜘蛛絲。蜘蛛星雲附近 有另外一个恆星形成區，內底嘛是少年星團、雲絲、kah 去予歕出 氣泡形 ê 星雲。這張看對南天 劍魚座 方向 ê SuperBIT 氣球望遠鏡視野，差不多有 1/3 度遐爾大。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230427/ 影像：SuperBIT, NASA 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap230427.html Powered by Firstory Hosting

土星上大粒 ê 衛星 土衛六 Titan 實在是真歹看--著，因為伊去予足厚 ê 大氣層閘牢矣。細粒粒子浮 tī 頂層大氣內底，造成足歹透光 ê 雲霧，kā 可見光波段 ê 光線散射，kā 土衛六 Titan ê 表面崁--起來，按呢逐家就攏看無。毋過土衛六 Titan ê 表面 tī 紅外線看是會較清楚，因為這个波段 ê 散射較無遐爾強，大氣吸收嘛較少。排 tī 中央彼張是土衛六 Titan ê 可見光影像，排 tī 外口彼輾是紅外線影像。遮是目前為止 土衛六 Titan 上清楚 上迷人 ê 全球影像。外口這六幅假色圖，是裝 tī Cassini 太空船 頂懸 ê 視覺佮紅外線影像光譜儀 (VIMS) 翕--ê。Cassini 太空船是自 2004 到 2017 年 踅 土星咧行 ê 太空船。這寡影像是 kā 13 年來 ê 紅外線影像資料，規个閣重新處理過 ê 影像。這寡紅外線影像 kah Cassini 太空船翕 ê 可見光影像，形成強烈對比。NASA 降落 土衛六 Titan ê 任務按算欲 tī 2027 年進行。這是一个 革命性 ê 降落任務，按算欲用 自旋飛行器 來降落 Titan，這是一款 敢若 直升機 閣 敢若 飛龍機 ê 航空器。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230331/ 影像：VIMS Team, U. Arizona, U. Nantes, ESA, NASA 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230331.html Powered by Firstory Hosting

這張 Hubble 太空望遠鏡影像 是 tī 北方英雄星座，英仙座 ê 方向。內底彼寡金爍爍、十字形光針 ê 前景星，是咱銀河內 ê 恆星。這張清楚影像內底有一个較遙遠 ê 天體 UGC 2885，伊是大型捲螺仔星系，kah 咱 ê 距離是 2 億 3200 萬光年。Kah 銀河系 ê 直徑 10 萬光年 相比，這个星系 ê 大細有 80 萬光年遐爾大，伊內底差不多有 10 億粒恆星。這差不多是咱銀河內恆星數量 ê 10 倍。有一寡研究主題 就是想欲了解 星系是按怎會大甲這个寸尺。天文學家 Vera Rubin ê chhōa 頭研究就是咧研究會捲踅 ê 捲螺仔星系，UGC 2885 就是其中一个 足趣味 ê 目標。伊 ê 研究是頭一个有明確證據講，咱 ê 宇宙是有烏暗物質 ê 存在。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230405/ 影像：NASA, ESA, B. Holwerda (University of Louisville) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230405.html Powered by Firstory Hosting

是哩！毋知你看過 ê 青爍現象敢有親像按呢生？日落 ê 青爍 實在是真罕得看--著。足濟太陽觀測者若是有看--著，會感覺足驕傲--ê。青爍 以前去 hŏng 認為講是 無影。這馬咱知影講，伊是地球大氣層同齊出現 稜鏡 kah 透鏡性質 ê 時陣，產生 ê 現象。無仝 大氣層 會因為海拔懸低無仝，對 太陽頭頂 ê 光產生無仝 屈折，造成色散，變做兩个影像。若是萬事攏順利，這个現象閣會放大，咱就會 tī 太陽消失進前，看著 薄縭絲、白殕色 ê 光逝 轉做 青色 ê 光。是講，這張相片 是閣較罕得看--著 ê 日落。這張相片是 四月 ê 其中一工 tī 智利 ê 懸海拔 Tololo 山美洲洲際天文台 翕--ê。In 翕著大氣層後壁 ê 日頭欲落去矣。日頭頂懸有翕著 幾若重 ê 溫度層，產生幾若个太陽 ê 幻影圖。Tī 這个時間這个地點，有幾若層同齊產生 青爍 現象。這个多重青爍現象去予 兩位掣一趒 ê 天文攝影師 翕著了後兩秒鐘，日頭就沉落去雲內矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230328/ 影像：T. Slovinský & P. Horálek (IoP Opava) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230328.html Powered by Firstory Hosting

太陽系上大 ê 火山 tī 火星。雖罔講 Olympus 山 比地球 ê 聖母峰 較懸三倍，毋過 對地球人來講 伊袂傷歹 peh，因為這粒火山袂傷崎，火星 ê 重力嘛無遐爾強。是講 Olympus 山 ê 範圍比 規个 夏威夷 ê 火山鍊 範圍閣較大，毋過平均來講，Olympus 山 無蓋崎，一擺才 peh 懸幾若度爾爾。Olympus 山 是一粒足大 ê 盾形火山，是足久以前 ê 流體熔岩 做--出來--ê。這是因為火星有 相對靜態 ê 表面地殼，予伊有法度 tī 久長 ê 時間內，沓沓仔疊出這粒火山。上尾一擺 ê 火山 爆發，應該是 2500 萬年前發生--ê。這張影像 是 歐洲太空總署 (ESA) ê 火星快車 機器人太空船 翕--ê。伊這馬猶繼續踅火星這粒 紅色行星 咧行。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230404/ 影像來源：ESA, DLR, FU Berlin, Mars Express 資料處理 & CC BY 2.0 License: Andrea Luck 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230404.html Powered by Firstory Hosting

是啥毋造成咱銀河中心附近有這个奇怪 ê 彎曲結構？這張電波影像 倚頂懸遐，有幾若逝長長趨趨 ê 平行光線，ùi 銀河盤 伸--出來，伊就叫做 銀河中心電波弧。電波弧 kah 銀河中心 之間，有一條 拗彎 ê 奇怪雲絲，咱 kā 叫做 銀河弧。正爿下底彼丸 足光 ê 電波結構 ê 中心，是 銀河中心 ê 烏洞，人馬座 A*。有一款解說這个結構 是按怎來 ê 假說是講，這个電波弧 kah 銀河弧會生做這形，是因為內底有高溫 電漿，綴 仝款強度 ê 磁場咧行。這張影像是 NASA Chandra X 光 太空天文台 翕--ê。影像表示講，這个 電漿 kah 附近 ê 低溫氣體雲咧相挵。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230403/ 影像：Ian Heywood (Oxford U.), SARAO; 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230403.html Powered by Firstory Hosting

翕出這張相片是毋是足好運--ê？雖罔講有足濟精彩 ê 相片攏是因為有人拄仔好 tī 彼个時間出現 tī 遐，毋過欲翕 這張相片 真正是愛技術嘛愛足細膩 ê 計畫。頭一項愛考慮 ê 是角比例：若是 kah 這个 tī 法國 巴黎 足出名 ê 凱旋門 傷倚，這粒月娘就會看起來傷細粒。若是傷保守，ùi 傷遠 ê 所在翕，月娘 就會看起來 傷大粒，袂拄仔好卡 tī 凱旋門 內底。第二項愛考慮 ê 是翕 ê 時機：月娘干焦會 tī 足短 ê 時間內 出現 tī 凱旋門 中央，像 tī 這个距離，是無夠 1 分鐘。其他愛 考慮 ê 部份親像是城市 ê 燈火、相對 輝度、懸度、前景有媠無、kah 數位處理 ê 問題。閣有，嘛愛小可仔運氣運氣，比論講，天氣 愛袂䆀。這擺 ê 計畫確實有成功，有 kā 人類上有名 ê 兩項標誌攏翕做伙，予逐家 欣賞。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230426/ 影像：Stefano Zanarello 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap230426.html Powered by Firstory Hosting

咱會當 tī 南方星座 飛魚座 揣著這个 去予搝甲變形 ê 星系 NGC 2442，伊離咱有 5000 萬光年遠。Tī 這張深空彩色影像內底，咱看會著伊 ê 兩支捲螺仔手骨 ùi 中央彼支明顯 ê 星系棍仔 伸--出來，變做一个鉤仔形 ê 結構。影像內底四界攏有光針，這是望遠鏡視野內底 ê 前景星。影像嘛有翕著這个遙遠星系頂懸 閘光 ê 塗粉帶、藍光 ê 少年星團、紅光 ê 恆星形成區、kah 黃光 ê 星系核。這寡恆星形成區 是踅 星系核咧行，黃光主要是 ùi 一寡較老 ê 星族來--ê。毋過看--起來，恆星形成區較濟攏是倚 tī 正爿頂懸彼條搝長 ê 捲螺仔 手骨遐。這支手骨會去予搝甲變形，應該是因為這个星系 tī 古早時代 kah 倒爿頂懸彼个較細 ê 星系 行傷倚 ê 結果。照 NGC 2442 kah 咱 ê 距離來估算，這兩个產生交互作用 ê 星系 ê 距離差不多有 15 萬光年遠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230401/ 影像：Nicolas Rolland, Martin Pugh 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230401.html Powered by Firstory Hosting

是啥物星會當製造這个氣泡？毋是 氣泡正爿彼粒金爍爍 ê 星製造--ê。嘛毋是太空大 海豬 製造--ê。是藍色星雲中心彼粒，能量懸甲通人知 ê Wolf-Rayet 星 製造--ê。Wolf-Rayet 星 ê 質量一般講--來是超過 20 倍 太陽質量，伊會歕出速度足緊 ê 粒子風，做出這个 外形 足出名 ê 星雲。像這張影像內底這个恆星氣泡，大細是超過 60 光年闊，年歲有 7 萬歲矣，看起來敢若是海豬仔 ê 頭。伊 ê 編號是 Sh2-308，嘛叫做 海豬仔頭星雲。這粒氣體球離咱有 5000 光年遠，tī 天頂看--起來是 kah 規粒月娘 差不多大，是講伊較暗。這張 影像 倒爿紅色色調 ê 星雲，可能是 ùi 仝這粒 Wolf-Rayet 星 發射出來--ê 能量較懸 ê 輻射光 kā 激發、創出這个外形--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230329/ 影像：Aleix Roig (AstroCatInfo) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230329.html Powered by Firstory Hosting

球形星團 半人馬座 ω，嘛叫做 NGC 5139，離咱有 1 萬 5000 光年遠。這个星團中央直徑 150 光年 ê 範圍內，有 1000 萬粒比太陽較老 ê 恆星。這是 tī 咱銀河系銀暈內 已經知影 ê 200 團 球形星團 中，上大上光--ê。雖罔講大部份星團內底 ê 恆星攏有仝款 ê 年歲 kah 成份，毋過這个神祕 ê 半人馬座 ω 煞有 無仝款 年歲 kah 無仝款化學成份 ê 恆星組成。實際上，半人馬座 ω 有可能是 一个較細 ê 星系 kah 咱銀河系合併了後 ê 殘骸。Tī 這張 遮爾清楚 ê 望遠鏡彩色相片 內底，咱會使足簡單就揣著半人馬座 ω 內底 黃色色調 ê 紅巨星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230316/ 影像：Neil Corke, Heaven’s Mirror Observatory 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230316.html Powered by Firstory Hosting

3 月 23 ê 暗頭仔，觀星者 會當看著金星 kah 月眉，攏 tī 西爿地平線附近出現。Tī 這工，地球天頂足光 ê 暗頭仔星、月球無照著日光 ê 暗暝彼爿、月球有照著日光 ê 薄月眉彼爿、kah 前景 意大利 Dolomiti 山 Danta di Cadore 市 ê 教堂鐘塔，攏做伙出現 tī 這張長焦鏡頭翕--ê 天景內。是講月娘表面 咧 微微仔發光 ê 部份，其實是 地球反照光，就是反射日光 ê 地光，照 tī 月球暗暝彼爿。這个現象 500 冬前就捌予 Leonardo da Vinci 紀錄 loài。伊寫講，地球反照光是地球海洋 反射日光，kā 月娘較暗彼爿照予光。Tī 3 月 24 這工，地球 一寡所在 會當看著月掩金星，就是月球 ùi 金星頭前行過，kā 金星閘牢。這暗 tī 地球 天頂，閣會當看著 頂月眉出現 tī 昴宿星團附近。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230325/ 影像：Giorgia Hofer 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230325.html Powered by Firstory Hosting

匈牙利天文學家 Krisztián Sárneczky對天頂搜揣 近地天體 ê 時陣，tī 2023 年 2 月 12 世界時 UTC 20:18:07 ê 時陣，頭一擺翕著這粒這馬 編做 2023 CX1，大細差不多一公尺左右 ê 太空石頭。 這張差不多是 伊欲挵著地球大氣層 ê 7 點鐘前翕–ê。 科學家預測伊挵地球 ê 路線，對流星觀測家來講是一个足罕得看著 ê 機會。 這个臨時決定 ê 攝影計畫，是 tī 荷蘭翕–ê，結果就翕出 這張壯觀 ê 火流星影像。 落尾這粒編做 2023 CX1 ê 太空石頭，tī 法國北部天頂 蒸發、碎–去。 愛注意 ê 是，這是 Sárneczky 第二擺揣著 這款欲挵地球 ê 小行星。 是講，太空石頭 2023 CX1 是第七粒 科學家 tī 伊挵著地球 進前就揣著 ê 小行星。 這嘛是 最近有 tī 地表揣著隕石 ê 第三粒天體。 這粒火流星 kah 進前彼个歹名聲 ê Chelyabinsk 流星爍，時間上是 差欲 10 冬。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230217/ 影像：Gijs de Reijke 音樂：P!SCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap230217.html Powered by Firstory Hosting

因為有強烈太陽爍光 ê 報告，才會開始這个 7 點鐘久 ê 北極探險。這个探險 ê 目的，是欲翕 前景 ê 現代紀念碑 kah 背景 ê 滿天 極光。這个 tī 冰島 北部 Raufarhöfn 庄 ê 地標，就是 北極岩石陣。伊 ê 岩尖已經 kah 天星 ê 方位對予好勢矣。有一寡仔是 ùi 一爿看，會對綴正北去，ùi 另外一爿看，就會對綴正南去。這張相片是頂個月底日落了後翕--ê。翕相 ê 方向是向南，毋過因為組合起來 ê 影像範圍包含足大片 ê 天空，所以 北極星 才會出現 tī 相片上頂懸彼位。咱嘛會當看著咱熟似 ê 星座，親像是 倒爿 ê 大隻熊星座（大熊座），kah 正爿下跤 ê 拍獵--ê 星座（獵戶座）。這擺 ê 探險有成功。夜空出現 戲劇性 ê 色光，kā 天頂照予光。這个足光、hŏng 足難忘 ê 極光，是閃閃爍爍、五花十色。這寡色有：紅色、粉紅仔色、黃色、kah 青色，有當時仔一擺會同齊出現幾若色。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230327/ 影像：Cari Letelier 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230327.html Powered by Firstory Hosting

行星形星雲 Jones-Emberson 1 是欲死 ê 類太陽恆星 ê 殮布。伊 kah 地球 ê 距離是差 1600 光年，tī 目睭足利 ê 天貓座遐。恆星核心先是進行水素 ê 核融合反應，煞落來是日素 ê 核融合反應。幾若十億年了後，這寡元素攏燒了矣。這時，這粒欲死 ê 恆星 ê 大氣，去予 hiù tùi 星際空間去。這个脹大 ê 殘骸差不多有 4 光年闊。咱會使看著行星形星雲 ê 中心遐，是恆星核燒賰 ê 部份，是一粒藍色高溫 ê 白矮星。這个星雲嘛叫做 PK 164 +31.1，伊足暗--ê，用望遠鏡 ê 目鏡是足歹影著。毋過這張 深空 ê 闊頻影像 是 kā 22 點鐘久 ê 感光疊做一張--ê，所以確實會當看著足足足清楚 ê 細節。Tī 這个清楚 ê 視野內底，有咱銀河系內 ê 恆星，kah 散佈 tī 宇宙 ê 背景星系。行星形星雲 Jones-Emberson 1 tī 這个宇宙舞台頂懸 ê 時間，是 足短--ê。伊會 tī 紲落來幾若千年 ê 時間內，沓沓仔消失。毋過中心彼粒高溫 ê 白矮星，愛等幾若 十億 年 ê 時間才會變冷--去。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230224/ 影像：Serge Brunier, Jean-François Bax, David Vernet, C2PU/OCA 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap230224.html Powered by Firstory Hosting

北天夜空 進前上衝 ê 主角 彗星 C/2022E3 (ZTF 彗星)，這馬已經 愈來愈暗 矣。二月初 是 ZTF 彗星 kah 咱地球 距離上倚 ê 時陣，彼馬 ê 距離才 2.3 光分遠爾爾。這位 ùi 外太陽系 ê Oort 雲 來--ê 人客，去 hŏng 叫做青色彗星。伊這馬離咱是 13.3 光分遠。這張 kā 幾若張感光相片組合起來 ê 深空影像是 3 月 21 翕--ê。咱看這粒彗星猶有闊幅 ê 白色彗尾 kah 彎曲 ê 青色彗鬚。ZTF 彗星 tī 天頂 kah 獵戶座 上光彼粒星 參宿七 ê 視距離，毋是蓋遠。這張影像 ê 視野範圍內，有 ZTF 彗星、較暗閣厚塗粉 ê 星雲、kah 遙遠 ê 背景星系。這張用長焦鏡頭向 波江座 方向 翕--ê 景色內底，密密攏是銀河系 ê 恆星。ZTF 彗鬚愈飛向內太陽系，伊踅太陽 ê 軌道就愈受著木星重力 ê 影響。按呢可能會予彗星離開了後，就 袂閣轉來矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230324/ 影像：Rolando Ligustri 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230324.html Powered by Firstory Hosting

Kā 你 ê 3D 目鏡囥踮 Bennu 小行星 (嘛叫做 小行星 101955) 頂懸看。這粒太陽系內底 ê 小世界 差不多 kah 紐約帝國大樓 平大 (比 500 公尺較細)。伊 ê 外形就親像一粒干樂仔，地表是粗粗缺缺，頂懸攏是 岩石。這幅圖是 2018 年 12 月 3 號這工，OSIRIS_REx 太空船 tī 80 公里遠 ê 所在 翕--ê。欲建構這幅 3D 立體圖，是愛用太空船頂懸 ê PolyCam 相機翕才有法度。OSIRIS_REx 太空船載小行星 岩石表面 提著 ê 標本，tī 2021 年 5 月 離開 Bennu 小行星，這馬 tī 轉來地球 ê 路--lih。機器人太空船按算欲 tī 今年 9 月轉來到咱 ê 地球。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230311/ 影像來源：NASA, GSFC, U. Arizona 立體影像版權：Patrick Vantuyne 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230311.html Powered by Firstory Hosting

咱會當 tī 北天 ê 大熊座 方向揣著捲螺仔星系 NGC 2841，伊是 夜空 中算袂䆀揣 ê 天體，離咱才 4600 萬光年遠爾爾。這張 清楚相片中央 有一个華麗 ê 島宇宙。前景 ê 光針，其實是銀河系內底 ê 恆星，kah 背景遙遠 ê 星系，做伙出現 tī 仝一个望遠鏡景色內底。NGC 2841 有一个光 iàⁿ-iàⁿ ê 星系核，坦敧 ê 星系盤，kah 暗淡 ê 外部區域。星系內底 花貓貓、踅 絚絚 ê 捲螺仔手骨 頂懸，有塗粉帶、較細區 ê 恆星形成區、kah 少年星團。相對來講，大部份其他捲螺仔星系 ê 捲螺仔手骨攏較闊、較散，嘛有較大區 ê 恆星形成區。NGC 2841 ê 直徑超過 15 萬 光年，比咱銀河系閣較大。X 光影像 表示講，巨星 ê 大尺度噴流 kah 恆星爆炸產生 ê 高溫氣體雲煙，會湠到 NGC 2841 ê 星系暈去。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230323/ 影像：Roberto Marinoni 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230323.html Powered by Firstory Hosting

你 ê 目睭敢有好甲會當看著毛蟹星雲咧脹大？毛蟹星雲 ê 編號是 M1，伊是彼个有名 ê Charles Messier's 星表 頭一个天體。這个星表內底 ê 天體，無一粒是彗星。實際上，咱這馬知影 毛蟹星雲 是一个 超新星殘骸，是懸質量恆星爆炸了後產生 ê 脹大星雲內底 ê 雲屑仔。這个 激烈出世 ê 毛蟹星雲，tī 1054 年 ê 時陣有 去予天文學家觀測著。這个星雲這馬差不多有 10 光年 闊，毋過伊猶閣繼續咧 脹大。這个脹大 ê 速度，一秒鐘有超過 1000 公里。過去這 10 冬 ê 脹大狀況，就紀錄 tī 這支 予人讚嘆 ê 縮時攝影影片 內底。Ùi 2008 年 到 2022 年之間，澳洲 ê 遙控天文台 逐年攏用 仝一台望遠鏡、仝一台 kha-mé-lah tùi 這个天體翕一張相片。咱會當 tī 這張處理過--ê 清楚影像 看著 踅 中心彼粒 自旋速度足緊 ê 脈動星 邊仔 ê 動態高能 發射光。毛蟹星雲 離咱有 6500 光年遠，就 tī 牛犅星座，金牛座 遐。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230320/ 影像：Detlef Hartmann 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230320.html Powered by Firstory Hosting

這張 清楚 ê 紅外線景色 是高溫明亮 ê Wolf-Rayet 星 124 強烈 ê 恆星風 驅動、推捒四箍圍仔 ê 氣體 kah 塗粉。這个引人注目 ê 六指光尖 ê 圖樣，其實是對應到恆星 ê 影像。會生做這形是因為 James Webb 太空望遠鏡 是 ùi 18 塊六角形鏡組成--ê。WR 124 離咱差不多 1 萬 5000 光年遠，就 tī 北方 ê 天箭座遐。伊 ê 質量是有超過 30 倍 ê 太陽質量。這个恆星 ê 掣流 星雲差不多有 6 光年闊，是 tī 咱銀河系內底揣會著 ê 一款 tī 懸質量恆星演化 過程一个較短嘛較罕得看--著 ê 階段。這暗示講，WR 124 隨會以超新星爆炸 ê 方式，結束恆星 ê 性命。超新星爆炸留--落來 ê 厚塗粉星際殘骸，是 tī 脹大 ê 星雲內底 形成--ê。這 會影響著 後一个世代 ê 恆星形成。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230318/ 影像：NASA, ESA, CSA, STScI, Webb ERO Production Team 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230318.html Powered by Firstory Hosting

這个看起來有編織花樣 kah 蛇紋 ê 發光氣體雲絲，予伊得著這个足紅 ê 名：Medusa 星雲。伊嘛予人號做 Abell 21。這个 Medusa 星雲是一个足老 ê 行星形星雲。伊 to̍h tī 雙生仔座方向，離咱有 1500 光年遠。Kah 神話 內底 ê 名仝款，這个星雲嘛有一个戲劇性 ê 轉變。伊現此時 ê 行星形星雲，其實是像太陽這款低質量恆星 演化 到上尾 ê 階段，已經 ùi 紅巨星 轉變做燒滾滾 ê 白矮星矣。Tī 這个過程中，白矮星會 kā 伊 ê 外層氣體幌掉。高溫恆星發出 ê 紫外光 輻射，會 kā 星雲照予光。Tī 發光 ê 月眉形氣體中央彼粒無蓋光 ê 天體，to̍h 是 Medusa 星雲演化尾期 ê 恆星。Tī 這張深空 ê 望遠鏡景色 內底，較暗 ê 雲絲嘛翕甲真清楚。這寡雲絲 to̍h 湠到較光彼个月眉形氣體 ê 正爿 kah 下底去。照估計，Medusa 星雲應該有超過 4 光年大。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230317/ 影像：Martin Bradley Chesterfield Astronomical Society 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230317.html Powered by Firstory Hosting

這个天景真適合提來介紹予囡仔知影。這個月初，夜空中上光 ê 兩粒行星，木星 kah 金星，行到 合相 ê 位置。這 兩粒行星 行上倚 ê 時陣，tī 天頂 ê 角距離才一粒 月娘 大爾爾。這个 奇景 發生 tī 日落了後無偌久，毋管你是 tī 地球 佗位攏有法度翕著。這張 影像 是兩粒行星 tī 天頂行到上倚 ê 時陣 tī 德國 Wiltingen 翕--ê，而且閣有翕著天文攝影師 in 某 kah 伊兩个囝。是講 kah 木星比起來，金星 其實是較倚 太陽 kah 地球。咱 tī 地球看著金星 kah 木星相倚，只是視覺上 角度 ê 關係。木星 kah 金星 tī 天頂上倚 ê 時陣已經過矣，這馬 in 兩粒是愈來愈遠矣。毋過像這款 行星合相 ê 機會 猶閣會出現。比論講，閣過幾若個月，火星 kah 金星 會 tī 日落了後做伙出現 tī 天頂仝一个方位。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230315/ 影像：Michael Luy (Trier Observatory) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230315.html Powered by Firstory Hosting

虹 ê 尾溜有啥物？每一个人攏有無仝款 ê 答案。若是對欲翕這張相片 ê 攝影師來講，虹 ê 尾溜 是有一欉樹仔。毋過 tī 附近 ê 人，會看著 虹 ê 尾溜是 tī 別位。這是因為 虹 ê 位置 kah 觀測者 ê 角度有關係。虹 ê 中心總--是出現 tī 日頭 相對面 ê 地平線附近。毋過 tī 無仝所在看--著 ê 中心，實際上會對應到無仝所在 ê 地平線。這个 虹弧 暗示講，伊 ê 中心應該是 tī 倒爿 40 度 遠 ê 所在，而且 tī 地平線下底一屑屑仔 ê 所在。這个時陣 ê 日頭 是 tī kha-mé-lah 後壁，tī 地平線頂懸一屑屑仔 ê 所在。Tī 虹 ê 方向，因為 遠方風暴 內底 ê 雨滴 kā 日光 反射、屈折 去，才會產生 七彩 ê 光帶。這張孤張感光相片 是一月初 tī 美國 加州aaaa Knight's Ferry 區附近翕--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230313/ 影像：Eric Houck 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230313.html Powered by Firstory Hosting

塗粉敢會是媠--ê？當然！而且 in 閣足有路用--ê。金牛座分子雲 內底有幾若粒足光 ê 恆星，毋過內底 ê 烏暗塗粉 是閣較 吸引人注意。這寡四湠 ê 塗粉 有波湧 kah 波紋，予這幅媠圖內底敢若有幾若隻 塗粉 兔仔。毋過閣較重要 ê 是，in 代表講這區 ê 星際間氣體 是厚甲會產生 重力收縮，形成恆星。這張相片 ê 中心有較淺色 ê 星雲，是去予厝邊恆星照予光--ê。這毋但是一个有名 ê 星雲 in 兜，嘛是有名 ê 少年懸質量恆星 in 兜。恆星、T Tauri 星、星雲、kah Hind 變光星雲 ê 光度變化攏足大--ê。毋過 in ê 光度變化無一定發生 tī 仝一个時間，所以這區才會遮爾神祕遮爾趣味。T Tauri 星 kah 類似 ê 恆星 攏去予天文學家 當做 類太陽 恆星。In 較少年，無到幾若百萬歲遐爾老，猶 tī lih 恆星 形成 ê 早期階段。這張相片差不多有 4 度 闊，內底 ê 天體離 昴宿 星團無蓋遠，相片內底 ê 塗粉區離咱有 400 光年 遠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230321/ 影像：Vikas Chander 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230321.html Powered by Firstory Hosting

土衛七 Hyperion 頂懸彼个奇怪 ê 隕石坑下底有啥物？為著欲揣出這个答案，過去踅 土星 ê Cassini 機器人太空船 捌 飛倚到 這个看--起來敢若 海綿材質 ê 衛星 附近，才會翕著 這个空前 ê 細節相片。這張 是 Cassini 太空船 2005 年飛過 土衛七 Hyperion 彼陣翕--ê，是 ùi 六張相片鬥--出來 ê 拼鬥影像。咱看會著一个足精彩 ê 世界，內底有奇怪 ê 隕石坑 kah 古老 ê 類海綿地表。Tī 大部份隕石坑底部，攏有一款 咱無啥了解 ê 豬肝紅物質。這款物質看--起來 kah 崁 tī 土衛八 Iapetus 表面 ê 物質相 siâng。而且等伊 吸收溫暖 ê 日光 了後，這寡物質可能就會沉入去這粒 冰衛星 下底。土衛七 Hyperion 差不多有 250 公里闊，伊 ê 自轉足亂--ê，而且伊 ê 密度足低--ê，所以伊 內底可能有 一个足大 ê 岩洞 系統。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230312/ 影像：NASA, ESA, JPL, SSI, Cassini Imaging Team 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230312.html Powered by Firstory Hosting

Aethopia 女王 ê 靈魂內底當咧形成恆星。講較詳細咧，咱會當 tī 仙后座 方向揣著一个叫做 靈魂星雲 ê 大型恆星形成區。遮講--著 ê 仙后是希臘神話內底，tī 古早時代統治 尼羅河水頭 地區 ê 國王 in 兜彼个虛華 ê 某。靈魂星雲 嘛叫做 Westerhout 5 (W5)，伊內底有幾若个開放 星團、去予宇宙 塗粉 閘暗--去 ê 雲脊 kah 雲柱、kah 少年大質量 恆星 ê 恆星風 吹--出來 ê 大型氣泡。靈魂星雲 就 tī 6500 光年 遠 ê 所在，大細差不多有 100 光年闊，定定 kah 伊 ê 厝邊 天體 心臟星雲 (IC 1805) 做伙翕。這張影像 是無仝色光感光 ê 合成影像：紅色是 水素 氣體 ê 發射光、黃色是 硫磺 氣體 ê 發射光、藍色是 酸素 氣體 ê 發射光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230314/ 影像：José Jiménez (Astromet) 音樂：P!SCO - 鼎鼎 聲優：草莓大福 翻譯：An-Li Tsai (NCU) 原文：https://apod.nasa.gov/apod/ap230314.html Powered by Firstory Hosting

DART (雙小行星改道實驗) 太空船是咱地球 頭一个行星防衛 測驗任務。伊 tī 2022 年 9 月 26 翕著這張 小行星衛星 雙衛一 Dimorphos ê 特寫相片。3 秒鐘後，伊就 挵著 雙衛一 Dimorphos ê 表面矣。Tī 兩塊大岩石中央 畫予你看 ê 太空船外形 kah 兩塊長長 ê 太陽能枋，就是太空船按算欲挵 ê 所在。較大彼粒岩石差不多有 6 公尺半遐爾大。DART 太空船有 570 公斤重。照估計，雙衛一 Dimorphos 應該嘛有 50 億公斤遐爾重，伊是近地雙小行星系統內底較細粒彼粒。太空船 利用動能直接挵 雙衛一 Dimorphos 了後，咱會當量著伊本底踅伊較大彼粒星伴 小行星 65803 雙生星 Didymos ê 速度改變幾若葩。Kā 本底 12 點鐘 ê 軌道週期 減了 33 分鐘。這个行星尺度 ê 相挵實驗 有成功，毋但 改變小行星軌道、阻止伊去挵著地球，閣 kā 這粒 150 公尺大細 ê 雙衛一 Dimorphos 挵出 類彗星 ê 物質尾溜。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230309/ 影像：NASA, Johns Hopkins APL, DART 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230309.html Powered by Firstory Hosting

暗淡 ê 恆星是攏走 tùi 佗位去矣？Tī 地球 足濟所在，包括大城市，已經是看袂著夜空內 幾若千粒恆星 ê 迷人景色 矣。這馬干焦看會著霧霧 ê 光 kah 一寡恆星爾爾。這張地圖 是標示 地球表面 ê 相對 光害強度。造成光害 ê 原因是人造光反射大氣內底 ê 分子 kah 煙霧質。咱來看一寡例，親像講，美國 東岸 kah 歐洲 西岸 有一寡所在標--ê 色是紅色--ê。這寡 人造光 tī 暗暝照--出來 ê 光，是天頂自然光 ê 10 倍以上。圖內底若是標做柑仔色抑是紅色 ê 所在，遐 ê 人就 看袂著 咱銀河系 ê 中央帶。所以 國際暗空協會 建議咱使用 較袂產生遐爾強 光害 ê 固定式通用照光設備。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230308/ 影像資料：JPSS Satellites 影像處理：David J. Lorenz 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230308.html Powered by Firstory Hosting

這个敢是 捲螺仔星系？毋是呢！實際上，這个是 大麥哲倫星雲 (LMC)，是咱 銀河系 上大 ê 衛星星系。LMC 去予 分類 做 不規則矮星系，因為伊 看起來花 kô-kô、鬍 sap-sap。毋過這張深空闊幅相片，有 kā 這規个 LMC 翕予清楚。這張長時間感光相片予人感覺意外 ê 是，LMC 看起來較成一个 棍螺仔星系。大麥哲倫星雲 是 tī 18 萬 光年 遠 ê 所在，就 tī 旗魚 星座 (劍魚座) 遐。LMC ê 大細差不多是 1 萬 5000 光年大。是近代 上光 上近 ê 超新星 SN1987A in 兜。咱若是 tī 地球南半球，會使直接用目睭 看著 LMC kah 小麥哲倫星雲 (SMC)。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230307/ 影像：Yuri Beletsky (Carnegie Las Campanas Observatory, TWAN) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230307.html Powered by Firstory Hosting

咱會使 tī 有大頭 ê 白羊座 邊界內底 揣著這个 特殊 ê 捲螺仔星系 Arp 78。這个島宇宙是足大--ê，有 20 萬光年大，離咱銀河系內底 ê 恆星 kah 星雲 有 1 億光年遐爾遠。伊嘛叫做 NGC 772，tī 這張有清楚細節 ê 宇宙肖像 內底，有翕著足明顯 ê 外捲螺仔手骨。Arp 78 發展過分 ê 捲螺仔手骨是去予星系尺度 ê 引潮力 激--出來--ê，咱會當 綴 塗粉帶 kah 藍色少年星團 ê 方向看著。這可能是 kah 大捲螺仔手骨正爿頂懸彼粒 較實密 ê NGC 770 產生交互作用 造成 ê 結果。望遠鏡 ê 深空影像內底，有微弱 ê 恆星流，霧霧 ê NGC 770 就 藏 tī 遐。前景 ê 光尖，是銀河內底 ê 恆星。黃色 色調 ê 銀河，就 kah 長株圓 ê NGC 770 形成對比。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230223/ 影像：Josep Drudis 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap230223.html Powered by Firstory Hosting

這 tī 地球逐位攏看會著。2012 年 ê 金木合相，毋管你蹛 tī 地球佗位，日落了後攏看會著。毋管你 tī 地球佗位，只要西爿地平線彼搭 ê 天氣袂䆀，你就看會著這个現象。這張 2012 年翕--ê 相片，是一个有創意 ê 攝影師 tī 波蘭 旅行 ê 時陣，行到離 Szubin 鎮 ê 燈火較遠 ê 所在，欲翕 兩粒行星 合相 ê 相片。因為這兩粒 遮爾光 ê 行星 tī 天頂 ê 視距離才 3 度遠 爾爾，所以伊 ê 查某囝煞激出這个 趣味 ê 動作 來。背景是 日落 ê 暗淡紅光。這個月日落了後，木星 kah 金星 會 閣出現金木合相 ê 現象。差不多一禮拜前，in 兩粒 tī 天頂 ê 視距離 是 比 1 度閣較近。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230306/ 影像：Marek Nikodem (PPSAE) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230306.html Powered by Firstory Hosting

天頂彼兩个光點是啥物？是行星啦！幾若工前，這兩粒 tī 夜空 上光 ê 行星，tī 天頂才拄行到無到 1 度遠 ê 距離，這就是咱講 ê 合相。 全世界攏會使 tī 日落無偌久看著這个現象。這兩个光點就是 木星 (倒爿彼粒) kah 金星 (正爿彼粒)。這張相片 是 金木合相前後 tī 意大利 Sicily 島 ê Cirica 海邊仔翕--ê。翕相 ê 前一禮拜，金星 tī 日落 彼陣 tī 天頂是愈來愈懸，去拄著欲落去 ê 木星。毋過這馬 in 已經 換位 矣。是講，kah 木星比--起來，金星 是離 太陽、嘛離 地球 kah 近。所以咱看 金星 kah 木星 tī 天頂 ê 視距離，其實是 角度上 ê 距離。這個月，你猶是會當 tī 日落了後一點鐘左右 ê 時間，看著 這兩粒熱門天體。毋過 in 會愈行愈遠，木星 逐暗嘛會愈來愈早落去。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230305/ 影像：Giovanni Tumino 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230305.html Powered by Firstory Hosting

最近 ê 金星 kah 木星 可能會引起你 ê 注意。這段日子 ê 暗頭仔，天氣若是袂䆀，咱 無可能無注意著 天頂有兩粒足金 ê 行星，已經行到 大合相 ê 位置。這組相片是 ùi 二月 21 到三月 2 號，tī 印度 Dhanbad 市 翕--ê 。相片照時間排，是 ùi 倒爿到正爿。木星是頂懸彼粒，這兩粒 ê 合相，是逐工攏有紀錄落來。這組相片是向西爿地平線附近翕--ê。逐格 ê 暗頭仔天色 kah 感光時間，是照當地日落 ê 狀況決定--ê。二月 22 這工，月眉 嘛來 kah 木星、金星鬥陣。三月 2 號 這工，這兩粒行星 tī 天頂 ê 角距離才一粒月娘 ê 闊度爾爾。是講這工，這兩粒 踅太陽行 ê 行星，實際上 ê 距離是 6 億公里遐爾遠。紲落來幾若工，木星會沓沓仔行到日落 ê 日光內底，去予日光食--去。毋過金星會繼續 tī 西爿天頂，kah 太陽是愈行愈遠，所以伊猶原是 暗頭仔天頂上光 ê 一粒星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230304/ 影像：Soumyadeep Mukherjee 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230304.html Powered by Firstory Hosting

咱 ê 日頭這馬是愈來愈無閒矣。兩冬前，太陽猶 tī 太陽極小期 ê 時陣，是幾若 個月 攏 揣無 一粒 太陽烏子。相對來講，今年太陽活動 ê 時間表是行傷緊矣。這馬 ê 太陽 傷活潑，已經來到 10 冬前 太陽活動 ê 極大期 矣。兩禮拜前，咱有翕著 活動力愈來愈強 ê 太陽 足濟 趣味 ê 特徵。這張影像 是紀錄孤色光 H-α 倒反色 ê 假色圖。太陽 ê 表面，大部份攏去予 光針體 崁牢矣。太陽邊界較光，是因為 溫度較低 ê 太陽大氣 ê 吸收線 變較濟 造成--ê。這个現象就叫做 邊界變暗效應。太陽盤外口 有幾若个較光 ê、噴懸 ê 日珥。日珥就是太陽表面 ê 氣體絲，tī 圖頂較光 ê 彼寡條紋。磁力交纏 ê 太陽活跳區，有 ê 所在是較暗，有 ê 所在是較光，這內底閣有較低溫 ê 太陽烏子。紲落來幾若年，咱 ê 太陽活動會來到太陽極大期，太陽磁場 ê 交纏現象 嘛會愈來愈濟。毋過 太陽 ê 活動力 是毋是會繼續增加，咱就毋知矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230222/ 影像：Mehmet Ergün 音樂：P!SCO - 鼎鼎 聲優：阿綠 翻譯：An-Li Tsai (NCU) 原文：https://apod.nasa.gov/apod/ap230222.html Powered by Firstory Hosting

是啥毋原因，予這粒衛星 看起來敢若是一粒核桃？咱會使 tī 這張相片較倚下底 ê 部份，看著一輾奇怪 ê 山龍 踅 tī 土星 ê 衛星，土衛八 Iapetus ê 赤道頂懸。所以這粒衛星，才會看起來 敢若是 逐家攏 足愛食 ê 美國塗豆。咱到今猶毋知 這條山龍 ê 來源，毋過有幾若个假說咧解說這个現象。一个是講，這是 ùi 地下 chu̍t 出來 ê 冰。另外嘛有講，這是踅衛星 ê 環落落來 ê 結果。閣有講，這是 10 億年前衛星形成留落來 ê 結構。閣有一項奇怪 ê 代誌是，土衛八 Iapetus 有一半較烏，所以咱若是 ùi 地球看，會 giōng 欲看無。毋過 另外一半 相對來講，就足光--ê。是講，觀測 著--ê 地形烏暗度 會遮爾齊勻，實在是足奇怪 ê 代誌。有可能是最近才有一重深色 ê 地皮崁 tī 較古老、滿面隕石坑 ê 地表頂懸。落尾欲看 ê 是，土衛八 Iapetus 頂懸有幾若个較大 ê 衝擊盆地。尤其是相片中央彼个 400 公里闊 ê 隕石坑。咱看會著外沿有 足深 ê 山崁，予坑仔墘 kah 坑底有明顯 ê 懸低差。這張相片 是 踅土星 ê Cassini 太空船 tī 2004 年底 飛過土衛八 Iapetus ê 時陣翕--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230226/ 影像：NASA, ESA, JPL, SSI, Cassini Imaging Team 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230226.html Powered by Firstory Hosting

芬蘭 ê Kilpisjärvi 庄 天頂，是規片活跳跳、光 iàⁿ-iàⁿ、輕 báng-báng ê 七彩 虹波。In 就 叫做 真珠雲 抑是 珠母雲，實在是真罕得看著。這个只要看過一擺就 永遠會記得--ê 景色，是 1 月 24 tī 北緯 69 度 日頭落山彼陣，向南 ê 方向翕著--ê。這是一款 極地平流層雲，愛 tī 無啥毋雲 ê 低層平流層 內底，等溫度低甲會產生冰晶 ê 時陣，才會形成這款雲。就算是日頭已經落山，只要天色猶未變暗，tī 海拔 15 到 25 公里懸 ê 雲，猶是會因為日光 ê 繞射效應 去予照甲發光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230209/ 影像：Dennis Lehtonen 音樂：P!SCO - 鼎鼎 聲優：草莓大福 翻譯：An-Li Tsai (NCU) 原文：https://apod.nasa.gov/apod/ap230209.html Powered by Firstory Hosting

這粒衛星是去予伊 ê 母行星 照予光--ê。講較詳細咧，相片內底 這粒土衛二 Enceladus 發光 ê 部份，主要是去予 土星 反射日光 ê 土星光 kā 照予光--ê。所以這粒平常時 白雪雪 ê 衛星，這馬變做金爍爍，就是 ùi 土星雲頂 ê 色光照過來--ê。這張相片主要 ê 光源是 ùi 倒爿來--ê，所以 這寡像迷宮 ê 山龍產生 ê 深色烏影，就出現 tī 相片中央倚正爿遐。倚下底彼个明顯 ê 烏影，是公里深 ê 山谷 Labtayt Sulci。干焦上正爿 leh 發光 ê 薄月眉，是 土衛二 Enceladus 直接去予太陽照予光--ê。這張相片 是 2011 年 Cassini 機器人太空船 駛倚這粒 神祕 衛星 ê 時陣翕--ê。咱若是檢查這張清楚 ê 數位影像，就會 tī 倒爿下跤揣著 冰晶煙，這可能是 ùi 地下海洋 噴出來--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230205/ 影像：NASA; ESA, JPL, Cassini Imaging Team, SSI 疊色：Gordan Ugarkovic 音樂：P!SCO - 鼎鼎 聲優：草莓大福 翻譯：An-Li Tsai (NCU) 原文：https://apod.nasa.gov/apod/ap230205.html Powered by Firstory Hosting