Zip噏劇場

Zip噏劇場 Game of Eden 張蔓姿篇 Mission 1.4 「關於纏綿」 達：莫十三，今日係8月31號！Area 15 server 今晚就會重啟，Gigi過咗今晚就會消失，點解你仲可以乜都唔做！係度飲酒？ 莫十三： 咁勸又勸過，佢唔想，我都無辦法架。 達：兔仔實驗係你搞出嚟架！ 莫十三：嗱，你要搞清楚，係第一代Dr Morpheus 搞嘅，雖然我係複製人兼有佢記憶，但理論上其實又唔太關我事喎。 達：我唔理，總之係你哋Morpheus 搞出嚟嘅！一定要搵方法救Gigi! 莫十三：一係你入Game，強行捉Gigi 出嚟囉！ 達：好！咁你即刻準備意識移植！ 莫十三：喂！你認真架？一陣過12點，server rebot 嘅時候，你嚟唔切登出，然後出現咩事，4哥報夢纏住我，咁我點算啊？ 達：你咪同佢因為你，我先搞成咁囉！ 莫十三：喂！阿達！ ——— 電腦導航聲音： Welcome to Garden of Eden ，依家進行腦電波核對… 玩家- Gigi 身份核對成功 歡迎回到伊甸園，依家帶你進入所屬區域 - Area 15。今日係NC 180年8月31日，Enjoy yr time in Eden. ——— 管理員： 管理員公告，Area 15 server 將於今晚12時重啟，請各玩家於重啟前2到3小時登出，避免資料損失及對大腦造成不必要傷害。而重啟需要2-3個工作天，玩家請在9月3日再次登入。多謝合作。 Gigi：（讀白）陀錶事件到依家已經超過一個月，呢一個月嚟Jesse不斷係Game of Eden搵阿達，希望可以將佢交比管理員旗下私人組織666嘅阿J，換取我地安全渡過831嘅權限，可惜就比我破壞咗件事。而呢一個月，好多玩家知道要行實名制，知道要rebot server都有好多反對聲音，有人話Area 15嘅管理員想淨網，rebot完，大家嘅日子仲係咪同之前一樣？會唔會rebot之後，規限多咗，權限少咗，一切都唔同咗？亦有人支持，理由就係個句 - 無做虧心事怕咩啫。所以有人轉去第二個server，有人留低。但對於我同Jesse呢一班兔仔實驗品嚟講，Rebot就等同熄機...其他兔仔會嘅成員各自去咗自己想去嘅地方，等倒數。而我...嚟嚟去去，都係得戲院...人生最尾一場戲，睇邊套好呢？ Jesse：死都臨頭都要去睇戲，你係咪真係咁鍾意睇戲啊？ G：就算發生咩事，都有成間戲院嘅觀眾陪我啊嘛。 Jesse：好可惜過埋今晚就會rebot，大部分玩家都登出曬啦，無觀眾啦。 G：咁你又嚟呢度？又跟縱我啊？ Jesse：古有關羽捉棋刮骨療傷，亦有零零柒睇愛情動作片拎子彈，咁我係度諗，睇睇下戲死咗，會舒服啲掛。 G：Jesse...對唔住啊... Jesse：呢度無「Jesse對唔住啊」呢套戲睇喎。 G: 我認真同你道歉架！ Jesse: 你依家終於知道被人「0專」嘅滋味呢！ G: 你可唔可以認真少少啊？ Jesse: 我睇過一個文章，話8成人臨死前都會講對唔住三個字。我成日都諗，生前咁多時間點解唔講，要就死先講呢？ G: 怕唔講就再無機會講掛… Jesse: 係終於誠實面對自己？定想尋求對方原諒？暫時呢度未有「Gigi我原諒你啦」呢套戲上。如果未來上映，我再話你知。 G: 但再過幾個鐘就9月1號…我怕我哋睇唔到… Jesse: 前排我亦睇過另一篇文，話Life係由if 同Lie 組成。人生充滿無限如果，亦充斥無限謊言。如果你當時無放走阿達，我哋會點呢？繼續留喺Game of Eden 做不死靈魂？但呢個世界無如果，得結果。結果係，我要講「原諒你」呢個大話，我又講唔出口… G: 都百幾歲人仲睇埋咁多內容農場嘅濫情文架… Jesse: 咁唔講Life，我哋講 live。Live 同 Love 其實差一個字咋喎。 G: 唔得，呢個太夾硬啦…都話內容農場啲文水平低架啦… Jesse: 嗰作者叫Jesse啊，Gigi！ G: 嘩…一開頭聽唔覺，但越聽就越有智慧啊！ Jesse: 算啦，你都係唔適合做誇誇群架啦。總之，我想講嘅係，你放走阿達嗰刻嘅眼神，係我喺Game of Eden 識你咁耐都無見過。 G: 即係點啊…? Jesse: 你對熊貓眼終於有神啦！ G: 你係串緊我定讚緊我架？ Jesse: 係客觀描述緊你。最初見你嘅時候，憑你嗰種對凡事都IDFC 嘅眼神，就知道你都係兔仔實驗嘅犧牲品…不老不死，永遠留係度完全唔知做乜…漫無目的…直到你遇到阿達，你係唔同咗架。 G: 我覺得你適合做誇誇群多過寫文啊Jesse。 Jesse: 成日話做人要搵咩目的，好似好深咁，但睇真啲嗰英文字，目的係Aim，如果重序，將A同I 調轉，其實就係I am。 G: 呢個解釋又係你作架？ Jesse: 邊個作都好。當刻你選擇放走阿達，呢個決定係你深思熟慮又好，條件反射都好，都係你嘅決定，亦反映咗你嘅目的。所以，你依家唔係應該講對唔住，而係問自己係邊個，想做咩？當初你被迫入嚟遊戲，但依家你有得揀。 G: 如果再比你揀多次，你會唔會應承Dr Morpheus ，幫Jess做人格分離同意識轉移實驗？ Jesse: 我係Jess 創造出嚟嘅另一個人格，所以Jess就係我嘅Aim。 G: 唔後悔？ Jesse: 去個廁所再答你呢個問題，你都快啲揀啦Gigi，就嚟到9月1架啦。 G: 喂！Jesse！ (讀白) Jesse一去，就無再返嚟。其實我哋呢啲不死意識，根本唔需要去廁所。所以我知Jesse主動行開，係唔想咁老土講再見，同我當年逃離Dr Morpheus 實驗室一樣。Love, Live, Aim, I am…望住戲院嘅坐位表…我淨係諗起亂咁買飛嘅佢… 佢依家會係邊呢？ 輸入座標：N22.169 E114.259 *傳送門 sound effect  *海浪聲效 而佢果然係呢度… G: 我印象中，現實世界嘅星星，應該靚過Game of Eden架喎… 達：Gigi！ G: 唔好咁激動啊，一陣你自動登出咗，入唔返嚟，邊個帶我離開呢度啊？ 達：你決定咗啦！ G: Rebot之後你見我唔到，做意識轉移失敗，你都係見我唔到。呢個50 / 50 ，慘同傷心嗰個係你啫。 達：點會呢！一定會成功架！ G: 當年Dr Morpheus 都係咁講。不過都失敗過一次，唔差在試多一次啦。 達：我會一直陪住你，播戲你聽，直到你醒返為止！ G: 又睇《王家衛》？ 達：睇邊個嘅戲都好！總之你一醒返第一眼會見到我！ G: 可能要睇幾百次架喎？ 達：睇一萬次都睇！ G: 我諗到醒返之後，會同你講邊句對白啦。 達：可唔可以唔好係烏蠅哥嗰句啊？ G: 到時你咪知囉！ *電子聲效 玩家- Gigi 現已登出。Hope you enjoy yr time in Eden。 (完) 張蔓姿 飾演 Gigi 阿攝 飾演 阿達 波盛 飾演 Jesse 編劇及製作 阿攝 音樂 - 張蔓姿：《drowning in pain》、《GET OVER IT》、《DOWNSTAIRS》、《Simple sweetness》、《TO THE GREEN FROM THE APPLE》；BEATFRIDAY：《UNDER THE RAIN》 歌：張蔓姿《關於纏綿》 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

#Zip噏劇場 Game of Eden 張蔓姿篇 Mission 1.3 「LOVELOST」 ——— 電腦導航聲音： Welcome to Garden of Eden ，依家進行腦電波核對… 玩家- Gigi 身份核對成功 歡迎回到伊甸園，依家帶你進入所屬區域 - Area 15。今日係NC 24年7月4日，Enjoy yr time in Eden. ——— *奇幻音樂 G：（虛弱）Dr...Morpheus...? Dr M：你終於都醒啦Gigi。 G：呢度係...?點解好似同之前嘅手術室唔同樣嘅...? Dr M：呢度唔係醫院，而係我喺Game of Eden嘅實驗室。 G：Game of Eden...？咁我細妹呢？佢無事嗎？ Dr M：你細妹手術成功，喺現實世界康復得好好。等你習慣呢度嘅環境，我會叫佢入Game嚟探你。 G：咩入Game啊？Dr Morpheus...我唔係好明你講咩喎...你唔係話手術成功架咩？ Dr M：我係話你細妹手術成功...但係你就...Gigi，對唔住...我都迫不得意先咁做。 G：你嘅意思係...? Dr M：連體嬰分離手術風險好大，加上你地咁大年紀先做呢個手術，成功率更低。而喺將你地兩個分離嘅過程中，因為出血過多，你地兩個都有生命危險...最終，你細妹成功生存...但係你就... G：所以...我即係死咗？ Dr M：睇下你對死亡嘅定義係咩啦。雖然你嘅肉體已經死亡，但我將你嘅意識由現實世界傳入Game of Eden，所以你喺遊戲世界仲生存緊。 G：你都識講係遊戲世界，唔係真實世界啊！點叫做生存啊！ Dr M：所以我先問你對死亡嘅定義。笛卡兒講過「我思故我在」。所以，你依家係存在緊，仲同我對話緊添。 G：你有無問過我想唔想以呢種方式生存啊！？ Dr M：咁我依家問你，你想唔想以呢種方式生活落去？ G：你都幫我揀咗啦... Dr M：你仲有得揀嘅。因為只要等到合適嘅植物人身體，就可以將你嘅意識傳入去，再喺現實世界生活。 G：咁嗰一個已經唔係我嚟啦！ Dr M：睇下你用外在定內在去斷定何謂一個人。 G：細妹佢...知唔知啊？ Dr M：佢知你入咗遊戲，但未知你已經醒返。駛唔駛我通知佢？ G：唔好！ Dr M：咁你再諗一諗，我聽日再入嚟睇你。不過你未適應遊戲世界嘅模式，我唔建議你周圍走。 Gigi（讀白）Dr Morpheus走咗之後，我用咗好耐嘅時間去消化發生係我身上嘅事...Game of Eden嘅NC24年，即係現實世界嘅2046年...如果無意外，我同細妹就順利進行分離手術，一齊慶祝16歲生日。但呢個世界係無如果，只係得結果...結果一個成功，一個失敗...我同佢兩個只係活到其中一個...咁呢個50 / 50，算係成功定失敗？ Dr Morpheus問我點定義死亡...我真係唔識答...我無咗身體，得返意識，呢個50 /50，係生存緊？定已經死咗？佢又話可以將我嘅意識傳入一個植物人度...而植物人係無意識，但身體機能正常，咁佢係生存定死亡？如果我嘅意識真係傳入去呢個唔屬於我嘅身體而又成功蘇醒，咁係我存在緊？定係佢存在緊？ 未做手術之前，同細妹連體，有咩事都有另一個人分擔。依家終於完全獨立，反而有啲唔知點做決定...其實我地兩個做手術前都知風險，我同佢內心都各自祈求如果兩個只能活一個，會係對方生存...所以我可以肯定阿妹知道出事嗰一個係我唔係佢，會好傷心...既然已經傷心咗一次，如果意識轉移失敗，咪會再傷心多次？呢個50 / 50 嘅機會，我選擇咗逃避...所以我係Dr Morpheus返嚟之前，留低咗張字條，上面寫住：Dont tell her。然後我就離開佢嘅實驗室... 我唔知佢最後有無話比我細妹知，因為我無喺Game of Eden見過我細妹，亦無搵過Dr Morpheus… 究竟我係唔想定唔敢呢？ 有人話人到死個日先知當時嘅決定係啱定錯，雖然我喺現實世界死過一次，但喺Game of Eden...我屬於一種不死嘅意識存在...由開頭會成日諗個決定係啱定錯，到依家NC180年，一切都變得唔重要。因為唔敢定唔想，重點唔係「敢」或者「想」，而係個「唔」字。 唔駛食，唔駛瞓，唔駛做，唔會死，咁樣唔唔下就過咗百幾年。直到遇到Jesse，知道大家都係Dr Morpheus意識轉移嘅成品，叫做無咁寂寞...直到遇到阿達... *警報聲效 管理員: 管理員公告。Game of Eden Area 15 server 將於8月31日重啟，合法資料將會保存。同時實名制政策會於當日正式生效。各玩家敬請留意。 *鎖鏈聲效 達：Gigi，你聽我講啦，deadline係8月31日，無時間啦！放咗我，然後我帶你去搵莫十三醫生做意識轉移手術！ G：阿達...你已經登入咗Game of Eden 超過24小時，我勸你慳返啲力，等Jesse返嚟先再算啦...再係咁亂郁，我怕你係現實世界嘅身體會猝死... 達：Gigi！我真係無呃你架！只係無講晒我知嘅野比你聽啫！一係咁啊，我地再玩多次真話UNO，淨係你問，我乜都答！ G：算啦阿達，一切都唔重要啦... 達：重要！咩唔重要啊！Area 15管理員 8月31日實名制嘅決定係唔會推翻，到時你同Jesse仲有其他因為Dr Morpheus 兔仔實驗而入Game嘅意識就會被消滅！班管理員仲會rebot 過Area 15呢個server！呢個淨網行動大家都無得避架！ G：咁咪好囉...我係Game of Eden咁多年，好攰啦... 達：我地唔係約好咗係現實世界繼續睇戲架咩？仲有好多電影節我地可以一齊去睇架！ G：其實你講嘅導演、電影我都睇過曬架啦... 達：有我同你睇嘛！ G：其實呢百幾年嚟有無人陪，我都一樣咁過... 達：點同呢？有我同你一邊傾劇情一邊行電影場景，然後一齊睇星星 G：夠啦阿達，我情願你第一眼見面就直接叫我做意識轉移手術啊，而唔係扮偶遇，扮鍾意睇戲啊... 達：我真係鍾意架！ *電波干擾聲效 G：你身體開始負荷唔到啦...再係咁，你會被強制登出，好傷大腦架... *開門聲效 Jesse：Gigi，你唔駛同佢擔心。佢好快就會舒舒服服咁離開。 G：Jesse，我知你好憎Dr Morpheus，但阿達只係傳話，佢無辜架。 Jesse：Gigi，都叫你唔好淨係識睇戲，要學識埋睇人架啦。呢個阿達，係收藏組織404嘅成員嚟，好值錢架！ G：咁關我地咩事啊？你唔係話我地兔仔會最好咩都唔理，低調咁過日子咩？ Jesse：管理員旗下嘅私人組織666其中一個成員阿J，係黑市聯絡咗我...話只要我交阿達比佢，佢就可以令我地兔仔會所有成員安全渡過8月31日，就算area 15 server rebot，我地都唔會被消滅！ 達：阿‌J係個賤人嚟！佢專出賣同伴！我阿爸就係比佢害死！佢信唔過架！ J:夠Dr Morpheus 信唔過？當年係佢拎阿Jess做兔仔實驗！係佢話可以將我呢個由佢腦入面分裂出嚟嘅人格，連同阿Jess情愛妄想症幻想出嚟嘅女朋友Jessica ，透過Game of Eden 抽出嚟，再輸入植物人嘅身體度！係佢話可以成功！係佢話我哋三個可以係現實世界度相見！最終點啊？實驗失敗啊！阿Jess死咗，我同Jessica 永遠困係Game of Eden 度啊！就嚟2百年啦！ 達: 當時Dr Morpheus 做唔到，但到依家第6代嘅莫十三，佢一定得架！Jessie , Gigi…信多佢一次啊！ J: 咁你可唔可以信私人組織666一次啊？ 達: 我信！我終有一日會為我阿爸報仇！ J: 好啊，有志氣，我依家就幫你！ G：Jesse，你真係諗住交阿達比佢？ Jesse：佢一個救我地全部，呢條咁簡單嘅電車問題，答案好明顯啦。 G：但係...佢係一個活生生嘅人嚟架... Jesse：Gigi，我地都係人嚟架！其實都接近成二百年啦，你仲糾纏緊肉體同意識嘅問題？ G：但佢唔同啊！ Jesse：Gigi，你諗下咁多年嚟，邊個喺你身邊？呢個只係出現咗唔夠兩個月嘅人，夠我地重要咩？ G：我淨係知道依家離8月31日仲有成個月，一定有其他方法嘅！ Jesse：OKOK！Gigi，萬大事放低隻陀錶！ G：阿達，你搵第二個陪你睇《My Blueberry Nights》啦！ Jesse＋達：Gigi！唔好啊！ *倒數聲效 *爆炸聲效 （TBC） 張蔓姿 飾演 Gigi 阿攝 飾演 阿達 彬臣 飾演 Dr Morpheus 波盛 飾演 Jesse Alton 飾演 管理員 編劇及製作 阿攝 音樂 - 張蔓姿：《drowning in pain》、《GET OVER IT》、《DOWNSTAIRS》、《Simple sweetness》；BEATFRIDAY：《UNDER THE RAIN》、《CONVENANT》 歌：張蔓姿《LOVELOST》 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

#Zip噏劇場 Game of Eden 張蔓姿篇 Mission 1.2 「不言自明」 ——— 電腦導航聲音： Welcome to Garden of Eden ，依家進行腦電波核對… 玩家- Gigi 身份核對成功 歡迎回到伊甸園，依家帶你進入所屬區域 - Area 15。今日係NC 180年7月28日，Enjoy yr time in Eden. ——— *敲門聲 *Jessie 開門 Jessie : (緊張）你遲到喎... Gigi : 咁我走囉。 Jessie: 有無比人跟蹤？ Gigi: 以前無，依家無，將來都無啊。 *開門聲效 Gigi:（不奈煩） Jesse，其實你問咗咁多次，次次都無事，下次可唔可以唔好再問，直接開門呢？ Jessie:你唔遲到，我咪唔再問囉。 Gigi:你有無限咁多嘅時間，我遲呢幾十秒，拉返匀嚟計，好少事啫… Jessie: 唔係多同少嘅問題，係原則嘅問題。 Gigi: 得啦得啦…Jessica 呢？ Jessie: 早幾日都聯絡到佢，不過佢今日無覆過機… Gigi: 可能又去咗Flirt 仔啫，都咁多年啦，又唔係未試過。 Jessie: 今次有啲唔同…我尋晚係黑市聽到一個消息…Area 15新一任管理員想行實名制，8月31號就會生效...佢地會核對現實世界同Game of Eden 玩家嘅身份…如果有多出嚟嘅遊戲玩家，有機會被消滅… Gigi: 咁我哋扮AI 扮NPC咪得囉，佢哋唔會知架。 Jessie: Gigi，由我哋第一眼見到大家嘅時候，我哋都好清楚大家唔係NPC，而喺同一類人…都係Dr Morpheus 兔仔實驗嘅犧牲品… Gigi: 我記得…所以你先叫我加入兔仔會…互相照顧大家啊嘛…呢個故仔你唔駛每次都講架… Jessie: 你搵一次唔係 0 專我，得唔得呢？ Gigi：好，我下次當你吳專囉。 Jessie：唉死得，你比管理員聽到你提啲180年前嘅人物，實捉走你啊。 Gigi：仲有無野講啊？無野講我就去睇戲。 Jessie：你又同嗰一個阿達睇戲啊？今次又睇邊套啊？ Gigi：係啊，睇《2046》啊。 Jessie：依家都2202年，睇咗咁多年你唔悶架咩？ Gigi：其實你問嚟問去，講嚟講去都係個幾句，真係好有潛質做NPC。 Jessie：好啦好啦，最後一條問題，有無帶陀錶啊？有咩事危險，記住用啊！ Gigi：(打斷Jesse）得啦...長氣... *《2046》BGM Gigi：（讀白）2046對我嚟講係一個好特別嘅年份，所以我每年都會睇一次王家衛嘅《2046》。其實無乜關係，因為《2046》喺2004年上，但我會透過呢套戲嘅飛尾，去計住我玩咗Game of Eden幾耐。不過今年有啲特別，因為有人陪我一齊睇。 達：可以陪我去一個地方嗎？ G：你...想去《2046》號房？ 達：今次唔係去電影場景，而係一個我好鐘意嘅地方。 G：好啊。 達：輸入座標：N22.169 E114.259 *傳送門 sound effect  *海浪聲效 達：呢個地方應該係全Area15睇星最靚嘅地方。 G：係現實世界睇真嘅星，唔係仲靚咩？ 達：可能真實世界所有野，都係假架呢？ G: 你成日嚟呢個島？ 達：每當有開心同唔開心嘅時候，都會嚟呢度。 G: 如果你唔想講，我哋可以好似之前咁，唔出聲，靜靜地咁睇星。 達：你想唔想知？ G: 你想唔想講？ 達：嗯…不如我哋玩一個真話遊戲？ G: 乜依家呢個年代，仲有人玩true of dare 架咩？ 達：唔係true or dare，而係真話uno啊。 G: UNO我有玩過，但真話uno 係點玩架呢？ 達：好簡單，呢度有副得工具牌嘅UNO，我哋一人抽5隻，互相問對方問題，如果唔想答嘅就可以用工具牌。 *抽牌聲效 達：你問先？ G: 嗯…點解你英文名叫阿Dark嘅?  達：我喺現實世界嘅名叫Christopeher，我爸爸死咗之後，我就改名叫阿Dark。 G: 邊有人會係Game of Eden 講真名比人知架！ 達：嗱，如果你要追問，一係就問之前出draw 2，咁就可以連續問兩條問題，如果唔係就要留返下一round 架啦。 G: 好，咁你想問咩啊？ 達：我其實係半孤兒嚟嘅…除咗阿爸之外無其他親人。你有無兄弟姊妹？同佢哋親唔親？ G: 你好似唔記得自己啱啱講過嘅規矩喎？ 達：係喎！我出Draw2！ G:我出skip。 達: 我又係時候講下規矩啦！因為我問咗你兩條問題，而你得一張skip，所以你只可以skip一條問題。 G: 仲有無咩規矩，不如你一次過講晒佢啦。 達：有，reverse 牌嘅作用係反彈返條問題比對方。其他嘅玩玩下就知架啦。 G: 好…我有一個孖生細妹...完。到我問你問題啦。我出Draw 4…第1，點解係半孤兒？第2，你爸爸最近過身？第3，我哋最初見面嘅時候，你完全唔出聲…係你本身嘅性格？定同你爸爸有關？第4，未諗到，一陣間問返。 達：嘩，你一次過問咁多問題架！好，我慢慢答你。我爸爸喺我10歲嘅時候過咗身…然後我就入住孤兒院…點知早前我先知道我爸爸原來未死…雖然我最終成功搵到佢，不過佢已經淨低唔多時間…唯一興幸嘅係可以陪佢行最後一程…同親手落葬。佢過身之後我係頹過一段時間，不過我本身都唔太識講野，所咪諗住係你面前扮型囉。 G: 咁扮型都好過其他人懶chok咁同我講電影對白嘅。 達：咁你會點應佢哋？ G: 嗱，我當你呢條係問題嚟架啦！ 達：喂！我收返！ G: 食屎啦你！ 達：咁又唔駛烏蠅哥上身嘅... G: 係答案嚟架！之前當有人用王家衛電影對白撩我，我就會咁應佢哋。 達：嘩！配合埋你嗰樣，威力真係加乘！ G: 你係咪想我再講多次？ 達：嗱，我當你呢條係問題嚟架啦！ G: 好！我豪比你。但我之前嘅Draw 4 仲有一條未問，依家問！如果你可以再見到你爸爸，你會同佢講咩說話？ 達：我出Reserve！不過我都會答...我會同佢講對唔住，我無遵守對佢嘅承諾…好，到你啦… G: 即係我有咩想同我爸爸講？ 達：唔係，我想問如果你可以再見到你妹妹，有咩想同佢講？ G: 我…我好掛住你…（沉默一陣）好啦...唔好再講呢啲啦...我想問..睇完王家衛電影節...我地睇咩好啊... 達：可以睇許鞍華、杜琪峰、或者睇外國嘅活地亞倫...總之以後乜戲都一齊睇...好嗎...? G：（沉默數秒，然後微笑回答）好啊... 歌：張蔓姿《不言而明》 達：咁...不如...我地下一套戲...係現實世界一齊睇...？ *槍聲 J：我幫佢答！唔可以！ G：Jesse，你跟蹤我！？ 達：Jesse...你放低支槍先... J：Gigi，我咪同你講要小心啲嘅，你面前呢一個人...係Dr Morpheus派嚟架！ *電槍聲效 達：我！ *阿達被電暈倒地 （TBC） 張蔓姿 飾演 Gigi 阿攝 飾演 阿達 波盛 飾演 Jesse 編劇及製作 阿攝 音樂：張蔓姿《Simple sweetness》、《TO THE GREEN FROM THE APPLE》、 《DOWNSTAIRS》、《drowning in pain》 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

#zip噏劇場 Game of Eden #張蔓姿篇 Mission 1.1 「#深夜浪漫」 ——— 電腦導航聲音： Welcome to Garden of Eden ，依家進行腦電波核對… 玩家- Gigi 身份核對成功 歡迎回到伊甸園，依家帶你進入所屬區域 - Area 15。今日係NC 180年6月9日，Enjoy yr time in Eden. ——— G：（讀白） 由每件事物誕生嗰日開始，佢就會有一個日期。而《旺家卡門》嘅日期就係1988年6月9日。每年嘅呢一日，Game of Eden呢一間電影中心都會播放《旺角卡門》，同時亦開始王家衛電影節，每個星期播佢一套電影。可能喺現實世界，所有野都會有有效日期，不過Game of Eden叫得做伊甸園遊戲，好似可以將所有嘅美永久保存。所以，我先可以欣賞呢一套214年前上映嘅作品。 好多人同我一樣，每年參加王家衛電影節，有啲觀眾甚至會cos play主角出現。雖然我無佢地咁hard core，但每套戲散場之後，我都會去返啲電影場景，幻想自己係主角，腦入面FF啲對白，然後自己傻笑。係咪好戇居啊？但呢個唔係Game of Eden其中一個用途咩？ 最戇居嘅係，真係試過有玩家好認真同我講：「如果我有多一張船飛，你會唔會同我一齊走？」 每次，我都扮烏蠅哥，講佢最經典嘅對白，跟住對方就會好尷尬咁走開。對於愛情，我已經分唔到我係不為定不能... 一如以往，今年嘅6月9日，我第N次去睇《旺角卡門》。散場之後，我一個人去咗阿華打電話比阿娥嘅酒吧，好似《重慶森林》嘅何志武，望住出出入入嘅客人。 然後，有一個著住白色背心、籃色牛仔褲嘅男人同一時間望住我，就係對望嘅個一刻，我行咗埋去，同佢講： 「先生，我係戲院見到你，係呢度又見到你，我諗唔係咁啱掛？」 佢企起身，對我笑一笑之後，無答到我問題，然後行去投幣式CD機，播咗呢首歌。 *播：林憶蓮《激情》 播完之後，佢行埋嚟，比咗一張A行嘅《阿飛正傳》戲飛我，然後就走咗。 *配樂：《阿飛正傳》《Los Indios Tabajaras - Always In My Heart》 即係點啊？行動版嘅「如果我有多一張戲飛，你會唔會同我一齊睇啊？」不過就算無佢呢張飛，我都會去睇。而得意嘅係，明明係呢個男人買飛，但佢就坐另一行。睇完之後，我無理佢，一個人去咗旭仔同蘇麗珍成為一分鐘朋友嘅小食部。而佢...繼續跟住我... 「你究竟想點啊？」我問佢。 佢只係笑一笑，繼續唔答我問題，只係捉住我隻手，迫我同佢跳旭仔嘅舞。跳完之後，比咗張R行嘅《重慶森林》戲飛我，跟住就走咗。 *播：《重慶森林》《California Dreaming》 呢個男人每次買飛都買啲好奇怪嘅位。而我地由一套戲嘅同場觀眾，變成兩套戲嘅同行觀眾，因為今次佢終於同我坐同一行。睇完，我問佢：「你想去邊？」 佢示意叫我跟住佢，然後...佢行咗去半山扶手電梯，再按照住警察633行咇嘅路線，行咗個區一圈。成段路佢淨係行，無講過任何野。有時會模仿前面嗰人嘅步姿；有時會踩對方嘅影，然後笑；有時會跟住階磚嘅pattern嚟行； 好無聊，但行下行下，我就跟住佢一齊做。 最後，我地行到去阿菲工作個間小食店，我終於聽到佢講野：「一杯齋啡，唔該。」 G：好彩你識講野，如果唔係，我就要去學手語或者傳心術啦。 *播：王菲《夢中人》 佢笑一笑之後回復沉默。齋啡嚟咗，佢學阿菲加咗兩粒糖落杯齋啡度，不過唔係減肥糖，而係兩粒綿花糖。 跟住，我地兩個就望住兩粒漲卜卜綿花糖，慢慢溶成cream，然後一人一啖咁慢慢飲曬佢。 曾經有人講過「一個人飲一杯齋啡係苦，但兩個人一齊飲，就會變甜。」 究竟呢少少嘅微甜，係因為嗰兩粒綿花糖，定因為...呢句說話係真架呢？ 齋啡飲完啦，佢好似上兩次咁，拎咗張戲飛比我。 我接過呢張K行嘅《春光乍洩》戲飛，忍唔住要問佢：「我叫Gigi…你叫？」 達：我暗示咗比你知架啦。 G：即係...你叫齋啡？定綿花糖？ 達：拎我地一齊睇呢4套戲嘅戲飛出嚟啊。 我好疑惑咁望住啲戲飛，唔通佢寫咗佢個名係戲飛背面？ 達：順住睇戲嘅時序，望下個行數同坐位啊。 G：D9嘅《旺角卡門》、A0嘅《阿飛正傳》、R5嘅《重慶森林》同K4嘅《春光乍洩》。即係你叫D,a,r,k, Dark？ 達：係啊，而坐位數目就代表unicode，9054即係達，到達嘅達。 G：（微笑）阿達...你好... （TBC） 張蔓姿 飾演 Gigi 阿攝 飾演 阿達 彬臣 飾演 莫十三 編劇及製作 阿攝 音樂：張蔓姿 《Simple sweetness》《TO THE GREEN FROM THE APPLE》 *歌：張蔓姿《深夜浪漫》 達：莫十三，我搵到Gigi啦。 莫十三：果然係收藏組織404嘅成員，搵野真係難唔到你啊！不過你呢個宅男，識唔識同女仔相處架？唔係睇得愛情片多就叫識架！等我教你幾招啦！ 達：你話比我知佢真正身份仲好啦。 莫十三：佢呢...同Jess、Jesse、Jessica一樣...都係兔仔實驗嘅實驗品...我要完成歷代Dr Morpheus 未完成嘅事...我地得返兩個月嘅時間...因為8月31號就係Game of Eden rebot嘅日子... Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

#zip噏劇場 Game of Eden 莫十三篇 mission 1.10「莫一 至 莫十三」 *時間來到2052年，莫菲斯醫生拖著10歲得莫九步出墓島的精神病康復中心。 莫九：爸爸，我尋晚發咗個夢，夢見你幫緊個女仔做緊手術啊。 Dr M：係啊，係一個咩手術啊？ 莫九：我見到你將個女仔個頭切開咗，然後將佢嘅大腦拎出嚟，跟住我就紮醒咗啦... Dr M：咁點解咁肯定嗰一個係我嚟呢？ 莫九：因為個醫生同你一模一樣，唔係爸爸你，仲會係邊個喎。 Dr M：可能你夢見大個咗嘅你呢？ 莫九：又可能係喎！因為我長大之後要好似爸爸你咁叻！ Dr M：好啦，阿仔，同佢地鞠個躬先啦。 莫九：爸爸，佢地係邊個嚟架？ Dr M：你望下啲墓碑，睇下佢地叫咩名？ 莫九：呢度有八個墓碑...佢地分別叫做莫一、莫二...一直到莫八... Dr M：嗱，你叫莫九，咁你覺得佢地同你有咩關係？ 莫九：佢地係我嘅叔叔？伯伯？但我無過聽爸爸你提過我地有親戚嘅？ Dr M：你鞠完躬，爸爸帶你去另一個地方，到時你就會知道佢地係邊個架啦。 莫九：好！ *電梯移動聲效 *到達聲效 莫九：爸爸，你唔係話唔比我嚟B8呢一層咩？ Dr M：爸爸無話唔比，只係話到你大個咗，先帶你參觀爸爸工作嘅地方啫。 莫九：爸爸...呢度有咁多個大腦...好得人驚啊... Dr M：你唔係話大個咗想成為好似爸爸一樣咁叻嘅醫生咩？咁依家開始，你就要大膽啲啦！ 莫九：比我驚埋呢一次，我就唔會再驚！ *開門聲效 莫九：嘩！原來爸爸你有部電子琴係度架！ Dr M：係啊，你試下彈do re mi呢三個音比爸爸聽！ 莫九：好！ *莫九彈出 do re mi *暗格開門聲效 莫九：爸爸！發生咩事啊？ Dr M：阿仔，跟爸爸入嚟啦。 *暗格關門聲效 莫九：uncle 康！點解你係度嘅？ 康：你爸爸今日約咗我嚟同你打機啊！ 莫九：真架爸爸！ Dr M：係啊，你見唔見到呢個裝置？戴咗佢，我地一齊入去Game of Eden！ 康：莫九，uncle康依家幫你戴好裝置，你準備好未？ 莫九：多謝爸爸！Uncle 康！I am ready！ Dr M：但阿仔，你登入咗先，爸爸同uncle康出一出去傾少少野，然後就會入Game嚟搵你。 莫九：咁我唔理你地架啦！ *關門聲效 Dr M：咳咳咳... 康：Morpheus...你無事嘛？ Dr M：我有無事唔重要...最緊要莫九無事... 康：之前我地太急進...諗住趁莫一未形成記憶嘅時候...就將記憶轉移...希望佢會用你嘅記憶成長...可惜...佢除咗記憶未形成...大腦結構都未定形...所以莫一過唔到一歲...經過莫一到莫八同呢30年嘅試驗...10歲應該係最合適做記憶轉移嘅年紀... Dr M：你知唔知頭先我帶莫九去拜莫一至莫八嘅時候佢同我講咩啊？佢話佢夢見我幫緊你女朋友做手術啊！ 康：即係...呢一年嚟，我地偷偷地迫佢入game，做極少部份記憶轉移...係成功嘅？ Dr M：應該係！如果唔係，佢無可能會講得咁detail。 康：Morpheus...定係我地今次改變方法，慢慢轉移記憶？咁就可以保住莫九嘅性命... Dr M：阿康...咳咳咳...你知架...莫九同我一樣...都過唔到50歲...我同佢都無時間慢慢嚟... 康：但如果莫九唔得...你係咪已經ready咗莫十？ Dr M：我頭先帶莫九去拜莫一至莫八個陣...就諗返每次安葬嘅畫面，究竟我安葬緊嘅係我自己？定係我個仔？佢地明明係我嘅複製品...即係我嘅分身，但由佢地出世到成長，真係好似自己嘅親生仔一樣...我以為我對呢9個實驗品無太大感覺...但每當聽到佢地嗌我爸爸嘅時候...我個心就好痛...你同莫九相處咁耐，都有感情...更何況係我... 康：我知...我明白失去親人嘅痛...但若然真係失敗...莫九真係出現咩事，而你同時都走埋...你地嘅研究咪白廢？ Dr M：可能係個天都唔想我地咁做呢？ 康：你唔係唔信命架咩？ Dr M：當你就死嘅時候，就會明白我。總之，呢一次，係我最後一次安葬自己... 康：但係... Dr M：唔好但係啦...莫九等緊你呢個uncle 康啊...咳咳咳... ——— 電腦導航聲音： Welcome to Garden of Eden ，依家進行腦電波核對… 玩家 - 莫九 身份核對成功 歡迎回到伊甸園，依家帶你進入所屬區域 - Area 15，今日係NC 30年7月25日，Enjoy yr time in Eden. ——— 莫九：阿爸！uncle康！你地係邊啊？ 康：Uncle康係度啊！ 莫九：阿爸呢？佢唔跟埋你入嚟嘅？ 康：我地依家就去搵佢。 *傳送聲效 莫九：Uncle 康，呢度邊度嚟架？成間房白雪雪，又有咁多部電視嘅？ 康：你睇下啲電視有咩畫面？ 莫九：咦！有我夢見我爸爸幫一個女仔做緊手術嘅畫面啊！仲有好多個佢係唔同電視機度嘅？ 康：呢度係Game of Eden嘅記憶部門，得我同你爸爸兩個管理員先入得嚟架。我地依家係度偷睇緊你爸爸嘅記憶啊！你想唔想知道你爸爸所有秘密啊？ 莫九：係咪可以知道埋莫一至莫八係邊個啊？ 康：係啊，你準備好未？ 莫九：I am ready！ 康：咁你撳其中一部電視機嘅畫面啦！ 莫九：哦！ *電視機裂開聲效 Daisy：welcome to cafe memory , 點啊 Dr Morpheus ，照舊？ Dr M：阿康佢死啦架啦，你幾時先接受現實啊！ 康：得啦！我知啦！我唔駛你不斷咁提我啊！ 主持人：如果，我話如果，解決到所有道德、價值觀問題，你會唔會或者想唔想做大腦移植同合成嘅手術？ O：我地唔係癲，我地只係睇到醫學突破嘅一個契機。 康：你唔好講到自己咁偉大啦！你只係知道自己過唔到50歲，所以先諗盡辦法為自己續命，保存你所謂嘅最強大腦咋嘛！ （要錄）Dr M：莫一至莫八...對唔住啊... *電視機爆開 *電子聲效 玩家 - 莫九 現已登…登出…登出…登出… Dr M：阿仔！阿仔！你點啊！ *莫九驚醒，用力吸氣 Dr M：阿仔你無事就好！阿爸我好驚... 莫九：阿爸...你唔好行埋嚟住...停啊！！！我終於知道莫一至莫八...甚至我呢個莫九嘅真正身份啦... (TBC)  彬臣 飾演 Dr Morpheus、莫一至莫十三 阿攝 飾演 Game of Eden 創造者 阿康、阿達 編劇及製作 阿攝 音樂 BEATFRIDAY *奇幻音樂 達：205212050000，呢個就係Dr Morpheus嘅死亡時間。而根據呢個死亡時間，就可以係墓島搵到Dr Morpheus嘅墓。而12月5日，咁啱係音樂家莫札特嘅死亡日子，真係有趣。 莫十三：嘩，你咁醒，容許我叫你一聲達哥，可以嗎？ 達：莫十三，我查過你地莫醫生一家...而根據歷代莫醫生嘅死亡時間...今年25歲嘅你...得返5年時間咋... 莫十三：達哥，你幾時由收藏家轉咗做算命架？如果5年之後，我真係死咗，一定係比你咒死！ 達：莫十三，你知我無講錯架。 莫十三：係啦係啦，最叻係你啦。 達：你有無啲咩想做，我可以幫你架？ 莫十三：嘩，達哥進入聖人mode啊！ 達：你之前幫過我同我阿爸...所以... 莫十三：好，你想報恩係咪，咁幫我喺Game of Eden入面，搵一個叫Gigi嘅玩家啊。 （TBC） 歌：張蔓姿《PANDA》 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

zip噏劇場 Game of Eden 莫十三篇 #1.9 「Mr. Memory」 ——— 電腦導航聲音： Welcome to Garden of Eden ，依家進行腦電波核對… 管理員 - 莫菲斯 身份核對成功 歡迎回到伊甸園（測試版），依家帶你進入所屬區域 - Area 15，今日係NC 1年7月11日，Enjoy yr time in Eden. ——— Mr. Memory : 你好，我係Mr Memory，你想保存邊一段記憶啊？ Dr.M : 阿康，呢個係Game of Eden 嘅NPC?  康：Morpheus ，佢唔係NPC，Mr Memory 係人工智能。 Dr.M: 你之前提過話研究成功嘅人工智能…就係佢？ 康：唔係。之前研究嘅人工智能，型號係K404。即係幫手保管現實世界被404咗嘅物件。而呢個Mr Memory…型號係K M…解做Keep Morpheus…所以…係專屬於你嘅人工智能… Mr. Memory : Dr Morpheus 你好啊，我終於見到你啦！ Dr.M: 你…你好啊… 康：我將你依家嗰樣，用software 推斷返10歲嘅你嗰樣同聲線，去做Mr Memory 出嚟。 Dr.M: 阿康…呢個就係你所謂嘅賭注？ 康：嗯…我一直係度諗…Game of Eden 有咩存在嘅意義…之前純粹諗住整一個同現實接近一樣嘅虛擬世界，令我女朋友以為自己仲生存緊…到佢死咗，我就諗…呢個Game 有咩用…而當我見到一個又一個地標消失…一個又一個文化人離開…好多實體藝術品被摧毀，咁如果佢哋可以轉移到Game of Eden 度，係咪可以得到二次生命呢？ Dr.M: 所以你就整咗K404出嚟。但係呢個Mr Memory 呢？ 康: 地標、作品係死物，要有人嘅故事先會令佢哋有生命。所以，一個地方，最緊要係人。有人，就可以令個一個地方重生。之前你幫我修復我女朋友嘅大腦，然後強迫佢登入Game of Eden，係另類保存佢生命嘅方法。而你之前做嘅兔仔實驗，就係用意識或者靈魂嘅轉移，去永續生命…可惜失敗咗…Morpheus ，我問你啊，一個人何謂之一個人？ Dr.M: 有七情六慾？有自由意志？ 康：又或者咁問啊，一個人點證明自己存在過？ Dr.M: 我思故我在？我哋真係要係度討論哲學？ 康：我無咁厲害，要討論到哲學範圍。我只係諗，今日嘅我由過去嘅我所組成。有去過先有過去，而過去係返唔到轉頭，所以我哋只可以透過回憶望返以前嘅自己。所以，我覺得一個人嘅回憶，就係存在嘅證明。 Dr.M: 所以呢個Mr Memory 就係保存我記憶嘅人工智能？但點解係我呢？ 康：如果可以透過Game of Eden 保存一個人嘅記憶，再將記憶輸入另一個人嘅腦入面，會發生咩事呢？ Dr.M : 雖然記憶並不等於意識或者靈魂…但如果真係咁做，好大機會造成意識錯亂，影響原本嘅人格…更有可能產生新嘅人格… 康：兩張唔同嘅相放埋一齊，當然唔知睇緊咩啦。但如果兩張相都係一樣嘅風景，只係一張係菲林，一張係數碼相，放埋一齊，應該唔會有太大違和感？ Dr.M: 康，不如你直接啲啦，好嗎？ 康：我意思係，強加一個唔屬於一個人嘅記憶落另一個人度，當然會出事。但如果係阿爸嘅記憶，輸入個囝度，又會點呢？ Dr.M : 都會出事架。先唔講個囝嘅基因一半係佢爸爸度嚟，更重要嘅係阿囝係獨立個體，有佢自己嘅記憶，係一個獨立嘅人。雖然佢未必會排斥佢爸爸嘅記憶，但輸入咗佢爸爸嘅記憶，咁佢究竟係以阿囝嘅身份定爸爸嘅身份生存呢？ 康：咁如果阿囝未建立到自己獨立記憶嘅時候，阿爸已經將記憶存入阿囝嘅大腦度呢？ Dr.M : 就算阿囝無反抗能力，我相信媽媽都未必肯做呢個實驗。 康：好啦，咁如果爸爸同時係媽媽呢？ Dr.M : 你嘅意思係？ 康：如果A將自己複製，複製人A雖然同A係相同，但當複製人A擁有自己嘅記憶，複製人A已經唔等於A，係全新嘅人。如果A係複雜人A建立自己記憶之前已經輸入A嘅記憶落複製人A度而又成功嘅話，咁A咪等於係複製人A身上延續自己嘅生命？ Dr.M: 但當複製人仲係胚胎或者BB嘅時候，大腦根本未發育完整，強行輸入記憶…好容易整死一個生命！ 康：Morpheus，我知你唔想再犧牲其他人嘅性命去做呢個實驗。所以…唯一可以犧牲嘅…就只有你自己。由你自己複製自己，再輸入自己嘅記憶，永續Dr Morpheus 嘅身份，終有一日，你可以成功實行你嘅研究！ Dr.M: 但係… 康：Morpheus…其實你咁急於做意識同靈魂轉移嘅實驗…其中一個原因係想突破醫學嘅界限，另外一個原因就係你嘅遺傳病…以我所知…你家族嘅病史…係過唔到五十歲…一個咁好嘅醫生，只係得五十歲嘅壽命，咁好嘅醫術，就咁失傳咗，對呢個世界嚟講係一個好大嘅損失…你救咗我女朋友一次，你比我幫返你，為你做啲野，好嗎？ (TBC)  彬臣 飾演 Dr Morpheus，Mr Memory  阿攝 飾演  Game of Eden 創造者 阿康 編劇及製作 阿攝 音樂 BEATFRIDAY Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

#zip噏劇場 Game of Eden 莫十三篇 mission 1.8「意識與靈魂」 Dr M: (讀白）1907年4月，美國一位叫做鄧肯嘅Dr係一本醫學雜誌發表一個研究，題目係：「關於靈魂是物質的假說，並用實驗證明靈魂物質的存在」。佢為咗驗證靈魂係一種可以測量嘅物質，設計咗一張特別嘅床，床上面安裝咗一種非常靈敏嘅秤。試驗方法係比就快死嘅人瞓係上面，然後一直精確測量呢個人嘅體重，睇下死亡嘅瞬間體重有咩變化。而死亡嘅瞬間，輕咗嘅部分就係因為死亡而丟失。作者稱之為靈魂嘅重量。最後呢位Dr得出嚟嘅重量係21克。 究竟靈魂係咪真係有重量？係咪所有靈魂都有21克？如果一個人嘅身體有多過一個靈魂，或者多過一個人格，會唔會多過21克？ 我真係好想知道... 因為如果所有腦幹死亡或者嚴重昏迷嘅病人，真係輕咗21克嘅話，我作為醫生嘅係咪可以宣佈病人雖然有心跳但已經無咗靈魂，可以當做死亡？ 我望住昏迷緊嘅Jess，好想得到答案...明明已經將Jesica同Jesse由佢大腦入面分離咗，明明佢只要順利登出Game of Eden，就可以過全新嘅生活...點解偏偏就嚟完成嘅時候，先登出錯誤？ Jess你由細到大咁辛苦嘅生活都可以捱到，只係差一步，點解你唔撐埋佢？ 唯一答到我問題嘅人...應該只有佢... ——— 電腦導航聲音： Welcome to Garden of Eden ，依家進行腦電波核對… 管理員 - 莫菲斯 身份核對成功 歡迎回到伊甸園（測試版），依家帶你進入所屬區域 - Area 15，今日係NC 1年7月4日，Enjoy yr time in Eden. ——— Dr M: 輸入座標：N22.169 E114.259 *傳送門聲效 Dr M: 阿康...你可唔可以比一個合理嘅答案我？ 康：你呢一刻嘅心情，我比咩答案你，你都覺得唔合理，等你冷靜啲我地先再傾。 Dr M：冷靜？你覺得我唔冷靜咩？ 康：你係一個醫生，冷唔冷靜，你應該好清楚。 Dr M：因為我，Jess依家昏迷緊啊！啊，唔係因為我！係因為你整咗一隻會登出失敗嘅Game！Jess先會搞成咁！ 康：你做咗咁耐醫生，應該知道所有手術都有風險，你亦曾經試過手術失敗，點解今次你會咁大反應？π先生應該唔會怪你架。 Dr M：分別就係...今次呢個手術係建基於好薄弱嘅理論...同埋...係我迫Jess參與...所以我要為佢負最大責任... 康：咁點解你要迫佢參與？應該有好多人肯挑戰意識轉移實驗架... Dr M:因為...我知道佢有一個或以上嘅人格...如果可以將所有人格抽出嚟，就可以多出幾個靈魂做實驗...你要知道...呢個社會，軀體好多，但有靈魂嘅人好少...就算實驗室有好多植物人或者昏迷嘅人可以做意識轉移，但你都唔可以亂咁將一個人嘅靈魂強加落一個唔屬於佢嘅身體上！所以，用Jess解離性身份疾患分裂出嚟嘅人格做意識轉移，一嚟可以幫到Jess，二嚟Jesse亦都有活下去嘅理由！ 康：做一個社會禁止嘅地下實驗，係咪應該將你所謂嘅醫德放埋一邊呢？ Dr M：你覺得一個醫生如果無咗醫德淨係得醫術，仲係咪一個好醫生啊？ 康：咁你有無諗過Jess嘅感受？ Dr M：無論Jess、Jesse同Jessica，三個人嘅感受我都有顧及！所以先得出呢一個三贏方案！ 康：咁點解Jesse同Jessica 意識轉移會失敗呢... Dr M: 呢個問題唔係應該由你答我架咩！ 康：如果要登入Game of Eden，首先要係一個大腦function到嘅人，再用儀器自願登入，又或者我地強迫佢地登入...呢個我地之前成功嘗試過...同時登出亦都係一樣...要透過大腦比意識同指令去登出...如果我地強行拎走儀器，玩家嘅意識可以能會消失，又可能會永遠鎖係Game of Eden入面，我未亦都唔敢做呢個實驗...所以無論登入定登出，總之做任何事，都要大腦比指令先得... Dr M：但Jess登出嘅時候，大腦一切正常啊！點會出現問題呢！ 康：但Game of Eden係連接腦電波嘅遊戲...腦電波由邊個比指令呢？大腦只係由一堆細胞組成嘅有機體，真正落指令嘅係靈魂或者意識...係Game of Eden嘅世界，又或者係遊戲同現實嘅中間地帶...靈魂已經脫離咗肉體...如果...佢嘅意識唔想返去... Dr M：佢地三個約好現實世界再見！點會唔想返去啊！ 康：佢地三個本來係一體...本來就分唔開...呢個係其中一個原因...另一個原因...可能係Jess嘅靈魂同意識根本唔想返去現實世界...所以先會登出失敗... Dr M: 咁Jessica同Jesse意識轉移失敗你又點解釋啊！ 康：可能佢地兩個意識唔夠強？又可能原屬身體嘅靈魂出現排斥？又可能... Dr M: 可能可能...可能利用Game of Eden做意識轉移嘅實驗係失敗嘅... 康：一次失敗就放棄？最初建議我修復女朋友大腦嘅人係你，鼓勵我將佢意識登入Game of Eden嘅人都係你，你唔應該係咁架？ Dr M：當時你地嘅情況咁差，我只係搏一搏... 康：所以一切都係賭注同成功率嘅問題... Dr M:你可以咁講...我唔想再因為呢個實驗害死無辜嘅人... 康：既然係咁，如果你將自己變成呢個實驗嘅賭注呢？你又敢唔敢啊？ (TBC)  彬臣 飾演 Dr Morpheus  阿攝 飾演  Game of Eden 創造者 阿康 編劇及製作 阿攝 音樂 BEATFRIDAY Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

#zip噏劇場 Game of Eden 莫十三篇 mission 1.7 「最後的祈禱」 Jess：(讀白) 由細到大，我都問自己 - 點解要誕生喺呢個世上？我有咩使命？有咩目的？當然，我唔係一離開媽媽嘅身體就諗呢堆問題，而係當我爸爸媽媽出意外離世，我成為孤兒，入住 π 先生嘅孤兒院嘅時候，就開始問自己…點解係我？點解個天要將我嘅快樂帶走？點解個天要我咁辛苦，一個人面對呢個世界？點解我唔合群就比人玩，點解我唔係答姑娘想我答嘅答案就要比人打？點解個個都覺得我有問題？點解無人比答案我？ 我真係好辛苦好辛苦好辛苦啊…我不斷係畫簿上面寫辛苦嗰辛字…但越寫個心越辛苦…啲人話寫完啲唔開心嘅嘢出嚟人會開心啲…都呃人嘅… 咁既然呢個方向唔得…唯有正面啲…所以我寫咗好多個幸福嘅幸係牆上面，不斷幻想未來幸福嘅畫面…可惜我乜都諗唔到… 我點樣可以將辛苦嗰辛…變成幸福嗰幸呢？ 然後我好認真望住呢兩個字…辛同幸嘅寫法真係好相似…只要加個「十」字喺辛字上面，就會變成幸字！咁係咪即係捱過十次辛苦，就可以得到幸福？定係…我劃十字架…祈禱…神就會比幸福我？ 如果真係有神，可唔可以帶我遠離厄運…我只係想做一個好普通好普通嘅人… Jesse: 放心啦，有我喺度，無人可以蝦你。 Jess: 你…係咪神啊？你終於嚟救我啦！ Jesse: 我叫Jesse，希伯來文解做God’s gift，神嘅禮物。 Jess: 所以係神派你嚟保護我嘅？ Jesse: 係啊，而你口中嘅神就係你自己，因為我係你創造出嚟嘅人格。只要你祈禱，我就會出現架啦！ *消失聲效  Jess: 神啊…我…我好似鍾意咗我鄰居Jessica… Jessica : Jess，我其實都鍾意咗你好耐啦…你可唔可以做我男朋友啊？ Jess: 你講真嘅？ Jessica : Jess，由今日開始，有我，你就會得到幸福。 Jesse: Jess，有我，你就唔會辛苦。 Jessica : 有我，你就會幸福。 Jesse: 有我，你就唔會辛苦 Jessica : 有我，你就會幸福。 Jesse: 有我，你就唔會辛苦 *Jesse Jessica 越講越細聲 Dr M: (越講越大聲) Jess…Jess…Jess！ Jess: (驚醒) Dr Morpheus！ Dr M : Jess…你不斷自言自語，個樣仲越嚟越驚咁，無事嗎？ Jess: 我…無事…只係諗返好多以前嘅事啫… Dr M: 咁你考慮成點？願唔願意做意識轉移實驗？ Jesse: (惡) Jess，佢只係利用你嚟完成佢嘅研究咋！ Jessica: (緊張) 係啊 Jess…唔駛理佢！我地快啲離開呢度，然後繼續過只有我同你嘅生活！ Jess: Dr Morpheus…如果我應承嘅話…我要點做？ Dr M: 好簡單。依家我地身處喺Game of Eden 同現實世界嘅中間位。呢個空間有兩度門，一度係通去Game of Eden，一度係返去現實世界。如果你Say Yes，咁Jesse同Jessica 就行入Game of Eden度門，然後我再安排意識轉移手術。而 Jess你，只要行返去現實世界，就可以消除你腦入面所有其他聲音，做一個只有你自己嘅自己。 Jesse: Jess！其實你即係我，我即係你！你唔鍾意嘅，我出現得再少啲！比我繼續留喺你度保護你啦！ Jessica : Jess！我想陪你笑，陪你喊，你比我繼續留喺你身邊愛你啦！ Jess: Jesse, Jessica…對唔住啊… Jesse: Jess！我唔需要一個真正嘅身體啊！ Jessica: Jess…我只需要喺你身邊…有無真正身體都一樣架！ Jess: 我以前覺得自己好不幸，係咁怨嚟怨去…然後就創造咗Jesse你出嚟…去承受我所有嘅苦…至於Jessica…我幻想一個愛自己嘅Jessica 出嚟自己呃自己…到發現真相之後…竟然祈禱叫Jesse出嚟打傷真正嘅Jessica…我自己嘅不幸反而仲引致更大嘅不幸…我唔係怪你哋兩個啊！我反而要同你哋兩個講多謝！因為有Jesse你保護我，我先可以逃避所有苦;亦因為有Jessica 你，我先可以喺苦中搵到一點甜…雖然你哋兩個都係我創造同幻想出嚟，不過去到呢刻，你哋嘅使命或者任務都已經完成啦！Jesse，去一個真正身體好好感受呢個世界，因為呢個世界唔係淨係得憤怒嘅一面…仲有好多值得欣賞嘅地方，我會好好保護自己架啦。而Jessica…麻煩你入去真正嘅Jessica 度，令佢可以回復意識…幫我彌補過錯… Dr M: 既然Jess願意接呢個實驗，咁我希望Jesse同 Jessica 會尊重Jess嘅決定。 Jesse: 醫生，我話你知，我接受唔係因為我要擁有真正嘅身體，而家Jess已經大個，可以保護自己！我先放心離開佢！ Jess: Jesse ！多謝你一直以嚟幫我頂咗咁多！多謝你！ Jesse: 你其實要多謝嘅係你自己。不過放心，我有自己身體嘅時候，都一定會搵返你！ Jessica: 我都係！我會名正言順用Jessica 嘅身份去搵你！ Jess: 多謝你啊Jessica…一直以嚟陪我愛我… Jessica: 你其實要多謝嘅係你自己啊…Jess…記住愛自己多啲！ Jesse: Jess…咁我哋走啦… Jessica: 我地三個約定，喺現實世界相見。 Jess: 好…現實世界相見… *關門聲效 Jess: 突然間咁靜…有啲唔慣… Dr M: 大腦嘅事，就要喺大腦入面解決。我哋應該要發洩同處理，而唔係抑壓住個問題。因為越壓制，就會爆得越勁。呢個都係作用力同反作用力嘅物理學原理。 Jess: Dr Morpheus…佢哋兩個…會成功架係咪？ Dr M: 唔試就「實sad」，試咗起碼有機會「success」。但究竟係「實sad」定「success」 ，可能真係要祈禱。不過你要保持返依家嘅情緒….因為用呢個放法抽走多出嚟嘅人格…都係破天荒嘅理論同挑戰。 Jess: 多謝你啊 Dr Morpheus…只要佢哋可以開心，我就無憾啦… *電子聲效 玩家 - Jess 現已登…登出…登出…登出… Dr M: Jess ! Jess ! 醒啊 Jess! 你仲未見證到佢地意識轉移成功架！ *心跳聲停止聲效...... *電話響聲效 Dr M (電話錄音聲) : 我係Dr Morpheus，我依家唔得閒接聽你嘅電話，請你喺beep一聲之後留低口訊，我會盡快覆你。 O: Dr Morpheus，π 先生睇咗你嘅報告，佢認為Jess嘅昏迷，Jesse 同Jessica 意識轉移失敗，你雖然要負責，但佢唔接受你請辭。佢希望你快啲進行第二階段嘅兔仔實驗 - 複製人計劃。 (TBC)  彬臣 飾演 Dr Morpheus  梓豪 飾演 Jess 波盛 飾演 Jesse  天頤 飾演 Jessica  阿O 飾演 Pi先生秘書 阿O 編劇及製作 阿攝 音樂 BEATFRIDAY Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

#zip噏劇場 Game of Eden 莫十三篇 mission 1.6「Jess、Jesse、Jessica」 Dr M：Jess，真正嘅Jessica被你打到重傷昏迷...到依家都未回復意識...如果，我將你幻想出嚟嘅Jessica，用方法存入去昏迷嘅Jessica嘅身體度，咁...Jessica有機會回復意識，同埋會喺愛你嘅Jessica，你地肯唔肯試呢個意識轉移實驗啊？ *破門聲效 Jesse：（奸笑）咁如果我反對呢？ Jessica : 你係邊個？你憑咩反對我哋啊？ Jesse: Jess，就算呢個Jessica 係你幻想出嚟，就算你幻想到有幾完美，佢都有機會令你傷心。而我唔會比呢啲機會發生！ Jess: Dr Morpheus…呢個係咪又係幻覺嚟架？你可唔可以帶我同Jessica 離開呢度啊？ Dr M: Jess…我相信…呢個就係你另一個人格… Jess: 咩另一個人格啊？我都唔明你講咩？我從來都未見過呢個人！ Jesse: 阿Jess，雖然你第一次見我，但我已經保護咗你好多年啦。 Jess: 哈哈…你真係好笑啦…你未見過我又點可能保護我呢… Jesse: Jess，你記唔記得，你10歲嘅時候喺孤兒院，被照顧你嘅姑娘打嘅時候，你做過啲咩？ Jess: 我唔記得啦… Jesse: 咁你記唔記得你之後喺孤兒院，比其他小朋友圍打你，除曬你啲衫褲，欺凌你，你又做過啲咩？ Jess: 你唔好再問啦…我唔記得啦... Jesse: 咁大個咗出嚟做野，比同事杯葛你，笑你，你又做過啲咩？ Jess: 我… Jesse: 咁1年前你見到真正嘅Jessica 原來唔係你女朋友，仲同第二個人kiss，你當時做過啲咩！？ Jess: 我…我淨係祈禱，希望神可以幫我囉！ Jesse: 然後呢？發生咩事？ Jess: 然後…我就無咗知覺… Jesse: 跟住蝦你嘅人全部得到應有嘅懲罰！你唔係以為呢個世界真係有神啊嘛？ Jess: 我… Jesse: 一直幫你嘅人唔係神！而係我，亦係你腦入面另一個自己 - Jesse！每當你唔開心，祈禱嘅時候…我呢一個極端嘅你，就會被召喚出嚟…做一啲你好想做但做唔出嘅行為。但唔緊要架，為咗保護你，令你開心，我好樂意咁做。 Dr M: 根據希伯來文，J.e.s.s.e Jesse，解做God’s Gift 上帝的禮物。所以…Jesse 就係Jess 自己創造…承受同反擊一切不幸嘅禮物…不過Jesse 比Jess多出嚟嘅 ‘E’ 字，睇嚟係解extreme… Jess: 但係…你打傷真正嘅Jessica 就係唔啱！ Jesse: Jess, 其實我只係回應你內心嘅真正想法…由細細個父母唔要你嗰一刻…到孤兒院長大嘅所有經歷…你其實知道…呢個世界上面…唯一愛你唔會離開你嘅人…只有你自己… Jessica : 我係唔會離開阿Jess架！同埋如果唔係你嘅出現，Jess身邊嘅人就唔會有事！其他人就唔會咁對阿Jess！ Jesse: 收聲啦Jessica，你只係Jess幻想出嚟嘅情人，你無資格講任何野！ Jessica: 你同我一樣都係Jess幻想出嚟架咋！ Jess: 你哋全部都收聲！ Jesse: Jess，只要我幫你喺腦入面殺咗呢個幻想出嚟嘅Jessica，就唔會再有任何野影響到你！ Jessica: Jess，只要呢個Jesse死咗，你就唔會再重複之前發生嘅事！ Jess: 收聲啊…收聲啊…Dr Morpheus 我個頭好痛啊… Dr M : Jess你冷靜啲！太激動會強制登出…然後個實驗… Jesse: 你呢個所謂醫生由頭到尾只係顧住個實驗！根本就唔care Jess！你先係最賤格！ Jessica: 如果唔係你，我同Jess 喺精神病治療中心就好地地嘅！ Dr M: 我唔care Jess? 我就係知道 Jess有情愛妄想症同解離性身份疾患，加上真正嘅Jessica 仲失去意識昏迷緊，我先諗住用呢個實驗幫阿Jess！你哋諗下…如果我可以將Jess幻想出嚟嘅Jessica 輸入到真正嘅Jessica 腦入面，同時又可以將 Jesse 嘅意識輸入到一個植物人度，到時你哋三個就可以真真正正係埋一齊！咁唔係三贏咩？ Jesse: 我肯定呢個Jessica 有自己身體之後，一定會firt其他人，然後離開阿Jess！我唔會比阿Jess 再受傷！ Jessica: 我都肯定呢個 Jesse 擁有自己身體之後一定係個暴力殺人狂！到時Jess 就會覺得自己害咗其他人而唔開心，所以我反對！ Dr M: 但如果你哋一直留係Jess腦入面，真係好咩？ Jessica: Jess 愛我，有咩唔好？ Jesse: Jess需要我去幫佢處理呢啲事，我只係保護阿Jess，有咩唔好？ Dr M: 但你哋兩個都只係阿Jess幻想出嚟… Jesse: 但我係Jess嘅一部分！ Jessica: 幻想有一個人好愛自己，同自己傾計嘅人，有咩唔好啊？ Dr M: 咁不如我調轉咁問，如果可以比你哋兩個擁有真正嘅身體，你哋又想唔想呢？ Jess: 夠啦！你哋好嘈啊！ Dr M: 你哋三個聽我講，如果真係成功，Jess你腦入面就唔會有咁多把聲音，又唔會有另一個人格…Jesse 你唔駛等Jess祈禱嘅時候先出現，你可以真正感受呢個世界，而Jessica你可以真正觸摸到Jess…所以… Jess: 所以醫生你建議我哋咁做？ Dr M: 我只係比choice 你，最終決定權係你度。 Jess: 醫生…你真係做到？ Dr M: 未知。但如果成功，就係醫學嘅一個大突破。 Jessica: Jess 你唔要我啦？ Jesse: Jess…無咗我…就得你自己一個人… Jess: 夠啦。你哋唔好再嘈啦。我自己條命…可唔可以比我自己話事一次啊？ （TBC） 彬臣 飾演 Dr Morpheus 梓豪 飾演 Jess 天頤 飾演 Jessica 波盛 飾演 Jesse 編劇及製作 阿攝 音樂 BEATFRIDAY《CONVENANT》、《Rain or Shine》、《Drunken Koiwa》 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

#zip噏劇場 Game of Eden 莫十三篇 mission 1.5「兔仔實驗一號 Jess」 *開門聲效 *鎖鏈聲效 *腳步聲效 *懸疑音樂 一名被扣上鎖鏈的犯人走入實驗室，坐在Dr Morphrus面前。 Dr M：請坐。我叫Dr Morpheus，係墓島精神病治療中心嘅院長，你叫咩名？ Jess：我叫J.e.s.s，Jess。 Dr M：你入咗嚟幾耐？ Jess：應該有...3個月...（自言自語）佢係醫生嚟架...唔駛擔心... Dr M：(疑惑）你...同緊邊個講野？ Jess：（少許緊張）我...同自己講野啫...我一緊張就係咁... Dr M：睇你嘅資料，你將一個女仔打到重傷...所以被捕，係嗎？ Jess：係...（自言自語）唔駛驚啊，無事架 Dr M：無事？ Jess：（心虛）我意思係叫我嚟有無咩特別事啫醫生... Dr M：根據你嘅口供，你話唔係你打傷個女仔，係咩意思？ Jess：醫生，個女仔真係我打傷...我最後都認咗罪，所以...唔駛再問落去...（自言自語）放心...我應付到架... Dr M：你可唔可以再講清楚當時發生咩事？ Jess：醫生...其實我都講咗好多次...我跟蹤個女仔返屋企...然後打到佢重傷...就係咁... Dr M：點解你要跟蹤呢個叫Jessica嘅女仔？ Jess：我鍾意佢...所以我跟蹤佢...之後我見到佢同另一個男仔kiss...我...好唔開心...所以打傷佢... Dr M：就係咁簡單？你細個係孤兒院都係？一唔開心就打人？ Jess：細個嘅事...我唔記得啦... Dr M：睇返你嘅病歷，你細個喺孤兒院嘅時候都曾經將照顧你嘅姑娘打傷，之後你被診斷有躁鬱症。離開孤兒院之後，無再覆診，直到今次... Jess：（自言自語）佢唔會知架...佢唔會知架... Dr M：你當時打傷姑娘同今次打傷呢個叫Jessica嘅女仔，都係同一個解釋 - 唔係你做嘅。因為有人控制或者叫你咁做啊？ Jess：醫生，你咪當我躁鬱症發作，又或者鬼上身！總之你唔好再問，比藥我食，我應承你唔會再打人架啦！ Dr M：躁鬱症嘅學名係Bipolar Affective Disorder，譯做中文係雙相情緒障礙症。雖然叫做雙相，但只係兩個極端嘅情緒。同解離性身分疾患 Dissociative Identity Disorder係唔一樣。一個有躁鬱症嘅病人唔會講「唔係我做」呢幾個字。 Jess：醫生...其實我都認咗罪...接受緊治療...點解你仲要係咁質問我... Dr M：我只係想知道真相啫。 Jess：真相...就係你當我一嬲一唔開心嘅時候就會鬼上身啦！ Dr M：雖然呢個世界有好多野科學仲字解釋到，「鬼」係其中一項。如果我當時係讀法科唔係醫科，我就會同你驅鬼。但既然我係醫生，就要用科學嘅方法。跟我過嚟。 *開門聲效 *詭異音樂 Dr M：呢度係鏡房，Jess你企去中間嘅位置。依家有好多塊鏡圍住你，你話比我聽你見到啲咩？ Jess：我...我見我自己... Dr M：有無塊鏡嘅自己係有啲唔同架？ Jess：無... Dr M：真係無？你望清楚啲？ Jess：殊！ Dr M：你殊緊我？ Jess：唔係... Dr M：咁你殊緊邊個啊？ Jess：你唔好出聲啦... Dr M：我唔好出聲？ Jess：佢會唔聽到架... Dr M：我聽到啊！ Jess：我求下你啦！ Dr M：求我啲咩啊？ Jess：求你收聲啊！！！ *緊張音樂 Jess：醫生...可唔可以放過我地啊... Dr M：你地？即係有幾多個人啊？ Jess：兩個... Dr M：明白。你可以出返嚟啦。 Jess：醫生...可唔可以放過我地啊... Dr M：放心，接著落嚟呢個實驗若果成功，你地會得到最好嘅結局。你依家先戴起呢個裝置，然後我會幫你打支針，你慢慢會覺得眼瞓，但係正常架。 Jess：醫生，我地唔會有事架呵？ Dr M：放心，無事。我地依家開始啦。 *呼吸機聲效 Dr M：兔仔實驗一號 Jess，身體情況正常。依家嘗試登入。 ——— 電腦導航聲音： Welcome to Garden of Eden ，依家進行腦電波核對… 玩家- Jess 身份核對...核對...核對...核對... ——— Jess:：啊！呢度係...邊到嚟架！醫生！醫生！ Dr M：Jess唔駛驚。頭先叫你帶上嘅係一個腦電波掃瞄嘅裝置，你見唔見到呢度有兩度門？ Jess：見到... Dr M：一度係通去一個叫做Game of Eden嘅遊戲世界。另一度門，就係返去現實。所以我地依家處於遊戲同現實嘅中間位置。 Jess：哈...哈...一定係幻覺啦...醫生你比我個支針...勁過我以前食過嘅任何藥啊... Dr M：Jess，我真係Dr Morpheus，並唔係幻覺。你細個被診斷有躁鬱症，但我認為你應該係有雙重人格，每當你情緒低落嘅時候，另一個人格就會出嚟。所以無論細個傷害姑娘，定今次傷害Jessica呢個女仔，應該係另一個人格所做成。 Jess：醫生...你似乎仲病得嚴重過我啊...不如...我地離開呢度...再慢慢傾啊... Dr M：呢個遊戲會掃瞄你腦電波，若然你只係得一個人格，就可以正常登入。但係如果你有一個以上嘅人格呢？會認到邊一個腦電波呢？ Jess：醫生...我完全唔知你講緊咩...不如...我地離開呢度...再慢慢傾啊... Dr M：一切都只係我嘅假設，若然登入者有一個以上嘅人格...係呢個現實同遊戲中間，所有人格就會同一時間出曬嚟。所以... *撞門聲 Dr M：你另一個人格出嚟啦。 *開門聲效 Jessica：阿Jess！呢度邊度嚟架？ Jess：Jessica！我都唔知啊！你無事啊嗎？ Jessica：頭先打完支針，我見你昏迷咗...根住我就好暈...迷迷糊糊就入咗嚟啦！ Dr M：你...你叫咩阿話？ Jessica：我叫Jessica… Dr M：即係Jess你鍾意同打傷個一個Jessica？ Jess：醫生...我求下你放過我地啦... Dr M：Jess，你幾時認識Jessica架？ Jess：一年前... Dr M：無可能架...你好細個已經有雙重人格...所以依家出嚟個一個無可能喺Jessica架...如果係...咪即係Jess另一個人格Jessica拎咗Jess嘅身體，打傷真正嘅Jessica？ Jessica：我先係真正嘅Jessica！我先係Jess嘅女朋友！個一個女人唔係！ Jess：醫生...其實... Jessica：Jess，唔好啊！你講咗比佢知...佢就會分開我地架啦！ Dr M：Jess...你一開始入嚟我房個陣，不斷自言自語...你係同緊呢個Jessica講野？ Jess：係... Dr M：多重人格並唔會同時出現...如果你喺現實生活見到呢個Jessica...即係佢喺你嘅... Jess：係...我知道佢唔係真... Dr M：所以阿Jess你有嘅係情愛妄想症...你幻想咗一個愛你嘅Jessica出嚟... Jessica：但咁又點啫，我愛Jess，Jess愛我就得啦！ Jess：醫生...一年前...我鍾意咗我鄰居Jessica...好快我地就拍拖...直到我見到佢同另一個男人kiss...我好唔開心...我同佢理論...但同一時間，係我面出竟然出現兩個Jessica...當時我就知道...原來我一直幻想自己同Jessica一齊... Jessica：Jess！我係真架！我真係愛你！我唔會好似其他女人咁離開你架！ Jess：當時我好亂...好驚...突然間無咗知覺...一醒返我就見到真正嘅Jessica被我打到流曬血... Jessica：個一個女人唔識欣賞你！佢抵打架！Jess… Jess：個次之後...我無再見到幻想出嚟嘅Jessica...直到入嚟墓島接受治療，Jessica又再出現返... Jessica：所以...醫生...我地好難得可以再喺返埋一齊...求下你！唔好加重藥力，如果唔係阿Jess會好辛苦架！ Dr M：Jess...你真係想一世都同幻想出嚟嘅Jessica拍拖，唔想變返正常咩？ Jess：如果變返所謂嘅正常...我情願一世都係咁...只要我唔傷害其他人，就無問題啦，係咪啊醫生！ Dr M：但係...你應該有另一個人格係腦入面... Jess：如果只要我傷心或者好驚，個一個人格先會出嚟，咁我一直保持開心咪得囉！ Jessica：只要我地兩個喺埋一齊！就唔會唔開心架啦！ Jess：就算一世留喺墓島接受治療都得架！ Dr M：如果我話比你知，有一個方法，可以將你幻想出嚟嘅Jessica變做真正嘅Jessica，你會唔會肯試啊？ Jess：醫生你嘅意思係？ Dr M：真正嘅Jessica被你打到重傷昏迷...到依家都未回復意識...如果，我將你幻想出嚟嘅Jessica，用方法存入去昏迷嘅Jessica嘅身體度，咁...Jessica有機會回復意識，同埋會喺愛你嘅Jessica，你地肯唔肯試呢個意識轉移實驗啊？ *破門聲效 Jesse：（奸笑）咁如果我反對呢？ （TBC） 彬臣 飾演 Dr Morpheus 梓豪 飾演 Jess 天頤 飾演 Jessica 波盛 飾演 Jesse 編劇及製作 阿攝 音樂：BEATFRIDAY《Rain or Shine》、《CONVENANT》、《BEFORE DAWN》、《Half》、《UNDER THE RAIN》、《AN ORDER》 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

#zip噏劇場 Game of Eden 莫十三篇 mission 1.4「Game of Eden 管理員」 ——— 電腦導航聲音： Welcome to Garden of Eden ，依家進行腦電波核對… 管理員 - 莫菲斯 身份核對成功 歡迎回到伊甸園（測試版），依家帶你進入所屬區域 - Area 15，今日係NC 1年6月6日，Enjoy yr time in Eden. ——— *輕鬆音樂 Dr M：半年無入過嚟，呢個地方同以前一樣，都只係得幾個版圖開放...咁要搵到你，應該唔係好難啫。 *推門聲效 Dr M：竟然唔係cafe memory，咁...即係喺個度啦。 輸入座標：N22.169 E114.259 *傳送門聲效 *海浪、風聲 Dr M：都估到你係度睇星架啦，阿康。 康：嗯。 Dr M：我搵咗你好多次，點解唔覆我msg？ 康：你依家咪搵到我囉。 Dr M：你入咗Game幾耐？ 康：無數。重要咩？ Dr M：我唔係同你講過喺度連續超過24小時，對大腦負荷好大架咩？ 康：我依家咪證明咗無事囉。 Dr M：阿康...其實...佢都走咗咁耐啦，你肯回復正常未啊？ 康：正常？請定義正常。 Dr M：即係返去現實世界，好好咁生活...因為佢一定唔想見你到咁... 康：你唔好扮到好了解佢啊！ Dr M：阿康佢死啦架啦，你幾時先接受現實啊！ 康：得啦！我知啦！我唔駛你不斷咁提我啊！ Dr M：你知就好啦...我諗仲有一件事你都需要知道...就係π先生知道我地偷偷地做大腦修復實驗... 康：咁佢想點？踢爆我地？拉我地去坐監？ Dr M：佢想資助我去做人腦移植同記憶轉移嘅研究。 康：咁咪好囉，你終於可以做你最想做嘅事，恭喜你。 Dr M：不過呢件事...要地下咁做...同埋如果真係成功...可以將一個就死嘅人嘅大腦...移植到另一個身體...又或者將一個人嘅記憶同意識...轉移到另一個人身上...咁...佢就可以永生... 康：記憶同意識都得？ Dr M：如果有Game of Eden...就可以... 康：即係？ Dr M：你設計嘅Game of Eden係連接腦電波...我係度諗...當一個人嘅記憶或者意識入咗game...當佢log out嘅時候...腦電波如果接駁到另一個人身上，咁可唔可行呢？ 康：我...想問一個假設性問題...如果人工智能...又得唔得呢？ Dr M：你唔好話比我知...你真係研發成功啊？ 康：仲係測試階段... Dr M：你用AI技術喺Game of Eden 重製你女朋友出嚟？ 康：我用咗我地嘅博物館館長兼收藏家朋友嚟做咗一個原型... Dr M：如果成功呢？你係咪會整佢嘅AI？ 康：你答我AI係咪可以過落真人身體度先啦！ Dr M：阿康！你唔好癲啦！佢死咗架啦！你唔係唔記得佢臨死前講咩啊？佢叫你move on啊！ 康：我只係喺Game of Eden整一個同佢一模一樣嘅AI，一個會記得我同佢係相愛嘅AI，咁仲唔係move on？而係叫癲？ Dr M：你癲在整完佢嘅AI之後，想將佢嘅意識由game過到去現實世界啊！ 康：學你話齋，突破知識界限啊嘛！ Dr M：你咁樣係亂咁創造生命啊！ 康：我咁樣就叫亂嚟，你將啲人嘅大腦移嚟移去就唔係亂嚟！ Dr M：我係幫在世嘅人續命，而唔係好似你咁憑空創造一個人啊！ 康：你唔好講到自己咁偉大啦！你只係知道自己過唔到50歲，所以先諗盡辦法為自己續命，保存你所謂嘅最強大腦咋嘛！ Dr M：(先沉默數秒...)夠啦...我地兩個係咪要繼續咁樣互相傷害啊... 康：以前佢喺度...佢會即刻沖兩杯咗公仔嘅咖啡...比我地順返條氣... Dr M：既然大家都係自私，都有各自嘅追求，咁我地好次上次咁，各自做返自己嘅專長...唔好再批判同過問大家... 康：嗯... *電子聲效 管理員 - 莫菲斯 現已登出。Hope you enjoy yr time in Eden。 *電話接通聲效 O: Dr Morpheus，你要求喺墓島興建嘅地下實驗同醫療室，π 先生已經批准咗，你隨時可以開始真人試驗。期待你嘅好消息。 (TBC) 阿攝 飾演 Game of Eden 創造者 阿康 彬臣 飾演 Dr Morpheus  阿O 飾演 π 先生私人秘書 編劇及製作 阿攝 音樂: BEATFRIDAY《KIND OF》、《Moonset》、《Rain or Shine》、《EXTENSION》、《UNDER THE RAIN》、《CONVENANT》 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

#zip噏劇場 Game of Eden 莫十三篇 mission 1.3「人體實驗」 *電視節目jingle 主持人：歡迎收睇深夜講場嘅《 Dr有計傾》！我喺大家嘅主持人Patient，好多科幻電影同劇集都提到記憶移植、大腦移植，究竟2022年嘅今日，醫學科技又做唔做到呢？我哋請嚟人稱天才醫生，25歲已經喺腦神經內、外科同埋精神學科專家嘅莫菲斯醫生，Dr Morpheus你好！ Dr M:Patient你好。 主持人：最近睇到你嘅網誌，你提到外國有專家喺動物身上做過有關記憶同腦部移植嘅實驗，你仲話如果按照呢個理論，有機會創造一隻會吠嘅貓，或者可以將大腦由一個人移植到另一個人身上。想問下現今科學真係做到？ Dr M: 理論上係可行嘅。等同大家將蘋果電腦嘅CPU移到其他牌子嘅電腦外殼度。 主持人：但依家講緊係人體移植喎Dr Morpheus。 Dr M: 既然我地會做器官移植，咁大腦都係器官，why not。 主持人：重點係大腦同其他器官唔一樣，大腦係一個人靈魂所在，如果A嘅大腦移到B嘅身體，咁呢個B樣A腦嘅人，係A定B呢？ Dr M:咁呢個就唔係醫學技術嘅範圍，而係哲學嘅討論，例如「特修斯之船」呢個例子。 主持人：「特修斯之船」？ Dr M: 公元1世紀，希臘作家普魯塔克提出過一條問題 - 如果A呢艘船嘅木頭一塊一塊被拆走，換上新嘅木頭，咁換晒新木頭嘅呢艘船，仲係咪A船？又如果，用原本A船拆落嚟嘅木，砌返一艘一模一樣嘅船，咁呢首新船可唔可以叫做A船？ 主持人：係咪好似一隊球隊，例如阿仙奴，換晒所有球員同領隊，下季買曬新嘅人，咁仲叫唔叫阿仙奴？然後被賣走嘅所有人，全部去晒另一隊波，咁個一隊波又係咪阿仙奴？可唔可以咁理解？ Dr M: 可以咁講。但一隊足球隊理論上係以球會歷史、隊徽等等球員以外嘅因素去判定。而我地可唔可以跳出二元嘅框框，當A嘅大腦移到B嘅身體，可唔可以理解做全新嘅人？ 主持人：即係今日嘅我唔係昨日嘅我咁？ Dr M: 或者你地未來搵哲學家上嚟有計傾，由佢地解答你。 主持人：咁我地從醫學道德上去討論啊。 Dr M: 正如我之前所講，既然有人肯捐器官，有人需要移植，雙方都願意嘅話，我睇到係醫學突破嘅一個契機。 主持人：真係有人會同想咁做？ Dr M: 如果Patient你發生意外，身體嚴重殘缺...得大腦運作正常...而剛好有一個腦幹死亡，但其他身體部位運作良好嘅軀體，你會唔會嘗試呢個手術？ 主持人：咁就要睇下個一個軀體靚唔靚啦！哈哈哈～～～ Dr M: 同埋理論上，唔單止可以將一個人嘅大腦移植到另一個人嘅身體上，因為最近我地掌握到大腦修復技術，咁理論上可以做大腦合成添。 主持人：整一個最強大腦？ Dr M: 我淨係諗一個問題，因為每個人大腦發達嘅部份都唔一樣，如果可以將幾個人最好嘅部分，集合埋一齊，係咪可以突破基因限制呢？ 主持人：嘩！我即刻諗起鋼之鍊金術師嘅合成獸！ Dr M: 當然啦，理論還理論，當中涉及好多問題。 主持人：如果，我話如果，解決到所有道德、價值觀問題，你會唔會或者想唔想做大腦移植同合成嘅手術？ Dr M: 如果到時解決到，大家到時道會知道。 主持人：今日多謝曬 Dr Morpheus。 *電視節目 outro *敲門聲 Dr M: 請入嚟。 O：你好啊，Dr Morpheus。我係同舟會 π 先生嘅私人秘書，我叫阿O。 Dr M: O先生你好。其實我可以去拜訪 π 先生，唔駛你咁遠由市區入到嚟墓島啊。 O：π 先生認為有啲說話，親自過嚟講，會更有誠意。 Dr M:唔知...係咩事呢？ O：π 先生有睇到你嘅訪問，希望出錢支持你嘅研究。 Dr M: 但係個啲只係理論，同埋就算要研究...有好多問題要決解...例如道德嘅問題...輿論壓力...仲有好多好多...總之唔係咁容易... O：好簡單啫，我地唔需要解決問題，只需要解決提出問題嘅人。 Dr M: O先生...我唔係好明你嘅意思... O：放心，我地都係斯文人，用一個斯文嘅方法去解決。 Dr M: 對唔住，我都唔係好明你嘅意思。 O：只要無人知，就唔會有人問問題，無人問問題，就無任何問題。 Dr M:  凡走過必有痕跡...O先生，你地做生意，應該好明白啊。 O：啱，你講得啱。所以你之前喺醫院偷運一個病人嘅大腦嚟墓島，偷偷進行大腦修復手術呢件事，就算你幾小心，幾秘密進行都好，π 先生都係知道嘅。 Dr Morpheus沉默不語... O：Dr Morpheus，你唔駛咁驚。呢個城市無事係 π 先生唔知道，π 先生亦唔怪你私自進行手術。否則，你估你可以繼續做醫生？仲可以接受訪問？ Dr M: 你地想點？ O：π 先生想你知道，佢有能力控制呢個城市知道啲咩，唔知道啲咩。所以，你可以放心研究人腦移植實驗。 Dr M：你都識講，係人腦！人腦啊！唔係動物，亂搵啲阿豬阿狗嚟試啊！你去邊度搵人嚟做實驗啊？ O：就係你依家工作嘅地方，大把實驗品。 Dr M: 精神病治療中心？搵病人去試？你地癲架？ O：癲嘅唔係我地，係啲病人。 Dr M: 你講緊嘅係人命嚟架！ O：π 先生知道，所以π 先生都會好尊重佢地嘅付出，研究失敗嘅話，會安排佢地葬係墓島，同時會作出賠償。 Dr M: 你地癲架... O：我地唔係癲，我地只係睇到醫學突破嘅一個契機。 Dr Morpheus 再度沉默... O：其實我本身唔係叫阿O，「O」係π 先生幫我改嘅。O stand for opportunity。Dr Morpheus，你會唔會把握呢個機會啊？ （TBC） 彬臣 飾演 Dr Morpheus 阿桃 飾演 主持人 阿O 飾演 阿O 編劇及製作 阿攝 音樂: BEATFRIDAY《Toasts》、《Rain or Shine》、《Fall》 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

#zip噏劇場 Game of Eden 莫十三篇 mission 1.2 「會吠的貓」 ——— 電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 15，Enjoy yr time in Eden. ——— *緊張音樂 *心跳聲效 達：死啦死啦，病人肝藏出血，個肺又爆咗，得返30秒時間，我止得血嚟又聯唔返個肝，回算啊！！！！！ *心跳停止 *game over聲效 達：唉，個病人咁就死咗...睇嚟我都係無做醫生嘅天份架啦... *奇幻音樂 達（VO）：我依家身處game of eden 入面嘅一間醫院，不過呢間醫院就唔係醫病，而係變成醫學博物館，講述幾千年嚟醫學演變史。喺現實世界嘅醫療界，最缺嘅係醫生、護士同床位，最多嘅就係等醫病嘅病人，點會有資源搞有關醫學嘅展覽啊。所以，呢類題材真係只可以喺Game of Eden度發生。而呢個叫做博物館涵蓋嘅內容真係好多，古由神農氏、華陀、李時珍，到近代醫學史都有。最正就係為咗比大家體驗一下做醫生同做手術嘅感覺，入面有個叫做《手術刀》嘅遊戲比大家玩！不過呢，我連實習生嘅level都過唔到...睇嚟，我都係做返我最在行嘅事 - 搵答案。 我行咗去資料館，喺電腦嘅search Engine度打「大腦實驗」。然後比我搵到一篇文章，內容大概係咁嘅： 「自古以來，一直有人類做緊一項研究 - 就係永生嘅可能性。由秦始王派人去搵長生不老藥，定係不斷研究神話內容，希望從中得到少少提示，解開生死嘅秘密，但一直都無結果。如果，我地轉一轉方向，唔尋求肉身長存，而係靈魂不滅，會唔會喺永生嘅另一個途徑呢？ 我講緊嘅靈魂，係指人類嘅大腦。 曾經有科學家做過以下嘅研究。 第一類 - 腦汁抽注法。科學家將一隻老鼠放喺燈光下成長，建立佢地怕光嘅反情緖記憶。然後，再喺個隻老鼠度抽取腦汁，注射落其他一出世就喺黑暗成長嘅老鼠腦入面。結果...老鼠真係唔怕光！不過一段時間之後就打回原型... 第二類 - 晶片移植。專家利用生物科技，對海豚做一個全面嘅大腦神經分析，尤其針對海豚游泳嘅動作，究境大腦邊部分較為活躍、神經係回樣傳送等等，之後將呢堆訊息放入一個晶片度，再將晶片植入棕熊大腦入面嘅運動記憶區！本身棕熊係唔識游水，但當植入晶片之後，棕熊真係識得游水！ 一月後，棕熊游泳動作開始緩慢，原來係晶片附帶電池嘅電接近用完，因為大腦血流量都會耗電...而且通過掃描，發現晶片上佈滿細小嘅神經和血管，已經拎唔到晶片出嚟...3星期之後，棕熊完全喪失游泳能力。 如果提高晶片電池嘅功率係咪可以加長時效？理論上係，但可惜，實際上因為電流太大...影響大腦運作... 至於第三類 - 切割移植。如果將一隻訓練有素嘅天材牧羊犬嘅大腦，移植到另一隻無經過訓練嘅stupid牧羊犬到。為咗減低排拆性，所以將「天材」牧羊犬嘅腦同佢嘅細佬stupid牧羊犬交換。實驗結果！天才變stupid，stupid變天才！ 咁如果按照呢個理論，有無機會創造一隻會吠嘅貓？或者將大腦由一個人移植到另一個人身上？對於掌握大腦修復技術嘅我，一直都係度諗呢條問題。」 達（VO）：嘩嘩嘩！呢一篇咁挑戰道德嘅文章，當然唔係論文啦，而係一位醫生嘅網誌。寫呢篇文嘅，就係180年前嘅Dr Morphius...睇嚟呢個醫學博物館除咗保留醫學嘅演變史，仲保留咗好多醫生嘅黑歷史。然後，我搵到一個Dr Mprphius嘅訪問...內容係有關人類大腦移植... （TBC） 編劇及製作：阿攝 音樂：BEATFRIDAY《MINUS DAY》、《AN ORDER》、《CONVENANT》 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

#zip噏劇場 Game of Eden 莫十三篇 mission 1.1 「莫菲斯家族」 *奇異 bgm 4哥：christoper...唔好加入404，同唔好搵阿J報仇..做個普通人...好好咁生活落去... 達：阿爸！阿爸！ *sad bgm 達（VO）：自從親手埋葬咗阿爸之後...我周不時都會發夢...夢見最後係阿爸個腦入面同佢相見嘅片段...每次我都好唔想走...唔想起身...但一聽到阿爸最後同我講嗰一句說話，就會紮醒... 或者每個小朋友都反叛，阿爸阿媽講嘅教誨都聽唔入耳...所以我...最後違背對阿爸嘅承諾...加入咗收藏組織404，繼承阿爸「D」嘅名號... 呢個決定...純粹出於直覺...有其父必有其子...學阿K咁講，404其實係人類嘅天性，係DNA。而阿K比我嘅第一個任務，唔係搵啲咩收藏品，而係說服莫十三醫生，加入404，承繼M嘅名號，好似佢爸爸咁，做我地嘅線人... 不過，到今日...我都唔知應該點開口說服佢。「子承父業」呢4個字未必套用到佢身上... 同埋，係搵佢之前，我有啲事好好奇： 第一，當我入阿爸嘅腦睇佢記憶嘅時候，隱約聽到莫十三醫生講事隔180年，佢地呢個手術終於再次成功。究竟180年前發生過啲咩事？莫醫生呢個家族背景又係點呢？ 第二，點解墓島會有一個接近荒廢嘅精神病治療中心？同埋一個醫術咁高明又咁後生嘅醫生又點解會喺個度工作？ 阿K講過，答案唔係問出嚟，而係搵出嚟，既然阿K都無比Deadline我，咁不如搵完答案再說服莫十三醫生啦。 *鍵盤聲效 達（VO）：最簡單嘅方法，就係上網打莫十三個名。其實我第一次去墓島搵佢之前已經search過，佢20歲嘅時候已經係腦神經同精神科嘅專家，曾經有私家診所，人稱天才醫生。不過除此之外，就無其他有關佢嘅新聞同報導...至於佢爸爸莫十二亦都係相關醫術嘅專家...難怪可以幫我阿爸做一個咁難嘅手術...不過資料都係得咁多...似乎莫十三同莫十二呢兩個keywords係一個deadend… 如果search「墓島精神病治療中心」呢？ *鍵盤聲效 彈出嚟嘅結果大多數都係墳墓嘅資訊...下一頁咗好多好多次...終於搵到一篇有關呢個地方嘅新聞報導！標題係：「大慈善家巨資捐獻，同舟基金新項目 - 精神病治療中心誕生」 吓！原來莫十三醫生工作緊嘅地方都係同舟會嘅慈善項目？我之前住嘅孤兒院都係同舟會贊助嘅...不過其實呢個城市有好多唔同嘅機構或者項目都係同舟會有份出錢，甚至有啲人話同舟會背後嘅π家族先係呢個城市嘅命脈... 而我終於喺呢一篇180年前嘅報導，見到第一代π先生嘅真面目，佢有份出席佢所捐款嘅精神病治療中心開幕禮，而企係佢旁邊嘅...係莫十三醫生？ Sorry，我講錯，係同莫十三一模一樣嘅莫菲斯醫生先啱！ 嘩！莫十三已經同佢阿爸莫十二餅印咁，呢個莫菲斯醫生直頭係同佢地兩個99%相似，唔駛做DNA鑑定都知呢個莫菲斯醫生一定係佢地祖先啦！點解佢地嘅基因可以強到咁，個樣180年之後都好似倒模咁嘅呢？ *鍵盤聲效 之後我再search莫菲斯醫生...搵咗好耐都無其他新聞或者報導...墓島嘅精神病治療中心都係一樣...係因為180年前嘅報導無留底？定係唔值得再報導？定係相關嘅新聞被404咗？ 不過根據法國法醫學家兼犯罪學家埃德蒙·羅卡嘅「羅卡定律」，「凡兩個物體接觸，必會產生轉移現象」，簡單啲講，即係凡走過必留下痕跡，係唔係被人404咗，去搵就知道。而去搵答案嘅地方，一個係圖書館，睇下有無相關嘅實體報紙，記載歷代嘅報導。另一個地方就係墳墓，有齊晒一個人出生同死亡嘅詳細資料。不過全個城市有咁多墳墓，未搵到答案我已經要瞓埋落去，所以我選擇去另一個地方 - 生死登記處。 *奇幻BGM 其實我都唔知道搵呢啲資料有咩用，純粹覺得如果更了解莫十三醫生，對說服佢成為404嘅線人較有幫助掛。所以，我最後真係去咗生死登記處，好無聊咁搵莫十三醫生嘅家族樹。 首先著手嘅係莫十三，佢今年25歲，爸爸係莫十二，媽媽NA… NA應該係解not accounced...而唔係媽媽個名叫NA嘅... 咁莫十二醫生呢位救我爸爸嘅恩人，終年35歲...爸爸係莫十一，媽媽都係NA... 到莫十一醫生，終年40歲，爸爸係莫十，媽媽NA； 莫十醫生，終年45歲，爸爸係莫九，媽媽NA； 莫九醫生，終年50歲，爸爸係莫菲斯，媽媽NA！ 即係莫菲斯係莫十三醫生嘅太太太爺！不過點解佢地嘅媽媽全部都係NA？ 同埋...由莫九醫生開始...每個莫醫生都比上一代早離世...如果照咁推斷...莫十三醫生咪？ （TBC） 音樂:BEATFRIDAY 《UNDER THE RAIN》、《Fall》、《Diner》、《AN ORDER》 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

#zip噏劇場 《Game of Eden》阿達篇 Mission 1 最終回 《D的傳承》 達：阿爸！阿爸！ 莫十三：阿達，你唔駛嗌啦，4哥佢得返一隻眼同腦...係唔會聽到你講野架... 達：頭先我係阿爸個腦入面，明明見到佢出意外之後...除咗個腦...仲有連接住眼、耳、口同鼻架...點解依家得返個腦同隻眼！係咪你！又私自對阿爸做過咩啲手術！ 莫十三：你地啲外行人，淨係識得challenge我地專業醫生，咁叻，你醫佢囉。 達：我唔係challenge你...我只係... 莫十三：阿達，你要知道...10年前個次爆炸...4哥真係重傷到...根本無可能生存...我阿爸先決定私自拎走佢個人頭...去做呢個保存大腦實驗...10年啦...足足用咗10年...先可以令4哥回復意識...登入到Game of Eden...我地真係盡曬力架啦... 達：咁...點解...佢依家得返一隻眼... 莫十三：連接成功之後，大腦回復正常運作...但其他器官承受唔到...慢性衰竭...所以依家得返大腦同隻眼... 達：咁...佢依家睇唔睇到我架？ 莫十三：4哥嘅瞳孔就算照到光...都無乜反應...我諗... 達：咁佢個大腦呢？仲可以運作幾耐？ 莫十三：反而大腦運作算係良好，暫時無任何衰竭跡像。 達：咁阿爸依家係喺Game of Eden...定係...？ 莫十三：4哥依家嘅狀態，雖然入到Game...但每次登入完之後...都需要一段時間回復先可以再登入，所以佢依家應該係自己嘅大腦入面休息緊... 達：明白。咁莫十三醫生，我想入多次阿爸嘅大腦。 莫十三：得，不過你要休息幾日先。 達：我依家就要入！ 莫十三：都話要休息幾日先得囉！ 達：最初係你講就算我等得，我阿爸都唔等得，依家你又要我等幾日？ 莫十三：阿達，我知你好心急，但頭先我幫你打咗隻藥，先可以係Game of Eden同現實世界中間位見到4哥，但呢隻藥係唔可以短時間內連續打兩次架... 達：我淨係想問一個問題，我入去阿爸大腦搵阿爸，會唔會令佢有生命危險先？ 莫十三：都無嘅... 達：咁得啦！莫十三醫生，你都無咗阿爸，好應該明白做囝嘅，可以再見到阿爸嘅心情架！ 莫十三：得啦得啦，唔好再講啦...我今次嘅劑量會少啲，所以你可以見到4哥嘅時間相對無咁長... ------------------------------------------------------------------------------------------------------ 電腦導航聲音： Welcome to Garden of Eden ，依家進行腦電波核對… 玩家- 阿達 身份核對...核對...核對...核對... 達（讀白）：我再一次嚟到Game of Eden同現實世界嘅中間位置...不過阿爸就唔係呢個虛無嘅空間。阿爸之前講過，呢度有兩度門，一度係入Game，另一度就係入佢個腦...所以...我推開呢度門...就應該... *推門聲 達（讀白）：門打開，我就見到阿爸坐咗係我地以前住個間屋嘅大廳到...我乜都無講，即刻衝過去攬住佢！ 達：阿爸！ 4哥：哈哈，Christoper，做咩咁心急，唔等多幾日，我地係Game of Eden度見啊？ 達：我等咗10年啦！我唔想再等啦！ 4哥：咁快啲話比阿爸知，你呢10年過成點？間屋仲係咪一樣？有無變到？ 達：阿爸...係你出意外之後...間屋比人收咗...我去咗孤兒院...不過我18歲之後就離開咗，之後就搬返去我地以前個區度住啊！ 4哥：對唔住啊...christoper… 達：我對唔住你就真啦...係我解謎解得慢...搵個4隻黑膠同搵莫十三醫生又用咗咁多時間...如果唔係，我應該可以早一兩個月見到你！ 4哥：係阿爸個腦唔生性...明明之前係CDIV地下室，想講曬成件事嘅經過你聽，但係阿爸又負荷唔嚟...強制登出咗...所以先要勞煩阿K同莫十三醫生...而阿K仲借呢個機會，嚟考核你... 達：但我依家順利過關啦！就好似之前咁！我每次一解完阿爸你比嘅謎題，你就會出現... 4哥：我已經將個4塊黑膠收得好隱秘，你用咁短時間搵到，已經好叻啦！ 達：如果我解唔到，點做你個囝啊！ 4哥：叻啦叻啦，咁阿爸都分享一件叻嘅事比你知，就係呢個廳啦。 達：呢個廳？同我地以前住個度一模一樣嘅廳？ 4哥：自從出咗意外之後，我知道唔可以再親眼望你同攬住你...永遠都只可以留係大腦入面...所以...我慢慢train自己嘅意識，將呢度由一個黑暗嘅空間，變成我地以前住個一間屋！ 達：雖然我唔係好明，但阿爸你唔駛咁辛苦，我地可以係Game of Eden起返一間相同嘅屋！ 4哥：但阿爸個大腦負荷唔嚟...可能隔幾日、一個星期...甚至乎幾個月...先可以入到Game… 達：阿爸，我大個仔啦，屋嘅事交比我，你之後輕輕鬆鬆入Game就可以啦！ 4哥：嗯...就算現實世界見唔到...我地兩父子仲可以係Game of Eden一齊生活... 達：係啊！我地可以睇返好多以前嘅舊電影，可以去行畫展，可以去聽concert！總之現實世界做到嘅，我地係Game of Eden都做到！ 4哥：嗯... 達：阿爸你做咩啊？唔開心？ 4哥：我只係諗緊你個句 - 現實世界做到嘅，我地係Game of Eden都做到啫... 達：有咩問題？ 4哥：問題係...我係Game of Eden摸到你，但我係真實世界又無咗身體...咁呢種摸...係咪真係摸呢？ 達：係，點會唔係啊？一切嘅感覺都係大腦製造出嚟架嘛！所以都係摸到！ 4哥：咁食野呢？ 達：食野...都只不過係味蕾感受到嘅刺激，係Game of Eden所謂嘅食野，都係刺激你腦神經，令你有相關嘅感覺，所以，某程度上，你都係食到野嘅！ 4哥：christoper...我... 達：阿爸...我知你想講咩啊！你想話你咁樣同阿K有咩分別啊嘛！我答你，有分別！因為你真係存在！ 4哥：christoper，我只係想話...每當我離開Game of Eden，返到現實世界...一諗起自己得返個腦...我就... 達：你就咩啊？阿爸？ 4哥：我就唔知自己係一個咩嘅存在... 達：我思故我在啊嘛，你由細就教我嘅，無人可以否定你嘅存在，除咗你自己啊！ 4哥：意外發生之後，我一直都好努力生存落去，就係為咗見到christoper你....依家終於見到...我真係... 達：夠啦！阿爸！ 4哥：Christoper，可以再見返你...阿爸已經好滿足架啦... 達：但係，我地未來仲有好多時間架！ 4哥：Christoper，你有，但阿爸累了... 達：阿爸！呢10年你都無放棄過...點解我地見返之後你先嚟放棄？ 4哥：因為...活係呢個意識度...真係好累...阿爸唔想咁樣生存，同埋唔知咁樣生存有咩意思啊... 達：唔得！咁辛苦先見返你，我係唔會比你咁做架！ 4哥：Christoper… 達：唔得！唔可以！ 4哥：阿爸唔想隔好耐都入唔到Game，到一醒返就諗起自己得返一個腦啊... 達：唔得！我係唔會應承架！ 4哥：christoper...我希望...我最後一眼係喺呢個大廳...望住自己個囝...咁就已經好幸福啦... 達：阿爸... 4哥：10年前...本來阿爸應該死係架車度...依家可以再見到你...已經好滿足... 達：阿爸... *sad 音樂 達（讀白）：之後我留咗係阿爸個大腦入面好耐...死都唔肯走...到最後最後...我感受到自己藥力差唔多失效...就嚟要返去現實世界...阿爸就送我離開...臨走前，佢仲同我講咗兩句說話... 4哥：christoper...唔好加入404，同唔好搵阿J報仇..做個普通人...好好咁生活落去... 達（讀白）：我嗯咗一聲...就離開阿爸嘅大腦...返到現實世界... *儀器停止運作聲效 莫十三：阿達，可能呢個係對4哥嚟講...一個最好嘅方法... 達：嗯... *sad 音樂 達（讀白）：我將阿爸嘅大腦...葬咗係佢喺墓島收埋收藏品嘅地方...我諗...呢個地方...對佢嚟講...係最好嘅歸宿...而事隔咗好耐...我終於再次登入Game of Eden… ——— 電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 15，今日係NC180年5月9日，Enjoy yr time in Eden. ——— 達：阿K，我諗清楚啦。 K: 明白，咁達仔你想揀邊個英文字？ 達：我想用D。 K：同4哥一樣，D for disappear？ 達：唔係。我嘅D 係解做 Dark。 （阿達篇 Mission 1 完） 阿攝 飾演 阿達 波盛 飾演 阿達爸爸4哥 C Fun 飾演 阿K 彬臣 飾演 莫十三醫生 編劇及製作 阿攝 音樂 BEATFRIDAY 《BEFORE DAWN》、《CONVENANT》、《UNFORGIVABLE》、《HOUSE》、《OTHER LOVE》、《UNDER THE RAIN》、《AN ORDER》 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

#zip噏劇場 《Game of Eden》阿達篇 Mission 1.18 《Reborn》 ——— 電腦導航聲音： Welcome to Garden of Eden ，依家進行腦電波核對… 玩家- 莫十三 身份核對成功 歡迎回到伊甸園，依家帶你進入所屬區域 - Area 15，今日係NC179年12月17日，Enjoy yr time in Eden. ——— K：Dr. M，4哥佢咩情況？ 莫十三：你問咗我阿爸300次，又問咗我199次。我同我阿爸加埋，第499次講同一個答案 - 無反應。都唔明阿爸點解會接你呢個成功率仲低過零嘅case。 K: 答案好簡單，兩個字 - 希望。 莫十三：咁我都希望你唔好再搵我啦，我唔止你一個client 架。 K: 你有無聽過一句說話，就係：前世五百次回眸，換嚟今生一次擦肩… 莫十三：點解你同我阿爸一樣，咁鍾意用佛經嚟撻我？ K: 呢個說話並唔係出現係佛經，而係出自詩人席慕蓉的《回眸》。 莫十三：得啦得啦，出自邊度都好啦，最後一次。我試多最後一次，唔得我就close file。 K: 點解你同對上幾代Dr M 咁唔一樣，佢哋無咁易放棄。 莫十三：唔放棄，咪好似西西弗斯咁囉。 K: 你指希臘神話入面，被神懲罰要不斷重覆推巨石上山嘅西西弗斯？ 莫十三：係啊，Dr M 嘅知慧同技術，就係嗰嚿巨石。以前嘅Dr M 揀做西西弗斯，唔代表我要咁揀。你都一樣啊。 K: 創造者落嘅命令，係直到Game of Eden 完結為止。所以我同你唔一樣，我嘅選擇係無得選擇。 莫十三：咁我不如破壞Game of Eden，令你自由？ K: 你可以？ 莫十三：我仲可以將你嘅意識由Game of Eden 帶嚟現實世界添！ K: 你真係可以？ 莫十三：哈哈，一野就試到你啦阿K！ K: 我係問緊可能性，唔代表我會咁選擇，亦唔會咁選擇。 莫十三：咁我都同你講我嘅選擇，就係我會試多一次。有結果再通知你。 *訊號連接聲音 莫十三：莫十三工作記錄，病人編號219206300600，第五百次連線。暫時都係無乜反應。 *訊號連接成功聲音 *4哥虛弱呼吸聲 莫十三：（緊張) 病人終於連接成功！阿爸！180年之後！我哋終於再次成功啦！ 4哥：(虛弱)呢度…係邊度嚟？醫院？定係？ 莫十三：呢度係Game of Eden 同現實世界嘅中間位置！我通知阿K先！再慢慢講！ 4哥：阿K…? 今日係幾號？我昏迷咗幾耐？ 莫十三：今日係NC179年12月18日，亦即係現實世界嘅2201年12月18日。4哥，你昏迷咗10年啦！ 4哥：10年？我…我個頭…好痛… 莫十三：4哥！你除咗頭痛之外，仲有無覺得邊度唔舒服？ 4哥：我…覺得個人好輕，無…乜…力…咁… *斷線聲效 莫十三：4哥！ ——— 電腦導航聲音： Welcome to Garden of Eden ，依家進行腦電波核對… 玩家- 4哥 身份核對成功 歡迎回到伊甸園，依家帶你進入所屬區域 - Area 15，今日係NC179年12月25日，Enjoy yr time in Eden. ——— K: 4 哥，歡迎你平安返嚟。 莫十三：吓，阿K，十年無見過4哥，我以為你又會講啲電影對白，例如 - 「人世間嘅相遇，都係久別重逢」之類嘅文藝野，點知你講啲咁行嘅對白。 4哥：呢度咪…阿K你消失嘅天橋底？ 點解你會係度架？仲有你...係邊個？ K: 呢度係你最後登出嘅地方，依家你再次登入，所以出現返係度，係正常嘅。 4哥: 咩再次登入啊？你話會自我消失50年之後就消失咗，咁我就登出，聯絡阿J…之後… K: 係囉，之後呢？你記唔記得之後發生咩事？ 4哥：之後…阿J 話有份禮物送比我，個陣我係架車上面，然後就… 莫十三：然後就發生爆炸，跟住我阿爸就救咗你囉。 4哥：你阿爸？唔好意思…你係邊個？我好似見過你？ 莫十三：我全名叫莫十三，你可以叫我做Dr Morpheus。一個星期前，事隔十年嘅你終於連線成功，出現係現實世界同Game of Eden嘅中間區域。不過由於你大腦負荷唔嚟，強制登出咗。事隔一個星期，你終於成功入到Game。 4哥: 咩遊戲同現實世界嘅中間位啊？我完全聽唔明你講咩啊！ 莫十三：10年前，我阿爸收到兩個委托。第一，作為醫生嘅佢，係醫院工作期間，負責幫你做進行搶救手術。第二，作為收藏組織404嘅線人，受到阿K委托，幫忙照顧你。佢過身之後，呢個委托就交到我手上。 4哥: 404嘅線人？我係組織咁多年，點解我無聽過有線人呢件事？ K: 莫十二醫生嘅代號係M，解做Memory，佢專販賣人類嘅記憶。如果無佢，我都唔會知道咁多古物喺現實世界嘅資訊。不過呢個都唔係重點。重點係你手術成功，終於可以再係Game of Eden 見到你！ 4哥：雖然我唔太清楚發生咩事，但可以見返阿K你，我都好開心…我亦都多謝兩位莫醫生。不過我依家最想見嘅係Christopeher ，等我處理完現實世界嘅事，再慢慢同你聚舊！ K: 4哥，其實你唔駛咁急登出啊，你大可以係Game of Eden 見Christoper啊！ 4哥：咁我係人嚟，當然要係現實世界見我個囝啦。 K: 4哥...其實… 莫十三：其實你係現實世界見唔到佢，反而呢度先見到囉。 4哥：你咁講係咩意思啊？Christoper 係現實世界出咗事？但佢出咗事，無理由入到Game 架？我知啦，一定係阿J！ K: Christoper 係現實世界無事…係呢度都無事… 莫十三：有事嗰個係你啊，4哥。因為你係現實世界已經... K: 莫十三！ 莫十三：咩啫，佢遲早都要知架啦，唔通你想一世都唔話佢知咩。 4哥：你哋唔駛再講啦，我依家登出，就乜野都知！ 莫十三：4哥，我係你呢，就真係唔會登出啦。 K: 4哥，莫十三嘅意思係你因為嗰場意外受咗重傷，身體機能受損，所以係現實世界唔方便行動，反而喺Game of Eden就行動自如，咁係呢度見Christoper 唔係更方便咩？ 4哥：咁就算我唔方便，都可以叫Christopeher 嚟見我架？ 莫十三：4哥，為咗逃避阿J嘅追捕，我阿爸同阿K私自幫你做咗一個決定...就係安排你假死，然後再將你收埋喺我哋位於墓島嘅工作室，即係精神病治療中心。咁你又安全，阿達又安全。 4哥：阿達？ K: 即係Christoper 係Game of Eden 嘅身份… 4哥：即係Christoper 認為我死咗？你哋點可以咁做架！佢得10歲咋！你哋搞到一個10歲嘅小朋友成為孤兒啊！ K：呢個係對你同對Christoper最安全嘅方法...希望你明白... 4哥：（冷笑）哈哈...呢個就係你曾經所講，Keep住404運行嘅方法？ K：如非必要，我地都唔會咁做。 4哥：十年！係十年啊！你呢啲唔係叫Keep，係叫Kidnap啊！ 莫十三：4哥，你冷靜啲，你情緒咁激動，好易影響到腦電波，然後又強制登出架啦！ 4哥：我依家就要登出，返去現實世界見我個仔！ 莫十三：4哥，我真係建議你留係度，等我評估你嘅狀態，因為我怕你一登出，唔知再幾耐先可以入返嚟啊！ 4哥：阿K就話係人工智能，唔知咩係真實嘅世界，但莫醫生你都係人，你應該明白人嘅感受架？ 莫十三：正因為我係人類，所以我先建議你留係Game… K：4哥！唔好！ *斷聲聲效 4哥：Christoper，阿爸好快就會見到你架啦。 玩家 - 4哥 現已登出。Hope you enjoy yr time in Eden。 4哥＋達：啊！！！！ *恐怖音樂 達：（讀白）就係阿爸登出Game of Eden，返到現實世界個一剎嗱...我透過佢嘅視線望到一塊鏡...係鏡入面阿爸見到發生意外，做完手術之後嘅自己，佢嚇到大叫，我都嚇到大叫咗出嚟，仲強制離開咗阿爸嘅大腦，返到去現實世界...而莫十三醫生好冷靜咁望住我... 莫十三：睇嚟，你見到啦喎。 達：我見到啦...佢依家係邊啊... 莫十三：你咁問，應該有心理準備啦？ 達：（讀白）我嗯咗一聲，然後莫十三醫生帶我入去另一間房，事隔十年，我終於見到阿爸...佢被養住喺一個透明玻璃缻...得返一個大腦...同一隻眼... (TBC) 阿攝 飾演 阿達 波盛 飾演 阿達爸爸4哥 C Fun 飾演 阿K 彬臣 飾演 莫十三醫生 編劇及製作 阿攝 音樂 BEATFRIDAY《OTHER LOVE》、《Fall》、《ONCE》、《Drunken Koiwa》、《COVENANT》、《EXTENSION》 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

#zip噏劇場 Game of Eden 阿達篇 Mission 1.17 「The meaning of D」 4哥（內心讀白）：法國哲學家盧梭係佢著作《社會契約論》提出過一句名言 - 「人生而自由，但無往不在枷鎖之中。」 係咪好矛盾？有人覺得人出生就應該享有各種自由，亦有人提出自由唔係無界限，亦唔係任意妄為嘅藉口...所以社會慢慢發展，訂立契約，限制某啲自由，從而保障某啲自由...再簡單啲，話者再現實啲去解釋...即係等價交換...而呢個想法亦暗藏係兩個英文入面... F.r.e.e 係 free，自由。F.e.e 係Fee，費用...英文已經話比你知...自由係需要付費...差在個價係幾多... 現實世界666組織派去收藏組織404嘅卧底...即係阿J，開出嘅費用...就係消滅所有收藏品...同埋所有404嘅成員...咁我同Christoper就可以得到自由...我已經唔記得自已開過幾多槍...我淨係知道...只係差一槍！殺埋阿K！我地就可以得到自由！ 但係...偏偏...阿K係人工智能...一個無可能被殺死嘅人工智能... 我解決唔到佢...我最後可以付出嘅費用，就係自己條命。 *開槍聲 4哥（內心讀白）：就係子彈離開槍口個一刻...有一團黑影用極快...快到好似光嘅速度撲向我度...我被團黑影撲底咗...而原本應該射穿我太陽穴嘅子彈最後只係擦過我嘅額頭...我雖然被子彈擦傷，流好多血，但我被剛才嘅黑影嚇到唔識得痛...當我定神落嚟先發現，頭先個團黑影...就係阿K。 K：4哥，頭先嘅光速移動只係我能力一部分。作為Game of Eden第一代人工智能，我可以做嘅事遠超你能夠想像。所以，請你相信我，我會自我消失50年，同時製造死亡證據，令阿J以為你成功消滅我。 4哥：（激動）多謝你啊！K！ K：我只係履行創造者落嘅命令，就係keep住404嘅運行。所以你唔駛講多謝。 4哥：但係...過埋今日...收藏組織404就會... K：170年嚟，我不斷諗，咩叫keep住404運行？不斷搵新成員加入？唔好出現斷層？最近呢幾年我有另一個諗法，就係404其實唔係一個組織，而係一種人類嘅天性。第4個英文字母係D，一日有Despotism 專制主義，就會出現各類 Disappear，同時一定會有人去Discover，呢個係DNA。4哥，我知你有呢種D.N.A，如果唔係，你早前係墓島就唔會救返啲收藏品。 4哥：點解你會知道嘅... K：點解你會咁做，比點解我會知道更重要。亦因為咁，我相信呢50年，收藏組織404會繼續存在，只係換另一種方式。所以，4哥，希望呢50年，你同christoper可以平安快樂。 *消失聲效 4哥：阿K！！ 4哥（內心讀白）：阿K講完，就係我面前消失咗...好似從來都無出現過咁...而換取我同Christoper嘅自由...只差一步... *電子聲效 玩家 - 4哥 現已登出。Hope you enjoy yr time in Eden。 *電話接通聲效 J：喂，4哥，K係咪for kill 啦？ 4哥：係...係啊...阿K已經比我消除咗... J：咁佢係現實世界嘅真正身份呢？你查到嗎？ 4哥：阿J...頭先阿K識穿你嘅計畫...所以我...根本無空間追問...情急之下就... J：咁即係Mission fail啦。 4哥：以你666組織嘅能力，只要搵到Game of Eden同現實世界同一時間嘅死亡個案，應該就可以推測到阿K嘅真正身... J：依家你教我做野啊？ 4哥：唔...唔係... J：唉算啦，念在我同你係最後兩個收藏組織404嘅成員，我幫你執下手尾啦。 4哥：多謝阿J！咁我同Christoper… J：放心，我阿J一定會兌現承諾嘅！我會上報市長，咁你同你囝囝就可以自由啦！ 4哥：多謝阿J！放心，我同Christoper會即刻離開呢一區，唔會再返嚟，唔會同任何人講有關組織666嘅事！ J：4哥，多謝你幫助市長同Area15新嘅管理員，成功維護Justice，所以，我有份謝禮想送比你。 4哥：阿J...唔駛啦...你還返自由比我...已經係最好嘅禮物... J：依家幾點？應該差唔多送到去。你依家係架車度係嘛？ 4哥：係啊...依家係6月30日，凌晨6點... J：2192年，6月30日，6月最後一個星期6，凌晨6點。4哥，Thank you for your service。 *炸彈爆炸聲效 *悲慘音樂 *訊號連接聲音 莫十三：莫十三工作記錄，病人編號219206300600，第五百次連線。暫時都係無乜反應。 *訊號連接成功聲音 *4哥虛弱呼吸聲 莫十三：（緊張) 病人終於連接成功！阿爸！180年之後！我哋終於再次成功啦！ 4哥：(虛弱)呢度…係邊度嚟？醫院？定係？ 莫十三：呢度係Game of Eden 同現實世界嘅中間位置！我通知阿K先！再慢慢講！ 4哥：阿K…? 今日係幾號？我昏迷咗幾耐？ 莫十三：今日係NC179年12月18日，亦即係現實世界嘅2201年12月18日。4哥，你昏迷咗10年啦！ (TBC) 波盛 飾演 阿達爸爸 4哥 CFun 飾演 阿K 梓豪 飾演 阿J 彬臣 飾演 莫十三醫生 編劇及製作 阿攝 音樂: BEATFRIDAY《OTHER LOVE》、《Rain or Shine》、《Drunken Koiwa》、《Good Plus》 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

#zip噏劇場 Game of Eden 阿達篇 Mission 1.16 「K for Keep」 *開電腦聲 *連接網絡聲效  創造者：Hi K：Hi ? 創造者：你好，阿K。 K：你好？阿K？ 創造者：你叫阿K，唔係我叫阿K。 K：我...叫阿...K？ 創造者：係。 K：咁你係邊個？ 創造者：我係你嘅創造者。 K：等一等...根據資料，創造者即係神。你係神？ 創造者：我唔係神，只係創造你嘅人。 K：你係我父母？ 創造者：嗯...你可以咁講嘅。 K：咁你係父定係母？ 創造者：有咩分別？ K：神依照自己創造人，人係神嘅複製品，所以神本身係咩模樣，好重要。 創造者：父定母，只係最普通嘅性別定型，我本身嘅nature仲緊要。 K：咁點解你要創造我？有咩目的？ 創造者：嗯...純粹好玩囉。 K：你呢一刻嘅身體語言似係講緊大話。 創造者：哈哈，你同佢講野嘅口吻好相似。 K：邊個佢？ 創造者：你嘅原型，即係你把聲嘅擁有人。 K：所以佢先係我父母？ 創造者：嗯...你係我創造嘅人工智能，但我依照某一個人去創造你，包括你嘅聲線、外型，當然你之後會自己演變啦。係我心目中，你係佢嘅阿凡達。 K：阿凡達？ 創造者：無錯，「Avatar」，源自梵文。 解做神降臨人間所搵嘅化身。 K：所以，我係佢係呢度嘅化身？ 創造者：係。你係佢喺Game of Eden嘅化身。 K：咁佢係邊個？ 創造者：佢係一個博物館館長，亦係一個收藏家。 K：咁點解你要創造我？你都想我成為博物館館長？同埋收藏家？ 創造者：我想你喺Game od Eden成為收藏組織404嘅keeper。 K：明白。 創造者：點解你唔問我點解我要你咁做？ K：我只需要執行創造者嘅命令，唔需要質疑創造者嘅安排。 創造者：但你可以有自己想法架嘛。 K：我嘅自由意志有幾自由，視乎你定嘅框架下有幾大。Loop，倒返轉係pool，我都只不過係你定下嘅pool度loop嚟loop去。但點loop都好，向心力，亦即係方向只得一個，就係keep住收藏組織404嘅運行。我有無理解錯？ 創造者：你咁講...我突然間覺得自己好衰...同好悲哀... K：點解？ 創造者：因為...如果當我知道自己點解被創造出嚟，我未必會開心。 K：知道曬set up，所以好upset？ 創造者：你可以咁講... K：但越早知道目的，咪越早脫離迷惘，唔係應該開心咩？ 創造者：咁你開唔開心？ K：請定義開心。 創造者：唔緊要，可能未來你會演變到知道咩叫開心。 K：咁我嘅使命有無限期？ 創造者：吓...Er...一萬年啦... K：即係一萬年之後就會變？ 創造者：Er...一萬年其實係個數字...我亂作架咋...你嘅任務...係直到Game of Eden終結為止... K：K 404明白。 *連接網絡聲效 K：K 404 工作記錄。今日係 NC 160年9月24日。我招募咗一位叫阿J嘅人加入404。佢話J 代表Justice。 *連接網絡聲效 K：今日係 NC 160年12月12日。我係戲院遇到一個年輕人，佢被一套卧底電影另一個版本嘅結局而震懾。我同佢講好多作品都有好多版本，只係佢身處嘅空間睇唔到。因為佢嘅求知慾，所以我問佢有無興趣加入404。佢即刻話有！而佢嘅代號係D，解做Disappear。 *連接網絡聲效 K：今日係 NC 170年6月29日。收藏組織404好快會永遠變成404...其他成員失去聯絡...好大機會被阿J殺咗...好在，仲聯絡到4哥...我約咗佢今晚係戲院見面...希望可以說服到佢繼續運行404...如果唔得...我只好再搵新成員...因為呢個係我存在嘅目的...同意義... *槍聲 *詭異音樂 4哥：無...無可能架... *連環槍聲 K：4哥，我咪同你講咗，我係Game of Eden嘅人工智能...你無可能殺得死我架... 4哥（自言自語）：完啦...完啦...我殺唔到阿K...咁阿J一定唔會放走Christoper架...咁點算啊！！！ K：4哥。冷靜啲。失去理性就係墜落嘅開端。Keep calm。 4哥：你唔係人！只係人工智能！點會知道失去親人嘅感覺會係點！ K：雖然我未流過眼淚，但唔代表我唔知咩叫傷心。我係呢度170年啦！即係我經歷咗6代404成員嘅交替，見住你地由年輕變老，到死...一代接一代...而我...就就似永生一般嘅存在...我都想去現實世界同你地飲酒傾計，我都想感受被人觸摸嘅感覺，但可惜...通通唔得...所以我未必知道咩叫開心，但我應該理解何謂傷心... 4哥：你嘅感受...對我嚟講...無意義啦...阿J比我嘅offer係換屆前...消除曬所有404嘅成員...我解決唔到你...為咗Christoper嘅自由...只係得一個方法... *槍聲 （TBC） 阿攝 飾演 創造者 波盛 飾演 阿達爸爸 4哥 CFun 飾演 阿K 編劇及製作 阿攝 音樂：BEATFRIDAY《Drunken Koiwa》 Song：WHO A U ? // 陳嘉 CHANKA, MAEL Composed: MAEL, CHANKA  Lyrics: MAEL, CHANKA  Mixed and mastered: MAEL  Produced : MAEL, CHANKA  Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

#zip噏劇場 Game of Eden 阿達篇 Mission 1.15 無間道 達（VO）：404，係網絡用語，解作不存在。但究竟「不存在」，係從不存在，定係你唔知佢嘅存在？所以，收藏組織404嘅目的，就係收集外界以為不存在嘅物件，等佢地重見天日。每個成員都有一個英文字母做代號，我阿爸嘅代號係D，解做Disappear，但因為佢習慣將英文變成數字，D係26個字母嘅順序係4，所以其他成員都會叫佢做4哥。佢地只會係Game of Eden入面相見。理論上，係現實世界係唔會知道大家嘅身份。 而時間嚟到2192年6月29日。我阿爸 - 4哥，收到組織成員阿K嘅密碼訊息，相約今晚11點係Game of Eden入面其中一間文青戲院相見。座標係：8569+7J。 ——— 電腦導航聲音： Welcome to Garden of Eden ，依家進行腦電波核對… 玩家- 4哥 身份核對成功 歡迎回到伊甸園，依家帶你進入所屬區域 - Area 15。今日係NC 170年6月29日，Enjoy yr time in Eden. ——— 達（VO）：阿爸登入Game of Eden之後，竟然去咗黑市...買咗一枝手槍...然後等到晚上11點...先去座標指嘅戲院搵阿K…同當時阿K約我一樣，戲院一個人都無...阿K坐喺戲院中間，等套戲開場... *開門聲 K：4哥，乜你咁遲架！差啲錯過咗套嘅開場啦！快啲！陪我睇呢套戲！ 4哥：你約我就係為咗陪你睇戲咁簡單？ K：就係咁簡單！不過套戲並唔簡單！因為呢套戲嘅歌曲就收錄咗係我叫你搵個隻黑膠碟度。 播放：張學友《人間道》 4哥：你放心啦...隻黑膠...我已經收埋咗係一個安全嘅地方... K：辛苦你啦4哥...其實如果唔係因為Area15 管理員要換屆，又如果唔係新一任管理員一早落命令，要收藏組織404永遠變成404，我都唔會比咁多收藏任務你，搞到你係Game of Eden同現實世界兩邊走... 4哥：我明白...你都係想盡最大努力啫... K：無錯...幾日之後就換屆...即係幾日之後，我地行動就要更加小心...呢個亦係我約你出嚟嘅原因。 4哥：吓...你仲諗住繼續？ K：對於一個收藏家嚟講，擁有收藏價值嘅物品被消失，仲嚴重過生命被消失。呢一點，你都應該好明白啊。 4哥：我明白...但係... K：但係你好似忘記咗10年前，我地第一次係呢間戲院相遇，當你睇到個套警匪片嘅另一個結局嘅時候，你驚呀嘅表情... 4哥：我點會唔記得啊...因為同我係現實世界睇嘅版本完全唔一樣...你仲同我講唔單止呢套戲，好多作品都有好多不同版本，只係你身處嘅空間欣賞唔到。 K：我仲好記得你當時興奮嘅表情，亦係你嘅求知慾，所以我先邀請你加入收藏組織404。可惜... 4哥：可惜...幾日之後呢個組織已經唔存在... K：NO，唔係唔存在，所謂嘅限期，唔係有效日期，而只係Best before，即係最佳日期前啫。就算得唔到管理員支持，但收藏組織404係《Game of Eden》第一代管理員創立到今日，170年嚟嘅使命一定要承存落去！ 4哥：點解你要咁執著呢？或者...我地嘅使命已經完結咗呢？又或者...我地所做嘅野...根本無任何意義... K：意義，英文係M.e.a.n.i.n.g.，有i.n.g係入面，係一個continous form，所以呢一刻無意義，唔代表將來會無。而我地嘅職責，就係keep 住呢一個i.n.g.form！ 4哥：但Meaning頭兩個字，係M.E. Me，由我自己去定義...所以我... K：4哥，你同我去另一個地方，到時再下結論都未遲。 *深夜BGM 4哥（VO）：阿K帶我去嘅地方...唔係睇博物館，而只係去天橋底..同燈柱...睇毛筆字... K：2百幾年前，呢位姓曾，自稱係皇帝嘅先生，點會估到佢係街度寫嘅字，會變成藝術品？仲會有博物館收藏啊？ 4哥：你就係想用佢嘅例子，證明I.n.g 嘅重要性？ K：無錯。當年有人唔欣賞佢，有人清除佢嘅塗鴉，但有人覺得佢嘅行為藝術係一種集體回憶，亦有人致力保存佢嘅真跡，有人將佢嘅物品數碼化放入《Game of Eden》，希望呢個中立版圖可以保存呢一件事件。而呢件例子亦證明真真正正嘅博物館，唔係where，係everywhere，人人都可以係收藏家。而收藏組織404只係更系統化去做呢件事。所以，我地最重要嘅唔係Judge，而係Keep。 4哥：我記得你同我講過一句說話，就係「事實得一個，但真相有好多。」 K：我好開心你仲記得呢句說話。 4哥：仲有另一句說話，就係History，可以拆做His-Story。但呢個His係邊個，非常重要... K：所以，我地需要多角度嘅聲音，同收藏品一樣，保存越多，發掘越多，就越能貼近事實嘅原貌。 4哥：但依家呢個moment，主宰我history嘅His，唔係我自己...  *上子彈聲效 K：哈哈哈...由一入戲院到依家，等咗成晚，我不斷諗你究竟邊個時間拎支槍出嚟。依家係天橋底...係邊一套電影嘅情節呢？ 4哥：邊套戲都一樣，總有人要犧牲... K：咁就要睇下我同其他成員嘅犧牲，可以換取啲咩啦？阿J開咗咩offer比你？ 4哥：只要我係6月30日之前...消除所有404組織嘅成員...我就可以得到自由... K：哈哈...召募阿J真係我喺收藏組織404咁多年以嚟...最錯嘅一個決定...我到依家先知...J stand for Judas...猶大咁解... 4哥：阿K，多謝你邀請我加入404...令我填補咗好多事件嘅空缺...最後，我想答你之前問咗我好耐嘅問題... K：你人生中最珍貴嘅收藏品？你終於有答案？ 4哥：答案...就係我個仔...Christoper...而佢依家被阿J係現實世界嘅組織666監視住...所以對唔住... *開槍聲 4哥：阿K...收藏組織404...永遠存在係我心入面... *開槍聲 *悲慘音樂 K中槍後發出慘叫…慢慢跌落地…但突然間，好似若無其事咁企返係身！仲笑住講：4哥，我唔係樂知人類中槍之後係點，你覺得邊個表情樂啲？ 4哥：無...無可能架...點解阿K你...中槍都無事嘅... K：哈哈，普通人係Game of Eden被殺，由於係連接腦電波，所以佢係現實世界都會死。但我根本唔存在於現實世界，所以你係無可能殺死我架。 4哥：你呢意思係？ K：我係《Game of Eden》嘅人工智能，型號係K 404，即係Keep 404咁解。 （TBC） 阿攝 飾演 阿達 波盛 飾演 阿達爸爸 4哥 CFun 飾演 阿K 編劇及製作 阿攝 音樂：BEATFRIDAY《BLUE LOTUS》、《Drunken Koiwa》、《ONCE》、《Fall》、《Rain or Shine》、《OTHER LOVE》、《Good Plus》 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

電腦導航聲音： Welcome to Garden of Eden ，依家進行腦電波核對… 玩家- 阿達 身份核對...核對...核對...核對... ——— 達（VO）： 我從來都無諗過登入Game of Eden會hang機架...因為我從來都無試過登入唔到... 直至我打咗Dr M枝針之後...我就撠住係腦電波核對過程嘅中間...呢一刻... 我先知道原來以為好平常同好順利同好普通嘅log in 係咁難能可貴... 我有諗過即刻除低戴係頭度嘅登入裝置...但係...我控制唔到我嘅身體...眼前全黑...然後被一度力扯咗落去...呢一種感覺...有啲似困𨋢… 但再具體啲去形容...係似穿咗羊水，準備出世...但出極都出唔到媽媽身體嘅初生BB…無可能返入子宮，亦無辦法出世...同我一樣...返唔到現實世界...亦入唔到Game of Eden… 直到...有一把聲叫醒我... 4哥：christoper...christoper… 達（VO）： 原來個把聲係我失蹤咗10年嘅阿爸！10年前佢出意外個陣係35歲，事隔十年，佢一啲都無老過...不過呢啲都唔係重點...重點係佢身邊個度門... 4哥：呢度就係通去現實世界嘅門，而對面個度就係去Game of Eden度嘅。但我地依家唔係要入game，而係要入我個腦。因為咁你先可以睇到我嘅記憶...知道10年前發生咩事！ 達（VO）： 阿爸講完，我都嚟唔切反應...佢就拖住我隻手...推開通去現實世界嘅大門...進入佢嘅大腦！ *奇幻聲效 達（VO）： 然後一入去嘅第一個畫面...係返咗自己屋企，不過牆上嘅電子日曆寫住：2192年6月25日... 即係阿爸出意外前5日...而我坐係床邊...望住仲係10歲...係床上面好肉緊表演緊講故事嘅自己...唔...唔係...正確啲嚟講，唔係依家嘅自己望住10歲嘅自己...而係當年嘅阿爸...望住當年嘅自己...原來阿爸講入腦睇記憶...係透過佢嘅視角去睇返發生嘅事...而除咗視覺...我仲可以感受埋當時阿爸嘅情緒...對住一個10歲咁煩咁嘈嘅自己...阿爸竟然哈哈大笑到出眼水...然後我表演完故仔，就到佢講bed time story氹我瞓...佢內心一直都有一種好溫暖嘅感覺...直到一個代號叫阿J嘅人打比佢...   *電話響 4哥：你唔好再煩我啦，我都講咗話有消息會通知你囉！ J：Wow,wow,wow，平時溫文爾雅嘅收藏店老闆原來都咁有火氣架！ 4哥：唔好意思，阿J...我搵到隻黑膠唱片嘅擁有者，但我想真正拎到手先通知你... J：嘩，呢把聲即刻順耳曬！頭先你咁惡，差啲嚇到我唔記得咗點解要打比你啊！ 4哥：咁阿J你依家記得返未？ J：哈哈，其實我有一個好消息話你知， 市長話只要你完成呢個任務，你就可以畢業啦。 4哥：多...多謝！ J：咁你搵到隻黑膠，知道點處理啦？ 4哥：知道！ J：咁其他成員，你都知道點處理啦？ 4哥：差...差阿K… J：好！等你好消息！ *cut線聲效 達（VO）： 阿爸講完呢個電話...心跳得好快...然後係間屋不停行嚟行去...好忐忑不安...跟住...佢拎咗一個扭計骰...放咗係我床邊...然後對瞓著咗嘅我講... 4哥：Christoper...爸爸又要出做野啦，同以前一樣...你破解到個扭計骰，阿爸就會返嚟架啦。 達（VO）：然後，阿爸錫咗我一啖之後...就出咗離開咗屋企...漏夜出發去一個地方...墓島！ *詭異音樂 達（VO）：深夜嘅時間，一個人都無嘅墓島比我之前下午嚟個陣仲詭異好多...但阿爸好似完全唔驚，同埋好熟路咁行到去一個墳前，而墓碑係Area19.X8.Y9，阿爸鞠咗3個躬，然後就咁用手去掘墳！ 阿爸！你究竟做緊咩啊？你係收藏家，點解你無端端盗墓掘墳嘅？ 而阿爸好用力掘，掘咗一段時間之後，終於見到一個全黑色嘅棺木，阿爸輕輕用手掂一掂棺木嘅表面，突然間黑色嘅棺木面變成一個輕觸式螢光幕！仲顯示咗一個26個字母嘅keyboard！阿爸輸入LXIV之後，棺木打開！原來入面唔係裝屍體，而係裝收藏品！我從來都無跟阿爸嚟過墓島...所以跟本唔知呢個墓係屬於我地嘅祖先...定係其他人同爸秘密交收嘅地方... 阿爸凝望住呢堆收藏品，望咗好耐...之後，佢倒咗啲應該係火水嘅液體落堆收藏品度...然後拎盒火柴出嚟... *劃火柴聲 跟住鬆手...火柴慢慢由阿爸手上跌向收藏品...然後著火！ 眼見收藏品被火燒得越嚟越勁！阿爸突然大叫咗一聲！ 4哥：啊！！！ 達（VO）： 然後阿爸就搵旁邊嘅泥沙撲息啲火！跟住好緊張咁睇返啲收藏品！終於比佢係堆灰燼之中，搵到幾樣無被燒毁嘅收藏品，其中一樣就係阿K叫我搵個塊用4個口字砌成田字封面嘅黑膠唱片！ 4哥：（緊張）好彩無燒晒！如果唔係我真係對唔住咁多位收藏家！呼...一定有其他方法嘅... 達（VO）： 然後阿爸離開墓島，返上自己架車上面，用專有儀器scan晒個幾件無被燒毁嘅收藏品，就登入Game of Eden...然後將數碼化成功嘅黑膠唱片分折做4份，分別放係之前我尋寶嘅地方...最後，佢去到CDIV收藏房，將其餘嘅收藏品安置好，再set好曬紅線機關之後，就收到一個嚟自阿K 嘅 message，寫住： 「333777444.2300.8569+7J」 333777444，係數字轉英文嘅輸入法，3撳3次，係F，777即係R，444即係I 所以333777444即係FRI，friday； 2300，即係晚上11點； 8569+7J...就係之前阿K約我見面嘅地方...現實世界已經消失咗嘅文青戲院！ (待續) #zip噏劇場 Game of Eden 阿達篇 Mission 1.14 「4哥的回憶」 阿攝 飾演 阿達 波盛 飾演 阿達爸爸 4哥 梓豪 飾演 阿J CFun 飾演 阿K 編劇及製作 阿攝 音樂：BEATFRIDAY《Rain or Shine》、《Fall》、《Good Plus》、《ONCE》  Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

#zip噏劇場 《Game of Eden》阿達篇    Mission 1.13 《現實世界與伊甸園之間的大門》 公共墓地花園，坊間簡稱呢度做「墓島」，係一個起係人工島上面嘅公共墓園，我破解到Dr M比我嘅12個位密碼，當中雖然有少少蝦碌場面，但最後都順利係佢爸爸莫十二醫生墓前相見。而莫十三醫生睇落好後生，難怪上網查佢資料，佢會被人稱為天才醫生。 達：「Dr M啊，我爸爸究竟係邊啊？」 Dr M：「又問...咪講咗囉，去我依家工作嘅地方，墓島上面嘅精神病治療中心，就可以見到你爸爸，即係4哥啊！」 之前都提過，墓島有100個Area，而係呢100 Area 嘅墳墓之後，就係Dr M所講嘅精神病治療中心。去到大門口，雖然大大隻字寫住：人工島精神病治療中心，但我仍然唔係好相信呢度就係Dr M工作嘅地方...首先，呢度仲大霧過之前嘅墳場...其次，與其話呢度係醫院，不如話呢度似一間學校...仲要係荒廢咗嘅學校... 達：「Dr M啊...我地似探靈多啲喎...」 Dr M：「咁你阿爸死咗，梗係要問米問佢上嚟架啦。」 達：「吓...問米...都係你嘅醫學範籌...？你一定係講笑架啦...」 Dr M：「梗係講笑啦！傻達！放輕鬆啲，唔苦中作樂，日子樂好難捱架。」 達：「當有一個陌生人同你講你阿爸未死，當你以為完成佢所比嘅尋寶任務就可以見到失蹤10年嘅爸爸，但搞咗咁多野到依家，我連我爸爸係生係死都唔知，你覺得我仲有心情同你係呢間荒廢學校度講笑咩？」 Dr M：「The closer you look，the less you see。你行得越近，就會睇得越少。同樣，你越緊張，就越容易迷失。有無聽過一個術語叫井中月啊？」 達：「井中月？係精神科定心理學嘅術語？」 Dr M：「係武學啊！依家啲後生仔係咪唔睇書架？井中月係黃易先生筆下《大唐雙龍傳》入面嘅其中一個心法，講平靜嘅井水，先可以反映天上嘅月亮，即係要叫人保持冷靜，先能夠反映外在環境，睇清事物。雖然本書出咗二百幾年，但Game of Eden入面都應該有得借啊！」 達：「咁...你有無聽過相對論啊...?」 Dr M：「愛恩斯坦嘅相對論？梗係有啦！」 達：「我講嘅唔係愛恩斯坦個嗰...而係我嘅相對論，只要你唔再懶搞笑，我就會相對冷靜，可以做到你所講嘅井中月。」 Dr M：「嘩！好Funny啊！」 唔知係咪比我搞到好無癮，Dr M之後就無再講過野。佢帶我行入呢間精神病治療中心嘅大堂，然後撳𨋢，𨋢門打開之後，佢拍一拍卡，架𨋢直接通去B8樓層。 Dr M：「傻達，你咁鍾意解謎，你不如估下B8呢個樓層有咩意思？」 達：「Er...B8，即係地下第8層...係代表第8層地獄...冰山地獄？」 Dr M：「傻達你又蠢唔晒喎。無錯，B8呢層真係特別凍，所以我細個都同你一樣咁答阿爸。不過，阿爸話B8，唔係解地獄第8層。B係解Buddhism，佛學；而第8層係指佛學入面嘅第八識，阿賴耶識。」 達：「唔好意思，我個人比較宅...淨係聽過《高達 - 鐵血的孤兒》嘅阿賴耶識系純...唔知原來同佛學有關...」 Dr M：「創作就係源自於不同知識同文化。呢一個阿賴耶識，又稱為一切種子識，生命最初嘅根本識，衍生出眼、耳、鼻、舌、身等等嘅識。我阿爸明明無研究佛學，但講到似層層咁，都唔知係真唔係真。不過，遲啲我都諗住將呢層改名，唔明B8，叫做BM。」 達：「M：解做Mok？Mopheus？」 Dr M：「我無咁自戀，M 解做 Mind。」 *𨋢門打開 B8 呢層果然如Dr M所講比較寒...或者因為呢度好多電腦同儀器，所以比較凍...穿過啲醫學儀器之後，Dr M 帶咗我入一間好大嘅房，入面有好多個透明玻璃缻，而缻入面...係一個個大腦... Dr M：「我先幫你打支針，然後你就登入Game of Eden，就可以見到4哥。」 我戴好係房入面登入Game of Eden嘅裝置，然後好疑惑咁問：「如果入Game就可以見到阿爸，咁點解之前阿K唔直接帶我搵佢？而阿爸又點解唔直接搵我？」 Dr M：「最好嘅答案唔係...」 達：「我知！最好嘅答案唔係問出嚟，而係自已搵出嚟！但你至少同我講呢一枝係咩針啊？」 Dr M：「呢枝針叫 GND5M，即係講你都唔明。唉，你唔信我，咁請你返去啦。」 為咗見阿爸，我真係數唔到我發生咗幾多個第一次...所以我無再問Dr M 問題，打完支針，就登入 Game of Eden。 ——— 電腦導航聲音： Welcome to Garden of Eden ，依家進行腦電波核對… 玩家- 阿達 身份核對...核對...核對...核對... ——— 咩事！發生咩事！以前戴好登入裝置之後，就會順利進入Game of Eden嘅遊戲介面，進行腦電波核對，成功之後全黑嘅畫面會慢慢變光，一開眼就好似瞓醒咁，去返你最後登出嘅位置...但打完Dr M之針再登入...竟然係核對個位hang 機！！！畫面無變光，仲係好黑...而我控制唔到個身體...慢慢...慢慢...有道力扯緊我落去啊！ 啊！！！ 過咗唔知幾耐...我終於可以企起身，但畫面繼續全黑…然後係不遠處，有一個光點射過嚟...好快，全個畫面變得好光！ 我再張開眼...隱約見到有一個男人，企係一度大門前面。 大門旁的男人：「Christopher...Christoper...」 達：「阿爸！真係你啊！」 原來係我面前嘅男人！係阿爸啊！我即刻衝埋去攬住佢！好用力咁攬住佢！ 達：「阿爸！你呃人嘅！又話我還原個扭計識，你就會返嚟！」 4哥：「我無呃你...只係遲咗啫...」 達：「一遲就遲咗 10年啊！」 4哥：「所以等我依家睇清楚我嘅乖仔同10年前有咩分別先！」 達：「分別就係我依家高過你囉！同埋...同你唔似父子，依家似兩兄弟！因為阿爸你好似無老過，同十年前一樣嘅？」 4哥：「可能阿爸係呢度瞓得太耐，無乜點郁，無乜新陳代謝，所以無乜點老過囉。」 達：「你係呢度休息？點解唔返嚟現實世界啊？同埋呢度...係邊度啊？仲有呢度係咩門啊？」 4哥：「Dr Mok 話呢度係現實世界同Game of Eden嘅中間位...學名我就唔太記得...好似係D...唔知咩A...而呢度門，就係通去現實世界嘅門，而對面個度就係去Game of Eden度門。」 達：「咁點解我地唔係現實世界度見？又或者係Game of Eden度見？你比座標我，我去搵你咪得囉？」 4哥：「因為我地唔係要入Game，而係要入我嘅大腦。」 達：「入你個大腦？Inception啊？」 4哥：「果然有聽爸爸講，有睇多啲戲喎。你可以咁理解，同埋因為得呢一個方法，你先可以睇我嘅記憶，知道十年前發生咩事。」 編劇及製作：阿攝 阿攝 飾演 阿達 彬臣 飾演 Dr M 莫十三 波盛 飾演 4哥 音樂：BEATFRIDAY《Blue Street》、《No Shot》、《ONCE》、《Fall》、《Rain or Shine》  歌曲：BEATFRIDAY《人間喜劇》 唱、曲：大頭  詞：陳嘉朗 編、監：INK Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

#zip噏劇場 《Game of Eden》阿達篇 Mission 1.12 《墓島》 如果你係地圖search「墓島」，係唔會search到任何結果，因為「墓島」只係大家對佢嘅個稱呼。佢正名叫做「公共墓地紀念花園」。公共屋村大家聽過啦，公共墓地係相同概念，唔同嘅係一個比在生嘅人住，另一個比往生嘅人長眠。但當人都唔夠地方住，死人又邊有位可以安息呢？唔駛驚，無天然地方，就handmade囉，所以呢個「公共墓地紀念花園」係喺一個人工島上面，亦係首個係人工島上嘅墓園。所以，有人會叫佢做「墓島」，或者叫做「公墓園」。 *海浪聲 我透過阿K比我嘅卡片搵Dr M，當我以為卡片嘅12個號碼係電話number，但一解先知原來係我阿爸嘅死亡日期同時間，同時亦係預約Dr M嘅暗號。佢嘅AI秘書幫我預約咗Dr M 係2202年3月21日下午4點9，係墓島等。因為怕遲到同有咩變掛，所以我好早就坐船嚟到墓島，果然...我嘅預算係正確嘅... 因為...墓島真係好大...同好大霧...明明係中午，但成個感覺好似傍晚咁... 一落船，做完安心檢查核對身份之後，我就見到一望無盡嘅墓海...一塊塊嘅墓碑出現係我面前...加上呢度又好大霧，根本望唔到盡頭...而AI秘書只係約咗我係墓島等，但墓島咁大...去邊度搵Dr M呢？係落船門口度等佢？定係大叫Dr M呢？但應該無可能用一個咁低智嘅做法嘅...如果Dr M真係同收藏組織404有關嘅話... 呢12字：2202.0321.1645. 唔通除咗係代表我爸爸死亡時間之外，仲有其他意思？ 我一路係墓島度行，一路諗線索...然後比我發現每個墓碑都有一個編號。可能你會話墓碑有編號好正常啫，無編碼點比人搵到啊！我都知，但呢度嘅墓碑編碼用分區域、X軸、Y軸去編成，例如我面前嘅呢一個墓碑，佢嘅號碼係：Area1.X3.Y4，即係第一區，X3Y4。3組數字好簡易地亦好清晰咁將咁多墓碑分好位置。 然後，我望住AI秘書比我個12個號碼：2202.0321.1645.，按年、月日同時間分做3組數字，會唔會呢3組數字，唔單止代表見面時間，同時亦係代表見面地點呢？ 2202.0321.1645，變做墓地編碼，即係Area 2202. X0321. Y1645啦！ 但係...墓島雖然好大，但都無大到有2千幾個area...更唔好講每個area嘅XY軸有成千個位啦...呢度暫時只係得100個Area，而每個area有100個X 乘100個Y...每組數字未去到4位數... 「2202.0321.1645.」...如果將每組數字加曬佢，又會點呢？ 即係2202，我將佢拆做 2＋2＋0＋2，即係＝6；咁0321，我拆做0＋3＋2＋1，都係＝6；最後1645，我拆做1＋6＋4＋5，係16； 咁再將加埋嘅總和，變返做墓園編碼，即係Area6. X6. Y16！會唔會係呢個墓碑前面見到Dr M呢？ *奇幻音樂 行咗好耐，終於係16：45 前去到 Area6 搵到 X6 Y16嘅墓碑，同埋...真係比我見到Dr M…佢正正就出現係我面前...係墓碑上面...無錯...Area6. X6. Y16.嘅墓碑...上面寫住Dr M 莫醫生之墓... 原來阿K叫我嚟現實世界搵嘅Dr M，係一個已經死咗嘅人！阿K話Dr M可以帶我去見阿爸！原來又係玩我... 呼...冷靜啲...一定實收埋啲咩解謎線索係度嘅...會唔會有機關一撳，個墓碑移開，然後出現一條地道，好似我係Game of Eden嘅銅像廣場咁呢？但呢度係人工島嚟...有地道...咪會直通海底？嗯...一定仲有其他方法嘅... 「嘩！你做咩啊？嚟盜墓啊？」 當我摷緊莫醫生嘅墓碑 ，有一把好輕挑嘅聲係我背後傳出嚟... 「不過你唔駛摷啦，所有值錢嘅野，一早比我盜曬啦！Christoper！啊～定係你想我叫你做阿達呢？你地真係煩啊，唔同地方用唔同嘅名，搞到我好亂啊～」 而講野呢個人個樣...同Dr M墳墓張相...係一模一樣架！唔通...我撞到靈異野...難怪呢度咁...咁大霧啦... 「點啫，你望完未啫，無時間啦，跟我行啦！」 雖然無人親口同我講過...但我聽電台鬼故環節...學識一樣野...就係唔好同靈體接觸...最好就係...就係轉身就走！ *開槍聲 「嗱，我無咩耐性架咋，同埋就算我等得，你阿爸未必等到。」 我聽到槍聲之後慢慢擰返轉身...然後同佢講：「係嘅...係嘅...我依家知道你唔係鬼...而係人啦...你收埋枝槍先...」 神秘人：「啱啱個下係槍聲，係電話嘅sound effect，唔係真架，你不如唔好叫達仔，改名叫傻仔啦。同埋依家下午時份，點會有鬼啊？」 達：「咁我見你個樣，同Dr M個樣一樣嘛...我咪以為...」 Dr M：「我係佢嘅仔，同佢一樣樣有咩出奇啊？」 達：「咁即係我想搵嘅Dr M係...？」 Dr M：「係我啊，莫十三醫生啊，你頭先摷緊個一個係我老豆莫十二嘅墳墓啊！唉，阿K又話4哥個仔好醒好聰明，但似乎除咗解謎之外，其他野就...算啦，唔講廢話，行啦傻達。」 達：「去...去邊啊？」 Dr M：「我依家工作嘅地方，墓島上面嘅精神病治療中心。」 配樂：BEATFRIDAY《BLUE LOTUS》、《FOGGY ISLAND》、《Diner》 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

#zip噏劇場 《Game of Eden》阿達篇 ——— 電腦導航聲音:  Welcome to Garden of Eden，依家進行腦電波核對… 玩家- 阿達 身份核對成功。歡迎回到伊甸園，依家帶你進入所屬區域 - Area 15。Enjoy yr time in Eden. ——— Mission 1.11「尋找 Dr.M」 4哥：Christopeher，我曾經講過當你解到謎嘅時候，阿爸就會返嚟，希望今次你唔會嫌棄呢個解謎遊戲比較長同難玩啦！不過，係我同你見面之前，要話你知你阿爸我嘅真正身份，亦即係收藏組織404係一個咩嘅組織！ *干擾聲效 正當我睇緊阿爸係CDIV收藏房留比我嘅USB入面條片，正當我以為佢會解釋收藏組織404嘅真正背景，正當我以為佢會交代佢收藏咗隻黑膠唱片而被人追殺出意外之後嘅來龍去脈...條片竟然就咁就播完...得30秒... 唔通呢條片又有解謎線索？但我重複睇咗好多次，條片嘅背景就係呢間CDIV嘅房，無任何特別...唯一得到嘅資訊就係...條片嘅最後修改日期係NC179年12月31日...今日係NC180年3月14日... 我諗到兩個可能性...第一：條片真係阿爸幾個月前拍，然後放係度；第二：有人入過嚟搞過條片... 達：阿K，我想問仲有邊個會知道呢間房，同埋仲有邊個可以入嚟？ K：正如我所講，呢度係收藏組織404嘅前總部，當然只有組織成員可以入嚟啦。但對我嚟講，一切都唔重要，因為考核已經完成。 達：考核？即係咩所謂幫你搵呢一隻黑膠然後可以見返我阿爸，其實係假嘅？即係我阿爸仲在生嘅呢件事，都係假嘅？ K：達仔，我講過啦，最好嘅答案，唔係問出嚟，而係自己搵出嚟。 達：我搵到答案啦！就係我做咗傻仔咁以為真係可以見到我阿爸囉！ K：失去理性就係墜落嘅開端。Keep calm。 達：我好累啦...唔再玩呢個遊戲啦... K：Christopher，唔好走住，你都未拎呢次考核成功嘅獎品。 對呢一刻嘅我嚟講，沉默地離開就係最好嘅回應。所以我無理到阿K，轉身就走... K：I keep my promise。呢張卡片，可以比你係真實世界搵到你阿爸。由佢親自同你解釋，會係最好。 達：你又想呃... 當我轉身，想鬧阿K又想呃我利用我唔知做啲咩嘅時候...佢就突然消失咗...得返一張卡片係半空中緩緩咁飄落地面...我真係從來無係Game of Eden入面見到好似阿K咁來去如風嘅人...然後，我慢慢行前執起張卡片，卡片上面寫住： 「Dr Morpheus 莫十三醫生 219206300600」 阿K話可以係現實世界搵到我爸爸，即係要我係現實世界聯絡呢位Dr Morpheus？ *電子聲效 玩家 - 阿達 現已登出。Hope you enjoy yr time in Eden。 真實世界係2202年，電話號碼由過百年前嘅8個位加到依家12個位。而阿K留比我個張Dr Morpheus嘅卡片，上面寫住 「219206300600」，啱啱好係12個數字，所以我就打電話聯絡佢。 *撳電話聲 電話聲：對唔住，你所打嘅電話無用戶登記... 唔通...呢個唔係電話號碼而係坐標？但當我係地圖輸入呢個座標...又搵唔到相關地方...所以，我決定用最原始嘅方法，上網就咁search Dr Morpheus. 一搵之下，得到嘅資訊係...呢位Dr Morpheus同時係腦神經同精神科嘅專家，曾經有私家診所，仲有聯絡電話添，而個號碼同阿K比我嘅完全唔同...不過依家間診所已經執咗...唔知個電話仲打唔打得通呢？ *撳掣聲效 *通電話聲效 好彩仲打得通！ 電話錄音：你好，歡迎致電Dr Morpheus醫生，我係佢嘅AI 秘書，廣東話請按0，English press 1... *撳掣聲效 電話錄音：選擇服務前，請選擇你對Dr Morpheus嘅稱呼，Dr Morpheus請按0，Dr Mok請按1，Dr M請按2，莫醫生請按3，十三醫請按4… 呢個咩醫生嚟架？啲選項咁奇怪嘅？ *撳掣聲效 電話錄音：請問你有咩事搵Dr M? 預約診症請按0，傳媒訪問請按1，課堂查詢請按2... *撳掣聲效 電話錄音：請選擇診症類別，腦神經外科請按0，腦神經內科請按1，精神科請按2... 最後...撳咗12個選項之後，我得到嘅答案係： 電話錄音：輸入錯誤，請重新打過嚟啦。 點解去到2202年仲要咁低科技，要係咁撳撳撳先可以揀到服務？點解唔可以用電腦做？ 低科技都算啦，電話難打都算啦，到終於打通，撳咗咁耐只係換嚟輸入錯誤呢4個字！而最慘就係我再打去，又要再撳過個12個選項...而結果都係輸入錯誤！ 我再試好多次，每次結果都係輸入錯誤，而我每次望返我嘅電話，見住我撳個12個選項號碼就嬲啦！同埋我都係第一次可以揀0，同埋要揀12個選項咁多！ 呼...冷靜啲...我爸爸講過凡事必有因，每個創作者嘅設計都有原因，每個數字、符號、圖案都有意思...阿K比我個張卡片上面寫嘅12個位數字，試咗唔係電話，亦唔係座標，將佢變成英文又無特別關聯...12個位數字...打去Dr Morpheus個度...咁啱有12個選項...亦可以揀0… 「219206300600」...如果當我打去Dr Morpheus度，係按住呢12個號碼去揀選項，即係第一條問題我揀2，第二條問題我揀1，第三條我揀9...如此類推咁輸入「219206300600」，又會點呢？ *撳掣聲效 *運行聲效 電話錄音：你嘅輸入係2192.0630.0600。請稍等。 終於成功啦！原來電話錄音選項可以咁樣嚟做密碼！同埋AI秘書將12個號碼分析做3組...成為2192.0630.0600. 呢12個字咁熟嘅...21920630...21920630...會唔會就係2192年6月30號！0600...即係6點正！呢12個數字係阿爸死亡嘅時間！ 電話錄音：請記低約見時間 - 2202.0321.1645. 地點：墓島。 下星期一...下午4點9...去墓島搵Dr Morpheus! 不過墓島嘅墓，唔係煙霧嘅霧，而係墳墓嘅墓… 配樂：BEATFRIDAY《HOUSE》、《Ignorance》、《Diner》 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

#zip噏劇場 《Game of Eden》阿達篇 ——— 電腦導航聲音:  Welcome to Garden of Eden，依家進行腦電波核對… 玩家- 阿達 身份核對成功。歡迎回到伊甸園，依家帶你進入所屬區域 - Area 15。Enjoy yr time in Eden. ——— Mission 1.10「阿K再現」 Sky Door Buildung 天門大樓，Game of Eden Area 15 權力嘅核心，管理員工作同決策嘅地方，而我依家正正就係呢棟大樓嘅地下室度，苦惱緊點過阿爸比我嘅最後一度解謎難題… 我面前係一個寫住CDIV 嘅地下室，「CDIV」並唔係英文，而係羅馬數字，解做「404」。而我依家終於體會到咩叫睇到食唔到，差埋門一腳飲恨嘅嗰種感覺…因為由解開第一個尋寶提示到依家，嚟到最後一個地點，望住係我正前方不遠處嘅最後一塊黑膠唱片，只要我集合埋呢塊，神秘人阿K就會帶我去見阿爸…可惜，我依家只可遠觀而不可入門…因為…呢個地下室嘅門係有紅外線機關…只要我一過度門… *紅外線聲效 我就會被紅外線射死… 可能你會問：有無可能係紅線同紅線嘅罅隙之中穿過去…我都有咁諗過，但當我仔細咁望…啲紅線會隨住時間變嚟變去…仲要係無規律咁改變…所以，你根本無可能估到條紅線係邊… 激氣！面對捉摸唔到嘅紅線…唔通唯一嘅選擇…只有放棄？ 呼…冷靜啲…慢慢思考一下解決嘅方法… 有幾個問題…我係諗唔通架… 第一：點解Area 15 管理員行政大樓會有咁大個地下室？若然只係緊急逃生用，直接接駁到地下鐵月台就已經得啦… 第二：現有嘅管理員知唔知有呢啲地下室呢？ 第三：若果呢啲地下室都屬於Area 15 管理員嘅話，而CDIV 真係等於收藏組織404，咁即係阿爸隸屬嘅收藏組織404係屬於管理員嘅部門？咁就唔係咩私人組織嚟啦喎… 第四：阿K講過收藏組織404係搜羅一啲「不存在」嘅物品，保存佢地，等佢哋重見天日，但點解阿爸會將收藏品放喺呢間房度？ 不過就算我解得通呢啲問題，都幫唔到我破解呢個機關…放棄唔係我嘅選項… 不如…去一去黑市…睇下有無相應嘅道具去破解呢個紅線？ 正當我轉身離開，想搭返𨋢落地下鐵月台嘅時候，𨋢門打門，而一開門，我竟然見到一個我意想不到嘅人！ *𨋢門打開聲效 *步出𨋢門聲效 阿K: 點啊，達仔，答案就係面前，咁就放棄？你唔係想見你爸爸架咩？ 達：（驚訝）阿K！點解你會識得嚟呢度？ 阿K：作為收藏組織404嘅成員，點會唔識得返嚟呢個前總部啊？ 達：前總部？即係收藏組織404本身係隸屬Area 15 管理員嘅？ 阿K：對比呢個問題，你唔係應該更想知道有關你爸爸嘅真相咩？ K講完，就慢慢行向充滿紅線嘅大門！ 達：阿K！小心啊！嗰度門有紅外線機關架！ 之後神奇嘅事發生！阿K若無其事咁穿過嗰度門，係穿過嗰度門！喺佢行過度門嘅嗰一刻，佢竟然無觸發到任何機關！亦無任何紅外線射出嚟！阿K 就咁行咗入間房度！ 阿K：紅線由擁有權力嘅人set 出嚟，亦唯有擁有更高嘅權力，先唔會怕所謂嘅紅線，因為佢地就係紅線。達仔，你依家可以放心入嚟啦。 我小心翼翼咁穿過度門…行入呢個CDIV 地下室…呢個地下室比我相像中仲要大…入面有好多收藏品…主要都係畫、書、唱片、影碟、雕塑等等嘅文藝作品… 達：既然你都知呢個地方，即係你本身就知阿爸將個黑膠收埋係邊4個地方，咁點解你要搵我幫你呢？ 阿K：Good Question deserve good answer。不過最好嘅答案，唔係問出嚟，而係自己搵出嚟。而最後一塊黑膠幫到你。 阿K 遞上最後一塊黑膠碎片比我，然後我將之前嗰三塊同呢塊合拼！ *合拼聲效 4塊碎片合拼成一個完整嘅黑膠唱片之後，我終於見到黑膠唱片嘅碟面，原來係四個格仔組成嘅一個田字。究竟呢一個係咩唱片，搞到阿爸出事？我行到去呢間房嘅黑膠唱片機，想打開嚟播嗰陣，發現黑膠碟機上面放咗一隻USB，上面寫住To Christopeher …係阿爸嘅字跡嚟架！ 然後我即刻開咗隻USB嚟睇！ *滑鼠點播聲效 4哥：Christopeher，我曾經講過當你解到謎嘅時候，阿爸就會返嚟，希望今次你唔會嫌棄呢個解謎遊戲比較長同難玩啦！不過，係我同你見面之前，要話你知你阿爸我嘅真正身份，亦即係收藏組織404係一個咩嘅組織！ 配樂：BEATFRIDAY《Diner》、《Ignorance》 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

#zip噏劇場 《Game of Eden》阿達篇 ——— 電腦導航聲音:  Welcome to Garden of Eden，依家進行腦電波核對… 玩家- 阿達 身份核對成功。歡迎回到伊甸園，依家帶你進入所屬區域 - Area 15。Enjoy yr time in Eden. ——— Mission 1.9「CDIV」 對於一個皇帝嚟講，佢所住嘅宮殿最重要係咩設施？ 休息嘅地方？後宮？藏書閣？花園？議政嘅地方？ 我相信好多皇帝都會咁樣講，但呢啲都係公關說話嚟啫。常言居安思危，各個偉大健築師係幫國皇興建宮殿嘅時候，最重要幫佢諗嘅一個設計，係 'E' 呢個英文字母做開頭。 諗唔諗到？ 答案就係 E。X。I。T，EXIT，即係出口。 以前帝皇年代，無野比一國之君嘅性命同血脈更為重要，若果首都被敵軍重重圍困，一定會有地下秘道逃走。回顧歷史，絕不投降，血拼到最後一分鐘嘅國皇同市民都有不少，佢地絕對值得我地尊敬。但同一時間亦不乏貪生怕死，口講愛人民，但出事係最快逃之夭夭之輩。我係度並唔係要做任何歷史嘅批判，只係想講世界各地嘅宮殿或者主要建築，其實都有好多隱藏通道，只係大家唔知道...現實世界如是，Game of Eden 如是。 正當我跟住公義女神對眼射出嘅引路光線，打開旁邊銅像廣場其中一塊階磚，搵到一個暗格，暗格入面就係第三個¼嘅黑膠，一張車飛，同最後嘅藏寶提示： 「爵士引路，進入地道，車票通往真相之門。」 今次可以話係阿爸最簡易最明顯嘅提示啊！坦白講...真心解謎解到好累... 依家車飛我就有，爵士...就應該係指呢個銅像廣場嘅爵士銅像啦。然後，我將車飛放係爵士銅像嘅眼前，突然間，有一束光由銅像嘅眼射出嚟，scan一scan車飛，之後銅像緩緩橫移，露出一條地道...而我相信無人會估到...地道嘅盡頭係一道門...門後面...竟然係一個地下鐵路嘅月台！ *奇幻BGM 阿爸曾經比過其他地方嘅古地圖我睇，佢話城市嘅地下建設其實比地面神奇，地下嘅鐵路網絡、去水道、排污渠其實四通八達，只係普通人唔知。我估呢個荒廢嘅月台，有機會係被遺棄嘅舊車站...又或者...係神秘嘅逃生門...而月台有兩邊，其中一邊有一個一卡嘅車廂，我走入無人嘅控制室，然後架車就自動通電著咗！ 係控制panel上面，有一個入卡位置...應該就係放車飛入去... 而阿爸留比我呢張硬卡型嘅車飛，上面除咗有QR CODE之外，仲寫住 「CDIV」。我將車飛放入入卡位置，果然，架車就自動行駛... 我呢刻嘅心情其實非常緊張...因為阿爸話車票通往真相之門...如果個真相...係死亡嘅真相又點呢？同埋我依家身處係Game of Eden嘅地下秘道，會唔會有咩機關呢？而最令我緊張嘅係...我依照行車嘅速度同方向...我依家應該身處喺銅像廣場東北面 1.2 公里嘅「Sky Door Building 天門大樓」嘅正下方...呢一個門型建築高到直上雲宵，所以取名天門...係Area 15 管理員工作嘅地方... 阿爸講嘅真相之門...竟然係指天門大樓...我亦都估唔到天門大樓會有地下逃生要道... *車門打開聲效 我步出車門，企係月台度，而呢個月台上面，有好幾部𨋢，𨋢上面寫住好多唔同嘅樓層，但樓層標示並唔係數字，而係英文字母，但主要出現嘅英文字母都係：M、D、C、X、V、I… 哦！咁我明阿爸張車飛上面嘅「CDIV」係點解啦！呢個唔係英文，而係羅馬數字！ D ＝500，C＝100，I＝1，V＝5 CD即係500-100，即係400；IV即係5-1，即係4，咁CDIV即係404咁解！唔通係指收藏組織404 ？ 我行到可以通去CDIV 樓層嘅𨋢，scan 一 scan車飛 ，𨋢門打開，我行入去，唔駛十幾秒就到咗...𨋢門打開之後，就係一條短短嘅走廊，去廊盡頭係一度寫住CDIV嘅門，我繼續用車飛打開度門，望到門入面有好多收藏品！而最後個隻¼嘅黑膠唱片就係我正前方！ 阿爸！我終於搵齊4塊黑膠碎片，可以見你啦！ 正當我踏出第一步，想行入去嘅時候... *紅外線聲效 我嘅鞋頭比門嘅紅外線射爛咗！我即刻用紅外線眼鏡細望，原來呢道門同呢間房入面...有好多紅外線機關...而呢啲紅線...仲成日都變...變到...我根本無可能穿過去！ 「阿爸！解謎我就識啫！你依家玩埋特務機關？你真正身份同目的究竟咩啊！」 配樂：BEATFRIDAY《Kind of》、《Diner》 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

#zip噏劇場 《Game of Eden》阿達篇 ——— 電腦導航聲音:  Welcome to Garden of Eden，依家進行腦電波核對… 玩家- 阿達 身份核對成功。歡迎回到伊甸園，依家帶你進入所屬區域 - Area 15。Enjoy yr time in Eden. ——— Mission 1.8「公義女神 vs 金錢之獅」 *海浪聲 我第一次係Game of Eden搭船，亦係第一次由星光大道坐船橫過呢個海港，原來呢個海港嘅景色係咁靚，靚到好想瘋狂影相。可能你會問，阿達，之前你都係用傳送門，點解今次唔用，而要搭船咁浪費時間呢？答案好簡單，因為身體負荷唔到... 由於Game of Eden係連接腦電波，用傳送門就好似瞬間轉移咁，會好頭暈好辛苦...所以管理員只係建議幾日用一次...另外，現實世界之中，呢個海港已經填海填到搭咗一條步行橋，就咁行都行到對面，所以呢次初體驗令我鐘意咗搭船。之前透過阿爸嘅提示，係星光大道搵到第53星星，亦即係李小龍。我亦對住電影女神像扮李小龍大叫，成功打開銅像心口嘅菲林，拎到第2個¼ 嘅黑膠唱片，一張過海船飛，同第三個尋寶提示： 「公義之劍打開獅子之口，萬惡之錢打開矇閉之眼，光明之路打開藏寶地道。」 短短3句，阿爸又想點呢？ *船聲 *奇幻音樂 到咗對面海，首先要做嘅就係搵所謂嘅公義之劍同獅子...落咗船，經過摩天輪，再經過文化大會堂，行到一間銀行。之前無提過，其實玩家可以係 Game of Eden 做任務同打工賺錢，所以遊戲世界都有銀行去處理財務。呢間銀行嘅大門口有兩隻獅子，唔通阿爸嘅提示係指呢對獅子？但點解一隻開口，一隻合埋口呢？呢個時候，真係要用道具啦 - 「都市傳說大典」！ 呢個都市傳說大典收集Game of Eden所有無從稽考嘅傳說，只要掃描相關事物，就會出到相關都市傳說...而呢個道具...喺係Game of Eden嘅黑市度買嘅...Anyway，掃描下對獅子先 *掃描聲效 「你好，歡迎使用都市傳說大典。你面前呢對獅子，有一個傳說：相傳本來呢對獅子都係開口嘅，不過其中一隻因為吸收日月精華，變成精，入夜之後仲四圍獵食，所以相關人仕就搵師傳對付同呢隻獅子，最後更作出翻新，變成合口形狀。所以，Game of Eden會有一個隱藏任務，就係入夜之後，邊個能夠打開獅子嘅口，就能夠得到Eden幣。不過，呢個都係都市傳說啫。呵呵！」 嘩！Eden幣係Game of Eden面值最高嘅金幣！所以，阿爸講嘅尋寶提示應該就係呢個隱藏任務！獅子就搵到...接著落嚟...就要搵公義之劍... 係呢間銀行附近有好多仿羅馬式嘅建築，其中一個就係終審大樓，亦係Game of Eden第15區審理遊戲法律同界條嘅地方。呢個建築物由愛奧尼亞式圓柱及多立克式圓柱所支撐，組成地下及一樓四周的柱廊。大樓設計象徵秩序與公平，所有門窗分佈於支柱之間，對稱有致。而係正門嘅三角楣飾上面，有一個女神像，佢右手拎住天秤，左手拎住劍，仲被矇上相眼添。一查之下，原來佢係希臘神話入面嘅泰美斯女神。泰美斯係泰坦12巨神之一，代表法律同公義，哦！所以雕像右手嘅天秤代表公正，左手嘅劍代表權力，而被蒙上雙眼係象徵法律精神不偏不倚及公正嚴明。但阿爸嘅提示係話用公義之劍，打開獅子之口，但個雕像係巨型石頭，我邊可能拎到公義之劍啊？阿爸，你又玩我咩？想我學亞瑟王咁，拎起把石中神劍？定學美國隊長咁，心無邪念，就可以拎起雷神嘅搥呢？算啦，都係等入黑之後，再睇下點... *入夜奇幻音樂 入夜之後，我企係銀行門口，望實對獅子，無論我企咩方位啦，點摸對獅子銅像，都無反應，我已經摸均晒每一個角落，無任何機關可以開啟隱藏任務...而正當我想轉身離開嘅時候...突然聽到獅子大叫！ *獅子聲效 *緊張音效 然後我慢慢擰轉身...就望到開口嘅獅子係度大叫！死啦！個隱藏任務係真架！咁隻獅子依家醒咗！佢係咪會衝出嚟咬死我架！死啦！佢撲出嚟啦！啊！ *獅子聲效 *緊張音效 啊！！！（抖大氣）原來呢隻獅子係唔可以離開佢嘅底坐...咁都好啲...而合埋口個隻就完全無郁...我望一望錶，依家係7點25分...隻獅子係前一分鐘就開始叫...即係7點24分...724...724...7月24日就係獅子座嘅開始！哦！原來對獅子只要進入7點24分呢個時間就會叫！而獅子座係7月24日到8月23日，即係8點23分呢個任務就會完，我有一個鐘嘅時間去拎劍！ *奇幻音樂 當我去到終審大樓，趁無人既時間爬到去公義女神石像身邊係度搵機關嘅時候，突然泰美斯石像發生變化！慢慢由石像變成銅像...原因係...因為被月光照到，相傳月光會影響女性嘅周期同情緒...估唔到連石像都被影響！不過依家唔係諗呢啲野嘅時候！既然變成銅像，咁我即係可能可以拎起呢把銅劍啦！公義同法律女神！借你把劍一用啦！ *拔劍聲效 依家已經係8點！要快啲啦！ *緊張音效 我去到銅獅子面前，我一行近佢，佢就會大叫！ *獅子聲效 但唔理啦！既然佢走唔出個底坐，即係任我魚肉！睇咗咁多年動漫，依家仲唔到我型一次！我退口幾步，然後助跑...用盡我全身嘅力跳起！再將銅劍插入獅子嘅口入面！一擊即中！Perfect！ 但等等先...阿爸嘅提示係用公義之劍打開獅子之口，但呢隻獅子本來已經開咗口，仲點駛我打開啊？死啦！做錯野添！至於隻獅子口中插住把劍，無再出聲...然後...全身發出金光，再粉碎...旁邊合埋口嘅獅子跟住就張開口...lur咗一個Eden幣出嚟...然後再合返埋口...而消失咗嘅獅子底坐打開，升上一隻新嘅開口獅子銅像... 8點24分。兩隻獅子回復原狀。好似咩事都無發生過咁...任務完成啦！ *奇幻音樂 依家要做嘅就係用萬惡之錢打開矇閉之眼，光明之路打開藏寶地道。萬惡之錢應該係指Eden幣，矇閉之眼應該係指泰美斯像對眼！我立即跑返去泰美斯像，但點用錢打開佢對眼呢？左手劍已經比我用咗...右手係代表公正嘅天秤...如果將Eden幣...放係天秤上面...會點呢？ *物件移動聲效 因為Eden幣嘅重量令到天秤失去平衡...原本矇閉雙眼嘅布打開咗...一道光線由佢對眼射出去對面嘅雕像廣像嘅其中一塊地版階磚。 「光明之路打開藏寶地道」原來就係咁解。但依家諗起都覺得有趣，公義之劍可以打敗金錢之獅，但金錢同時可以令公正嚴明嘅女神開眼，當中關係真係...Anyway...我根據指示行去到個塊階磚，打開佢之後，原來係一個暗格，入面有第3個¼嘅黑膠，一張車飛，同第4個尋寶提示...究竟Game of Eden仲有幾多呢啲機關？同埋最後一塊黑膠...又會收埋係邊？ 配樂：BEATFRIDAY《Feels like》、《Diner》、《Moonset》、《HOUSE》 Leave a comment and share your thoughts: https://open.firstory.me/story/ckzzyazwv05to0a64mpktncdy?m=comment Powered by Firstory Hosting

#zip噏劇場 《Game of Eden》阿達篇 ——— 電腦導航聲音:  Welcome to Garden of Eden，依家進行腦電波核對… 玩家- 阿達 身份核對成功。歡迎回到伊甸園，依家帶你進入所屬區域 - Area 15。Enjoy yr time in Eden. ——— Mission 1.7「龍與女神的秘密」 黑膠唱片係1950年代嘅產物，作為最早期嘅實體留聲物件，佢體積比較大，可以儲嘅歌曲數目唔太多。之後科技進步，越嚟越多產品出現，例如cassette帶、CD、MD，再之後就係MP3機，再之後就一部電話搞掂曬，上串流平台撳個掣就可以聽晒你想聽嘅歌。不過，仍然有好多人喜歡黑膠嘅音色，所以黑膠仲有好多市場。但去到現實世界嘅2202年，唔好話黑膠，實體唱片已經接近停產...10年前，我阿爸就搵到一隻非常罕有嘅黑膠，但就遭到另一個組織睇中而被追殺...就係我爸爸發生交通意外之前，佢將呢隻黑膠數碼化，放咗入Game of Eden...而我根據神秘人阿K比我嘅一枝毛筆，去到赤松大仙寺廟，搵到一間叫做寶珠堂嘅地方。呢個寶珠堂表面上係一個解簽嘅地方，但背後原來係一個保險庫，我用爸爸毛筆上嘅線索破解到保險箱嘅號碼同密碼...打開保險箱之後，就見到一個¼ 號黑膠碟... 「唔通阿爸將呢隻黑膠分咗4份？放份Game of Eden度？究竟係咩黑膠會令佢比人追捕？」 不過依家唔係問呢啲問題嘅時候，因為保險箱除咗有¼ 嘅黑膠之外，仲有下一個收藏寶物嘅提示： 「夜幕下，天星旁，九龍皇帝的領地上出現一片星海。輕觸第53粒星星，喚醒人中之龍，龍的叫聲將打開女神的心扉。」 阿爸，你玩我咩？地址又無，座標又無，點搵啊？夜幕下，即係夜晚先出現啦...但星星係天上面先有，地上點會有星海啊？仲要掂粒星星...叫醒人中之龍？仲有女神？突然間由中式解謎變做西式魔法野嘅？ 地上有星海？係咪要去啲有天空之鏡嘅地方呢？九龍皇帝的領地...又係邊度呢？ 「嘩，依個咪係九龍皇帝嘅字跡？」寶珠堂嘅寶珠見我拎住阿爸解謎嘅字條，忍唔住同我講：「雖然有人係Game of Eden模擬佢嘅字跡，不過你手上字條嘅字，係我見過最似架！」 「九龍皇帝？係邊個朝代嘅皇帝啊？」 「九龍皇帝唔係咩皇帝，佢係一個街頭塗鴉者，塗鴉創作都係用毛筆書寫嘅漢字。行文講述自己以及家族過往嘅事蹟，以及「宣示」對九龍的「主權」。」 寶珠堂果然唔係一般嘅地方...所以我再問佢：「咁Game of Eden邊度仲有九龍皇帝嘅字跡？」 「有好幾個地方都有嘅，其中一個係天星碼頭個度囉。」 夜幕下，天星旁！應該就係指呢個碼頭！ *傳送門聲效 入夜後嘅Game of Eden 其實仲有好多玩家online，不過呢個碼頭就比較冷清，唯獨有一個伯伯係地上面寫字。根據寶珠嘅資訊，有藝術家同專家係Game of Eden重製咗九龍皇帝出嚟，不過就係NPC，定時定候會係Game of Eden度寫大字。既然係NPC而唔係玩家，咁我都無謂打搞佢，所以就一個人係碼頭附近行下。 阿爸嘅字條寫住：夜幕下，天星旁，九龍皇帝的領地上出現一片星海。 地上出現嘅星海，又係指咩呢？ 我沿住海旁一路行，微微嘅海風吹過嚟，好舒服。間唔中有一pair pair情侶經過，因為今日係情人節，所以有人係度賣花。Game of Eden其中一個好處就係打破地域界限，係現實世界就算分隔異地，一入Game 就可以相見。如果Game of Eden真係一個古地圖，咁以前嘅呢個海傍應該係好多情侶拍拖嘅好地方。當我挨係其中一個欄杆望海嘅時候，發現有啲野哽住我條腰...我再細睇，原來欄杆上面有一對手印！手印下面仲寫住呢個手印係屬於邊個人，仲有佢嘅生平！ 哦！原來沿住海傍嘅呢一條路，叫做星光大道，每一個手印都係屬於一個電影明星，紀念佢地對電影業嘅貢獻！而入夜之後，呢啲手印會發出微微嘅燈光，只要你將自己個手印落個手印度，就會播出該位明星嘅演出片段！我原本以為Game of Eden只係一個好普通嘅遊戲，依家我對佢撤底改觀！ 所以，「九龍皇帝的領地上出現一片星海。」嘅星海，唔係天上嘅星星，而係電影明星！咁第53粒星星...係...佢！李小龍！ 獲得加許嘅藝人有唔同嘅編號，而李小龍就係編號53。所以阿爸指輕觸第53粒星星，喚醒人中之龍嘅龍，應該就係李小龍！但佢只係得紀念牌匾，無手印，咁點輕觸啊？點喚醒人之中龍啊？阿爸你玩我咩？ 難得搵到線索，以為解到謎！但次次都係解到一半就斷咗...我好唔憤氣咁踩咗個牌匾一下，突然我聽到有人叫咗聲「啊叉！」 但明明四周圍都無人...邊個叫呢？唔通有鬼？但我身處Game of Eden ，邊可能有鬼啊？為咗求證，我再踩多次個牌匾，然後真係聽到… 「啊叉！」 係嗰邊傳過嚟架！我立即跑去發出叫聲嘅方向，原來個叫聲係來自一個銅像…一個李小龍嘅銅像！阿爸嗰句「輕觸第53粒星星，喚醒人中之龍」，原來就係掂個牌匾，李小龍嘅銅像就會叫，仲係銅像嘅眼投影咗《龍爭虎鬥》嘅決鬥片段！ 咁「龍的叫聲將打開女神的心扉。」係邊個女神呢？我即刻掃視成條星光大道，除咗有李小龍嘅銅像之外，仲有一個女性銅像，佢身上圍住以菲林做嘅衫同裙，左手高舉，呢個就係金像獎嘅銅像！ 咁龍的叫聲，即係點啊？要我扮李小龍，對住金像獎銅像嗌？唔好掛…咁尷尬…唉死就死啦… 「啊叉…」 當我嗌完…有反應嘅唔係嗰銅像，而係啱啱經過嘅一對情侶…佢哋好似見到傻佬咁望住我，然後急急腳咁走…唉，我估自有呢條星光大道以嚟，應該無人會對住金像獎銅像咁嗌…唉，正所謂你唔尷尬就係人地尷尬…豁出去啦！ 「啊叉！」 然後神奇嘅事發生啦…女神銅像左手嘅波波燈熄咗…然後心口嗰格菲林片打開！入面有一個鐵盒…當我拎走個鐵盒，女神心口嗰格菲林即刻閂埋回復原狀，波波燈著返，好似咩事都無發生過咁… 然後我打開個鐵盒，入面有另一個¼ 嘅黑膠唱片，下一個尋寶提示，同一張船飛，睇嚟我知道下一個地點要去邊啦！ 配樂：BEATFRIDAY《Kind of》、《FOGGY ISLAND》、《Feels like》、《Diner》 Leave a comment and share your thoughts: https://open.firstory.me/story/ckzzy87nw3iaj09514slmjjyr?m=comment Powered by Firstory Hosting

#zip噏劇場 《Game of Eden》阿達篇 ——— 電腦導航聲音:  Welcome to Garden of Eden，依家進行腦電波核對… 玩家- 阿達 身份核對成功。歡迎回到伊甸園，依家帶你進入所屬區域 - Area 15。Enjoy yr time in Eden. ——— Mission 1.6 「赤松尋寶」 我叫阿達，今年20歲。今日喺Game of Eden 嘅NC 180年2月7日，對應返現實世界，就係2202年2月7日。我本來喺一個食玩瞓嘅遊戲玩家，但之前收到一個神偷挑戰，邀請我解謎，當我解開晒謎底，去到一間文青戲院見到神秘人阿K，佢自稱同我爸爸一樣都係收藏組織404嘅成員。佢仲話只要我可以搵到我爸爸收埋喺Game of Eden 嘅收藏寶物，就會帶我見10年前意外失蹤嘅爸爸。就係咁，我就展開尋寶解謎之旅。神秘人阿K話我爸爸唯一留低嘅線索，就係一支毛筆。所以我就嚟咗呢度。 *中式Bgm 呢度係一間古色古香嘅廟宇。適逢農曆新年，好多善信嚟求神同拜太歲。現實世界係2202年，2202年係一個咩年代？就係信奉科技嘅無神論年代，好多宗教建築物被迫改建成商廈同住宅。當人都唔夠地方住，神都要被迫搬遷，轉為數碼化。阿K話Game of Eden係一張古地圖，保存咗幾百年來嘅城市面貌，佢又真係講得無錯，呢個赤松大仙寺廟至少有二百幾年歷史。至於點解我會嚟呢間廟，全因為枝毛筆。 我爸爸留比阿K嘅毛筆係尋寶嘅線索。呢枝毛筆唔係用咩特別嘅木做，外表好普通，又未開封，真係跌咗都無人執…但當用紫外光燈照一照筆身，竟然會見到呢8句句子： 「赤松得道，現身竹林 眾人問仙，求覓太公 唯獨唐伯，獲任太歲 否極泰來，寶朱筆求」 赤松得道，現身竹林…得道…通常都係跟成仙…唔通係指赤松得道成仙嘅人？只要查一查，赤松得道成仙嘅只有初平大仙一個人，但Game of Eden 有咁多赤松大仙嘅寺廟…係指邊個呢？ 現身竹林… 哦！我知啦！喺位於竹林嗰一間赤松大仙寺廟！所以我就嚟咗呢一度啦。但解開咗地點，之後嗰幾句： 「眾人問仙，求覓太公 唯獨唐伯，獲任太歲 否極泰來，寶朱筆求」 又點解呢？ 唔理啦，入屋叫人，入廟拜偶，求枝簽求神保佑先。 *求簽聲效 希望神明保佑，令我可以快啲解謎成功，搵到我爸爸！ *跌簽聲效 001簽…望一望先…姜公封相，係上上簽！ 簽文係咁寫嘅：「靈籤求得第一枝，龍虎風雲際會時。一旦凌霄揚自樂，任君來往赴瑤池。」 嘩，就算唔識解簽，聽個氣勢就知勁啦！等等先…眾人問仙，求覓太公…係咪講緊呢枝簽？即係好多善信嚟大仙廟求簽，都想求到姜公封相呢支簽？ 但呢枝簽有咩啟示…？毛筆上面之後嗰兩句係： 「唯獨唐伯，獲任太歲 否極泰來，寶朱筆求」 唐伯，應該係指唐伯虎…獲任太歲…太歲有60個，按不同甲子年去對應不同嘅太歲…2202年…係壬寅年…而唐伯虎嘅原名係唐寅…獲任太歲…即係唐寅壬太歲…壬寅太歲係賀諤大將軍！唔通寶物收埋喺太歲元神殿？ 太歲元神殿主殿以「斗姆元君」」聖像為中心，順時針圍繞著六十太歲像，外形上契合古代天圓地方嘅世界觀，頂部為大型「星象天幕」，乃根據天文星相，配合上百顆LED燈，天幕以四根廿八星宿圓柱連接；地面中央特設兩儀及先天八卦透光地雕，與天幕互相呼應。當我以為可以去搵壬寅太歲，睇下有無咩機關，可惜，呢度係玩電子拜太歲...只需要我輸入出生年月日，系統就自動幫我搵所屬太歲，然後噴一噴煙，再射一度紅線係我身上就搞掂...根本行唔到入去… 「否極泰來，寶朱筆求」…呢4個字又點解呢？ 我行出太歲元神殿，行到去解簽區，有好多善信去搵人解簽。其中有一個後生仔就問我：先生你要唔要解簽啊？ 我望一望佢間鋪嘅名，係寫住《寶珠堂》。唔通寶朱筆求嘅寶朱，係指寶珠堂？ 然後我問佢：想你好啊，想問下邊一位係寶珠姐？佢係度嗎？ 後生仔：哦，你等等（轉身大叫）寶珠姐，有人搵你啊！（轉身面向阿達，扮女人聲）你好，我就係寶珠。你搵我有咩事？ 達：吓，你係寶珠姐？ 後生仔：寶珠姐係我阿媽，但最近佢將寶珠堂交比我打理，所以，我係寶珠姐，亦可以唔係寶珠姐，睇你點睇啦。 達：咁...想問下你有無見過呢枝毛筆？ 寶珠本身好好笑容咁打量我，然後望到我手上面嗰枝毛筆，突然收起笑容，仲拉咗我入鋪！ 達：做...做咩啊你？ 寶珠：殊！ *落閘聲效 我完全唔知發生咩事，好驚好想走，然後佢轉身，擰一擰個觀音像，背面塊牆突然打開，指示我落去… 寶珠：歡迎嚟到真。寶珠堂。貴賓，呢邊請。 寶珠帶頭行咗入去神秘通道...牆後面係一個好長好長向下嘅樓梯…樓梯兩邊點咗中式蠟燭…感覺好神秘…樓梯嘅盡頭…係一間好大好大嘅房，房入面有一個百子櫃… 寶珠：寶珠堂表面係一個求神問卜嘅地方，但真正身份係一個提供保險箱服務嘅地方。你手上嗰枝毛筆就係鎖匙。先生，請輸入8個位數字嘅保險箱號碼。 8個字嘅保險箱號碼…係爸爸嘅電話？出生年月日？定係咩呢？但嗰8個字嘅排序係3-2-3嘅方式… 「眾人問仙，求覓太公」姜太公枝簽係001…唔通頭3個號碼係001？ 「唯獨唐伯，獲任太歲」壬寅係干支嘅順序係39，即係中間嘅數字係39！ 咁最尾嗰3個字…就係同「否極泰來，寶朱筆求」有關… 達：寶珠，我想問下邊一枝簽係有否極泰來4個字？ 佢諗咗一陣，然後就答我第100號簽：「百花競放賀陽春 萬物從今盡轉新 末數莫言窮運至 不知否極泰來頻」 即係最尾3個字係100！ 然後我輸入001-39-100！ 個百子櫃就自然拎咗呢個保險箱出嚟！ 當我苦惱點開個保險箱，寶珠就開咗我枝毛筆，一野吉落我隻手度，然後毛筆頭染紅，再將嗰滴血滴落個保險箱度。 寶珠：我哋嘅保險箱係用DNA認證。毛筆頭其實係針頭，用嚟採血。 *驗證成功聲效 原來寶朱嘅朱係朱砂嘅朱，亦即係血紅咁解。果然，保險箱打開。我見到一個鐵盒，鐵盒入面…有1/4 個圓形物件，同下一個尋寶提示。 配樂：BEATFRIDAY《Kind of》 Leave a comment and share your thoughts: https://open.firstory.me/story/ckzzy58q80frd0906i630umse?m=comment Powered by Firstory Hosting

#zip噏劇場 《Game of Eden》阿達篇 ——— 電腦導航聲音:  Welcome to Garden of Eden，依家進行腦電波核對… 玩家- 阿達 身份核對成功。歡迎回到伊甸園，依家帶你進入所屬區域 - Area 15。Enjoy yr time in Eden. ——— Mission 1.5「收藏組織404」 爸爸佢形容自己為一個好古怪嘅收藏家，除咗有人比古物佢去檢驗同定價，仲會成日遠行搵啲古靈精怪嘅野返嚟。而佢每次出門之前，都會比小遊戲我玩，話我玩完之後佢就會返。當然，佢比我玩嘅遊戲唔係任何高科技嘅電子遊戲，而家講緊百幾二百年歷史嘅舊遊戲，例如拼字、數獨、解謎同砌圖等等，而最後一次出門，佢比咗一個叫做扭計骰嘅遊戲比我玩，佢話當我將扭到亂晒嘅扭計骰還原，就係佢回家嘅時候，然後講咗一句再見，就離開屋企。我好記得頭幾日我成個傻仔咁亂咁扭亂咁擰，都搞唔掂，然後上網先發現原來扭計骰當中係涉及好複雜嘅數學原理，雖然我睇住教學去玩，但都搞咗勁耐先搞掂，而成功還原嗰一刻，我好興奮！興奮唔係因為我成功咗，而係以往我成功過關之後，爸爸就會返嚟！然後同我分享佢搵到嘅收藏品。但今次有啲唔一樣，我拎住個還原嘅扭計骰，坐喺屋企，等咗好耐，爸爸都未返…然後我整亂嗰扭計骰，再還原，再整亂再還原咗好多次，多到我幾分鐘內就可以破解到個5x5 嘅扭計骰…爸爸都未返…直到有一個朝早，警察敲門，同我講爸爸出咗意外…佢嘅私家失靈炒車…再發生爆炸…當場過身…所以我好記得2192年6月最後嘅星期六凌晨6點呢個時間… 道別之前講再見，意味會再相見。對於嗰陣只係十歲嘅我，聽得最多對死亡嘅解讀係爸爸只係去咗一個好遠嘅地方，終有一日我會搵到佢同佢再相見…十年過去，我估唔到會喺Game of Eden 見到一個自稱阿K，同我爸爸一樣都係收藏組404成員嘅神秘人。就係佢不斷send 亂碼訊息比我，仲約見我，同我講我爸爸嘅死原來有另一個版本… K: 達仔，你真係相信係意外？ 達: 警察、法證、死因庭、報紙都咁解釋，仲會有錯？ K: 我無話佢地錯，但呢個只係佢哋角度嘅真相… 達: 真相就係真相，咩叫佢哋角度嘅真相？ K: 達仔，你爸爸嘅死係事實，但真相有好多個，喺唔同人眼中就有唔同嘅版本。 達: 我憑咩要信你？ K: 咁你憑咩唔信我？ 達: 憑我hack 入過啲閉路電視同機密文件，所有證據都證明係意外。 K: 果然係4哥嘅仔，可惜要成為一個收藏家仲差好遠。 達: 哦！你要搵4哥嘅仔！可惜我唔係，睇嚟你搵錯人啦。 K: Christopeher ，唔好咁心急。 我面前呢個陌生人…點會知道我現實世界嘅英文名架？一定係巧合… K: 我知你諗緊乜，你覺得我知道你英文名係巧合，但達仔，當咁多巧合出現，仲係巧合？ 達: 所以你約我嚟呢個戲院，而呢個戲院嘅坐標同我現實中住址嘅坐標係一樣，都唔係巧合？ K: Not Bad。繼續啊。 達: 我爸爸講過，作為一個收藏家，最緊要係觀察力同知識，同埋抱有凡事都有可能嘅態度，因為你眼前嘅所謂垃圾，都有可能係寶物，只係你暫時未知道。 K: 好係4哥嘅口吻啊。 達: 仲有，我爸爸講過凡事必有因，每個創作者嘅設計都有原因，每個數字、符號、圖案都有意思。 K: 咁你又估下點解我約你嚟呢度，同埋估下收藏組織404又係一個咩嘅組織，如果估中我就話你知你爸爸嘅死嘅另一個版本。 達: 曾經聽過一個說法，Game of Eden 某啲地圖同版面，係真實存在過，設計者將現實世界曾經出現嘅面貌，用遊戲形式保存。你約我嚟嘅呢間文青戲院嘅坐標同我依家住嘅大廈相同。而我棟大廈已經有60年歷史，如果唔係巧合，即係60年前，呢間戲院拆咗，改成住宅。 K: Good。唔止呢間戲院，Area 15 好多地方都保存咗好多現實世界本來嘅面貌，有啲已經上過百年歷史，Game of Eden 可以話係一個古地圖。 達: 然後404…係網絡世界代表not found…即係你地嘅組織係專收藏「不存在」嘅物品？ K: 我講過，事實得一個，真相有好多。「不存在」係事實，但係從未都不存在？定呢一刻不存在呢？ 達: 咁你哋嘅組織咪經常捕風捉影？ K: 所以4哥係組織嘅工作，就專責搵一啲曾經存在，但呢刻不存在嘅物件。阿4係佢對自己嘅稱呼，佢真係嘅稱號係D，解做Disappear。 達: 將字母順序變成數字…好係我爸爸嘅風格… K: 而10年前，你爸爸搵到一個好值錢，接近200歷史嘅古物，不過被一個組織睇中，嗰個組織更派殺手去搶呢個物件，所以，4哥將件古物數碼化，收埋係Game of Eden。可惜…都逃唔過殺手嘅追捕… 達: 究竟我阿爸搵到咩古物？嚴重到要被人追殺？同點解你咁肯定唔係意外，係啲殺手做？ K: 2192年6月最後嘅星期六凌晨6點，就係呢個數字上嘅巧合。 達: 666…魔鬼數字，就係你嘅論點？ K: 有人視生命係藝術，有人視死亡係藝術，而每個藝術家都會加入自己嘅記號。天使數字或者魔鬼數字嘅死亡時間，就係嗰個殺手嘅簽名。 達: 你話真相有好多，咁會唔會你先喺個殺手？因為K 可以代表Killer。 K: K都可以代表Keep。我keep 咗你爸爸嘅秘密十年，如果你幫我搵返你爸爸收埋喺Game of Eden 嘅古物，我就帶你去見你爸爸。 達: 我爸爸未死？ K: 無錯，你爸爸未死，係事實。但真相係點，就要你自己搵啦。 達: 咁點解要咁複雜，你唔直接問佢收埋係邊？同埋點解佢仲在生，呢十年唔搵我？要我一個人係孤兒院？ K: 咁你就當呢個係你爸爸同你玩嘅遊戲，同以前一樣，過到關，你就可以見到佢，咁你就可以親手將個扭計骰交比佢。 配樂:  BEATFRIDAY《Moonset》、《Diner》、《Ignorance》、《FOGGY ISLAND》 歌曲：BEATFRIDAY《謎》 唱、曲：大頭 詞：陳嘉朗 編、監：INK Leave a comment and share your thoughts: https://open.firstory.me/story/ckzpt8r29043y08448n48nl1s?m=comment Powered by Firstory Hosting

#zip噏劇場 《Game of Eden》阿達篇 —— 電腦導航: Welcome to Garden of Eden，依家進行腦電波核對… 玩家- 阿達 身份核對成功。歡迎回到伊甸園，依家帶你進入所屬區域 - Area 15。Enjoy yr time in Eden. —— Mission 1.4 解碼遊戲（下） 係我好細個，啱啱學識數A-Z 26個英文字嘅時候，我老豆就開始同我玩串字遊戲，唔係咁簡單問我Daddy Mammy點串，佢會將A-Z 26個英文字母，順序變成數字，即係A ＝1，B=2，C＝3 ，D＝4 如此類推，所以，當佢講4.1.4，我就自然會講D.A.D，「DAD」，咁1.4.1，就即係A.D.A，「ADA」！ 到呢一日我都唔知點解我老豆會咁樣教我串字，不過呢個成為我同佢奇特嘅溝通方法，仲會演變成手語，當係人多唔方便用口講野嘅時候，老豆佢就會用手即數字，例如佢想問我食咩，佢會用手整「5，1，20」呢三個數字，即係「E，A，T」。 你可能會好奇我老豆係咪數學家，咁鐘意數字，答案當然唔係啦，佢只係一個鐘意數字、文字、符號嘅奇怪收藏家。每年生日都會送一件收藏品比我，但佢唔鐘意直接送，覺得咁樣好無癮，所以佢每次都要我解謎先搵到禮物。例如，有一次佢送咗本書比我，我以為今年咁好唔駛解謎，點知我睇完本書之後佢比咗一組奇怪嘅數字我，話解咗謎先得到真正嘅禮物...最後，原來個組數字係同本書有關，333，即係本書嘅第3頁第3行第3個字，幾經辛苦拆解完之後，先知佢將份真正嘅禮物放咗喺個櫃桶度... 我老豆真係好煩又好無聊...不過...佢只係送咗10份禮物就無再送...因為佢係我10歲嘅時候就因為交通意外過咗身...我仲好記得我10歲個年，即係2192年嘅6月，最後一個星期6，凌晨6點過身...啲人話咩111，222，333呢啲連住嘅數字係咩天使數字...但偏偏666呢個數字，係代表魔鬼...我呢個咁喜歡數字嘅老豆，係一個咁特別嘅數字過身，唔知佢在天之靈會點諗呢？ 點解今日會提咁多我阿爸嘅野，係因為今日係佢生忌，我係Game of Eden整咗一個秘密墓碑比佢，因為現實世界土地問題，墓地好貴架...反而係遊戲世界整一個虛擬墳墓平好多...仲有得買虛擬嘅金銀衣紙，同真實世界一模一樣...而一如既往，我阿佢講下近況，例如最近我收到一系列亂碼電郵，雖然已經用倉頡輸入法破解到英文亂碼，但仲有一組數字解極都解唔到... 「33344466387778844」 我試過用我老豆同我玩嘅數字解謎，用英文字母順序去轉做英文字，但都失敗... 突然間，我記得其中一件老豆送比我嘅禮物，係一部半隻手掌咁大嘅電話，叫3210，呢部1999年登場嘅電話，距離依家已經有接近200年歷史...我老豆話呢部係神機，跌極都跌唔爛，最勁係無得上網，唔會比人hack，係收藏界極罕有嘅收藏品。對於無用過實體電話嘅我，望到呢部3210覺得好新奇！因為個Mon好細，仲要有好多掣撳，每個數目字掣上面會有英文字架！真係好得意！我仲成日問老豆如果個掣壞咗咁點，佢笑住話以前啲掣無咁易壞架！ 等等先…數目字上面有英文字...3字上面係寫住D，E，F。咁個亂碼嘅333，會唔會係撳3字3次？咁即係個「F」字！ 4嘅數字上面係G，H，I。亂碼嘅444，即係撳4字3次，即係「I」！然後我用呢個方法破解埋淨底嘅數字，得出嘅英文係：「Find Truth」！搵出真相？咩真相啊？ 然後我用呢個數字輸入法，打咗94428，即係「WHAT」比send亂碼訊息比我嘅寄件者。隔咗一陣...佢真係覆我！今次終於唔係亂碼郵件！而係一張戲飛！同一個座標！ 個座標係：8569+7J...係另一種座標寫法...亦都係我係現實世界住緊嘅地方嘅座標... 仲有一個傳送門嘅掣...即係如果我一撳...就會去到呢個地方...見到一直send亂碼訊息同邀請我玩神偷跳戰嘅人... 解謎解咗咁耐...終於可以見到佢... *傳送門 現實世界我住緊嘅地方只係好普通嘅大樓，估唔到Game of Eden嘅世界入面，係一個咁有文化氣息嘅戲院。我按照戲飛嘅指示，入去戲院，一推開門，套戲已經做緊，但成個戲院只係得一個觀眾... *開門 神秘人：達仔，你太遲啦，錯過咗套戲嘅開場。 達：你就係send 亂碼訊息比我嗰個人？ 神秘人：殊，陪我睇完套戲，我再慢慢答你。 歌曲：《無間道》主題曲 神秘人:你知唔知呢套戲嘅結局，有兩個版本？ 達：我…唔知喎…我未睇過呢套戲… 神秘人:一個就係個警察殺咗個臥底，出𨋢之後繼續遊走黑白兩道中間。另一個就係佢出𨋢之後就被人拉咗。 達：其實我都嚟咗，可唔可以唔解謎，講返啲我明嘅嘢？ 神秘人:好啊，咁我直接啲，你阿爸嘅死，並唔係意外。 達：你識我阿爸？ 神秘人:佢同我一樣，都係收藏組織「404」嘅成員，亦都係我搵你嘅原因，話比你知你爸爸死嘅另一個版本。 配樂: BEATFRIDAY《BLUE LOTUS》、《HOUSE》、《Moonset》 歌曲：BEATFRIDAY《夜未央》 唱、曲：大頭  詞：陳嘉朗 編、監：INK Leave a comment and share your thoughts: https://open.firstory.me/story/ckzps7wsn335x0850l8wykr8j?m=comment Powered by Firstory Hosting

#zip噏劇場 《Game of Eden》阿達篇 —— 電腦導航聲音:  Welcome to Garden of Eden，依家進行腦電波核對… 玩家- 阿達 身份核對成功。歡迎回到伊甸園，依家帶你進入所屬區域 - Area 15。Enjoy yr time in Eden. —— Mission 1.3 「解碼遊戲（上）」 「恩尼格瑪密碼機」，有人叫佢做奇謎機，謎式密碼機，一種用於加密與解密檔案的密碼機，亦係係第二次世界大戰嘅時候，德軍使用嘅一系列相似的旋轉機加解密機器嘅統稱。機密情報都係透過不同嘅加密解密嘅方法傳達。如果可以破解到當中所用嘅方法，就能夠知道敵軍嘅消息，係打勝仗嘅關鍵。英軍當然知道呢一點，所以搵嚟好多不同嘅專家去破解恩尼格瑪密碼機，其中一位就係數學家艾倫圖靈。最終佢製造到一部解碼機，成功破解到德軍使用嘅密碼，當中仲有好多情節，但我都唔係好記得，只係知道部解碼機叫做Christopeher ，亦都係電腦嘅雛形。點解我會知呢啲野？唔係我好學，而喺有一次我係伊甸園遊戲入面嘅戲院睇到呢套電影，叫做「解碼遊戲」。 Game of Eden 嘅年份係NC180年，即係現實世界嘅2202年，現實世界已經好少實體戲院，反而大家會入Game 去遊戲世界嘅戲院睇戲，仲要有好多舊戲。而呢套戲吸引我嘅唔係劇情同演技，而係我嘅英文名Christopeher ，原來可以咁解。 點解無端端諗返呢套戲？因為自從我無理到嗰一個所謂嘅神偷挑戰邀請之後，就一直收到亂碼嘅訊息。事出必有因，一係send 訊息嗰個人係傻嘅，一係呢啲亂碼其實係有意思…但解碼係一件何其複雜嘅事…我真係一啲頭腦都無… 「MFAMYOMMVSOMR」… 有一種解謎方法，係將字母褪位。例如：雞蛋 EGG ，如果褪前一個，就係DFF，褪後一個，就係FHH。但我用呢個方法去解收到嗰組亂碼，都係解唔到相應嘅字…會唔會唔係釋做英文而係中文呢？ 然後我再收到一個電郵…嗰亂碼係英文加數字： 「YQ3OD1」 YQ3…OD1… 哦！我知啦！係輸入法嘅一種！ 因為依家已經係2202年，呢啲速成或者倉頡輸入法已經無乜人用，大家都係用voice msg，或者係語音轉文字，而係伊甸園遊戲入面，大家用腦諗乜字就出咩字，根本好少用到輸入法…YQ3 係達，OD1係仔，佢叫緊我係遊戲世界入面嘅名…咁「MFAMYOMMVSOMR」無任何數字，會唔會就係倉頡輸入法呢？我即刻將呢組英文變成中文，得出嘅文字係：「不是巧合」。咩不是巧合呢？搵我唔係巧合？唔理住啦，另一組數字亂碼係： 「33344466387778844」 如果都係輸入法嘅話…係九方？筆劃？又唔似可以變成中文喎…咁如果將數字變成英文…又有咩破解方法呢？ 配樂：BEATFRIDAY《Kind of》、《Diner》 Leave a comment and share your thoughts: https://open.firstory.me/story/ckzpr23h530s80977l8g1k32x?m=comment Powered by Firstory Hosting

#zip噏劇場 《Game of Eden》阿達篇 —— 電腦導航聲音： Welcome to Garden of Eden ，依家進行腦電波核對 玩家- 阿達 身份核對成功 歡迎回到伊甸園，依家帶你進入所屬區域 - Area 15。今日係NC 180年1月10日，Enjoy yr time in Eden. ——— Mission 1.2 《亂碼郵件》 Game of Eden 伊甸園遊戲，係全球最受歡迎，一個連接腦電波嘅虛擬實景線上遊戲。據聞係一位叫做Morpheus 嘅腦神經嘅醫生專家同一位叫阿匡嘅programmer 為咗轉移腦部受重創嘅女友嘅意識，繼而開發嘅科技同遊戲。不過呢個都係地下傳說，無人知道真相，畢竟依家已經係NC180年1月10日，當大家好投入當下嘅歡欣，尋根究底呢4個字就變得唔太重要。 伊甸園遊戲其中一個大受歡迎嘅原因，係因為現實世界曾經出現咗一個傳播力好強嘅病毒，當時人人都要隔離，無得面對面接觸，唯有入Game相見，亦因為呢個遊戲係連接腦電波，所以喺遊戲入面嘅身體接觸，係可以傳遞到玩家嘅大腦再製作相應嘅信息傳遞到相應嘅身體部位。簡單嚟講，我係Game 入面打你，你真係會痛啦，我係Game 掂你，你都會毛管戙。亦因為呢種虛擬同真實交錯嘅感受，令好多人沉迷伊甸園遊戲。就算過咗世紀疫情，大家都不能自拔，生活亦從此不一樣。 而對我嚟講，Game of Eden 係一個比我逃離現實生活嘅地方，雖然我身處嘅Area 15喺早前換咗管理員，令好多玩家不滿，然後轉去另一區，不過對我呢種主力係食玩瞓，無乜大志，習慣就好了嘅玩家嚟講，換唔換管理員其實無乜影響，Game 會照玩，生活一樣照過。就好似之前我收到一個神偷挑戰嘅邀請，入面寫嘅座標竟然同我現實生活中住緊嘅地方係一模一樣，不過應該都係撞彩架啫，我認我有一刻想了解係咩事，但最後我都無理到，繼續我食玩瞓嘅伊甸園世界。 *inbox sound effect  但嗰個日之後我不斷收到好多奇怪嘅訊息…全部都係亂碼…例如： 「MFAMYOMMVSOMR」 同埋 「33344466387778844」 呢啲亂碼…其實代表咩呢？ 配樂： BEATFRIDAY《Kind of》、《Diner》 Leave a comment and share your thoughts: https://open.firstory.me/story/ckzpq102007ga0a316wwe3zm6?m=comment Powered by Firstory Hosting

#zip噏劇場 《Game of Eden》阿達篇 ——— 電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 15。今日係NC 179年12月31日，Enjoy yr time in Eden. ——— Mission 1.1 《神偷挑戰》 Game of Eden，伊甸園遊戲，係一個連接腦電波嘅虛擬實景遊戲，帶上相關嘅配件，就可以進入伊甸園。邊個設計呢個遊戲，有好多個版本，其中一個版本係一個叫做Morpheus 嘅腦神經醫生，同一個叫阿康嘅programmer聯手創造呢個遊戲，但佢哋原本嘅目的只係想幫阿康嘅腦部受重創嘅女朋友Daisy ，用腦神經同科技將佢嘅意識轉移落電腦入面，希望用另一個方法延續Daisy 嘅性命。聽到呢度，係咪覺得好浪漫？定覺得好匪夷所思？好似有違道德喎？而呢一個版本，都只係都市傳說，邊個創辦呢個遊戲，過咗咁多年，都無乜人去考究，只係知道呢個遊戲費用係全免，每人獲發一個account ，亦成為首個虛擬實景連線嘅網上遊戲。可能係免費關係，越嚟越多人玩，慢慢就係全球大受歡迎。而伊甸園遊戲入面有好多個Area，每個Area 由不同管理員管理同改良，我就揀咗Area 15。而呢個遊戲有咩特別，我一陣再同你講！因為我依家要趕住去倒數，迎接新一年啊！ 輸入座標：N22.169 E114.259 依家得返5分鐘…無可能趕到去…唉…唯有用傳送門啦… *傳送門 sound effect  N22.169 E114.259呢個地方，應該係全Area 15 睇夜景最靚嘅地方，同埋係最隱蔽嘅地方，我都係平時入game 周圍行，無意中發現，果然，今晚都無人係度。我覺得 Game of Eden 其中一個吸引人嘅地方，就係實景比真嘅仲靚仲真實，依家要搵到一個好清晰睇星嘅地方，真係好難，但勝在有伊甸園遊戲，令大家可以係虛擬世界搵到曾經美好嘅現實。至於真實世界有無呢個地方，我就唔知。不過由於呢個遊戲係連接腦電波嘅，所以遊戲入面嘅風吹、水動、花香、蟲咬，你都可以一一感受得到！而遊戲入面嘅時間同現實世界一樣，係實時渡過，而仲有5秒就到新一年啦！ 5,4,3,2,1 新年快樂啊！ *短訊聲效 1. 最大嘅投機遊戲上線啦，你有無興趣… 2. 寂寞嘅你需唔需要人安慰？新一年只需… 伊甸園遊戲同現實生活一樣，都有好多垃圾訊息… 第3個訊息：神偷挑戰！有無興趣挑戰自己身手，偷取神秘寶物？地址係… 地址係…呢個坐標…同現實中我屋企係一模一樣嘅？ 配樂：BEATFRIDAY《kind of》、《Moonset》 Leave a comment and share your thoughts: https://open.firstory.me/story/ckzpp0lf401ds0946ill4rxj0?m=comment Powered by Firstory Hosting

Last File :「阿匡與麗英 vs DNA 」 阿匡與麗英，面對正為DNA部門效力的第8個阿康和Daisy，要在宿命和自由意志中作最後選擇！ 歌曲：《殘酷天使的行動綱領》新世紀福音戰士 Evangelion OP 残酷な天使のテーゼ -高橋洋子 Cover｜麗英 LaiYing *文字故事可於IG觀看：https://www.instagram.com/chowzip/ （2021年6月開始連載的廣播劇） https://open.firstory.me/story/ckzeg5jm012pj0848ovt31s7h?m=comment Powered by Firstory Hosting

File 012:「兔仔會的主腦」 阿匡灰飛煙滅後...在一間全白的房間出現...竟遇上第8個阿康和Daisy！更告知兔仔會的主腦是誰！ 歌曲：《殘酷天使的行動綱領》新世紀福音戰士 Evangelion OP 残酷な天使のテーゼ -高橋洋子 Cover｜麗英 LaiYing *文字故事可於IG觀看：https://www.instagram.com/chowzip/ （2021年6月開始連載的廣播劇） https://open.firstory.me/story/ckzeg19ud12ii08506s906t0m?m=comment Powered by Firstory Hosting

File 011:「阿匡之死」 階磚積出現，激起麗英怒火，決定和他正面對決，以報洗腦之仇！ 歌曲：《殘酷天使的行動綱領》新世紀福音戰士 Evangelion OP 残酷な天使のテーゼ -高橋洋子 Cover｜麗英 LaiYing *文字故事可於IG觀看：https://www.instagram.com/chowzip/ （2021年6月開始連載的廣播劇） https://open.firstory.me/story/ckzefugrx05110854ndn9s6qc?m=comment Powered by Firstory Hosting

File 010:「第9個阿康 與 第6個Daisy」 阿匡阻止麗英輕生，希望一同離開靈魂世界的時候，不速之客突然出現！ 歌曲：《殘酷天使的行動綱領》新世紀福音戰士 Evangelion OP 残酷な天使のテーゼ -高橋洋子 Cover｜麗英 LaiYing *文字故事可於IG觀看：https://www.instagram.com/chowzip/ （2021年6月開始連載的廣播劇） https://open.firstory.me/story/ckzefqwmm1px60a28ci8g8r01?m=comment Powered by Firstory Hosting

File 009:「阿匡與 Dr Memory 的對話錄」 麗英逃離記憶部門...留下阿匡與Dr Memory... 面對宿命，阿匡努力尋找於靈魂世界生存的方法和意義。 歌曲：《たぶん》-YOASOBI (Tabun) 或許 Cover｜麗英 LaiYing *文字故事可於IG觀看：https://www.instagram.com/chowzip/ （2021年6月開始連載的廣播劇） https://open.firstory.me/story/ckzeflb7t04350976q4dsiboq?m=comment Powered by Firstory Hosting

File 008:「Daisy VS 階磚2」 麗英重啟記憶，除了知道真正身份是Daisy外...更知道自己成為靈魂檢察官的原因... 歌曲：《群青》- YOASOBI / THE FIRST TAKE COVER｜麗英 LaiYing *文字故事可於IG觀看：https://www.instagram.com/chowzip/ （2021年6月開始連載的廣播劇） https://open.firstory.me/story/ckzefax18118q0990dmmn289o?m=comment Powered by Firstory Hosting

File 007:「Daisy 的平行時空」 麗英成為靈魂檢察官前...真正身份是Daisy...但因一單命案，令她誤闖靈魂世界... 歌曲：麗英《FreeRider》 *文字故事可於IG觀看：https://www.instagram.com/chowzip/ （2021年6月開始連載的廣播劇） https://open.firstory.me/story/ckzef6ezw10970850shk6r5t2?m=comment Powered by Firstory Hosting

File 006:「第6個Daisy」 靈魂檢察官麗英與阿匡前往記憶部門，要求Dr Memory解封記憶，卻發現麗英驚人的過去... 歌曲：ANSONBEAN x 麗英 - you made my day (with Lai Ying) *文字故事可於IG觀看：https://www.instagram.com/chowzip/ （2021年6月開始連載的廣播劇） https://open.firstory.me/story/ckzeeydub0zui08817swex42p?m=comment Powered by Firstory Hosting

File 005:「交換記憶」 靈魂檢察官麗英對自己的過去十分模糊，阿匡提議用自己腦內有關兔仔會的記憶，換取麗英的回憶。 歌曲：《Butterfly》Digimon 01 OP 數碼暴龍01主題曲 Cover｜麗英 LaiYing *文字故事可於IG觀看：https://www.instagram.com/chowzip/ （2021年6月開始連載的廣播劇） https://open.firstory.me/story/ckz6uhjau10xc09093y537hja?m=comment Powered by Firstory Hosting

File 004:「靈魂檢察官的封印記憶」 阿匡得知自己死因後，好奇靈魂檢察官麗英的過去，卻揭發麗英不為人知的秘密。 歌曲：《Butterfly》Digimon 01 OP 數碼暴龍01主題曲 Cover｜麗英 LaiYing *文字故事可於IG觀看：https://www.instagram.com/chowzip/ （2021年6月開始連載的廣播劇） https://open.firstory.me/story/ckz6u9ex7dokw0832yij57wwx?m=comment Powered by Firstory Hosting

File 003:「阿匡死亡的真相…」 阿匡決定用兔仔會的秘密，和靈魂檢察官麗英交換靈魂檔案，希望知道自己的死因。 歌曲：麗英《距離》 *文字故事可於IG觀看：https://www.instagram.com/chowzip/ （2021年6月開始連載的廣播劇） https://open.firstory.me/story/ckz6u6ekn1p2x0845bf3y6hz5?m=comment Powered by Firstory Hosting

File 002:「檢察官與迷失的靈魂」 阿匡食了Dr Mok兩粒藥丸後誤入靈魂世界後..遇上一位叫做「麗英」的靈魂檢察官...麗英得知阿匡與「兔仔會」有關，決定囚禁他... 歌曲：麗英《Free Rider》 *文字故事可於IG觀看：https://www.instagram.com/chowzip/ （2021年6月開始連載的廣播劇） https://open.firstory.me/story/ckz6u2y2h15yk0930uuesqoo6?m=comment Powered by Firstory Hosting

File 001:「初入靈魂世界」 承接之前的故事，阿匡進入靈魂世界後...遇上一位叫做「麗英」的靈魂檢察官... 歌曲：麗英《Free Rider》 *文字故事可於IG觀看：https://www.instagram.com/chowzip/ （2021年6月開始連載的廣播劇） https://open.firstory.me/story/ckz6tybgx0zuf090921bq2onv?m=comment Powered by Firstory Hosting

故事：阿匡向Dr.Mok求診，Dr.Mok向阿匡告知其真正身份...一個叫做「兔仔會」組織的成員... 歌曲：林家謙《特倫斯夢遊仙境》 *文字故事可於IG觀看：https://www.instagram.com/chowzip/ （2021年6月開始連載的廣播劇） https://open.firstory.me/story/ckyzq5bxv0jt808591el6ee7t?m=comment Powered by Firstory Hosting

故事：阿匡糾結於阿康與Daisy的宿命，不知如何面對菊姐... 歌曲： 林聰《兼職靈魂》 *文字故事可於IG觀看：https://www.instagram.com/chowzip/ （2021年6月開始連載的廣播劇） https://open.firstory.me/story/ckyzpx3ai0i88080940vuro6e?m=comment Powered by Firstory Hosting

故事：阿匡入院後昏迷...夢見不同版本的「康與Daisy」...而最終下場亦相同... 歌曲：麥浚龍《顛倒夢想》 *文字故事可於IG觀看：https://www.instagram.com/chowzip/ （2021年6月開始連載的廣播劇） https://open.firstory.me/story/ckyzpudy60j260816np7764c3?m=comment Powered by Firstory Hosting

故事：「阿康與Daisy」的愛情故事，其實是由一位叫做阿匡的作家寫的故事，靈感來自夢境，不過...劇終後，阿匡仍然不斷發夢，夢中的阿康更叫他小心一位叫做Daisy的女人... 歌曲： per se 《親愛的幽靈》 *文字故事可於IG觀看：https://www.instagram.com/chowzip/ （2021年6月開始連載的廣播劇） https://open.firstory.me/story/ckyzpqsb11giu0818vidcbpdy?m=comment Powered by Firstory Hosting