NASA 逐工一幅天文圖 APOD Taigi

是毋是獅仔星雲才是 仙王座 內底上大--ê？這个看起來敢若是一隻貓仔科動物 ê 星雲，是 2 粒 20 倍以上 太陽 質量 ê 大質量恆星 咧提供能量。星雲是 離子氣體殼 湠出來--ê 結構，伊 ê 高能物質毋但會 發光，密度嘛懸甲產生 重力收縮，形成新 ê 恆星。獅仔 星雲 ê 官方名稱是 Sh2-132，伊 ê 角寸尺比 規粒月娘 較大一屑屑仔。這个 有特別外形 ê 氣體區 差不多是 tī 1 萬 光年 遠 ê 所在。伊就 tī 仙王座內底，這是一个用 希臘神話 Aethopia 國王 ê 名 號名 ê 星座。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240610/ 影像：Imran Badr 文稿：Natalia Lewandowska (SUNY Oswego) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240610.html Powered by Firstory Hosting

你若是 tī 火星看著你家己 ê 影，結果彼毋是人影，按呢到底是啥物狀況？按呢你應該是一台 火星 探測車，毅力號。2021 年開始，毅力號探測車一直咧研究火星，想欲 tī 這粒紅色行星頂懸 揣著複雜 ê 火山活動歷史 kah 古早時代水流 ê 證據，通 kā 這寡影像 送轉來 tī 內太陽系 ê 地球。相片 是 tī 2024 年 2 月翕--ê，看起來日頭 是 tī 毅力號 後壁。伊這馬當咧 行過 Jezero 隕石坑 內底 ê Neretva 山谷，相片遠方是 當地 ê 山崙。這个烏影看起來一定毋是人，較成是 kah 車平大台 ê 探測車，就 tī 相片底部中心，疊 tī 規四界 ê 岩石 頂懸。毅力號 kah 伊 ê 飛行朋友 獨創號 直升機，已經 無咧鬥陣 做工課矣。賰伊家己繼續 tī 火星頂懸，揣看 有 古生物 ê 影跡 無。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240605/ 影像來源：NASA, JPL-Caltech, MSSS, ASU, NeV-T, Perseverance Rover 資料處理 kah 版權：Neville Thompson, Gigapan Zoom 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240605.html Powered by Firstory Hosting

是按怎 Pons-Brooks 彗星 這馬有一个顛倒方向 ê 彗尾？咱會當 tī 相片內底看著這个 足壯觀 ê 藍色 離子尾溜。離子尾溜是去予 太陽風 直接 歕 出來--ê。倒爿頂懸咧發光 ê 彼个，就是 彗星 12P/Pons–Brooks ê 中央彗鬚。Ùi 彗鬚 湠出來 ê 塗粉尾溜 ê 形體 就敢若是一支葵扇，大部份是湠去倒爿。塗粉尾溜 去予 日光 ê 輻射壓力 歕出來，速度是愈來愈慢，綴彗星 ê 軌道咧行。Ùi 一寡角度來看，塗粉尾溜 kah 離子尾溜 就敢若 tī 顛倒方向。這張 頂禮拜 tī Namibia 共合國 翕 ê 相片底部，有一粒遙遠明亮 ê 天兔座 Alpha 星。2 工前，這粒彗星才拄行過 kah 地球 上近倚點，欲 轉去 外太陽系 矣。伊這馬是愈來愈暗，若是欲看著伊，ùi 南半球會較好揣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240604/ 影像：Rolando Ligustri & Lukas Demetz 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240604.html Powered by Firstory Hosting

壯麗 ê 島宇宙 NGC 2403 就 chhāi tī 長頷頸 ê 麒麟鹿座 內底。這个捲螺仔星系 kah 咱 ê 距離差不多是 1000 萬光年，大細 5 萬光年大。照伊 ê 大細來看，伊 ê 大質量恆星形成 HII 區 敢若是傷大。這區 ê 紅光，是 ùi 水素原子氣體發出來--ê。大型 ê HII 區是由一陣高溫大質量恆星提供能量。這寡恆星上落尾會變做 足光 ê 超新星爆炸，結束 in 短短 ê 一生。NGC 2403 是 M81 星系群 ê 成員之一。伊 kah 咱本地星系群其中一个成員，三角座星系 M33，足成--ê。M33 是一个有足豐富恆星形成區 ê 星系。這張 NGC 2403 肖像 內底，有 尖尖 形體、較光 ê 恆星是咱銀河系內底 ê 前景星。Tī 這幅深空闊幅 ê 望遠鏡視野相片內底，閣有銀河系內底 暗暗、厚塗粉 ê 星際雲，這嘛叫做 銀河卷雲 抑是 積分通量星雲 IFN。毋過 NGC 2403 本身 湠出來 ê 較暗 ê 部份，可能是伊 kah 厝邊星系之間 ê 重力交互作用 產生 ê 潮汐恆星流。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240603/ 影像：(Team F.A.C.T.) Lilian Lbt - Cyrille Malo - Maxime Martin - Clément Daniel - Paul Grasset - Louis Leroux-Géré 音樂：高小糕 GaoXiaoGao 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240603.html Powered by Firstory Hosting

是按怎 Pons-Brooks 彗星 這馬有一个顛倒方向 ê 彗尾？咱會當 tī 相片內底看著這个 足壯觀 ê 藍色 離子尾溜。離子尾溜是去予 太陽風 直接 歕 出來--ê。倒爿頂懸咧發光 ê 彼个，就是 彗星 12P/Pons–Brooks ê 中央彗鬚。Ùi 彗鬚 湠出來 ê 塗粉尾溜 ê 形體 就敢若是一支葵扇，大部份是湠去倒爿。塗粉尾溜 去予 日光 ê 輻射壓力 歕出來，速度是愈來愈慢，綴彗星 ê 軌道咧行。Ùi 一寡角度來看，塗粉尾溜 kah 離子尾溜 就敢若 tī 顛倒方向。這張 頂禮拜 tī Namibia 共合國 翕 ê 相片底部，有一粒遙遠明亮 ê 天兔座 Alpha 星。2 工前，這粒彗星才拄行過 kah 地球 上近倚點，欲 轉去 外太陽系 矣。伊這馬是愈來愈暗，若是欲看著伊，ùi 南半球會較好揣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240604/ 影像：Rolando Ligustri & Lukas Demetz 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240604.html Powered by Firstory Hosting

目前猶無人看過月球按呢踅。這是因為月球去予潮汐力鎖 tī 地球，所以才會一直是 仝一爿面對咱。毋過，利用 現代數位技術，咱會當 kā 月球探測軌道衛星 (LRO) 送轉來 ê 懸解析度影像鬥起來，造出這支 月球自轉 ê 短片。這支 縮時攝影影片 是 ùi 地球 定定看著 ê 月球這爿 開始。毋過，真緊就會出現地球較歹看著 ê 東方海，這是一个足大 ê 隕石坑，就 tī 月球赤道下面。影片 kā 月球自轉一個月 ê 時間濃縮做 24 秒。咱會當看著面對地球這爿 ê 月娘 有足濟 較暗 ê 月海，月球後壁彼爿主要是較光 ê 高原。目前有足濟國家 kah 公司 當咧開發新 ê 月球計畫，攏總超過 32 个。其中包括 NASA ê Artemis 計畫，這主要是欲 tī 紲落來幾若年內 kā 人類送去哩月球。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240602/ 影像：NASA, LRO, Arizona State U. 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240602.html Powered by Firstory Hosting

這張透過 狹頻濾鏡 翕 ê 宇宙速翕，視野範圍差不多是一粒月娘 ê 大細，就 chhāi tī 天鵝座 ê 邊界內底。相片內底上明顯 ê 部份是這个圓箍仔形星雲 較光 ê 邊緣。這是離子化 ê 硫磺氣體、水素氣體、kah 酸素氣體 發出 ê 光。這个複雜 leh 發光 ê 弧形結構，是藏 tī ùi 氣體 kah 塗粉組成 ê 星際雲世界。這个發光弧其實是氣泡 ê 一部份，嘛會使講是氣體殼 ê 一部份，伊是 Wolf-Rayet 星 WR 134 ê 恆星風 吹出來 ê 結構。WR 134 就是相片中央 leh 發光彼粒星。科學家估計 WR 134 差不多是 tī 6000 光年遠 ê 所在，所以這幅圖應該有超過 50 光年闊。大質量 ê Wolf-Rayet 星 ê 外層氣體殼，會去予能量足強 ê 恆星風 kā 褪掉。In leh 燒 核燃料 ê 速度是緊甲驚死人。這款大質量恆星演化到上落尾，會以 壯觀 ê 超新星爆炸做結束。這个恆星風 kah 上落尾 ê 超新星，會增加星際物質 重元素 ê 成份，這 tùi 做後一代恆星 是有足大 ê 幫贊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240531/ 影像：Xin Long 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240531.html Powered by Firstory Hosting

是按怎有當時仔烏陰天 ê 月娘看起來會是彩色--ê？這款 效應 就叫做 月華，是 光 ê 量子力學 繞射反應。月華嘛叫做月冕，這會發生 tī 大部份會透光 ê 雲內底，一寡仝款大細 ê 水珠仔 之間。因為無仝色光有無仝波長，所以逐款色光 ê 繞射結果 嘛會無仝。月冕 是少數會當 直接用目睭 簡單看著 ê 量子力學 色光效應。日冕 嘛是，有當時仔是真明顯。這張相片是頂個月 tī 法國 巴黎 翕--ê。是講 巴黎鐵塔 發出來 ê 藍光，並袂去影響著 彩色 ê 月華。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240530/ 影像：Valter Binotto 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240530.html Powered by Firstory Hosting

北半球 1 月份 ê 月圓就 叫做 狼月。新曆年 ê 頭一个月圓，就 ùi Las Campanas 天文台後壁 peh 起來，成做這个戲劇性 ê 地月景色。前景 ê 天文台是 Magellan 望遠鏡，就敢若是一對天文目睭 咧看遠方。這是一組兩台 ê 雙生仔望遠鏡，直徑有 6.5 公尺遐爾大。這張速翕相片是用長焦鏡頭 翕 智利 Atacama 沙漠 敧敧曲曲 ê 地景。翕相 ê 地點是 離天文台 14 公里遠，kah 月球表面 差 38 萬 4000 公里 遠。舊曆年 ê 頭一个月圓，就叫做 雪月，會 tī 2 月 24 peh 起來。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240127/ 影像：Yuri Beletsky (Carnegie Las Campanas Observatory, TWAN) 音樂：P!SCO - 鼎鼎 聲優：阿綠 翻譯：An-Li Tsai (NSYSU) 原文：https://apod.nasa.gov/apod/ap240127.html Powered by Firstory Hosting

你若是 ùi 這个 樓梯 直直行 tùi 銀河去，會發生啥物代誌？欲回答這个問題進前，咱愛先來了解這个美麗 ê 夜空。上引人注意 ê 部份是 銀河系 這个大隱痀橋，這條 光帶 是咱銀河系中央 ê 銀河盤。伊是 直--ê，毋過因為這張闊幅 ê 合成影像，予伊看起來去予拗彎去。銀河系頭前有足濟恆星，恆星隱痀橋 下底 發白光 ê 恆星 是 牛郎星，頂懸發藍光 ê 是 織女星。倒爿是發青光 ê 氣體，伊下底是發黃光 ê 雲。這張相片 是頂個月 tī 北 大西洋 ê 葡萄牙 Madeira 島 翕--ê。啊著！等你 peh 樓梯 peh 到上頂懸，欣賞 這个美麗 ê 夜空了後，你應該就會 ùi 樓梯 ê 另外一爿 行落去矣！ ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240529/ 影像：Marcin Rosadziński 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240529.html Powered by Firstory Hosting

4 月 11 這工，國際太空站 第 59 號 探險隊 tī 加拿大 魁北克省 天頂 400 公里懸 ê 所在，翕著足大港 ê St. Lawrence 河 kah 足趣味 ê 圓箍仔形湖。中央正爿有一个 現代化 ê 水庫，就 tī 這个直徑 100 公里大、古早時代就有，毋閣去予侵蝕留落來 ê 隕石坑內底。Tī 軌道頂懸 看這个古早時代就有 ê 隕石坑是足清楚--ê。這表示講，地球定定受著 太空石頭 ê 威脅。Manicouagan 隕石坑已經有 2 億外年 ê 歷史矣。伊可能是去予直徑 5 公里大 ê 石頭挵出來--ê。目前咱猶袂揣著會 tī 紲落來 100 冬內 挵著地球 ê 小行星。NASA 行星防禦協調辦公室 逐個月攏會 公佈新 ê 資料，包括 近地天體 最近 ê 特寫相片，kah 其他可能會挵著地球 ê 彗星 抑是 小行星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240525/ 影像：NASA, 國際太空站 Expedition 59 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240525.html Powered by Firstory Hosting

伊轉來矣！日頭頂懸彼个有名 ê 太陽活跳區 AR 3664，會 tī 地球產生 咱看會著 ê 極光。伊 這個月初 踅到日頭後壁去，這馬閣踅轉來矣，猶閣活跳跳。太陽活跳區 AR 3664 昨昏拄踅轉來地球這爿，而且閣一擺爆發 能量足強 ê X 級 太陽爍光。這支影片主要是欲翕 ùi 倒爿下跤踅轉來 ê 太陽活跳區。這是 NASA 踅地球 ê 太陽動力學衛星天文台 昨昏 tī 紫外線波段 翕--ê。這支影片是 太陽自轉 24 點鐘 ê 縮時攝影影片。咱注意看影片 2 秒 ê 時陣，倒爿下跤 煏出 足強 ê 太陽爍光。這寡 ùi 太陽爍光 kah 日冕物質噴射 (CME) 來--ê 高能粒子，袂直接挵著地球產生極光。毋過科學家會 tī 紲落來 2 禮拜 繼續觀察 這个 面對地球、無四常 ê 太陽活跳區，看伊會按怎發展。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240528/ 影像：NASA, Solar Dynamics Observatory 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240528.html Powered by Firstory Hosting

咱 ê 日頭是發生啥物代誌？無啥物代誌啦！伊只是 擲一條太陽絲出來 爾爾。2012 年中，雄雄有一條 日珥 噴到太空中，產生能量足懸 ê 日冕物質噴射 (CME)。太陽磁場一直咧變化，予這條 日珥 擋 幾若工。嘛因為太陽 磁場 一直咧變化，所以日珥噴出來 ê 時間 誠歹臆。咱會當 tī 踅地球行 ê 太陽動力學衛星天文台 翕 ê 特寫 相片內底，看著太陽表面 ê 爆炸。這个爆炸會 kā 電子 kah 離子 送入去 太陽系內底。其中有一寡 3 工前才拄到地球，kah 地球 磁層 相挵，產生咱看會著 ê 極光。咱會當 ùi 紫外光 影像 看著 日珥 爆發。這寡噴出來 ê 日珥 頂懸，是 出現 tī 太陽活跳區 週邊 ê 電漿箍仔。太陽活動是 11 年一个週期。伊這馬是愈來愈倚伊 活動力上強 ê 時期，所以會產生足濟 日冕洞，予帶電粒子通噴去太空中。就 kah 咱進前講過 ê 仝款，這寡帶電粒子會 產生極光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240526/ 影像：NASA’s GSFC, SDO AIA Team 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240526.html Powered by Firstory Hosting

天頂彼个光點是啥物？這可能是咱定定會問 ê 問題。這个問題會當 ùi 幾若个簡單 ê 觀察揣著答案。比論講，伊敢有 leh 振動？抑是 leh 爍咧爍咧？若是有，而且若是你蹛 tī 市區，按呢彼个可能是飛龍機。因為飛龍機實在是濟到有賰，市區 ê 光線 嘛傷光矣，kah in 比起來，恆星 kah 衛星 傷暗，看無。若是無，而且若是你蹛 ê 所在離市區較遠，按呢彼个光點可能是 金星 抑是 火星。若是金星，伊會 tī 日出進前抑是日頭落山了後，出現 tī 地平線附近。有當時仔 tī 地平線附近，拄著 leh 飛 ê、較遠 ê 飛龍機，是有較困難講伊是飛龍機抑是 較光 ê 行星。毋閣就算是按呢，咱觀察伊 ê 動作幾分鐘仔了後，to̍h 會知影伊是毋是飛龍機矣。按呢若是猶無清楚欲按怎？這張圖表 雖然講有淡薄仔笑詼，毋閣嘛是會當予你袂䆀 ê 建議。一寡較細膩 ê 天文愛好者可能會有意見，咱嘛 鼓勵 in 提供 溫柔 ê 建議。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240609/ 影像：HK (The League of Lost Causes) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240609.html Powered by Firstory Hosting

這幅深空視野拼鬥圖 leh 展示一个 hŏng 足讚嘆 ê 景色，這是 James Webb 太空望遠鏡 ê NIRCam 紀錄 loài ê 星系團 Abell 2744。Abell 2744 嘛叫做 Pandora 星系團，伊敢若是 3 个無仝 ê 大質量星系團合併 ê 結果。伊就 tī 玉夫座方向 35 億光年遠 ê 所在。這个大型星系團 因為 內底攏是烏暗物質，所以伊就 kā 時空扭曲去，這个 重力透鏡 效應嘛 影響著 閣較遠方 ê 天體。比 Pandora 星系團閣較紅 ê 天體，有足濟攏是受著透鏡效應 ê 影響，in 大部份攏是早期宇宙 ê 遙遠星系。受著透鏡效應扭曲 ê 影響，in ê 影像 去予搝長、拗彎，變做弧形。是講影像內底這寡 特別 ê 繞射光針，是銀河內 ê 前景星。照目前估計 ê Pandora 星系團 距離來看，這个宇宙盒仔差不多有 600 萬 光年大。毋過免驚！你閣會當看 這支 2 分鐘 ê 影片，來探索這个迷人 ê 天區。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240608/ 影像來源：NASA, ESA, CSA, Ivo Labbe (Swinburne), Rachel Bezanson (University of Pittsburgh) 資料處理：Alyssa Pagan (STScI) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240608.html Powered by Firstory Hosting

這个宇宙氣波去予大質量恆星 ê 高溫、高速恆星風吹 kah 遮爾大。伊去予編做 Sharpless 2-308，tī 大隻狗（大犬座）方向 5000 光年遠 ê 所在，比一粒月娘 tī 天頂 ê 寸尺閣較闊。按照這个距離來推算，這个直徑 差不多是 60 光年長。產生這个氣波 ê 大質量恆星是 Wolf-Rayet 星，to̍h 是星雲 中央附近 上光彼粒。Wolf-Rayet 星 ê 質量比太陽閣跤大 20 倍，伊應該是大質量恆星演化過程中，變做超新星進前 一个較短 ê 階段。Wolf-Rayet 星 ê 高速恆星風 tī 演化早期，會掃過行較慢 ê 物質，製造氣波形體 ê 星雲。這个 去予風歕出來 ê 星雲差不多有 7 萬歲 矣。這幅 深空影像 ê 狹頻濾鏡有翕著較暗 ê 發射線。影像內底上主要 ê 部份是發光 ê 離子化 酸素原子，tī 遮 kā 標做 藍色 ê。SH2-308 看起來 真古錐 ，伊嘛叫做海豬仔頭星雲。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240607/ 影像：Prabhu Kutti 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240607.html Powered by Firstory Hosting

華麗 ê 捲螺仔星系 NGC 4565 ùi 咱地球 kā 看是側向--ê。因為伊狹狹--ê，所以伊嘛叫做 繡針星系。這个光-iàⁿ-iàⁿ ê NGC 4565 tùi 天文觀測團 ê 群眾來講，是北天關注 ê 目標，伊就 tī 暗暗毋閣整齊 ê 后鬃座 遐。這个清楚閣多彩 ê 影像，看會著星系中心有一个 盒仔形、脹脹 ê 星系核。有一條 閘光 ê 塗粉帶，就迒 tī NGC 4565 薄薄 ê 星系盤遐。NGC 4565 離咱有 4000 萬 光年 遠，伊 ê 闊度有 10 萬光年闊。因為咱用細台天文望遠鏡就揣會著 NGC 4565 矣，所以 天文愛好者 認為講，這个遮爾出眾 ê 天體無 tī Messier 星表內底，應該是 伊編星表 ê 時陣 kā 落勾去矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240606/ 影像：Lóránd Fényes 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240606.html Powered by Firstory Hosting

這幅望遠鏡南天景色內底有 烏-mih-mà ê 烏雲 kah 光-iàⁿ-iàⁿ ê 星雲。這表示講遮有足濟少年恆星，恆星形成 ê 活動嘛 真鬧熱。In chhāi tī 干焦 650 光年遠 ê 所在爾爾，踮 變色杜定分子雲複合體 kah 本地波 ê 邊界。Tī 1946 年編 ê Cederblad 目錄內底，有少年恆星 ê 恆星形成區 去予當做是厚塗粉 ê 反射星雲。這个目錄內底閣有 C-形 ê Cederblad 110，to̍h tī 相片倒爿中央。藍色 ê Cederblad 111 to̍h tī 伊 ê 下跤。這張相片內底閣有一个足顯目 ê 部份，是 柑仔色、V-形 ê 變色杜定紅外線星雲 (Cha IRN)。彼是去予新形成 ê 低質量恆星 ê 物質流 kā 雕出來 ê 形體。這幅構圖袂䆀 ê 影像 有 1.5 度闊。用附近 ê 變色杜定分子雲 I ê 距離來推算，這差不多是 17 光年闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240527/ 影像：Amiel Contuliano 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240527.html Powered by Firstory Hosting

捲螺仔星系 NGC 3169 看起來就敢若是一蜷宇宙膨紗當咧散--開。伊離咱有 7000 萬光年遠，就 tī 光光 ê 軒轅十四 南方、暗暗 ê 六分儀座 遐。倒爿 ê NGC 3169 kah 伊邊仔 ê NGC 3166 發生 重力交互作用，所以 in ê 捲螺仔手骨就去予搝出來，變做潮汐尾溜。落尾這寡星系會合併做一个，這是 本地宇宙 內底較光 ê 星系 ê 共同運命。Tī 這張深空 ê 彩色 星系團體相片 內底，搝長 ê 恆星流 表示講，遮當咧進行重力交互作用。照研究小組估算 ê 距離 40 萬光年來算，這个 望遠鏡視野 差不多有 20 角分遐爾大。這張相片正爿閣有一个較細、較藍 ê NGC 3165。咱知影 NGC 3169 ê 光譜範圍是 ùi 電波 到 X 光。伊 ê 核心有一个活跳星系核，內底有 一粒超大質量烏洞。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240523/ 影像：Christophe Vergnes, Aziz Kaeouach 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240523.html Powered by Firstory Hosting

有一个明亮 ê 青色極光迒過規个天頂。這个極光景色是 2016 年 tī 瑞典 Östersund ê 庄跤翕--ê。攝影師 kā 6 張相片合併做這張欲 180 度 ê 全景圖。這个 極光 上引人注意 ê 部份就是伊 ê 外形就親像是虹。前景是 Storsjön 湖，極光後壁 ê 天頂有幾若个咱熟似 ê 星座 kah 北極星。是講誠拄仔，極光 無閘著 倒爿下跤 ê 月娘。極光出現了後 隔轉工，太陽日冕 頂懸出現 一大空，予能量特別懸 ê 粒子流入去 太陽系 內底。青色極光 是 地球頂層大氣 內底 ê 酸素 原子 kah 電子 重新結合產生--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240522/ 影像：Göran Strand 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240522.html Powered by Firstory Hosting

氣體雲敢會 kā 星系食去？按呢問 to̍h 毋著矣！這張相片 內底奇怪「生物」ê「跤爪」是一个叫做 彗星雲球 ê 氣體雲。毋閣這个雲球 已經破去 矣。彗星 雲球 ê 特徵是有 厚塗粉 ê 頭部 kah 搝長 ê 尾溜。這个特徵予彗星 雲球 tī 視覺上看起來敢若親像是 彗星，毋閣實際上 in 兩个差足濟 ê。雲球 較捷是恆星誕生 ê 所在，頭部彼搭有足濟少年 ê 恆星。這款天體 ê 頭部會破去 ê 原因，到今猶毋知。雲球倒爿 ê 星系 足大、足遠 ê，伊只是 拄仔好疊 tī CG4 附近爾爾。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240521/ 影像來源：CTIO, NOIRLab, DOE, NSF, AURA 資料處理：T. A. Rector (U. Alaska Anchorage/NSF’s NOIRLab), D. de Martin & M. Zamani (NSF’s NOIRLab) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240521.html Powered by Firstory Hosting

這看起來敢若是暗暝 ê 景色，毋過天頂有一部份是茄仔色 ê 光。其實這是 2024 年 5 月 10 號暗暝，這工 tī 世界無仝所在 ê 人攏報講，天頂出現美麗 ê 極光。這張相片是今仔日翻點了後 tī 美國 Wisconsin 州 Arlington 翕--ê。這張全景圖是 kā 幾若張 感光 6 秒 ê 相片疊出來--ê，相片以 北方 為中心，佔天頂 三分二 ê 範圍。資料有做一寡處理，包括加強色水，kah kā 電線刣掉。 前景 ê 攝影師報講，極光 敢若是 ùi 頭頂某一點發出來--ê，毋過干焦 kā 北方 天頂照予光爾爾。極光 ê 高能粒子是幾若工前 ùi 有足濟太陽烏子 ê 太陽活跳區 AR 3664 噴出來 ê 日冕物質噴射 來--ê。這个 大型太陽活跳區，頂禮拜踅到 太陽後壁，毋過 可能會活到 後禮拜 閣踅倒轉來 地球 這爿。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240520/ 影像：Xuecheng Liu & Yuxuan Liu 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240520.html Powered by Firstory Hosting

這是一个飛入去太陽系上大粒 ê 氣態巨行星，木星，ê 頂層大氣 ê 模擬動畫。這段精彩 ê 動畫 是利用 踅木星 ê Juno 太空船 頂懸 ê JunoCam kah 微波輻射儀 ê 影像資料做出來--ê。影片會 ùi 木星南半球 ê 木星雲 頂懸 3000 公里 ê 所在開始，而且倒爿邊仔有進度條 kā 你講，你這馬已經飛到佗位矣。海拔愈低，表示你飛入去木星 ê 大紅斑 愈深，木星 ê 溫度就愈懸。Juno 太空船 ê 資料 kā 咱講，大紅斑這个太陽系上大 ê 風暴系統，其實佔木星大氣層 300 公里遐爾深。Kah 這比起來，地球海洋上深 才 11 公里爾爾。毋過 免煩惱 你 tī 木星飛傷深，因為 你會閣飛轉來。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240519/ 影像：NASA, JPL-Caltech, SwRI, MSSS, Gerald Eichstadt, Justin Cowart 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240519.html Powered by Firstory Hosting

Tī 這个彩色夜景內底，這寡 恆星軌跡 ê 優雅弧線，反映 ê 是地球逐工 ê 自轉。為著欲製造這張 縮時攝影 合成相片，攝影師 tī 5 月 12 這工 tiàm 美國 紐約 Catskills 區 ê Ashokan 水庫 水岸，kā kha-mé-lah 固定 tī 三跤馬頂懸，連紲翕幾若張相片。北極星 就 tī 恆星軌跡弧線 ê 中心附近。倒爿較大箍 ê 恆星軌跡 是頂月眉，投影 tī 水庫頂懸，產生強烈 ê 倒影。因為 強烈 ê 太陽活動 引起 最近 ê 地磁風暴，所以 真罕得看著 ê 彩色北極光，嘛 tī 有 北極星 kah 北天極 ê 夜空中閃閃爍爍。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240518/ 影像：Chirag Upreti 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240518.html Powered by Firstory Hosting

這幅 構圖袂䆀 ê 組合影像 是 tī 紐西蘭南島 附近 ê Banks 半島向南方看過去 ê 景色。前景是 底部去予海水侵蝕去 ê 尖塔岩石，天頂有南十字星群，中央是地球南天極附近。這張南半球 ê 夜空相片是 5 月 11 翕--ê，tī 這个有天星 kah 海洋 ê 景色內底，上顯目 ê 是活潑 ê 南極極光。閃閃爍爍 ê 南極 極光表演 是強烈 ê 地磁風暴引起 ê 現象，予北半球 kah 南半球 ê 觀星者歡喜甲。這款極端 ê 太空天氣 是 太陽活跳區 AR 3664 ê 日冕物質噴射 (CME) 引起--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240517/ 影像：Kavan Chay 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240517.html Powered by Firstory Hosting

恆星形成過程可能足混亂--ê。為著欲了解到底有偌亂，ESA 有一台新 ê 踅太陽 ê Euclid 太空望遠鏡，最近才拄翕著 到今為止 上清楚 ê 恆星形成區 M78。影像中央 ê M78 kah 咱 ê 距離才差 1300 光年，而且有一个 5 光年大 ê 主要發光核心。這張相片 是用 可見光 kah 紅外光 翕--ê。M78 中央 ê 茄仔色色調 是 烏暗 塗粉 反射 高溫少年恆星 ê 藍光造成--ê。透過這个 華麗閣顯目 ê 天景，咱會當追蹤複雜 ê 塗粉帶 kah 雲絲。倒爿頂懸是 kah 伊相連 ê 恆星形成區 NGC 2071，正爿下跤是第 3 个 恆星形成區。這寡星雲攏是 獵戶座分子雲複合體 ê 一部份，咱會當用細台望遠鏡 tī 獵戶座皮帶 ê 北爿 揣著伊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240524/ 影像來源 kah 許可：ESA, Euclid, Euclid Consortium, NASA 資料處理：J.-C. Cuillandre (CEA Paris-Saclay), G. Anselmi 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240524.html Powered by Firstory Hosting

這是 tī 美國 Georgia 州庄跤暗暝定定看著 ê 景色：天頂 ê 月娘 tī 西爿地平線欲落去矣。相片是 tī 當地時間 5 月 10 號翻點進前翕--ê，因為感光時間傷長，倒爿彼粒頂月眉煞傷光。前景有一台長長 ê 灌溉設備，迒過 Bainbridge 市北方 24 公里遠 ê 農地面頂。這个 tī Georgia 州南部暗暝天頂 閃閃爍爍 ê 極光 kha-tián，確實是真罕得看著 ê 景色。太陽活跳區 AR 3664 最近 ê 強烈活動，引起地球極端地磁風暴，予本底干焦 tī 南北極才看會著 ê 極光，tī 頂禮拜拜六禮拜 ê 時陣，變做 tī Georgia 州南部、甚至 tī 地球閣較低緯度 ê 所在嘛看會著。太陽活動力若愈強，地球就會發生愈濟地磁風暴。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240516/ 影像：Wright Dobbs 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240516.html Powered by Firstory Hosting

造成地球最近產生極光 ê 上激烈 ê 太陽活跳區 AR 3664，若是行到太陽邊緣，會生做啥物款？Tī 遐，咱會當看著伊 ê 3D 結構。相片內底是一个大型 太陽日珥，看起來敢若有幾若支管，ùi 混亂 ê 太陽烏子區 AR 3664 伸去太空中。這是 ùi 這个激烈 ê 太陽活跳區噴出來 ê 粒子雲 ê 其中一个例。地球是比這款大型日珥 箍起來 ê 範圍 閣較細。這張一直咧變化 ê 太陽活跳區 相片，是 2 工前翕--ê。昨昏有出現 最近這幾年來 上強 ê 太陽 爍光（無 tī 相片內底），這擺 ê 爆發是 X 級--ê。太陽爍光發出 ê 紫外光，真緊就來到 地球大氣層，造成 北美 kah 南美 ê 短波 無線電跳電。就算這馬 AR 3664 已經踅到離地球較遠 ê 所在去矣，毋過這區 kah 綴咧出現 ê 日冕物質噴射 (CME) ê 粒子，可能猶是會綴 彎曲 ê 磁場 來到 內太陽系，tī 地球激出極光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240515/ 影像：Sebastian Voltmer 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240515.html Powered by Firstory Hosting

Tùi 大部份地球人來講，開放星團 NGC 2169 看起來就敢若是宇宙 ê 數字 37。抑是你感覺這是數字 42？Ùi 咱 ê 角度來看，這个無可能 ê 數字 星群 出現 tī 遮完全是巧合。伊是 tī 獵戶座 方向 3300 光年遠 ê 所在。Tùi 銀河系抑是開放星團來講，NGC 2169 是一个細粒星團，才 7 光年闊爾爾。NGC 2169 ê 恆星 是 ùi 仝一團塗粉氣體生出來--ê，in ê 年歲才 1100 萬歲爾爾。時間若長，這款 星團 tī 銀河系 內底會 拄著 其他恆星、星際雲，受著引潮力影響，就會散去。40 外億年前，咱 ê 太陽嘛有可能是 tī 類似 ê 開放星團 內底形成--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240514/ 影像：Sergio Eguivar 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240514.html Powered by Firstory Hosting

伊比地球閣較大。伊大甲毋免閣放大，你就會當 tī 太陽 表面看著伊。伊有強大 複雜 ê 磁場 kah 足濟 烏烏 ê 太陽烏子。伊去予標做 AR 3664，最近這幾年來愈變愈大區，這馬已經是上大區矣，而且引起連紲爆炸，造成大量高能粒子去攏地球，形成 美麗 ê 極光。而且可能會繼續落去。就算像 AR 3664 這款 太陽活跳區 足危險--ê，這區 ê 日冕物質噴射 (CME) 猶未 tùi 地球軌道衛星 抑是 地球表面電力網路 造成嚴重 ê 傷害。相片 內底是幾若工前 tī 意大利 羅馬 Civitavecchia 日落 ê 時陣翕著 ê 大區太陽活跳區。合成影像 包括短時間感光 ê 太陽表面，kah 模擬實際上看會著 ê 景色。上落尾，AR 3664 這馬 tī 太陽表面是 愈踅愈離開 地球，而且這區可能會 活到伊閣踅轉來。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240513/ 影像：Marco Meniero 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240513.html Powered by Firstory Hosting

北極 ê 極光通常袂走到遮爾南爿去。毋過，tī 一个大區 ê 太陽活跳區 AR 3664，因為磁場混亂，tī 表面產生爆炸，kā 大量 電子、質子、kah 較大質量 ê 帶電原子核 送入去 太陽系 內底。幾工後，日冕物質噴射（CME）影響著地球，引起極光。有回報講，這擺 ê 極光，行到離 北極 kah 南極 足遠 ê 所在去。這个天空 show 可能袂遐爾緊結束。太陽烏子足濟 ê 活跳區 AR 3664 已經噴出比以前閣較濟 ê CME，這可能會 tī 下暗抑是明仔載 影響著地球。毋過，活跳區這馬出現 tī 太陽邊緣，會隨踅過後壁，按呢就離 地球 愈來愈遠矣。這張相片是 chăng 暝天拄暗 ê 時陣 tī 波蘭 Racibórz 翕--ê 感光 6 秒 ê 紅色 輻射形 極光。相片內底遠遠 ê 所在，有翕著攝影師 ê 朋友，伊是 頭一擺 看著極光，嘛咧翕這个 美麗 ê 彩色 夜空。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240512/ 影像：Mariusz Durlej 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240512.html Powered by Firstory Hosting

踅烏洞咧行 ê 物件看起來會是啥款 ？吸積盤若是一个踅 烏洞 ê 發光吸積氣體，烏洞 ê 強大引力 會 kā 吸積盤 發出 ê 光拗彎，予伊看起來足特別--ê。這支動畫影片 提供咱視覺化 ê 效果。影片是 觀測者，抑就是你，ùi 吸積盤頂懸看 烏洞 ê 角度開始。 踅 tī 中心 烏洞 外口彼輾薄薄 ê 圓箍仔，是 光子球 ê 所在，內底是烏洞 ê 事件視界。這支影片上主要 ê 部份就是吸積盤。吸積盤 tī 倒爿是踅 tùi 你 ê 方向來，這部份會 變較光。咱繼續看 影片，這馬你 tī 烏洞 頂懸，ùi 頂懸 看 tùi 下底去。紲落來你迵過吸積盤，來到較遠彼爿。落尾閣轉來 你本來看烏洞 ê 角度。其中一段影像是真趣味，吸積盤顛倒反，毋過看起來毋是平--ê。像這款視覺化影片是足重要--ê，因為 事件視界望遠鏡 這馬當咧用 世界第一厲害 ê 解析度 替烏洞 翕相。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240508/ 影像：NASA’s Goddard Space Flight Center, Jeremy Schnittman 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240508.html Powered by Firstory Hosting

烏洞若是 kā 一粒恆星吞落去，會發生啥物代誌？細節 ê 部份咱毋知，毋過觀測 ê 結果有提供一寡新 ê 線索。2014 年，有一个 強力爆炸 去予 超新星自動巡天觀測計畫（ASAS-SN 計畫）ê 地面機器人望遠鏡 紀錄落來。隨後 NASA 踅地球 ê 雨燕衛星 kah 其他儀器，繼續做追蹤觀測。Tùi 發射線 做電腦模擬 ê 結果表示講，這應該是有一粒星去予遙遠 ê 超大質量烏洞 搝甲散去。這个相挵 ê 結果就畫 tī 這張藝術插圖 內底。烏洞 tī 中央，是一粒細細粒 ê 烏點。物質若是落 tùi 烏洞去，伊會 kah 其他物質相挵，造成溫度變懸。烏洞周圍有一个 吸積盤，過去是恆星 ê 熱物質，另外閣有一條 tī 烏洞自轉軸 方向 ê 噴射流。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240507/ 影像：NASA, Swift, Aurore Simonnet (Sonoma State U.) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240507.html Powered by Firstory Hosting

這支影片紀錄著日頭 tī 日時 是按怎消失去--ê。這支縮時攝影影片 是 2024 年 4 月 8 號 tī 美國 Arkansas 州 山景城 翕--ê。影片開始 ê 時陣，有看著日頭有 太陽烏子，紲落來一部份太陽銀盤開始變暗去。才幾若分鐘，規粒 日頭 就去予前景 ê 月球 閘去矣。免一點鐘，日頭就完全去予 月球閘去 矣，干焦賰 ùi 後壁射出來 ê 日光，成做一跤 璇石手指。食甚 ê 時陣，規个天頂是暗--ê，予踅 tī 日頭外口彼輾 粉紅仔色日珥 煞變甲足出眾，壯觀 ê 日冕 tī 天頂嘛湠到規四界。中央 ê 日冕 是 kā 食甚階段翕 ê 相片疊出來 ê 結果。免幾若分鐘，影片欲煞進前，閣出現一擺璇石手指，這擺 ê 璇石是 出現 tī 月球另外一爿。紲落來 ê 一點鐘，天頂就 恢復正常 矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240506/ 影像：Reinhold Wittich 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240506.html Powered by Firstory Hosting

目前有一區近代上大陣 ê 太陽烏子群，當咧行過太陽表面。In 是 太陽活跳區 AR 3664，毋但面積大，而且活動力足強--ê，會向 太陽系 擲出粒子雲。其中，日冕物質噴射 (CME) 有一部份已經影響著地球，賰 ê 部份嘛隨欲來矣。Tī 極端環境下底，這寡太陽風暴 可能會造成一寡 地球軌道衛星發生故障、地球大氣層 小可仔變形、kah 電力網路無穩定。In 挵著 地球頂層大氣 ê 時陣，粒子會產生美麗 ê 極光，其中有一寡極光已經出現 tī 比平常時閣較倚南方 ê 地點。相片內底 ê 太陽活跳區 AR3664 kah 烏色 ê 太陽烏子，是昨昏 tī 意大利 羅馬 翕--ê 可見光影像。AR3664 ê 太陽烏子群足大--ê，你會當提頂個月 看 日全食 用 ê 日食目鏡來看，就看會著。這禮拜拜六禮拜，天文愛好者 會 tī 全球無仝所在 ê 暗暝天頂，斟酌揣這寡 光爍爍 閣 特別 ê 極光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240511/ 影像：Franco Fantasia & Guiseppe Conzo (Gruppo Astrofili Palidoro) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240511.html Powered by Firstory Hosting

來！放予輕鬆，咱來看兩粒烏洞合併 ê 動畫。這支動畫是照 2015 年頭一擺 直接量著 重力波 ê 概念做--ê，模擬動畫是慢動作放送，實際上這規个過程才 3 分 1 秒 ê 時間爾爾。Tī 這个宇宙舞台，烏洞 tī 頭前，後壁 是 恆星、氣體、kah 塗粉。兩粒烏洞那踅倚那合併，落尾就合併做一粒。In 強大 ê 引力 kā in 後壁 ê 光 拗彎做 [愛因斯坦環][Einstein rings 1]。烏洞 合併了後，會予本底看袂著 ê 重力波，因為大質量天體 快速合併，造成看會著 ê 影像會 tī [愛因斯坦環][Einstein rings 2] 內底 kah 外口產生波動。LIGO 雷射干涉引力波天文台 量著 ê 重力波 叫做 GW150914，是 tī 13 億光年遠 ê 36 倍 太陽質量 kah 31 倍太陽質量 ê 烏洞合併產生--ê。落尾，孤一粒烏洞變做是 太陽質量 ê 63 倍大，其中 3 个太陽質量轉做 重力波 輻射 ê 能量。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240510/ 影像： 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240510.html Powered by Firstory Hosting

一粒恆星倚近烏洞會發生啥物代誌？恆星若是直接攏著一粒大質量 烏洞，這粒恆星會完全落入去、消失去。毋過 閣較有可能 ê 是，這粒恆星離烏洞足倚--ê，所以烏洞 ê 引力會共伊 ê 外層大氣搝開，甚至破壞伊 ê 結構。了後，恆星大部份 ê 氣體就袂落入去 烏洞 內底。這寡恆星受著 潮汐力 ê 影響去予拆散去，造成 in 可能變甲 kah 超新星平光，自動 巡天 觀測揣著愈來愈濟這款事件。Tī 這張藝術家畫 ê 插圖內底，有一粒恆星拄經過一粒大質量烏洞，擲出一寡氣體，繼續 tī 軌道頂懸咧行。踅 烏洞--ê、由 氣體 kah 塗粉組成 ê 吸積盤 內沿，會因為 受著搝拆 ê 影響，造成溫度衝懸，而且可能會 tī 恆星消失一段時間了後猶咧繼續 發光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240505/ 影像：NASA, JPL-Caltech 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240505.html Powered by Firstory Hosting

就算 in kah R2D2 機器人足成--ê，這 3 台並毋是你欲揣 ê 機器人。顛倒是，這个外殼內底裝 ê 是直徑 1.8 公尺大 ê 輔助望遠鏡 AT (ATs)，是 智利 Atacama 沙漠 地區 Paranal 天文台 ê 望遠鏡。AT 望遠鏡是設計欲來 做干涉儀用--ê，這是一款 kah 8 公尺大 ê VLA 望遠鏡 配合 ê 懸解析度觀測技術。遮攏總有 4 台 AT 當咧運作，逐台下底攏鬥一台車仔，通予望遠鏡會當 tī 鐵枝路頂懸 徙來徙去，組合做無仝 ê 排列，鬥做一个較大單位 ê 望遠鏡。為著欲當做干涉儀使用，逐台望遠鏡接收著 ê 光線會送去 tī 地下道 ê 反射鏡系統 ê 共同焦點。這 3 台 AT 天頂有 大麥哲倫星雲 kah 小 麥哲倫星雲，in 兩个攏是咱銀河系 ê 衛星星系，毋閣有較遠淡薄仔。Tī 南半球好天暗暝 ê 天頂，咱會當看著地球大氣 ê 青色 氣輝，綴地平線頂懸 微微仔咧發光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240504/ 影像：Yuri Beletsky (Carnegie Las Campanas Observatory, TWAN) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240504.html Powered by Firstory Hosting

明亮 ê 長株圓星系 Messier 87 (M87) 是超大質量烏洞 in 兜。2017 年 ê 時陣，伊 ê 影像頭一擺去予地球 ê 事件視界望遠鏡 翕著。這幅 Spitzer 太空望遠鏡 紅外線影像內底 ê 藍色大型星系，是離咱 5500 光年遠 ê 巨人，M87 室女座星系團。雖罔講 M87 看起來就敢若是雲，無啥物特殊，毋過 Spitzer 影像確實有記錄著 ùi 星系中央噴出來 ê 相對論噴射流。咱會當 tī 這幅圖正爿頂懸 ê 插入圖看著，噴射流是湠到幾若千光年遐爾長。正爿 較光 ê 噴射流 當 leh 倚近咱 ê 視線方向。另外一方面，噴另外一个方向 ê 噴射流，雖罔講咱看袂著，毋閣伊產生 ê 衝擊波，kā 一个較暗 ê 弓形物質照予光。正爿下跤 ê 插入圖就是文章內底講著--ê 歷史性 ê 烏洞影像。伊 to̍h tī 這个大型星系 kah 相對論噴射流 ê 中央。雖罔講這張 Spitzer 影像 ê 解析度猶無夠懸，毋閣咱猶是有法度知影 烏洞是驅動 活跳星系 M87 中心 ê 相對論噴射流 所需要 ê 大量能量 ê 源頭。是講踅 tī 超大質量烏洞 四箍圍仔 ê 物質，落尾攏會落 loăi 烏洞內底。事件視界望遠鏡翕著 ê M87，這馬已經有加強處理過矣。按呢咱就會當 清楚看著這粒有名 ê 超大質量烏洞 矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240509/ 影像：NASA, JPL-Caltech, Event Horizon Telescope Collaboration 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240509.html Powered by Firstory Hosting

木星大細 ê 系外行星 WASP-43b kah 地球 ê 距離才 280 光年爾爾，伊踅伊 ê 母恆星一輾是 0.8 个地球日，而且 kah 伊 ê 母行星 因為潮汐鎖定，會用仝一面面對伊 ê 母恆星。伊 kah 中央彼粒細粒、溫度較低 ê 太陽 ê 距離是 200 萬公里，這个距離是無夠水星軌道 ê 25 分 1。毋過，面對母恆星彼爿 ê 日時，若是照鬥 tī James Webb 太空望遠鏡 頂懸 ê MIRI 儀器 tī 紅外線波段 量著 ê 溫度來看，差不多是華氏 2500 度。Tī 這張 熱系外行星軌道圖 內底，Webb 太空望遠鏡 嘛有量著 伊暗暝 ê 溫度，一直攏有 華氏 1000 度以上。這表示講，強力 ê 赤道風 有共大氣層內底 日時加溫 ê 氣體，tī 伊完全冷去進前，送到暗暝彼爿去。系外行星 WASP-43b 這馬 正式 ê 名 是 Astrolábos，伊 ê 母恆星是 K 型星，叫做 Gnomon。Webb 太空望遠鏡 ê 紅外線光譜 表示講，這粒行星暗暝 kah 日時 攏有水煙，這就會當解說 Astrolábos 表面是按怎有雲矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240503/ 插圖來源：NASA, ESA, CSA, Ralf Crawford (STScI) 科學：Taylor Bell (BAERI), Joanna Barstow (The Open University), Michael Roman (University of Leicester) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240503.html Powered by Firstory Hosting

Ùi 真正 ê 宇宙尺度來看，M100 是足壯觀--ê，逐家 kā 伊叫做 大設計 捲螺仔星系。這个大型星系有超過 1000 億粒恆星 tī 內底，伊有明確 ê 捲螺仔手骨，kah 咱 ê 銀河系 足成--ê。M100，嘛叫做 NGC 4321，是 室女座星系團 內底上光 ê 成員之一，kah 會梳妝打扮 ê 后鬃座 差 5600 萬 光年 遠。Tī 這張望遠鏡影像內底，正向 ê 大設計捲螺仔星系 kah 正爿頂懸彼个無遐爾顯目 ê 側向捲螺仔星系 NGC 4312，做伙佔天頂 1 度闊 ê 視野。這張相片是 tī 地球頂懸 ê 美國 Arizona 州 Flagstaff 附近一个 o͘-mih-mah ê 天頂，開 21 點鐘久 ê 感光時間翕--ê，有翕著藍色星團 kah 複雜 ê 塗粉帶，這是這款星系 ê 標誌。量 M100 內底 ê 變光星是一个 確定 宇宙大細 kah 年歲 足重要 ê 方式。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240502/ 影像：Drew Evans 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240502.html Powered by Firstory Hosting

對一寡人來講，這个星雲看起來敢若是一粒 魚 頭。毋過，這个彩色 ê 宇宙肖像 其實是 IC 1795 內底 ê 發光氣體 kah 閘光 ê 塗粉雲。IC 1795 是一个 tī 仙后座 北方 ê 恆星形成區。這个星雲 ê 色水是採用 哈伯色盤 ê 色。是共酸素、水素、kah 硫磺原子 ê 狹頻發射線，對應到 藍色、青色、kah 紅色去。閣共闊頻濾鏡 tī 這區紀錄 ê 資料濫入去，才變做這張影像。IC 1795 tī 天頂 kah 英仙座內底彼个有名 ê 雙星團 無蓋遠，就 tī 心臟星雲 IC 1805 邊仔，是大型分子雲邊緣 ê 恆星形成區複合體 ê 一部份。這个大型恆星形成複合體離咱才 6000 光年 遠，伊是綴咱銀河系 ê 英仙座捲螺仔手骨咧行。照這个距離來估算，IC 1795 ê 闊度 差不多是 70 光年闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240501/ 影像：Roberto Colombari & Mauro Narduzzi 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240501.html Powered by Firstory Hosting

恆星系統 GK Per 干焦 kah 相片 內底 3 个星雲內底 ê 2 个有關係。英仙座 GK 內底 ê 新星 英仙座 1901 就 tī 1500 光年 遠 ê 所在，是目前為止有紀錄--ê，第二近 ê 新星。正中央是一粒 白矮星，伊進前是一粒 類太陽恆星，這是伊留落來 ê 核心。伊去予圓形 ê 煙火星雲包 tī 內底，這个星雲是 ùi 白矮星表面 噴出來 ê 氣體。這个白矮星 發生 熱核爆炸，光度變甲足光--ê，咱叫是講有一粒新 ê 星，就 kā 叫做 新星，這 tī 1901 年 ê 時陣有紀錄落來。踅 tī 煙火星雲外口彼輾紅光氣體，過去是中心彼粒恆星 ê 大氣層。這款氣體 tī 新星 爆炸進前去予擲出來，湠開了後，看起來就敢若是 行星形星雲。畫面頂懸 較暗 ê 殕色氣體，是拄仔好 迒過伊 ê 星際卷雲。1901 年 ê 時陣，英仙座 GK ê 新星 是比 參宿四 閣較光。恆星系統 北冕座 T，按算今年嘛會有一粒 新星爆炸，毋過咱毋知影伊當時會爆炸，嘛毋知伊會變 偌光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240430/ 影像：Deep Sky Collective 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240430.html Powered by Firstory Hosting

這個月初，日頭拄落去 ê 時陣，西爿天頂出現 3 粒足光 ê 天體，予經驗豐富 ê 觀星者有滿意。咱上熟 ê 是 月娘，就 tī 相片頂懸，這馬是月眉 相。月球其他 ê 部份雖然較暗，毋過因為去予 地球 反射太陽 ê 光照著，嘛猶看會著。光爍爍 ê 木星 是 太陽系 內底上大粒 ê 行星，就 tī 倒爿頂懸。上特別 ê 是 彗星 12P/Pons-Brooks，就 tī 月娘下底。伊有一條較粗 ê 塗粉尾溜 tī 正爿，毋過予人 印象較深 是 湠 tùi 頂懸去 ê 離子尾溜。這張相片是 kā 幾若張 tī 仝一个所在、用仝一台 kha-mé-lah 連紲翕 ê 相片疊做伙 ê 合成影像，是 tī 西班牙 ê Girona 省 Llers 庄頭附近翕--ê。頂禮拜 彗星 Pons-Brooks 離 太陽 上倚，伊這馬 行到南天，嘛愈來愈暗，欲轉去到外太陽系矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240429/ 影像：Juan Carlos Casado (Starry Earth, TWAN) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240429.html Powered by Firstory Hosting

日頭若 tī 天頂，毋過天色是暗--ê、四面 ê 地平線是光--ê，按呢你可能是徛 tī 月娘 ê 烏影下底，拄著日全食矣！實際上，這張 通天的月娘烏影 全景組合影像 是 tī 地球美國 Arkansas 州 Shirley 附近 ê 農場翕--ê。這張相片是 tī 4 月 8 號 日全食 彼工，好天 ê 時陣翕--ê。你若是徛 tī 月球烏影帶 ê 中心線附近，食甚階段 就會超過 4 分鐘。Tī 食甚階段，除了會當看著 踅 tī 月盤外口 彼輾日冕，嘛會當看著幾若粒行星 kah 恆星。其中 這內底上好揣--ê，是金星 kah 木星，in 就 tī 食日 ê 正爿下底 kah 倒爿頂懸。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240427/ 影像：Tunc Tezel (TWAN) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240427.html Powered by Firstory Hosting

環形星系 (M57) 比你 ùi 細台望遠鏡看著 ê 閣較複雜。上明顯 ê 中央環 差不多有 1 光年 闊。毋閣這張 足長時間感光 ê 影像，是 ùi 三台無仝 ê 大型望遠鏡影像資料 組合起來--ê，欲 探索 離 星雲 中央 ê 恆星足遠 ê 發光氣體 ê 環形雲絲。這个 組合影像 有 ùi 酸素發--出 ê 紅光，tī 可見光 kah 紅外線 攏有。這个環形星雲是搝長 ê 行星形星雲，是像 太陽 ê 恆星 tī 演化過程 kā 外層大氣擲--出去，落尾變做 白矮星。這个 環形星雲 離咱 2500 光年遠，to̍h tī 音樂星座 天琴座 遐。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240428/ 影像來源：Hubble, Large Binocular Telescope, Subaru Telescope 影像合成 kah 版權：Robert Gendler 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240428.html Powered by Firstory Hosting

Tī 北半球春天 ê 時陣，欲 tiàm 東部地平線頂懸揣著光爍爍 ê 軒轅十四 是真簡單 ê 代誌。軒轅十四 是獅仔座 ê alpha 星，是這幅 望遠鏡視野 中心彼粒鑿目 ê 天星。伊 kah 咱 ê 距離才 79 光年遠爾爾，是一粒 燒熱、自旋速度足緊 ê 恆星，咱這馬知影伊是多星系統 ê 其中一粒。軒轅十四下底有一搭猶未消失、霧霧 ê 光，是 ùi 細粒星系 獅仔座一 內底來--ê。獅仔座一 是一个 長株圓矮星系，是 本星系群 ê 成員之一。本星系群內底閣有 咱 銀河系 kah 仙女座星系 M31。獅仔座一 kah 咱 ê 距離差不多有 80 萬光年遠，去予人認為講是 踅咱銀河 ê 細粒衛星星系內底上遠--ê。毋過 矮星系 獅仔座一 已經有 證據 講，伊 ê 中心有一粒超大質量烏洞，伊 ê 質量 kah 咱銀河中心 ê 烏洞差不多大。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240426/ 影像：Markus Horn 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240426.html Powered by Firstory Hosting

NGC 604 是 一个大型 ê 恆星托兒所，大細差不多有 1300 光年闊，就 chhāi tī 300 萬光年遠 ê 厝邊捲螺仔 星系 M33 ê 捲螺仔手骨 頂懸。伊差不多是 銀河系 ê 獵戶座星雲 ê 100 倍大，獵戶座星雲 是 kah 地球上倚 ê 大型恆星形成區。實際上，tī 本星系群 ê 恆星形成區內底，NGC 604 是第二大 ê，干焦比 劍魚座 30 較細。劍魚座 30 嘛是 大麥哲倫星雲 內底 ê 蜘蛛星雲。James Webb 太空望遠鏡 ê NIRCam 翕 ê 這張予人讚嘆 ê 紅外線影像，有翕著 NGC 604 內底足幼 ê 氣泡 kah 閬空。這 ê 結構是這區 200 外粒，猶 tī 性命週期 早期階段 ê 高溫大質量少年恆星 ê 高能恆星風 kā 雕出來--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240425/ 影像：NASA, ESA, CSA, STScI 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240425.html Powered by Firstory Hosting

Úi 咱 銀河系 內底看，NGC 1232 是面對咱 ê 正向星系。這个大閣媠 ê 捲螺仔星系 差不多有 20 萬光年闊，就 tī 南天 ê 流水星座 波江座遐，kah 咱 ê 距離是 4700 萬光年遠。這張清楚、多彩 ê 望遠鏡影像 NGC 1232，有包括 這个遙遠 ê 島宇宙 足濟重要 ê 細節。這个星系 ê 色水 ùi 核心到外口 ê 變化是按呢：星系中心是發黃光 ê 老歲仔恆星，外圍 ê 大支捲螺仔手骨 是少年藍色星團 kah 發紅光 ê 恆星形成區。NGC 1232 邊仔有一个較細毋過誠顯目 ê 星系伴，是 棍螺仔星系 NGC 1232A。毋過伊 ê 距離應該是閣較遠，差不多是 3 億光年遐爾遠，按呢伊就無啥可能會 kah NGC 1232 產生交互作用。是講，彼个顯目、有光尖 ê 恆星是比 NGC 1232 閣較倚咱，伊其實是咱銀河內底 ê 天體。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240418/ 影像：Neil Corke 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240418.html Powered by Firstory Hosting

明仔載 ê 日全食 敢會拄著好天？這个問題已經 tī 足濟想欲看日全食 ê 北美洲人 心內想過幾若擺矣。這个問題嘛仝款 tī 2017 年 8 月 日全食經過北美 ê 時陣出現。彼陣 ê 日全食，全食帶 ùi 美國 西岸 ê Oregon 州 到 美國東岸 ê 南 Carolina 州。毋過，日偏食 kah 明仔載仝款，會經過規个 北美。是講真不幸，2017年 ê 時陣，足濟所在 ê 日頭攏去予雲閘去矣。毋過有一个所在有看著，就 tī Wyoming 州 ê Green River 湖 ê 湖邊。一搭一搭 ê 雲 tī 天頂出現 ê 距離有夠遠，所以才有法度翕出這組 kā 日全食 囥 tī 相片中央 ê 連紲影像。食甚 ê 時陣，日頭 去予烏暗 ê 月娘 規个閘牢，日冕 ùi 月娘後壁湠出來。日冕以外 ê 其他部份，是 食甚 進前 kah 了後 ê 日偏食階段。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240407/ 影像：Ben Cooper 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240407.html Powered by Firstory Hosting