NASA 逐工一幅天文圖 APOD Taigi

恆星是按怎形成這个美麗 ê 星雲？發射星雲 NGC 6164 ê 中央是一粒 質量特別大 ê 恆星。這粒恆星，捌去予比做 蚵仔 ê 真珠 抑是 阿拉神話內底 ê 天龍 保護 ê 卵。咱會當 tī 相片 中央看著這粒 編號 HD 148937 ê 恆星，伊 ê 溫度懸甲會發出 紫外光，會予邊仔氣體 ê 溫度變較懸。這款氣體應該是進前 ùi 恆星擲出來--ê，可能是 kah 踅伊咧行 ê 星伴 產生 重力交互作用 ê 結果。擲出來 ê 物質可能去予大質量恆星 ê 磁場 搝牢咧，落尾 形成對稱 ê 雙極星雲。NGC 6164 ê 闊度差不多有 4 光年 大，就 tī 南天星座 矩尺座 方向，離咱有 3600 光年遠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240424/ 影像：Rowan Prangley 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240424.html Powered by Firstory Hosting

是啥物 tī 雲內底創出這个大型 X 型烏影？這是下底 ê 機尾雲 ê 烏影。飛龍機咧飛 ê 時陣，iăn-jín ê 排氣若是較澹，就會產生水珠仔。這寡水珠仔可能會 tī 地球 較寒 ê 頂懸大氣 內底結凍。這寡擋較久 ê 水流 kah 冰流 會散射 日頭 ê 光線，按呢 ùi 下底看起來就會較光。毋過 tī 真少情形下，日頭接近地平線 ê 時陣，機尾雲 嘛會當 ùi 下底照予光。這寡機尾雲 向天頂 投影出長長 ê 烏影，一般是看袂著，除非遐有較懸 ê 雲層。這个景色是這個月初 tī 土耳其 伊斯坦堡 ê 狀況。其實地球 四界 攏看會著 機尾雲，而且一般講來，in 若是掠著 紅外線，會予地球變較 燒。毋過 in 若是有效率咧反射 日光，會予地球變較冷。這張相片是一个感覺意外 ê 攝影師 tī 早起 欲去上班 ê 時陣翕--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240423/ 影像：Fatih Ekmen 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240423.html Powered by Firstory Hosting

是講，你知影 ê 火山敢有法度按呢生？予一寡人較 意外 ê 是，Etna 火山 有當時仔會衝 圓箍仔煙。用專業術語來講，這款圓箍仔煙就叫做 渦旋環。這是因為火山壁 kā 欲噴出去 ê 煙霧 較倚壁邊 ê 氣體速度變較慢，造成較倚內部 ê 氣體 ê 相對速度變較緊。結果形成一个低壓區，予噴出來 ê 火山氣體 kah 火山烌 踅做一个 圓箍仔。這是一个咱熟似 ê 幾何結構，tī 伊衝懸 ê 時陣，煞意外誠穩定。圓箍仔煙 是足罕得看著，需要 風喙 ê 幾何結構、噴射煙 ê 速度、kah 平靜 ê 外部大氣攏配合甲好勢好勢，才會出現。這張影像 是 2 禮拜前 tī 意大利 Sicily 島 Gangi 翕--ê，咱會當看著幾若个火山噴出來 ê 圓箍仔煙。這个景色去予天光進前 ê 日頭 照甲 紅記記，背景閣有一粒 月眉相 ê 月娘。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240422/ 影像：Dario Giannobile 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240422.html Powered by Firstory Hosting

4 月 8 號這工，月球 ê 烏影 迒過北美洲，逐日食 ê 民眾 若是有 tī 這條狹狹烏影帶 ê 中央線，就會看著日全食。璇石環就是 tī 日全食過程中，初一 ê 月娘烏影 kā 日頭閘牢，tī 天色變暗去 ê 前後，攏總爍兩改 ê 現象。這个 tī 天頂出現一目𥍉 ê 寶石，會綴 tī 食甚階段 ê 進前 kah 後壁出現。這个時陣，太陽盤 ê 光 ùi 月球邊緣 迵過來，變做一跤 tī 夜空中 ê 璇石手指。這張戲劇性 ê 縮時攝影合成相片，是 tī 美國 Arkansas 州中北部翕--ê，有翕著 這擺日全食 出現 ê 兩擺璇石環。兩擺 ê 璇石環是 tī 食甚階段，去予空靈美麗 ê 太陽日冕 kā 隔--開--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240420/ 影像：Wright Dobbscd 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240420.html Powered by Firstory Hosting

船底座大星雲 是 南天天頂 ê 一粒寶石，逐家較熟 ê 是伊 ê 編號 NGC 3372。伊是咱 銀河 內底上大 ê 恆星形成區之一，大細超過 300 光年闊。船底座大星雲 kah 較細、較倚北方 ê 獵戶座大星雲 仝款，直接用目睭就看會著。毋過伊 chhāi tī 7500 光年遠 ê 所在，是獵戶座大星雲 ê 5 倍遠。這幅予人讚嘆 ê 望遠鏡景色，展示了這區 ê 足濟細節，包括 星際氣體 ê 雲絲 kah 閘光 ê 宇宙塗粉雲。船底座大星雲 是 少年、超大質量恆星 in 兜。星雲內底閣有 猶足神祕 ê 船底座 Eta 變星，伊是一粒質量超過咱太陽 100 倍以上 ê 恆星。船底座 Eta 變星 是這區中央烏暗溝仔面頂 較光 ê 彼粒恆星，就 tī 編號 NGC 3324、厚塗粉 ê 鎖匙空星雲 ê 倒爿。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240419/ 影像：Demison Lopes 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240419.html Powered by Firstory Hosting

頂禮拜 ê 日全食 期間，毋但一粒，其實有兩粒彗星出現 tī 日頭附近。本底期望會出現 ê 彗星 是 12P/Pons-Brooks，毋過伊傷暗矣，逐家感覺足失望--ê。毋過另外一个逐家較毋知 ê 彗星是 SOHO-5008，煞出現 tī 長時間感光 ê 影像內底。這粒彗星 是 ESA kah NASA ê 踅太陽 SOHO 太空船 翕 ê 第 5008 粒彗星。彗星 SOHO-5008 應該較細粒，是一粒 ùi 太陽邊仔𫝻過去 ê 彗星，tī 伊經過 太陽附近 幾若點鐘內就解體矣。這張相片會遮爾特別，毋但是因為 tī 日全食 ê 時陣翕著 兩粒彗星，而且閣是 真罕得 tī 地球表面翕著 ê 𫝻日彗星。咱閣會當 tī 相片內底看著 ùi 日頭 邊仔 湠出來 ê 日冕，閣有兩粒行星，倒爿 ê 水星 kah 正爿 ê 金星。4 月 8 號這工，tùi 迒過北美洲 ê 月球烏影 下底 這幾若百萬人 來講，天頂這寡行星 kah 彗星，干焦 金星 較好揣爾爾。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240417/ 影像：Lin Zixuan (Tsinghua U.) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240417.html Powered by Firstory Hosting

遮是 4 月 8 號 日全食 ê 7 張清楚相片。7 張是分開翕--ê，ùi 倒爿頂懸開始，你會當看著日全食 ê 規个過程。這个系列影像是 kā kha-mé-lah 鬥 tī 望遠鏡 頂懸翕--ê。翕相 ê 地點是 tī 日全食狹狹 ê 日食帶內底，月娘 ê 烏影 就 ùi 美國 Vermont 州 ê Newport 市行過。中央彼張是壯觀 ê 太陽日冕。日頭薄薄 ê 外層大氣，干焦會當 tī 日全食，而且愛好天 ê 時陣，才有法度用目睭直接看著。Ùi Newport 市看--出去，日食 ê 食甚階段 擋差不多 3 分 26 秒 遐爾久。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240411/ 影像：Xiaofeng Tan 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240411.html Powered by Firstory Hosting

爆炸已經煞矣，毋過後壁猶閣有。差不多 1 萬 1 千年前，船帆座 內底有一粒星 爆炸，產生一个 tī 短短時間內，光甲人類目睭看會著 ê 光點，這 tī 早期 歷史內底有紀錄著。恆星 ê 外層氣體挵著 星際媒介物，引起 震波，到今猶看會著。這張影像 有翕著 可見光 波段 ê 一部份雲絲 kah 大型震波。氣體 ùi 爆炸 ê 恆星飛出來了後，會 衰變、kah 星際媒介物發生反應、產生無仝色、無仝能量 ê 光。Tī 船帆座超新星殘骸 中心 留落來 ê 是一粒 脈動星，是一粒 kah 核物質 仝款實密 ê 星，伊 ê 自旋 速度是 1 秒鐘超過 10 改。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240416/ 影像來源：CTIO, NOIRLab, DOE, NSF, AURA 資料處理：T. A. Rector (U. Alaska Anchorage), M. Zamani & D. 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240416.html Powered by Firstory Hosting

日全食是按怎收尾--ê？無毋著！月娘會 ùi 完全 閘牢 ê 日頭 徙開，毋過 tī 上開始幾若秒 ê 時間內，會出現一寡 趣味 ê 現象。代先會出現 璇石環。日光可能會 ùi 月球邊緣 ê 山谷之間、抑是 lap-o-á 地 ê 縫迵過來。你若是 ùi 你徛 ê 所在看出去，頭一个迵過來 ê 日光，就會 kah 踅 tī 月球 外口彼輾 日冕，鬥出一跤 璇石手指。紲落來幾若秒 ê 時間內，其他光束嘛會出現，鬥--出 ê 現象就叫做 Bailey 珠仔。Tī 這支影片 內底，你可能會看著 粉紅仔色 ê 三角形日珥，看起來敢若 kah 日食 ê 復圓階段有關係，毋過實際上是無。其他地點 ê 觀測者會看著 Bailey 珠仔 出現 tī 月球無仝位，kah 三角日珥 ê 相對位置嘛無仝。這支用特別設備翕 ê 影片，是 2024 年 4 月 8 號 tī 美國 德州 New Boston 鎮 翕--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240414/ 影像：David Duarte 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240414.html Powered by Firstory Hosting

這个星系發生了一寡奇怪 ê 代誌，是按怎會按呢？這个星系叫做 大管薰星系，編號是 M82，伊 ê 中心噴出 發紅光 ê 氣體 kah 塗粉。雖罔講這个 星爆星系 應該是去予最近 倚近 伊 ê 大型捲螺仔星系 M81 激發--ê，毋過這猶是無法度解說噴出來 ê 紅光氣體 塗粉 ê 來源。證據表示講，這寡物質去予 足濟粒恆星 ê 粒子風 做伙驅動，產生一个 星系超級風。這張影像 ê 倒爿是 哈伯太空望遠鏡 翕 ê 可見光 影像，正爿是 韋伯太空望遠鏡 翕 ê 紅外線 影像。Tùi 新 ê 韋伯影像 斟酌檢查 了後，意外發現講，發紅光 ê 塗粉 kah 高溫 ê 電漿 有關係。Tùi 這个奇怪 ê 厝邊星系 ê 研究，一定會繼續落去。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240415/ 影像：NASA, ESA, CSA, STScI, Alberto Bolatto (UMD) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240415.html Powered by Firstory Hosting

Tī 4 月 8 號這工欲看著日全食，愛 tī 月球烏影行過 ê 狹狹 ê 路線 內底，才看會著。毋過北美洲大部份 ê 所在，是攏看會著日偏食。這張 tī 美國 Florida 州 清水市翕--ê 速翕相片，雖罔講無直接翕著日頭，毋過猶是有翕著足濟 tī 北美大部份所在看著 ê 日食現象。Tī 棕樹 烏影下底 看會著相疊 ê 葉仔，利用 針孔相機 ê 原理，kā 日偏食 ê 半月形 投影 tī 塗跤。Tī 清水市看著 ê 日食行到 食甚階段 ê 時陣，閘著 ê 日頭差不多閘 53 葩。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240413/ 影像：Lori Haffelt 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240413.html Powered by Firstory Hosting

Tī 日全食 ê 食甚階段，Baily 珠仔 定定會出現 tī 太陽 ê 邊緣。月盤邊緣 ê 剪影，反應 ê 是 月球表面 敧敧曲曲 ê 地形。日光 ùi 地形 ê 縫 射出來，就親像是日光做出來 ê 真珠。這攏去予紀錄 tī 這个戲劇性 ê 縮時攝影組合影像內底。這个系列影像是 4 月 8 號發生日食 ê 時陣，tī 墨西哥 Durango 市 翕著 月娘邊緣 tī 食甚階段 ùi 開始 到結束 ê 規个過程。In 嘛翕著粉紅仔色 ê 日珥，這是 太陽活動力較強 ê 時陣，tī 太陽邊緣 噴較懸 ê 電漿。Durango 市 是 4 月 8 號 日全食 ê 時陣，月球烏影 頭一个行到 北美洲 ê 城市。Tī 遮，食甚是擋 3 分 46 秒遐爾久。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240412/ 影像：Daniel Korona 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240412.html Powered by Firstory Hosting

月娘若是 kā 日頭閘去，會出現啥物款 ê 景色？Tùi 足濟期待 tī 美國時間 4 月 8 號（台灣時間已經是 9 號矣）ê 日全食 觀星者來講，tī 忽然間變暗去 ê 天色內底，咱會當看著 ê 景色，包括 日冕 kah 可能看會著 ê 兩粒行星：金星 kah 木星。正常講來，最近 ê 金星干焦會當 tī 透早時、抑就是日頭 kah 木星攏 tī 地平線下底才看會著，木星是暗暝足光 ê 一粒星。拜一 ê 時陣（台灣時間已經是拜二翻點矣），若是有徛 tiàm 適當 ê 所在，就會當 tī 日全食 ê 日時，看著兩粒行星 kah 食日 排排做一逝。這个排排做一逝 ê 景色是 tī 拜一下晡 tiàm 美國 Arkansas 州 Nebo 山 翕--ê，相片內底閣有翕著 好奇 ê 觀星者、kah 媠形 ê 樹仔。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240410/ 影像：Stéphane Vetter (Nuits sacrées) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240410.html Powered by Firstory Hosting

咱若是來看 1990 年代後半木星系統 ê 資料，就會發現 加利略太空船 有記錄著 木衛二 Europa 足精彩 ê 影像。這粒衛星 ê 表面冰層下底有一重足深 ê 全球性海洋。這張加利略四大衛星 ê 木衛二 Europa ê 影像資料已經 重新處理過。這擺有改善資料校正 ê 方式，才有法度產生彩色影像。按呢產生 ê 色彩 kah 咱目睭看著 ê 較 相-siâng。木衛二 Europa 表面足長 ê 彎曲痕跡，暗示講遐有地下水。這粒木星上大粒 ê 衛星，踅木星 ê 長株圓軌道 leh 行。伊面頂 ê 潮汐作用提供能量，予伊 ê 海洋保持液體 ê 形態。毋閣閣較 趣味 ê 是，就算是無太陽光，伊嘛是會當提供支持性命 ê 能量。所以 木衛二 Europa 就變做是 地球 以外上有可能有性命 ê 所在。目前 tī 木星軌道頂懸行 ê Juno 太空船，已經 ùi 這个有水 ê 世界頂懸 飛過幾若擺，kā 影像 kah Europa 是毋是適合生物徛起 ê 資料送轉來地球。今年 10 月，NASA 就會發射 Europa 快船，開始 探索 這个有水 ê 世界矣。太空船會飛過 Europa 50 擺，沓沓仔倚近 伊 ê 冰質地表 25 公里懸 ê 所在。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240329/ 影像：NASA, JPL-Caltech, SETI Institute, Cynthia Phillips, Marty Valenti 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240329.html Powered by Firstory Hosting

獵戶座 peh 起來 ê 時陣，tī kha-mé-lah 內底看起來會是按怎？逐年這个時陣，咱會當 tī 日落了後 ê 東南方看著這个 有名 ê 星座。獵戶座上好認--ê，就是伊皮帶頂懸彼 3 粒星。Tī 地球 大部份所在看著 ê 這 3 粒星，總是 ùi 側面 peh 起來。這張夜空暗暝 ê 相片，有包括獵戶座 tī 內底，伊就 ùi 波蘭 kah 捷克共和國 交界 ê Śnieżka 山 後壁 peh 起來。這張長時間感光 ê 相片內底 有足濟暗暗 ê 天體，包括 獵戶座 kah 火焰 星雲，這 2 个攏去予 Barnard 環 包 tī 內底。這張 闊幅 kha-mé-lah 組合影像 閣有翕著夜空中 幾若个標誌性 ê 天體，包括影像頂懸 ê 藍色 昴宿星團 kah 獵戶座倒爿 ê 紅色 玫瑰星雲。視野內底 有名 ê 恆星 有，南河三、參宿四、參宿七 kah 畢宿五。Tī 未來幾若個月內，獵戶座 會 tī 日落 了後出現 tī 天頂愈來愈懸 ê 所在。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240131/ 影像：Marcin Ślipko 音樂：P!SCO - 鼎鼎 聲優：阿綠 翻譯：An-Li Tsai (NSYSU) 原文：https://apod.nasa.gov/apod/ap240131.html Powered by Firstory Hosting

這張速翕是 4 月 8 號 tī 地球北美洲 Quebec 省 Magog 湖天頂翕著 ê 月娘烏影。Tùi tī 湖邊 逐日食 ê 人來講，這場日全食是 tī 好天 ê 時陣，忽然間出現 ê 短短 ê 暗暝，是一个予人讚嘆 ê 壯麗景色。是講這个 Magog 湖，是這擺 tī 美洲發生日全食 ê 過程中，月球烏影經過上落尾 ê 所在。這條 2024 年 日全食 ê 狹狹全食帶，是 ùi 墨西哥 ê 太平洋海岸 向東北爿 迵過美國 kah 加拿大。毋過日偏食差不多 tī 規个美洲大陸攏看會著。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240409/ 影像：Stan Honda 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240409.html Powered by Firstory Hosting

這規片發光氣體塗粉雲，對 地球 ê 天文學家來講，看起來敢若是一隻鳥仔，所以伊才會提著這个外號，海鷗星雲。這隻 宇宙鳥仔 ê 肖像 包括了銀河盤，闊度有 2.5 度，就 tī 天狼星 方向附近。天狼星 是 大犬座（大隻狗星座）ê alpha 星。是講，這區 嘛有其他目錄 ê 天體，像有名 ê NGC 2327，伊是一个實密、厚塗粉 ê 發射星雲 kah 反射星雲，內底有一粒大質量恆星，這部份就是 海鷗 ê 頭。這規片海鷗星雲去予編做 Sh2-296 抑是 IC 2177，應該是連紲 ê 超新星爆炸 產生幾若重 大型外殼結構 ê 一部份。Tī 中央正爿下跤 彼个顯目 ê 藍色光弧，是 ùi 大犬座 FN 星 噴出來 ê 弓形衝擊波。這个複雜 ê 氣體塗粉雲主要是成份是發紅光 ê 水素原子。伊 kah 大犬座 ê OB1 星協 tī 天頂佔 200 光年闊，就 tī 離咱 3800 光年遠 ê 海鷗星雲 遐。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240313/ 影像：Gianni Lacroce 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240313.html Powered by Firstory Hosting

地平線頂懸彼个是啥物？這團看起來敢若怪怪 ê 厝邊星系，實際上是一台普通火箭咧噴煙，只是講伊有無四常 ê 後壁光。雖罔講 SpaceX 獵鷹 9 號 火箭是 ùi 美國 加州 ê Vandenberg 太空軍事基地 發射--ê，毋過會當看著 火箭咧燒 推進燃料 ê 範圍，是包括閣較闊 ê 所在。像這張相片就是 tī 冰島 Akureyri 鎮 翕--ê。這台 大台太空船是 1 禮拜前發射--ê，這个 壯觀 ê 景色隨去予 智慧形手機仔 翕了 10 秒，就消失去矣。就親像是 夜光雲 仝款，這个煙會遮爾光，是因為 晨昏光效應 造成--ê。就是講，若是有一个有夠懸 ê 物件去予黃昏 ê 太陽照著，就算是地面觀測者 tī 暗暝嘛看會著。這个煙會成做 捲螺仔形，是因為獵鷹號 火箭愛調整方向，向無仝方向送衛星出去。這張特別 ê 相片內底，閣有恆星 kah 暗暗 ê 青色 極光 kah 紅色極光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240312/ 影像：Seung Hye Yang 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240312.html Powered by Firstory Hosting

啥物物件 tī 暗暝會發光？這幅 夜景相片內底，有四常 ê 光 kah 無四常 ê 光。四常 ê 光應該就是 月光，是咱熟似 ê 天體。因為觀測者是 tī 地球赤道 附近，所以月娘是 直直沉落去。月娘沉落去了後，地球大氣 內底 ê 空氣 kah 煙霧質 會散射藍光，予 反射日光 ê 衛星 tī 地平線附近看起來較紅。無四常 ê 光 應該就是 浮游生物 發--出 ê 生物光，是咱較無熟似 ê 物件。這寡 微生物 會發出藍光，應該是欲 嚇驚 捕食者。像這个例，生物光主要是 綴 海湧咧泅 ê 浮游生物，tī 海岸去予拍散去，才會發光--ê。這張相片是舊年 tī Maldives ê Soneva Fushi 島 翕--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240311/ 影像：Petr Horálek / Institute of Physics in Opava 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240311.html Powered by Firstory Hosting

這是啥物天體？這是一个正常星系，毋過是坦倒 ê 側向星系。足濟盤仔型星系實際上 kah 相片 內底 ê NGC 5866 紡錘星系 平薄，毋過 ùi 咱 ê 方向來看，in 毋是坦倒--ê。其實咱閣較熟似 ê 側向星系，應該是咱 ê 銀河系。紡錘星系 ê 另外一个編號是 M102，伊有足濟足複雜 ê 塗粉帶，tī 相片內底是較暗較烏 ê 部份。星系盤內底較光 ê 恆星，予星系看起來變做是藍色--ê。咱會當 tī 哈伯 影像內底 看著有少年 恆星 ê 藍色星系盤，伊延伸 ê 範圍比這个 足薄 ê 星系盤 ê 塗粉 閣較闊。有證據講這个 紡錘 星系 tī 過去幾若十億年 ê 時間內，捌 kā 幾若个較細 ê 星系食食去。包括 幾若條較暗 ê 恆星流，離星系盤較遠 ê 烏暗塗粉，kah 踅 tī 週邊、毋過無出現 tī 相片內底 ê 星系群。一般講來，足濟 盤仔型星系會變薄，因為 形成盤仔 ê 氣體 tī 踅重力中心 ê 時陣會相挵。紡錘星系 就 tī 天龍座 方向 5000 萬 光年 遠 ê 所在。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240306/ 影像來源：NASA, ESA, Hubble 資料處理：Ehsan Ebrahimian 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240306.html Powered by Firstory Hosting

為著欲看著日全食，你敢願意行到世界 ê 盡頭？你若是願意，到時若是有人 比你閣較早到，你敢會感覺意外？2003 年有一个特別 ê 日全食，tī 這張相片內底，日頭、月娘、南極州、kah 2 个 攝影師，攏排做一逝。就算這擺 ê 日食發生 tī 這个偏僻 ê 所在，猶是有一陣 日食愛好者，逐到世界 ê 盡頭，就是為著欲 體驗 日頭暫時消失 tī 月娘後壁 ê 超現實感受。這張相片 是 4 張無仝款 ê 數位影像 合成--ê，主要是欲模擬人類 目睭看著 ê 日食景色。翕相 ê 時陣，月娘 kah 日頭 做伙出現 tī 南極一个山陵 ê 天頂。忽然間，天色變暗去，壯觀 ê 日冕 就出現 tī 月娘 ê 邊緣。意外 ê 是，閣有 翕著 另外一位攝影師咧整理 kha-mé-lah 內底 ê 影像。倒爿是伊 貯器材 ê kha-báng kah 一隻 通 摺--起來 ê 椅仔。欲 看著 日食，較簡單 ê 方式就是 4 禮拜後 ê 4 月 8 號，日食會經過美洲一條長長狹狹 ê 路線。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240310/ 影像：Fred Bruenjes (moonglow.net) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240310.html Powered by Firstory Hosting

３ 月 ３ 號透早 ê 這團氣體塗粉雲，予太空海岸 ê 觀星者看甲目睭褫金金，毋過這毋是 James Webb 太空望遠鏡 最近看著 ê 遙遠星雲。這張長焦鏡頭速翕是 獵鷹 9 號火箭 發射了後 幾若分鐘翕--ê。這是 SpaceX 公司 欲飛去國際太空站 ê 載人 8 號 任務。影像翕著第一級 kah 第二級火箭分離了後 ê 雲煙 kah 廢氣，變做是 浮 tī 烏暗夜空 ê 墨跡圖。這个美麗 ê 地球星雲 內底，倚中央下底附近 ê 光點，是 載 4 个 人去太空 ê 載人龍 奮進號太空船 ê 第二級火箭。清楚 ê 剪影內底，是 獵鷹 9 號 ê 1 號助推器，伊這馬當咧調整方向，通轉來地球 tī 美國 Canaveral 角 ê 登陸區。這台會當重複使用 ê 助推器是頭一擺完成伊 ê 助推任務。毋過 載人龍奮進號 太空艙進前就已經載人 ùi 低地球軌道 轉來 地球 4 擺矣。其實 奮進號 這个名是重複使用--ê，像進前退伍 ê 奮進號太空梭 kah 阿波羅 15 號 ê 指揮艙 嘛是。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240307/ 影像：Michael Seeley 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240307.html Powered by Firstory Hosting

Tùi 北半球 ê 觀星者來講，春天愈倚，彗星 12P，嘛叫做 Pons-Brooks 彗星，就會愈來愈光。目前咱會當用細台望遠鏡 kah 雙筒千里鏡 看著 這粒 哈雷型彗星。Tī 未來幾若禮拜，伊 ê 光度會光甲咱會當直接用目睭看著。這張 取景袂䆀 ê 夜空相片，是 3 月 5 號深夜 tī Slovakia 共和國 Revuca 鎮 翕--ê。雖罔講天頂有薄薄 ê 霧，毋過咱抑是會當看著這粒彗星 青色 ê 彗鬚 kah 伊長長 ê 彗尾，出現 tī 地平線附近。仙女座星系 M31，kah 光爍爍 ê 黃色恆星 奎宿九，嘛叫做 仙女座 beta，就出現 tī 這粒彗星 ê 頂懸。仙女座星系 kah 咱銀河 ê 距離差不多是 250 萬光年。Pons-Brooks 彗星是一个週期性彗星，伊會行到內太陽系，離咱袂超過 14 光分遠 ê 所在。這粒彗星 ê 近日點會發生 tī 4 月 21，而且 tī 4 月 8 號 日全食 ê 時陣，嘛會當 tī 天頂看著伊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240309/ 影像：Petr Horálek / Institute of Physics in Opava 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240309.html Powered by Firstory Hosting

蜘蛛星雲，嘛叫做 劍魚座 30，是一个直徑超過 1000 光年闊 ê 大型恆星形成區，就 chhāi tī 咱附近 ê 衛星星系 大麥哲倫星雲 內底。伊是本星系群內底上大上活潑 ê 恆星形成區，離咱差不多有 18 萬光年遠。這幅 美麗 ê 圖 是大型 ê 太空望遠鏡 kah 地面望遠鏡 ê 合成影像，這隻宇宙蜘蛛就佔滿規个視野。Tī 蜘蛛星雲 NGC 2070 內底，有強烈 ê 輻射、恆星風、kah ùi 中央大質量少年星團 R136 來 ê 超新星震波。R136 毋但 激發星雲發光，嘛 kā 星雲雕出蜘蛛形 ê 雲絲。蜘蛛星雲周邊 是其他恆星形成區，內底有少年星團、雲絲、kah 歕出來 ê 氣泡形結構。實際上，這幅圖內底閣有 近代揣著 ê、離咱上近 ê 超新星 SN 1987A，就 tī 正爿下跤遐。這个豐富 ê 視野就 tī 南天 ê 劍魚座方向 2 度闊 ê 天區，按呢差不多是 4 粒月娘 tī 天頂 ê 大細。毋過蜘蛛星雲若是離咱閣較倚咧，比論講 1500 光年遠，差不多就是咱銀河內底 ê 恆星形成區 獵戶座星雲 ê 距離，按呢這个星雲就會佔天頂一半 ê 範圍矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240308/ 影像處理：Robert Gendler, Roberto Colombari； 影像資料：Hubble Tarantula Treasury, European Southern Observatory, James Webb Space Telescope, Amateur Sources 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240308.html Powered by Firstory Hosting

日頭若是消失去，你會有啥物感覺？2017 年 tī 美國各地 有足濟日食觀測者，看著日頭暫時消失 tī 月娘後壁 ê 時陣，tùi in 家己 ê 反應感覺掣一趒，因為 in tùi 這个景色感覺著 ê 是敬畏。可能本底 in 是想講，天色變暗只是一个短短 ê 時間爾爾，毋過出現 ê 景色煞 予人 無法度放袂記。這寡景色包括一目𥍉就變做暗暝 ê 天色、月盤邊緣媠甲予人袂喘氣 ê Baily 珠、粉紅仔色 ê 日珥、kah tī 規个天頂湠--開 ê 日冕。這寡細節，攏 tī 這个 2017 年 ê 日全食 3 分鐘即時影片 內底 出現。這支影片 是 tī 美國 Oregon 州 溫泉鎮 翕--ê，是用 Jun Ho Oh 特別設計 ê 設備，tī 日全食過程中，觀察日頭邊緣 ê 細節。影片欲煞 ê 時陣，日頭 會 ùi 月娘 後壁 ê 另外一爿出現、離開。後閣月 ê 4 月 18，tī 北美洲 狹狹 ê 日食帶內，會閣看著 另外一个日全食。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240303/ 影像：Jun Ho Oh (KAIST, HuboLab) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240303.html Powered by Firstory Hosting

Tī 這張直覺機器公司 Nova-C 月球登陸器 ê 闊幅速翕內底，液氧甲烷火箭 iăn-jín 咧噴火，Odysseus 號 登陸器 ê 停車跤才拄磕著月球表面。Tī 2 月 22 登陸月球 ê 影像內底，看會著歹去 ê 停車跤，所以登陸器才會停趨趨。Odysseus 號輕輕仔停 tī 月球表面，予這个電話亭大細 ê 登陸器通運作，收集太陽能，kā 影像 kah 資料送轉來地球。伊實際上 ê 登陸地點 是 tī 月球 ê 南極區，是 NASA ê 月球探勘號軌道衛星翕著--ê。登陸器中央控制枋頂懸 ê 美國國旗是 NASA 寄付--ê，這是過去捌參加 1970 年 阿波羅計畫 ê 物件。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240302/ 影像：Intuitive Machines 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240302.html Powered by Firstory Hosting

太陽附近是發生啥物代誌？為著欲揣出這个答案，NASA 發射 Parker 機器人太陽探測器 (PSP) ，飛到比進前閣較倚太陽 ê 所在 做調查。PSP ê 循環 軌道，予伊每幾若個月就會接近太陽 一擺。這个縮時攝影影片 是舊年 PSP 第 16 擺倚近太陽 ê 時陣翕--的。這是 PSP 飛到水星軌道內底，用目尾 ùi 太陽閘仔後壁 看出去 ê 景色。PSP ê 闊幅相機 (WISPR) 翕了超過 11 工 ê 影像，毋過 tī 遮 去予數位技術 壓縮做 1 分鐘 ê 影片。綴 PSP 踅太陽行，咱會當 tī 影片內底看著咧跳舞 ê 日冕 kah 日冕物質噴射。背景閣有 飛過 ê 恆星、行星、kah 銀河系 ê 中央盤。PSP 發現講，太陽的厝邊區 實在是有夠複雜--ê，甚至 太陽磁場 會 tī 足短 ê 時間內底 翻倒反。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240219/ 影片來源：NASA, JHUAPL, Naval Research Lab, Parker Solar Probe 資料處理：Avi Solomon; h/t: Richard Petarius III 音樂：Beethoven’s Symphony No. 7, Second Movement 音樂來源：Wikimedia Commons 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240219.html Powered by Firstory Hosting

這支 leh 翕地球平靜暗暝 ê 影片，是 2017 年 國際太空站 翕 ê 縮時攝影影片。愛看這款低地球軌道景色 ê 人，會當趁這个機會享受一下仔 地球大氣頂懸 厚 tut-tut ê 青色極光 kah 紅色極光。這个夜景是 ùi 北美州 ê 西北爿 翕到 東南爿，一直翕到 墨西哥灣 kah Florida 海岸。第二段影片是 leh 追蹤 歐洲城市 ê 燈火，飛過地中海，kah 北非洲 光爍爍 ê 尼羅河。Tiàm 太空站頂懸看，下底有 kah 西北雨做伙出現 ê 雷公爍爁。Tī 遠方，迵過地球表面薄薄 ê 大氣氣輝，閣會當看著天星 tùi 彎彎 ê 地平線下底 peh 起來。是講，你嘛會使隨時 tī 厝 lih 追蹤 地球這馬發生 ê 自然現象。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230617/ 影片：NASA, Gateway to Astronaut Photography, ISS Expedition 53 音樂：The Low Seas (The 126ers) 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap230617.html Powered by Firstory Hosting

這是一幅畫？抑是一張相片？這幅用宇宙畫筆畫 ê 天體抽象畫，畫 ê 是 厚塗粉 ê 星雲 NGC 2170，嘛叫做 天使星雲，伊就 tī 影像中央倚面頂遐 咧爍。咱看會著 NGC 2170 是因為伊反射附近 ê 高溫恆星 ê 光。伊 ê 附近閣有 藍色 反射 星雲、紅色 發射 星雲、烏暗 吸收星雲、kah 彩色 ê 背景星。就親像 抽象畫家 定定用日常生活做主題仝款，氣體雲、塗粉雲、高溫恆星嘛是 獨角獸座 (麒麟座) 這个 大質量 ê 恆星形成分子雲內底 定定出現 ê 元素。這个大型 分子雲 Mon R2 離咱是足近--ê，照估計 才 2400 光年 左右爾爾。照這个距離來算，這張 畫布 可能會超過 60 光年闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240305/ 影像：David Moulton 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240305.html Powered by Firstory Hosting

這片土地天頂是發生啥物代誌？相片內底 ê 光 毋是 極光，是 光柱，是一款較倚地表 ê 現象。運氣袂䆀 ê 人，會當 tī 地球 足濟所在看著 光柱，就是 ùi 日頭 延伸出--來 ê 光。這是 頂層大氣 ê 薄板 冰晶 反射日光造成 ê 現象。這款 冰晶 會 tī 落到地表進前，就蒸發了了。毋過氣溫若是低到結凍 ê 溫度，薄板 冰晶 可能會 tī 低層大氣形成，變做 雪，沓沓仔、輕輕仔 落落來。咱就 kā 這叫做 冰晶霧。這个時陣，這款冰晶可能會反射地面 ê 燈火，就親像是 太陽 ê 光柱。這幅影像是頂個月 tī 中國 內蒙古 ê Wulan Butong 草埔區 翕--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240304/ 影像：N. D. Liao 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240304.html Powered by Firstory Hosting

這張 tī 地球澳洲 New South Wales 省翕 ê 影像內底，有 澳洲聯邦科學工業研究組織 CSIRO ê Parkes 無線電波望遠鏡，當咧指向月圓相 ê 月娘。這个直徑 64 公尺長 ê 望遠鏡就浸 tī 月色內底，伊這馬當咧接受 ùi Odysseus 號 送轉來 ê 微弱 無線電波信號。Odysseus 號是一台 2 月 22 tī 月球南極北爿 300 公里遠 ê 所在 登陸 ê 機器人登陸器。Odysseus 號 ê 登陸，予咱想起 1972 年 美國頭一擺登陸月球 ê 阿波羅 17 號任務。因為 Odysseus 號 tī 月球表面歪一爿，所以伊 ê 高接收天線煞無法度指向地球。毋過因為 Parkes 望遠鏡有夠大，閣有通改變方向 ê 接收盤，所以伊 ê 敏感度就有夠，通接收 tī 月球表面 ê 機器人登陸器 ê 實驗結果。是講 Parkes 無線電波望遠鏡 ê 接收盤 tī 1969 年阿波羅 11 號任務期間，捌變做足出名--ê。這是因為彼陣伊就有才調接收 月球 ê 電視信號，予 tī 地球 ê 人看著太空人頭一擺 tī 月球頂懸咧散步。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240301/ 影像：John Sarkissian (ATNF Parkes Radio Observatory) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240301.html Powered by Firstory Hosting

凱撒大帝 tī 西元前 46 年 ê 時陣重新修定曆法。根據 Alexandria 城 ê 天文學家 Sosigenes ê 建議，新 ê 曆法包括 4 年出現一改 ê 潤日，因為地球一冬是比 365 工閣較長淡薄仔。用現代 ê 術語來講，地球踅太陽一輾需要 ê 時間是 365.24219 个平均太陽日。所以，曆日 一冬若是干焦 365 工，按呢 4 冬落來就會差一工。時到北半球就會發生 7 月出現 tī 寒天 ê 代誌。是講這个 7 月就是用 凱撒大帝 號名 ê 月份。若是每四冬加一个潤年，這款影響就會較少。1582 年 ê 時陣，天主教教宗 Pope Gregory 十三世 kā 改做尾數 00 年 ê 時陣莫潤，等到 尾數 400 ê 時陣才閣潤。這款 Gregorian 曆法 就是這馬咱咧用 ê 新曆。是講，地球月球系統 ê 潮汐摩擦力 會 kā 地球 ê 自轉速度變較慢，按呢就會予地球一工變較長，逐世紀會增加 1.4 毫秒。抑就是講，閣過 400 萬年以後，像今年這款潤年就變做無必要矣。這个羅馬龍銀 denarius ê 倒爿是 凱撒大帝 ê 頭像，正爿是 羅馬愛神 維娜斯。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240229/ 影像：Classical Numismatic Group, Inc., Wikimedia 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240229.html Powered by Firstory Hosting

這个超新星震波 用一點鐘 超過 50 萬公里 ê 速度，迵過星際空間。Tī 這幅 有清楚細節 ê 彩色組合影像 中央，向頂懸徙動 ê 彼个薄薄光光、相纏做伙 ê 雲絲，實際上是 ùi 側邊看著 ê 發光氣體 ê 長波紋。1840 年代 John Herschel 爵士 發現伊，所以這个看起來狹狹 ê 星雲，嘛叫做 Herschel ê 光束。這个星雲 去予編做 NGC 2736，伊尖尖 ê 外形，予伊提著鉛筆星雲 ê 現代名。鉛筆星雲 差不多 tī 800 光年遠 ê 所在。伊差不多有 5 光年長，是 船帆座超新星殘骸 足細 ê 一部份。這个 足大 ê 船帆座殘骸 ê 直徑差不多有 100 光年長，是人類 tī 1 萬 1000 年前看著 ê 恆星 爆炸 湠出去 ê 殘骸雲。爆炸 震波 就成做這个 鉛筆星雲。上開始 ê 時陣，伊 ê 速度是一點鐘 幾若百萬公里。毋過等伊 kā 四箍圍仔 ê 星際物質掃予清氣了後，伊 ê 速度就變較慢矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240223/ 影像：Helge Buesing 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240223.html Powered by Firstory Hosting

暗暝 ê 時陣，天空是按怎變暗去--ê？Tī 無仝階段，會有無仝款 ê 特殊色水 ùi 地平線湠出來。這張影像 ùi 倒爿 到 正爿，是日頭落山了後，tùi 愈來愈暗 ê 黃昏天色 連紲 翕 20 張，才 kā in ê 長條影像接起來 ê 組合影像。相片是頂個月 tī 意大利 Sicily 島 ê Syracuse 市 翕--ê，翕相 ê 方向是 日頭 ê 相對面。相片上倒爿是日落進前 ê 天空。正爿彼寡 顯目 ê 光帶，包括 金星帶、藍帶、地平帶、kah 紅帶。地球烏影 peh 起來 了後，光帶 ê 色，就會因為日光直接反射、多次反射、kah 屈折，產生無仝色。日光直接反射，是反射 地球大氣 內底 ê 空氣 kah 煙霧質。多次反射，有當時仔會 tī 產生 紅化現象 ê 日落 彼陣出現。實際上，這寡光帶可能會湠--開，變甲足歹認--ê，而且 in ê 色嘛會受著 日落附近 ê 色 ê 影響，煞改變。落尾，日頭 完全沉落去 地平線下底，天色嘛變暗去。毋過莫絕望，這規个過程會 tī 透早 日頭 peh 起來 ê 時陣，顛倒反 閣出現一擺。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240228/ 影像：Dario Giannobile 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240228.html Powered by Firstory Hosting

星系相挵 ê 時陣，會生出偌濟恆星？哈伯太空望遠鏡 最近拄發表 ê 這幅影像 內底 ê 星系 AM1054-325 kā 咱講，是有幾若百萬粒。AM1054-325 kah 伊 ê 厝邊星系 互踅，是袂 kā 恆星 毀滅去，顛倒是 in 之間 ê 重力 kah 運動 會引起恆星誕生。Uì 黃色 AM1054-325 伸出來 ê 氣體殘骸，是受著其他星系 ê 重力相搝 ê 結果。Tī 遮會 tī 短時間內，發生足濟恆星形成活動。新誕生 ê 恆星，閣會激發 邊仔 ê 水素氣體，發出粉紅色 ê 光。發出 明亮藍光 ê 嬰仔恆星，定定會倚做一團，形成一个有幾若千 到 幾若百萬粒 成員星 ê 實密星團。AM1054-325 有百外粒這款明亮反藍、像光點 ê 星團，有一寡看起來敢若是真珠袚鍊。分析 紫外光波段 ê 資料發現，大部分這款恆星 ê 年歲是比 1000 萬年閣較少年，會使講 in 是 紅嬰仔時期 ê 恆星。足濟這款恆星托兒所 有可能會發展做 球形星團，內底較少年 ê 一陣恆星，甚至有可能 會脫離，形成一个較細 ê 星系。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240220/ 影像來源：NASA, ESA, STScI 資料處理：J. English (U. Manitoba) 科學：M. Rodruck (Penn State U. & Randolph-Macon C.) et al. 文稿：Jayanne English (U. Manitoba). 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240220.html Powered by Firstory Hosting

你敢捌這个星座？就算伊是天頂 上好認 ê 星群之一，這个 是比 你所看著 ê 獵戶座閣較完整。這張是用數位 kha-mé-lah 對 獵戶座 長時間感光了後 閣 處理過 ê 影像。這張影像倒爿頂懸上光彼粒，是低溫紅色 ê 紅巨星 參宿四。獵戶座 內底有足濟高溫藍色恆星，包括正爿下底 ê 超巨星 參宿七、kah 伊平光 ê 參宿四、閣有正爿頂懸 ê 參宿五。獵戶座皮帶 頂懸彼三粒星，離咱 差不多 有 1500 光年 遠。In 是 ùi 獵戶座內底 ê 研究足濟 ê 星際雲 內底 生出來--ê。獵戶座皮帶下底有一片霧霧 ê 光斑，你可能知影，伊就是 獵戶座星雲，是恆星 ê 托兒所。上落尾是 目睭 勉強看會著，毋過真引人注意 ê Barnard 環。這是一个 踅 tī 獵戶座皮帶四箍圍仔 ê 大型氣體發射星雲，是 100 年前獵戶座先鋒攝影師 E. E. Barnard 發現--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240116/ 影像：Michele Guzzini 音樂：P!SCO - 鼎鼎 聲優：草莓大福 翻譯：An-Li Tsai (NSYSU) 原文：https://apod.nasa.gov/apod/ap240116.html Powered by Firstory Hosting

Tī 超新星殘骸 Simeis 147 複雜交纏 ê 雲絲內底，是真簡單就會揣無路。這个有交纏雲絲 ê 星雲，嘛去予編做 Sharpless 2-240，伊閣有一个偏名叫做 意大利麵星雲。伊 就 tī 金牛座 kah 御夫座 ê 交界。複雜 ê 氣體結構 tī 天頂 迒過 3 度 闊，差不多是 6 粒 月娘 tī 天頂 ê 大細。這團 恆星屑仔雲 ê 大細，照估計 ê 距離 3000 光年 來算，差不多是 150 光年 闊。這幅組合影像 是 kā 獨立 ê 狹頻濾鏡，包括 水素 發射線（紅色）kah 酸素 發射線（藍色）組合起來的結果。超新星 殘骸 ê 年歲，估計是 4 萬歲，意思是講，這个大質量恆星爆炸了後第一時間發出 ê 光，來到 地球 ê 時間，差不多是 4 萬年前。彼个時陣，長毛象 猶 tī 地球頂懸賴賴趖。這个 宇宙災難 毋但產生湠出去 ê 殘骸，閣有留一粒 脈動星 落來。脈動星是一个會自旋 ê 中子星，是 uì 恆星核心留落來 ê 殘骸。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240227/ 影像：Stéphane Vetter (Nuits sacrées) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240227.html Powered by Firstory Hosting

天頂若是有兩粒月娘，而且 in 互相 kā 另外一粒閘去，會是啥物狀況？這款狀況就發生 tī 火星。這支影片 就紀錄著太空中這款無四常 ê 現象。相片內底 是火星 ê 兩粒衛星。較大粒 ê 是 火衛一 Phobos，伊踅這粒紅色行星 ê 軌道較近。較細粒 ê 是 火衛二 Deimos，伊踅 ê 軌道較遠。這个系列影像 是舊年 歐洲太空總署 ESA 一台踅 火星 ê 機器人太空船 火星快車號 翕--ê。火星表面嘛 會當看著互食景色，毋過較罕得看著。Ùi 火星表面看，較倚 ê 衛星 Phobos 會 ùi 較遠 ê 衛星 Deimos 面頭前行過。較趣味 ê 是，Phobos 踅火星是遮爾倚，所以伊 ê 公轉週期煞比火星 ê 自轉週期閣較緊。Kah 地球 ê 月娘 相比，變做是西爿 peh 起來，東爿沉落去，就親像是 Phobos tī 天頂咧 倒退攄。Phobos 是上倚火星 ê 衛星，伊踅火星 ê 速度是遮爾緊，緊甲逐工會 ùi 火星天頂經過 3 擺。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240226/ 影片來源：ESA, DLR, FU Berlin, Mars Express 資料處理 & CC BY 2.0 License: Andrea Luck 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240226.html Powered by Firstory Hosting

直覺機器公司 ê 機器人登陸器 Odysseus tī 1972 年 Apollo 17 號任務 ê 時陣，完成美國頭一擺登陸月球 ê 任務 。2 月 15 ê 時陣，SpaceX 公司發射火箭，kā 電話亭大細 ê 登陸器送入去月球軌道，tī 美國東部時間 2 月 22 下晡 6：23，成功降落 tī 月球表面。伊 ê 降落區是 月球南極北 爿 300 公里遠 ê 所在，tī 一个叫做 Malapert A ê 隕石坑。目前這台登陸器停 tī 邊仔。伊這馬 當咧收集太陽能，kā 資料送轉來直覺機器公司 tī Houston ê 任務控制中心。這个任務 是人類頭一个做商業使用 ê 無載人任務。降落進前，Odysseus ê kha-mé-lah 翕著這張超級闊幅 ê 影像。停車跤 就 tī 正爿遐。伊這馬當咧飛過 Schomberger ê 隕石坑，離降落地點猶有 200 公里 ê 距離。Odysseus 號就飛 tī 月球表面 10 公里懸 ê 所在。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240224/ 影像：Intuitive Machines 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240224.html Powered by Firstory Hosting

大閣光 ê 美麗 捲螺仔星系 Messier 106 是這張宇宙影像 ê 主題。這張 2 度闊 ê 望遠鏡景色，是看 tùi 北斗星 湯匙柄 附近 ê 獵犬座。M106 嘛去予編做 NGC 4258，差不多有 8 萬光年闊，2350 萬光年遠，伊是 獵犬 II 星系群 上大粒 ê 成員。Tùi 一个足遠 ê 星系來講，M106 ê 距離是量甲足準--ê。這是因為伊會當利用 星系 ê 微波雷射，直接量著 星系 ê 距離。這款罕得看著、毋過會自然發生 ê 微波雷射，是 活跳星系核 ê 分子雲內底 ê 水分子發出來--ê。視野內底另外一个足顯目 ê 捲螺仔星系，是 M106 正爿下底 ê NGC 4217，這是一个差不多完全坦倒 ê 側向星系。NGC 4217 ê 距離就量較無遐爾準，差不多是 6000 萬光年遠。視野內底 ê 光針 是前景 ê 恆星，in 就 tī 咱銀河系內底。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240222/ 影像：Kyunghoon Lim 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240222.html Powered by Firstory Hosting

這隻鳥仔是比這粒山頭閣較大。海鷗星雲 會叫這个名是因為伊 ê 外形 就親像是一隻鳥仔。伊是一个發射星雲，tī 夜空中是 足闊--ê，伊 ê 角寸尺是 規粒月娘 ê 5 倍大以上，按呢差不多有 200 光年 大。海鷗星雲 ê 頭，編號是 IC 2177，正爿 ê 翼 下底 是一个星團，編號是 NGC 2343。海鷗星雲 主要 ê 成份是發紅光 ê 水素 氣體，內底閣有一寡塗粉帶，當咧形成 恆星。山頭頂懸這隻海鷗，就敢若是 tī 美國 加州 ê 山尖國家公園 頂懸咧飛。這幅影像，是 kā 長時間感光 ê 背景 佮 短時間感光 ê 前景 組合起來--ê。兩張攏是用仝一台 kha-mé-lah，tī 仝一个地點翕--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240221/ 影像：Dheera Venkatraman 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240221.html Powered by Firstory Hosting

這是一个 抑是 兩个星系？這个問題出現 tī 1950 年，彼陣 ê 天文學家 Arthur Hoag 雄雄發現這个無四常 ê 銀河系外天體。外箍圍仔主要是藍色恆星組成--ê，中央核球主要是較老 ê 紅色恆星，in 之間是一个 o͘-mih-mà ê 縫。Hoag 天體 是 按怎形成--ê？是按怎伊有這个 會當講是完美 ê 圓箍仔？到今咱猶毋知。是講，這个圓箍仔內底，攏是恆星 kah 氣體。Kah 起源有關係 ê 假說 講，星系 tī 幾若十億年前 相挵 了後，重力改變造成星系中心 ê 星系棍仔 消失 去矣。這張相片 是 哈伯太空望遠鏡 翕--ê，了後用 人工智慧 ê 演算法 kā 背景雜訊刣掉，才閣重新處理過--ê。無線電波波段 ê 觀測表示講，Hoag 天體 tī 過去 幾若十億年 ê 時間內，並無 吸積 一个較細 ê 星系。Hoag 天體 差不多有 10 萬 光年 大，伊就 chhāi tī 蛇 ê 星座 (巨蛇座) 方向 6 億 光年 遠 ê 所在。咱閣會當看著 tī 影像正爿有足濟遙遠 ê 星系，而且真拄仔好，7 點鐘方向閣有另外一个較遠 ê 圓箍仔星系。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240218/ 影像來源：NASA, ESA, Hubble 資料處理：Benoit Blanco 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240218.html Powered by Firstory Hosting

看極光 ê 人攏轉去矣！佇 冰島 九月一个安靜 ê 暗暝，半暝三點半，大部份 ê 極光攏已經消失矣。忽然間煞出現一陣新爆發 ê 粒子對天頂瀉落來，閣再 kā 地球 ê 大氣層 照予光。這个時陣，雄雄煞看著天頂 親像是 予一隻 非常 大隻 ê 鳳凰 kā 夜空照予光。用準備好 ê kha-mé-lah tùi 天頂趕緊翕兩張，閣加翕一張地景。Tī 後壁 ê 山頭是 Helgafell 山，tī 頭前 ê 河川是 Kaldá 河，兩个攏離冰島首都 Reykjavík 北爿 30 外公里遠。有經驗 ê 觀星者 to̍h 認會出 tī 山頂倒爿 ê 獵戶座。昴宿 星團 嘛 tī 相片中央面頂看會著。2016 年 ê 極光，干焦有一分鐘久，而且隨無去。若是無這張 數位組合相片，可能會予人當做是咧 臭彈。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240225/ 影像：Hallgrimur P. Helgason 圖標：Judy Schmidt 音樂：P!SCO - 鼎鼎 聲優：陳威盛 翻譯：An-Li Tsai (NSYSU) 原文：https://apod.nasa.gov/apod/ap240225.html Powered by Firstory Hosting

一粒宇宙塗粉粒 ùi 太空軁入去 咱地球 ê 頂層大氣。伊落落來 ê 速度，kah 樹葉仔落 tùi 塗跤 ê 速度相比，是緊足濟--ê，所以咱才看會著這个光爍爍 ê 流星軌跡。這幅美麗 ê 夜空景色，是 2 月 8 號暗暝 tī Naples 海灣 ê 度假勝地 Capri 島 ê 時陣，拄仔好翕著--ê。Kha-mé-lah 面向 東北爿 ê Naples kah 伊週邊 ê 城市，kā 規个海灣攏翕起來。這逝 流星軌跡 指向地平線 ê 方向，拄仔好 tī Vesuvius 火山 ê 剪影 頂懸結束。Vesuvius 火山是地球頂懸上有名 ê 火山 之一，伊 tī 西元 79 年 噴發，kā 龐貝城 吞去矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240217/ 影像：Wang Letian (Eyes at Night) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240217.html Powered by Firstory Hosting

彗星 12P/Pons-Brooks tī 4 月 21 ê 時陣，會閣再行到近日點，所以伊紲落來會愈來愈光。這粒 哈雷型 ê 週期彗星有青色 ê 彗鬚，咱這馬已經會當用細台望遠鏡看著伊矣。這粒活跳跳 ê 彗星有 藍色 ê 離子尾溜，這是去予 太陽風 歕出來 ê 彗鬚，較暗、嘛較歹看著。這張影像 是 kā 2 月 11 暗暝幾若張感光影像疊起來 ê 結果，才會當看著這个足暗 ê 尾溜，kah 伊 ê 詳細結構。這張影像有 2 度闊，內底有暗暗 ê 恆星、背景星系，就 tī 北天 ê 蝎虎座 方向。是講，彗星 12P tī 4 月 21 近日點 ê 時陣，kah 發生 tī 4 月 8 號 ê 日全食，才差 2 禮拜爾爾。時到，地球天頂會同齊出現彗星 kah 日全食。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240216/ 影像：Dan Bartlett 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240216.html Powered by Firstory Hosting

你敢揣會著玫瑰星雲？相片倒爿頂懸彼个大閣 紅、看起來敢若一蕊花 ê 星雲，是逐家上愛翕 ê 天體。毋過，其實伊是 踅 tī 圓錐星雲 kah 狐狸皮星雲 四箍圍仔 ê 水素 發射線。這个有名 ê 玫瑰星雲，就 chhāi tī 正爿下底，kah 其他星雲 相連。星雲 kah 星雲 之間，是一寡無固定形體 ê 雲絲。因為 這張 玫瑰星雲 ê 影像是 足闊閣足深，所以伊看起來，敢若閣有足濟蕊花 tī 內底。玫瑰星雲去予編做 NGC 2237，伊 ê 中心 是開放星團 NGC 2244，這是一个有足濟 足光藍光星 ê 星團。In ê 恆星風 kah 高能恆星光，kā 星雲中心 ê 物質掃甲清氣清氣。玫瑰星雲 kah 咱 ê 距離 是 5000 光年，伊 ê 視寸尺差不多是 規粒月娘 ê 3 倍大。這个天頂 ê 花園，就 tī 釘仔馬 座（麒麟座）ê 方向遐。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240214/ 影像：Olivier Bernard & Philippe Bernhard 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240214.html Powered by Firstory Hosting

孤張感光相片翕做這款，是愛先計畫好勢才有法度。第一步愛先了解這款 三項排做一逝 ê 美麗現象確實會發生。第二步是愛揣著上好 ê 翕相地點。毋過第三步是上困難--ê：愛 拄著好天，tī 拄仔好 ê 時間翕。攝影師 tī 6 年內翕 5 擺，逐擺攏 歹天。落尾，10 工前 ê 天氣 總算袂䆀，攝影師 ê 夢想總是達成矣！這張 tī 意大利 Piemonte 翕--ê。前景 ê 教堂是 Basilica of Superga，中央 ê 山 是 Monviso，背景就是 你知影 ê 月娘。Tī 這張相片內底，本底攝影師干焦翕著 欲落去 ê 月眉形 月娘，毋過因為感光時間傷長，去予兩重反射 ê 地球光，嘛叫做 da Vinci ê 光 影響著，煞 kā 月娘 ê 頂半爿照予光矣！ ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20231225/ 影像：Valerio Minato 音樂：P!SCO - 鼎鼎 聲優：阿綠 翻譯：An-Li Tsai (NSYSU) 原文：https://apod.nasa.gov/apod/ap231225.html Powered by Firstory Hosting

仙后座 內 ê 行星形星雲 HFG1 kah Abell 6，是像 太陽 這款 中型恆星 tī 性命上尾 ê 階段 留落來 ê 殘骸。就算 行星形星雲 ê 形體看起來有成 行星，in 兩个是完全無關係。相片 倒爿下底 ê HFG1 是 雙星系統 V664 Cas。這个系統是一粒 白矮星 kah 一粒 紅巨星 組成--ê。這兩粒踅 in 共同 ê 質量中心 咧行，週期差不多是 半工 ê 地球日。V664 Cas 用 比 地球頂懸上緊火車 300 倍 閣較緊 ê 速度，chhōa 規个星雲做伙行，產生 藍色 ê 弧形 震波。這个波 kah 四箍圍仔 星際媒介物 產生作用，作用上強 ê 部份，就會產生 上光 ê 弧形震波。差不多過 1 萬年 了後，產生星雲 ê 恆星發出 ê 紫外光 減弱，行星形星雲 就會變甲看無。行星形星雲有 美麗 ê 形體 kah 結構，所以是天文攝影師 足愛翕 ê 天體。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240212/ 影像Julien Cadena & Mickael Coulon 文稿：Natalia Lewandowska (SUNY Oswego) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240212.html Powered by Firstory Hosting

光爍爍 ê NGC 253 是天頂上光--ê，嘛是上厚塗粉 ê 捲螺仔星系之一。有人 kā 叫做 龍銀星系，這是伊 tī 細台望遠鏡內底 看起來 ê 形體。嘛有人 kā 叫做 玉夫座星系，因為伊就 tī 南天 ê 玉夫座內底。這个厚塗粉 ê 島宇宙就 tī 1000 萬光年遠 ê 所在。伊是 1783 年，一个數學家兼天文學家 Caroline Herschel 發現--ê。NGC 253 差不多有 7 萬光年大，是 玉夫座星系群 內底上大粒 ê 成員。玉夫座星系群是離咱 本星系群 上近 ê 星系群。Tī 這張彩色 ê 星系影像 內底，除了捲螺仔星系頂懸 ê 塗粉帶以外，星系盤 內底 ê 少年星團 kah 恆星形成區，嘛充滿 坱 phōng-phōng ê 塗粉。遮爾濟塗粉 kah 激烈 ê 恆星形成活動，予 NGC 253 成做一个 星爆星系。NGC 253 嘛是一个有強烈 高能 X 光 kah gamma 光 ê 發射源，這真有可能是因為這个星系中心附近有一寡大質量烏洞。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240215/ 影像：Steve Crouch 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240215.html Powered by Firstory Hosting

頂個月你敢有看著月圓？平均來講，地球 天頂逐個月攏會出現一擺 月圓。這是因為 月球 踅伊 ê 母行星 一輾，愛開 一個月 ê 時間，這會經過一个完整 ê 月相 週期。了後，伊會閣轉來用伊去予日光照予光 ê 彼半爿，面對地球。Tī 足濟 原住民文化內底，每一个月圓攏有一个名，頂擺 ê 月圓，有叫做 冰月--ê、O͘-thá-khuh 月--ê、嘛有叫做 恬月--ê。新曆 ê 一月，有一寡文化嘛 kā 頭一个月圓號做 狼月，算是對這个會吼 ê 有名動物 致敬。這張 頂個月 ê 狼月，是 tī 意大利 Alps 山脈翕--ê，是 kā 長時間 kah 短時間 ê 感光影像合成 ê 相片。這張影像會遮爾 引人注目，是因為 tùi 一寡人來講，踅 tī 月娘四箍圍仔 ê 雲，就親像是狼 ê 喙，欲 kā 狼月 吞落去。毋過嘛有人認為講，這是狼 ê 目睭。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240213/ 影像：Antoni Zegarski 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240213.html Powered by Firstory Hosting