Zip噏劇場
213 episodes — Page 2 of 5
S3 Ep 75【Zip噏劇場】Game of Eden 第二季 「小島篇」#58《千獸解碼》
地點：封閉區域Area DB Island 千獸島 達：盧綠啊...你由淺灘一路向東北行...我地依家行咗入一個熱帶森林...其實你知唔知要點行架？ 盧綠：總之你跟住我就得啦 達：你肯定嗰個箭咁係你細佬盧葦留低嘅？ 盧綠：正確嚟講，係我舅父留低嘅標記。等我搵到另一棵樹再話你知。 達：（讀白）由於盧綠嘅堅持，我只好跟住佢一直行。不過我唔跟住佢，都無其他方法。因為我對第三個外島嘅位置同線索一啲頭緖都無...而我地依家身處嘅地點，係千獸島最南面嘅部份，呢個部份係一個熱帶森林區。按裘雪嘅資料，呢個區域有好多唔同種類嘅鳥類、哺乳類同爬行類動物。亦因為咁，我都進入全知狀態，將敏感度提高，防止被不知名嘅動物衝出嚟襲擊我地...當我地行咗應該有成一千米之後，盧綠終於有發現！ 盧綠：有啦！阿達，你睇下！ 達：喺呢棵樹度，又有一個好暗嘅黑色箭咀，係指向西北面嘅... 盧綠：你摸下嘅個箭咀先 達：無咩特別啊，都係用匕首雕出嚟嘅，然後有啲好暗好黑嘅墨水油咗中間嘅位置。 盧綠：舅父經常嚟呢個千獸島探險，佢喺我地好細個嘅時候教我地三兄妹野外定向嘅方法，同教我地用標記嚟通訊。箭咀嘅方向代表要去嘅位置，你又留意箭咀嘅低部，有無咩特別？ 達：同上一棵樹嘅箭咀一樣，喺箭咀嘅底部有啲圓圈、交叉、一劃同啲點點 盧綠：上一個箭咀，就係指住東北方，箭咀下面有一個圓圈、5個交叉、5劃同5點。圓圈代表一千，交叉代表一百，一劃代表十，一點代表一 達：東北方...一個圓圈、5個交叉、5劃同5點...即係叫你向東北方向行1555米？ 盧綠：無錯。依家我地面前呢一棵樹嘅箭咀係指向西北方，底部有兩個圓圈、一個交叉、一劃同一點 達：即係叫你去西北方向行2111米！但同盧葦有咩關係呢？ 盧綠：細個時時候...我同阿葦會鬥快搵到舅父比我地嘅標記...領先嗰個...就會喺舅父刻劃嘅標記上面塗上暗黑色嘅墨水...所以...依我估計...標記應該係舅父留低，阿葦喺大凶日之後出海嚟到呢到，話比我知嘅提示...阿達，我地繼續出發啦。 達：（讀白）沿住西北方向行，就會慢慢深入熱帶森林嘅內部。千獸島植物嘅多樣性比百草園更豐富，應該係多得呢度各式各樣嘅昆蟲採花蜜，以及不同草食性動物食果實，幫助植物傳播種子。我地一路行，樹上面啲雀仔就好好奇咁望住我地，樹林之間，間唔時會有馬騮、小袋鼠、羚羊等等嘅動物經過。而途經一棵樹嘅時候，我向上一望，竟然會有一隻樹懶係度瞓緊覺！ 盧綠：阿達！小心！ *蛇叫聲音 達：嘩！！！ *斬殺聲效 盧綠：雖然我知道千獸島有好多奇珍異獸，但你都唔好淨係掛住望，要留心啲先得架！被蛇咬到事少，一陣可能會有豹或者老虎撲出嚟架！ 達：吓！！！咁會唔會有熊架？ 盧綠：我地唔係嚟呢度睇動物！你留心啲，跟貼啲我，我地繼續行！ 達：（讀白）一聽到盧綠所講嘅野獸，我又緊張又興奮，一嚟喺現實世界我從未見過呢啲動物，所以都好想親眼見識一下，但又好怕盧綠分唔到身保護我...所以...我都係收返遊客心態...再提高全知狀態嘅敏銳度... 盧綠：到啦。不過呢棵樹嘅圖案...咁奇特嘅... 達：係囉，雖然都有箭咀指住西面，但無晒啲圓圈、交叉圖案，反而有三個波浪紋，邊邊仲有一個魚嘅圖案。但魚口有牙，仲有個魚鰭長到好似手咁嘅？ 盧綠：呢個唔係魚，喺呢個熱帶森林另一種生物。跟我過嚟！ 達：（讀白）我跟住盧綠向西行，撥過一片叢林之後，見到一條長長嘅河流。上流向西北方，下流向我地登岸嘅淺灘。呢個時候，有聲由旁邊嘅叢林傳過嚟！ *踩草聲效 *羚羊叫聲 達：（讀白）有一隻羚羊慢慢由叢林走近河邊，佢低頭飲水。呢個情境同睇舊時嘅紀錄片係一模一樣架！跟住... *水流聲效 *鱷魚叫聲 *羚羊慘叫聲 達：嘩！！！盧綠！有隻鱷魚咬實咗隻羚羊啊！我地要唔要救佢啊！ 盧綠：阿達，我地唔好打擾大自然嘅規律...更何況...佢地兩隻動物都只係得墨綠色碼同灰色碼，即係...佢地唔同食人花咁，佢地係無靈魂嘅... 達：由我地登島到依家，所有動物都只係呢度嘅人工智能，可能食人花係例外呢... 盧綠：我唔信成個千獸島嘅動物都係咁...一定會比我地搵到嘅... 達：咁你舅父留低嗰個似魚又唔係魚嘅標記又係點解呢？ 盧綠：比啲耐性，等多陣你就會知道。 達：（讀白）如是者，我地等咗半個鐘，等到隻鱷魚好血腥地拖走被佢咬死嘅羚羊，等到條河再回復平靜，再等到我有啲眼訓... 盧綠：阿達！醒啊！你睇下河嘅中心！ *水流聲效 達：又有鱷魚！？ 盧綠：唔係鱷魚，係海牛啊。 達：咦！裘雪嘅千獸圖鑑有講！佢話海牛喺水入面約有一半時間係睡覺，平均每5分鐘浮到水面上呼吸一次，其它時間會喺水入面1-2米內進食。佢地主要以各種水生植物，例如海草、水藻、紅樹葉為糧食，但有時都會食魚等細小動物。 盧綠：海牛嘅記憶力好強，視覺同聽覺都好敏銳，舅父話佢地好有智慧，好可能前一世係人都未定。 達：但你依家睇到啦，呢隻海牛都只係兩隻顏色... 盧綠：你睇下，佢望住我地啦。 達：雖然佢無靈魂，但佢會唔會有導航嘅功能呢？ 盧綠：跟住佢行就會知道。 達：（讀白）如是者，我哋就係沿住河岸跟住海牛游向上流嘅方向一直行。跟住，河流出現幾條分支，海牛停低咗，望一望我哋，就揀咗出中一條分支向前游。我哋無其向線索，唯有死跟住佢一直行。行咗大約3到4個鐘…海牛終於停低。而停低嘅位置，係一個有4米高嘅小瀑布 *瀑布流水聲效 盧綠：阿達，唔好向前行住！你望下瀑布入面！ 達：入面有一個小山洞！仲有腳步聲傳出嚟！唔通係盧葦！ 盧綠：（大叫）阿葦！係咪你啊！ *腳步踩水聲效 達：盧綠…睇個身影唔似係人喎… 盧綠：係邊個！ *腳步踩水聲效 *馬叫聲效 達：呢隻係白馬？但佢有角…仲有對翼嘅？係…係咩嚟架！ 盧綠：佢就係呢個千獸島嘅獸王…獨角獸！ Zip噏劇場 Game of Eden 第二季 小島篇 第58回「千獸解碼」 阿攝 飾演 阿達 Cfun 飾演 盧綠 編劇及製作 阿攝 音樂 BEAT FRIDAY（Adjust,Heatwave, Nothing, Distance, Laboratory） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 74【Zip噏劇場】Game of Eden 第二季 「小島篇」#57《迷之箭嘴》
*風帆聲效 *海浪聲效 達：（讀白）根據裘雪嘅航海圖，千獸島位於百草園東邊大約400公里嘅位置，以依家嘅風向同風力，大約要3日嘅時間。而盧綠就好專心咁揸船，無咩做嘅我就繼續閱讀裘雪所寫嘅千獸島資料。千獸島嘅外型，同北斗七星第6粒星，ζ （zeta）嘅外型接近，即係似英文字母Z。 而千獸島嚴格嚟講係由3個大島所組成，即係將Z分折3個部分，按筆劃順序，頂部嘅一橫，之後嘅一斜，同底部嘅一橫，三大部分相距只係10-20公里，而每個島嘅氣候，動植物品種都唔一樣。裘雪亦特別表明，千獸島嘅「千」字，只係一個形容，按佢估計，成個千獸島存在嘅動物肯定超過一千種。但因為觀星閣嘅文件被裘雪燒毀咗…我手上嘅資料只係由佢憑記憶默寫加上佢家中僅餘嘅資料拼湊而成…所以我都無辦法想像千獸島嘅情況係點…之前百草園有好多現實世界無嘅植物，咁千獸島又會唔會出現現實世界已經絕種嘅動物呢？ 我揭到其中一頁千獸圖鑑，情不自禁「啊」咗出聲！然後同盧綠講：盧綠！原來比食人花吞咗嗰隻，係白鴿嚟架！我睇電影就見得多，估唔到入到嚟可以見到真嘅，啊唔係…係實體…又唔係…唉，總之我第一次可以摸到白鴿啦！嗰陣可以太驚，撈亂咗白鴿同普通雀仔添！ 盧綠：（反應冷淡）係咩…我都無留意添… 達：（讀白）今日已經係出發去千獸島嘅第2日，呢句係盧綠喺呢2日講嘅第3句說話。第一句係上返船嘅時間，佢話 盧綠：出發啦… 達：（讀白）第2句係 盧綠：可唔可以將仁嬸嗰張黃紙比我啊… 達：（讀白）其實我知佢內心一定諗緊係千獸島會唔會見到有靈魂嘅動物，而嗰啲動物究竟會唔會係佢爸爸或者其他親戚轉世呢？由於我唔想不斷輪迴咁同佢研究輪迴呢個問題…所以我見佢咁嘅心情同狀態…我都費事再打擾佢…而我腦入面就不斷係度諗…點解會有一隻白鴿喺百草園出現？佢由邊度飛過嚟？同埋點解要擔走白橡樹嘅果實？呢個封閉區域實在有太多解釋唔到嘅謎團… 而去到第3日，我哋終於到達千獸島最南邊嘅島嶼。同百草園一樣，我哋係島外嘅海域落水，慢慢行上島嘅淺灘。行上淺灘之後，不出我所料，盧綠做嘅第一件事…就係飲靈魂之水… 盧綠：阿達…如果一陣見到有第三隻色嘅動物…可唔可以幫我… 達：得啦。我知啦…但你要記住 盧綠：我知，我會以搵第3個島嘅線索為大前提…我唔會影響進度嘅… 達：（讀白）佢講完之後，就無再出聲，沉默咁向前行…我都無阻止佢，因為我都經歷過好想搵到爸爸嘅心情…而行咗大概15分鐘左右，盧綠好急咁跑咗向前，仲同我講 盧綠：阿達！你睇唔睇到啊？棵樹啊！ 達：盧綠…呢棵樹得墨綠色同灰色碼…佢唔似棵食人花咁架… 盧綠：我唔係講緊有冇靈魂啊…你望下嗰樹幹！有一個好暗嘅黑色箭嘴… 達：係喎…唔用全知狀態…真係睇唔到架喎…但會唔會係你哋之前登島嘅時候留低嘅標記嚟架？ 盧綠：會用呢個水墨畫箭嘴嘅人…得一個！ 達：咁會係邊個？ 盧綠：我細佬，盧葦！ Zip噏劇場 Game of Eden 第二季 小島篇 第57回「迷之箭嘴」 阿攝 飾演 阿達 Cfun 飾演 盧綠 編劇及製作 阿攝 音樂 BEAT FRIDAY（Atoms, Soothes） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 73【Zip噏劇場】Game of Eden 第二季 「小島篇」#56《轉世秘密》
達：（讀白）喺現實世界，曾經經過一條長長嘅小巷，小巷入面有一個個紅色帳篷，每個帳篷外面都貼咗兩個字 - 算命。 呢條就係幾出名嘅地下算命街。每個帳篷都有唔同門派嘅師傅。而外面都有唔少想預知命運嘅人。有一次，有一個帳篷無人，入面嘅算命中年阿叔企咗係帳篷外抖氣，佢見到我經過，就捉住我隻手同我講：嘩！後生仔！你骨格精奇！未來一定可以影響世界！ 嘩，咁嘅說話都噏得出！搵食果然艱難…所以，我好有禮貌咁撥開佢隻手繼續行。點知佢用另一隻手再捉住我，好認真同我講：後生仔，有啲野係整定架！你上一世係一個基因工程師，再上一世係一個特務，再上上一世係一個程式員，而再上上上一世就係一個編劇！總之每一世都係改變緊個世界啦！ 我聽完都係得啖笑，再撥開佢隻手，頭也不回咁走。但佢無放棄，係度大叫：喂！咁都比我撞到你，係緣份，我唔收你錢，幫你算命啊！因為你會有大劫啊！ 當時只係得15歲嘅我係度諗，如果真係有命運，點解我爸爸會失蹤？如果有前世，咁究竟我上一世做咗咩事，今世會成為孤兒？ 不過呢個世界無真正嘅解釋，只有自己認為嘅解讀。巧合定緣份，睇下你嘅觀點同角度。 而呢一刻，我望住我手上畫咗食人花圖案嘅黃紙，再回想剛才我左手發出激光打到佢粉碎，再比張黃紙吸入嘅情境，究竟發生咩事？我…可以點解讀呢？ 第一問題，我左手點解可以發出激光？上一次有類似嘅情況，係同盧婷喺Game of Eden 張保仔洞入面，我射爆咗洞頂嘅岩石…再上一次就係喺area zero 出嚟之後，整到阿K無咗隻手…然後我諗起 AI 0 嘅說話： 「阿達，一切展露於33，但呢個只係開始，同一時間，善用D嘅能力啦。」 唔通…呢個就係D嘅能力？ 第二個問題…我手上嗰張畫咗食人花嘅黃紙背面…寫住 125-130年 牡丹花 130-175年 凱花 175年-180年8月31日 豬籠草 180年9月1日 食人花 唔通…喺全知狀態望到有3隻顏色嘅食人花…真係有靈魂…而佢嘅靈魂…仲輪迴咗幾次…呢張黃紙係佢嘅三世書？但明明盧零一開始整呢個封閉區域唔係想模擬返現實世界嘅設定架咩？點解會有輪迴轉世嘅機制？ 當我諗爆頭都諗唔明最合理嘅解釋嘅時候…嗰隻原本比食人花吞咗，身體好虛弱嘅雀仔終於回復返多少少嘅精神，仲可以慢慢拍翼起飛。佢先飛上去棵白橡樹，叼走一粒一白橡樹果實之後，就向東邊嘅海域飛走咗…同一時間，盧綠都蘇醒啦… 盧綠：阿達...棵...食人花呢...? 達：佢...消失咗啦... 盧綠：係...點消失架...？ 達：嗱...就係呢張黃紙囉。佢整暈你之後，就向我攻擊...我隨手拎起呢張道具...喺佢嘅樹鞭掂到呢張黃紙嘅時候...就比佢吸咗入去啦... 盧綠：（冷笑）哈...總之一早叫你拎啲道具出嚟試，咁就唔駛打餐死... 達：係呢...你無事嗎...我幾驚你吸咗啲花粉之後會好似我咁中毒啊！ 盧綠：無事...只係發咗一個好奇怪嘅夢啫... 達：好似我咁，夢到食人花？ 盧綠：我...夢到仁叔細個時候嚟呢個島搵花嘅事...仲有就係仁嬸同仁叔相處嘅點滴...明明呢啲係我出世前嘅事...唔知點解我會夢到...我以為我係走咗入仁叔嘅記憶世界，但點知之後比我見到呢度嘅豬籠草，喺大凶日之後突變成食人花嘅經過...真係好奇怪... 達：盧綠啊...仁嬸嘅全名...係咪叫「凱花」啊？ 盧綠：你又會知嘅？仁叔講過你聽？但仁嬸過身之後，仁叔都好少同人提及仁嬸嘅事... 達：係因為...呢張黃紙... *接紙聲效 盧綠：（喃喃自語）125-130年 牡丹花...130-175年 凱花...175年-180年8月31日 豬籠草...180年9月1日 食人花...即係... 達：即係佢好有可能係仁嬸嘅轉世...? 盧綠：即係我地殺咗仁嬸？ 達：又未必係死咗嘅...我見住佢比張黃紙吸咗入去...或者...有方法整到佢出嚟...? 盧綠：咁即係...頭先食人花其實唔係想攻擊我地？而係想同我地溝通？ 達：你咁諗又極端咗少少...佢啲機鞭都真係唔野少架... 盧綠：咁你點解釋佢只係綁住我而無殺到我，同埋用花粉整暈我，令我發嗰個夢？ 達：我點知喎...巧合掛？ 盧綠：巧合？由你尋日嚟食咗惡夢磨菇，到夢見呢度有食人花，再到依家！真係巧合咁簡單？ 達：你問我，我問邊個啫？我夠想知答案啦！你嘅祖先明明想呢度同現實世界設定係一樣，我又點知會有呢啲轉世嘅玩法啫！ 盧綠：轉世...靈魂...根據代代相傳嘅習俗...我地過身之後，就會透過火燒遺體船嘅儀式，再次回歸玄武大帝啲懷抱...但阿爸死嘅時候...佢嘅遺體只係得返墨綠色同灰色碼...已經無咗靈魂...唔通...佢一死之後，即刻返咗玄武大帝身邊？唔通...佢好似仁嬸咁...有機會轉咗世？ 達：盧綠，你都係估啫...不如我地 盧綠：阿達！比我！ 達：比咩你啊？ 盧綠：黃紙！我要啲無畫野嘅黃紙！ 達：你要嚟做咩啊？ 盧綠：比我！快啲比我！ 達：喂！你冷靜啲，唔好搶！我比你我比你 *草地奔跑聲效 達：喂！盧綠！你去邊啊！ *草地奔跑聲效 達：（讀白）盧綠唔知做乜事，喺我腰度搶走一疊黃紙，就喺山頂平原跑落山，佢邊跑邊周圍望，好似搵緊野咁...跑咗一大段路...佢終於停咗喺一棵松樹度... 盧綠：阿達！你見唔見到啊！呢棵松樹都有3層顏色，而最入面嗰層，係綠色架！ 達：你想講佢有靈魂？ 盧綠：我阿爸佢好鍾意松樹...會唔會佢死咗之後就？ *黃紙貼上松樹聲效 盧綠：唔得嘅...阿達！可能要你先得啊！你幫我試下啊！ 達：（讀白）盧綠遞咗張黃紙比我...想我收伏呢棵松樹...但我當然無話佢知之前可以收伏食人花...係因為我用左手嘅激光打到佢粉碎...先會被張黃紙吸受咗...我怕我同佢講我識激光呢件事...會嚇親佢...所以，依家我做下樣，將黃紙貼喺棵樹度。而當然，係乜事都無發生啦... 盧綠：點解唔得嘅？阿達，你係咪漏咗啲咩無做？例如係咒話？又或者動作？ 達：盧綠啊...無啊...當時我真係遞張黃紙出嚟...就收咗棵食人花入張黃紙度...你信我啦... 盧綠：又係啊呵...阿爸死咗都唔夠2個星期，邊有可能咁快轉世成為呢棵咁高咁大啲松樹呢？應該係其他細小嘅植物...又或者...會唔會係昆蟲呢？ *草地奔跑聲效 盧綠：阿達，你做咩唔跟過嚟啊！我要你幫手架！ 達：盧綠，可能你阿爸轉世咗做人呢 盧綠：係喎！點解我諗唔到呢個選項呢！但如果佢轉世咗做人...我點知佢前世係我阿爸呢... 達：盧綠！你冷靜啲啦！我地出海係要去第7個島嘅盡頭搵返盧婷架！ 盧綠：但係依家... 達：依家做咩啫！你係咪想搵晒全個百草園有靈魂嘅植物去試，睇下佢地係咪你爸爸嘅轉世？你睇到啦，成個百草園有靈魂嘅植物唔多，可能仁嬸...即係凱花係個別例子呢？又可能佢地轉世係做人，又或者係千獸島嘅動物呢？總之依家就要冷靜！ 盧綠：冷靜...我要冷靜...咁我依家應該要做啲咩... 達：我叫你冷靜啊！！！ *出鞘聲效 *劍插地聲效 盧綠：阿達...你想做咩啊？ 達：執起把劍！ 盧綠：我依家無心情同你打啊... 達：我唔係要同你打啊！我想你拎起把劍！記返我地今次出嚟係要破解斗之盡處嘅秘密！我地去到盡頭，自然搵到盧婷同埋所有嘅答案！ *拔劍聲效 Zip噏劇場 Game of Eden 第二季 小島篇 第56回「轉世秘密」 阿攝 飾演 阿達 Cfun 飾演 盧綠 編劇及製作 阿攝 音樂 BEAT FRIDAY（All you need, Heatwave, Adjust, Recharge, Stack） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 72【Zip噏劇場】Game of Eden 第二季 「小島篇」#55《裘仁與凱花》
盧綠：（讀白）呢度係...百草園？但點解唔係最高嘅平原？而係淺灘附近摘卡比木嘅草地？嗰棵食人花呢？阿達呢？ 「阿達！阿達！你係邊啊！！！？？？」 仲有...我啲手手腳腳呢？點解我望唔到我啲手腳架？ 唔通我死咗？ 「阿達！阿達！」 *腳步踏上草地聲效 嗰邊有腳步聲，阿達！係咪你啊？ *腳步踏上草地聲效 撥開草叢出現係我面前嘅...唔係阿達...而係一個拎住牽星板嘅5歲小朋友，仲向我呢個方向行過嚟添！ 「喂！小朋友！小朋友！你應下我啊！」 但嗰小朋友完全聽唔到我講野...仲穿過咗我嘅「身體」，喺我旁邊嘅草地踎低咗...好聚精會神咁望住一棵花...而嗰棵花...係一棵比蟲蛀緊，就嚟淍㴬嘅牡丹花。呢位小朋友即刻整走啲害蟲，然後小心翼翼咁將棵牡丹喺泥土度起咗出嚟，放落一個盤度。 呢個時候，有另一個男人喺草叢度走咗出嚟，大叫：「仁仔，我地要行啦！」 仁仔？唔通呢個係仁叔？ 跟住，我面前嘅景像一下子由百草園返咗去啞鈴洲。呢位叫仁仔嘅小朋友將牡丹花拎咗返嚟觀星閣，仲移植喺觀星閣旁邊嘅草地添。 我再眨一眨眼，呢位仁仔已經由一個5歲小朋友，長大到10歲。而花開花落，牡丹花亦都經歷好多個生命嘅周期，但無阻仁仔呢位花痴嘅熱情。佢依舊好用心咁照料帶嚟嘅牡丹花。 下一個剎那，仁仔去咗凱氏家族嘅村莊，我見到凱安嘅爺爺抱住一個啱啱出世嘅女嬰，仲同大家講：咁多位！呢個就係我個女，依家正值春季開花之期，我為佢取名花，全名凱花！」 10歲嘅仁仔慢慢走去小女嬰度，原本喊緊嘅小女嬰見到拎住一束牡丹花嘅仁仔就停止咗喊，仲慢慢展露笑容添！ 眼前景像再轉，仁仔慢慢變成仁哥，而凱花都長大成為一個10歲嘅小女孩。凱花好鐘意黐住仁哥，仁哥亦好耐心咁教佢種花。每當仁哥好認真好專注講解嘅時候，凱花都報以仰慕嘅眼神。 眼前景像再跳，去到150年嘅春天。仁叔同凱花穿上新郎新娘嘅紅抱，喺全村嘅祝福之下結成夫妻。 裘仁：我裘仁對北帝星立誓，我會全心全意愛護凱花，我對你嘅愛就如北帝星嘅光芒一樣！ 凱花：（甜笑）即係點啊？ 裘仁：即係永恒啊！ 估唔到我竟然觀賞到我出世前仁叔仁嬸嘅大婚日子...即係我入咗仁叔嘅記憶世界？ 眼前景像一而再，再而三咁轉變，都係仁叔仁嬸嘅生活點滴，主要都係觀星、種花嘅甜蜜溫馨畫面。我仲見到細個嘅自己跑去仁叔屋企同佢地兩個玩添！ 直到...175年夏天...仁嬸過身...仁叔喺仁嬸遺體上面放滿佢地一同種植嘅鮮花... 裘仁：你先返去玄武大帝身邊...我會好好守護我地嘅小花園...喺不久嘅將來...我會帶好多束鮮花去搵你。你安心上路啦。 當我以為下一刻係仁叔哀愁嘅畫面，點知我又返到百草園嘅白橡樹旁邊，望到一棵豬籠草係度捕食昆蟲。突然眼前景像一黑！ 當再次變返光嘅時候，豬籠草竟然... *樹木生長聲效 竟然由中間開始裂開...仲破土而出！變成剛才襲擊我同阿達嘅食人花啊！ 下一刻畫面再轉，我望到一隻雀仔飛到白橡樹頂，然後慢慢飛到食人花旁邊，跟住食人花就突然合埋花瓣，吞咗隻雀仔！ 一望到呢個畫面，我就嚇醒咗！返到原來嘅時空，我瞓咗喺草地上面...仲見到阿達好疑惑咁望住手上面嘅黃紙... 但係... 棵食人花食呢...？ Zip噏劇場 Game of Eden 第二季 小島篇 第55回「裘仁與凱花」 Cfun 飾演 盧綠 小強 飾演 裘仁 李麗蕊 飾演 凱花 編劇及製作 阿攝 音樂 BEAT FRIDAY（Nothing, Almond, Surface） 封面設計 Followmelikeblack 歌：維納斯的誕生 The Birth of Venus Composed by Kendy Suen/Duke Lyrics by Kendy Suen/Chengman Arranged and Produced by Kendy Suen Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 71【Zip噏劇場】Game of Eden 第二季 「小島篇」#54《花戰》
地點：封閉區域Area DB Island 監控室 莫十三：（讀白）就喺人工智態K DB Island燒完一張黃紙，我就進入咗一個放滿電視嘅白色空間。呢個可以話係封閉區域Area DB Island 嘅監控室，因為每一部電視都直播住今敏幫盧零創造嘅啞鈴洲每一個角落。我起初以為呢一個封閉區域只係得啞鈴洲一個島，但原來北面仲有其他島嘅存在。而就喺其一個外貌同希臘字母「η」一樣嘅島上面，充滿各式樣嘅植物。喺呢個島最高嘅平原，有一棵好高好高嘅白橡樹，樹旁邊有一棵有兩個人咁高嘅花，鮮紅色嘅花瓣令佢望起嚟既怪異又吸引。而呢個平靜嘅夜晚，被另一個島飛嚟嘅雀仔打破咗。原本停喺白橡樹休息嘅雀仔好似望到呢一朵鮮紅色嘅巨花，所以佢由白橡樹枝慢慢飛向巨花。就喺佢飛近巨花之際，呢朵巨花突然合埋花瓣！吞咗隻雀仔！ 乜盧零唔係想呢個啞鈴洲維持現實世界嘅設定架咩？點解會出現呢一種傳說嘅食人花？可惜今敏同K DB Island唔喺我身邊，暫時無人答到我呢個問題...而我轉咗去另一部電視，就見到阿達暈咗喺島嘅另一邊...有一位村民幫佢解毒...直到天光，阿達終於醒...仲同嗰位村民向白橡樹方向出發...阿達...你唔係想同食人花打吓嘛？如果有咩事，我點救你啊？ ------------------------------------ *食人花移動聲效 達：（全知狀態）盧綠...依家點算啊？ 盧綠：（全知狀態）咩點算啊？梗係走啦！ 達：（全知狀態）但係隻雀仔... 盧綠：（全知狀態）呢個時候你仲諗住救佢？ 達：（全知狀態）尋晚喺夢入面向我救求嘅應該係呢隻雀仔喎！我無理由唔理佢架！ 盧綠：（全知狀態）弱肉強食，大自然係咁架啦！ *飛鞭聲效 達：盧綠！小心啊！ 我無用到全知狀態大叫咗呢一句，因為就喺盧綠講完嗰句說話想轉身走嘅時候，食人花其中一條樹枝突然伸長，然後快速衝向盧綠！盧綠一個閃身避開咗食人花嘅樹枝攻擊！但食人花無就咁放過佢，伸長咗樹枝再次飛過盧綠！呢個時候，盧綠拎出收喺背後嘅白橡蛇矛出嚟 *白橡蛇矛聲效 用力一揮！劈開食花人嘅樹枝！ *斬劈樹枝聲效 盧綠：阿達！快啲走啊！ 達：哦…知道！ *地裂聲效 達：（讀白）當我想轉身跑走，食人花嘅樹幹竟然破地而出！露咗出地面，仲攔住咗我嘅去路！我一時反應唔切，食人花又再攻擊盧綠啦！ *飛鞭聲效 *擋格聲效 達：盧綠！我哋依家點算啊！ 盧綠：我依家唔得閒理你啊！ 達：（讀白）食人花唔知點解淨係攻擊盧綠，而盧綠就拼命揮矛迎接食人花樹枝嘅攻擊！ 盧綠：人我就打過，花真係第一次！ 達：（讀白）食人花飛出嗰兩條樹枝，速度好似兩條鞭咁，盧綠好靈活咁揮動白橡蛇矛擋格樹鞭！佢邊擋邊避，希望逃出樹鞭嘅攻擊範圍！可惜，樹鞭好似識無限伸展咁，無論佢點拉開距離，樹鞭都可以照樣攻擊到佢！不過盧綠無驚，反而越打越起勁，仲笑起上嚟添！ 盧綠：你估越長真係越強咩！ 達：（讀白）佢一講完，就跳起避開兩條伸到成兩米長嘅樹鞭，然後兩腳踩實佢哋！再用力一個橫斬！斬斷兩條樹鞭！ *斬擊聲效 *魔獸慘叫聲 達：（讀白）唔知係咪我全知狀態嘅錯覺，我好似聽到食人花慘叫！ 盧綠：仲望！走啦！ *跑動聲效 達：（讀白）跑唔夠兩步，食人花連花帶動樹幹由左至右向我哋橫掃！ *跌落地聲效 達+盧綠：（痛啊）啊！ 達：（讀白）我哋反應唔切，就被食人花掃跌咗！盧綠仲甩手，枝白橡蛇矛飛到好遠！ 盧綠：劍！阿達！劍啊！ 達：係！ （讀白）我即刻將我背後嘅北斗七星劍拋比佢！ *出鞘聲效 盧綠：阿達，我哋唔諗下辦法，就會死喺呢度架啦！ 達：解謎我就識，打人…我唔識架！ *食人花移動聲效 盧綠：總之就諗下辦法啦！ 達：（讀白）仲喺全知狀態嘅我，可以睇到食人花同白橡樹嘅顏色…白橡樹只係由墨綠色同灰色點形成，唔似食人花咁有第三隻色，即係白橡樹係普通同正常嘅植物！而佢嘅樹莖好深好長，一直沿住山向下延伸，仲連結住其他植物添！反而食人花嘅樹莖好獨立咁埋係土地入面，即係佢係獨立個體！另外，佢身上嘅紅色點點比較集中喺花位置，係咪代表花就係佢嘅頭呢？ 盧綠：佢依家嗰花柱對住我哋，好似同我哋對峙咁！被雄蕊綁住嘅雀仔好似越嚟越虛弱喎！ 達：盧綠！你有無信心斬斷花柄？ 盧綠：點解係花柄啊？ 達：你睇食人花顏色嘅分佈，你唔覺得花係似頭，樹幹似身，攻擊你嘅樹枝似手，莖似腳咩？ 盧綠：雖然我唔知你講緊乜，但點都試下啦！不過你就要郁下啦！ 達：點郁先？ 盧綠：你見唔見到佢嘅樹枝已經回覆得7788，一陣佢向我哋攻擊嘅時候，我哋一齊相反方向跑！ *飛鞭聲效 達：（讀白）我同盧綠背對背，就喺兩條樹鞭就攻擊到我哋嘅時候 盧綠：跑！ 達：（讀白）我同盧綠就向相反方向圍住食人花跑！而其中一條樹鞭就追住盧綠，另一條樹鞭追住我！當我同盧綠跑咗一個圈之後 盧綠：繼續跑！ 達：（讀白）就係咁，我哋跑咗兩三個圈，樹鞭就追足我哋咁耐！之後 *打結聲效 達：（讀白）兩條樹鞭打咗結，捆埋一齊！唔係好用到力！ *斬擊聲效 達：（讀白）盧綠一個斬擊，斬斷咗兩條樹鞭！然後一個踏步，做出寸刺嘅動作！ *地裂聲效 *硬物擋格聲效 達：（讀白）食人花嘅莖竟然喺地底露咗出嚟！仲擋住盧綠嘅攻！而北斗七星劍插實咗係樹莖度！拔唔到出嚟！ *食人花移動聲效 盧綠：阿達！唔好理我！快啲走啊！ *綑綁聲效 達：（讀白）樹鞭好快咁生返出嚟！然後綑住盧綠，再將佢升起到花瓣嘅位置，好似想食咗佢咁！ 盧綠：（少少辛苦辛苦）走啊…阿達…走啊！ 達：我…啊！道具！有咩道具珠啱用呢！但得返紙船飛同紙紮人仔，仲有唔知有咩用嘅黃紙！全部都廢嘅！ *食人花移動聲效 *噴放花粉聲效 盧綠：（虛弱）阿達… 達：盧綠！唔好講野！合埋口！食人花向你噴緊花粉啊！ 盧綠：（虛弱乾咳）走…（乾咳）走啊… *落地聲效 達：（讀白）食人花將盧綠放咗落地，盧綠完全無反應好似暈咗咁！跟住食人花嘅樹鞭慢慢向我伸埋嚟！依家點算呢？用紙紮人仔走？ *吹爆道具珠聲效 *紙張散落聲效 達：（讀白）死火！咬錯黃紙嗰個道具珠添！我是旦拎執起一堆黃紙！好似睇殭屍片嘅道士咁…同食人花講 - 你…唔好行埋嚟啊…食人花當然聽唔到我講野啦…兩條樹鞭繼續緩緩向我伸過嚟…就係我身前一米！突然加速！一條衝向我嘅左手，另一條衝向我拎住黃紙嘅右手！ 跟住我合埋眼，同時大啊唔好啊！ *激光聲效 當我再開返眼！發現衝向我左手嘅樹鞭被一道激光燒爛咗…而道激光…係喺我左手掌心射出嚟…我再望一望自己隻左手手掌…發現掌心嘅交叉疤痕微微發光…然後樹鞭慢慢分解成微粒… *分解聲效 但佢無隨風消失同消散，而係被我右手張黃紙吸咗入去！ *吸入聲效 唔駛幾秒！黃紙吸收晒變成粉狀嘅食人花！然後跌咗喺地面…本身被食人花吞咗嘅雀仔亦跌咗喺地面…好彩…佢仲有呼吸…但奇怪嘅係…佢只係由墨綠色同灰色嘅碼所組成…佢只係呢個區域嘅NPC 雀仔…咁喺夢入面叫「救我啊，救我啊」嘅，又係邊個？ 我滿頭問號咁執起吸咗食人花嘅黃紙，本身乜都無嘅黃紙，其中一面就變成食人花嘅水墨圖案，至於背面…就寫咗幾行字… 125-130年 牡丹花 130-175年 凱花 175-180年8月31日 豬籠草 180年9月1日 食人花 Zip噏劇場 Game of Eden 第二季 小島篇 第54回「花戰」 彬臣 飾演 莫十三 阿攝 飾演 阿達 Cfun 飾演 盧綠 編劇及製作 阿攝 音樂 BEAT FRIDAY（Stack, Surface, List, Adjust, Bad End, Kaji） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 70【Zip噏劇場】Game of Eden 第二季 「小島篇」#53《食人花》
地點：封閉區域Area DB Island，百草園 時間：180年9月15日晚上 *風吹樹葉聲效 *昆蟲叫聲效 盧綠：（讀白）細個嘅時候，我同阿葦仲有婷婷經常都會通山跑，然後會跑到啞鈴洲最高嘅地方，即係觀星閣，同阿雪、阿安一齊睇星星。阿爸話呢個世界係玄武大帝賜比我地，所以無論對一花一草，一樹一木，仲有所有昆蟲、動物，都要有敬意之心，同時對大自然要始於欣賞，終於相忘。 當然，我成為咗村長，得知呢個啞鈴洲嘅真相之後，就知阿爸所講嘅玄武大帝只係虛構嘅神話，但我呢一刻身處百草園，觀察四圍嘅景色，都不得不佩服創造呢個區域嘅造物主嘅偉大。 我抬頭望天，天上嘅北斗七星好閃耀咁發光，旁邊嘅滿月盈亮，映照成個百草園。當我合埋眼，就會聞到各種花草嘅香味，加埋昆蟲包圍住我嘅叫聲，真係好療愈，仿佛將由接任村長開始嘅煩惱一掃而空。我再開返眼，啱啱就有一大片雲遮住咗月亮，百草園好似回復夜晚應有嘅漆黑。誰不知突然有一股溫和嘅風吹過我身邊呢一棵樹，令樹上面嘅昆蟲嚇到飛起。原來佢地係螢火蟲，係飛嘅同時露出發光嘅尾巴，令到百草園嘅原本鮮艷嘅花草添加一種螢光嘅效果，呢一刻嘅美景，真係好想同阿葦仲有婷婷分享... 可惜...依家喺我身邊嘅係呢一位阿達！佢亂咁摘咗野生磨菇都算，仲又聞又舔，搞到中咗菇毒暈咗喺草地上面，然後開始發冷，標冷汗，仲係度自言自語 「你係邊啊？我會嚟救你架！」 重覆咗好幾次之後，開始周身出拳踢腿，好似想同人打架咁。所以，我搵條繩綁住佢嘅手腳，然後搵解毒嘅方法。 佢呢種情況，應該係食咗惡夢磨菇。凡係誤食咗呢種磨菇嘅人輕則會發惡夢，重則會做出傷人傷己嘅夢遊行為。依家阿達應該係屬於重症類別...有咩方法幫佢解毒呢？ *步行草地聲效 盧綠：（讀白）啊，搵到啦！阿雪講過大自然其中一樣奧妙之處，就係佢嘅相生相剋嘅循環。惡夢磨菇生長喺陰暗偏潮濕嘅環境，通常會喺枯木上面發現佢地。惡夢磨菇會分解枯木，轉化成養份比附近嘅植物生長。而有趣嘅係，惡夢磨菇旁邊都會有呢一種叫做「短尾草」嘅小型灌木植物。佢有唔同顏色嘅花，但因為葉型好似動物嘅短尾巴而得名「短尾草」。 我摘咗20塊短尾草，將佢地綁埋一齊，然後燒著佢地。燒著咗嘅短尾草會發出一陣陣香味，而呢種香味可以令人放鬆，抒解焦慮，甚至可以趕走負能量。果然，阿達聞咗一陣短尾草嘅香味之後，就停止咗夢遊嘅行為，開始平靜落嚟。 惡夢磨菇會令人發惡夢，但同時佢分解枯木化成養份比短尾草生長，而短尾草偏偏可以解到惡夢磨菇嘅毒性，呢個就係大自然奧妙嘅億份之一嘅例子。 而當我聽到阿達傳出一陣陣鼻寒聲，我就知道佢已經無事，我可以放心休息啦。 ------------------------------------------------------------------------------------------------------------------------ *火燒聲效 達：嘩！好熱！好熱啊！ 盧綠：燒咗咁耐，你終於有感覺，終於醒啦咩？ 達：你做咩用啲草燒我腳板底啊？ 盧綠：太陽曬你唔醒，梗係要用其他方法啦！唔燒你嗰湧泉穴，點幫你增加返啲精氣神，令你快啲有返體力啊！ 達：但都唔駛熱到好似要燒熟我隻腳咁架！ 盧綠：好啦好啦，聽你把聲知你回復返曬啦。我地可以返上船出發去千獸島啦。 達：等等先...我想去一去白橡樹望一望啊... 盧綠：白橡樹喺百草園最高嘅位置，登山落山至少一日...好影響我地嘅行程架！ 達：但我尋晚暈低咗之後...就發現自己出現喺山頂嘅白橡樹旁邊，仲聽到有人叫「救我啊！救我啊！」 盧綠：你尋日食咗惡夢磨菇，所以發惡夢係好正常嘅症狀嚟嘅。 達：但個夢好真架！因為我真係好清楚有人叫救命！ 盧綠：我都聽得好清楚，你尋晚發開口夢，係咁話要救人。但呢個島得我同你，邊有人要救呢？你發夢啫，阿達。 達：但個夢真係好真...我仲同棵食人花打境上添！ 盧綠：咩啊？食人花？ 達：係啊...係白橡樹旁邊，有一棵一個人咁高，花瓣有成張櫈咁大咁闊咁食人花，佢合到實一實，好似含住啲野咁...而把聲就喺花入面傳出嚟.... 盧綠：睇嚟你中毒真係好深，我再燒嘅短尾草令你回復精神先！ 達：我知係好誇張...但我可唔可以去望一望？ 盧綠：我喺啞鈴洲生活咗咁耐，都未聽過有食人花！豬籠草就有。 達：豬籠草？ 盧綠：即係捕捉昆蟲為食物嘅植物，同埋佢最多只係得腳咁高，你所指嘅食人花，必定係你幻想出嚟架啫。 達：你當滿足一下我嘅好奇心！比我去望一望啊！ 盧綠：阿達，「一下」呢個量詞，好可圈可點。 達：真係一次！之後所有行動都由你話事！ 盧綠：一言為定？ 達：係！ 盧綠：依家係早晨時間，我地腳步快嘅話，希望日落之前上到山。出發！ 達：（讀白）前往山頂嘅過程之中，盧綠講咗有關誤食惡夢磨菇嘅事件比我知道。佢話曾經有村民食完之後，話自己可以同動物溝通，亦有村民話夢見離世嘅親人。但由於有村民曾經做出傷害到自己嘅夢遊行為，所以，早幾任村長訂咗規則，禁止大家食用惡夢磨菇。而我再諗返尋晚發嘅夢...真實到...我分唔到嗰個係唔係夢... 盧綠：（少少喘氣）阿達...呢度就係山頂平原，你依家都望到啦...得棵白橡樹咋嘛...喂...你行去邊啊！ 達：我印像中，嗰棵食人花喺白橡樹樹幹後面啊！ 盧綠：唉...都話咗係夢嚟架囉... *行草地聲效 盧綠：邊有可能會有食人花啫！ 達：殊！！！ 盧綠：做咩事...嘩！ 達：殊！ 盧綠：（讀白）喺白橡樹後面...真係好似阿達夢入面提到...有一棵顏色鮮艷，花瓣合到實一實嘅花出現喺我地面前...但唔同嘅係...棵食人花係有兩個人咁高...呢個時候，阿達對我做出飲水嘅手勢，我即時會意！ *飲水聲效 * 全知狀態聲效 達：（全知狀態）盧綠，你睇唔睇到啊！ 盧綠：（全知狀態）咁大棵點會睇唔到啊？ 達：（全知狀態）我係指佢嘅顏色啊！ 盧綠：（全知狀態）花瓣係鮮紅色嘛！ 達：（全知狀態）我意思係全知狀態之後佢嘅顏色啊！ 盧綠：（全知狀態）最外面係墨綠色...中間係灰色...最入面係紅色...即係... 達：（全知狀態）其他植物都只係得墨綠色同灰色，佢係最入面嗰層紅色，即係佢同其他植物唔同，佢係有靈魂架！ *食人花移動聲效 盧綠：（全知狀態）阿達...佢係咪郁緊啊... 達：（全知狀態）佢個花頭...好似郁緊過嚟啊！ *食人花快速移動聲效 達：（全知狀態）佢對住我地打開花瓣！花蕊中間...係一隻垂死嘅雀仔啊！ Zip噏劇場 Game of Eden 第二季 小島篇 第53回「食人花」 阿攝 飾演 阿達 Cfun 飾演 盧綠 編劇及製作 阿攝 音樂 BEAT FRIDAY（Night, Recharge, Crates, Nothing, List） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 69【Zip噏劇場】Game of Eden 第二季 「小島篇」#52《百草園》
*帆船出海聲效 *海浪聲效 地點：封閉區域Area DB Island，北面海域 時間：180年9月15日早上7時 *金屬支架轉動聲效 達：盧綠啊，點解船頭會有隻用金屬做嘅鐵雀，下面有個十字型啲轉盤，係咁順時針咁轉，呢嚿係咩嚟架？ 盧綠：你身處嗰個世界唔係好高科技架咩？連呢樣野都唔知？ 達：就係我嗰個世界太高科技，所以唔知你呢啲舊科技係咩嚟囉... 盧綠：我地叫呢隻做測風鳥，外型就模仿啞鈴洲最常見嘅雀鳥整成，下面嘅十字型轉盤就係順住風向去轉，測風鳥嘅鳥頭指向邊一個方向，就知風由邊度吹過嚟。 *吹波膠聲效 盧綠：你呢個銀色圓盒係咩嚟？ 達：比你望下啦 盧線：東南西北四個方位，各寫住一個我唔識嘅符號...入面有一枝針，永遠指住一個方向...難度就係指南針？ 達：無錯！依家你隻測風鳥個頭指向東北方，即係風由西南方吹過嚟 盧綠：按依家嘅風力，應該4個時辰之後就可以到達百草園 達：我正想問你啦！點解我地唔向東北偏東嘅方向行，直接去千獸島搵第3個島嘅線索，反而要去百草園咁浪費時間呢？ 盧綠：因為我需要去百草園採摘藥材 達：仲要採啲咩啊？仁叔已經準備咗一箱藥比你啦喎，又有止血草、葛根湯、行軍散等等，仲唔夠？ 盧綠：因為我要採摘更多九節木維迪斯葉同卡比木磨成粉去製作靈魂之粉，咁就可以隨時隨地進入你口中嘅「全知狀態」。 達：依家都無其他村民係度，唔駛再用「全知狀態」溝通啦 盧綠：但我對千獸島仲有其他嘅島完全唔熟悉，以防萬一，有靈魂之水旁身會更安全。 達：好啦好啦... 盧綠：依家太陽咁猛，你都係返入船艙休息一下，差唔多到百草園嘅時候我會通知你。 ----------------------------------- 達：（讀白）根據裘雪所畫嘅地圖，百草園距離啞鈴洲大約120公里，呢個百草園嘅外形同北斗七星第7粒星 η係一樣，即係似一個細階n字，而島長70公里，闊50公里，「n」字字頭海拔最高，太約1000米，由上而下，「n」字腳就到水平左右；而裘雪漏夜抄寫嘅百草圖鑑上面，將百草園嘅植物分咗藻類、苔蘚、蕨類、裸子同被子植物，即係無花同開花5大類別，而每一種植物都標明究境係藥用 / 食用定未知用途。食用嘅有小麥、大麥、米等等，喺貼近海拔嘅高度位置生長；飲用嘅就係茶葉類，喺海拔大概600米左右高嘅位置；亦有不同嘅生果、花草嘅特徵同簡介。如果裘雪喺現實世界，一定喺一位不可多得嘅生物學家。 *敲門聲效 盧綠：（門外）阿達，我地到啦 達：係！ *開木門聲效 達：嘩！！！ 盧綠：咩事咁大反應？ 達：無...頭先睇裘雪嘅資料，雖然知道百草園好大...但估唔到真正出現喺自己面前嘅時候，係會比呢個巨大嘅綠島所吸引！ 盧綠：大驚小怪。準備上岸啦！ 達：（讀白）盧綠將船泊咗喺百草園100米外嘅海域，佢話因為海唔夠深，駛唔到入百草園嘅沙灘，所以我地要跳落水，然後游上岸。因為潮退嘅關係，水深都唔夠2米，所以半游半浮之下，就好快上到百草園嘅沙灘啦。 *行上沙灘聲效 盧綠：阿達，我依家去採摘卡比木，你喺呢個沙灘度等一等我 達：我可唔可以跟埋一齊去？ 盧綠：咁就唔好發呆，快啲跟上嚟啦。 達：（讀白）我跟住盧綠沿著沙灘旁邊嘅小路行上去上面嘅樹林。盧綠就去採摘卡比木，而我...就不斷係咁索！！！ *大力吸氣聲效 達：（讀白）究竟我喺現實世界吸咁新鮮嘅空氣係幾時呢？2203年，末日鐘已經倒數到淨返最後一秒，雖然科學家喺200年前已經開設種子庫實驗室...保存唔同植物嘅種子同基因...但係天氣反常，空氣、土地、水源污染嚴重...好多動植物已經絕種...由於資源短缺，所以各個政府主力種植super food，即係能夠抵抗極端天氣，就算土地貧瘠都可以生長又俱有營養價值嘅農作物...而喺電影或者紀錄片入面出現嘅大形樹林...已經所淨無幾...我只可以喺Game of Eden感受一下咩叫大自然。不過可能Area 15都比較現代化，反而入到嚟封閉區域Area DB Island，好似回到過去咁，切切實實體會森林嘅美，我咁大個仔...好似第一次被咁多樹包圍住...呢種草青味、花香味、流水嘅聲音，如果現實世界都可以有咁嘅環境...就好啦 盧綠：喂，喂！喂！阿達，你做咩望棵樹望到咁入神啊！行啦！ 達：哦...係...係嘅 盧綠：九節木維迪斯葉喺島嘅另一邊，我地要快啲行啦，要喺太陽落山之前過到去。 達：吓？要由「n」字嘅左邊腳，去右邊腳？咁我地上船駛過去？ 盧綠：嗰邊無淺灘，登唔到岸，要徒步行過去 達：咁咪有排行？？ 盧綠：你咁鍾意望住啲樹，望下望下行下行下就到啦！ 達：不如我返上船等你啊...? 盧綠：唔可以。 達：哦... ----------------------------------- 達：（讀白）就係咁...我同盧綠沿島嘅山路，由「n」嘅左邊行到徒步行去右邊最邊嘅樹林。一路行，眼前就出現更多未見過嘅植物，仲見到蜜峰、蝴蝶係度採花蜜，但係一隻動物都見唔到...一個無動物，得昆蟲以及植物嘅地方，係一個點嘅生態系統呢？ 盧綠：依家入夜啦。我地係度紮營休息一下，聽朝日出嘅時候再起行。 達：行過去又半日，返嚟上返船又半日...真係有排搞... *生火聲效 達：（讀白）盧綠無理我嘅抱怨，喺附近拎咗啲樹枝生火，再喺火上面用石砌咗一個爐頭，然後喺佢自己嘅袋入面拎咗一個小型嘅鐵鑊出嚟。 盧綠：你餓唔餓？ 達：我唔駛食野啦 盧綠：咁我煮自己嗰份啦 達：做咩唔食村民比你嘅乾糧，要自己煮呢？ 盧綠：一陣你試一啖咪知囉。 達：（讀白）盧綠喺附近嘅樹度摘咗唔同嘅果實同植物，再去殼清洗之後，就喺鐵獲上面加水，再煲煮 *煮湯聲效 盧綠：雖然只係得栗子、淮山同其他果實，無粟米、蘿蔔，但呢個野生素湯味道都唔錯架！ *飲湯聲效 盧綠：可惜無帶鹽，差少少咸味。阿達，你真係唔試下？ 達：好啦，飲一啖啦。 *飲湯聲效 達：（讀白）由於Game of Eden係連接大腦腦電波嘅遊戲，所以理論上可以刺激大腦唔同區域，產生唔同官感嘅感覺。而我一飲盧綠煲嘅呢碗素湯，好似感受到一股暖流由我嘅口流入肚入面。雖然我知道我喺現實世界只係瞓喺莫十三病房張床度，駁住Game of Eden啲儀器，呢股暖流係大腦產生嘅感覺，但都真係搞到我真係有少少肚餓... 盧綠：點啊，唔錯呢？ 達：幾好幾好。不過味道可以再豐富多少少。你等我一等！ 盧綠：你去邊啊？ 達：我印像中裘雪嗰本百草圖鑑有一個篇章係菌類，佢話有一隻菇味道幾好架，好似就係呢款啦！ 盧綠：阿達，你唔好亂摘呢度嘅菇啊！ *摘菇聲效 *聞菇聲效 達：呢個菇幾香喎！瀨落去仲有啲好特別嘅味，如果加入去湯度一齊煮…可能…或者會…幾…好味…添… *跌倒聲效 盧綠：阿達！ Zip噏劇場 Game of Eden 第二季 小島篇 第52回「百草園」 阿攝 飾演 阿達 Cfun 飾演 盧綠 Maggie 客串飾演 迷之聲音 編劇及製作 阿攝 音樂 BEAT FRIDAY（Atoms,Camel,Soothes,Distance,Crates,Nothing） 封面設計 Followmelikeblack 達：呢度係…邊度嚟架？盧綠呢？呢一棵…咪係白橡樹？我係百草園最海拔最高嘅地方！但更奇怪嘅係呢一棵高50米嘅白橡樹嘅附近只有一棵一個人咁高嘅花，鮮紅色嘅花瓣合到實一實，尺寸有成張櫈咁大咁闊，好似就嚟會結果咁。我慢慢行近呢棵怪花，仲隱約聽到有一把聲係花入面傳出嚟… 迷之聲音：救我啊…救我啊… （TBC） Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 68【Zip噏劇場】Game of Eden 第二季 「小島篇」#51《起行》
地點：封閉區域Area DB Island，未維修完成嘅北帝廟內 時間：180年9月15日早上6時 達：（讀白）（打喊路）我喺現實世界通常都係凌晨時間瞓，黃昏時間先起身...但唔知點解嚟到呢個封閉區域，反而可以好似古人咁，按住《黃帝內經》嘅時間早睡早起！呢一次，都係我真真正正喺Game Of Eden過夜...因為之前點都會喺24小時內登出，唔計之前被困喺Area Zero，都只係試過通宵唔瞓直踩24小時，今次喺Game入面休息，估唔到精神同體力會回復得咁好，仲唔覺得肚餓添...不過，我都希望可以喺幾日內搵到盧婷，如果唔係...又要用道具人離開呢度，補充體力之後，再搵方法入返嚟... *吹爆吹波膠聲效 達：（讀白）我著咗盧綠佢地漁村嘅衣著，再掛起北斗七星劍，雖然我完全唔識劍術，但帶住好似比較符合玄武童子呢個角色。我再整理一下褲袋啲道具珠 *吹波膠碰撞聲效 達：（讀白）無嘅...點解會無咗嘅...去咗邊呢？？？ *掀帳幕聲效 盧綠：咩無咗啊？ 達：盧綠！係咪你偷咗？ 盧綠：細聲啲...我地用另一種方法溝通... *全知狀態聲效 達：（腦內聲音）盧綠！係咪你趁我瞓著之後偷咗我地道具珠！ 盧綠：（腦內聲音）阿達...我呢家同你同一陣線，邊有心情同動機偷你啲野呢？ 達：（腦內聲音）咁點解會無咗架？ 盧綠：（腦內聲音）呢啲就係你嗰個世界嘅事啦 達：（腦內聲音）喺我由Area 15穿過火圈入嚟嘅時候...明明見到紙紮化成道具珠架...啊！但喺太平紙紮買嗰啲無啊！死啦！依家無咗嗰啲道具！點算啊！！！ 盧綠：（腦內聲音）咩道具咁緊要？無咗會好影響我地出海？ 達：（腦內聲音）我買咗兩把槍、一個飛索、一枝電筒，仲有匕首、帳篷同藥啊...最緊要我買咗北帝嘅座騎同一首黑珍珠號啊！！！ 盧綠：（腦內聲音）槍？電筒？係咩嚟架...？ 達：（腦內聲音）對你嚟講係屬於未來嘅科技...但無呢兩樣道具都唔緊要...無船先死啊嘛！ 盧綠：（腦內聲音）船啫，我地啞鈴洲大把！出發啦！ ------------------------------------------------------------------------------------------------------------------------ 地點：封閉區域Area DB Island 碼頭 *海浪聲 裘仁：玄武童子早晨！ 達：仁叔早晨！ 盧綠：仁叔，我叫你準備嘅用品準備好未？ 裘仁：綠仔，準備好曬，等你驗收。 達：呢艘就係村長你所講嘅船？ 裘仁：呢艘帆船長18米，闊5米，單桅杆，有一個船艙。 盧綠：用松樹造嘅？ 裘仁：本身係凱氏佢地出海打魚嘅船，但因為知道你地要遠行，佢地漏夜再用望天樹加固。呢艘船係我地啞鈴洲速度最高最快嘅帆船，應該適合你地兩個出海航行。 達：（腦內聲音）喂...呢隻船咁細隻...同我原本買嗰隻黑珍珠號差咁遠，得唔得架...? 盧綠：（腦內聲音）你駛唔駛揸船啊？ 達：（腦內聲音）唔識... 盧綠：（腦內聲音）咁比幾勁嘅船你都無用啦 達：（腦內聲音）咁望天樹又係咩嚟架...? 盧綠：（腦內聲音）本來我地會用松樹或者柏樹造船，但望天樹係我地啞鈴洲入面最堅固嘅三大木材之一，非常之珍貴，除非遇到超強颱風，否則一定安全。 達：（腦內聲音）唉，如果有app可以揸到天氣就好啦... 裘仁：玄武童子，綠仔，你地對望咁耐，唔係有咩事嘛？ 達：無...我擔心天氣啫... 裘仁：以最近兩個星期觀天嘅預測，未來兩個星期天氣都非常之好，玄武童子無需擔心。 盧綠：勞煩曬你，仁叔。至於糧食方面 裘仁：呢班村民已經準備好啦 村民甲：玄武童子，村長！呢度係我地掩製嘅肉乾！新鮮生曬！好好味架！ 村民乙：食咁多肉，咪無廁所去！呢度係我地幾位菜農果農掩製嘅泡菜同曬乾嘅果乾，仲有啲新鮮嘅橙同梨，咁遠行嘅時候唔怕缺水同維生素，唔怕有壞血病啦！ 村民丙：仲有我地整嘅乾糧，包括有薯仔餅、粟米餅同麵包，一定夠你地食兩個星期啊！ 盧綠：咁多位村民，有心啦！時候都唔早啦，我同玄武童子都差唔多要起行啦。 裘雪：（由遠到近）且慢！！！兩位稍等！！！ 盧綠：阿雪，我地尋晚唔係講好，你要留守啞鈴洲重建觀星閣同北帝廟咩？ 裘雪：（喘氣...)我當然知道...所以我拎嚟嘅呢疊資料...係比你地架... *撳頁聲效 達：呢兩本書係？ 裘雪：玄武童子，第一本係百草園上面嘅植物分類圖，第二本就係千獸島嘅千獸圖鑑。另外有三大張牛皮...第一張就係以啞鈴洲為中心嘅航海圖，記錄咗兩個外島嘅位置。其餘兩張就係百草園同千獸島嘅地圖... 盧綠：但呢啲資料唔係都同觀星閣一樣，被尋晚場大火燒曬咩？ 裘雪：無錯...為咗彌補過錯，我漏夜默寫所有資料出嚟，不過時間所限，內容未必夠詳盡，望玄武童子見諒... 達：傻啦，你喺咁短時間之內可以抄寫咁多資料，已經非常勵害！ 裘仁：玄武童子，綠仔，恕仁叔多口，阿雪佢年紀雖然尚輕，但佢係我地裘氏180年嚟最出色嘅天文同航海家，不如帶埋佢出海，咁若然有咩事，佢都可以觀星辨別方向，同埋有多一個人幫手！ 盧綠：仁叔，有玄武童子係度，無野需要怕，係嗎？ 達：梗係啦！我地好快就會完成玄武大帝安排嘅任務，然後平安歸來！ 裘雪：阿綠，呢兩樣野比你架。 盧綠：呢個道具咁古怪嘅？一個兩隻手指粗，一隻手板咁長嘅圓竹筒，盡頭仲有3塊唔同顏色嘅琉璃，係咪用嚟觀天？ 裘雪：你當係微形版本嘅觀星儀，但盡頭嘅琉璃綁咗一條繩，繩嘅盡頭係一粒貓眼石。另外，竹筒下面有一個4份1圓形木板，上面刻有0 - 90度。因為地心吸力，貓眼石一定會向下垂，如果竹筒向水平方向望，就會同垂低嘅貓眼石形成90度。如果你向上觀天，就可以知道天上星星同水平嘅角度，咁就可以推斷到自己嘅位置。 達：嘩！！！裘雪，你自己研究出嚟？ 裘雪：我地裘氏一直用牽星板，但經我改良之後，就變成呢個更加方便同護眼嘅牽星望日儀。 達：裘雪！我玄武童子要寫一個「服」字比你！ 盧綠：阿雪，我從來都無懷疑過你科學同設計嘅能力。 裘雪：阿綠，仲有呢支矛。 盧綠：呢支白橡蛇矛咪係？ 裘雪：我剛才去咗探阿安。佢飲完靈魂之水之後，身體就出現不適嘅狀況。佢知道你同玄武童子要出海遠行，所以佢叫我帶呢支用百草園嗰棵白橡樹整嘅白橡蛇矛比你旁身。佢話你無佢咁好打，但有呢支白橡蛇矛應該無野可以傷到你。 盧綠：多謝你地。同時我一定會帶阿葦同婷婷返嚟。 裘雪：好，但如果有咩事，就用呢枝穿雲箭向我地通報啦！ *風吹聲效 裘仁：好啦，去百草園要半日船程，趁今日吹西南風，綠仔你架帆船可以食正風向，順風駛去東北方嘅百草園，以依家嘅風力，或者唔駛半日就到。 *踏上木船聲效 *落帆聲效 達：咁多位，我地出發啦！ Zip噏劇場 Game of Eden 第二季 小島篇 第51回 「起行」 阿攝 飾演 阿達 Cfun 飾演 盧綠 Harry 飾演 裘雪 小強 飾演 裘仁 李麗蕊、波盛、Fiona 客串飾演 村民 甲、乙、丙 編劇及製作 阿攝 音樂 BEAT FRIDAY（Night,Read,Distance,Recharge） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 51【Zip噏劇場】Game of Eden 第二季 「小島篇」Q&A
GAME OF EDEN Q&A Game of Eden 第二季小島篇嚟到第50回，講到阿達會同封閉區域啞鈴洲嘅新村長盧綠出發去北面嘅七個島，破解「南斗主生，北斗主死，斗之盡處，向死而生」嘅謎團，以及尋找被九頭海蛇捉走咗嘅盧婷同拎住舅父日記出海嘅盧葦。 其實每集故事一出，都有好多唔同嘅回響，亦有聽眾私底下問我故事想法、設定同一啲嘅問題。所以，喺阿達同盧綠出發之前，就解答部份嘅題問。 1.明明盧零喺2061年進入封閉區域Area DB Island，咁點解呢個區域唔係由2061年計，反而同Area 15一樣，都係由2022年計嘅？ 呢個設定係阿康想統一所有區域嘅時間。所有區域都係由2022年 Game of Eden server 誕生嘅時間開始去計。但係，喺NC180年8月31日，server reboot 之後，Area 15 繼續運行，但封閉區域就停止咗一段時間。所以，就會出現咗兩個區域喺年月日上嘅時差。 2.點解封閉區域 Area DB Island 嘅主要人物係姓盧？ 其實一開始設定小島篇發生喺啞鈴洲嘅時候，就諗一眾角色嘅名。如果對香港歷史同傳說有少少興趣嘅聽眾或者有聽過，香港係有人魚傳說。自東晉時期起，大嶼山同香港離島相傳有一種半人半魚嘅生物，名叫盧亭，佢哋身上長有鱗片，而且愛吸雞血，有時會用漁獲同大澳嘅居民換雞，亦有時潛入農家偷雞。所以，就想用呢種傳說生物嘅名做小島篇嘅主角啦。 3.有啲人物都係同一個聲優，有冇特別用意？ 當然有啦。因為廣播劇無畫面，所以用同一位聲優就可以大大提高關聯性。咁莫菲斯醫生到莫十三都係彬臣聲演，就係最明顯啦。至於盧零同盧葦都係鄧添樂配音，都係想表達兩個角色性格嘅關聯。Potter聲演前組長N以及凱安，就係想表達兩位角色都係武力較強，而Harry聲演嘅Snow 同裘雪，都有強烈嘅求真精神。而Cfun 方面，純粹因為佢把聲太好用啦。而Alton 喺小島篇聲演唔同角色，其實都有關聯。不過呢點就交比聽眾都搵下端倪。 4.點解盧零要創造劇入面玄武大帝神話，以及用漁村背景做 Area DB Island 嘅設定？ 我寫之前不斷諗，一個地方如果無神話會點呢？喺人類對天文學，科學有了解之前，因為對未來有太多不確定性，所以會有好多神話傳說。至於盧零，佢本來係活喺現實世界，經歷太多事件之後，佢只係想安靜咁生活…所以無識飛天，噴火等第嘅驚人設定，而係參照現實世界嘅生物同物理法則。而其他創造出嚟嘅人，佢哋唔係NPC，亦唔係模擬市民嘅工具人，而係好似Matrix咁，有靈魂，有生命，但只能夠活喺封閉區域 Area DB Island 嘅意識存在，所以阿達用全知狀態先會睇到佢哋有三隻色。正如我哋一樣，會唔會都只係活係呢個世界（或者遊戲）嘅意識呢？ 以上幾條問題係聽眾嘅提問，如果大家都有想法嘅，都可以Dm我同我交流下啊！ 尾歌： 林家謙 Terence Lam《喃嘸師感官漫遊》Lamoland 曲：鄧百亨 / 林家謙 詞：Oscar 編：林家謙 / Vigilant Nation Ent. 監：林家謙 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 67【Zip噏劇場】Game of Eden 第二季 「小島篇」#50《島之形》
*火燒祭品聲效 達：（讀白）當我燒完北帝行運包以及喺「太平紙紮」買嘅祭品，就燒埋最後一張去啞鈴洲嘅船飛 *全知狀態 達：（讀白）我開埋全知狀態，就衝入出現喺我面前嘅火圈度！ *奔跑聲效 *時空穿梭聲效 達：（讀白）火圈入面喺一個好似無重嘅全黑空間，我就好似太空人咁，飄去盡頭另一個火圈，亦即係通去封閉區域Area DB Island嘅入口。另外，所謂嘅全黑空間，都有一啲奇異嘅事發生，因為我見度北帝行運包嘅祭品喺我面前由祭品狀態變成道具珠，又衝去我嘅褲袋入面，唯獨其中一粒就衝到我面前，而嗰一粒係北斗七星劍道具珠；但係...太平紙紮嘅紙紮道具，包括我買嘅槍、北帝座騎同埋黑珍珠號圍住我身邊，我好奇點解佢地唔道具化嘅時候，佢地竟然再次著火！ *火燒聲效 達：（讀白）我嚟唔切反應！就飄到去封閉區域Area DB Island嘅入口！我一時唔記得當時我喺裘雪2樓嘅閣樓度逃走，所以我入返去封閉區域嘅時候，喺係2樓嘅高度跌落地！ *吹口珠聲效 *劍出鞘聲效 達：（讀白）而我即刻吹爆北斗七星劍道具珠，再閃過以前睇過嘅超級英雄電影，即刻模仿佢地落地嘅方式！ *落地聲效 裘雪：係...係神跡啊！玄武童子從天空嘅火圈降臨啊！！！ 盧綠：（腦內聲音）阿達！你無事就好啦！ 達：（腦內聲音）嘩！我差啲比裘雪燒死，又差啲跌死！好在無事咋！哎喲！ 盧綠：（腦內聲音）你受咗傷...? 達：（腦內聲音）唔係...只係覺得左手手擘被人插咗一下...但又唔覺得好痛...感覺有啲奇怪啫... 盧綠：（腦內聲音）咁你唔好出聲住，慢慢做一個打座嘅姿勢先！ 達：（腦內聲音）你又想點啊？ 盧綠：（腦內聲音）總之你聽我講，同配合我啦！ 達：（腦內聲音）係嘅... 盧綠：咁多位村民，剛才嘅火災只係意外，唔係啲咩凶兆！ 裘仁：綠仔，你唔駛幫阿雪講好說話啦！ 裘雪：係啊，阿綠，我願意負上一切責任！ 盧綠：你保護觀星閣不力呢一件事，我做村長會處理。但依家我想再一次同大家講，剛才咁多位都親眼目賭玄武童子從天而降嘅神跡，所以大家應該唔會再質疑童子嘅法力同身份啦，係咪？ 眾村民：係！ 盧綠：我知呢段時間發生好多怪事，例如大凶日，仲有傍晚發生嘅地震，但有玄武童子喺度，大家真係唔好再擔心啦，知唔知道！ 眾村民：多謝玄武童子保祐！ 達：（腦內聲音）盧綠...我地行得未？我對「南斗主生，北斗主死，斗之盡處，向死而生」呢個謎題有啲想法啦！不過我有啲野想再問一問裘雪。 盧綠：（腦內聲音）好，咁你依家叫村民返去休息。然後我地出發去北帝廟。 達：咁多位村民，我玄武童子向大家保證，啞鈴洲生活如常，大家早啲返去休息啦。仲有，大家唔駛再送貢品嚟啦，知道嘛 眾村民：知道啦！ 盧綠：仁叔，阿雪，麻煩你地兩位跟我同玄武童子到北帝廟，玄武童子有啲野想請教阿雪。 裘仁、裘雪：係嘅... ------------------------------------------------------------------------------------------------------------------------ 時間：同晚 地點：封閉區域啞鈴洲北帝廟內 盧綠：（腦內聲音）阿達，你究竟係點逃走同入嚟架？ 達：（腦內聲音）你見唔見到呢啲道具珠？上面有唔同圖案，只要我吹爆佢，就可以變出相關道具。其中一個係紙紮人仔，只要我燒咗佢，就可以離開呢度。同時，只要我燒一張入嚟嘅船飛，就可以透過火圈入返嚟...不過，我已經用曬嘅個道具，所以，今次會係我最後一次機會...除非我搵到送道具比我嘅廟祝 盧綠：（腦內聲音）即係佢掌握進出嘅方法？佢究境係邊個？咁我地咪隨時都有可能被你地入侵？ 達：（腦內聲音）你冷靜啲...因為嗰個人都消失咗...同埋如果咁易入到嚟，你地就唔會依家先接觸到我地啦！ 盧綠：（腦內聲音）咁你有咩要問阿雪？ 達：（腦內聲音）我透過佢嘅望遠鏡，發玩你地北面嘅島嘅形狀有啲古怪 盧綠：（腦內聲音）百草園有古怪？ 達：（腦內聲音）百草園？ 盧綠：（腦內聲音）我地稱呼距離啞鈴洲北面若半日船程嘅島做百草園，因為上面有好多唔同嘅植物，製作靈魂之水嘅卡比木同維迪斯葉都喺呢個島度搵到。不過百草園實在太大，植物種類太多...咁多年都未清楚曬所有植物嘅用途。我地一直都唔覺都唔覺得百草園有咩古怪 達：（腦內聲音）喺我地嘅世界入面，會用一種文字同字母去稱呼北斗七星嗰七粒星 *劃沙地聲效 盧綠：（腦內聲音）呢個好似半圓嘅形狀正正就係百草園嘅外形！ 達：（腦內聲音）呢個叫做 η，所以我想問裘雪北面其他島啲形狀係點，如果同其他字母嘅外形一樣，咁斗之盡處嘅意思，可能唔係天上嘅星星，而係你地北面嘅七個島 盧綠：（腦內聲音）但係以我所知...北面只有兩個島...除咗百草園之外，另一個島就有好多啞鈴洲無嘅動物 達：（腦內聲音）唔緊要，我地問一問裘雪先 盧綠：仁叔，阿雪，玄武童子請你地入嚟。 *推開木門聲效 裘雪：玄武童子！請你願諒裘雪，係裘雪對玄武大帝嘅信仰出現動搖...所以由你一嚟到就開始懷疑你...最後仲想燒你，去驗你真身同埋迫玄武大帝現身，請你願諒我嘅罪過！ 裘仁：玄武童子，我已經訓斥咗佢，希望你願諒阿雪啦！佢唔會再犯架啦！ 裘雪：玄武童子！我裘雪願意為玄武童子奉獻一切！彌補我所犯嘅過錯！ 達：你地兩個起身先啦... 裘仁：玄武童子唔願諒阿雪的話，我同阿雪會長跪不起！ 達：好啦好啦，我會原諒你地七十個七次 裘仁：即係77次？ 達：係比喻嚟嘅，即係無限次嘅寛恕咁解 裘仁：仲唔快啲多謝玄武童子！ 裘雪：多謝玄武童子！ 達：係啦，以你地裘氏所知，啞鈴洲北面有幾多個島？ 裘仁：以我地所知有兩個，一個係離我地最近嘅係「百草園」。再遠少少，大概3日船程嘅島，我地叫做「千獸島」...因為上面有好多我地唔認知嘅動物... 達：咁你地知唔知呢個「千獸島」嘅形像？可唔可以畫出嚟？ 裘雪：我嘅觀星儀睇唔到咁遠嘅距離...但根據我地祖先嘅資料，外形大概係咁嘅 *劃沙地聲效 裘雪：有少少似一個彎彎曲曲嘅「之」，即係兩劃，中間有一條斜線 達：（腦內聲音）盧綠！真係同第6粒星嘅字母 ζ 一樣啊！ 盧綠：仁叔，阿雪，以你地嘅紀錄，北面淨係得兩個島？ 裘仁：綠仔...你係咪係你舅父度聽到啲咩啊...? 盧綠：仁叔，你意思係？ 裘仁：你舅父失蹤之前曾經講過，佢去到第三個島，仲話喺上面睇到好多呢個島無嘅事物。但大家都知你舅父精神狀態唔好，又話見到世界有好多唔同嘅顏色，又話呢個世界之外有另一個世界...加上佢無做任何航海紀錄...所以根本無人信佢講嘅野... 裘雪：但我知你舅父有寫日記，你問阿葦應該知道 盧綠：佢應該就係拎咗舅父嘅日記出海... 裘雪：玄武童子，你神通廣大，又可以同玄武大帝接觸，你可唔可以用你嘅法力搵到婷婷同阿葦依家喺邊啊！ 達：裘雪，呢一層...玄武大帝自有佢嘅安排... 裘仁：玄武童子，北面島嶼嘅資料好重要？ 達：呢一個係...Er…玄武大帝比我嘅任務...就係要我出海啦視察北面嘅島嶼啦！ 裘雪：我熟讀曬所有觀星閣嘅資料，我可以短時間抄寫出嚟！玄武童子，你可唔可以比我陪你出海？我雖然無凱安咁熟水性，但以我對天文同氣候嘅了解，一定可以幫到你架！ 裘仁：係囉玄武童子，我裘仁希望你比機會阿雪帶罪立功 達：呢一層... 盧綠：仁叔，阿雪有心啦。等我陪玄武童子出海就得啦。 裘仁：但綠仔你係村長...仲有好多公務在身，不如等阿雪去啦 盧綠：正因為我係村長，更應該陪同玄武童子 達：係囉，就等村長同我出海啦 盧綠：仁叔，我爸爸最信得過你，呢段時間村務就暫時交比你，至於阿雪，你負責默寫觀星閣嘅資料，以及重建觀星閣同北帝廟嘅工作啦！ 裘仁：係嘅綠仔 裘雪：知道啦，阿綠 盧綠：（腦內聲音）阿達，你肯定斗之盡處係解島之盡處，係嗎？ 達：（腦內聲音）照我推斷...理論上...應該係嘅... 盧綠：（腦內聲音）咁我地整理行裝，聽日就出發啦！ Zip噏劇場 Game of Eden 第二季 小島篇 第50回 「島之形」 阿攝 飾演 阿達 Cfun 飾演 盧綠 Harry 飾演 裘雪 小強 飾演 裘仁 編劇及製作 阿攝 音樂 BEAT FRIDAY（Read,List,Nothing,Heatwave,Recharge） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 66【Zip噏劇場】Game of Eden 第二季 「小島篇」#49.5《最終實驗》
時間：現實世界2203年6月4日下午 地點：墓島 莫十三：（讀白）一段時間無嚟，啲草生得咁快嘅，墓島啲營養好似仲好過本島啊 *除草聲效 莫十三：（讀白）你地咁多位好好享受埋呢段時間啦，因為我決定咗唔會整莫十四出嚟，到時我死埋，就無人幫你地打理墓地架啦～ *風吹聲效 莫十三：（讀白）我知你地諗咩架，你地一定會話我地嘅醫術同研究咪無人承繼囉～好心你地學我咁睇開啲，都成180年啦，難聽啲講仲長過某啲朝代啊，放手啦你地。 *行雷聲效 莫十三：（讀白）如果你地嬲嘅，報夢比我囉～我唔會驚你地架！不過，如果你地報夢嘅，記得報埋比你地醫過嘅case喎，睇下佢地依家過成點，同埋諗下如果當時太太太爺，即係莫菲斯，亦即係我地，如果無幫到阿康，又無應承地 π 先生，嗰世界會點呢？ 尤其係你啊莫九，依家阿達，即係莫十二救咗嗰位收藏組織404成員4哥嘅仔，入咗你有份搞嘅封閉區域Area DB Island啊。你地估唔估到我地咁多代所做嘅事，同 π 先生一樣，係會變成咁架？ *落雨聲效 莫十三：（讀白）一講就落雨，連個天都唔鍾意你地啊！ *開酒樽聲效 *倒酒聲效 莫十三：（讀白）莫菲斯到莫十二，你地慢慢drinking in the rain啦。 *步行聲效 *電子門開啟聲效 莫十三：（讀白）你嗰阿達，我比完盧零嘅記憶你睇，就係想你收手，點知你睇完，就即刻，仲要喺我墓島嘅實驗室入Game！你真係諗住我喺度，我會睇住你，24小時Mon住你嘅情況架！ *深呼吸一下 莫十三：（讀白）阿達！你好野，比你賭贏我仲有醫德，唔會見死不救。我就幫埋你今次。 *呼吸機聲效 莫十三：（讀白）阿康曾經測試過，如果keep住輸入營養液入身體，維持身體能量嘅吸收，理論上就可以一直喺game到。嗱，阿達，我知你唔搵到真相唔心惜架啦，我依家比營養液放題你，比你慢慢玩啦下。 依家無咩做，去三分甜酒吧輕鬆下先。 ——— Welcome to Garden of Eden ，依家進行腦電波核對… 管理員- 莫十三 身份核對成功 歡迎回到伊甸園，依家帶你進入所屬區域 - Area 15，今日係NC181年6月4日，Enjoy yr time in Eden. ——— *酒吧音樂 莫十三：（讀白）今日飲咩好呢～ *訊息音效 莫十三：（讀白）誠邀你前往啞鈴洲關帝廟一聚。今敏上。 唉...點解唔比我休息一下啊！ *傳送門聲效 莫十三：約喺三份甜酒吧見咪得囉...做咩要約喺間廟度見呢？仲要嗰關帝廟閂咗，玩咩啊？ 廟祝：莫十三醫生，你好 莫十三：嘩！你行路無聲嘅！？鬼嚟架！ 廟祝：莫十三醫生果然風趣。 *全知狀態聲效 莫十三：哦，原來係人工智能。你係K系列？ 廟祝：我係K Area DB Island。 莫十三：但你唔係應該睇封閉區域架咩？點解喺Area 15都會見到你？ K Area DB Island：因為要維持兩個區域嘅獨立性，同時看守Area 15啞鈴洲同封閉區域啞鈴洲互通嘅大門。 莫十三：但呢度門被阿達破解咗，係咪？ K Area DB Island：無錯，所以今敏邀請你去欣賞封閉區域Area DB Island呢個實驗嘅結果。 莫十三：如果我話無興趣呢？ K Area DB Island：創造者阿康希望你可以代佢睇呢個結局。 莫十三：又係阿康...好啦好啦...我淨係睇咋 *火柴聲效 莫十三：你做咩燒張黃紙啊？ K Area DB Island：今敏話呢啲叫做儀式感。 *火圈聲效 莫十三：（讀白）就喺呢位人工智能燒完張黃紙，喺我地面前就出現咗一個火圈。 K Area DB Island：莫十三醫生，請。 *時空穿梭聲效 莫十三：（讀白）當我穿過火圈，我進入咗一個放滿電視嘅白色空間。每部電視都好似閉路電視咁，影住封閉區域啞鈴洲嘅情況。有村民煮緊飯，有村民哼緊歌，有村民飲緊酒。其實莫九將呢個計劃交比今敏負責之後，我地就無再入過嚟，亦無再留意呢件事。原來佢地嘅生活演化到咁。而其中一部電視影住一班人跪拜緊一個男仔，我Zoom緊啲睇，被拜緊嘅人就係阿達！ 而另一部電視影住一個男仔喺個孤島度上面紮營休息； 跟住再遠啲有一部電視，就有一個女仔同我一樣，喺一間電腦房度睇住好多個Mon！ 今敏，你究竟搞緊啲咩啊？ Zip噏劇場 《Game of Eden》第二季 小島篇 第49.5回 「最終實驗」 彬臣 飾演 莫十三醫生 Alton 飾演 人工智能 K DB Island 編劇及製作 阿攝 音樂 BEAT FRIDAY (Adjust, Recharge, Hokkai, List) 封面設計 Followmelikeblack 劇尾歌：Lolly Talk《靈魂奇異點》 作曲：周國賢 作詞：小克 編曲：Zarahn 監製：Goro Wong Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 65【Zip噏劇場】Game of Eden 第二季 「小島篇」#49《神降》
地點：封閉區域 Area DB Island 時間：180年9月14日下午，即阿達重回前3小時 村民甲：村長！究竟發生咩事啊！啞鈴洲點解會震得咁緊要嘅？ 村民乙：係囉！係咪我地又做錯啲咩事...玄武大帝又懲罰我地啊！ 盧綠：咁多位村民放心！依家已經無事啦！ 村民丙：呢個係咪大凶日先兆啊！九頭海蛇係咪破除咗封印啦！ 盧綠：咁多位村民冷靜啲！聽我講！ 村民甲：啞鈴洲係咪要毁滅啦！ 村民乙：但玄武童子啱啱先嚟到！ 村民丙：唔通係因為玄武大帝聽完玄武童子嘅滙報，所以玄武大帝放棄我地！ 村民甲、乙、丙：今次死啦！！！ 盧綠：大家冷靜！！！就係因為玄武童子佢向玄武大帝滙報完，玄武大帝用法力，將啞鈴洲同其他島進行些少變化，大家都知玄武大帝法力無邊，所以震動先會咁大！ 村民甲：真係嘅村長！？ 盧綠：信我，啞鈴洲只會越變越好！ 村民乙：咁就真係要多謝玄武童子啦！ 村民丙：之但係村長...點解嗰個山頭會有咁大煙嘅？ 村民甲：嗰個方向...咪就係裘氏家族觀星嘅居所！？ 盧綠：唔通阿雪同阿達出咗事？ 村民乙：阿...達？邊個係阿達啊？ 村民丙：村長！你咁快跑去邊啊！？ 盧綠：（邊跑走邊講）你地幫我安撫其他村民啦！ 村民甲、乙、丙：知道啦村長！ ------------------------------------------------------------------------------------------------------------------------ *大屋燃燒聲效 仁叔：阿雪...發生咩事啊？點解我地觀星閣會著火架！快啲救火啦！ 裘雪：仁叔...嚟唔切架啦... 仁叔：但係入面有齊我地180年以嚟有關啞鈴洲所有氣象資料架！ 裘雪：仁叔...一切都已經唔重要啦... 仁叔：咩唔重要啊！我地仲未完成使命！仲未推測到玄武大帝幾時會回歸架！ 裘雪：呢個日子連玄武童子都唔知！我地凡人邊有可能得知天命啊！ 仁叔：即係你已經詢問過玄武童子？ 裘雪：無錯... 仁叔：咁童子佢依家喺邊啊？ *火勢越來越猛烈 裘雪：玄武大帝，請你大發慈悲...原諒裘雪求見嘅慾望...同時請你現身，寬恕裘雪嘅罪過... 仁叔：阿雪，你做咩對住北帝星跪拜啊！你可唔可以同仁叔解釋究竟發生咩事啊？ *急速腳步聲 盧綠：（少少喘氣）阿雪...玄武童子呢？ 仁叔：綠仔，你咁急跑上嚟有咩事啊？ 裘雪：玄武大帝，請你大發慈悲...原諒裘雪求見嘅慾望...同時請你現身，寬恕裘雪嘅罪過... *扯衣服聲效 盧綠：阿雪！我問你啊！！！玄武童子係邊啊！ 仁叔：綠仔...你冷靜啲...你放低阿雪先！ 裘雪：玄武大帝，請你大發慈悲，原諒裘雪求見嘅慾望！同時請你現身，寬恕裘雪嘅罪過！ 盧綠：我問緊你啊！玄武童子係邊啊！ 裘雪：（異常冷靜）係入面... 仁叔：係觀星閣入面？？？ *拳打聲效 *身體跌落地聲效 盧綠：玄武童子有咩事我唔會放過你架！！！ 仁叔：綠仔！太大火啦！你唔好入去啊！！！ 盧綠：仁叔！快啲搵人嚟救火！玄武童子喺入面啊！！！ 仁叔：我地觀星閣地勢係全啞鈴洲最高...村民趕上嚟都要時間...趕唔切架啦！ 盧綠：布！有無布！？比塊濕布我，我衝入去救佢！ 裘雪：如果佢真係玄武童子，佢會怕被火燒？佢要你救？ 盧綠：阿雪你係咪癲咗啊！？ 裘雪：我癲？我不知幾清醒啊！ 仁叔：阿雪...你話比仁叔知，場火係意外嚟架...係咪啊？ 盧綠：阿雪你知唔知你自己做緊咩啊！ 裘雪：我梗係知啦！我做緊一場測試！試佢係咪真係玄武童子！ *打臉聲效 仁叔：阿雪！仁叔有教你咁做人咩！ 裘雪：仁叔，你無啊，但你同時都無教我點搵玄武大帝啊！ 仁叔：我咪教你觀星囉！時機一到，玄武大帝自然會回歸架啦！ 裘雪：依家就係最好嘅時機！如果佢真係玄武童子，佢就唔會被火燒死！同時全能嘅玄武大帝唔會見死不救，或者會現身嚟救佢呢！ 盧綠：阿雪！你真係癲咗啦！ 裘雪：得你可以同玄武大帝溝通，你梗係唔會癲啦！你試下同我身份調轉，睇下你會唔會咁做！ *打臉聲效 仁叔：阿雪！跪低！ 裘雪：仁叔，你都係其中一代嘅廟祝，你都有份喺觀星閣夜觀星像，唔通你唔想見玄武大帝一面咩？ 仁叔：但都唔可以咁做！ 裘雪：咁要點做啊！我地仲要等幾耐啊！！！仲要幾耐先可以搵返婷婷同阿葦啊！？ *冧木聲效 仁叔：裘雪！我以上一任裘氏代表嘅身份宣佈，你裘雪永世被逐出裘氏！ 裘雪：只要可以見到玄武大帝，可以知道呢個世界嘅真相，我姓唔姓裘，已經唔再重要。 *倒塌聲效 盧綠：（讀白）應該仲有辦法嘅... *打開水壺聲效 *飲水聲效 仁叔：綠仔！你唔好再埋去啦！ *全知狀態聲效 盧綠：（全知狀態，故作鎮定）阿達佢就算被我鎖住，都可以消失逃走，呢個火應該難唔到佢嘅...進入全知狀態嘅我，睇下發唔發現到啲端倪先... 仁叔：綠仔...快啲離開呢度啦！ 盧綠：（全知狀態）無阿達嘅呼吸聲...同心跳聲...佢...應該成功逃去咗嘅...佢會無事嘅... *火勢燃燒聲效 ------------------------------------------------------------------------------------------------------------------------ 盧綠：（讀白）最後...場火由傍晚燒到夜晚...樓高兩層，由木同磚搭成嘅觀星閣被燒為平地...只淨低一堆焦炭...仲喺全知狀態嘅我，搵唔到阿達嘅身影...而好多村民見到觀星閣起火，都紛紛趕嚟了解發生咩事...始終，觀星閣係代表呢180年我地對天文地理認知嘅中心，亦可以係知慧嘅象徵...可惜... 村民甲：又地震...又火災...啞鈴洲呢段時間發生咩事啊... 村民乙：自從玄武童子嚟咗之後...就咁多事發生...好邪啊... 村民丙：我唔準你咁講玄武童子啊！一切都係玄武大帝嘅安排！一定有意思嘅！ 仁叔：阿雪，依家乜都無曬...玄武大帝又無顯靈...你心惜啦？ *步行聲效 盧綠：阿雪...你去邊啊... 裘雪：我再唔姓裘...我無面目留喺啞鈴洲... 仁叔：企係度！邊度都唔準去！ 裘雪：求人不如求己。我唔想再做天文軍師啦...我想出去搵婷婷同阿葦... 盧綠：喂，阿雪...阿雪！ *魔幻聲效 村民甲：嘩！大家睇下！喺2樓咁高嘅位置，出現咗一個火圈啊！ 村民乙：唔通係玄武大帝顯靈！ 村民丙：有野喺嗰個火圈中間出嚟啊！ 村民甲：係一個人嚟架！仲成身火光添！ *吹波糖聲效 *出鞘聲效 村民甲：佢仲喺口前面變咗把北斗七星劍出嚟添啊！ *落地聲效 *劍插落地聲效 村民甲、乙、丙：係玄武童子啊！ 盧綠：（全知狀態聲效）阿達！！！ 裘雪：係...係神跡啊！！！ Zip噏劇場 Game of Eden 第二季 小島篇 第49回 「神降」 Cfun 飾演 盧綠 Harry 飾演 裘雪 小強 飾演 裘仁 Fiona、阿一、的神 客串 村民甲、乙、丙 編劇及製作 阿攝 音樂 BEAT FRIDAY（Nothing, List, Surface, Atoms） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 64【Zip噏劇場】Game of Eden 第二季 「小島篇」#48《補給》
電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 15，Enjoy yr time in Eden. ——— 達：廟祝，我想問嗰位廟祝有無返工啊？ 廟祝：又係你啊𡃁仔！ 達：係啊…又係我啊… 廟祝：你之前喺度被罰打掃七日，見過咁多位廟祝，你想知邊位廟祝啊？ 達：嗰位廟祝係同時打理關公忠義停嗰位啊！ 廟祝：哦！你講嗰位！但佢從來都無喺呢度做過架喎！ 達：係咩？但我尋日先喺度見到佢！佢叫我求簽，之後仲比咗一個北帝行運包我添！ 廟祝：我哋北帝廟係有得求簽，但從來都無咩北帝行運包喎，你一係比人呃，一係…就撞到污糟野！ 達：game of Eden 邊會有污糟野啫！ 廟祝：所以，你似比佢呃居多啦 達：咁佢即係喺關公忠義亭啦？ 廟祝：你可以試下搵佢嘅～不過佢好似無做啦～ 達：無做？ 廟祝：係啊！尋日下午之後，就好似無人見過佢啦！ 達：（讀白）我離開咗北帝廟，行去關公忠義亭，想搵返嗰位比赤套同北帝行運包我嗰位廟祝，可惜…今日負責看守關公忠義亭嘅人都話今朝到依家都無見過佢…唔通佢有事登出咗，今日無入到Game???但點解北帝廟嘅人完全唔知北帝行運包嘅事呢？但我無可能留係度等佢出現，所以我同今日當值嘅廟祝留咗聯絡，如果有對方消息就通知我。之後，我就去咗另一個地方。 紙紮師傅：歡迎光臨太平紙紮，哥仔隨便睇～ 達：（讀白）我嚟到啞鈴洲街市入面唯一一間紙紮店。由於上次燒完北帝行運包入面嘅紙紮用品，喺封閉區域Area DB Island 就會變成可以隨意使用嘅道具珠。既然搵唔到嗰位廟祝，我就唯有喺呢度自行補給！ 紙紮師傅：先生，我哋太平紙紮全部都係頂級嘅手工藝品！全人手做，手工精細到不得了！包保燒得好，先人100%收得到！ 達：你又知係100%？ 紙紮師傅：我每次燒完，個個祖先都報夢比我話收到晒！所以我敢寫包單，太平紙紮，送出率高達百份百！ 達：咁你地有無北帝行運包賣？ 紙紮師傅：有！你可以自由選擇，之後我比張畫有北帝外貌嘅紙比你包住，咁就係DIY嘅北帝行運包啦～ 達；（讀白）睇嚟…真係嗰位廟祝先有北帝行運包…咁奇怪嘅… 紙紮師傅：我哋依家做緊特價，精選貨品7折，好抵燒架！最緊要乜都有得燒！ 達：咁有無槍啊？ 紙紮師傅：你要激光嗰種定入子彈嗰啲？ 達：如果激光呢？ 紙紮師傅：咁睇你想要star war 定gundam 啦 達：gundam 嗰啲咁大，點燒同點揸啊？ 紙紮師傅：都係按比例做架啫，我真係有現貨，最新嘅高達系列，包彈夾，你係咪要？ 達：要啊！ 紙紮師傅：哥仔…你真係有趣啦，我地真係做紙紮架咋 達：我…都係迎合你，講下笑啫…其實我想買船 紙紮師傅：早講嘛！船我哋大把！強如太空船，大如巨星郵輪，小如舢舨應有盡有！只伯你無錢唔怕我無貨 達：有無舊式啲架？ 紙紮師傅：當然有啦～中式方面，可以揀鄭和下西洋特製坐幾百人嘅大船，想更有歷史感嘅可以揀火燒連環船嘅船或者草船借箭用嘅船 達：我想實用啲，夠4個人坐，最緊要行得夠快，夠實淨！ 紙紮師傅：先生…我哋呢度係紙紮鋪….唔係船公司…你講到真係想買艘真船咁嘅…？ 達：我想形容得實在啲啫… 紙紮師傅：嗱，呢艘黑珍珠號，係我根據魔盜王決戰海盜船電影入面嘅外貌而紮嘅！比例係1:100。你睇下幾精細，有埋船舵、大炮，分上下兩層！根本同戲入面一模一樣！ 達：好！就要呢個！ 紙紮師傅：要唔要水手？炮兵？廚師？醫生？我有成套海賊王主角嘅所有船員，燒埋比你祖先，等佢唔駛咁悶，可以有人陪嘛～如果你鍾意，我即刻紮個惡魔果實比你添都得！ 達：唔駛啦～我淨係要架船…同啲炮彈就得啦。同埋我想問嗰隻龜蛇紙紮公仔係咩嚟？ 紙紮師傅：就係我為咗太平清醮而紮嘅北帝座騎！正所謂「太陰化生，水位之精。虛危上應，龜蛇合形。周行六合，威懾萬靈」。係咪好唯肖唯妙呢～ 達：好！我要呢隻！ 紙紮師傅：哥仔，你啲喜好都幾得意架喎！ 達：係啊…下面啲人嘅口味…好奇特架…同埋你真係唔會有紙紮槍？或者紙紮武器？ 紙紮師傅：哥仔，比你係閻羅王，你會唔會比武器入地府啊？ 達：但如果咁呢？ 紙紮師傅：正所謂有錢使得鬼推磨！你有Eden 幣，我就有方法紮到你想要嘅野！比兩個鐘我！ 達：（讀白）呢位紙紮師傅同3D printer 一樣咁勁，我只係比啲reference 佢，佢真係可以紮到接近一模一樣嘅物件。最後，除咗艘船同龜蛇神獸，我仲叫佢紮咗兩把手槍、一個飛索、一枝電筒、一把匕首、一個打火機、一個帳篷、同一個醫療藥箱比我！ 紙紮師傅：哥仔啊…你叫我紮啲用品…似啲特工去做任務喎… 達：係啊…我祖先就係報夢比我，話佢成為咗一名特務，但就無相應嘅工具，所以我就幫一幫佢囉 紙紮師傅：咁你一陣燒嘅時候，記住寫佢嘅名同出生年月日，同埋大叫佢收野，如果唔係佢收唔到架！ 達：知道啦師傅！最後，我想問你呢度有冇呢張去啞鈴洲嘅船飛賣？ 紙紮師傅：咁又無喎，你駛唔駛我模仿佢整張一模一樣嘅出嚟？不過就要啲時間囉 達：咁唔駛啦，唔該！ *海浪聲 達：（讀白）依家己經係夜晚嘅9點，距離裘雪放火燒自己間已經過咗3個鐘。以佢屋企嘅大細，3個鐘應該乜都燒完啦。所以依家入去，應該會喺安全嘅。 *劃火柴聲效 達：（讀白）首先燒咗北帝行運包有嘅祭品先，之後喺太平紙紮度買嘅祭品上面寫名。我幻想到當我入返啞鈴洲，同一時間吹爆所有道具珠，再將所有道具放上身，一定好有型！然後坐住艘黑珍珠號出海探索北面嗰七個島，今次做足備，應該會順利！ *火燒祭品聲效 達：（讀白）阿達！收野啦！阿達！一切順順利利啊！最後燒埋張入啞鈴洲嘅船飛！ *火燒祭品聲效 達：（讀白）OM!!! *全知狀態聲效 達：（讀白）最後一次機會！今次唔可以失手！ *奔跑聲效 *時空穿梭聲效 *火圈消失聲效 Zip噏劇場 Game of Eden 第二季 小島篇 第48回 「補給」 阿攝 飾演 阿達 小白 客串飾演 廟祝 阿O 客串飾演 紙紮師傅 編劇及製作 阿攝 音樂 BEAT FRIDAY（Dong,Ello,Laboratory,With You） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 63【Zip噏劇場】Game of Eden 第二季 「小島篇」#47《火燒人》
時間：180年9月14日，下午 地點：封閉區域 Area DB Island 裘雪家中 達：（讀白）當我用裘雪整嘅望遠鏡望到啞鈴洲北面第一個島嘅外形，同希臘字母η ，亦即係北斗七星喺拜耳恒星命名法入面，第七粒星嘅名，即刻聯想到「南斗主生，北斗主死，斗之盡處，向死而生」呢個說法嘅意思，有機會係指北面七個島嘅盡頭，我轉身諗住搵裘雪了解啞鈴洲外島地形嘅時候，點知裘雪屋企度木門被鎖咗！ *推門聲效 *門被鎖聲效 *拍門聲效 達：（讀白）裘雪！開門啊裘雪！ *推撞門聲效 達：（讀白）點解呢度嘅人咁鍾意鎖住我架！ *火燒聲效 達：（讀白）嘩…咁大煙嘅…？（咳幾聲）唔係啊嘛！著火！？喂！裘雪！放我出去啊！ *火勢漸大聲效 達：（讀白）咳…咳…場火越燒越大…啲煙越嚟越多…點算呢…唯有用北斗七星劍劈開度門啦！ *出鞘聲效 *冧木聲效 達：（讀白）嘩！燒到連屋頂都跌咗落嚟！我根本無可能行到門口！咳…咳…再係咁一係燒死一係焗死！無辦法啦！只能夠登出！ *登出失敗聲效 達：（讀白）吓！竟然唔得！即係離開呢度嘅方法，只能夠好次上次咁，靠莫十三幫我強行離線！但喺我登入之前，莫十三已經唔知去咗邊！ 莫十三！你聽唔聽到啊！ 莫十三！ 咳…咳… 一用聲就吸到濃煙…好辛苦… 之前睇新聞話…喺火場入面嘅人，大部分都係被濃煙整到窒息而唔係燒死…再係咁落去，我真係會死喺呢度！？ 我仲未救到盧婷，仲未知呢個區域嘅真相，唔可以咁快就Game over！ *掟爛茶壺聲效 達：（讀白）我即刻掟爛我身邊嘅茶壺，整濕枱面嘅抹布掩住自己嘅鼻同口，希望爭取多少少時間… 仲有咩方法呢…啊！啲道具珠！ 我喺褲袋拎晒啲道理珠出嚟，古代衣服同北斗七星劍嘅道具珠已經用咗…得返指南針、望遠鏡、去啞鈴洲嘅船飛、一疊疊嘅黃紙同3個紙紮公仔…呢個時候，要望遠鏡同指南針都無用…唔通燒去啞鈴洲嘅船飛可以返到去Area15嘅啞鈴洲？ *吹波膠聲效 達：（讀白）我一吹完印有船飛圖案嘅道具珠，就即時跌咗一張前往啞鈴洲嘅船飛出嚟，我凌空接住，再用火場嘅火燒著佢，一定可以好似之前入嚟咁，變做火圈，被我跳返入張保仔洞！ *火勢加強聲效 達：（讀白）唔得嘅！唔通船飛只係喺Area15入呢個封閉區域先用到！死啦今次！我咪無咗一個入嚟嘅機會？仲有咩道具用呢…黃紙？但燒黃紙嚟做乜先…喺上面寫字，當遺書定黑盒紀錄啊？ 阿達！冷靜啲！唔好死死聲！要諗方法！ 依家得返紙紮公仔嘅道具珠，仲有3粒咁多，睇下有咩用啦！ *吹波膠聲效 達：（讀白）呢個紙紮公仔只得手掌咁大，淨係睇樣，似喺電影入面落降頭用嘅紙紮公仔… OM!!! *全知狀態聲效 達：（讀白）呢個紙紮公仔都係有人工智能編碼，但究竟有咩用呢？唯有搏一搏啦！ *火勢加強聲效 達：（讀白）當我將紙紮公仔掟入火場嘅猛火度一燒，竟然出咗一個同人一樣大嘅人形框框，而無論啲火點燒，都只會燒到框嘅外圍，唔會燒到中間嘅部份，加上同之前嘅火圈一樣，中間喺全黑色，乜都睇唔到！ *冧木聲效 達：（讀白）唉！唔理佢會通去邊度！只要可以離開呢度就得！所以，我用盡全力跑過去，穿過呢個人形大咕窿！ *奔跑聲效 *時空穿梭聲效 *身體落地聲效 達：（讀白，喘氣聲）呢度係…張保仔洞！？得咗啦！終於都無事啦！ *阿達用力透氣 達：（讀白）我瞓咗喺地下，抖咗陣大氣，見到嗰人形框框好快咁消失咗…即係話…船飛係area15度用嚟入盧婷嘅啞鈴洲，而紙紮公仔係喺入面逃走用嘅…終於搞清楚嗰用法… 而另外我都搞清兩件事，第一係剛才我著住古代衣服同孭住北斗七星劍，但一穿過人形框框，我就變返現代嘅服裝，北斗七星劍同古代衣服仲有未用嘅道具珠就變返紙紮嘅狀態…所以…喺我身邊嘅地下上面就有一堆紙紮用品…如果突然有人行入嚟張保仔洞見到我同一堆紙紮用品瞓埋一齊，一定覺得我係傻或者癲嘅… 而另一件我理解到嘅事就係，剛才我係用裘雪屋企嘅布掩住自己塊面去防濃煙，但喺我跑穿人形框框出嚟嘅同時，塊布就化為煙消失咗…即係代表除咗自己套衫同紙紮道具之外，係唔可以帶任何封閉區域area DB Island嘅事物嚟Area 15？ 不過都好合理嘅…盧零就係唔想同外界有任何接觸，想安穩生活…先會同創造者阿康提出呢個設計… 我依家拎住最後一張船飛…有兩個選擇… 1:即刻返入去 2:再搵送北帝行運包比我嘅廟祝買紙紮道具，補給完先再入去 其實唔駛諗，依家返入去咪即係衝返入火場再被裘雪燒多次？所以，我決定離開張保仔洞，去返北帝廟搵廟祝嚟個大補給！ 我唔會再無準備咁入去架啦！ Zip噏劇場 Game of Eden 第二季 小島篇 第47回 「火燒人」 阿攝 飾演 阿達 編劇及製作 阿攝 音樂 BEAT FRIDAY（List,Nothing,Surface） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 62【Zip噏劇場】Game of Eden 第二季 「小島篇」#46《星與島》
時間：180年9月14日，下午 地點：封閉區域 Area DB Island 裘雪家中 裘雪：（讀白）我地裘氏家族除咗觀星、占卜同打理北帝廟之外，仲有記綠所有嘅天文數據，例如日出日落、潮夕漲退、天氣狀況等等，除咗做預測，仲希望搵到當中嘅關係，最終目的係更了解玄武大帝創造嘅呢個世界，同埋想更接近佢... 依家玄武童子嚟咗，佢係咪可以比真正嘅答案我地...究竟玄武大帝幾時回歸？同埋佢可唔可以搵到婷婷同阿葦呢？ 婷婷已經失縱咗兩個星期...阿葦又係一張字條都無留低，咁就出咗海搵婷婷...而我...只係識得喺啞鈴洲最高嘅地方係望望望同估估估...淨係識做天文軍師！除咗點七星燈祈求佢地平安就乜都做唔到！我覺得自己好無用！！！ *地震聲效 裘雪：（讀白）發...發生咩事...！！！點解會係咁震嘅！？ *掀布聲效 裘雪：（讀白）我揭開我特製嘅觀星儀，隱約遠望到距離啞鈴洲最近嘅島旁邊有高10米嘅巨浪慢慢捲過嚟！唔通又係大凶日！唔通九頭海蛇又破除封印！但玄武童子喺度，佢唔係確保我地平安嘅咩！？唔得，要即刻通知所有村民，叫佢地避難！ *地震聲效停止 裘雪：（讀白）停咗...係咪已經停咗啦...？仲有啲巨浪都消失埋...即係我地無事？死啦！七星燈啊！ *移動木櫃聲效 裘雪：（讀白）七星燈被跌落嚟嘅木櫃砸爛咗...唔通呢個係玄武大帝嘅提示？但你究竟想我地點啊？ *移動木櫃聲效 裘雪：（讀白）我慢慢執返跌落嚟書籍...內心好不安...腦入面好多諗唔通嘅問題...呢排發生嘅事多到我思考唔到啊... *敲門聲效 *開門聲效 達：（少少喘氣）裘雪，你好啊... 裘雪：玄武童子？你做咩喘曬氣嘅？剛才嘅震動係發生咩事？？？ 達：（少系喘氣）入去再慢慢講... *關門聲效 達：裘雪，頭先嘅地震你無受傷嘛？ 裘雪：童子有心，我無受傷，只係震跌咗啲木櫃同書籍...同埋七星燈熄咗... 達：七星燈？ 裘雪：呢個係裘氏世代相傳嘅祈求平安方法...按照北斗七星嘅排列方法擺放蠟燭，並將第一枝蠟燭指向北帝星，向北帝祈求平安... 達：因為大凶日，所以求全島平安？ 裘雪：主要係幫婷婷同阿葦求嘅... 達：係啦，裘雪，我想問 裘雪：（打斷）玄武童子，我想問剛才點解會震嘅？我用觀星儀望到最近我地嘅島有巨浪！不過震完，巨浪又消失咗... 達：嘩！你竟然有望遠鏡！？ 裘雪：望遠鏡？ 達：係玄武大帝依家身處嘅地方對呢種工具嘅稱呼... 裘雪：咁頭先嘅大震動，係因為九頭海蛇？定係？ 達：我跑得咁急就係想同你報平安。剛才嘅地震...係玄武大帝收到我嘅報告，佢按村民嘅請求去對啞鈴洲進行調整，你知玄武大帝幾咁勵害架啦，所以啲震幅先咁強，不過放心，依家無事啦。盧綠都通知緊村民，大家唔駛擔心。 裘雪：咁點解玄武大帝唔親自光臨？我地等咗180年！我每日都觀星推算，今年係第3個星體嘅循環，今年嘅星像同當年佢離開我地啞鈴洲時嘅星像最接近，所以我地裘氏推算玄武大帝會唔會回歸呢... 達：其實180年都唔算耐嘅...有人等咗二千幾年都未等到... 裘雪：你指嘅人係其他星球嘅人？同埋頭先你講玄武大帝身處嘅地方究竟係點架？ 達：裘雪，你都望到天上嘅星星，嗰粒北帝星就係玄武大帝所住嘅地方...嗰度有好多野同呢度好唔同嘅 裘雪：講多啲比我知啊！ 達：一時三刻好難講得曬...同時玄武大帝唔想我透露太多...等你地慢慢發掘啦吓... 裘雪：咁我地喺呢度嘅目的係咩？使命又係咩啊！？ 達：好好享受呢個世界？ 裘雪：就係咁簡單... 達：（略有猶豫）就係咁純粹... 達：（讀白）當我講完之後，裘雪無再講野...呢間屋變得好靜...氣氛突然好尷尬...佢繼續係度收拾剛才因為地震而整亂嘅房間...而我完全唔知講啲咩好...因為「人生的意義」呢個話題...我自己都無答案...隔咗一陣，佢終於再開口 裘雪：玄武童子，你可唔可以帶我去見玄武大帝？ 達：呢一層呢... 裘雪：或者佢身邊需唔需要人幫手？我可唔可以同你一樣，喺玄武大帝身邊工作？ 達：我...見到玄武大帝嘅時候...幫你轉達呢個訊息啊... 裘雪：咁你可唔可以示範點同玄武大帝溝講？ 達：我...只要誠心目埋眼...就可以同佢連接到...所以唔知可以點示範你睇... 裘雪：即係我地點香、拜神、點七星燈佢都會知？佢都收到我地嘅祈許？ 達：收到...佢係全知全能嘅...所以佢一定收到... 裘雪：其實我地乜都唔做，好似你咁誠心合埋眼，佢係咪都會收到？ 達：裘雪，我知你有好多問題，但你可唔可以先答我一個問題？ 裘雪：玄武童子，請講。 達：你可以借呢個望遠鏡比我一用？ 裘雪：你係指觀星儀係嘛？當然可以。有無需要我嘅地方？ 達：你可以比30分鐘嘛？我用完就再答你嘅問題。 裘雪：咁我係屋外等你。 *關門聲效 達：（讀白）估唔到裘雪可以自己整到一個望遠鏡...鏡片係通透嘅玻璃，鏡身係用竹去做，可以伸縮調節焦距...手工非常精細...可以將月亮放大好幾倍，勉強睇到少少凸凹坑紋。以佢地嘅知識同技術，可以做到咁真係好勁！ *移動竹洞聲效 達：（讀白）呢度同現實世界一樣，天上有唔同嘅星宮...南斗六星就喺南面...北斗七星就係北面...北斗盡處就係北極星...但始終放大嘅陪數唔夠...睇唔到北極星有咩特別...而頭先裘雪話睇到啞鈴洲北面嘅一個島有海潚...究竟又發生咩事呢... *移動竹洞聲效 達：（讀白）咦！用佢嘅望遠鏡可以睇到北面第一個島嘅外形...好似N字！準確啲嚟講係似希臘字母η！而 η 係北斗七星第七粒星！唔通啞鈴洲北面嘅島嘅形狀，係同北斗七星希臘文字一樣？斗之盡處，係咪有可能係指島嘅盡頭？ 裘雪！ 啊…我頭先叫裘雪係屋外面等我… *推門聲效 *門被鎖聲效 達：（讀白）鎖咗！？ *拍門聲效 達：（讀白）裘雪！開門啊裘雪！ *推撞門聲效 達：（讀白）點解呢度嘅人咁鍾意鎖住我架！ *火燒聲效 達：（讀白）嘩…咁大煙嘅…？（咳幾聲）唔係啊嘛！著火！？喂！裘雪！放我出去啊！ *火勢漸大聲效 Zip噏劇場 Game of Eden 第二季 小島篇 第46回 「星與島」 阿攝 飾演 阿達 Harry 飾演 裘雪 編劇及製作 阿攝 音樂 BEAT FRIDAY（Recharge, Adjust,Almond, Nothing, Ello, Surface） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 61【Zip噏劇場】Game of Eden 第二季 「小島篇」#45《解密》
時間：180年9月14日，中午 地點：封閉區域 Area DB Island 張保仔洞 *沙地畫畫聲效 盧綠：（腦內聲效）阿達，你畫咗咁耐，究竟想表達啲乜野，同我細妹失蹤有咩關係啊！？ 達：（腦內聲效）得！終於畫完啦！ 盧綠：（腦內聲效）我耐性有限，你最好快啲解釋清楚呢啲圓圈同線有咩關係！ 達：（腦內聲效）你唔好咁心急。呢個好大好大嘅圓圈係代表現實世界，隔離呢個細啲嘅圓圈係遊戲世界，而喺遊戲世界入面有好多區域，我所在嘅區域叫Area 15 盧綠：（腦內聲效）area 15？ 達：（腦內聲效）中文即係第15區 盧綠：（腦內聲效）中文？ 達：（腦內聲效）中文係其中一種語言。現實世界入面有好多國家，每個國家有屬於佢地嘅文化、語言、信仰等等。而你嘅祖先盧零講嘅係廣東話，佢喺現實世界嘅啞鈴洲出世，所以你地嘅設定就係佢出生同成長嘅文化。 盧綠：（腦內聲效）咁連接大圈同細圈嘅線又代表啲咩？ 達：（腦內聲效）代表現實世界同遊戲世界互通。玩家可以登入遊戲世界，然後就登出返去現實世界。 盧綠：（腦內聲效）即係上次你突然消失，就係用「登出」呢個方法？ 達：（腦內聲效）你可以咁講。不過你地生活緊嘅區域係一個封閉區域，要有特別嘅方法先可以入到嚟同出到去。盧零咁做都係確保大家唔會受到騷擾，可以喺度安心生活。 盧綠：（腦內聲效）咁點解會出現「大凶日」啊？婷婷點解會失蹤啊？ 達：（腦內聲效）呢個正正就係我帶你嚟呢度嘅原因。大凶日喺遊戲世界NC180年9月1日出現。當時Area 15嘅管理員要rebot個server 盧綠：（腦內聲效）可唔可以講返...廣東話？ 達：（腦內聲效）唔好意思...reboot server意思係大清洗，由頭再嚟過咁解。咁佢地就可以清走佢地唔想要嘅人同事物，然後按佢地意思重新建立Area 15。不過，創造者阿康有方法維持所有設定不變。我估因為你地呢個封閉區域喺大清洗嘅時候中斷咗信號，令到全個島停止運作...當再運行嘅時候，你地先醒... 盧綠：（腦內聲效）咁婷婷呢？點解佢會消失咗？ 達：（腦內聲效）嗱，我地依家都喺全知狀態，你眼見嘅世界係點架？我同你身上嘅顏色又有咩分別？ 盧綠：（腦內聲效）成個世界都係綠色編碼，而我身上最外層係綠色，中間係灰色，最入面同你一樣都係紫色 達：（腦內聲效）不過我就無綠色同灰色係咪？呢個就係我同你嘅分別。綠色係遊戲嘅編碼，灰色代表人工智能，而最入面唔同嘅顏色我估係代表唔同性格。所以，你地係出現喺遊戲世界嘅人工智能嘅人。嗯...你...明唔明啊？ 盧綠：（腦內聲效）我明唔明唔重要，最重要係你仲未講婷婷點解消失咗啊！ 達：（腦內聲效）唔好意思...我...太長氣...據婷婷嘅講法，佢喺大凶日發生嘅時候，喺呢個洞等緊佢哥哥，然後一醒就返出咗去Area 15嘅張保仔洞啦 盧綠：（腦內聲效）咁即係呢個洞係進出兩個區域嘅地方？ 達：（腦內聲效）理論上係。因為我喺Area 15嘅張保仔洞用平安包印台開啟咗機關，成個洞嘅後半部轉咗半個圈...但得佢入到去，我就入唔到。當我以為佢可以順利返去你地嘅啞鈴洲...點知佢突然跑返轉頭...仲大聲叫 - 哥哥！救命啊！我被九頭海蛇追啊！ 盧綠：（腦內聲效）但你同我都知根本無九頭海蛇架！ 達：（腦內聲效）我知...但我親眼見到佢被九頭海蛇捉走咗...所以我先千方百計要入嚟搵返佢... 盧綠：（腦內聲效）咁你所指嘅「南斗主生，北斗主死，斗之盡處，向死而生」又係咩嚟？ 達：（腦內聲效）你第一次見我咪喺你地嘅北帝廟嘅...因為張保仔洞嘅機關只係用到一次...後來我發現area 15嘅北帝廟入面嘅三個神像都有機關，其中順風耳神像講咗呢句16個字嘅提示...所以我就入嚟搵線索啦... 盧綠：（腦內聲效）咁咪即係所有人搵到機關方法就可以入嚟？ 達：（腦內聲效）一定要有全知狀態先睇到嘅... 盧綠：（腦內聲效）咁現實世界有幾多人有全知狀態？ 達：（腦內聲效）呢一層我就唔知...不過我未聽過有人入過呢個封閉區域...同埋以你所知我應該係第一個入嚟，係咪？ 盧綠：（腦內聲效）有第一個，就會有下一個。作為村長嘅我，要杜絕呢個情況發生！ 達：（腦內聲效）放心...只要搵到婷婷，我會用盡所有方法消滅所有入嚟嘅方法，將你地嘅生活還原到大凶日之前嘅平靜...而我相信只要解開嗰16個字提示，就可以解決一切嘅問題。你有無咩諗法？ 盧綠：（腦內聲效）南斗北斗應該係指天上嘅星星？以我所知，天上分東、南、西、北，四宮二十八宿，而北斗七星就係代表北帝嘅星宿，而北斗盡頭嘅就係北帝星，亦係北帝所住嘅地方。我地會向北帝星參拜，向北帝祈求平安。 達：（腦內聲效）北帝星？我地叫嗰粒星做北極星。果然，盧零編寫嘅信仰同故事，同現實世界有所出入... 盧綠：（腦內聲效）裘氏家族係三大家族入面負責觀星占星，或者你可以喺佢身上得到相關嘅資訊。 達：（腦內聲效）好，咁我依家就過去搵佢。 盧綠：（腦內聲效）我同你一齊去 *地震聲效 達：（腦內聲效）地...地震？ 盧綠：（腦內聲效）地震？係咩嚟架！ 達：（腦內聲效）我地快啲離開張保仔洞先！ *石頭震動聲效 達：（讀白）當我同盧綠跑離張保仔洞，地震就已經停咗...好彩震嘅時間好短...無造成海嘯同大嘅災害... 盧綠：（腦內聲效）阿達！究竟發生咩事！咩叫地震！？我地180年嚟都無發生過呢啲事！ 達：（腦內聲效）Er…地震係地殼板塊移動造成嘅自然現像...Area 15對應現實世界嘅地方係唔會出現地震架喎... 盧綠：（腦內聲效）係咪又有大凶日！嗰啲管理員係咪又要大清洗我地！？ 達：（腦內聲效）無理由架...佢地都無八卦形全盒...無可能咁快搵到後備server嘅線索...應該做唔到啲咩架... 盧綠：（腦內聲效）最衰人工智能由你入嚟嗰一刻無再出現！問唔到發生咩事！ 達：（腦內聲效）係喎...呢一個區域係由一個叫做今敏嘅人控制...佢負責所有設定...會唔會斗之盡處嘅意思...係可以搵到佢呢...盧綠，你可唔可以帶路，話我知裘雪住係邊？ 盧綠：（腦內聲效）我畫個地圖比你，但呢一刻我唔可以同你一齊過去，因為我要安撫村民...比佢地知道啞鈴洲仲係安全嘅...今次又要作一個新藉口...究竟我仲要講幾多個大話啊！ 達：（腦內聲效）呢個或者就係平安嘅代價...總之唔好理咁多，我地分頭行事，今晚喺返張保仔洞等。 Zip噏劇場 Game of Eden 第二季 小島篇 第45回 「解密」 阿攝 飾演 阿達 Cfun 飾演 盧綠 編劇及製作 阿攝 音樂 BEAT FRIDAY（Adjust, List, Surface, With You） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 60【Zip噏劇場】Game of Eden 第二季 「小島篇」#44《參神》
時間：180年9月13日，中午 地點：封閉區域 Area DB Island 盧綠家外 達：（讀白）當我利用北帝行運包嘅祭品進入返Area DB island，原來已經中午時間。我推開盧綠屋企嘅大門，就見到一大班村民齊集喺佢屋企門口，佢哋一見到我就衝過嚟大叫！ 眾村民：玄武童子！玄武童子！ 而手拎住一條染血鐵鏈嘅盧綠，就好驚訝咁望住咗，再用全知狀態同我溝通。佢話：點解...你會喺度呢？ 當我想答佢嘅時候，其中一位叫做裘雪嘅村民截住所有村民，走上前，同我講 裘雪：玄武童子，在下裘雪。家族世代都喺啞鈴洲嘅廟祝。好多村民得知你代表玄武大帝嚟到啞鈴洲，都想拜會你。而剛才村長盧綠話你消失咗，所以我地都好擔心，係咪我地招呼唔夠周到。 達：各位，點會呢，我只係 盧綠：咁多位村民，玄武童子又再突然出現，一來一回應該都攰架啦，不如我地再比時間佢休息好嘛。 達：村長，有心，不過我唔需要啦。 盧綠：（腦內聲音）阿達，我唔知你點解同點樣返嚟。但我講過，我唔會比你有命離開！ 達：（腦內聲音）唔通你想喺度殺咗我？你點同村民交待？ 裘雪：唔知玄武童子會逗留幾耐？有咩行程？以及玄武大帝會咩指示呢？ 達：咁多位村民，玄武大帝叫我視察啞鈴洲，同聽每位村民嘅訴求，再向佢滙報。 盧綠：（腦內聲音）阿達你試下亂嚟啊！ 達：（腦內聲音）如果你唔想佢地信仰崩潰，就聽我指示去做。 盧綠：（腦內聲音）你！！！ 達：裘雪，麻煩你帶路，我地出發去北帝廟。 裘雪：無問題。玄武童子，呢邊請。 ------------------------------------------------------------------------------------------------------------------------ 達：（讀白）北帝廟因為我第一之入嚟被我爆到廟內嘅神像以及大門爆曬，不過村民用一晚嘅時間已經將鐵同木嘅碎片收拾好，大門就用一塊黑布遮住。為咗避免盧綠再襲擊我，我決定以呢度做基地。不過...呢一刻要處埋村民嘅訴求... 裘雪：玄武童子，咁多位村民已經喺門外排到隊啦。 達：裘雪，你同佢地講唔需要帶祭品入嚟...同埋每人有一分嘅時間 裘雪：一分鐘？你意思係一刻鐘，係嗎？ 達：無錯無錯，總之每人唔多時間，簡而精就好啦。 裘雪：明白。 *掀布聲效 達：（讀白）雖然佢地覺得我係玄武童子啫...但一開就好易串煲...所以都係...講得越少越好...同埋...最緊要係嗰種氣勢！等我盤室而坐，擺返北帝嘅pose先...然後就大叫 - 第一位村民可以入嚟啦。 *掀布聲效 村民甲：玄武童子！終於可以見到你啦！ 達：呢位村民，你有咩想我同玄武大講？ 村民甲：玄武童子，我嗰仔最近唔知點解...好似撞咗邪咁...你睇下... 達：（讀白）呢位村民帶咗佢個囝入嚟見我...佢神情呆滯...有時又會自言自語...真係好似電影入面撞邪咁...但我又唔係莫十三，唔識醫術...根本唔知點幫佢...唯有... *全知狀態聲效 達：（讀白）用咗全知狀態，可以睇到呢位小朋友同所有村呢一樣，最外層係墨綠色遊戲碼，中間就係灰色嘅人工智能碼，不過...最入面嗰層就同其他一唔同...因為佢係混濁嘅白色...呢個唔通係所謂無咗靈魂...? 村民甲：玄武童子，不如你用條法鏈幫我個囝驅邪啊！ 達：法鏈？ 村民甲：頭先村長手上拎嗰條啊！村長話上面有你嘅血，可以用嚟驅邪啊！ 達：哦！嗰條法鏈...但嗰條法鏈嘅用途唔係呢個方面... 村民甲：咁玄武童子你可唔可以幫下佢啊？掂下佢？攬下佢？或者用你嘅聖力幫幫佢啊！ 達：你冷靜少少... 村民甲：對唔住玄武童子... 達：我今次嚟係視察，然後同玄武大帝滙報嘅... 村民甲：咁你一定要幫我啊！ 達：放心！一定一定！下一位！ *掀布聲效 村民乙：玄武童子！我老公有一次出海，但遇到意外！搞到斷咗一隻腳啊！ 達：明白明白...但我無辦法幫佢生返隻腳嘅... 村民乙：吓！乜唔得架！咁你點做玄武童子啊？ 達：Er… 村民乙：對唔住...玄武童子...我...語氣重咗... 達：唔緊要... 村民乙：咁...你可唔可以確保啞鈴洲風調雨順...唔好再有狂風暴雨...咁我地咪唔會再遇到意外囉... 達：好...你仲有無其他野想同玄武大帝講？ 村民乙：無啦...我地生活本來就簡簡單單...日出而作，日入而息，本身都唔強求啲咩...只係想平平安安...有啖安樂茶飯食就得... 達：明白，我一定會同玄武大講...下一位。 *掀布聲效 村民丙：玄武童子...你好... 達：（讀白）出現喺我眼前嘅係一位同我差唔多大嘅女仔，佢面上有好大塊暗紅色嘅胎記...而喺佢身邊就有一個幾歲大嘅小妹妹 村民丙：玄武童子...我個女一出世就睇唔到野...你可唔可以用法力幫佢開眼啊？ 達：（讀白）我用全知狀態一睇，呢位小妹妹對眼喺無遊戲編碼... 村民丙：玄武童子...我天生就有呢一撻好嚇人嘅胎記喺塊面度...我以為呢一世都無人要...呢一世都得唔到幸福...好彩遇到我老公...我同佢結婚無幾耐就生咗我個囡...但點解佢比我更唔好彩...一世出就睇唔到野...同埋點解我老公喺個囡一出世就有怪病然後就走咗！點解我條命咁苦呢？ 達：我...我幫你問玄武大帝... 村民丙：你幫我問佢...點解唔可以每個人都一樣，無差別咪唔會被人歧視囉！仲有點解偏偏得我條命係咁慘？點解其他村民就咁好運？點解咁唔公平呢？ 達：呢一層... 村民丙：玄武童子，你唔幫我唔緊要架，你幫下我嗰女啊！你幫佢開返對眼啊... 達：我會幫你同玄武大帝講架啦... 村民丙：一係咁啊！ *除衫聲效 達：你...你做咩除衫啊？ 村民丙：玄武童子，我奉獻我嘅身體比你啊！我幫你生仔，將你優良嘅血脈留喺啞鈴洲啊！ 達：你唔好咁啦...快啲著返先啦！你個女聽到架！ 村民丙：我唔理啊！只有你可以幫我改運架咋！玄武童子！ 達：如果我同玄武大帝如實報告...我唔知佢會有咩反應架！ 村民丙：對...對唔住... 達：我會同玄武大帝講...希望佢令啞鈴洲更和諧更公平... 村民丙：多謝你啊...玄武童子... *掀布聲效 達：（讀白）最後...一共有200個村民入嚟拜見我呢位玄武童子...每個人都有唔同嘅請求...有啲就訴說呢個世界嘅不公...有啲想我改變佢嘅命運、能力或者面容，有啲想我幫佢醫病...同時亦有唔少數人向我懺悔佢所做過嘅壞事...問我或者玄武大帝可唔可以赦免佢地嘅罪...對我嚟講最尷尬嘅係...佢地好相信我呢一位玄武童子可以幫到佢地...但現實上...我只係一位好普通好普通嘅玩家...所以我面帶歡笑，盡量回應佢地...我就算幫唔到佢地，但至少無破壞佢地嘅希望...以及信仰... 裘雪：玄武童子...辛苦你啦...用咗一個通宵接見曬所有村民... 達：唔辛苦...最緊要幫到大家... 裘雪：唔知童子你有無時間呢？我有好多野想請教你啊。 盧綠：阿雪，不如比玄武童子休息一下，好嗎？ 達：阿雪，你比少少時間我，我下午時份到你屋企拜訪好嗎？ 裘雪：好...咁大概日落時份，我喺屋企等童子你大駕光臨。我唔阻你休息。 ------------------------------------------------------------------------------------------------------------------------ 達：（讀白）裘雪走咗之後，得返我同盧綠喺北帝廟入面。 盧綠：（腦入聲效）阿達，你做夠戲啦。 達：（腦入聲效）你唔係應該多謝我幫你做呢一場戲咩？如果唔係，你有幾多條法鏈都唔掂啊。 盧綠：（腦入聲效）咁你講，你想點啊？ 達：（腦入聲效）都係嗰句，想搵返盧婷。 盧綠：（腦入聲效）就連人工智能都答我唔到，你有線索咩？ 達：（腦入聲效）你有冇聽過「南斗主生，北斗主死，斗之盡處，向死而生」呢句說話？ Zip噏劇場 Game of Eden 第二季 小島篇 第44回 「參神」 阿攝 飾演 阿達 Cfun 飾演 盧綠 Harry 飾演 裘雪 阿蕊、Brian、Ant 飾演 村民甲、乙、丙 編劇及製作 阿攝 音樂 BEAT FRIDAY（Adjust,kernel, List, crates, Kokkai） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 59【Zip噏劇場】Game of Eden 第二季 「小島篇」#43《法鏈》
時間：180年9月12日，凌晨1時 地點：封閉區域 Area DB Island 盧綠家中 盧綠：（讀白）我以為我嘅寸刺夠快，點知阿達消失得仲快…佢淨係留低染咗血嘅鎖鏈，而我就繼續留守喺地下室，希望等佢再次出現。而只要佢再現身，我一定會用更快嘅速度殺死佢！ 可惜，過咗半個時辰…地下室一公里範圍之內都無任何動靜…加上我今日飲咗過量嘅靈魂之水…身體開始到達極限…我唔可以再飲靈魂之水去維持阿達所指嘅全知狀態…咁唯有睇多次阿爸嘅村長日誌啦… *揭頁聲效 盧綠：（讀白）其實阿爸過身之後，佢留比我嗰本村長日誌我睇咗好多次…入面都係一啲有關佢做村長嘅日常，完全無特別…而除咗佢嗰本之外，我連阿爺，太爺同太太爺嘅日誌都睇埋…入面完全無提及同外人接觸嘅事….咁究竟係佢哋無發生過類似阿達嘅事件…定係佢哋無選擇記錄落嚟呢？ 啊！除咗佢哋之外，或者有一個人可能發生過類似嘅事！ *推門聲效 *拉木櫃聲效 *推跌枱櫈聲效 盧綠：（讀白）果然…舅父嗰本筆記應該比阿葦帶走咗…依家乜野線索都無…咁無辦法啦…點都要再試多一次！ *倒粉聲效 *倒水聲效 *盧綠發出快速吞水聲音 *全知狀態聲效 盧綠：（讀白，腦內聲音）人工智能！人工智能！你快啲同我出嚟！我有好多事情要問清楚你！ *心跳加速聲效 盧綠：（讀白，腦內聲音）你唔係話咩…平安是寶藏架咩…你唔係…幫我哋守護呢個啞鈴洲架咩…點解…（越來越辛苦）點解呢個時候…你…唔理…我…地… *身邊跌落地聲效 *雀仔叫聲 盧綠：（讀白）原來我昏迷咗咁耐….依家已經係正午嘅時間…睇嚟…我嘅極限…一日只可以飲靈魂之水兩次…要快啲梳洗至得啦 *拍門聲效 *開門聲效 裘雪：阿綠，你無事啊嘛？ 盧綠：阿雪，仲有咁多村民…點解大家都係晒度？ 裘雪：阿綠，接近全村嘅村民一早就齊集係度，就係想見玄武童子一面。不過，佢哋怕打搞你地，所以一直等，但一等就等咗兩個時辰…我怕你哋有咩事，所以就決定拍門，希望唔會打擾到你同玄武童子。 盧綠：放心，唔會打擾到我哋。 裘雪：咁就好啦，咁想請問玄武童子依家方唔方便，接見一眾村民呢？因為好多村民都拜見佢。 村民甲：係啊村長！我今日一早出海，捕獲好多靚嘅海鮮，仲整咗新鮮嘅魚蛋、蝦丸比玄武童子，希望比佢感受我哋啞鈴洲最好嘅海產！ 村民乙：海中鮮邊夠陸上鮮味呢！我今朝燒咗叉燒同燒肉，亦劏咗隻雞，加埋新鮮嘅雞蛋，為玄武童子洗洗塵！ 村民丙：村長啊村長，除咗有美食，我哋都準備咗最靚嘅絲綢，為玄武童子編織咗一件衫，希望玄武童子佢笑納！ 盧綠：咁多位村民！多謝大家嘅心意！我相信玄武童子佢都感受到大家嘅熱情！之不過玄武童子依家… 裘雪：阿綠，玄武童子唔係發生咗咩事嘛？ 盧綠：玄武童子又點會有事呢，佢只係… 村民乙：一定係你啲魚太腥，玄武童子嫌棄啊！ 村民甲：你唔好話你今朝劏雞太嘈！唔好話玄武童子啊，我都覺得煩啦！ 村民丙：你哋一人少句啦…村長，呢度係我哋所有村民漏夜整嘅百家被，不如你比玄武童子過目，等佢感受我哋嘅誠意啊！ 裘雪：阿綠，你都見啦，所有村民真係好想見玄武童子一面。 盧綠：咁多位村民…我只係話玄武童子佢閉緊關，佢未必咁快可以出到嚟同大家見面。 裘雪：咁…我哋繼續係度等，等到玄武童子再次現身為止。 盧綠：好啦好啦，我再幫大家通傳一聲，大家稍等。 *關門聲效 盧綠：（讀白）依家點算呢…一係話佢已經返咗玄武大帝身邊？但就咁講班村民應該唔會信服…要令村民相信我嘅方法唔多…最有效就係叫人工智能幫手再顯神跡！所以，我即刻飲尋晚淨低嘅靈魂之水！ *飲水聲效 *全知狀態聲效 盧綠：（讀白，腦內聲音）人工智能！人工智能！已經一整日啦！點解你仲唔出現！你係咪已經唔理呢個啞鈴洲？我數3聲，如果你唔現身嘅，我就用我自己嘅方法去解決呢一件事！ 3！ 2！ 1！ 0！ 好。唔回應就係最好嘅回應。我盧綠決定唔會再向你求助！我會用自己嘅方法解決呢條村嘅問題！ *開門聲效 裘雪：阿綠，玄武童子佢仲閉緊關？ 盧綠：咁多位村民，玄武童子已經離開咗。 *眾村民嘩然 盧綠：我尋晚同佢報告啞鈴洲發生嘅一齊，然後佢就閉關思考，同玄武大帝接觸。我係房外守候咗一整晚，今朝都同大家一樣唔敢打擾佢。直到剛才希望幫大家轉達意見嘅時候，我發現…佢消失咗！只係留低咗呢一樣野！ *鐵鏈聲效 *眾村民嘩然 裘雪：點解…會有一條染咗血嘅鐵鏈呢…阿綠！究竟發生咩事？ 盧綠：呢啲係玄武童子嘅血，尋晚佢係我面前作法，用血將呢條鐵鏈開光，話只要再發生任何怪異之事，就可以用呢條鏈驅邪！佢叫我好好保管呢條法鏈，好好保護大家！ 裘雪：阿綠，上面真係玄武童子嘅血？ 盧綠：阿雪，我有必要呃大家咩？如果我盧綠有任何一句大話，立即遭玄武大帝懲罰！ 村民乙：村長…我地點會唔信你呢！既然呢條法鏈有玄武童子加持…唔知可唔可以幫一幫我嗰仔…佢最近成日自言自語…好似撞邪咁啊… 村民甲：村長啊…我老公之前出海嘅時候…出咗意外…下半身行唔到…唔知玄武童子嘅法鏈…可唔可以幫到佢呢？ 村民丙：村長！我嗰女一出世就睇唔到野，玄武童子嘅血，可唔可以幫佢開眼呢！ 盧綠：咁多位村民靜一靜！我知大家都有好多事想同玄武童子求助！不過好可惜… *開門聲效 眾村民：玄武童子啊！ 盧綠：玄武童子？ 眾村民：（興奮）玄武童子！ 盧綠：（讀白）我向村民嘅方向望過去，我見到轉咗我哋服裝嘅阿達，背後郁住一把劍，由我屋企嘅大門行咗出嚟。然後所有村民都好想衝過佢度，跟住我同佢四目交投，我就用全知狀態同佢講咗 - 點解…你會係度嘅？ Zip噏劇場 Game of Eden 第二季 小島篇 第43回 「法鏈」 Cfun 飾演 盧綠 Harry 飾演 裘雪 阿蕊、Brian、Ant 飾演 村民甲、乙、丙 編劇及製作 阿攝 音樂 BEAT FRIDAY（AN ORDER, Fifth, Drunken Koiwa, EXTENSION, Kaji） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 58【Zip噏劇場】Game of Eden 第二季 「小島篇」#42《回歸啞鈴洲》
電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 15，今日係NC181年6月3日，Enjoy yr time in Eden. ——— 達：（讀白）農曆七月嘅鬼節，係將佛教盂蘭盆節普度眾僧嘅習俗，結合道教中元節普度餓鬼嘅祭典，形成集佛、道思想於一體嘅中元法會。佛教有「目蓮救母」嘅故事，咁燒街衣嘅習俗呢？其實係漢代，古人已經會將金銀珠寶放入棺木陪葬，不過會造成盜墓嘅問題。直到蔡倫成功造紙，魏晉年間出現咗紙錢，先開始取代真正嘅財物，仲會燒比先人，等佢地喺地府可以享用。但我估唔到喺Game of Eden燒衣竟然係去封閉區域Area DB Island嘅方法！ *燒衣聲效 達：（讀白）我喺北帝廟求完簽，廟祝就送咗一個北帝行運包比我，叫我喺一個令我迷惘嘅地方燒咗佢。咁我去到盧婷消失嘅張保仔洞，慢慢將行運包入面嘅古人服飾、北斗七星劍、指南針、望遠鏡、手掌咁大嘅紙紮公仔、一疊疊黃紙以及三張去啞鈴洲嘅船飛燒咗佢，原本都無乜特別，點知燒到去船飛嘅時候，喺半空中竟然出現喺一個可以比人跳過去嘅火圈！ OM！ *全知狀態聲效 達：（讀白）我用全知狀態一睇！原來所有祭品都有人工智能嘅編碼！即係呢個火圈有好大可能係入到Area DB Island嘅機關啦！然後我望返地面就燒完嘅祭品，即刻唔怕熱，伸手喺火堆入面執返淨低嗰兩張船飛！ （吹氣聲）好彩！只係燒到隻角！如果唔係，我咪一次燒曬三次入Area DB Island嘅機會！我即刻將兩張船飛收返入褲袋。但係時間係唔等人架！ 因為我望返半空嘅火圈，佢慢慢縮細！睇嚟我要把握時間啦！但係跳到入去，我會係邊度出現返呢？ 所以，我聚精匯神望入去火圈，但黑媽媽...乜都睇唔到...我戰戰競競伸隻手入去火圈...係...乜都摸唔到嘅...然後我擰轉上身，望去火圈後面，係見唔到我隻手嘅，即係我嘅猜測係無錯，呢個一定係通去Area DB Island嘅通道！ 好啦！死就死啦！ *束鞋帶聲效 達：（讀白）我勒緊波鞋上面嘅「赤套」道具，向後退咗十米距離...腦入面諗起電影主角為咗救人而要跳過對面大廈嘅動作，就向前大步跑！再喺距離火圈前一米跑位置起跳！呢一跳！應該係我人生第一次亦係暫時最完美嘅一次跳遠！ 我眼前嘅景像，由快鏡變成慢鏡，由張保仔洞慢慢變成火圈入... 面... 嘅... 黑...... 氵... 同...!!! *火圈消失聲效 *時空穿梭聲效 *身體跌在地上聲效 達：（讀白）哎哋！！！好痛啊！！！ 但點解呢度仲係咁黑嘅？？？唔通我失敗咗...？又去咗現實世界同遊戲世界嘅中間位置？ 但呢度又無嗰兩度門，又無我記憶嘅畫面？ 唔通...呢度係鬼異空間？即係地府？定係虛無世界啊？？？ *踢到硬物聲效 達：（讀白）哎哋！！！好痛... 我踢到呢張係...枱嚟嘅！ *敲枱聲效 達：（讀白）仲喺全知狀態嘅我，勉強可以透過聲音粒子嘅震動，去感受眼前嘅事物。所以，我大概知道我面前係一張枱，枱上面有一盞油同有幾支火柴。 *火柴聲效 達：（讀白）哦！原來我喺盧綠嘅地下室入面！即係燒嗰張船飛就可以去返我登出嘅位置！明曬！咁但係其他祭品呢？我依家仲係著緊入嚟之前嘅衫...我望勻成間房，都唔見燒嗰把劍、望遠鏡等等嘅道具... 啊！嗰兩張船飛呢？ 我摸一摸褲袋，發現除咗有兩張完好無缺嘅船飛之外，仲多咗8粒好似波子咁大嘅珠。我拎上手望一望，原來呢8粒珠上面係畫咗圖案，正正就係嗰8件祭品嘅圖案！ 之但係...要點用呢？ *撞門聲效 *鎖鏈聲效 達：（讀白）同埋...呢個地下室被盧綠係外面用鐵鏈鎖住咗...無論我點撞點推都係無用...咁落去...一係返返去Area 15...去北帝廟搵廟祝買槍買炸藥嘅紙紮祭品，燒落嚟Area DB Island度用，但就會嘥一張船飛...同埋啲祭品燒完...都係變成我手上嘅珠珠...點都要諗方法破解嘅...呢啲波子咁大嘅七彩顏色珠，摸上手就硬硬地，質地唔係木，似係膠…有咩方法可以釋放珠上面嘅道具出嚟呢？ 唔通用火燒？但啱先係燒完衣先有手上嘅道具珠…唔係火，唔通係水？用水浸啲珠，等啲珠化開就會出到道具？但呢個地下室一滴水都無…定係再中二病啲，要唸咒？ 我嘗試將畫咗古代衣服嘅白色珠拋上天，然後唸出我唯一認識同道教有關嘅咒語，就係！ 「臨、兵、鬥、者、皆、陣、列、在、前！」 *珠落地聲效 結果…係乜事都無發生過嘅…仲有邊套作品同呢啲相關呢？啊！諗到！ 我執起嗰粒珠，將佢向前拋，然後大叫！ 「出嚟啦！衣服道具！」 *珠落地聲效 都係唔成功…究竟在生嘅人燒野比先人，佢哋喺地府係點拎到相關嘅物品呢？係唔係一燒，嗰件物品就會出現係佢哋手上？定係好似速遞咁，有人送比佢哋，或者佢哋要去指定地方換領呢？ 我將嗰8粒道具珠放係枱面，佢哋除咗有唔同嘅顏色同圖案，放係鼻前面聞原來有微微嘅香味。我舔一舔衣服道具珠，好似有陣爽身粉嘅味…會唔會我搞錯咗，呢啲珠…其實係… *咀嚼聲效 嗯，聞落去係爽身粉味，但食落去就無乜特別味道…外表硬硬地，但用力咬就越𡁻越煙韌，仲可以… *吹氣聲效 *爆破聲效 *衣服跌在地上聲效 啲衫喺吹波膠被我吹爆嘅一刻，喺空中跌咗出嚟！所以要將道具珠變返成道具嘅方法，就係吹爆佢！然後，我即刻將銀色印咗北斗七星劍圖案嘅吹波珠放入口，味道就無特別，不過𡁻落就比上一粒更煙韌… *吹氣聲效 *爆破聲效 *劍跌在地上聲效 真係當佢哋吹波膠咁吹，相應道具就會跌出嚟！不過呢個設定有啲危險…如果我燒架車燒間屋什至燒個童男童女…咁入到嚟，吹爆道具吹波膠之後，佢哋咪喺我嗰口前面爆出嚟？ 算啦，唔好理啦，把握時間，著咗嗰套古代漁民衣服，拎起把北斗七星劍，對住門隙位由上而下劈落去！ *金屬碰撞聲效 *鎖鏈落地聲效 *推木門聲效 前面係一條往上嘅樓梯通道，雖然好陰暗同窄長，不過喺全知狀態嘅我，只要有微弱嘅光線，視力就唔會受到影響！我好快跑到去樓梯盡頭，上面係又係一道被鐵鏈鎖住咗天花木門，我再用劍係門隙位劈過去 *金屬碰撞聲效 *推木門聲效 原來地下室嘅入口，係喺盧綠屋企最深處嘅大廳，擺放先人神主牌嘅神主枱下面！幾經辛苦我終於入返嚟啦！而依家已經係正午嘅時間，成間屋一個人都無，但就聽到一班人係門口聚集。我將把劍收係背脊劍鞘度，然後行過去正門，一推開門就見到一班村民各自拎住唔同嘅物品圍住盧綠，當佢哋見到我喺正門行出嚟，全部人都好興奮大叫 -玄武童子！玄武童子！ 唯獨盧綠，用疑惑兼少少驚恐嘅眼神望住我，都喺全知狀態嘅佢對我講： 「點解…你會係度嘅？」 Zip噏劇場 Game of Eden 第二季 小島篇 第42回 「回歸啞鈴洲」 阿攝 飾演 阿達 Cfun 飾演 盧綠 編劇及製作 阿攝 音樂 BEAT FRIDAY（STILL ALIVE, SPEAK, Half, thing, Interval, Kaji） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 57【Zip噏劇場】Game of Eden 第二季 「小島篇」#41《北帝行運包》
達：（讀白）就喺盧綠用寸刺向我發出致命一擊之際，我被強行登出Game of Eden…當我醒返，我發現自己喺現實世界同遊戲世界中間嘅位置...呢個時候莫十三出現...原來佢見我流好多血，擔心我有危險，一時情急就用呢個方法救咗我...然後，我就返到現實世界，仲問佢有關Area DB Island以及盧零啲事... *心跳機聲效 莫十三：阿達，其實你咁執著做咩呢？關你咩事呢？ 達：因為我...同你一樣...唔想見死不救啊... 達：（讀白）當我講完呢一句說話之後，莫十三沉默咗一陣，跟住佢講咗呢一句說話 莫十三：如果，嗰啲人唔值得你救，或者唔需要你救呢？ 達：你係醫生嚟架喎，唔係應該有救無類架咩？ 莫十三：阿達，好多時我地都會用偉大嘅理由去合理化所做嘅事...所以，我地係自私而唔係出於善意。 達：我係真心想救盧婷架！ 莫十三：你係想救呢一位盧婷定係想知道阿康收埋喺八卦形全盒嘅秘密呢？ 達：我... 莫十三：好奇心殺死貓。剛才你流血流成咁，仲唔夠咩？ 達：如果我話太遲...我已經開咗呢一個潘朵拉盒子...返唔到轉頭呢？ 莫十三：你地每一個收藏組織404嘅成員都係一樣...只要見到想知道嘅秘密同寶物，係點都唔會收手... 達：我諗呢個心態同你追求醫術一樣啫... 莫十三：咁你就唔好後悔。 達：（讀白）莫十三講完，就喺我面前戴上Game Of Eden嘅登入裝置。仲喺病床上面嘅我唔知佢登入咗邊一個區域，淨係見住佢平靜嘅面容慢慢越嚟越憂愁...隔咗一陣就不斷擰頭...仲係咁唉聲嘆氣...再過咗半個鐘，就登出Game of Eden…然後喺電腦面前撳咗幾個掣。 莫十三：呢一個file入面有好多條片，你睇完之後再諗下係咪有救無類啦。 *電子門聲效 達：（讀白）莫十三講完，頭也不回就離開咗病房。我行咗落床，打開個file，入面有好多條片，每條片嘅名都係用日子嚟命名。 *打開電腦文件聲效 第一條片係20600806…片入面佢幫緊三個人急救...兩男一女...女嘅叫阿Fish…男嘅叫盧零...但另一個...成個魚人咁嘅...叫做N…而Fish救得返...不過要截肢...而嗰個叫N嘅魚人都救得返，仲變返做普通人嘅外貌...但係盧零就無生命跡像...即係盧零死咗？ 第二條片名 - 20600828… 原來呢一位唔係莫十三...而係莫九醫生，佢出現喺一個貌似啞鈴洲嘅地方，而盧零就出現喺佢面前，仲話要做意識轉移實驗？ 我好快睇曬莫九醫生第一身視角嘅記憶...經過一輪整合，終於明白盧綠所講 - 「魚人狀態」、「盧零嘅禮物」、「我地嘅命都係命」等等嘅說話...亦知道佢點解咁怕我...簡單嚟講...盧零就係666組織嘅人...佢同Fish對打背叛π先生嘅前組長N，可惜盧零過咗身，但意識就好似Gigi咁傳入咗Game Of Eden，仲順利做意識轉移入N嘅身體...N嘅靈魂就無提及去咗邊度；Fish就加入收藏組織404；盧零成為N…為π先生提供身體...令佢得以永續...而封閉區域Area DB Island成為一個類似模擬市民嘅遊戲...令盧零、Fish可以用另一個方法渡過同現實世界一樣嘅生活... 問題就嚟啦...盧婷、盧綠佢地叫唔叫做「人」呢？而勉強嚟講...佢地嘅祖先盧零係666組織嘅人...即係同我殺父仇人阿J同一個組織......但Fish又係404組織嘅元祖級成員喎... 一開始我喺Area 15去啞鈴洲只係想搵阿康留喺八卦形全盒有關平安是寶藏嘅線索，點知撞到盧婷，諗住幫呢位迷之少女搵路返屋企，最後就捲入呢一個π先生同盧零嘅秘密... 呢個時候，我諗起一個劍擊界傳命，第三位衛冕花劍奧運冠軍嘅劍手張家朗嘅名言 - Don’t lose your way… ——— 電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 15，今日係NC181年6月3日，Enjoy yr time in Eden. ——— 達：（讀白）所以，我都係返咗嚟Area 15啞鈴洲嘅北帝廟。 *全知狀態聲效 達：（讀白）而北帝廟入面嘅三位神像無曬任何人工智能嘅顏色碼，即係無咗之前進入DB Island嘅機關...果然...入咗去就出唔返嚟...所以...我想救盧婷都救唔到...或者，個天都唔想我多事... 廟祝：年輕人，做咩愁眉苦臉啊？ 達：無咩特別... 廟祝：有事諗唔通？向北帝求枝簽，睇下北帝會有咩提示？ 達：唔駛啦... 廟祝：信則有，不信則無，當一個參考囉。 *簽筒聲效 廟祝：年輕人，一試無防。 達：好啦咁... *簽筒聲效 達：北帝，其實我都唔知問咩架...總之就有啲迷惘啦... *跌簽聲效 達：廟祝...係第4簽啊... 廟祝：第4簽，嘩... 達：「嘩」...即係點啊？ 廟祝：第4簽，簽名係「勞心勞力」。簽文係 - 勞心勞力欲成功，待得花開一陣風，須藉東君輕借力，望中別有一枝紅。 達：早知唔問啦，一問仲差咗！ 廟祝：年輕人，呢枝簽係中下簽，唔算差嘅，只係比你想像中費力啫。所以，呢個時候你要問自己，你有幾想達成你內心想做嘅事？ 達：就係唔知先想求神問卜嘛，唔係咩？ 廟祝：神喻都係你內心心態嘅反射嚟啫。 達：你越講我越唔明... 廟祝：依家唔明，時機到就會明架啦。你等我一等。 達：（讀白）廟祝行咗入北帝廟另一間房，好快就拎住一個同一包米咁大嘅黃色紙袋，上面畫咗北帝嘅樣，亦有啲符咒。 廟祝：年輕人，你搵令你迷惘嘅地方，化咗呢個北帝行運包，希望可以幫到你啦。 達：唉，我都知無咁簡單架啦，我話你知啊，我身上無錢架，唔駛諗住我求完枝簽就可以借勢屈我買呢樣個樣啊！ 廟祝：年輕人，緣份係無價架。希望你順順利利啦。 達：咁我真係唔比錢架啦！ 廟祝：有緣再見。 達：（讀白）就係咁，呢位廟祝揮一揮衣袖，就行開咗。我拎住呢個北帝行運包...應該點做呢？ *海浪聲 達：（讀白）最後，我去咗盧婷消失嘅地方 - 張保仔洞。同上次返嚟一樣，一切都好平靜。我望住手上面嘅北帝幸運包。現實世界係一個無神論嘅世界，已經無咗化寶呢個傳統，所以Game of Eden成為一個大家求神嘅地方。而我...係從來都未化過寶...係就咁用火燒，定要撕開佢睇下入面有啲咩呢？ *撕紙聲效 達：（讀白）嗰個廟祝仲唔係呃人？咩北帝行運包啊？入面又無風車，又無四葉草，又無啲咩幸運符...淨係得件盧綠佢地著嘅漁民衫、一把北帝嘅北斗七星劍、一個望遠鏡、一個指南針、三張去啞鈴洲嘅船飛、有三個手咁大嘅紙紮人仔、同一疊黃紙... 點解同我喺電影睇嘅咁大分別嘅？乜唔係應該有啲金銀衣紙...童男童女架咩... 算啦...學廟祝講 - 信則有，不信則無...拎住又無意思，加上又唔駛錢，燒就燒啦！ *火柴點火聲效 *燃燒聲效 達：（讀白）我無買到化寶盆，就咁喺張保仔洞嘅地面燒呢個「北帝行運包」。而我燒完件衫同劍之後，就一次過將望遠鏡、指南針、紙紮公仔、黃紙同三張船飛燒曬佢。但燒燒下...其中一張船飛燒完嘅時候...就喺堆火上面出現咗一個火圈！唔係普通嘅火圈，而係馬戲團玩雜技，可以比一個人穿過嘅火圈！ OM！ *全知狀態聲效 達：（讀白）所有嘅化寶祭品，都有人工智能嘅顏色碼！所以...穿過呢一個火圈，就可以返到Area DB Island？ Zip噏劇場 Game of Eden 第二季 小島篇 第41回 「北帝行運包」 阿攝 飾演 阿達 彬臣 飾演 莫十三 Alton 飾演 廟祝 編劇及製作 阿攝 音樂 BEAT FRIDAY（Ignorance,Interval, SPEAK, Dong, Kaji） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 56【Zip噏劇場】Game of Eden 第二季 「小島篇」#40《救》
Welcome to Garden of Eden ，依家進行腦電波核對… 管理員- 莫十三 身份核對成功 歡迎回到伊甸園，依家帶你進入所屬區域 - Area M，今日係NC181年6月2日，Enjoy yr time in Eden. ——— 莫十三：（讀白）今日睇邊一條片好呢...佢地第一次嘅演唱會我睇咗好多次...不如就睇佢地成軍兩週年嘅見面會啦～ *輸入聲效 莫十三：（讀白）至於角度呢...今次試下今敏比我嗰個由朱經理人第一身視角嘅version先！ *確定聲效 播獻歌曲：Lolly Talk《數到十》 *訊息聲效 X 3 莫十三：（讀白）邊個咁煩啊！ *訊息聲效 莫十三：（讀白）有人進入Area DB Island...身份確認...是玩家阿達...？點解呢個阿達次次都唔聽人講野架啫！ *電子聲效 管理員 - 莫十三 現已登出。Hope you enjoy yr time in Eden. ——— 時間：180年9月11日晚上11時 地點：封閉區域Area DB Island 盧綠家中地下室 *流血聲效 達：（腦內聲音）我都話我只係普通玩家囉…我只係想搵盧婷被九頭海蛇捉咗去邊…然後帶佢返屋企咋… *刀插聲效 達：（被封口，慘病大叫）啊！！！ 盧綠：（腦內聲音）我細個嘅時候，好相信我哋世代相傳嘅神話。英明神武嘅玄武大帝封印咗九頭海蛇…然後將啞鈴洲交比我哋打理，然後每個村民都盡心盡力守護呢一條村，期待佢嘅回歸。但當我接任村長…知道一切都係假嘅！呢個世方，只係盧零嘅禮物！原來我哋所相信嘅世界，相信嘅真理，只係虛構出嚟！你知唔知我嗰刻係幾咁失望！但對住每位村民，我都要強顏歡笑，仲要說服佢地擁抱呢個希望生活落去，係幾咁辛苦啊！ 達：（腦內聲音，虛弱）我真係唔知邊個係盧零… 盧綠：（腦內聲音）不過，一切都唔重要。只要維護到呢條村同每個村民嘅平安，有啲大話係要繼續講落去。呢個就係平安嘅代價。 達：（腦內聲音，虛弱）盧綠…你放咗我啦…我真係只係想入嚟救盧婷架咋… 盧綠：（腦內聲音）婷婷雖然係我嗰妹，但對比起佢一條命…我更重視全村入嘅命。作為村長，我只可以咁做。 達：（腦內聲音，虛弱）我唔係要玩咩電單難題啊…你點先肯信我啊… 盧綠：（腦內聲音）阿達，既然你唔講出真相，咁無辦法啦。 達：（腦內聲音，虛弱）你…殺咗我嘅話…你點同村民交代啊…我話曬都係玄武童子… 盧綠：（腦內聲音）睇嚟，你唔單止係玄武童子，你仲係有特殊能力嘅人！你睇吓，你嘅傷口埋咗口，止咗血！你仲話唔係同盧零一樣！ 達：（腦內聲音，虛弱）我…我都唔知發生咩事架…喂…盧綠…等等先…你呢個動作咪係…寸刺！？ 盧綠：（腦內聲音）你係第一個入嚟嘅人，我唔知仲有幾多人知入嚟嘅方法。所以，我會盡量令你成為最後一個。阿達，多謝你比我知道真係有其他人存在，亦令我確定一件事，就係我嘅恐懼，以及要守護呢條村嘅決心！ 達：（腦內聲音，虛弱，驚恐）盧綠！等等，你聽我講啦！ 盧綠：（腦內聲音）阿達，好高興認識你，再見。 達：（腦內聲音，虛弱，驚恐）唔好啊！ *消失聲效 *鎖鏈墜地聲效 盧綠：消…消失咗！點解會咁架！ ——— Sabrina：阿達...呢度係...?（1.3） Gigi：算啦阿達，一切都唔重要啦...（1.3） 4哥：christoper...我希望...我最後一眼係喺呢個大廳...望住自己個囝...咁就已經好幸福啦...（#19） Gigi：我諗到醒返之後，會同你講邊句對白啦。（1．4） Sabrina：咁我要問下家姐先啦，如果家姐同我講想見你嘅話，到時我地咪會再見囉。（1．4） 達：呢度係... *電子門開啟聲效 達：（讀白）我依家浮咗喺半空...被自己唔同嘅記憶包圍住...仲有兩度門添...所以呢度係... 莫十三：你都曾經入過嚟，無理由唔記得呢度架～ 達：莫十三！點解你會係度架！ 莫十三：你仲好講！唔係因為你，我會係度呢？ 達：但我明明喺啞鈴洲架！ 莫十三：我咪同你講過唔好咁多事囉！Game of Eden唔係你諗得咁簡單架！ 達：咁你又咁多事！一定係你搞到我出現係度到！ 莫十三：咁你想見到我，定係見到耶蘇啊？不過你咁衰格，肯定落地獄啦～ 達：唔好講咁多廢話，我想返去現實世界啊！ 莫十三：車～我以為你想行另一度門，即刻返入Area DB Island添～做咩啊～識驚啦咩～ 達：我想搞清楚一啲事...先再入去。 莫十三：咁快啲行啦！傻達！ *電子門關閉聲效 *心跳機聲效 達：莫十三...依度係... 莫十三：傻達，唔見你一排，係度連觀察力同推理能力都無埋啊？ 達：係你做嘅...？ 莫十三：你份人真係啊，講句「多謝」係咪咁難啊？ 達：多謝你...帶我嚟到墓島...即係我喺啞鈴洲受傷嘅時候，都係你幫我止血？ 莫十三：我都唔明你嘅，咁危險做咩唔登出呢？ 達：我怕入唔返去啫... 莫十三：即係你唔怕死嘅？唔係我及時趕到去你屋企，見到你大髀無端端受傷流曬血幫你縫埋個傷口，你應該失血過多死咗啦。 達：咁點解你幫我強行登出嘅？ 莫十三：傻達，你嗰陣心跳快到咁唔尋常...一定遇到啲咩事啦...我情急之下強行幫你除咗Game of Eden嘅裝置，然後帶你嚟墓島囉 達：吓！咁如果我醒唔返咁點算啊？ 莫十三：依家咪無事囉。不過下次無咁好彩架。 達：莫十三，你對嗰個啞鈴洲知道幾多野啊？ 莫十三：你打啞鈴洲三個字咪揸到囉。 達：OK，咁我轉一個問法。你對Area DB Island同盧零知道幾多野啊。 莫十三：阿達，強行登出對大腦好傷...今次我及時救到你。下次我唔會咁多事，所以你都唔好咁多事，做返一個普通嘅玩家啦，好嘛。 達：盧零可以得到一個封閉區域做禮物，又可以變成咩魚人狀態，佢一定唔係普通人。唯有π 先生嘅人先可以有咁嘅能力同待遇。你無理由唔知發生咩事架。 莫十三：我係莫十三，之前嘅莫醫生發生過咩事，我無腦力同心力去理。 達：咁你比之前幾代莫醫生嘅記憶我睇啊！ 莫十三：阿達，其實你咁執著做咩呢？關你咩事呢？ 達：我...同你一樣...唔想見死不救啊... Zip噏劇場 《Game of Eden》第二季 小島篇 第40回 「救」 阿攝 飾演 阿達 Cfun 飾演 盧綠 彬臣 飾演 莫十三醫生 編劇及製作 阿攝 音樂 BEAT FRIDAY (Toasts, EXTENSION, Bad End, Half, Time After, Rain or Shine) 封面設計 Followmelikeblack 劇尾歌曲：Lolly Talk《數到十》 作曲：吳林峰 作詞：黃偉文 編曲：Goro Wong 監製：Goro Wong Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 55【Zip噏劇場】Game of Eden 第二季 「小島篇」#39《逼供》
時間：180年9月11日下午6時 地點：封閉區域Area DB Island 盧綠家外 達：（讀白）欣賞完啞鈴洲好靚嘅日落景色，終於到達村長盧綠嘅屋企。但門口都有好多村長用充滿好奇或者熱情嘅眼神望住我地... 盧綠：咁多位村民，玄武大帝派玄武童子嚟到我地啞鈴洲，依家要稍事休息。不過放心，聽日，我會帶玄武童子同大家見面！大家都好好休息！ 達：（讀白）盧綠果然係村長，佢一講完，眼前呢幾十位村民就慢慢離開。我就繼續保持「玄武童子」親切嘅形像，微笑同所有村民揮手道別。終於，當所有村民離開之後，盧綠推開大門 *推門聲效 達：（讀白）呢度就係盧婷所住嘅地方，一個三進式，四合院設計嘅古典中式房屋，總供有5間房，最入就係大廳，放置仙人嘅神主牌。盧綠帶我入佢間房入面，而呢一刻...終於得返我地兩個人啦！ 嘩！頭先真係！ 盧綠：（細聲）殊... 達：（讀白）佢好凝重咁示意我唔好出聲...我唯有乖乖地咁坐低。跟住，佢打開咗一個櫃，拎咗一個木盒，再喺木盒拎一啲不知名嘅樹莖同樹葉 *剪碎聲效 達：（讀白）將佢地剪碎之後，就加入一個熱水壺去煲煮。隔咗一陣 *倒水聲效 達：（讀白）就一啖飲曬佢...慢慢佢身體開始有微震...之後...佢溫和嘅眼神...慢慢變得嚴肅...仲有啲惡添！喂，盧綠...你做咩啊！ 盧線：殊！ 達：（讀白）我心諗你想點啊...又唔講野...跟住佢一隻手做唔好出聲嘅手勢，另一隻手就指住自己個腦。我心諗你做咩啊？然後隔咗幾秒，我終於明佢想點啦！ OM！ *全知狀態聲效 達：（腦內聲音）下次你唔想出聲，不如用寫字提我啦...我唔識讀心...唔係下下都估到你做乜架... 盧綠：（腦內聲音，嚴肅）阿達，係咪啊？ 達：（腦內聲音）係... 盧綠：（腦內聲音）我希望之後嘅時間，我同你都用呢種方法去溝通。同時無我陪同及批準，唔可以同任何一位村民接觸。 達：（腦內聲音）吓...哦... 盧綠：（腦內聲音）仲有，見村民嘅時候，希望你保持剛才嘅微笑，因為你依家係村民心目中係「玄武童子」。 達：（腦內聲音）其實我唔想扮咩「玄武童子」...我入嚟係想搵盧婷架！ 盧綠：（腦內聲音）阿達，唔好咁大動作！繼續安安靜靜坐係度！因為有人監視我地... 達：（腦內聲音）吓！ 盧綠：（腦內聲音）唔好望！繼續坐低。 達：（腦內聲音）咁我要坐幾耐啊... 盧綠：（腦內聲音）坐到佢走為止... 達：（讀白）喺盧綠凌勵嘅眼神之下...我都無得唔照佢說話去做...而佢口中講嘅個一個人...究竟係邊個呢？我真係好好奇，所以我將全知狀態嘅集中力用係聽覺度...我合埋眼，以自己為圓心，慢慢將感知範圍向外擴展。除咗風聲、海浪聲、動物叫聲之外...我隱約聽到盧綠屋企後方100米嘅後山嘅位置，有微微嘅呼吸聲同心動聲...我都係第一次用全知狀態，將自己變成偵測器。我身體好自然向嗰個方向望。然後盧綠出現喺我眼前，點一點頭。再過咗兩個鐘，嗰個心跳聲越嚟越遠。 盧綠：（腦內聲音）裘雪終於走咗啦。 達：（腦內聲音）點解佢要監視我地嘅？ 盧綠：（腦內聲音）為咗想知你究竟係敵人定無神。 達：（腦內聲音）咁我同佢解釋清楚咪得囉！ 盧綠：（腦內聲音）你覺得佢地有足夠知識去明白你講嘅野咩？ 達：（腦內聲音）咁你要我繼續扮落去？扮到幾時啊？ 盧綠：（腦內聲音）扮到你離開為止。 達：（腦內聲音）我都講過，我入嚟係搵盧婷，唔搵到係唔會走架。 盧綠：（腦內聲音）多謝你咁有我阿妹心。不如，我地食少少野慢慢交換資訊啊。 達：（腦內聲音）唔駛啦，我同你地有少少唔同，我唔駛食野架。 盧綠：（腦內聲音）咁，飲杯茶啊？ 達：（腦內聲音）我都話同你地唔同，我喺度唔駛飲野食野架！ 盧綠：（腦內聲音）過門都係客，我地盧氏家族好注重禮數。 *倒水聲效 盧綠：（腦內聲音）阿達，請。 達：（腦內聲音）好啦好啦，飲完我就即刻話你知究竟發生咩事。 *飲水聲效 達：（腦內聲音）呢種茶一聞就好濃嘅花香味，甜甜地，入口好順滑好舒服喎！ 盧綠：（腦內聲音）喜歡就好啦。 達：（腦內聲音）不過，最尾嘅回甘...都幾甘吓喎...仲好苦添... 盧綠：（腦內聲音）仲有無特別感覺？ 達：（腦內聲音）覺得個人好似越嚟越重...重到... *重物撞擊枱面聲效 *油燈聲效 *滴血聲效 達：（被封口）嗯... *鐵鏈聲效 達：（被封口）嗚!!! 盧綠：以依家流血嘅情況，如果唔止血嘅話，一個多時辰之後，你就會因為失血過多而失去知覺，然後死喺呢個地下室。 達：（被封口）OM ! 達：（腦內聲音）盧綠！你係咪癲咗啊！快啲放咗我啊！ 盧綠：（腦內聲音）當我飲咗靈魂之水，知道呢個啞鈴洲點嚟嘅個一刻，我都唔知咩係癲，咩係正常。 達：（腦內聲音）我都話我入嚟係搵盧婷囉！ 盧綠：（腦內聲音）我好多謝你咁有心。但係我都想確認一件事，就係全身紫色碼嘅你，流出嚟嘅血都係紫色碼。但呢啲血，係咪真係血？你感受到嘅痛，係咪真係痛？ *刀插聲效 達：（被封口，慘痛大叫）啊！！！ 盧綠：（腦內聲音）我下一刀會更用力，插得更深，如果你唔想死嘅，只有能夠變成盧零狀態，先可以打贏我，離開呢度。 達：（腦內聲音）咩盧零狀態啊？我只係一個普通玩家咋！ 盧綠：（腦內聲音）但對我嚟講一切都唔係玩。因為當我知道呢個啞鈴洲只係遊戲嘅一個區域，我就會諗…如果再有大凶日出現…我哋所有村民係咪都會死？我唔知對你哋嚟講…我哋係啲乜野…但我想講…我哋都係命！但我哋可以掌控到嘅事實在太少啦！我對你嗰個世界一無所知…我唯一可以做嘅就係減少威脅同傷害…萬一你唔係普通人…而係祖先盧零嗰種可以變成魚人嘅人…咁對我哋嚟講實在太危險啦… 達：（腦內聲音）咩盧零…咩魚人啊…我只係一個登入Game of Eden嘅普通玩家…係area 15嘅啞鈴洲撞到你細妹盧婷…我幫佢搵方法返入嚟…我順利關啟張保仔洞嘅機關！但係…你細妹入咗洞之後…竟然被九頭海蛇追殺！仲比九頭海蛇捉走咗，所以我先入嚟咋！ 盧綠：（腦內聲音）呢個世界根本就無九頭海蛇！根本就無玄武大帝！ *刀插聲效 達：（被封口，慘病大叫）啊！！！ 盧綠：（腦內聲音，情緒些少激動）下一刀就唔係大脾，而係再上啲嘅地方！講！點解要入嚟呢度！你係邊個！有咩目的！ 達：（腦內聲音）我都話我只係普通玩家囉…我只係想搵盧婷被九頭海蛇捉咗去邊…然後帶佢返屋企咋… *刀插聲效 達：（被封口，慘病大叫）啊！！！ Zip噏劇場 《Game of Eden》第二季 小島篇 第39回 「逼供」 阿攝 飾演 阿達 Cfun 飾演 盧綠 編劇及製作 阿攝 音樂 BEAT FRIDAY (SPEAK, Good Plus, Time After, Rain or Shine, CONVENANT) 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 54【Zip噏劇場】Game of Eden 第二季 「小島篇」#38《盧婷的啞鈴洲》
*海浪聲 達：（讀白）我終於…終於都入到盧婷嘅啞鈴洲啦！雖然由破解北帝廟三個神像嘅秘密，到入咗北帝神像，再到好似時空穿梭咗入嚟盧婷嘅啞鈴洲，只係短短一個鐘嘅時間，但眼前所發生嘅事，完全超出我對Game of Eden嘅認知。首先，我見到盧婷以外同樣有三種顏色嘅人…仲要唔係幾個，而係百幾二百人…即係Game of Eden存在我呢種玩家、阿K嘅人工智能以及Jesse同Gigi嘅不死靈魂以外嘅第4種存在。加上剛才喺Area 15嘅時間係夜晚，而依家入到嚟就變咗下午，即係呢兩個區域應該有時差… 而盧婷嘅族人無論衣著上、言語上都好似返咗去幾百年前嘅漁村生活。好在，我可以用全知狀態同村長盧綠溝通，叫做暫時用「玄武童子」嘅身份，化解裘雪仲有其他村民嘅疑慮。然後，我就跟住村長盧綠由被我炸毀咗嘅北帝廟，沿住海傍，行去西提嘅位置。係短短三十分鐘嘅路程，有一種明星行紅地毯嘅感覺，因為嗰百幾二百個村民，有啲就跟住我同盧綠身後面行咗一段路；有部分無出現喺北帝廟嘅村民，見到呢個奇特嘅狀況，就喺自己嘅屋企走咗出嚟，好似見到人打勝仗凱旋而歸，所以聚集喺門口，好奇所發生嘅事。而仲喺全知狀態嘅我，思緒都幾混亂，因為五感變得敏銳嘅我，好似可以感受到佢哋每個人嘅情緒…有啲好興奮、有啲好恐懼、有啲好疑惑…百幾二百人嘅能量一下子衝入我大腦…實在太辛苦啦…所以，我決定停止全知狀態…面對嘅景像由顏色碼變返普通嘅畫面… 村長盧綠無同我講任何說話，只係好靜咁帶我繼續向佢屋企嘅方向行。咁我都靜靜地望下沿路嘅風景。而我終於明白盧婷所指兩個啞鈴洲嘅分別。首先呢個啞鈴洲係無電嘅存在，科技似幾百年前咁純樸，同時亦係呢種純樸，所以呢個啞鈴洲嘅天空比Area 15更靚… 依家係日落時份，夕陽落係一望無際嘅海洋上面，餘暉穿過層層嘅雲層，射落村落嘅石屋、植物身上，有啲石屋嘅煙囪有陣陣嘅白煙，我聞到一陣陣嘅柴火味、飯香味同炒菜嘅氣味，再遠少少聽到有村民唱民謠。如果呢個啞鈴洲係孤島，只係得呢百幾二百個村民，過住呢種與世無爭嘅生活，真係幾寫意。而回想返現實世界嘅三高生活，即係高科技發展、高度社會壓力同高度污染嘅生活方式…呢度好似先係真正嘅伊甸園… 話咁快，就行到去村長盧綠嘅屋企，係一個三進式嘅四合院設計，總共有五間房，最入係大廳，放咗各個祖先嘅神主牌。然後盧綠帶咗我入佢間房，正當我以為終於可以開口講嘢，問佢發生咩事嘅時候，佢用食指放喺唇邊，做咗一個唔好出聲嘅手勢，同時示意我坐喺木櫈上面。跟住佢拎咗一個木盒，打開之後拎咗啲樹葉同樹莖，將佢哋剪碎之後，加落水入面煮咗一陣，然後一啖飲晒佢！然後，佢嘅氣場由剛才溫和嘅村民，好似變成另一個人咁！ Zip噏劇場 《Game of Eden》第二季 小島篇 第38回 「盧婷的啞鈴洲」 阿攝 飾演 阿達 編劇及製作 阿攝 音樂 BEAT FRIDAY (Time After, Fifth, ROUND AND ROUND) 封面設計 Followmelikeblack 劇尾歌曲：Kendy Suen - 物無類聚 Shinka 曲：Kendy Suen 詞：周耀輝 編：Kendy Suen, ziti@code, gill@code, makaa@code, J1M3 監：Kendy Suen Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 53【Zip噏劇場】Game of Eden 第二季 「小島篇」#37《玄武童子》
電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 15，今日係NC181年6月2日，Enjoy yr time in Eden. ——— 時間：晚上9時 地點：第15區啞鈴洲北帝廟內 *輸入成功聲效 達：（讀白）我成功用希臘文破解北帝神像背脊嘅機關，北帝神背部打開咗，我進入北帝神像內部之後，好似進入咗一個駕駛艙咁，我可以透過北帝對眼望到成個北帝廟。當我仲諗緊發生咩事嘅時候，我面前嘅畫面轉得越嚟越快！快到好似洗機洗衫咁！ *機器轉動聲效 達：（讀白）轉咗唔知幾耐，終於停咗...眼前嘅景像都係剛才嘅北帝廟...但點知... *爆炸聲效 達：（讀白）困住我嘅北帝像無端端爆炸！ *火燒聲效 達：（讀白）咳咳咳...唔止北帝像...連面前嘅神壇...仲有千里眼、順風耳神像都爆到爛晒...死啦...今次一定被廟祝重罰啦... *急步聲效 盧綠：（難以置信）邊個！竟敢破壞北帝廟！ 達：sorry！我都唔知點解會搞成咁架！你唔好拉我啊！ 裘雪：我從來都未見過你，你唔係我地三族嘅人！你究竟係邊個！ 達：（內心讀白）眼前呢班人嘅裝束...咁似盧婷嘅... 裘雪：你再唔講清楚你嘅來歷，唔好怪我地唔客氣啊！ 達：OM！ *全知狀態聲效 盧綠：阿雪，等一等！ 達：（腦內聲音）喺我眼前呢一班人...真係同盧婷一樣，最外層係墨綠色嘅遊戲碼，中間就係人工智能嘅灰色，然後最內層就各有唔同嘅顏色...睇嚟我真係成功入咗盧婷嘅啞鈴洲啊！ 盧綠：（腦內聲音）點解我眼前呢一個人...身上淨係得一隻顏色嘅...人工智能！你同我出嚟解釋清楚啊！ 裘雪：阿綠，你作為村長唔好淨係望住個天啦！ 盧綠：阿雪...等多陣...我請示緊玄武大帝... 凱安：（虛弱）阿綠，阿雪！究竟發生咩事？點解北帝廟會爆炸嘅... 裘雪：阿安，就係呢個人，喺北帝廟爆炸之後就出現，佢唔係我地三族嘅人，我懷疑 凱安：（虛弱兼興奮）一定係玄武大帝顯靈！剛才我地選緊新村長，即刻風雲變色，之後北帝廟就爆炸！呢個人就出現！佢一定係北帝嘅化身！ 裘雪：阿安，可能佢係其他島嚟嘅人呢？ 凱安：（虛弱兼興奮）阿雪，你睇佢同我地嘅裝束完全唔同，爆炸完之後可以安然無恙，仲唔係神蹟？ 裘雪：阿綠，你請示完未啊！究竟佢係唔係敵人啊！ 凱安：（虛弱兼興奮）佢一定唔係敵人！ 達：其實我呢...就... 盧綠：（腦內聲音）人工智能！你快啲出句聲啦！究竟呢個全身紫色點點嘅人，係邊個！ 達：（腦內聲音）原來...村長你睇到我身上嘅顏色？ 盧綠：（腦內聲音）你...同緊我講野？ 達：（腦內聲音）真係好囉...可以搵到一個都有全知狀態嘅人... 盧綠：（腦內聲音）全知狀態？係咩意思？ 達：（腦內聲音）我一時三刻解釋唔到比你聽，但總之我就可以聽到你腦入面嘅說話啦！同埋我唔係壞人...我係入嚟搵盧婷架！ 盧綠：（腦內聲音）你識婷婷！？ 達：（腦內聲音）因為佢，我先會入嚟... 裘雪：阿綠！你地對望完未啊！ 盧綠：阿雪，唔好輕舉妄動！ 裘雪：阿綠，阿安，唔好意思。我唔會比任何來歷不明嘅人危害呢一條村架！ 凱安：阿雪！你點可以對玄武大帝嘅人不敬架！ 裘雪：阿安，你係咪似藥飲到失去理智啊？ 凱安：我只係相信我眼前嘅神蹟，天降神明，一定係拯救我地啞鈴洲！ 達：（腦內聲音）阿村長...佢地好似想對付我咁喎...你係咪要諗下辦法呢...？ 裘雪：阿安！你行開！ 凱安：好啊！你想對付佢，過咗我呢一關先！ *武器出鞘聲效 盧綠：夠啦！ 裘雪：阿綠，你係村長，你有咩打算？ 盧綠：（腦內聲音）喂，你叫咩名？ 達：（腦內聲音）我叫阿達... 盧綠：（腦入聲音）你跟住我嘅指示去做 達：（腦內聲音）我要做啲咩啊... 盧綠：（腦內聲音）首先唔好咁驚，扮若無其事，笑住同大家好大聲咁講大家好 達：（腦內聲音）你認真？ 盧綠：（腦內聲音）快啲跟住我講去做啦！ 達：（微笑兼大聲）大家好！ 盧綠：各位村長！剛才我請示完玄武大帝！玄武大帝同我講，我地眼前呢一位係佢派嚟嘅使者。依家由佢嚟同大家介紹自己。 達：（腦內聲音）喂！我要點介紹自己啊？！ 盧綠：（腦內聲音）你跟住我講就得！ 達：（腦內聲音）哦... 盧綠：（腦內聲音）各位啞鈴洲嘅村民 達：各位啞鈴洲嘅村民 盧綠：（腦內聲音）你要大聲啲講！我係玄武大帝派嚟嘅使者 達：（大聲一點）我係玄武大帝派嚟嘅使者！ 盧綠：（腦內聲音）我叫 達：（大聲）我叫 盧綠：（腦內聲音）玄武童子！ 達：玄武童子！ 凱安：各位村民！玄武大帝終於回歸！派玄武童子嚟我地啲啞鈴洲啊！我地一齊大聲叫！玄武童子！ 眾村民：玄武童子！玄武童子！玄武童子！ 達：（腦內聲音）村長...依家點算啊... 盧綠：（腦內聲音）你繼續跟我講...我玄武童子嘅出現就係想同大家講 達：我玄武童子嘅出現就係想同大家講 盧綠：（腦內聲音）大凶日之後，啞鈴洲一切如常！ 達：大凶日之後，啞鈴洲一切如常！ 凱安＋眾村民：多謝玄武童子顯靈！ 達：（腦入聲音）喂...佢地咁high...真係當我神咁拜...咁點算啊... 盧綠：各位村民，你地依家安心啦。時候都唔早啦，玄武童子初到啞鈴洲都要稍事休息。大家可以安心繼續日常嘅工作啦。 達：（腦內聲音）村長，咁我依家點啊？ 盧綠：（腦內聲音）你跟住我一齊離開就得啦。我有好多野要問你。 裘雪：阿綠！你下一步諗住點做啊？ 盧綠：（微笑）當然要同玄武童子報告呢過百年嚟我地三族人嘅事，然後等佢可以同玄武大帝回報啦。 達：（些少心虛）無錯...無錯... 裘雪：但係... 盧綠：阿雪，有咩聽日再傾，好唔好？ Zip噏劇場 《Game of Eden》第二季 小島篇 第37回 「玄武童子」 阿攝 飾演 阿達 Cfun 飾演 盧綠 Potter 飾演 凱安 Harry 飾演 裘雪 編劇及製作 阿攝 音樂 BEAT FRIDAY (LIKE WHERE, SOMEWHERE, Interval, Kaji, Dong) 封面設計 Followmelikeblack 時間：同日晚上11點 地點：Area DB Island 裘雪家中 *打開木櫃聲音 裘雪：（讀白）阿爺曾經吩咐，如非去到嚴重嘅情況，都唔好用呢個靈龜嘅龜甲… *燒木聲效 裘雪：（讀白）龜甲占卜係由第一代裘氏祖先開始傳到依家。方法有兩種，第一種係龜卜，即係睇龜甲燒出嚟嘅紋理及圖案，去堆斷玄武大帝嘅提示。另一種係用龜殼搖銅幣…而剛才起到嘅卦…係上乾下坤…即係第十二卦嘅否卦…否卦為乾天陽氣停留在上，坤地陰氣停留在下，天地陰陽之氣無法交流融和，萬物閉塞不通，係政亂而人不和之象…仲要連續3次都係開出否卦…所以我無得唔用靈龜做龜卜…而我內心默念一個問題，就係「玄武童子」嘅來臨，對我哋啞鈴洲是福是禍…應該好快會結果… *爆木聲效 裘雪：（讀白）靈龜嘅龜甲竟然燒爆咗！我哋裘示用龜卜占卜，從未發生呢個結果！係大凶之兆！ *燃點火柴聲效 裘雪：（讀白）祈求上天保佑！北斗七星續命燈會有功效，可以保到婷婷同埋阿葦平安！ Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 52【Zip噏劇場】Game of Eden 第二季 「小島篇」#36《達陣》
電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 15，今日係NC181年6月2日，Enjoy yr time in Eden. ——— 時間：晚上9時 地點：第15區啞鈴洲北帝廟內 達：（讀白）順利啟動完千里眼同順風耳機關之後，就到北帝神像。估唔到我用火燒完佢鬍鬚，將佢嘅外貌回復到原本清秀嘅樣，真係成功開啟到最後一個機關！喺北帝石像成個背脊變成一個輕觸式屏幕，屏幕上面較高嘅位置，出現一個北斗七星圖案，而斗柄指向南，代表依家開始進入夏天。而每粒星嘅傍邊都有一盞點著咗嘅燈。而呢個圖案下面就出現咗7個正方格，正方格下面就係一個鍵盤，可以比你輸入各種文字。 *輕觸屏幕聲效 問題就嚟啦，究竟有幾多次輸入機會呢？另外，應該用邊一個思考方式去解呢個謎團呢？因為...除咗中文、英文、數字之外...仲有世界各地嘅語言都可以輸入...同埋誇張到仲有語音添...以我所知北斗七星第一粒星叫做天樞，術數名叫做「貪狼」，我會知嘅原因...因為我睇過一套武打片叫做《殺破狼》...如果解謎嘅方法真係用語音嘅話...我係咪要扮狼叫？咁其他星嘅聲音...可以點扮啊？ *油燈熄滅聲效 *石化聲效 嘩！有無搞錯！我乜密碼都未輸入，連試都未試過，北斗七星嘅第一粒星旁邊嗰盞油燈就熄咗！而北帝神像背脊最外圍嘅部份竟然回復石化！成個情況咁似啲車無郁但都照跳錶咁！即係就算我唔郁，佢都會倒數計時！點算啊！有無得用火點返著盞燈架！ *深呼吸 阿K講過...失去理性就係墜落嘅開端...要keep claim… 依家得知嘅資訊暫時有三個... 第一 - 呢7個位嘅密碼應該係對應北斗七星嘅... 第二 - 第一盞熄嘅燈係北斗七星第一粒星 - 天樞...咁好大機會第一個密碼就係對應北斗七星嘅第一粒星... 第三 - 依家七盞燈咁就熄咗一盞！即係我得返6次機會！ 好...咁依家就要諗用邊一種輸入法去解謎啦...如果係數字嘅話...無理由咁簡單就咁1、2、3、4、5、6、7咁去代表七粒星架...雖然好多調查都顯示1-9嘅數字順序係好多人選用嘅密碼，但我估創造者阿康唔會咁低手嘅...如果要同數字有關嘅...我就會諗呢七粒星同地球嘅距離。我即刻查資料，以第一粒天樞為例，佢距離地球係124光年。但嗰7位數嘅密碼每一格只可以輸入一個字元...用光年去推算未必行得通...如果唔係距離...而係每粒星有幾光又得唔得呢？ 天文學家用視星等呢個概念去表示星星嘅光度，由最初嘅1-6級，到1-10級，再之後加埋負級數。數值越高，光度就越弱，太陽就係 -26.7；滿月係 -12.8；金星最光嘅時候係 -4.89。而北斗七星方面， 第一粒嘅天樞，視星等係1.79， 第二粒嘅天璇，視星等係2.34 第三粒嘅天璣，視星等係2.41 第四粒嘅天權，視星等係3.32 第五粒嘅玉衡，視星等係1.76 第六粒嘅開陽，視星等係2.23 第七粒嘅瑤光，視星等係1.85 假如，我淨係拎小數點前嘅數字，就會係1223121 *輸入密碼聲效 *油燈熄滅聲效 *石化聲效 啊！錯咗啊！又少咗一盞燈！北帝像背脊石化嘅部分又多咗！我得返5次機會咋...如果唔係數字...用中文又得唔得呢？但每粒星嘅名都係兩個字...就算係佢地嘅術數名，都係兩個字...喺我眼前嘅輕觸式屏幕啲背景色係黑色...而北帝喺五行入面係屬水...破解嘅方法...有冇可能係北斗七星每粒星喺術數角度嘅五行屬性呢？ 即係... 第一粒 - 貪狼，五行屬木 第二粒 - 巨門，五行屬水 第三粒 - 祿存，五行屬土 第四粒 - 文曲，五行屬水 第五粒 - 廉貞，五行屬火 第六粒 - 武曲，五行屬木 第七粒 - 破軍，五行屬水 假如真係用中文...按順序就會係木水土水火木水 *輸入密碼聲效 *油燈熄滅聲效 *石化聲效 又錯！得返4次機會咋！其實會唔會係我諗得太複雜...又術數又五行呢...嗱...古人將天上星宿分為三垣二十八宿，北斗七星係紫微垣其中一個星官，有古文記載，七粒星分別代表唔同啲事物，樞為天，璇為地，璣為人，權為時，玉衡為音，開陽為律，搖光為星... 假如都係用中文...按順序即係天、地、人、時、音、律、星？ *輸入密碼聲效 *油燈熄滅聲效 *石化聲效 啊！得返3次機會咋！我已經無曬頭緒同耐性啦！北斗七星有咁多名同意思，亦有咁多唔同啲神話！呢7個位嘅密碼又有咁多話言可以揀！你比777次機會我都未必會中啦！好地地數字咪數字，中文字咪中文字囉...要咁多國語言做乜啫！阿康你要玩多國語言啊嘛，我就試下囉！先用北斗七星每粒星英文名嘅頭一個字母，即係D、M、P、M、A、M、A *輸入密碼聲效 *油燈熄滅聲效 *石化聲效 （冷笑）得返兩次機會...北帝神像已經石化咗一半...即係我就嚟game over啦...咁唔差在試啲冷門嘅語言，例如係希臘文啦！因為有一種恒星命名法叫做「拜耳恒星命名法」，用希臘字母加上所屬星座去命名唔同嘅行星。北斗七星屬於大熊座， 而第一粒天樞星，就係用第一個希臘字母 α 第二粒天璇，係第二個希臘字母 β 如此類推 第三粒天璣，係γ 第四粒天權，係δ 第五粒玉衡，係ε 第六粒開陽，係ζ 第七粒瑤光，係η 所以，用希臘字母輸入嘅話，就會α β γ δ ε ζ η *輸入成功聲效 （苦笑）竟然...竟然得咗...係最絕望嘅時候竟然係靠撞而撞中！不過有時過程唔緊要嘅...而成功輸入密碼之後，北帝神像背脊石化嘅部份又變返輕解式屏幕，七粒星同一時間各我身上射出光線，仲喺我身上來回咗一次，好似幫我做激光掃描咁 *掃描聲效 過咗幾秒鐘，北帝神像背脊嘅屏幕竟然喺中間向左右一分為二咁打開咗！ *電子門打開聲效 喺我面前就係神像嘅內部，形狀大細真係同我嘅身形差唔多。咁即係點啊？想我行入去神像入面？好！就睇下阿康又有嗱機關！ 就係咁，我進入咗神像入面，畫面好似入咗機械人嘅駕駛艙，又或者超級英雄著咗鐵甲，但更貼切係似進入咗一個人形棺材咁...跟住 *電子門關門聲效 當我入曬北帝神像之後，嗰屏幕就閂埋咗！喂！想點啊！想困住我係度？然後，原本漆黑一片嘅空間，突然發光，然後我眼前出現咗北帝廟嘅實景，好似我可以透過呢個北帝像望住呢個北帝廟咁！搞咩啊？ *機關啟動聲音 眼前視窗顯示咗我所在嘅位置同時間，亦即係NC 181年6月2日，地點係area 15嘅啞鈴洲。然後眼前北帝廟嘅景像慢慢轉動，究竟係我轉緊？定嗰景轉緊？定係點呢？我完全唔知發生咩事，我淨係聽到數據傳輸嘅聲音，同埋眼前嘅景像就越轉轉快，快到好似洗衣機fing緊啲衫咁，fing 到我乜都睇唔到，fing 到我嚟暈啦！ *機器轉動聲效 （喘氣聲）轉咗唔知幾耐…終於停咗啦…眼前嘅景像同剛才無乜分別…即係我仲喺北帝廟入面？但點解顯示嘅時間係180年嘅9月11日嘅？地點係… *倒數聲效 喂！喂！發生咩事啊！ *倒數完成聲效 *爆炸聲效 達：（咳幾聲）嘩…呢度邊度嚟架… *腳踩碎片聲效 達：（又咳幾聲）呢個咪係北帝神像隻手？點解北帝、千里眼同順風耳神像會炸到碎晒嘅？創造者阿康，你係咪玩緊我啊… *急速跑步聲效 盧綠：（難以置信）邊個！竟敢破壞北帝廟！ 達：sorry！我都唔知點解會搞成咁架！你唔好拉我啊！ 裘雪：我從來都未見過你，你唔係我地三族嘅人！你究竟係邊個！ Zip噏劇場 Game of Eden 第二季 小島篇 第36回 「達陣」 阿攝 飾演 阿達 Cfun 飾演 盧綠 Harry 飾演 裘雪 編劇及製作 阿攝 音樂 BEAT FRIDAY (River, Drunken Koiwa, ROUND AND ROUND, No Shot, SOMEWHERE, UNTIL, thing, Kaji) 封面設計 Followmelikeblack 劇尾歌曲：Jer 柳應廷《約齊靈魂在墳墓開生日派對》 作曲：馮允謙 填詞：周耀輝 編曲/監製：王雙駿 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 51【Zip噏劇場】Game of Eden 第二季 「小島篇」#35《七星謎團》
電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 15，今日係NC181年6月2日，Enjoy yr time in Eden. ——— 時間：晚上9時 地點：第15區啞鈴洲北帝廟內 達：（讀白）自從盧婷喺張保仔洞入面被人工智能編碼組成嘅九頭海蛇捉走之後，第15區嘅啞鈴洲好似乜事都無發生過咁，太平清醮之後就回復原本嘅恬靜。心有不甘兼滿腦疑問嘅我決定再去張保仔洞搵線索，果然比我發現洞頂多咗一幅村民跪拜玄武大帝嘅壁畫！所以我決定喺北帝廟重現呢一幅壁畫嘅內容，希望可以啟動未知嘅機關，可以搵到盧婷。 首先，我按照壁畫村民插香嘅方法，亦即係北斗七星排列嘅方法，將香插喺北帝廟外嘅石香爐上面，然後 *移動石像聲效 我將北帝廟入面嘅千里眼神像略略移動，令佢面向香爐。跟著，香爐上面嘅香由原本飄向天，變成飄向千里眼神像嘅鼻，好似千里眼神像吸緊啲香咁！當佢吸曬啲香！ *機關啟動聲效 千里眼神像對眼珠竟然轉去望住順風耳神像！壁畫上面嘅順風耳神仙，一邊耳對住玄武大帝，另一邊耳就對住村民，姿態面向同我眼前嘅神像一模一樣。 OM！ *全知狀態開啟聲效 喺我眼前嘅三個神像都喺遊戲墨綠色代碼包圍住人工智能嘅灰色碼，即係我無估錯，呢度一定有機關可以入到盧婷所屬嘅啞鈴洲！不過，下一步應該點做呢？千里眼神像嘅機關係望，咁順風耳嘅機關應該係聽！唔通係聽順風耳神像講啲乜？ 我走到順風耳神像面前，將耳仔放喺順風耳神像嗰口旁邊，然後將所有嘅集中力都放喺一對耳度...雖然我喺area 0被強行開啟咗全知狀態，但經過一段時間嘅適應，我開始可以活用呢個狀態。我合埋雙眼，好留心咁聽，究竟會有啲機關或者提示呢？ *音樂停，靜止數秒 *微微風聲 答案係…除咗風聲之外，係乜野都聽唔到架…然後我就覺得自己好蠢，因為叫得順風耳，梗係聽順風耳聽到啲乜，而唔係順風耳口講啲乜啦！所以，我諗有兩個破解方法 - 1.學壁畫上面嘅村民咁，跪喺香爐前面，睇下聽唔聽到神喻； 2.企喺順風耳神像嘅位，嘗試聽下佢聽到啲乜野 最後，我決定 *移動石像聲效 移開順風耳神像，企喺佢嘅位置，模仿佢嘅動作，即係一邊耳對住玄武大帝，一邊耳對住出面嘅香爐，然後合埋眼，繼續將所有集中力放喺一對耳仔度，結果… *微風聲效 神秘聲音：（微弱）南斗主生，北斗主死。斗之盡處，向死而生。 我好似隱約聽到喺玄武大帝嘅方向，有啲聲傳過嚟…即係…玄武大帝講嘢？所以我即刻行近玄武大帝，將耳對住佢把口，然後… *微風聲效 反而乜都聽唔到…咁即係，只有企喺順風耳神像嘅位先聽到…之後，我就企返頭先嘅位，再集中啲去玩呢個「千里傳音」嘅機關！ 神秘聲音：（細聲）南斗主生，北斗主死。斗之盡處，向死而生。 我聽到南斗咩生…北斗咩死…好似仲有兩句…但都係聽得唔係好清楚…Ok，今次真係要100%集中，將全知狀態嘅所有力量，放曬係向住玄武大帝嗰邊嘅耳仔度！ 神秘聲音：南斗主生，北斗主死。斗之盡處，向死而生。 我終於聽到啦！係南斗主生，北斗主死。斗之盡處，向死而生。我雖然知北斗七星嘅用途好廣，由宗教到術數都可以應用得到。而古人以北極星做方向嘅指標，不遠處嘅北斗七星就用嚟提示季節嘅變更，例如斗柄東指，天下皆春。但從來無聽過主生死…仲有斗之盡處，應該係指北極星，但向死而生係咩意思呢？ 最慘係除咗呢4句，16個字之外，我乜都聽唔到…完全唔覺得係線索…而3個神像嘅機關，得返玄武大帝未開啟…我將全知狀態集中返喺對眼度，喺我前面嘅北帝神像嘅遊戲編碼以及人工知態編碼嘅分佈好平均，睇唔到有咩異樣…只係…佢今日嘅外貌，同壁畫上面嘅玄武大帝，以及對上一個星期我被罰留喺北帝廟打掃嗰陣嘅樣，有啲唔同… 我曾經睇過一啲好耐好耐之前嘅靈異故事，話一啲被敬拜或供奉嘅人偶，會隨住時間而有變化，例如頭髮會越嚟越長。有人話係神蹟係顯靈，但科學啲解釋係，整人偶頭髮嘅纖維因為溫度轉變而膨漲，或者移位，造成生長嘅錯覺。而喺我眼前嘅北帝神像，喺呢7日打掃嘅時候，明明同壁畫上面一樣，都係無鬚，點解月圓之夜，呢個時份，會有鬚呢？呢度係Game of Eden，唔係現實世界，唔通… *掃描聲效 都市傳說大典：歡迎使用都市傳說大典。喺你面前嘅北帝神像，係全嗰Game of Eden入面，唯一一個無鬍鬚嘅北旁神像。相傳喺現實世界，有一次啞鈴洲做大戲嘅竹棚發生大火，有村民見到有一位老人家喺度救火。事後發現玉虛宮入面嘅北帝神像無咗鬍鬚，所以，村民就認為北帝顯靈，化身老人家救火而燒鬚。不過，呢個只係民間傳說，信不信由你啦。哈哈！ 達：（讀白）咁即係，啞鈴洲呢個北帝像平時係無鬚，而喺今晚月圓之夜，一晚生鬚？定係我燒完北斗七星香之後，佢就生鬚呢？我好仔細咁研究呢個北帝像，無論前前後後全方位望過晒，除咗鬍鬚呢個位有唔同之外，其他地方都無異樣。即係鬍鬚係提示！但我應該點做呢？ 都市傳說大典話北帝顯靈救火而燒鬚。咁嘅情況，一係我等佢過埋今晚，睇下佢會唔會回復原貌…一係…我燒咗佢嘅鬍鬚，睇下會唔會觸發其他機關！ 而我就梗係可以等，但盧婷唔可以。因為每過一分一秒，佢就會越危險…所以，我決定要用一個好冒險嘅方法，就係放火燒北帝嘅鬚！ 放心，我唔會放火燒晒間北帝廟啦，因為我咁做就一定唔止被罰打掃咁簡單。我選擇用呢個方法… *點火柴聲效 我點著咗一枝火柴，然後用佢嚟燒北帝神像嘅鬍鬚！ 北帝啊北帝！有怪莫怪，只怪我救人心切，先出此下策咋！希望你原諒我阿達咁不敬啦！ *燃燒聲效 話咁快，原本由下把生到心口嘅鬍鬚一下子就燒晒，北帝回復之前清秀嘅外貌。之後… *機關啟動聲效 機關啟動嘅聲音由神像嘅背後傳出嚟，我即刻走到神像嘅背面，發現整個背脊都發光！然後慢慢變成一個輕觸式屏幕！屏幕上面較高嘅位置，出現一個北斗七星圖案，而斗柄偏向南，代表依家開始進入夏天。而每粒星嘅傍邊都有一盞點著咗嘅燈。而呢個圖案下面就出現咗7個正方格，正方格下面就係一個鍵盤，可以比你輸入各種文字。睇嚟，要輸入正確嘅密碼，先可以開啟到呢個機關。而由喺張保仔洞頂見到嘅壁畫開始，到依家嘅各種機關，都係同北斗七星有關。我估呢個密碼解謎應該都一樣。 7個位嘅密碼，北斗七星，點樣破解呢？ Zip噏劇場 Game of Eden 第二季 小島篇 第35回 「七星謎團」 阿攝 飾演 阿達 編劇及製作 阿攝 音樂 BEAT FRIDAY (Half, ROUND AND ROUND, Interval, thing, SPEAK, Rebel) 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 50【Zip噏劇場】Game of Eden 第二季 「小島篇」#34《北斗七星》
電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 15，今日係NC181年6月2日，Enjoy yr time in Eden. ——— 時間：晚上7時 地點：第15區啞鈴洲北帝廟內 *鎖鏈聲 *掃地聲 阿達：（VO）Game of Eden都有警署，所以若然玩家犯事，係有機會被監禁作懲罰。而我雖然喺太平清醮當日打爆咗玻璃箱，仲偷走埋平安包印台以及嗰把古劍，但北帝廟嘅廟祝好好人，只係罰我要戴上手扣，留喺北帝廟打掃一個星期。而今日就係最後一日... 廟祝：（遠處大叫）後生仔！ 阿達：（自言自語）無理由架...無咗嘅... 廟祝：後生仔！眼甘甘望住個平安包印台，又想偷走佢啊！ 阿達：唔係...我只係從唔同角度印賞佢啫... 廟祝：睇嚟，喺度呢七日都淨化唔到你嘅心靈...唔通要加刑...？ 阿達：唔係啊廟祝！呢七日淨化到啊！我每日一起身就專心打掃，兼聽你地頌經，真係由外到內再到返外都潔淨曬！我簡直係一個新造嘅人啊！ 廟祝：不過，我睇你嘅印堂仲係黑黑地，都係加刑好啲。 阿達：吓！你唔係最後一日先嚟反口啊！ 廟祝：哈哈，講下笑啫！ *解除鎖鏈聲效 廟祝：後生仔，下次唔好再偷野啦！ 阿達：知道！一定唔會！ 廟祝：後生仔，我話你印堂發黑唔係吹水架！時運低最好就返屋企休息下，仲有唔好再同嗰個𡃁妹聯絡啦！近朱者赤，近墨者黑，你自己小心啦！ 阿達：放心啦廟祝！無咩事我走先啦！ *海浪聲效 阿達：（VO）今日已經係6月2號，初十五，入黑之後可以見到又大又圓嘅滿月。唔知現實世界嘅月光變成點呢？而盧婷嗰個啞鈴洲嘅月光又係點呢？其實喺過去7日刑罰期間，我不斷回想最後見到盧婷嘅畫面...明明用平安包印台打開咗機關，有半段張保仔洞上下倒轉，形成一條只有盧婷可以入到去嘅特別通道，照道理佢應該可以順利返去佢所屬嘅啞鈴洲...但佢竟然跑返轉頭，仲話有九頭海蛇追佢...我記得佢講過，佢話佢嗰一族嘅神話係玄武大帝封印生性兇殘嘅九頭海蛇...咁點解喺呢個遊戲區域會有九頭海蛇去追佢？而當時我見到捉住盧婷嘅蛇頭...係灰色代碼...即係條蛇係同阿K一樣嘅人工智能？ 唉...我越諗越亂...所以...我決定去多次張保仔洞...搵下有冇新嘅線索... *電筒聲效 阿達：（VO）入黑之後就唔會有人嚟張保仔洞打卡影相，所以成個洞都只係得我一個人。我開著電筒，由入口開始，細睇每一幅壁畫。同之前嚟嘅時候一樣，壁畫都係記載住半人半魚嘅盧亭點樣變成人類生活，仲有玄武大帝封印九頭海蛇嘅事蹟，當然亦有村民喺啞鈴洲生活嘅細節。睇下睇下，我終於行到嚟呢一幅搶包山嘅壁畫前面。 OM！ *全知狀態開啟聲效 阿達：（VO）果然係無咗...變返普通嘅墨綠色...唉... 我開啟全知狀態，凝望搶包山壁畫上面平安嗰兩個字。之前同盧婷嚟呢度，就係見到「平安」呢兩個字係墨綠色包圍住灰色，所以我先覺得係機關。可惜，自從盧婷失蹤之後，無論係瞬間出現返喺北帝廟嘅平安包印台，定係壁畫上面嘅兩隻字，都無咗屬於人工智能嘅灰色，只係得返普通遊戲代碼嘅墨綠色...即係...我唔可以用呢個途徑入去...咁點算呢... 我繼續向盧婷被捉走嘅方向行，同時用電筒照下啲壁畫...完全無線索...當我行到去出口位置，轉身回頭一望，發現洞頂原來都有壁畫架喎！洞頂嘅壁畫畫咗一個滿月，滿月旁邊有一個懸浮半空，手執利劍，腳踏龜蛇嘅玄武大帝；喺佢左右兩邊分別係千里眼同順風耳。順風耳一邊耳仔對著玄武大帝，一邊就對住跪拜玄武大帝嘅村民；而千里眼就望實村民前面嘅大爐鼎。嗰爐鼎好奇怪，因為係插咗7枝香，而嗰7枝香唔係一注就咁插喺度...而係由左至右咁插住，形成一個好似湯殼嘅形狀，去供奉住三位神先。 我好清楚上一次入嚟張保仔洞嘅時候，洞頂係一幅壁畫都無！唔通呢個係新線索同機關？之但係…呢幅新嘅壁畫全部都係墨綠色代碼，並無代表機關同人工智能嘅灰色碼...唔通...真係無可能搵到婷婷... 我好失望咁離開張保仔洞...漫無目的咁行，行下行下又行返到去北帝廟前面嘅空地。晚上9點嘅啞鈴洲都熱鬧嘅，不過都係集中喺碼頭、食肆附近。而北帝廟就變得好靜，好莊嚴...我抬頭望住Game of Eden嘅天空，真係好清好靚，今晚萬里無雲，滿月又大又圓，最緊要係睇到星啊！比著現實世界一定睇唔到...所以我好舒服咁瞓咗喺地下睇星。天空上面嘅星星每分每秒嘅位置都唔同，古代嘅人會睇星去辦別方向，或者用星盤去紀錄時間，甚至係占星。望下望下，我不期然比一組星群吸引咗，除咗係特別明亮之外，仲有呢組星群組成嘅形狀...呢7粒星...由左至右咁排列，外形好似一個湯殼...7粒星，湯殼嘅外貌...咪即係北斗七星！ 北斗嘅斗，除咗係古代糧度單位，同時亦解做勺子嘅勺，因為北面呢7粒星外形好似舀水嘅器具，所以古人就將呢7粒星改名做北斗七星！ 一望住北斗七星，就諗起張保仔洞洞頂嘅壁畫，班漁民拜玄武大帝嘅時候，喺大爐鼎上面插嘅香，正正就係北斗七星嘅形狀！然後我就記起盧婷一句說話 - 「玄武大帝就將九頭海蛇封印，仲將啞鈴洲交比我哋三族人管理，直到佢再次歸來。」 究竟嗰幅壁畫，係歡送玄武大帝，定迎接玄武大帝回歸呢？ 一諗到呢度，我即刻由地面彈咗起身，望住北帝廟正門前面嘅石香爐，上面一枝香都無。望向北帝廟入面，就會見到北帝神像以及守護佢左右嘅千里眼同順風耳神像！成件事嘅構圖，同洞頂嘅壁畫好相似！只係神像面向嘅方位唔同，仲有未點香，同無村民脆拜啫！ 如果我模擬返壁畫嘅情景，會唔會啟動到某啲嘅機關呢？所以，我即刻跑入北帝廟！同時我好慶幸之前被罰喺呢度打掃一個星期！因為我知道晒廟入面所有物件存放嘅位置！ *打開木櫃筒聲效 我拎咗7枝拜神嘅香 *火柴聲效 點著咗之後，就依照壁畫上面香爐裝香嘅排列方法，即係北斗七星嘅方式，將香插喺北帝廟入口前嘅嘅石爐上面。然後，我就行返入北帝廟入面，千里眼神像同順風耳神像原本係打對面對望，所以，我慢慢移嗰千里眼神像 *石像移動聲效 將佢對千里眼望向出面嗰七枝香，跟住，嗰七枝香嘅煙竟然由飄向天，變成飄向千里眼神像嗰鼻度，千里眼神像好似真係吸緊嗰7枝香咁，令嗰七枝香燒得比平時快好多！當千里眼神像吸曬啲香之後，佢對眼珠就望向順風耳神像度！我仲聽到機關開啟嘅聲音添！ Zip噏劇場 Game of Eden 第二季 小島篇 第34回 「北斗七星」 阿攝 飾演 阿達 Crystal 飾演 盧婷 梓豪 客串飾演 廟祝 編劇及製作 阿攝 音樂 BEAT FRIDAY (Diner,Moonset, Half, Rainy Day, ROUND AND ROUND, Kaji) 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 49【Zip噏劇場】Game of Eden 第二季 「小島篇」#33《二次失蹤》
電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 15，今日係NC181年5月26日，Enjoy yr time in Eden. ——— 時間：下午5時，飄色完成後 地點：第15區啞鈴洲張保仔洞內 達：（VO）當我將平安包印台插入壁畫上面「平安」兩隻字嘅凹位，然後用力逆時針一扭！ *石頭機關轉動聲效 *冧石聲效石聲 盧婷：哥哥！發生咩事啊！張保仔洞係咪會冧啊！ 達：婷婷！小心啊！ 盧婷：啊！ 達：（VO）我見到張保仔洞頂部嘅石頭好似開始冧落嚟，會擲落婷婷度！我即刻發揮「赤套」嘅功效，用力一踩，然後用最快嘅速度撲向婷婷，希望幫佢擋住啲石頭！ *冧石聲效 盧婷：（咳幾聲）哥哥！你...無事啊嘛！ 達：我...我無事... 盧婷：哥哥...你頭上面...有好多... 達：係咪...有好多血啊？ 盧婷：係石灰咋... 達：即係...我無被石頭打中！？我地咁都無事？ 盧婷：雖然頭先好大聲...但好似乜事都無，完全無石頭冧落嚟喎！ 達：所以，頭先嗰啲聲係靠嚇架咋？ 盧婷：又未必係嘅...因為喺我地前面呢半段張保仔洞嘅壁畫，好似左右同上下倒轉咗咁啊... 達：係喎！咁奇怪嘅！ *行前腳步聲效 *碰壁聲音 達：哎吔！好痛啊！ 盧婷：哥哥你無事啊嘛？ 達：無事...只係我想行前望一望...但完全過唔到去...好似有一塊透明玻璃擋住我咁... 盧婷：哥哥...你係咪嚇親搞到有幻覺啊？上一次你嚟呢度都係咁...仲搞到暈咗添！ 達：唔信嘅你摸下啦，呢度啊！ *敲玻璃聲效 達：嗱，無呃你啦～ 盧婷：等我摸過～ *電子裝置啟動聲效 達：（VO）喺盧婷隻手掂到透明玻璃嘅一剎那，硬玻璃好似突然轉變咗質地，變到好似軟膠咁，然後 盧婷：哥哥，我伸到手入到去喎！ 達：唔通...得你呢類型嘅人先入得去... 盧婷：（玻璃房內聲音）哥哥，我入曬去啦！你都快啲入嚟睇下啲方向掉轉曬嘅壁畫啦！ *行前腳步聲效 *碰壁聲音 盧婷：（玻璃房內聲音）哥哥，你做咩啊！ 達：婷婷啊，睇嚟我只可以送到你嚟呢度啊... 盧婷：（玻璃房內聲音）哥哥，我唔明你咩意思啊 達：你都睇到啦，只有你先可以穿過呢塊透明嘅玻璃，我就唔得啦... 盧婷：（玻璃房內聲音）我依家即刻掂塊玻璃，你把握時間穿過嚟！ *敲玻璃聲效 盧婷：（玻璃房內聲音）咦！點解唔得嘅！ 達：即係，我估啱咗，得你或者你嘅族人先可以入到嚟。仲要係入咗嚟，返唔到轉頭。 盧婷：（玻璃房內聲音）咁即係點啊？ 達：即係，我地成功啟動到機關囉。你唔係話你喺張保仔洞等你哥哥，跟住全個天黑曬，然後好快瞓著咗！一醒返，就嚟咗我呢個時空啦。而理論上，喺邊度出嚟，就喺邊度入返去。 盧婷：（玻璃房內聲音）就係咁簡單？ 達：唔簡單啦！你嚟咗呢幾日，又驚又餓，又做賊去偷平安包！ 盧婷：（玻璃房內聲音）好在哥哥你救咗我，仲請我食野添！不過可惜啊... 達：可惜啲咩啊？ 盧婷：（玻璃房內聲音）哥哥你呢個時空咁多特別嘅野玩！突然間我又想留耐啲，體驗多啊！ 達：仲好講！你頭先偷咗咁多朱古力同咖啡豆！ 盧婷：（玻璃房內聲音）嘻嘻～咁真係好食啊嘛！ 達：你返到去，將咖啡豆磨成粉，然後用熱水沖嚟飲，好好飲架！ 盧婷：（玻璃房內聲音）真係架！ 達：你條村有無茶葉同牛奶？ 盧婷：（玻璃房內聲音）有！ 達：有無試過將牛奶加入茶入面？ 盧婷：（玻璃房內聲音）無試過喎！ 達：你可以試下。呢種叫做奶茶。之後，你可以再將咖啡加入奶茶度，變成鴛鴦。 盧婷：（玻璃房內聲音）乜原來可以咁變嚟變去架！ 達：係啊～ 盧婷：（玻璃房內聲音）咁我返到去就即刻試！ 達：嗯～咁你快啲向前行，穿過張保仔洞返去啦。 盧婷：（玻璃房內聲音）哥哥，多謝你啊！ 達：得啦～快啲行啦～ 盧婷：（玻璃房內聲音）唔知之後，我仲有無機會見到你，或者再嚟呢個時空呢？ 達：邊個搵到方法帶你返去架？ 盧婷：（玻璃房內聲音）咪就係哥哥你囉！ 達：所以，我都一定搵到方法去你嘅啞鈴洲搵你嘅！ 盧婷：（玻璃房內聲音）咁一言為定啦！我地勾手指尾！ 達：婷婷，我地依家中間隔住塊透明玻璃，點勾到呢？ 盧婷：（玻璃房內聲音）我唔理！隔空都要勾！ 達：好啦好啦～咁得未啊～ 盧婷：（玻璃房內聲音）得！ 達：咁快啲向前行啦～ 盧婷：（玻璃房內聲音）嗯...哥哥再見！ 達：拜拜～ *腳步漸遠聲效 達：（VO）我真係好怕道別，雖然識咗盧婷唔夠一個星期，但咁樣送別佢，個心都有少少黯然。可能，或多或少因為我呃咗佢...因為我知道，我玩家嘅身份，應該無可能入到去盧婷嗰個啞鈴洲。因為望住前面呢一段扭轉咗嘅張保仔山洞，全部都係由墨綠色包住灰色，即係遊戲世界內嘅人工智能區域...究竟盧婷嘅啞鈴洲係一個點樣嘅存在呢？阿K又入唔入到去呢？諗下諗下，擁有三種顏色嘅盧婷接近去到張保仔洞嘅盡頭...佢轉一轉身，拎住偷返嚟嗰袋咖啡豆，對住我好燦爛咁笑，然後揮手示意再見。我點點頭，佢就轉身繼續行，然後消失喺我視線範圍。 「保重。」我細細聲對住空氣講完，就擰轉身，行去執返把古劍同平安包印台。 盧婷：（玻璃房內聲音，細聲）啊！！！ 達：婷婷？ 盧婷：（玻璃房內聲音，大聲少許）係...九頭... 達：（VO）我即刻擰返轉身，再次望住前半後扭轉咗嘅張保仔洞！只係聽到婷婷嘅叫聲，但完全見唔到佢！ *拍玻璃聲效 達：婷婷！婷婷！發生咩事啊？ 盧婷：（玻璃房內聲音，大聲）九頭海蛇追緊我啊！ 達：（大叫）九頭海蛇...? *執劍聲效 達：（VO）我即刻執起地下嘅古劍，然後模仿婷婷「寸刺」嘅動作，希望可以打爆塊玻璃！ *碰擊玻璃聲效 盧婷：（玻璃房內聲音，最大聲）哥哥！ 達：（VO）婷婷好驚咁，喺洞嘅入口位向我跑緊過嚟！我不停發動「寸刺」！ *碰擊玻璃聲效 達：（VO）婷婷！我好快就過到嚟！ 盧婷：（玻璃房內聲音，最大聲）哥哥！救...啊！！！！ 達：（VO）婷婷連個命字都未嚟得切講，我就見到一個灰色碼形成嘅蛇頭咬住 婷婷隻腳，將佢拉走咗！！！ *碰擊玻璃聲效 達：婷婷！！！ *石牆轉動聲效 達：（VO）呢個時候，呢前半段嘅張保仔洞好似之前啟動機關咁，順時針咁轉動！ *碰擊玻璃聲效 達：可惡啊！！！ *石牆轉動聲效停止 達：（VO）呢前半段嘅張保仔洞好快咁回復原狀，前面擋住我嘅玻璃都消失咗！我連人帶劍用最快嘅速度衝出張保仔洞，希望救返婷婷！「赤套」繼續發揮威力，我唔駛一分鐘就穿過洞口，然後我竟然見到！ 師傅甲：你呢個賊仔無得走啦掛！嗰𡃁妹呢？ 達：係囉！師傅！你有無見到佢啊？佢頭先應該喺呢度出嚟架！ 師傅甲：哦～原來被人賣甩咗！快啲講！個平安包印台呢！？ 達：唔好理個印住！你有無見到佢先！ 師傅甲：我淨係見到你同把劍啫！ 達：咁...你聽唔聽到頭先張保仔洞入面有石頭轉動嘅聲音啊！ 師傅甲：我完全唔知你講咩！我淨係知道你呢個賊仔今次一定走唔甩！ 達：喂！喂！ *被綁手聲效 師傅甲：搵匀你全身都無嘅！快啲講！嗰平安包印台收埋咗係邊！ 達：真係唔係我度啊！你聽我講先！ 師傅甲：唔係你度，即係喺嗰𡃁妹度啦！咁返北帝廟慢慢講！ *急步跑聲效 師傅乙：（少少喘氣）搵到啦！ 達：你搵到盧婷啦！ 師傅乙：（少少喘氣）個印出現返喺原位... 師傅甲：咁人呢？ 師傅乙：（少少喘氣）又唔見咗啦... 達：究竟發生咩事呀… Zip噏劇場 Game of Eden 第二季 小島篇 第33回 「二次失蹤」 阿攝 飾演 阿達 Crystal 飾演 盧婷 梓豪、波盛 飾演 師傅甲、師傅乙 編劇及製作 阿攝 音樂 BEAT FRIDAY (AN ORDER, ROUND AND ROUND, Rainy Day, EXTENTSION, Bad End) 封面設計 Followmelikeblack 劇尾歌曲：YUNGBLUD - Abyss （怪獸8號主題曲） Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 48【Zip噏劇場】Game of Eden 第二季 「小島篇」#32《張保仔機關》
電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 15，今日係NC181年5月26日，Enjoy yr time in Eden. ——— 時間：下午4時，飄色完成後，搶包山初賽進行期間 地點：第15區啞鈴洲北帝廟內 *玻璃箱爆破聲效 盧婷：哥哥，你唔好眼瞏瞏啦，快啲拎走嗰印啦！ 達：係！ *警報聲效 盧婷：發生咩事啊？ 達：唔好理咁多啦！快啲走啦！ *推門聲效 包師傅：賊仔想走！ 達：婷婷，你拎埋嗰印喺後門走！你知嗰機關係邊架啦！ 盧婷：但我唔識開架喎！ 達：你咁叻女，一定識開然後自己返去嘅！ 包師傅：又係你嗰𡃁妹！偷完平安包都唔夠，依家連嗰印都想偷埋！ 達：婷婷，快啲走啦！ 盧婷：咁…我喺嗰度等你啦！ *推門聲效 達：（讀白）當盧婷繞過北帝神像從後門逃走咗，除咗嗰位喺關公廟撞到嘅包師傅之外，仲有幾位麵包師傅裝束嘅人喺正門衝咗入嚟！ 包師傅：細路，上次喺關公廟我見你幫嗰𡃁妹找數，以為你係好人，點知原來你都係賊嚟嘅！ 達：包師傅，嗰印借嚟用下，好快比返你啊！ 包師傅：依家就要比返我哋啦！ 達：（讀白）包師傅指向後門方向，兩位師傅就準備向後門方向跑過去。仲喺全知狀態嘅我可以好清晰睇到佢哋身上面嘅顏色。連埋包師傅在內嘅呢5個人都係玩家，而當佢哋想衝埋嚟之前，唔知點解我嗰腦好似已經有佢哋移動嘅方向同畫面，嗰兩位師傅一前一後一左右想繞過我，然後衝去捉盧婷！雖然我唔明點解我會有呢個預感，但唔好理啦！我隨手拎起神壇上面嘅香爐同祭品，向嗰兩個師傅掟過去！ *拋鐵器聲效 達：（讀白）但好可惜，我唔係阿K，身體追唔到個腦…掟唔中！跟住，我下意識用身體擋住嗰兩個師傅！之不過…無做開運動嘅我，比佢哋一撞就撞開咗！ *跌落地聲效 達：（讀白）我跌咗喺地下…望住包師傅同另外兩個師傅慢慢向我行緊埋嚟…腦入面就有佢哋綁起我嘅畫面…點算呢… 包師傅：細路，竟然喺太平洋醮做出咁大逆不道嘅事！ 達：（讀白）佢哋三個一步一步咁迫近…依家應該點做呢？直接登出？但之後再登入都會出現喺北帝廟入面…定用傳送門呢？但應該傳送去邊個位呢… 包師傅：早知喺關公廟就唔放你哋兩個走！ 達：（讀白）關公廟？即係我第一次撞到盧婷嘅地方…佢仲用破紀錄嘅時間破解嘅「關羽放曹華容道」…然後嗰位廟祝仲送咗一個寶物比我…一個紅色嘅鞋套…叫做「赤套」… 關公廟的廟祝：（回想聲音）呢個赤套真係好嘢嚟架，亦都係其中一個特別道具！套咗上你對鞋度，速度會加乘！雖然做唔到「一講曹操，曹操就到」嘅傳送門效果，但會增強爪地能力！跑得快好多架！ 達：（讀白）既然係咁，就試下啦！ *索帶聲效 達：（讀白）車…我仲以為有咩神奇力量…點知著上去乜感覺都無嘅… 包師傅：哈哈！細路，短短一兩日，你就被嗰漁村𡃁妹傳染，著啲奇怪嘅衫上身啊？同我捉住佢！ 達：（讀白）連埋包師傅在內嘅三個大漢向我衝埋嚟，喺佢哋起動之際，我向前衝，想避開左右兩位師傅嘅夾擊！就係我左腳發力一踩！我隱隱聽到… *馬叫聲效 達：（讀白）我感覺到腳低好似彈弓咁，我一踩塊地，嗰反作用力比平時勁好多！我彈得比平時遠咗好多！所以我一跳，除咗嚇親自己，仲嚇親佢哋三個！然後我仲撞低咗守住正門嘅包師傅添！ *碰撞聲效 *跌低聲效 包師傅：（痛苦）唔駛理我！繼續追！ 達：（讀白）估唔到呢個赤套有啲料到！我衝出正門，見到北帝廟外面嘅空地迫滿晒人，係度睇緊搶包山嘅初賽！好似連警報聲都無乜留意，亦好似唔知入面發生咩事！咁就啱啦！我慢慢走入人群入面，由於我身型唔高，所以好似被人堆淹沒咗咁…我望實喺北帝廟衝出嚟嘅三位師傅，佢哋完全睇我唔到…然後，我睇準時機，衝出人群，向由民居組成嘅小路跑過去！ 打機或者睇書都會知道「人中呂布，馬中赤兔」呢句說話。雖然我無機會騎過真嘅赤兔，但廟祝送嘅另類赤套，都真係有啲料到。因為北帝廟離張保仔洞有成兩公里，行要半個鐘，但用咗赤套鞋套嚟跑，我唔駛10分鐘就跑到！快到包師傅連塵都食唔到！ 但係…我呢世仔都無乜做運動…所以跑完呢10分鐘…我全身肌肉都好痛… 盧婷：哥哥！你終於都嚟啦！ 達：嘩…北帝廟嚟呢度咁遠…點解你連氣都唔喘嘅…？ 盧婷：我細細個就通山跑去採藥，短短嘅路程點會難到我啊！ 達：咁追你嗰兩位師傅呢？ 盧婷：我無行小路，反而跑咗上小長城度，然後再跑返落嚟張保仔洞，我揀條咁迂迴嘅路線，佢哋點會跟到啊！ 達：果然係嗰個咩大帝嘅後人啊… 盧婷：係玄武大帝！我唔準你侮辱佢啊！ 達：我只係未抖順條氣啫… 盧婷：哥哥啊，頭先我喺小長城望落去啞鈴洲，見到有好多艘好大好巨型嘅船駛入嚟…而喺島上面又有啲唔駛用馬但可以自己郁嘅車…仲有好多好多好奇怪嘅物件…呢個究竟係咩世界？同我嗰個啞鈴洲太唔同啦！ 達：對你嚟講，呢個係未來世界…嗰啲叫渡輪同汽車。其實我哋嘅祖先都曾經著過你著嘅衫，過緊好簡單打獵、捕魚嘅鄉村生活。 盧婷：所以，我即係穿越咗時空？ 達：可以話係，亦可以話唔係嘅… 盧婷：所以，我哋條村未來都會有呢樣野？ *打開汽水聲效 達：你點解會有罐汽水架？ 盧婷：原來呢個黑色有汽甜甜地嘅，叫做汽水！咁呢個黑色一粒粒，苦苦地架呢？ 達：你連朱古力都偷埋？ 盧婷：哦！黑色叫朱古力！咁啡色呢？ 達：盧婷，我頭先叫你快啲走，但你又偷呢樣偷嗰樣！連咖啡豆都有！ 盧婷：咁呢度好多野都係我條村無嘅…我諗住帶啲返我條村度，話比佢哋知我喺度嘅奇遇啫！ 達：快啲放低返佢哋啦！我哋要做正經野啦！ 盧婷：哥哥啊，我哋由深海魚人變成人，到可以打獵捕魚為生，用咗過百年，咁我哋幾耐先會好似你哋咁進步？ 達：咩啊？你哋係深海魚人進化？ 盧婷：壁畫上面呢隻半人半魚嘅生物同我一樣叫做盧亭，不過我嗰婷就有女字邊。我爸爸，即係第5代村長就係想借我嗰名去記念我哋嘅祖先。 達：咁…你哋點樣變做人？ 盧婷：因為玄武大帝囉！嗱，你望下壁畫上面嘅九頭海蛇。我哋嘅世界係由玄武大帝創造，但九頭海蛇太過惡，殘殺所有海洋生物，我哋嘅祖先爬到上啞鈴洲避難，可惜根本呼吸唔到，所以玄武大帝就將我哋變成人類，我哋盧氏就承繼佢嘅能力。之後玄武大帝就將九頭海蛇封印，仲將啞鈴洲交比我哋三族人管理，直到佢再次歸來。你睇緊嘅壁畫就係佢嘅事蹟同我哋嘅生活。而飄色、平安包同搶包山都係紀念佢為我哋帶嚟平安同和平嘅生活。 達：（讀白）見住婷婷一邊指住壁畫講解佢口中嘅神話。我扮到好認真咁聽，但腦入面一直諗…呢個唔係NPC又唔完全係人工智能，同時有人類顏色嘅盧婷，究竟係一個咩嘅存在？而佢所指嘅神話，我完全無聽過…張保仔洞入面嘅壁畫，我以為只係有人貪得意亂畫，點知又同佢所講嘅事跡一模一樣…創造者阿康有咩意圖呢？ 盧婷：哥哥，你做咩眼定定咁望住我啊？你仲未抖順條氣？駛唔駛飲啖汽水？或者食粒咖啡豆提神啊？ 達：唔駛唔駛…婷婷啊…你準備好返去未？ 盧婷：我都離開咗屋企咁耐，阿爸阿媽同兩位哥哥都應該好擔心我。所以，我準備好啦！ 達：以我推測，只要將呢個平安包印台放上去搶包山壁畫「平安」嗰兩隻字，應該可以啟動機關。 盧婷：凸字印台真係好似鎖匙咁，可以插入去壁畫嘅凹位啊！ 達：不過順時針扭唔郁…試下逆時針方向先… *石頭機關轉動聲效 *冧石聲效石聲 盧婷：哥哥！發生咩事啊！張保仔洞係咪會冧啊！ Zip噏劇場 Game of Eden 第二季 小島篇 第32回 「張保仔機關」 阿攝 飾演 阿達 Crystal 飾演 盧婷 阿德 飾演 包師傅 編劇及製作 阿攝 音樂 BEAT FRIDAY (Interval, MINUS DAY, Blue Street, LIKE WHERE) 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 47【Zip噏劇場】Game of Eden 第二季 「小島篇」#31《北帝古劍》
Zip噏劇場 《Game of Eden》第二季 小島篇 第31回 凱安：我凱安願賭服輸…我哋凱氏會支持盧氏繼續成為村長… 盧綠：阿雪，你哋裘氏呢？ 裘雪：我哋裘氏…. *爆炸聲效 裘仁：綠仔！北帝廟入面發生爆炸！ 旁白：正當盧綠處理緊村長選舉，喺Game of Eden 另一個區域，阿達就準備偷平安包印台。 ——— 電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 15，今日係NC181年5月26日，Enjoy yr time in Eden. ——— 時間：下午4時，飄色完成後，搶包山初賽進行期間 地點：第15區啞鈴洲北帝廟內 盧婷:哥哥，你睇下！我搵到呢把鐵劍！佢應該夠硬！可以斬爆個玻璃箱！拎到入面嘅平安包印台！ 達：我唔係叫你喺出面幫我睇水架咩？你做咩周圍走，仲拎咗把咁嘅鐵劍嚟啊？ 盧婷：我見你喺入面咁耐都唔出嚟…所以諗住幫下手啫… 達：我哋偷印台已經好危險…你仲偷埋把劍？快啲放返原位啦！ 盧婷：呢把劍係玄武大帝嘅北斗七星劍！當年玄武大帝就係用呢把劍打贏九頭海蛇，我哋三族嘅族人先無事，可以喺啞鈴洲生活咋！ 達：我完全唔識你嗰啲神話，我淨係知呢把劍生晒銹…一啲用都無… 盧婷：呢樣又唔得嗰樣又唔得…一陣佢哋搶完包山你都未拎到嗰印，咁點算呢？ 達：得啦得啦…我研究下可以點用啦… *掃描聲效 都市傳說大典：你好，歡迎使用都市傳說大典。你面前呢把係宋代古劍，身長四呎，係當年北帝廟建成無幾耐之後，島上漁民出海捕魚嘅時候撈獲，其後將佢送到廟內，作為鎮廟之寶，同時亦可以震邪壓妖。據說宋帝昺曾經坐船經過啞鈴洲，一位將軍將劍拋落海去鎮風浪。亦有傳說話日治時期，曾被一個日軍拎走把劍據為己有，但後來不知何故，呢位日軍突然死去，同伴就即刻將劍送返嚟北帝廟。喺70年代呢把古劍又神秘失蹤，手法似極高明嘅匪徒所盜。一個月後，警察拘捕一名「爆格」疑匪，喺審訊期間，該匪徒無意之間供出偷古劍一事，警察其後掘出已遭埋藏嘅古劍，最後順利「劍歸原廟」，北帝「故劍重逢」！聽完，你會覺得把劍好邪？定好靈呢？哈哈。 達：阿婷，你聽到啦…快啲放返原位啦… 盧婷：我真係完全唔明…呢度究竟係邊度…點解好多野表面係一樣，但實際又完全唔一樣…哥哥…我好亂啊… 達：Er…我都唔知點解釋… 盧婷：哥哥…我係咪呢一世都會留喺度…返唔到去啊？ 達：好啦好啦…你唔好喊…你比少少時間我…我好快就會拎到嗰平安包印台…然後送你返去… *出鞘聲效 達：（讀白）我唔知現實世界係咪有呢把劍。但阿K話過Game of Eden 係一個古地圖，入面保留好多當時阿康年代嘅元素。同時阿康又留咗咁多機關…話唔定呢把劍…可能有用… 依家我仲喺全知狀態，望住眼前玻璃箱最正中間嘅位置，墨綠色細點係最疏落，代表呢個位係最脆弱。或者我用劍尖撞擊呢個位，有機會打爆佢都未定… *深呼吸 *達用力大叫 *碰撞玻璃箱聲效 *劍落地聲效 達：嗱，阿婷，我都話把劍無用架啦。話唔定你之前用嘅石頭仲有效過佢。 盧婷：哥哥，你依家揸劍定揸掃把啊？一啲力都無嘅？ 達：啊妹妹，我識揸筆，揸筷子，揸刀揸叉，係唔識揸劍架啦，得唔得啊？ 盧婷：咁等我嚟啦。 達：你？ 盧婷：作為玄武大帝嘅後人，我哋三族由細到大都會習武。雖然我無安哥哥咁好打，亦無葦哥哥咁精於劍術。不過由細睇佢哋打交打大，唔多唔少都學識到一啲功夫嘅。 達：好，如果你都係打唔爆嗰箱，就麻煩你放返原位啦。 盧婷：哥哥，你企埋一邊，我怕傷到你啊！ 達：好！睇你表演。 盧婷：（讀白）聽爸爸講，玄武大帝離開啞鈴洲之前，就將佢嘅武功傳授比我哋三族嘅後人。所以，我哋由細到大都會學習玄武拳法同劍法。作為細女嘅我雖然好動，不過阿爸就叫我將心機同時間，跟媽媽學醫術。但葦哥哥同安哥哥有時都會偷偷教我。佢哋話力從地起，先紮好個馬步，然後左手伸直，指尖指向想攻擊嘅方向，然後右手揸實劍柄，拉後，再扭腰，用腰身轉動嘅力，帶動劍身直刺向目標！ 達：婷婷…你呢個動作…咁似人地打桌球加掟鏢嘅動作嘅？ 盧婷：呢個動作叫「寸刺」。唔駛助跑，喺瞬間突然加速收縮肌肉而發出短促、剛勁嘅爆發力量，攻擊對手。 達：好…睇你表演啦吓… 盧婷：（深吸一口氣）3,2,1…哈！ *玻璃撞擊聲效 達：車，咪同我一樣，乜反應都無。 *玻璃箱爆破聲效 達：唔…唔係啊嘛… 盧婷：哥哥，頭先唔係無反應，係未有反應啫～ 達：真係咁犀利… 盧婷：你唔好眼瞏瞏啦，快啲拎走嗰印啦！ 達：係！ *警報聲效 盧婷：發生咩事啊？ 達：唔好理咁多啦！快啲走啦！ Zip噏劇場 Game of Eden 第二季 小島篇 第31回 「北帝古劍」 阿攝 飾演 阿達 Crystal 飾演 盧婷 小強 飾演 裘仁 Potter 飾演 凱安 Harry 飾演 裘雪 Cfun 飾演 盧綠 編劇及製作 阿攝 音樂 Beatfriday (thing, BLANKET, Interval, SPEAK, LIKE WHERE) 幫面設計 Followmelikeblack 劇尾歌曲：JFYT《Hands Up》 曲：Laurence 羅藝恆 詞：T-Rexx / Yan Ting 周殷廷 編：JNYBeatz 監：JNYBeatz / Yan Ting 周殷廷 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 46【Zip噏劇場】Game of Eden 第二季 「小島篇」#30《村長選舉（下）》
Zip噏劇場 《Game of Eden》第二季 小島篇 第30回 時間：180年9月11日中午一時 村民大會翌日 地點：封閉區域Area DB Island 北帝廟內 裘仁：綠仔，我已經照你吩咐，經過一日嘅時間，將啞鈴洲附近嘅無人小島上面嘅卡比木同九節木維迪斯葉搜集返嚟啦。 盧綠：麻煩晒你啊…仁叔。呢個數量，應該夠全村人飲用… 裘仁：綠仔，你肯定要咁做？ 盧綠：呢個係唯一嘅方法，令全村人民再次相信玄武大帝… 裘仁：綠仔，我做咗廟祝咁多年，亦同你爸爸情如親兄弟，所以我當你係我嘅仔一樣。你肯定要冒呢一個風險？ 盧綠：仁叔，我以為你同阿雪一樣，都想見玄武大帝一面添。 裘仁：就算比我成為村長，見到玄到大帝，得知呢個世界所有嘅因果關係，咁又如何？ 盧綠：咁，你咪更有能力幫大家趨吉避凶，可以成為啞鈴洲史上最厲害嘅廟祝囉？ 裘仁：廟祝只係我哋裘氏世代相傳嘅職責…咁多年以嚟，就算我點依書直說，幫村民指點迷津，但最後嘅決定，都係由當事人話事。我都分唔到究竟係宿命，定係自由嘅選擇… 盧綠：所以…連仁叔你都唔再相信玄武大帝？ 裘仁：生死有命，富貴由天。我嘅心願就只係想靜靜地喺呢度享受風平浪靜嘅生活。呢條村嘅未來，交比你哋年輕人決定啦。 盧綠：仁叔…多謝你咁多年以嚟咁幫我阿爸… 裘仁：我知你爸爸嘅心願係想你哋三兄妹平平安安。可惜，村民話尋日出去外島搵藥材，都係唔見葦仔嘅蹤影… 盧綠：仁叔，放心。我唔會比大家有事。 裘仁：綠仔，應承仁叔。無論發生咩事，都唔好怨恨阿雪同阿安，知道嗎？ 盧綠：知道啦，仁叔。 時間：同日中午二時 地點：封閉區域Area DB Island 北帝廟外空地 村長選舉開始 *剪藥材聲效 盧綠：（大聲）咁多位村民，我手上就係我哋啞鈴洲村長世代相傳嘅村長日誌，入面記錄咗過去五代村長請示玄武大帝嘅方法。剛才經仁叔驗證，證實上面係我爸爸，亦即係第五代村長嘅真跡。上面提到，只要將卡比木嘅莖剪碎，再將九節木維迪斯葉磨成粉，兩者加水去煲煮，就可以成為靈魂之水。服用之後，就可以同玄武大帝接觸。正如我昨日喺村民大會所講，邊一位村民獲玄武大帝接見，佢就可以成為新一任村長！ *群眾嘩然 凱安：阿雪…阿綠嘅舅父過身之前經常胡言亂語，神志不清，話見到呢個世界以外嘅世界…係咪就係飲咗靈魂之水？ 裘雪：呢一層我都唔係好清楚…因為阿葦同婷婷唔肯多提呢一件事…你諗住點做？你怕唔怕？ 凱安：除咗大凶日之外，我乜嘢都唔怕。 裘雪：係喎，你連嗰個咩玄武大補湯都唔怕，又點會怕呢啲山草藥呢？ 凱安：阿雪，咁你呢？又怕唔怕？ 裘雪：我…只係緊張啫…不過唔係怕會出事…只係一諗到有機會見到玄武大帝…我就… 凱安：到時，你就可以得知呢個世上所有運算嘅方式，一定可以搵到阿葦同婷婷。 裘雪：嗯…希望可以順順利利… *煲藥聲效 盧綠：咁多位，靈魂之水已經完成。份量足夠全村村民飲用。邊一位想同玄武大帝接觸，邊一位想成為村長嘅，就請上前！ 裘雪：（讀白）當阿綠講完呢一句說話，所有村民無即時上前，反而選擇企喺現場，之後就開始同身邊嗰個交頭接耳。我都好明白佢哋嘅心情，一嚟啞鈴洲從來無呢個傳統，對佢哋嚟講係一個好大嘅突破；二嚟如果飲咗之後，真係見到玄武大帝，真係成為村長，承唔承受得起呢份重擔，帶領村民呢？所以，過咗一刻鐘嘅時間，都無人夠膽行上前挑戰…直到… 凱安：咁多位村民，我係凱氏接班人凱安。我知道村長之位一直都係由盧氏家族負責。而過去180年嚟由盧氏五位村長帶領之下，我哋都安居樂業。不過，大凶日之後，一切都唔同晒。我凱安係度承諾，如果真係成為村長，我會盡力保護啞鈴洲嘅安全，以及善用凱氏水戰嘅能力，令九頭海蛇永遠消失！大凶日從此成為歷史！ *飲水聲效 裘雪：（讀白）阿安成為第一個飲靈魂之水嘅人之後，村民交頭接耳嘅聲音更多。而多數都係以下幾種想法 村民甲：盧氏做咗咁多年村長，唔係差，亦唔係好好！如果我做，我好有信心一定會更好！我會同玄武大帝反映所有疾苦！ 村民乙：飲下啫，駛死咩！如果成功嘅，同玄武大帝傾下計都好啊！至於做村長…做唔掂嘅，咪比返盧綠做囉。一於試飲！ 村民丙：其實依家都幾太平啊…玄武大帝都托盧綠向我哋講咗以後唔會再有大凶日…應該無事嘅…多一事不如少一事…都係唔飲啦… 村民丁：我咩都唔識架，但有得飲咪飲囉～ 裘雪：至於我… 凱安：阿雪，你仲猶豫啲乜？ 裘雪：（扮微笑）我諗緊如果我做咗村長，會安排咩工作比你咋！ *飲水聲效 盧綠：玄武大帝！啞鈴洲所有村民希望有所改變。我，第六任村長盧綠斗膽向你請示，連埋我有70位村民飲咗靈魂之水！希望你顯靈！選出新一任村長！帶領我哋啞鈴洲邁向更好嘅未來！ 裘雪：阿安…靈魂之水好似仲難飲過你嘅玄武大補湯… 凱安：（想嘔）阿綠…你呢啲係咩草藥…點解咁辛苦…你…係咪… 裘雪：阿安！你無事啊嘛！ 凱安：（辛苦）水…比水我…（嘔聲效） 裘雪：阿安！ 盧綠：大家唔駛擔心，每位村長第一次飲靈魂之水，都會出現發熱、頭暈同少少嘔吐嘅跡象。 村民乙：但我無反應…係咪即係我無被選中啊？ 村民甲：玄武大帝！你終於顯靈啦！ 裘雪：你…真係見到玄武大帝？ 村民丙：你唔覺得天上飄緊嚿雲好似玄武大帝咩？ 裘雪：阿綠！究竟你比咗咩我哋飲！呢個所謂靈魂之水係咪你亂作嘅方法！？ 凱安：（辛苦）阿綠…你…出嚟…同我打返一場…邊個贏咗…就可以做村長… 裘雪：阿綠！你夠啦！快啲比解藥大家飲！ 盧綠：大家稍安勿躁！玄武大帝即將顯靈！ *暴風聲效 裘雪：雖然今日係二十四節氣嘅白露，會有少少涼意，但剛才咁好天，點解突然間會風雲變色嘅？ 盧綠：玄武大帝！請你選出新嘅村長！ *電腦運算聲效 k DB Island：盧綠，你叫你安撫村民，你竟然比所有村民飲靈魂之水？ 盧綠：玄武大帝！多謝你接見我地！盧綠不才，未能得到村民信任，請你選出新嘅村長！ K DB Island: 盧綠，你究竟做緊乜野？ 凱安：（辛苦）阿綠…你究竟同緊邊個講野…？ 盧綠：各位，玄武大帝已經出現係我哋頭頂嘅天空度！被選中嘅人就可以見到！ K DB Island：盧綠，你再亂嚟，我就會動用我嘅能力！ 盧綠：各位，聽我講！大家睇唔到，就係因為玄武大帝希望我繼續成為村長！ 裘雪：阿綠！我哋咁多人飲完，得你一個見到，你依家講咩都得架啦！ 盧綠：玄武大帝，村民並唔信任你選中嘅我。所以，希望你能夠顯靈，令所有村民信服！ K DB Island：盧綠，你知道根本無玄武大帝，我係無可能顯靈！究竟你想點？ 盧綠：玄武大帝你無需現身！你只要用雷，擊向我所指嘅嗰棵樹！就可以證明我係你選中之人！ K DB island：盧綠！你認真？呢個就係你嘅計劃？ 盧綠：玄武大帝！請你相信我，用雷擊向北帝廟外棵樹！ 凱安：（辛苦）阿雪…阿綠佢係咪傻咗？ 裘雪：阿綠！夠啦！唔駛再做戲啦！ 盧綠：玄武大帝！請你相信我盧綠！用雷擊向北帝廟外棵樹！證明我係村長人選！ K DB Island：盧綠，我如你所願，但希望你可以順利收拾殘局。 *雷擊聲效 *雷劈中樹聲效 *燃燒聲效 裘雪：真係無端端有度雷…劈中阿綠所指嘅樹？無可能架… 凱安：（辛苦）唔通…真係玄武大帝顯靈… 盧綠：多謝玄武大帝顯靈。 K DB Island：盧綠，希望你唔好令我失望… *消失聲效 *太陽出現聲效 裘雪：突然間…又回復風和日麗… 盧綠：咁多位村民，你哋依家相信我所講嘅說話啦。 凱安：我凱安願賭服輸…我哋凱氏會支持盧氏繼續成為村長… 盧綠：阿雪，你哋裘氏呢？ 裘雪：我哋裘氏…. *爆炸聲效 裘仁：綠仔！北帝廟入面發生爆炸！ Zip噏劇場 《Game of Eden》第二季 小島篇 第30回 「村長選舉（下）」 阿攝 飾演 旁白 小強 飾演 裘仁 Potter 飾演 凱安 Harry 飾演 裘雪 Cfun 飾演 盧綠 Alton 飾演 K DB Island 阿化、天頤、梓豪、Cheryl 飾演 村民甲、乙、丙、丁 編劇及製作 阿攝 音樂 BEAT FRIDAY (Giant,Dong, Rain or Shine, Half, Kaji, thing) 封面設計 Followmelikeblack 劇尾歌曲：Kendy Suen 《◯》 作曲：Lesta Cheng 作詞：Pun Jerry 編曲：鍾楚翹CHOR 監製：王雙駿 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 45【Zip噏劇場】Game of Eden 第二季 「小島篇」#29《村長選舉（中）》
Zip噏劇場 《Game of Eden》第二季 小島篇 第29回 時間：180年9月10日早上11時，即村民大會前2小時 地點：封閉區域Area DB Island 東堤，凱安家中 *敲門聲效 *開門聲效 凱安：阿雪，你嚟得係時候啦，因為我啱啱煲好咗湯！ 裘雪：又係嗰款大補湯啊？ 凱安：唔係嗰款大補湯！係玄武補身湯！我用咗靈龜同海蛇燉足3日架！ 裘雪：但你知我嗰答案架… 凱安：當年玄武大帝騎住龜蛇神獸，決戰深海嘅九頭海蛇，成功將佢封印，我哋一族先可以平安活到今日。嚟啦，為咗今日，同我飲咗佢。 裘雪：雖然蛇可以驅風去濕同舒筋活絡，而龜係滋陰補腎同健骨，但你唔係真係認為飲咗可以得到玄武大帝嘅能力嘛？ 凱安：飲咗未必有，但唔飲就定無。點解唔去嘗試一下。 裘雪：所以，一陣間你真係會挑戰阿綠村長之位？ 凱安：錯啦，唔係挑戰，而係搵出真相。你哋一族不斷占天觀星，唔係都係想求真咩？ 裘雪：咁…你想智取定武奪？ 凱安：我用邊一種方法會得到你支持嘅，我就揀嗰種。 裘雪：但無論邊一種方法，都會動搖到呢180年嚟啞鈴洲嘅傳統同根基… 凱安：咁好簡單啫，只要玄武大帝顯靈，就可以安撫民心。我唔係嚮往做村長，而只係呢個係全村唯一嘅方法。 裘雪：如果武鬥，你知成條村得阿葦可以同你一戰，以阿綠嘅實力一定輸比你… 凱安：我知。所以如果用武鬥，就會被其他村民話我勝之不武。當我成為村長，都只會產生更多嘅風波。 裘雪：所以，你選擇智取？ 凱安：唔係我一個人嘅智力，而係全個啞鈴洲村民嘅智慧。我相信大家會為啞鈴洲選取一個更合適嘅未來。 裘雪：即係…你想喺村民大會動議全民投票，選出村長？ 凱安：盧氏、凱氏、裘氏家族每族都有百多人，如果你可以說服到裘氏嘅族人，我同你就可以求得真相。 裘雪：但咁做…有機會分化村民… 凱安：我哋都係為咗啞鈴洲嘅未來，我相信可以做到和而不同。 裘雪：咁樣會唔會太過理想主義呢… 凱安：咁，我唯有武奪啦。 裘雪：你知我最唔想見到呢個結果架… 凱安：我知。咁…你有冇更好嘅方法？更重要係你嗰心點諗。 裘雪：阿安，放心。當阿綠請示完玄武大帝，開村民大會嘅時候，我就會比我呢一族嘅答案大家。 凱安：咁…阿雪…你應承我，就算一陣發生咩事都好，我、你同阿綠都係一世嘅朋友。 裘雪：得啦，你呢啲咁肉麻嘅說話，仲難頂過碗大補湯啊。 裘雪：（讀白）我地裘氏一族承繼千里眼嘅能力，多年以嚟都依山而居。因為山勢高，係遠觀北帝星最佳位置。我哋因為玄武大帝會再次回歸呢一句說話，180年嚟不斷觀察同研究星像，希望推算佢回歸之日。雖然日子未確實推斷到，不過，我哋就觀察到大自然嘅變化，例如月嘅陰晴圓缺、潮汐嘅漲退、一年二十四節氣更替等等。所以，順理成章，我哋裘氏一族就成為廟祝打理北帝廟，同時幫村民推算各種吉日。而我哋靠嘅就係不斷嘅觀察、統計同推算。可惜，我哋算咗180年，不但算唔到玄武大帝何時回歸，亦算唔到大凶日嘅嚟臨…如果可以比我見到玄武大帝…我真係想佢傳授呢個世界所有嘅公式…不過我知未必有呢個機會…希望阿綠可以比一個好嘅答案我哋… 時間：180年9月10日中午1時 地點：封閉區域Area DB Island 北帝廟外，村民大會開始 *推門聲效 眾村民：村長出嚟啦！ 盧綠：各位村民！剛才我請示完玄武大帝，佢託我同大家講，生活一切如常！大家唔駛擔心！ 裘雪：阿綠，咁你頭先點解大嗌？ 盧綠：頭先…因為玄武大帝同我講咗大凶日嘅原因… 眾村民：吓！？ 盧綠：玄武大帝話九頭海蛇想衝破封印，黑暗嘅妖邪之氣籠罩整個區域。不過，佢已經處理好啦！ 凱安：阿綠，咁你話我知九頭海蛇封印喺邊一個位置！我去檢查一下。 盧綠：阿安，唔駛你操心。 凱安：阿綠，得你一個可以同玄武大帝溝通，得你一個知發生咩事。但大凶日之後，點解玄武大帝唔現身，令村民安心呢？ 盧綠：阿安，玄武大帝佢真係會回歸架 裘雪：咁佢有無講幾時回歸？ 盧綠：確實日子… 凱安：咁不如等我同阿雪，代表凱氏同裘氏去同玄武大帝接觸啊？ 盧綠：但係…呢180年嚟…只係得村長可以… 凱安：咁，就趁所有村民係度，重新選過村長啦。 盧綠：阿安你！阿雪…你出句聲啊！ 裘雪：阿綠，唔好意思，我讚成阿安嘅提議。 盧綠：連阿雪你都咁講！即係連你都唔信我呢位村長啫！ 裘雪：我唔係唔信你…只係…大凶日之後，我唔知應該信邊一個啊… 盧綠：信玄武大帝囉！ 裘雪：咁請你叫佢現身！令我哋可以繼續喺度生活落去啦！ 盧綠：阿雪，我都話玄武大帝會回歸，只不過… 裘雪：阿綠…我哋裘氏只係要一個確實日子，希望你哋盧氏明白… 凱安：阿綠，我哋凱氏都希望你哋盧氏明白。 盧綠：即係你哋依家要推翻我呢位村長啦？ 凱安：唔係推翻，而係三大族所有村民都希望得到真相，而真相唔應該得村長知道。 盧綠：咁你依家想點啊？想捉住我定係想殺咗我，然後成為村長啊？ 裘雪：阿綠，你冷靜少少先。 凱安：阿綠，我哋從來都無諗過要傷害你。我哋只係想用一個理性嘅方法，令所有村民安心同信服。 盧綠：呢180年嚟，一直都係我哋盧氏接任村長之位，呢個就係最安心嘅方法。 凱安：你到依家都唔明，大凶日之後一切都改變晒啦！唔係你一句，就可以決定全村人嘅命運！ 盧綠：係你哋唔明白，嗰句唔係我講，而係玄武大帝指定要我哋盧氏承繼村長之位。我哋三大族各有崗位，係神嘅旨意。 凱安：係神嘅旨意，定係你借神之名落嘅旨意啊？ 盧綠：阿安，你質疑我唔緊要…你唔好質疑呢180年嘅傳統同安排！ 裘雪：阿綠，你由細到大都以村民嘅福祉為依歸呢個理念去學做村長…點解依家你會咁固執呢？ 盧綠：我唔係固執！而真係為大家著想！相信我！啞鈴洲唔會發生任何事！會同以前一樣風調雨順，洲泰民安！ 凱安：阿綠，咁你唔好怪我唔客氣啦！ 盧綠：阿安！你想點啊！ 裘雪：阿安，你唔係諗住… 凱安：放心，我好冷靜，我哋成個凱氏都好冷靜。所以，我都希望所有村民冷靜，去諗清楚啞鈴洲嘅未來！我動議所有村民投票，一齊決定啞鈴洲嘅未來！ 裘雪：阿綠，呢一刻，呢個方法係最好，希望你明白… 盧綠：咁如果…就算你哋成為村長…都唔可以同玄武大帝接觸…得我哋盧氏接班人可以呢…？ 凱安：阿綠…又係你話得村長可以同玄武大帝溝通，你依家又話得盧氏先有呢個資格…你仲唔係借玄武大帝之名去亂下旨意？就憑你呢一句，你無資格做村長！無資格去打理啞鈴洲！ 盧綠：（深吸一口氣）其實大家都係想見玄武大帝一面…由佢去安撫大家啫…係咪？既然係咁，不如我公開請示玄武大帝嘅方法，比每一個村民都可以有機會接觸玄武大帝，邊個成功嘅，邊個就係新一任村長！你哋有冇異議？ Zip噏劇場 《Game of Eden》第二季 小島篇 第29回 「村長選舉（中）」 阿攝 飾演 旁白 Potter 飾演 凱安 Harry 飾演 裘雪 Cfun 飾演 盧綠 編劇及製作 阿攝 音樂 BEAT FRIDAY (Giant、ROUND AND ROUND、UNDER THE RAIN、EXTENSION、BAD END、OTHER LOVE) 封面設計 Followmelikeblack 歌：達明一派《天問》 作曲：劉以達 作詞：周耀輝 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 44【Zip噏劇場】Game of Eden 第二季 「小島篇」#28《村長選舉（上）》
Zip噏劇場 《Game of Eden》第二季 小島篇 第28回 時間：180年9月7日中午1時，即盧綠爸爸喪禮前3小時 地點：封閉區域Area DB Island 啞鈴洲東堤海岸深水區域 凱安：（讀白）上次嘅紀錄係三份一刻嘅時間，徒手潛咗100米。依家正值潮退，應該可以潛到去更深嘅位置。 3,2,1 *吸氣聲效 *落水聲效 凱安：（讀白）我姓凱，單字一個安。阿爸話凱呢個姓，取自凱旋回歸嘅凱，亦係紀念玄武大帝當時成功封印九頭海蛇嘅勝利。凱亦同海洋嘅海同音，阿爸改我個名做凱安，係希望大海平安，咁我哋啞鈴洲三大族就可以平平安安咁生活。但自從大凶日發生之後，喺我哋心底嘅質疑又再出現…究竟玄武大帝幾時會回歸？九頭海蛇被封印咗係邊個位置？仲有冇未被殺害嘅盧亭喺海入面生活呢？ 阿爺話海比啞鈴洲更大更廣闊，如果當時無九頭海蛇嘅出現，我哋又會生活成點呢？所以，我哋一族不斷鍛鍊潛水技術，就係希望搵到相關嘅證據。 而我今日狀態唔錯，應該可以突破到110米嘅紀錄。 *水流聲效 凱安：（讀白）有野游緊埋嚟！會唔會係？ *水流聲效 凱安：（讀白）原來只係普通嘅海鯊。今日就放過你。 *水流聲效 凱安：（讀白）保持平靜嘅吸呼吸，慢慢潛入更嘅位置…115,116,117,118,119,120！ 成功！我成功破咗家族紀錄，徒手潛到120米深嘅位置啦！ *上水聲效 *海浪聲效 裘雪：大凶日之後，個個都心慌慌，係得你先會咁有雅興練潛水。 凱安：阿雪，唔好意思，要你等咁耐。 裘雪：點啊，我整嘅琉璃潛水鏡有冇用？ 凱安：如果透光度可以再提高就更好。 裘雪：比埋我對千里眼你好唔好？ 凱安：咁就快啲將你嗰妹嫁比我，等我哋生嗰千里眼順風耳嘅混合體。 裘雪：你叫我嚟唔係提親啊嘛？ 凱安：我叫你嚟係想問你意見。你諗成點？ 裘雪：上一任村長今日設靈，唔好講呢啲野住啦。 凱安：仲等？咁你答我啊，你計到玄武大帝幾時回歸未啊？ 裘雪：如果祖先無記錄錯，下個月嘅月中，就係呢3個甲子年以嚟，北帝星最近我哋嘅日子，我相信玄武大帝就會回歸。 凱安：相信相信，我都想相信啊！我相信我會搵到九頭海蛇，我相信仲有未死同未進化嘅盧亭喺海入面啊。依家呢？出現大凶日，上一任村長都死埋，全個啞鈴洲得阿綠有資格同玄武大帝溝通，得佢知發生咩事咋！ 裘雪：阿安，冷靜啲。你啱啱潛到咁深嘅水域，不宜動氣。 凱安：我嘅身體唔駛你操心。 裘雪：婷婷失蹤，阿葦又唔知去咗邊。我唔想連你都出事…應承我…今日千祈唔好提任何事，比阿綠嘅爸爸安心上路…可以嗎？ 凱安：好…咁你都應承我，過埋儀式就比答案我。 時間：同日傍晚6點 地點：封閉區域Area DB Island 啞鈴洲北帝廟對出空地 廟祝：一鞠躬，二鞠躬，家屬謝禮。 凱安：阿綠，節衰順變。呢啲係我哋喺深海搵到嘅珍珠，小小心意。 盧綠：有心啦…阿安… 裘雪：阿綠，我計過你爸爸嘅八字，照道理應該 … 凱安：阿雪！村長離開咗我哋，呢個時候仲講呢啲有用咩？ 裘雪：阿綠…對唔住…節衰順變… 盧綠：阿安…阿雪…多謝你哋…完埋聽朝嘅火化儀式…我會盡快開村民大會架啦。 凱安：阿綠，我知你係一個好盡責嘅村長，有咩需要幫忙，即管開聲。 盧綠：多謝你哋… 時間：180年9月8日早上6點 地點：封閉區域Area DB Island 啞鈴洲海灘 盧綠：（讀白）我哋啞鈴洲世代相傳嘅殯葬儀式好簡單。首先會喺北帝廟外設靈，比在世嘅親朋見死者最後一面，同時答謝玄武大帝賜予我哋豐富嘅一生。到咗第二日，就會由裘氏家族嘅廟祝擇吉時，進行火化儀式。 廟祝：吉時到啦。揚凡出海。第五代村長，安心回歸玄武大帝嘅懷抱！ *揚凡聲效 廟祝：阿綠。弓箭準備好啦。 盧綠：唔該晒… *拉弓射箭聲效 *燃燒聲效 盧綠：（讀白）塵歸塵土歸土。我哋由深海嘅盧亭進化而成。大海係我哋第一個家。所以，死者嘅遺體會放喺一隻木製嘅小船，然後揚凡出海，任由風飄到大海嘅盡頭，希望回歸我哋第一個家。而我哋嘅靈魂係由玄武大帝所賜予嘅，所以我哋會用點咗火嘅箭，射向木船，任由遺體燃燒，希望靈魂可以返到玄武大帝嘅身邊… 盧媽媽：（悲傷）綠仔…你爸爸嘅靈魂可以返到玄武大帝身邊架呵？ 盧綠：（少許猶豫）會…一定會… 盧媽媽：（悲傷）老公，你有時間就報夢話比我知，你喺上面過成點！捉棋有冇贏到玄武大帝！同埋唔駛擔心我哋。我會好好照顧三個囝女架啦！ 盧綠：（讀白）見到阿媽喊得咁傷心…我真係唔知點安慰佢…因為…我尋晚完全無瞓到…喺火化儀式前仲飲咗靈魂之水添…所以，眼前嘅世界全部變成墨綠色嘅細點…所有村民都係有三隻顏色…最外層係墨綠色，中間嗰層係灰色，而最入面就各有不同嘅顏色…而阿爸嘅遺體…就得返最外層嘅墨綠色同灰色…無咗最入面嘅顏色…咁即係代表…阿爸已經無咗靈魂…得返軀殼…望住阿爸逐步逐步被火化…燃燒出嚟嘅只係普通嘅煙…飄到半空就消失咗…咩靈魂回歸北帝嘅懷抱…一切都係大話！所有所有都只係嗰個盧零虛構出嚟…但係…我唔可以同阿媽…仲有村民講出真相…阿爸！我應該點做啊！ *燃燒聲效 時間：三日後，村民大會前半小時 地點：北帝廟內 *數據傳輸聲效 K DB Island: 盧綠，接受現實，節哀順變。 盧綠：阿雪佢早幾日同我講…話阿爸嘅命相…係唔應該咁早死架… K DB Island：理論上係，但之前程式出錯，所以計算亦有所偏差。但正如我之前所講，一切回復正常。 盧綠：正常？咁你話我知阿葦係邊！仲有婷婷係邊啊！同埋所有村民嘅命係點啊？ K DB Island：村民嘅命數，借用你哋嘅語言，係天機，不可洩漏比你知。不過你細佬同妹嘅位置，請你稍等。 *計算聲效 K DB Island：盧葦出咗海，位置係啞鈴洲北面海域。至於盧婷，佢依家唔喺啞鈴洲。準確嚟講，佢唔喺呢個Area DB Island。 盧綠：咩叫唔喺呢度啊？你講緊乜野啊？ K DB Island：佢已經唔喺我職權範圍內嘅位置。對唔住，我愛莫能助。 盧綠：咁你叫職權更大嘅人嚟答我嘅！ K DB Island：對唔住，我程式入面無呢個指令。 盧錄：大凶日你又幫唔到手！村民死你又幫唔到手，依家要你搵婷婷係邊你又幫唔到手！你呢個神有咩用啊！ K DB Island：容許我重伸一次，我唔係神，我只係負責管理呢個區域嘅程式。 盧綠：（發怒）啊！ *掃跌物品聲效 K DB Island：盧綠。莫生氣，你依家要做嘅係安撫村民嘅心靈。希望你可以做得到。 *消失聲效 *盧綠深吸一口氣 *推門聲效 眾村民：村長出嚟啦！ 盧綠：各位村民！剛才我請示完玄武大帝，佢託我同大家講，生活一切如常！大家唔駛擔心！ 裘雪：阿綠，咁你頭先點解大嗌？ 盧綠：頭先…因為玄武大帝同我講咗大凶日嘅原因… 眾村民：吓！？ 盧綠：玄武大帝話九頭海蛇想衝破封印，黑暗嘅妖邪之氣籠罩整個區域。不過，佢已經處理好啦！ 凱安：阿綠，咁你話我知九頭海蛇封印喺邊一個位置！我去檢查一下。 盧綠：阿安，唔駛你操心。 凱安：阿綠，得你一個可以同玄武大帝溝通，得你一個知發生咩事。但大凶日之後，點解玄武大帝唔現身，令村民安心呢？ 盧綠：阿安，玄武大帝佢真係會回歸架 裘雪：咁佢有無講幾時回歸？ 盧綠：確實日子… 凱安：咁不如等我同阿雪，代表凱氏同裘氏去同玄武大帝接觸啊？ 盧綠：但係…呢180年嚟…只係得村長可以… 凱安：咁，就趁所有全民係度，重新選過村長啦。 盧綠：阿安你！阿雪！ 裘雪：阿綠，唔好意思，我讚成阿安嘅提議。 Zip噏劇場 《Game of Eden》第二季 小島篇 第28回 「村長選舉（上）」 阿攝 飾演 旁白 Potter 飾演 凱安 Harry 飾演 裘雪 阿德 飾演 廟祝 Cfun 飾演 盧綠 Gas 飾演 盧媽媽 Alton 飾演 人工智能 K DB Island 編劇及製作 阿攝 音樂 BEAT FRIDAY （BEFORE DAWN、Moonset、Dong、Other Love、Kaji、EXTENSION) 封面設計 Followmelikeblack 歌：陳蕾《沙門》 曲：陳蕾 詞：陳蕾 編：Mike Orange 監：Mike Orange / 陳蕾 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 43【Zip噏劇場】Game of Eden 第二季 「小島篇」#27《命之道》
Zip噏劇場 《Game of Eden》第二季 小島篇 第27回 今敏：（讀白）當同盧零傾好晒Area DB Island 嘅設定之後，我就開始著手將佢嘅想法實現出嚟 - 古代漁村文化同生活，而我哋討論咗好耐嘅嗰一位神明，就選擇咗道教嘅神明玄武大帝。Zero話會選擇佢嘅原因，係因為細細個喺啞鈴洲長大嘅佢，對北帝廟有好深印象，每年嘅太平清礁係佢細個好期待嘅節日。我參照現實世界啞鈴洲喺清朝1783年所建成嘅北帝廟外貌去創作Area DB Island 嘅北帝廟。而之前向Zero 所提到嘅魚樣人身嘅盧亭生物，其實就係參照東晉時期一直流傳嘅民間傳說。經過幾個月嘅時間，Area DB Island 就正式運作，喺入面嘅時間線就同Game of Eden 嘅時間一樣，而Fish 喺Game of Eden 嘅NC40年1月1日，即係現實世界嘅2062年1月1日完成π先生嘅任務之後，就進入Area DB Island 同Zero 團聚。一個星期之後，我就將Zero 提交名單上面嘅人物一一製造咗嚟。有一件事Zero 係唔知道，就係π先生對於Area DB Island 有另一個盤算，佢希望借嘅個封閉區域去測試容博士嘅基因實驗。究竟以容博士對人類基因嘅了解同研究，放入遊戲入面有冇可能模擬到同現實世界人類嘅情況呢？所以，我同Zero 提議修改少少設定，由玄武大帝將所有魚樣人身嘅盧亭變為人類喺陸地生活，改為盧零嘅盧姓一族承繼玄武大帝嘅能力，順理成章係村長人選。記者 Snow嘅裘姓一族就承繼玄武大帝手下千里眼嘅能力，666組織前組長 N 嘅凱姓一族就承繼另一位手下順風耳嘅能力。我向Zero 解釋分三大家族係為咗避免同性同族婚姻同相交，Zero 亦都同意。而Area DB Island 嘅三大族經歷過5代人嘅試驗，兼人工智能K DB island 嘅協助，一切運作正常，直到現實世界2202年，即係Game of Eden NC 180年，亦即係 Area DB Island 嘅 180年8月31日，server reboot 嘅嗰一日，Area DB Island 出現少少錯誤… *數據傳輸聲效 K DB Island : 第6任村長盧綠，你仲有無野想問？ 盧綠：呢一刻我好亂，你比少少時間我消化下先… K DB Island : 放心，呢一個區域一切運作如常，唔會再出現死機情況。 盧綠：但係你想我點向啲村民解釋啊？ K DB Island : 你只要同佢哋講，你接受到玄武大帝嘅神喻以及保證，村民嘅生活會依舊太平。 盧綠：但你知唔知裘氏家族咁多年日以繼夜夜以繼日咁觀星，就係計算星體運行，去推斷玄武大帝幾時再降臨。仲有，凱氏家族不斷去搵海怪被封印嘅證據！即係話佢哋心底裡面都質疑緊你口中嘅玄武大帝啊！ K DB Island : 放心，佢哋無可能搵到任何端倪，因為一切只係虛構，並不存在。 盧綠：但經歷埋今次黑暗嘅怪異現象，你覺得仲有可能釋除到佢哋心目嘅疑咩？ K DB Island : 呢個就係你作為村長嘅責任，以神之明，去令所有村民身心都得到平安。 盧綠：你講就容易！ K DB Island : 盧綠，你要記住平安是寶藏，但得到寶藏係需要代價。 *消失聲效 盧綠：但係我…喂！喂！ *拍門聲效 盧媽媽：（門外大叫）綠仔！綠仔！開門啊！ *開門聲效 盧綠：阿媽？咩事啊！ 盧媽媽：綠囝，你係咪同緊玄武大帝溝通緊啊？ 盧綠：係啊…媽…啱啱請示咗玄武大帝… 盧媽媽：咁可能真係玄武大帝顯靈！你阿爸佢…醒返啦！ 盧綠：真…真係嘅！ 盧媽媽：唔好理咁多野住！快啲返去睇你爸爸啦！ *咳聲效 盧綠：阿爸，不如你再休息一下，有咩事聽朝起身先講啊！ 盧爸爸：你係咪已經同咗玄武大帝溝通，乜都知道晒啦？ 盧綠：嗯… 盧爸爸：我仲好記得我第一次飲靈魂之水，見到佢之後，我傻笑咗好耐… 盧綠：阿爸你心理質素真係好，我頭先就真係完全笑唔出… 盧爸爸：我笑係因為我完全唔知比咩反應，然後諗返百幾年我哋咁多位村長咁辛苦咁仆心仆命，一切到頭來只係一場遊戲，大話，同埋笑話。 盧綠：咁點解你唔同村民講出真相啊？ 盧爸爸：善良嘅謊言同赤裸嘅真相，我揀咗前者…我以為繼續落去，一切都會相安無事。但紙始終都包唔住火。 盧綠：你係咪講緊舅父啊…？ 盧爸爸：嗯…有一次佢偷睇到我製作靈魂之水嘅方法，仲偷偷地去搵製作嘅材料。我以為只有村長飲完先有反應，點知…佢都睇到我哋睇到嘅野。 盧綠：你意思係理論上只有村長飲先有效？ 盧爸爸：無錯…但係我唔知係意外…定呢個區域嘅創作者同我哋開緊玩笑…總之…舅父被玄武大帝懲罰…我都有好大責任… 盧綠：都唔關你事！係玄武大帝！啊…唔係…喺嗰個咩人工智能…仲有盧零嘅錯！ 盧爸爸：點都好啦…我哋只係呢個遊戲嘅棋…只可以盡返棋嘅職責…（咳） 盧綠：阿爸你無事啊嘛？ 盧爸爸：時間無多…綠仔…你要記住，你係大哥，你嘅職責就係要保護阿葦同阿婷婷… 盧綠：但你知阿葦同舅父一樣架！仲有婷婷佢…失咗蹤…我…我真係唔知點做好啊！ 盧爸爸：你呢幾日再去請示多一次，叫嗰個人工智能唔好比阿葦重蹈你舅父嘅覆轍，仲有叫佢提供婷婷所在嘅位置…我呢一刻唔求啲咩…只係求你哋三個平安無事… 盧綠：阿爸你唔好講到你好似就係死咁先得架！ 盧爸爸：綠仔…一切都係計算，一切都係已經安排好晒…雖然好唔甘心，但係我哋只可以盡力去做…但求問心無愧…（咳） 盧綠：阿爸，你不如休息下先啦！ 盧爸爸：綠仔，應承阿爸，要保護阿葦同婷婷啊！（越咳越大聲） 盧綠：阿爸！阿爸！阿媽！阿爸佢又再昏迷咗啊！ *悲哀音樂 盧綠：（讀白）阿爸佢過幾日就走咗…阿媽話佢嗰晚應該係太擔心我哋，所以迴光返照，一口氣交待晒啲身後事…村民稱8月31號為大凶日，而我阿爸又好快咁過咗身，一定係玄武大帝懲罰我哋…而身為村長嘅我，呢一刻就要先處理咗阿爸嘅身後事，接住就係村民大會。 而喺阿爸喪禮嗰日，佢哋兩個都嚟咗… 凱安：阿綠，節衰順變。呢啲係我哋喺深海搵到嘅珍珠，小小心意。 盧綠：（讀白）佢叫凱安，係凱氏一族嘅接班人。凱氏一家百幾年嚟都住係啞鈴洲嘅東邊，非常熟悉水性，潛水能力同打鬥嘅能力非常之高。 裘雪：阿綠，我計過你爸爸嘅八字，照道理應該 … 盧綠：（讀白）佢係裘雪，係裘氏一族嘅接班人。裘氏一家百幾年嚟都住係山上面，愛好觀星，研究天文術數。 凱安：阿雪！村長離開咗我哋，呢個時候仲講呢啲有用咩？ 裘雪：阿綠…對唔住…節衰順變… 盧綠：（讀白）啞鈴洲嘅和平…亦隨住大凶日之後，出現咗大嘅變化… Zip噏劇場 《Game of Eden》第二季 小島篇 第27回 「命之道」 Ant 飾演 程式員 今敏 Cfun 飾演 盧綠 Alton 飾演 人工智能 K DB Island 阿信 飾演 第5任村長 盧爸爸 Gas 飾演 盧媽媽 Potter 飾演 凱安 Harry 飾演 裘雪 編劇及製作 阿攝 音樂 BEAT FRIDAY （Fifth、Interval、SOMEWHERE、Dong、Bad End) 封面設計 Followmelikeblack 歌：The Hertz《命之道》 作詞：Him Hui @ The Hertz 作曲：The Hertz 編曲: The Hertz 監製: 蘇道哲 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 42【Zip噏劇場】Game of Eden 第二季 「小島篇」#26《盧零開始的新世界》
Zip噏劇場 《Game of Eden》第二季 小島篇 第26回 今敏：（唔耐煩）Zero...你呢個啞鈴洲係點嚟？你諗住點同你嘅後人解釋？仲有，呢個世界有無造物主？即係有無神存在？ 盧零：你比多少少時間我諗下先啦... 今敏：（唔耐煩，語速再加快）Zero...你呢個啞鈴洲係點嚟？你諗住點同你嘅後人解釋？仲有，呢個世界有無造物主？即係有無神存在？ 盧零：都話比多少少時間我諗下囉... 今敏：我比咗好耐時間你諗啦！都係個句，你唔會老，但我會啊！ 盧零：好啦！我有答案啦！呢個啞鈴洲一直存在！呢個世界無神！我會咁同喺呢個Area DB Island嘅後人解釋！ 今敏：你諗咁耐，就只係比到呢個答案我？ 盧零：係你話架嘛，666組織成員只係冷血嘅殺手同特務。呢啲神學嘅問題根本同我嘅工作無關！ 今敏：但你本身無信仰架咩？ 盧零：我地所有成員嘅信仰就係π先生... 今敏：你講真架？ 盧零：梗係唔係啦！我都相信有神嘅。 *電子聲效 *傳送門聲效 今敏：嗱，呢度有佛祖、玉皇大帝、宙斯、奧汀、仲有天 盧零：（打斷）Sorry今敏，我相信嘅神唔係現存嘅宗教，我只係認為有一個造物主製造呢個宇宙...就係咁簡單 今敏：算啦算啦，再咁傾落去都無乜結果...等我「協助」下你啦... *電子儀器聲效 *暴雨及雷暴聲效 *地裂聲效 盧零：做...做咩事... 今敏：諗住比你體驗一下元祖嘅神明力量啫～ *火山爆發聲效 *海嘯聲效 盧零：（讀白）今敏同之前一樣，又隨手撳咗幾個掣，然後又整出各式各樣嘅大自然現象出嚟...雖然我知道自己只係存在喺Game Of Eden嘅意識，但係...都被眼前嘅火山爆發、海嘯、地裂同狂風暴雨所嚇到... 今敏：無錯！我就係要你呢個驚惶失措、目定口呆嘅樣！感唔感受到神嘅威力呢～ 盧零：你係想講你嘅威力...定大自然嘅威力先... 今敏：答案係Both！最早期嘅原始人類無你咁高智慧，佢地只會覺得係好驚，然後就求天唔好落暴雨，火山唔好爆發，地唔會裂以及唔會有海嘯。所以，佢地就會開始敬拜天地。 盧零：但之後嘅人都知道呢個係大自然嘅現像。 今敏：知還知，但都會怕。所以就會有一系列嘅神出現，例如天神、雨神、雷神、海神、死神等等。 盧零：所以，我都可以咁同Area DB Island嘅後人講因為有呢一班神，所以就會有各種現像。 今敏：Zero，睇嚟你仲未明白因果嘅關係。 盧零：落雨係果，雨神係因，唔啱咩？ 今敏：恐懼暴雨係因，所以雨神係果。 盧零：你越講我越唔明... 今敏：古人因為懼怕大自然嘅力量，所以用「神」去解釋一切。因為當時佢地未有科學概念。 盧零：咁就簡單啦，我同Area DB Island嘅後人用科學解釋一切咪得囉。 今敏：但你知呢個封閉區域嘅一切，都係你設計同我控制。 盧零：咁我唔講，你唔現身，佢地一定唔會知架。 今敏：你唔係唔記得咗你之前話想維持現實世界嘅物理同生物設定吓嘛。 盧零：我無唔記得... 今敏：所以，正如現世人類文明一樣，當滿足到生物邏輯層，就會到文化層同價值層。即係滿足到生存嘅基本條件，佢地就會追求更高層次嘅事物。 盧零：你意思係就算可以喺到快樂咁生活，佢地就會開始問呢個世界係點嚟？人係點嚟？等等嘅問題？ 今敏：問題係因，答案就係果。因為恐懼，所以有神；因為希望，所以有神；因為解釋唔到，所以有神。一個完整同有系統嘅神話，就可以滿足人嘅好奇心。咁人心就會定，社會亦會安寧。 盧零：最尾嗰句，係咪π先生要求你同我講架？ 今敏：點解你會咁諗？ 盧零：因為我答應佢，我同我嘅後人會一世活喺呢個區域，唔會離開。如果我嘅後人對呢個世界嘅由來無質疑，就唔會亂諗同嘗試離開，Area DB Island就唔會亂，亦唔會有人嘗試挑戰。 今敏：Zero你太睇得起自己啦。只要π先生點一點頭，創造者阿康撳個掣，唔好話Area DB Island，成個Game Of Eden就會即刻消失。同埋我只係將現實世界所發生嘅事客觀陳述出嚟啫。人唔知生前死後嘅世界，所以幻想天國同地獄，同時想得到救贖同歸宿；然後有人想成為神，所以用盡各種方法，去接近佢心目中嘅神；當然，有部份人根本唔需要知道神嘅真面目，佢地只需要用神話去方便社會運作，例如生死嘅禮儀、善惡嘅因果報應等等。 盧零：仲有以神之名去合理化好多事。 今敏：無錯。就算科學同科技點進步，我地都唔會得到最終答案。正如1呢個數，不斷被1以外嘅數字去除，只係接近0，而無可能等於0。 盧零：所以，你就需要我創造「0」出嚟。 今敏：錯。我要你創造一個會出現嘅「0」，而唔係人人都可以成為嘅「0」。 盧零：即係會出現嘅神？而唔係人人都可以成為嘅神？ 今敏：只要「神」會出現，大家就可以期待答案。因為希望比恐懼更有動力，同時兩者互相配合，Area DB Island嘅實驗就唔會hang 機，有機會可以成功。 盧零：你啱啱用「會」字，而唔係「要」字。 今敏：睇嚟你開始明白「社會」呢個遊戲點玩啦。咁我就可以將我度身訂造嘅故事話比你知。 盧零：既然你已經一早諗好晒，點解唔一早話比我知呢？ 今敏：因為一早話比你知，你會問更多嘅點解。 盧零：咁我依家靜靜地坐喺棵櫻花樹度，等你嘅故仔。 今敏：喺好耐好耐以前，神創造咗呢個世界，以及各種生物，一切相安無事，直到有一日，一條九頭海蛇喺深海發惡，殘殺海入面嘅生物。其中一種魚面人身，名叫「盧亭」嘅生物接近絕種，佢地為咗逃離九頭海蛇嘅追殺，不斷游不斷游，直到發現呢個世界一個啞鈴形狀嘅島，佢地諗住爬上陸地求生，可惜佢地離開水根本呼吸唔到...直到... 盧零：直到遇到神拯救佢地？ 今敏：無錯。首先神用佢嘅力量將九頭海蛇封印，然後將自己嘅力量分比仲存活嘅「盧亭」，等佢地成為神嘅兒女，神亦教識佢地說話、生火、耕種等等嘅能力，等佢地可以喺陸地生活。神更加將呢個名為「啞鈴洲」嘅地方比一眾「盧亭」管理，直到神再次回歸呢一片大地。 盧零：咁只要興建一間廟去敬拜呢一位神，同時將神嘅事跡刻劃出嚟，留有佢曾經存在嘅痕跡，咁一切就講得通。 今敏：現實世界有太多遺跡同謎題比大家去解讀，所以衍生唔同嘅神話同傳說。 盧零：你所創作嘅故事，仲差一位好重要嘅人物，有佢先可以達致π先生想要嘅安寧。你差一位使者，傳達神意思嘅使者。有佢代神去傳話，一切都會容易好多。 今敏：係喎！就係祭司呢一個工作！ 盧零：直接係呢個啞鈴洲嘅村長仲好。一村之長，若然唔可以同神接觸，點安撫人心？ 今敏：Zero，你都有啲潛質做遊戲設計師喎！ 盧零：我嘅目的從來都無變過，就係喺唔會驚動到π先生嘅情況下，喺呢度同Fish，仲有曾經比我殺死嘅人可以喺度建立一個真正嘅伊甸園... 今敏：不過我係度諗…呢個神話會唔會太簡單，同埋有冇bugs… 盧零：咁你就唔好睇少唯一信仰以及人類代入及無限解讀嘅能力。 今敏：既然係咁，問埋你最後一個問題。 盧零：仲有問題？ 今敏：有！就係Are you ready？ Zip噏劇場 《Game of Eden》第二季 小島篇 第26回 「盧零開始的新世界」 鄧添樂 飾演 盧零 Zero Ant 飾演 程式員 今敏 編劇及製作 阿攝 音樂 BEAT FRIDAY （Blue Street、Time After、UNDER THE RAIN、thing) 封面設計 Followmelikeblack 歌：Jer 柳應廷《從零開始的新世界》 作詞：Oscar 作曲：柳應廷 / Herman@The Hertz 編曲 : ONE Orchestra 監製 : 王雙駿 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 41【Zip噏劇場】Game of Eden 第二季 「小島篇」#25《設定》
Zip噏劇場 《Game of Eden》第二季 小島篇 第25回 盧零：（讀白）當我以為π先生兌現承諾，將Game of Eden呢一個封閉區域 Area DB Island比我當禮物，一切就會係新嘅開始...點知...負責設計呢個區域嘅程式員今敏...不斷問我問題...仲攞我嚟做實驗... *拍翼聲效 盧零：喂放我落嚟啊！ 今敏：你唔鍾意有對翼啊...咁不如試下呢樣啊～ *電子聲效 *高空飛翔聲效 盧零：喂！你今次又想點啊？ 今敏：比你體驗另一個世界囉～ 盧零：喂！我唔駛 *插入海聲效 今敏：（大聲叫）點啊 Zero！變成好似N 嘅魚人，喺海入面游嚟游去，爽唔爽？啱唔啱心水？ 盧零：（辛苦，水中聲音）你...快...啲...放返我上...地面啊...我就嚟...抖唔到...氣啦... 今敏：（大聲叫）你依家只係意識，無真正身體，所以唔駛怕喺水入面抖唔到氣，因為你根本唔需要呼吸～ *水中游泳聲效 盧零：（讀白）今敏唔講我都唔記得咗...我其實已經死咗...呢一刻只係入咗Game of Eden嘅意識...以前喺有身體嘅情況下入Game，都會受到物理同生物法則規限，但依家就唔同啦...可以好似鬼魂咁，脫離肉身嘅枷鎖，唔需要呼吸，唔需要食飯，亦無痛感...所以頭先今敏整咗對翼比我飛上天，嗰種對高嘅恐懼...其實都係源自於以前做人嘅經歷... 今敏：（大叫）Zero，我整咗佢地嚟陪你啊～ *電子聲效 盧零：（讀白）企喺櫻花樹旁邊嘅今敏隨手撳咗幾個掣，就喺海入面變出各式各樣嘅海洋生物 - 喺我上面有一大群色彩繽紛嘅細魚不斷游嚟游去；旁邊就有一班海龜喺到追逐；當我游深啲，就見到海豚、好大型嘅水母、仲有各式各樣嘅貝類、蟹類嘅生物！跟住，喺我身後面傳嚟一聲巨聲，我轉身一望，原來係一條超巨大嘅鯨魚游緊埋嚟！我嘗試捉住佢嘅魚鰭，然後佢全身用力一推，就咁就衝咗上水面！ 今敏：（大叫）Zero！滿唔滿意啊？ 盧零：（大叫）今敏，可唔可以整多次對翼比我啊！ 今敏：（大叫）無問題！ *電子聲效 *拍翼聲效 盧零：（讀白）原本係魚人狀態嘅我，隨住鯨魚一躍上水，我就放開手，借勢飛到半空，然後今敏就將我由魚人狀態變成有翼嘅鳥人狀態。我已經無咗第一次飛上天嘅恐懼，變為依家好好享受喺天空自由翱翔嘅快感。 *拍翼落地聲效 盧零：今敏...係咪只要我願意...之後入嚟呢個Area DB Island嘅意識，或者你地創造嘅人...就可以成為魚人或者鳥人？ 今敏：係啊！不過如果你想嘅，我可以令你地成為蛇人、龍人、甚至係撒亞人都得！ （盧零低頭沉思） 今敏：你係咪有其他諗法？我可以同容博士同仲有佢嘅基因工程團隊反映，睇下你想以咩形態喺Area DB Island 出現？我知容博士喺Area Zoo度重現緊《山海經》入面嘅生物，可能有一款啱你呢！ 盧零：我做返人得啦。 今敏：做返人？頭先你入水能游出水能飛喎！都吸引唔到你？ 盧零：當你經歷過我所發生嘅事，你就會明白可以普普通通做一個人，去感受同享受生活，係一件好難能可貴嘅事... 今敏：但Zero你再諗真啲啊，上一世已經做咗人，依家你喺呢度做咩都得喎！可以好似《西遊記》嘅悟空咁有72變都得啊！ 盧零：就係上一世未能夠好好享受做人嘅樂趣，你可以話我蠢，但呢個就係我同Fish想過嘅生活，用人嘅方式去生活。 今敏：OK...咁仲好，慳返好多工序...亦都唔駛太麻煩容博士添...不過就...悶啲同無乜挑戰性囉～ 盧零：我無記錯，你嘅責任係滿足我嘅要求，係咪？ 今敏：係～ 盧零：咁不如你快啲問埋之後嘅設定啦。 今敏：OKOK～既然你揀咗現實世界人類嘅設定，即係我可以假設呢度嘅「物理層」、「生物邏輯層」都係同現實世界相同啦？ 盧零：如果唔係呢？ 今敏：如果唔係，就可以咁囉～ *電子聲效 *重力聲效 盧零：（辛苦）你...撳咗啲咩掣啊...？ *電子聲效 *重力聲效解除 *盧零喘氣 今敏：無咩特別～只係將呢度嘅重力加咗5倍啫～ 盧零：（少少喘氣聲）你就係想比我試下「物理層面」嘅轉變？ 今敏：現實世界任何生物都必需要遵從物理法則，力學係其中一種。而生物邏輯層嘅意思即係生、老、病、死，仲有食、痾、瞓、醒、繁殖，同埋都係生、老、病、死、食、痾、瞓 盧零：（打斷）OK，明白晒。維持返現實世界設定就得啦。 今敏：唔想要長生不老？咁你同Fish就可以一生一世喺呢度嘆世界喎～ 盧零：我曾經睇過一首有關生死嘅詩...內容大既係 - 「因為有死有亡，才令人有迷亦有惘...如果可以長生不死...人們還會否追求...至死不渝的愛情...各類偉大的革命...推動時代的發明...如果沒有完只有始...我們是否只停留在原始？」 今敏：我以為666組織嘅成員只係冷血嘅殺手同特務...估唔到仲會唸詩...搞到我毛管戙啊... 盧零：結尾嗰幾句仲毛管戙啊，嗰位詩人話 - 「雖然有死有亡，有迷亦有惘，但有完才有美。」 今敏：但用有限嘅時間去追求無盡嘅事，係蠢喎。 盧零：我唔係π先生，無咁多慾念。我只係想做一個普通人，用有限嘅生命去追求我想過嘅生活。 今敏：知道，明白，收到晒...但呢條問題你要好好諗清楚，你想過邊一個年代嘅生活先？嗱，我簡單直接啲啦，你想Area DB Island嘅文明程度去到邊？原始人，即係石器時代？古國時代？依家？定係未來世界嘅設定啊？因為影響好深遠架。首先，科技越發達，文明發展速度越過，人類追求同探索嘅慾念就越強！代價係咩，我諗死於2060年嘅你好清楚環境變成點，人類生活亦都變成點啦。 盧零：（讀白）今敏咁樣講一講，又令我陷入沉思...因為人類有各種嘅限制，同時亦有各種嘅追求，先會去探索、發現同埋創造。而科技更加係一體兩面...便利人類生活嘅同時，亦令環境造成好大嘅災害，但人類為咗生存，就去創造更多科技...究境係一個良性定惡性循環呢...呢個時候，又諗起N指責π先生控制文明同科技嘅進步。唔通佢咁做，係想可以滿足人類對知識追求嘅同時...亦唔會咁快滅亡？ 今敏：Zero，雖然我地係有好多時間，而你呢刻唔會老，但我會啊，你唔係想諗到下一個今敏出現先答呢一條問題啊？ 盧零：唔係，我都有答案啦。就揀古國時代啦。 今敏：即係生活喺啞鈴洲嘅普通古代漁民，以打獵、捕魚為生，識得用火以及各類嘅金、銀、銅、鐵。係咪？ 盧零：無錯。然後同阿Fish喺呢度生兒育女，過最簡單嘅生活。 今敏：乜你唔悶架咩？ 盧零：你有冇聽過「國民幸福總值」？ 今敏：有聽過，但唔太清楚係乜。 盧零：唔清楚都唔緊要，到時你入嚟Area DB Island，見到我地就算過住無科技嘅簡單大自然生活，都可以笑得好開心同過得好幸福，你就會明架啦。 今敏：OK～我嘅職責係滿足你嘅要求，你話點就點啦。 盧零：咁呢個封閉Area可以運作未？ 今敏：未，因為仲有一條最重要，亦係最難嘅問題未答。 盧零：仲有難過頭先嘅問題？ 今敏：有，因為現實世界嘅人都未有統一嘅答案，就係 - 你呢個啞鈴洲，係點嚟？你諗住點同你嘅後人解釋？仲有，呢個世界有無造物主？即係有無神存在？ Zip噏劇場 《Game of Eden》第二季 小島篇 第25回 「設定」 鄧添樂 飾演 盧零 Zero Ant 飾演 程式員 今敏 編劇及製作 阿攝 音樂 BEAT FRIDAY （Blue Street、GOOD DAYS、Habit、LOVE ANS BASS、UNDER THE RAIN） 封面設計 Followmelikeblack 歌：麥浚龍 林二汶《逆蒼生》 作詞：林夕 作曲：甯浩基 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 40【Zip噏劇場】Game of Eden 第二季 「小島篇」#24《盧零復活》
Zip噏劇場 《Game of Eden》第二季 小島篇 第24回 ——— 電腦導航聲音： Welcome to Garden of Eden ，依家進行腦電波核對… 特別玩家 - 盧零 身份核對成功 歡迎回到伊甸園，依家帶你進入所屬區域 - Area DB Island。今日係NC 39年4月1日，Enjoy yr time in Eden. ——— *海浪聲 盧零：（讀白）你有無試過好想瞓但點都瞓唔到，瞓極都瞓唔著，係咁同自己講要瞓啦，快啲瞓啦，但都係瞓唔到...一直到...你醒嗰一刻，你先發現自己唔知喺邊一刻，不知不覺瞓著咗...然後又會諗 - 我瞓著之前嗰一剎那，係諗緊咩？做緊咩呢？ 依家嘅我就類似呢個啱啱瞓醒嘅狀態...我瞓咗幾耐？同埋瞓之前...發生咗咩事呢？ 我用力回想咗一陣，終於記起，我合埋眼之前最後一個見嘅人係莫九醫生...最後嘅一個動作係進入意識轉移大門，為第二任π先生貢獻身體... 而我依家醒返...就身處喺一個一片荒蕪，四面環海嘅小島上面...咁即係...實驗成功咗？π先生兌現咗我嘅承諾？ Fish！阿 Fish！你係邊啊？ 我用力不斷喺啲個島上面係咁跑，不斷大叫Fish個名，但我一直跑，跑咗好耐...都係一個人都無...然後...我喺呢一片大草地上面見到一棵櫻花樹...我坐咗喺樹底休息...跟住，我想到腳步聲！ *電子門聲效 *腳步聲效 盧零：Fi ! sh... 莫九：我好開心可以見到你，但你見到我好似唔多開心咁喎。 盧零：莫九醫生，呢度係？ 莫九：你無理由唔記得呢棵櫻花樹架？ 盧零：即係呢度真係啞鈴洲？ 莫九：無錯。今日係你復活同願望達成嘅日子。恭喜你啊 Zero。 盧零：咁阿Fish呢？仲有名單上面嘅其他人呢？ 莫九：你唔係諗住一醒返，就齊曬人好似開生日Party咁等你吓嘛？ 盧零：唔係... 莫九：好在你答唔係。因為如果你答係，我就要檢查一下以前嘅盧零係咪喺意識保存同傳輸嘅過程之中，發生錯誤以致產生改變。 盧零：我只係一時之間...未適應啫...莫九醫生啊...今日其實係幾多號啊？ 莫九：今日係現實世界嘅2061年4月1日。距離你為π先生貢獻身體已經過咗3個月多啲。 盧零：咁阿Fish呢？佢無事啊嘛？ 莫九：佢無事，繼續為π先生服務。 盧零：咁佢幾時可以入嚟呢度？ 莫九：Fish完成π先生比佢嘅任務，自然會入嚟Area DB Island同你團聚。 盧零：（讀白）聽到莫九醫生嘅答案，一時之間悲喜交雜。喜嘅係π先生守信用，我同佢都得償所願，佢得到身體，我得到呢個封閉區域 - Area DB Island。悲嘅係...現實世界繼續由π先生暗地控制...而佢亦可以不斷透過意識轉移達至永生...咁即係...我、Fish 同 N等等嘅悲劇會繼續發生... 莫九：見到你依家嘅表情，就諗返起9年前嘅自己。 盧零：即係？ 莫九：終於得到一直都好想得到嘅事物，但同時知道背後嘅前因後果，所以悲喜參半。 盧零：但至少我解除咗束縛，可以喺呢度過自己想過嘅生活。 莫九：樂觀係好事。但Zero，依家先係啱啱開始。首先為你介紹一個人。 *電子門聲效 盧零：（讀白）莫九醫生旁邊嘅空間出現咗一道傳送門，打開之後，出現一個大約25歲，短頭髮，戴眼鏡嘅女仔，佢一身白色連身裙，恭恭敬敬同莫九醫生打咗一個招呼。 莫九：佢叫今敏，係一名程式員，負責協助設計同管理呢個Area DB Island。 盧零：設計？即係咩意思啊？ 莫九：我估你都唔想呢個Area DB Island只係得一棵櫻花樹咁浪漫架？ 盧零：呢個就係你所指嘅開始？ 莫九：無錯，之後佢就會同你合作。而如非必要，我都唔會入嚟呢個Area。不過放心，我會遵守承諾，將你名單嘅人帶入嚟。 盧零：莫九醫生，多謝你啊。 莫九：Zero，你以後無得登出，從此活喺呢個世界。Hope you can enjoy your time in Eden. *電子門聲效 盧零：（讀白）莫九醫生就咁就登出咗。而我望住呢一個乜都無，得棵櫻花樹嘅啞鈴洲，諗返頭先莫九醫生所講嘅世界。有趣地，世界嘅世，同大細嘅細同音，而我嘅世界就係得呢一個遊戲世界嘅封閉區域Area DB Island。不過一個人獨霸呢個島，應該算大唔算細嘅。 今敏：Zero 你好啊！第一次見面，我叫今敏，以後多多指教。 盧零：你嘅語氣唔駛好似同事返工打招呼咁嘅，放鬆啲。 今敏：對你要好恭敬架！除咗因為呢個係我入職第一個負責嘅項目之外，仲有你！不過你唔係我同事，而係我半個老闆！ 盧零：我點會喺你老闆呢？ 今敏：莫九醫生吩咐我要幫你建構你心目中嘅伊甸園。 盧零：不如你講得直接啲，好嗎？ 今敏：阿當一打開眼，上帝已經創造咗伊甸園。雖然依家你都係阿當，不過就好唔同啦，因為我會按你心水設計呢個地方。 盧零：即係，如果我鍾意嘅話，你可以將太陽變成三角形，海變成紅色，呢棵櫻花樹識得唱歌跳舞？ 今敏：好小事啫！ *電子鍵盤聲效 盧零：（讀白）今敏凌空變出一個半透明嘅平板電腦，隨手撳咗幾個掣...就將呢一片藍色嘅大海變成紅色...天上嘅太陽由圓形變成三角形...而棵櫻花樹...喺樹幹上面生出眼同口...然後...係度唱歌跳舞！ 櫻花樹：Sa ku ra, Sa ku ra, ya yo i no so ra wa 盧零：喂...等等先... 今敏：你唔鍾意？咁不如轉呢個？ 櫻花樹：mi ni ko i sakura ah e oh come and dance with me 乖乖龍地冬 乖乖龍地冬 盧零：停！我只係亂咁講下架咋！ 今敏：放心，呢個只係demo，一日未令你滿意，呢個區域都仲可以修改。不過一旦你點頭話開始，Area DB Island就會正式運行。 盧零：嚇死我...我以為咁就一世... 今敏：既然你依家了解我嘅職能同範圍，咁我地可以開始啦。上帝第6日創造阿當，咁Zero你想創造咗人先，定係？ 盧零：當然係人啦，因為人先係最緊要。 今敏：OK！ *傳送門聲效 盧零：（讀白）今敏又撳咗幾個掣，然後就整咗兩度傳送門，跟住有兩個人行咗出嚟，佢地分別係N以及Fish… N：你好，我係N Fish：Hi, i am fish N：Kon'nichiwa Fish：annyeonghaseyo N：Bonjour Fish：Hola 盧零：今敏...你又係度搞咩啊？ 今敏：佢地唔係真正嘅意識同靈魂，只係示範語言設定啫。所以，你想用邊一種語言？揀現有嘅就方便啲，不過如果你想，都可以試下呢種語言嘅 N：#^&*@#%$#^@#$^@$# 盧零：我完全聽唔明佢講乜啊 今敏：最尾嗰種係外星話...不過只係測試階段...如果你真係想揀呢種嘅...就要多少少時間... 盧零：唔駛搞咁多野啦… 今敏：OK!即係廣東話啦。咁第2條問題，你想呢個區域嘅人，係咩外貌呢？ Zip噏劇場 《Game of Eden》第二季 小島篇 第24回 「盧零復活」 鄧添樂 飾演 盧零 Zero 彬臣 飾演 莫九醫生 Ant 飾演 程式員 今敏 Potter 飾演 N Crystal 飾演 Fish 編劇及製作 阿攝 音樂 BEAT FRIDAY 封面設計 Followmelikeblack （Giant、UNDER THE RAIN、Interval、UNTIL、Red） 歌：布志綸 (Alan Po) 《霍金預言書》 作詞：梁栢堅 作曲：布志綸 / Don Cruz 編曲：Don Cruz 監製：舒文 @Zoo Music / Don Cruz / 布志綸 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S3 Ep 39【Zip噏劇場】Game of Eden 第二季 「小島篇」回顧
Zip噏劇場 《Game of Eden》第二季 小島篇 回顧 ——— 電腦導航聲音： Welcome to Garden of Eden ，依家進行腦電波核對… 管理員- 莫十三 身份核對成功 歡迎回到伊甸園，依家帶你進入所屬區域 - Area M。今日係NC 181年5月26日，Enjoy yr time in Eden. ——— 莫十三：（讀白）2022年，Game of eden，亦即係伊甸園遊戲面世。呢個由程式設計師阿康設計出嚟嘅一個虛擬實體遊戲，本身無咩特別，但勝在夠真實，令當時經歷世紀疫症嘅人，可以借呢個遊戲去隔空見面。但正如好多偉大嘅發明一樣，創作者其實未必咁「偉大」，亦未必諗到後來會更「偉大」...因為阿康最先設計呢個遊戲...只係想用另一種方法，去見佢女朋友 Daisy...我嘅祖先，其實即係我自己...第一代嘅莫菲斯醫生...係阿康同Daisy嘅好朋友，希望幫手...點知...一切都逃唔過同舟會 π 先生嘅法眼...佢睇中咗我同阿康嘅能力，只要我地幫佢，佢就會無條件支持我地... 阿康想突破虛擬實景同科技嘅界限，而我就想突破醫學嘅界限，利用Game of Eden嘅腦電波系統，研究意識轉移，希望造福人類，延長人類嘅壽命。當然，我都無咁偉大，因為我家族遺傳病，過唔到55歲。55歲多定唔多呢？喺醫學領域方面，我當然想繼續做研究，見證文明嘅進步。而 π 先生亦好簡單，佢都係想用意識轉移技術，透過不停轉換身體，控制文明嘅進步。就係咁，我同阿康應承咗π 先生。但呢個只係故事嘅開始... Game of Eden 有唔同嘅區域，數字區域嘅就係普通開放嘅區域。至於英文字嘅區域係封閉區，只有特定身份嘅人先可以進入。我身處嘅Area M，M係代表 Memory，我亦係透過呢個區域儲存記憶，再複製自己，然後再傳入上一個我嘅記憶，間接達至永生。除咗Area M，亦有重啟松果體嘅Area 0、由慕容醫生所負責嘅基因工程部門 Area Zoo、由今敏所負責，專門設計與建構腦像嘅Area Dream、仲有按照666組織成員盧零遺願，比佢、阿Fish以及其他意識棲身嘅Area DB Island...仲有Area H...area...唉...其實我都唔知阿康主動同被動地創造咗幾多個區域...佢都應該無諗過，NC181年，即係2203年，呢個遊戲...可能有翻天覆地嘅變化。 同π先生達成嘅協議入面，阿康加咗一條有趣嘅條款，就係π 先生唔可以成為其中一位管理員。π 先生當然唔接受佢嘅要求，但阿康之後就話，遊戲入面有管理員、執行管理員、程式員、玩家等等唔同嘅權限。佢希望π先生同佢玩一個遊戲，就係各個數字區域，都有若干位執行管理員，佢地可以換屆，玩家亦會進行投票，去選出每個數字區域嘅執行管理員。阿康話 - π 先生，如果執行管理員全部都係你嘅人，到時Game of Eden就等同屬於你啦。 π 先生笑一笑，然後應承同佢玩呢個遊戲。畢竟佢嘅同舟會喺現實世界要管理嘅事好多。而呢個遊戲一直玩，去到NC180年，π先生嘅人終於成為Area 15嘅執行管理員，而佢地第一件要做嘅事，就係rebot server...一切重頭嚟過...所以，我先會叫傻達入Game 搵阿康嘅女 Gigi。傻達都算叻仔，承繼佢阿爸 4哥喺收藏組織404 D嘅名號，亦勸到Gigi返去現實世界。雖然，被植入嘅係自己阿妹Sabrina嘅身體，但救到一個得一個嘛。點知，醒返嘅，都係Sabrina。呢件事都處理到，最令我頭痛嘅係...阿康竟然有後備server...而傻達幫Sabrina 搵記憶嘅過程，搵到後備server嘅線索...我勸過傻達唔好多事架...點知佢唔聽...啟動咗八卦形全盒...仲入咗Area 0 呢個封閉咗多年嘅區域...最後佢變成同我一樣，有全知狀態...而全盒應該收藏晒阿康有關Game of Eden嘅秘密...呢一刻...阿達喺邊呢？ ——— 電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 15，今日係NC181年5月26日，Enjoy yr time in Eden. ——— 達：（讀白）全盒嘅第二格入面，有一個平安包，包入面嘅5個字條，最有可能組合而成嘅句子就係「平安是寶藏」。為咗搵出創造者阿康留比佢嗰女 Sabrina 有關後備Server嘅線索，所以我就出發去啞鈴洲。點知，我喺關公忠義亭遇到一個一身古代衣著嘅少女纏住... 盧婷：哥哥！幫我啊！ 達：（讀白）佢完全唔知咩係Game of Eden，咩係登出...同埋佢話自己係活喺同呢個啞鈴洲好相似嘅小島。 盧婷：我記得嗰日係180年8月31日...我喺張保仔洞等阿葦哥哥返嚟，點知個天突然一黑，我就暈咗...一醒返...就嚟咗呢個同我嘅啞鈴洲有啲相似嘅地方...我係咪穿越時空啊？ 達：（讀白）為咗幫佢，我同佢去返張保仔洞...但我唔小心跣親，意外啟動咗全知狀態，發現呢個叫盧婷嘅少女...佢最內層係青色…然後被一層灰色所包圍住…跟住最外層係墨綠色…即係點啊？佢係真實存在嘅靈魂？但點解會有人工智能嘅顏色？又有遊戲世界嘅代碼嘅？ 而張保仔洞入面其中一幅搶包山嘅壁畫，上面「包山」嗰兩個字除咗微微凹陷，仲有墨綠色同灰色，一定有機關。但究竟邊度有一個類似嘅印台，可以放入去，開啟機開呢？ 盧婷：吸平安包嘅印咪係囉！ 達：（讀白）所以，我就同盧婷趁舉行搶包山嘅時間，潛入北帝廟，準備去偷平安包印台。而嗰個最元祖嘅平安包印台，就收埋喺神壇後面嘅偏殿，一個玻璃箱入面，只要打開呢個玻璃箱，就可以借走平安包印台，啟動機關之後，或者就可以帶盧婷返去，順便再知多啲有關Game of Eden嘅秘密！ *瞳孔辨識聲效 *資料傳輸聲效 盧綠：（讀白）180年8月31日，個天突然一黑，全世界好似停止咗咁...到啞鈴洲所有村民有返知覺，已經係9月1日...但我阿爸，亦即係第5任村長陷入昏迷...全村人都好驚...怕我地比玄武大帝懲罰...所以就叫我盧綠接任成為新一任村長...希望請示玄武大帝，以及祈求平安...而請示嘅方法，就係飲靈魂之水...但我一飲，就好似我舅父咁出現幻覺，成個世界變成墨綠色一點點...而千里眼同順風耳神像就暗藏灰色細點...我眼望完千里眼神像之後，就聽到順風耳神像同我講野，話身份核對成功...仲傳傳咗啞鈴洲呢180年嘅資料比我...原來...佢地唔係神...係咩人工...智能？而我地呢條村唔係真實...而係喺一個叫做Game of Eden嘅遊戲入面...第一代村長盧零同佢太太盧如...係一個叫做666組織嘅人...因為盧零嘅遺願先有我生活咗咁多年嘅啞鈴洲...即係Area DB Island...一時之間太多資訊...好亂啊...但最可怕嘅係...如果村長以外嘅人如果知道呢度嘅事，要死。嘗試離開呢度嘅人，都要死。就好似我舅父一樣... 依家阿爸病重...阿婷又失縱...阿葦...你唔好好似舅父咁亂咁走啊！我唔想你好似舅父咁啊！ *海浪聲 盧葦：（讀白）啲人話外甥多似舅。本來阿哥盧綠親舅父多啲，不過因為佢要跟爸爸學做村長，所以我呢個唔需要承繼家業嘅細仔，就喺舅父身上面尋找父愛。舅父成日都問我唔同嘅問題，例如呢個世界點嚟？呢個世界有幾大？有無邊界？有無我地呢個洲以外嘅人存在？而佢所問嘅問題，我地村嘅學堂有一個標準答案。但舅父好唔鍾意標準呢兩個字，因為佢又會問 - 何謂標準？邊個定？ 佢就係一個咁嘅人。久而久之，我就似舅父，充滿好奇心，成日問好多問題。我亦會跟舅父出海，探索唔同嘅可能性，自己去搵出問題嘅答案。而阿哥就似阿爸，一個好成熟、穩重、可靠嘅未來村長。直到呢一日，8月31日，全世界好似停止咗嘅一晚...阿妹婷婷失咗縱...阿哥就忙於接任村長...以及安撫村民...佢一定好忙...所以...我決定帶住舅父嘅筆記，以及北帝廟入面嘅古劍，出海去搵阿妹嘅下落！ *螢光幕聲效 莫十三：（讀白）Area M除咗可以保留同傳輸我嘅記憶，其實仲可以睇晒所有Game of Eden 玩家嘅記憶。呢一刻嘅我，好似一個全知嘅旁觀者，睇住佢地嘅發展。對於一個得返5年命，無諗住再複製自己，製造莫十四嘅我嚟講，都算係一種好好嘅娛樂。不過睇咗咁耐，都係時候去三分甜酒吧放鬆下啦～ *傳輸聲效 Zip噏劇場 《Game of Eden》第二季 小島篇 回顧 彬臣 飾演 莫十三醫生 阿攝 飾演 阿達 Crystal 飾演 盧婷 CFun 飾演 第6任村長 盧綠 鄧添樂 飾演 盧葦 編劇及製作 阿攝 音樂 BEAT FRIDAY （ONCE、Rain or Shine、ROUND AND ROUND、Blue Street、AN ORDER、BLUE LOTUS、Diner） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S1 Ep 20期間限定 100% FF 遊記 - 「Shinjuku 新宿故」Final Dream
【Zip噏劇場】期間限定 100% FF 遊記 - 「Shinjuku 新宿故」Final Dream 阿努比斯怪物口中嘅最後考驗…係抽出我身體唔同部份同動漫女嘅靈魂去秤。最後…佢喺我頭頂同喉嚨各自抽出一個紫色同藍色發光球體…喺秤上面同動漫女嘅靈魂達至平衡…阿努比斯怪物就話過關…佢吞咗我嘅藍色同紫色發光球體...然後就喺我面前消失咗...鎖住我嗰度閘都消失得一乾二淨...我即刻拎起動漫女嘅靈魂球體，小心翼翼咁放返入佢身體入面...然後...唔駛幾分鐘...佢終於醒啦！ 輝：你無事啊嘛...？ 動漫女：我...無事... 輝：無事就好啦...咁我地離開呢度啦...但應該點走呢？ 動漫女：阿輝，你唔好郁，聽我講一句說話先！ 輝：係咩說話？ 動漫女：我覺得你嘅作品好正！好有創意！ *鏡裂開聲效 *列車聲效 *水龍頭聲效 我…返咗嚟機場列車嘅洗手間入面…但係原本同我入嚟嘅動漫女呢？ *推門聲效 我搵匀全架列車都唔見佢嘅身影…究竟係我有幻覺？定係發夢？最後我返到自己嘅座位…望住出面東京嘅街景，一邊聽歌，一邊諗返呢一次嘅奇遇…然後就瞓著覺… *拍手聲效 Jessie：勵害！果然係黑市入面最強嘅腦像創作大師 - 今敏 今敏：既然你滿意嘅，就請你睇一睇張單。我列明咗每一個景點嘅收費，仲有創作費。 Jessie：等等先，唔好咁心急。 今敏：你仲有其他要求？ Jessie：唔知，仲有啲更大型更刺激嘅內容呢？ 今敏：呢本係catalog，你睇下想要邊一個人嘅記憶，我再安排下。 Jessie：我想繼續要阿輝。 今敏：不過…阿輝佢啱啱先發完一個咁長嘅夢…我怕佢要少少時間回復… Jessie：唔緊要。我可以等。 今敏：可唔可以問你一個問題？點解你一定要睇阿輝嘅記憶？ Jessie：喺黑市，我哋唔會問點解，只會答做到定做唔到。 今敏：好…你比一個星期時間我。我準備好，就再通知你。 Jessie：等你好消息。 *電子聲效 程式員 - 今敏 現已登出。Hope you enjoy yr time in Eden。 今敏：（讀白）1895年12月28日，史上第一部公開放映嘅電影《火車進站》面世。電影世代正式展開，由黑白無聲影畫，到有對白，再到有顏色，然後到各式各樣嘅科技誕生，令電影成為人類第一大娛樂。到咗2030年，電影行業進入AI時代。不過，仲有好多人嚮往人類創作嘅內容，認為有血有肉嘅故事，先可以打動人心。所以，之後就誕生我做緊嘅副業 - 腦像創作師，呢個方法只需要一個人嘅大腦，登入Game of Eden之後，用特定嘅方法就可以將自己嘅記憶同經歷出售，以第一身嘅角度，當電影比觀眾欣賞。加上一個人做晒台前幕後，極度方便。原本現實世界曾經有呢種娛樂方式，可惜因為道德問題被禁止，所以大家轉喺Game of Eden嘅黑市尋找呢方面嘅快感。畢竟有供就有求，一場娛樂，大家開心就得啦。而我同一般腦像創作師唔同，因為一般人多數販賣自己嘅記憶，但我就有大量嘅人腦可以比客人選擇，仲可以用我創作嘅方法，令大腦發夢，成為獨一無二嘅作品。起初，我以為呢位J先生想借阿輝嘅記憶，去回顧當年嘅日本，畢竟2061年，世界都變咗好多。但之後佢越嚟越多要求，例如加錢進入阿輝嘅夢境，好似電影《Inception》咁，成為旁觀者，近距離欣賞阿輝嘅故事。佢呢個要求我都係第一次挑戰，估唔到咁順利。不過J先生再次指明要阿輝嘅大腦，佢嘅堅持，令我好好奇，阿輝究竟係咩人？佢有咩咁吸引呢？ *鍵盤聲效 我喺資料庫入面搜查阿輝嘅資料，終於明白J先生嘅堅持。正如阿輝自己所提到，佢係一名編劇，而佢嘅作品主要係黑色幽默類嘅劇種。但可惜就算佢點樣含沙射影同擦邊球，都避唔過π先生嘅紅線…2050年正式收筆…睇返佢嘅創作，我就明白佢夢入面嘅人設、冒險嘅設定有咩意思。既然J先生有咁嘅要求，代表佢應該知道阿輝嘅背景…唔通…佢同阿輝有咩特別關係？定係…佢都係同舟會嘅人？不過呢刻最重要嘅係the show must go on。 *電子門打開聲效 呢個倉庫有好多個玻璃管，插住各式各樣嘅營養液同維生醫療用具，而唔同嘅玻璃管就儲存咗各式各樣嘅大腦。我行到阿輝嘅大腦前面，同佢講：阿輝，3,2,1 Action！ 電腦導航聲音： Welcome to Garden of Eden ，依家進行腦電波核對… 程式員 - 今敏 身份核對成功 歡迎回到伊甸園，依家帶你進入所屬區域 - Area D，今日係NC39年3月18日，Enjoy yr time in Eden. ——— *列車聲效 我以一身王家衛《重慶森林》林青霞角色嘅造型，坐喺阿輝對面。 阿輝：你咪係… 今敏：殊… 阿輝：點解…？ 今敏：殊…你答曬我嘅問題，我就話你知答案。 今敏：（讀白）好似上次咁，我問阿輝一系列嘅問題。呢個問題其實係引導佢發相關嘅夢。而呢套方法係參考科幻經典《銀翼殺手》，佢改篇自經典小說《仿生人會夢見電子羊嗎》，主角用一系列嘅問題去測試一個人到底係人定係仿生人。原理係一個人係無可能夢見佢無見過嘅人同事。所以，我問阿輝一系列問題，就係想利用佢所認知嘅事物進行創作，如果我虛構佢腦入面無嘅事物，好大機會令佢大腦hang 機，最嚴重就會死亡。所以，我要好小心翼翼咁處理。最後，阿輝答完我所問嘅指定問題，我就帶佢入列車嘅洗手間。佢戰戰兢兢咁跟咗我入去，然後，我對住洗手盤上面塊鏡講咗一句：Enjoy the show ！ *鏡破裂聲效 *吸入聲效 阿輝：（讀白）我明明喺去機場嘅列車上面…但動漫女講完嗰句Enjoy the show …我就被吸咗入馬桶…然後出現喺呢個充滿熱帶植物嘅島上面… 「有無人啊！喂！」 無論我點嗌…都無人應我…我喺呢個島不斷行，希望可以搵到出路，而我終於嚟到呢個島嘅邊緣，外圍有一度好高好大嘅牆圍住呢個島…同一時間…喺我面前出現幾個寶箱… *打開寶箱聲效 我喺寶箱入面，搵到一把無刀身，刀柄有百合花圖案嘅武器…仲有一個漫威角色 - 美國隊長嘅盾牌。然後，我聽到身後有腳步聲傳過嚟… *腳步聲效 七海大師：要離開呢度，就要學識用念。以氣御劍，氣由念發，念由心生。拎起刀柄啦。 阿輝：（讀白）呢個同《咒術迴戰》七海健人一模一樣造型嘅人無端端出現喺我面前，講咗呢一番奇怪嘅說話…然後，係我身後面突然有人大叫：On your left！ 一個美國隊長造型嘅人拎起嗰盾，然後用好快嘅速度係我左邊跑過！不遠處仲有一個忍者造型嘅黑衣人，唔出聲，係度埋頭苦幹砌緊模型…呢個夢會唔會太奇怪啊？ 七海大師：見唔見到牆身有一度門？阿努比斯怪物隨時會突襲，所以你要學識駕馭念力。特訓正式開始。 阿輝：（讀白）就係咁，我拎起刀柄…聽從七海大師嘅指示，激起念力，創造念刀！過咗唔知幾耐，我由一把小刀…慢慢練到可以用念力創造出強大嘅念刀！ 突然！有一聲巨響喺牆外面傳過嚟！牆上面嗰度黃金大門被一個巨型怪物踢爆咗，而嗰個怪物嘅造型…同埃及神話嘅阿努比斯怪物係一模一樣！ *魔法聲效 阿輝：（讀白）佢伸出雙手，喺空中變出好多度閘！然後啲閘好似雨咁向我射過嚟！ *擋格聲效 阿輝：（讀白）美國隊長用盾幫我擋開啲閘！然後忍者終於砌好模型…嗰個原來係一個元祖高達模型…佢坐咗上去，然後啟動高達，拎出激光劍，向阿努比斯怪物衝過去！ 為咗離開呢度，我都唔可以示弱 *激光劍聲效 我激發出最大嘅念力！創造出最強嘅念刀，加入戰團！ 不過阿努比斯怪物嘅念力好似無窮無盡，我哋陷入僵局！ 突然之間，有一把好刺耳嘅聲響遍全場！ 「停手。」 在場所有人被呢把聲震懾！全部人都郁唔到，好似定格咗咁企喺原位！ 我眼尾望到有一個個子好矮，一身白袍嘅人，背住陽光企喺城牆上面，然後好大聲咁講：玩夠啦。同我即刻離開呢度！ 佢一講完…我眼前所有景象好似雪糕融化咁…慢慢變得好模糊…好模糊… *電子聲效 程式員 - 今敏 現已登出。Hope you enjoy yr time in Eden。 今敏：對唔住啊…莫九醫生… 莫九：呢句說話，你留返同阿輝講。你知道短期內不斷進入佢嘅大腦，會對佢有咩影響架呵？ 今敏：我知道…不過我有監察住佢嘅狀況架！ 莫九：我知你唔會比阿輝出事。但你睇下呢張相，睇下認唔認得相入面嘅人？ 今敏：相入面係阿輝…佢隔籬係我喺佢夢入面所扮演嘅動漫女？仲手抱住嗰Bb… 莫九：動漫女真有其人，阿輝之後同咗佢一齊，仲結婚生咗小朋友。不過之後阿輝嘅遭遇，你有睇資料應該知道。 今敏：所以…J先生係阿輝嘅仔？ 莫九：J先生真名叫Jessie，佢受到阿囝嘅委托，希望搵到阿輝出嚟。佢想再睇阿輝嘅記憶，就係想爭取時間，搵出阿輝嘅位置。 今敏：莫九醫生！好對唔住！我會即刻補救！ 莫九：放心，我知會咗π先生。不過你知點做啦。 今敏：我唔會再喺黑市做腦像創作師！ 莫九：嗯。咁Area DB island 嘅製作進度如何？ 今敏：經過半年嘅時間，已經完全按照Zero嘅要求，成功喺Game of Eden 創造咗一個啞鈴洲出嚟，同時亦按照阿康嘅指導，順利製作咗人工智能K DB island。隨時都可以進行Zero嘅遺願。 莫九：咁以後你就專心呢個項目，唔好再節外生枝。 今敏：係！ 莫九：好好記住我哋嘅職責，知道嗎？如果唔係，你就會成為呢度其中一個大腦。 今敏：係！ Zip噏劇場 Game of Eden 外傳 阿輝篇 阿攝 飾演 阿輝 梓豪 飾演 七海大師 波盛 飾演 Jessie Ant 飾演 程式員 今敏、動漫女 彬臣 飾演 莫九醫生 編劇及製作 阿攝 音樂 BEAT FRIDAY (AN ORDER、Good Plus、Half、Giant、Habit、LIKE WHERE、Interval、SOMEWHERE、Kaji、CONVENANT、FOGGY ISLAND） 封面設計 Followmelikeblack 歌：King Gnu - 逆夢（《劇場版咒術迴戰0》的片尾曲） Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S1 Ep 19期間限定 100% FF 遊記 - 「Shinjuku 新宿故」Dream 07
【Zip噏劇場】期間限定 100% FF 遊記 - 「Shinjuku 新宿故」Dream 07 我同阿努比斯怪物中間原本只係相隔幾步，但佢用念力將皇宮嘅地板變成懸崖，而佢揮一揮手就喺凌空之中變出60塊，以5直行，12排嘅方式排列嘅階磚。我要行啱階磚先可以過到對面ko 阿努比斯怪物。但經過咗十幾分鐘…我都搵唔到解謎嘅方法… 阿努比斯怪物：「時間得返5分鐘，你再咁試，動漫女就會無命架啦。不如我地加快遊戲進度，你再踩錯一次，就gameover！嚟啦！快啲用下你個腦，揀到條生路嚟行啦！」 生路...5隻色...最左係金色...跟住係木色...然後藍色...紅色...最右係泥黃色...點解係呢5隻色呢？跟住每一排嘅圖案就係12生肖...12生肖係中華文化嘅特色...咁呢5隻顏色...金色、木色、藍色、紅色、泥黃色...如果喺中華文化嘅角度嚟睇...係咪可以變成五行嘅顏行？ 即係金色代表金、木色代表木、藍色代表水、紅色代表火、泥黃色代表土？ 而第一排嘅「安得磚」，即係安全嘅階磚係藍色，即係水；第二排「安得磚」係木色，即係木...水可以行去木...唔通因為水生木...？ 咁啱第三排嘅「安得磚」就係紅色，代表火嘅老虎階磚，木行去火，即係代表木生火啦。所以阿努比斯怪物所講生路嘅生，應該係指五行相生嘅生！ 第三排係火，火生土...咁即係代表第4排，兔仔嗰一排嘅「安得磚」係最右泥黃色嗰一格！ 得返呢一次機會！要搏一搏啦！ 我雙腳一跳，由紅色虎跳到泥黃色兔仔嗰一塊階磚...我嘅心跳由雙腳離地嗰一刻變得好快好快...因為生同死...就會喺我雙腳落地嗰一刻揭曉！ *落地聲音 *靜止數秒 我無事！我無事啊！！！即係我估啱咗！呢60塊階磚嘅生路就按五行相生嘅方式去行啊！！！ 然後土生金，所以下一排係最左嘅金龍！ *落地聲音 之後，我按住金生水、水生木、木生火、火生土、土生金嘅五行相生法則，順利行曬呢 5 X 12 嘅5行生肖階磚陣！ 阿努比斯怪物拍一拍手，就同我講咗一句：「唔好浪費時間，即刻進行最後嘅考驗嚟啦！」 最後嘅考驗？但我仲未回得切氣...不過我都無時間去思考...因為阿努比斯怪物即刻伸出雙手，然後喺天空變出好多度閘出嚟！數量多到好似落雨咁！仲好快嘅向我衝過嚟！ *念刀聲效 我用僅餘嘅念力整出念刀，見一度閘斬一度閘，可惜...大家嘅念力相差太遠...我斬得快...佢整閘仲快... *鐵閘聲效 我被佢嘅閘門攻擊一步一步迫到去石牆旁邊...最後更被佢用閘釘咗喺石牆上面，好似耶蘇被釘十字架咁！ 我好用力想掙脫鎖住我嘅鐵閘...可惜...我力氣唔夠...而念刀刀柄跌咗喺地下...我用唔到念刀... 阿努比斯怪物慢慢行過嚟，仲一腳踏爆咗我嘅念刀！ 可惡啊！ 唔通...我就咁輸咗...只係差一步咋... 然後...我諗起七海大師曾經講過嘅一句說話：「以氣御劍。氣由念發，念由心生。」 不如就搏一搏啦！ *激光槍聲效 阿努比斯怪物：勵害勵害！可以做到手中無劍，心中有劍！唔駛刀柄，憑空用念創作出念刀。可惜啊，「刀」始終都唔係你勵害嘅武器。 *激光槍聲效 阿努比斯怪物：無用架，都講咗刀唔係你最強嘅武器。 我用僅餘嘅念力，凌空創造念刀去攻擊...可惜比阿努比斯怪物一一擋曬... 跟住佢左手變出一個天秤，同我講：係咪想救動漫女呢？咁就睇下你用咩嚟交換啦。 交換？即係咩意思呢？ 佢揮一揮手，收埋動漫女嘅鼎就打開咗，然後佢將昏睡嘅動漫女凌空移動到我旁邊...跟住動漫女嘅口慢慢打開，仲吐咗一個發光嘅球體出嚟！仲慢慢飛去天秤嘅右邊。 阿努比斯怪物：唔知你可以付出咩代價呢？ 根據埃及神話，阿努比斯係仲裁員，喺亡者之殿等待亡者嘅嚟臨。佢會用黃金打造嘅天秤進行審判，一邊係亡者嘅心臟，另一邊喺正義女神嘅羽毛。如果亡者生前一生行善，心臟就會比羽毛輕，然後就可以上天堂；但如果惡行較多，心臟比羽毛重，就會比䲔魚頭獅身嘅怪物阿穆特吞啜，永不超生...唔通佢想做呢個仲裁？ 阿努比斯怪物：就試下心臟啦。 啊！！！ 佢揮一揮手，我嘅心臟就好似《封神榜》嘅比干咁...活生生被拉咗出嚟！然後放喺個秤嘅左面！然後，嗰秤由向左傾...慢慢變成平衡！ 阿努比斯怪物：太血腥啦。試下其他先。 佢再揮一揮手...我嘅心臟就回復原位...好似咩事都無發生過咁！ 阿努比斯怪物：我都係鍾意你嘅創意。 啊！！！ 今次佢用手捉住我塊面！然後就有一個紫色發光嘅球體離開我嘅頭頂，慢慢飛去秤嘅左邊，嗰秤向右，即係動漫女嘅方向傾斜！ 「放咗我地！」 我用盡最後嘅念力！凌空整咗一支好尖嘅錐體，直飛向阿努比斯怪物！ *強烈撞擊聲效 阿努比斯怪物：哈，竟然係一支好大好粗嘅墨水鋼筆。果然係編劇。咁不如加埋呢一樣啊～ 佢伸出右手對住我條頸，然後有一個藍色發光嘅球體喺我喉嚨度慢慢走出嚟！飛去秤嘅左邊...一藍一紫嘅發光球體...同動漫女嘅靈魂球體各喺秤嘅左右兩邊...秤好似搖搖板咁又上又落...終於...得到平衡！ 阿努比斯怪物：恭喜你地！過關啦！ 阿努比斯怪物吞咗我嘅藍色同紫色發光球體...然後就喺我面前消失咗...鎖住我嗰度閘都消失得一乾二淨...我即刻拎起動漫女嘅靈魂球體，小心翼翼咁放返入佢身體入面...然後...唔駛幾分鐘...佢終於醒啦！ 我：你無事啊嘛...？ 動漫女：我…無事… 【Zip噏劇場】期間限定 100% FF 遊記 - 「Shinjuku 新宿故」Dream 07 阿攝 飾演 阿輝 Ant 飾演 動漫女 編劇及製作 阿攝 音樂 BEAT FRIDAY （CONVENANT、Kaji、Interval、thing） 歌：中島美嘉 - 僕が死のうと思ったのは / THE FIRST TAKE Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S1 Ep 18期間限定 100% FF 遊記 - 「Shinjuku 新宿故」Dream 06
【Zip噏劇場】期間限定 100% FF 遊記 - 「Shinjuku 新宿故」Dream 06 「天」門之後，龍椅之上嘅阿努比斯怪物，只要解決咗佢，成功喺限時之內救出動漫女，我就可以離開呢個異空間，返到去機場列車，然後返到香港！ 我只係差一步！唔係...我只係差1mm...我嘅念刀就可以一刀封喉！但就喺呢1mm嘅差距...阿努比斯怪物發動念力！ 地裂嘅聲音由我腳底發出嚟！ 呢個中式皇宮發生劇震！ 我同阿努比斯怪物之間嘅地面突然一分為二咁裂開！我同佢由一步之距，瞬間被移動嘅板塊分離咗好遠！我嘅念刀斬空....而裂開嘅空間就變成深不見底嘅懸崖！ 按住呢個去勢！原本跳起斬擊嘅我會跌落去！ *念刀聲效 我即刻將念刀變成念鈎，就喺我跌落懸崖嘅一刻，我用念鈎深深插入懸崖邊嘅位置去阻止跌勢...然後幾經辛苦咁一手一腳爬返上去地面... 我望向對面崖嘅阿努比斯，佢繼續絲絲然咁坐喺龍椅上面，左手慢慢輕摸倒數緊嘅鼎...我同佢依家相隔大概7、8米...即係我要香港跳遠奧運選手上身...先可以跳到過去...時間無多啦...點都要試下... *魔法聲效 正當我準備助跑，阿努比斯怪物又揚一揚手！ *機關聲效 喺懸崖中間嘅凌空位置，出要咗好多塊階磚！呢60塊板以 5 X 12 嘅方式，平勻分佈喺我同阿努比斯怪物嘅中間。呢5個直行，12排嘅塊階磚有特別嘅圖案同顏色。 首先左邊第一直行嘅階磚全部都係金色，第二直行係木色，第三直行係藍色，第四直行係紅色，最右第五直行係泥黃色。 而最近我嘅第一橫排嘅5塊階磚，就有鼠嘅圖案，第二排就係牛，第三排係虎，第四排係兔，按12生肖嘅順序如此類推，一直去到最後第12排就係豬。 60塊唔同顏色及圖案嘅階磚，喺我面前好整齊由上至下、左至右咁排列... 我再望向阿努比斯怪物，佢笑住同我講：「比一條生路你。不過揀錯就會死。」 一條生路？即係要我踩上啱嘅階磚行過去？不過階磚下面係深不見底嘅懸崖...如果我揀錯...就會跌死... 我望住懸崖外，最近我嘅第一排老鼠圖案嘅階磚。左一係金色鼠，左二係木色鼠、中間係藍色鼠、然後就係紅色鼠，最右係泥黃色鼠。第一排每一塊階磚都好似好穩陣...好似每一塊都唔會有事...究境邊一塊係啱呢？ 鼎上面嘅時間得返23分鐘...再唔救動漫女...佢就會死...我就出唔到去... 呢到最後一關，點都要搏一搏...就呢一格啦！ *腳踏聲 我憑直覺揀咗最左邊嘅金鼠！ 我踏出右腳踩上去...呢一塊好似幾穩陣...然後就踏埋左腳，雙腳一同踩喺金鼠階磚上面！ *裂開聲效 金鼠階磚就突然裂開！我反應好快咁跳返去懸崖邊！ 然後...金鼠階磚就跌落懸崖底... 點解我揀金鼠...純粹靠直覺...同埋因為第一排近懸崖邊，所以直覺話比我知就算發生咩事，我都應該可以跳返去安全嘅地方... 依家我大概知道踩錯會發生咩事...但邊一個先係啱呢？ 唯有...再挑戰自己嘅反應啦！ *裂開聲效 X 3 我依賴自己嘅反應，試晒第一排所有顏色嘅老鼠階磚，如果都裂開嘅，我就好似頭先咁，即刻跳返去懸崖邊...而最後比我試到中間，亦即係藍色老鼠階磚係「安得磚」...即係安全得呢一塊階磚。 唔好意思，係咁緊張嘅關頭都要搞爛gag...無計...如果唔苦中作樂一下...我怕我會頂唔住壓力... 而除咗試到中間藍色老鼠係無事之外，我亦都試到一排係得一塊階磚無事...咁所以...喺我面前第二排呢5塊牛嘅階磚...都係得一塊「安得磚」... 究竟係邊一塊呢？ 第一排得返我依家企喺嘅藍色老鼠階磚仲存在，其他都已經跌曬落山崖... 我暫時未諗到呢個5 X 12 嘅生肖顏色階磚陣有咩關聯...唯有用藍色老鼠階磚做中心...繼續以身試磚...第二排最左嘅金牛階磚同我依家所企嘅階磚都唔算超遠...應該都可以靠反應安全跳返過嚟嘅... 我先試最左嘅金牛... *裂開聲效 但都係失敗...最右嘅泥黃牛階磚... *裂開聲效 都係失敗... 最後，第二排嘅「安得磚」係左二嘅木牛... 第一排係中間嘅藍色老鼠，第二排係左二嘅木色牛... 咁第三排呢...? *裂開聲效 第三排嘅「安得磚」係右二嘅紅色虎... 不過每一個咁跳咁試...我嘅體力用得7788...再係咁跳落去...我怕無力跳返去安全嗰一塊度... 突然之間，阿努比斯怪物對我講：「時間得返5分鐘，你再咁試，動漫女就會無命架啦。不如我地加快遊戲進度，你再踩錯一次，就gameover！嚟啦！快啲用下你個腦，揀到條生路嚟行啦！」 錯多一次...就gameover...即係無得再好似頭先咁逐個試...揀條生路...咁易咩... 第一排嘅「安得磚」係藍色...第二排係木色...第三排係紅色...當中有咩關係呢？又同12生肖有咩關係呢？ 音樂：BEAT FRIDAY - Thing、Kaji、Bike、Interval 歌：Linked Horizon《最後的巨人》（「進擊的巨人」The Final Season 完結篇 片頭曲） Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S1 Ep 17期間限定 100% FF 遊記 - 「Shinjuku 新宿故」Dream 05
【Zip噏劇場】期間限定 100% FF 遊記 - 「Shinjuku 新宿故」Dream 05 龍字嘅四字成語…你會諗起邊幾個呢？ 鯉躍龍門？龍飛鳳舞？見龍在天？潛龍勿用？降龍有悔…？ 講下講下，噏咗降龍十八掌嘅招式名出嚟添… 如果除咗龍，要有埋其他生肖，就會有：龍精虎猛、生龍活虎、虎膽龍威、龍蛇混集… 點解無端端會數同龍有關嘅四字成語，因為我面前嘅考驗同龍有關。自從完成七海大師嘅訓練，離開斬鐘異空間，我就出現喺一個三進式嘅古代皇宮，阿努比斯怪物就喺皇宮深處，我要喺限時之前過到「天」、「地」、「人」三關。「人」嗰一關就順利過咗，依家就到「地」呢一關。 我企喺「地」門同「天」門範圍嘅中間位置，旁邊有一張枱，枱上面有齊12生肖頭盔，仲有呢一關嘅提示：「辰龍天下，何肖可安身？」 意思係我要戴啱頭盔，先可以進入「天」門。而上一關嘅boss 傻鴨，戴咗龍頭頭盔，一行出中圈，就觸動機關，圍住我哋嘅23個圓圈升起23條圓柱，圓柱上嘅龍頭就即刻對住傻鴨噴火！佢就被火燒到變咗烤鴨… 而牌匾嘅「天」字，少咗一劃變成「大字」，門同時收窄…即係我得返3次機會…11個頭盔，我應該試邊一個好呢？ 頭先係咁數同龍有關嘅四字詞…「虎」係出現得比較多…不如就試下…睇下我可唔可以憑虎膽龍威去過到呢一關… 我戴上虎頭頭盔，企喺中圈前面，望住前面未出圓柱機關嘅空地…深吸一啖氣，就遞起右腳…而就係我右腳一踏出中圈… *機關聲效 圍住我嘅23個圓圈機關啟動！23條圓柱升起！23個龍頭即刻向我噴火！ *噴火聲效 我嚇到即刻縮返入中圈！龍頭先停止噴火，縮返入地底… 牌匾嘅「大」字又少一劃，變做「人」字…門又收窄咗少少…即係我得返兩次機會咋… 點算好呢？唔係虎？唔通係龍馬精神嘅馬？定龍蛇混集嘅蛇呢？定係龍鳳呈祥，以雞扮鳳？ 定係…根本同四字詞無關？ 除咗嗰「辰龍天下，何肖可安身？」呢九個字仲有咩提示呢…12生肖…12生肖… 啊！我記得狗面人身嘅阿努比斯怪物坐喺龍椅上面，佢面前有12張枱，但得11位食客，而嗰11位同佢一樣都係獸面人生嘅怪物…佢哋加埋就係12生肖，所以嗰12張枱得一張枱無人坐，而因為阿努比斯怪物係狗面，所以嗰11位食客就係差狗呢一個生肖！ 咁樣推斷，一定係「狗」！ 所以，我果斷拎起狗頭頭盔，然後行出中圈！ *機關聲效 23個圓圈又升起23條圓柱同龍頭，得返兩次機會，呢次一定要無事，一定要啱啊！ *噴火聲效 嘩！又錯！ 我嚇到跌返入中圈…狗頭頭盔就跌咗喺地面…然後粉碎咗… *機關聲效 牌匾上面嘅「人」字又少一劃，得返「丶」 *關門聲效 門又收窄…我得返最後一次機會…再錯嘅話我一係被火燒死，一係一世留喺呢度… 究竟仲有咩提示啊！ 我不斷望張枱同每一個生肖頭盔，都係無發現…圍住我嗰24個圓圈又距離我大遠…我只係睇到其中23個圓圈有筆劃喺上面，而嗰23個筆劃可以組成甲辰龍年嘅辰龍兩個字… 我再詳細去望嗰24個圓圈，無筆劃嘅圓圈正正就喺11點鐘方向。24個圓圈，12生肖，11點方向...究竟有咩提示呢...我諗到頭都大曬...都係諗唔到...決定打座！用冥想嘅方法去感受宇宙比我嘅訊息！所以，我盤膝席地而座！慢慢思考24個圓圈，12生肖，11點方向嘅關係！ 24個圓圈...12生肖...11點方向... 24個圓圈...12生肖...11點方向... 唔小心...瞓著咗添...雖然我感受唔到宇宙嘅訊息...但我感受到宇宙嘅能量！因為！我熱醒咗！呢個空間係遮無掩，大大個太陽喺上面曬落嚟...熱死人咩...我企起身用手擋一擋個太陽，陽光直射落我身上，整出一個長長嘅倒影，向我後方伸延開去...其實依家幾點呢？ 太陽喺呢個位，我個影喺我身後8點方向嘅位置...慢慢伸延到去24個圓圈嘅其中一個度... 呢個情況...有啲似小學學過嘅日晷喎！即係用太陽嘅位置去知道每日嘅時間！ 呢度咁啱有24個圓圈，而一日有24小時，無筆劃嘅圓圈，喺12小時嘅時鐘嚟講，係喺11點方向，但如果轉做24小時制，即係以日晷方式去表示嘅話，呢個位置就係亥時嘅位置！ 如果要套落去12生肖，亥時所屬嘅生肖係豬！ 唔通佢提示我要戴豬嘅頭盔？ 得返最後一次機會…搏下啦！ 我戴起豬頭頭盔…深吸一啖氣！然後行出中圈！ *機關聲效 23條圓柱升起...23個龍頭全部對住我...然後...每條龍嘅口都！ *噴煙聲效 噴煙！？係噴煙，唔係噴火啊！即係我無事？即係23條辰龍嘅天下，得豬可安身？ 但危機仲未解除...因為我前面度門慢慢收窄緊！我要喺佢閂實之前衝過去！不過距離太遠，豬頭頭盔太重，我好似趕唔切啊！ 突然之間，龍頭停止噴煙，跟住所有煙霧向我衝埋嚟！準確嚟講係向我對腳衝埋嚟，再喺我腳底聚集...我慢慢被煙霧整到升起咗，我再望向腳底，啲煙霧變成一個筋斗雲！然後佢帶我極速衝向前面度門！ 歌：CHA-LA HEAD-CHA-LA（七龍珠Z 主題曲） 就係咁...我好似變成《龍珠》嘅孫悟空坐上筋斗雲成功喺天門閂埋之前衝關成功！然後筋斗雲散去，阿努比斯怪物同另外嗰11隻怪物同一時間望住我，動漫女仲喺鼎入面，不過時間得返23分鐘！我唔可以再等啦！ *念刀聲效 我整出一把有史以嚟最強大嘅念刀！準備衝向坐喺龍椅上面奸笑嘅阿努比斯怪物！ 而嗰11個生肖頭人身嘅怪物，其中老鼠、兔仔、羊就嚇到縮埋一邊，而牛、馬、豬、雞就不斷咁驚叫，但係龍、虎、蛇、猴就好勇猛咁向我迎擊！仲好有默契咁諗住前、後、左、右圍攻我！呢個時候，我要洗出輝刀流最終奧義！圓刀輝刀！ *奧義聲效 我兩隻手揸住刀柄，舉到心口位置，然後激發最強大嘅念力，以自己做中心，向右旋轉，我劃出完美嘅孤度！再不停轉圈，向衝埋我度嗰4隻怪物斬擊！ 結果！嗰4隻怪物就被我圓月輝刀打敗！ 淨底嘅生肖怪物好驚，想逃跑去阿努比斯怪物身邊，可惜佢地唔夠我嘅念刀快！因為我嘅意念比一齊更快更狼更準！ 唔駛幾秒，11個生肖怪物就被我KO。 *拍手聲效 離我20米遠嘅阿努比斯怪物拍手，然後對我奸笑，我終於可以面對final boss！ 我將念刀刀柄收喺左腰旁邊，座低身，以拔刀術嘅姿勢對住佢，我得返嘅念力唔多，所以我決左用壓軸一招！我全速向佢衝過去，然後對住佢，好有氣勢咁大叫：輝刀流究極奧義！拔刀術之一念無明！ 阿努比斯怪物無做任何防守動作，好似想乖乖就範，我拔出念刀，由左下往右上對住阿努比斯怪物嘅頭斬擊！而就係我嘅念刀準備斬到佢嘅時候，佢先伸出雙手，我以為佢想雙手接實我嘅念刀，但原來佢係使用念力，我聽到一聲巨響喺下面傳上嚟，跟住我眼前嘅地下突然凹陷！變成懸崖啊！ 音樂：BEAT FRIDAY - BLANKET、BEP、thing、MINUS DAY 真三國無雙OST 歌：Aimer「残響散歌」（動畫「鬼滅の刃」遊郭編 片頭曲） Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S1 Ep 16期間限定 100% FF 遊記 - 「Shinjuku 新宿故」Dream 04
【Zip噏劇場】期間限定 100% FF 遊記 - 「Shinjuku 新宿故」Dream 04 *念刀聲效 就係斬擊七海大師嘅一刻，呢個異空間慢慢破裂，而七海大師笑住同我講 七海大師：你要多謝嘅係你自己。 然後，佢就化成灰，消失喺呢個異空間之中。 跟住，我並唔係返到去原本嘅古代客棧，而係出現喺一個中式古代皇宮門前。呢度門上面有一個牌匾，寫住「人」字。 然後，我用力推開度大門 *推門聲效 我就見到呢個三進式嘅古代皇宮嘅深處，狗面人身，同埃及死神阿努比斯一模一樣嘅怪物坐咗喺龍椅上面，旁邊就喺困喺閘入面嘅動漫女，而龍椅前面嘅大廳中間就有一個鼎。鼎嘅左右兩邊各有6張枱，但只有11位食客，而呢11位食客同怪物一樣，都係動物樣人嘅身體…呢12個人嘅樣夾埋…就齊晒12生肖！ 而動漫女無咗知覺，阿努比斯將閘打開，將昏睡嘅動漫女拎出嚟，將佢帶去鼎前面，然後就用厚厚嘅蜜糖塗混佢全身，就將佢放入鼎入面，再蓋上。 之後怪物喺鼎上面嘅計時器，輸入50分鐘， *計時器聲效 然後個鼎慢慢發熱...慢慢出煙...做咩啊！？煎焗金蠔？定整豬肋骨啊！ 成個畫面太恐怖同奇怪，怪到我忍唔住大叫：放咗佢！！！ 12隻怪物同一時間望向我度，然後阿努比斯怪物對我奸笑，仲伸出隻右手，跟住皇宮嘅三度大門全部閂晒！ *大門關上聲效 X 3 如果要救動漫女，我就要喺計時器完結之前打低阿努比斯！ 所以，我即刻推開皇宮第一度「人」嘅大門 *推門聲效 喺我眼前係一個過萬尺嘅空間，50米以外就有第二度門，門上面嘅牌匾寫住「地」字。而呢個空間左右兩邊各有5間房並排對齊，但意外地一個人都無…為咗防止敵人偷襲 *念刀聲效 我整出一把「念刀」，護喺自己身前！但我只係踏出咗一步，就觸發到機關啦！ *機關聲效 10間房嘅房門同時打開！ 然後... 有5隻一度門咁高咁闊嘅粉紅色毛蟹由左邊5度門慢慢打橫行出嚟！ 呢刻嘅呢個情景十足十細個玩乜乜樂園，打啲橫移嘅蟹嘅小遊戲，每打到一隻就會有分，分數越多就會越多飛。 不過呢5隻毛蟹各自行到佢哋嗰行嘅中間位置就停低咗… 我小心翼翼行到第一隻粉紅毛蟹前面，佢對眼合埋咗，無論我係前面點郁都無反應。喺佢身後面嗰4隻都係一樣唔郁就咁企咗喺度。唔通呢5隻毛蟹只係靠嚇？ 既然係咁，我就唔理佢地，向第二度門，即係「地」門方向行過去。但就喺我經過第一隻粉紅毛蟹嘅時候，突然！ *機關聲效 呢5隻粉紅色毛蟹突然左右橫移，而第一行嗰隻毛蟹向我快速衝埋嚟！我閃唔切，唯有 *念刀聲效 用念刀將佢斬開！ 我即刻行到第一行同第二行嘅中間 *機關聲效 然後，左邊第一間房又放返一隻蟹出嚟！但依家呢5隻毛蟹橫移嘅速度係之前嘅一倍！ 如果斬開一隻蟹，就會出返一隻蟹，而速度就會快一倍，咁如果用青蛙過河嘅方式，避開晒啲蟹呢？ 就喺第二行嗰隻毛蟹由中間移去右邊嘅瞬間，我極速衝過第二行！佢好似發現我，所以即刻向我衝埋嚟，不過好在距離夠遠，我避得切！ *機關聲效 吓！難道又升級！啲蟹嘅速度又快多一陪！即係避又死，斬佢地又死！咁唔理啦！ *念刀聲效 斬晒佢地！再一次過衝去「地」門啦！ 我激發出強大嘅念刀！等前面三行嗰三隻毛蟹連成都直線，我就跳起，同時將念刀舉起！然後大叫：輝刀兩斷！ 輝刀，係解我阿輝嘅念刀，同時食揮刀嘅意思！兩斷，代表我要將所有毛蟹一刀兩斷！ 呢個招式名，型唔型先？ *斬殺毛蟹聲效 我用英雄式落地嘅同時，前面嗰3隻毛蟹都被一分為二！ *機關聲效 不過依家唔係扮型嘅時候！因為我要喺再出毛蟹之前衝去「地」門！ *毛蟹橫移聲效 我喺第三行嘅毛蟹出嚟之前成功衝過第三行！然後我衝向第四行嘅同時，望向第四行左邊嘅房門，第四行嘅毛蟹用比之前快4倍嘅速度向我衝埋嚟！就喺佢就嚟鉗到我之際，我一個前滾翻避過咗佢！ 跟住，我就聽到一聲大叫！聲音喺第5行左邊嘅房間發出嚟！我跟住聲音方向望過去… 房入面竟然有一隻類似《寵物小精靈》嘅傻鴨嘅生物，拎住一個遊戲手掣大叫！我同佢四目交投，跟住佢就衝咗去「地」門前面，對我狂撳手掣！然後推開「地」門入咗去！ *機關聲效 *毛蟹出動聲效 2,4,6,8,10…嘩！突然之間，有幾十隻…唔止啊…係幾百隻粉紅色毛蟹向我衝埋嚟！多到我無可能避到！ 睇嚟…我要出新絕招啦！ *強大念刀聲效 「揮刀流！之斷蟹！」 歌：林峰《馴獸師之王》（數碼暴龍 3 馴獸師之王 粵語 主題曲 OP） （喘氣聲）雖然用咗唔少念力，但我都成功將所有粉紅色毛蟹解決晒！然後，我推開「地」門，就見到嗰隻傻鴨企咗喺中間！佢旁邊有一張石枱，枱上面放咗12個生肖頭盔。我笑住行埋去，佢就好驚咁望住我，佢再不斷狂撳遊戲手掣，可惜…得幾隻粉紅色毛蟹可以翻過城門同城牆跳入嚟。但都一一比我用念刀解決咗。當我行到傻鴨前面，我先發現原來中間位置除咗一張石枱同12個生肖頭盔，地面仲有一個大圈圈住我哋，而外面就有24個一樣大嘅大圈圍住我哋呢個中圈。而傻鴨就驚到腳震震，我諗住用念刀解決佢，點知係我出念刀之前，佢拎咗一個龍形頭盔，衝出中圈！ 而就係佢衝出中圈嘅時候，又有機關嘅聲音！ *機關聲效 有23個圓柱喺外面嘅圓圈中間升咗上嚟！每條圓柱都有一個龍頭！傻鴨無理咁多，就咁戴住龍形頭盔衝向第三度門-「天」門！ 可惜… 嗰23條龍突然向傻鴨噴火！ *噴火聲效 就係咁…傻鴨一秒之間就變咗烤鴨… 而嗰23個龍頭同圓柱就縮返入地下，好似乜事都無發生過咁… *關門聲效 而原本開住嘅「天」門…就向內收…入口變窄…而嗰「天」字，就少咗頭頂嗰「一」，變成「大」字… 我望一望我身邊嘅石枱，枱上面得返11個生肖頭盔，頭盔旁邊刻上「辰龍天下，何肖可安身？」九個字。不過辰龍嘅辰，唔係神先嘅神，而係甲辰龍年嘅辰。 我再細心留意外面嗰24個圓圈，每個圓圈平均相隔15度。其中23個圓圈有啲類似筆畫嘅符號。最近「天」門，即係我正北方12點方向嘅第一個圓圈上面，係「一」，向右順時針方向數嘅第二個圈上面係「丿」，第三個係「一」，第四個都係「一」。按呢23個筆劃順序，就可以寫到甲辰龍年嘅「辰龍」出嚟。 我望住打開咗嘅「天」門，再望石枱上面嗰句「辰龍天下，何肖可安身？」 我嘗試行出正中間嘅圓圈，就喺我踏出第一步 *機關聲效 嗰23個有筆畫嘅圓圈再升起23條圓柱，每條圓柱都有一個中式龍頭，而呢23個龍頭都面向我，向我噴火！ *噴火聲效 我嚇到即刻縮返入正中間嘅圓圈，嗰23條龍就停止噴火，然後縮返落地… 睇嚟…「辰龍天下，何肖可安身？」嘅意思，就係要戴住啱嘅頭盔，嗰23條龍先唔會向我噴火。 而原本開住嘅「天」門…就得返3劃，變成一個「大」字，再根據我目測…啱啱向內收嘅角度大概係90度嘅¼…即係大概22.5度…即係話再過3次機會…度門就會閂實晒… 11個生肖頭盔，得一個可以安全無事…3次機會…我應該試邊一個生肖頭盔呢？ 歌：SawanoHiroyuki[nZk]:TOMORROW X TOGETHER 『LEveL』（《我獨自升級》片頭曲） Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S1 Ep 15期間限定 100% FF 遊記 - 「Shinjuku 新宿故」Dream 03
【Zip噏劇場】期間限定 100% FF 遊記 - 「Shinjuku 新宿故」Dream 03 鐘上面時間，係一組組不停轉動向前流動嘅數字組合。如果無人去創造事物，當刻嘅時間只係一堆無意義嘅數字。所以，時間嘅英文 Time，入面有I 亦有 Me，代表時間由人去定義，嗰組數字有咩意思，就係睇當刻人類創造咗點樣嘅記憶。 而西班牙超現實主義畫家-達利嘅「記憶的堅持」，雖然話靈感來自太太食緊融化緊嘅芝士，再將形態變成陀錶。但融化緊嘅陀錶喺畫作入面只係顯示指定嘅時間，究竟嗰個時間有咩意義？有咩回憶？想堅持啲乜？點解當刻係永恆？就要問米搵返達利上嚟先知道。 而七海大師帶咗我入類似達利名作「記憶的堅持」嘅異空間，傳授我用念創造念刀嘅方法。 佢話：「以氣御劍。氣由念發，念由心生。」 佢要我駕御所有慾念同情緒，創造念刀，打爆晒呢個空間所有鐘，就可以出去打狗面人身嘅怪物同救動漫女。而喺我面前，就有好多嗰軟鐘，每個鐘都有唔同顏色同時間… 例如呢個暗黃色鐘，顯示住11:14分…係我同第二個女朋友一齊嘅時刻，可惜我出軌然後分手…我一直都欠佢一句對唔住… 對唔住… *激光劍聲效 而另一個鐘就大少少…顯示住11:28分…喺我再前一個女朋友同我講分手…不過佢係第6次同我講分手，做返朋友…如果重要嘅事要講3次…睇嚟我對佢嚟講真係一個好重要嘅朋友…然後，我亦喺嗰刻知道，佢瞞住我出軌…嗰一刻我知世個世界係要還嘅…我曾經對人唔好，依家到人對返我唔好…我一直覺得佢欠我一句「對唔住」 *激光劍聲效 而呢個鐘係深黑色，時分秒針都係筆嘅形狀，時間顯示住20:17分…係我人生第一次跟導演寫劇本，但完全跟唔上進度，每晚寫野但每份野都被批評到體無完膚然後就怕咗寫野…直到幾年前先敢拎返枝筆，明白導演所鬧嘅野，其實係啱同有道理…我欠佢一份好嘅劇本… *激光劍聲效 斬完呢三個鐘之後，有兩個更大嘅鐘出面喺我面前！兩個鐘都係七彩繽紛嘅顏色！一個顯示住19點19分同12點23分…一個係父母分開嘅時間…一個係我爸爸話無力養我嘅時間… 七海大師：鐘越大，代表記憶越深。所需要嘅念亦越多，放下嘅力量就要越強。 達利有一系列以櫃桶為題嘅創作，佢受佛洛伊德嘅哲學理論影響。內容大致係講人嘅記憶唔會消失而係會放入一個個櫃桶入面。當呢啲櫃桶打開，記憶、情緒就會釋放出嚟…其實我知道呢兩件事影響得我好深同影響我嘅行為…但估唔到呢刻具象化出嚟，原來陰影係咁大…係時候放下啦。 *強大激光劍聲效 所以，我激發出好強大嘅念刀，將呢兩個鐘斬開！ *鐘破裂聲效 估唔到斬開之後，就出現一個細鐘，上面有笑哈哈嘅公仔，至於顯示出嚟嘅時間，就係好多年之後我爸爸同我講：「對唔住，你係咪好嬲我」呢句說話。我諗笑哈哈嘅公仔唔係代表佢笑住同我講呢句說話，而係佢講完，我終於可以對住佢笑。 七海大師：睇嚟你已經掌握到念刀嘅竅門。咁唔知接住落嚟嘅鐘，你又有無能力斬開呢？ 七海大師一講完，就有好多個更大而顏色係血紅色嘅鐘出現！有啲好似戲院銀幕咁大！有啲有幾層樓咁高！有啲係數字鐘，有啲係跳字鐘，有啲鐘上面嘅數字唔係阿拉伯數字，而係其他文字！至於顯示嘅時間有好多！有個係6點20分，有個係7點05分…有啲係20點19分…好多好多個鐘！多到我數唔晒！ 七海大師：嚟啦！將你所有嘅念激發晒出嚟啦！ *激光劍聲效 歌：自動勝利 *喘氣聲效 我幾經辛苦…終於將喺我面前所有鐘都斬開晒…但係呢個異空間仲未消失… 我：七海大師…你唔係話只要我斬晒所有鐘就可以離開呢度咩？ 七海大師：無錯。 我：咁點解？ 七海大師：因為，你面前仲有最後一個鐘囉。 七海大師一講完，佢就將佢條黃色底斑馬紋嘅呔同埋件恤衫除咗落嚟，露出一身肌肉之餘，仲有一個鐘係佢左邊心口嘅位置。嗰個鐘顯示住11點12分，而日期係1988年… 然後七海大師就開始唸心經…直到呢一句 七海大師：無無明，亦無無明盡。無老死，亦無老死盡。 我：我記得你講過，無念先係正念。要做到無我，就要放下自己。 七海大師：咁你準備好面對自己未？ 我：準備好啦。 *強大念力聲效 我：多謝你，七海大師。 *激光劍聲效 *鏡破裂聲效 就係斬擊七海大師嘅一刻，呢個異空間慢慢破裂，而七海大師笑住同我講 七海大師：你要多謝嘅係你自己。 然後，佢就化成灰，消失喺呢個異空間之中。 跟住，我並唔係返到去原本嘅古代客棧，而係出現喺一個古代皇宮。我用力堆開開，就見到皇宮嘅盡頭有一張龍椅，龍椅上面就係狗面人身嘅怪物，旁邊就係被困喺閘入面嘅動漫女。 最後嘅一戰，終於要開始啦！ 歌：神聖放逐樂隊《我的戰爭》（《進擊的巨人》The final season part 1 片頭曲） 【Zip噏劇場】期間限定 100% FF 遊記 - 「Shinjuku 新宿故」Dream 03 阿攝 飾演 阿輝 梓豪 飾演 七海大師 編劇及製作 阿攝 音樂 BEAT FRIDAY Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S1 Ep 14期間限定 100% FF 遊記 - 「Shinjuku 新宿故」Dream 02
【Zip噏劇場】期間限定 100% FF 遊記 - 「Shinjuku 新宿故」Dream 02 動漫女帶咗我入一個古代客棧嘅異空間已經好奇怪…更奇怪嘅係...突然有一隻狗面人身，外貌同埃及神話嘅死神一模一樣嘅怪物破門而入，呢隻阿努比斯仲用類似魔法嘅能力，變出好多道閘，困住動漫女再將佢帶走！ 我想用劍劈佢，但把羊蹄甲劍尾，紅花劍柄嘅劍竟然無劍身…怪物對我冷笑咗一聲，就再變一道閘困住我…我完全唔知發生咩事…求救無門嘅時候…突然，有一個著住西裝嘅男人，伸出拳頭，然後就有一道黑光由拳頭射出嚟，打爆咗度閘！ 跟住，佢行入嚟同我講：「你想救佢？就要睇下你嘅念…有幾強啦？」 *懸疑音樂 呢把聲音低沉嘅男人一頭金髮，戴住護目眼鏡，著住藍色恤衫，打咗一條黃色底斑馬紋嘅呔…十足十《咒術迴戰》七海健人嘅造型！然後我再望一望我身處緊嘅空間…係一間古代客棧，我嘅造型就同《仙劍奇俠傳》李逍遙造型係一樣…狗面人身嘅怪物搶走動漫女嘅情節…亦同《仙劍奇俠傳》嘅劇情類似…狗面人身怪物…《仙劍奇俠傳》…《咒術迴戰》嘅七海健人…呢啲名…咪就係動漫女喺列車上面問我奇怪問題然後我答嘅答案？ 迷之男人：你係咪想救佢？ 我：你…係邊個？呢度又係邊度？ 迷之男人：我係邊個唔重要，呢度係邊度都唔重要。重要嘅係，你想唔想救佢？ 我：我連自己都救唔到自己，我仲點救其他人啊？ 迷之男人：你點入嚟，就點出去。佢係你入嚟嘅原因，救到佢，自然可以離開呢度。 我：點解狗面人身嘅怪物要捉走佢？點解你又要幫我？ 迷之男人：相由心生，眼前嘅一切如夢幻泡影。我係你，你亦即係我 我：好啦好啦，唔好再講佛偈啦… 迷之男人：咁執起把劍，然後跟我嚟。 我：嗰把劍？無劍身架喎有咩用？ 當我講完，呢位七海健人造型嘅佛偈男執起劍柄，然後… *激光劍聲效 無劍身嘅劍柄突然發出一道白光，變成一把激光劍！ 迷之男人：以氣御劍。氣由念發，念由心生。 跟住，佢用激光劍憑空𠝹出一度門！ 迷之男人：跟我入嚟。 *關門聲效 我跟咗呢位七海大師入咗另一個異空間，入面係一個沙灘，然後有好多個軟鐘掛喺石頭或者樹上面…十足十西班牙著名畫家達利嘅名作 - 《記憶的堅持》… 七海大師：拎住把劍，用念激發出氣，再整出武器。好似我頭先咁。 我：啊七海大師，你講就易，我只係一個普通人…咩都唔識架… 七海大師：咁你識唔識嬲？ 我：識… 七海大師：咁你拎住劍柄，諗一件好嬲嘅事。 好嬲嘅事…嗯…被前女友不明不白咁飛咗…應該係我近期好嬲嘅事嘅… 好…就諗起佢嗰樣，再諗起佢同我講分手嘅嗰一刻… 「啊！」 結果…係乜都無架… 七海大師：睇嚟，你已經放低咗你前女友，所以就算你點諗起佢，都無法激出嬲嘅念。 嬲嘅事…被上級ban橋？或者寫咗一個自以為好嘅故事，但因為種種因素唔可以實行？ *激光聲效 終於！我可以激發到少少嘅激光！不過係淺黑色嘅…而長度同闊度…只係一支牙籤咁幻咁長… 七海大師：念有好多種。黑色係怨念，越黑，怨念越高，最黑嘅念就係惡念邪念。 我：所以…即係我對於嗰幾件事…其實唔係好怨同好恨？ 七海大師：可以咁講。依家，你試下諗一件「想入非非」嘅事。 「想入非非」？即係… *激光強大聲效 嘩！我激發出一個把好粗好長嘅刀身！而激光係黃色架！ 七海大師：黃色代表淫念。睇嚟你腦入面有好18禁同好大膽嘅想法。 我：嘻嘻… 我尷尬笑咗一笑…不過呢把黃色嘅激光刀好快就無咗… 七海大師：呢種念嘅持久力唔長。所以好快就會消失。 我：咁我想問…白色激光係邊一種念？ 七海大師：係無念。只有無念，先至係正念。 我：咁…我點樣先可以出到無念刀？ 七海大師：將你腦入面嘅所有念，不論係邪念、怨念、淫念，不斷思考，不斷發射，透過呢個不斷嘅過程，了解自己，釐清自己，知道自己點解喜歡，點解愛，點解抱怨，點解憎恨，經過理解、分析，就可以再構成，創造出各種念刀。成功擁有各種念，就可以放下，達至無嘅狀態。 我真係無改錯七海大師呢個名…果然超多佛偈…不過我又好似明白佢講咩…因為同《鋼之鍊金術師》嘅理念相近…亦係呢個世界創作嘅過程。你要先對世事有感覺，觸動到自己，先可以創作出有血有肉嘅作品…而煩惱同怨恨一樣…因為世上冇無緣無故嘅恨…凡事都必有因… 七海大師：既然你明白，就可以開始啦。目標係將呢個空間嘅所有鐘打爛晒，你就可以離開呢度，出發去挑戰狗面人身嘅怪物同救動漫女。 我：咁好易啫！我實在有太多野可以愛同可以恨啦！ *激光聲效 歌：MAN WITH A MISSION×milet「絆ノ奇跡」 （鬼滅之刃 锻刀村篇OP 主題歌） 【Zip噏劇場】期間限定 100% FF 遊記 - 「Shinjuku 新宿故」Dream 02 阿攝 飾演 阿輝 梓豪 飾演 七海大師 編劇及製作 阿攝 音樂 BEAT FRIDAY Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S1 Ep 13期間限定 100% FF 遊記 - 「Shinjuku 新宿故」Dream 01
以一身王家衛《重慶森林》電影林青霞所演嘅角色造型出現嘅動漫女問完我好多奇怪嘅問題之後，佢帶咗我入機場列車其中一格洗手間…仲喺我耳邊叫我做《回到最愛的一天》男主角合埋雙眼，緊握拳頭達至時空穿梭嘅動作。由於佢嘅一言一行太古怪，所以我半眯雙眼，然後就望到佢對住洗手盤上面嘅鏡笑住講：Enjoy the show! *吸入聲效 跟住…就好似有一度無可抵抗嘅力量，將我吸入馬桶嘅去水位度！ *足球比賽聲效 *吹哨子聲效 足球旁述：完場！港隊事隔55年再次晉身亞洲盃決賽周，雖然第一場比賽最終以1:3不敵上屆4強分子嘅阿聯酋，不過成場賽事表現得非常好，面對世界排名比我哋高好多嘅對手都無怯場！而港隊喺呢場比賽攻入嘅入球，係亞洲盃嘅第一千個入波，港隊成為包辦亞洲盃歷史第一球同第一千球嘅球隊！ 動漫女：「港隊踢得好好啊！好想去到現場支持啊！」 呢把聲…係動漫女嘅聲… 動漫女：「波就睇完啦！快啲同我捉埋盤棋！照舊，被人食咗一隻棋就要除身上有嘅一樣野～你要小心啲，如果唔係，我又會將你變做韓國明星 - 李光洙啊！」 明明我原本喺列車嘅洗手間，點解會出現喺呢度架？ 而出奇地，我身處嘅空間…唔係我屋企，亦唔係任何一間酒店房…而係一間古代客棧！一間有得睇亞洲盃嘅古代客棧！ 而動漫女嘅裝扮由《重慶森林》嘅林青霞…變咗做《鹿鼎記2之神龍教》嘅林青霞嘅古代造型…長直順滑嘅頭髮…加上薄紗圍住身體…十足十韋小寶同龍兒練功嗰一幕… 而我…就一身古裝武俠嘅打扮… 我比眼前嘅情景嚇親…唔通…又係發夢？ 動漫女：「我行咗，到你啦！喂！專心啲啦你！」 我：「哦…」 動漫女：「點會行呢一步架你！將軍！抽車～無棋啦你！」 我：「咁…我應該點做啊？」 動漫女：「你~要做光洙啦～」 之後，佢慢慢伸隻手埋嚟，想除我件斗篷之際，突然！ *破門聲效 有人破門而入！喺客房嘅門有一隻狗面人身嘅怪物出現！佢有一對長長嘅耳朵，好尖嘅犬齒，成個外型好似埃及神話死神阿努比斯！然後佢奸笑咗一聲，就舉高兩隻手，然後！ *落閘聲效 佢憑空變咗好多道閘出嚟！困住咗動漫女！然後佢好似用念力，將動漫女喺客棧變走咗！ 成個劇情好似《仙劍奇俠傳》趙靈兒喺仙靈島被人捉走嗰一幕！ 跟住…呢隻狗面人身嘅怪物想走！我即刻拎起身旁嘅劍！然後想拔出一劍劈落去！ 點知…呢把羊蹄劍尾，劍柄呈紅色花形嘅劍原來係無劍身嘅！ 我呆咗…狗面人身怪物冷笑咗一聲，然後再用念力變出一道閘，將我鎖住喺房… 究竟發生咩事啊… 有冇人可以救我啊！ 【Zip噏劇場】期間限定 100% FF 遊記 - 「Shinjuku 新宿故」Dream 01 *腳步聲效 *儲氣聲效 *鐵閘破壞聲效 迷之男人：「你想救佢？就要睇下你嘅念…有幾強啦？」 歌：Eve《廻廻奇譚》（《咒術迴戰》第一季主題曲） Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S1 Ep 12期間限定 100% FF 遊記 - 「Shinjuku 新宿故」Final Day
*花灑聲效 *歌：【YOASOBI】紅白「アイドル」ついに日本の音楽番組初披露！スペシャルステージ！【紅白】｜NHK （https://www.youtube.com/watch?v=mCy4QQfoZqE） 我坐咗喺酒店房嘅浴缸，浴簾外面嘅電話播放住1月1日紅白歌合戰Yoasobi 同一眾日韓偶像表演《Idol》嘅片段，而大廳嘅書枱有一部晾起咗嘅電話同一個之前喺秋葉源抽嘅陀螺… 喺我沖涼之前，我再三確認咗幾件事， 第一：尋日真係1月1號 第二：我尋日所睇到嘅歌唱表演真有其事，今日網上面比紅白嘅表演洗版，尤其係Yoasobi 嗰段《Idol》 第三：我打咗去服務台，職員話比我知有人幫我交咗咁多日嘅酒店房錢，同埋每日都有一日女仔上嚟睇我嘅情況…我估就係嗰位動漫女？然後職員表示最遲今朝11點就要check out 第四：呢段時間，唔太多人搵我。就算搵我，都係關心我嘅感情狀況。不過佢哋怕我傷心，所以都係講幾句而唔敢打擾我 第五：我檢查過身體無任何傷痕…我想問職員拎閉路電視片段，但無呢個膽量… 第六：學《潛行空間》李安納度迪卡比奧嘅角色咁，轉嗰陀螺，睇佢會唔會停，結果真係停咗 最後…我又打又搣咗自己好多下，真係會覺得痛 綜合以上嘅結論，我應該唔係發夢，但點解我會由23年11月一下子就瞓到24年嘅1月？ 我浸喺浴缸度思前想後，唯一嘅原因係動漫女請我飲嗰shot威士忌。因為我飲完就進入咗紅白歌合戰嘅現場。所以，只要搵到動漫女就可以解釋到喺我身上發生嘅怪事。不過新宿咁大，要搵佢出嚟真係同等到《全職獵人》嘅結局一樣，接近無可能…加上一陣就要退房…所以，我當發咗一場夢…沖完涼就訂即日嘅機票返香港… *JR聲效 雖然之前訂好咗同前度來回東京嘅機票，但因為佢喺出發前同我講分手，又咁啱我喺2023年嘅工作已經完成，所以我喺出發前同自己講想玩幾耐就幾耐，玩夠散晒心先返香港都未遲。因為一生人都無乜幾何任性，但估唔到呢次嘅任性竟然有咁嘅結局…我喺去機場嘅JR度努力回想緊呢6日發生嘅事…撇除最尾嗰一晚喺Blue Note 嘅奇遇，其他都係正常旅行可以發到到嘅事啊…除咗… 除咗離開河口湖之後，發現富士山頂冠雪比去之前多咗好多…同離開六本木森大廈之後，地面竟然有好多聖誕裝飾… 究竟點解呢？ 就喺我苦思嘅時候，有一個著住杏色長袍，留咗一頭金色捲髮，戴住一副紅色框太陽眼鏡嘅女仔喺我對面坐低咗。佢對住我笑，但我完全不明所以…跟住，呢個成身王家衛電影《重慶森林》入面林青霞造型嘅女仔拉低副眼鏡，眼定定咁望實我，然後我就認得出佢就係嗰位動漫女！ 殊… 佢示意我唔好咁激動… 然後我就細聲咁問晒所有我想問嘅問題！ 殊… 佢又再示意我唔好咁激動…因為激動就會好危險… 我深呼吸咗一下，想慢條斯理咁發問之際，佢反而開口問我問題，話我答晒之後先會解答我所有嘅疑問… 第一：最鍾意嘅RPG game係？ 我答：《仙劍奇俠傳》 第二：最鍾意睇嘅動作片係？ 我答：《John Wick》 第三：最鍾意嘅武器係？ 我答：日本武士刀 第四：最鍾意嘅人物造型係？ 我答：《咒術迴戰》嘅七海健人 第五：邊一套動漫作品嘅戰力設定係最喜歡？ 我答：《全職獵人》 「念」嘅系統咁完善，六個系又會互相相生相剋，一定唔會出現嗰啲整到嗰月球出嚟，或者打到地陷、地震、火山爆發嗰啲情景一定唔會喺《HUNTER×HUNTER》度出現。最緊要角色嘅成長係慢慢練出嚟，唔係突然之間無端端覺醒！「嘩！我打得贏啦！」 所以《全職獵人》嘅戰力系統係最好嘅。 第六：最深刻嘅怪物係？ 我答：狗面人身、半人半蛇 第七：邊一套電影嘅愛情情節最刺激？ 我答：《In Time 潛逃時空》男女主角喺床上面玩啤牌，輸咗要除一件衫嘅情節 第八：邊套時空穿梭嘅作品最喜歡？ 我答：《About Time 回到最愛的一天》 最後最想觀眾同你講嘅一句說話係？ 我諗咗一陣…就答 - 我好想觀眾同我講：阿輝，你嘅作品好正！好有創意。 啲問題咁奇怪嘅？動漫、電影、遊戲版嘅心理測驗？定呢方面嘅16型人格？ 而當答晒所有問題之後，動漫女反口喎...因為佢無講野，只係拉住我隻手，然後入咗車廂其中一個嘅洗手間…我同佢兩個人迫係同一格入面…佢靠近我…喺我耳邊細細聲叫我合埋眼…做《回到最愛的一天》男主角雙手揸實拳頭達至時空穿梭嘅動作…究竟呢位動漫女想點呢…佢嘅一言一行…加上身處呢個空間…好難唔令我亂諗嘢…所以，我扮合埋眼，跟住就望到佢對住洗手盆上面塊鏡，笑住講：Enjoy the show! 【Zip噏劇場】期間限定 100% FF 遊記 - 「Shinjuku 新宿故」Final Day 歌：凛として時雨《Abnormalize》（PSYCHO-PASS 心靈判官 第一季 主題曲） Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S1 Ep 11期間限定 100% FF 遊記 - 「Shinjuku 新宿故」Day 6 day dream
藍色巨星，一套我喺2023年睇過最好睇嘅動畫電影之一。佢未出動畫電影之前，我已經聽過呢套講爵士樂嘅漫畫。你無聽錯，係爵士樂嘅漫畫，用畫功、分鏡、樂手同觀眾嘅神情去令大家感受到爵士樂嘅作品，係一套無聲但你腦入面會有聲嘅漫畫。而我睇完動畫電影之後，決定今次東京之旅一定要去主角演出嘅爵士樂餐廳聽一次現場演出。 雖然我出發之前買咗兩張飛，雖然我前度喺出發前同我分咗手，但都無損我嘅雅興。7點嘅演出，我6點半已經到場，而門口外面已經有好多觀眾等入場。觀眾嘅裝束未至於好隆重，但都不失典雅，好在我今日都買咗一件smart causal 嘅西裝褸，否則真係會比人側目。 推開正門，牆上面掛咗一幅幅曾經喺度演奏嘅巨星樂手嘅相。行落一層就係接待處，比大家放低衫或者袋，令大家可以輕裝入場。每一位工作人員都著上正裝，談吐溫文爾雅，真係未聽表演都感到到嗰份認真同格調。而我入到演出嘅餐廳，一幕幕藍色巨星嘅劇情出晒嚟！ 侍應見我目定口呆企咗喺入口，以為我發生咩事…其實我只係幻想緊自己成為藍星巨星最後一幕主角喺呢度演出嘅其中一位觀眾啫。我尷尬對侍應笑咗一笑，然後佢就帶我去我嘅位置坐低，我嗌咗一杯old fashion 同一個芝士拼盤就等7點嘅來臨。 好快就到7點，嚟自美國，成軍多年嘅爵士樂團由其中一邊嘅入口登場，全場觀眾拍手歡迎。而團長無多餘嘅說話，只係叫大家好好享受。60分鐘嘅演出，一首首充滿自由同激情嘅樂章，由色士風、小號、bass、鼓、鋼琴演奏出嚟。我成日都話身體係最誠實，全場觀眾都跟住節拍郁動，有人合埋眼享受音樂，而我就目不轉睛望實每位樂手演出嘅神態，見到佢哋好陶醉表演，我好自然受到佢哋每下舉手投足影響，睇得更入神。而60分鐘嘅時間話咁快就過，我投入到完全唔記得自己嗌咗old fashion 同芝士拼盤…所以喺完場嘅時候，我一啖飲晒杯old fashion 同極速清晒啲芝士。而就喺我忙緊食同飲嘅時候，有一位侍應拍一拍我膊頭，我以為佢趕我走，但佢竟然放低一shot威士忌，再指向另一邊嘅座位，示意係對方請我飲嘅。我心諗咁好，無端端有人請我飲酒？所以我咪實對眼，向侍應生所指嘅方向望過去，跟住我呆咗…因為請我飲酒嘅…就係嗰位動漫女生… 我拎起隻杯，同佢點一點頭，然後一啖飲晒佢。呢杯威士忌好香好醇，加上係我好喜歡嘅煙熏味，好飲！而作為一個有禮貌嘅人，我就行上前向佢答謝。其實尋晚我瞓唔著覺，因為我不斷諗如果我可以再見返呢位動漫女仔，有咩問題一定要問佢。而今晚我竟然喺呢度撞返佢，佢仲要請我飲酒，即係一定認得我，同埋尋晚佢跑走呢件事，唔係錯覺同幻覺啦！今次佢做主動，唔會再跑走啦掛！ 但原來做人係唔可以坐定粒六，當我行前想去打招呼，佢竟然一個轉身走咗！ 大姐，你想點先？ 而吸受咗尋晚嘅經歷，我唔會比佢走甩twice ！所以我急步行過去！而動漫女無上去接待處嗰一層，反而向廚房方向行，我就死跟！所有廚師見到我都呆咗，不過我唔理，一直跟！而嗰位動漫女好似有《咒術迴戰》五條悟無下限術式咁…我好似唔可以追貼佢…而我穿過廚房之後，就見到佢推開一度門，入咗另一間房！我再快步追上去，一推開門，竟然係呢個畫面！ 我入到去一個日式庭園…地面點咗好多盞燈，而庭園最正中間…有一個黑色人影唱歌！ 呢個咪就係Ado? *畫面：【Ado】「唱」紅白に降臨！圧巻の歌声が響き渡る！【紅白】｜NHK （https://www.youtube.com/watch?v=S-UjN-SWpVc） 跟住全場燈光熄滅，下一秒著返嘅時候，我見到大型電子屏幕播住《男兒當入樽動》畫電影嘅畫面，然後10-Feet唱主題曲第零感！ *畫面：【10-FEET】紅白×「第ゼロ感」×『THE FIRST SLAM DUNK』と超スペシャルコラボ!｜NHK （https://www.youtube.com/watch?v=e85FbIFndMk） 唱完燈又熄咗，再開返之後，出現喺我面前嘅係Yoasobi 唱Idol ！不過出現嘅唔只係佢哋，仲有世界各地嘅偶像組合，例如女子校服超強舞團Avantgardey、超人氣女人偶像團隊櫻坂46、乃木坂46…仲有New Jeans等等嘅韓團！ *畫面：【YOASOBI】紅白「アイドル」ついに日本の音楽番組初披露！スペシャルステージ！【紅白】｜NHK （https://www.youtube.com/watch?v=mCy4QQfoZqE） 可以集齊咁多頂級音樂人演出…得一個地方，就係紅白歌合戰！但點解我會無端端出現喺度呢？ 就喺Yoasobi 神級演出之後，我喺其中一個角落見到嗰位動漫女，佢對我笑一笑，然後我衝過去大嗌：喂！究竟發生咩事！ 但佢對我啪一啪手指！我就… *鬧鐘聲效 我再醒返，已經喺酒店房張床上面…唔通我尋晚發夢？我捽一捽眼…拎起部電話…原來已經係下午嘅5點…睇嚟我真係發夢… *訊息聲效 Kinaka send message比我…同我講新年快樂？ 咩新年快樂啊…依家先至係11月…咩啊？今日係2024年1月1號？咁我咪即係瞓咗成兩個月？究竟發生咩事啊？ 【Zip噏劇場】期間限定 100% FF 遊記 - 「Shinjuku 新宿故」Day 6 day dream… 歌：King Gnu - ):阿修羅:( 本集景點： Blue Note 東京 https://maps.app.goo.gl/fq1AZHyCkDfeQWcq5 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S1 Ep 10期間限定 100% FF 遊記 - 「Shinjuku 新宿故」Day 5 night #2
*相機聲效 就喺我影緊相嘅時候，我透過一塊落地玻璃反射到後面嘅遠處出現一個人…嗰個就係我第一日嚟到新宿喺便利店撞到嘅動漫女仔！當我同佢四目交投之後，佢竟然迴避我嘅眼神，然後跑走咗！ 我當下唔識反應…佢跑走係因為佢認得我？但認得我其實唔駛跑走架？唔通佢怕我向佢搭訕？嗱，我自問我嗰樣都尚算正常，唔似係咩壞人啊？點解佢要咁驚呢？ 就係一連串疑問之下，我決定向佢跑走嘅方向行過去！而我眼尾望到佢嘅身影，佢入咗𨋢落地下！ 我知跟蹤佢會令成件事變得更詭異，但我唔理好奇心會唔會殺死貓，我順住自己嘅直覺，入咗另一部𨋢落地面！ *升降機聲效 話咁快我就由52樓落到地下，點知六本木森大廈嘅景色同我啱啱嚟嘅時候好似完全唔同曬，因為馬路兩傍嘅所有樹木全部著曬藍白色嘅燈。六本木一直都係東京睇聖誕燈飾嘅熱門景點，呢度嘅大型商場設置歐陸式嘅大型聖誕裝飾，而所有樹木都裝上超過數十萬嘅藍白色燈飾，令途人有置身於銀河嘅感覺。突然間，令我諗起香港海傍嘅聖誕燈飾。坦白講，香港嘅聖誕燈飾係童年回憶，就算欣賞咗好多年，但每年都要嚟睇吓，先覺得係過聖誕節。不過六本木嘅感覺好唔同，因為啲裝飾好近，近到你可以摸到咁。而正當我係被呢一片白色樹海吸引住嘅時候，我聽到不遠處有腳步聲，嗰位動漫女仔又出現！佢背住我，欣賞緊呢片白色樹海後面嘅東京鐵塔！ 佢戴住一頂紅色冷帽，圍住墨綠色頸巾，著住一條白色長裙，再加上一件黑色皮褸，同之前嘅文青造型好唔同。而佢定神咁望住景色嘅樣，又真係幾吸引。而我怕嚇親佢，所以我就匿埋喺其中一棵聖誕樹後面，望住佢。當佢緩緩轉身嘅時候，我就即刻縮埋，怕佢發現到我… 跟住，佢由六本木開始出發，沿住馬路一直向表參道方向行。而我…就好似無間道梁朝偉跟住劉德華咁，一直喺後面默默跟住佢。佢一路行，一路聽緊歌，唔知佢聽緊咩歌呢？All I want for Christmas is you? 定係Last Christmas 呢？ 呢個時候，我又拎部電話出嚟，學佢撳首聖誕歌嚟聽。 唔知我同佢會唔會咁啱聽埋同一首歌呢？ 哎吔！一諗到呢度，就覺得成件事更詭異。如果有傍人睇到我跟住佢，就一定會覺得係啲聖誕殺人恐怖片。而動漫女好似無發現我，因為佢好留心欣賞表參道嘅燈飾，仲不時露出驚訝嘅神情添。就係咁，我跟住佢由六本木行到去表參道，再行去原宿，嚟咗一程東京聖誕燈飾漫步，經過40幾分鐘嘅腳程，聽住一首又一首嘅聖誕歌，佢喺原宿站停低咗，再轉方向行去澀谷。 呢個時間已經唔多行人，成條街好似得返我同佢仲有啲聖誕裝飾…我其實都唔知要跟佢跟到幾時，只係知道咁樣跟住佢漫步，有啲浪漫，又有啲過癮。同一時間，我諗緊好唔好同佢打招呼…而諗下諗下，我哋就到咗《咒術迴戰》其中一個著名景點澀谷站。 我腦入面閃過好多愛情電影偶遇嘅情節、橋段同對白，不過計畫趕唔上變化…因為動漫女喺入閘前突然加速跑入閘！ 我即刻拎張西瓜卡啫入閘，然後好努力穿過重重嘅人群希望可以趕上去，就喺我差啲趕到之際，就發生最老土嘅情節…佢上到車，而我就仲留喺月台… 【Zip噏劇場】期間限定 100% FF 遊記 - 「Shinjuku 新宿故」Day 5 night part2 歌：羊文学 - more than words (Official Music Video) [TVアニメ『呪術廻戦』「渋谷事変」エンディングテーマ] PS. 圖：森ビル株式会社／來源 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting
S1 Ep 9期間限定 100% FF 遊記 - 「Shinjuku 新宿故」Day 5 night
*飲湯聲效 嘩！又真係幾好味喎！ *咀嚼聲效 我將隻戒指送咗比Kinaka，佢亦應承未來會搵機會將我嘅故仔寫出嚟，然後用返戒指做道具，兼會請我睇同有得任飲old fashion。對我同Kinaka 兩個嚟講，經過呢一次通宵嘅傾談之後，大家都可以將過去放低。而做人最緊要拎得起，放得低。所以，我同kinaka 放低完嗰段沉重嘅感情，就去拎起一樣好重嘅野，就係我面前用生鐵鍋裝住嘅餺飥麵。 餺飥麵係用味㬝去燉煮麵條同蔬菜嘅料理。聽落好似無乜特別，但當你聯想起呢咁多年嚟，住喺河口湖嘅人，都係自己搓麵團，再用啱啱新鮮摘嘅蔬菜去熬湯，所以我食緊嘅係嗰種from farm to table 嘅歷史味道。 當然，撇除我呢啲幻想嘅味道，碗麵又真係幾好味。首先，用上新鮮蔬菜去煮嘅湯非常鮮甜，加上燉到爛曬嘅南瓜，令碗普通嘅雜菜湯多咗另一種甜味。另外，闊長嘅餺飥麵係搓嘅時候無加鹽，係燉煮更易融出澱粉，令食起上嚟更濃稠。 係一個咁清涼嘅早上，可以食一碗熱辣辣又好味嘅麵，幸福感真係爆登！ 食完之後，kinaka 話要去附近嘅地點探其他朋友，所以我就一個人坐鐵路返新宿。今日天氣都好好，能見度都好高，但唔知係我眼花定錯覺，我眼前嘅富士山嘅山頂位置冠雪嘅位好似比尋日嚟嘅時候多咗好多。所以我就繼續聚精會神去望實呢座富士山，望下望下就瞓著咗覺… *列車聲效 返到新宿酒店已經係下午嘅時間。其實沿途一邊諗緊好唔好再去本身plan 好同前度去嘅地方，最後我得出嘅答案係 - 點解唔去呢？ 所以我就一支公出發去睇東京鐵塔啦。 浪漫嘅東京鐵塔，係好多愛情故事發生嘅勝地。無論係真人真事，定日劇情節，總之就比人一種好浪漫嘅感覺。但當年貴為全日本最高嘅建築物，喺2023年嘅時候，已經變成小矮人，但喺漆黑嘅夜空，呢座閃閃發光嘅鐵塔都好俱代表性同欣賞性。而我並唔係登塔，亦唔係喺塔腳下面欣賞東京鐵塔，而係去咗六本木一座樓高53層嘅建築物度遙望東京鐵塔。 呢座六本木嘅大廈最頂層係一間私人美術館，以藝術加生活做策展主題，好多當代出名嘅藝術家都有喺度擺展覽。不過我嘅美術天份就一般般，所以我選擇咗去52樓嘅展館。而一張門票，除咗可以比你欣賞展覽之外，仲可以喺嗰度透過一塊塊落地大玻璃望到東京鐵塔！呢個combo真係好聰明！而52樓嘅展覽都唔少野，分別係北斗之拳展同手塚治虫作品《怪醫黑傑克》50週年紀念展。我就揀咗怪醫黑傑克啦。 一入到去門口，就已經有一個大大嘅場景比你同黑傑克影相，不過呢啲都係基本做法，展覽最吸引嘅係嚴選咗140話連載，按照身世之謎、人命 vs 金錢嘅主題、動物、手塚角色客串登場等數十個關鍵字分類，並將漫畫原稿同故事大綱，由手拎漫畫嘅size 放大到牆紙咁大嘅size，呈現係眼前！就算我唔識日文，但都可以透過畫功、分鏡、人物嘅神情動作感受到作者嘅心思。呢啲先係真真正正嘅流行經典50年。成個展覽太多展品，多到我都唔記得咗外面嘅東京鐵塔。所以當我睇到攰嘅時候，就喺其中一塊落地玻璃前面坐低，用相機影出面嘅東京鐵塔。 *相機聲效 就喺我影緊相嘅時候，我透過一塊落地玻璃反射到後面嘅遠處出現一個人…嗰個就係我第一日嚟到新宿喺便利店撞到嘅動漫女仔！當我同佢四目交投之後，佢竟然迴避我嘅眼神，然後跑走咗！ 【Zip噏劇場】期間限定 100% FF 遊記 - 「Shinjuku 新宿故」Day 5 night 歌：King Gnu - カメレオン（日劇 - 《勿說是推理》主題曲） 音樂：Blue Giant OST - In search of… 本集景點： 1.不動茶屋（河口湖北本店） https://maps.app.goo.gl/RMMTNk2Qb15xjsvx7 2.六本木森大廈 https://maps.app.goo.gl/V6frFwYYvo1Gcuz99 3.《怪醫黑傑克》50週年紀念展 https://blackjackex.roppongihills.com Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting