NASA 逐工一幅天文圖 APOD Taigi

這張速翕 是 8 月 11 tī 國際太空站 翕--ê。這个時陣，太空站是飛 tī 地球 南半球 印度洋 頂懸 430 公里懸 ê 所在。這个壯觀 ê 景色是向南爿 kah 東爿看過去 ê 景色，上下底是地球 ê 地平線，中央經過 紅色 kah 青色 ê 南極光 窗仔布。國際太空站 ê 軌道懸，差不多就是 高層大氣 ê 懸度。極光是 薄縭絲 ê 高層大氣 內底 ê 激發態 酸素原子 發出 ê 輻射。青色發射線 主要是 海拔 100 到 250 公里懸 ê 酸素原子輻射。毋過紅色發射線 是 酸素原子輻射 一直到 海拔 500 公里懸 攏有。這个低地球軌道 ê 景色，除了南極光，嘛有翕著 南半球 ê 星空。獵戶座皮帶 kah 獵戶座星雲 就出現 tī 地球 邊界頂懸，就相片中央倚倒爿遐。天狼星是 大犬座 ê alpha 星，是 地球暗暝天頂 上光 ê 恆星。伊就出現 tī 太空站 下底 ê 南半球夜空，tī 相片正爿中央遐。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240913/ 影像：NASA, ISS Expedition 71 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240913.html Powered by Firstory Hosting

James Webb 太空望遠鏡 翕--ê 這張 壯麗 ê 拼鬥影像，是 少年星團 NGC 1333 ê 中心。伊是一个 tī 英仙座 方向，大型 英仙座分子雲邊仔 ê 星團。而且伊無偌遠，才 1000 光年遠 爾爾。Webb 太空望遠鏡 ê 深空 探索 包括觀測這區，主要是欲辨識 低質量棕矮星 kah 獨立行星。太空望遠鏡 ê 視野有 2 光年闊，kā 這个厚塗粉星團 ê 恆星工場 包 tī 內底。實際上， 咱已經知影 NGC 1333 內底有 比 100 萬歲閣較少歲 ê 恆星，毋過大部份攏去予 滿四界 ê 星塗 閘牢矣，所以 光學望遠鏡看袂著。這个亂糟糟 ê 環境可能 kah 咱 太陽 tī 45 億年前 拄形成 ê 時陣有成。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240912/ 影像：ESA/Webb, NASA, CSA, A. Scholz, K. Muzic, A. Langeveld, R. Jayawardhana 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240912.html Powered by Firstory Hosting

Slovakia 共和國 kah 波蘭 ê 自然邊界是 Tatra 山脈。Tatra 山 是 Carpathians 山脈 上懸 ê 山。Tùi 天文攝影師 來講，遮是一个足有名 ê 所在。這張相片 是 5 月份翕--ê，你會當看著咱 銀河系 中心 kah 一寡有名 ê 恆星工場，像 內海仔星雲 kah Omega 星雲，就出現 tī Tatra 山脈天頂。恆星工場 內底攏是 水素離子，這是做水 ê 基本元素，咱地球頂懸上濟-- ê 就是水。所有 tī 宇宙 內底咱所知影 ê 性命形式，水是一項 足重要 ê 元素。這个 水，就 tī 相片前景 ê Bialka 河 內底。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240911/ 影像：Marcin Rosadziński 文稿：Natalia Lewandowska (SUNY Oswego) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240911.html Powered by Firstory Hosting

你若是 ùi 火星頂懸飛過，會看著啥物？這張相片 是 火星快車號 太空船 7 月 ê 時陣 ùi 火星 足趣味 ê 一區 頂懸翕--ê。相片內底上有名 ê 特徵是 Olympus 山，這是 太陽系 內底上大 ê 火山，就 tī 相片正爿頂懸遐。正爿地平線頂懸有另外一个嘛足大 ê 火星火山：Pavonis 山。咱閣會當看著這粒 紅色行星 ê 表面 有幾若个 圓 ê 隕石坑。予人印象較深 ê 是，咧翕這張相片 ê 時陣，中央倒爿有一粒 烏烏--ê，是 註定會死 ê 火衛一 Phobos。倒爿下底 ê 火星 地表 是 Orcus 塌仔地，伊是長株圓--ê，而且大甲毋是款。是按怎有這个 神祕 ê 結構，到今咱猶毋知。ESA ê 機器人太空船 火星快車號 tī 2003 年發射。Tī 過去足濟 有名 ê 科學 發現 中，伊是一个捌提供證據講 火星頂懸有大型 水體 ê 太空船。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240909/ 影像來源：ESA, DLR, FU Berlin, Mars Express 資料處理 kah CC 2.0 版 ê 許可: Andrea Luck; h/t: Phil Plait 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240909.html Powered by Firstory Hosting

烏暗 ê 馬頭星雲 kah 發光 ê 獵戶座星雲 tī 宇宙遠景成做一个對照，就 chhāi tī 這張 美麗拼鬥影像 ê 兩个對角。In tī 1500 光年遠 ê 所在，是 夜空中 足好揣 ê 兩个 星座。咱熟似 ê 馬頭星雲 看起來敢若是烏雲，kah 倒手下跤 ê 紅色發光區相比，是一个 較細 ê 形體。參宿一 是 獵戶座皮帶 內底上東爿 ê 恆星，是 馬頭星雲 倒爿上光 ê 恆星。Tī 參宿一下跤是 火舌星雲，有足光 ê 發射雲 kah 變化多端 ê 塗粉烏帶。這个壯麗 ê 發射區是 獵戶座 (嘛叫做 M42)，to̍h tī 正爿頂懸。Tī 伊 ê 倒爿隨看著一个足明顯 ê 反射星雲，有人嘛 kā 叫做「慢跑的人」。這區內底 四界攏是 虯毛形 ê 發光水素氣體。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240910/ 影像：Antoine & Dalia Grelin 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240910.html Powered by Firstory Hosting

M31 仙女座星系 是咱目睭會當直接看著 ê 天體內底 上遠--ê。伊離咱有 250 萬 光年 遠，是一个大細 超過 20 萬光年 ê 大捲螺仔星系。雖罔講這个 tī 仙女座 內底 ê 仙女座星雲 有淡薄仔暗，咱猶是看會著。這張媠甲擋袂牢 ê 望遠鏡影像 是 kā 踅地球行 ê 哈伯太空望遠鏡 kah 地面望遠鏡 Subaru kah Mayall ê 影像資料疊做一張--ê。影像 ê 對比足明顯 ê，有黃色 ê 核心、暗色彎曲 ê 塗粉帶、伸長 ê 捲螺仔手骨、手骨面頂 ê 藍色星團 kah 紅色星雲。閣 50 億年，仙女座星系可能 to̍h 會 看較清楚 矣。Tī 伊 kah 咱 銀河系 合併 抑是 ùi 咱銀河系邊仔 閃過 進前，咱規个天頂會攏是伊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240908/ 影像：Subaru (NAOJ), Hubble (NASA/ESA), Mayall (NSF) 資料：R. Gendler & R. Croman 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240908.html Powered by Firstory Hosting

火星有 2 粒 細粒衛星，火衛一 Phobos kah 火衛二 Deimos，這兩个名是 ùi 希臘文 ê 驚 kah 惶 來--ê。這是火衛二 Deimos ê 詳細表面圖，兩張攏是。這寡影像是 NASA 火星探測軌道衛星 頂懸 ê HiRISE kha-mé-lah tī 2009 年翕--ê，這台太空船 ê 長期任務 是監看這粒紅色行星。火衛二 Deimos 是 火星 2 粒衛星內底 較外口彼粒。伊是太陽系內底上細粒 ê 衛星之一，直徑才 15 公里爾爾。火星 這 2 粒衛星 攏是 Washington D.C. ê 美國海軍天文台 內底 ê 美國天文學家 Asaph Hall tī 1877 年揣著--ê。毋過 tī 1610 年 ê 時陣，天文學家 Johannes Kepler 就講火星有 2 粒衛星矣。Johannes Kepler 就是寫出 行星運動定律 ê 人。其實 Kepler ê 預測 毋是根據 科學原理，毋過伊 ê 文章 kah 想法 影響足大--ê。大甲像 Jonathan Swift 寫 ê 小說「格列佛遊記」嘛講著火星 ê 這 2 粒衛星。小說是 1726 年寫--ê，比這 2 粒衛星 去予揣著 ê 時間 閣較早 150 冬。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240907/ 影像：HiRISE, MRO, LPL (U. Arizona), NASA 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240907.html Powered by Firstory Hosting

NGC 247 差不多有 7 萬光年大，是一个比銀河較細 ê 捲螺仔星系。咱量著 伊 ê 距離 kah 咱才差 1100 萬光年爾爾，實在是足近--ê。Ùi 咱 ê 角度來看，伊趨坦倒，是一个側向星系。伊是這个視野 ê 主角，望遠鏡看--ê 方向是 南天 ê 海翁座。星系盤其中一爿有一空，敢若是 針欲穿線彼空，所以有人 kā 叫做「針空星系」。這張清楚 ê 星系肖像 有足濟 背景星系，其中上顯目 ê 就是 NGC 247 倒爿下跤彼 4 粒 排規排 ê 星系，in 就叫做 Burbidge 星系鍊。Burbidge 星系鍊 tī 差不多 3 億光年遠 ê 所在。NGC 247 kah 金爍爍 ê 捲螺仔星系 NGC 253 攏是 玉夫座星系團 ê 成員之一。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240905/ 資料來源：Eric Benson 資料處理：Dietmar Hager 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240905.html Powered by Firstory Hosting

你有看著一隻夜婆無？這張 宇宙特寫 內底 ê 夜婆，to̍h 出現 tī 面紗星雲 ê 東半爿。面紗星雲 本身是一个大型超新星殘骸，是大質量 恆星 死亡爆炸 了後，產生 ê 脹大 ê 雲屑仔。面紗星雲是 圓箍仔形，tī 天鵝座 方向，差不多有 3 度闊。NGC 6995 私底下嘛叫做 夜婆星雲，tī 天頂看起來干焦半度闊爾爾，這差不多是 月娘 ê 視寸尺。面紗星雲離 地球 有 1400 光年遠，照這个距離來估算，伊差不多 有 12 光年闊。這幅組合影像 ê 影像資料是 ùi 狹頻 濾鏡來的。超新星殘骸 ê 水素原子 發射線是紅色 ê，酸素 原子 ê 強發射線是藍色 ê。面紗星雲 ê 西半爿 tī 另外一个 季節看起來 就敢若是 尪姨 ê 掃帚，所以伊就去予人叫做 尪姨掃帚 星雲。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240904/ 影像：Mike Taivalmaa 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240904.html Powered by Firstory Hosting

9 工前，這 2 个 tī 天頂代表無仝意義 ê 天體，做伙出現 tī 天頂。講較詳細咧，ùi 加拿大 Alberta 省 看著--ê 東爿天頂，除了 月娘，閣有 昴宿星團 ê 七姑星。昴宿星團 是足有名 ê 天文景色，一般講來，伊是一个迷人 ê 藍色 反射星雲。毋過 tī 遮，伊去予 柑仔色 ê 月出 天景 比落去矣！月球有半爿去予日光照著，所以咱 kā 叫做 半月。毋過這半爿是過度感光矣！另外彼半爿較暗 ê 月球，是去予 地球反射 ê 地球光 照著--ê。這張相片 是 8 擺連紲 感光 ê 合成相片，相片 ê 光暗有照 人類目睭 較方便看 ê 範圍調整過。是講，月娘逐個月攏會 ùi 昴宿星團 面頭前，抑是 附近 行過。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240903/ 影像：Alan Dyer, TWAN 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240903.html Powered by Firstory Hosting

是按怎土星會遮爾大粒？毋是啦！這是 地球 ê 雲閘 tī 月娘 頭前啦！月娘這馬是月眉形--ê，毋閣咱會看著規粒月娘，是因為伊反射 地球光，嘛叫做 Da Vinci ê 光。太陽 直接 kā 月球 ê 腹肚底照予光，成做一个 月眉形。這就表示講，太陽這馬一定是 tī 地平線下底，而且這張相片是 tī 日出進前翕--ê。這張 會予人閣看一擺 ê 相片是 tī 2019 年 12 月 24 翕--ê。兩工後，月娘會 ùi 日頭面頭前趨過，產生 日食。前景 ê 電火是 ùi 瓜地馬拉 ê 小鎮來--ê，伊 to̍h tī Pacaya 大火山 ê 後壁。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240901/ 影像：Francisco Sojuel 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240901.html Powered by Firstory Hosting

這是一張 NGC 7771 星系群 做主角 ê 迷人夜空相片。NGC 7771 tī 飛馬座方向 2 億光年遠 ê 所在，就是相片中央彼粒大粒--ê 側向 捲螺仔星系。伊 ê 大細差不多有 7500 光年大，下底有 2 个 較細 ê 星系。伊正爿彼粒大粒--ê，是 正向 捲螺仔星系 NGC 7769。NGC 7771 星系群 之間有交互作用，所以 in 互相會倚來倚去，經過久長 ê 宇宙時間了後，星系會合併。欲揣著這款交互作用，看星系是毋是有 變形，抑是 星系之間是毋是有引潮力 搝出來 ê 微弱 恆星流，就會知。毋過欲看著遮爾清楚 ê 星系群是較困難。因為深空影像嘛會翕著 前景 ê 一大片 塗粉雲。這款暗暗霧霧 ê 銀河絹雲，嘛叫做 積分通量星雲 IFN。這款 暗暗 ê IFN 就 tī 銀河盤 頂懸 幾若百光年遠 ê 所在，會反射咱銀河系內底 ê 恆星光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240831/ 影像：Steve Mandel and Bob Fera 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240831.html Powered by Firstory Hosting

這是一張用 望遠鏡翕--ê 詳細月球景色。相片倒爿頂懸，是 月球 ê 南極。這是 8 月 23 翕--ê，翕--ê 是 敧敧曲曲 ê 月球南部高地。因為透視角度 ê 關係，隕石坑 看起來是密喌喌，而且愈倚月球邊緣，隕石坑看起來就愈扁。中央附近 上大彼个是 Moretus 隕石坑，直徑 是 114 公里。Moretus 隕石坑是 月球頂懸一个大型 ê 少年隕石坑。伊有 樓梯型 ê 內底壁，坑底 ê 山尖有 2.1 公里懸。看起來 kah 較倚北爿 ê 少年隕石坑 Tycho 有成。相片頂懸是月球邊緣 ê 山脈，差不多有 6 公里懸。月球南極附近是 永暗區 ê 隕石坑坑底，照講，這應該是水冰 ê 冰庫。所以這个敧敧曲曲 ê 月球南極 就變做是一个 足有名 ê 探險區。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240830/ 影像：Lorand Fenyes 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240830.html Powered by Firstory Hosting

咱附近有一个叫做 Messier 17 ê 恆星工廠，就 tī 5500 光年遠、厚星雲 ê 人馬座 內底。照這个距離來算，1.5 度 ê 視野 差不多是 150 光年闊。這張 清楚 ê 彩色合成影像，主要是欲翕 這寡較暗 ê 氣體塗粉雲 ê 細節，相片 ê 背景是 銀河 中央 ê 恆星。Tī M17 內底，有 ùi 宇宙雲 kah 塗粉做出來 ê 高溫大質量恆星。In 所產生 ê 恆星風 kah 高能輻射光，沓沓仔 kā 賰--ê 星際物質 吹走，產生這款 海綿質 外形 kah 彎彎曲曲 ê 形體。M17 嘛叫做 Omega 星雲，抑是 天鵝星雲。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240829/ 影像：Gaetan Maxant 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240829.html Powered by Firstory Hosting

咱當時會當同齊看著 烏洞、鬱金香、kah 天鵝？暗暝 ê 時陣，若是時間有拄好，而且你 ê 望遠鏡有指向 正確 ê 方向，按呢就看會著！這个複雜 美麗 ê 鬱金香星雲 就 tī 天鵝座 方向 8000 光年遠 ê 所在。Tī 天鵝座邊仔 ê OB3 星協 內底有 O 型星 HDE 227018。這款少年高能 ê 恆星發出 紫外光輻射，kā 鬱金香星雲內底 ê 原子 離子化，產生發射線。天文學家 Stewart Sharpless tī 1959 年 編 ê 目錄 內底，kā 這陣 70 光年長 ê 星際氣體 kah 塗粉 叫做 Sh2-101。這个視野 內底閣有 一粒烏洞 天鵝座 X-1。伊其實是一粒 微類星體，是天頂上強 ê X-光 發射源 之一。Tī 這个宇宙鬱金香花葉 ê 正爿，咱會當看著較暗較藍 ê 衝擊波前，彼是 ùi 藏 tī 星雲 內底 ê 烏洞 噴出來 ê 強力噴射流 驅動--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240828/ 影像：Anirudh Shastry 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240828.html Powered by Firstory Hosting

太陽頭頂是按怎有一葩三角形 ê 火？這實在是無四常，毋過這葩火其實是 一直咧振動 ê 太陽日珥 ê 一部份。太陽 表面 ê 環形磁場 會 kā 高能粒子流 接起來。這款發光 ê 氣體結構，有當時仔會擋幾若個月遐爾久。日珥 會遐爾光，是因為伊有 特別燒、實密、kah 無透光 ê 太陽 電漿。這款 予人意外 ê 三角結構是頂禮拜出現--ê。這个 三角形 ê 日珥 是比咱地球閣較大。這張相片是幾若位 太陽攝影師 翕--ê，而且去予 NASA 太陽動力學天文台 紀錄 落來--ê。這个現象會 tī 一工內形成，而且一工左右就會花去。相片 翕著 ê 紅色，是 水素 發射線 發出 ê 紅光。下底是 太陽色球層 表面 ê 太陽纖維。Kah 這比起來，背景天空傷暗矣，看袂著半粒星。今年 ê 太陽表面，是 活跳跳。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240902/ 影像：Andrea Vanoni 音樂：高小糕 GaoXiaoGao 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240902.html Powered by Firstory Hosting

土星若是消失去 會按怎？伊有當時仔確實會無去。毋過，伊毋是消失去矣，伊只是去予 頭前 ê 月娘 閘牢矣。這款現象就叫做 土食，講較正確咧，這是 月 掩 土星。幾若工前，地球頂懸有一大片所在，ùi 秘魯、大西洋、到 意大利，攏看著這个現象。這張彩色相片 是 目前為止上清楚 ê 數位合成相片，較暗 ê 土星 kah 較光 ê 月娘 之間 ê 光暗有重新調整過。這張相片是 發生掩星進前，tī 西班牙 加泰隆尼亞 ê Breda 翕--ê。到年尾進前，逐個月攏會發生 月 掩 土星。毋過愛徛著位，才看會著這个一目𥍉就無去 ê 現象。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240827/ 影像：Pau Montplet Sanz 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240827.html Powered by Firstory Hosting

你有看著流星無？這是 流星雨 時期 逐家上愛問 ê 問題，因為流星是一目𥍉就無去。這寡飛過天頂 ê 流星是光爍爍。你若是知影 in 進前 是 其他世界 ê 細粒石頭，可能會予 in 變甲較有價值毋過 kah 你做伙來 ê 朋友可能袂按呢想。這支影片 是 kā 2023 年 英仙座流星雨 期間 tī 中國 內蒙古 翕--ê 幾若支短片鉸做伙 ê 影片。影片拄仔好有翕著幾若粒較光 ê 流星 爍咧爍咧。今年 2024 年 英仙座流星雨 會閣出現 足濟美麗 ê 流星。另外一个 有名 ê 流星雨 是 雙生仔座流星雨，伊 tī 12 月中 ê 時陣上強。今年 12 月中會拄著初一前後，到時若是欲揣流星，較袂去予月光影響著。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240826/ 影像：Jeff Dai (TWAN) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240826.html Powered by Firstory Hosting

土星 ê 衛星 土衛二 Enceladus ê 地下海洋，是毋是會 ùi 海底山谷 流出來？這款去予 叫做 虎紋 ê 長溝仔，kā 冰 ùi 土衛二 Enceladus 冷凍 ê 內部 噴到 太空中，tī 衛星 南極 ê 天頂 形成 冰珠仔雲，這就是神祕 ê 土星環 E 環 ê 來源。這个證據是 ùi 2004 年 到 2017 年 踅 土星 ê Cassini 機器人太空船 來--ê。這張相片 是 近距離 飛過 土衛二 Enceladus ê 懸解析度影像。這張 假色相片 內底 ê 藍色 條紋，就是這个叫做 虎紋 ê 特別紋路。土衛二 Enceladus 是按怎會遮爾活跳跳，到今猶是一个謎。伊 ê 厝邊衛星 土衛一 Mimas kah 伊差不多大細，毋過是 死殗殗。科學家 tùi 噴出來 ê 冰粒 做分析，證據表示講，土衛二 Enceladus 內底有複雜 ê 有機分子。這款 厚炭素 ê 大分子 會當支持 土衛二 Enceladus 地下 可能 有 性命 ê 假說，毋過猶無法度證明講 伊有。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240825/ 影像：NASA, ESA, JPL, SSI, Cassini Imaging Team 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240825.html Powered by Firstory Hosting

CTA 1 內底有一粒 恬 chih-chih ê 脈動星。超新星殘骸 是 天文學家 tī 1960 年 ê 時陣，tī 無線電波 發現 ê 發射源，了後才知影伊是 大質量恆星 死亡爆炸 ê 階段。毋過科學家無 tī 無線電波波段 揣著 這粒 脈動星。脈動星就是大質量恆星 核心崩塌 留落來 ê 殘骸，是一粒 會自旋 ê 中子星。超新星爆炸拄開始 1 萬年 ê 時陣，星際屑仔雲 tī 光學波段 是 足暗--ê。這張 深空望遠鏡影像 是 tī 仙王座 北爿翕--ê。這个星場有 2 度闊，咱會當 tī 可見光波段 看著 CTA 1 咧脹大 ê 衝擊波前。雖罔講科學家無揣著 無線電波 ê 脈動星，毋過 Fermi Gamma-光 太空望遠鏡 tī 2008 年 量著 CTA 1 ê 脈動輻射，證明講這个 超新星殘骸 內底 確實有一粒 咧 自旋 ê 中子星。這个發射源去予人認為是 一大陣 脈動星 ê 頭一粒。這寡脈動星 tī 無線電波波段 是 恬 chih-chih，毋過 tī 高能 ê gamma 光 量著--ê，是活跳跳。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240823/ 影像：Thomas Lelu 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240823.html Powered by Firstory Hosting

六月底 ê 時陣，有一个 tī 土耳其 Bursa 省 騎 o͘-tó͘-bái 欲去 Uludağ 山 ê 人，發現 in 家己 行 tī 低雲 kah 雲霧頂懸。大粒日頭 就 tī in 後壁，山 ê 另外一爿 是 美麗 ê 大氣 觀音圈 kah 霧虹。一寡人 kā 叫做 聖光 抑是 Brocken 幽靈。這有當時仔嘛會當 ùi 飛龍機 抑是 大樓 內底 看著。伊看起來就親像是 一个較光 ê 圓箍仔 kā 較烏 ê 巨人 箍 tī 內底。是講，烏暗巨人其實是 觀測者 tī 日頭 對面留落來 ê 烏影。咱來看這支 90 MB ê 影片 就知。雲 kah 霧 是 足細粒 ê 水珠仔組成--ê，比雨水 閣較細粒。In 會坳射、反射日光，產生這款 彩色 日箍 kah 闊幅 ê 霧虹。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240803/ 影像：Cem Özkeser and Yasin İlcebay 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240803.html Powered by Firstory Hosting

Tī 這个小島 ê 天空景色內，月圓 kah 地球 ê 烏影 是做伙出現。這个迷人 ê 景色是 8 月 20 拜二早仔 tī 地球南太平洋 斐濟 翕--ê。對 透早就 peh 起來 ê 人來講，西方天空 ê 烏影是 逐工攏看會著 ê 景色。毋過，殕藍色 ê 烏影 定定去予人看落勾去，因為 東爿地平線彼爿較光。日頭落去 產生 ê 地球烏影，迵過 實密 ê 大氣層。烏影頂懸 ê 天空，是粉紅仔色 ê 反晨昏光弧。這條光弧 嘛叫做金星帶，伊 ê 色會遮爾媠，是因為這是 ùi 對面地平線 peh 起來 ê 日頭 ê 紅化日光 反向散射 造成--ê。因為月光迵過大氣層 ê 路線較長，所以會產生 紅化效應，予伊看起來較紅。毋過照定義來講，這工 ê 月圓 是這个季節 ê 藍月，就是一季內底 4 擺月圓 ê 第 3 擺。雖罔講地平線附近 ê 月圓 定定予人印象足深--ê，毋過對一寡人來講，這粒 8 月 月圓較重要 ê 代誌是，伊是 2024 年 連紲 4 个超級月娘 ê 頭一个。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240824/ 影像：Jin Wang 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240824.html Powered by Firstory Hosting

這張相片是 tī 天蠍座 尾溜一个厚天星 ê 星場。星場內底 ê 宇宙塗粉 形成 ê 剪影，予人聯想著 恐怖 ê 烏塔。這張 美麗 ê 望遠鏡景色 有 40 光年闊。中央 ê 烏暗星雲內底，可能有 大型塗粉分子氣體 崩塌、形成恆星。相片內底 ê 彗星形雲球，是 高溫恆星 發出來--ê 強烈紫外光輻射 雕出來 ê 結果。這寡高溫恆星，就 tī 相片正爿頂懸外口 ê NGC 6231 內底 ê OB 星協 中。高能紫外光嘛提供能量，驅動 雲球 外沿 ê 水素氣體 發出紅光。反射星雲 發出--ê 藍光，是藏 tī 塗粉 內底 ê 高溫恆星 造成--ê。這个烏塔 kah 附近 ê 星雲，離咱有 5000 光年遠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240822/ 影像：Mike Selby 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240822.html Powered by Firstory Hosting

先 kā X 光影像 擲一爿，咱這馬來 想像一下，若是用 Gamma 光 來看，你會看著啥物？這張全天圖 是 NASA Fermi Gamma 光 太空望遠鏡 看著 ê 宇宙。Fermi 看著 ê 光，能量是 咱 人類目睭 看著--ê 10 億倍。這張圖 是累積 12 年 Fermi 觀測 ê 結果。無仝色水 代表 gamma 光 發射源 有偌光，較光 ê 發射源，色較淺。橫 tī 中央彼逝，是咱 銀河系 ê 中央盤。出現 tī 銀河盤 頂懸 kah 下底 ê 紅點 kah 黃點，大部份是 遙遠 ê 星系。毋閣 tī 銀河盤 內底--ê，是 tī 咱附近 ê 脈動星。藍色 背景是 遙遠 ê gamma 光 發射源 發出 ê 漫射光。In 傷暗矣，無法度一粒一粒量著。一寡 gamma 光 發射源 猶未去予人認出來，所以這是一个研究主題，因為 無人知影 in 是啥物。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240821/ 影像：NASA, DOE, Fermi LAT Collaboration 文稿：Barb Mattson (U. Maryland, NASA's GSFC) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240821.html Powered by Firstory Hosting

Chăng 有超級月娘。Eng 暗 ê 月娘嘛予人印象足深--ê。超級月娘 看起來比平常時 ê 月圓 較大 嘛 較光，這是因為 in 較倚地球，贏過 90 葩 ê 月圓。這擺 ê 超級月娘 拄仔好拄著 藍月。藍月 毋是 藍色--ê，伊 ê 定義 是 一季內底 4 擺月圓 ê 第 3 擺。藍月 ê 另外一款定義是一個月 內底 ê 第 2 擺月圓。這張相片 是 chăng 暗 tī 希臘 翕--ê。超級藍月 才拄 peh 到 Poseidon 海神廟 後壁，而且是伊看起來上大粒 ê 時陣。這擺 ê 超級月娘 足特別--ê，因為伊是 4 个連紲出現 ê 超級月娘 ê 頭一个。紲落來 3 个超級月娘 會出現 tī 9 月，10 月，kah 11 月。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240820/ 影像：Alexandros Maragos 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240820.html Powered by Firstory Hosting

娘仔殼星雲內底有新 ê 星團。這个美麗 ê 娘仔殼星雲 編做 IC 5146，差不多有 15 光年 闊。伊就 tī 北天夏季夜空 飛甲懸懸懸 ê 天鵝座 方向 4000 光年遠 ê 所在。伊遮爾出眾，就 kah 其他恆星形成區仝款。紅光是 水素氣體 去予少年高溫 ê 恆星激發--ê。目睭看袂著 ê 分子雲 邊仔，有 反射塗粉 ê 星光。實際上，星雲中心彼寡較光 ê 恆星干焦幾若十萬歲爾爾。伊會提供能量予星雲發光，嘛會 kā 分子雲 閬空內底 形成恆星 ê 塗粉 kah 氣體 掃清氣。這是一張感光 48 點鐘久 ê 深空彩色影像，咱會當看著 厚塗粉 ê 恆星工場 內底 kah 邊仔 ê 美麗 景色。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240819/ 影像：Luis Romero Ventura 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240819.html Powered by Firstory Hosting

日珥爆發是上壯觀 ê 太陽現象之一。2011 年，NASA 一台踅太陽行 ê 太陽動力學天文台 太空船 tī 太陽表面 翕著這个 予人印象足深 ê 大型 日珥。這个戲劇性 ê 爆發是 tī 紫外線波段翕著--ê。原本 ê 縮時攝影影片 是 90 分鐘久，這支新--ê 是 24 秒 抾一張。日珥 ê 規模是足大--ê，這个敢若窗仔布 ê 燒氣體，凊凊彩彩 就比 規粒 地球 較大。日珥 是 受著太陽 磁場 引導、出現 tī 太陽表面 ê 一款短期結構。無聲 ê 日珥通常會擋一個月左右，而且可能會因為 日冕物質噴射 (CME) 爆發，kā 燒氣體 擲到 太陽系 內底。產生 太陽日珥 ê 能量 機制，到今一直是一个研究主題。咱 ê 太陽這馬閣拄著 太陽活動 上強 ê 時期，所以伊這馬是活跳跳，定定會有 日珥爆發 kah CME。頂禮拜才因為按呢，tī 地球 產生 美麗 ê 極光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240818/ 影像：NASA/Goddard/SDO AIA Team 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240818.html Powered by Firstory Hosting

火箭實驗室 ê 電子號火箭 tī 8 月 11 這工 ùi 地球發射。電子號火箭 ê 任務叫做「飛過規个天頂 ê SAR」，SAR ê 全名是「合成孔徑雷達」，是一台細台人造衛星。這台火箭載 SAR ùi 紐西蘭 北島 ê Mahia 半島 發射，飛到 低地球軌道 頂懸遐。火箭 發射 ê 軌跡媠甲，ùi 南部海岸 向 東爿天頂 飛過去。這張合成相片是 kā 2.5 點鐘 內 ê 50 張連紲感光影像 疊出來 ê 結果。固定 tī 三跤馬 頂懸 ê kha-mé-lah 翕--ê 方向是 南天極，就是 地球自轉軸 延伸到天頂 ê 方位。毋過南半球 ê 夜空 無較光 ê 天星 通紀錄這个方位。就算是按呢，南天極 猶是真好揣。伊就 tī 天頂遮爾濟 天星軌跡 ê 仝心弧中心。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240817/ 影像：Rory Gannaway 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240817.html Powered by Firstory Hosting

這張是 8 月 12 tī 加拿大 Nova Scotia 省 Halifax 西部，用 kha-mé-lah 向 北極方向 翕著 ê 孤張感光 ê 夜空相片，有翕著 足光 ê 英仙座流星。流星 白鑠鑠 ê 光巡是一目𥍉就無去矣。伊敢若是飛過 北斗星 ê 款，北斗星 是 北方 ê 星群，嘛是天頂 ê 大支湯匙。閃閃爍爍 ê 北極光 就 tī 暗暝 ê 天頂 咧跳舞。今年 ê 英仙座流星雨 上濟 ê 時期，拄仔好 拄著 地磁風暴，予地球 ê 極光活動變甲較強，所以 觀星者 嘛歡喜甲。像這款強烈 ê 太空天氣，其實是 活動力較強 ê 太陽 產生 ê 太陽爍光 引起 ê 現象。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240816/ 影像：Jason Dain 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240816.html Powered by Firstory Hosting

英仙座流星雨是 ùi 佗位來--ê？英仙座流星體 是 彗星 Swift-Tuttle 落 tī 彗星軌道頂懸 ê 細粒砂石，in 落尾會沓沓仔散去。這支動畫 kā 所有踅 太陽 一輾 ê 流星體 攏畫出來。逐年，只要地球接近 這輾 流星體，就會產生 英仙座流星雨。動畫內底一寡較光--ê，是 彗星屑仔。這款大細 通常傷暗矣，量袂著。干焦 一部份 ê 彗星屑仔 會入內 地球大氣層。In ê 溫度會變懸，散去進前會變光。若是拄著好天，eng 暗 kah 紲落來幾若暗，咱攏會當 tī 天頂 看著 英仙座流星雨 kah 其他 活潑 ê 流星雨。因為 翻點了後，頂半月 已經 落去 矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240811/ 動畫：Ian Webster 資料：NASA, CAMS, Peter Jenniskens (SETI Institute) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240811.html Powered by Firstory Hosting

這張 tī 瑞典 Vallentuna 後半暝 翕--ê 夜空相片中，有翕著 光爍爍 ê 火星 kah 閣較光 ê 木星 行到「大合」ê 相位。相片是 tī 8 月 12 發生 地磁風暴期間 翕 ê 速翕相片。相片倒爿有翕著 北極光。這工，英仙座流星雨 ùi 地球天頂落來，這寡塗粉粒 是 ùi 流星雨 ê 源頭，週期彗星 Swift-Tuttle 來--ê。相片正爿 ê 流星光巡 是 英仙座流星雨，伊用 一秒鐘 60 公里 緊 ê 速度迵過地球大氣層。金爍爍 ê 昴宿星團 是 地球天頂足有名 ê 天體，伊就 tī 英仙座流星 ê 光巡 下底。Tī 希臘神話內底，昴宿星團 是 泰坦族天神 Atlas kah 海洋女神 Pleione ê 7 个查某囝。昴宿星團 內底上光 ê 9 粒星，就是用 這 7 个查某囝 kah in 爸母 ê 名 來號名--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240815/ 影像：P-M Hedén (Clear Skies, TWAN) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240815.html Powered by Firstory Hosting

這个暗暝是足特別--ê。8 月 11、12，禮拜、拜一 ê 暗暝天頂，是 一年一擺 ê 英仙座流星雨 流星上濟 ê 時陣。這是 彗星 Swift-Tuttle ê 彗星屑仔 去挵著 地球大氣，tī 夜空中 畫出 流星 ê 痕跡。閣較特別 ê 是，德國 中部 tī 這工暗暝 ê 天色，是 茄仔色--ê。茄仔色色調 是 幾若工前，太陽 爆發 噴出來 ê 粒子 引起 ê 極光現象。這場 極光風暴 是足強--ê，強甲 北半球 較倚南爿 ê 美國 德州 kah 意大利 嘛看會著。這張 是 kā tiàm 德國 Ense tī 26 分鐘 內 翕--ê 7 張感光影像 疊出來--ê 合成相片。逐年 8 月 攏看會著 英仙座流星雨，毋過 tī 離北極遮爾遠 ê 南方 嘛看會著 極光，實在是 傷過特別，嘛料想袂著。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240814/ 影像：Chantal Anders 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240814.html Powered by Firstory Hosting

地平線頂懸彼是啥物？頂個月初，太空人 Matthew Dominick tiàm 踅地球行 ê 國際太空站 頂懸 看著 地球邊緣 有一个無四常 ê 爍爁：巨大噴流。相片倒爿 紅色 kah 藍色--ê，就是 這个能量足懸 ê 噴流。巨大噴流爍爁 是最近 23 年才知影 ê 現象。大氣噴流 kah 暴雷有關，會向頂懸湠到 地球 ê 電離層。相片 下底是 地球 暗暝 ê 光。地球薄薄 ê 大氣，因為氣輝 ê 關係，發出 青色 ê 光。咱看會著 城市 ê 燈火，有當時仔是清楚--ê，毋過若是中央有雲，就會變做 霧霧 ê 白光。相片 頂懸 是 夜空中 遙遠 ê 天星。巨大噴流 ê 性質 kah 其他形態 ê 瞬態發光事件 (TLE)，比論講 藍色噴流 kah 紅色精靈 ê 關連，到今猶是一个 熱門 ê 研究主題。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240813/ 影像來源：NASA, Expedition 71 Crew, JSC, ESRS, Matthew Dominick 資料處理：Simeon Schmauß 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240813.html Powered by Firstory Hosting

這个圓石陣 ê 天頂是發生啥物代誌？是流星雨啦！講較詳細咧，這是 英仙座流星雨。這張相片是 kā 幾若暗 翕--ê 英仙座流星雨 疊出來 ê 合成影像。流星 其實是行直--ê，毋過闊幅鏡頭翕出來 ê 路線 會變做彎--ê。這寡 流星 ê 痕跡 看起來敢若是 ùi 天頂一點 輻射出來--ê，咱 kā 叫做 輻射點。這个輻射點是 tī 英仙座 內底。背景夜空是用仝一台 kha-mé-lah 翕--ê，有翕著 銀河系 ê 中央帶，直直 chhāi tī 影像中央。這張相片 是 tī 英國 Wiltshire 翕--ê，下底是足有名 ê 天文紀念碑 圓石陣。英仙座流星雨 上強 ê 時陣是 chăng 暝，毋過 咱猶是會當 tī 紲落來幾若暝 看著 英仙座 ê 流星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240812/ 影像：Josh Dury 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240812.html Powered by Firstory Hosting

Messier 20 嘛叫做 三叉星雲 抑是 三裂星雲，離咱有 5000 光年遠，tī 厚星雲 ê 人馬座方向遐。三叉星雲 是一个 tī 咱銀河盤 ê 恆星形成區，內底有三款無仝款 ê 天文星雲：紅色 發射星雲 是酸素原子發出 ê 光， 藍色 反射星雲 是塗粉反射恆星 ê 光，烏暗星雲 是厚塗粉雲 ê 剪影。紅色發射區去予閘光 ê 塗粉帶分做三爿，所以 才會叫做 三叉星雲。這个宇宙雲 ê 大細超過 40 光年，tī 咱地球天頂看起來差不多 kah 月娘欲平大。毋閣伊傷暗矣，目睭無法度直接看著。這張 媠甲會觸舌 ê 望遠鏡景色，是 kā tī 夜空中感光超過 75 點鐘久 ê 影像資料 疊出來 ê 結果。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240810/ 影像：Robert Edelmaier and Gabriele Gegenbauer 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240810.html Powered by Firstory Hosting

這三个光爍爍 ê 星雲，就 tī 人馬座 kah 密喌喌 ê 銀河中心區，是逐家足愛翕 ê 望遠鏡景色。實際上，tī 18 世紀 足愛探索宇宙 ê Charles Messier 嘛 kā 其中 2 个編入去目錄。一个是 M8，是倚中央頂懸上大彼个星雲。另外一个是 M20，是倒爿下跤彩色彼个。第三个發射區包括 NGC 6559，就 tī M8 正爿，伊 kah 上大彼个星雲之間，有一條烏暗塗粉帶。這三个攏是 5000 光年遠 ê 恆星工場。這規片 M8 ê 大細超過 100 光年，伊閣有一个名，叫做 內海仔星雲。M20 嘛有一个偏名，叫做 三重奏。發射星雲 ê 紅光，主要是 ùi 發光 ê 水素氣體 來--ê。Kah 紅光相對 ê 藍光，是塗粉 反射恆星光 造成--ê。這个闊莽莽 ê 星際景色 是超過 4 度闊，按呢差不多是 8 粒月娘 ê 大細。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240710/ 影像：Andy Ermolli 音樂：P!SCO - 鼎鼎 聲優：阿綠 翻譯：An-Li Tsai (NSYSU) 原文：https://apod.nasa.gov/apod/ap240710.html Powered by Firstory Hosting

這寡雲實在是 足 無四常--ê。第一，in 是 足罕得看著 ê 夜光雲，就是講，in 愛 tī 暗暝才看會著，毋過干焦 tī 日出進前 抑是 日落了後才看會著。第二，咱知影這寡夜光雲 ê 來源。這是一个真罕得拄著 ê 情形。高層大氣 內底 反射日光 ê 冰晶，是 ùi 30 分鐘前 tī 附近發射 ê SpaceX 火箭 來--ê。伊較正式 ê 名 是 極地中氣層雲。天頂這寡 牽絲 ê 冰，攏牽 tùi 天頂 ê 月眉面頭前。這張相片 kah 這个連結內底 ê 影片，是一禮拜前 tī 美國 Florida 州 Orlando 翕--ê。月娘正爿彼个光點是 木星，正爿地平線頂懸 一點一點 ê 光點 是 飛龍機。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240709/ 影像：Pascal Fouquet 音樂：P!SCO - 鼎鼎 聲優：阿綠 翻譯：An-Li Tsai (NSYSU) 原文：https://apod.nasa.gov/apod/ap240709.html Powered by Firstory Hosting

一般講來，地球人攏是攑頭看流星雨。毋過太空人 Ron Garan tī 2011 年 8 月 13 翕--ê 這張 特殊角度 ê 相片，就是 向頭看 英仙座流星雨。Garan 是 tī 380 公里懸 ê 國際太空站 軌道頂懸，看下底 ê 英仙座流星雨，這是 彗星 Swift-Tuttle 留落來 ê 塗粉屑仔。蒸發 ê 彗星塗粉粒 用一秒鐘 60 公里 ê 速度 迵過 地球表面 100 公里厚 ê 大氣層。咱會當 tī 影像中央，大角星 下底，看著一逝 流星光，出現 tī 地球邊緣、青色氣輝下底。你有想欲攑頭看流星雨無？你誠好運，因為 2024 年 英仙座流星雨已經開始矣，8 月 12 左右會變上強。彼工無光爍爍 ê 月光，所以半暝了後，你就會當 tī 好天 ê 烏暗夜空中，看著 英仙座流星雨。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240809/ 影像：Ron Garan, ISS Expedition 28 Crew, NASA 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240809.html Powered by Firstory Hosting

彗星 109P/Swift-Tuttle 是 一粒週期 133 年 ê 哈雷型彗星，是一年一擺 ê 英仙座流星雨 ê 源頭。這粒彗星頂擺來到內太陽系 是 1992 年 ê 時陣。伊毋是蓋光，目睭直接看是看無。毋過猶是光甲 有法度 用雙筒千里鏡 抑是 細台天文望遠鏡 看著。這張 hŏng 讚嘆 ê 彩色相片是 tī 1992 年 11 月 24 用底片翕--ê，有翕著 彗星 Swift-Tuttle ê 青色彗鬚、長長 ê 離子尾溜 kah 塗粉尾溜。是 tī 這粒 大粒週期彗星 上倚地球 ê 16 工後翕--ê。彗星 Swift-Tuttle 會 tī 2126 年 閣出現 tī 地球夜空中。而且 彗星 Swift-Tuttle tī 軌道留落來 ê 彗星屑仔 若是拄著地球，就會變做 7 月 kah 8 月 ê 流星雨。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240808/ 影像：Gerald Rhemann 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240808.html Powered by Firstory Hosting

照這張天文合成相片來看，火星 tī 地球暗暝天頂 經過 昴宿星團 南方 5 度遠 ê 所在。這是 7 月 12 開始連紲 tī 16 暗 ê 好天暗暝翕--ê 夜空系列影像。視野內底 ê 火星 ùi 上正爿開始行。這粒 行星 ê 紅色色調 kah 藍色星團 誠做一个對比。Kah 背景 ê 遙遠天星相比，這粒 太陽系 第 4 粒行星，是比第 7 粒行星行較緊。紅色行星 火星 kah 冰巨行星 tī 7 月 16 這工 行到「大合」ê 相位，in tī 天頂 是差 半度 ê 距離。火星繼續行對東爿去，早就 kā 七姊妹仔星團 擲 tī 後壁，這馬 ùi 紅巨星 畢宿五 ê 北方 行過。8 月 14 這工，火星會 tī 地球天頂 行到 kah 木星 差 1/3 度 ê 距離。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240802/ 影像：Tunc Tezel (TWAN) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240802.html Powered by Firstory Hosting

彗星 13P/Olbers 每 70 冬 來到 內太陽系 一擺。伊 tī 6 月30 行到 近日點，就是 kah 太陽上倚 ê 位置。這張相片翕--ê 是 tī 熱天暗暝 出現 tī 捷克共和國 歷史久長 ê Kunetice 城堡 天頂 ê 哈雷型彗星。伊這馬欲 轉去 伊 ê 故鄉 Oort 雲 矣。這張是 7 月 28 紀錄彗星軌跡 ê 合成相片。咱看會著彗星 ê 闊幅塗粉尾溜、光爍爍 ê 彗鬚、長長 ê 離子尾溜、kah 前景 ê 景色。這粒彗星 tī 城堡後壁 16 光分遠 ê 所在，背景是北天 ê 天星，彗星就出現 tī 大熊座 下底。這个山頂城堡 ê 歷史 ùi 15 世紀開始，毋過 彗星是 Heinrich Olbers tī 1815 年發現--ê。Olbers 彗星 tī 日頭落山了後出現 tī 地球天頂 ê 西北爿，是觀星者 用 天文望遠鏡 kah 雙筒千里鏡 觀測彗星 上好 ê 時機。彗星 13P Olbers ê 後一擺 行到 近日點，愛等到 2094 年。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240801/ 影像：Petr Horálek / Institute of Physics in Opava 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240801.html Powered by Firstory Hosting

對一寡人來講，in 看起來敢若 城垛子，保護咱莫受著 銀河 中心 ê 傷害。三峰山 嘛叫做 Lavaredo ê 三峰，到今猶遮爾懸，是因為 in 是 實密 ê 白雲岩 構成--ê，kah 伊邊仔較軟 ê 岩石相比，較毋驚去予 侵蝕 去。In 是 2.5 億年前 形成--ê，kah 地球 頂懸 發生 生物 大滅絕 ê 時間差不多。有一个主要 ê 假說是講，這擺 ê 大滅絕 是 一粒 直徑 10 公里、比 聖母峰 較大 ê 小行星 挵著 地球引起--ê。Tī 過去幾若世紀 ê 時間內，人類 一直咧 觀察 銀河 內底 kah 外口 ê 天星。所以這个 tī 意大利，看起來敢若是 戰場結構 ê Sexten Dolomites 山脈，一直是 這馬 kah 古早時代天文學家 上愛 ê 地點之一。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240807/ 影像：Donato Lioce 文稿：Natalia Lewandowska (SUNY Oswego) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240807.html Powered by Firstory Hosting

這个暴風雲是按怎會遮爾七彩？代先，咱愛知影 雲 是幾若百萬粒 細粒 水珠仔 kah 冰珠仔 組成--ê。雲底是平--ê，這無啥物特別。這是因為雲 ê 懸度愈懸，空氣溫度 就愈低，到某一个懸度以上，空氣就會因為水份飽和，堅出水珠仔。雲 ê 中層 形體 是 水珠仔飽滇 ê peh 升 空氣柱仔 形成--ê。毋過，上無四常 ê 是柑仔色 kah 黃色。這兩色 攏是 雲 內底 ê 水珠仔 反射日光 造成--ê。雲 中層 kah 底層 ê 柑仔色，攏是反射 日落 ê 紅光。顛倒是 雲 頂層 ê 黃色，是 反射猶未日落 ê 日光，其中有一寡仔 藍光去予 散射 去。這个 hŏng 印象足深 ê 烏跤雲，看起來 就敢若 浮 tī 美國 德州 平原 [頂懸]，是 2021 年 調查 捲螺仔風 ê 時陣翕著--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240806/ 影像：Laura Rowe (有提著使用許可) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240806.html Powered by Firstory Hosting

這暗 無月娘。前景是 突尼西亞 ê Lars 地下田庄 ê 出入口。天頂彼个毋是普通 ê 星系，是咱 銀河系 ê 中央帶。而且天頂彼逝嘛毋是普通 ê 流星，伊是金光閃閃 ê 火流星，可能是 ùi 舊年 ê 英仙座流星雨 來--ê。這張合成影像 是用 仝一台 kha-mé-lah tī 仝一位連紲感光翕--ê。今年 ê 英仙座流星雨 上強彼工 是 這禮拜六。等 頂半月 落去了後，差不多半暝彼陣，應該就會拄著。為著欲 好好仔觀賞 流星雨，你需要一个好天暗暝、好坐 ê 椅仔、kah 耐心。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240805/ 影像：Makrem Larnaout 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240805.html Powered by Firstory Hosting

Ùi 銀河系外口轉來 ê 景色會生做按怎？歐洲太空總署 ESA ê Gaia 機器人任務 本底是欲回答一个 閣較大 ê 問題，毋過 in 提著 ê 資料會當用 獨立特別 ê 現代觀點 來回答這个問題。Gaia 是 tī 地球 附近 踅 太陽 咧行 ê 太空船。伊詳細紀錄恆星 ê 位置，按呢才有法度確定 恆星 ê 位置 tī 一冬內 ê 微小變化。而且 恆星愈遠，這款變化就愈細，所以咱會當用這來 量恆星 ê 距離。影片 上開始是 銀河系 ê 插圖，連鞭就 變做 Gaia 恆星資料 ê 3D 視覺化影像。一寡有名 ê 恆星攏有 in 家己 ê 名，其他恆星就干焦賰 Gaia 目錄 ê 編號。落尾，影片來到太陽附近，遮有足濟恆星攏是 Gaia 追蹤 ê 目標。紲落來就來到咱 ê 太陽 矣。影片欲煞進前，咱會當看著太陽系第 3 粒行星，地球，變甲愈來愈清楚。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240804/ 影片來源：Galaxy Illustration: N. Risinger (skysurvey.org) 恆星資料：Gaia Mission, ESA, A. S. Sellés (U. Heidelberg) et al. 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240804.html Powered by Firstory Hosting

Tī Uluru 天頂彼是啥？Uluru 是 聯合國世界遺址，是 tī 澳洲 中部 平原 噗出來 ê 一粒 350 公尺懸 ê 無四常 ê 山。Uluru ê 成份是 沙岩。伊是 tī 過去 3 億年 ê 時間內底，較軟 ê 岩石去予侵蝕 ê 時陣 沓沓仔形成 ê。Uluru 地區 tī 過去 2 萬 2000 年 內底，一直 攏有人蹛。這張相片是頂個月 tī Uluru 翕--ê 夜空景色 kah 銀河系 中央帶，內底包括複雜 ê 烏暗 塗粉 雲絲、發紅光 ê 發射 星雲、kah 幾若十億粒 天星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240729/ 影像：Max Inwood 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240729.html Powered by Firstory Hosting

土星 tī 地球半暝進前 tī 天頂 peh 起來。這粒 目睭直接看會著 ê 行星，tī 7 月 24 這工，行到 kah 下膨月 出現「大合相」ê 相位。毋過 tī 地球一寡所在，像 亞洲 kah 非洲 ê 一寡地區，這粒 有環 ê 氣態巨行星 去予 閘去 一點鐘久。月球 kah 光爍爍 ê 行星 攏 tī 天頂 黃道面 附近 賴賴趖，所以這款 掩星現象 嘛真四常，毋過 in 確實是 引人注意。這張望遠鏡相片是 tī 中國 江蘇 南京 翕--ê，有翕著土星消失 tī 月盤 後壁 進前 ê 景色。這張速翕相片予人一款錯覺，敢若是土星出現 tī Glushko 隕石坑 頂懸。這个 tī 月球西爿邊緣 ê 隕石坑，是一个 直徑 43 公里 ê 少年輻射形隕石坑。是講，月球是 tī 40 萬公里遠 ê 所在，毋過土星是 tī 14 億 公里遠 ê 所在。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240727/ 影像：Chengcheng Xu 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240727.html Powered by Firstory Hosting

月球是 地球 ê 衛星。伊無遮爾大窟 ê 隕石坑，無遮爾敧敧曲曲 ê 紋路，伊 ê 色水嘛無遮爾花漉漉。會有這張數位創作，是有原因--ê。這張相片 是 kā NASA 月球軌道雷射高度計 (LOLA) 任務 翕著--ê 較好 ê 月球影像 kah 月球表面懸度資料 用數位技術合成 ê 結果，而且為著 教育目的 kā 一寡特性放大。比論講，利用數位技術 kā 月球高地 ê 懸度放大、kā 隕石坑標較清楚。這寡隕石坑是月球 tī 過去 46 億年 ê 歷史 中，去予太空大石頭挵著 ê 痕跡。相片內底 ê 烏暗區 叫做 月海，內底 ê 隕石坑 較少，而且進前是一个 熔岩 海洋。影像 ê 色水 有盡量照月球 ê 誠實色水，毋過猶是有小可仔改一下 kah 加強。比論講，藍色表示這區 ê 鐵較豐富，柑仔色表示遮 ê a-lú-mih 傷濟。雖罔講幾若十億年來，月球 一直用仝一面 面對咱，毋過 現代技術 已經會當予人類 閣較 了解月球是按怎 影響咱地球 矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240724/ 資料：NASA, Lunar Orbiter Laser Altimeter 影像 kah 處理：Ildar Ibatullin 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240724.html Powered by Firstory Hosting

咱 銀河系 徛 tī 一个袂䆀 ê 地點，遮會看著 NGC 6946 ê 正面。這粒大範美麗 ê 捲螺仔星系 tī 仙王座 2000 萬光年遠 ê 所在，就 tī 塗粉 kah 天星 組成 ê 宇宙面紗後壁。這張 清楚 ê 星系望遠鏡相片 ùi 核心到外口 ê 色水變化是，老恆星 ê 黃光、少年星團 ê 藍光、到 捲螺仔手骨頂懸 恆星形成區 ê 紅光。NGC 6946 ê 紅外光 影像嘛足光--ê。伊有豐富 ê 氣體 kah 塗粉，表示講伊有足懸 ê 恆星出生率 kah 死亡率。實際上，自 20 世紀初開始，NGC 6946 已經 去予人揣著 幾若十粒 新 ê 超新星，這是大質量恆星 死亡爆炸 ê 階段。NGC 6946 有 4 萬光年大，伊嘛叫做 煙火星系。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240726/ 影像：Roberto Marinoni 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240726.html Powered by Firstory Hosting

這寡無四常 ê 斑 是按怎來--ê？這個月初 咧探索 火星 ê NASA 毅力號探測車，發現 火星岩石 頂懸有 淺色 ê 斑，每一搭外口攏有一輾較烏 ê 箍仔。這寡奇怪 ê 圖樣 去 hŏng 叫做 豹紋，kah 地球頂懸 ê 哺食者 足仝--ê，所以科學家 咧 研究這寡圖樣 是毋是 古早時代 ê 火星性命 留落來--ê。相片 內底 ê 斑，直徑才幾若 毫米 爾爾，是 tī 一塊 叫做 Cheyava Falls ê 大塊岩石 頂懸揣著--ê，有一个 hŏng 激動毋過 猶未證明 ê 解說 是，足久以前 ê 微生物 透過 化學反應產生能量，予岩石 ùi 紅色 變做 白色，而且留一輾烏色箍仔落來，就親像是地球岩石頂懸出現 ê 斑仝款。就算其他 非生物學 ê 解說 可能會贏，毋過這款 kah 生物起源可能有關係 ê 解說，會引起較濟人注意。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240731/ 影像：NASA, JPL-Caltech, MSSS, Perseverance Rover 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240731.html Powered by Firstory Hosting