Middagvervolgverhaal

Conrad Nienaber het meer as een mens erg bekommerd. Dr. Dawie Becker kry 'n onverwagse besoek met 'n nog meer onverwagse versoek. Wie besoek hom met watter versoek?

By wie het Morkel Nienaber sy spoggerige meenthuis gekoop? Wie is die blyste dat die kooptransaksie uiteindelik afgehandel is? Iemand het verdwyn. Die saak moet dringend by die polisie aangemeld word. Wie het verdwyn, en wie meld dit aan?

Kamers 303 en 304 van die Tafelkop Hotel in Tafelbergstraat 30, Kaapstad, sal nooit weer dieselfde wees nie. Wat speel alles in die twee hotelkamers af? Wie is die groot argitek van die planne? En wie is die arme slagoffers?

Martha Sithole is skielik in die spervuur, maar sy is ook in aanvraag. Wie wil van haar dienste gebruik maak? Susara Visagie se vervalste Francois van Dyk-skildery is weer hoog op die agenda. Wat gebeur by die garage langs die N3, wes van Heidelberg?

Hoekom kry Sweetness Botes die wind van voor? Conrad Nienaber wil net op sy eksamens fokus en al sy vakke deurkom. Maar wie neem hom onverwags onder kruisverhoor? Dis tyd vir Seef Visagie se volgende besoek aan die chemokliniek. Wie verras hom daar?

Cindy Nel kry druk van meer as een kant. Hierdie keer aanvaar sy dit nie. Hoekom is Grace Fortuin in 'n slegte bui? Wie staan aan haar verkeerde kant? Sweetness Botes krap weer waar dit nie jeuk nie. Wie is dr. Liebenberg se enigste erfgenaam?

Die Franse glo dat as jou hand vol waarheid is, is dit nie altyd verstandig om dit oop te maak nie. PJ Stofberg kon net sowel 'n Fransman gewees het. Hy weet hoe om sy hand toe te hou. Vir wie hou PJ sy hand so toe?

Koster kom tot stilstand vir die begrafnis van een van sy geliefde gemeenskapsleiers. Die gemeenskapleier se dood maak steeds opslae. Morkel Nienaber is vol innoverende planne, maar kry hy oral die nodige oor en entoesiasme daarvoor?

Dis goed vir kollegas om soms saam te sit en die legkaart van onduidelikhede te probeer voltooi. Al is dit net om aan die einde van die sessie uit te vind hoeveel ontbrekende stukkies daar nog is. Wie het 'n intense gesprek?

Margaret Koster se begrafnis lewer sy kwota verrassings op. Wie daag almal daarvoor op? Wie is die vroue met 'n hart vol nuwe drome? Gaan sy droom of doen?

Waarmee hou Amelia Rossouw haar nou eintlik besig? Wie maak almal van haar talente en dienste gebruik? Wie kry 'n blink plan, en hoe moet dit uitgevoer word? Wie loop sy rieme onverwags lelik styf?

Die jagmes begin by meer mense te spook. En dis skielik nie al bewys uit die kindersorgsentrum in die moordsaak nie. Sweetness Botes tel twee en twee bymekaar.

'n Paar foto's uit die verlede het dramatiese gebeure tot gevolg. Hoekom is Cindy Nel op die oorlogspad? Wie het sy almal in haar visier? Wie het Seef Visagie se vervalste skildery gesteel?

Sweetness Botes is soms soos 'n bul in 'n glaskas - praat nou, dink later. En nou is sy weer op só 'n missie. Wie het sy in haar visier? Wie vlieg waarheen met die vervalste skildery?

Desjare het Sweetness Botes bedreigd gevoel deur Cintaine Nel. Toe stalk sy Cintaine, en neem foto's van alles wat sy doen. Sy't dit in plakboeke gesit en later vir Cindy gegee - al die plakboeke, behalwe een. En nou is die tyd ryp vir die laaste plakboek om uitgehaal te word.

Martha Sithole se kerktrappe sal nooit weer dieselfde wees nie. En asof dit nie genoeg is nie, speel nog 'n tragedie hom af in die ouetehuis. Wie word almal deur die tragedies geraak en daarby betrek?

Daar is iets wat Seef Visagie meer as Susara se skilderye, selfs meer as die volgende chemosessie, pla. Hy weet dis 'n saak wat dringend hanteer moet word. Uitstel is nie 'n opsie nie. Wat jaag Seef Visagie?

Dawie Becker kry 'n onverwagse besoek wat hom ontstel. Hy word genoodsaak om 'n belangrike besluit te neem en dit deur te voer. Wie het vir Cindy Nel so volledig ingelig? Grace Fortuin se nare ondervinding bly by haar spook.

In vandag se lewe is dit onmoontlik om sonder 'n papierspoor te leef. En papierspore vertel so baie. Ook van dit wat mense wil wegsteek. PJ Stofberg het op 'n papierspoor geloop en op meer as interessante inligting afgekom. Inligting wat Seef Visagie op die oorlogspad het.

Seef Visagie maak sy opwagting op 'n onverwagse plek. Dis duidelik dat Susara se skilderye hom ontsenu. Maar groot misdade word dikwels met behulp van klein leidrade opgelos. Wie wil 'n huis koop? En vir wie?

Soms is die individu se geskiedenis vol dwaashede wat mettertyd werklikhede word. Werklikhede wat 'n nuk het om 'n mens iewers langs die pad in te haal. Martha Sithole is op 'n missie, en niemand is beïndruk nie.

Die dood het nie vriende nie. Wicus Nel ook nie. Wie daag almal by sy begrafnis op? Hoekom het Grace Fortuin haar seun Paul gedoop?

Morkel Nienaber loop meer as een verrassing op die lyf. Daar moet dringend 'n groot besluit geneem word. Die groen monster slaan liederlik toe.

Dis nie almal wat die verskil tussen oorspronklike en vervalste skilderye ken nie. Die Francois van Dyk-skilderye is baie gesog en miljoene werd... mits dit natuurlik nie vervals is nie. Wie vlieg Kaapstad toe vir 'n groot transaksie?

Om iemand 'n guns te doen, is nie altyd lonend nie. En om raad te gee is nie altyd welkom nie. Wie soek 'n guns en wie gee raad? Wie word gevra om 'n begrafnis te hou?

Die mens is van nature agterdogtig, maar Martha Sithole is skielik meer as agterdogtig. Daarom begin sy te krap waar dit nie jeuk nie. Morkel Nienaber spin homself weer uit 'n situasie. Daar's nuus oor Wicus Nel.

Grace Fortuin is alweer op pad, en Sweetness Botes moet gasvrou vir die TV-span speel. Watter gemene plan voer dokter Dawie Becker in die mou? Wie stel vir hom 'n slagyster? Kom hy dit agter?

Wie is verdagte nommer een in die poging-tot-moord-ondersoek? Die swembad word toe nie sonder toesig gebou nie. Die filmspan begin skiet aan die televisiereeks Hoop vir 'n Kind. Wie vaar nie so goed voor die kameras nie?

Cintaine Nel se pistool sorg vir groot drama. Wie bring nou maar net die verkeerd in mekaar uit? Almal is nie ewe welkom by die grou en bou van die nuwe swembad nie. Wie steek sy hand diep in sy sak?

Jy kan nie verhoed dat die voëls van depressie oor jou vlieg nie, maar jy kan keer dat hulle in jou hare nes maak. Wie sukkel met depressie? Conrad Nienaber kry 'n aanbod waarvoor hy kwalik nee kan sê. Grace Fortuin soek 'n borg.

Die nuwe Morkel Nienaber het nog nie oral sy knie gebuig en vergifnis gevra nie. Daar is iemand reg bo aan sy lysie. Hy het nou lank genoeg draaie geloop. Hy kan die besoek nie langer uitstel nie. Die aand van vergifnis vra, word egter 'n nag van belydenissse.

Dit het bloedsweet gekos vir Grace Fortuin om te kom waar sy is. Vir die eerste keer in haar lewe het Lady Luck vir haar gesmile... totdat Wicus Nel en sy aantygings op die toneel verskyn. Maar Grace weet, uit dure ondervinding, dat jy soms geen ander keuse het nie. Jy moet dan maar jou eie luck maak.

Om te wil weet, is om te wil twyfel. En skielik wil Seef Visagie weet, en hoe meer hy wil weet, hoe meer twyfel hy! Wie was Wolfgang Beltracchi? En wat het hy en die oorlede Susara Visagie gemeen gehad? Of was alles net een vet leun?

'n Rustige Sondag bly alles behalwe rustig. Geraamtes het 'n nou maar eenmaal die geneigdheid om op die onmoontlikste tye uit die kas te foeter. En dis 'n kuns om 'n geraamte terug in die kas te kry. Wie se geraamte val uit watter kas?

Die inbraak by Morkel Nienaber en Camilla Thompson se meenthuis veroorsaak baie bespiegelings. In die soeke na die waarheid, mik sommiges na die onverkrygbare, en moet dan met brokkies inligting tevrede wees. Conrad Nienaber en sy Oupa glo elke brokkie inligting help, en moet bekom word.

Martha Sithole is terug van Koster met haar lysie beproewings, maar nie almal is ewe bly oor haar terugkoms nie. 'n Gedeelde geheim is gewoonlik 'n verlore geheim. Wie deel 'n geheim met wie?

Oorlede Susara Visagie kom nou maar net nie tot rus nie - sy bly spook by meer as een geliefde. Dis ekstra woelig op kampus, en dis nie net studente wat bedrywig is nie. Morkel Nienaber kry die skok van sy lewe.

'n Plan is 'n boerdery, en iemand boer deesdae met planne. Seef Visagie se kop is besig, en dis nie vanweë die kanker nie. Om van blyplek tot blyplek te verhuis, kan negatief op die psige van die arme betrokkene inwerk. Wie moet weer en weer verhuis? En vir wat?

Grace Fortuin het alles behalwe afsluiting oor die tragedie gekry toe sy haar seun, Paul, verloor het. En Wicus Nel se onverwagse opwagting by haar gastehuis is meer as net 'n beproewing. Dit krap die ou seer oop. En seer mense tree nie altyd rasioneel op nie.

Conrad Nienaber, glo nie in terapeute nie. Hy dink as hy net sy kop kan leegmaak van al die vrae, sal dit ook sy nagmerries minder maak. Daarom is hy bly oor die geleentheid om te kan praat en sy vrae te kan vra. Met wie praat hy sy hart leeg?

Die nagmerries ry Conrad Nienaber bloots. Om dokter Dawie Becker te baby-sit is groot moeite. Wat pla Conrad? Wat lê soos 'n berg voor Seef Visagie?

Wie ry met 'n pakkie Stellenbosch toe? En wie vlieg almal Zambië toe? Die oorlede Cintaine Nel se testament bevat 'n tweede baie belangrik bepaling. Wat is dit, en wie krap dit uit?

'n Klompie tergende vrae spook skielik by Conrad Nienaber. Stilbly is egter nie een van sy sterk punte nie. Dokter Dawie Becker word verras. Hoekom is die Francois van Dyk-skilderye skielik so belangrik?

Die nuwe Morkel Nienaber is vol verrassings. Kan 'n mens hom glo? Werk hy met feite of is hy maar net daarop uit om sekere mense se koppe deurmekaar te maak? As dit feite is, hoe en waar sou hy daaraan gekom het? Cindy Nel werk skielik met nuwe feite wat haar baie laat wonder.

Cindy Nel moet skielik 'n handvol besluite neem. Dokter Dawie Becker weet hoe om druk toe te pas. Wicus Nel draai sy mantel slim. Watter onaangename verrassings loop Conrad Nienaber alles op die lyf?

Soms loop alles op een slag skeef, soos met Seef Visagie. Dokter Dawie Becker sal jou vertel dis nie hoe jy val nie, maar hoe jy opstaan wat die belangrikste is. Hoe staan hy op? Die arme Cindy Nel kry die een skok na die ander.

Sybrand is 'n vereensaamde, patetiese figuur. Hy weet sy einde is naby, maar hy klou verbete vas aan die lewe in die hoop dat Henning sal kom sodat hy sy seun net nog een keer kan sien.

Jannewarie waarsku Sybrand, en Annie lê bekommerd besoek af by Maria. Sybrand se lewe word in chaos gedompel.

Jaap het verrassende nuus vir Mieta. Sybrand en Jannewarie gesels kopstukke een bitter koue winternag terwyl hulle probeer om lammers van 'n gewisse dood te red.

Johanna skuil in haar kamer terwyl Henning besoek aflê by Jaap en Mieta. Sybrand lê 'n verrassingsbesoek af.