Middagvervolgverhaal

Johan skarrel vir sy eie vryheid, terwyl Sumi wil slange vang oor Fortuin se verraad. Fortuin en Bobby maak nuwe planne.

Terug in Suid-Afrika konfronteer Johan vir Fortuin en verduidelik die ooreenkoms aan hom. Fortuin aanvaar dit oënskynlik langtand, maar kom met ‘n onverwagte teenaanval.

Ina en Wynand slaap oor op die renosterplaas, maar kry in hulle kamers geskenke, sommige met ‘n angel in die stert.

Wynand en Ina styg op vanaf George se vliegveld en Ina stem in die lug in tot ‘n verhouding met Wynand. Dit word egter deur meer ore gehoor as vir wie dit bedoel is.

Die stropers op grondvlak verneem dat Johan op Sumi se wildsplaas gekuier het en is totaal verward omdat hulle nie weet of Johan vir, of op Sumi spioeneer nie.

Johan keer terug na sy nuwe huis in L’Agulhas en die verrassings hou nie op nie. Die reaksie van Sersant Fortuin is egter nie ‘n verrassing nie.

‘n Vinnige, onbeplande besoek deur Johan en Christien aan die wildsplaas loop uit op ‘n onaangename verrassing en groot verleentheid.

Johan en Christien besoek George en ontmoet onverwags ‘n vermeende belhamel van die sindikaat van aangesig tot aangesig.

Johan bespreek ‘n moontlike besoek aan Sumi se renosterplaas met Christien, en reguit woorde word gewissel as moontlike liefdesverhoudings binne die span ter sprake kom.

Sumi spog met nuwe nuus oor sy renosterplaas en nooi Johan en sy vriendin om die plaas te besoek. ‘n Aangeklamde Bobby beskuldig Johan van verraad.

Wynand en Ina beweeg nader aan Big Joe se netwerk en Sumi skakel Johan oor ‘n onthulling.

Wynand en Ina slaan ‘n slag in ‘n selfoonwinkel, maar die stropers begin agterkom dat iemand in hulle slaai krap.

Misverstande onder spanlede verongeluk byna die hele ondersoek, maar ‘n agtervolging per pad lei die span na nuwe informasie.

Ina moet keer as Bobby haar toenadering verkeerd vertolk. Johan soek toenadering by Christien, maar hy praat sy mond verby.

Bobby konfronteer Johan omdat hy ‘n spioen is en dit nooit genoem het nie. Ina besoek weer vir Bobby op ‘n gewaagde en gevaarlike operasie.

Johan wil die spioenasie voortsit om die belhamels te identifiseer en Wynand kry ‘n sagte, maar besliste hou op die neus toe hy romanties wil raak.

Johan vra vir Ina om haar vroulike vernuf in te span om op Bobby te spioeneer. Christien begin meer bekendes verdink en stel ‘n lokval vir hulle.

Die span bekom fotografiese bewyse van die stropers se aktiwiteite, maar Johan soek die belhamels van die sindikaat.

Johan en Christien soek in die nasionale park na die stropers se voertuie en maak ‘n merkwaardige vonds. Sumi vertel vir Johan van sy planne vir ‘n renosterplaas.

Wynand swem weer die see in om te kyk wat onder die water aangaan by die Tarantula se omdraaipunt, maar die stropers daag onverwags op.

Die span volg die stropers te voet en per motor tot binne in die nasionale park. Hulle besluit om die stropers seer te maak en dan te kyk wat die reaksie is.

Die operasie teen die stropers neem ‘n onverwagse wending. Die vraag wat skielik van die perlemoen geword het, en ‘n verdere versoek van Sumi, hou Johan aan die raai.

Die spioenasiespan sien ongelooflike tonele voor hulle afspeel in die donker op Langezandt se strand. Christien rapporteer dit aan die polisie en stel optrede voor om die stropers vas te trek.

Wynand swem in die donker na die Tarantula buite die hawe, terwyl die span ‘n duin bestyg om met nagsigtoerusting te kyk of die perlemoen snags aan land gebring word.

Die stropers verander hulle vaarpatroon en die twee jongmense doen nagtelike waarneming om uit te vind waarheen die perlemoen verdwyn. Johan gaan Kaap toe en bring spioenasie-toerusting terug.

Johan is woedend oor sersant Fortuin se insinuasies en besluit om self tot die ondersoek na stropery toe te tree. Hy maak vriende met Bobby en begin voorbereidings tref om die stropers vas te trek.

Wynand raak agterdogtig oor Johan se Sjinese vriende en sersant Fortuin is teleurgesteld in Johan se samewerking. Fortuin impliseer dat Johan besig is met spioenasie en dat hy betrokke is by smokkelhandel en perlemoenstropery.

Johan weier weer ‘n aanbod van Fortuin en raak moedeloos omdat almal van hom verwag om weer ‘n spioen te word, terwyl hy juis probeer om te kom rus by die see.

Johan laat ‘n geskenk deur sy vingers glip. Daar is ‘n Sjinese konneksie by die geskenk, maar Sumi ontken betrokkenheid. Christien is baie teleurgesteld in Johan en Wynand, die mans in haar lewe.

Wynand misgis hom met Ina se fiksheid. Sersant Fortuin probeer Johan intrek by dinge waarby hy nie betrokke wil wees nie. Johan ontvang ‘n groot geskenk wat hy nie verwag nie.

‘n Sjinese vriend, Sumi, kom kuier vir Johan op L’Agulhas en maak ‘n aanbod wat hy amper nie kan weier nie. Sersant Fortuin is op Johan se spoor en Wynand begewe hom op ‘n terrein waar Ina hom ver voor is.

Johan weier om weer by spioenasie betrokke te raak, maar hy kry ook ‘n oproep van ‘n ou Sjinese vriend en agent. Wanneer Wynand wil vrede maak met Bobby, kry hy ‘n onverwagte reaksie, en as hy toenadering soek tot Ina, ‘n koue skouer.

Christien is teleurgesteld oor die trae reaksie van die owerhede op die stropery en sy en twee vriende probeer Johan ompraat om te help om die smokkelaars agter tralies te kry.

‘n Mooi meisie verskyn op die toneel en maak Wynand verbouereerd. Hy kry boonop ‘n dreigement van stroper-skipper Bobby Jackson.

‘n Afgetrede spioen en voorlmalige vlootduiker konfronteer perlemoenstropers op see met die risiko van geweld en onheilspellende gevolge.