Əkinçi

Turizm dayanıqlı modellər əsasında qurulmadıqda, onun törətdiyi zərər kifayət qədər ciddi olur. Turizm və hotel idarəçiliyi üzrə mütəxəssis Vəfa Kərəmova bildirir ki, dayanıqlı modellər turizm fəaliyyəti zamanı gəlirlərin yalnız böyük şirkətlərə deyil, yerli əhaliyə də çatmasını nəzərdə tutur. Qonağımız əlavə edir ki, hazırda Azərbaycanın unikal imkanı var – ölkə iqtisadi baxımdan səmərəli, eyni zamanda mədəni və ekoloji cəhətdən dayanıqlı bir turizm modeli qura bilər.

Fotoqraf Əli Rza ənənəvi köç həyatını sənədləşdirmək üçün çoban icmalarına qoşularaq piyada şəkildə 200 kilometrdən çox məsafə qət edib. Bu işdə o, insan faktoruna - nəsildən-nəslə ötürülən biliklərə, fiziki çətinliklərə və sosial reallıqlara fokuslanır. Əli Rza öz obyektivindən yalnız köç həyatının mədəni və tarixi qatlarını deyil, onun davam edən sosial təsirini də göstərir. Burada uşaqların təhsilinin pozulması və ailələrin parçalanmasından doğan emosional təsirlər əsas mövzulardan biridir.

Kitab və filmlərdən fərqli olaraq, video oyunlar oyunçulara sadəcə müşahidəçi olmaq deyil, həmin dünyaların içində yaşamaq və qərarlar qəbul etmək imkanı verir. “Dynamic Box Studio”nun həmtəsisçisi Şahin Əliyevin sözlərinə görə, məhz bu interaktivlik video oyunları digər media növlərindən tamamilə fərqləndirir. Qonağımız bildirir ki, video oyunlar texnologiya, sənət və hekayəçilik arasında körpü rolunu oynayır. Onunla söhbətimizdə video oyunların necə yaradıldığını və istifadəyə verilməzdən əvvəl hansı mərhələlərdən keçdiyini müzakirə etdik.

Yeni müsahibəmizdə şirkətlərin həyata keçirdiyi xeyriyyə təşəbbüsləri və korporativ sosial məsuliyyət layihələri haqqında danışmışıq. Marketinq mütəxəssisi Aydan Nəbiyeva bizimlə söhbətində müxtəlif özəl qurumların bu cür təşəbbüsləri həyata keçirərkən fəaliyyətin mahiyyətindən daha çox şirkət imicinə fokuslandığını qeyd edir və bu cür fəaliyyətlərin işıqlandırılmasında qüsurlara yol verildiyini vurğulayır.

Yeni çəkilişimizdə tədqiqatçı Orxan Zakirov son 15 il ərzində həm dünyada, həm də Azərbaycanda elektrikli avtomobillərə artan marağı təhlil edib. Qonağımız Azərbaycanda bu tendensiyaya təsir göstərən dövlət siyasətləri, müxtəlif ölkələrdə həyata keçirilən yaşıl təşəbbüslər, o cümlədən ABŞ-ın Tesla şirkətinin və Çin markalarının nailiyyətləri barədə danışıb. Çıxışda, həmçinin, elektrikli avtomobillərlə yanaşı, bazarda hibrid və plagin-hibrid modellərə artan tələbat da vurğulanıb.

Hər keçən gün Süni Zəka vasitəsilə həyata keçirilən telefon fırıldaqçılığı haqqında eşidirik. Heç kim yeni texnologiyalardan məharətlə istifadə edən bədniyyətlilərdən sığortalanmayıb. Əhalinin həssas qruplarından tutmuş nüfuzlu şəxslərə qədər hər kəs bu cür fırıldaqçıların qurbanı ola bilər. İnsan-robot ünsiyyəti üzrə mütəxəssis Maral Qurbanzadə bu cür zənglərin tələsinə düşməmək üçün görülməli olan tədbirləri izah edir.

Memar Dilqam İsmayılov şəhər kimliyinin onun tarixi və memarlıq irsi ilə formalaşdığını deyir və əlavə edir ki, binalar sadəcə tikililər deyil, eyni zamanda tarixi, xatirələri və mədəni davamlılığı özündə daşıyan abidələrdir. Qonağımızın sözlərinə görə, Bakı, həm Şərq, həm də Qərb memarlıq üslublarının birləşdiyi bir şəhər olaraq, digər şəhərləri təqlid etməklə öz kimliyini itirmək təhlükəsi ilə üz-üzədir. İsmayılov düşünür ki, şəhərin tarixi mahiyyətinin bərpasında ictimaiyyətin və yaradıcı sənayelərin iştirakı, eləcə də özəl investisiyalar mühüm rol oynamalıdır.

Dayanıqlı inkişaf bugünkü nəslin ehtiyaclarını ödəməklə gələcək nəsillərin imkanlarını təhlükəyə atmamaq deməkdir. Sustainera Solutions şirkətinin təsisçisi İlkin Hacıyevin sözlərinə görə, ətraf mühitin çirklənməsində əsas iştirakçılar şirkətlər olsa da, fərdlər də gündəlik istehlak seçimləri ilə bu prosesdə mühüm rol oynayırlar. Qonağımız məsuliyyətli istehlakçılığı, tullantıların azaldılmasını və ekoloji təsirləri nəzərə alaraq şüurlu qərarlar qəbul etməyi tövsiyə edir.

Yeni müsahibəmizdə tədqiqatçı Tamella Abdıyeva ilə həbsxana təhsili haqqında danışdıq. O bildirir ki, Azərbaycanda həbsxanalarda ümumi və peşə təhsilini nəzərdə tutsa da, praktikada ümumi təhsil yalnız yeniyetmə məhkumlar üçün əlçatandır, böyüklər üçün isə bu imkanlar təmin edilmir. Abdıyeva həbsxanada olan yetkin məhkumların təhsilə çıxışının vacibliyini vurğulayır. O qeyd edir ki, bir çox məhkum həbsə düşərkən savadsız olur və oradan heç bir əsas bilik əldə etmədən azadlığa çıxır, bu da onların yeni həyata uyğunlaşmasını çətinləşdirir.

Qiymətləndirmələrə görə, iqlim dəyişikliyinin təsirləri nəticəsində regionumuzda su ehtiyatlarının 15-30% azalacağı proqnoz edilir. Bu vəziyyətin gələcəyimiz üçün ciddi bir təhlükə yaratdığını bildirən ətraf mühit üzrə ekspert Rövşən Abbasov əlavə edir ki, əhali artımı, həyat tərzindəki dəyişikliklər və ərzağa olan tələbatın artması su ehtiyatlarına daha çox təzyiq göstərəcək. Qonağımız vurğulayır ki, bu problemlərin həlli üçün daha dayanıqlı bir strategiya tələb olunur.

Bu dəfə uşaqlar və kitablar mövzusuna toxunmuşuq. “Roller Bird” nəşriyyatının təsisçisi Əfsanə Yusif ilə söhbətimizdə kitabların uşaqlarda özünü dərk etmə və maraq hissini formalaşdırmadakı əhəmiyyəti haqda danışdıq. Qonağımız bildirir ki, kitablar sadəcə təhsil vasitəsi deyil, həm də dünyanı və insanın özünü kəşf etməsi üçün vacib bir alətdir. O, qeyd edir ki, uşaqlarda kitaba maraq yaratmaq əvəzinə, onların təbii marağını qorumağa diqqət yetirməliyik.

Keyfiyyətli öyrənmənin təmin edilməsində müəllimlərin bilik və təcrübəsi ilə yanaşı, onların bu işə olan səmimi həvəsi və göstərdikləri fədakarlıq da vacib rol oynayır. Təhsil mütəxəssisi Aynurə Abdullayeva bildirir ki, müəllimlik peşəsinə marağı olan, özünü uşaqların inkişafına həsr etmək istəyən daha çox gənc istedadı bu işə cəlb etmək lazımdır. Lakin müəllimlik peşəsinin hazırkı nüfuzu və təhsildə mövcud problemlər bu məqsədin reallaşmasına mane olur. Daha ətraflı yeni müsahibəmizdə.

Karnegi Beynəlxalq Sülh Fondunun qeyri-rezident alimi Zaur Şiriyev müasir millət anlayışının çox vaxt XVI-XVIII əsrlərdə millət-dövlətlərinin yaranması ilə, xüsusilə İngiltərə, Fransa və ABŞ-dakı tarixi proseslərlə əlaqələndirildiyini bildirir. Qonağımız qeyd edir ki, milli kimlik kollektiv aidiyyət formasıdır və onu ortaq dil, mədəniyyət və siyasi proseslərdə iştirak müəyyən edir. Lakin onun formalaşmasında əsas amil tarixən ərazi bağlılığı – müəyyən bir torpaqla əlaqə olmuşdur. Bu haqda daha ətraflı yeni müsahibəmizdə.

ChatGPT 2022-ci ildən bəri gündəlik həyata sürətlə inteqrasiya olunub və məzmunun strukturlaşdırılması, eləcə də tədqiqat proseslərinin sürətləndirilməsi üçün geniş istifadə edilən bir alətə çevrilib. Jurnalist Pəri Abbaslı ilə bu alətin media sahəsinə təsiri və onun jurnalistləri əvəzləyə biləcəyi ilə bağlı narahatlıqları müzakirə etdik. Qonağımız süni intellektin bir təhlükə kimi deyil, bir vasitə kimi görülməli olduğunu vurğulayır, eyni zamanda bu alətlərin istifadəsi zamanı diqqətli olmağı tövsiyə edir.

Dram dərsləri dünyanın bir çox inkişaf etmiş ölkələrində ictimai təhsil proqramının vacib bir hissəsidir. Birləşmiş Krallıq, Kanada, ABŞ, Fransa, Avstraliya, Finlandiya və digər ölkələrdə məktəblərdə tədris edilən dram dərsləri şagirdlərin istedadlarını tətbiq etməsi ilə yanaşı, onların tənqidi düşüncə, özünəinam və sosial bacarıqlarının inkişafına töhfə verir. Yeni videomuzda teatr rejissoru və Ritual Mobil Teatr Laboratoriyasının təsisçisi Aynur Zərrintacla dram dərslərinin məktəblərdə tədrisinin əhəmiyyəti haqqında danışmışıq.

Qonağımız, qrafik dizayner və tədqiqatçı Rəsul Həsən bildirir ki, çoxları dizaynı sadəcə estetika ilə əlaqələndirir, lakin dizaynın funksionallıq tərəfi tez-tez unudulur. Onun fikrincə, Azərbaycanda ictimai məkanlar vizual xaos və qeyri-funksionallıq səbəbindən insanların rifahına mənfi təsir göstərir. Yeni videomuzda dizayn təhsilindəki çatışmazlıqlar, ölkədə yaradıcı rəqabətin və yeni ideyaların inkişafına maneə yaradan mühit, eləcə də azərbaycanlı dizaynerlərin özünəinam çatışmazlığı haqqında danışmışıq.

Su böhranı dünyanın müxtəlif yerlərində icmalara və iqtisadiyyatlara ciddi təhlükələr yaradır. Lakin bu böhranın səbəblərinə baxdıqda, əksər hallarda problemin suyun yoxluğu deyil, su idarəetməsinin düzgün aparılmaması olduğu görünür. Növbəti qonağımız Şahanə Bilalova su idarəçiliyi üzrə tədqiqatçıdır. Onunla həm iqlim dəyişikliyi, həm də kənd təsərrüfatında istifadə olunan suya tələbatın artması nəticəsində yaranan su böhranının necə düzgün idarə olunması haqqında danışmışıq.

Yeni videomuzda qonağımız, nəqliyyat eksperti Rauf Ağamirzəyev Bakının şəhər mobilliyindəki irəliləyişlərdən, o cümlədən rəqəmsal transformasiya, dayanıqlı nəqliyyat və infrastruktur təkmilləşdirmələrinin əhəmiyyətindən danışıb. Qonağımız avtomobil mərkəzli siyasətdən səmərəli yol hərəkətinin idarə olunmasına keçidin vacibliyini vurğulayaraq, bu çərçivədə ayrılmış avtobus zolaqları, velosiped infrastrukturunun inkişafı və elektrobusların istismara verilməsini qeyd edib.

Yəqin ki, bir çoxunuz toksik iş mühitində çalışmağın nə demək olduğunu bilirsiniz. Müxtəlif araşdırmalara görə, işçilərin işdən çıxmasının və ya başqa iş axtarmasının əsas səbəblərindən biri qeyri-sağlam korporativ mədəniyyətdir. İnsan resursları mütəxəssisi Səbinə Qulamzadə müsbət və sağlam iş mədəniyyətinin yaradılmasının bu səbəbdən nə qədər vacib olduğunu deyir. Onunla toksik iş mühitinin səbəbləri və sağlam iş mühitinin qurulması üçün görülməli olan tədbirlər barədə danışmışıq.

“İnsan yönümlü şəhərlər” təşəbbüsünün təsisçisi Anar Əliyevlə Bakının insanı mərkəzdə olduğu şəhərə çevrilməsi üçün atılmalı olan addımlar barədə danışdıq. Avtomobil sahiblərinin çoxuna xoş səslənməsə də, insan mərkəzli şəhər modelində avtomobillər əhəmiyyət baxımından piyada, velosipedçi və ictimai nəqliyyatdan sonra gəlir. Qonağımız COP29 ərəfəsində görülən işlərin yaxşı bir başlanğıc olduğunu qeyd etsə də, növbəti illərdə bu işləri daha iddialı şəkildə davam etdirməyi təklif edir.

Azərbaycan turizm sənayesinin hazırkı durumu necədir? Bələdçi Qanı Nəsirov verdiyi müsahibədə pandemiyadan sonra turizm sənayesinin üzləşdiyi çətinliklərdən, Azərbaycan üçün ənənəvi və qeyri-ənənəvi turizm bazarlarından, ölkədə keçirilən tədbirlərin turizmə təsirindən danışıb. O, mövcud nailiyyətlərə baxmayaraq, keyfiyyət üzərində işlərin görülməsinin vacibliyini də vurğulayıb.

Yeni videomuzda yazıçı Qismət Rüstəmovla müasir dünyada rasional düşüncəyə, intellektual müzakirələrə və elmi təfəkkürə olan inamın azalması mövzusunda söhbət etdik. Bu tendensiyanın mistik inanclara, konspirasiya nəzəriyyələrinə və psevdointellektual baxışlara olan marağın artması ilə müşayiət olunduğunu vurğulayan yazıçı, çıxışında internet və sosial şəbəkələrin yüksəlişinin media mühitinə necə təsir etdiyindən bəhs etdi. Qonağımız, eyni zamanda, məlumat istehlakçısı kimi məsuliyyətimizin nədən ibarət olduğunu da qeyd etdi.

Yeni müsahibəmiz qlobal müstəvidə ifrat sağ hərəkatların yüksəlişi mövzusundadır. Beynəlxalq seçki eksperti Rəşad Şirin bildirir ki, ifrat sağın populist ritorikası tez-tez liberal demokratiyanın legitimliyini sual altına qoyur. Bu hərəkatlar iddia edir ki, ənənəvi siyasi sistemlər immiqrasiya, iqtisadi çətinliklər və mədəni mübahisələr kimi problemləri həll etməkdə acizdir. Qonağımız əlavə edir ki, texnokratik hökumətlərlə əhali arasındakı əlaqənin zəifləməsi demokratik institutlara olan etimadsızlığı daha da artırır.

İş müsahibələrində qadınlara və kişilərə verilən suallar arasında fərqlər haqqında yəqin ki, eşitmisiniz. Xüsusən də qadın namizədin evlilik statusu, uşaqlarının olub-olmaması və ya ana olmağı planlaşdırıb-planşdırmaması kimi mövzularla bağlı. İşəgötürən bu suallara ümid etdiyi cavabları eşitməyəndə qadın namizədin seçilmə şansları azalır, işə götürüldüyü halda isə karyera irəliləyişi imkanları məhdudlaşdrlır. Bu cür suallar və yanaşmalar qanuna zidd olsa da, təəssüf ki, tez-tez rast gəlinir. İş müsahibələrində və iş mühitində cinsi ayrı-seçkilik haqda daha ətraflı hüquqşünas İnara Camal ilə müsahibəmizdə.

Yeni müsahibəmizdə Azərbaycan təhsil sisteminin qarşısında duran vəzifələr, tələbələrin inkişafına və həyata hazır olmalarına necə kömək edə biləcəyindən danışdıq. Təhsil eksperti Yalçın İslamzadə bizimlə söhbətində son beynəlxalq testdə göstərilən zəif nəticələr, kurikulumların təkmilləşdirilməsi, təhsildə valideynlərin rolu, şagirdlərin üzləşdiyi emosional çətinliklər və digər məqamlara toxundu.

Ailələrində ilk dəfə universitet təcrübəsi yaşayan gənclər digər tələbələrdən fərqlənirlər. Ali təhsil tədqiqatçısı Abbas Abbasov deyir ki, əksər hallarda ilk nəsil tələbələr “sosial kapitala” malik deyillər və bu, onlara həm universitetdə, həm də gələcək həyatlarında maneələr yaradır. Qonağımız ilk nəsil tələbələrin nə üçün dəstəyə ehtiyac duyduğu və bu dəstəyin cəmiyyət üçün faydaları haqda danışır.

Dünyanın müxtəlif yerlərində qohum evliliyinə münasibət fərqlidir. Bir çox coğrafiyalarda ortaq nənə və babaları olan şəxslər arasında nikah kifayət qədər yayılmış haldır. Azərbaycanda ümumi nikahların təxminən 4-5 faizi qohumlar arasında olduğu təxmin edilir. Qadın hüquqları üzrə hüquqşünas Vəfa Rüstəmlə uşaqlarda irsi xəstəlik hallarını artıran bu cür nikahların səbəbləri və məhdudlaşdırılması üçün görülən tədbirləri müzakirə etdik. Qonağımız deyir ki, müvafiq qanunun qəbul edilməsi məntiqli səslənsə də, belə tədbirlərin mənfi təsirləri də ola bilər. “Qohumlar arasında nikah” mövzusunda videomuzu kanalımızda izləyə bilərsiniz.

Dezinformasiya yeni şey deyil. Lakin sosial media və müasir texnologiyalar bu cür xəbərlərin daha geniş yayılmasına təsir edib. Bizimlə söhbət edən media mütəxəssisi Lalə Kişiyeva deyir ki, dezinformasiya bir-birimizə qarşı inanmsızlıq, institutlara etibarsızlıq və geniş apatiyaya səbəb ola bilər. Qonağımız dezinformasiyanın siyasi manipulyasiya və maliyyə qazancı kimi məqsədlərini qeyd edir və əlavə edir ki, dezinformasiyanın yayılmasında təqsiri tamamilə sosial media platformalarının üzərinə atmaq doğru deyil.

Wikipedia-nı ənənəvi ensiklopediyalardan fərqləndirən əsas xüsusiyyət onun hər kəs tərəfindən rədaktə edilə bilən, dinamik və açıq resurs olmasıdır. Bununla bərabər, Wikipedia şəxsi fikirlər və ya tərəf tutmaq üçün yer deyil. Bu resursun məqsədi çoxsaylı perspektivləri təqdim edərək, mövzu haqda hansı qənaətə gəlməyi oxucunun öhdəsinə buraxmaqdır. Bizim platformamızda tez-tez çıxış edən sosial media müşahidəçisi Cavid Ağa uzun illərdən Wikipedia-da məqalələrin redaktəsi ilə məşğuldur. Qonağımız adi istifadəçinin Wikipedia haqda bilmədiyi və ya yanlış təsəvvürə malik olduğu məqamlar haqda danışdıq.

Elmi tədqiqat konkret suallara cavab vermək və ya problemləri həll etmək üçün məlumat toplamaq və təhlil etmək üçün strukturlaşdırılmış, sistemli bir prosesdir. Yeni müsahibəmizdə Vaşinqton Universitetinin Asistent Tədqiqat Professoru Aytəkin Hüseynli ilə elmi tədqiqatın əhəmiyyət və onun düzgün aparılması şərtləri haqda danışmışıq. Qanağımız deyir ki, akademik şəraitdə tədqiqat müstəqil araşdırmanı təşviq etməklə yanaşı, tələbələrə və müəllimlərə ictimai tərəqqiyə və real dünya həllərinə töhfə verən layihələrdə əməkdaşlıq etməyə imkan verir.

Siyasi müzakirələrdə tez-tez işlədilən Yumşaq Güc (Soft Power) terminini məcbur edilmə əvəzinə cəlbedicilik vasitəsilə əməkdaşlığın təmin olunması kimi ifadə edə bilərik. Xarici siyasətdə bu aləti istifadə edən ölkələr daha çox öz mədəniyyətlərinin qlobal səhnədə tanınmasından bəhrələnirlər. Yumşaq Gücün üstünlüyünə malik olan ölkələr dedikdə, ağla ilk Birləşmiş Ştatlar və Birləşmiş Krallıq gəlir. Amma son illər Çinin də adı bu sırada səslənir. Şərqşünas tədqiqatçı Vüsal Quliyev deyir ki, Çin hökuməti Yumşaq Güc siyasətinə ildə təxminən 10 milyard dollar xərcləyir. Qonağımızla bu haqda daha ətraflı danışmışıq.

Rəqəmsal savadlılıq nə deməkdir və nə üçün əhəmiyyətlidir? Rəqəmsallaşma sahibkarlığın inkişafında necə rol oynayır? Proqramlaşdırma bacarıqlarına hər kəs yiyələnə bilərmi? “Maestro School” proqramlaşdırma məktəbinin təsisçisi Mədinə Paşayeva ilə danışdıq.

Dünyada və Azərbaycanda qadın futbolunun tarixi haradan başlayır? Futbolla məşğul olmağın hansı faydaları var? Məktəbli qızları futbola cəlb etmək üçün nə etmək mümkündür? “Baku Juniours Women” futbol klubunun meneceri Ağasəf Osmanlı ilə videomuzu izləyə bilərsiniz.

Klassik şəhərsalma nəzəriyyələri hansılardır? Bu nəzəriyyələr müasir şəhərlərin formalaşmasında necə rol oynayıb? Azərbaycanda şəhərsalma sahəsində hansı fundamental problemlər mövcuddur? Urbanist tədqiqatçı Bayram Axundovla videomuzu izləyə bilərsiniz.

Tələbələrin ixtisas seçimi ilə bağlı düzgün yanaşma hansıdır? Gənclərə öz seçimlərini etmələri üçün imkan yaratmaq nə üçün əhəmiyyətlidir? Düzgün ixtisas seçimi etmək üçün hansı trendləri izləmək lazımdır? ADA Universitetinin prorektoru Vəfa Kazdalla bu haqda danışmışıq.

Azərbaycandakı trans fərdlərin qarşılaşdığı əsas çətinliklər hansılardır? Bu çətinlikləri yaradan səbəblər haradan qaynaqlanır? Trans kimliklərin mediada daha çox görünən olmağı nə üçün əhəmiyyətlidir? Rejissor Miray Dənizlə bu haqda danışmışıq.

116-111 Uşaq Qaynar Xətti hansı fəaliyyətləri həyata keçirir? Qaynar xətt xidməti regiondakı uşaqlar üçün əlçatandırmı? Qaynar xəttə gələn müraciətlərdə məxfilik prinsipi necə qorunur? Kəmalə Aşumova rəhbərlik etdiyi Azərbaycan Uşaq Qaynar Xətt xidməti haqda danışır.

Elmi jurnallarda məqalələrin çap edilməsi üçün hansı prosesdən keçmək lazımdır? Sosial sahələrdə elmi məqalələrin yazılması üçün hansı tələblər var? Elmi jurnalların təsir qüvvəsi dedikdə nə nəzərdə tutulur? Vaşinqton Universitetinin elmi işçisi Aytəkin Hüseynli bizimlə bu haqda danışıb.

İşəgötürənlər əmək münasibətlərində hansı problemlərlə qarşılaşırlar? İşçilərin müqaviləsinə xitam verərkən hansı məqamlara diqqət edilməlidir? Müəssisələrdə daxili intizam qaydalarının hazırlanması nə üçün vacibdir? Hüquqşünas Araz İsmayılov bu mövzuda təcrübəsini bölüşür.

Təhsilin inkişafında həmrəylik pedaqogikası nə üçün əhəmiyyətlidir? Rəqabətyönümlü pedaqogika hansı mənfi nəticələrə səbəb ola bilər? Şagirdlər məktəbdə xoşbəxtdirlərmi? Təhsil mütəxəssisi Ülviyyə Mikayılova bu haqda danışmışıq.

Neyromüxtəliflik nədir və təhsil prosesində nə üçün nəzərə alınmalıdır? Yaradıcılığın təhsil üçün əhəmiyyəti nədən ibarətdir? Öyrənmə müxtəlifliklərinin hansı faydaları ola bilər? Təhsil mütəxəssisi Coana Braun ilə bu haqda danışmışıq.

Müstəqil həyat tərzi fəlsəfəsi nə deməkdir? Əlilliyi olan şəxslərin qanunvericiliyin təkmilləşdirilməsində iştirakı nə üçün vacibdir? Müyəssərliyin təmin edilməsi üçün nələrə diqqət etmək lazımdır? “Müstəqil Həyat” İnkişaf və Dəstək Mərkəzinin rəhbəri Aydın Xəlilovla videomuzu izləyə bilərsiniz.

İtkin düşmüş şəxslərin ailələrinin hansı ehtiyacları var? Beynәlxalq Qızıl Xaç Komitәsi itkin düşmüş şəxslərin kimliyinin müəyyənləşdirilməsi ilə bağlı Azərbaycanda hansı işləri görür? Beynәlxalq Qızıl Xaç Komitәsinin nümayəndəsi Elif Günce ilə videomuzu izləyə bilərsiniz.