NASA 逐工一幅天文圖 APOD Taigi

Gum 星雲是離咱上倚 ê 超新星殘骸，因為伊傷倚矣，所以伊真歹得看著。因為這个 暗暗 ê 星雲佇天頂有 40 度 遐爾闊，所以佮較光較複雜 ê 背景相比，伊就較會去 hŏng 無注意著。這張 5 月底翕 ê 孤張感光闊幅相片內底，上明顯 ê 就是正爿彼个發出紅光發射線 ê Gum 星雲。咱 tī 相片內底有看著前景 ê 智利 Atacama 沙漠，tī 咱 銀河 盤、ùi 倒爿頂懸行 tùi 對角去 ê 船底座星雲，kah 厝邊星系 大麥哲輪星雲。Gum 星雲 足近 ê，所以咱會當量著伊頭前這爿 kah 咱 ê 距離是 450 光年 遠，後壁彼爿 kah 咱 ê 距離是 1500 光年遠。這个 複雜 ê 星雲 就 tī 船尾 座 kah 船帆 座 遐。較奇怪 ê 是，Gum 星雲 猶有足濟咱毋知影 ê 代誌，比論講是當時？有偌濟 超新星爆炸？才會形成這个星雲。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221129/ 影像：Victor Lima 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221129.html Powered by Firstory Hosting

後一粒流星會佇當時出現？就算是拄著流星雨 ê 時陣，咱嘛無一定會知。所以，享受 流星雨 上好 ê 方式，是揣一个四序 ê 所在好好仔坐咧，觀賞這个夜空電影。而且你會當 kah 朋友分享這个經驗，逐家攏會足歡喜--ê。這張相片是佇 中國 海南島 看 tùi 南中國海，內底 ê 流星雨是 2022 年 ê 獅仔座流星雨。流星出現上濟 ê 時陣，就是佇這個月。相片內底 ê 流星軌跡是連紲翕幾若點鐘了後，才疊佇較早進前翕 ê 背景影像頂懸。佇這个地點佮時間，咱會當 ùi 獅仔座流星雨 ê 流星軌跡，揣出 in 是 ùi 獅仔座 來--ê。毋過咱嘛會當看著這寡軌跡嘛迒過 其他星座，嘛包括 獵戶座。相片頂懸彼粒紅紅上光 ê 行星是 火星。相片內底這兩位流星雨愛好者，因為對天文 ê 愛 結婚矣。In 佇這個月慶祝 in ê 仝一工生日。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221128/ 影像：Luo Hongyang 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221128.html Powered by Firstory Hosting

土星佇咱地球 ê 暗暝 猶是遮爾光。這粒遙遠 ê 氣態巨行星 佮 美麗 ê 土星環，予伊佇望遠鏡景色下底，成做 天星宴會 ê 焦點。這个予人讚嘆 ê 土星環 佮 土星暗暝，是無可能出現 佇 倚太陽這爿 ê 望遠鏡景色內底，愛到外行星彼爿才有法度。望遠鏡干焦會當 看著土星 ê 日時。實際上，這張相片是 Cassini 太空船翕--ê。有翕著去予日光照著 ê 月眉相 ê 土星，嘛有翕著 土星暗暝這爿 ê 烏影，投影佇複雜 ê 土星環系統頂懸。Ùi 地球出去 ê 機器人太空船 Cassini，以土星為家，已經踅土星 13 冬矣。伊佇 2017 年 9 月 15 彼工，飛入去這粒氣態巨行星 ê 大氣層內底。這張壯麗 ê 拼鬥影像 是 Cassini 太空船 ê 闊幅 kha-mé-lah 翕--ê，時間點是伊欲進行 上尾一擺飛入去土星軌道內底 ê 任務 ê 2 工前。咱無法度閣看著土星 ê 暗暝，除非地球閣送 另外一台太空船--過來。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221126/ 影像：NASA, JPL-Caltech, Space Science Institute, Mindaugas Macijauskas 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221126.html Powered by Firstory Hosting

真少星團會 chhāi 遮爾倚。這是咱 tī 夜空 用目睭就有通直接看著 ê 天體，tī 西元前 130 年 彼陣去予 希臘天文學家 Hipparchus 編 tī 星表內底。這組 開放星團 離咱有 7000 光年遠，嘛是用雙筒千里鏡就有通看著 ê 目標。In 是希臘神話內底 ê 英雄星座，tī 北天 一个 引人注目 ê 星場，英仙座 內底。這兩个星團咱這馬 kā 叫做 英仙座 h kah χ，嘛會當叫做 NGC 869（正爿頂懸彼个） kah NGC 884。In 兩个 ê 距離干焦幾若百 光年 遠，內底有足濟比 太陽 閣較少年、閣較燒 ê 恆星。這兩个 星團 ê 年歲，照 in ê 成員星來估算，嘛差不多老。毋但按呢，in 兩个 ê 距離嘛有相倚。這表示講，這兩个 星團 應該是 ùi 仝一个 恆星形成區 生出來--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221122/ 影像：Tommy Lease 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221122.html Powered by Firstory Hosting

這張 太空速翕相片 內底，有 80 億人 giōng 欲無去矣！這是 11 月 21 翕--ê，是 Artemis 1 號任務 ê 第 6 工。這張相片是獵戶座太空船飛出去 ê 時陣，伊 ê 外部 kha-mé-lah 翕 ê，咱會當看著地球 tī 月娘外沿遐。獵戶座太空船這馬欲進行動力飛行，飛過月球表面 130 公里懸 ê 所在。動力飛行 ê 過程會增加飛行速度，按呢會當飛到 離月球較遠 ê 逆行軌道 去。這个軌道較遠，因為伊離月球有 9 萬 2000 公里遠，而且是逆行軌道。這是因為太空船 ê 軌道方向會 kah 月球踅地球 ê 方向倒反。獵戶座太空船會 tī 11 月 25 拜五 ê 時陣，飛到這个較遠 ê 逆行軌道。獵戶座太空船 tī 月球附近幌來幌去，落尾會 tī 11 月 28 拜一 ê 時陣飛到離地球上遠 ê 距離（40 萬公里）。這个距離超過進前 設計欲載人做太空探險 ê 阿波羅 13 號任務 ê 記錄。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221123/ 影像：NASA, Artemis 1 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221123.html Powered by Firstory Hosting

6 月 15 這工，太陽系上內底 ê 行星，水星，佇地球天頂 行到離太陽上遠 ê 所在。這張速翕相片，是天欲光進前 踮智利 Rio Hurtado 山谷翕--ê。佇 日頭欲 peh--起來進前，水星出現佇東爿地平線附近彼个遙遠 ê Andes 山脈面頂。佇 6 月，別粒透早星攏會排踮比水星較懸 ê 所在。這寡會當用目睭直接看著 ê 太陽系行星，會踮 黃道面 排排做一逝，按呢一張闊幅相片就會當 kā 這个行星連珠 ê 現象翕入去。踮南半球，太陽系 ê 黃道面崎崎迒過天頂，趨 tùi 北方去。毋閣踮北半球，這寡佇黃道面 排好勢 ê 透早星 peh 起來了後，會用較淺 ê 角度趨 tùi 南方去。毋管是踮北半球抑是南半球，佇 6 月美麗 ê 早起時，攏會當看著這寡透早星，會照 in 到太陽距離 ê 順序，踮天頂排做一逝。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220617/ 影像：Elke Schulz (Daniel Verschatse Observatory) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220617.html Powered by Firstory Hosting

Tī 曼哈頓 ê 暗暝，天頂 ê 月娘欲落去矣。這是 kā 11 月 8 號 紀錄 月全食 ê 16 張連紲感光組合出來 ê 相片。這支縮時攝影相片內底，恆星 tī 城市天頂拖出一條短短 ê 光跡，這个時陣月娘猶 tī lih 地球 ê 烏影下底。國際太空站嘛才 ùi 烏影下底 出現，飛到低軌道 較光 ê 所在。Ùi Niú-iok 市 來看，天頂 ê ISS 光跡 ùi 金牛座 ê 恆星邊仔開始，ùi 正爿追蹤到倒爿，經過獵戶座皮帶、天狼星、kah 大犬座 α 星。咧高速運動 ê 軌道光跡中央 ê 空縫，kah tī 地平線附近咧飛 ê 飛龍機光跡 ê 空縫，予咱 ùi 這張系列相片內底感受著時間 ê 變化。火星 ê 光跡就 tī 影像頂懸遐。昴宿星團 ê 光跡 tī 食月 kah 帝國大廈 頂懸較懸 ê 所在。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221112/ 影像：Stan Honda 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221112.html Powered by Firstory Hosting

美麗 ê 捲螺仔星系 NGC 6744 差不多有 17 萬 7000 光年闊。比咱 銀河系 閣較大。伊就 tī 3000 萬光年遠 ê 所在，tī 南方星座 孔雀座遐。Ùi 咱 ê 視線方向看，伊 ê 星系盤是趨趨 ê。這張厝邊島宇宙 ê Hubble 特寫 翕著 NGC 6744 中心區域差不多 2 萬 4000 光年闊 ê 範圍。這張 Hubble 影像是 kā 可見光資料 kah 紫外光資料敆起來 ê 結果。這个 大星系 中央 ê 黃色星系核主要是 tī 可見光看著--ê，是 ùi 較老、較冷 ê 恆星發出來 ê 光。Tī 星系核外口 ê 內捲螺仔手骨遐，四界攏有恆星形成區 kah 少年星團。NGC 6744 ê 少年星團 tī 紫外光波段較光，是相片內底藍色 kah 粉紅仔色遐。相片內底彼寡 十字形 ê 恆星 是前景星，in 攏 tī 咱 ê 銀河系內底。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221125/ 影像：NASA, ESA, and the LEGUS team 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221125.html Powered by Firstory Hosting

Lynds 暗星雲 1251 (LDN 1251) 內底當咧形成恆星。這个厚塗粉 ê 分子雲離咱有 1000 光年遠，就浮佇咱 ê 銀河盤面頂，是 仙王座爆發區 內底，暗星雲複合體 ê 一部份。這个閘光 ê 星際雲 佇 規个電磁波頻譜 ê 天文探索 展示出 ùi 新恆星發出 ê 高能震波佮大角度噴流。這嘛包括 藏佇影像內底 去予散射、發紅光 ê Herbig-Haro 天體。 遙遠 ê 背景星系嘛藏佇這幅影像內底，差不多是佇這个湠開 ê 厚塗粉星雲後壁。這張迷人 ê 影像 佇天頂有超過四粒月娘 ê 闊度。照 LDN 1251 ê 距離來推算，這差不多有 35 光年闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221124/ 影像：Stefano Attalienti 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221124.html Powered by Firstory Hosting

恆星老矣了後，會產生美麗 ê 圖樣。有當時仔親像花，有當時仔親像蟲豸。蝶仔 星雲 NGC 6302 就是一个有名 ê 例。這个氣體做--ê 翼有 3 光年 闊，表面溫度超過 20 萬度 C。相片內底 ê 行星形星雲 是 NGC 6302。伊中央彼粒較老 ê 恆星，已經變甲燒燙燙，tī 可見光 kah 紫外光 咧發光。毋過伊 藏 tī 實密 ê 塗粉後壁，咱是看袂著。這張 Hubble 太空望遠鏡 ê 特寫相片是紀錄甲遮爾清楚。資料處理好矣了後，咱就看會著複雜 ê 行星形星雲 內底 精彩 ê 細節。其中，藍色是 酸素，青色是 水素，紅色是 窒素。NGC 6302 離咱有 3500 光年遠，經過 考古 校正，伊應該是 tī 天蠍座 遐。行星形星雲 是 ùi 像咱 太陽 這款 恆星 ê 外層大氣演化來--ê。毋過一般講來，伊會 tī 2 萬年左右就變暗去矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221121/ 影像來源：NASA, ESA, Hubble 資料處理：William Ostling 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221121.html Powered by Firstory Hosting

天頂看起來敢若有一个大天體乎？彼是 氣輝 啦！4 月底 tī 孟加拉 天頂出現雷公雨了後，tī 中國 西藏 ê 天頂嘛出現一輾一輾發光 ê 大型圓形波，就親像 相片 按呢。這个無四常 ê 圖樣 是大氣 重力波 造成--ê。Tī 較懸 ê 所在，空氣較薄，交替 ê 壓力波嘛會變較強。像這个現象是發生 tī 90 公里懸 ê 所在。氣輝 kah 極光 無仝，極光是 tī 懸緯度 kah 高能帶電粒子相挵，是物理現象。氣輝是 化學性發光，是化學反應 ê 光產物。較典型 ê 氣輝 會當 tī 地平線附近看著，伊予咱 ê 夜空袂變甲 規个烏 mi̍h-mà。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221120/ 影像：Jeff Dai 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221120.html Powered by Firstory Hosting

Artemis 1 號任務 ê 獵戶座太空船 tī 11 月 21 飛過月球 ê 時陣，地球 ê 居民 會看著 下月眉。太空船會飛倚到月球表面 130 公里懸 ê 所在，才閣飛到 7 萬公里遠 ê 懸逆行軌道，踅月球行。是講 11 月 16 火箭發射 ê 時陣是下半月，而且會 tī 翻點了後才出現 tī 地平線附近。 這是 tī Kennedy 太空中心 ê 天頂翕--ê。相片內底閣有 SLS 火箭 ê iăn-jín kah 固體火箭推進器 kā 無載人 ê 獵戶座太空船送到太空去。因為 火箭產生 ê 壓力波 改變 kha-mé-lah 視線方向 ê 屈折率，所以月娘去予日光照著 ê 彼爿外沿，才會看著彎彎曲曲 ê 波紋。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221119/ 影像：John Kraus 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221119.html Powered by Firstory Hosting

暗星雲 L1527 內底 ê 原恆星 干焦 10 萬歲爾爾，伊這馬猶藏 tī 飼伊大漢 ê 氣體塗粉雲內底。這張是 James Webb 太空望遠鏡 ê NIRCam 翕 ê 紅外線相片。Tī 星雲頷頸有一條暗帶，彼其實是踅 tī 少年恆星 外口 厚 tut-tut ê 原恆星盤。Ùi Webb 望遠鏡 ê 紅外線影像看來，原恆星 是藏 tī 原恆星盤內底。這塊 原恆星盤 是側向--ê，比咱 ê 太陽系較大淡薄仔。伊 ê 物質，落尾會提去做原恆星。是講這張影像內底有濟濟星雲 ê 細節。這个沙漏形星雲，是去予原恆星發出 ê 紅外線 kā 照予光--ê。這是恆星形成過程中，去予 擲出來 ê 物質 kā 週邊媒介物掃出去 ê 結果。原恆星得著夠額 ê 質量了後，就會開始轉大人，產生重力崩塌，tī 核心開始進行核融合反應。暗星雲 L1527 內底 ê 原恆星 離 金牛座內底 ê 恆星形成區 有 460 光年遠。伊可能 kah 咱太陽系 tī 紅嬰仔時期有相仝。這張 Webb ê NIRCam 影像 差不多有 0.3 光年闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221118/ 影像來源：科學：NASA, ESA, CSA, STScI, NIRCam 資料處理：Joseph DePasquale (STScI), Anton M. Koekemoer (STScI), Alyssa Pagan (STScI) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221118.html Powered by Firstory Hosting

11 月 16 美國東岸時間 半暝 1:47，太空發射系統 載 Artemis 1 號 任務 ê 獵戶座太空船 離開地球。這是 NASA 深空探索系統 ê 頭一个整合試驗。In ùi 歷史久長 ê 美國 Kennedy 太空中心 39B 發射場飛出去。過一點鐘了後，獵戶座太空船 ê 其中一台 外部攝影機，翕著這个 ùi 太空 看著 ê 景色。前景是獵戶座軌道機動系統 iăn-jín kah 輔助 iăn-jín，就 tī 歐洲服務艙下底。Tī 服務艙 7 公尺長 ê 太陽能枋陣列 遠方，是太空船 美麗 in 兜。Artemis 1 號任務 會運作 4 禮拜，欲試驗看有法度予人類踮月球抑是火星面頂探索。這台無載人 ê 獵戶座太空船按算欲 tī 11 月 21 飛過月球，ùi 7 萬公里遠 ê 逆行軌道，飛倚到月球表面。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221117/ 影像：NASA, Artemis 1 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221117.html Powered by Firstory Hosting

捲螺仔星系 NGC 1097 佇南天咧發光，伊 kah 咱 ê 距離有 4500 萬光年遐爾遠，就佇 天爐座 遐。佇 NGC 1097 這張彩色 ê 星系肖像 內底，伊藍色 ê 捲螺仔手骨面頂有粉紅仔色 ê 恆星形成區。這个捲螺仔星系 ê 正爿頂懸，看起來有 kā 一个較細 ê 星系伴包起來。星系伴 kah 足光 ê 捲螺仔核心 ê 距離，差不多有 4 萬光年遠。是講 NGC 1097 毋但這項奇怪爾爾。這張長時間感光 ê 相片內底閣有較暗 ê 神祕噴流，看起來是比 藍色 ê 捲螺仔手骨閣較長。實際上，佇 NGC 1097 ê 光學影像內底，攏總 揣著 4 條較暗 ê 噴流。噴流是追蹤星系核心 ê X 形結構，毋過這本底可能毋是 ùi 遐來--ê。而且，in 可能是 恆星流 ê 化石證據。是較大 ê 捲螺仔星系佇古早時代掠著一个較細 ê 星系，kā 破壞了後 留落來 ê 跤跡。NGC 1097 是一款 Seyfert 星系，伊 ê 核心嘛有一粒 超大質量烏洞。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221116/ 影像：Mike Selby, Mark Hanson 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221116.html Powered by Firstory Hosting

這个神祕 ê 藍色反射星雲編做 VdB 152 抑是 Ced 201，伊實在是足暗--ê。伊就 tī 長長 ê 暗星雲 Barnard 175 ê 雲尖遐，是 tī 一个叫做 狼窟星雲 ê 厚塗粉複合體內底。這个 宇宙幻影 就 tī 這張深空 ê 望遠鏡景色 中心。伊離咱有 1400 光年 遠，就 tī 銀河北方 ê 皇家星座 仙王座遐。這區內底 ê 星際塗粉 kā 背景星 ê 光閘牢，閣 kā 藏 tī 雲內底 ê 恆星 光散射去，落尾才會予這个星雲產生特殊 ê 藍光。雖罔講恆星攏是 ùi 分子雲內底生出來--ê，毋過這粒恆星敢若是走毋著位才會出現 tī 遮。因為咱 tī 天頂量著伊 ê 速度，是 kah 分子雲 ê 速度差足濟--ê。相片 下底是行星形星雲 Dengel-Hartl 5。咱 閣看會著 相片正爿有古早時代 ê 超新星殘骸發出 ê 紅光氣體。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221115/ 影像：Gianni Lacroce 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221115.html Powered by Firstory Hosting

是啥物力量咧控制這个童乩星雲？咱知影講，萬有引力若是有夠強，就有法度形成恆星。而且 in ê 恆星風 kah 輻射，嘛強甲有通製造抑是解離 氣體塔。這張 相片內底 ê 童乩星雲，離咱有 8000 光年遠，伊就踅佇當咧做恆星 ê 開放星團 NGC 7380 邊仔。恆星、氣體、塗粉 ê 交互作用會製造出一个 看起來 敢若是 古早時童乩 ê 形體。活跳 ê 恆星形成區差不多有 100 光年 大，予伊佇天頂 ê 視角度 看起來較大 月娘 。咱會當用細台望遠鏡佇 仙王座 ê 方向看著 童乩星雲。雖罔講這个 星雲干焦會擋 幾若百萬冬，毋過有一寡當咧形成 ê 恆星是會比咱 ê 太陽活較久。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221114/ 影像：Ioan Popa 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221114.html Powered by Firstory Hosting

這个美麗 ê 正向捲螺仔星系 M33 是停踮北方星座三角座 內底 較細 ê 星系。伊閣有一个較有名 ê 名稱是風吹星系，若無叫伊 三角座星系 嘛是會使。M33 ê 直徑超過 5 萬光年，是 本星系群 內底第三大--ê，比仙女座星系 (M31) kah 咱 ê 銀河 較細。M33 kah 咱銀河 ê 距離 差不多 有 300 萬光年遠。伊去 hŏng 認為是仙女座星系 ê 衛星星系。蹛踮這兩个星系內底 ê 天文學家，可能會互相看著對方這个壯觀 ê 大捲螺仔星系。Ùi 銀河內底看，這張清楚 ê 相片 是 kā 地面望遠鏡 kah 太空望遠鏡 ê 觀測資料 組合出來 ê 影像。咱會當看著 M33 櫳櫳 ê 捲螺仔手骨內底，有藍色星團 kah 粉紅仔色 ê 恆星形成區。實際上，佇星系中心一點鐘方向彼糊上光--ê，是恆星形成區 NGC 604。M33 kah M31 仝款，咱已經有量著足濟變星矣。這會當幫贊咱 kā 這个厝邊捲螺仔星系當做一个宇宙尺度，按呢咱才有法度 建立 距離尺度，予咱了解 咱 ê 宇宙到底有偌大。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221103/ 資料處理：Robert Gendler 資料：Hubble Legacy Archive, KPNO, NOIRLab, NSF, Aura, Amateur Sources 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221103.html Powered by Firstory Hosting

去予雷達 kah 直升機追蹤 ê 外太空來 ê 飛碟，落 tī Utah 州 ê 沙漠，煞摔歹去。這是 2004 年 ê 代誌，kah 外星人 無底代。相片內底 ê 飛碟是 起源號 太空船 ê 標本回送船，是 NASA tī 2001 年為著欲研究太陽 發射 ê 人造機器人太空船 起源號 ê 一部份，。是講，因為降落傘 無照計畫拍開，致使伊愛 tī 一點鐘 超過 300 公里緊 ê 速度下底，進行計畫以外 ê「𠕇登陸」。起源號 ê 任務 是踅 太陽，收集彼寡定定去予 地球磁場 轉向 ê 太陽風 粒子。雖罔講登陸是失敗矣，毋過提轉來地球 ê 標本，猶是有足濟保存了袂䆀，有夠予咱做分析。到目前為止，kah 起源號 任務有關 ê 發現，包括有 太陽 組成成份 較新 ê 細節，閣有 太陽系 內底一寡元素 ê 豐度 是按怎無仝。這个結果有提供咱一寡趣味 ê 線索，予咱了解幾若十億年前，太陽 kah 行星是按怎形成--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221113/ 影像：USAF 388th Range Sqd., Genesis Mission, NASA 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221113.html Powered by Firstory Hosting

Tī 11 月 8 號 月圓這工，月球會規粒 ùi 地球烏影下底趨過，發生月全食，產生這个美麗 ê 血月。月全食 ê 時陣，北美洲 kah 亞洲 ê 一寡所在，拄仔好有機會看著月娘 ùi 外行星 天王星 ê 頭前行過，產生掩星現象。這兩張相片，一張是特寫相片，一張是闊幅相片。這兩張相片攏是掩星進前翕著--ê，是用無仝望遠鏡、無仝 kha-mé-lah，毋過攏是踮中國上海仝一个厝頂翕--ê。一般講來，月圓時 ê 月光是足光 ê。所以這粒遙遠、看起來細細粒 閣 青恂恂 ê 冰巨行星，是會暗甲 giōng 欲看袂著。毋過月食 ê 時陣，月光就會較暗。伊這馬就 tī 食月 ê 倒爿外沿，連鞭就會消失 tī 這粒豬肝色 ê 月娘 後壁。雖罔講月掩行星干焦踮地球一寡所在看會著，毋過咱猶是 定定有機會 看著。像這款「月全食掩星」就毋是遐爾捷看著矣！月全食 ê 時陣，行星 kah 月球攏愛出現 tī「衝」ê 相位 ê 仝一爿。而且行星嘛愛 kah 太陽、地球、月球 攏行到 黃道面附近，咱才有機會看著。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221111/ 影像：Ryan Han 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221111.html Powered by Firstory Hosting

是按怎 WR-18 星 ê 外圍星雲有一爿較光？這粒活跳 ê 星 嘛叫做 NGC 3199，伊 kah 伊外圍 ê 星雲攏 tī 南方 ê 航海星座 龍骨座 遐，離咱有 1 萬 2000 光年 遠。這張深空影像 是經過足濟處理步數，才有法度看著氣泡形星雲內底，發光氣體 ê 雲絲細節。這个星雲差不多有 75 光年闊。星雲中心附近是 Wolf-Rayet 星 WR-18，伊是一粒大質量高溫短命 ê 恆星，會產生實密複雜 ê 恆星風。實際上，因為 Wolf-Rayet 星 有足強 ê 恆星風，會 kā 邊仔 ê 星際物質 吹走，所以 in 會製造 外形看起來足趣味 ê 星雲。像這个案例，咱本底叫是講，較光彼爿是因為這粒星 tī 齊齊 ê 媒介物內底 hôe--過 ê 時陣，產生 弓形震波，就 kah 一隻船行過 水面 ê 現象仝款。毋過 最近 ê 測量分析 結果 表示，這粒星 並無 向 較光彼爿高速徙動。所以這馬 ê 解說 變做 講，這粒星 ê 外圍物質毋是對伨--ê，較光 ê 彼爿較實密，而且是一簇一簇--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221109/ 影像：Alex Woronow 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221109.html Powered by Firstory Hosting

Tī 這張 月全食 ê 縮時攝影合成相片內底，有翕著地球彩色 本影 ùi 拄開始、中央、到結束 ê 過程。這張相片是 11 月 8 號 踮 美國 Kitt Peak 國家天文台翕--ê。這規个月食過程是 1 點鐘 25 分，食是 ùi 正爿開始，倒爿結束。反紅 ê 日光去予地球厚厚 ê 大氣層散射到中央本影，閣予月盤反射，才會產生這个戲劇性 ê 豬肝紅 色調。月食會比以前閣較紅，應該是因為年初 ê 時陣，南太平洋有一个大粒火山爆發，噴出來 ê 火山烌 tī 大氣內底散射造成 ê。注意看正爿 kah 倒爿，咱地球 ê 烏影 tī 邊仔猶是有較光。月娘外沿 較暗 ê 藍色光帶，是日光去予地球平流層（臭氧層）濾掉 ê 結果。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221110/ 影像：KPNO / NOIRLab / NSF / AURA / Petr Horalek (Institute of Physics in Opava) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221110.html Powered by Firstory Hosting

遮有偌濟星系咧進行交互作用？這陣星系叫做 Wild 三重奏 抑是 Wild 三生仔。這毋但是因為這是 Wild 發現 ê，嘛是因為 in 看起來有三个較光 ê 星系。這三个做伙去予編做 Arp 248，本底叫是講 in 三个攏有 交互作用。毋過 最近 ê 研究 發現講，干焦上光彼兩个有引力 ê 交纏，就是頂懸 kah 下底較大彼兩个星系。這張 Hubble 太空望遠鏡 翕 ê 相片內底，中央彼个 捲螺仔星系 實際上是較遠 ê，伊下底 kah 附近 ê 其他濟濟星系 嘛是仝款攏較遠。這寡 巨人決鬥 ê 結果，就是 tī in 之間搝出一條長長 ê 星橋，內底攏是恆星、氣體、kah 塗粉。這條星橋有 20 萬 光年 遐爾長。咱今仔日看著 ê Wild 三生仔是差不多 2 億年前 留落來--ê，彼陣地球 ê 主人是 恐龍。差不多閣 10 億年，這兩个交互星系就會合併 做 一个 較大 ê 捲螺仔星系。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221108/ 影像：ESA/Hubble, NASA, Dark Energy Survey/DOE/FNAL/DECam/CTIO/NOIRLab/NSF/AURA, J. Dalcanton 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221108.html Powered by Firstory Hosting

這个奇怪 ê 烏球看起來敢若有小可仔面熟面熟呢？嘿啦！因為伊就是咱 ê 太陽啦！這張影像是 2012 年翕--ê，有翕著太陽足濟細節。這本底是欲翕一个 特別 ê 紅光，了後先 kā 變做烏白色，才閣 kā 變做 倒反色。創好了後，kā 星場 加入去，才閣 kā 變做倒反色一擺。這張太陽影像內底，有 長長淺色 ê 太陽絲、烏暗 ê 活跳區、外緣暴出來 ê 日珥、kah 咧跳舞 ê 高溫氣體毯。太陽 表面是足無閒刺鑿 ê 所在，尤其是拄著 太陽極大期，就是太陽表面 磁場 交纏上激烈 ê 時陣。活跳期 ê 太陽 就親像是一幅圖，伊噴出來 ê 電漿 去挵著地球磁層 ê 時陣會產生 極光，這閣是另外 一幅圖 矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221106/ 影像：Jim Lafferty 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221106.html Powered by Firstory Hosting

今年 5 月 16 ê 時陣，月球 ùi 地球烏影下底趨過。月球完全去予 地球本影 閘牢，出現月全食 ê 時間差不多是 1 點鐘 25 分。這張縮時攝影 ê 組合相片 是佇 Amundsen-Scott 南極站翕--ê。有紀錄著地平線頂懸 ê 月偏食 kah 月全食 ê 連紲影像。背景是南極冷吱吱 ê 暗暝，天頂有足濟天星，閣有 南極極光 ê 極光湧，kah 銀河中心。前景 是地球上南方 ê 研究站 暗區實驗室，正爿彼个是 BICEP 望遠鏡，倒爿彼个是南極望遠鏡。雖罔講極區 ê 夜空是足媠--ê，毋過你應該袂為著欲看 今年 11 月 8 號 ê 月全食 去南極 乎！是講月食嘛會當踮亞洲、澳洲、太平洋、美洲、kah 歐洲看著。這應該是你佇 2025 年進前，上尾一擺看著 月全食 ê 機會矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221105/ 影像：Aman Chokshi 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221105.html Powered by Firstory Hosting

這張是火星洞察號降落器佇 2018 年 11 月 26 踮這粒紅色行星 ê 赤道平原 Elysium 平原 成功降落了後，頭一張 傳轉來地球 ê 影像。這个創歷史記錄 ê 任務，是欲利用 地動調查、大地測量、kah 熱傳導，來探索火星 ê 內部結構。這个任務已經運作超過 1400 个火星日矣。彼陣洞察號任務已經偵測著超過 1300 擺 ê 火星地動。伊嘛有紀錄著火星 去受著流星體 ê 衝擊造成 ê 火星震動，看地動波是按怎傳送的。按呢咱才有法度影--著火星 ê 內部構造。本底咱按算講，分析收集著--ê 資料，會當予咱佇紲落來這幾若十冬，繼續有新 ê 發現。毋過洞察號 tī 火星 上尾 ê 工作日，應該是欲到矣。這是因為咱看伊今年年頭 ê 自翕 相片 就知。伊 ê 甲板 kah 2 公尺長 ê 太陽能枋攏去予塗粉崁牢矣。這寡去予火星風歕起來 ê 塗粉 會繼續累積，按呢會害 太陽能枋造出來的電，一時仔就用了矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221104/ 影像：NASA, JPL-Caltech, Mars InSight 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221104.html Powered by Firstory Hosting

星雲當時看起來會親像是掃帚星？這个實捅捅 ê 星場 有 2 度闊，伊就佇 天鵝座 內底。這隻佇天頂飛甲遮爾懸 ê 天鵝，目睭 ê 所在就是娘仔殼星雲。這个 宇宙娘仔殼 是一个實櫼 ê 恆星形成區，伊是倒爿這个較光 ê 發射星雲 kah 反射星雲。正爿拖一條長長 ê 星際塗粉雲，予這規个星雲複合體看起來 敢若是一粒彗星。伊去予編做 IC 5146，星雲中央較光 ê 部份差不多有 10 光年，毋過暗 塗粉 尾溜有 100 光年長。兩个攏離咱有 2500 光年遠。星雲中心較光 ê 恆星 應該干焦幾若十萬歲 爾爾，伊是予星雲發光 ê 動力來源。伊嘛 kā 恆星形成 分子雲 內底 ê 塗粉 kah 氣體 put-put--出去，掃出一个閬縫。雖罔講這條長長厚厚 ê 雲絲 佇 這張 可見光 影像內底 看起來是有較暗，毋過這內底其實是有藏足濟粒 恆星當咧做，而且會當佇 紅外線波段 看著。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221026/ 影像：Andy Ermolli 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221026.html Powered by Firstory Hosting

天鷹座必巡佇天頂迒過牛郎星附近，伊是 kā 咱密喌喌 ê 銀河盤拆--開 ê 烏暗區。Kah 銀河暗淡 ê 恆星光 相比，這个奇怪 ê 剪影其實是厚塗粉 ê 分子雲。這內底有做恆星 ê 原始材料，才有法度做出數千萬粒 ê 恆星。所以 天文學家 才會踮這个烏暗雲內底，揣看有恆星誕生 ê 線索無。這个碎糊糊 ê 天鷹座烏暗雲複合體去 hŏng 編做 LDN 673。這張望遠鏡特寫 差不多是比規粒月娘佇天頂看起來 ê 大細閣較大淡薄仔。佇這个景色內底，咱較看會著--ê，是 kah 少年恆星 有關 ê 高能量大角度噴流，這內底嘛包括中央正爿頂懸 較細 ê 紅色星雲體 RNO 109，kah 下底 ê Herbig-Haro 天體 HH32。這个 天鷹座 內底 ê 烏暗雲可能 看起來有小可仔恐怖，毋過 in 其實離咱有 600 光年遠。踮這个距離，這个視野差不多有 7 光年闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221029/ 影像：Frank Sackenheim, Josef Poepsel, Stefan Binnewies (Capella Observatory Team) 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221029.html Powered by Firstory Hosting

仙女座星系邊仔彼寡紅色 ê 雲是啥物？地球 ê 天文學家定定咧翕 M31 這个星系。這是離咱上近 ê 大捲螺仔星系，伊有咱熟似 ê 烏暗塗粉帶、明亮 ê 黃色星系核、kah 有藍色恆星星雲 ê 捲螺仔手骨。這張深空肖像 是咱 ê 厝邊 島宇宙，是感光足久 ê 闊頻 kah 狹頻資料 ê 拼鬥影像。佇仝一个視場內底，有一寡咱 足無熟 ê 特徵，是 暗淡 ê 紅色 電離水素氣體雲。大部份 ê 電離水素 雲一定是佇前景，就佇咱 ê 銀河系 內底。In 可能 kah 彼寡去予咱 銀河盤 擲到幾若百 光年 懸、四界坱埃 ê 星際絹雲 有關。是講有一寡雲是出現佇 仙女座星系 內底，另外一寡就出現佇下底彼个較細 ê M110 內底。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221024/ 影像：Andrew Fryhover 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221024.html Powered by Firstory Hosting

這个宇宙雲 就浮佇銀河系 ê 捲螺仔手骨 獵戶座手骨遐，伊 ê 外形看起來就敢若是美國西岸 ê 加州。咱 ê 太陽 嘛佇銀河系 ê 獵戶座手骨 遐，離 加州星雲 干焦 1500 光年遠爾爾。這个經典 ê 發射星雲 嘛叫做 NGC 1499，有 100 光年長。加州星雲發出特別 ê 紅光，這是水素原子 佮 phàng-見 ê 電子複合發出 ê 光。電子以前捌去予高能恆星光離子化，煞落去。這粒提供高能恆星光 共 星雲內底大部份氣體離子化 ê 天體，應該是星雲正爿 ê 高溫恆星 英仙座 ξ。這張 3 度 闊 ê 深空影像 內底，有發光 ê 星雲、閘光 ê 塗粉、佮 恆星，這對天文攝影師來講是一个足有名 ê 目標。加州星雲就佇 英仙座 遐，離 昴宿星團 無偌遠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221022/ 影像：Stephen Kennedy 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221022.html Powered by Firstory Hosting

龍蝦星雲是按怎形成一寡咱這馬所知影 ê 上大質量恆星？這个咱這馬猶毋知。龍蝦星雲去予編做 NGC 6357，中心附近有開放星團 Pismis 24，是明亮 ê 大質量恆星 in 兜。內部 ê 恆星形成區附近發出 ê 紅光是 ùi 電離 水素 氣體 ê 發射線 來--ê。這張相片內底 ê 星雲，有規片 ê 複雜氣體、烏暗塗粉、當咧形成 ê 恆星、kah 拄仔做好 ê 恆星。這个複雜 ê 圖樣，是 星際風、輻射壓力、磁場、kah 重力 複合交互作用 ê 結果。這張相片是用 智利 Cerro Tololo 美洲洲際天文台 4 公尺 Blanco 望遠鏡 ê DOE 烏暗能量相機 翕--ê。NGC 6357 佇 8000 光年 遠 ê 天蠍座 遐，差不多有 400 光年遐爾闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221101/ 影像來源：CTIO/NOIRLab/DOE/NSF/AURA 資料處理：T. A. Rector (U. Alaska Anchorage/NSF’s NOIRLab), J. Miller (Gemini Obs./NSF’s NOIRLab), M. Zamani & D. de Martin (NSF’s NOIRLab) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221101.html Powered by Firstory Hosting

銀河系內底上使人驚惶 ê 星雲是佗一个？其中一个應該是 LDN 43，伊足成是一隻大型 ê 宇宙 夜婆，佇 萬聖節 暗暝 ê 星空 咧飛。這个 分子雲 就佇 蛇夫座 遐，離咱有 1400 光年 遠。伊厚甲毋但會 kā 背景光線閘牢，嘛 kā 反射星雲 LBN 7 照予光 ê 氣體閘牢矣。這个 12 光年長 ê 氣體 塗粉 雲絲，實際上是一个 恆星托兒所，毋是歹吉兆。這隻夜婆發出 ê 奇怪 光線，是因為這寡光是 ùi 實密 ê 氣體丸 內底照出來--ê，這內底有才拄形成 ê 新恆星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221031/ 影像：Mark Hanson and Mike Selby; Text: Michelle Thaller (NASA’s GSFC) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221031.html Powered by Firstory Hosting

這粒幽靈行星是佗一粒？當然是 地球 這粒 行星 啦！這是 2013 年彼陣 佇 冰島 東北爿 火山 ê 地熱活跳 區 Hverir 一个烏暗 ê 風暴暗暝。地磁風暴 佇這个天星滿滿 ê 暗暝產生 極光現象。Ùi 地球 氣空 噴出來 ê 水煙 kah 氣體 成做這个幽靈塔，伊就敢若是佇這个奇怪 ê 青色極光下底咧跳舞。極光佇紲落來幾若年，可能會愈來愈濟，這是因為 咱 ê 太陽 這馬愈來愈倚 太陽極大期。按呢免偌久，這款幽靈 嘛有可能出現 佇你身軀邊咧跳舞！ ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221030/ 影像：téphane Vetter (Nuits sacrées) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221030.html Powered by Firstory Hosting

哈雷彗星 (編號 1P/Halley) 是人類頭一粒認捌 ê 掃帚星，每 75 冬就會轉來內太陽系一擺。咱頂擺直接用目睭看著這粒有名 ê 長尾星，是 1986 年彼陣。毋過咱踮地球，逐年攏會當看著兩擺哈雷彗星 ê 塗粉殘骸，包括 五月 ê 寶瓶座 η 流星雨 佮 十月 ê 獵戶座流星雨。In 佇天頂就親像是咧落雨仝款。這張 獵戶座流星雨 ê 合成影像 是 kā 2015 年 到 2022 年翕--ê 相片疊做伙，嘛包括 出現佇 10 月 21 ê 流星雨極大期。這張夜空全景圖內底，差不多有 47 粒較光 ê 流星。背景 ê 夜空有長長 ê 銀河佮滿滿 ê 天星，獵戶座流星看起來就親像是 ùi 獵戶座 參宿四 北方 ê 輻射點 來--ê。前景是 Slovakia 共和國 西部 Presov 市附近 ê 山脈。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221028/ 影像：Petr Horalek / Institute of Physics in Opava 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221028.html Powered by Firstory Hosting

10 月 25 佇 印度 Agra 會當看會著日頭 kah 月娘 同齊 落去。這个霧霧 ê 高空景色，就佇泰姬瑪哈陵 圓厝頂 附近。這个「日月合」 就出現佇西爿地平線附近，產生日偏食 ê 現象。是講，日偏食 嘛會當佇歐洲、北非、中東、kah 西亞看著。這是 2022 年上尾兩个日食，兩个攏是日偏食。毋過後一个 月圓時會佇 11 月 7 號 8 號彼陣，時到月娘會 ùi 地球烏影下底趨過，出現月全食。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221027/ 影像：Neelam and Ajay Talwar (TWAN) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221027.html Powered by Firstory Hosting

這个奇怪 ê 世界是佇佗位？啊就 地球 啦！這張相片 ê 前景是 澳洲 西部 Nambung 國家公園 ê 尖石岩。這是古早時代 ê 花蛤仔（石灰石）做--出來--ê，是講這寡 kah 人平大 ê 美麗尖石岩 是按怎形成--ê，就是一个 研究主題 矣。這張美麗 ê 全景圖是 2017 年 9 月翕--ê。相片中央 ùi 地平線 peh--起來 ê 黃道光，是日光去予浮佇 太陽系 行星之間 ê 塗粉粒反射產生--ê。迒過相片頂懸 ê 彎弓橋是咱 銀河系 ê 中央帶。咱閣會當佇背景 ê 夜空，看著 木星、土星、kah 幾若粒有名 ê 恆星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221023/ 影像：Jingyi Zhang 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221023.html Powered by Firstory Hosting

咱若是 ùi 紐西蘭南方 向北爿看，仙女座星系一定是佇地平線 peh--起來 袂超過 5 度懸 ê 所在。南半球 ê 春天是 ùi 九月底開始，這陣 ê 仙女座會佇半暝出現佇天頂上懸 ê 所在。這張 30 秒鐘 ê 孤張感光 望遠鏡景色，是愛 peh 到 南島彼个坎坎坷坷 ê 南 Alps 山脈 山頂 ê Mount John 天文台，追蹤天頂 ê 天星，才有法度翕著這个離咱上近 ê 大捲螺仔星系。天星 ê 光就反射佇前景 Alexandrina 湖恬靜 ê 湖水。仙女座星系 嘛叫做 M31，是 Messier 星表 內底上光 ê 天體之一，咱用目睭就看會著這个無蓋大、暗暗霧霧 ê 天體。這个佇 晴和夜空 長時間感光 ê 相片，予咱看著星系佇天頂差不多有 6 粒月娘遐爾闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221021/ 影像：Ian Griffin (Otago Museum) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221021.html Powered by Firstory Hosting

請你注意看這支奇怪 ê 日食影片內底 ê 三項代誌。代先，咱先來看 ùi 正爿過來--ê、kā 日頭 閘牢 矣 ê 大塊烏色圓盤。這个烏色圓盤是 月娘，影片主要是咧翕 頂禮拜 ê 日偏食。第二，咱來看浮佇 太陽外緣 頂懸，彼个 leh 爍咧爍咧 ê 大型日珥。你若是斟酌 kā 看，就會發現實際上 in 當咧 落轉來 太陽。日珥是高溫 電漿 組成--ê。因為 太陽磁場咧變化，所以 in 就會暫時浮佇較懸 ê 所在。落尾，咱來看太陽外緣 咧跳舞 ê 鬚鬚。這規組 咧跳舞 ê 鬚鬚 就敢若是一塊活--ê 地毯，in 是 太陽色球層 內底咧 peh 升 kah 降落 ê 高溫氣體管仔，嘛會使 kā 叫做 針形管。這支 4 秒鐘 ê 縮時攝影影片 其實是太陽性命 ê 10 分鐘久。是講太陽應該會 閣活 50 億年 講！ ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221102/ 影像：Ralf Burkart; h/t Maciej Libert (AG) 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221102.html Powered by Firstory Hosting

Gamma-光暴天體 GRB 221009A 應該是有新 ê 烏洞出世 ê 信號，是 ùi 遙遠宇宙足久以前 ê 一粒崩塌 ê 恆星核心生出來--ê。這張 gif 動畫就是咧描述這款超強 ê 爆發，這是 ùi Fermi Gamma-光 太空望遠鏡 ê 資料建構出來--ê。Fermi tī gamma-光偵測著伊 ê 能量，算出遮 ê 光子有超過 1 億 電子 bó͘-lu-to͘h。Kah 可見光相比，光子 ê 能量差不多才 2 電子 bó͘-lu-to͘h 爾爾。咱銀河盤平常時有發出穩定 ê 高能 gamma-光，就 tī 畫面倒爿對角 20 度闊 ê 範圍內。毋閣畫面中心 ê GRB 221009A 發--出 ê gamma-光，發出一目𥍉 ê 爍光了後，就隨閣暗去。GRB 221009A 是 目前為止量著--ê 上光 ê gamma-光暴天體，而且伊嘛足近--ê，毋閣猶是有 20 億光年遠。頂禮拜日 10 月 9 號 彼陣，GRB 221009A 爆發，發出 gamma-光光子。伊 ê 高能輻射 掃 tùi 咱地球來，有去予踅地球低軌道 ê Fermi 大面積望遠鏡 紀錄著 超過 10 點鐘 ê 時間。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221015/ 影像：NASA, DOE, Fermi LAT Collaboration 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221015.html Powered by Firstory Hosting

這个星雲是一隻神祕 ê 花枝形宇宙雲，伊 tī 天頂足暗、嘛足大--ê。這幅圖 是 kā 30 點鐘久 ê 狹頻影像資料組合出來--ê，大細差不多是 3 粒月娘遐爾闊，就 tī 皇家星座 仙王座 遐。大花枝星雲是法國 ê 天文攝影師 Nicolas Outters tī 2011 年發現--ê。這是伊發現 ê 第四个天體，所以才會號做 Ou4。伊 ê 雙極結構 有夠清楚，是雙電離酸素原子 發出 ê 青藍色 發射線。因為大花枝星雲去予紅色 ê 水素發射線區 包 tī 外口，所以伊真正 ê 距離 kah 特性才會遮爾歹量。最近 ê 研究 認為講，Ou4 應該是 tī 發射星雲 Sh2-129 內底，差不多是 2300 光年遠。照這个推論，這隻宇宙大花枝可能是一个壯觀 ê 大角度噴流，是 ùi 星雲中心彼个高溫、大質量 ê 三星系統 HR8119 噴出來--ê。若真正是按呢，這隻實在有夠大隻 ê 花枝星雲，應該是比 50 光年閣較長。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221012/ 影像：Tommy Lease 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221012.html Powered by Firstory Hosting

8 字形 ê 日行軌跡，是咱一冬內 逐工 tī 仝一个時間仝一个地點看伊 tī 天頂出現 ê 位置變化圖。毋閣仝款這个技術，欲翕出 月娘 ê 月行軌跡，是愛開較長 ê 時間。一般講來，欲等 月娘 tī 天頂轉來 到仝一位，逐工是愛加等 50 分 29 秒。所以若是欲 翕月娘，逐工就愛加等 50 分 29 秒。經過一个月圓週期，差不多就是舊曆一個月 ê 時間，咱就會當追蹤月娘實際上，因為自轉軸趨一个角度 kah 長株圓 軌道 造成 伊 tī 天頂散步 ê 月行軌跡。這張相片 是翕差不多兩個月，所以你會當看著兩个月行軌跡。月初 ê 月眉 月相，因為傷薄傷暗，所以 咱看無。這个堅持翕兩個月 ê 天文攝影師，是揀七月 kah 八月天氣較好 ê 時陣，tī 土耳其 ê Kayseri 翕--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221010/ 影像：Betul Turksoy 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221010.html Powered by Firstory Hosting

踅佇 gamma 光暴天體邊仔 ê gamma 光環是生做啥款?這个意外 ê 答案 kah 爆炸有小可仔關係，毋過 kah 光線反射咱 銀河系 ê 塗粉 有關。GRB 221009A 是一个足強烈 ê 爆炸，伊是足光 ê gamma 光暴天體 (GRB)，伊佇遙遠宇宙發出 ê 輻射線，頂禮拜才拄到 咱 ê 太陽系。因為 GRB 嘛會當發出大量 ê X-光，所以伊發出 ê 強 ê X-光 爍光，就 kah gamma 光輻射 差不多仝一个時間到。像這張 相片，X-光嘛 kah 咱 銀河系 較懸 ê 塗粉區作用，產生 無四常 ê 反射。GRB kah 反射銀河塗粉 ê 角度 若是差愈大，X-光環 ê 半徑就愈大。而且一般講來，這寡 光線 ê 反射 欲到咱遮，就愛開較濟時間。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221017/ 影像來源：NASA Swift Obs.; Data: B. Cenko (NASA’s GSFC), A. Beardmore (U. Leicester) et al. 資料處理：J. Miller (U. Michigan) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221017.html Powered by Firstory Hosting

這个捲螺仔星系中央有一个 棍仔形 結構，棍仔形結構中央有一个較細 ê 捲螺仔 結構，捲螺仔結構中央有一粒 超大質量烏洞。這攏佇這个大閣媠 棍螺仔星系 NGC 1300 內底看會著，伊就佇 7000 萬光年遠 ê 波江座 遐。這个壯麗 ê 島宇宙，是 Hubble 太空望遠鏡 合成影像 有史以來有 上濟細節 上完整 ê 星系。NGC 1300 有 10 萬 光年 闊，伊 ê Hubble 影像展示這个星系內底引人注目 ê 細節，包括有明顯中央棍仔 kah 雄偉捲螺仔手骨。是講這支大棍仔是按怎形成 ê ?按怎保持?按怎影響 恆星形成，到今猶是一个 足衝 ê 研究主題。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221016/ 影像：NASA ESA, Hubble Heritage 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221016.html Powered by Firstory Hosting

10 月 9 號 ê 月圓 是 北半球 秋分 過了 ê 第二个月圓，傳統來講咱 kā 叫做 拍獵月。根據傳說，這个名是足合--ê，這是因為紲落來就欲 過冬 矣，這个時陣拄仔好是拍獵--ê 咧囤糧食，月圓 ê 月光拄仔好 kā 暗暝照予光。這張速翕是 10 月 8 號日落了後 翕--ê。這粒 giōng 欲倚月圓 ê 拍獵月，就 tī Florida 太空海岸天頂 沓沓仔 peh--起來。徛 tī 攝影師 袂䆀 ê 角度來看，ùi 地球飛出去 ê 獵鷹 9 號火箭，kā 光 iàⁿ-iàⁿ ê 月盤 tōng 破去矣。月盤邊仔 ê 波紋 kah 條紋，是火箭 ê 超音速 震波 飛過 大氣 ê 時陣，改變屈折率 產生 ê 現象。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221014/ 影像：Michael Seeley 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221014.html Powered by Firstory Hosting

這規个形體看起來敢若是一隻鴟鴞。是講這張 鴟鴞星雲 中心 ê 特寫是一个 較光 ê 區域，實際上伊是一个較大 ê 烏暗 塗粉殼 中心 ê 窗仔門。這个窗仔門內底有一个 光-iàⁿ-iàⁿ ê 工場 當咧製造規粒 開放星團。這个閬縫內底有 長長 ê 雲柱 kah 圓圓 ê 球體，閣有其他製造恆星 ê 烏暗塗粉 kah 冷 分子氣體。是講較矛盾 ê 是，咱若是欲看這个 恆星製造 工場，內底無恆星會 較好。所以咱會當用數位處理 ê 方式 kā 恆星 ùi 相片內底徙走。鴟鴞 發射星雲 嘛叫做 M16，kah 咱 ê 距離是 6500 光年 遠，有 20 光年闊。咱會當用 雙筒千里鏡 揣著伊，就 tī 巨蛇座 ê 方向。欲 創作這張相片，需要 22 點鐘久 ê 感光時間，特別 kā 水素（紅色）kah 酸素（藍色）發射線 ê 色光合成，才有這張--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221004/ 影像：Yannick Akar 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221004.html Powered by Firstory Hosting

木星 kah 伊 ê 衛星 ê 運動，就親像是咱 ê 太陽 kah 行星 ê 運動仝款。木星 哪咧自旋，伊 ê 衛星 嘛哪咧踅伊行。咱會當 ùi 追蹤木星頂懸 環形 ê 暗帶 kah 光區 ê 運動，了解 木星咧自轉。大紅斑 是目前咱知影上大 ê 木星風暴。這支 48 秒鐘 ê 影片開始放送了後，差不多 15 秒 ê 時陣你就會看著伊踅過來矣。這支影片 是 kā 頂個月幾若暗翕 ê 相片，用數位組合 ê 方式重新鬥做伙，變做這支 24 點鐘 ê 連紲影片。木星上光 ê 衛星 總是踅木星 ê 行星平面咧行。毋過地球自轉予 in 看起來 趨一爿。咱會當佇影片內底 看著 木衛二 Europa、木衛三 Ganymede、kah 木衛一 Io。冷吱吱 ê 加利略衛星 ùi 木星面頭前行過 ê 時陣，木衛二 Europa ê 烏影就出現 佇木星盤面頂。木星這個月猶 佇「衝」附近，這表示講伊這馬是足光--ê。伊欲行到離地球上倚 ê 所在矣，咱這馬是差不多規暗攏看會著伊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221025/ 影像：Makrem Larnaout 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221025.html Powered by Firstory Hosting

Hubble 太空望遠鏡 上有名 ê 一張相片 是：創生之柱。伊是鴟鴞星雲 M16 內底，ùi 冷氣體塗粉組成--ê、1 光年長--ê 恆星形成柱。毋過這張是 James Webb 太空望遠鏡 ê NIRCam 影像，有通看著 Hubble 進前看袂著 ê 部份，包括 tī 這个有名 ê 恆星托兒所內底，看著較濟細節 kah 較深空 ê 景色。佇 Webb 近紅外線景色內底上特別--ê，是佇雲柱上尾節 ê 紅色發射線。佇遐 ê 物質當咧進行重力崩塌，未來會形成恆星。鴟鴞星雲 離咱有 6500 光年遠。這个大閣光 ê 發射星雲 tùi 雙筒千里鏡抑是細台天文望遠鏡來講，是真好揣 ê 目標。M16 就佇咱銀河盤 ê 方向，遐是天頂厚星雲 ê 所在，就佇 分做兩爿--ê 巨蛇座尾溜遐。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221020/ 影像來源：科學：NASA, ESA, CSA, STScI, NIRCam 資料處理：Joseph DePasquale (STScI), Anton M. Koekemoer (STScI), Alyssa Pagan (STScI) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221020.html Powered by Firstory Hosting

你敢信會得過你的目睭？咱咧看這寡 天頂的相片 ê 時陣，定定會憢疑講，咱看--著--ê 影像到底是毋是「真--的」？毋過答案嘛定定無仝。像這張就 kah 咱目睭看--著--ê 景色差不多，因為這是用 RGB (紅色、青色、藍色) 濾鏡翕--ê，kah 咱人目睭 ê 錐狀細胞 ê 感光波段差不多。是講 這張相片 ê 感光時間有 19 點鐘久，咱 ê 目睭是無夠一秒。這張相片 是用 tī 美國 加州 Sierra Nevada 山脈 ê 一台 直徑 24 英尺 ê 天文望遠鏡，開 6 暗 ê 時間翕--ê。相片中央 ê 捲螺仔星系 (NGC 7497) 看--起來敢若是去予 太空幽靈 奇怪 ê 喙鬚纏牢--矣，才會看--起來是按呢生。這个星系實際上離咱有 5900 光年 遠，毋過你看--著--ê 星雲叫做 MBM 54，是無夠 1000 光年遠。這是 離咱上近 ê 冷氣體塗粉雲，是咱 銀河系 內底 ê 銀河絹雲。In 兩个攏佇飛馬座內底，你若是踮北半球 ê 秋天，攑頭就 會當看--著。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221019/ 影像來源 kah 版權：Howard Trottier 文稿：Emily Rice 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221019.html Powered by Firstory Hosting

咱的銀河就親像是天頂這蕊花的花柄，佇天頂開出這蕊極光花。無閣，就算 伊佇天頂看起來是按呢，實際上毋是按呢生！倒爿是咱銀河 的 中央盤，ùi 地平線 湠 tùi 夜空的中央。正爿是 長株圓形的極光，嘛湠 tùi 夜空的中央。伊主要發出的 青光是 ùi 酸素來的。這兩項實際上並無相連，因為 極光 是離咱足近的。就算是 較懸的紅色極光，嘛才佇 地球大氣層 1000 公里 懸的所在爾爾。佮極光比起來，銀河 內底的恆星佮星雲，平均距離嘛愛 1000 光年遠，是極光的 10 萬億 倍遐爾遠。這幅圖 是 10 月初佇 瑞典 北方 Abisko 一个無蓋大的湖翕的。咱的 太陽磁場 11 年一个週期，最近伊變甲愈來愈強，地球南北極的極光 嘛 變甲 愈來愈濟。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221018/ 影像：Göran Strand 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221018.html Powered by Firstory Hosting

這寡奇怪 ê 光環是啥物？這寡光環是較厚 ê 塗粉，應該是一个球形殼。In 是按怎製造出來--ê，到今猶是一个 研究主題。毋閣咱知影 in 是 tī 佗位製造出來--ê：是一个 tī 6000 光年 遠 ê 天鵝座 內底 ê 雙星系統。彼是一个 Wolf-Rayet 星 WR 140 主導 ê 雙星系統。Wolf-Rayet 星 是大質量恆星，而且伊上有名 ê 是伊有一个 生狂 ê 恆星風。In 嘛會製造 kah 噴出 重元素，親像是 星際 塗粉 ê 構成成份，碳素。雙星 系統另外彼粒恆星嘛是足光 ê 大質量恆星，毋閣 無遐爾活潑。這兩粒 大質量 恆星 tī 長株圓軌道 咧互踅，in 每 8 年就會倚近一擺 互相唱聲。In 兩粒上倚 ê 時陣，雙星系統 ê X-光 發射線 就會增加，kā 塗粉捒出去宇宙中，就按呢產生新 ê 塗粉殼。這張 紅外線 影像是新 ê Webb 太空望遠鏡 翕--ê，有看著足濟 足讚 ê 細節，kah 遮爾濟塗粉殼，這是以前攏毋捌看過--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221013/ 影像來源 kah 版權：NASA, ESA, CSA, JWST, MIRI, ERS Program 1349 資料處理: Judy Schmidt 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221013.html Powered by Firstory Hosting