NASA 逐工一幅天文圖 APOD Taigi

Gum 星雲 真歹看著，這是因為伊足大--ê，閣離咱傷倚矣。這个 ùi 發光 水素 氣體組成 ê 星際雲氣，定定會去予落勾去。因為伊踮天頂有 35 度闊，比 70 粒月娘閣較大，毋閣大部份攏較暗。這張壯觀 ê 相片是 90 度闊 ê 拼鬥影像，是特別設計欲予咱會當看著正爿彼个較闊較暗 ê Gum 星雲。這張相片是舊年尾翕--ê。前景是 Haba 雪山，背景是 銀河 ê 中央帶，是用仝一台 kha-mé-lah 踮仝一个地點，中國 雲南省 ê 香格里拉縣，翕--ê。Gum 星雲離咱足近--ê，伊上頭前 ê 部份，離咱干焦 450 光年 遠爾爾。毋閣伊上後壁 ê 部份，離咱就有 1500 光年矣。伊 ê 名是 ùi 一个專門研究宇宙雲 ê 澳洲天文學家 Colin Stanley Gum (1924 年 - 1960 年) 來--ê。這个 複雜 星雲 ê 起源，到今猶無一个定論。Gum 星雲 ê 起源，目前有一个主流理論是講，伊是百萬年前 ê 超新星爆炸 了後 ê 殘骸。毋閣另外一个嘛真衝 ê 理論是講，Gum 星雲 是一个 分子雲，是足久以前去予幾若粒超新星 kah 幾若粒大質量恆星噴出來 ê 恆星風 kā 雕做這形--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220627/ 影像：Wang Jin 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220627.html Powered by Firstory Hosting

是啥物造成 麒麟座 V838 ê 爆發？咱其實毋知。麒麟座 V838 這粒恆星 ê 外層大氣 忽然間脹大，結果就 tī 2002 年彼陣變做 銀河系 內底 上光 ê 恆星。毋閣 伊 連鞭就閣勼--去、暗--去矣。像這款 恆星干焦爍一目𥍉 ê 現象，咱以前毋捌看過。若是 超新星 抑是 新星，猶會 kā 一寡物質擲去太空中。就算 麒麟座 V838 爍一目𥍉 ê 時陣有 kā 物質擲去太空中，毋閣咱 tī 這張 Hubble 太空望遠鏡 翕--ê 相片內底，嘛干焦看著 原始爍光 ê 光波回音 湠出去爾爾。這个 光波回音，是 ùi 爍光傳來 ê 光波，是反射踅 tī 恆星邊仔 愈來愈遠、足複雜 ê 星際塗粉。麒麟座 V838 離咱有 2 萬 光年 遠，伊就 tī 釘仔馬 星座（麒麟座）遐。上外口這層 光波回音 ê 直徑，差不多有 6 光年 闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220626/ 影像：NASA, ESA, H. E. Bond (STScI) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220626.html Powered by Firstory Hosting

這是 4 台 kha-mé-lah 同齊翕了了後，才鬥做這張天光進前 ê 天景。這是佇 6 月 24 天光進前翕--ê 太陽系八大行星，落尾 成功合作做這張全景圖。這个透早 ê 雺霧景色內，有太陽系 ê 頭一粒行星水星，伊就佇地平線附近，拄仔好比貓霧光閣小可仔較光淡薄仔。伊 ê 倒爿下跤是金爍爍 ê 金星。閣起哩是下月眉、另外一粒光甲 目睭會當直接看著 ê 火星、閣有木星 kah 土星，攏 chhāi 佇黃道面附近，迒過這个闊幅視野，彎彎趨 tùi 正爿頂懸去。較暗 ê 天王星 kah 海王星嘛佇天頂 ê 黃道面遐，毋過就愛用雙筒千里鏡才看會著矣。這張八星連珠 ê 相片，前景是佇咱 地球 意大利 Marina di San Nicola 附近 ê 一个古代羅馬別莊 ê 考古現場。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220625/ 影像：Antonio Canaveras, Chiara Tronci, Giovanni Esposito, Giuseppe Conzo, Luciana Guariglia, (Gruppo Astrofili Palidoro) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220625.html Powered by Firstory Hosting

太陽絲 是 tī 太陽表面 ê 太陽活跳區 頂懸，循環磁場發出 ê 超大型、超高溫 ê 電漿流。Kah 太陽盤比起來，太陽絲看起來烏烏，這是因為伊 ê 溫度較低，所以看起來比 太陽光球層 較暗。這寡浮 tī 太陽邊界頂懸 ê 結構，若是背景是烏暗 ê 太空，in 看起來就會較光，這个時陣咱就 kā 叫做 日珥。太陽絲爆發包括 ùi 太陽盤頭前行過--ê，kah 湠到太陽邊界外口 ê 磁化電漿流。Hα 波段 ê 太陽特寫是 tī 6 月 22 翕--ê。太陽活跳區 AR3038 就 tī 正爿，欲倚 太陽西爿邊界 遐。太陽活跳區 AR3038 是綴太陽踅到邊界 ê 時陣才看會著--ê。過去 tī 太陽活跳區頂懸遮爾大 ê 太陽絲，這馬變做是日珥 ê 一部份。毋知你敢知影太陽活跳區 AR3038 ê 太陽絲爆發是有偌大？相片正爿頂懸角仔遐，有囥一粒地球做比例，予你做參考。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220624/ 影像：Martin Wise 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220624.html Powered by Firstory Hosting

美麗 ê 捲螺仔星系 NGC 6744 ê 大細差不多是 17 萬 5000 光年闊，比 咱 ê 銀河系 閣較大。伊 chhāi tī 南方星座 孔雀座 遐，離咱有 3000 萬光年遠。咱若是用細台望遠鏡 kā 看，伊干焦是一个暗暗霧霧 ê 天體。這个島宇宙離咱無蓋遠，伊 ê 星系盤趨 tùi 咱 ê 視線方向，所以這張顯目 ê 望遠鏡景色才看會著詳細 ê 星系肖像。這幅圖 ê 視野大細，差不多 kah 規粒月娘 ê 視角平大。這个大星系 ê 中心，有一个 搝長 ê 黃色星系核。這个黃光主要是 ùi 較老較冷 ê 恆星 來--ê。除了星系核，伊閣有足闊 ê 捲螺仔手骨，面頂攏是藍色少年星團 kah 一搭一搭 ê 粉紅仔色恆星形成區。倒爿下跤有一條較長 ê 捲螺仔手骨，掃過一个較細 ê 衛星星系 NGC 6744A。看著 NGC 6744 ê 星系伴，予咱想著咱銀河系嘛是有一个衛星星系，大麥哲倫星系。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220623/ 影像：Basudeb Chakrabarti 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220623.html Powered by Firstory Hosting

超巨星 天鵝座 γ（天津一）是佇北十字座 ê 中心遐。這个有名 ê 星群，就敢若是一隻天鵝飛佇北半球熱天懸懸 ê 夜空中。In 就是 天鵝座，佇銀河盤附近遐。天津一佇英語內底正式 ê 名 就號做 Sadr。這幅彩色影像是 ùi 闊頻 kah 狹頻影像資料來--ê，天津一就佇這幅 望遠鏡景色 中央倚下跤遐。伊佇天頂 ê 視野範圍差不多是 3 度闊（6 粒月圓 ê 大細）。內底閣有發射星雲 IC 1318 kah 開放星團 NGC 6910。相片倚頂懸咧發光--ê，看起來敢若是去予長長 ê 塗粉帶分做兩爿 ê 宇宙翼股。所以 IC 1318 才會叫做 蝶仔星雲，這嘛誠好理解。天津一 ê 正爿是一陣少年、實櫼 ê 星團 NGC 6910。咱到天津一 ê 距離 差不多是 560 秒差距，按呢差不多是 1800 光年遠。咱估計 IC 1318 kah NGC 6910 到咱 ê 距離，差不多是 2000 到 5000 光年遐爾遠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220618/ 影像：Min Xie, Chen Wu, Yizhou Zhang, and Benchu Tang 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220618.html Powered by Firstory Hosting

2022 年有四擺超級月娘。超級月娘 ê 定義，就是月球 tī 伊踅地球 ê 軌道面頂 行到伊離近地點 ê 距離 90% 以上 ê 時陣，月娘看起來會較大粒。今年 ê 超級月娘會 tī 5 月 14，6 月 14，7 月 13，kah 8 月 12 出現。近地點附近 ê 月圓，tī 地球天頂看起來是上光上大--ê。毋閣逐擺月圓 ê 寸尺 kah 輝度 ê 差別足細--ê，實際上咱 ê 目睭是無法度看出 in 有啥物無仝。這張相片是 kā 6 月 14 翕 ê 兩張超級月娘疊做一張--ê。Tùi 北美洲 ê 觀星者 來講，這擺 ê 月圓嘛叫做 i-chhí-go͘h 月娘。會叫做 i-chhí-go͘h 月娘，毋是因為伊看起來是粉紅仔色--ê，是因為六月是北美洲原住民採收 i-chhí-go͘h ê 季節。這兩張連紲翕 ê 相片，一張是短時間感光--ê，另外一張是長時間感光--ê。短時間彼張，看會著咱較熟似 ê 反射日光 ê 月娘。長時間彼張，看會著 較暗 ê 月冕 kah 大氣 ê 雲景。這攏是踮 中國重慶 翕--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220616/ 影像：Jeff Dai (TWAN) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220616.html Powered by Firstory Hosting

你敢捌看過月出？這个月出影片可能會予你印象足深 ê，是 tī 月圓彼工，月娘 ùi 晴和 ê 地平線沓沓仔 peh--起來 ê 景色。這是 2013 年初 tī 紐西蘭 Wellington ê Victoria 山 觀景台 翕 ê，是一位 厚工 ê 天文攝影師 ê 詳細計畫。伊 kā kha-mé-lah 囥 tī 2 公里遠 ê 所在，向觀景台 ê 方向翕，按呢 to̍h 會翕著 月娘 tī 暗暝 peh--起來 ê 模樣。這个毋是縮時攝影，逐張相片 ê 時間 攏是照真 ê、無改過 ê。咱 會當看著 tī Victoria 山 觀景台 ê 人，當咧欣賞地球上大粒衛星拄 peh--起來時陣 ê 月光。欲看著 月出 並無困難。伊逐工攏會出現，毋閣 kan-na 有一半 ê 時間會 tī 暗暝出現。月娘逐工會比前一工閣 較晏 50 分鐘 peh--起來。月圓彼工一定是日頭落山彼陣 peh--起來。10 月 16 這禮拜六是 國際觀月之夜，你會當 tī 這工 kah 其他月娘愛好者 做伙看著頂月眉。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211010/ 影像：Mark Gee 音樂：Tenderness (Dan Phillipson) 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211010.html Powered by Firstory Hosting

室女座星系團 是離咱 銀河系 上近 ê 星系團。因為 室女座星系團 離咱足倚--ê，所以伊踮天頂看起來有 5 度 遐爾闊，差不多是 規粒月娘 ê 10 倍大。離咱上倚 ê 室女座星系團，伊 ê 中心離咱有 7000 萬光年遠，內底有超過 2000 个星系。伊有 足強 ê 引力，kā 本星系群 內底 ê 星系，嘛包括咱 ê 銀河，攏搝搝做伙。星系團 內底毋若有恆星組成 ê 星系，嘛有溫度懸甲會發出 X-光 ê 高溫 氣體。星系團內底 ê 星系 kah 星系團邊仔星系 ê 運動，暗示講星系團內底 ê 烏暗物質，比發光物質猶閣較濟。這張相片是 室女座星系團 ê 中心，內底有足光 ê Messier 星系。像倒爿頂懸有 Markarian ê 目睭，中央倚正爿頂懸有 M86，上正爿有 M84，正爿下跤有 捲螺仔星系 NGC 4388。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220615/ 影像：Saulius Adomaitis 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220615.html Powered by Firstory Hosting

根據人類歷史 ê 記錄，一萬年前有一工，天欲暗進前，有一个新 ê 光線忽然間出現 tī 夜空，幾若禮拜了後就暗去矣。咱今仔日知影講，這个光線是 ùi 超新星，就是爆炸 ê 恆星 來--ê。脹大 ê 屑仔雲就是 超新星殘骸，去 hŏng 叫做是 面紗星雲。這張影像是用特別 ê 彩色濾光片翕--ê。紅色是 硫磺 發射線，青色是 水素 發射線，藍色是 酸素 發射線。這張深空闊幅景色已經 kā 恆星徙走矣，按呢咱才有法度看著這个 hŏng 印象足深 ê 面紗星雲內底，咧發光 ê 雲絲。面紗星雲 ê 另外一个名叫做 天鵝座環。因為伊是圓箍仔形--ê，tī 天頂 ê 大細有 3 度闊，就 tī 天鵝座遐。這个環內底閣有足有名 ê 夜婆星雲、尪姨掃帚星雲、kah Fleming 三角精靈。這 規个超新星殘骸，離咱有 1400 光年 遠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220622/ 影像：Craig Stocks (Utah Desert Remote Observatories) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220622.html Powered by Firstory Hosting

天頂 ê 日頭敢會逐工行轉去原來彼位？袂呢！想袂知影這个答案，來看 日行軌跡 會較清楚，就是 kā 一冬內 仝一个時間仝一个所在 翕 ê 日頭相片疊做一張。這張日行軌跡 是 kā 足濟工 2021 年下晡 4:30 踮 台灣 翕 ê 相片疊出來 ê 結果。前景是 台北市 ê 剪影，咱嘛看會著上懸彼个 台北 101。日頭 tī 天頂上倒爿 ê 時，是 12 月 ê 冬節。日頭 tī 天頂上正爿 ê 時，是 6 月 ê 夏節。這張閣有翕著 冬節、夏節、春分、秋分 這幾工，日頭規工是按怎咧行。今仔日是 2022 年北半球 ê 夏節，抑就是講，這工 ê 日頭 會 tī 地球 天頂 留上久。Tùi 足濟國家來講，今仔日是官方換 季 ê 日子。咱若是踮南半球，今仔日就是冬季 ê 頭一工。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220621/ 影像：Meiying Lee (李美英) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220621.html Powered by Firstory Hosting

彼个！踮中央較倚正爿彼个，是啥物？火星表面一直有一寡新 ê 趣味代 出現。最近這个新發現，是一个手指頭仔形 ê 岩石。這張相片是 火星 ê 好奇號機器人探測車 佇頂個月 翕--ê，內底有直直徛咧 ê 細塊岩石。雖罔講這个寸尺 kah 外形有成細隻 蛇，毋閣若是講著 in ê 起源，這馬較 hŏng 接受 ê 解說是講，是水 流過岩石閬縫 ê 時陣，留落來 ê 細塊礦物 ê 集合體。是當初時，有一寡 較實密 ê 礦物 kā 岩石閬縫窒予密，等邊仔 ê 岩石去予侵蝕了了 了後，就賰這寡集合體矣。地球面頂 kah 這有類似起源 ê 岩石，就是有名 ê 巫毒石林。NASA ê 好奇號探測車，這馬繼續踮火星 ê Gale 隕石坑 內底揣古早時代 水 ê 線索。伊嘛紀錄火星 ê 地質資料，因為這 tùi 未來人類欲探索 火星，是足重要 ê 資訊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220620/ 影像：NASA, JPL-Caltech, MSSS 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220620.html Powered by Firstory Hosting

你若是踮葡萄牙 Alentejo 附近，暗暝就當綴這條迵過 Alqueva 夜空保護區 ê 車路行看覓咧。你嘛會使停落來，欣賞 天頂彼條牛奶路。這張 ùi 地平線 到地平線，180 度 ê 全景相片 是 6 月 3 號翕--ê。咱 ê 銀河，英語叫做 Milky Way 牛奶路，意思就是講，伊看起來敢若是天頂有一條牛奶色 ê 路。咱 ê 星系，英語叫做 Galaxy，是 ùi 希臘話 ê 牛奶 ê 意思延伸來--ê。Tī 咱美麗地球 無月娘 ê 烏暗夜空，欲揣銀河彎弓實在是足簡單--ê。毋閣無這張彩色相片遮爾光就是矣。天頂光-iàⁿ-iàⁿ ê 光帶，是銀河盤面頂算袂清 ê 恆星。這寡恆星傷暗矣，煞無法度逐粒攏看遐爾清楚。這寡霧霧 ê 恆星光，去予銀河內底閘光 ê 大片星際塗粉帶 kā 切斷去矣。Tī 這張全景夜空景色內底，徛踮銀河彎弓面頂 彼粒足光 ê 恆星，是織女星。閣有，銀河 ê 中央核球 是 tī 倚正爿 ê 地平線遐。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220611/ 影像：David Cruz 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220611.html Powered by Firstory Hosting

因為有這張有創意 ê 天文合作相片，你才會當看著 kā 北半球天頂 kah 南 半球天頂 鬥做伙 ê 銀河盤。為著欲鬥出這張闊幅 ê 合成夜景，智利 ê El Sauce 天文台 kah 法國 Alps 山頂 ê Saint-Veran 天文台 tī 仝一工翕 in 天頂 ê 銀河。兩爿 ê 時間差 6 點鐘，按呢等 地球 自轉踅過去，就有法度 kā 天文台圓厝頂 天頂 ê 銀河 對予好勢。是講 in 兩爿有用仝型 ê kha-mé-lah kah 鏡頭，鬥 tī 普通 ê 三跤馬頂懸來翕。智利 ê 暗暝是烏-mih-mà，咱會當 tī 天文台圓厝頂附近 ê 夜空，看著氣輝 kah 大小麥哲倫星雲。Tī 法國 Alps 山嘛是用差不多 ê 感光時間 leh 翕，毋閣光害就較嚴重矣。就算是按呢，咱猶是會當 tī 北天 ê 地平線附近，揣著遙遠 ê 仙女座星系。這兩个天文台 ê 距離，差不多是一萬公里遐爾長。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220603/ 影像：Maxime Oudoux, Jean-Francois GELY 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220603.html Powered by Firstory Hosting

這毋是風暴中心，毋閣是一个值得紀念 ê 暗暝。昨暝是 武仙座 τ 流星雨上濟彼工，這是一个毋是蓋濟、有當時仔才會出現 ê 流星雨，是 ùi 破去 ê 彗星 73P/Schwassmann-Wachmann 3 號 ê 彗星屑仔來--ê。今年 ê 計算 kā 咱講，地球會行過 彗星殘骸 特別厚 ê 所在，按呢就會 tī 武仙座 ê 方向產生 足光 ê 流星西北雨。毋閣實際上咱看著--ê，無算是流星西北雨，干焦是 一般 ê 流星雨。這張相片是 kā 5 月 30 半暝 tī 美國 Arizona 州 ê Kitt Peak 國家天文台 翕--ê 超過 2.5 點鐘久 ê 影像合做一張--ê。Tī 彼陣有翕著 19 粒武仙座 τ 流星，kah 4 粒其他 ê 流星。毋閣你敢有法度揣著 in？前景較倚頭前彼个是 直徑 2.3 公尺闊 ê Bok 望遠鏡，tī 伊後壁彼个 是 直徑 4 公尺闊 ê Mayall 望遠鏡。武仙座 τ 流星雨逐年攏有。毋閣明年，伊應該會閣變轉去原本 較低流星率 ê 時期。伊後一擺閣變轉來活跳期 ê 暗暝，應該愛等到 2049 年矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220601/ 影像：Jianwei Lyu (Steward Obs., U. Arizona) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220601.html Powered by Firstory Hosting

是哩！毋知你敢有看著一隻獅？這張長時間感光相片 ê 中央倒爿下跤遐，有一个有名 ê 烏雲 區，伊 ê 形體看起來 to̍h 親像是一个馬頭，彼是咱早 to̍h 知影 ê 馬頭星雲。馬頭星雲 (Barnard 33) 是 吸收烏暗 塗粉 kah 發光氣體 大型複合體 ê 一部份。為著欲看較清楚 馬頭星雲 ê 細節，天文攝影師 累積 20 點鐘久 水素 (柑仔色)、酸素 (藍色)、kah 硫磺 (青色) ê 感光。落尾伊 to̍h tī 黎巴嫩 Raachine 翕著這張壯觀 ê 相片。相片內底 ê 細節，包括有錯綜複雜 ê 氣體絲 kah 坱蓬蓬 ê 塗粉 絲。這塊掛 tī 天頂 ê 地毯，是幾若萬年來，恆星風 kah 古早時代 ê 超新星 製造、雕出來 ê。這个組合 閣 tī 馬頭星雲 面頂彼个闊莽莽 ê 柑仔色氣體內底，產生 另外一个 敢若嘛是 動物 ê 外形：獅頭。火舌星雲 to̍h tī 馬頭星雲 ê 倒爿。馬頭星雲 離咱有 1500 光年 遠，to̍h tī 獵戶 座 ê 方向遐。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220307/ 影像：Maroun Mahfoud 音樂：P!SCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap220307.html Powered by Firstory Hosting

背景這寡光巡是啥物？是人造衛星 ê 軌跡啦！欲講這進前，咱先來看前景這寡美麗 ê 尖峰石林。In 是佇 澳洲 西爿 ê Nambung 國家公園 揣著--ê，in kah 人差不多平懸，是用古早時代一款 石灰石 貝殼，毋知經過啥物過程做出來--ê。毋閣閣較引人注目--ê，是背景 ê 天景。In 是 低軌道踅地 衛星 反射日光 ê 光巡，攏是佇 2 點鐘內 ê 時間翕著--ê。前景是等背景翕煞了後，用仝一台 kha-mé-lah 踮仝一位翕--ê。落尾才用數位合成 ê 方式，疊出 這張相片。大部份 ê 光巡 是這馬猶咧發展 ê 通訊衛星 星鏈 衛星網來--ê，毋閣有一寡毋是。這寡 光巡 表示講，天欲暗了後抑是天欲光進前，地球 天頂會當連紲看著 人造衛星 ê 數量增加矣。這个現象 tùi 地面 kha-mé-lah 抑是地面天文望遠鏡來講，攏是足重要 ê 議題。因為毋管是想欲翕 優美 ê 天文相片，抑是人類想欲理解 遙遠宇宙 背後 ê 科學智識，咱攏愛 了解 這寡衛星軌跡，才有法度 kā in tùi 影像造成 ê 影響 刣掉。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220614/ 影像：Joshua Rozells 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220614.html Powered by Firstory Hosting

禮拜去拄著五月 ê 月圓，又閣叫做 花月。這工有 月全食，就是規粒月娘趨 tùi 地球烏影內產生 ê 現象。因為天頂 ê 雲有較濟，一寡觀星者足煩惱--ê。毋閣這張 tī 智利 Atacama 沙漠 ê 望遠鏡速翕，猶是有翕著足精彩 ê 天景畫面。Tī 月全食拄開始彼陣，天頂有薄薄懸懸 ê 絹雲。月娘去予完全閘去進前，日光照出 ê 月眉形，就親像是一粒霧霧 ê 寶石 tī 月盤面頂發光。這擺 ê 月圓拄仔好是月球行到近地點，就是月球 tī 長株圓軌道 行到離咱上倚彼位。伊 ùi 地球 本影區 ê 中心附近行過，所以這擺 ê 月全食有 90 分鐘遐爾久。雖罔講行到本影區 ê 月球照袂著光，毋閣猶是有日光會迵過大氣層，散射到月球頂。結果就予月娘看起來較紅，「血月」這个偏名就是按呢衝起來--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220518/ 影像：Tomas Slovinsky 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220518.html Powered by Firstory Hosting

渦輪星系是一个足典型 ê 捲螺仔星系。伊嘛叫做 M51 抑是 NGC 5194，是天頂上光 上媠 ê 星系之一。伊離咱干焦 3000 萬 光年 遠，大細干焦 6 萬光年闊爾爾。這張影像 是 踅地球 ê Hubble 太空望遠鏡 kā 伊翕--ê 無仝色 ê 影像，用數位組合方式 kā 鬥做一張--ê，會當看著足濟清楚 ê 細節。毋閣，你若是有袂䆀 ê 雙筒千里鏡，你嘛會使踮 獵犬 ê 星座（獵犬座） ê 方向揣著 渦輪星系。M51 是 Sc 型 ê 捲螺仔星系，而且伊嘛是 規个星系群 內底 ê 主要成員。天文學家 推測 講，M51 ê 捲螺仔結構 會生做按呢，主要是因為伊 kah 影像倒爿彼个 較細 ê 星系，當咧進行引力交互作用 ê 關係。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220613/ 影像來源：NASA, ESA, Hubble, HLA; 資料處理 kah 版權：Bernard Miller 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220613.html Powered by Firstory Hosting

你敢有看著月娘內底彼个查埔人？這个問題愛看 看的人是毋是有 想像力，有法度 kā 實際上無存在 ê 物件看做咱熟似 ê 圖樣。月娘 表面 ê 紋理有足濟有標誌性 ê 圖樣，毋若佇現代西方文化揣會著，歷史上嘛佇 世界各地 ê 民間故事 內底揣會著。比論講，咱若是綴 月娘 無仝方向去看，就會看著 月娘內底 ê 姑娘仔 抑是 兔仔。有一个面模 ê 想像，是 ùi 月娘 中央較倚面頂 ê 月海 來--ê，彼看起來敢若是 一个查埔人 ê 面。這是因為月海內底有兩个較暗 ê 圓窟仔，就親像是人 ê 目睭。較 hŏng 意外 ê 是，咱若是用天文望遠鏡 斟酌來 kā 看，就會看著月娘相片內底 真正有 一个查埔人，佇月球表面出現一个剪影。這張計畫好勢 ê 相片是 2016 年踮 西班牙 馬德里 ê Cadalso de los Vidrios 翕--ê。毋知你敢有法度 踮月娘面頂揣著你佮意 ê 圖樣？ ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220612/ 影像：Dani Caxete 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220612.html Powered by Firstory Hosting

這張彩色 ê 望遠鏡景色 是星系三重奏，是一組當咧進行交互作用 ê 星系。In 離咱差不多是 9000 光年遠，tī 室女座 ê 方向遐。正爿彼兩粒 十字型光點，是銀河系 ê 前景星。In ê 色調 kah 其他星系相-siâng，提醒講咱銀河系 ê 恆星 kah 遙遠 島宇宙 ê 恆星是差不多仝款。三重奏主要 ê 成員 NGC 5566 有寬闊 ê 捲螺仔手骨 kah 閘光 ê 塗粉帶。伊足大--ê，差不多有 15 萬光年遐爾闊。伊面頂是較細較藍 ê 星系 NGC 5569。中央附近有第三个星系 NGC 5560。看會出來伊 kah 較大 ê NGC 5566 有交互作用，已經去予搝甲弄家散宅矣。這組星系三重奏，嘛去予 Halton Arp 囥入去 伊 tī 1966 年編 ê Atlas 特殊星系星表，就叫做 Arp 286。是講，這款 宇宙中 ê 交互作用，咱這馬知影講，這嘛是 星系演化 ê 一部份。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220610/ 影像：Nicolas Rolland, Telescope.Live 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220610.html Powered by Firstory Hosting

這寡宇宙雲 ê 成份是氣體 kah 塗粉，in 就 tī 咱銀河盤面頂 足濟恆星 ê 所在，差不多是 tī 天鵝座 ê 方向遐。毋閣 in 傷暗矣，就算是 tī 晴和無光 ê 暗暝，咱猶是無法度直接用目睭看著。這張 10 度闊 ê 視野影像資料，是用 kha-mé-lah 鬥 天文攝影鏡頭，閣鬥狹頻濾光片翕--ê。這張深空拼鬥影像，予人看著恆星形成 ê 塗粉雲剪影，閣有水素原子氣體 kah 酸素原子氣體 ê 特徵發射光。頂懸彼个足出眾 ê 發射星雲是 NGC 6888。伊是去予大質量 Wolf-Rayet 星 ê 恆星風歕出來--ê，大細差不多是 25 光年闊。伊嘛叫做 月眉星雲。視野中央倚下跤較暗彼个藍色虯毛雲，嘛是 Wolf-Rayet 星做 ê 記號。伊用足驚--人 ê 速度 leh 燒，免偌久就行到恆星性命上尾 ê 坎站矣。落尾恆星會爆炸，變做足壯觀 ê 超新星爆炸。倚正爿遐閣有一粒少年 ê 大質量 O-型恆星，提供能量予 鬱金香星雲 Sh2-101 發光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220609/ 影像：Wolfgang Zimmermann 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220609.html Powered by Firstory Hosting

這寡奇怪 ê 痕跡是啥物？地球 表面有一寡足清楚 ê 痕跡 kah 船 leh 行 ê 海路有關。這寡看起來較低較狹 ê 雲帶是 船跡，是 船 ê iăn-jín 噴出來 ê 物質。這寡噴出來 ê 細粒物質叫做 煙霧質，in ê 邊仔會凝 水煙，連鞭就會變做浮 tī 太空中、會當 反射日光 ê 水滴。人類第一擺看著 船跡，是 ùi 1965 年 NASA TIROS 衛星 翕--ê 地球相片 看著--ê。這張相片 是 2009 年 NASA Terra 衛星 ê MODIS 儀器踮 太平洋 面頂翕著--ê，內底有看著足濟 船跡。這寡船跡予 一寡科學家想著一个計畫。In 踮 全世界各地 ê 海洋 設 浮筒站，成做一个浮筒網，kā 有海水 ê 煙霧鹽 噴到空氣中。按呢風就會來鬥相仝，做出會當 反射日光 ê 雲 絲。是講，做這 是欲創啥？做出--ê 這寡人造雲，會當反射 日光，按呢咱就會當對抗 全球暖化 矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220608/ 影像來源：NASA, Terra, MODIS 文稿：Raymond Shaw (MTU) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220608.html Powered by Firstory Hosting

這寡龍敢是 tī 天頂 ê 天壇座 leh 飛？看起來敢若是按呢。毋閣實際上，這个 幻象 是這寡薄薄 ê 氣體 kah 塗粉造成--ê。Tī 南天星座 天壇座 ê 發射星雲 NGC 6188，就是這寡發光星雲 in 兜。伊 tī 大型分子雲邊仔 4000 光年 遠 ê 所在，tī 可見光波段是看袂著。幾若百萬年前，遮有足濟大質量少年 恆星 形成 ê OB1 星協，藏 tī 這个星雲內底。是恆星風 kah 強 紫外光輻射 雕出 這个烏暗外形，嘛 kā 附近 ê 星雲照予光。最近 ê 恆星形成 活動，應該是去予頂一代大質量 恆星 ê 恆星風 kah 超新星爆炸 掃著風颱尾、壓縮分子雲，才驅動 新 ê 恆星形成--ê。踮這个有 NGC 6188 ê 宇宙畫布 內底，咱會當 tī 正爿下跤看著一个較罕得看著 ê 發射星雲 NGC 6164。伊嘛是 ùi 其中一个恆星形成區內底 ê 大質量 O-型恆星 產生--ê。下底 ê NGC 6164 kah 足濟 行星型星雲 仝款引人注目，伊有對伨 ê 氣體殼。踅 tī 中央較光彼粒恆星外口--ê，是較暗 ê 星暈。NGC 6188 這張 hŏng 印象足深 ê 闊幅 相片，有 2 度闊 (4 粒月娘 ê 闊度)。照這个距離推算，按呢差不多有超過 150 光年闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220607/ 影像：Shaun Robertson 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220607.html Powered by Firstory Hosting

咱 ê 銀河系，未來是毋是會 kah 伊 ê 厝邊大星系，仙女座星系相挵咧？應該是會！咱若是 kā M31 內 ê 恆星 相對背景星系 ê 小變位，細膩畫踮 最近翕--ê Hubble 太空望遠鏡 影像面頂，就會當預測 M31 中心 kah 咱 銀河系 中心，未來可能會直接 相挵。毋閣，側向速度 ê 精差猶足大--ê，表示講兩个星系欲相挵 ê 時陣，可能袂 ùi 中心直接相挵，應該 會小可仔相閃過。是講 in 猶是 足倚--ê，按呢 in 外部 ê 星系暈猶是會因為引力作用 互相交纏。等這个作用開始了後，兩个星系會 tī 未來 幾若十億年 ê 時間內捒做堆、四界跳舞，落尾會合併 做一个 較大 ê 長株圓星系。這張 合成影像是欲予咱看講，兩个星系 ùi 外部 開始相挵 以後，咱未來會 tī 天頂看著啥物款 ê 景色。Tī 紲落來幾若年，咱銀河系 kah 咱附近規个 本星系群 ê 未來，應該猶是一个足衝 ê 研究主題。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220606/ 影像：NASA, ESA, Z. Levay and R. van der Marel (STScI); T. Hallas; and A. Mellinger 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220606.html Powered by Firstory Hosting

活跳星系 3C 75 ê 中心是發生啥物代誌？Tī 這張 合成 ê X-光 (藍色) kah 電波 (粉紅仔色) 影像內底，彼兩粒足光 ê 天體是互踅 ê 超大質量烏洞。In 產生 ê 能量，會予 3C 75 發出足強 ê 電波，成做一个電波源。這兩粒 超大質量烏洞 互相 ê 距離是 2 萬 5000 光年 遠，有幾若百萬度燒 ê X-光 發射氣體踅 in 咧行，閣會噴出相對論粒子 ê 噴流。Tī Abell 400 星系團內底有 兩个當咧合併 ê 星系，in ê 核心離咱是 3 億光年遠。天文學家 ê 結論是講，這兩粒超大質量 烏洞 是 tī 雙星系統內底，因為引力縛做伙--ê。有一部份 ê 理由是講，噴流一直按呢掃轉來，應該是因為 in 用一秒鐘 1200 公里緊 ê 速度迵過 高溫 ê 星系團氣體 彼陣，產生 ê 共同運動。這款壯觀 ê 宇宙合併，去 hŏng 認為是 tī 遙遠宇宙 實櫼 ê 星系團內，足四常 ê 現象。Tī 合併 ê 上尾階段，應該會變做 重力波 上主要 ê 來源。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220605/ 影像：X-Ray: NASA/CXC/D. Hudson, T. Reiprich et al. (AIfA); Radio: NRAO/VLA/ NRL 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220605.html Powered by Firstory Hosting

這張 ùi 太空翕地球邊界 ê 景色，視野有 8 度闊。Tī 5 月 31 彼工，有記錄著幾若十粒平行 ê 流星軌跡。這張相片是 踅地球 ê 仰望一號 太空望遠鏡 leh 進行 5 分鐘久 ê 系列觀測內底 ê 其中一張。這是 tī 武仙座 τ 流星雨 上濟 ê 彼陣，就是 世界時 3:43 翕--ê。Kah 預測 ê 仝款，今年 ê 流星雨是伊 ê 活跳期，因為地球 ùi 破去 ê 彗星 73P/Schwassmann-Wachmann 3 號 留踮太空 ê 彗星屑仔較濟 ê 所在行過。毋閣遮攏無較光 ê 流星。仰望一號太空望遠鏡翕 ê 武仙座 τ 流星雨攏傷暗矣，咱用地面望遠鏡是看袂著。毋閣彼工猶是有一寡 有耐性 ê 地面 觀星者，tī 天氣較好 ê 時陣，享受 武仙座 τ 流星雨 這改有紀念性 ê 表演。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220604/ 影像：Zhuoxiao Wang, 仰望一號太空望遠鏡, Origin.Space 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220604.html Powered by Firstory Hosting

為著欲揣出造成 NGC 1316 遮爾特殊景色 ê 原因，天文學家煞來變做偵探。研究發現 NGC 1316 是一个足大型 ê 長株圓星系。伊差不多 tī 1 億年前，就開始咧食伊厝邊一个較細 ê 捲螺仔星系，就是正爿頂懸彼个 NGC 1317。支持這款講法 ê 證據，就是咱會當 tī 這張闊幅深空 ê 影像內底，看著 捲螺仔 星系才有 ê 暗 塗粉帶、無蓋清楚 ê 捲螺仔結構、kah 恆星氣體相濫 ê 外殼。毋閣有一項代誌 咱猶無啥清楚，就是內底有一寡 應該袂出現 tī 遐 ê 細粒 球形星團，就是相片內底較暗彼寡光點。大部份 ê 長株圓星系 有比 NGC 1316 閣較濟、閣較光 ê 球形星團。毋閣這寡 球形星團 實在是傷老矣，應該毋是因為 kah 捲螺仔星系相挵，才生出來--ê。有一款假說是講，這寡 球形星團，是 NGC 1316 閣較早進前 食去 ê 星系 所留落來 ê 物件。NGC 1316 嘛叫做 天爐座 A。伊閣有一个 hŏng 掣一趒 ê 特性，就是伊 ê 巨型氣體瓣 tī 電波波段 實在是有夠光--ê 啦！ ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220517/ 影像來源 kah 版權：翕相：Greg Turgeon; 影像處理：Kiko Fairbairn 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220517.html Powered by Firstory Hosting

5 月 27 欲暗仔彼陣，天頂 已經 有幾若粒行星矣。這工 ê 金星是透早星，伊這馬 chhāi tī 下月眉 附近。金星 kah 下月眉 tī 天頂 是遮爾相倚。全世界 ê 天文觀星者，攏咧欣賞這个第二光 kah 第三光 ê 天體合相。毋閣咱若是 chhāi tī 東南亞 kah 印度洋之間 ê 路線，咱就有法度看著月娘 ùi 金星面頭前行過，這就叫做 月掩金星。Tī 這張動畫圖內底，這粒有 75 葩金星盤 ê 金星，欲 ùi 月球反射太陽光 ê 西南爿落去。這張望遠鏡景色，是 tī 當地時間透早 4:50 ùi 印度洋 ê Reunion 島翕月娘 kah 金星 tī 東爿地平線附近 ê 景色。彼陣 ê 金星 離 Reunion 島超過 1 億 8000 萬公里遠，離月球干焦 40 萬公里遠。過 50 分鐘了後，金星就 ùi 月娘後壁 出現矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220602/ 影像：Quentin Gineys 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220602.html Powered by Firstory Hosting

毛蟹星雲 tī 彼个有名 ê Charles Messier 星表內底編做 M1，是星表內底頭一粒天體。是講這个星表內底 ê 天體，攏毋是彗星。實際上，咱這馬知影講，毛蟹星雲 其實 是一个 超新星殘骸。伊是大質量恆星死亡爆炸了後，殘骸噴出去 ê 現象。這个現象 tī 西元 1054 年 ê 時陣 去予人看著，一直到今。這張大膽 ê 全新影像 是 毛蟹星雲 ê 21 世紀影像。是 kā 規个 電磁頻譜 ê 觀測資料，用可見光影像來表示。太空 ê 觀測資料是 ùi Chandra (X-光)、XMM-Newton (紫外光)、哈伯 (可見光)、kah Spitzer (紅外線) 望遠鏡來 ê，分別是 茄仔色、藍色、青色、kah 黃色。地面 ê 觀測資料是 ùi 超大陣列電波望遠鏡 (VLA) 來 ê，是紅色 ê。對現代天文學家來講，毛蟹星雲脈動星 實在是有夠特別 ê。伊 ê 中心其實是一粒中子星，一秒鐘踅 30 輾。相片中央彼粒光點 to̍h 是矣。恆星核心崩塌 ê 殘骸，會當予毛蟹星雲 tī 規个電磁頻譜 發射電磁波，to̍h 親像是宇宙發電機仝款。毛蟹星雲有 12 光年闊，離咱有 6500 光年遠。咱會當 tī 金牛座 ê 方向揣著伊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220304/ 影像：NASA, ESA, G. Dubner (IAFE, CONICET-University of Buenos Aires) et al.;A. Loll et al.; T. Temim et al.; F. Seward et al.; VLA/NRAO/AUI/NSF; Chandra/CXC; Spitzer/JPL-Caltech; XMM-Newton/ESA; Hubble/STScI 音樂：P!SCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap220304.html Powered by Firstory Hosting

西元 185 年 ê 時陣，中國天文學家 記錄著這个 tī 南門星官 ê 新恆星。這个天區 tī 現代星表叫做 半人馬座 α kah β。這粒新恆星 tī 彼陣，光甲有幾若個月攏會當直接看著。伊應該就是歷史上 有紀錄 ê 上早一粒超新星。這張深空影像內底有發射星雲 RCW 86。咱這馬知影伊是恆星爆炸了後 ê 殘骸。這張狹頻資料追蹤去予 脹大 震波 離子化 ê 氣體。這張 天文影像 暗示講，這內底有足濟鐵元素。毋閣 超新星殘骸 內底無揣著中子星 猶是 脈動星，表示講本底彼粒超新星應該是 Ia 型--ê。Kah 大質量恆星 核心崩塌 ê 超新星爆炸無仝，Ia 型超新星 是 白矮星 ùi 雙星系統 ê 星伴 吸積物質 產生 ê 熱核爆炸。雖罔講這个超新星殘骸 chhāi tī 銀河 盤附近，而且伊 tī 天頂比月娘看起來閣較大粒。毋閣伊實在是傷暗矣，煞看無。RCW 86 離咱有 8000 光年遠，差不多有 100 光年闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220528/ 影像：Martin Pugh 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220528.html Powered by Firstory Hosting

遮爾大型 ê 起跤龍袂 tī 地球出現。2006 年，有一个大型 ê 太陽閃焰 ùi 地球大細 ê 太陽烏子 噴出來，產生 起跤龍 形 ê 震波。這 tùi 太陽來講，實在是 有夠壯觀--ê。這張相片 是 起跤龍震波 ùi 太陽活跳區 AR 10930 噴出來 ê 時陣，去予踮 美國 新墨西哥州 ê 太陽光學巡邏網路 (OSPAN) 望遠鏡 翕著--ê。這个產生 ê 震波，技術上咱 kā 叫做 Moreton 波，是 kā 太陽 光球層 內底 ê 氣體，嘛包括 水素 氣體，壓縮 kah 加溫，才產生這个一目𥍉仔 ê 爍光。這張相片是咧翕 ùi 水素氣體發出來 ê 特別紅光。這个 四界亂傱 ê 起跤龍，kā 一寡活跳 ê 太陽 雲絲 創斷去矣。是講 in 較等咧嘛是會閣連起來。太陽起跤龍 湠開 ê 速度，是一點鐘 100 萬公里遐爾緊，in 幾若分鐘就踅 太陽 一輾。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220522/ 影像：NSO/AURA/NSF, USAF Research Laboratory 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220522.html Powered by Firstory Hosting

今仔日欲 kā 逐家補充 ê 主題是：台北天頂 ê 日行軌跡。是按怎日行軌跡是 8 字型 ê 呢？ 相關文章：(2022/6/21) 台北天頂 ê 日行軌跡 Powered by Firstory Hosting

這个攝影計畫本底是按算欲翕美麗 ê 天景 kah 一位特別 ê 貴客。結果煞加翕著另外一位來賓，真正是有夠意外--ê 啦！相片上倒爿 ê 美麗背景，是 咱銀河系 中央帶 ê 一部份。相片中央 ê 彩色雲 是 蛇夫座 ρ。這个特別 ê 貴客是正爿彼粒較暗、反紅 ê 月娘。這是 tī 頂禮拜 月全食 彼陣翕--ê。翕相 ê 時間愛著，因為 月娘 tī 發生月食進前 kah 了後會傷光，按呢背景就會看無。這个 意外 ê 來賓，是行過相片中央彼粒 足光 ê 流星。這張相片是 tī 西班牙 Canary 群島 ê La Palma 島 翕--ê。這个 一目𥍉就無--去 ê 流星 軌跡，是 10 張連紲深空影像內底 ê 其中一張 翕著--ê。而且這个 月食影像，是翕著流星了後，tī 仝一个所在，用仝一台 kha-mé-lah 隨翕--ê。後一擺 ê 月全食，按照預測，會 tī 11 月初 出現。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220524/ 影像：Andrei Ionut Dascalu 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220524.html Powered by Firstory Hosting

內海仔星雲中央有 高速捲踅、足壯觀 ê 恆星形成。咱看會著相片中心附近，上無有兩个長長 ê 漏仔形雲，一个差不多有半 光年 長，是極端 恆星風 kah 強力恆星光 形成--ê。這是附近超級光 ê 恆星 Herschel 36 kā 這區照予光--ê。寬闊 ê 塗粉 牆 kā 其他高溫少年 ê 恆星藏 tī 內底，閣 kā in 發出 ê 光變較紅咧。這寡恆星 ê 能量入去到 低溫 ê 塗粉 kah 氣體內底，會 kah 隔壁 ê 物質 產生足大 ê 溫度差，結果就會產生 剪切風，造成 漏仔形 ê 雲。這張相片 差不多有 10 光年闊，是 kā 踅地球咧行 ê Hubble 太空望遠鏡 翕 ê 六種色光影像，鬥做一張--ê。內海仔星雲 嘛叫做 M8，伊 chhāi tī 離咱 5000 光年 遠 ê 射手 座（嘛叫做 人馬座）遐。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220525/ 影像來源：NASA, ESA, Hubble 影像處理 kah 版權：Mehmet Hakan Özsaraç 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220525.html Powered by Firstory Hosting

日出彼陣發射 ê 火箭會產生一个無四常 ê 趣味景色，予咱同齊看著火箭 kah 日頭。這張相片就是其中一張。頂個月 SpaceX 獵鷹 9 號 火箭 ùi NASA Kennedy 太空中心 發射。伊 閣載 53 粒 星鏈衛星 到 踅地低軌道 去。這張發射相片，是火箭 噴出 ê 煙流 咧發光，投影 tī 遙遠 ê 太陽。火箭看起來 彎彎有小可仔奇怪，太陽倚下底彼爿邊界，嘛有 敢若水滴 ê 特殊波紋。造成這个效應 ê 物理原因，是 屈折：就是較高溫抑是較薄 ê 空氣包 kā 日光拗彎 ê 程度，比 較低溫抑是較實密 ê 空氣包較少。是講，倒爿頂懸 ê 太陽烏子活跳區 3014，才無咧插這个 tī 地球 ê 表演，伊就沓沓仔 ùi 太陽表面行過。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220531/ 影像：Michael Cain 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220531.html Powered by Firstory Hosting

彼个島嶼後壁是發生啥物代誌？有一寡咱臆會著--ê，有一寡咱臆袂著--ê。臆會著--ê，應該是圖內底 ê 光線，這嘛叫做 佛光，是 ùi 日頭 來--ê。臆袂著--ê，是 日頭 tī 頂個月底拄著 日偏食，去予 月娘 閘去矣。臆會著--ê，是 日光 遮爾光，ùi 地平線下底 ê 雲 ê 閬縫透光過來。臆袂著--ê，是 佛光 遮爾紅，可能是 地球大氣層 內底有足濟 氣溶膠，kā 大部份 ê 藍光散射去矣。臆會著--ê，是向望會當疊出一張 月娘 kah 日頭 同齊出現 ê 紀念性景色。是講真不幸，tī 遮，ùi 烏拉圭 向 阿根廷 ê 方向看，雲 kā 日食閘牢矣！這嘛毋是完全臆袂著。毋閣，等 in 包袱仔款款咧轉去了後，煞發現翕著美麗閣光 ê 紅色佛光。這真正是臆袂著--ê 啦！順紲講一下，彼个 tī 地平線 ê 島嶼，其實是兩个。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220530/ 影像：Fefo Bouvier 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220530.html Powered by Firstory Hosting

Kah 地球 ê 衛星仝款，土星上大粒 ê 衛星，土衛六 Titan，嘛去予土星鎖牢，綴伊同步自轉矣！這張拼鬥影像 是 Cassini 太空船 tī 2012 年 5 月彼陣記錄--ê。這爿毋是向土星彼爿，是 永遠離 有環 ê 氣體巨行星較遠彼爿。土衛六 Titan 是太陽系內底，唯一有實密大氣層 ê 衛星。嘛是 太陽系 內底，除了地球以外，地表固定有液體 ê 所在。伊 kah 地球仝款，有 落雨 kah 蒸發 ê 循環。這个證據，就 tī Cassini 太空船翕著 ê 這張相片內底。咱看會著這粒 tī 土星環 kah 土星雲頂懸、直徑 5000 公里闊 ê 衛星，tī 較懸海拔 ê 所在，有一層大氣雲霧。中央附近 烏烏--ê 是沙崙區，咱 kā 叫做 Shangri-La。Cassini 太空船 送出去 ê Huygens 探測船，降落 tī 土衛六 Titan，這是 離地球上遠 ê 一擺降落。伊落尾就 tī 倚中央 ê 倒爿下跤遐安息。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220527/ 影像：NASA, JPL-Caltech, Space Science Institute 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220527.html Powered by Firstory Hosting

月娘是啥物色？愛看是佗一工。月娘是袂發光 ê，伊干焦會反射太陽光。咱若是 tī 地球大氣層外口 kā 看，月娘是 美麗 ê 咖啡殕色。毋閣咱若是 ùi 地球大氣層 內底 kā 看，伊看起來可能會無仝。這張相片 kā 無仝色光 ê 月圓 khêng 做一張。這是一位天文攝影師 tī 過去 10 冬內，踮 意大利 無仝地點 記錄 無仝色光 ê 月圓。一般講來，紅色抑是黃色 ê 月娘，攏是 tī 地平線附近看著 ê。藍光行過 地球大氣層 較長路線 ê 時陣，抑是拄著有較幼塗粉 ê 時陣，有一部份 光線會去予散射去。藍色月娘 是閣較罕得看著 ê，代表講咱是 tī 有較大粒塗粉 ê 大氣層內底看著伊--ê。是啥物造成茄仔色 ê 月娘，咱 到今猶毋知，可能是幾若款效應組合起來 ê 結果。上尾彼粒月娘是 2018 年 7 月 ê 月全食。彼陣 ê 月娘，行到 地球 ê 烏影下底。月色會 反紅，是因為光線行過 地球 大氣層 ê 時陣，去予 屈折 去矣。今仔日毋若是月圓時，嘛是 北美洲 佮 南美洲 ê 月全食，咱可能會看著一寡 平常時看袂著 ê 月色。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220515/ 影像：Marcella Giulia Pace 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220515.html Powered by Firstory Hosting

華麗 ê 捲螺仔星系 NGC 4565 ùi 咱地球 kā 看是側向--ê。因為伊狹狹--ê，所以伊嘛叫做 繡針星系。這个光-iàⁿ-iàⁿ ê NGC 4565 tùi 天文觀測團 ê 群眾來講，是北天關注 ê 目標，伊就 tī 暗暗毋閣整齊 ê 后鬃座 遐。這个清楚閣多彩 ê 影像，看會著星系中心有一个 盒仔形、脹脹 ê 星系核。有一條 閘光 ê 塗粉帶，就迒 tī NGC 4565 薄薄 ê 星系盤遐。NGC 4565 離咱有 4000 萬 光年 遠，伊 ê 闊度有 10 萬光年闊。因為咱用細台天文望遠鏡就揣會著 NGC 4565 矣，所以 天文愛好者 認為講，這个遮爾出眾 ê 天體無 tī Messier 星表內底，應該是 伊編星表 ê 時陣 kā 落勾去矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220526/ 影像：Michael Sherick 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220526.html Powered by Firstory Hosting

新單元：天文𥴊仔店 Thian-bûn Kám-á-tiàm 這个單元主要是欲共逐家補充一寡逐工一幅天文圖講過 ê 內容，今仔日欲講 ê 主題是：M51 渦輪星系。 相關文章：(2022/6/13) M51：Hubble 太空望遠鏡翕–ê 渦輪星系 Powered by Firstory Hosting

這張仙女座星系 ê 相片，毋若看會著恆星 tī 佗位，嘛看會著欲出世 ê 恆星會出現 tī 佗位。仙女座星系 M31 是一个 捲螺仔星系。伊遮爾大閣遮爾媠，離咱干焦 250 萬 光年 爾爾。這張足心適 ê 仙女座星系相片，是 kā 太空觀測 kah 地面觀測 tī 可見光波段以內 kah 以外 ê 影像，疊做這張--ê。可見光 看著--ê，是 M31 內底 ê 恆星。白色 kah 藍色是 Hubble 太空望遠鏡、Subaru 地面望遠鏡、kah Mayall 地面望遠鏡 ê 影像資料。紅外線 看著--ê，是 M31 內底，連鞭欲出世 ê 新恆星。In 是柑仔色--ê，是 NASA Spitzer 太空望遠鏡 ê 影像資料。紅外線會當追蹤大型 塗粉帶。塗粉帶會去予恆星加溫，伊綴 仙女座星系 ê 捲螺仔手骨咧行。這寡 塗粉 是星系內底 大量星際氣體 ê 追蹤劑。這寡星際氣體，就是未來欲 做新恆星 ê 原始材料。仙女座星系 會 tī 未來 50 億年 ê 時間內，kah 咱 銀河系 合併 做一个星系。Tī 彼進前，這寡新恆星應該會 先做出來，差不多 tī 紲落來幾若億年 ê 時間內。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220523/ 影像來源：NASA, NSF, NOAJ, Hubble, Subaru, Mayall, DSS, Spitzer 影像處理 kah 版權：Robert Gendler & Russell Croman 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220523.html Powered by Firstory Hosting

行星形星雲 Abell 7 毋是蓋光，伊離咱有 1800 光年遠，tī 獵戶座南方 ê 兔仔星座，天兔座 內底。Abell 7 是 這張深空望遠鏡影像 ê 主角，伊 ê 邊仔有銀河內底 ê 恆星，視線方向有遙遠 ê 背景星系。伊 ê 結構是一个 簡單 ê 圓球形，直徑差不多是 8 光年闊。是講，圓球內底美麗複雜 ê 細節，愛用 狹頻 濾鏡才看會著。咱 kā 水素發射線用紅色表示，kā 酸素發射線用青色 kah 藍色表示，按呢會當予 Abell 7 看起來有一个較自然 ê 形體。若無，伊實在是傷暗矣，煞 看 袂著。行星形星雲 是恆星演化到上尾，一个足短 ê 階段。咱 ê 太陽閣過 50 億 年了後，嘛會變做按呢。Tī 行星形星雲 ê 中心，會有一粒像太陽這款 ê 恆星，kā 伊 ê 外層大氣捒出去。咱估計講，行星形星雲 Abell 7 應該有 2 萬歲矣。伊 ê 中心恆星就是相片中央彼粒 較暗 ê 白矮星，差不多有 100 億歲矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220521/ 影像：Donald Waid 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220521.html Powered by Firstory Hosting

5 月 15 到 16 這暗，美國 Florida 州中部 ê 天氣算袂䆀。這个樹仔頂 ê 光點弧，就是咧記錄月圓 拄著 月全食 ê 系列變化。有一台數位 kha-mé-lah 每 5 分鐘翕一擺，予咱會當看著月食 tī 3 點鐘內 ê 變化過程。月球 趨 tùi 地球烏影 ê 時陣，月盤就變暗、變紅矣。講實在--ê，咱若是算看覓這个系列相片 ê 中央有幾粒月球，就會知影月全食 tī 規个月食過程，佔差不多 90 分鐘 ê 時間。西元前 270 年左右，希臘天文學家 Aristarchus 嘛量過月全食愛經過偌濟時間。應該是 無通用 電子錶抑是數位 kha-mé-lah 啦！毋閣伊猶是用 幾何學 ê 方式，利用月食經過 ê 時間 kah 地球 半徑 ê 大細，簡單閣精確 算出月球 ê 距離。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220519/ 影像：Michael Cain 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220519.html Powered by Firstory Hosting

5 月 16 透早天猶未光，法國海岸 ê Pilat 沙崙 猶暗暗，沙景 kah 天景看起來是遐爾平靜。這工，地球 ê 本影 遮到太空去，kā 月娘閘去矣。遮 ê 月全食 才 tī 月落進前，拄欲開始 niă。猶照會著日光 ê 國際太空站，飛過西爿地平線。相片內底 ê 光弧就是伊 tī 離地球 400 公里懸 ê 太空咧飛。這个簡單構圖 ê 全景圖，是 tī 5 分鐘內連紲翕相 ê 系列相片 ê 其中一張。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220520/ 影像：Maxime Oudoux 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220520.html Powered by Firstory Hosting

北半球 4 月 15 月圓前後 ê 春天暗暝，tī 加拿大 Alberta 省 ê 天頂，出現這寡光閃閃 ê 幻影 。這暗，光映映 ê 月光 kā tī 懸雲 ê 六角形冰晶 屈折 kah 反射去，產生這个 複雜 ê 月暈 kah 光弧。一般講來，這款現象 tī 日時 ê 日光較看會著。雖罔講光弧 kah 幻月（嘛叫做月狗） ê 色光，用目睭就會當直接看著。毋閣這張闊幅 ê 月光天景，是 kā 30 秒到 1/20 秒 無仝感光時間 ê 相片組合起來 ê。這幅圖頂懸 ê 北斗星，拄仔好 tī 咧微微仔笑 ê 環天頂虹弧 面頂。月娘 ê 倒爿有大角星，正爿頂懸有軒轅十四。伊就 tī 這个 22 度月暈 ê 中心。5 月 15 這暗會閣拄著月圓，咱會當 tī 夜空看著光映映 ê 月光。明仔載 ê 月圓會變較暗一段時間，因為月球會 ùi 地球烏影下底行過，產生 月全食。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220514/ 影像：Alan Dyer, Amazingsky.com, TWAN 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220514.html Powered by Firstory Hosting

NGC 346 星團內底 ê 大質量恆星 ê 歲壽足短 ê，毋閣 in 足 活潑 ê。這个星團藏 tī 小麥哲倫星雲 上大 ê 恆星形成區內底，離咱差不多有 21 萬光年遠。恆星風 kah 輻射 tī 差不多 200 光年闊 ê 氣體 kah 塗粉雲內底，掃出一个星際閬縫，驅動 恆星形成，雕出恆星形成區實密 ê 內圍。這个恆星形成區去 hŏng 編做 N66，伊內底嘛有足濟 嬰仔恆星。星團內底四界攏是這寡 嬰仔恆星，in 干焦 300 到 500 萬歲爾爾，in 核心 ê 水素 猶未開始燒。這張 Hubble 太空望遠鏡 ê 假色影像內底，可見光是藍色 ê，近紅外線是青色 ê，水素原子發射線是紅色 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220512/ 影像：NASA, ESA；感謝：Antonella Nota (ESA/STScI) et al. 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220512.html Powered by Firstory Hosting

100 冬前，愛因斯坦 發表 廣義相對論。彼陣伊講，這个世界應該揣會著 重力透鏡 ê 現象。這个遙遠星系 ê 奇怪外形，就是咧講這个現象。這幅圖，是 ùi Chandra 太空望遠鏡 ê X-光影像資料 kah Hubble 太空望遠鏡 ê 可見光影像資料 來 ê。伊有一个偏名，號做笑面貓星系群。笑面貓就是 Alice 夢遊仙境內底彼隻，笑甲身軀無去，嘛猶看會著笑面 ê 貓仔。星系群內底 ê 兩个大長株圓星系，去予幾若條光弧 kā 箍起來。這寡光弧其實是背景遙遠星系 ê 可見光影像，受著前景星系群 重力質量分佈 ê 影響，kā 拗彎去矣。重力質量，是 暗物質 決定 ê。笑面貓 ê 兩粒目睭，就是彼兩个大長株圓星系。In 是這馬當咧合併 ê 兩个星系群內底，上光 ê 兩个星系。In ê 相對相碰速度，差不多是 一秒鐘走 1350 公里遐爾緊。這會共氣體加溫到 幾若百萬度遐爾懸，產生 X-光，就是相片內底茄仔色 ê 部份。你敢對星系群合併 有興趣？這个笑面貓星系群離咱有 46 億光年遠，in 就 tī 大熊座內底 咧笑。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220511/ 影像：X-ray - NASA / CXC / J. Irwin et al. ; Optical - NASA/STScI 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220511.html Powered by Firstory Hosting

星雲會引人注目，可能是因為 in ê 外形看起來 干焦是咱知影 ê 物件。這就親像是 貓仔 共咱 揣麻煩，引起咱 ê 注意仝款。毋閣，無一隻貓仔有法度 踮 天蠍座 創出遮爾大 ê 跤印，咱共伊叫做是 貓掌 星雲。貓掌 星雲離咱有 5500 光年 遠，是一个紅色 ê 發射星雲。紅色主要是 ùi 厚-tut-tut ê 離子化 水素 原子來 ê。伊嘛會使叫做 熊掌星雲，編號是 NGC 6334。Tī 過去 幾若百萬年 ê 時間內，這个星雲做出足濟 太陽 質量 10 倍大 ê 恆星。這張相片 是 貓掌 星雲 ê 深空影像，相片內底 ê 色光，是 ùi 水素、酸素、kah 硫磺 發--出來 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220510/ 影像：Stefan Steve Bemmerl (Saulburg Observatory) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220510.html Powered by Firstory Hosting

真正 ê 城堡無遮爾老，而且背景 ê 星系是比伊閣較老。是講，這看起來有淡薄仔成外星人 ê 城堡。相片內底尖尖 ê 岩石，去 hŏng 叫做是 巫毒石林，in 應該有幾若百萬歲矣。雖罔講，巫毒石林 真罕得看著，毋閣 tī 世界各地 猶攏揣會著。巫毒石林 ê 頂層是較實密 ê 岩石，下層是 較軟 ê 岩石。頂層岩石 會予下層岩石 ê 侵蝕作用 變較慢，落尾就變做這形--ê 矣。相片內底 ê 巫毒石林 是 tī 法國 Alps 山 內底，法語 kā 叫做是 Demoiselles Coiffées，意思是「少女 ê 頭鬃」。背景星系是咱 銀河系 中央盤 ê 一部份，內底有足濟幾若十億歲 ê 恆星。巫毒石林 後壁 ê 天景，是足媠 ê 天鵝座天區，內底有足濟厚塗粉 ê 烏暗雲 kah 發紅光 ê 星雲。這張相片 是兩階段翕--ê：前景是 tī 天欲暗進前 ê 藍色時間 翕--ê，背景是踮仝一位，毋閣是較晏才翕--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20220516/ 影像：Benjamin Barakat 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap220516.html Powered by Firstory Hosting