NASA 逐工一幅天文圖 APOD Taigi

對一寡人來講，這看起來敢若是一隻徛鵝。毋過對研究宇宙 ê 人來講，這是 2 个大粒星系產生交互作用 ê 一个足趣味 ê 例。幾若億年前，面頂 ê NGC 2936 可能是一个普通 ê 捲螺仔星系。會自轉、會做新 ê 恆星，攏咧無閒伊家己 ê 代誌。伊 kah 大質量 長株圓星系 NGC 2937 行傷倚了後，煞沉落去。In 兩个做伙去予人叫做 Arp 142。這張 相片是 新 ê Webb 紅外線 影像，另外閣有 Hubble 可見光 影像 做比較。NGC 2936 受著引力 ê 影響，去 hŏng 拗彎 變形。大質量星系 互相 倚近 ê 時陣，氣體 會 堅凍，才有通形成 新 ê 恆星。相片正爿頂懸 有 一陣少年恆星，看起來就敢若是 徛鵝 ê 鼻。捲螺仔星系 中心 光爍爍 ê 恆星，看起來就敢若是伊 ê 目睭。這兩个星系可能是 tī 十億年前 合併做一个 較大 ê 星系。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240730/ 影像來源：NASA, ESA, CSA, STScI Hubble Rollover 重新處理 kah 版權：Raul Villaverde 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240730.html Powered by Firstory Hosting

有當時仔，咱 ê 太陽表面 敢若是咧跳舞。比論講，2012 年中，NASA 踅太陽 ê 太陽動力學衛星天文台 就 翕著 一个 予人印象足深 ê 日珥，就敢若咧 跳舞 仝款。這支 3 點鐘久 ê 縮時攝影影片 是 tī 紫外光波段 翕--ê。圓箍仔形 ê 磁場 是 太陽 ê 高溫 電漿 流。這个 咧跳舞 ê 日珥，規模是足大--ê，規粒 地球 攏去予包 tī 這條高溫氣體 弧 內底。袂出聲 ê 日珥 通常 會擋 一個月，而且有可能會 tī 日冕物質噴射 (CME) 中爆發，kā 高溫氣體 擲到 太陽系 內底。產生 太陽日珥 ê 能量機制到今猶是一个 研究 主題。Kah 2012 年仝款，今年太陽表面 ê 活動閣開始變強 矣，嘛開始出現足濟 太陽絲 kah 日珥。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240728/ 影片來源：NASA, SDO 資料處理：Alan Watson via Helioviewer 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240728.html Powered by Firstory Hosting

毛蟹星雲 ê 動力來源是啥物？是一粒大細差不多 kah 城市平大，1 秒鐘 自旋 30 擺、有磁性 ê 中子星。伊嘛叫做 毛蟹星雲脈動星，是星雲核心 氣體捲螺仔旋中心 ê 光點。毛蟹星雲 M1 差不多有 10 光年闊。這張 壯麗 ê 相片 有翕著 捲螺仔旋 ê 中央盤 kah 踅 tī 邊仔、沓沓仔湠出去--ê、足複雜 ê 雲絲。這張相片是 kā 紅色 ê Hubble 太空望遠鏡 ê 可見光 影像，白色 ê Chandra X 光天文台 ê X 光 影像，kah 茄仔色 ê IXPE 偏振探測器 ê X 光發射線 疊做伙 ê 合成相片。中央 ê 脈動星 透過 沓沓仔 降低 自旋速度 ê 方式，驅動 毛蟹星雲 產生發射線 kah 脹大，產生 高能 電子 風。這張 今仔日發表 ê 影像，是欲紀念 NASA 旗艦級 天文台：Chandra X 光天文台 發射 25 週年。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240723/ 影像：NASA, ESA, ASI, Hubble, Chandra, IXPE 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240723.html Powered by Firstory Hosting

有一寡人 tī 7 月 11 日頭落山了後，tī 天頂 看著這寡光影帶射出來。這寡光影帶 叫做 反向佛光，是西方地平線附近 ê 大片雲層 tī 日落彼陣 ê 大氣層 投影出來 ê 長長 ê 烏影。因為 kha-mé-lah ê 視角，這寡光影帶 看起來敢若 攏收 tùi 東爿地平線去，捷克共和國 Brno 山頂一棟 14 世紀城堡 ê 方向。前景 是 當地人 tī Brno 天文台 kah 天文館 下面 ê 公園 舉辦--ê，逐年攏有 ê 行星節。公園內底有囥 太陽系 ê 行星 大雞胿，逐粒攏是直徑 10 公尺。雖罔講 佛光 kah 反向佛光 攏是定定 tī 地球 看著 ê 大氣現象，毋過拄仔好 tī 行星節看著，是較罕得有--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240719/ 影像：Pavel Gabzdyl 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240719.html Powered by Firstory Hosting

是按怎這个星系 ê 尾溜遮爾長？這張相片是 ùi Hubble 影像資料庫 內底來--ê。這个戲劇性 ê 美麗相片，是 捲螺仔星系 Arp 188，肚胿仔星系。這尾 宇宙肚胿仔 是 tī 天龍座 方向，離咱 4.2 億光年遠 ê 所在。伊有 引人注意 ê 尾溜，差不多有 28 萬 光年 長，閣有光爍爍 ê 大質量 藍色星團。有一款 講法 是，這進前應該是有一粒 較實密 ê 外來星系 ùi Arp 188 面頭前行過，ùi 正爿行到倒爿，去予 肚胿仔星系 ê 引力 搝到後面去。In 兩粒星系 接近 ê 時陣，引潮力 kā 捲螺仔星系 內底 ê 恆星、氣體、塗粉 攏 搝搝出來，變做這條壯麗 ê 尾溜。外來 星系應該是 tī 肚胿仔星系 後壁 30 萬光年遠 ê 所在，就 tī 相片正爿頂懸，捲螺仔手骨 頭前。肚胿仔星系 就 kah 伊 ê 名 仝款，年歲較大了後，伊 ê 尾溜 就會無去矣。尾溜內底 ê 星團會變做 這个大粒捲螺仔星系 ê 細粒衛星星系。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240715/ 影像來源：Hubble Legacy Archive, ESA, NASA 資料處理：Harshwardhan Pathak 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240715.html Powered by Firstory Hosting

這寡宇宙雲花就開 tī 1300 光年遠 ê 仙王座 豐富 ê 星場內底。伊就叫做 尾蝶花星雲，編號是 NGC 7023。伊毋是天頂唯一一个生甲親像 花 ê 星雲。這張深空望遠鏡景色 有翕出 尾蝶花星雲 kah 伊四箍圍仔 ê 星際塗粉。咱看會著 尾蝶花星雲 大範圍 ê 色光 kah 對稱 ê 結構。Tī 尾蝶花星雲內底，厚塗粉物質 ê 中央 有一粒高溫少年恆星。反射星雲主要 ê 色光是藍色--ê，這是塗粉粒反射恆星光 ê 特殊色光。Tī 反射星雲 中心 ê 雲絲，發出較暗 ê 紅光，這是一款 光致發光現象，就是物質吸收光子了後，重新輻射出光子 ê 結果。這个結果，予塗粉粒 kā ùi 恆星發出來 看袂著 ê 紫外光輻射，有效率轉做 看會著 ê 紅光。紅外線 觀測 表示講，這个星雲內底有一款足複雜 ê 炭素分子，叫做 PAHs 多環芳炭氫化合物。這个有 藍色花葉 厚塗粉 ê 尾蝶花星雲，差不多有 6 光年大。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240725/ 影像：Robert Shepherd 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240725.html Powered by Firstory Hosting

有當時仔星際空間內底 ê 暗塗粉 特殊 ê 形態實在是足優雅 ê。比論講上南爿 ê 變色杜定座 就是按呢。咱知影講暗塗粉會 kā 後壁 ê 恆星 抑是 星雲 ê 可見光閘著，所以 in 平常時是 傷暗看無。毋閣 這張 36.6 點鐘久 ê 感光 內底，大部份看著 ê 是 塗粉 家己 ê 光，咖啡色色調是伊較強 ê 紅光 kah 近紅外線 ê 部份。Tī 中央正爿有一粒較藍較光 ê 恆星，是 變色杜定座 Beta 星。伊本底就是一粒發藍白光 ê 恆星，伊邊仔 ê 塗粉 to̍h 拄仔好反射伊 ê 藍光。相片內底 ê 恆星 kah 塗粉 攏是 tī 咱銀河系內底。毋閣有一个較明顯 ê 例外：Tī 變色杜定座 Beta 星下底 ê 白色光點 是 tī 遠方 ê IC 3104 星系。星際塗粉 大部份是 tī 巨恆星 較冷 ê 大氣層內底產生，才去予恆星光、恆星風、抑是 恆星爆炸（比論講 超新星）kā 捒出去 ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240722/ 影像：Chang Lee 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240722.html Powered by Firstory Hosting

這款岩石結構毋是假--ê，是真--ê。伊毋是遐爾有名，可能是因為伊毋是蓋大，干焦 幾若公尺 爾爾。就算是按呢，這个 tī 美國 新墨西哥州 ê 國王翼 石坪，猶是一款特別 ê 岩石結構，叫做 巫毒石林。巫毒石林 應該是 去予侵蝕 的軟岩石 頂懸 疊 一重𠕇岩石 形成--ê。欲翕出 有 巫毒石林 細節 ê 夜空相片，是開攝影師一冬 ê 時間。除了愛 等一个無啥物雲 ê 好天暗暝，前景嘛愛有 人工照明，才會 kah 背景 ê 自然光 四配。經過長時間 ê 計畫 kah 等待，總算 tī 2016 年 5 月 翕著 這張相片。背景天頂 ê 銀河，kah 前景 ê 橫篙 互相呼應。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240721/ 影像：Wayne Pinkston (LightCrafter Photography) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240721.html Powered by Firstory Hosting

M24 kah Charles Messier 上有名 ê 彼个星表內底 大部份 ê 天體無仝，伊毋是一个光爍爍 ê 星系、星團、抑是 星雲。伊是附近星際塗粉雲內底 ê 一个空縫，予咱會當看著 銀河系 人馬座捲螺仔手骨 內底 ê 遙遠恆星。用雙筒千里鏡 抑是 細台天文望遠鏡 就會當 ùi 這个 300 光年闊 ê 星雲窗仔 看著 離地球 1 萬 光年遠 ê 恆星。M24 內底 光爍爍 ê 恆星，有當時仔嘛去予人叫做 小人馬座星雲，就 tī 這張美麗夜空景色 中央倚倒爿遐。這个 tī 人馬座方向 ê 望遠鏡視野 超過 6 度闊，差不多是 12 粒月娘 ê 大細。內底有銀河系中心 ê 塗粉雲 kah 發光 ê 星雲，包括 M24 中央附近 ê 暗星雲 B92 kah B93。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240718/ 影像：Christopher Freeburn 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240718.html Powered by Firstory Hosting

羅馬神話 ê 火神 Vulcan 提伊 ê 摃槌仔 tī 天頂摃一下，火 就著矣。這是最近 tī 智利 Villarrica 火山 ê 火。這个火實際上是 ùi 熔去 ê 石頭 來 ê 發光水煙 kah 火山烌。天頂 ê 光是 tī 咱 銀河系 kah 麥哲倫星系 內底 ê 遙遠恆星。火 kah 光就 tī 這張相片內底互相呼應。Tī 這支縮時攝影影片 中，地球頂懸 ê Villarrica 火山噴發，伊家己 tī 天星滿滿 ê 夜空下底咧自轉。地球 頂懸 有 1350 粒火山，kah 木星 ê 衛星 木衛一 Io 仝款，攏是 太陽系 內底 上蓋 活跳跳 ê 地質環境。雖罔講兩个世界攏有遮爾媠 ê 景色，毋過兩个世界頂懸 ê 火山 形成 ê 原因無仝。地球 ê 火山是 地球枋塊 之間沓沓仔徙動產生--ê。木衛一 Io ê 火山是 木星 ê 引潮力 kā 伊 ê 地殼 搝 甲 變形 產生--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240717/ 影像：Gabriel Muñoz 文稿：Natalia Lewandowska (SUNY Oswego) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240717.html Powered by Firstory Hosting

這个無四常 ê 星際結構是啥物？這寡 有 明亮邊緣 ê 水流形結構，就 tī 船尾座 kah 船帆座 邊仔附近 ê 豐富星場 內底。這个星際氣體 kah 塗粉組成 ê 彗星形雲球，是 tī 1300 光年 遠 ê 所在。是附近高溫恆星發出 ê 高能紫外光輻射，雕出這寡雲球，kā in ê 邊緣離子化，才會發光。這寡 ùi 船帆座 超新星殘骸 來 ê 雲球，in ê 外形 嘛是 受著 超新星殘骸 ê 影響。Tī in 內部，冷氣體 kah 塗粉 ê 核心 可能會 崩塌，形成低質量恆星。這个過程落尾會造成 雲球散去。事實上，倒爿頂懸 ê 彗星形雲球 CG 30 tī 頭 ê 部份發出暗暗 ê 紅光，這是 恆星形成 早期發出 ê 高能噴射流 造成 ê 現象。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240716/ 影像：Mark Hanson & Martin Pugh, Observatorio El Sauce 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240716.html Powered by Firstory Hosting

這張是 1990 年 航海家 1 號太空船 飛到 離太陽 64 億公里遠 ê 所在，越頭翕--ê 頭一張 太陽系 全家福。這組完整 ê 相片是 ùi 黃道面 頂懸 32 度 ê 所在翕--ê 60 張 拼鬥影像。其中，航海家 ê 闊幅 kha-mé-lah ùi 倒爿 ê 內太陽系 開始翕。一直翕到上正爿 ê 冰巨行星 海王星，就是太陽系上遠 ê 行星。金星 V、地球 E、木星 J、土星 S、天王星 U, kah 海王星 N，攏有用英文字母 kā 標出來。太陽就 tī 倒爿圓箍仔型相片群中央，上光彼點。逐粒行星 ê 相片 攏是用 航海家 ê 狹頻 kha-mé-lah 翕--ê。相片內底看袂著水星，因為離太陽傷近矣，煞光甲看袂著。火星較拍損，去予 kha-mé-lah 光學系統 散射 ê 日光 閘著矣。而且，比海王星較倚太陽 ê 細粒冥王星，嘛無翕著。航海家 1 號 是 NASA 發射到 星際空間 中，飛上久、上遠 ê 太空船。2024 年 ê 時陣，伊已經離咱 240 億公里遠矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240713/ 影像：Voyager Project, NASA 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240713.html Powered by Firstory Hosting

毋知你最近敢捌看過別个世界 ê 全景圖？這張是阿波羅 11 號 ê 登陸地點，就 tī 彼个壯麗閣青荒 ê 月海，寧靜海 遐。是原始相片 ê 高解析度掃描相片 鬥出來 ê 全景圖。相片是 Neil Armstrong tī 1969 年 7 月 20 鴟鴞號登月小艇 登陸月球了後無偌久，ùi 窗仔翕出去 ê 景色。全景圖 上倒爿彼張 (編號 AS11-37-5449)，是人類頭一擺 tī 地球以外 ê 世界翕 ê 相片。倒爿 ê 前景有一个推進器 ê 煙筒管，是 tī 南方。正爿有鴟鴞號 ê 烏影，出現 tī 西爿。予你做一个參考，正爿彼个較大較淺 ê 隕石坑，伊 ê 直徑差不多是 12 公尺闊。相片是登陸月球了後差不多點半鐘，太空人 踏 tī 月球塗跤 進前，ùi 登月小艇 ê 窗仔翕--ê。翕相 ê 目的是欲紀錄登陸地點用--ê，若是欲提早離開 ê 時陣就用會著矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240720/ 影像：Neil Armstrong, Apollo 11, NASA 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240720.html Powered by Firstory Hosting

看起來是按呢，其實星系是足安全 ê 啦！相片內底 ê 三角星系 M33，其實比 石頭大細 ê 流星 大閣較濟。而且星系是 tī 足遠 ê 所在。像相片內底這粒星系，是 tī 300 萬 光年 遠 ê 所在，毋是 0.0003 光秒 遠 ê 所在。毋過因為這粒 流星 ê 投影路線 ùi 這粒星系下底行過，而且 地球大氣 高層 ê 風 吹 ê 方向，予這粒 流星蒸發 ê 分子 ê 方向，看起來敢若是咧離開星系。天文攝影師嘛足好運，才會 tī 仝一張相片內底，同齊翕著流星 kah 星系。了後伊才閣 疊 2 張 M33 影像去哩，加強 捲螺仔星系 ê 色水。是講咱愛知影，流星 是一秒就無去矣，毋過 星系 煞會擋 幾若十億年。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240714/ 影像：Aman Chokshi 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240714.html Powered by Firstory Hosting

行星型星雲 Jones-Emberson 1 號 就敢若是 包 tī 一粒欲死 ê 類太陽恆星 外口 ê 往生被。伊就 tī 天貓座 方向，離咱地球 1600 光年遠 ê 所在。這个脹大 ê 氣體殘骸差不多有 4 光年闊，是 ùi 一粒欲死 ê 恆星 ê 大氣層 擲出來 ê 氣體。中央 ê 恆星 kā 核融合 需要 ê 水素 kah 日素 tī 幾若十億年 ê 時間內 用煞了後，會 kā 氣體殘骸擲到星際空間去。行星型星雲中央有一粒恆星核 ê 殘骸，是一粒燒燙燙 ê 藍色 白矮星。這个星雲 嘛叫做 PK 164 +31.1，伊足暗--ê，較歹利用望遠鏡 ê 目鏡看著。這張深空影像 是 kā 12 點鐘久 ê 感光影像疊出來 ê 結果，確實看會著足濟細節。這張清楚相片 ê 背景 攏是咱銀河系 ê 恆星 kah 一寡遙遠 ê 星系。行星型星雲 Jones-Emberson 1 號 tī 這个宇宙舞台頂懸是 足短命--ê，伊會 tī 紲落來 幾若千年 ê 時間內底沓沓仔消失去。毋過中央彼粒高溫 ê 白矮星，愛 幾若十億 年才會冷去。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240712/ 影像：Team OURANOS,(Jean-Baptiste Auroux, Jean Claude Mario, Mathieu Guinot & Matthieu Tequi) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240712.html Powered by Firstory Hosting

這三个光爍爍 ê 星雲，就 tī 人馬座 kah 密喌喌 ê 銀河中心區，是逐家足愛翕 ê 望遠鏡景色。實際上，tī 18 世紀 足愛探索宇宙 ê Charles Messier 嘛 kā 其中 2 个編入去目錄。一个是 M8，是倚中央頂懸上大彼个星雲。另外一个是 M20，是倒爿下跤彩色彼个。第三个發射區包括 NGC 6559，就 tī M8 正爿，伊 kah 上大彼个星雲之間，有一條烏暗塗粉帶。這三个攏是 5000 光年遠 ê 恆星工場。這規片 M8 ê 大細超過 100 光年，伊閣有一个名，叫做 內海仔星雲。M20 嘛有一个偏名，叫做 三重奏。發射星雲 ê 紅光，主要是 ùi 發光 ê 水素氣體 來--ê。Kah 紅光相對 ê 藍光，是塗粉 反射恆星光 造成--ê。這个闊莽莽 ê 星際景色 是超過 4 度闊，按呢差不多是 8 粒月娘 ê 大細。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240710/ 影像：Andy Ermolli 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240710.html Powered by Firstory Hosting

這寡雲實在是 足 無四常--ê。第一，in 是 足罕得看著 ê 夜光雲，就是講，in 愛 tī 暗暝才看會著，毋過干焦 tī 日出進前 抑是 日落了後才看會著。第二，咱知影這寡夜光雲 ê 來源。這是一个真罕得拄著 ê 情形。高層大氣 內底 反射日光 ê 冰晶，是 ùi 30 分鐘前 tī 附近發射 ê SpaceX 火箭 來--ê。伊較正式 ê 名 是 極地中氣層雲。天頂這寡 牽絲 ê 冰，攏牽 tùi 天頂 ê 月眉面頭前。這張相片 kah 這个連結內底 ê 影片，是一禮拜前 tī 美國 Florida 州 Orlando 翕--ê。月娘正爿彼个光點是 木星，正爿地平線頂懸 一點一點 ê 光點 是 飛龍機。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240709/ 影像：Pascal Fouquet 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240709.html Powered by Firstory Hosting

球形星團 半人馬座 Omega ê 直徑是 150 光年，這个範圍 內底有 1000 萬粒 比太陽較老 ê 恆星。伊 ê 編號是 NGC 5139，tī 1 萬 5000 光年遠 ê 所在，是銀暈內底 已經知影 ê 200 粒 球形星團 內底上大、上光--ê。大部份 星團攏是 差不多年歲 ê 恆星組成--ê。毋過神祕 ê 半人馬座 Omega 煞有無仝年歲、無仝化學豐度 ê 恆星族群。實際上，半人馬座 Omega 可能是一个 較細粒星系 kah 銀河系合併過程中，留落來 ê 核心。半人馬座 Omega ê 紅巨星是 黃色--ê，tī 這張 清楚 ê 望遠鏡景色 內底是真好揣。Hubble 太空望遠鏡 tùi 這款 實密星團 已經研究 20 外冬矣。目前 ê 證據表示講，半人馬座 Omega 中心 附近 有一个大質量烏洞。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240711/ 影像：Juergen Stein 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240711.html Powered by Firstory Hosting

Tī 這个無四常 ê 暗暝天頂是發生啥物代誌？這是一支 濃縮 4 點半鐘 ê 360 度 全景 影片，上引人注意 ê 部份，應該是 粉紅仔色 kah 茄仔色 ê 極光。5 月 11 這暗 ê 極光，實在是世界 有名--ê。等到暗暝 ê 時陣，極光帶出現 tī 天頂 閃閃爍爍，銀河系 ê 中央帶 沓沓仔 peh 懸，恆星嘛因為 地球自轉 tī 天頂徙位。影相有同齊翕著 tī 極光頂懸 真罕得看著 ê 紅色光帶，tī 天頂沓沓仔咧變化。這就是 SAR 弧，穩定極光紅弧。地平線以下 ê 爍光，是因為有車駛過去。天頂會振動 ê 光點，是衛星 kah 飛龍機。這支影片是 tī 中國 新疆 用 4 台獨立 ê kha-mé-lah 翕出來--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240626/ 影像：Jeff Dai (TWAN) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240626.html Powered by Firstory Hosting

其他恆星是毋是嘛 kah 咱太陽仝款有行星？是哩！這个證據是因為恆星若是有 行星 踅伊咧行，伊就會因為受著行星引力 ê 影響，幌來幌去，嘛會因為行星行到伊頭前，煞變較暗。目前已經有 5500 粒 系外行星 去予揣著，其中有幾若千粒是 NASA ê Kepler 太空望遠鏡 kah TESS 任務揣著--ê。其他有 百外粒是 ESO ê 地面望遠鏡 HARPS 儀器 揣著--ê。這張圖 畫--ê，是 系外行星 可能生做啥物款。海王星 型 行星 tī 圖中央，in 是 藍色--ê，可能是因為 大氣內底有甲烷，散射藍光造成--ê。兩爿是 木星 型 行星，咖啡色 kah 紅色 是因為大氣內底有 一屑仔 炭素，散射造成--ê。之間閣有足濟其他色--ê，是地球這款 岩石行星。科學家揣著 愈來愈濟 系外行星，對 in ê 研究 嘛愈來愈濟。人類嘛 tùi 地球型行星 愈來愈了解，想欲知影宇宙內底是毋是有性命，是毋是有普遍。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240708/ 影像：Martin Vargic, Halcyon Maps 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240708.html Powered by Firstory Hosting

這張 夜空景色 上引人注意--ê，是 地平線附近 ê Etna 火山 山頂 ê 紅光。這粒火山是地球頂懸足有名 ê 活火山，是一款多層火山。銀河內底 ê 恆星光 就 tī 天頂閃閃爍爍。銀河盤頂懸一搭一搭 ê 烏影，是大量 ê 塗粉雲。火山天頂 有 北方天文愛好者 足熟似 ê 天津四、織女星、牛郎星、kah 夏季大三角，背景閣有 烏暗星雲 kah 光爍爍 ê 星雲。這張深空影像，有 銀河頂懸 活跳 恆星形成區 發出 ê 光，伊就 kah 北半球 熱天暗暝 ê Etna 火山頂懸 ê 紅光，相對應。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240705/ 影像：Gianni Tuminon 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240705.html Powered by Firstory Hosting

這个美麗 ê 三叉星雲 其實是一个宇宙研究主題。伊嘛叫做 M20，離咱有 5000 光年遠，tī 厚星雲 ê 人馬座方向遐。這是一个 tī 咱銀河盤 ê 恆星形成區，三叉星雲展示三種無仝款 ê 天文星雲：紅色 發射星雲 是酸素原子發出 ê 光，藍色 反射星雲 是塗粉反射恆星 ê 光，烏暗星雲 是厚塗粉雲 ê 剪影。毋閣紅色發射區去予閘光 ê 塗粉帶分做三爿，所以 才會叫做 三叉星雲。這張是有名 ê 哈伯太空望遠鏡 tī 這區翕 ê 特寫相片。Tī 發射星雲中央 ê 倒爿下跤，有去予新誕生 ê 恆星雕出來 ê 條仔雲 kah 噴流。三叉星雲差不多有 40 光年闊。伊 tī 咱天頂看起來差不多 kah 月娘欲平大。毋閣伊傷暗矣，目睭無法度直接看著。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240704/ 影像：Jesús Carmona Guillén 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240704.html Powered by Firstory Hosting

這支影片 ùi 12 秒開始，有一粒 地球 peh 起來 矣！一直到 55.5 年前，人類毋捌看過地球 ùi 月球邊緣 peh 起來，所以這个景色予 阿波羅 8 號 太空船 ê 船員感覺足心適--ê。這寡 船員 隨開始 翕 阿波羅 8 號 踅月球行 ê 各種精彩景色。這支 影片 是用現代技術 tùi 彼陣翕 ê 影片重新處理過，予伊看起來敢若是現代 ê 電影。咱 熟似 ê 地球 tī 咱 無熟似 ê 月球景色 中 peh 起來。這規个景色 kah 咱 tī 地球看著 月球 peh 起來 ê 概念顛倒反。對足濟人來講，這个景色嘛提醒咱是一个性命共同體：這粒 藍色大理石，就是咱生活 ê 所在。這支 2 分鐘 ê 影片 毋是縮時攝影影片，這是 ùi 阿波羅 8 號 窗仔看著 ê 景色，這是地球 peh 起來 ê 誠實速度。經過 7 個月 ê 3 擺任務，來到 阿波羅 11 號 任務，太空船毋但踅月球咧行，太空人總算是 登陸月球 矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240630/ 影像：NASA, SVS, Apollo 8 船員 首席動畫師：Ernie Wright 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240630.html Powered by Firstory Hosting

這馬有新 ê 登陸器 tī 月球頂懸呢！差不多 2 禮拜前，日本 ê 智慧型月球探測器 (SLIM) 欲降落 tī 月球。伊 tī 降落進前先囥 2 台探測車落去，了後，主登陸器才降落。2 台探測車較大 ê 彼台，會當 像水雞仝款跳。毋閣較細台 ê，差不多 kah 野球 平大彼台，會 kah 變形金剛 仝款，展開 了後才開始徙動。主登陸器 ê 小名叫做 月球狙擊手，就 tī 這張較細台 ê 探測車翕--ê 相片內底。檢查 這張影像 就會知影，[月球狙擊手][Moon Sniper 1] ê 推進器是 tī 頂懸。這表示講，這台登陸器降落 ê 時陣就是 倒頭栽，伊本底 欲降落 ê 方位 是 tī 邊仔。其中一个結果就是，[月球狙擊手][Moon Sniper 2] ê 太陽能枋 無出現 tī 安排 ê 方位，所以太陽能儉 ê 電就無夠。按呢登陸器 按怎用電，就愛重新調整。SLIM 登陸器 已經成功完成 伊 ê 主要任務，技術試驗。明仔載開始 就會當看著月球 ê 暗暝矣，毋閣這毋是本底安排 ê 任務。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240130/ 影像：JAXA, Takara Tomy, Sony Co., Doshisha U. 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240130.html Powered by Firstory Hosting

有名 ê 昴宿星團 當咧 沓沓仔 消滅 一部份 迵過 伊 ê 氣體 kah 塗粉 。昴宿星團 是地球天頂上光 ê 開放星團 之一，tī 北半球任何一个所在用 目睭 就 看會著。Tī 過去 10 萬年內底，有一大片氣體 kah 塗粉拄仔好迵過 昴宿 星團，造成 恆星 kah 塗粉 ê 強烈反應。這團雲可能是 Radcliffe 波 ê 一部份，是 最近才發現--ê。伊是 kah 咱 銀河系 附近 幾若个恆星形成區相連 ê 氣體 kah 塗粉結構。恆星 ê 光壓會排斥四箍圍仔藍色 反射星雲 內底 ê 塗粉。愈細粒 ê 塗粉，排斥力就愈大。短期 ê 結果是，一部份 ê 塗粉雲變做 一絲一絲、一重一重。這張深空影像是舊年 tī 美國 猶他州 ê 猶他沙漠遙控天文台 開 9 點鐘 ê 感光時間翕--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240129/ 影像：Craig Stocks 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240129.html Powered by Firstory Hosting

宇宙開始到今，發生過啥物代誌？這張 捲螺仔時間圖 有 kā 一寡重點畫出來。捲螺仔中心是 大爆炸，咱知影這差不多是 138 億年前 開始--ê。開始幾若十億年左右，原子形成矣。紲落來 原子 形成 恆星，恆星 kah 氣體 形成 星系、咱 ê 太陽、地球，這發生 tī 46 億年前。地球頂懸 ê 性命 大約仔出現 tī 38 億年前，了後開始有 細胞，紲落來 10 億年內出現 光合作用。差不多 17 億年前，地球頂懸開始有無仝款 ê 多細胞生物 出現。魚仔類 tī 5 億年前開始 tī 海底咧泅，飼奶動物 tī 2 億年前開始 tī 陸地咧行。人類 tī 600 萬年前開始出現，1 萬年前 開始出現城市。捲螺仔時間圖就畫到遮，紲落來應該是人類 飛到太空中，這嘛才開始 75 年爾爾。而且 人工智慧 才拄開始無幾年，這馬已經變甲足重要矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240701/ 影像：Pablo Carlos Budassi via Wikipedia 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240701.html Powered by Firstory Hosting

是按怎這寡雲遮爾多彩？七彩雲 是一款較罕得看著 ê 現象，雲看起來是活跳跳，甚至會當看著規个 光譜 ê 色。這寡 出現 tī 極區 平流層 ê 雲，嘛 叫做 真珠雲 抑是 珠母雲，是 平大粒 ê 細粒 水珠仔 形成--ê。日頭 若是出現 tī 適當 ê 方向，毋是直接看著，咱就會當看著 這款薄雲 因為對 日光 產生 繞射，kā 無仝色 ê 光拗 tùi 無仝方向去。所以，觀測者 tī 無仝角度 就會看著 無仝色。足濟 雲 上開始 ê 時陣攏是齊勻--ê，而且是 七彩--ê。毋過連鞭就變甲傷厚、色濫濫做伙，抑是離 日頭 傷遠，所以就看袂著這款色矣。這張相片 kah 連結內底這支影片 攏是 2019 年 tī 瑞典 Ostersund 翕--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240707/ 影像：Goran Strand 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240707.html Powered by Firstory Hosting

NGC 7789 星團 tiàm 銀河豐富 ê 星場內底，tī 仙后座方向 8000 光年遠 ê 所在。這个星團 是 天文學家 Caroline Lucretia Herschel tī 18 世紀尾 tiàm 深空發現--ê，所以嘛叫做 Caroline ê 玫瑰。伊 tī 細台望遠鏡 內底 看起來 是一个 有 恆星 kah 空縫 ê 星團，就親像是一重一重 ê 玫瑰花花葉。照估計，開放 星團 ê 恆星 應該才 16 億歲爾爾。星團內底 ê 恆星應該是仝一个時期誕生--ê。毋過較光、質量較大 ê 恆星，in 核心 ê 水素燃料 會燒較緊煞。像太陽這款恆星會 ùi 主序星 演化做 紅巨星，就是相片內底發黃光 ê 恆星。天文學家利用 量 恆星 ê 色光 kah 亮度，會當模擬 星團 ê 質量 kah 年歲，以及 主序星 當時會離開 主序帶 變做 紅巨星。Caroline ê 玫瑰 ê 大細超過 50 光年，tī 這張清楚 ê 望遠鏡影像 內底 ê 角寸尺 差不多是 半度大，一度就是月娘 ê 大細。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240706/ 影像：Massimo Di Fusco 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240706.html Powered by Firstory Hosting

大型金爍爍閣美麗 ê 捲螺仔星系 M83 就 tī 長長長 ê 長蛇座 東南方，離咱 1200 萬光年遠 ê 所在。M83 ê 直徑差不多有 4 萬光年長，伊有足顯目 ê 捲螺仔手骨，所以去予人叫做 南方風吹星系。Tī 捲螺仔手骨頂懸 ê 厚塗粉帶 邊緣附近，有足濟 發紅光 ê 恆星形成區。這予 M83 提著另外一个偏名，叫做 千粒紅寶石星系。這張新 ê 望遠鏡 數位影像 嘛有紀錄這粒 光爍爍 ê 星系 湠出來 ê 霧霧星系暈。這張宇宙相片 ê 底部有一條 恆星潮汐流。這是因為大質量星系 M83 kah 較細 ê 衛星星系 合併，受著引力 ê 影響，kā M83 內底 ê 物質搝出來，才會形成 恆星流。天文學家 David Malin 佮 Brian Hadley tī 1990 年代中，就捌透過 加強相片底片處理 ê 方式，揣著這寡足歹揣 ê 恆星流。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240703/ 影像：Michael Sidonio 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240703.html Powered by Firstory Hosting

六月 ê 月圓 會 tī 夏至過了 28 點鐘內 ùi 日頭相對面 peh 起來。因為月球 tī 天頂咧行路線 足倚 太陽咧行 ê 黃道面，所以夏至 日頭 peh 到天頂足懸 ê 時陣，彼暗 tī 北緯看著 ê 六月月圓猶是足低--ê。實際上，這張 6 月 21 tī 土耳其 Bursa 厝頂翕--ê 地平線附近 ê 月圓相片，是 tī 月娘 peh 起來 到落去 之間，每 10 分鐘感光一擺 ê 合成相片。月球軌道 ê 進動週期是 18.6 年，會 tī 18.134 度 (上細月球至點) 到 28.725 度 (上大月球至點) 之間 進行週期變化。所以逐個月 自月出到月落之間，月娘行到上北爿 kah 上南爿 ê 南北差，嘛會無仝。2024 年月球來到 上大月球至點，月圓會行到上倚南爿 ê 所在，所以 今年夏至 ê 月出 kah 月落 攏會出現 tī 地平線附近。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240629/ 影像：Tunc Tezel (TWAN) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240629.html Powered by Firstory Hosting

咱若是會當看著宇宙 ê 起源，毋知會是按怎？咱應該會當看著星系形成。毋知彼當時 ê 星系是生做啥物款？James Webb 太空望遠鏡 (JWST) 最近 公佈 ê 影像資料 ê 分析結果，就是想欲回答這个問題。伊揣著 目前為止 上遙遠 ê 天體。大部份 星系是 tī 大爆炸 了後 30 億年形成--ê，毋過嘛是有一寡星系閣較早就形成矣。插圖 內底 暗暗霧霧彼點是 JADES-GS-z14-0，伊是 宇宙誕生 拄開始 3 億年 ê 時陣，形成 ê 一个星系。用專業術語來講，這个星系是 tī 紅移 z=14.32 ê 所在，就是目前 宇宙 年歲 ê 五十分之一 ê 時陣就有矣。實際上，這張相片 內底 ê 天體攏是星系。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240624/ 影像：NASA, ESA, CSA, STScI, B. Robertson (UC Santa Cruz), B. Johnson (CfA), S. Tacchella (Cambridge), P. Cargile (CfA) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240624.html Powered by Firstory Hosting

哈伯太空望遠鏡 ùi 6 月 14 開始繼續做科學研究。伊新 ê 指向模式 翕著這張清楚 ê 捲螺仔星系 NGC 1546。這个宇宙島是 Dorado 星系群 ê 成員之一，就 tī 5000 萬光年遠 ê 所在。Ùi 咱 ê 視線方向來看，NGC 1546 ê 星系盤趨趨。Tī 伊 ê 塗粉帶頂懸，有發黃光 ê 老恆星，kah 發藍光 ê 新恆星。這張哈伯相片內底 ê 背景，是遙遠 ê 星系。哈伯太空望遠鏡 自 1990 年發射到今已經 30 外年矣，一直咧 探索宇宙。今年是伊第 34 年。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240621/ 影像：NASA, ESA, STScI, David Thilker (JHU) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240621.html Powered by Firstory Hosting

這張 巨蛇座星雲 是 James Webb 太空望遠鏡 翕--ê 特寫相片，有翕著 ùi 新誕生恆星 噴出來 ê 物質流。能量足強 ê 原恆星噴流 是 雙極--ê，是 噴 tùi 相反方向 ê 雙噴流。In ê 噴射方向 kah 吸積盤 是 互相垂直--ê。吸積盤是 踅 恆星紅嬰仔stellar infants 咧行 ê 結構。恆星紅嬰仔 是 星雲 重力崩塌，開始自轉 ê 階段。這張 NIRcam 影像內底 ê 紅光，是水素分子 kah 一酸化炭素分子 ê 輻射。這是噴射流 kah 邊仔 ê 氣體塗粉相挵 產生--ê。這是頭一擺翕著 遮爾清楚 ê 影像。Tī 巨蛇座星雲 內底 翕--著 ê 噴流，攏噴 tùi 仝一个方向去。這个結果 kah 科學家 ê 料想結果 相 siâng。毋過一直到今，Webb 影像才有法度 tùi 這款活跳 ê 少年恆星形成區 進行 較詳細 ê 探索。較光 ê 前景星，會出現 Webb 影像特別有 ê 繞射光針。照 巨蛇座星雲 估計 ê 距離 1300 光年來算，這張宇宙特寫差不多有 1 光年闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240627/ 影像：NASA, ESA, CSA, STScI, Klaus Pontoppidan (NASA-JPL), Joel Green (STScI) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240627.html Powered by Firstory Hosting

這个雲看起來 to̍h 親像一粒蚵仔，遮 ê 恆星 mā 敢若真珠仝款，毋閣 in 看起來敢若較遠 ê 款。離咱 20 萬光年遠 ê 衛星星系 小麥哲倫星雲 ê 外沿附近，有一个 5 百萬 歲 ê 星團 NGC 602。這張 予人讚嘆 ê 影像，是 哈伯太空望遠鏡 ê 可見光影像，閣疊 Chandra 太空望遠鏡 ê X 光影像 kah Spitzer 太空望遠鏡 ê 紅外線影像。咱看會著 NGC 602 去予會產生新恆星 ê 氣體塗粉殼 箍 tī 內底。美妙 ê 雲嶺 kah 予輻射掃出來 ê 外形，應該是 NGC 602 內底 ê 大質量少年恆星發出 ê 足強能量 ê 輻射 kah 衝擊波，kā 塗粉 物質食去，引起星團中心 ê 恆星形成 運動，才閣湠出去 ê。用 小麥哲倫星雲 估計 ê 距離來推算，這張影像 差不多有 200 光年闊。毋閣咱 mā 會當 tī 這个清楚 ê 彩色景色 內底，看著各種 美麗 ê 背景星系。遮 ê 背景星系 上無有幾若億光年遠，有 ê 是 比 NGC 602 閣較遠。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240702/ 影像來源：X-ray: Chandra: NASA/CXC/Univ.Potsdam/L.Oskinova et al; 可見光：Hubble: NASA/STScI; 紅外線：Spitzer: NASA/JPL-Caltech 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240702.html Powered by Firstory Hosting

彗星 13P/Olbers 會 tī 68 年後閣轉來 內太陽系，這並 袂 矛盾。這粒 哈雷型 週期彗星 會 tī 6 月 30 行到後一个近日點，就是上倚太陽彼點。伊這馬已經變做是 雙筒千里鏡 tī 北半球 暗暝 咧看 ê 一个目標矣。這張清楚 ê 13P 望遠鏡影像，是 kā 6 月 25 暗暝翕--ê 幾若張相片疊出來--ê 結果。相片有翕著這粒光爍爍 ê 彗星 ê 足濟細節，包括去予太陽風吹甲散開 ê 離子尾溜，闊幅葵扇型 ê 塗粉尾溜，kah 青色 ê 彗鬚。這張 tī 天貓座方向 ê 相片有 2 度闊，背景是一大陣 暗暗 ê 天星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240628/ 影像：Dan Bartlett 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240628.html Powered by Firstory Hosting

天頂彼條奇怪 ê 咖啡色 lī-póng 是啥物？咱咧觀測 星團 NGC 4372 ê 時陣，觀測者定定注意著附近有一條烏暗帶，伊 ê 角寸尺差不多有 3 度 長。實際上，這條是一个長 分子雲，叫做烏暗 Doodad 星雲，抑是 烏暗 Lī-póng 星雲。（Doodad 是土話，是「物件」、「毋知彼是啥」ê 意思。）相片內底 ê 烏暗 Lī-póng 星雲 就佔 tī 這个豐富多彩 ê 星場中心。伊 ê 色較深，是因為 星際塗粉 較厚，kā 可見光 散射造成--ê。上倒爿彼个 霧霧 ê 白點 是 球形星團 NGC 4372，伊正爿頂懸彼粒藍星是 胡蠅座 gamma。咱只要用較好 ê 雙筒千里鏡 看 tùi 南方 ê 胡蠅座 就會當揣著 烏暗 Lī-póng 星雲。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240625/ 影像：Martin Pugh & Rocco Sung 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240625.html Powered by Firstory Hosting

土星 ê 色是按怎來--ê？這張相片 是 Cassini 機器人太空船 tī 2005 年 飛倚到 土星環附近翕 ê 特寫相片，內底 ê 色水是比人類目睭實際上看著--ê 閣較顯目。這台太空船 tī 2004 年 到 2017 年為止是踅 土星 咧行。壯麗 ê 土星環 tī 相片內底 誠做一條 彎曲線。有一部份環是咖啡色--ê，這是 紅外光 輻射造成--ê。土星環有複雜 ê 結構，環 ê 烏影 就投影 tī 頂半爿 ê 土星。土星 ê 北半球有一部份是藍色--ê，這 kah 地球天空是藍色 ê 原因相-siâng。兩粒行星 ê 大氣層 tī 較無雲 ê 所在，分子散射藍光 ê 能力比紅光較強。毋過，咱若是看 土星大氣 看較深咧，土星雲就會變做金色--ê。目前咱 猶無清楚 是按怎土星南半球無出現仝款 ê 藍色色調。有一寡假說認為講，這是因為遐 ê 雲較懸。科學家 嘛毋知 是按怎有一寡 土星雲會是金色--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240623/ 影像來源：NASA, ESA, JPL, ISS, Cassini Imaging Team 資料處理 & 許可：Judy Schmidt 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240623.html Powered by Firstory Hosting

Kā 你 ê 3D 目鏡提來，囥 tī 土星 ê 細粒冰衛星，土衛十二 Helene 邊仔。Helene 是一粒 Trojan 衛星，就是 tī Lagrange 點踅土星咧行。這个名號了袂䆀，因為 Helene 是希臘神話內底，引起 Trojan 戰爭 ê 美女。Lagrange 點 是 2 粒大質量天體附近 ê 重力穩定點，tī 遮就是 土星 kah 伊上大粒衛星，土衛四 Dione。實際上，Helene ê 形是不規則形--ê，差不多 36 x 32 x 30 公里大。伊行 tī Dione 頭前 ê Lagrange 點。伊 ê 兄弟，土衛三十四 Polydeuces，是行 tī Dione 後壁 ê Lagrange 點。這張清楚 ê 立體相片 是 kā 2011 年 Cassini 太空船 飛倚 土星 ê 時陣翕--ê 2 張影像合成--ê。咱看會著 Helene 面對土星這半爿，頂懸有足濟隕石坑 kah 山溝地形。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240601/ 影像來源：Cassini Imaging Team, ISS, JPL, ESA, NASA 立體影像：Roberto Beltramini 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240601.html Powered by Firstory Hosting

這是舊年四月 ê 月圓，月光迵過地平線附近 ê 懸雲，投影 tī 夜空下 ê 花園。這張闊幅速翕相片 除了翕著 徛衛兵 ê Sandy，嘛翕著 足光 ê 月娘 kah 22 度 ê 冰月暈。毋過金爍爍 ê 六月月圓 嘛投影 tī 遐。這個月，月娘上圓 ê 時間是發生 tī 世界協調時間 6 月 22 1:08。這 kah 今年 ê 夏至點（世界協調時間 6 月 20 20:51）才差 28 點鐘爾爾。Tī 這个時間點，太陽才拄行到赤緯 上北彼點。有人 kā 六月 ê 月圓叫做「草莓月」，伊行到 赤緯 上南彼點，這會予月娘 tī 暗暝天頂產生 直徑 22 度 ê 月暈。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240620/ 影像：Marcella Giulia Pace 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240620.html Powered by Firstory Hosting

Lynds 暗星雲 1251 (LDN 1251) 內底當咧形成恆星。LDN 1251 嘛叫做臭酸魚星雲。這个厚塗粉 ê 分子雲離咱有 1000 光年遠，就浮佇咱 ê 銀河盤面頂。伊是 仙王座爆發區 內底，暗星雲複合體 ê 一部份。這个閘光 ê 星際雲 佇 規个電磁波頻譜 ê 天文探索 展示出 ùi 新恆星發出 ê 高能震波佮大角度噴流。這嘛包括 藏佇影像內底 去予散射、發紅光 ê Herbig-Haro 天體。 遙遠 ê 背景星系嘛藏佇這幅影像內底，差不多是佇這个湠開 ê 厚塗粉星雲後壁。這張迷人 ê 影像 佇天頂有超過四粒月娘 ê 闊度。照 LDN 1251 ê 距離來推算，這差不多有 35 光年闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240622/ 影像：Long Xin 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240622.html Powered by Firstory Hosting

RCW 是 Rodgers、Campbell、kah Whiteoak 三个人 tī 1960 年編 ê 目錄。RCW 85 是一个南天 ê 發射區，就 tī 足光 ê 半人馬座 Alpha kah Beta 之間。這个霧霧暗暗 ê 星際雲，是 leh 發光 ê 水素氣體 kah 塗粉 組成--ê，差不多 tī 5000 光年遠 ê 所在。這幅圖是 kā 狹頻 kah 闊頻影像資料，攏總 28 點鐘 ê 感光時間 疊出來 ê 合成影像。Tī 這个宇宙景色 內底，咱看會著 RCW 85 有清楚 ê 外形。這个星雲是一个 恆星工場，就是一个會生出新恆星 ê 氣體塗粉雲。伊去予 高能恆星風 kah 輻射 雕出一个戲劇性 ê 形態，才會去予人 kā 叫做魔鬼塔。這幅 RCW 85 ê 望遠鏡景色有偌大？若是照科學家估計 ê 距離來算，應該有 100 光年遐爾大。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240614/ 影像：Martin Pugh 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240614.html Powered by Firstory Hosting

地球 ê 花枝無遮爾大隻啦！這个星雲是一隻神祕 ê 花枝形宇宙雲，伊 tī 天頂足暗、嘛足大–ê。這幅圖 是 kā 30 點鐘久 ê 狹頻影像資料組合出來–ê，大細差不多是 3 粒 月娘 遐爾闊，就 tī 皇家星座 仙王座 遐。大花枝星雲是法國 ê 天文攝影師 Nicolas Outters tī 2011 年發現–ê。這是 伊發現 ê 第四个天體，所以才會號做 Ou4。伊 ê 雙極結構 有夠清楚，是雙電離酸素原子 發出 ê 青藍色 發射線。因為大花枝星雲去予紅色 ê 水素 發射線區 包 tī 內底，所以伊真正 ê 距離 kah 特性才會 遮爾歹量。最近 ê 研究 認為講，Ou4 應該是 tī 發射星雲 Sh2-129 內底，差不多是 2300 光年遠。照這个推論，這隻宇宙大花枝可能是一个壯觀 ê 噴流，是 ùi 星雲中心彼个高溫、大質量 ê 三星系統 HR8119 噴出來–ê。若真正是按呢，這隻實在有夠大隻 ê 花枝星雲，應該是比 50 光年 閣較長。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240617/ 影像：Alex Linde 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240617.html Powered by Firstory Hosting

恆星若是 kah 烏洞行傷倚，會發生啥物代誌？烏洞 會 kā 伊拆食落腹，毋過實際上會按怎食？其實這毋是因為烏洞 ê 引力傷懸，是因為 引力差 kā 恆星 解體矣。這支動畫 有解說這个解體過程。代先你會看著一粒恆星接近烏洞。紲落來，你會看著伊踅烏洞 ê 速度愈來愈緊，tī 伊愈來愈倚烏洞 ê 時陣，恆星 ê 外層大氣 嘛去予搝開。恆星 ê 大氣，大部份攏湠去深空內底，毋過猶是有一寡仔繼續踅烏洞咧行，形成一塊 吸積盤。這个 動畫 ê 第二部份，是𤆬你 到吸積盤附近看烏洞。嘛𤆬你看 重力透鏡 造成 奇怪 ê 視覺效果。你甚至會當看著較遠彼爿 ê 吸積盤。落尾，你會當看著烏洞自轉軸方向 噴出來 ê 其中一條 噴射流。理論 模型 表示講，這寡噴射流毋但會擲高能氣體出來，嘛會產生高能 中微子。其中一款中微子，最近可能捌 tī 地球揣著。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240616/ 影像：DESY, Science Communication Lab 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240616.html Powered by Firstory Hosting

這張有 kā 太陽影像調較清楚 ê 彩色相片，是 5 月 15 紀錄 太陽色球層 ê 水素原子發射線 ê 合成影像。時間愈倚 第 25 个太陽週期 上強 ê 時期，太陽就愈活跳，規个太陽表面 嘛攏是 太陽活跳區 kah 拗來彎去、敢若蛇咧趖 ê 太陽絲。浮 tī 太陽活跳區強磁場頂懸--ê，是電漿絲。In 出現 tī 太陽邊緣 ê 部份會較光，就是咱咧講 ê 日珥。太陽邊緣 4 點鐘方向 kah 9 點鐘方向附近出現 ê 大型日珥，是 彼工 有 2 个足強 ê X 級太陽爍光 出現了後產生 ê 爍光尾仔環。實際上，4 點鐘方向 ê 日珥 kah 才拄 ùi 太陽邊緣 踅過來--ê 夭壽大 ê 太陽活跳區 AR 3664 有關係。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240615/ 影像：Steen Søndergaard 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240615.html Powered by Firstory Hosting

咱來看 Juno 太空船飛過木星 ê 特寫。NASA ê 機器人太空船 Juno 這馬當咧踅太陽系內底上大粒 ê 行星，伊會用一個月 ê 時間踅一个 搝長 ê 長株圓軌道 行。這支影片是 近木軌道 16，這是 Juno 太空船 自 2016 年中飛到木星系統了後 ê 第 16 擺近距離飛過木星 ê 任務。逐擺 ê 近距離飛過 木星雲頂懸 ê 任務攏 有小可仔無仝。這支 加強色彩 ê 影片 是 kā 21 張 JunoCam 翕 ê 靜態影像，用數位技術合成，產生 125 倍 ê 縮時攝影影片。影片 ùi 木星出現開始，這是 Juno 太空船 ùi 北方 飛倚 到木星 ê 影像。等 Juno 飛倚到 木星雲頂 3500 公里懸 ê 時陣，太空船就會當翕著這粒大粒行星 足濟細節矣。Juno 飛過踅木星一輾 ê 光區 kah 暗帶，閣有一大堆 tī 木星表面 捲踅 ê 圓形風暴，in 大部份攏比 地球 ê 風颱 較大。Juno 離開 ê 時陣，咱會當看著顯目 ê 海豬仔形雲。經過 近木點 了後，木星 會退到較遠 ê 所在，這馬看著 ê 是出現 tī 木星南方無四常 ê 雲。為著欲提著需要 ê 科學資料，Juno 會飛到 木星 表面，近甲伊 ê 儀器會直接坦 tī 足強 ê 輻射 下底。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240421/ 影像：NASA, Juno, SwRI, MSSS, Gerald Eichstadt 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240421.html Powered by Firstory Hosting

大型 ê 美麗 捲螺仔星系 Messier 66 kah 咱 ê 距離才 3500 萬光年爾爾。這个 華麗 ê 島宇宙 才 10 萬光年大，kah 咱銀河差不多大。這張 Hubble 太空望遠鏡 ê 特寫相片，翕 ê 是星系核心周邊 3 萬光年闊 ê 範圍。Ùi 咱 ê 視線方向來看，星系盤 ê 角度是誠趨。明亮 ê 核心內底可能有一粒超大質量烏洞。捲螺仔手骨頂懸 有閘光 ê 塗粉帶、藍色 ê 少年星團、kah 粉紅仔色 ê 恆星形成區。Messier 66 嘛叫做 NGC 3627，是 獅仔座三生仔 3 个交互作用星系內底，上光 ê 彼个。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240613/ 影像：NASA, ESA, Hubble Heritage (STScI/AURA)-ESA/Hubble Collaboration 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240613.html Powered by Firstory Hosting

天頂是毋是發生龍族 ê 戰爭？雖罔講看起來敢若是按呢，毋過其實這寡龍是 氣體 kah 塗粉 ê 薄雲 產生 ê 幻影。這个發光 ê 雲是 tī 4000 光年 遠 ê 發射星雲 NGC 6188。伊 tī 南天 ê 天壇座 大型分子雲邊緣，毋過 tī 可見光波段是看袂著。藏 tī 天壇座 OB1 星協 內底 ê 大質量少年 恆星，才拄 tī 幾若百萬年前生出來。In ê 恆星風 kah 強烈 ê 紫外光輻射，雕出 這个烏暗形體，嘛提供能量予星雲發光。較新 ê 恆星 形成，可能是受著 前一代大質量 恆星 爆炸 抑是 恆星風 ê 推捒 kah 壓縮 分子氣體 引起--ê。這張 予人印象足深 ê 詳細 影像 tī 天頂 ê 角寸尺有 2 度闊，差不多是 4 粒月娘 ê 大細。照 NGC 6188 進前估計 ê 距離來算，這差不多有 150 光年大。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240619/ 影像：Carlos Taylor 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240619.html Powered by Firstory Hosting

緊來看喔！毋知你敢捌看過這款暴雷？這張相片是頂禮拜 tī 中國 kah 不丹 交界 ê 喜馬拉雅山脈 方向翕著--ê，是發生 tī 大氣層內底 ê 暴雷 kah 巨大噴流。這張合成影像內底有 4 條長長 ê 噴流，發生 ê 時間互相差幾若分鐘爾爾。巨大噴流 是這世紀才開始有紀錄--ê，這是一款爍爁放電現象，出現 tī 一寡 暴雷 kah 伊頂懸 ê 地球 電離層 之間。伊是一款特別 ê 爍爁，kah 一般 ê 雲對雲爍爁、雲對地爍爁 是差足濟--ê。相片底部 ê 巨大噴流，較成是 雲對天 雷殛，咱 kā 叫做 藍色噴流。頂懸紅色 ê 部份，較成是 頂層大氣 ê 放電現象，咱 kā 叫做 紅色精靈。巨大噴流 ê 機制 kah 引起 ê 原因，到今猶咧研究。目前咱已經知影講，因為這款噴流會迵過地球無仝層大氣，所以會當減少大氣層之間電荷無平均 ê 情形。你若是想欲看著巨大噴流，會使踮一个離暴雷較遠、視野無去予閘著 ê 所在，較揣會著。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240618/ 影像：Li Xuanhua 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240618.html Powered by Firstory Hosting

這是歷史上頭一擺。上無嘛是這位攝影師 頭一擺 tī in 故鄉 ê 山頂翕著--ê 極光。這个極光是 偌爾壯觀！遮是 波蘭 Karkonosze 山脈，一般講來，遮 tùi 北極來講傷倚南爿矣，應該看袂著極光。毋過 tī 5 月 10 號 kah 11 號這兩个 媠甲毋是款 ê 暗暝，出現 茄仔色 ê 光 kah 青色 ê 光，kā 夜空照甲足光--ê。這个媠甲予人會觸舌 ê 夜空，嘛出現 tī 足濟 地球 中緯度 ê 所在。這張相片 是 kā 6 張 chhāi 直 ê 感光影像 疊做伙 ê 合成影像，是 tī 極光出現上強 ê 時陣翕--ê。正爿有幾若棟敢若是未來 ê 建築，其實是 Karkonosze 山脈 上懸山 山頂 ê 氣象站。茄仔色 ê 光 是 太陽激發 ê 高能 電子 去挵著 地球大氣 內底 ê 窒素 分子引起--ê。咱 ê 日頭 會 tī 未來 2 年內，來到伊 表面活動 上強 ê 時期。照科學家 ê 估計，時到，極光 會比這馬閣較濟，毋過大部份攏會出現 tī 地球南北極 附近 ê 地區。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240612/ 影像：Daniel Koszela 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240612.html Powered by Firstory Hosting

是按怎 心宿二 kah 蛇夫座 Rho 附近 ê 天區是遮爾多彩，閣遮爾 厚塗粉？這寡色是 天星 kah 一寡過程相濫 ê 結果。藍色 ê 反射星雲，是較幼 ê 塗粉 去予恆星光照著產生--ê。紅色 ê 發射星雲，是氣體雲內底 ê 原子去予 紫外光 激發 產生--ê。有後壁光 ê 塗粉 雲，是因為伊 kā 後壁 ê 恆星光閘牢矣，所以 看起來才會是烏--ê。相片正爿頂懸是 心宿二，伊是一粒 紅超巨星，嘛是夜空中 足光 ê 恆星。蛇夫座 Rho 恆星系統就 tī 相片倒爿 ê 藍色 反射星雲 內底。另外一个反射星雲 IC 4605 就 tī 相片中央下底小可倚正爿遐。這寡星雲 ê 色光是比 人類 ê 目睭看著--ê 閣較 多彩，in 發出 ê 光是迒過規个 電磁波頻譜。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20240611/ 影像：Craig Stocks 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap240611.html Powered by Firstory Hosting