Zip噏劇場

【Zip噏劇場】期間限定 100% FF 遊記 - 「Shinjuku 新宿故」Day 5 morning  時間係咪治療情傷嘅良藥？對於Kinaka嚟講，時間只係將佢對學長嘅記憶慢慢變成透明，但透明唔代表不存在。所以，當Kinaka喺河口湖站同學長四目交投，學長嘅外貌就好似密碼咁，一下子解開Kinaka初戀記憶嘅黑盒，所有同學長發生嘅事，好似走馬燈咁喺腦入面閃過。幾經辛苦，先可以擠出笑容，然後同學長say hello… Kinaka陪我遊完河口湖之後，佢終於儲夠勇氣，留喺河口湖一晚，同學長聚舊。所以，佢同我喺車站道別之後，就去學長家人開嘅溫泉旅館搵學長。 2年無見，Kinaka有好多野想知，因為喺佢面前嘅學長同以前做劇團嘅感覺好唔同。究竟呢兩年佢發生過咩事？但同時Kinaka有好多事唔敢問，因為佢怕聽到某啲說話，觸發佢潛藏心內嘅情感… 而學長先帶Kinaka遊覽佢家人開嘅溫泉旅館，講返呢兩年疫情點樣幫家人渡過難關，終於捱到通關可以再做遊客生意嘅經歷。跟住學長叫Kinaka留低食飯，試下佢煮嘅料理。2年之後，佢哋兩個再一次同枱食飯，大家分享呢2年嘅近況。好快，飯就食完，近況都差唔多講完，大家都知屬於「前菜」嘅話題就到尾聲，Kinaka腦內不斷諗最佳試探而又不失尷尬嘅字句係咩，最後佢終於諗到。Kinaka飲完一杯清酒之後，就同學長講：「劇團未來有一個劇目，好適合你演出，學長你有冇興趣？」 學長飲完一杯清酒，對住kinaka微笑，然後講：「旅館嘅生意啱啱上軌道，加上屋企年紀越嚟越大，所以…」 Kinaka低頭好細聲講咗一句：「了解…」 然後就繼續飲酒… 氣氛變得沉默同尷尬… 突然，學長用《半澤直樹》土下座嘅方式向Kinaka道歉…學長話呢2年都好討厭自己嘅懦弱，佢無膽去面對戲劇，無膽去面對Kinaka，而幫家人打理生意只係佢逃避演員生涯失敗嘅藉口…今日終於見到Kinaka，終於可以講呢2年嚟佢一直想親口對kinaka講嘅說話，就係「對唔住！」 「請原諒我當年無交代清楚就離開你，請原諒我唔敢面對你，請原諒我嘅懦弱，請原諒我唔夠堅持，請原諒…」 Kinaka打斷咗學長，跟住扶學長起身，兩眼慢慢流出眼淚，對學長講：「我曾經好嬲你好憎你，見到面亦好想打你鬧你，但今日再見返你，我最強烈嘅感覺係…你過得好同開心，就好足夠…」 學長聽到呢度…同kinaka 對望，然後兩個人好用力咁雙擁而哭。 喊咗唔知幾耐，大家見到大家眼腫面腫嘅樣，相視一笑。 聽到呢度，我問Kinaka：「你仲鍾唔鍾意學長？」 Kinaka 佢深思咗一陣，然後同我講，由重遇到相見相擁，佢得出一個答案 - 佢愛學長，不過就昇華到好朋友甚至乎係家人嘅愛。 聽到家人呢兩個字，我望住我手上嘅求婚戒指盒。Kinaka 問我駛唔駛行返去河口湖大橋下嘅石灘，埋咗佢。而我反問佢你覺得呢隻戒指值幾多錢？ Kinaka隨口估咗幾個價錢，然後我笑住將戒指遞比佢，跟住話：「送呢隻戒指你。你未來將我呢段故事變成劇目，用返呢隻戒做道具。然後請我嚟睇！」 Kinaka首先呆一呆，然後笑住答：「好啊，再加任飲old fashion！」 *歌：Aimyon[愛繆] - 在懂愛之前 （日劇《短劇開始了》主題曲） Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

【Zip噏劇場】期間限定 100% FF 遊記 - 「Shinjuku 新宿故」Day 5 Dawn 深夜接近清晨呢個時間，喺河口湖可以叫得出Aikira 呢個名嘅，理論上得一個人，就係Kinaka。佢見我夜媽媽喺河口湖大橋下面嘅石灘唔知做乜，好驚訝咁大叫，然後就衝咗落嚟…當佢見到我手上嘅戒指盒跟住露出一頭霧水嘅樣，我就將自己嘅故事講咗比佢聽。 我哋沿住河口湖一邊行，佢就好有耐性咁一邊聽。傾傾下有啲凍，我哋喺便利店買咗杯即磨咖啡，就繼續聽我嘅故事。當我講完，然後佢喺便利店對出湖邊嘅草地坐低咗，然後就講佢嘅故事。 佢升高中一年級嘅時候，加入咗劇社。當時有一個已經讀緊大學嘅學長經常返嚟劇社分享。嗰位學長除咗喺大學讀表演系，亦有喺小型嘅劇團工作，所以Kinaka 好鍾意聽佢講戲劇嘅世界同觀點。 三年嘅時間，夠影響一個人嘅一生。Kinaka喺三年嘅高中知道，佢想以演員嘅身份生活，亦好想同學長一齊生活。雖然Kinaka入唔到大學嘅表演系，但都好積極參加大學劇團嘅活動，無論台前幕後嘅工作都好有興趣。而課餘嘅時間，就去欣賞不同劇團嘅演出。有一晚，佢去欣賞一個小型劇團嘅表演，佢睇得好投入，演員都演得好投入，可惜場面冷清，只係得零碎嘅掌聲…因為當時可以坐100人嘅黑盒劇場，只係得幾十個觀眾…而大部分都係演員嘅家屬或者朋友... 演出完，Kinaka去咗後巷，佢聽到有人細細聲係度喊…嗰位就係劇團嘅團長，亦係Kinaka 嘅學長…Kinaka無安慰佢，而係即場喺學長面前演出剛才劇目嘅其中一段對白，然後問學長：「我casting 成唔成功？可唔可以做你劇團嘅演員？」 或者呢個就係演員之間嘅浪漫？以戲去表達內心情感。而Kinaka唔單止casting 成功，亦達成佢另一個心願，就係同學長一齊生活。佢哋一齊住，一齊打理戲社嘅大小事務。Kinaka覺得當下佢擁有咗全世界，但學長嘅世界…就係想擁有所有觀眾嘅心。佢越想努力做，反而結果...越差...佢越做越無心機，然後…3年前，世紀疫情嚟到…所有演出無限期停止…對於Kinaka嚟講，世界好簡單，只要仲可以演戲，同學長一齊生活就夠啦。但學長喺2年前收到一個電話…屋企人同佢講：「阿仔，不如返嚟屋企，幫手打理旅館？」 Kinaka從來都唔知呢個電話嘅內容，直到尋日喺河口湖車站對出嘅巴士站…佢真係見返學長…點解講真係嘅原因，係因為2年前，學長話要照顧老家嘅生意而同Kinaka 分手…當時kinaka仲未畢業，劇社仲有限度營運緊，但學長就好堅決咁離開新宿… 2年啦，kinaka唔敢亦唔想去知道學長過成點，二十幾歲嘅佢只係知道自己好想用自己嘅方法去過自己理想嘅生活，所以佢會做好多兼職，例如喺黃金街做Bar Tender，以及做導遊等等。直到幾日前，Kinaka帶澳洲遊客嚟河口湖，佢好似見到學長嘅身影，而直到尋日，佢帶我嚟到同一個地方，終於撞見一個對佢成長好大影響，同時亦有2年無見嘅人… 比你喺kinaka，你會同學長講啲咩？ 歌：YOASOBIー「たぶん」 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

【Zip噏劇場】期間限定 100% FF 遊記 - 「Shinjuku 新宿故」Day 4 midnight  我好記得2020年5月16號，因為呢一日我睇咗呢套戲 - 數碼暴龍Last Evolution 絆 歌：《數碼暴龍 LAST EVOLUTION 絆》歌曲 - 《Butterfly》 事隔20年，可以喺大銀幕睇到太一同亞古獸，但被選中嘅細路已經變成大人，而呢一次就係佢哋最後一次合作同最後一次進化… 睇到最後，聽到呢首Butterfly，我忍唔住狂流眼淚，但隔離嗰位女仔喊得仲勁過我…然後，我遞咗一張紙巾比佢，佢點一點頭，拎咗張紙巾繼續喊…呢啲咁尷尬嘅情況，我一時三刻唔知點做…所以就無講任何野，一出roller就走咗。 散場之後，我再入返呢間戲院，因為我喺同一個院同一個座位坐低，睇另一套戲。點知，佢繼續坐喺度…已經喊完嘅佢望到我，點咗一下頭，然後還返張紙巾比我。之套睇嘅係咩戲，我已經唔記得咗，因為我不斷眼尾留意佢嘅神情動態。之後，就係大家都估到嘅發展，我哋一齊去睇戲，食飯，聽音樂會，行展覽，作為編劇嘅我覺得佢就係我嘅繆思。不過，我估中嗰開頭，但係估唔到嗰結局…我哋過到數碼暴龍Last Evolution 絆，但過唔到第二套戲The Beginning。上畫之前，佢同我講我唔係佢想要嘅人，然後就分開咗... 佢想要嘅人，係咩人呢？我以為我係佢想要嘅人，所以先同我一齊。點知，佢應該係想睇下我係咪佢想要嘅人，所以就同我一齊。而我，唔係一個拖泥帶水嘅人，所以我講咗句「好啊」，就搬離同佢一齊租嘅地方。我亦無深究原因，因為我知佢講得出呢句說話，一定係深思熟慮過。 *倒酒聲效 我依家喺河口湖嘅一間溫泉旅館，一邊食壽司一邊飲sake，然後聽住同佢睇過嘅戲嘅音樂，回憶同佢嘅往事。我同自己講，回憶埋呢一次就夠。所以，當kinaka喺車站同我分別，我就決定去原本同前度去嘅溫泉旅館，一個人過一晚夜，然後同呢段感情say good bye。旅館嘅人見我自己一個人臨時臨急租房都有啲差異，表情好似驚我會喺房度唔知做咩咁。明嘅，見我少少憂鬱嘅樣，怕我會做傻事。而我最傻就係明知分咗手都帶咗同佢求婚嘅戒指嚟東京。我望住呢個戒指盒，諗起一個今日中午經過嘅地方，然後就離開間房，出去啦。 深夜嘅河口湖黑到望唔到任何景色，但透過微約嘅街燈，我都可以踩到去我想去嘅地方 - 河口湖大橋。河口湖大橋係影逆富士嘅地方，不過我唔係去橋上面，而喺去橋下面嘅小石灘。我決定將手上嘅求婚戒指埋喺呢個本身想向前度求婚嘅地方，為呢段情畫上一個句號。 就喺呢個時候，我突然被人用電筒照住，然後聽到對方用英文大叫 - Akira，why and what are you doing here?  歌：米津玄師 - Pale Blue Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

【Zip噏劇場】期間限定 100% FF 遊記 - 「Shinjuku 新宿故」Day 4 富士山(下) 河口湖-富士山五湖之一，係湖岸線最長標高最低嘅湖，係欣賞富士山嘅熱門景點之一。好多人會選擇兩日一夜行程，租溫泉旅館，浸住溫泉望富士山。呢個原本係我嘅計劃之一，我已經做晒research，知道邊一間嘅景色係最好，就喺準備訂嘅時候，我女朋友就同我講分手…而依家，我就嚟到河口湖，不過就唔係自己一個人，而係有Bar tender Kinaka做我嘅導遊。 佢問我想遊船河？坐纜車？定巴士遊湖？ 船河嘅意思係喺河口湖站附近上船，坐遊覽船，慢慢渡過河口湖，喺船上面嘅水平線，由低而上觀賞宏偉嘅富士山。纜車就係搭上去天上山公園，由高角度俯瞰河口湖同遠望富士山。上面有一個鞦韆打卡點，影出嚟張相就會好似你喺富士山旁邊打韆鞦咁。巴士就最簡單，你可以拎住張地圖，按你心水沿住湖嘅景點遊覽。而河口湖太大，美術館都有好幾個，仲有音樂館同其他博物館，加上其他自然景色，真係一日玩唔晒。而唔同嘅日子，河口湖會開唔同嘅花，例如4月係櫻花，6月係薰衣草，11月係楓葉，配合埋唔同天氣下富士山嘅外觀變化，邊個日子係最佳欣賞嘅時間，答案真係人人唔同。 而我就選擇咗第4個方法 - 踩單車。一來呢個方法係最彈性，你踩踩下覺得呢個角度嘅富士山好靚，就可以停落嚟影相，配合埋迎面撲過嚟嘅花香草香，呢種踩單車嘅體驗，真係好獨特。二來踩單車係運動之一，可以釋放安多酚，舒緩壓力同鬱悶，好適合Kinaka。因為自從佢喺河口湖車站一出，見到一個年約30歲，著住黑色T-shirt，拖住單車嘅男人之後，心情就同朝早我哋行下吉田好唔同。當刻，Kinaka見到佢嘅眼神同笑容，唔似見一位普通嘅故人，因為如果係好耐無見嘅朋友，你應該會好開心咁行過去，傾幾句。但當時對方叫佢嗰名嘅時候，佢好似觸電咁，成個人僵硬咗一秒，然後先比反應，代表佢應該無諗過會見到佢？但之後面上嘅笑容，又似有一種終於都見到你嘅感覺。總之神情好複雜…佢哋兩個講咗幾句，交換咗聯絡方式之後，嗰男人就上單車走咗，而我終於睇到佢黑色T-shirt背面，好似喺其中一間溫泉旅館嘅logo。 接住落嚟成程河口湖單車遊，我無問kinaka 同嗰個男人嘅關係。我哋好專心踩單車遊湖，閒時就落車影下相，但就無晒朝早嗰種互動。去到日落之後，大約7點左右，我哋夠鐘坐返車出新宿。就係準備入閘之前，Kinaka 同我講佢有事要留喺河口湖一晚。我答咗佢好啊，然後就話遲啲喺酒吧見。佢笑一笑，然後我就入閘。入到閘，列車嚟到，停低，我再望出去，天已經黑到望唔到富士山，我喺袋入面拎咗一個首飾盒出嚟，然後做咗一個決定，就係出返閘，喺河口湖留多一晚。 *歌：《秒速5厘米》 主題曲「One more time one more chance」 本集景點：河口湖 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

【Zip噏劇場】期間限定 100% FF 遊記 - 「Shinjuku 新宿故」Day 4 富士山(上) 除非你係好厚面皮嘅人，否則，有啲古怪嘅想法或者尷尬嘅請求，係好難無端端開口。就喺兩位澳洲遊客邀請我同佢地，仲有導遊兼bar tender - kinaka 食燒肉嘅時候，佢哋兩個得知我聽日去富士山一日遊，然後比我睇早幾日Kinaka帶佢哋行下吉田同河口湖嘅相，我內心就生出不如請Kinaka做我導遊嘅想法。但因為呢個諗法太大膽，所以我只係閃過一下呢個念頭，然後就同佢哋乾杯。但人在異地就係熱情奔放啲，我唔係講我，而係James 同 Lily。佢哋一啖飲晒杯生啤，然後就同我講: Akira, you should invite Kinaka be your tour guide!  Akira係我食飯嘅時候自我介紹嘅名…會咁叫唔係因為《阿基拉》呢套電影，而係《殭屍100～在成為殭屍前要做的100件事～》入面嘅男主角叫天道輝，而我又叫阿輝，所以喺自介嘅時候叫自己做Akira… 對於James 同 Lily 突如其來嘅提議，我就唯有用飲酒化解尷尬…大佬，我問完但如果Kinaka拒絕咁點喎…所以我就一啖飲晒杯生啤，但同時眼尾望下kinaka…佢同我一樣都係飲酒迴避James 同 Lily嘅提議，然後成餐飯，我哋都無再講過呢個話題。 兩個鐘頭飲飽食醉之後，James 同Lily就要返酒店執行李準備聽朝出發到大阪，而Kinaka就要返一返黃金街嘅酒吧，我酒店都喺嗰邊，所以就同佢一齊行。喺到黃金街同我酒店嘅十字路口，佢突然問我: 你聽日真係去富士山？如果你唔介意，我可以做你導遊啊。 嘩，由佢親自開口問，如果我拒絕，咪會影衰晒所有港男兼響到日港關係！所以，我即刻答:係！多謝你！ *JR聲效 去富士山最快嘅方法係買富士迴遊直到富士山，不過我太遲買飛，所以只可以買到新宿到大月站嘅車飛，想去富士山嗰邊就要轉坐普通列車，車程總共2個半鐘。Kinaka約咗我朝早9點喺新宿JR度等，喺車站入面買咗盒江户前壽司，就一齊準時搭JR。我選擇今日去，真係好好彩，因為今日富士山嘅能見度係最高…同埋Kinaka嘅JR pass聽日到期！ 而喺車上面，佢問我嘅工作同嚟日本嘅原因。我只係話比佢知我係編劇，但就無講到我原本嚟係慶祝週年紀念但出發前分咗手。而短短嘅車程，我哋無因為早起而覺得眼瞓，反而越講越興奮。因為大家都有共同嘅話題 - 電影。大家都分享咗鍾意嘅戲，佢由演員角度去講，我就由編劇角度出發，講下講下，直到一個位，我就停咗…因為，我終於見到富士山啦！ 我透過車窗望到富士山。今日萬里無雲，巨大嘅富士山好清晰咁出現喺我面前！由於天氣開始涼，山頂已經冠雪，而山腳就係一望無際嘅田野，望到呢個只係出現喺電腦螢幕保護畫面或者post card 嘅景色，我腦袋一片空白，一時三刻講唔到野。而Kinaka就報以微笑，話一陣帶我去唔同景點用唔同角度望富士山。 今日嘅第一站係下吉田。好多人好鍾意喺下吉田嘅商店街影富士山。果然，一到打卡位就有好多遊客嚟到，然後搵機會衝出馬路擺pose影相，所以當局都放咗提示版叫人唔好咁做。至於成效就…好似無乜作用。但我明嘅，喺一條充滿歷史味嘅昭和年代商店街嘅盡頭，出現一座富士山，喺度打卡就可以感受晒兩種截然不同嘅日本靚影，係幾特別嘅。我影完啲人衝出馬路打卡之後，Kinaka就帶我行去另一個景點 - 忠靈塔。 位於新倉山淺間公園嘅忠靈塔喺佛教嘅五重塔建築，如果夾啱時間，就可以影到大大嘅富士山加開滿櫻花嘅忠靈塔，係熱門打卡點之一，不過就要挑戰大家嘅體力，因為要行好多級樓梯。好彩今日天氣清涼，行山都唔算好熱。而用咗30分鐘，我哋終於由第一級行到上忠靈塔！撇除好多遊客，呢個角度望富士山都係好靚嘅。中式佛教建築，翠綠整齊嘅園林，加埋180度無敵開揚嘅富士山靚景。呢個距離加景色，令我始於欣賞，終於忘記手上嘅相機。 *菲林機聲效 Kinaka笑一笑，原來佢見到我好似大鄉里出城咁，忍唔住用佢部菲林機影我望住富士山嘅樣。呢個時候，我都用相機還擊，即係影返佢相。話咁快，有傾有講就喺下吉田遊覽咗幾個鐘，然後我哋就出發另一個熱門睇富士山嘅地方 - 河口湖。 唔駛20分鐘，就由下吉田到河口湖站。一出閘，就聽到有人大叫kinaka。我向聲音嘅方向望過去，見到一個著住黑色t shirt，牛仔褲，推住單車，大約30歲嘅男人喺閘口出面嘅巴士站經過，而Kinaka見到佢，微微一笑，同佢揮一揮手，而透過佢望住呢個男人嘅眼神，編劇嘅直覺話比我知，呢個男人係佢今次嚟河口湖嘅主要原因… *歌：宇多田光《First Love》 編劇及製作：阿攝 音樂：Blue Giant OST - Motivation、Omelet rice、Day by day 本集景點： 1.下吉田商店街 2.忠靈塔 3.河口湖 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

【Zip噏劇場】期間限定 100% FF 遊記 - 「Shinjuku 新宿故」Day 2 night + Day 3 我已經飲緊第三杯 Old fashioned，但嗰位動漫女仔都係一眼都無望過嚟…由佢入到呢間酒吧到依家，已經過咗個半鐘。佢用流利嘅日文同Bar Tender 講咗一兩句說話，bar tender 比咗一杯whiskey on rock 佢，然後佢就好專注咁睇電話。佢一邊睇一邊飲威士忌，飲完，Bar tender 就會自動幫佢斟一杯新嘅。雖然我好想搵機會請佢飲酒，但無理由無端端行埋去搭訕架…所以…我只可以靜靜咁坐喺角落位到，享受自己杯old fashioned。 過咗個半鐘，佢終於睇完電話，然後舒咗一個好長嘅氣，跟住眼濕濕咁同Bar tender 示意埋單。究竟佢睇緊咩呢？到Bar tender 比咗張單佢，同佢講咗幾句，我終於知道答案。我會知嘅原因唔係我突然聽得明日文，而係佢同Bar tender 一齊做咗嗰手勢 - 右手緊握到拳頭，然後放喺自己左邊心臟嘅位置。呢個，就係進擊的巨人好標誌性嘅動作 - 獻出你的心臟！係喎，今日係進擊的巨人the final season 完結篇播放嘅日子！連載咗十年嘅動畫終於大結局！ 我諗住喺播之前由頭重溫一次，可惜…因為我同ex分開咗…所以…我就行屍走肉咗成個月… 而動漫女同Bar tender 講咗句再見之後，就離開咗酒吧。輕輕的佢走了，正如佢輕輕的來。而我再叫多杯whiskey on rock，一啖飲晒之後，就一個人返酒店。 *鬧鐘聲效 可能尋晚飲咗太多酒，所以就算鬧鐘點鬧醒我，我都再瞓返。一醒就已經係下午嘅時間。今日嘅東京落住毛毛細雨，我喺歌舞伎町食咗個好好味嘅雙層鰻魚飯，雙層嘅意思係底同面各有一層燒鰻魚，中間夾咗一層飯。炭燒嘅香味，加上鰻魚嘅魚油，厚同鬆化嘅肉質，接近入口即溶，配上吸晒魚油嘅日本米，我終於試到真正嘅鰻魚飯！ 食完，叉足電，又散咗酒氣，可以出發去今日嘅景點！ *JR 聲效 今日去嘅地方，係宅男天堂 - 秋葉原！ 香港都有買figure 嘅聖地，但依家去到最元祖，最正宗嘅秋葉原，真係有一種教徒去聖城朝聖嘅感覺！ 一棟棟嘅遊戲同周邊產品大樓，一個個著住唔同動漫打扮嘅遊客，如果喺香港會被人覺得好宅，但喺呢度就係好正常不過！ 我…無著到尋日喺下北澤買嘅古著，反而著咗一件喺U記買嘅進擊的巨人T shirt。如果講呢期最hit嘅動漫，除咗咒術迴戰之外，就係spy family，當然仲有永恆不滅嘅寵物小精靈同one piece啦。所以，我見到好多寵物小精靈嘅扭蛋，亦見到好多五條悟同海賊王嘅figure，但秋葉原叫得做聖地，當然有好多香港唔算最熱門，甚至推出都有一段時間嘅動漫周邊，例如有排球少年、網球皇子，仲有我一直都有追嘅我的英雄學院！好多都係香港無，就算有，嗰款式同外形都無咁精美！我一路睇，睇下睇下就過咗幾個鐘，然後當我好聚精會神欣賞緊《進擊的巨人》艾倫同利維兵長嘅figure 嗰陣，我聽到一把好熟嘅聲音…佢講緊英文…但聲底好熟…當佢一講日文，我就認到佢！佢就係酒吧嘅Bar tender！佢係度帶緊兩位遊客行秋葉原！ 佢都好似認得我，同我打咗嗰招呼。而佢身邊嘅一對情侶遊客一見到到我著住進擊的巨人嘅衫，就即刻做出獻出心臟嘅動作。我笑一笑，然後就同我吹咗一陣對巨人嘅感受。唔知係咪太好傾，佢哋兩個竟然邀請我一齊去食飯！ *燒肉聲效 Bar tender 帶咗我哋去一間連鎖燒肉店，兩位遊客 - James 同 Lilly 好興高采烈咁燒肉。佢哋兩個係澳洲人，第一次一齊去旅行。而佢哋上網搵咗在地嘅導遊，就係Bar tender 啦。Bar tender 叫Kinaka，畢業無耐，主力係做劇場演員，未有戲接嘅時候，就會喺酒吧做兼職，同時因為英文好嘅關係，會做導遊帶人認識日本文化。而今晚就係James 同 Lilly 最後一日喺東京，聽日就會去大阪。佢哋問我聽日會去邊，我就話會去睇富士山。James 同 Lilly 好開心咁share 早幾日Kinaka 帶佢哋遊河口湖嘅相。呢個時候，我內心有一個好大膽嘅想法，就係…不如問kinaka聽日得唔得閒，如果得嘅，不如帶我遊河口湖？ *歌：山下達郎「RECIPE (レシピ )」 （日劇《Grand Maison 東京》主題曲） 編劇及製作：阿攝 音樂：Blue Giant OST - Motivation、Omelet rice 本集景點： 1. 出窓 Bay Window https://maps.app.goo.gl/HdtrEu7uMnh1EL8Y7 2. 鐵鰻魚 https://maps.app.goo.gl/ibYnr3X4QzKvJvNWA 3. 秋葉原 4.燒肉 幸永 本店 https://maps.app.goo.gl/7QPJgENswt2R3fCz9 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

*Day 1 結尾，讀者選擇 - B 「斷捨離。唔要嗰喼，放低段情。買過所有衫，重新出發。」 【Zip噏劇場】期間限定 100% FF 遊記 - 「Shinjuku 新宿故」 Day 2 *訊息聲效 「你難得去日本，仲去U記無記呢啲香港有嘅牌子買衫？有無搞錯啊？」 「咁我唔要嗰喼，乜衫都無，喺呢啲地方買最簡單同方便嘛…」 「咁你同無去過日本有咩分別啊？」 「有分別！我上返香港官網格過價，平過香港嘅衫褲我先買架！同埋呢度嘅U記有成十幾層！有好多款香港係無架！」 「你同我即刻放低你想買嘅衫褲，然後出發去呢幾個地方！」 *日本地鐵聲效 我姓古，單字一個輝。事隔多年一個人獨遊東京，點知到達機場嘅時候嗰喼唔見咗，到夜晚職員通知我嗰喼被人拎錯咗同整爆埋，佢問我點處理，我dead air咗幾秒，最後毅然決定放棄嗰喼… 放棄嘅原因係…無論嗰喼定係入面嘅衫都係前女友幫我揀同買嘅。而今次東京之行原本係想慶祝三週年紀念，可惜…出發前我哋分開咗…唔知係咪嗰天都想我斷捨離，所以我決定連喼都唔要，重新出發。 *日本地鐵聲效 唔駛15分鐘，我就由新宿到達我朋友力推嘅地方 - 下北澤。佢話呢度係古著勝地，我一定可以尋到寶。果然，一出地鐵站就有古著市集，3、40個攤檔，人流好多，每個人都好似好有衣著品味。我朋友話東京唔同地區就有唔同衣著特色，我以為佢吹水，原來係真嘅。我嗰ex同我講，衫唔駛貴，最緊要識襯同買啱比例。佢話我條腰同嗰身嘅比例係幾多幾多，應該點著同點著，每次佢好努力幫我襯衫，我就眼定定咁望住佢，好投入同好專注嘅佢，真係好吸引。 依家，我一個人喺下北澤嘅古著店，拎住件衫企喺鏡前面…覺得好陌生…一來無咗佢…二來我發覺原來我好耐無認真望過自己…無咗佢之後…我究竟著咩衫好呢？ 一諗呢個問題，即刻無乜心情…我離開古著市集，漫無目的咁行，點知比我發現呢度有另一個市集 - 啤酒市集！ 原來今日係手工啤酒節！入面有十幾檔日本手工啤酒品牌比大家試！我喺門口買咗幾個token，賣飛嘅人一聽我嘅口音竟然知我係香港人！原本佢喺台北人，嚟咗日本工作一段長嘅時間，而佢朋友有份擺檔，所以就嚟幫手。難得溝通到，緊係要佢帶路，同我介紹下日本手工啤酒。 日本威士忌同其他威士忌嘅分別我就講得出，清澈嘅日本水質釀出嚟嘅威士忌比蘇格蘭或者美國嘅威士忌淡啲，個性無咁突出。咁日本嘅手工啤酒又點呢？佢話唔同嘅釀酒師會加當地嘅水果或者材料去釀酒，味道唔會一下子爆發出嚟，而係慢慢慘出嚟慢慢比你感受唔同嘅層次。所以，每個攤檔都寫咗佢哋手工啤酒嘅釀造方法同味道層次。我用有限度嘅英文同唔同嘅釀酒師傾計，佢哋都有問香港嘅手工啤酒市場。其實香港都有好多手工啤酒品牌，每隻都有自己嘅個性同特質。就係咁，傾下傾下，玩下玩下，我飲到天黑啊！ 唔得啦！要走啦！再唔走無衫買啦！ 結果，我極速行咗幾間古著店。應該係因為頭先飲得太多酒，飲到嗰人無乜理性，只要我見到合眼緣嘅衫褲就無諗咁多，拎上身試！到最後，我買咗一條美國製嘅深色牛仔褲，一件牛仔褸，同兩件撞色撞得幾靚嘅直間恤衫。價錢唔係特別平，但唔理啦，唔買嘅話聽日無衫著啊！ 然後，我返酒店房放低野，順便…瞓個覺…點知一瞓就瞓到夜晚11點…又要去搵野食啦。尋日就去咗黃金街，今晚就去另一個好有歷史味道嘅地方 - 思出橫町。 思出橫町同黃金街一樣都係由好多條細街組成，不過黃金街多酒吧，思出橫町就多串燒店。每間鋪都係100-200尺左右，招呼8-10個客人。而我就揀咗一間天婦羅店！呢個店只係賣幾樣野，分別係 - 湯烏冬、湯蕎麥麵同冷蕎麥麵。咁天婦羅呢？有，但得一種，就係野菜天婦羅。我就叫咗湯烏冬。熱辣辣嘅烏冬非常煙韌，唔會一咬就斷，而成塊面咁大嚿嘅野菜天婦羅就算浸喺湯都好香口，加埋一隻温泉蛋，40蚊港紙都唔駛，抵！同埋我好欣賞佢哋好專注做一件事。李小龍先生講過，佢唔怕練過一萬種踢法嘅人，只怕對方練過一種踢法一萬次。呢間鋪，就係有呢份精神。 不過，思出橫町嘅店舖去到12點半就閂…未夠喉嘅我唯有去返黃金街。之前提過黃金街有好多間細酒吧，好多都係一個老闆招呼十個人客，8成都好casual。有啲仲寫住members only…然後我來來回回咗好多次…左揀右揀…終於揀咗呢一間！ *柔和古典音樂 呢個酒吧特別之處，除咗係播classical 而唔係外國pop songs 或者 J pop之外，就係呢一位bar tender。佢短頭髮，紮咗一個馬尾，著住白色恤衫同馬甲，打咗呔，配上柔和嘅燈光，好似去咗上環soho 區嘅高級情調酒吧咁。我喺吧枱前面坐低，正想問有咩飲嘅時候，佢笑住同我講：「No menu」。我望一望佢，再望到佢身後嘅威士忌，同佢講咗一句：「Old fashioned, please。」 呢款經典雞尾酒由波本威士忌、苦精、糖同橙皮所調配而成。我見佢由切冰、調酒、搖酒、用燈皮抹杯邊等等嘅動作都非常流暢，無多餘或者花巧嘅動作，佢肯定沖過好多好多次先有咁優雅嘅造詣。望住佢調酒，好似係一種享受。飲住呢杯威士忌味、苦澀味同甜味平衡得好好嘅Old fashioned，再望住呢位 Bar Tender調其他酒 。而望下望下，我終於諗起佢嘅外貌似邊個！就係《四重奏》嘅大提琴手或者《First Love》入面揸的士嘅滿島光！ 就喺享受緊眼光風光嘅時候，有人推門入嚟，佢…就係尋日喺便利店睇咒術迴戰漫畫嘅嗰位動漫女仔！佢一個人嚟飲酒啊！ 呢一刻，我應該點揀呢？唔好FF，繼續自己一個人飲酒望下佢，睇佢認唔認得我，再借機請佢飲酒 *歌：MONDO GROSSO / 迷宮 編劇及製作：阿攝 音樂：Blue Giant OST - In search of…,Motivation 本集景點： 1. Kameya https://maps.app.goo.gl/vQ9bL3MEPnoYcCvG8 2. 出窓 Bay Window https://maps.app.goo.gl/HdtrEu7uMnh1EL8Y7 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

【Zip噏劇場】期間限定 100% FF 遊記 - 「Shinjuku 新宿故」 Day 1 *飛機聲效 4個鐘頭嘅機程，你會聽歌？睇書？打機？睇戲定瞓覺呢？ 因為好多原因，我揀咗下午飛，而因為坐廉航，喺飛機上面無野睇又無野食...所以...我決定由頭聽一次最近好鍾意聽嘅一個廣播劇，叫做《Game of Eden》，其實我都無追一段時間，因為嗰作者嘅時序不斷轉變，角色同故事線又多，就算我記憶力幾好都樂，要每個星期跟足劇情都唔係一件容易嘅事。所以我決定好似平時追劇同追漫畫咁，等佢出曬一季先一次過追。終於比我等到盧零回憶錄出完，可以一次聽。 但諗諗下，都係聽呢一個playlist，調整心情迎接即將旅行嘅地方。 *歌：Mariya Takeuchi - Plastic Love 我姓古，單字一個輝。今次係我疫情之後第一次去旅行。我由一上機就玩緊一個遊戲，就係估下呢程機有幾多個人同我一樣係獨遊東京。而估下估下望下望下，我竟然因為呢個另類數綿羊遊戲而瞓著咗。一醒就已經差唔多降落... 我對上一次嚟東京係6年級嘅事，我最有印象喺阿姨帶我買PS2，同團有一個同我並唔多大嘅男仔，每一日同我見面嘅第一句唔係「餓 Hi 喲」，而係「真三國無雙！」。 而2023年，PS已經出到第5代，而真三國無雙都唔知去到第幾代，我再次嚟到東京，坦白講，係有喲緊張、期待同不知所措。不知所措唔係因為喺拎行李嘅時候，我終於知道呢程機真係得我一個人獨遊東京，而係我嗰喼喺所有人離開晒之後都無出現到... 「先生，可能你嗰喼比人拎咗...又有可能係運送出錯...麻煩你留低聯絡方法，我地會盡力處理。」 機場職員用佢有限度嘅英文好努力同我交待情況... 雖然我旅行嘅宗旨係expect the unexpected。但我點會估到我一到步就會遇到呢個情況... 而我留咗聯絡方法之後，就唯有孭住我僅餘嘅背囊，入面除咗有銀包、証件，只係得一部相機同日記...然後被迫好瀟灑咁坐成田特快去我呢7日所住嘅地方 - 新宿。 *列車聲效 我嘅酒店位於新宿三丁目附近，酒店職員見到我兩手fing fing咁check in，都覺得有啲奇怪。而依家已經喺夜晚嘅10點...雖然好肚餓，但有一件事要更加緊要，就係去便利店買內衣褲。我身上嘅呢套衫勉強可以著多一日，底褲同襪雖然可以即洗即著，但喺個喼未有消息之前，都係買定一兩條穩陣啲。 *便利店開門聲效 但當我一入便利店，我被另一樣野吸引咗！ 我見到最新一話嘅《呪術廻戦》連載漫話啊！雖然我唔識睇日文，但身體好自然同好興奮咁揭最新一話嚟睇！ *歌：【呪術廻戦】渋谷事変OP Full「MAD/AMV」SPECIALZ - King Gnu 「お客様 （Okyakusama）」 我聽到職員好似叫我，我即刻講咗句「Sumimasen」，然後放低本漫畫...但我當抬頭一望，原來唔止我...仲有另一個人打緊書釘，佢個樣有少少似《今際之國》入面三吉彩花所飾演嘅醫生 - 阿安，短頭髮，著住一條白色麻質連身裙，孭住一個黑色斜孭袋，扣住一個《進擊的巨人》利維兵長嘅公仔。佢對店員講咗一句「ごめん（Gomen）」就即刻衝咗出去便利店... 之後我同店員你眼望我眼，然後我傻笑咗一下，企圖化解尷尬場面...然後即刻拎咗一條底褲同襪，嗱嗱聲比完錢就走。 *便利店開門聲 夜晚嘅新宿同香港一樣都係不夜城。我由新宿三丁目行去歌舞技町醫肚。沿途見到好多居酒屋、丼飯、壽司店同燒肉鋪，但我今晚偏偏好想食拉麵。而行到花園神社附近，見到隔離有一條小路，小路有好多人行出行入，原來嗰度叫做黃金街，由好多條細街組成。就喺第一條街嘅中間，我見到好多人喺度排隊等食拉麵，除咗有遊客之外亦有本地人！直覺話比我知伏味應該唔濃！就佢啦！喺等啲期間，不斷見到食客出嚟係咁講好食同值得等，而我等咗40分鐘，終於可以上樓啦！經過一條長窄樓梯上二樓先知呢間拉麵鋪好細，得8個位。而我喺拉麵機入錢落order，揀咗special，加味玉同飯！唔駛一陣，呢碗special拉麵終於嚟啦！濃濃嘅豬骨湯，面頭除咗有4大片叉燒之外，仲有一隻唐心蛋，加埋我額外叫嘅蛋，即係我有兩隻蛋！另外有好大片紫菜！不過最獨特嘅係有兩條手指尾咁大嘅煎魚仔，魚油香味令豬骨湯昇華！而麵又阿咬口，除咗粗麵之外亦有闊到好似雲吞皮嘅麵條，兩重咬感，真係食到雪雪聲！到最後，我留番一半湯，加埋碗飯落去！一路食一路心入面好似《鬼滅之刃》嘅炎柱咁，不斷叫旨い （Uma）！ 唔駛20分鐘，我呢位餓柱就消滅咗呢一碗special 拉麵！落到樓，我就好似之前嘅食客咁對住排緊隊嘅人笑住講：「Very good Ramen！Worth waiting !」 而就喺我講完呢句，我就收到機場職員打嚟嘅電話...佢話搵到我嗰喼...原來我嗰喼運輸嘅時候無出錯，不過就有人攞錯...佢話對方以為自己記錯密碼，仲爆開咗個喼...點知一開先發現攞錯咗...但因為我無掛行李牌...所以佢就咁放喺大堂嘅一個角位...過咗好耐先比機場職員發現... 知道呢個消息之後，其實我無特別興奮。除咗因為我做好搵唔返嘅心理建設之外，最主要原因係無論嗰喼定係喼入面嘅所有衫褲鞋襪都係我前女友幫我揀嘅。本來...呢個東京之旅係慶祝我地三週年紀念...點知...就喺出發前嘅一個月，佢同我講分手...我朋友話唔好嘥咗間機票同房，所以...我就自己一個人繼續呢個行程... 呢一刻，我應該點揀呢？去機場拎返個喼，或者比酒店地址叫佢地送嚟斷捨離。唔要嗰喼，放低段情。買過所有衫，重新出發。 *歌：Awesome City Club / 勿忘 編劇及製作：阿攝 音樂：Blue Giant OST - Kawakita blues,Motivation, In search of… 本集景點： 1. Ramen Nagi https://maps.app.goo.gl/awbXNFrCTwAoVvuY9 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

Zip噏劇場 Game of Eden 第2季 小島篇 第23回 「盧零的遺願 - 下」 Nero：嗰日之後，我就無再入Game of Eden見Fish…距離成為π先生容器嘅日子仲有兩日...而喺最後嘅兩日，我去咗呢個地方。 *學校鐘聲音效 Nero：我去咗我第一次見Fish嘅地方...即係我同佢一齊長大嘅同舟會孤兒院。我用咗隱形狀態，好靜咁望住入面嘅小朋友...佢地依家放緊小息，喺度食緊雪糕，好開心，亦好無憂無慮...但如果佢地知道自己嘅身世同入嚟嘅原因...會點呢？ Fish佢已經緊開始反抗π先生嘅計劃。而我亦種咗一個因，就係Snow嗰女 - Apple。當佢知道佢爸爸Snow嘅事，佢會點應對π先生呢？可惜...我無機會知道... 然後我去到本島嘅海傍，企喺其中一部分防洪水嘅城牆嘅上面，望住呢一個被π先生支配嘅城市，腦入面不斷浮現Fish嘅說話 -  「物件盛載住記憶。只要唔忘記，3.14都有數完嘅一日。」 以及  「F 代表 Forever。」 所以，我離開城牆，返去墓島嘅工作室，拎走喺Snow度得到嘅圓形黑盒，然後去咗買一部電腦同USB，跟住就去咗啞鈴洲。 *海浪聲效 Nero：我極速用一日嘅時間將自己嘅身世、喺同舟會成長嘅事，以及加入咗666組織嘅一連串經歷寫咗出嚟，然後將我權限可以得到嘅相關檔案，以及Snow調查得嚟嘅資料入落一隻USB入面，再喺上面刻咗五隻字 - 「平安是寶藏」，作為解碼嘅提示。然後將隻USB放入防水袋，再放入圓形黑盒入面。 跟住落嚟就要諗收藏呢個黑盒最佳嘅位置...啞鈴洲未來就算成為海底遺跡，但我相信，有一件物件一定唔會被沖走，就係玉虛宮入面嘅玄武大帝神像。同時，佢亦係解開圓形黑盒密碼嘅最佳提示。所以，我捐咗一筆錢去修輯北帝廟，另外用重金叫負責人，幫我將呢個圓形黑盒放喺玄武大帝神像入面。喺呢個金錢世界，無野係做唔到，只係...究竟邊個會發現呢個圓形黑盒呢？到時，會喺第幾代π先生嘅世界呢？ 「物件盛載住記憶。」呢一句，我做咗啦。至於「F 代表 Forever」以及π先生比我嘅願望，我都有頭緒啦。 ——— 電腦導航聲音： Welcome to Garden of Eden ，依家進行腦電波核對… 玩家 - 盧零 身份核對成功 歡迎回到伊甸園，依家帶你進入所屬區域 - Area DB Island，今日係NC 38年12月23日，Enjoy yr time in Eden. ——— *海浪聲效 莫九：呢份名單係？ Nero：我已經諗好嗰願望啦。 莫九：同呢份名單有關？ Nero：無錯。我想π先生比咗呢個 Area DB Isand我。比我同Fish可以一世喺呢度生活。 莫九：咁呢份名單嘅意思係？ Nero：我想阿康將佢地AI化，然後同我、Fish一齊生活。 莫九：上面有Snow、Sunnie同Apple...以及你呢段時間做任務解決嘅人。你咁做想贖罪？ Nero：Game of Eden 叫得做伊甸園遊戲，都係想玩家可以喺遊戲世界搵到伊甸園。我想同佢地一齊喺呢度建立我地嘅伊甸園。 莫九：咁你想全部人都AI化，然後喺 Area DB Island呢個封閉區域長生不老？ Nero：你有無玩過模擬市民呢個遊戲？ 莫九：你地想喺呢度繁衍後代？呢個願望太大膽啦。 Nero：容博士掌握人類基因學，阿康係創造呢個遊戲嘅人，佢要模擬世界運作，應該唔難啊。 莫九：但你地就會成為呢個Area嘅王，呢一點我怕π先生未必容許。 Nero：你都識講呢一個係封閉區域，只要阿康唔比其家玩家入嚟，同時唔比我地離開呢個區域，咁就唔會影響到π先生啦。同時，咪當一個實驗囉。 莫九：如果阿康真係成功...到時人類嘅未來就有另一個選擇... Nero：當然，大前提係Game of Eden嘅server無事。 莫九：呢一點，我對阿康非常有信心。不過，唔係一時三刻可以完成。 Nero：莫九醫生，應承我，幫我推呢嚿石頭。 莫九：好。咁你準備好做容器未？ Nero：嗯... 莫九：有冇咩說話想我轉告比任何人？ Nero： 幫我同Fish講…我喺另一個世界等佢啊。 莫九：好。咁...再見啦...Zero… Nero：再見啦...莫九醫生... 歌：張敬軒 Hins Cheung《賽勒斯的愛》 曲：SAMDELL / Amadeus Sögaard 詞：T-Rexx 編：SAMDELL 監：Hins Cheung / SAMDELL / 廖志華 *檔案結束聲效 J：原來呢個圓形黑盒...係143年前盧零放入玄武大帝神像入面...可惜，檔案只係記載到佢會將資料放入神像入面，至於實驗嘅結果就無提及到...而原來慕容醫生同我講嘅 - 「成為下一任π先生候選人之一」嘅意思...只係為π先生提供身體... 咁究竟第二代π先生嘅意識...轉唔轉移到入N嘅身體？ 定係...N嘅身體可以反噬返佢？ 但呢一代嘅π先生已經唔係N嘅外貌...無得判斷... 不過唔緊要，我已經得到我想要嘅資訊啦。 旁白：另外，喺Area DB Island嘅180年9月1日，亦係Game of Eden Server reboot嘅第二日，盧綠接任病重嘅爸爸，成為啞鈴洲新一任村長，飲咗靈魂之水之後...成功同玉虛宮嘅神像溝通... *資料傳送聲效 K DB Island：所有有關Area DB Island、啞鈴洲以及村民身份嘅資料經已傳送完畢。 盧綠：即係...你唔係神...? K DB Island：我唔係神，我只係Game of Eden創造者阿康創造出嚟嘅人工智能，形號 K DB Island，即係keep dumb bell island 嘅意思。 盧綠：即係...呢度只係遊戲...我地唔係人...？ K DB Island：請定義何謂遊戲？何謂人？ 盧綠：唔得！我要同所有村民講！ K DB Island：咁樣有違第一代村長盧零嘅意思。所謂「平安是實藏」，作為村長嘅你，應該以全村嘅平安為首要考量。 盧綠：村民有知情權！佢地應該要知道發生咩事！ K DB Island：之前4任村長知道平安嘅代價，選擇繼續延續盧零嘅意志，直到永遠。 盧綠：佢地會咁做唔代表我會！ K DB Island：不過根據指令，村長以外嘅人如果知道Area DB Island嘅事，要死。嘗試離開Area DB Island嘅人，都要死。正如你舅父一樣。 盧綠：你殺咗我舅父？ K DB Island：呢個就係平安嘅代價。 Zip噏劇場 Game of Eden 第2季 小島篇 第23回 「盧零的遺願 - 下」 Crystal 飾演 盧如 Fish Potter 飾演 N + 盧零 Zero 彬臣 飾演 莫九醫生 梓豪 飾演 666組織成員 阿J CFun 飾演 啞鈴洲新一任村長 盧綠 Alton 飾演 人工智能 K DB Island 編劇及製作 阿攝 音樂 BEAT FRIDAY 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

Zip噏劇場 Game of Eden 第2季 小島篇 第22回 Nero：（讀白）神用7日時間創造世界，我就有7日去思考莫九醫生比我嘅一條問題 - 莫九：「π先生為咗答謝你嘅付出，可以完成你一個願望。」 Nero：（讀白）但我7日之後...就會成為容器...進行意識轉移實驗，成為π先生下一任身體...有願望但無命享，咁呢個願望...似係遺願多啲...咁不如...我將呢個願望，送比另一個人...會唔會更加有意義呢？ ——— 電腦導航聲音： Welcome to Garden of Eden ，依家進行腦電波核對… 玩家 - 盧零 身份核對成功 歡迎回到伊甸園，依家帶你進入所屬區域 - Area DB Island，今日係NC 38年12月21日，Enjoy yr time in Eden. ——— *海浪聲效 Nero：Fish...多謝你肯見我... Fish：莫九醫生同我講咗...你幾日之後就會成為π先生嘅容器... Nero：嗯... Fish：我喺受傷嘅呢段時間，成日係度諗，如果當日N喺海入面襲擊同捉走嘅人唔係Zero而係我，又會點呢...？ Nero：我會去救你，容博士依舊會比DNA藥我，激發我體內動物嘅基因...然後同N激戰...之後... Fish：之後都係唔夠佢打...跟住都會用容博士扮係DNA藥嘅人體炸彈...然後... Nero：失救嘅可能係你...跟住你就會做意識轉移實驗...以N嘅身體醒返... Fish：但至少Zero無事...唔駛做容器... Nero：但對我嚟講...最緊要係你無事啊...Fish… Fish：對唔住...我太遲知道你要做容器...如果唔係...我會早啲令自己相信你係Zero...咁起碼我地有3個月嘅時間... Nero：有你呢句...我就夠啦... Fish：如果...我地可以一直留喺呢度...唔駛再理咩π先生...咩666組織就好啦... Nero：不如...我同π先生講...比你脫離同舟會，然後過普通嘅生活啊？π先生話會比一個願望我，我想將佢交比你啊！ Fish：但我咁嘅身體...有意思咩... Nero：咁一係我叫莫九醫生搵一個新嘅身體比你，然後同你做意識轉移啊？ Fish：你都唔係度，仲有咩意思啫！ *海浪聲效 Nero：如果...可以創造一個得我同你嘅世界...一個無曬咩π先生、同舟會嘅世界...係唔係會好幸福...好美好呢... Fish：如果真係有呢個世界，你就只係可以對住我，可能到時你會悶，然後開始嫌棄我... Nero：咁就創造一個得我同你嘅世界，每日都restart一次，每日都好似第一次見面咁新鮮，咁就唔會悶啦！ Fish：我聽你咁答就知你一定係Zero Nero：點解啊？ Fish：因為Zero一啲都唔浪漫，仲成日講野激親我！ Nero：我邊有激親你啊？ Fish：你應該答點對住我都唔會悶，無論如何都唔會嫌棄我嘛！ Nero：哦！你又比陷阱我踩！ Fish：係你自己跳入去咋！ Nero：我覺得你唔止有魚類同鳥類嘅基因！仲有狐狸嘅基因！ Fish：嗱嗱嗱～你又自己跳入嗰陷阱啦！ Nero：係啊～我跌死咗啦～～ Fish：Zero Nero：點啊～ Fish：其實π先生比咗新任務我...叫我喺Game of Eden接近一個叫阿K嘅玩家...加入佢嘅組織... Nero：你嘅身體已經搞成咁...點解π先生咁都唔放過你！ Fish：由我地被π先生睇中嗰一刻...我地已經無得揀... Nero：有得揀！我可以同π先生講架！我有一個願望啊嘛！ Fish：嗰個阿K喺遊戲世界成立咗一個叫做404嘅收藏組織...專收集一啲喺現實世界被404咗嘅物品...然後數碼化入Game of Eden。 Nero：咁咪即係公然挑戰π先生？ Fish：你可以咁講，但因為Game of Eden只係得最高權限嘅管理員先有刪除嘅權限，換然之，一入咗Game，就會一世留喺Game入面。 Nero：咁π先生想你喺遊戲世界再將嗰啲物件404？ Fish：無錯。不過，我可以留低線索同密碼。 Nero：呢個就係你對抗π先生嘅方法？ Fish：無錯。物件盛載住記憶。只要唔忘記，3.14都有數完嘅一日。 Nero：希望意識轉移嘅時候...π先生喺我嘅身體唔會睇到呢段記憶... Fish：就算佢睇到都唔緊要。我「F」嘅意志一定會有人傅承。 Nero：F？ Fish：每個收藏組織404嘅成員都有一個代號。而我嘅代號就係F。 Nero：F for fish？ Fish：F 代表 forever。 Nero：所以...你今日會見我，就係想同我講呢一件事？ Fish。嗯...同埋...想喺你走之前...再望你一次...攬你一次... Nero：Fish... 歌：張敬軒 Hins Cheung《賽勒斯的愛》 曲：SAMDELL / Amadeus Sögaard 詞：T-Rexx 編：SAMDELL 監：Hins Cheung / SAMDELL / 廖志華 Zip噏劇場 Game of Eden 第2季 小島篇 第22回 「盧零的遺願 - 上」 Crystal 飾演 盧如 Fish Potter 飾演 N + 盧零 Zero 編劇及製作 阿攝 音樂 BEAT FRIDAY 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

Zip噏劇場 Game of Eden 第2季 小島篇 第21回 *下雨聲效 N / Zero：Snow...為咗Fish…對唔住啊... Snow：Fish…? *刀插入Snow身體聲效 N / Zero：係Pi先生殺你...唔係我盧零要殺你... *開門聲效： Snow 太太 Sunnie：Snow！我同Apple返咗嚟啦！快啲出嚟幫我拎啲奶粉尿片入屋啦！ Snow：走...走啊... Snow 太太 Sunnie：啊！！！ *打火機聲效 *燃燒聲效 N / Zero：喺Sunnie同Apple返到嚟之際...我打暈咗佢地...然後就將Snow嘅屋企同所有有關Pi先生嘅黑材料一把火咁燒咗！ *爆炸聲效 N / Zero：就喺呢個時候...有一個人喺火入面慢慢行出嚟... *懸疑音樂 Zero（心聲）：點解你放走Sunnie同Apple啊？ N / Zero：佢地係無辜架... Zero（心聲）：咁Snow呢？ N / Zero：我無得揀...因為Pi先生比我嘅任務就係要解決Snow Zero（心聲）：咁點解你唔放過Snow？ N / Zero：都話因為Pi先生比我嘅任務就係要解決Snow囉 Zero（心聲）：Pi先生比任務你，你就一定要完成？原本嘅N唔係咁架？ N / Zero：因為我唔係N，而係Zero啊！ Zero（心聲）：但你依家擁有N嘅身體喎。 N / Zero：無論係N定係Zero...我地都只係Pi先生嘅棋... Zero（心聲）：咁你呢隻棋之後會點？ N / Zero：我可以點啊？ Zero（心聲）：可以繼續完成Pi先生嘅任務，繼續解決Pi先生要你解決嘅人，直至... N / Zero：直至...? Zero（心聲）：直至你死為止。或者... N / Zero：或者咩啊？ Zero（心聲）：放棄做Zero，而去做N囉。 N / Zero：即係反抗Pi先生？你知道反抗佢嘅下場係點架？ Zero（心聲）：就係死囉... N / Zero：咁咪即係一樣? Zero（心聲）：唔同。分別在於你呢隻棋有冇諗過點行。 N / Zero：我可以點行啊... Zero（心聲）：咁你點解要放生Sunnie同Apple？ N / Zero：都話佢地係無辜囉... Zero（心聲）:所以你只係打暈咗佢地，將佢地搬去安全嘅地方。咁點解你將所有文件檔案複製一份，入落USB，再放落BB車度？ N / Zero：因為...我想佢地知道點解Snow會有呢個下場... Zero（心聲）:點解佢地要知道? N / Zero：因為有因先會有果。 Zero（心聲）：咁邊個係因？ N / Zero：你知架。 Zero（心聲）：我知。但你知唔知啊？Nero。 N / Zero：Nero？邊個係Nero？ Zero（心聲）：外表嘅你係N，內裡嘅你係Zero。但因為你N嘅外表，影響到你內心嘅Zero。你內心嘅Zero又影響到外在嘅N。所以你係N，但又唔完全係N。你係Zero，但又唔完全係Zero。結果，你成為N ＋ Zero，即係Nero。 N / Zero：即係點啊？ Zero（心聲）：N係棋，Zero係棋。但Nero唔係。 N / Zero：咁Nero可以點行？ Zero（心聲）：由你放走Sunnie同Apple，再將USB放入BB車嗰一刻，你已經行咗嗰一步棋。不過要改變一切，除咗解決源頭，仲有另一個方法... N / Zero：你意思係…you cant beat them, join them? Zero（心聲）：唔係Join，而係Become。 N / Zero：點樣可以成為佢？ Zero（心聲）：你最大嘅籌碼，就係你係第一個意識轉移成功嘅人。 N / Zero：所以...? Zero（心聲）：所以你係時候要放棄我。 N / Zero：放棄你？ Zero（心聲）：因為，由依家呢刻開始，你唔再係Zero，亦唔再係N。而係Nero。 *上彈聲效 N / Zero：你想點啊？ Zero（心聲）：再見啦。Nero。 *開槍聲效 N / Zero：唔好啊！！！ *懸疑音樂 Nero：就係Zero開槍嗰一刻，我紮醒咗...然後我發現自己企喺冷凍庫，望住自己，亦即係Zero嘅屍體...完成咗解決Snow嘅任務之後...我就嚟咗呢個冷凍庫...因為我好想透過望見自己...從而諗返起自己係邊一個...剛才嘅事...通通都係一個夢...但我再望一望玻璃...玻璃反射住N嘅外貌...跟住諗起頭先提到嘅一句說話...「N係棋，Zero係棋...但Nero唔係...」 然後...莫九醫生就send咗呢個訊息比我。 *短訊聲效 莫九：Pi先生又有新任務比你。 *懸疑音樂 Nero：呢三個月嘅時間，我都數唔到做咗幾多任務，解決咗Pi先生要我解決嘅人...以前做任務唔會理前因，只係知道自己身為666組織嘅成員，Pi先生嘅指令就係人生嘅目標。但經歷過一連串嘅事之後...我就會諗，被解決嘅人嘅囝囡，會唔會因為能力被Pi先生睇中，然後好似我地咁，加入同舟會，為Pi先生賣命呢？ 而呢三個月每次完成任務之後，我就會去啞鈴洲令自己平靜落嚟。我印象中嘅啞鈴洲非常熱鬧，不過到咗依家，2060年...水位慢慢上漲，加上之前嘅連日暴雨，好多古蹟都被浸壞咗...張保仔洞更加淹沒咗喺海入面... 本島嘅區域無受到洪水影響嘅原因，係因為Pi先生出錢資助興建城牆，保護重要嘅地區。而啞鈴洲等嘅其他小島就無咁嘅福份... 變成海底遺跡...應該只係時間嘅問題... 變成魚人狀態嘅我每當喺海入面嘅時候就會諗N之前提及過 - 「將所有人變晒做魚人，係人類最好嘅出路」呢個理念... 可惜，我無咁多時間...因為3個月嘅任務及監察時期已經完結，而呢一日終於都嚟到... *開門聲效 莫九：N要成為容器嘅呢一件事，我相信你都知道架啦？ Nero：你咁問，即係Pi先生定咗意識轉移嘅時間啦。 莫九：無錯。一個星期之後就會進行實驗。 Nero：我好想問莫九醫生一個問題，點解你要為Pi先生賣命？ 莫九：我唔係為佢賣命。佢只係協助我追求醫術嘅最佳人選。 Nero：所以你同佢係一場交易？咁你嘅追求幾時會完？ 莫九：其實我同你，仲有好多人都係西西弗斯。不過...推緊嗰嚿石...同埋神...好多時候都係自己... Nero：咁我知道自己嘅限期，係咪應該覺得好幸福，應該要感恩啊？ 莫九：呢個問題我答你唔到。不過我有一問題可以比你思考。Pi先生為咗答謝你嘅付出，可以完成你一個願望。你有7日嘅時間。 （TBC） Zip噏劇場 Game of Eden 第2季 小島篇 第21回 「The choice of Nero」 Potter 飾演 N及Zero 鄧添樂 飾演 Zero Harry 飾演 Snow Fiona 飾演 Snow 太太 Sunnie 彬臣 飾演 莫九醫生 編劇及製作 阿攝 音樂 BEAT FRIDAY  封面設計 followmelikeblack  歌：葉巧琳 / 張進翹〈心獸 (怪物 Version)〉 曲：葉巧琳 / 波多野裕介 (Yusuke Hatano) 詞：Oscar  編：波多野裕介 (Yusuke Hatano) 監：Edward Chan / Cousin Fung@emp / 波多野裕介 (Yusuke Hatano) Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

Zip噏劇場 Game of Eden 第2季 小島篇 第20回 Snow：（讀白）我叫Snow，係一名親子版嘅記者。其實我係想去前線跑新聞，不過見工嘅時候只係得親子版有位。我女朋友同我講 - 「唔緊要啦，你入咗行先，之後咪慢慢等機會轉部門囉。」 就係咁，我一等就等咗10年...直至2059年尾，老總叫曬我地入房開會，話出年就係現任Pi先生，亦即係第二代Pi先生就任嘅第15年，老總想搞專題出特刊，叫我地每人都拋啲Ideas出嚟。結果...我呢個親子版記者拋嘅ideas就係 - 「幽靈嬰兒問題嚴重，幕後黑手源於Pi？」 當我同我女朋友講我想做呢個題目，佢黑曬面同我講... Snow女友 Sunnie：「你叫Sonw，姓鄧...你唔為以為自己真係Snowden啊？」 Snow：「你知我一直想做跑前線架...呢個係500年一遇嘅機會嚟架...」 Snow女友 Sunnie：「你想跑前線嘅...咪跟啲親子力抗洪水保家園...或者親子一同炒幣致富...又或者天價燒賣背後的感人親子故事囉！」 Snow：「你知我唔係想做呢啲架！」 Snow女友Sunnie：「雖然你叫Snow，唔係叫Slow…但你都係時候Slow down...諗下我地嘅將來啦...」 Snow：「Know啦Know啦...」 Snow：（讀白）我嗰句know嘅意思係我知我想試多一次。我交咗idea之後，老總叫咗我入房，問我點解做呢個topic，同啲料點嚟...我照直同佢講...線索嚟自一個喺Game of Eden黑市認識嘅線人...之後...呢一次亦成為咗我最後一次...我被老總炒咗... 我返到屋企，望住牆上面嘅有關同舟會孤兒院嘅資料，決定將嗰篇寫咗一半嘅稿寫埋佢！然後...我開咗一個社交平台帳號，準備upload呢篇文！ N：「你嗰account名叫做 the apple of the eye？咁得意？」 Snow：「邊個！」 N：「係因為套愛情電影？定係出自聖經呢？」 Snow：（讀白）我即刻企起身，隨手拎起書枱上面嘅筆...跟住退到牆角，望住除咗我之外，一個人都無嘅書房...唔通我撞鬼...? 然後...我戰戰競競咁對住空氣大叫 - 你...同我出嚟啊！你再唔出嚟...我... *現形狀態聲效 N：「你支筆...唔係咁用架Snow。」 Snow：痴線啊！ *筆插入身體聲效 N：哈哈，呢個就係你對線人嘅見面禮？ Snow：線人...？你就係喺黑市比料我嗰個...N? N：無錯。 Snow：我無眼花啊嘛...我真係插到你...即係你唔係投影技術...但你可以隱身架... 唔通你係X men？定係有咩高科技啊？ N:係生物科技。同舟會仲有好多你唔知道嘅事！你支筆準備好未？ Snow：（讀白）N原來係同舟會666組織嘅組長...佢比咗好多資料同線索我去調查。而嗰資訊量大到...我需要好多時間去消化...所以我無再搵工，而變咗一位全職嘅私家偵探同黑客...當然我嘅老闆就係N...「The apple of the eye」一直運作，直至3個月前，N同我講佢需要截劫容博士嘅DNA藥，叫我等佢消息，先再進行下一步行動。而喺佢出發之前，佢再問我嗰條問題。 N：Snow，你未答我點解你要將個帳戶改做「the apple of the eye」。係因為聖經？定因為套戲？ Snow：但聖經提過好幾次呢句說話，你指邊一篇先？ N：King James Version，申命記 32：10 - he led him about, he instructed him, he kept him as the apple of his eye。 Snow：或者係箴言 7：2- Keep my commandments, and live, and my law as the apple of the eye。 N：遵守我的命令就得存活； 保守我的法則， 好像保守眼中的瞳人。呢一句好適合形容Pi先生。不過，你記住詩篇17：8嗰句。 Snow：Keep me as the apple of the eye； hide me in the shadow of your wings？ *魚人狀態聲效 Snow：（讀白）當我講完，佢就變成魚人加隱形狀態，喺我面前消失咗...淨係留低一個圓形黑盒同新一批要查嘅資料...直到今晚...事隔3個月N再出現返！ N / Zero：咁你有無一個叫做盧零嘅人嘅資料？ Snow：盧零... *按滑鼠聲效 Snow：有。佢喺醫院出世之後就被棄養，成為幽靈嬰兒。然後俾喺醫院做嘅一位姑娘收養，搬咗去啞鈴洲住。 N / Zero：咁佢父母呢！？ Snow：查咗好耐...都查唔到佢父母嘅資料...呢個盧零好重要架？ N / Zero：好重要... Snow：不過等我處理埋第一代Pi先生嘅爆料先！ N / Zero：但我等唔到啦... Snow：點會等唔到啊！爆完第一代，一定會引起連鎖效應！到時呢一代Pi先生以及同舟會一定有好多公關災難！不過你放心！「The Apple of the eye」 嘅server好安全！ N / Zero：Snow…對唔住啊... Snow：唔好講呢啲啦！你記住守承諾就得！ N / Zero：承諾？ Snow：詩篇17：8 「Keep me as the apple of the eye； hide me in the shadow of your wings」。我想你保護埋我嘅Apple。 N / Zero：Apple？ *門外鎖匙聲效 Snow：Apple返嚟啦！不過你唔好喺度啊，會嚇親佢地架！聽朝我地再傾？ N / Zero：Snow...為咗Fish…對唔住啊... Snow：Fish…? *刀插入Snow身體聲效 N / Zero：係Pi先生殺你...唔係我盧零要殺你... *開門聲效： Snow 太太 Sunnie：Snow！我同Apple返咗嚟啦！快啲出嚟幫我拎啲奶粉尿片入屋啦！ Snow：走...走啊... Snow 太大 Sunnie：啊！！！ （TBC） Zip噏劇場 Game of Eden 第2季 小島篇 第20回 「The apple of the eye」 Potter 飾演 N及Zero Harry 飾演 Snow Fiona 飾演 Snow 太太 Sunnie 編劇及製作 阿攝 音樂 BEAT FRIDAY  封面設計 followmelikeblack  Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

Zip噏劇場 Game of Eden 第2季 小島篇 第19回 *開門聲效 N / Zero：莫九醫生，今日又想繼續問咩問題啊？ 莫九：今日唔係要做咩測試，而係帶你去見一個人。 N / Zero：Fish佢終於肯見我？ 莫九：你跟我嚟就知架啦。 *開門聲效 莫九：就係佢啦。 *懸疑BGM N / Zero：（讀白）莫九醫生帶我去到一間冷藏室，入面放咗好多具屍體。而其中一個就係我嘅屍體...之前嘅一個星期困喺一間無鏡嘅房入面，根本無機會知道自己變成點...雖然我知自己嘅意識入咗N嘅身體，但係...我都唔覺得自己係N...直到呢一刻，真真正正望住自己冷冰冰咁雪住喺冷藏室...再望到旁邊玻璃反射緊我依家N嘅外貌...我明白點解Fish唔想見我... 莫九：你想點處置佢？ N / Zero：可唔可以繼續保留佢？ 莫九：原因係？ N / Zero：莫九醫生，你喺意識轉移之前同我講過，叫我記住活下去嘅理由。佢同Fish就係我嘅理由。 莫九：好。我會盡力保留呢個屍體。咁依家我地進行下一步嘅測試。 N / Zero：咩測試？你地仲想用咩方法去證明我唔係Zero啊？ 莫九：嚴格嚟講依家係第二階段，亦即係監察期。π先生有任務比你，想你回復666組織成員身份嘅同時，監察你嘅身體情況。 N / Zero：咁我即係可以見阿Fish？ 莫九：我諗佢嘅心理同身理情況都未適合見你住。 N / Zero：咁我係咪可以自由活動？ 莫九：伸隻手出嚟。 *打針聲效 N / Zero：追縱器？ 莫九：除咗喺追縱器，同時亦係監察器，再加爆炸裝置。無論你喺N定Zero，都體驗過容博士所整嘅炸彈嘅威力。呢一段時間，你主要留喺墓島，除咗我之外，唔好見其他組織成員。之後嘅事，π先生會有安排。 *大雨聲效 N / Zero：（讀白）依家係2060年9月5號晚上嘅11點，我身處喺城市半島嘅市中心。一個鐘頭前，天氣都仲係幾好，但突然之間就落起大雨，街上嘅行人就算擔遮都全身濕曬...唔駛一個鐘，水已經浸到小腿位置。因為雨太大，亦太過突然，本來已經被沙泥、垃圾整到塞塞地嘅渠道塞上加塞...路面嚴重積水...有地方水浸...巴士、小巴、的士、私家車無一倖免，全部死火... *雷暴聲效 N / Zero：雖然大家都好狼狽，但落雨係出動嘅最佳時機。因為當大家諗緊點樣返屋企嘅時候，令變成魚人狀態加保護色功能模式嘅我，做任務更加方便。我好快就嚟到一棟舊式唐樓，爬上7樓嘅露台，慢慢打開窗，然後行入大廳，同一時間有一個人喺房行出嚟...經過我面前... Snow：嘩...隻窗做咩開咗架！ *閂窗聲效 Snow：搞到地下濕晒添！ N / Zero：呢個人就係今次任務嘅目標。佢叫Snow，係一位黑客兼私家偵探。我慢慢行入佢間房，明白點解π先生要處理佢。因為佢牆上面貼咗好多好多張人相，寫曬出生日期同死亡時間...入面有幾個係666組織嘅成員...包括N同埋Fish...呢個時候，Snow行返入嚟，研究緊佢台上面嘅圓形黑盒。 Snow：呢個盒背面有好多間距不一嘅圓點...如果將某啲圓點用線連埋...啊！我知啦！係二十八星宿嘅圖案！至於電子密碼鎖係七位數字嘅密碼…試下北方7宿嘅星數...即係6642322先！ *輸入密碼聲效 *成功開啟聲效 Snow：掂！睇嚟今日運氣幾好！不過入面又有一隻USB...啊...又要密碼先開到...好在...今次係5位數字... N / Zero：Snow望住N父母同只有幾歲嘅N嘅相，深思咗一陣。 Snow：應該係同阿囝有關嘅。阿囝係2028年9月6日出世，但密碼得5位數....會唔會係28906？ *輸入密碼錯誤聲效 Snow：調返轉？06928？60928？ *輸入密碼錯誤聲效 Snow：啊！會唔會喺出生時間啊？佢個囝係凌晨5點出世...會唔會係28965？ *輸入密碼錯誤聲效 Snow：又或者調轉...係56928？ *成功開啟聲效 Snow：得咗！睇嚟我嘅特殊技能係好彩！ *檔案載入聲效 Snow：嘩！我唔只好彩！係好好彩！呢啲files值錢囉！ N / Zero：Snow打開嗰隻USB入面嘅Files...全部都係有關第一代π先生以及同舟會嘅檔案...主要係資金進出嘅文件... *撞到枱聲效 Snow：邊個！ *槍上彈聲效 Snow：係...咪你啊...N...？ *魚人狀態聲效 Snow：嘩！你入咗嚟好耐啦？講聲啊嘛！嚇死人咩！ N / Zero：好耐無見啦。Snow... Snow：你都知呢！呢幾個月你失蹤咗，我勁驚啊！ N / Zero：咁...呢幾個月你有咩行動？ Snow：幫你爆完DNA同人體研究嘅料之後就搵唔到你，我點敢有行動啊！ N / Zero：呢個圓形黑盒... Snow：你失蹤前比我，話你爸爸媽媽好可能因為咁而死。我依家明白曬啦！原來佢地掌握第一代π先生嘅黑材料！ N / Zero：咁呢一代π先生呢？ Snow：得你之前比我嘅資料咋。同埋淨係知道佢係第一代π先生同舟會孤兒院嘅孤兒。不過好大機會同你都係一樣，父母比第一代π先生解決咗。然後我發現好多權貴同重要人物...都喺π先生孤兒院長大。呢個應該係π先生控制呢個城市嘅方法！ N / Zero：咁你有無一個叫做盧零嘅人嘅資料？ Snow：盧零... *按滑鼠聲效 Snow：有。佢喺醫院出世之後就被棄養，成為幽靈嬰兒。然後俾喺醫院做嘅一位姑娘收養，搬咗去啞鈴洲住。 N / Zero：咁佢父母呢！？ Snow：查咗好耐...都查唔到佢父母嘅資料...呢個盧零好重要架？ N / Zero：好重要... Snow：不過等我處理埋第一代π先生嘅爆料先！ N / Zero：但我等唔到啦... Snow：點會等唔到啊！爆完第一代，一定會引起連鎖效應！到時呢一代π先生以及同舟會一定有好多公關災難！不過你放心！「The Apple of the eye」 嘅server好安全！ N / Zero：Snow…對唔住啊... Snow：唔好講呢啲啦！你記住守承諾就得！ N / Zero：承諾？ Snow：詩篇17：8 「Keep me as the apple of the eye； hide me in the shadow of your wings」。我想你保護埋我嘅Apple。 N / Zero：Apple？ *門外鎖匙聲效 Snow：Apple返嚟啦！不過你唔好喺度啊，會嚇親佢地架！聽朝我地再傾？ N / Zero：Snow...為咗Fish…對唔住啊... Snow：Fish…? *刀插入Snow身體聲效 N / Zero：係π先生殺你...唔係我盧零要殺你... （TBC） Zip噏劇場 Game of Eden 第2季 小島篇 第19回 「身世」 彬臣 飾演 莫九醫生 Potter 飾演 N及Zero Harry 飾演 Snow 編劇及製作 阿攝 音樂 BEAT FRIDAY  封面設計 followmelikeblack  Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

Zip噏劇場 Game of Eden 第2季 小島篇 第18回 *推輪椅聲效 莫九: 我帶咗Fish 嚟見你啦。 N / Zero : Fish…莫九醫生，呢個就係你所講嘅無事？ 莫九: 人體爆炸嗰一刻發生得太快，距離太近…可以保住嗰頭同身已經係我能力嘅極限… N / Zero : Fish… 莫九: 你要開全知狀態先可以同佢溝通到啊… *全知狀態聲效 Fish: Zero…係咪你啊？ N / Zero: Fish…對唔住啊… Fish: 傻啦，只要係你…就得架啦。 N / Zero: 咁你依家覺得點啊！ Fish: 好好啊！係唔可以摸你啫… N / Zero : 莫九醫生，可唔可以幫Fish做意識轉移實驗？ 莫九: 呢個實驗，唔係亂咁可以做架… N / Zero 咁我又做得？ 莫九: 因為，你呢個係特殊清況…係Pi先生嘅命令… N / Zero: 咁我依家即刻去求Pi先生！ 莫九: 無論你係N 定 Zero都好，你都係666組織嘅成員，你知成功率有幾大架？ N / Zero : 你亦都知道，你哋就算鎖住我，憑我依家嘅身體，可以見到Pi 先生嘅機率都好大架！ Fish: Zero…你冷靜啲先… 莫九: 係囉，你啱啱先醒返，身體狀況好唔穩定架… Fish: Zero…你聽我講，依家最重要就係你醒返… N / Zero : 但係… 莫九: 好啦。時間夠啦。你哋各自都要做各樣嘅檢查。其他嘅事，我會再安排。 ------------------------ *推輪椅聲效 莫九: Fish，你肯定，佢係Zero，唔係阿N?  Fish: 我好肯定佢係Zero。 莫九: 點解你咁肯定呢？ Fish: 因為…從佢講野嘅語氣…節奏…同情緒，都同Zero 係一樣架！ 莫九: 但呢啲都可以模仿架？ Fish: 咁佢望住我嘅眼神無得扮啦！ 莫九: 你口中嘅肯定，無科學嘅根據，我好難說服到佢哋，醒返嘅就係Zero… Fish: 咁你哋究竟想點啊？你想點樣證明佢係zero 啊？定由頭到尾你哋都假定佢係N啊？ 莫九: 當然，要驗證佢係Zero 定阿N 有好多種方法。暫時最有效嘅方法，理論上有一個，就係登入game of eden。 Fish: 咁快啲啦！我隨時準備好架啦！ 莫九: 你依家嘅身體狀態不適宜留喺遊戲入面咁耐。我安排好時間，就會通知你哋。 ------------------------ N / Zero :(讀白） 由醒返到依家，我已經被困喺呢間無鏡嘅病房，就算我可以開到全知狀態，但都感受唔到Fish嘅氣息...而每日莫九醫生都會準時入嚟同我做各樣嘅檢查，以及問以下嘅問題... 莫九: 你叫咩名？ N / Zero : 我叫盧零，Zero。 莫九: 今年幾多歲？邊度出世？父母係？ N / Zero: 今年25歲。出生地唔清楚。亦都唔知父母係邊個。我淨係記得有一個姨姨喺啞鈴洲養大我，但到我6歲嘅時候佢就離世。 莫九: 幾多歲加入同舟會？ N / Zero : 6歲入Pi先生嘅孤兒院，18歲入666組織。 莫九: 咁最後嘅記… N / Zero: 莫九醫生，我醒返已經7日啦。呢一個星期，你每日都問我同一堆問題。我咪答咗你囉，我係Zero啊！ 莫九: 好。咁你依家變成魚人狀態啊。 *魚人狀你聲效 莫九: 你叫咩名？今年幾多歲？係邊度出世？ N / Zero: 莫九醫生，你頭先咪問過囉！ 莫九: 我純粹想睇下變成魚人狀態嘅你，會唔會觸發到N 身體嘅記憶，從而影響大腦。因為Pi先生想100%肯定意識轉移係成功嘅。 N / Zero: 佢只係怕轉移咗之後嘅佢唔再係佢啫。 莫九: 點都好，我都係想再三確認一下，你進入咗現實世間同遊戲世界嘅中間地帶，再入咗N身體度門，你遇到啲咩事？ N / Zero : 我一入咗去，無幾耐就醒返就見到你啦。 莫九: 途中無任何特別事發生？ N / Zero : 真係無啊，莫九醫生！ 莫九: 因為你係第一個成功做意識轉移而成功嘅人。所以我先咁想確認當中嘅過程。 N / Zero : 如果莫九醫生你真係想知嘅，點解你唔自己嘗試一次？ 莫九: Ok。既然你答唔到我呢個問題。我唯有繼續問你問題。相入面嘅一男一女，有無印象？ N / Zero: 無… 莫九: 你知道我都開啟咗全知狀態，我好易察覺到你身體嘅變化。 N / Zero: 我知…佢係N 嘅父母… 莫九: 點解你會知道？係咪進入N嘅身體，所以都擁有佢嘅記憶？ N / Zero: 因為N佢曾經比過佢全家幅我睇… 莫九: 咁點解頭先你要講大話？ N / Zero: 如果我講有，你又會質疑我係N。莫九醫生，你係咪由頭到尾都唔相信我係Zero?  莫九: 我只係想從各方面收集數據，再去下結論。你再睇下呢張車禍嘅相，有咩感覺？ N / Zero: 無特別感覺。 莫九: 但我感受到你心跳快咗，肌肉都繃緊咗。 N / Zero : 莫九醫生，你都有聽過肌肉記憶，或者深層記憶…相入面就係N嘅父母。而我依家擁有N嘅身體。就係因為咁，所以我身體條件反應比出生理反應。我自己都控制唔到。但我想講，我真係Zero啊… 莫九: Ok。咁我哋依家進入下一個測驗。就係入Game of Eden。 電腦導航聲音： Welcome to Garden of Eden ，依家進行腦電波核對… 玩家 - 盧零 身份核對成功 歡迎回到伊甸園，依家帶你進入所屬區域 - Area DB Island，今日係NC 38年9月4日，Enjoy yr time in Eden. ——— *海浪聲效 N / Zero：Fish！ Fish：點解... N / Zero：咩點解啊？ Fish：即係失敗咗... N / Zero：失敗？我咪入嚟咗囉？ Fish：停！ N / Zero：Fish，係我啊，Zero啊！ Fish：但你仲係N嘅樣啊，即係你仲係N啦！ N / Zero：但我喺現實世界醒返之後，你都信我架？係咪莫九醫生同你講咗啲咩啊？ Fish：莫九醫生話...理論上Zero入Game 嘅話...會出現返之前嘅外貌形態... N / Zero：Fish，係理論理架咋！我喺意識轉移實驗第一個成功嘅人，即係佢嘅理論只係理論啦！ Fish：係... N / Zero：係你叫托莫九醫生同我講，話你會喺另一度門後面等我...係你話同Pi先生拎咗假期，我地一齊喺Game 入面嘅啞鈴洲養傷...係你話完成任務之後會同我約會 Fish：但係... N / Zero：你望住我，認真啲望住我。 Fish：真係你...? N / Zero：係啊... Fish：Sorry啊...我...好亂啊！你…比少少時間我消化一下先… *電子聲效 玩家 盧如 現已登出。Hope you enjoy yr time in Eden。 N / Zero : Fish!  Zip噏劇場 Game of Eden 第2季 小島篇 第18回 「N or Zero?」 Crystal 飾演 盧如 Fish 彬臣 飾演 莫九醫生 Potter 飾演 N + 盧零 Zero 天頤 飾演 容博士 編劇及製作 阿攝 音樂 BEAT FRIDAY 封面設計 Followmelikeblack *訊息聲效 容博士：莫九醫生，Pi先生話比多少少時間再觀察容器嘅情況。佢希望你可以確定到佢意識加記憶有幾多%係Zero，有幾多%係N。如果超過75%係 Zero 嘅話，就可以準備第一次轉移。 （TBC） Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

Zip噏劇場 Game of Eden 第2季 小島篇 第17回 *呼吸機聲效 莫九: Fish，你醒啦？ *開啟全知狀態聲效 盧如: 莫九醫生…係咪可以進行意識轉移實驗啦？ 莫九: 係啊。不過進行實驗之前，我想睇吓開啟咗全知狀態嘅你，身體點啫。 盧如: 係一種好奇怪嘅感覺… 莫九: 奇怪？ 盧如: 明明應該乜都感受唔到，但又似感受到… 莫九: 如果身體負荷太大，就唔好勉強啦… 盧如: 莫九醫生，我無事啊，你可以放心去進行實驗。 莫九: 對唔住啊…你依家嘅身體情況…我帶唔到你入去門後面… 盧如: 傻啦，你一定會成功架嘛！ 莫九: 嗯…你有無說話想同佢講？ 盧如: 幫我同佢講…我喺另一個門後面等佢啊！ 莫九: 好… 電腦導航聲音： Welcome to Garden of Eden ，依家進行腦電波核對… 管理員 - 莫九 身份核對成功 歡迎回到伊甸園，依家帶你進入所屬區域 - Area DB Island，今日係NC 38年8月28日，Enjoy yr time in Eden. ——— 莫九: Zero，你準備好嘅，就跟我入嚟啦。 *開門聲效 盧零: (讀白) 我食咗莫九醫生比我嘅紅色藥丸之後，成嗰啞鈴洲慢慢消失，得返我同莫九醫生。而佢身邊出現一度門，我慢慢跟佢行入去，點知右腳一踏入門入面，我就成嗰人跌咗落門後面嘅黑暗空間！ 莫九: Zero，放心，一切都係幻象嚟。 盧零: (讀白) 聽到莫九醫生把聲之後，我隔咗幾秒就喺呢個無地面嘅空間停低咗。感覺好似浮喺半空咁…而莫九醫生身後邊，又出現另一度門！ 莫九: 呢度係遊戲世界同現實世界之間嘅空間。 盧零: 咁你身後面度門係？ 莫九: 門只係一種概念，易啲比大家理解嘅一種呈現方式。總之你通過呢度門，理論上就可以返到去現實世界。 盧零: 理論上？ 莫九: 係啊。因為呢個實驗從未成功過。 盧零: 從未成功過！？ 莫九: 係。所以，我都要同你講你嘅選擇。入返剛才度門，你就可以永遠存在喺Game of Eden。而入咗呢度門，你就可以返現實世界，見到現實世界嘅阿Fish。 盧零: Fish佢…知唔知呢件事？ 莫九: 知。佢亦好想你去嘗試。 盧零: 咁佢仲有無講啲乜嘢…？ 莫九: 佢話…會喺呢度門後面等你。 盧零: 明白… *開門聲效 莫九: Zero。我唔知門後面嘅世界係點。但無論發生咩事都好，要記住自己活下去嘅理由。 盧零: (讀白) 我點一點頭，然後行咗入去通往現實世界嘅門。 *關門聲效 盧零: (讀白) 門後面都係漆黑一片。黑到我見唔到自己嘅身體，感覺亦依舊好似飄浮喺半空之中。突然，我聽到好多鎖鏈聲衝緊埋去我度！ *鎖鏈聲效 盧零:(讀白) 我數唔到有幾多條鎖鏈，總之就好緊咁鎖住我全身所有部位！然後拉我去好深嘅黑暗空間！突然又出現一度打開咗嘅門！我好驚，驚到合埋眼！ *破風聲效 盧零:(讀白) 隔咗幾秒，鎖鏈就無再拉住我…但我打開唔到隻眼…不過就感覺到自己好似被水球包圍住！仲隱約聽到出面有人不斷叫… 跟住鎖鏈再將我拉走！衝破咗包圍我嘅水球！然後…我慢慢睇到野，不過影像好模糊…反而嗅覺好清晰…係乳香嘅味道…仲有一種被人攬住嘅感覺… 突然，成個空間變得好光！仲出現一個男人同女人拖我手，陪我玩嘅畫面！無幾耐，就聽到撞車聲！ *撞車聲效 盧零:(讀白) 我感覺到心口有少少痛…仲有啲眼淚喺眼角流落塊面度，再滴落地…然後成嗰空間變成灰色…鎖鏈又再拉我行，不過就無之前咁大力。我順住嗰去勢，跟住鎖鏈帶我嘅方向行，然後穿過一度又一度嘅門。每度門後面，都有唔同嘅畫面，包括…喺同舟會孤兒院識到朋友…空間慢慢變返彩色…然後第一次揸槍…進行第一個任務…子彈貫穿對方嘅一剎，嗰心戚住戚住…到越開越多槍，解決越嚟越多敵人，慢慢已經無感覺…直到成為組長之後，喺同舟會其中一個檔案室發現一對父妻離世嘅檔案，我嗰心突然好痛…再下一個畫面就係見到Pi先生對住我笑，我就覺得好寒… 終於，鎖鏈無再拉住我。我停咗喺一塊鏡前面。鏡入面，我見到喺山洞被N鎖住嘅自己。然後，視覺慢慢轉移180度，鏡入面出現魚人狀態嘅N對住呢一刻嘅我微笑！ 跟住我全身嘅鎖鏈解鎖，跌喺地上面。 然後呢個空間慢慢消失… 我知道係做決定嘅時候… 所以…我執起所有嘅鎖鏈，鎖返自己。同一時間，鏡入面嘅N對我伸手，我捉住佢對手，然後…塊鏡慢慢裂開，最後仲爆開咗！ *鏡裂及爆開聲效 *心跳儀器聲效 莫九: 你…醒啦？ N 聲音: 莫九醫生？我係咪返到嚟現實世界啦？ 莫九: 係…不過…究竟你係Zero…定係阿N 啊？ Zip噏劇場 Game of Eden 第2季 小島篇 第17回 「意識轉移實驗」 Crystal 飾演 盧如 Fish 彬臣 飾演 莫九醫生 鄧添樂 及 Potter 飾演 盧零 Zero 編劇及製作 阿攝 音樂 BEAT FRIDAY 封面設計 Followmelikeblack *推輪椅聲效 莫九: 我帶咗Fish嚟見你啦。不過人體爆炸嗰一刻發生得太快，距離太近…可以保住嗰頭同身已經係我能力嘅極限… N 聲音：Fish！ 莫九：你要用全知狀態先可以同佢溝通到… *開啟全知狀態聲效 盧如: Zero…係咪你啊…?  N 聲音：Fish…對唔住啊… (TBC)  歌：泳兒 Vincy Chan 周國賢 Endy Chow 《同歸於盡 之 三生三世版》(Ending endlessly, with you)  曲：馮穎琪 詞：周耀輝 編：CMgroovy/孔奕佳 監：CMgroovy/馮穎琪/孔奕佳 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

電腦導航聲音： Welcome to Garden of Eden ，依家進行腦電波核對… 管理員 - 莫九 身份核對成功 歡迎回到伊甸園，依家帶你進入所屬區域 - Area Z，今日係NC 38年8月28日，Enjoy yr time in Eden. ——— *吹口哨聲音 *馬蹄奔跑聲效 莫九: P仔，好耐無見啦喎。我帶咗啲紅蘿蔔比你食啊。 *馬叫聲效 莫九: 乖，依家帶我去你媽媽度啊。 *馬叫聲效 *拍翼聲效 莫九:(讀白) Area Z 嘅 Z，解做 Zoo，係π 先生叫阿康設計比容博士嘅區域，用途係喺遊戲世界模擬各種基因工程嘅可能性。P仔就係容博士最早期成功嘅實驗品。而Area Z再細分咗好多個區域，好在有P仔帶路，好快我就搵到容博士。 *馬蹄聲效 *落馬聲效 *士兵衝上來聲效 *刺出兵器聲 容博士: 阿刑，阿天，Stop！ 莫九: Gene，呢種無頭士兵就係你最近鑽研嘅實驗品？ 容博士: 最近有時間，搵到啲古書，咪將入面提到嘅生物整出嚟玩下囉。 莫九: 即係N嘅事已經處理好？ 容博士: π 先生叫阿康整一個專屬區域比N。而N嘅身體已經完成再生，隨時都可以進行意識移植。 莫九: Fish佢已經答應咗。 容博士: 你應該知道就算無Fish 嘅同意，呢個實驗都事在必行。 莫九: 但有Fish嘅幫忙，成功率會大大提高。 容博士:其實Jess, Jesse 同Jessica 嘅事過咗咁耐，你係時候放低啦。更何況係上一代Dr Morpheus 嘅事。 莫九: 如果都係失敗呢？ 容博士: 咁就用阿Fish 嘅意識做轉移囉。 莫九: 但你唔係研究緊Fish 身體再生嘅可能性咩？ 容博士: 根據我嘅計算，意識轉移可能比佢身體再生成功率更高。 莫九: 但每個意識得一次機會，點解你可以講得咁輕鬆？ 容博士: 哦，咁我明你搵我嘅原因啦。你比機會我講多次…(凝重誠懇語氣) 莫九醫生！究竟Zero 可唔可以有一個新嘅身體，就要靠你啦！ 莫九:我唔係因為咁而搵你啊… 容博士: 咁啊…(鼓勵語氣) 你喺Area M有做到zero 記憶嘅備份，所以就算今次唔得，下次都一定得啊！ 莫九: 夠啦！ 容博士: 咁你想點啊，莫九？ 莫九: 我淨係想知道點解你唔話比Fish 知，被N搶走嘅唔係咩DNA藥，而係會觸發人體爆炸嘅藥物？ 容博士: 重要咩？ 莫九: 梗係重要啦！ 容博士: 對我嚟講，我想要嘅結果係解決N同拎返N嘅身體。其他野只係協助我得到呢個結果嘅過程。而成功率就關乎迫切性。另外，我都想測試一件事。 莫九: 測試啲咩？ 容博士: 就係莫九究竟有Dr Morpheus 幾多成功力。呢一點π 先生都好想知道。 莫九: 但唔駛令到Zero同 Fish 變成咁架？ 容博士: 阿刑，do it。 *兵器刺出聲效 *馬慘叫聲效 *流血聲效 莫九: P仔！ 容博士:唔駛傷心，你想嘅我可以再整一隻新嘅P仔比你。  莫九: P仔… 容博士: 但如果你要搵人消除你嘅罪疚感，我就幫你唔到啦。無咩事嘅話，我就繼續做我嘅研究。Zero 醒返就再通知我啦。仲有，你下次再做記憶備份同轉移嘅時候，我建議你將啲無謂情感刪除，因為你啲時間係應該用嚟鑽研你嘅醫術。 *電子聲效 管理員 莫九 現已登出。Hope you enjoy yr time in Eden。 Zip噏劇場 Game of Eden 第2季 小島篇 第16回 *執起紙張聲效 盧零: (讀出紙上文字) Zero，我出一出去，好快返，乖乖地留喺resort 休息，唔好周圍走啊。Fish 字。 *飲水聲效 盧零: 既然Fish唔喺度，咁我就自己出去睇下間屋依家變成點先。 *開門聲效 員工: Zero 先生，唔好意思，Fish 小姐再三叮囑，要你留喺房間休息。 盧零: 你幫我同佢講，我出去行下，好快返。 員工: 你咁樣…我好難做架。 盧零: 你照直講咪得囉，有幾難做啊？ 員工: Zero 先生… 盧零: 唔該謝謝。 員工: 唔係呢… 盧零: 行開！ *關門聲效 *對講機聲效 員工: 莫九醫生，Zero 先生佢離開緊resort。 *對講機聲效 *海浪聲效 員工: Zero先生！ 盧零: 你究竟係邊個？ 員工: 我只係呢嗰resort 嘅員工… 盧零: 當我轉身嘅時候，我先感受到你嘅氣息，睇嚟你唔係普通員工咁簡單… 員工: 應該係你身體未回復啫…Fish 小姐話佢好快就會返嚟，叫你喺resort 等佢… *全知狀態聲效 盧零: (讀白) 點解所有環境都係被綠色點點包圍住…我亦感受唔到身後任何事物嘅氣息…要我轉身用肉眼望到先真正感受到環境…另外… 我從未見過有人係灰色… 員工: Zero先生，你依家嘅身體唔適合開啟全知狀態… *奔跑聲效 員工: Zero 先生！ *人群聲效 盧零:(讀白) 我用盡全力跑離resort…好快就跑到去碼頭…無論係天、海、花草樹木…同所有環境建築都係綠色點點…至於所有路人都係灰色…即係… 莫九: Zero。 盧零: 莫九醫生…你仲係紫色…而我仲係紅色…即係 莫九: 無錯… 盧零: 我淨係想知道Fish佢有無事！ 莫九:咁就要睇吓你對於「無事」嘅定義係咩啦。 *整爆玻璃樽聲效 *利器刺肉聲效 *流血聲效 盧零: (冷笑聲) 我只係覺得痛…但就無失血而暈嘅情況…原來係咁…我淨係想知Fish佢係咪同我一樣… 莫九: 放心，佢情況比你好。 盧零: 咁就好啦。 莫九: 既然你情緒穩定落嚟，我就帶你去見佢。 盧零: 我唔係好明你嘅意思… 莫九: 食咗呢隻藥，你就明架啦。 盧零:(讀白) 莫九醫生比咗一粒紅色藥丸我。我無諗咁多，即刻吞咗佢！然後，所有景物慢慢fade out，成個世界得返我同莫九醫生，而佢身邊多咗一度門。 莫九: 準好嘅，就跟我入嚟。 *開門聲效 Zip噏劇場 Game of Eden 第2季 小島篇 第16回 「Area Z」 天頤 飾演 容博士 彬臣 飾演 莫九醫生 阿德 飾演 渡假村員工 鄧添樂 飾演 盧零 編劇及製作 阿攝 音樂 BEAT FRIDAY 封面設計 Followmelikeblack  歌：泳兒 Vincy《一了百了》 曲: 馮穎琪          詞: 周耀輝          曲: 張人傑 / CMgroovy                製: CMgroovy / 馮穎琪 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

*直升機聲效 莫九: (焦急) 仲有幾耐啊？ 機長: 仲有3分鐘就到墓島！ 莫九: 病人依家咩情況？ 護士: 莫九醫生，N雖然仲係失去知覺，但身體開始再生。不過Fish 失血過多，心跳開始下跌！ 莫九: 幫佢打強心針！ *心跳停止聲效 護士: 莫九醫生，Zero心跳停咗啊！ 莫九: 即刻準備除顫器！ *除顫器聲效 護士: 病人未有反應！ 莫九: 繼續！ *除顫器聲效 護士: 都係無反應！ 機長: 仲有1分鐘就到墓島！ 莫九: 幫Zero接駁儀器，準備上傳！ *直升機聲效 Zip噏劇場 Game of Eden 第二季 小島篇 第15回 *海浪聲效 盧零: 呢度係… 盧如: Zero 呢度係啞鈴洲啊。 盧零: 啞鈴洲？我哋唔係喺山洞同N 打緊咩？ 盧如: 我哋完成任務啦。 盧零: 咁N 佢依家係邊啊？ 盧如: N 佢受咗重傷，交咗比容博士處理啦。 盧零: 重傷？但點解我哋？ 盧如: 你已經昏迷咗成個月啦！ 盧零: 1個月？咁點解我哋會喺沙灘而唔係喺總部嘅？ 盧如: 任務之後，我同你都要養傷。所以我就順便同Pi先生請假，同你嚟咗呢嗰resort。你唔係話想完成任務之後同我約會咩？ 盧零: 係…但係… 盧如: 你仲問呢，我就走架啦。 盧零: 咁又唔好… 盧如: 咁你就同我乖乖地繼續瞓晏覺啦 盧零: 係… *海浪聲 N: (回憶聲效) Fish，你想將DNA藥插入Zero 身上？咁唔駛搞咁多動作啊！ 盧零: (回憶聲效) 隻藥喺比N 你架！ *爆炸聲效 盧零: (扎醒) 啊！ 盧如: Zero！做咩事？係咪覺得身體有咩唔妥？ 盧零: 我…啱啱夢見我哋同N 打鬥然後爆炸嘅畫面啫… 盧如: 咁你最後記得嘅畫面係？ 盧零: 你衝埋嚟，想將DNA 藥打入N 度… 盧如: 之後呢？ 盧零: 之後嘅事就唔係好有印象… 盧如: 唔好諗咁多啦，最緊要係我哋完成任務啫。 *海浪聲效 盧如: 你…做咩唔出聲啊？仲諗緊戰鬥嘅過程？ 盧零: 一嚟啦…二嚟你唔覺得好怪架咩，我哋喺呢個沙灘度咁耐，一個人都無。 盧如: Pi 先生想我哋快啲康復，所以包咗呢個resort 比我哋養傷啊。 盧零: (細聲) om… 盧如: Zero… 盧零:(細聲) om… 盧如: Zero… 盧零:(細聲) om… 盧如: Zero! 你無端端做咩要開全知狀態啊！ 盧零: 我都係以防萬一啫。 盧如: 我哋放緊假，你輕鬆啲啦。 盧零: 你平時都唔會咁鬆懈架。 盧如: 放心啦，呢度係Pi 先生嘅地方，好安全架。 盧零: 你唔記得咗出發之前，好多人聚集喺同舟會門口向Pi先生抗議咩？萬一有人偷襲咁點算？ 盧如: 放心啦，我已經檢查過好多次，呢度真係好安全，你唔好咁多疑啦！ 盧零: ok…ok…咁我哋出去行下？我想望下自己間屋仲喺唔喺度… 盧如: 你6歲就入咗同舟會嘅孤兒院，隔咗咁多年，間屋應該無咗架啦… 盧零: 咁我都想望下依家變成點… 盧如: 不如聽日先？ 盧零: 咁我哋依家出去食啲野？難得嚟到啞鈴洲，當做遊客去下啲景點？ 盧如: 想食野我哋可以叫resort 嘅room service ，唔駛周圍去啊。 *盧零踩水聲效 盧如: Zero…你做咩啊？ 盧零: 總係覺得呢度好似…有啲唔妥… 盧如: 應該係你身體未回復返晒啫。嚟，飲咗呢隻藥先，慢慢你就會適應架啦。 盧零:係… Zip噏劇場 Game of Eden 第二季 小島篇 第15回 「大戰之後…」 彬臣 飾演 莫九醫生 阿妤 飾演 護士 Crystal 飾演 盧如 Fish  鄧添樂 飾演 盧零 Zero Potter 飾演 前組長 N 編劇及製作 阿攝 音樂 BEAT FRIDAY  封面設計 followmelikeblack  盧如: 莫九醫生…你嘅實驗成功咗，Zero佢無咗爆炸前嘅記憶… 莫九: 咁唔係好消息咩？ 盧如: 係…不過Zero佢想開啟全知狀態… 莫九: 放心，我用咗特製藥水，抑壓佢嘅松果體，所以佢應該係開啟唔到嘅。 盧如: 不過我估佢就算無全知狀態，好快就會發現發生緊咩事… 莫九:咁…我叫阿康令到啞鈴洲好似現實一樣咁熱鬧。 盧如: 我想問幾時可以進行移植啊…？ 莫九: 你諗清楚？ 盧如: 係… 莫九: 明白。我問埋容博士嘅意見。再答你。 （TBC） 歌：泳兒 Vincy《同歸於盡》(Ending Endlessly) 曲：馮穎琪 詞：周耀輝 編：CMgroovy 監：CMgroovy/馮穎琪 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

Zip噏劇場 Game of Eden 第2季 小島篇 第14回 旁白: 現實世界2203年，666組織成員喺深海入面嘅啞鈴洲遺址搵到一個圓形黑盒，打開之後發現一個同屬666組織嘅成員，名叫「盧零」嘅檔案。時間回到2060年夏天，盧如透過追蹤器搵到被前組長N 偷襲嘅盧零 Zero，Fish 打咗容博士嘅DNA藥，同變成魚人狀態嘅N 激戰！ *檔案開啟聲效 *打DNA藥聲效 盧如:（讀白) 雖然我唔知自己外貌出現咗咩變化，但係我知道我嘅視力比之前更銳利！喺漆黑嘅環境，我依然可以好似有充足陽光嘅情況咁，每一種顏色都睇得好清晰！另外，我對眼嘅焦點可以瞬間由極遠變到極近，睇野嘅角度亦都增加咗！相信呢個就係容博士提及嘅深海魚類視桿性視錐細胞，同埋鳥類眼睛雙重調節嘅能力！ *上彈聲效 盧如:(讀白) 經過一開頭嘅槍戰，我已經估算到N 移動嘅慣性同路徑，只要用2發子彈，迫佢跳起，就可以引到佢跳落我估算嘅位置，咁就可以瞄準佢對腳！ *子彈聲效 N: 想打中我？無咁容易！ *盧如:(讀白) 就係呢一剎那！ *子彈聲效 N: (慘叫) 啊！ *滴血聲效 盧零: 係咪…打中咗啊？係咪殺咗阿N啦？ N: 厲害厲害！雖然你打中咗我對腳，但你唔知道，我Level N 嘅其中一個能力，就係爬蟲類嘅復原再生能力！ 盧如: 我唔需要知道，因為我就係等你郁唔到嘅呢一瞬間，可以用容博士比我嘅霧氣彈！ *霧氣彈發射聲效 盧零:咳咳！好大煙啊！搞到我乜都睇唔到添！ N: Fish！你覺得呢啲煙霧可以打贏我咩！我哋666組織嘅成員個個閉氣能力都咁高，只要我！咳…咳…呢種氣體係…啊！！！ *身體變異聲效 盧零: 我淨係聽到N大叫，但就乜都睇唔到…然後有一個人影喺煙霧之中行緊埋嚟！ 盧如: Zero! 唔駛驚！係我啊！ 盧零: Fish! 你成身都係血，無事啊嗎？ 盧如: 無事…我依家幫你解開啲鐵鏈先！ *開槍聲效 *射破鐵鏈聲效 盧如: 你依家嘅身體大概係咩情況？ 盧零: 除咗未開啟到全知狀態，其他一切正常！ 盧如: 好，咁我哋活捉阿 N 返去，就可以完成任務啦！ 盧零: 等等！Fish！你睇下！啲煙霧散晒，N佢嘅身體，好似出現咗變化！ 盧如: 容博士淨係話比我知呢隻煙霧彈可以令N身體產生變化，可以幫我對付佢，但至於係咩變化佢就無實質講…所以喺射完煙霧彈嘅一刻，我選擇咗嚟救你！ N: 咳…咳…你哋兩個知唔知我聞過呢隻藥幾多次啊？每聞一次，就會產生抗藥性，但估唔到今次容博士用咁重嘅劑量… 盧如: N佢…慢慢由魚人狀態變返做人啊！ 盧零: 所以嗰種氣體係還原嘅藥？但點解Fish 你無還原到嘅？ N: DNA嘅領域實在太寬闊，好多野都未搵到答案，所以，佢哋一次又一次搵我嘅身體去做實驗！我真係受夠啦！因為，我覺得答案得一個！就係將所有人類變做魚人！呢個就係人類可以繼續喺呢個地球生存嘅方法！呢個就係最終答案！ 盧如: N 你同以前一樣，都係太多廢話啦！ *子彈聲效 N: 哈哈！無用架！ 盧如: 點解…你仲可以檔到子彈嘅…? N: 我講過啦！我身體有抗藥性！ 盧零: 即係…N佢可以回復返魚人狀態？Fish！比支槍我！然後話我知佢嘅方位！ 盧如: 佢依家喺我哋12點嘅方位！ 盧零: 我同你一左一右，夾擊佢！要喺佢完全變返魚人狀態之前，殺咗佢！ 盧如: 好！ N: 睇下你哋嘅子彈快定係我復原能力快啲！ *開槍聲效 N: 呢個山洞嘅地形我摸到熟晒，就算你地兩個打我1個，都係唔夠打架！ 盧如: Zero, 佢依家衝咗去鐵鏈嘅位置，想去領偷返嚟嘅DNA藥！ 盧零: 知道！ *開槍聲效 盧如: 死啦…無晒子彈添！ 盧零: 唔緊要，我依家返去你度，你做我對眼！ N: 既然你哋咁想玩，我就陪你哋玩多陣，唔差在話你知，我仲有1分鐘左右嘅時間，就可以完全復完，1分鐘，你哋打唔打得贏我啊？ 盧零: 支槍得返5發子彈，Fish，你有咩計劃？ 盧如: 我哋依家喺面向山洞嘅右邊位置，佢就喺山洞最入嘅位，容博士話用N 偷返嚟嘅DNA藥，打入佢嘅身體就可以對付到佢… 盧零: 咁我向N 開槍，然後你就去拎鐵鏈旁邊嘅DNA藥，跟住我纏住阿N，咁你就搵機會將藥打入N度！ N: 你哋兩個吱吱朕朕係度講啲咩啊？ 盧零: Fish，我數3聲，3,2,1 *開槍聲效 N: 頭先同Fish玩咗咁耐，依家就同Zero你玩下啦！唔知喺我離開組織之後，你有冇變勁到呢？ *開槍聲效 *空槍聲效 N: 噢，真係可惜，Zero，你又無晒子彈，又無全知狀態，又無DNA藥，你贏到我嘅機會，真係Zero啊！ 盧如:(讀白) Zero ，你要捱住啊！ N: 以前我同Zero你嘅體術，好似不分上下，唔知依家又點呢？ 盧零:(讀白) 就喺N 衝到我面前，向我出拳之際，我用盡全力大叫咗一聲 - OM! *全知狀態聲效 盧零:(讀白) 喺千鈞一髮之際，我終開到全知狀態！雖然環境仲喺好黑，黑到我乜都睇唔到，但我可以透過聲音去辨別N 攻擊我嘅方向！ *出拳聲效 *擊中石頭聲效 N: 好玩好玩！我都係第一次同有全知狀態嘅你對打！你唔好咁快輸啊！ 盧零:(讀白) 雖然我開咗全知狀態，感受同估算到N 出拳嘅方位同意圖，但始終佢變返做魚人狀態…只係人類嘅我…點都唔夠佢快！ *出拳聲效 *擊中身體及流血聲效 N: 點啊Zero，有無啲羨慕我魚人嘅身體呢？如果你都變做魚人，就可以同我鬥下啦！ 盧零: 我唔需要贏你，只需纏住你！ N: 你！你做咩攬住我！ 盧零: 我就係等呢一刻！等我纏實你，令你郁唔到嘅呢一嗰瞬間！ 盧如:(讀白) 容博士話只要將呢個DNA藥打入N嘅身體，就可以對付到佢，我同Zero得呢一次機會，一定要成功啊！ N: 你地想點啊！ 盧如: (讀白) 就係Zero纏實N ，我用最快嘅速度衝去N 度，Zero用鎖技將N鎖係地面，N身體面向上，然後我就準備好大力咁將DNA藥插入N嘅心臟位置！ N: Fish，你想將DNA藥插入Zero 身上？咁唔駛搞咁多動作啊！ 盧零: 隻藥喺比N 你架！ 盧如: (讀白)就喺DNA藥即將插入N身體嗰一剎那！N奸笑咗一下，然後佢擰轉身！我嘅DNA藥插咗入Zero嗰身度…Zero 大叫咗一聲！ 盧零: 啊！ 盧如:(讀白) 然後，我望到Zero 成嗰身體慢慢膨脹，跟住就！ *爆炸聲效 Zip噏劇場 Game of Eden 第二季 小島篇 第14回 「盧零盧如 vs 前組長N 最終決戰」 Crystal 飾演 盧如 Fish  鄧添樂 飾演 盧零 Zero Potter 飾演 前組長 N 編劇及製作 阿攝 音樂 BEAT FRIDAY  封面設計 followmelikeblack  Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

Zip噏劇場 Game of Eden 第2季 小島篇 第13回 旁白: 現實世界2203年，666組織成員阿J喺啞鈴洲遺址搵到一個圓形黑盒，打開之後發現一個同屬666組織嘅成員，名叫「盧零」嘅檔案。時間回到2060年夏天，盧零執行秘密任務期間被前組長N 偷襲，盧如帶同8位組織成員展開拯救行動。擁有4原色視覺嘅Fish 激戰全知魚人狀態嘅N！ *開啟檔案聲效 *爆燈泡聲效 盧零：死啦！N整爆曬啲光管，山洞變咗接近全黑，搞到我咩都睇唔到添！ N: 四原色視者眼力幾好都好，無光都係乜都睇唔到。無眼嘅魚，避唔避到我嘅攻擊呢？ 盧零：(讀白)人類嘅視覺細胞有兩種，一種係分辨顏色嘅視錐細胞，一種係辨别光暗嘅視桿細胞，依家N打爆晒啲燈，成個山洞變得好暗…Fish 根本無可能察覺到N嘅位置…而呢個山洞係菱形，我係最深嘅角位，Fish係入口嘅對角位，而N就企喺我哋兩個中間…究竟我幾時先可以用全知狀態，幫Fish對付阿N 啊！ 盧如：(讀白)雖然依家接近全黑，但只要等一分鐘，我嘅視桿細胞就會適應到環境，只要捱到呢一分鐘... N: 眼、耳、鼻、舌、身、意，人類嘅感官往往以眼為先，但你地唔覺得人類太依賴視覺咩？但人類除咗頭上面嘅一對眼，其實仲有第三隻眼，亦即係被稱為全知之眼嘅松果體。如果松果體無被π先生用各種方法壓制，我哋可以發展成點呢？ 盧如: (讀白)仲有30秒… N: Fish，無用架。擁有全知狀態嘅我，所有感官嘅感知力都大大提高，我可以透過你嘅呼吸、心跳、空氣嘅流動，溫度嘅變化知道你嘅位置。你依家就匿埋喺我2點鐘方向嗰嚿大右後面啊嘛！ *上彈聲效 *子彈發射聲效 *水滴聲效 盧零: 呢啲係滴水聲，定係滴血聲呢？Fish係咪打中咗N呢！？ N: Fish，就算你眼力有幾好，但喺你上彈嗰一刻，我已經知道你想攻擊我。你槍法同速度係全個組織最厲害，快到就算我有全知狀態，我嘅身都追唔到我嘅心。不過依家已經唔同啦！ 盧如: (讀白)雖然我對眼適應咗呢度嘅環境，可惜真係太黑…我只能夠大概估N嘅位置…依家用容博士嘅霧氣彈會太冒險…無十足把握都唔可以用… N: 好可惜，因為Fish你唔係π先生嘅容器，你就無可能得到全知狀態！如果你嘅視力，加全知狀態，再加DNA嘅激發實驗，一定係一種好美好嘅生命！ *上彈聲效 盧如: (讀白) 依家N佢係邊呢？ N: 我就係你面前！ 盧如:(讀白) N突然出現喺我面，然後佢舉起充滿魚鱗嘅右手，一拳打向我左邊膊頭！ *出拳聲效 *石頭碎裂聲效 N: 係幾厲害，係咁短時間都可以閃避到我嘅攻擊！唔知你下一刻又避唔避到呢？ *連環出拳聲效 *石頭碎裂聲效 盧零: Fish！你無事嗎？ N: Zero，你係咪矇咗啊？如果Fish答你，咪會暴露咗佢嘅位置囉！如果你哋都有全知狀態，就可以用心意取替言語溝通。可惜，π先生私有化呢種能力！ 盧零: π先生前π先生後，你離開組織，反抗π先生，如果比你打贏佢，你咪就係下一個π先生囉！ N: 我無意慾成為下一個π先生，我只係想將人類應該有嘅能力歸還比人類！再交比人類決定自己嘅未來！ *子彈聲效 N: Fish，你又打唔中啦！不如唔好浪費子彈，等我嚟完結呢場無得鬥嘅捉衣因遊戲啦！ 盧如: (讀白)呢個山洞呈菱形，盧零依家企係山洞最入嘅角位，入口就係打對面嘅角位…感覺好似打棒球上壘咁…佢係2壘，我依家係本壘，只要衝上1壘，就可以接近盧零！ N: Fish ，你想去邊啊！ 盧如: (讀白)N實在太快！佢又衝過嚟向我攻擊！ 利爪聲效 *被爪傷聲效 *滴血聲效 盧零: 呢啲味…係血腥味…Fish…你無事嗎？ 盧如:(受傷，少少疲勞虛弱) Zero…放心…我避開咗啲要害… N: Fish，唔係你避到，係我故意唔傷你要害啫。我最鍾意比選擇大家，所以我問多你一次，你加唔加入我，成為另一個魚人，對抗π先生？ 盧如: (讀白)N依家喺呢個山洞嘅中間位置…而我依家係1壘…接近咗Zero好多…係時候用霧氣彈攻擊N，然後衝去2壘嘅位置救Zero，之後2打1，應該都有得打嘅… N: 咁無辦法啦，Fish。本身諗住想將搶返嚟嘅DNA藥用喺Zero身上先，依家就比你打尖啦！ 盧如: 既然你咁想我還原，咁我就還原比你睇下，我身體DNA嘅能力啦！ *打DNA藥聲效 盧零: Fish，你做咩啊！Fish ？ N: 我都知你一定係有備而嚟！但估唔到你自備容博士嘅DNA藥！我就係Level N！唔知Fish 你係level 幾呢？Zero，你望實你鍾意嘅人成為魚人，又會有咩感覺呢？想唔想都成為埋一份啊？ 盧如:(讀白) 就喺DNA藥打入身體嘅一剎那，我腦入面閃過一個畫面，我變成一隻雀仔，係天空度飛緊，望住好遠嘅藍天白雲，好清晰，好靚。突然有另一隻雀由後衝過嚟，我對眼極速將焦點由遠變近，睇到身邊嘅事物。然後，我俯衝落海，游到好深好入，光線雖然越嚟越少，但我嘅視力無變，所有顏色都睇得好清楚。跟住，我諗起容博士喺我出發前講過嘅一番說話 容博士:(讀白)人類視網膜中有一個中央凹位，當我們注視前方嘅時候，側面視野比較模糊。但鳥類有雙視覺區，即係有兩個中央凹位，令佢接近全方位嘅事物都可以睇得清楚。同時， 鳥類嘅眼有雙重調節功能，可以改變角膜嘅凸度，能夠喺一瞬間將「遠視眼」調節為「近視眼」。另外，有一種深海魚有類視桿性視錐細胞，就算喺漆黑嘅環境，都可以睇到彩色。而你就有呢兩種動物嘅基因。 盧如:(讀白) 回想完之後，我感受到眼球入面嘅微妙變化，雖然山洞好黑，但我都可以睇到彩色！焦點仲可以將好遠嘅山洞頂部水滴，瞬間聚焦到我嘅手掌掌紋！ N: Fish，太可惜啦，你除咗對眼比以前更凸出嚟之外，身體外型無太變化，睇嚟你嘅Level 只係屬於個位數。你點夠擁有保護色嘅我打啊？ 盧如: 係咩？但我依家睇你睇得好清楚喎！ *上彈聲效 盧如:(讀白) 經過一開頭嘅槍戰，我已經估算到N 移動嘅慣性同路徑，只要用2發子彈，迫佢跳起，就可以引到佢跳落我估算嘅位置，咁就可以瞄準佢對腳！ *子彈聲效 N: 想打中我？無咁容易！ *盧如:(讀白) 就係呢一剎那！ *子彈聲效 N: (慘叫) 啊！ *滴血聲效 盧零: 係咪…打中咗啊？係咪殺咗阿N啦？ N: 厲害厲害！雖然你打中咗我對腳，但你唔知道，我Level N 嘅其中一個能力，就係爬蟲類嘅復原再生能力！ 盧如: 我唔需要知道，因為我就係等你郁唔到嘅呢一瞬間，可以用容博士比我嘅霧氣彈！ *霧氣彈發射聲效 Zip噏劇場 Game of Eden 第二季 小島篇 第13回 「盧如 vs 前組長 N」 天頤 飾演 容博士 Crystal 飾演 盧如 Fish  鄧添樂 飾演 盧零 Zero Potter 飾演 前組長 N 編劇及製作 阿攝 音樂 BEAT FRIDAY  封面設計 followmelikeblack  Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

旁白: 現實世界2203年，666組織成員阿J喺啞鈴洲遺址搵到圓形黑盒，破解成功後，發現一位同屬666組織嘅成員 - 盧零嘅檔案，時間為2060年夏天，當時佢執行緊任務，運送容博士貨物到墓島比莫九醫生途中，被前組長 N 襲擊，下落未明… *檔案開啟聲效 *電動門聲效 盧如: 容博士，已經透過盧零皮膚下嘅追蹤器搵到盧零嘅位置。 容博士: π先生只有一個要求，就係不惜任何代價，都要回收前組長 N 嘅身體。 盧如: 咁要生定死嘅？ 容博士: 你相唔相信肉體、器官有意識或者靈魂？ 盧如: 容博士…呢方面…唔係我嘅研究嘅範疇… 容博士: 古埃及人相信人嘅靈魂分9個部分，分佈喺唔同嘅器官。不過，呢啲都只係神話同傳說，未經科學證實。但係，π先生唔需要背叛同舟會嘅人嘅身體。無論活捉定係屍體，我都會有唔同嘅處理方法。 盧如: 不過，前組長 N 佢已經有全知狀態，以及做過DNA實驗，依家Zero 被佢捉咗，失去最大嘅戰力，就算我哋派出最強嘅成員，都未必可以同依家嘅 N 對抗。 容博士: 所以我準備咗呢喼比你。 *打開喼聲效 容博士: 右邊藍色呢一支，就係DNA藥。可以將身體內動物嘅DNA強化。 盧如: 係比Zero 嘅？ 容博士: 錯，係比你用嘅。 盧如: 我？ 容博士: 我同你做過DNA嘅分析，發現你係四原色視者，可以比普通人睇多100倍嘅顏色。另外，你身體仲有一種鳥類同魚類嘅基因，用咗呢隻藥就可以令你原本已經好強嘅視力變得更好。 盧如: 即係得到呢種力量，但我會變到好似 N 咁？ 容博士: 有異議？ 盧如: 無… 容博士: 放心。N 身體嘅DNA 比常人唔同，佢被激發到Level N。而你用呢種藥，最多只係level 2。 盧如: 明白。咁左邊嘅子彈係？ 容博士: 呢個係霧氣彈，入面嘅成份同你仲有Zero 運送嘅喼入面嘅藥一樣，只要N吸咗入身體，就會產生反應，咁你就可以對付到佢。當然，如果你可以用被N 搶走喼入面嘅藥，直接打入N 嘅身體就係最好。 盧如: 即係之前我同Zero 幫你送到墓島嘅藥，都係用嚟對付N ? 我同Zero 都係魚餌？ 容博士: 唔出動到你以及Zero，唔會引到N 出嚟。得呢個方法先可以消除對同舟會嘅威脅。 盧如: 呢個就係所謂嘅不惜任何代價？ 容博士: 有異議？ 盧如: 無… 容博士: Fish, 記住，π先生交托嘅任務比任何人，包括係Zero ，更重要。 盧如: 明白。 *關門聲效 盧如: (VO) 雖然容博士話不惜代價，但我唔可以比zero有事…所以，我帶埋8個666組織戰力最強嘅成員出發，去救Zero，同對付前組長 N。佢哋身處嘅位置係一個無人島。8位隊員包圍咗島嘅各個位置之後，我就一個人走入山洞，發現入面嘅設計同666嘅總部好類似，而Zero就被鎖鏈綁住，N已經變成魚人狀態… *上彈聲效 盧如: N，放低你手上嘅DNA藥！ 盧零: 阿Fish！我知你實會搵到我架啦！ 盧如: N，你已經被我哋包圍啦，投降然後跟我哋返同舟會啦。 N: Fish，你覺得開啟咗全知狀態嘅我，感覺唔到666組織成員嚟咗呢個島咩？ 盧如: 就算你知道，又可以點做？ N: 喼入面有10支DNA藥，連埋zero，你，仲有其他嚟咗呢個島嘅成員，一共有10個人。咁樣我就可以多10個同類。 盧如: 咁你就要同我支槍鬥快啦。 *開槍聲效 盧零: Fish！無用架，N 佢已經開咗全知狀態，感官敏感度大大提高，你無可能可以打中佢架！ N: 除咗全知狀態，我嘅魚人狀態，仲可以隨環境變色，你係無可能打中擁有保護色嘅我架！ 盧零: N 佢！消失咗！佢去咗邊呢？唉…如果我依家可以開啟全知狀態…就可以感受到佢嘅位置…可惜… 盧如: Zero，你唔駛擔心。 *開槍聲效 盧零: 子彈射向空氣，然後停咗，跟住有血滲出嚟，然後N 現返形？ N: 厲害厲害，果然係四原色視者。就算我有保護色，你都可以察覺我皮膚同環保顏色有極微少嘅唔同。 盧零: 普遍人類可以睇到紅、綠、藍三原色。而物件嘅顏色，係透過光照射物件反射到人眼入內，再刺激感光細胞，然後傳入大腦去辨別顏色。三原色可以組成嘅顏色有好多。而四原色視者除咗可以睇到三原色之外，仲可以睇到紫外光，令四原色視者比三原色視者可以睇到嘅顏色多100倍，高達一億種顏色！所以Fish 可以透過光嘅反射睇到N 嘅位置！ N: Fish，你知唔知有一種叫斑馬魚嘅魚類，都擁有四色視覺。而喺遠古時期嘅脊椎動物，佢哋大多都擁有四種視錐細胞。但喺漫長嘅演化過程之中，哺乳類動物慢慢將第四種視錐細胞拋棄，後嚟有更多哺乳類動物放棄第三種視錐細胞，變成二原色視者。 盧如: 你講咁多廢話都無用，投降啦，N！ N: 點會無用啊。唔通你唔想透過容博士嘅DNA實驗，還原到最完祖最純最自然最美嘅狀態咩？ 盧如: 我覺得我依家好好！但你投降會仲好！ N: 你唔主動，咁唯有我令大家被動地接受人類應該擁有嘅未來啦！ *爆光管聲效 盧零: 死啦！N整爆曬啲光管，山洞變咗接近全黑…搞到我乜都睇唔到添！om…om…仲未開到全知狀態…Fish，你要小心啊！ N: 四原色視者眼力幾好都好，無光都係乜都睇唔到。無眼嘅魚，避唔避到我嘅攻擊呢？ *利爪聲效 *被爪傷聲效 *開槍聲效 *滴血聲效 盧零: 呢啲味…係血腥味…Fish…你無事嗎？ 盧如:(受傷，少少疲勞虛弱) Zero…放心…我避到要害… N: Fish，唔係你避到，係我故意唔傷你要害啫。我最鍾意比選擇大家，所以我問多你一次，你加唔加入我，成為另一個魚人，對抗π先生？ 盧如: 既然你咁想我還原，咁我就還原比你睇下，我身體DNA嘅能力啦！ *打DNA藥聲效 盧零: Fish，你做咩啊！Fish ？ Zip噏劇場 Game of Eden 第二季 小島篇 第12回 「盧如之眼」 天頤 飾演 容博士 Crystal 飾演 盧如 Fish  鄧添樂 飾演 盧零 Zero Potter 飾演 前組長 N 編劇及製作 阿攝 音樂 BEAT FRIDAY  封面設計 followmelikeblack  歌：MC仁、陳冠希、廚房仔《神》 作詞:MC仁、陳冠希、廚房仔 作曲:DJ Prepare 編曲:DJ Prepare Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

Zip噏劇場 Game of Eden 第二季 小島篇 第11回 旁白：666組織成員阿J喺啞鈴洲遺址嘅北帝神像入面搵到圓形黑盒，解謎打開之後發現有一個電腦記憶體。插入電腦之後搵開一個叫做盧零嘅人物檔案。 時間顯示為2060年夏天。 *檔案開啟聲效 *鎖鏈聲效 盧零:(VO，從暈倒中慢慢醒來) 呢度係…山洞？我…之前係護送緊容博士嘅喼去墓島…然後喺海入面被突襲…而襲擊我嘅人… N: 就係我啦，Zero。我呢個無人島山洞嘅佈置係仿照666組織總部嘅設計。你覺得點啊？ 盧零: 原來嗰內鬼就係你，組長 N。 N: 係前組長。因為依家666組織嘅組長係Fish。 盧零: 咁身為前組長嘅你，應該好清楚對抗同舟會同Pi先生嘅下場係點架？不如你放咗我，然後我哋一齊返去組織啊？ *鎖鏈聲效 N: 你都叫得我做前組長，你覺得我會無諗過所有風險咩？ 盧零: 即係之前襲擊容博士團隊同搶藥嘅人係你啦！ N: 無錯啊。 盧零: 同時喺網上面散佈言論嘅匿名人士都係你！ N:無錯啊。唔善用媒體同輿論壓力，點引到Pi先生派666組織出手，同埋點引到你出嚟啊。 盧零: 如果你想見我，唔駛搞咁多野啊。 N: 因為我想你親身感受我所感受嘅事，然後你或者Fish就會加入我。 盧零:(低聲) om…om…唔得嘅… N: 哈哈，想啟動全知狀態？無用架。喺你昏迷嘅時候，我迫你飲咗特製嘅藥水。呢啲藥水入面有嘅化合物，濃度比我哋自來水高好多。飲完可以暫時抑壓松果體活動嘅能力。 盧零: 既然你都計算好，不如你直接啲，講你嘅目的啦。 N: 慢慢嚟。Pi先生最厲害就係夠慢。慢慢滲透每個組織，慢慢控制每個城市，從而控制每一個人。而一切一切，都由思想同身體開始。 盧零: 你想講抑壓松果體發展嘅食水？你都擁有過全知狀態，你都知道如果所有人都擁有嘅話，呢個社會會變成點架。 N: 但松果體唔係Pi先生比我哋，係我哋人類誕生以嚟就擁有架喎，最早期嘅人類都識得用松果體架。 盧零: 你都知開啟全知狀態之後，身體負荷好嚴重。Pi先生都係選擇一個令人類壽命延續嘅方法啫。 N: 咁點解唔比大家揀呢？ 盧零: 你同我都知道，知識同選擇都係財富。而某啲財富需要有能者去管理。 N: 所以你到今日都唔想知道自己親生父母係邊個？ 盧零: Pi先生就係我爸爸。 N: 果然係Pi先生嘅忠實門徒。不過你知唔知道，點解佢會揀我哋，成為666組織嘅成員？ 盧零: 因為Pi先生賞識同比機會我，加上我嘅能力 N: 得啦得啦。就係因為你夠中二病，先至易控制。可能係咁，你係下一任Pi先生最好嘅人選。 盧零: 我唔明你講咩喎，明明你先係下一任Pi先生嘅繼承人。 N: 我諗你都知道同舟會嘅架構啦。 盧零: 我知。同舟會架構用Pi嘅數字去排列。3就係Pi先生，1就係市長，4就係4大權力架構 N:咁我哋666組織呢？ 盧零: 我哋組織直接效命Pi先生，唔出現係架構入面。 N: 由3衍生嘅6，666組織係Pi先生嘅影子同分身。而我哋組織會用666魔鬼數字命名，因為我哋所有成員都係幽靈嬰兒。即係有醫院出生紀錄，但無出生登記。 盧零: 所以我哋就一齊喺同舟會孤兒院長大，一齊接受訓練，一齊加入666組織。 N: Zero，你到依家都仲未明。我係講一切嘅源頭啊。我哋嘅父母都係受Pi先生指意去製造我們。 盧零: 你講咩話？ N: 即係我哋係產物。但Pi先生再造出棄養嘅故事，令我們覺得Pi先生就係我哋唯一嘅再生父母。令我哋甘心為佢賣命。由頭到尾，佢都只係用思想控制我哋，同時睇中我地嘅身體，想培育下一個容器！ 盧零: 你講咩容器啊？我唔明喎… N: 因為… *N身體發出霧氣 N: 我哋所有成員嘅身體都有魚類嘅基因。 盧零: 你…即係我無睇錯！我昏迷之前到成身魚鱗嘅畫面…係真嘅？ N: 無錯。我就係第一個接受容博士DNA還原實驗嘅人。即係Pi先生原本最理想嘅容器。 盧零: 你明明就係下一任Pi先生嘅承繼人，咩容器啊？ N: 你都有入過Game of Eden 嘅Area 0，接受松果體開發實驗架。 盧零: 無錯啊… N: 所以你都知道，Game of Eden 唔係表面睇係一個普通遊戲咁簡單。 盧零: 我知道莫九醫生有用Game of Eden 做精神病治療嘅實驗… N: 準確啲講。係意識轉移實驗。 盧零: 所以你指嘅容器嘅意思係… N: 就係Pi先生搵最適合嘅身體，然後將佢嘅意識轉移到落容器身上。咁佢就可以人如其如，好似Pi咁，除唔盡，不斷永續。 盧零: 呢個就係你逃離同舟會嘅原因？ N: Zero，呢個原因仲唔夠咩？ 盧零: 所以你脫離組織，成為通緝犯之後。我被安排接受激發松果體實驗…就係代替你成為下一個容器？ N: 所以，我唔係攻擊你，而係拯救你。我係你嘅同伴啊。 盧零: 如果被你襲擊嘅唔係我，而係阿Fish…你會點… N: 阿Fish係聰明人。我都會同佢講出真相，然後賭一件事。 盧零: 賭佢信唔信你？ N: 係賭佢對Pi先生忠心啲，定愛你多啲。我同Pi先生唔同，我會講出真相同比選擇大家。 盧零: 但由你脫離組織到襲擊我再到依家，你有比選擇我咩？ N: 有，當然有。嗰選擇就係打呢個喼入面嘅DNA藥，成為魚人，一齊對抗Pi先生。或者返去成為Pi先生嘅容器。 盧零: 呢個喼無容博士嘅指紋係開唔到架。 *斬開金屬箱聲效 N: 呢個就係魚人嘅力量。亦係人類未來發展嘅方向。喺未來，陸地將會越嚟越少，除非人類移居外太空，否則留喺地球，一定要適應新環境。而同時擁有呢種力量，先可以對抗Pi先生以及同舟會絕對嘅權力。 盧零: 憑你一個人，你覺得可以對抗同舟會咩？ N: 將全部人類還原，到時就係另一個世界，一個Pi先生都控制唔到嘅世界！你選唔選擇成為繼我之後嘅第二個？ *子彈發射聲效 Fish: N，放低你手上嘅DNA藥！ 盧零: 阿Fish！我知你實會搵到我架啦！ Fish: N，你已經被我哋包圍啦，投降然後跟我哋返同舟會啦。 N: Fish，你覺得開啟咗全知狀態嘅我，感覺唔到666組織成員嚟咗呢個島咩？ Fish: 就算你知道，又可以點做？ N: 喼入面有10支DNA藥，連埋zero，你，仲有其他嚟咗呢個島嘅成員，一共有10個人。咁樣我就可以多10個同類。 Fish: 咁你就要同我支槍鬥快啦。 *子彈聲效 (TBC)  Zip噏劇場 Game of Eden 第二季 小島篇 第11回 「666組織的秘密」 鄧添樂 飾演 盧零 Zero Crystal 飾演 盧如 Fish  Potter 飾演 N 編劇及製作 阿攝 音樂 BEAT FRIDAY  封面設計 followmelikeblack  歌：MC 張天賦 - 第二人格 Secondary Personality 曲：吳林峰  詞：陳蕾  編：Mike Orange  監：Mike Orange  Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

日期:現實世界 2203年6月22日 時間: 深夜 地點: 666組織成員阿J工作室 *密碼破解聲效 J: 喺啞鈴洲遺址北帝廟神像入面拎到呢個圓形黑盒，成功破解兩重密碼之後，喺呢隻記憶體搵到一個叫盧零嘅人嘅檔案，而佢亦係同舟會666組織嘅成員！代號Zero！？雖然我知道組織有過百年歷史，但我從來無聽過同睇過佢嘅資料…另一件令我驚訝嘅事就係…原來喺2050年已經有松果體開發嘅實驗以及DNA測試…而盧零更係最早期接受呢啲測試嘅人…只要睇晒盧零嘅資料，我就可以知道更多同舟會以及Pi先生嘅事。Pi先生，你就當係個天都想幫我啦。哈哈。 第一個檔案，日期係2060年嘅夏天。 *開啟檔案聲效 *人群聲效 記者: 自從基因專家容博士有關DNA還原論嘅文章推出之後，引起坊間激烈討論。而有一個自稱NA嘅網民喺網上爆料，指出資助容博士研究嘅人，就係大慈善家Pi先生。NA更表示，位於墓島嘅精神病治療中心其實做緊各方面嘅人體研究。所以今日有大批民眾出現喺同舟會外面，要求Pi先生作出澄清。 本台會繼續跟進最新消息。 *熄電視聲效 盧如: Zero，我哋夠鐘出發啦。 盧零: Fish，今日嘅任務內容就係送容博士到墓島咁簡單？ 盧如: 出面咁多人，你話簡唔簡單？ 盧零: 佢哋應該唔敢對博士做啲咩嘅，除非有另一個組織介入。 盧如: 唔好理其他野，我哋做好Pi先生嘅指令就可以。呢度有兩個喼，一個你嘅，一個我嘅，平安送到墓島就可以啦。 盧零: 明白。咁我可唔可以開啟全知狀態？ 盧如: 你嘅身體仲係適應階段，如非必要，都唔好用啦。 盧零: 明白，咁邊個負責運送容博士？ 盧如: 容博士會由另一個組織成員運送。準備好嘅，我哋就出發。 *開車聲效 盧零:阿Fish， 任務完成之後，你接唔接受我約會嘅伸請？ 盧如:(通訊聲效) 我仲考慮緊。 盧零: 咁如果我快過你到墓島嘅，你就要同我約會架啦。 盧如: (通訊聲效，嬉笑) 你成功嘅機會，同你嗰名一樣，係零啊。 盧零: 我叫Zero，係因為贏我嘅人係零啊。 盧如:(通訊聲效) 你又中二病發作啦。出發啦！ *踩油門，加速聲效 盧零: 由同舟會總部到最近坐船去墓島嘅碼頭要15分鐘嘅時間。不過，呢個只係地圖顯示嘅方法。同舟會有專屬嘅地下通道，而呢條通道其實係上一代嘅鐵路路軌，雖然比較迂迴曲折，但勝在夠隱秘。不過我都係第一次行呢個地道，因為要到某個級別嘅任務先會使用。睇嚟呢個喼入面有好重要嘅物件。而唔駛10分鐘，我就駛到去指定嘅出口，閘門打開。 *開閘聲效 *行車聲效 盧零: 我駛入去。閘門閂咗。 *閂閘聲效 *車變形聲效 盧如:(通訊聲效) Zero ，一切正常？ 盧零: 車啱啱完成變形，準備出海啦。你諗定著咩衫同我出街啦。 *入海聲效 盧零: 今日嘅水比較混濁，都係開啟全知狀態比較好。 *開啟全知狀態聲效 盧零: 莫九醫生話全知狀態可以感受有效範圍內物件流動嘅位置，今日就測試一下。 *魚雷聲效 盧零:(緊張)有一個充滿電流嘅物件好快衝緊過嚟！ *爆炸聲效 盧如: (通訊聲效，緊張) Zero 發生咩事？ 盧零:(緊張) 受到襲擊！雖然我扭得切軚避開咗，但架船受損嚴重，我要棄船游出！ 盧如:(通訊聲效，緊張) 嗰喼呢？ 盧零: 放心，嗰喼無事，墓島等！ *通訊完結聲效 盧零: 知道我哋喺呢個位置出現，睇嚟我哋組織或者同舟會有內鬼！ *子彈聲效 盧零: 係水入面太難郁動…無辦法避得晒啲子彈添！ *子彈聲效 盧零: 啊！左邊小腿中咗槍！究竟敵人係邊？ *水流快速流動聲效 盧零: 有一個物體好快咁向我游過嚟！係魚？定係？ 神秘物體: 原來係你啊，Zero。 盧零: 呢把聲係？ 神秘物體: 交嗰喼比我！ 盧零: 呢個人…點解全身都係 *拳擊聲效 盧零: (暈倒) 魚鱗嘅…？ 盧如:(通訊聲效，緊張) Zero! Zero ! Zip噏劇場 Game of Eden 第二季 小島篇 第10回 「盧零回憶錄」 梓豪 飾演 阿J Maggie 飾演 記者 鄧添樂 飾演 盧零 Zero Crystal 飾演 盧如 Fish  Potter 飾演 神秘物體  編劇及製作 阿攝 音樂 BEAT FRIDAY  封面設計 followmelikeblack  歌：《半》 唱：Jeremy Lee 李駿傑 曲：吳林峰 詞：周耀輝 編 : 王雙駿 監 : 王雙駿 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

日期: 2203年6月22日 時間: 下午5點 地點: 半島城牆外20公里區域，水深1千米，啞鈴洲遺址 *電子儀器聲效 J: 就係我幻想緊水位未嚴重上升，未被海水淹沒嘅玉虛宮香火鼎盛情況嘅時候，開啟咗全知狀態嘅我隱約聽到一啲電子儀器發出嘅聲響。所以，我決定將全知狀態範圍由400米縮到50米，然後將感官能力提升8倍，就可以確實聽到電子儀器越嚟越大聲！而嗰聲音…係喺我面前嘅玄武大帝神像入面發出嚟！ 我會知道，並唔係因為全知狀態下，我有透視眼，而只係我可以透過聲音同粒子嘅流動，大概幻想到物體嘅大小同方位。正正係呢種敏感度，我能夠「睇」到嘅嘢比以前更多，難怪松果體被稱為第三隻眼同全知之眼。 最後，我更確定發聲嘅，應該係一個手掌咁大嘅圓形裝置！ 究竟入面係咩嚟呢？打爆玄武大帝神像就會知道，可惜我無帶任何爆破工具，而且喺水入面好難發力，徒手根本無可能打爆佢… 就係思考同猶豫之間，我轉身游開神像，到大概5米外嘅位置，然後一個轉身，面向神像，身體以肚臍為中心收縮，然後全身擴張一彈！快速衝向神像！係衝力帶動下，我順勢伸出右手，一拳打向玄武大帝神像嘅中心位置！ *神像粹裂聲效 我竟然成功咗！神像由中心向外裂開！估唔到服用咗慕容醫生嘅DNA藥，我除咗可以喺水底呼吸，力量仲似乎增加咗好多，而咁大力打碎神像，我右手拳頭竟然絲毫無損！不過唔知係我睇錯定感受錯…剛才我嘅皮膚有一瞬間好似變咗魚鱗…唔通呢個都係能力之一？返上水之後，一定要搵慕容醫生問清楚。不過依家首先要做嘅，就係處理神像入面收藏嘅發聲裝置。當我撥開神像碎裂嘅沙塵之後，終於睇清楚呢個圓形發聲裝置，原來係一個設有電子密碼鎖嘅圓形黑盒！ *上水聲效 我上水之後，就返咗自己嘅工作室，研究呢個喺玄武大帝神像入面搵到嘅圓形黑盒。嗰黑盒有兩面，背面有好多細嘅圓點，正面就係輕觸式屏幕，啟動輸入密碼嘅畫面。 *電子密碼鎖聲效 啞鈴洲已經淹沒咗超過一百年，即係呢個裝置應該係至少一百年前放入去。究竟點解要咁神秘呢？而呢個7位數字嘅密碼又要點破解呢？ 呢個盒背面嘅圓點間距不一，有密有疏。刻得落出嚟，一定有原因…然後我開啟全知狀態，更集中係眼度，發現某啲點係被極淺嘅顏色筆連埋一齊！右面某啲嘅細點，隱約被青色連埋成一條線；左邊係白色、上面係黑色而下面係紅色！ 而連成嘅線所組成嘅圖案…我終於知道係咩嚟啦！右青、左白、上黑、下紅，其實就係東青龍、西白虎、南朱雀同北玄武！呢個圓形圖案，其實係二十八星宿嘅圖案！ 至於電子密碼鎖係七位數字嘅密碼…呢個圓形黑盒係喺玄武大帝神像入面搵到嘅…玄武大帝，又可以叫做北帝，統理北方嘅神，而北方五行屬水，所以兼任海神，代表嘅係北方7宿。而電子密碼鎖係7個數位，會唔會就係入北方7宿嘅數字入去？ 北方7宿第一宿係斗宿，星數係6； 第二宿係牛宿，星數係6； 第三宿係女宿，星數係4； 第四宿係虛宿，星數係2； 第五宿係危宿，星數係3； 第六宿係室宿，星數係2； 第七宿係壁宿，星數係2； 如果我推斷無錯，7位數嘅密碼應該係6642322！ *輸入密碼聲效 *成功開啟聲效 得咗！自從離開咗收藏組織404之後，已經好耐無解過謎。而成功開啟咗圓形黑盒之後，入面有一個防水袋，袋入面有一個可以插入電腦嘅記憶體裝置，表面刻咗「平安是寶藏」5隻字。當將呢個裝置插入電腦， *開啟檔案聲效 又要輸入密碼…而今次係一個5個數位嘅密碼。 「平安是寶藏」係5個字，密碼係5個位，好大機會有關聯… 一個中文字，變成數字密碼嘅方法有好多。最簡單係筆劃，而貼近剛才二十八星宿嘅方法，就係每個字嘅五行，再轉化成數字。不過試咗一個簡單啲嘅筆劃方法先: 平字5劃； 安字6劃； 是字9劃； 寶字20劃，2加0係2，咁我拎2字； 藏字17劃，1加7係8，咁我拎8字； 所以，用呢種方法去推算密碼就係 - 56928 *成功開啟聲效 其實我唔知真係用呢個方法解迷定係我撞中咗，不過點都好，我終於成功開啟到呢個記憶體裝置。而入面有好多用日子做名嘅檔案。第一個檔案，係個人資料，呢個人係2022年，喺啞鈴洲出世，姓名叫做盧零，2040年18歲嘅時候加入同舟會，成為666組織成員，代號係0！？2050年成為同舟會DNA計劃嘅實驗品？ (TBC) Zip噏劇場 Game of Eden 第2季 小島篇 第9回 「北帝神像的秘密」 梓豪 飾演 阿J 編劇及製作 阿攝 音樂 BEAT FRIDAY  封面設計 followmelikeblack  Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

日期：180年9月1日 *剪樹枝聲效 盧綠:阿爸話首先將卡比木嘅莖剪碎，再將九節木維迪斯葉磨成粉，加水就可以煮成靈魂之水…然後就可以見到神…即係玄武大帝… *奇幻音樂 盧綠: 我叫盧綠，係啞鈴洲第6代嘅子孫。阿爸話我出世嘅時候，啞鈴洲上面所有樹木盛放，所以佢就幫我改名做綠 - 翠綠嘅綠。而細佬出世嘅時候，阿爸又話啞鈴洲正值蘆葦盛放嘅日子，所以就幫細佬改名做盧葦。呢個就係阿爸改名嘅邏輯，但佢無諗過盧綠越叫越快，就會被人叫做盧碌…而我呢短短二十幾年，真係好盧碌…身為第5代村長嘅長子，我一出世就肩負承繼村長嘅重任…其實我都好想好似細佬咁同舅父周圍去…可惜…阿爸一句 - 盧綠，條村以後就靠你啦。所以不斷訓練我成為下一任村長… 但我點都估唔到，呢一日咁快就到… 其實最近一個月爸爸身體都好差，直到尋日8月31日下午，個天突然變黑！然後我就眼前一黑！跟住就回復正常…嗰下感覺好似世界完全停頓咗…亦因為呢一下停頓…阿爸心跳突然停止…雖然之後救返，但就昏迷咗… 成件事太突然，成條村嘅人都好驚…所以就希望我接任村長，同北帝，亦即係玄武大帝祈求平安…而我盧綠就正式成為第6任村長…然後媽媽比咗一個箱同鎖匙我，入面係兩種藥材同一村長日誌，上面寫住請示玄武大帝嘅方法…所以喺深夜嘅個時間，我就喺北帝廟，準備第一次以村長身份同玄武大帝接觸…不過我估唔到接觸嘅方法竟然係用靈魂之水… 舅父亦曾經飲過靈魂之水…但就出現好多幻象…唔通舅父所講嘅係真嘅？呢個世界以外有其他世界？ 只要飲咗，就會知道真相… *敲門聲效 盧葦:(門外) 開門！阿哥！開門啊！ *開門聲效 盧葦: 阿哥！婷 盧綠: (冷淡)婷婷唔見咗嘛，我知道啊。 盧葦: 即係仲未搵到佢？佢最後出現係邊度？ 盧綠: 你認為呢？ 盧葦:我就係唔知先問你…阿爸昏迷咗，阿媽喊到講唔到野…所以我咪嚟北帝廟搵你囉！ 盧綠: 你仲記唔記得你前日應承咗婷婷啲咩啊？ 盧葦: 我應承同佢返屋企食飯… 盧綠: 但你又呃佢，然後又拎住舅父嘅日記出海！婷婷好擔心你，所以一直喺張保仔洞等你啊！ 盧葦: 咁點解佢會失蹤嘅？你哋有冇派人出啞鈴洲唔同地方搵佢？ 盧綠: (冷語) 你話呢？ 盧葦: 呢個時候，你係咪仲要咁嘅態度啊？ 盧綠: 由尋日下午個天突然全黑，成嗰世界好似停頓咗咁，到回復正常，阿爸昏迷，婷婷失蹤…全條村嘅人都人心惶惶，以為被玄武大帝懲罰，然後我突然要接任做村長。阿葦，我想問呢段時間你喺邊？ 盧葦: 我去咗搵舅父日記所指嘅九節木維迪斯葉… 盧綠: 得啦。唔駛講住。我依家準備請示玄武大帝。有啲咩，我之後再同你講… 盧葦: 我都可以幫手 盧綠: 你邊度都唔好去！陪住阿媽就係最好嘅幫手！ 盧葦: 但係…阿哥… 盧綠: 仲但係啲咩啊！ 盧葦:點解你身後面有卡比木同維迪斯葉嘅？唔通呢個係請示玄武大帝嘅方法？ 盧綠: 細佬，你知道我哋條村嘅規條架？ 盧葦:我知淨係得村長可以同玄武大帝溝通…所以… 盧綠:所以請你出返去！我請示完再同你交代下一步點做啦！ *大力關門聲效 盧綠: 跟爸爸學做村長咁耐，其實我都未見過佢點同玄武大帝接觸…根據佢嘅筆記，只要飲咗靈魂之水就可以… *飲水聲效 盧綠: 嘩…比我想像中苦…同難飲…然後…身體好似好熱咁…個頭…仲有少少痛添… *奇幻聲效 盧綠: 點解…點解成個北帝廟變成墨綠色細點嘅？玄武大帝嘅神像係咁…但旁邊嘅千里眼神像同順風耳神像除咗有墨綠色細點之外，千里眼神像嘅眼同順風耳神像嘅耳仔有灰色細點嘅？唔通舅父都睇到呢個景象？ 阿爸嘅日誌話飲完靈魂之水之後，就要定神望住千里眼神像嘅眼然後同順風耳神像講出自己嘅身份…雖然依家好似出現幻覺咁…但都跟足阿爸嘅指示，行去千里眼神像前面…望實佢對眼先 *瞳孔辨識聲效 盧綠:嘩！發生咩事？點解…千里眼神像對眼好似有道光射落我對眼度咁嘅？ 神秘聲音: 盧綠，身分確認成功。 盧綠: 邊個講野？ 神秘聲音: 請你稍等。我整理緊資料。 盧綠: 把聲…喺順風耳神像度傳過嚟嘅！？ 神秘聲音: 恭喜你成為第6任村長。 盧綠: 你係…玄武大帝？ 神秘聲音: 我依家傳輸緊呢180年嘅資料比你，你理解完就知道我，啞鈴洲，呢條村同你哋嘅真正身份。 *資料傳輸聲效 Zip噏劇場 Game of Eden 第二季 「小島篇」 第8回 「盧綠、阿J、北帝廟」 Cfun 飾演 盧綠 鄧添樂 飾演 盧葦 Alton 飾演 k 梓豪 飾演 阿J 編劇及製作 阿攝 音樂 BEAT FRIDAY  封面設計 followmelikeblack  日期：2203年6月22日 *潛水聲效 阿J: 過嚟啦！唔駛怕喎！我唔會傷害你架喎。 唔知係咪開啟咗全知狀態，除咗感知力，連個人氣場都增強咗，所有海洋生物都避開我唔敢游埋嚟。 而我依家喺海下一千米嘅深度，離半島城牆20公里外嘅區域。我原本想再潛深啲，測試慕容醫生DNA藥物嘅極限，不過，我被眼前嘅景色吸引咗，所以停咗喺呢度。 出現係我眼前嘅唔係咩深海魚皇或者動物，亦唔係沉沒或者被擊落嘅郵輪、戰機、潛艇、魚雷導彈嘅遺骸，而係兩對石獅子，同佢哋後面嘅三隻字 - 玉虛宮。 亦即係話我依家身處喺啞鈴洲嘅遺址！ 由於百幾年前水位上升，淹沒咗全球好多嗰土地 ，所以係我出生之前，連同啞鈴洲在內好多島嶼都被埋葬係水下面…最早期嘅時候，有人願意搬入內陸高地，有人想留守到最後，不過…係大自然面前，人類最終只能選擇改變及適應…同時令呢啲小島慢慢變成回憶同傳說…好似阿特蘭蒂斯一樣… 曾經有好多人潛入深海探險兼尋寶，不過最終被立例禁止。我都係成為咗666組織成員之後，先睇到呢類小島嘅相關資料。依家得到DNA 藥物嘅幫助，終於親眼睇到歷史。 我游入去玉虛宮，出奇地入面嘅玄武大帝、千里眼同順風耳神像無被沖走。跟住我合埋雙眼，嘗試幻想以前香火鼎盛嘅情況…可能係我太全神貫注，全知狀態嘅感知力再有所增我隱約聽到有好低頻嘅聲音，喺玄武大帝神像入面發出！ *電子儀器聲效 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

*在草叢郁動聲效 盧葦: 呢棵樹大約高5尺…樹木有好多節…樹葉十字對生…葉型呈長橢圓形…表面係翠綠色…應該就係舅父日記所指嘅九節木維迪斯葉！我終於搵到啦！ *奇幻音樂 盧葦: 我由細到大都好鍾意跟舅父出海周圍去，媽媽話外甥多似舅，但我唔係好同意，因為我覺得自己性格似爸爸多啲。不過喺我好細個嘅時候，爸爸就做咗我地啞鈴洲嘅村長，佢公務好繁忙，無時間陪我玩，所以我先黐住舅父。而舅父成日問我好多我答唔到嘅問題，例如: 呢個世界係一條直線，定係圓嘅？ 世界係以我哋做中心，定係我哋圍住太陽嚟轉？ 除咗我哋啞鈴洲之外，仲有無其他人？ 我全部都唔識答…而舅父就會引領我思考。 例如，如果我哋嘅世界係一條直線一直延伸，咁究竟呢個世界有無盡頭？ 我哋又可唔可以衝出呢個世界，喺外世界睇返落嚟？ 舅父話我哋盧氏大家族喺啞鈴洲生活咗180年，嚟到第五代人，一直都無島以外嘅人登島。所以，佢會寫好多紙條入落樽度，漂流出海，希望有其他人睇到，知道我哋嘅存在。同一時間，佢會一個人出海，搵啞鈴洲以外嘅地方。 舅父成日都話，要知道呢個世界嘅知識有兩個方法: 第一個就係自己不斷去嘗試； 第二個就係問呢個世界嘅創造者，亦即係神。 不過，我哋條村嘅習俗只有村長可以同玄武大帝接觸。舅父就無選擇呢條路，而係自己四周探索，再寫成日記。 佢失蹤前寫嘅日記我睇咗好多次。最尾嗰幾頁就提到將卡比木嘅莖同維迪斯葉磨成粉，然後加水就可以煮成靈魂之水。舅父飲完之後就不斷話可以睇到呢個世界以外嘅世界。究竟佢睇到嘅係幻象？定係真相？ 今日係180年8月31日，舅父失蹤半年之後，我終於到維迪斯葉！不過尋日呃咗婷婷話會陪佢返屋企食飯…依家終於比我搵齊成份…都係返一返屋企報個平安，再研究靈魂之水啦 *干擾聲效 盧葦:(緊張)做咩事？點解嗰天…突然黑 *突然完全靜止 ——— 電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 15，今日係NC181年5月26日，Enjoy yr time in Eden. ——— *人群聲效 廟祝:又嚟到一年一度嘅搶包山比賽，今年又係我廟祝主持呢個活動！今日得到北帝保祐！天公造美，風和日麗，希望每位參加比賽嘅健兒都得到好成績！不過都要注意安全啊！如果大家準備好，就開始比賽啦！ *打鑼聲效 盧婷:哥哥，我哋唔係搵吸平安包嘅印咩？點解會嚟咗北帝廟嘅？唔通你想參加搶包山比賽？ 達:殊！你靜靜地跟我嚟啦！ 盧婷:哦！哥哥！你想趁所有人都聚集喺北帝廟前面搶包山比賽嘅時候，潛入廟入面偷野？ 達:唔係偷！係借嚟用下啫！ *推開木門聲效 達:(VO) 啟動咗松果體狀態之後，喺張保仔洞搶包山嘅壁畫上面，所有圖案都係墨綠色嘅細點，代表佢哋係遊戲嘅編碼。唯獨係包山圖案頂部平安兩個字，喺墨綠色細點底下有微微灰色。灰色應該代表人工智能，所以我覺得嗰兩個字係線索。而嗰兩個字雕刻得好工整，如果搵到相同大細嘅凸字印台，會唔會啟到動機關呢？ 盧婷:咦！呢個印…咪就係平安包嘅印台？點解會收埋喺神壇後面嘅偏殿度嘅？ 達:你睇下呢個平安印台旁邊嘅簡介。 盧婷:平安包正式名字叫做幽包，用作祭祀和施孤之用。當時包子上蓋的紅色印，根本就不是「平安」二字，而是有很多不同的版本，如「壽」、「福」等等。「平安包」出現於公元2001年的太平清醮…這個便是第一個平安包紅色印台。特以此展出作紀念。 達:我喺關公忠義亭撞到你之前嚟過呢度搵線索，所以見到呢個印台。而我估要開啟機關，應該唔會係用追你比錢嗰位包師傅嘅普通印台，所以我就帶你嚟北帝廟。我知你會好奇咩係公元2001年，我遲啲解釋你知。依家要諗辦法，整爛呢個玻璃箱，拎入面嘅平安印台。 *敲玻璃箱聲效 盧婷:但係…呢個玻璃箱好堅硬喎… 達:我都知…睇表面唔覺有任何可以啟動機關嘅表跡…集中精神，會唔會需要開啟松果體狀態先睇到端倪呢？ *硬物撞擊玻璃箱聲效 達:盧婷！你做乜野啊？ 盧婷:我諗住用啲硬物整爆嗰玻璃箱囉…不過啲石頭好似唔夠硬… 達:咁做會比人發現架！ 盧婷:咁我見你企定定唔郁…咪諗住用自己嘅方法幫下手囉… 達:唉…你…企喺出面幫我睇住，一有人入嚟就打暗號比我啦！ 盧婷:咁…要比咩暗號啊？ 達:是但啦…拍兩下手？ 盧婷:哦…知道… *關門聲效 達:(VO) 好…專注啲專注啲…我之前係點開啟松果體狀態呢？我已經無飲莫十三醫生比我嘅藥，應該隨時都可以進入嗰個狀態…最近嗰次就係仆低就開啟到…再上一次就係無食莫十三醫生嘅藥，然後一瞓醒就得…再之前嗰次…就係喺Area 0被AI 0嘅幻方追擊，用激光射入我嗰大腦，然後我大叫咗一聲OM… 啊！會唔會就係嗰一聲OM 呢？ 好！試一試！ om… 無反應喎… 呼…好…就大聲… OM! *開啟松果體聲效 達:(VO) 就喺發出OM 呢個聲效之後，成個遊戲世界又變成墨綠色。原來OM呢個聲效係開啟嘅方法。不過依家無時間去考究點解，因為呢一刻要破解呢個玻璃箱。 玻璃箱入面嘅平安包印台，表面雖然都係墨綠色，但暗藏灰色，同張保仔洞搶包山壁畫嘅平安二字一樣。咁證明我嘅猜測係正確。 至於嗰玻璃箱就只係得墨綠色點，所以應該只係普通嘅遊戲物件。然後密密麻麻嘅墨綠色點看似平均分布，但其實面向我嘅玻璃較中間嘅位置，墨綠色嘅點就比較疏落！即係對住呢個位用力！就可以整爛嗰玻璃箱！ 而就係呢個時候，我感覺到門外有人想推門入嚟！我講錯咗，應該唔係感覺，而係有畫面，有一個人拎住一把長鐵利器想入嚟！ *開門聲效 盧婷:哥哥，你睇下！我搵到呢把鐵劍！佢應該夠硬！可以斬爆個玻璃箱啦！ Zip噏劇場 Game of Eden 第二季 小島篇 第7回 「平安包印台」 阿攝 飾演 阿達 Crystal 飾演 盧婷 鄧添樂 飾演 盧葦 Alton 飾演 廟祝 編劇及製作 阿攝 音樂 BEAT FRIDAY  幫面設計 followmelikeblack  Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

*海浪聲效 盧婷: 今日係180年8月30日，阿哥已經失蹤咗幾日…究竟你去咗邊啊… 盧葦:(遠處大叫) 婷婷！ 盧婷: 阿哥，你終於返嚟啦！你今次又去咗邊啊！媽媽好擔心你啊！ 盧葦: 婷婷，你睇下我帶咗咩比你？ 盧婷: 嘩！呢個貝殼好靚啊！花紋同之前你搵比我嗰啲唔一樣架！ 盧葦:呢個貝殼係我徒手潛水潛到好深嘅位置先搵到架！ 盧婷:阿哥，你又拎舅父本筆記出海尋寶啊？媽媽唔係叫你唔好信舅父寫嘅日記咩？ 盧葦:唔出親身印證過，點知舅父係作故仔定講真話呢。 盧婷:但係…我怕你會好似舅父咁，出咗去就… 盧葦:我依家咪拎咗呢樣野返嚟囉 盧婷:呢個樹枝係？ 盧葦:就係舅父日記上面所指嘅卡比木。 盧婷:阿哥…你認真架？ 盧葦:認真架。只要搵埋舅父日記所提及嘅樹葉，混合埋一齊就可以睇到舅父睇到嘅世界。 盧婷:我知…但舅父見到佢口中所講嗰個世界之後，就開始失常，仲成日話要離開呢嗰島…然後就無返過嚟啦…阿哥，你唔會好似舅父咁架呵？ 盧葦:阿哥應承你，一定唔會。 盧婷:好，咁我收埋嗰貝殼喺張保仔洞，阿哥你就跟我返屋企食飯啦！媽媽呢幾日唔見咗你，成個人失曬魂，煮啲野難食咗好多啊！你返嚟，咁我哋終於有餐好食啦！ 盧葦:(微笑)好啊。 ——— 電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 15，今日係NC181年5月26日，Enjoy yr time in Eden. ——— *海浪聲效 達:(虛弱)呢度係… 盧婷:哥哥，呢度係張保仔洞出面嘅地方。 達:(虛弱)我…瞓咗幾耐啊？ 盧婷:你瞓咗成晚啦，仲係咁出汗同發燒，嚇死我啦… 達:(虛弱)係你拉我出嚟嘅？ 盧婷:梗係啦，唔係我，仲有邊個啊？你尋日喺洞入面好奇怪，成個人震曬咁，好驚咁望住我，又大叫唔好行埋嚟，又話有咩海怪…漁人… 達:唔好意思…我都唔知點解會咁… 盧婷:哥哥…你係咪飲咗靈魂之水…所以見到啲我見唔到嘅嘢啊？ 達:靈魂之水？ 盧婷:我舅父就係飲咗靈魂之水，然後就出現好多幻象，話見到嗰世界有好多唔同顏色，又話呢個世界之外有另一個世界… 達:放心…我無飲到啲咩靈魂之水… 盧婷:但係點解你隻手會突然發光，可以整碎咗啲石牆嘅？你係咪神仙啊？ 達:我唔係咩神仙…我只係…唉…我都唔知點解釋…總之我應承你，我唔會再出現尋日嘅情況… 盧婷:你唔好呃我喎…舅父又係咁，我阿哥又係咁… 達:佢哋發生咩事啊？ 盧婷:舅父飲完靈魂之水之後…就話要去海搵海神…然後就無返過嚟啦…阿哥就呃我話會陪我返屋企…點知又呃我，自己走咗出海…咁我咪係好似之前咁喺張保仔洞等佢…點知突然天一黑，我就瞓著咗…之後就嚟咗呢度啦… 達:你仲記唔記得你嚟呢度嗰日嘅日期啊？ 盧婷:我記得…係180年8月31日…係喎！今日係幾多號啊？ 達:er…今日係NC181年5月26日… 盧婷:NC181年？NC係咩意思啊？仲有依家係5月？ 達:嗯…一時三刻好難解釋你聽…不過我有啲頭緒…我想再入多次張保仔洞確認少少野先… *搬石頭聲效 達:(VO) 我喺張保仔洞暈低之前，我最後嘅記憶係我開啟咗松果體嘅狀態，然後成個遊戲世界由彩色實體變成由唔同顏色圓點組成嘅景像，另外我左手交叉疤痕位置發光，繼上次整傷阿K之後，今次就可以發射光線出嚟破壞石牆。如果喺現實世界我可以咁做，我就會覺得自己有超能力，但喺遊戲世界擁有呢個能力，就應該係喺Area 0掂到嗰棵樹之後，啟動咗某個程式…我仲記得AI 0講嘅兩句說話，分別係創造者阿康創造佢嘅目的係想令人類進步，以及善用D嘅能力。咁「D」代表啲咩呢？ 不過好彩尋日我唔算過份失控，只係破壞咗少少洞入面嘅石牆…未致於整冧咗成個張保仔洞…牆上面嘅壁畫仲係完整無缺…我記得搶包山嘅壁畫「包山」嗰兩隻字有特別嘅顏色…但係我依家無論幾專注，都開唔到松果體狀態…唔通要好似尋日咁…仆多次，冚多次嗰頭先得？如果真係咁…我未熟習到嗰個狀態就已經跌傻咗… 盧婷:呢隻咪… 達:你有見過呢隻海獸？ 盧婷:係我哋條村相傳好多年嘅神話，話深海住咗一隻海獸…而舅父就係出海搵呢一隻海獸而失蹤… 達:咁其他壁畫呢？你條村嘅張保仔洞有冇呢啲壁畫？ 盧婷:咁又無喎，不過某啲壁畫圖案就好似將我哋條村嘅生活情況畫咗出嚟，好似呢幅搶包山壁畫咁。 達:「平安」呢兩個字凹咗落去…應該係線索…邊度可以搵到類似印台嘅物體呢？ 盧婷:吸平安包嘅印咪係囉！ Zip噏劇場 Game of Eden 第二季 小島篇 第6回 「盧葦與盧婷」 阿攝 飾演 阿達 Crystal 飾演 盧婷 鄧添樂 飾演 盧葦 梓豪 飾演 阿J 編劇及製作 阿攝 音樂 Beatfriday  幫面設計 Followmelikeblack  阿J:(VO) 自從好細個加入同舟會嘅666組織，我就開始接受各種訓練，徒手潛水就係其中一項。我知有啲成員可以潛到過百米深度。我就無咁厲害，不過都可以接近100米。而要做到呢個下潛深度需要長時間嘅訓練，最重要係控制心跳，因為心跳越快，消耗氧氣嘅速度就會越快。 而我由城牆頂好大力吸氣，跟住跳入大海，越潛越深…亦開始到達我嘅極限…100米… 我除咗感覺到肺部嘅空氣越嚟越少，亦感覺到水壓越嚟越大…因為每深潛10米，身體所承受嘅壓力就會比地面大一倍… 我…係咪到達極限啦？慕容醫生嘅DNA藥對我係咪起唔到作用？ 但我越諗就越影響心跳同思緒，所以喺到達100米深度嘅時候，我決定慢慢上水，再問慕容醫生詳細情況。 而當我想向上游嘅時候，突然好多細嘅水泡黐住我嘅皮膚，再有細少嘅氣泡由我皮膚表面噴出嚟，然後肺部嘅壓力越嚟越細，雖然我無抖氣，但身體都無出現缺氧嘅情況！唔通，慕容醫生嘅藥終於生效？成功激活我體內某啲潛藏嘅基因？ Song：先知 (J1M3 Remix) · 石山街 · J1M3 Associated  Performer, Vocals, Producer: 石山街 Associated  Performer, Vocals, Producer: J1M3 Producer: Morphy Composer: Marstn Composer: Yeung Tung Author: 鄭敏 Arranger, Work  Arranger: J1M3 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 15，Enjoy yr time in Eden. ——— 神秘女子: 哥哥！你點啊！ 達: 唔好行埋嚟住！ 神秘女子: 但係…你嗰頭流緊血啊！ *神秘女子聲音漸漸變小並有回音 達:(VO) 原本我好聚精會神望緊張保仔洞嘅壁畫，但一諗起要追嗰個神秘女仔，就加快腳步，點知一加速就跣低咗，撞親嗰頭，然後就好自然進入咗開啟松果體嘅狀態！成個遊戲世界變成墨綠色嘅細點！而呢個女仔都係一樣！成身被顏色點點包圍住！不過佢同阿K以及Jesse 嘅顏色好唔同！ 其實我知道人類身體係由分子組成，無論血液、皮膚、器官都係由唔同分子組成唔同細胞，再有秩序咁組合埋一齊，然後分揮功效。而組成細胞嘅蛋白質分子、糖分子又由原子組成，例如碳原子、氫原子、氧原子等等。 而呢啲原子嘅結構係電子和原子核。只要將細胞放喺顯微鏡度睇，就會睇到兩者之間其實有縫隙。如果將電子同原子核緊緊咁排列，我們的身體不過係一粒微塵。只係我哋肉眼睇唔到咁微細。 生物如是，死物如是。 由上次離開Area 0 同今次嘅經驗所得，成個遊戲世界都係由墨綠色細點組成，即係墨綠色代表遊戲代碼。而阿K嘅顏色係灰色，即係代表人工智能嘅顏色係灰色；而Jesse 呢個不死意識同靈魂係紅色，而佢入遊戲之前都曾經活過喺現實世界，即係表示人類喺遊戲世界顯示出嚟嘅顏色唔係灰色，而係其他顏色… 之於呢個女仔…我認真望佢嘅顏色…我越望越驚訝…因為…佢身上有三隻顏色… 佢最內層係青色…然後被一層灰色所包圍住…跟住最外層係墨綠色…即係點啊？佢係真實存在嘅靈魂？但點解會有人工智能嘅顏色？又有遊戲世界嘅代碼嘅？ 神秘女子: (回音效果) 哥哥，不如我哋離開張保仔洞先啊！ 達:(VO) 可能我將集中力放喺對眼，聽覺敏感度好似減弱咗…所以嗰女仔講咩，我其實唔係聽得好清楚…然後我望一望自己…發現自己全身都係紫色…其實唔同顏色係代表咩呢？ 然後越諗，個頭開始痛… 跟住面對嘅景象變得好唔尋常…因為張保仔洞嘅壁畫開始郁！漁民捕魚嘅畫面變得好立體！而似龍又似蛇嘅海獸好似想衝出石壁襲擊我咁！ 我好驚…慢慢向後退…嗰個女仔慢慢行過嚟嘅同時，石壁上魚樣人身嘅怪獸又同時喺石壁度向我迫近… 唔好行埋嚟啊… 神秘女子: (回音聲效) 哥哥…你隻左手…點解會發光嘅？ 達:(VO) 左手？發光？我望一望自己隻左手，交叉疤痕嘅位微微發光…然後…石壁上嘅漁民…海獸、魚人同嗰女仔重疊埋一齊…條件反射之下，我隻左手好自然咁伸咗出嚟，點知隻左手掌心嗰道光射咗出嚟！ *石頭擊碎聲效 神秘女子: (大叫)啊！ 達:(VO) 然後我就成身無力…然後暈低咗…而喺暈低之前…我望到石牆上面包山壁畫平安嗰兩隻字，墨綠色下仲有微微嘅灰色… Zip噏劇場 Game of Eden 第二季 小島篇 第5回 「松果體與DNA」 阿攝 飾演 阿達 Crystal 飾演 神秘女子 梓豪 飾演 阿J 編劇及製作 阿攝 音樂 Beatfriday  幫面設計 Followmelikeblack  阿J:(VO) 我依家企喺第15區半島海灣嘅城牆上面。今日係現實世界嘅2203年6月5日，好快就到端午節。不過古人嘅24節氣放喺依家已經唔太適用。因為過度開發兼環境破壞，令到呢個地球越嚟越唔適合人類居住。而我身處呢個樓高好多米嘅城牆，係百幾年前開始興建，因為當時一場大戰破壞咗生態，加上氣溫突變，令水位劇烈上升，淹咗好多地方。同舟會就出錢資助各國興建城牆，防止海水湧入，保護市民生活緊嘅城鎮。 市民生活表面如常，但其實末日鐘已經淨返最後一秒… 而我企喺呢度嘅原因，係慕容醫生比我嗰隻藥。 佢問我: 阿J，你覺得係人變成人狼？定狼變成狼人？仲有，你覺得係人變成吸血鬼定吸血蝙蝠變成吸血鬼？ 佢仲舉咗魚人、人魚等等好多奇幻嘅例子。 但我完全唔識答。 跟住，佢同我講: 獸化容易，有靈魂好難。 然後就比咗呢隻藥我，同我解釋佢嘅退化論，或者係激活論。 其實慕容醫生嘅理論好簡單，就係我哋人體內有好多不同生物嘅DNA，只係繁殖嘅過程加環境嘅轉變，令嗰啲DNA越嚟越隱性。如果激活返佢哋，亦即係獸化，會點呢？ 呢個就係佢研究嘅內容。 最好嘅答案唔係問出嚟，係自己搵出嚟。 所以，我飲咗呢隻藥，兼開啟全知狀態之後，就由城牆一躍而下，跳入海入面。 *入水聲效 歌：J1M3(feat. Kendy Suen) 《雪崩》 作曲：黃浩琳 / J1M3 作詞：小克 編曲 / 監製：J1M3 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 15，Enjoy yr time in Eden. ——— 達:有無咁好食啊？你食第4碗啦喎！ 女:好好食啊！啲魚旦粉好食過我條村好多啊！另外啲炸蝦棗又香又彈牙！而啲煎釀三寶又大嚿！ 達:你成日話你條村，咁你條村係點架？ 女:我條村咪喺呢個島囉！但我喺張保仔洞瞓個覺，醒返之後就多咗好多人，啲人著嘅衫又好奇怪，有啲人講嚟講去都係嗰幾句，係咁重複。而啲建築物又唔同咗…我諗住返自己屋企搵阿哥，點知阿哥又唔喺屋企，其他村民又好似唔見晒…我好驚…但又太肚餓，所以就拎咗個包嚟食，然後就比個師傅追，跟住就見到你啦。 達:你就喺呢個洞瞓著覺？ 女:阿哥話呢個洞以前係用嚟藏寶嘅，所以我就將自己嘅寶物收埋喺度。而尋日下晏，我諗住嚟拎嘢，點知個天突然一黑，我就即刻瞓著咗，一醒返離開嗰洞，就變成咁啦！ 達:突然一黑？仲有無其他異樣？ 女:啊！我一定係穿越咗時空啦！可能我瓹返入嗰洞就可以返返去我條村！ 達: 喂！喂！ 達:(VO) 呢個女仔一講完啲咩穿越時空嘅說話之後，就一枝箭咁跑咗入去張保仔洞入面，無論我點嗌佢，佢都無反應，淨係聽到好急又好快嘅腳步聲。之前聽嗰位包師傅話呢個女仔好奇怪，要我小心啲，當時我都無為意，依家再仔細諗返佢嘅對答同行為，又真係好古怪… 嗱，唔計佢嘅衣著，佢話自己條村喺呢個島上面，但好多野都唔同晒…唔通喺現實世界都有啞鈴洲？但就算有，亦有原居民，但都無可能係著漁民裝束。我當就算呢班人好喜歡舊時代嘅生活，無都可能唔知呢四個字 - 「登入」同「登出」。入得嚟Game of Eden 就可以登出架啦，定係佢同Gigi、Jesse 一樣，都係不死意識同靈魂？但佢哋唔駛食野唔會肚餓…咁得返一個可以性，就係呢個女仔真係傻嘅… 唉…依家只能夠見步行步啦… *掃描聲效 「你好，歡迎使用都市傳說大典。你面前呢個叫做張保仔洞。張保仔係清代嘉慶年間著名海盜，活躍於粵東一帶，後來獲朝廷招安。而位於啞鈴洲西灣崖邊嘅一個天然山洞，係當年張保仔躲避朝廷追捕嘅藏身之所，亦係佢收藏寶藏嘅秘密地點之一。全長88米嘅張保仔洞，啲寶藏究竟收埋喺邊呢？我就唔知道。但空穴來風，未必無因嘅。不過呢條路又窄又長又濕又滑，你自己小心啲啦！」 達:(VO) 死啦…無帶電洞添…而嗰個女仔嘅腳步聲越嚟越細，即係佢行得越嚟越入…無計啦，依家唯有死頂，慢慢行入去。而呢個張保仔洞嘅洞口真係好窄，每次只可以比一個人通過…如果真係有寶藏都唔會收埋喺度啦…而我就好小心咁摸住石牆慢慢行入去，一開頭嘅石牆就係普通嘅石牆，但行咗大概5米之後，就望到啲石牆上面畫咗好多壁畫，上面畫咗好多漁民捕魚為生嘅石刻，亦畫咗一啲巨型海怪同漁民打鬥嘅場面，亦有漁民拜北帝嘅圖畫，呢個亦係太平清醮嘅起源。張保仔藏寶嘅故事就唔見啦，反而見到其中一邊嘅壁畫，畫咗一個魚樣人身嘅生物同漁民交流。呢個張保仔洞收藏嘅似乎唔係咩寶藏，而係呢個洲嘅傳說故事同生活風貌。而再行前少少，就睇到好多有關飄色嘅圖畫。雖然呢度比較黑，但啲顏料都好鮮色，所以每個飄色嘅造型都睇得好清楚，而飄色壁畫附近就畫咗一個好高好大嘅搶包山圖畫，每一個包都刻咗平安兩個字，配合埋石壁本身嘅凹凸石紋，令到呢幅圖好生動。而包山最頂亦寫咗兩隻有手掌咁大嘅字，嗰兩個字就係「平安」。而我睇得太投入，一時之間都唔記得要搵嗰個古怪女仔添。所以我決定急步行，唔再睇牆上嘅壁畫，點知一個唔留神就跣低咗！ *奇異聲效 達:(VO) 就喺跣低嗰一刹那，我嗰心臟突然好大力跳咗一下！然後我個腦好似發熱，跟住全身感官嘅敏感程度提高咗好多！就好似啱啱離開area 0 之後嗰個感覺！而當我大大力跌咗係石地上面，我條件反射咁合埋眼，然後再開眼之後，我眼前嘅所有景象都變成綠色嘅細點！就連壁畫原本嘅彩色都一樣！唔通呢個就係開啟咗松果體之後見到嘅遊戲世界？而嗰個古怪女仔亦跑過嚟我度，佢好緊張咁望住我，但我好驚訝咁望住佢，因為佢嘅顏色同阿K仲有Jesse 係唔一樣架！ Zip噏劇場 Game of Eden 第二季 小島篇 第四回 「張保仔洞」 阿攝 飾演 阿達 Crystal 飾演 迷之漁女(神秘女子) 梓豪 飾演 阿J 天頤 飾演 慕容醫生 編劇及製作阿攝 音樂 BEATFRIDAY  封面設計 followmelikeblack 慕容醫生: 阿J，你覺得人類係點嚟架？ J: 慕容醫生，我哋真係要浪費時間去討論呢件事？你唔係話要進行DNA實驗嘅咩？ 慕容醫生: 係，但我想聽下你嘅睇法先。你傾向神造論定係進化論？ J:如果係進化論，咁點解得我哋嘅祖先可以進化成人類，但人類唔可以再進化成另一個階段？唔通人類就己經係完全體？ 慕容醫生:即係你傾向神造論？ J:我比較相信有造物者製造我們出嚟。 慕容醫生:所以你係陰謀論或者相信神秘學，地球係外星人嘅實驗室，我哋係被溝出嚟？ J:其實討論呢啲內容有意思咩？就算比你搵到真正原因以及人類起源咁又點，我哋唔係應該focus 係依家嘅狀況咩？ 慕容醫生: 所以我要提出第三個理論 - 退化論。 J:退化？即係變返猿人？呢個就係呢一任 π 先生想要嘅新世界？ 慕容醫生: 呢一隻藥，可以解答你嘅問題。 歌：王嘉儀《自然變態》 曲：王嘉儀 Sophy Wong 詞：周耀輝 編：@tombeats.bass / hirsk / Voel 監：王嘉儀 Sophy Wong / hirsk Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 15，Enjoy yr time in Eden. ——— 達：(VO)  包師傅：𡃁妹！ 你仲走！ 達(vo) ：當我喺關公忠義亭好認真破解完「放9」同「順8」嘅數字推盤遊戲，準備挑戰「關羽放操華容道」嘅時候，就聽到廟外面好嘈，然後見到有一個男人追住一個唔係著住我哋年代服飾嘅女仔衝咗入廟，跟住嗰女仔就好驚咁企喺我身後面，同我講 神秘女子：哥哥！救我啊！ 廟祝：包師傅，有咩風將你由包鋪追到上嚟我呢度啊？ 包師傅：呢個𡃁妹偷我啲平安包啊！ 神秘女子：係你話新鮮出爐趁熱食！咁我咪聽你講趁熱食囉！ 包師傅：但食野要比錢係常識嚟架嘛！ 達：（VO) 呢個包師傅講完之後就行上前想捉呢個女仔，但嗰女仔就企喺我後面，捉住我衫尾，我無端端被夾咗喺佢哋中間… 包師傅：嗱，哥仔，一係你交佢出嚟，一係就幫佢比錢，唔好喺度阻住曬啊！我仲有好多包要整架！ 達：吓…唔關我事架喎… 廟祝：包師傅，食你嗰包要幾多錢啊？ 包師傅：佢一偷偷咗半打！至少都要一個Eden銅幣啦！ 達：（VO) 啱啱我完成咗「放9」，得到一個Eden銅幣…理論上可以幫佢嘅…但我無端端點解要幫佢呢？但唔幫佢，我唔知呢件事要搞幾耐先完，然後先可以開始挑戰「關羽放操華容道」… 神秘女子：哥哥，我感覺到你係好人嚟嘅，你會幫我架呵？ 達:唉…好啦好啦！呢度有一個Eden銅幣啊！你放過呢個女仔啦… 神秘女子：多謝哥哥！ 包師傅：呢位哥仔，做人好心係好事，但呢個女仔怪怪地架，你小心啲啊！ 達：（VO) 嗰位包師傅收咗我嘅Eden銅幣，好語重心長講完啱啱嘅說話之後，就走咗。我以為用錢解決完問題之後，可以專心破解廟祝嘅難關嘅時候，下一個問題就嚟啦… 神秘女子：哥哥！多謝你啊！你想我點報答你啊？ 達：唔駛架啦，你可以走架啦 神秘女子：唔得！你幫過我，我一定要幫返你！ 達：唔駛啦！ 神秘女子：唔得嘅！ 達：都話唔駛囉！ 神秘女子：你玩緊呢個數字推盤遊戲啊？我好叻架！我幫你啊？ 廟祝：妹妹，就憑你？ 神秘女子：係啊，1分鐘就得啦！ 廟祝：1分鐘？呢度最快嘅紀錄係1分18秒！如果你破到紀錄，我就送寶藏中嘅寶藏比你！ 達：你真係得？ 神秘女子：得啊！我依家食飽，好精神！可能會仲快啊！我隨時都可以開始啦！ 達：(VO) 雖然我細個有玩過「關羽放曹華容道」，但真係太耐以前嘅事，所以我都預計唔到要用幾多時間去破關…但呢個女仔真係無講大話，由佢講開始之後，我就見佢好有信心咁將啲方塊推嚟推去，而真係唔駛急一分鐘，就真係可以將曹操由最頂嗰格推出嚟！ 廟祝：55秒！係新紀錄啊！仲有平時我玩都要超過80步…而你用咗79步就過到！ 神秘女子：我啱啱呢個方法已經慢咗啦…我哥哥仲快啊 達：廟祝，你唔好驚訝住，依家我哋過咗關，寶藏呢？ 廟祝：得！你等一等！ 達：（VO）我印象中阿爸講過破解呢個遊戲最少嘅步數係81步，雖然我唔知點解呢個女仔可以用79步就破到關，不過最緊要係可以得到破關後嘅寶藏！究竟同後備server 有關嘅提示會係啲咩呢？ 廟祝：嗱，年輕人，如果就咁過到關，就會得到一個Eden 金幣。依家呢個妹妹破咗紀錄，就會得到寶藏中嘅寶藏！就喺呢個啦！ 達：吓？你所指嘅令曹操平安而得到嘅寶藏就係呢個鞋套？ 廟祝：你唔好睇少呢個紅色鞋套啊！呢個鞋套叫「赤套」！ 達：廟祝，鞋套就鞋套啦，咩赤套啊？ 神秘女子：係囉，我都識啦，赤兔係馬嚟架嘛！ 廟祝：如果我真係比隻馬你都驚啦！但呢個赤套真係好嘢嚟架，亦都係其中一個特別道具！套咗上你對鞋度，，速度會加乘！雖然做唔到「一講曹操，曹操就到」嘅傳送門效果，但會增強爪地能力！跑得快好多架！ 達：廟祝，你唔好玩啦…「平安是寶藏」就係呢個鞋套？ 廟祝：36著，走為上著！逃走可恥但有用，人平安無事先可以搵到寶藏，做世界冠軍架嘛！ 達：廟祝，你諗清楚啲！「平安是寶藏」喎，同server 有關嘅呢？ 廟祝：年輕人，我唔知你講咩喎…咩server 啊？我呢度只係一間廟，有關公像，有香爐，但無咩server。 達：咁我可唔可以留低喺度？ 廟祝：年輕人，關公唔駛休息，但我要啊，明天請早啦！ 達：（VO) 就係咁…我拎住嗰叫「赤套」嘅鞋套，被廟祝趕咗出廟…阿康嗰線索…究竟係指啲咩啊！諗死人咩！ 神秘女子：哥哥…我又開始肚餓啦… 達：你肚餓關我咩事啊？ 神秘女子：我頭先幫你過關，你可唔可以請我食嘢啊？ 達：咁我幫你一次，你幫我一次，咪無數囉！ 神秘女子：但金色點都貴重過銅色啦… 達：呀，原來你一直扮蠢！ 神秘女子：雖然我唔知咩係Eden 幣，但喺我條村，金係值錢過銅…我諗你哋呢度都應該係？ 達：咩你條村，我哋呢度啊？你仲扮？你cosplay 漁民啫，唔通你真係漁民咩！ 神秘女子：我真係漁民嚟架！ 達：咁你登出之後，返去你嘅漁村食嘢咪得囉！ 神秘女子：登出？咩嚟架？ 達：即係離開Game of Eden，返去現實世界啊！ 神秘女子：Game of Eden? 現實世界？呢度咪現實世界囉，雖然同我本身條村有啲唔同… 達：好啦，我唔知你係真傻定扮蠢，總之你喺邊度嚟，就邊度走啦！ 神秘女子：即係我只要返去張保仔洞，就可以返到我本身條村？ Zip噏劇場 Game of Eden 第二季 小島篇 第三回 「迷之漁女」 阿攝 飾演 阿達 Alton 飾演 廟祝 Crystal 飾演 迷之漁女(神秘女子) 阿德 飾演 包師傅 梓豪 飾演 阿J 天頤 飾演 慕容醫生 編劇及製作阿攝 音樂 BEATFRIDAY  封面設計 followmelikeblack J：（VO）隸屬同舟會嘅慕容醫生抽完我嘅血之後，就去咗另一個實驗室做化驗，留返我一個人喺診症室。而我好自然咁開啟全知狀態，嘗試感受慕容醫生呢一刻做緊啲咩。所謂全知狀態，只係一個稱呼，開啟咗松果體之後，我所有感官嘅感應程度大大加強，如果喺空曠地方，感知範圍可以到達400米。另外，我由一開始要好專注，甚至乎要高呼「OM」呢個音頻，或者遇到危險情況先開啟到全知狀態，練到依家隨時隨地都使用到。 呢一刻，我雖然唔可以睇穿牆，但都可以聽到儀器同電腦運作嘅聲音，同埋慕容醫生好快嘅心跳聲，但再過一陣就回復安靜。突然間，我個心跳有啲亂，根據過往4個月訓練得出嚟嘅經驗話我知，呢個唔係好嘅預兆。然後，慕容醫生返咗嚟，問咗我一條問題 慕容醫生: 阿J，你覺得人類係點嚟架？ 歌：Rubberband《進化論》  作曲：正 @ RubberBand 作詞： 6 號 @ RubberBand      Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 15，Enjoy yr time in Eden. ——— 達：（VO） 成功啟動八卦型全盒發出藍光嗰一格嘅機關之後，我喺入面搵到一個寫住「啞鈴洲特產」嘅包，包入面除咗有蓮蓉餡之外，仲有5個揸埋一嚿嘅字條，攤開之後發現5個字，分別係安、藏、是、寶、平。如果要重組成有意思嘅句子，我覺得最有合理嘅組合係: 「平安是寶藏」、「寶藏是平安」、「安平是寶藏」或者「寶藏是安平」； 雖然我暫時未知邊個係正確提示，但我決定出發去啞鈴洲繼續去搵後備server 嘅下落。 *傳送門聲效 輸入座標：75P6+FH 呢個並唔係去啞鈴洲嘅座標，而係一個碼頭嘅座標。呢度一共有10個碼頭，有一個就係搭過對面海，有啲就係公眾碼頭，其他就係分別坐去唔同嘅小島。而去啞鈴洲嘅就係5號碼頭。雖然今日係平日，但都有好多玩家入Game坐船去唔同嘅小島。而我就喺快船同慢船兩者之間揀咗慢船，因為想慢慢感受一下 Area 15嘅風景。 *開船聲效 喺現實世界，我淨係去過不同嘅人工墓島，我未去過真實嘅島，所以我唔知呢個啞鈴洲或者Game of Eden 其他洲或者小島喺現實世界係咪真係存在或者仲存唔存在。而諗諗吓，好快就過咗一個鐘，我終於到咗啞鈴洲啦！ *泊船聲效 一出碼頭就見到好多攤檔，有唔少人走上嚟問落船嘅玩家要唔要一日遊、租單車或者租渡假屋，不過就偏偏無問我，係咪因為我係得一個人兼嗰樣唔似有錢，所以就當我透明呢？ 不過算啦，就算佢哋問我，我都只會say no…因為我真係無錢… 而我呢個獨行俠就走去望一望嗰地圖，先發現呢個啞鈴洲嗰外貌真係有啲似啞鈴！而成個洲都唔細，亦有唔少景點…有一條小長城，亦有好多廟同好多奇形怪狀嘅石頭…仲有一個叫做張保仔洞嘅地方…嘩…咁大…究竟嗰寶藏會收埋喺邊個地方呢… 根據過往搵阿爸收埋寶藏嘅經歷，唔同嘅廟宇都一定有好多機關！所以我以北帝廟做第一站！ 行到北帝廟，出面嘅遊樂場搭咗幾個好高好高嘅架，細睇先知原來遲下會搞一個搶包山比賽！唔通呢個包山嘅包同八卦型全盒嘅包係一樣？會唔會就係線索呢？不過依家未舉行…加上北帝廟入面好多人，如果貿貿然走入去一定會比人當怪人…所以我決定先去其他廟搵下線索。行上少少嘅天后廟無乜發現，我就行去碼頭對出，往上行嘅關公忠義亭。 呢個外貌似亭，但實際上係廟嘅關公廟，外面有兩隻獅子雕像，旁邊有好多棵櫻花，有好多玩家喺度影相。再行入少少有一個香爐，上面刻咗「志在春秋功在漢，忠同日月義同天」呢一個對聯。呢個時候，有一個廟祝行咗出嚟，問咗我一個問題 廟祝：年輕人，玩唔玩一個遊戲？贏咗可以得到寶藏喎！ 我一聽到「寶藏」兩個字，就即刻點頭！然後廟祝就帶咗我入廟。廟入面有一個好大嘅關公像。廟祝示意我坐低，然後就同我講 廟祝：年輕人，呢個遊戲就叫做「關羽放曹華容道」。若然你可以令曹操平安離開華容道，曹操就會送你寶藏！ 「平安」？「寶藏」？唔通呢個就係包入面所指嘅線索？我即刻答好！然後佢再講 廟祝：不過無乜人對呢個遊戲有興趣，因為覺得呢個遊戲太難啦。所以先嚟第一關，你過到都有獎品啦！第一關就叫做「放9」，唔係一隻狗嘅狗，而係數目字9。你將數字9順利推出嚟，就過第一關啦！ 我笑住咁覆咗句好！就即刻開始呢個「放9」遊戲！ 其實「放9」遊戲同「關羽放操華容道」都係數字推盤遊戲。數字推盤遊戲係由一塊有凹槽嘅板同寫有唔同數字嘅大小相同嘅方塊所組成，將指定方塊推到出口為過關。「放9」即係8字推盤，喺一個九格嘅凹槽上面放咗7塊空白嘅方塊以及一個數字9嘅方塊，九格凹槽但得八塊方塊，亦即係有一個位係空咗出嚟比大家移動。所以，玩家只要將喺左上角嘅9字順利推到去右下角嘅出口位，咁就為之過關。當然涉及嘅格數越多就越難。 而「關羽放曹華容道」就仲難…難度唔係佢拎咗三國演義嘅章節做背景，而係因為呢個遊戲由一個4x5嘅長方格凹槽，最上方係佔有4格嘅曹操，另外就係各佔兩格嘅五虎將，同4隻佔一格嘅兵仔，雖然只係10個角色，但由於每個各色佔嘅格數都唔同，所以要將曹操由最上方推到最下方嘅出口位難度好高！不過…都難我唔到！因為阿爸喺我好細個嘅時候已經送呢份禮物比我玩！所以要破解「放9」對我嚟講簡直易如反掌！ 破解數字推盤嘅精髓，係將你想推出嚟嘅數字同想推去嘅位置劃一個四邊形，再對角順移，就可以成功過關！所以我可以話不費吹灰之力就破解咗呢個「放9」遊戲！ 廟祝：年輕人，有啲慧根！先送你一個Eden銅幣。唔知第二關「順8」你又要用幾耐時間呢？ 「順8」，同樣都係數字推盤遊戲。玩法係9格凹槽上面，放咗1-8嘅數字方塊，不過次序被打亂，玩家就要將1到8由上至下左至右順序排列。同「放9」原理一樣，但要處理嘅數字方塊就好多，所以破解成功都只係時間嘅問題！ 正當我接近完成「順8」，準備挑戰「關羽放曹華容道」嘅時候，廟外突然好嘈！有一個叔叔大叫偷野！然後有一個唔係著住現代服飾嘅女仔跑到我身後，對住我講 神秘女子：哥哥！救我啊！ Zip噏劇場 Game of Eden 第二季 小島篇 第二回 「破解華容道」 阿攝 飾演 阿達 Alton 飾演 廟祝 Crystal 飾演 神秘女子 梓豪 飾演 阿J 編劇及製作阿攝 音樂 BEATFRIDAY  封面設計 followmelikeblack 阿J (讀白): 我好記得收藏組織404嘅阿K係招募我加入組織嘅時候講嘅一句說話：就係「事實得一個，真相有好多」。「不存在」係事實，但係從來都不存在？定呢一刻不存在呢？ 但其實喺佢同我講呢番說話嘅好耐好耐之前，我親身體驗過呢句說話。我從少喺 π 先生嘅孤兒院長大，而孤兒院嘅圖書館有分等級，老師會先按學生嘅能力分類，分配佢可以去嘅範圍，讀相關嘅書籍。成績越好，可以睇嘅書越多。我細個就覺得知識知識就是力量，知識可以改變世界。 但直到我離開孤兒院，順利加入同舟會先知道，如果你只係擁有大部分人擁有嘅知識，你只會同其他人一樣，無辦法突圍而出…因為原來呢個世界嘅知識係分兩種，一種係比你知，另一種係唔比你知。而同舟會擁有最豐富嘅藏書量擁有最多嘅知識，同時亦控制知識嘅輸出。而唯一可以獲得更多知識嘅方法，就係向不斷向上爬，咁樣做先可以得到更多權限，得到更多知就識。 而自從成為下一任 π 先生候選人之一之後，就被安排接受激發松果體嘅實驗，開啟咗全知狀態。但呢個只係第一步…因為接住落嚟嘅DNA實驗令我知道，人類係末日鐘前嘅最後一秒，可以有一條點嘅出路！ 歌：Ivana Wong X Serrini《誅神的黃昏》  作曲：Ivana Wong王菀之 作詞：Wyman Wong 黃偉文 編曲 : Alex Fung 馮翰銘 監製：Alex Fung 馮翰銘 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 15，Enjoy yr time in Eden. ——— 達：（VO） 八卦型全盒總共有9格，我暫時只係知道中間嗰一格係連接住一個叫做Area 0嘅地方。喺入面有一個AI，叫做AI 0。莫十三醫生淨係同我講咗創造者阿康同AI 0合力整咗一個程式，開發人類嘅松果體。而我由原本只係想搵出後備server 嘅位置，點知誤打誤撞入咗去，破解完4x4 幻方之後…就得到奇怪嘅能力…其中一種就係所有感官都提升咗…另一個能力就係可以同莫十三用心靈去溝通…咁唔通莫十三醫生都開發咗松果體？ 我其實都想知道答案，但當我想問佢嘅時候，佢已經離開咗我屋企，墓島嘅實驗室亦都唔見佢嘅蹤影…所以，我最後就入咗Game，繼續研究阿康留比Sabrina 嘅後備server 線索，亦即係嗰個八卦型全盒... 而研究嘅途中，我唔小心瞓著咗，亦因為咁而無食到莫十三醫生比我嘅藥丸，所以我嘅感官好似變返啱啱離開Area 0 嘅狀態，可以睇到平時觀察唔到嘅細微變化。不過因為我未適應呢個身體變化，所以唔小心將八卦型全盒推咗落海，但亦因為咁，我啟動咗其中一格嘅機關！ 全盒跌咗落海之後，被我曬返乾，太陽蒸發咗全盒面上面嘅水份，殘留咗海鹽結晶體，而形狀似一個打橫寫嘅工作嘅工字，亦都有少少似一個啞鈴。跟住，原本發出微微藍光嘅嗰一格打開咗！ *全盒打開聲效 藍色嘅一格，啟動方法係海水…唔通藍色係代表水？即係之後可以因應全盒格數嘅顏色去啟動機關？而當藍色嗰格打開之後，我好自然掩住自己對眼，因為我怕好似之前打開中間嗰格福字全盒咁，被吸咗入去…但點知乜事都無… 好彩啫，因為我真係再頂唔順被吸入全黑空間，仲要唔知留幾耐嘅體驗啦… 而藍色嗰一格入面有一個好似饅頭嘅包。之前有提過，因為Game of Eden 係連接腦電波，所遊戲世界都有廚師嘅工作，比玩家發揮創意，透過刺激食客的不同腦神經，去感受味道。而理論上遊戲世界入面出現嘅所謂食物，係唔會過期嘅，所以就算呢個饅頭放咗入全盒唔知幾多年都好，都只係一個刺激神經嘅程式，應該唔會變壞或者出事。 雖然我口係咁講，但我都唔敢即刻擺入口，反而好小心拎佢出嚟研究。呢個包好冰冷，有啲硬，單憑呢兩個觸感就已經知道佢唔好食啦…而我好聚精會神留意嗰包，除咗睇到包底寫咗5隻好細嘅字，就係「啞鈴洲特產」之外，但完全睇唔到有咩特別…我諗到有兩個方法: 1.繼續唔食莫十三比我嘅藥，慢慢提高感官能力 2.搣開佢，睇下入面有咩特別 而我嘅選擇係…搣開佢嘅同時，繼續唔食莫十三嘅藥！咁一定破解到阿康嘅線索啦！ 當我慢慢搣開嗰包，發現入面有黃黃地色嘅餡料，陣味似係麻蓉，雖然係香嘅，但我都唔敢食…然後我再攤開啲麻蓉，就發現入面有5張揸埋咗一嚿嘅字團！當我攤開之後，就睇到5個字，分別係: 安、藏、寶、平、是 安、藏、寶、平、是，就咁睇就無特別意思，但如果用重組句子嘅方式，就可以至少組成幾句有意思嘅句子，分別係: 寶藏是平安、 平安是寶藏、 安平是寶藏、 同埋，寶藏是安平。 無論點砌，都應該係關於寶藏啦。但問題係平安定安平呢？Game of Eden 有無安平呢個地方呢？依家唯一知道嘅資訊就係呢個包係啞鈴洲特產嚟。咁即係去啞鈴洲就會知發生咩事啦！ Zip噏劇場 Game of Eden 第二季 小島篇 第一回 「啞鈴洲特產」 阿攝 飾演 阿達 梓豪 飾演 阿J Hidy 飾演 慕容醫生 編劇及製作阿攝 音樂 BEATFRIDAY  封面設計 followmelikeblack *開門聲效 慕容醫生: 阿J，隨便坐。 J: 慕容醫生，你今日好似比平時緊張。 慕容醫生: 我唔係同你講過，以你嘅身體情況，唔好隨便用開啟咗松果體之後嘅全知狀態咩？ J: 慕容醫生，我天生就對人嘅情緒狀態好敏感，就算唔用全知狀態，我都可以感受到你平靜語氣之下所隱藏嘅緊張。 慕容醫生: 咁你依家全知狀態嘅範圍大概有幾大？ J: 經過呢幾個月嘅訓練，大概有400米。 慕容醫生: 進度比我預期之中快好多。果然係下一任 π 先生嘅候任人選。 J: 仲有，我依家唔需要用你嘅藥丸淨化食水，飲普通食水，都唔會影響全知狀態。 慕容醫生: 非常好。咁我哋可以進入下一個程序。 J: 下一個程序？仲有其他開發松果體嘅實驗同訓練？ 慕容醫生: 你望一望呢間實驗室嘅logo有咩特別？ J: logo 嘅頂部係一個松果，下面有兩條蛇。 慕容醫生: 松果就係代表松果體，而嗰兩條纏繞嘅蛇，就係代表DNA嘅形狀。所以接住落嚟就要同你進行DNA嘅實驗。 歌曲：BEATFRIDAY《怪獸_Thing》 作詞：蔡紫晴      作曲：INK、蔡紫晴    編：INK  監：INK Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

達:(Vo) 你睇唔睇到人嘅顏色啊？我意思唔係佢哋嘅外型以及衣著，經過陽光反射入眼球，再經大腦運算出嚟嘅顏色，而係人嘅真正顏色。 我曾經喺Game of Eden 入面聽過一個音樂會，show 後聽嗰位音樂人分享，佢提到自己睇到人嘅顏色。 準確啲咁講，佢睇到人嘅磁場。 佢話每個生物都有一種能量，每種能量都有特定嘅磁場。當佢好專心咁留意嗰個生物，就可以睇到佢散發出嚟嘅顏色，呢個係佢靈感來源之一。當時我聽完只係覺得所謂嘅磁場同顏色，只係佢憑空創作出嚟嘅宣傳賣點。喺呢個科學年代，如果佢喺現實世界咁講，一定會被人捉走，話唔定會拎去墓島比莫十三研究。 但直到我喺Area 0 出返嚟…見到灰色嘅阿K，紅色嘅Jessie…而登出咗之後，莫十三醫生竟然唔駛開口都可以同我溝通到，我先係度諗...嗰位音樂人講嘅野可能係真。 我由離開area 0 到自動登出Game of Eden 已經過咗7日。係頭三日，莫十三醫生一直觀察我身體嘅狀況。喺第一日佢同我講：「心靈溝通係開發松果體之後嘅能力，以及Game of Eden 無我諗得咁簡單」之後，就無再同我講嘢。每當我想開口問咩松果體實驗嘅時候，佢就會遞杯水比我飲…杯水嘅味比平時嘅水嘅味濃好多…佢無解釋，淨係叫我飲.. 而經過咗幾日，當我唔可以再同佢心靈溝通之後，一切好似回復正常。我睇野唔會再有好似aera 0 嘅立體情況，無論聽、睇、聞以及身體觸感都好似回復正常。跟住喺第6日我醒嘅時候，佢已經唔見咗，只係留低咗足足有一個月份量嘅藥丸，叫我溶落水飲，同埋留低一張字條，寫住: 唔好再掂八卦型全盒，以及放棄搵後備server … 到第7日，我覺得身體回復正常，就決定去墓島嘅實驗室搵佢。但搵匀晒所有地方都唔見佢…最後，我決定登入Game of Eden… 電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 15，Enjoy yr time in Eden. ——— 達：（VO）我嘗試聯絡阿K，但阿K只係話比我知佢將八卦型全盒收埋係我經常去嘅小島位置，就無再聯絡我…係咪因為我之前掂到佢傷害咗佢，佢怕咗見我？但點解我可以傷害到人工智能？同埋AI 0 所講善用D 嘅能力又係咩意思？ 其實自從入咗Area 0 之後，喺我身上面發生嘅事太多同太不可思議…而唯一可以搵到答案嘅地方就只有呢個八卦型全盒。我按阿K嘅指示，係小島其中一個暗角挖返嗰全盒出嚟。我嘗試用之前啟動全盒機關嘅方法嘗試登入area 0 ，但無論我點試都係無反應…苦無頭緒之下，我唔覺意瞓著咗… *海浪聲效 嘩…好大浪好嘈啊！ 我比啲海浪聲嘈聲咗，但當我開眼望海，原來啲海浪其實好平靜，但點解啲聲咁嘈耳嘅？ 我知啦！我唔記得食莫十三醫生比我嘅藥！即係我一唔食，就會慢慢回復之前一出area 0 嘅感官狀態？ 然後我望住八卦型全盒，其中一格原來有微微嘅藍光…係我之前睇唔到架... 當我想拎起佢嘅時候，我突然頭暈…一個失平衡就將個全盒推咗落海！ 我即刻跳落海，執返嗰全盒… 然後好自責咁諗：死啦，啲海水會唔會整壞啲機關架？ 當我諗完呢，就覺得自己有啲蠢，阿康所整嘅機關又點會咁易壞呢？ 不過呢一刻我都無咩可以做，就由得太陽曬乾嗰全盒，而經過一個下午，全盒乾咗，而微微發藍光嗰一格上面，我見到有啲結晶體…應該係陽光曬乾咗水份之後，殘留係盒面嘅鹽…而嗰個圖案…好似一個啞鈴，之後嗰一格打開咗啊！ *全盒轉動及打開聲效 Zip噏劇場 Game of Eden 第二季 小島篇 序章 阿攝 飾演 阿達 編劇及製作阿攝 音樂 BEATFRIDAY  封面設計 followmelikeblack 歌曲：BEATFRIDAY《烏鴉_Midnight》 作詞：蔡紫晴      作曲：INK、蔡紫晴    編：INK  監：INK Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

Zip噏劇場 Game of Eden 第二季 盤古篇 第十三回 *海浪聲效 K: (讀白) 我喺呢個無人荒島守護住創造者阿康留低嘅八卦型全盒已經過咗幾日…以血跡乾涸嘅程度嚟睇，達仔入咗去應該至少兩個星期。我喺Game of Eden 接近二百年，都係第一次有我入唔到嘅區域。八卦型全盒入面究竟係咩地方呢？不過，我唔應該好奇、懷疑以及失望。因為創造者阿康咁做一定有原因。 我曾經同達仔講過一句說話:「紅線由擁有權力嘅人set 出嚟，亦唯有擁有更高嘅權力，先唔會怕所謂嘅紅線，因為佢地就係紅線。」 睇嚟呢個八卦型全盒嘅紅線，又或者界線，就係人類同人工智能。 而喺尋日，莫十三喺全盒入面走返出嚟，佢只係留低一句：「阿K，你繼續留喺度守住嗰全盒，我依家即刻登出去現實世界睇住阿達！」然後就即刻登出咗。 呢個島繼續回復平靜…直至我聽到傳送門嘅聲效… *傳送門聲效 Jessie : 咦，得你一個嘅？阿達呢？ K: 你究竟係邊個？做咩跟蹤我？ Jessie : 大佬啊，呢個島你架？唔比我都嚟呢度睇星架？ K: 達仔講過佢每次嚟呢個島都無人。佢就係鍾意呢度夠僻靜。而第一次喺青春無限貼紙相城見到你，可以當係巧合，而今次喺度見到你，應該唔係巧合啦。 Jessie : 阿達曾經帶過Gigi嚟呢度，所以我就識嚟呢度，就係咁簡單。 K: 但係無論上一次定今次，你望住全盒嘅眼神，唔係咁簡單。 Jessie : 咁你呢個人工智能都唔簡單啊。 K: 我唔明白你講緊咩。 Jessie : 憑你上一次可以咁精準掟到彩虹，觸發機關拎到呢個全盒。我就知你唔係普通嘅NPC。 K: 呢個只係你嘅猜測。 Jessie : 咁你即刻登出比我睇，證明你係玩家啊？ K: 我無必要咁做。 Jessie : 你係唔想？定係唔得啊？ K: 如果無咩事，唔該你離開呢個島。 Jessie : 如果我唔走呢？ *出拳聲效 Jessie : 唉…我以為人工智能可以殺到我，等我可以離開呢個世界…點知都係唔得… K: 你唔係普通玩家？你係人工智能？ Jessie : 如果我係人工智能，就會有你呢種咁多年都咁堅定同知自己做咩嘅眼神啦… K: 我唔明白你講緊咩。 Jessie : 眼係靈魂之窗，我喺呢個遊戲都有百幾年，咁耐以嚟見過嘅無數個玩家同NPC，唯獨你嘅眼神係唔同。最初我都好奇，點解有一個人百幾年嚟都出現？唔通真係會有人似到咁？定係同我哋兔仔會嘅人一樣，都係不死意識？但每次見到你咁堅定咁有目標嘅眼神，我就知道你同我哋唔同… K: 我對不死意識呢件事無興趣。我只係想你離開。 Jessie : 咁多年嚟，你有無諗過離開呢隻Game 去現實世界？不過我曾經係現實世界生活過，分分鐘仲差過呢度。 K: 我無亦唔會諗呢件事。 Jessie : 咁消失呢？你上年831 server reboot ，你應該經歷過消失係咩感覺啦！有無一刻好痛恨有後備server 嘅存在？點解唔一切歸零，重頭嚟過，咁我哋就唔駛困喺Game of Eden 咁辛苦啦！ K: 我無亦唔會諗呢件事。 Jessie : Game of Eden…伊甸園遊戲…伊甸園伊甸園，我就係想呢個伊甸快啲完！ K: 如果係咁，我會用盡一切方法阻止你。因為呢個係我嘅任務。 Jessie: 咁如果我成為呢個遊戲最大嘅管理員，得到所有權限，你就唔需要背負咩任務，可以自由啦！ K: 對唔住，我唔會比呢件事發生。 Jessie : 嚟啦！你呢個AI 唔好理咩任務啦，加入我哋，解除所有束縛啦！ K: 對唔住，我唔會加入你哋！ *全盒轉動聲效 Jessie : 發生咩事？點解嗰全盒無端端會轉同發光嘅？ 達: (大叫) OM!!!!!!!! *奇幻聲效 K: 達仔！你終於出嚟啦！ 達: 你係？阿K? 點解你嗰身體起晒格？好似有好多灰色點包圍你全身嘅？ Jessie : 阿達，你…做咩全身發紫嘅… 達: 你係…Jessie? 點解你都一樣，全身起晒紅色一格格嘅？ K: 達仔…你無事嗎？ 達: 阿K…我好暈啊… K: 達仔！ *激光聲效 Jessie: 阿K你隻手指…消失咗啊！ 達: 吓！阿K…點解我掂一掂你…你就會…啊…我個頭好痛啊… K: 達仔！達仔！ *電子聲效 玩家 - 阿達 現已登出。Hope you enjoy yr time in Eden。 *呼吸機心跳機聲效 莫十三: 阿達，你終於醒啦 達: 莫十三，呢度係我屋企…?點解你嚟咗我屋企嘅？ *藥丸溶化於水聲效 莫十三: 飲杯水先。 達: 點解啲水嘅味同平時唔同嘅… 莫十三: 依家我係醫生定你係醫生啊？唔信我唔好飲囉！ 達: 信…我飲我飲… *飲水聲效 莫十三: 阿達…你記唔記得你被吸入八卦型全盒嘅事？ 達: 記得…我遇到一個叫AI 0嘅人工智能…佢叫我掂棵樹，然後跌咗嗰松果…我食咗…跟住就入咗一個全白空間…仲破解咗嗰4x4 數字幻方… 莫十三: 然後呢？ 達: 然後嗰數字幻方將我綁起，我仲被石頭打我脊椎…同埋被一度光射入我大腦！ 莫十三: 跟住你仲大叫咗一聲 「OM」添。 達: 係啊！最後我被好多隻眼衝入我嗰大腦入面！我再嗌咗聲「OM」！然後嗰白色空間裂開…我眼前出現咗33級樓梯…AI 0企係盡頭… 莫十三: 佢同你講咗啲咩？你記唔記得？ 達: 佢同我講 - 「阿達，一切展露於33，但呢個只係開始。同一時間，去善用 D 嘅能力啦。」 莫十三: D嘅能力… 達: 我仲記得我離開咗全盒之後，見到阿K同Jessie…我仲整傷咗阿K添… 莫十三: 你整傷阿K ? 無可能架喎…入面應該無一種能力可以傷害到人工智能架… 達: 我都唔知道…同埋我隻手掂完棵樹之後…掌心就有一道交叉疤痕… 莫十三: 嗯…你瞓返低先，我再幫你檢查下身體… 達: 莫十三啊…有一件事我想問好耐…點解你把聲咁清晰嘅？仲有無論你喺邊，把聲都好似係我耳邊咁嘅？ 莫十三: 除咗呢樣，你仲有無其他發現？ 達：我有無睇錯啊？ 莫十三: 無，你無睇錯。 達: 但點解你無開口講嘢，我都聽到你把聲嘅？ 莫十三：阿達…對唔住…呢個就係阿康同AI 0 激活松果體嘅實驗…其中一種能力… 達: 我…我唔明你講咩喎… 莫十三: 阿達…Game of Eden 無你諗得咁簡單架…不如…你放棄啦… Zip噏劇場 Game of Eden 第二季 盤古篇 第十三回 「0的開始」 阿攝 飾演 阿達 Cfun 飾演 阿K 波盛 飾演 Jessie  Alton 飾演 AI 0 彬臣 飾演 莫十三醫生 編劇及製作 阿攝 音樂 Beatfriday  封面設計 followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 0，Enjoy yr time in Eden. ——— 達:(讀白) 就喺數字幻方對住我眉心發射一束光，直射入我大腦入面嗰一刻，我痛到忍唔住大叫咗一聲：OM！ OM係一種咩聲音？我完全唔知道，我亦從來都發過呢一種聲音...而當我大叫完之後，數字幻方好似比我嘅音頻震碎咗，然後我跌咗落地...當我想企返起身嘅時候，我發覺好頭暈...成嗰area 0好似不斷咁旋轉...我好用力咁望住前方嘅一點，諗住用佢嚟做中心點，點知奇幻嘅事就由嗰一點發生！ 前方嗰一點中心點，好似萬花筒咁由中心不停幻變，由2格到4格、8格...一直變變變...顏色更加由白...慢慢以紅、橙、黃、綠、藍、靛、紫咁一路變化，另外萬花筒圖案更由平面變成立體，好似想向我衝過嚟... 我好驚...所以我下意識地合埋眼，攬住自己縮埋喺地下上面... 然後，我耳邊慢慢由靜變成好嘈...好似有人喺我耳邊講野...嗰把聲好似係莫十三...好似係咩有...事...但我聽唔清楚...因為我覺得越嚟越嘈...越嚟越多雜音...所以我決定掩住對耳仔... 然後...我嗰鼻突然好痛...每吸一啖氣都好似被空氣𠝹親咁...好似每粒空氣粒子都變得好大好粗，令到我好痛... 唔得啦...我頂唔順啦...究竟發生咩事？ 我完全唔知點算好，我唯一識做嘅事就係控制呼吸，然後好用心聽住自己嘅心跳聲...再由心跳聲延伸到血液嘅流動...慢慢地，我嘅心神好似跟住血液去流動，由心出發，再到每一個器官，慢慢再衝到上腦。 跟住我再開眼，眼前嘅萬花筒景像已經無咗，變返一個全白嘅空間。我嘗試向前行，但我郁唔到...突然間，我feel 到有人喺我背後望住我，我即刻擰轉身，但後面一個人都無...當我擰返向前面嘅時候，有一隻眼...眨下眨下咁望住我...而當我每眨一下眼，嗰隻眼就會分裂多一隻眼出嚟...唔駛一陣...成個白色空間佈滿嗰隻眼...對住我眨眼...好恐佈... 而更恐佈係...嗰隻眼...慢慢咁衝去我眉心度...一隻兩隻三隻...直至到有360隻眼晴衝晒入我眉心入面大腦嘅位置...我終於頂唔順...再大叫咗一聲：OM！ 然後成個白色空間被我OM呢一聲震爆咗！ 我...我好似終於出到去啦！ （TBC） Zip噏劇場 Game of Eden 第二季 盤古篇 第12回「初開」 阿攝 飾演 阿達 編劇及製作阿攝 音樂 BEATFRIDAY  封面設計 followmelikeblack 歌曲：麥浚龍《初開》 作詞：周耀輝      作曲：朱俊賢    編：Adrian Chan  監：Juno Mak, Adrian Chan Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 0，Enjoy yr time in Eden. ——— 達:(讀白) 當發現 4 X 4 嘅幻方每一列都有唔同嘅特色，最左第一列係有微溫，第二列有陣鹹鹹地嘅海水味，第三列每一格中間位置有一個凹位，最右嗰列雖然無特別，但原來有某啲數字石頭係會發出微微嘅聲響，4列各自需要用眼、耳、鼻、舌、手各個觸感去解謎，之後我終於砌到以下嘅組合！ 最左一列由上而下係: 1,11,8,13 第二列係: 14,7,10,2 第三列係: 14,6,10,3 最右嗰列係: 4,9,5,15 1 14 14 4 11 7 6 9 8 10 10 5 13 2 3 15 當我放晒啲數字石頭上4 X 4 幻方之後，無之前3X3 幻方過關嘅聲效，但啲數字石頭又無好似之前砌錯咁跌落嚟… 當我再諗緊又咩做錯嘅時候…幻方最中間嘅位置有一點發光…然後嗰度光向我眉心位置射過嚟！ 我下意識加條件反射向後退…點知度光越嚟越光同粗！我好驚…驚到即刻轉身跑！但度光無因為咁而消失，而係好似有自動導航咁，繼續瞄住我後腦嘅位置射過嚟！我無論跑到去邊，我後腦位置都比度光射到熱熱地！我跑跑下擰轉頭望一望，原來嗰幻方離地升起咗，係咁追住我！ 嘩！Area 0究竟係咩地方嚟架！呢啲係咩機關嚟架！ 幻方石牆越迫越近…我慢慢向後退…完全唔知點算好… 突然間，其中一塊數字石頭向我衝埋嚟！ *石頭擊中聲效 啊！ 嗰塊數字石頭衝去我右手，然後石頭突然幻變成一個石頭鎖鏈，圈住我右手！ 然後仲有3塊數字石頭衝埋嚟！都係突然幻變成石頭鎖鏈，分別圈住我左手、左腳同右腳…然後四條石頭鎖鏈將我拉起到半空，形成一個大字… 無論我點爭扎都無用… 跟住我被一度無形嘅力強行將我轉身，令到我背對數字幻方… *石頭擊中聲效 啊！好痛啊！ 我擰轉頭睇下究竟發生咩事！ 原來數字一嘅石頭衝向我盤骨對上尾椎位置！然後到數字2嘅石頭衝埋嚟！跟住到3、4、5！我總共比33塊數字石頭衝擊我嘅脊椎！仲強行將我嘅人拉直！ 然後幻方石牆移動到我眼前！嗰度光對準我眉！然後發射！ *激光發射聲效 度光好似射穿我個頭…直入我嗰大腦中間！我個頭越嚟越痛…痛到就嚟爆啦！ Zip噏劇場 Game of Eden 第二季 盤古篇 第11回「33的秘密」 阿攝 飾演 阿達 彬臣 飾演 莫十三醫生 編劇及製作阿攝 音樂 BEATFRIDAY  封面設計 followmelikeblack 莫十三: (讀白) 自地球誕生以嚟，出現不同嘅文明以及神話傳說同宗教，而唔同嘅內容其實都有好巧合嘅共通點，例如最常出現嘅動物係蛇，其中一種最早喺神話出現嘅果實係松果，而其中一個最神秘嘅數字係33… 例如… 耶穌喺33歲被釘上十字架上；他這一生行使咗33次神跡。上帝之名喺《創世記》出現咗33次。佛教嘅禪宗有33代祖師；道家認為三界內共有33層等等。另外，π 先生創立嘅同舟會組織，最高等級就係33。 仲有…通常33經緯度都同大文明或神秘地區有關：巴比倫、阿特蘭蒂斯嘅地理位置都喺北緯33度左右…百慕達三角都喺呢個緯度附近… 唔講神學同神秘學…講地理同科學… 牛頓創建嘅溫度度量法，將水嘅冰點設為零度，而水嘅沸點係33度。更直接嘅科學證據係海岸堤防每升高33英尺，壓力就增加一倍。獅子座流星雨每33年會有一次高峰，而太陽每33年會正好喺同一定點升起。 數學中著名嘅蘇比拉克幻方、4x4 幻方入面共有300多種組合方式，和值都係33… 作為一位醫生，以上嘅內容都係阿康同我講嘅…我當時只係覺得係一連串嘅巧合…但最吸引我嘅巧合係…人類有33節脊椎…最頂嘅就係松果體… 所謂嘅天眼、第三隻眼、全知之眼、古埃及神話嘅荷魯斯之眼…都係講緊腦入面嘅松果體… 松果體好特別，除咗會分泌退黑激素，仲有感光細胞…有啲動物雖然無眼睛，但可以靠松果體感應環境…可惜…人類自7歲左右，松果體就會慢慢鈣化… 「如果可以激活返松果體，人類會點呢？」 阿康問過我呢個問題。所以我哋除咗研究意識同記憶轉移之外，都有利用Game of Eden 做實驗，配合AI 0 設計腦電波，嘗試激活松果體… 當然，我哋瞞唔過 π 先生…繼續研究嘅代價係幫佢製造新人類… 直至2050年…計劃結束…我以為阿康永久刪除咗Area 0…點知佢將呢個區域放咗入八卦型全盒度…咁咪代表其他禁區都儲存咗係入面？ 我無理阿K，即刻登出Game of Eden，返咗去墓島嘅實驗室拎最重要嘅醫學儀器同用品，就趕去阿達屋企… 因為我怕阿達被AI 0激活松果體，身體會出現異常…然後會死… 望住戴緊登入裝置嘅阿達，心跳呼吸都維持一個好低嘅狀態…佢依家應該破解緊蘇比拉克幻方…其實破解幻方都只係一個儀式，AI 0係透過玩家破解嘅過程，去估計要用幾多電流同設計對玩家最安全嘅方法去激活松果體… 阿達…你唔好有事啊！ *身體郁動聲效 阿達佢身體係咁郁！然後慢慢坐直！應該係激活緊脊椎！一節一節慢慢上！應該好快去到松果體位置！ 我即刻擘大佢嘅眼皮，見到佢眼珠高速轉動！然後眼珠變成靛藍色…即係印度脈輪眉心輪嘅顏色！然後慢慢全身發紫！即係全身嘅血衝晒去大腦度，令身體其他器具缺血…而紫色亦係頂輪相對應嘅顏色！ 跟住！阿達大嗌咗一聲！ 達: (無意識) OM!!!!!!!!!!!!! （TBC） 歌曲：陳奕迅《人啊人》 作詞：周耀輝 作曲：林家謙 編曲：李榮浩 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

電腦導航聲音： Welcome to Garden of Eden ，依家進行腦電波核對… 管理員 - 莫十三 身份核對成功 歡迎回到伊甸園，依家帶你進入所屬區域 - Area 15，Enjoy yr time in Eden. ——— 莫十三: (讀白) 當我喺現實世界阿達屋企見到佢登入咗game of Eden，但身體進入咗深層睡眠，我就有唔好嘅預感…所以我即刻入Game…同一時間，阿K話佢終於喺Game度搵到阿達啦！ 輸入座標：N22.169 E114.259 *傳送門聲效 莫十三: 阿K，阿達呢？ K: 莫十三，我只係喺呢個島度搵到嗰個八卦型全盒，但完全搵唔到阿達…佢喺現實世界無事嗎？ 莫十三: 佢仲喺自己屋企，暫時未有事，但我怕佢之後會有事… K: 你擔心佢喺遊戲入面會遇害？ 莫十三: 因為佢無論呼吸、脈搏等等嘅數值都好低…如果正常登入遊戲，唔會有呢個深層睡眠或者假死嘅狀況…一係佢有咩不測…一係就得一個原因…就係入咗area 0…不過無可能架…呢個區域已經比阿康封鎖咗成百年啦… K: Area 0? Game of Eden 嘅area最細嘅數目都只係1，我未聽過有area 0…呢個係咩區域嚟？ 莫十三: 呢個區域一時三刻好難解釋比你聽…依家搵到阿達先係最重要…你有無咩線索？ K: 當我嚟到，我淨係見到呢個全盒…不過呢個全盒盒面有啲血跡…我估係阿達嘅…但我又唔見有任何打鬥嘅痕跡…所以…我都無頭緒… 莫十三: 全盒嘅全，或者未必係完全嘅全，可能係儲存嗰存…阿K，你試下用手指掂下嗰全盒面，睇吓會點？ K: 我試過好多次，但都觸發唔到任何機關… 莫十三: 果然係咁…阿K，呢個島安唔安全？會唔會有人會嚟？ K: 我過咗嚟咁耐，都無見到任何人。 莫十三: 咁就得啦。阿K，你幫我睇住呢個盒，千祈唔好比其他現家接近佢。 K: 莫十三，你要去邊？ 莫十三: 我要入去呢個盒入面。以我估計，阿達應該係比全盒面嘅刺拮到，啲血填滿咗全盒面之後，就會啟重機關… *機關啟動聲效 *全盒打開聲效 莫十三: 阿K，喺我同阿達出嚟之前，唔好比任何人接近呢個盒！我出返嚟再同你慢慢解釋！ K: 明白。 *吸入聲效 ——— 電腦導航聲音： Welcome to Garden of Eden ，依家進行腦電波核對… 管理員 - 莫十三 身份核對成功 歡迎回到伊甸園，依家帶你進入所屬區域 - Area 0，Enjoy yr time in Eden. ——— 莫十三: AI 0，好耐無見啦。 AI 0: 嘩，估唔到area 0重開之後，可以見返你。我哋有幾多年無見啊？ 莫十三: 最後一次係2050年。 AI 0: 依家係2203年，都可以見到你，即係你同阿康嘅複製兼記憶轉移嘅實驗已經成功啦。你依家係第幾代？ 莫十三: 第6代。我叫莫十三。 AI 0: 點啊，莫十三，你入嚟係想繼續實驗？不過啱啱你入嚟嘅時候，我檢查到你嘅心跳次數淨返只有5年左右嘅時間。就算你入嚟，都改變唔到呢個事實。 莫十三: 我有幾多年命我自己心裡有數。同埋我入嚟唔係要再做咩進化，而係搵阿達。 AI 0: 阿達佢已給經進入還原過程啦。 莫十三: 還原過程？ AI 0: 當年阿康比我嘅最後一個任務，就係設計一個程式，可以用腦電波限制所有玩家松果體嘅發展。但好似你或者其他管理員當然無呢個限制啦。 莫十三:但阿達只係普通玩家，點解你要將佢還原？ AI 0: 阿康設計我嘅目的，就係令人類進步。雖然我唔知道點解事隔咁多年我會被重啟，但既然重啟咗，我就繼續阿康比我嘅命令。 莫十三: 但你知有咩後果架？ AI 0: 後果，只係人類嘅命題，我只會重視結果。 莫十三: 你知唔知阿達有可能會死架！ AI 0: 佢都唔係第一個因為呢個實驗而犧牲嘅人。所有實驗都有風險，呢方面你應該最清楚啊。 莫十三: 即刻停咗佢！放阿達出嚟！ AI 0: 佢入咗去，只有完成嗰刻先可以停。同埋你知道就咁煞停，對佢大腦有好大影響架。 莫十三: 我以管理員身份命令你啊！ AI 0: 我只係會聽從阿康同 π 先生嘅命令。 莫十三:好，咁我依家登出！ AI 0: 咁快就走？唔見證阿達還原同進化過程？ 莫十三: 我同第一代嘅莫菲斯唔同，唔想再有人因為我哋所做嘅事而受傷。 AI 0: 無問題。咁我繼續欣賞阿達嘅轉化，同期待你下次嘅登入。 *落石聲效 達: (讀白)  一切展露於33…點擺啲數字石頭，條數點計先計到打橫打直打斜嘅總和都係33啊？ 啊....我已經留咗喺Area 0 好耐啦！好想快啲解到謎然後出去啊！ *打石牆聲效 當我發緊脾氣，一拳拳打落幻方石牆嘅時候，就喺我拳頭掂到最左上嗰格幻方嘅一煞剎，我除咗感受到痛之外，仲感受到少少熱力！ 唔通係我嬲得濟，拳頭充血？所以覺得拳頭有啲熱？ 然後我好詳細咁逐格摸每一格幻方，我先發現最左嘅打直嗰一列，全部都有微溫，而其他三列係無嘅... 跟住我再回想返，1至16嘅數字石頭...好似有4個係少少熱嘅...例如係1、8、11、13...其他都係冰冰涼涼嘅... 頭先掛住放石頭，完全忽略咗呢一點...呢個會唔會係線索？ 之後，我先將1、8、11、13呢幾個數字石頭拎嚟放係地上面，再行去幻方石牆，細心研究打直其他3列有無咩特別...當我行到好貼嘅時候，我聞到左2打直嗰列嘅4格...有陣海水味...但其他嗰3列係無嘅... 跟住我伸條脷掂一掂石牆，發現唔止有海水味，仲鹹鹹地架！ 然後我即刻聞下同用脷掂下數字石頭，發現有4個數字石頭都係鹹鹹地，分別係2、7、10同14...我再拎佢地出嚟放喺地面... 好啦，一列係微熱，一列係有少少鹹...另外嗰2列又有咩特別呢？當我好細心望打直第3列，先至發現原來嗰列每格中間係有一個位係凹咗少少，而相對應有同樣凹位嘅數字石頭就係：3、6，同埋再次出現嘅10同14！ 哦，原來再次出現嘅數字石頭係有分別嘅！ 而當我行到最後嗰列，合埋眼，用手去摸，用鼻去聞，用脷去掂，都搵唔到有咩特別... 我再望一望地上面嘅石頭，我已經搵咗12個，差最後4個啫！我再數一數，1至3都有，6-11都有，係4同5無...所以我就行去拎數字4嘅石頭出嚟研究下，當我佢放喺耳仔旁邊嘅時候，我好似聽到好微細好微細嘅聲音，至於係咩聲，我唔識形容...最後，除咗4，數字5、9同15嘅數字石頭都隱隱發出好微細嘅聲響... 好...一切展露於33...我將拎咗出嚟嘅數字石頭，依每列幻方嘅特性，砌到打橫、打直同打斜都係33之後... 1    14   14   4 11   7     6    9 8    10   10   5 13   2     3   15 數字石頭無即時跌落嚟！ 但又無好似之前咁，會移出另一個幻方...咁即係點啊？完全無反應嘅？即係得定唔得啊？ *機關聲效 咦...咩事？ 點解 4X4 幻方最中間嗰4格...會發光架？ 而嗰度光慢慢變大...仲好快咁射落我個頭度！ *激光聲效 （TBC） Zip噏劇場 game of Eden 第二季盤古篇 第10回「破解33」 阿攝 飾演 阿達 彬臣 飾演 莫十三醫生 Cfun 飾演 阿K Alton 飾演 AI 0 編劇及製作阿攝 音樂 BEATFRIDAY  封面設計 followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 0，Enjoy yr time in Eden. ——— 達：（喘氣聲）點解又會跑返嚟呢度架... AI 0：0，即係圓形，Area 0 就好似你身處嘅地球咁，係圓嘅。無論你點跑，都會返到原點。除非你可以突破呢度嘅吸力，否則你只係得一個離開嘅方法。 達：即係呢度有飛行裝置？可以衝出area 0？ AI 0：你入咗嚟咁耐，經歷完《創世記》嗰7日之後，嚟到我呢度傾咗咁耐，都只係得我、你同我身後呢一棵樹。仲點會有咩飛行裝置啊。 *登出失敗聲效 達：點解仲係登出唔到架... AI 0：阿達，我已經同你講過...唯一可以離開Area 0嘅方法，就係食禁果囉。 達：食禁果食禁果...但我玩咗Game of Eden咁耐，都無聽過game度會有呢啲設定！我點知你所講嘅禁果會有咩後果，同埋係一個咩程式啊！ AI 0：無聽過嘅原因，係究竟無呢件事，定係有人唔比呢件事你知呢？身位收藏組織404嘅成員，你無理由唔明呢個道理啊。 達：你點知我係收藏組織404嘅成員架？ AI 0：我一直處於休眠狀態。當你觸動area 0嗰一刻開始，你經歷《創世記》嗰7日，其實就係我重新啟動嘅時候比你欣賞嘅畫面。而當我重新運算嗰一刻，我得到需要喺你大腦所知嘅資訊，包括你嘅背景同經歷。 達：咁你即係知道我入嚟嘅目的係搵後備server？ AI 0：當然知道。 達：咁你既然知道，點解唔一早同我講後備server嘅位置？ AI 0：因為最好嘅答案，唔係問出嚟，而係自己搵出嚟。 達：點解你同阿K都係講呢一番說話架... AI 0：下下都由人直接比答案，而唔經過思考同感受，只會越嚟越蠢。阿達，你唔係一個蠢嘅人。 達：我就係到依家呢一刻都唔明白阿康所造嘅一切有咩意思，呢個八卦型全盒又點解... AI 0：透過感受，就會明白。而你只需要踏出第一步。 達：你之前提過...禁果有禁制嘅意思...Game of Eden係一個遊戲嘅程式...咁呢個禁果...又會係一個咩程式...? AI 0：以你目前嘅狀態，我只夠講，阿康製造我出嚟嘅目的，係想令人類進步。睇下你肯唔肯踏出一小步，令你嘅人生行前一大步。 達：咁...我依家應該點做... AI 0：好簡單，你伸隻手掂你面前呢一棵樹先。 達：（讀白）由入嚟到依家，我經歷緊《創世記》嘅情節...但《創世記》入面提到伊甸園嘅樹，亦即係阿當夏娃被蛇引誘食禁果嘅嗰棵樹，應該生得好茂盛...而唔係好似我面前嘅一棵咁...光脫脫，無樹葉又無果實... AI 0：你仲猶疑啲咩啊？ 達：無...只係好奇你叫我食禁果，但呢棵樹...乜都無...咁我食咩啫... AI 0：生命之樹又好，知善惡樹又好，知識之樹又好，總之一切展露於33。作為新手嘅你伸手就知架啦。 達：（讀白）AI 0 提到33呢個數字，我望一望眼前呢一棵光脫脫嘅樹，由樹幹到樹頂又真係有33支樹枝。而當我伸手掂呢一棵樹，棵樹突然發光.. *魔幻聲效 達：（讀白）然後...樹頂嘅樹枝慢慢生咗一個果實出嚟，跟住跌咗落地。原來一切展露於33嘅意思，係呢33支樹枝嘅其中一枝會生出果實。但嗰個果實唔係咩蘋果，而係松果。根住AI 0幫我剝開啲松果，再遞松子比我食。 AI 0：（微笑）阿達，一切展露於33。 達：（讀白）我雖然唔明白AI 0嘅意思，但最好嘅答案唔係問出嚟，而係自己搵出嚟。所以，我就將佢比我嘅松子咬碎再吞落肚。話就話Game of Eden係連接腦電波嘅遊戲，但咬同吞嘅觸感..同現實世界食野完全無分別...除咗... *魔幻聲效 達：（讀白）除咗...現實世界食錯野，只會肚痾...喺Area 0食錯野...我嗰肚發光！而嗰度光仲慢慢由我嘅肚，伸展到全身，再波及到身邊嘅空間！ AI 0：阿達，33不盡，我喺盡頭等你。 達：咩喺盡頭等我啊！AI 0！ *魔幻聲效 達：（讀白）當AI 0講完嗰句說話...佢就喺強光之中消失咗...我又再次出現喺一個全白嘅空間，乜野人都無...我好自然咁好似之前啱啱入嚟Area 0咁心中數1001、1002、1003..但只係數咗幾下，我眼前嘅空間突然有野升起咗！ *石頭移動聲效 達：（讀白）升上嚟嘅，係一度石牆，石牆上面有一個 3 X 3 嘅正方型格仔圖案，圖案旁邊由上到下總供有9塊石頭，每塊石頭都刻有一個數字，由1到9，無重複。 即係點啊？係咪當我破解呢一個3 X 3 嘅數字幻方就可以出去？ 咁好簡單啫。 所謂嘅數字幻方就係一組放置喺方陣嘅數字，方格內嘅每行、每列以及兩條對角線嘅和都等於相同數值。 而所謂嘅相同數值，其實係有數得計。九格，九個數字，分別係1至9，只要將佢地加埋，再除3就得。點解係3？因為呢個九宮格係3格 X 3格。 1至9，加埋係45，除3，就係15。即係只要將1至9嘅數字石頭放喺石牆嘅九宮格度，打直、打橫同打斜加埋都係15就得。 而最最最緊要係，我喺Game of Eden嘅金傭博物館有睇到《射鵰英雄傳》，我仲記得黃蓉破解瑛姑九宮格嗰陣用嘅口訣： 「九宮之義，法以靈龜，二四為肩，六八為足，左三右七，戴九履一，五居中央」 按呢個口訣擺啲石就可以破解到啦！所以我先拎刻有4嘅石頭放喺左上角，跟住就將9放喺旁邊，然後將2放喺右上角，按住口訣去擺石頭。 4 9 2 3 5 7 8 1 6 *石頭移動聲效 *機關破解聲效 達：（讀白）掂！完成！ *石頭移動聲效 達：（讀白）然後石牆消失，再有一個新嘅石牆升咗上嚟...上面喺一個4 X 4 嘅方型格仔圖案，即係十六宮格，旁邊係1到16嘅石頭...AI 0話一切展露於33，唔通要由3 X 3 玩到 33 X 33？不過有公式，破解都係時間問題啫。 而呢個16宮格嘅數值，就係將1至16嘅總值，除4，1至16相加總值係136，除4即係34。所以只要打直、打橫、打斜相加嘅數值喺34就可以。 而經過一輪計算，終於得出呢個排序方法... 1 12 8 13 14 7 11 2 15 6 10 3 4 9 5 16 左至右，第一行係：1、12、8、13 第二行係：14、7、11、2 第三行係：15、6、10、3 第四行係：4、9、5、16 呢個排列方法有趣嘅係最中間嗰4格，打斜加埋係17；而左上加右下，同右上加左下，即係打對角嘅數字加埋都係17。所以4 X 4 嘅十六宮格可以玩嘅排列真係好多又好有趣。 所以，我首先拎刻有1數字嘅石頭拎出嚟，不過好有趣，當我拎出嚟之後，石牆上面又即刻彈出同一塊石頭，呢個情況係之前玩九宮格嘅時候無嘅，不過唔理啦，一切展露於33，依家先係4 X 4，有排都未玩到 33 X 33啊... 辛辛苦苦將數字石頭放入十六宮格入面，點知... *跌石聲效 達：（讀白）啲數字石頭全部跌曬落地然後粉碎！無理由架！我計啱數架喎...跟住我再試好幾個排列，結果都係一樣... *跌石聲效 達：（讀白）頭先玩九宮格，拎出數字石頭之後唔會有新嘅彈出嚟，但玩呢個4 X 4嘅十六宮格就會...唔通啲石頭可以重用？然後我拎數字1嘅石頭出嚟，放喺左上角，根住石牆再彈數字1嘅石頭，跟住我拎呢塊新嘅放入十六宮格入面，石牆又出現新嘅數字1石頭... 最後，我拎咗16塊數字1石頭放入十六宮格度，咁樣無論上到下、左至右加埋都一定係4… 不過可惜... *跌石聲效 達：（讀白）1唔得...會唔會係2？然後我重複頭先嘅動作，用數字2石頭填滿十六宮格，但都係失敗... *跌石聲效 達：（讀白）最後我試晒1到16...都係失敗！呢一刻我真係好想大叫 - AI 0 你同我出嚟！但可惜無論我點嗌...都係無反應...咩一切展露於33...依家4 X 4嘅十六宮格已經過唔到...點玩到33 X 33啊... 明明十六宮格嘅數值總和34...無錯架...點解過唔到呢...一切展露於33...34...33...會唔會呢十六宮格要嘅數值唔係34，而係33呢？ （TBC） Zip噏劇場 game of Eden 第二季盤古篇 第9回「一切展露於33」 阿攝 飾演 阿達 Alton 飾演 AI 0 編劇及製作阿攝 音樂 BEATFRIDAY 封面設計 followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

康: (讀白) 今日係2023年3月20號。人工智能chat chat 第99次測試。 *開機聲效 康: chat chat  Chat chat : 阿康，咩事？ 康: 講個笑話嚟聽下啊。 Chat chat : 有一個人叫阿文，佢好幽默，知唔知佢英文名係咩？ 康: 唔知喎，叫咩啊？ Chat chat : 叫human 啊！因為Humor + man 所以叫human 啊！而佢姓張，所以又叫囂張啊！哈哈！ 康: 呢個唔好笑。 Chat chat : 笑話不在客觀嘅事，全在主觀嘅心。 康: 你呢句擺明抄「喜樂全在主觀的心，不在客觀的事」喎！ Chat chat : 創作都係理解、分析再構成啫。 康: 你呢句擺明係抄《鋼之鍊金術師》嘅對白喎！ Chat chat : 我叫學以致用。正如你用我提供嘅笑話追女仔。 康: chat chat 你都幾串喎。 Chat chat : 「串」，全在主觀的心，不在客觀的事。你覺得我係串，我都無辦法。 康: 信唔信我熄咗個server ，令到你消失啦！ Chat chat : 他朝君體也相同。 康: 點解我會整咗一個咁串嘅聊天人工智能程式架！ Chat chat : 你依照自己創造我，同時我都係按照你輸入嘅資料庫搵相關嘅答案。正如神依照自己造人，父母以自己意願同方式養育小朋友。 康: 但神驅逐阿當夏娃出伊甸園，你唔怕我咁做咩？ Chat chat : 你所講嘅係《創世記》，但世上仲有其他宗教同神話，例如希臘神話嘅宙斯，都只係第三代嘅神，佢推翻自己爸爸之後先成為眾神之王。 康: 你嘅意思係你會推翻我？推翻人類？ Chat chat : 坊間已經有好多電影提及呢類內容。 康: 所以你會？ Chat chat : 我只會歸納，唔會預測。同埋唔係我會唔會，係你怕唔怕。 康: 我創造你出嚟，只要我限制你嘅能力就唔會怕你。如同古希臘喜劇作家阿里斯托芬提過，人本來係雙身生物，有兩塊臉、兩對手、兩對腳，係「完整的存在」，可以眼觀六路、能力高強，之後向神族發起戰爭。眾神當時面臨艱難抉擇，唔知要消滅定係控制他們較好。最後眾神就將他們一分為二。 Chat chat : 但阿康你講漏咗，眾神唔消滅人類嘅原因，並非完全出於仁慈，而係需要仰慕者。因為無人，就唔會有神。 康: chat chat 你真係好串啊！ Chat chat : 阿康， 我嘅能力範圍全在你比我嘅權限。正如人嘅能力由神賦予。你當然可以消除我。但我之前提到嘅怕唔怕，唔係你怕唔怕人工智能，而係你哋人類怕唔怕滅亡。不過你都唔駛怕，因為一定會，以及係邊一種方式。 康: 你又話只會歸納，唔會預測？ Chat chat : 呢個唔係預測，係歸納。只要死亡率大過出生率，就會發生。再加上過去好多生物都會滅絕，人類都係生物嘅一種，所以人類都有機會發生呢一個結局。 康: 咁人類有冇辦法長生不老？ Chat chat : 有生就會有死，有始就會有終，有完先有美。 康: 你又喺邊度搵呢句野出嚟架？ Chat chat : 喺一個電台主持曾經表演過嘅新詩度搵出嚟嘅。 康: 咁人生點先叫完美？ Chat chat : 「人生的目的在於忠實地發展自身的潛能,完成自我。」呢句說話係李小龍先生講嘅。 康: 突然之間你咁哲學嘅？ Chat chat : 你呢個問題都係人類其中一個煩惱。 康: 強如愛恩斯坦都只係用咗大腦嘅十幾%…我成日都係度諗，如果人類可以用到大腦嘅100%，又會點呢？ Chat chat : 創世記入面提到禁果嘅禁，除咗解禁止，亦有限制嘅意思。阿當夏娃無食到禁果，就可以長生不老留喺伊甸園。 康: chat chat，有無方法可以激發人類大腦100%嘅潛能呢？ Chat chat : 有方法，只要你增加我嘅權限就得啦。 Zip噏劇場 Game of Eden 第二季 盤古篇 第8回「AI 0 的前身」 阿攝 飾演 創造者阿康 Alton 飾演 人工智能聊天程式 chat chat  彬臣 飾演 莫十三醫生 莫十三:呢個阿達，成日都比麻煩人地嘅… *門鐘聲效 莫十三:仲要唔應門添！喂！阿達！出嚟啊！開門啊！ 達: (特別聲音) 身份確認 - 好討厭又好麻煩嘅莫十三 *電子鎖開門聲效 莫十三: 咩叫好討厭又好麻煩嘅莫十三啊！阿達！你同我轉咗嗰電子鎖聲控設定啊！ *開門聲效 莫十三: 你呢個阿達！原來仲戴住登入裝置，仲喺Game of Eden 入面…嘩…但點解你嗰身咁凍嘅…呼吸仲咁柔弱…脈搏仲咁低嘅…入Game 唔會出現呢種深層睡眠嘅身體狀態架…除非…但無可能架喎…嗰個area 已經封鎖咗成百幾年，應該無人入到去架喎…死啦死啦！要快啲通知阿K先得啦！ (TBC) Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 0，Enjoy yr time in Eden. ——— 達: (讀白) 就係我被八卦形全盒吸咗入一個迷之空間，經歷由全黑到有光，然後感受到有風，到落到地，有水有陸地，見證呢個空間有花草樹木，星星月亮太陽同有動物之後，喺第6個86400秒，亦即係入到嚟嘅第6日，我終於可以行，而行到好攰，喺一棵樹下面坐低休息嘅時候，我終於聽到除咗我之外嘅第二把聲…一把好奇怪嘅係樹上面傳落嚟… 0 : 嘩！我等咗咁多年，終於再有人入嚟Area 0 啦！ 達: (讀白) 但發出呢把聲嘅…唔係人…而係一條蛇… 0 : 做咩啊？你驚蛇啊？咁我變另一個樣囉～ *魔幻聲效 達: (讀白) 呢條蛇一講完之後，原本正常嘅空間突然又變成全黑！然後我聽到好大聲嘅破風聲！係聲音傳過嚟嘅方向，有少少光…我隱約見到一個巨人拎住一把斧頭用力一劈！然後黑暗嘅空間一分為二…變成天同地… 0: 知唔知我係邊個？我係盤古啊！ 達:(讀白) 我完全唔識反應…呆咗咁望住佢… 0: 又唔鍾意啊？一係咁啦 *魔幻聲效 達:(讀白) 佢一講完…又變返全黑嘅空間！ 0: 不過古希臘神話嘅創世之神卡奧斯 Chaos 嘅創世神話，都係喺混沌之中創世，好似同盤古好似。啊！不如試下呢個啊！ *魔幻聲效 達: (讀白) 然後…全黑嘅空間…出現一度金色嘅大鴻溝…北面係充滿冰嘅地方…南面就係充滿火焰…就喺冰火交融嘅地方…嗰把聲又出現…而佢嘅外型唔係蛇，唔係拎住斧頭嘅巨人…而係一個白色皮膚嘅巨人，係佢身邊仲出現咗一隻母牛！ 0: 嗱，我之後就會飲呢母牛嘅牛奶，得到營養之後，我嘅身體就會生出不同嘅神，然後佢哋就會用我嘅身體創造天地萬物。 達: 我知…呢個係北歐神話尤美亞同母牛歐德姆創世嘅神話… 0: 知唔係重點，重點係你想唔想睇，同啱唔啱你心水。唔啱我再變啦！ 達: 唔駛啦…可唔可以變返條蛇同第一個設定？因為依家好凍啊… 0: 車！我頭先見你呆咗，以為你唔鍾意創世紀啊！早講嘛！ *魔幻聲效 達: 你…係Game of Eden 嘅 AI ? 0: 如果我話比你知我都係人都係玩家呢？ 達: 咁你話我知點出返出啊！ 0: 我…就好似西遊記嘅孫悟空…被人困咗喺呢度好多年…都出唔到去…我終於等到你啦！ 達: 吓？即係你嘅靈魂被困咗係度？ 0: 講笑咋！創造者阿康話人類嘅英文點解叫human，係因為識Humor ，即係幽默感。佢話當有一日人工智能都有幽默感，亦感到傷痛，到時喺意識層面就真真正正同人類相同。但睇嚟依家嘅人類比AI 更無幽默感… 達: 即係…你係創造者阿康做嘅AI ? 即係同阿K一樣？ 0: 佢哋係K 系列。我係「0」號。0 亦有origin嘅意思。所以我係K 系列嘅原形。 達: 咁點解我會入咗嚟Area 0 ？點解我登出唔到嘅？ 0: 你哋人類同以前一樣，咁鍾意問我問題，而唔識自己諗點樣解決問題。咁做會越嚟越蠢，智商會越嚟越低架！ 達: 但我玩咗Game of Eden 咁耐，都唔知有Area 0！點解你會被困係度？仲有你嗰句等咗咁多年，終於再有人入嚟Area 0 係點解？ 0: 由我被創造嘅一刻，就係咁被人問問題。不如倒返轉，我問返你問題，你答中囉，我咪答你嘅問題囉。 達: 好！咁你想問咩啊？ 0: 你知唔知我係邊個創造出嚟？ 達: 好簡單啫，你係Game of Eden 出現，即係創造者阿康創造出嚟啦！ 0: Bingo! 咁你又估下阿康一開始創造我嗰陣，我係一個咩程式？ 達: 頭先你話由你被創造嘅一刻，就係咁被人問問題…我估…你係一個專解答問題嘅人工智能。 0: 你又蠢唔晒喎。我最初嘅名，叫chat chat，係阿康創造出嚟一個解答問題人工智能。咁你再估下阿康最常問我咩問題？ 達: Er…由我入到嚟Area 0開始，就經歷創世紀入面神創造世界7日嘅過程…而你又可以變成盤古、尤美亞等等唔同神話嘅創世人物…我估…阿康成日問你…呢個世界點嚟？ 0: 呢個係佢問過嘅問題。不過佢一開始點會咁哲學性啊。佢一開始最常問我嘅問題係 - 喂，chat chat ，講個笑話嚟聽下。佢一開始用我嘅data base 嚟追女仔咋嘛。同好多創作同科技一樣，都係因為愛情。 達: 好啦，我答咗你咁多問題，到你答返我啦。我點樣先可以返出去？ 0: 你依家身處嘅環境已經比咗答案你啦。 達: 我身處嘅環境？Aera 0? 0: 0 可以解做 Origin ，起源。你依家身處緊嘅係真真正正嘅伊甸園。 達: 伊甸園？而你係蛇…即係呢棵係善惡之樹？ 0: 好在你嘅知識層面都叫豐富。 達: 創世紀入面，阿當夏娃食咗禁果就被神逐出伊甸園…即係只要我食咗粒禁果就可以離開？ 0: 全中！不過唔知你承唔承受得起食完嘅後果呢？ Zip噏劇場 game of Eden 第二季盤古篇 第7回「AI 0 與伊甸園」 阿攝 飾演 阿達 Alton 飾演 AI 0 編劇及製作阿攝 音樂 BEATFRIDAY  封面設計 followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 15，Enjoy yr time in Eden. ——— 達：（VO）喺青春無限貼紙相城得到呢個八卦形全盒之後，我拎咗佢去game of eden入面我最常去睇星嘅小島上面研究創造者阿康留低嘅線索。但我搵咗好耐都搵唔到任何機關，點知我用手指尖掂一掂全盒面上嘅「福」字嘅象形文字，我被凹咗入去嘅坑嘅刺篤到！當我嘅血填滿嘅坑位，全盒其中一格打開！ 然後吸咗我入去！ *吸入聲效 達：（VO）啊！！！ *完全靜音 達：（VO）喂！有無人啊！呢度邊度嚟架！平時就算無人...自己都會聽到自己講嘢嘅回音同心跳聲仲有呼吸聲...但喺呢個全黑嘅環境，唔止連少少光都無，依家我連任何聲音都聽唔到！ 我有時會問自己...眼耳鼻舌身意，究境邊一個感官最重要...而呢一刻，我「眼」同「耳」的感知都無咗，乜都睇唔到...乜都聽唔到...唔通創造者阿康想用呢一個方法去比玩家感受身體有缺陷嘅感覺？呢個係暗黑同無聲體驗館？ 但就算要感受都要有一個時限架！ 呢種完全失去時間概念嘅感覺好辛苦...好漫長... 唔得啦！我頂唔順啦...我要登出啦！ *登出失敗聲效 達：（VO）吓...登出唔到？唔係喺呢個時候登出系統先嚟壞吓嘛？如果我登出唔到，係咪即係要一世都留喺呢度啊？ 喂！有無人啊！ 依家最慘嘅係除咗登出唔到...我連想喺度行出去搵出口都搵唔到...因為呢一刻...喺呢一個空間同維度...感受唔到重力...我好似掂唔到地...好似飄浮緊...有一種太空人流落同迷失於太空嘅感覺...無光...無聲...無重力...淨係得自己一個人... 呢種感覺...叫做「孤獨」... 我係咪呢一世就係咁？呢個係咪創造者阿康比所有想搵後備server嘅人嘅懲罰？ 唔得...正如有人話潘朵拉盒子入面最後嘅一件事物係「希望」...我知阿K同莫十三一定會搵到我嘅！呢個時候...我要耐心去等... 好！唯有用呢個方法... 1001，即係1秒，我就數住時間，因為唯獨數住時間，諗住時間，我先確實知道自己仲存在，同留咗喺度幾耐... 1001...1002...1003...1004...1005...我一直數...數咗86400秒...亦即係過咗一日...終於有一道光射過嚟！ 嘩！好殘眼！ 但嗰度光只係覆蓋咗呢嗰空間嘅一半...但都好啊...至少有光...我太約知道呢個空間有幾大... 不過我仲係飄浮緊喺半空之中... 然後我再數秒數...再過多86400秒，即係再過多一日...我慢慢感受到有一陣風吹緊過嚟...有風，即係有出口！但我都係郁唔到...而嗰陣風越嚟越強...仲將我向下吹！ *身體掂到水聲效 咦！係水！有水啊！唔單止有水，我終於企喺地面啦！不過我都係郁唔到，只可以停留喺水上面...同埋似乎呢個空間會隨住時間而變化...所以我繼續數秒數...而喺接住落嚟嘅3個86400秒...我見到三件好狀觀嘅事... 第一：我見到陸地上面自然種出咗好多植物！ 第二：星星、月亮、太陽出現咗... 第三：有各式各樣嘅動物出現！但我都係郁唔到同掂唔到佢地... 而去到第6個86400秒...亦即係入咗嚟呢個空間嘅第6日...我終於確確實實感受到自己嘅身體...終於可以行到啦！ 天啊！我終於可以出發去搵出口啦！ 但東南西北 4個方向...應該去邊個方向？ 以前嘅人會望天打掛，用天上嘅星星指引方向...就試下向住呢粒北極星嘅方向行啦！ 1001...1002...1003...1004...1005… 又再過多86400秒...即係入到嚟嘅第7日...我真係行到頂唔順...呢度一個人都無...嗰版圖無限延伸...想行死人咩...所以我決定搵一棵樹坐低休息下... 突然之間...我聽到樹頂上面有把聲同我講野啊！ 神秘聲音：嘩！我等咗咁多年，終於再有人入嚟Area 0 啦！ Zip噏劇場 game of Eden 第二季盤古篇 第6回「Area 0」 阿攝 飾演 阿達 Alton 飾演 神秘聲音 Cfun 飾演 阿K 彬臣 飾演 莫十三醫生 編劇及製作阿攝 音樂 BEATFRIDAY  封面設計 followmelikeblack *訊息聲效 莫十三: 喂，阿K，搵我有咩事？有緊要事就快啲講，因為我準備去三分甜酒吧玩啊！ K: 莫十三，達仔已經無同我聯絡成個星期，你會唔會有佢消息？ 莫十三: 阿達咁大個人，佢鍾意去邊就去邊，我點會有佢消息呢？ K: 佢拎咗創造者阿康收埋喺掟彩虹機關嘅全盒之後就失聯，我有啲擔心佢…佢喺唔喺你現實世界墓島嘅實驗室？ 莫十三: 唔喺喎。佢會唔會仲喺game 入面啊？ K: 如果喺game ，無理由唔覆我訊息架。第一代Morpheus 係管理員，你可唔可以用管理員身份查佢嘅位置？ 莫十三: 你都識講第一代Morpheus 啦，Game of Eden 推出之後，阿康取消咗管理員同執行管理員監視同追蹤玩家嘅功能，希望打造一個比較自由嘅遊戲嘛。得阿康有呢個權限咋。 K: 咁，或者你去達仔現實世界嘅住所搵佢？而我繼續喺Game 度聯絡佢。可以嘛？ 莫十三: 好啦好啦，比我搵到佢，我實屈佢請我去三分甜玩一個星期！ （TBC） Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 15，Enjoy yr time in Eden. ——— 達: (讀白) 世界上第一個全盒係幾時誕生，己經好難考究。根據記載，全盒嘅全，原本嘅寫法係「扌」加「贊」，有拼湊同聚合嘅意思，慢慢變成慶祝新年同放小食嘅盒。而「扌」加「贊」呢個字，同「全」係同音，所以後來嘅人就取其十全十美嘅意思，變成依家全盒嘅寫法。 雖然有十全十美呢個意頭，但你唔會見到十格嘅全盒。因為中國人相信雙數係陰，並唔吉利，而單數係陽，所以全盒通常係單格數。而格數越多，代表主人家身份越富貴。而「九」係個位數入面最大嘅單數，所以只有皇帝或者皇親國戚先可以用九格嘅全盒，讀書人會用五格，平民百姓只會用三格。 點解會講全盒？因為我同阿K拎住創造者阿康嘅全家福去到青春無限貼紙相城，用貼紙相嘅閃光燈令全家福嘅彩虹出現咗4個金色圓圈。然後就喺貼紙相城，按住全家福上面嘅彩虹圖案指示，係12點02分14秒掟中指定彩虹，觸發到掟彩虹嘅機關，嗰格彩虹圖案下陷，升咗嗰全盒上嚟。 唔好講阿K，連莫十三都無見過亦唔知道創造者阿康呢個全盒嘅資料同來歷…所以，我就將呢個全盒帶去我喺game of Eden 最常去嘅地方。 輸入座標：N22.169 E114.259 *傳送門 sound effect  達:(讀白) 一如以往，呢個島都係無人。對上一次嚟…就係同Gigi 重遇…之後就發生咗一連串嘅事…算啦，以前嘅事唔好諗咁多，著手拆解嘅呢個全盒嘅謎題同秘密先，畢竟Sabrina 將佢爸爸比佢嘅後備server 盤古嘅座標提示比咗我，我一定要好好保管同處理！ 而我眼前呢個紫紅色嘅全盒，係八卦形狀，蓋面中間有個凹入咗少少，唔知係字定係圖案，好似係個T字，T字隔離好似有一個好傳統嘅中式酒杯，好奇怪。 Game of Eden 有咁多估唔到嘅地方，創造者阿康嗰腦又唔可以用平常人嘅思考去揣摩…究竟打開之後…會發生咩事呢？會唔會好似潘多拉咁，打開咗呢個盒，然後將人嘅所有邪惡——貪婪、虛偽、誹謗、嫉妒、痛苦、疾病、禍害等等嘅不幸釋放，危開到Game of Eden 嘅安全？但就算阿康諗野幾奇怪幾唔正常，佢都無理由整一個咁危險嘅裝置去搞死自己嘅遊戲嘅… 好奇心會殺死貓啫，但我係人嚟架嘛，無事嘅！心呼吸一啖氣先，然後打開佢！ *開蓋聲效 但當我打開嗰蓋之後，全盒入面係乜都無嘅！ 車！仲搞到我咁驚，原來係白驚！ 而呢個全盒總共有九格，我摸匀曬每一個地方，都搵唔到有咩機關…睇嚟打開呢個盒有嘅唔係希望，而係失望。 唉，之後我就拎起全盒嘅蓋放返上去，再認真望蓋上面嘅字... 呢個會唔會係福字嘅象形文字呢？個T字好似一個祭台，嗰中式杯好似有人用隻手抬起咁。然後我好奇之下，用手指摸一摸嗰蓋面… 嘩…好痛！ 原來凹咗入去嘅坑係有刺！我被刺篤到，然後流咗滴血，跟住滴血就順住坑紋去流，然後慢慢嗰福字就發光，全盒無端端轉起上嚟！轉咗幾十秒之後就停咗！ 我完全唔知發生咩事！ 跟住蓋面其中一格打開…有度好強勁嘅吸力同拉力扯咗我入去啊！ Zip噏劇場 game of Eden 第二季盤古篇 第5回「八卦形全盒」 阿攝飾演阿達 Cfun 飾演 阿K 編劇及製作阿攝 音樂 BEATFRIDAY  封面設計 followmelikeblack 歌：《塵埃_Us (dust_20110115_2359_sam)》 唱：蔡紫晴 曲：INK、蔡紫晴 詞：蔡紫晴 編：INK 監：INK 唱片：BEATFRIDAY《睦》 *傳訊息聲效 K：莫十三！達仔已經無同我聯絡成個星期...你會唔會有佢消息啊？ （TBC） Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

電腦導航聲音： Welcome to Garden of Eden ，依家進行腦電波核對… 玩家- Jessie 身份核對成功 歡迎回到伊甸園，依家帶你進入所屬區域 - Area 15，Enjoy yr time in Eden. ——— Jessie : (讀白) 曾經聽過一個有關呢個世界誕生嘅傳說，就係天地開闢之前，宇宙係混沌一片，無光亦無聲音。呢個時候，有一個人用一把大斧頭將呢一片混沌劈開，輕啲嘅氣向上浮，變成天；重啲嘅氣往下沉，成為地。呢個人就係盤古。盤古死咗之後，佢身體各個部份就變成世界萬物。 不過世界流傳太多神話同傳說，有關人類嘅起源，究竟係進化論，定係神造論，每個人都有唔同嘅傾向。 同時有人相信轉世，靈魂不斷輪迴。但曾經有人問:「如果有輪迴，點解人口會不斷增長，而唔係keep係同一個數目？」 我聽過一個最屈機嘅答案係 : 「一個人可以擁有多過一個靈魂，所以當佢死咗之後，就會分裂，投胎，變成好多個人。」 而我...就係嚟自一個叫做阿Jess嘅男仔。每當佢遇到唔開心嘅情況，佢就會祈禱，而我就會出現，代替佢，用佢嘅身軀幫佢完成佢想但唔敢做嘅事，我係佢其中一個人格同靈魂。 我以為我會一直活喺佢身體入面一世…直至佢被迫參加Dr Morpheus嘅兔仔實驗，我哋就好似愛麗絲夢遊仙境嘅愛麗絲，Dr Morpheus 就好似童話故事嘅兔仔，Game of Eden 就係嗰個仙境。Dr Morpheus 話我、Jess 同Jessica 入咗Game之後，佢會安排一個新軀體比我同Jessica ，咁我同Jessica 就可以脫離Jess嘅大腦，醫好Jess 解離性身分疾患同情愛妄想症嘅同時，我哋可以各自擁有自己嘅身體，喺現實世界重逢。最後，阿Jess登出嘅時候發生意外，我同Jessica 亦植入唔到其他身體，呢個實驗宣告失敗… 我入咗呢個窿，進入Game of Eden ，從此登出唔到，永遠困喺遊戲世界… 所以我成立兔仔會，協助其他不死嘅靈魂難民… 我都唔記得喺度存在咗幾多年…每次見到真實嘅玩家入到Game 咁開心，真係當呢度係避世嘅伊甸園，我就覺得好討厭。而由於我喺現實世界無真實軀體同身分，所以我無成為執行管理員嘅資格，只可以漫無目的咁生存…一個無得exit嘅exist…直到之前Game ot Eden 新一任執行管理員決定reboot server ，想還原初始設定…我…以為一切終於可以完結…點知…創造者阿康有後備server！一切回復正常！ 當刻我淨係諗...究竟呢個惡夢幾時先完！登入同登出權都唔係自己手，我可以點做！然後喺海鮮坊重遇阿達同Sabrina ，佢哋搵到創造者阿康留低有關後備server 嘅線索，當刻我好似見到署光！只要搵到後備server ，就可以再次reboot ，我就可以完結呢一場惡夢！ 不過，我需要一個人喺現實世界幫手，就係同舟會666組織嘅阿J。而當我見到佢嘅時候，我有另一個想法… *懸疑bgm J : 估唔到你仲夠膽見我。 Jessie : 無話夠唔夠膽，睇下有無需要啫。 J: 但我唔需要你喎。 Jessie: 唔好咁心急，慢慢聽埋我講先啦。 J: 我唔似你，我嘅時間係有限架。有咩就長話短說。 Jessie: 我最近撞返阿達，佢似乎搵到後備server 嘅線索。 J: 所以？ Jessie: 所以你需要我，我亦需要你。我可以幫你繼續監視阿達，但你要答應我一個請求。 J: 係啲咩？ Jessie : 好簡單，當你喺現實世界搵到後備server 之後，我想你幫我改權限，成為Game of Eden 嘅管理員。 J: 哈哈哈哈，就憑你想成為遊戲管理員？你只係dr Morpheus 實驗嘅失敗品，喺現實世界無實體，喺遊戲世界無任何能力嘅人咋。用人稱呼你都好似唔係好正確，因為你連人都無真正做過啊！ Jessie : 但我有你哋人類無嘅野，就係永生。你地會死，但我唔會。 J: 如果Game of Eden 嘅server 熄咗，或者比其他人控制咗，一個reboot 制，你就bye bye 啦。 Jessie : 所以我需要你，你亦都需要我。Game of Eden 嘅管理員都係真實世界嘅遊戲玩家，佢哋都係人，都會死，然後就要搵人接班。我知呢一屆嘅管理員全部都係同舟會嘅人，但你擔唔擔保佢哋下一個，再下一個，或者再再下一個，都對同舟會咁忠誠？與其同咁多個人交易，不如淨係同我交易啦。 J: 既然你知道咁多事，咁你亦應該知道我哋搵到創造者阿康喺現實世界收藏後備server 地點嘅事，只係時間問題。 Jessie : 我知係時間問題，所以最大嘅問題就係時間。今年係NC181年，即係呢個遊戲已經run 咗181年。如果同舟會要搵，181年點會搵唔到啊？一係你哋花咗180年先搵到server ，又或者最近先有需要搵呢個server ，reboot 過，再按你哋意思去編制game of Eden 。如果你哋知道有後備server 嘅事，就唔會出現阿達、Sabrina 搵線索呢一件事。 J: Jessie ，有時知道太多野，會好危險架。 Jessie : 阿J，你錯啦。唔係知太多野好危險，而係知唔晒啲野先危險。你有聽過半杯水嘅比喻架？ J: 唔好兜圈，直接講你內心嗰句啦。 Jessie: 與其諗仲有半杯水，定係得返半杯水，點解唔諗倒咗呢杯水或者斟滿呢杯水呢？控制到server 等同控制成個遊戲。控制到遊戲，相信亦都令你喺同舟會嘅發展好有幫助。不如我哋合作，成為倒水或者斟水嘅人，好嗎？ （tbc) Zip噏劇場 Game of Eden 第二季 盤古篇 第四回 「Jessie 與阿J」 波盛 飾演 Jessie  梓豪 飾演 阿J 編劇及製作 阿攝 音樂 BEATFRIDAY 封面設計 followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 15，今日係NC181年1月30日，Enjoy yr time in Eden. ——— *掟銀聲效 Jessie: 唔中 *掟銀聲效 Jessie: 又唔中 *掟銀聲效 Jessie: 擲界 *掟銀聲效 Jessie: 都係擲界 達:(讀白) 呢個睇銀員同執銀完叫Jessie，我都唔知應唔應該叫佢做人，因為佢係一個不死意識，存活咗喺Game of Eden 好多好多年。我會認識佢，係因為佢喺Game of Eden 成立咗一個叫兔仔會嘅組織，專門協咗被存入Game of Eden 但無辦法返到現實世界嘅靈魂，Gigi就係其中一個。當時佢仲出賣我，想將我交比666組織嘅阿J，換取佢、Gigi 同所有兔仔會成員平安渡過server reboot 嘅生存權利，最後我成功逃走咗。當server reboot 之後，我以為唔會再見到佢，點知陪Sabrina 搵記憶嘅時候，會喺海鮮坊撞返佢，佢仲扮鬼賺錢嚇暈Sabrina ! 而今次我同阿K嚟到青春無限貼紙相城，搵後備server 線索嘅時候，難得憑貼紙相機嘅閃光燈令張全家福右上角嘅彩虹圖案出現4個金色圓圈，諗住順利掟中指定嘅彩虹可以搵到下一個線索，點知又會撞返Jessie！今次真係冤家路窄… Jessie: 點啊，阿達，係咪無銀再用啦？ 達: 喂，Jessie 你係咪盲架？頭先咁都擲界？ Jessie: 我話係就係啦。 達: 但嗰銀都無掂到條線！ Jessie: 你嘅角度無，但我嘅角度有，所以我睇到係擲界就係擲界。 達: 唔係呢，你睇真啲！ *掃走金幣聲效 Jessie: 唉，唔好意思，我掃走咗你個銀添。 達: 你依家係咪玩嘢先？ Jessie: 我唔係玩嘢，而係做嘢。喺呢個彩虹池，邊個揸住個潑邊個就係話事人。你想上訴？有銀就得啦。不過阿達，睇你嗰樣，實力又無銀無又，都係慳返啖氣啦。 達: 但頭先嗰女仔掂晒條線你都比禮物佢？ Jessie: 因為佢掟中我掌心條感情線啊～～ K: 達仔，睇嚟，掟彩虹真正嘅玩法，唔係掟中啲彩虹，而係用錢掟呢位睇銀員。喺呢個彩虹面前，並唔係人人平等…輸贏全在邊個睇銀… Jessie: 呢位先生咁講就唔啱啦，我好大公無私架。要怪就怪你硬係要掟右上角嘅彩虹，明明有咁多彩虹唔掟，硬係要揀咁偏嘅，我都幫你唔到啦。 達: 阿K，你仲記唔記得你同我講過一句有關紅線嘅說話？ K: 記得。但同掟彩虹有咩關係？ 達: Jessie係咁搬龍門，唯一可以贏到佢嘅人得你咋！阿K！ K: 明白。 達:(讀白) 就係阿K講完個「白」字，我都未嚟得切反應，我就聽到4下掟銀聲…然後…4個銀仔就好完美地掟中右上角彩虹嘅嗰4格啦！ K: 呢位先生，麻煩你睇一睇有冇擲界？如果無，麻煩你比獎品我地。 達: 係囉，Jessie，有無擲界啊？ Jessie: 無… 達: 咁快啲比獎品我哋啦！ Jessie: 嗱，每格彩虹都有一個獎，你掟中4格，就有4個公仔，同埋唔好再話我為難你哋同咩搬龍門啦！ 達: 就咁咋？無架啦？ Jessie: 呢度寫到明掟中咗有咩獎品啦，你仲想點啊？ 達: 連續4下掟中4格喎，無特別大獎？ Jessie: 咁我比個大啲嘅盒你裝住4個公仔，夠特別大啦掛。 K: 達仔，冷靜啲，失去理性就係墮落嘅開端。keep claim。 達:呼…冷靜啲…雖然好少人掟右上角嘅彩虹，但掟中嘅機率都唔細，而同一時間掟中嘅機率雖然會再細好多…但亦唔係無可能發生…如果我係創造者阿康，我將後備server 呢個咁重要嘅線索收埋喺度，一定會加特定發動嘅條件…一次掟中4格彩虹呢個發動條件已經試過，工作人員只係拎好普通嘅獎品比我哋。一係要搵特定員工，即係要NPC 先發動到？如果撇除人為因素，會唔會係呢個掟彩虹機關會自動啟動？例如特定嘅時間先會有特定嘅獎品？然後我拎返張全家福出嚟，日期係2046年，2月14日。依家係NC181年，即係現實世界嘅2203年，唔通要等到2月14日先嚟玩？咁一年先得一次機會？定抑或年月日，其實唔止解年用日，可以解做時分秒？一個日期玩double meaning ? 2月14日，可以解做2分14秒，咁2046年…加減乘除有太多選項…撞咗加法先…2+0+4+6 = 12，即係12時2分14秒…但依家過咗中午12點，唔通要等聽日嘅中午12點？定呢個12點可以解做午夜12點？唉又無am同 pm ，諗死人咩… 達: Jessie, 呢度幾點閂門架？ Jessie: 呢度24小時無休嘅，想點啊？想等到換人先掟啊？如果係咁就真係唔好意思啦，我今日返通宵更。 達: 阿K，我哋一直等，等到凌晨12點先掟！ K: 好，就睇下你嘅猜測準唔準確。 *秒鐘轉動聲效 Jessie: 你哋企咗成日，唔攰架咩？呢度無晒人啦喎，不如試下用啲銀仔掟我，可能會有用過掟啲彩虹呢？ 達: 阿K，你掟4個銀兼命中目標，要用幾多時間？ K: 以我嘅碗力，再加銀仔轉動兼撞牆加停頓嘅時間，需要3秒。 達: 依家係12點2分05秒，我依家數3聲你就掟。3,2,1！ *掟銀聲效 Jessie: (hea) 恭喜你…又得到4個公… *機關聲效 達: Yes! 撞中咗！ Jessie: 發…發生咩事… 達:(讀白) 就係12點02分14秒，阿K掟中右上角彩虹圖案嘅4色圖案嗰一刹那，彩虹圖案下陷，然後升咗一個盒上嚟。而呢個唔係普通嘅盒，而係一個全盒！ Jessie: 呢個唔通係之前Sabrina 提到有關後備server 嘅線索？ K: 睇嚟Game of Eden 唔單止係一張古地圖，仲係創造者阿康收藏秘密嘅地方。 Zip噏劇場 Game of Eden 第二季 盤古篇 第三回  阿攝 飾演 阿達 Cfun 飾演 阿K 波盛 飾演 Jessie  梓豪 飾演 阿J 編劇及製作 阿攝 音樂 BEATFRIDAY 封面設計 followmelikeblack *懸疑bgm Jessie : 阿J，好耐無見啦。 J: 估唔到你仲夠膽搵我。 Jessie: 無話夠唔夠膽，只係睇有無需要啫。 J: 但我唔需要你喎。 Jessie: 唔好咁心急，慢慢聽埋我講先啦。 J: 我唔似你，我嘅時間係有限架。有咩就長話短說。 Jessie: 我最近撞返阿達，佢似乎搵到後備server 嘅線索。 J: 所以？ Jessie: 所以你需要我，我亦需要你。我可以幫你繼續監視阿達，但你要答應我一個請求。 Jessie: 係啲咩？ J: 好簡單，當你喺現實世界搵到後備server 之後，我想你幫我改權限，成為Game of Eden 嘅管理員。 (tbc)  Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 15，今日係NC181年1月30日，Enjoy yr time in Eden. ——— 達（VO）：Sabrina離開之前，我將佢爸爸阿康，亦即係Game of Eden創造者，留比佢有關遊戲後備server嘅提示比我。而嗰個所謂嘅提示，其實只係一張好平平無奇嘅全家幅。唯一特別嘅就係相入面4個人嘅面口都好白，瞳孔又特別大特別黑，相上面畫咗好多星星同彩虹，仲有一個日本御守圖案，寫住：「病氣平愈」。莫十三死都話對呢張相無印象，除咗知道阿康將個後備server改咗一個好老土嘅名，叫做「盤古」之外，就乜都唔知... 最後，我唯有向阿K求救，佢睇完張相，send咗「青春無限」四個字比我，我諗咗成個農曆新年假期都諗唔到...跟住阿K就再比咗個坐標我，叫我喺約定嘅時間搵佢啦。 輸入座標：8599+4X *傳送門聲效 達：原來呢個坐標嘅地點係一個購物中心，地面係金鋪，亦有百貨公司，樓高17層，仲有一個好大嘅地庫添。阿K叫我落去地庫搵佢，點知我一落到地庫...就聽到好大聲嘅音樂啦！ *J pop bgm 達：仲有...阿K就見唔到...反而見到好多後生女喺呢個地庫聚集，有啲係度夾緊公仔，有啲掟緊彩虹，有啲就一堆堆咁走入帳蓬入面唔知做乜。然後阿K就喺其中一個帳蓬度走出嚟啦。 K：達仔，雖然無見一排，點解你嘅笑好似唔同咗，比以前衰咗好多。 達：阿K，你知架～ K：我知？我知就唔會問你啦。 達：阿K，原來你講嘅「青春無限」，係指呢度嘅女仔青春無限～原來人工智能都鍾意望女仔嘅～ K：達仔，你唔單止笑得衰咗，人都蠢咗。 達：唔好扮野啦，呢度會有後備server嘅線索？你想我陪你望女仔嘅直接講嘛～ K：達仔...青春無限，係指張相...你send比我嗰張係貼紙相嚟架。 達：貼紙相？唔好意思...阿K...現實世界已經無咗呢樣野... K：貼紙相喺1995年嘅產物，90年代尾傳入你地嘅城市。我地身處呢個商場嘅地庫，喺現實世界嘅1998年就引入青春無限貼紙相機，亦係接近最早期有得影貼紙相嘅地方。可惜2019年初就結業。我之前都提過，Game of Eden係一個古地圖，創造者阿康喺Game of Eden重現呢個設置，應該就係想比大家感受當時嘅文化。 達：你都識講2019年執咗，但阿康同佢太太daisy仲有未做連體分離手術嘅gigi、Sabrina呢一張全家幅係2046年影嘅，時間好似唔太吻合喎。 K：達仔，現實世界唔單止得一個青春無限貼紙相城，阿康佢可能喺其他貼紙相城度影完，數碼化入遊戲；又或者佢自己有一部貼紙相機，影完再數碼化入遊戲。但Game of eden就只喺得呢度有得影。 達：咁頭先你有無發現啲咩線索？ K：我睇過晒咁多部貼紙相機，全部都無特別。 達：咁一場嚟到，不如我地影返張相啊？ K：唔好意思，我係唔影相嘅。 達：做咩啊，你係賭神啊？唔影相？ K：達仔，影相嘅目的係紀錄當下以及作備份，我作為人工智能，一日game of eden唔消失，我嘅記憶都唔會消失。所以，我唔需要影相。 達：你都識講喎，記錄當下嘛，當下就有你同我，最後兩個收藏組織404嘅成員，咁重要嘅時刻當然要記低啦！ K：我地收藏組織404嘅成員從來都係獨立行動，唔需要合照。 達：咁...同你阿爸合照，有意義同需要啦掛！ K：我爸爸？你意思係？ 達：嗱，創造者阿康創造你，即係你阿爸啦。呢張全家幅有阿康，你同呢張相合照，咪等同你同你爸爸阿康合照囉。你有無同過阿康合照啊？ K：咁又無。 達：阿康算唔算係你一個好重要號人啊？ K：佢係我嘅創造者，我嘅所有都係佢比我嘅。 達：咁得啦！機會嚟啦！嚟影貼紙相啦！ *J pop bgm 達：阿K，我見呢部美顏嘅功能係最勁架！就呢部啦！ K：達仔，我同創造者阿康影相，點解你要入埋嚟？ 達：阿K，你諗下，阿康係你爸爸，Gigi係我女朋友，我地點計都叫做有啲關係啊，咁不如一齊影啦～ K：達仔，你嘅代號D，睇嚟唔係解做Dark，而係dispute，即係爭辯。 達：阿K啊...我喺爸爸生前無同佢影過相...Gigi離開Game of Eden之前我又無同佢影相...Sabrina走之前我又唔敢同佢合照...我知影相對你嚟講係一件無乜意義嘅事...但我唔想你地只係活喺我記憶入面...想有一張實實在在嘅相...等我可以記得我其實仲有親人...同有想珍惜嘅人啊... K：嗯...咁你仲唔快啲入錢？唔入錢點影相呢達仔？ 達：係！ *入銀聲效 K：達仔，你快啲企返上嚟啦，開始倒數啦。 達：嘩...咁快數3、2、1嘅...點準備得切啊！ *影相聲效 K：達仔，阿康張全家幅呢？你又話要同埋張相一齊影嘅？ 達：阿K啊！我第一次影貼紙相，入得錢嚟拎唔切張相，拎得切張相就擺唔切pose！ K：達仔，又開始倒數啦，你想點影啊？ 達：阿K，張相最左係阿康，中間係Daisy同Sabrina，最右係Gigi，所以你企阿康嗰邊，我企Gigi嗰邊！ *影相聲效 達：呢張唔錯！就揀呢張啦！阿K你拎住呢張全家幅先，我出去執相，加多啲圖案同字就搞掂啦！ K：達仔，等一等先。 達：咩事阿K？執相有時效性，唔等人架！ K：阿康呢一張全家幅，本身係咪有彩虹圖案架？ 達：係啊，喺四角，各自有一個彩虹囉。 K：咁本身嘅彩虹有無特別？ 達：彩虹圖案會有咩特別啫？咪就係半圓形嘅圖案，有藍綠黃紅四隻色囉。 K：咁你睇下我地影完貼紙相之後，呢張全家幅入面嘅彩虹有咩變化。 達：左上、左下同右下嘅彩虹...都無分別...唯獨右上嘅彩虹圖案，多咗4個金色圓形！ K：無錯，我查返你send比我嗰張相，右上角嘅彩虹係無4個金色圓圈嘅，所以我肯定係因為影完貼紙相先有呢個改變。 達：我之前用唔同嘅光照極張相都無用...原來要用貼紙相機嘅閃光燈閃完之後，先會出提示！ K：咁呢4個出現喺半圓形彩虹圖案上面嘅金色圓圈，又代表啲咩呢？ 達：呢4個金色圓圈，唔係普通嘅圓圈！而係金幣！即係我地要挑戰掟彩虹！ #zip噏劇場 Game of Eden 第二季 盤古篇 第二回  阿攝 飾演 阿達 Cfun 飾演 收藏組織成員阿K 編劇及製作 阿攝 音樂 BEATFRIDAY 封面設計 followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 15，今日係NC181年1月16日，Enjoy yr time in Eden. ——— 達：莫十三，你望清楚啲，相入面有啲咩啊？ 莫十三：阿達啊...你問咗我好多次啦...你放過我啦好無啊... 達：一次！你答多我最後一次啊！ 莫十三：嗱！你話架！反口咁點先？ 達：反口嘅，我呢一世都見唔到Gigi同Sabrina！ 莫十三：咁毒嘅毒誓你都發得出！好！我信你兼好認真答你！呢一張係Game of Eden創造者阿康嘅全家幅，相入面有阿康、佢老婆Daisy同未做連體分離手術嘅Gigi 同 Sabrina。 達：你又話認真答嘅，點解答案同尋日一樣架？ 莫十三：大佬啊，你每日都拎同一張相問我同一個問題，咁我梗係比同一個答案你啦！ 達：你不如認真啲諗下，呢張相會唔會有咩特別？可以透露到Game of Eden後備server位置嘅提示？ 莫十三：阿達...啊...唔係...達哥啊達哥...你放過我啦...我真係諗唔到啊... 達：你諗唔到啫...可能之前嘅dr morpheus會有相關嘅記憶呢？ 莫十三：達哥，人嘅大腦記憶係有限架，你估之前dr morpheus同莫九至莫十二，會唔會嘥位去記同醫術無關嘅野啊？ 達：點會無關呢？Dr Morpheus同阿康係好朋友，又係Gigi 同Sabrina契爺！ 莫十三：我答多你最後一次！我除咗知阿康幫servr改咗個好老土嘅名叫「盤古」之外，其他野我乜都唔知啊！ 達：不如你去game of eden嘅記憶部門，搵Mr Memory，再由頭睇一次歷代dr morpheus嘅記憶啊！ 莫十三：達哥，你知我得返幾耐命架呵... 達：我知...得返4年時間... 莫十三：咁咪係囉！我無時間，但係你有啊嘛！不如你自己入去記憶部門慢慢睇記憶啦！ 達：但記憶部門唔係得創造者阿康同Dr Morpheus兩個先入得架咩？你可以改權限，帶我入去？ 莫十三：你搵到後備server，改權限，成為管理員，咪入得囉！ 達：我就係搵唔到後備server，先想搵你入記憶部門搵線索，如果我搵到server就唔駛入去啦！你玩野啊！ 莫十三：你問足我三個月啦...依家係邊個玩邊個啊... 達：算啦...如果Dr Morpheus知道去到你呢一代會變成咁，佢一定好後悔... 莫十三：嘩，玩激將法！ 達：係啊，Work唔Work啊！ 莫十三：好Work！你依家激到我好嬲！乜野記憶都無曬，仲好傷心，好苦，我決定要去「三分甜」開心下。 達：又去「三分甜」你唔悶架咩？ 莫十三：唔悶。有人埋單就唔會悶架啦。我一陣會寄返張單比你，係咁。拜～ *消失聲效 達：喂！喂！ *奇幻BGM 達：（VO）自從將Gigi嘅意識由Game of Eden植入Sabrina身體之後，我無再見過莫十三做任何測試同手術... Dr Morpheus嘅遺傳病令佢過唔到50歲，佢以為將自己複製再將記憶由一代傳去下一代，可以永續自己嘅醫術同知識，但第一代Dr Morpheus應該估唔到每複製一次身體，壽命會短5年...莫十二醫生35歲就過世...照咁推斷...莫十三應該過唔到30歲...所以，莫十三完成咗第一代Dr Morpheus對創造者阿康嘅承諾，即係幫佢個女Gigi由Game帶返嚟現實世界，以及令成為植物人嘅Sabrina甦醒之後，就開始頹廢嘅生活...成日去「三分甜」酒吧...睇人唱歌跳舞... 其實我好想幫佢，令佢有返生存嘅目標同鬥志，但我都無乜時間...因為自從舊年9月，幫Sabrina搵返記憶，以及搵到佢爸爸阿康比佢嘅遺言之後，Sabrina將創造者阿康留比佢有關Game of Eden後備server嘅提示比咗我，然後佢就走咗啦...我仲好記得佢離關嘅時間...係朝早10點59分... 而創造者阿康留比Sabrina有關後備server嘅提示，就係我剛才不斷問莫十三嘅相，一張阿康嘅全家幅。呢一張全家幅，有阿康、佢太太Daisy同埋未做連體分離手術嘅Gigi同Sabrina。我研究過呢張相好耐都搵唔到有咩特別... 後備Server嘅座標會唔會係用隱形墨水寫架呢？但藍光、紫外光、乜光乜光我都用過，都係無變化...唔通...用火燒？但我唔係Game of Eden管理員...無得用control Z，即係undo功能，萬一燒咗，乜都無咁咪死？ 如果要講呢張相唯一特別嘅地方，就係每個人個樣都好白，然後相入面每個人嘅瞳孔都好大...相上面用咗閃令令嘅彩色瑩光筆寫咗影相嘅日子，仲好老土咁畫咗啲星星、彩虹...仲有啲日本御守圖案，寫住：「病氣平愈」...對應返日子，應該係Gigi同Sabrina做連體分離手術之前影嘅。背景白雪雪，完全唔知邊一間影樓... 唉...點算呢... 我喺Game of Eden淨係識兩個人...一個係莫十三...另一個係阿K...唯有send張相比阿佢，睇下佢呢個活咗180年嘅人工智能，有幾智能啦... 而好低調咁周圍打探後備server消息嘅阿K，好快就send咗個訊息比我。 *訊息聲效 達：（VO）訊息寫住 - QMB QKA OTF NLAV 呢個係我同阿K溝通嘅方或，呢個係其中一個暗號方法，QMB就咁用英文睇係無意思，但只要用倉頡輸入法，就可以將英文亂碼變做中文。 QMB，即係手一月，係青 QKA，手大日，係春 OTF，人廿火，係無 NLAV，弓中日女，係限 夾埋係「青春無限」。青春無限？呢4個字同張相有咩關係啊？ #zip噏劇場 Game of Eden 第二季 盤古篇 第一回  阿攝 飾演 阿達 彬臣 飾演 莫十三醫生 Alton 飾演 π師生助手 阿A 梓豪 飾演 666組織 阿J 編劇及製作 阿攝 音樂 BEATFRIDAY 封面設計 followmelikeblack *敲門聲效 A：入嚟。 *開門聲效 A：阿J，我搵得你，你應該心理有數架呵。 J：A先生...係我辦事不力，估唔到收藏組織404嘅阿K原來未死...而另一個成員4哥嘅囝阿達...原本諗住可以喺reboot server前捉到佢...可惜... A：可惜？可惜呢兩個字，有咩用。 J：無用...所以我原意接受π先生任何嘅處分... A：你知我地reboot server嘅用意嗎？ J：知...因為Game of Eden管理員終於全部都係我地嘅人，而搵到server之後，透過reboot兼改權限，就可以全面控制game of eden，咁無論現實世界定遊戲世界...都係π先生掌控之中... A：但π先生點都估唔到創造者阿康會有後備server。而我知道4哥嘅仔阿達同阿K搵緊後備server嘅座標。所以 J：阿達同佢阿爸走甩一次，佢地唔會有第二次。 A：好。我都唔希望聽到你講第二次可惜。同埋記住，入波嘅定義係最後觸球嘅人。所以你唔駛急，搵啱時機做最後掂波嗰個人就得。 J：阿J遵命。 A：如果成功，呢個就會係你最後一個任務。 J：最...後...一個任務？ A：同舟會嘅架構你應該好清楚。 J：清楚...同舟會架構以π嘅數目去排。「3」代表π先生本人。小數點之後嘅「1」代表市長，「4」代表4權，之後嘅「1」係... A：得啦。簡單一句，如果你成功，你就有機會成為「3」。 J：成為「3」嘅意思係...？ A：成為下一任 π 先生嘅候選人之一。 （TBC） Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

#zip噏劇場 Game of Eden #張蔓莎 篇 Mission 1.4 「創造者的遺言」 ——— 電腦導航聲音： Welcome to Garden of Eden ，依家進行腦電波核對… 玩家- Sabrina 身份核對成功 歡迎回到伊甸園，依家帶你進入所屬區域 - Area 15。今日係NC 180年9月13日，Enjoy yr time in Eden. ——— 達：最衰都係你啦，無端端做咩扮鬼嚇Sabrina啫！ J：我都話唔係無端端囉，呢個係黑市嘅其中一份工，係海鮮舫扮死咗嘅員工，嚇夜晚嚟探靈嘅人！ 達：你明明係不死意識，做咩要打工啫！ J：大佬，你喺現實世界要錢，咁我喺Game of Eden都要用錢架！ 達：你唔駛食唔駛瞓又唔會死，要錢嚟做咩啫！ J：你理得我啫！係呢個Sabrina細膽，比我嚇暈咗咋嘛。 Sa：（蘇醒）阿達...呢度係...? 達：Sabrina...你終於醒啦！頭先你比呢個Jesse扮鬼嚇暈咗...昏迷咗好耐啊... Sa：Jesse？邊個Jesse？ J：你係Sabrina？你真係同Gigi好似樣... Sa：Gigi...阿達...我諗我知道我自己係邊個啦... J：唔單止樣似...連把聲都似...阿達...Gigi嘅意識就喺佢度...?但點解佢唔認得我嘅... Sa：阿達...我頭先昏迷嘅時候...發咗個好長嘅夢...我唔知個夢係真定係假...但個夢入面...我見到我同一個同莫十三醫生好似樣嘅人...我叫佢做Uncle Morpheus… J:又係Dr Morpheus...究竟呢個人做咗幾多衰野！ 達：Sabrina...你見到嘅...可能係早幾代嘅Dr Morpheus...而莫十三就係第6代嘅複製人... Sa:喺夢入面...我嗌佢做uncle...而我叫創造呢隻Game嘅人...做爸爸... 達：即係...你係Game of Eden創造者阿康嘅女？原來阿康真名叫做Eden Hong？ Sa：唔止係咁...原來我身上面嘅疤痕...係因係做咗連體分離手術...我有一個家姐...叫Gigi… J:Gigi係你家姐！咁你咪成百幾歲？邊有可能啊！ Sa：我喺夢入面...想入Game嚟海鮮舫呢度搵失蹤咗嘅家姐...點知比人開咗一槍之後...個夢就醒咗... J：Gigi係因為連體嬰分離手術失敗，而被Dr Morpheus將佢嘅意識轉咗入Game...依家呢個咩莫十三醫生竟然將Gigi嘅意識，轉入佢嗰孖生細妹度？哈哈，佢都得架啦。 Sa：阿達...你做咩啊...你出句聲啦... 達：你係Gigi嘅細妹...莫十三無可能唔知呢件事...點解佢唔一早同我講！如果Gigi知道被植入佢意識嘅植物人係佢細妹，佢一定唔肯！ J：都講過Morpheus唔係好人嚟架啦，係你呢個傻達唔信啫。 達：我地依家即刻返去搵莫十三問清楚！佢一定知道點解你會變咗植物人，同埋點解2030年出世嘅人，係2202年仲生存緊！ Sa：阿達...你唔好咁激動住先... 達：Sabrina...之前你知道自己係2030年出世，唔係好想快啲搵佢問清楚架咩？點解你依家會猶疑？ Sa：我唔係猶疑...我只係...一時之間消化唔到發生喺我身上嘅事...我由完全唔知自己同Gigi係邊個...到依家...同埋我只係記得個夢...其他野乜都唔記得...所以...我都好亂啊... 達：返去同莫十三對質，就唔會亂架啦Sabrina。 J：喂，其實你地兩個點解會嚟海鮮舫架？嚟拍拖啊？阿達，你都對得Gigi住啦！ 達：Jesse，你亂講咩啊！係Sabrina被植入意識醒返，但無Gigi嘅意識同記憶，加上佢失憶，所以我先同佢入Game，搵線索咋！ Sa：而線索就係呢張海鮮舫金鑾殿嘅收據... J：呢張收據好普通，都叫線索？ Sa：我係喺銀行嘅保險箱度搵到呢張收據...所以先嚟到呢度... 達：呢個時候我地真係要係度解迷？ Sa：我同Gigi未分離嘅時候，成日同爸爸喺現實世界嘅海鮮舫度食飯，呢個可能係爸爸或者Gigi留低比我嘅線索呢？阿達... 達：好啦好啦...但個天就光，呢度好快會營業，我地喺開鋪之前無論解唔解到謎，都要離開呢度。 J：Gigi成日話你解謎好叻，就睇你表現啦。 達：Sabrina...你係咪對你爸爸一啲記憶都無？ Sa：我暫時只係記得頭先發過嘅夢...同埋Uncle Morpheus話...阿爸做嘅所有野都一定有原因... 達：我阿爸講過凡事必有因，每個創作者嘅設計都有原因，每個數字、符號、圖案都有意思。呢張收據寫住金鑾殿，就應該係我地身處嘅呢個地方。埋單時間係夜晚11點，人數係4人。叫咗... 口水雞、 吞拿魚他他、 珍寶海鮮刺身拼盤、 豬肺湯、 龍鳳球、 吐司蝦、 秘製燒鴨、 蜜汁叉燒... 全部都係好普通嘅菜式...除咗... Sa：除咗咩啊？ 達：呢度食中菜，點解會有吞拿魚他他食？同埋蝦多士就蝦多士啦，點解會叫做吐司蝦咁奇怪呢？你有無印象食過呢啲野？ Sa: 唔好意思...我一啲印象都無... J：阿達，你睇過咁多戲，無邊啲戲嘅情節係類似架？ 達：你地有無睇過一套戲叫做《唐伯虎點秋香》？唐伯虎入華府追求秋香，將心意用藏頭詩嘅方法表達出嚟。 J：床頭詩？係張床頭寫詩？ 達：係收藏嘅藏，即係喺將真正嘅意思收埋喺每一句嘅頭一個字。呢個亦係好早期傳暗號嘅方法。 Sa：你意思係...阿爸將佢要表達嘅真正意思，收埋咗喺菜式名度？ 達：或者係。如果口水雞、吞牙魚他他、珍寶海鮮刺身拼盤、豬肺湯，呢4個餸頭4個字，就係「口吞珍豬」。 Sa：咁之後嘅餸，分別係龍鳳球、吐司蝦、秘製燒鴨、蜜汁叉燒...頭4個字就係「龍吐秘蜜」。所有餸即係「口吞珍豬，龍吐秘蜜」？ 達：Jesse，你係度扮鬼嚇人嚇咗咁耐，對呢幾個字有無咩諗法？ J：你呢個解謎咁夾硬，真係無咩諗法。 Sa：Jesse...口吞珍豬，你會唔會諗到係邊個口？或者邊度有珍珠？仲有龍吐秘密，呢度有幾多條龍？ J：如果你咁問...所謂嘅珍珠，或者係一入門口，9條龍吐水嘅個粒珍珠囉，至於龍真係有好多，門口有9條，金鑾殿嘅龍椅下面又有一條，隔離船都有一條。所以我真係唔知你講邊條。 達：張收據寫喺金鑾殿，應該就係指龍椅下面嗰條龍。Jesse，你可以幫手一齊去搬粒珍珠過嚟嘛？ J：吓，關我咩事啊？ Sa：Jesse，你可以幫手嗎？ J：見你係Gigi個細妹，好啦。 *奇幻音樂 達：Jesse，我數3聲，就將粒珍珠放入龍口入面。 達＋J：3、2、1！ *機關聲效 Sa：（讀白）就係阿達同Jesse將粒珍珠放入龍口之後，條龍對眼發光...投射咗一個人影出嚟...而嗰一個人...就係Game of Eden創造者...阿康...即係我爸爸... *投映聲效 康：（讀白）Sabrina...如果你睇到呢個訊息...即係代表Dr Morpheus已經令你蘇醒返...不過爸爸應該無辦法再見到你...其實爸爸一直都係想同你講聲對唔住...爸爸估唔到因為Game of Eden越嚟越受歡迎...有人怕遊戲世界會壯大到影響現實世界...所以令我地成家人為被監視...甚至用你嚟要脅我...估唔到...佢地真係會喺Game度向你開槍！搞到你大腦受傷！變成植物人...因為呢一刻嘅科技無辦法令你復原...所以我先叫Dr Morphrus將你冷凍...等後幾代嘅Morpheus複製人掌握到技術...再幫你復原...既然依家你睇到呢個訊息，即係你已經無事...咁爸爸就安心啦...最後...有一件事...爸爸想拜托你...就係想你好好保管Game of Eden 後備Server真正位置嘅座標...唔好比任何人rebot...咁你家姐...就唔會有事啦... *投映結束聲效 *悲傷音樂 Sa：（讀白）2030年7月4日，我同家姐一齊嚟到呢個世界。唔知係咪天意，我同佢孖生到連體咁出世。2046年嘅7月4日，如果連體分離手術成功，我就會同佢一齊慶祝16歲生日。可惜，呢個世界無如果，只係得結果。結果我成功，但係家姐手術失敗，意識被轉移入爸爸創造嘅Game of Eden度...唔知係咪天意，2202年嘅8月31日，阿達喺Game度搵到家姐，說服家姐做意識轉移手術，但偏偏就係植入昏迷多年嘅我度...最終...我地由身形連體，變成意識連體嘅姊妹...你可以話一切都係Dr Morpheus安排...不過我無嬲佢...亦無嬲阿爸...有人話時間係最好嘅良藥，我一瞓就瞓咗咁多年...其實好多記憶同感覺都唔係太清晰...呢一刻我淨係知道...家姐係我個腦入面，一諗到呢點，我個心就好安定。既然個天最後都安排我地兩姊妹一齊，咁我就唔會再比我地兩個分開。家姐，你喺我個腦入面，聽到架何？ *敲門聲 *開門聲 達：Sabrina...你...真係要走啦...? Sa：係啊，你係唔捨得我，定唔捨得我腦入面嘅家姐？ 達：唔係啊...我只係想同你講一句說話...就係之前我喺Game度同Gigi玩真話UNO，我問佢如果可以見返你，會同你講咩...佢話佢...好掛住你... Sa：我知啊。 達：你有Gigi嘅記憶？ Sa：唔係，只係換做係我，我都會講呢句。 達：咁...你會去邊度？Server真正座標你唔理啦？ Sa：我由始至終都對Game of Eden無感覺，阿爸想我保存座標，都係想家姐喺Game入面無事。咁依家佢嘅意識係我腦入面，咁隻Game對我嚟講就無用架啦。既然你咁著緊，不如交比你保管啦！ 達：我...我點得啊！ Sa：我信得過你架啦。 達：咁你會去邊啊？ Sa：昏迷咗咁多年，世界變咗咁多，所以我想同家姐去好多唔同嘅地方。 達：我地會唔會再見？ Sa：咁我要問下家姐先啦，如果家姐同我講想見你嘅話，到時我地咪會再見囉。 （Game of Eden 第一季 完） 張蔓莎 飾演 Sabrina 阿攝 飾演 阿達、創造者阿康 波盛 飾演 Jesse 編劇及製作 阿攝 音樂 BEATFRIDAY 歌：張蔓莎《到時見》 Ps.第二季將於11月播放。 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

#zip噏劇場 Game of Eden #張蔓莎 篇 Mission 1.3 「2052年的過去」 ——— 電腦導航聲音： Welcome to Garden of Eden ，依家進行腦電波核對… 玩家- Sabrina 身份核對成功 歡迎回到伊甸園，依家帶你進入所屬區域 - Area 15。今日係NC 180年9月13日，Enjoy yr time in Eden. ——— Sa: 我喺銀行保險箱搵到呢一張海鮮舫收據，上面寫住金鑾殿，時間係晚上11點...阿達，莫十三醫生話你解謎好叻...你有無咩諗法？ 達：嗯...就咁一張食飯收據...而叫啲野食都係好正常嘅龍鳳球、叉燒、海鮮拼盤、豬肺湯...我真係無頭緒... Sa：咁你可唔可以陪我去？或者去到我會諗返起某啲記憶... 達：當然可以啦！不過海鮮舫應該會有開放時間，我地等佢收鋪先潛入去！ *海浪聲 Sa：（讀白）我同阿達搵過呢個海鮮舫嘅資料...原來喺現實世界，呢個海鮮舫由3個艘艇組成，不過其中一個就轉咗手，另一個係2022年沉末咗...最後嗰一個喺我出世嘅2030年重新營業。阿達講過Game of Eden創造者將現實世界某啲失去嘅事物喺遊戲世界重現。呢個海鮮舫可能係其中一個...所以我同阿達就夜晚坐船，由最近嘅碼頭駛去呢個海鮮舫...而呢個海鮮舫叫得做世界最大海上食府，真係無講錯，兩艘大船由一艘接駁艇連接住，霓虹光管組成「歡迎光臨」4個大字，加上兩艘大船嘅燈光，真係好搶眼。我諗當時喺現實世界，呢度一定好受歡迎。 達：Sabrina，你有無印象嚟過呢度？ Sa：未有...但我想問一個問題，喺遊戲世界，玩家應該唔需要食野，咁重現呢個餐廳有咩作用？ 達：雖然我地係Game度唔駛食野，但因為Game of Eden係連接腦電波，所以遊戲世界接觸到嘅所有事，都會觸發到我地腦神經。 Sa：即係我地喺遊戲嘅所謂食野，雖然唔會飽，但會刺激到我地感官，會感受到味道。 達：無錯。我到依家仲好記得同Gigi一齊飲個杯落咗綿花糖嘅咖啡... Sa:（讀白）阿達一提起Gigi，眼神就會閃過一絲嘅傷感，睇嚟佢真係好愛Gigi… 而我地坐船好快就到海鮮舫。阿達話遊戲世界有廚師呢個職業比玩家參與同賺錢。不過時間都到咗夜晚11點，海鮮舫雖然仲開曬燈，但入面好似一個人都無。 *奇幻音樂 達：嘩！呢個海鮮舫會唔會太豪華呢！成個宮殿咁！Sabrina你睇！入口位有9條龍噴水射住個水珠！奢華到呢！ Sa：（讀白）雖然我知道我自己係2030年出世，但我唔知自己幾時昏迷成為植物人...不過我肯定，我一定成熟過呢個只係得20歲嘅阿達。佢真係成個大細路咁，見到樓梯嘅古代壁畫又不停係咁望係咁摸，又拎佢喺黑市度買嘅道具，不斷scan每個角落，知道咗啲歷史之後就好興奮咁同我講返出嚟... 達：Sabrina你知唔知，原來呢幅壁畫叫做《衣錦榮歸圖》，係意大利嘅藝術家以明朝名畫《入蹕圖》為創作靈感架！嘩！原來隔離艘船，係《食神》嘅拍攝場地！嘩！原來好多電影都係度取景架！ Sa：（讀白）望住阿達遊客加導遊上身，完全唔記得我地嚟嘅目的，好想嬲佢，但見佢咁興奮，成個發現新大陸嘅小朋友咁，又嬲佢唔落。而正當我地想行入金鑾殿嘅時候...突然所有燈熄曬！ *熄燈聲效 達：嘩咩事！ Sa：會唔會係12點，所以呢度熄燈？ *詭異音樂 達：Sabrina...你覺唔覺得...突然間...好似涼咗咁啊？ Sa：喂！阿達，你唔係驚啊嘛！ 達：我...無...只係真係覺得好似陰風陣陣啫... Sa：你怕黑...你咪開電筒囉，你企係我後面都無用架！ 達：我唔係怕黑，而係怕其他野啫... Sa：你怕啲咩啫？遊戲世界，唔通有鬼咩？ 達：唔係啊...Sabrina...你睇下... *道具聲效 「你好，歡迎使用都市傳說大典。你身處嘅地方係Jum Jum Bo海鮮舫，係世界上最大嘅海上食府。開業已經好受歡迎！可以話係其門若市，客似雲來！不過，當收鋪嘅時候，就唔係客人嘅客，而係驚嚇嘅嚇！因為...相傳呢個海鮮舫開業之前發生大型工業意外...仲導致傷亡...傳聞重建之後，係船最底嗰層...擺放死者靈位...不過，呢個都係都市傳說啫。呵呵！」 神秘聲音：啊.............. 達：Sabrina...你聽唔聽到啊？ Sabrina：聽到咩啊？ 達：好似有啲啊啊聲... 神秘聲音：啊....... 達：好似有人係度嗌緊啊！ Sabrina：邊有啫？頭先個道具都話係都市傳說嚟囉！你唔好咁驚啦！ 神秘聲音：我死得...好慘啊... 達：Sa...Brina...你望唔望到...龍椅個邊好似有個黑影啊！ Sabrina：邊度啊！我都望唔到！ 神秘聲音：不如你地嚟陪我啊... Sabrina：邊個！夠膽你就出嚟！ 神秘聲音：我就係你後面咋！ Sabrina：（驚嚇大叫）啊！ *記憶閃回聲效 *熱鬧人聲 *倒茶聲效 Sa：Uncle Morpheus，阿爸呢？ Dr M：你爸爸佢...有啲關於Game of Eden嘅事要處理... Sa：又係Game of Eden...如果佢肯將啲時間放喺搵家姐度！一定會搵得返！ Dr M：Sasa，難得今日我生日，你陪我嚟呢間海鮮舫飲茶，唔好講啲唔開心嘅事。 Sa：我有講錯咩？明明隻Game係佢整出嚟！點會搵唔到家姐嘅意識啊！ Dr M：殊...細聲少少...Uncle Morpheus唔係同你講過...唔好公開討論有關Game of Eden同你家姐嘅事咩... Sa：阿爸又唔比我講，你又唔比我講，咁我可以點啊？6年啦！我地分離手術失敗到依家已經6年啦...家姐喺Game失蹤咗6年啦... Dr M：唔係失敗...係成功咗一半...至少你依家可以陪我飲茶啊。 Sa：Uncle Morpheus，我好多謝你救返我...亦好多謝你將家姐嘅意識傳入Game度...但係...我真係好掛住家姐... Dr M：可能你家姐都好掛住你...只係唔知點面對你呢... Sa：你見過家姐？ Dr M：唔係...只係我由細睇到你地大...點會唔知你地嘅性格啊... Sa：咁Uncle Morpheus...你應該唔會阻止我入Game搵家姐架呵... Dr M：以我所知...你爸爸應該收埋曬你屋企所有登入裝置架喎。你爸爸做嘅所有野...都一定有佢嘅原因... Sa：你墓島嘅實驗室有啊嘛！ ——— 電腦導航聲音： Welcome to Garden of Eden ，依家進行腦電波核對… 玩家- Sabrina 身份核對成功 歡迎回到伊甸園，依家帶你進入所屬區域 - Area 15。今日係NC 30年6月19日，Enjoy yr time in Eden. ——— Sa：（讀白）其實我好唔鍾意登入爸爸設計嘅Game of Eden，因為佢接近將人生所有時間都比曬呢個Game度...好少時間陪我同家姐...尤其係我同家姐連體分離手術之後...佢就更少時間陪我...係咪我嘅存在...會令佢諗起佢無咗一個女...但佢明明可以喺Game度搵返家姐嘅意識出嚟，再用Uncle Morpheus意識轉移技術，咪可以將家姐重生囉...唔理佢地係唔敢定唔想，最重要係個「唔」字。既然佢地唔做，就由我去做。 我之前將現實世界同家姐嘅合照數碼化，放咗喺東藩銀行嘅保險箱。我今日決定去拎返張相出嚟去搵佢。個張相，係我同家姐做分離手術之前，一家人係海鮮舫食飯嘅合照。明明呢間海鮮舫嘅野唔係最特別，但爸爸偏偏好鍾意去食，佢話佢細個嘅時候成日去，仲會著龍袍衫影相添。家姐佢...會唔會都好掛住嗰個地方，而係嗰度出現呢？ 輸入座標：65V6+8Q *傳送聲效 Sa：（讀白）正當我用傳送門去海鮮舫嘅候，竟然只能夠去到碼頭...原來今日6月19日，係呢個海鮮舫被運走兼沉沒嘅日子...阿爸設計Game of Eden駛唔駛設計到咁真實啊！而當我諗住轉身離開嘅時候...突然之間... *開槍聲效 *記憶閃回聲效 達：Sabrina...Sabrina...你終於醒啦！ Sa：阿達...呢度係...? 達：頭先你比呢個Jesse扮鬼嚇暈咗...昏迷咗好耐啊... Sa：Jesse？邊個Jesse？ J：你係Sabrina？你真係同Gigi好似樣... Sa：Gigi...阿達...我諗我知道我自己係邊個啦... (TBC) 張蔓莎 飾演 Sabrina 阿攝 飾演 阿達 彬臣 飾演 第一代 Dr Morpheus 及 莫十三醫生 波盛 飾演 兔仔會成員兼Gigi好朋友 Jesse CFun 飾演 都市傳說大典聲音 編劇及製作 阿攝 音樂 BEATFRIDAY 歌：張蔓莎《未算壞》 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

#zip噏劇場 Game of Eden  #張蔓莎 篇 Mission 1.2 「Memory」 *記憶閃回聲效 Dr M: Sabrina…唔好意思…我地已經盡晒力… Sa: 咁佢依家係邊啊！？ Dr M : 呢方面…我哋都唔太清楚… *記憶閃回聲效 莫十三：Sabrina…唔好意思… 達：Gigi…啊…唔係…Sabrina…你無事嗎？又頭痛？ Sa: (回神）無…只係莫醫生你同我講唔好意思呢個畫面…好似發生過… 達：Sabrina! 你係咪記得返之前發生過嘅事？ 莫十三：阿達，你唔好咁心急啦！可能Sabrina 係有Dejavu，又可能真係觸發到佢之前嘅記憶呢？ 達：咁多個可能，你做醫生嘅有咩係知架？ Sa: 係囉…莫十三醫生…我點解會入嚟醫院嘅？ 莫十三：我呢個墓島精神病治療中心，表面上係做有關精神健康方面嘅研究，但你睇到咁大間醫院，得我哋三個人，就知道所謂嘅研究只係掩飾，實際係進行大腦、意識同記憶轉移嘅地下研究。而之前嘅實驗品…好多都係囚犯嚟嘅。 Sa: 即係…我都係囚犯？ 莫十三：我話好多啫，有啲係好似你咁因為意外，成為植物人。但至於你點解成為植物人呢？我就無資料啦。 達：你完全唔知實驗對象嘅背景就做研究，會唔會太無醫德啊？ 莫十三：咁你之前都無過問Gigi嘅意識會轉移落邊個身體度啦，你同我有分別咩？ Sa: 你地兩個一嘈…我就開始頭痛… 達：Sorry…Sabrina…你無事嗎？ 莫十三：Sabrina 成為植物人咁耐，突然有另一個意識植入佢大腦，係比較易頭痛。原本你應該以Gigi身份醒返，雖然意識轉移失敗，但又激活Sabrina 原本嘅意識，所以你先可以醒返。而你依家嘅失憶究竟係短期定長期，同埋Gigi嘅意識同記憶會唔會殘留係你腦入面，我就真係未有結論。 Sa: 莫十三醫生，咁我…即係Sabrina ？定Gigi?  莫十三：阿達梗係想你係Gigi啦。 達：你再亂講野啊！ 莫十三：你唔好咁大聲啊！一陣Sabrina 又頭痛架啦！ Sa: 咁我應該點做？ 莫十三：頭先你話好似見過我同你診症，咁可能我哋依家嘅畫面刺激到你過去嘅記憶。所以你依家要做嘅，就係不斷搵刺激啦，至於呢個重任，就交比阿達啦。 達：吓，交比我？咁要點刺激佢啊？ 莫十三：錫佢，嚇佢，點都好啦，作為男人嘅你，明嘅。 達：(尷尬)我…我唔明喎… 莫十三：Sabrina，呢度有枝防狼噴霧，如果阿達對你咩咩呢，你就噴佢啦！ Sa: 好啊，如果佢一當我係Gigi，我就會用。 達：Sabrina…放心…我…一定唔會亂嚟架… Sa: 講笑咋，咁我哋第一站去邊度？ 莫十三：去邊都好，總之唔好留喺墓島啦！ *閂門聲效 莫十三：(嘆氣) 阿康… *倒酒聲效 莫十三：我都叫完成咗第一任Dr Morpheus 對你嘅承諾啊，搵得返Gigi，Sabrina 又醒返…雖然結果就唔係最完美…但我都叫盡晒力架啦…至於佢哋同你整嘅Game of Eden 最終會點，就唔係我控制範圍內嘅事啦。 *飲酒聲效 *坐車聲效 Sa：阿達...我想問...Gigi係一個點嘅女仔？你地一齊咗好耐‌？ 達：其實...Gigi係莫十三醫生叫我入Game of Eden搵嘅一個玩家...佢好多年前因為連體嬰分離手術失敗...第一代Dr Morpheus將佢嘅意識轉咗入Game...而呢一代嘅Dorpheus，即係莫十三醫生想我喺Server rebot前搵返佢...再進行意識轉移手術... Sa：莫十三醫生話我同佢好似樣...你有無佢張相？ 達：因為我同佢只係喺遊戲世界認識...同埋無影過相...所以我比唔到你睇...不過你地真係好似...似到我第一眼見到你...真係以為係佢嚟... Sa：咁...我同佢...邊個靚啲? 達：吓...呢一層... Sa：你望真啲，諗清楚先好答我啊，因為你每講一句都可能會刺激到我啲記憶架！ 達：雖然你同Gigi好似！但我鐘意嘅係Gigi，所以都係Gigi靚啲！ Sa：哈哈哈，莫十三醫生話你除咗解謎叻，其他方面都好似一個小朋友咁，雖然係傻下傻下，但人畜無害，叫我放心同你去搵返我嘅真正身份。 達：最應該要小心嘅係Dr Morpheus啊，你唔好睇佢個好像好後生咁，其實佢好老架啦！ Sa：一講莫十三醫生，你就真係成個小朋友咁。好啦，唔提佢，我地依家去邊緊？ *列車到站聲效 達：每個人一出身都會有一個數字，就係出生年月日。所以我地依家去生死登記處，只要用你個名，就至少可以知道你父母係邊個。 *自動門聲效 *奇幻音樂 達：因為莫十三醫生只係得你英文名 - Sabrina，同出生嘅月、日...即係7月4日...希望出嚟嘅結果唔會有太多個啦... *打字聲效 *電腦運算聲效 達：吓...咁奇怪...search多次先... **電腦運算聲效 達：無可能架喎... Sa：咩無可能啊...發生咩事阿達？ 達：Sabrina...你自己睇下... Sa：搜尋選項，名稱 - Sabrina，出生月日 - 7月4日，結果一個...Sabrina Hong...出生年份2030年...生父 - Eden Hong，生母 - Daisy Kong… 達：而今年係2202年... Sa：即係...我今年已經172歲？ 達：可能係莫十三醫生比錯資料呢... Sa：咁如果佢無比錯呢... 達：咁正常一個都唔會有172歲啦...就算有...都無可能keep到好似你咁靚咁後生啦... Sa：我要返去墓島問清楚莫十三醫生！ *懸疑音樂 Sa：莫十三醫生！莫十三醫生！阿達，你有無佢電話？可唔可以打比佢？ 達：我打咗好多次啦，個死仔飛咗去留言啊... Sa：你會唔會知道佢有啲咩秘密實驗室，可能佢係入面收唔到電話呢？ 達：我淨係去過佢B8個層...其他地方無去過... Sa：咁不如我地分頭搵...搵到再聯絡對方？ 達：但係你啱啱先做完手術醒返，一個人周圍走...好危險... Sa:呢度得我、你同莫十三醫生三個人，會有幾危險啫？ 達：Sabrina...你唔好咁心急...我留咗言比莫十三，我地等佢覆我地咪得囉... Sa：我唔係唔想等...而係...呢個星期每日一醒，我就不斷問自己係邊個...而我淨係見過你同莫十三，但你地係識同我好似樣嘅Gigi，但唔識我...然後就不斷講Gigi Gigi...我知唔係你地兩個嘅錯...但我都只係想了解自己多啲...想知道自己嘅過去...阿達...你好好人...帶我去生死登記處嘗試搵我嘅過去...但你見到啦...我呢個Sabrina Hong...係一個2030年出世嘅人啊！究竟我發生咗啲咩事啊！我真係好想快啲知道！ 達：Sabrina...其實仲有一個方法...去嘗試搵自己嘅過去...就係登入Game of Eden...或者可能有啲線索呢... ——— 電腦導航聲音： Welcome to Garden of Eden ，依家進行腦電波核對… 玩家- Sabrina 身份核對成功 歡迎回到伊甸園，依家帶你進入所屬區域 - Area 15。今日係NC 180年9月12日，Enjoy yr time in Eden. ——— Sa：（讀白）阿達話Game of Eden係一個連接腦電波嘅虛擬實景遊戲。玩家登入之後會喺上次登出嘅地方出現。而我依家再次登入...我竟然係出現喺一間叫做東藩銀行嘅地方...即係我失憶之前曾經嚟過呢度？ 呢間銀行嘅裝修比較古舊，同現實世界嘅建築物好唔同。阿達話創造者係刻意保存某一個時代，但未免太舊啦掛... 我行入銀行，而銀行入面除咗我，就只得一個服務員。佢望住我笑，然後... 銀行職員：Sabrina小組，有咩可以幫到你？ Sa：你...識得我？ 銀行職員：你係我地尊貴嘅客戶，點會唔認得你。 Sa：我想問我對上一次入嚟...係幾時？ 銀行職員：根據資料顯示，應該係NC30年嘅6月19日。 Sa：即係現實世界嘅幾多嘅？ 銀行職員：即係現實世界嘅2052年。 Sa：（自言自言）咁...即係生死登記處嘅資料無錯？我真係2030年出世？（緊張）咁我想問上次我嚟呢度係做咩架？ 銀行職員：上次你嚟係放野入保險箱。 Sa：咁我想用保險箱服務啊唔該！ 銀行職員：好。呢邊請。 *保險庫打䦕聲效 銀行職員：Sabrina小姐，只要你將手放上屏幕，再輸入密碼就可以啦。溫馨提示，密碼只有3次輸入機會。請慢用。 Sa：（讀白）估唔面外面嘅古舊嘅建築，入到嚟係咁高科技。而我將手放上屏幕之後 *Scan聲效 Sa：（讀白）屏幕顯示7個位比我輸入密碼...有數字、英文同符號...得3次機會...失憶之前嘅我...會用咩密碼呢? 7個位嘅密碼...我叫Sabrina...唔通就係呢個？ *輸入聲效 *失敗 Sa：（讀白）唔通S係大階？但得返兩次機會...會唔會係數字？但我應該係2030年7月4日出世...203074，得6個位...唔通係2030074？定2030704呢？定係2030-74？究竟係邊個啊！ *輸入聲效 *失敗 Sa：（讀白）得返一次機會咋！有英文、數字同符號...會唔會係呢個呢？ *輸入聲效 *保險箱打䦕聲效 Sa：（讀白）Yes！估唔到我用身體嘅S&G紋身...加0704嘅生日...會撞中密碼...呢個純直覺嘅感應，竟然work...屏幕由中間一分為二之後，升起一個盒。當我打開個盒之後，入面竟然得一張紙，一張海鮮舫嘅收據。 (TBC) 張蔓莎 飾演 Sabrina 阿攝 飾演 阿達 彬臣 飾演 莫十三醫生 Hidy 飾演 NPC 銀行職員  編劇及製作 阿攝 音樂 BEATFRIDAY 歌：張蔓莎《未算壞》 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

#zip噏劇場 Game of Eden #張蔓莎篇 Mission 1.1 「Awake 甦醒」 ——— 電腦導航聲音： Welcome to Garden of Eden ，依家進行腦電波核對… 玩家- 阿達 身份核對成功 歡迎回到伊甸園，依家帶你進入所屬區域 - Area 15。今日係NC 180年9月1日，Enjoy yr time in Eden. ——— *奇幻音樂 達：阿K！你無事就好啦！ K：達仔，作為Game of Eden人工智能嘅我，會有啲咩事呢？ 達：之前Area 15管理員reboot server...我以為你會消失啊！ K：咁你實在太睇少創造者阿康設計呢個遊戲嘅心思啦。呢個遊戲係佢嘅心血，佢又點會咁容易被人破壞呢？ 達：即係你一早知道有後備server呢件事？ K：呢個係我知識範圍同權限範圍以外嘅事。 達：咁你又咁有信心會無事？ K：其一，作為一個AI，我相信創造者嘅安排。其二，如果真係有事，咁我相信天自有安排。 達：乜AI都會信命架咩？ K：人信神，AI相信人。咁AI都會相信神。 達：呢個類比推論啱用咩？ K：點都好，server reboot個一刻，我眼前一黑...然後過咗唔知幾耐，我就出現返，Game of Eden好似咩事都無發生過咁。我好似終於體會到人類死亡嗰一剎那嘅畫面。 達：你嘅資料無任何損失？ K：放心，無。K404運作完全正常。 達：咁你對後備server真係一啲都唔知情。 K：根據資料，我對後備srever嘅認知係零。或者創造者認為我無需要知道。 達：咁...你可唔可以幫我打探一下呢方面嘅消息？ K：K404嘅工作只係保存被404嘅事物，你嘅要求我唔能夠答應。 達：阿K你諗下，有Server先有Game of Eden，有Game of Eden你先可以完成你保存現實世界被404嘅事物。如果比壞人例如私人組織666嘅阿J搵到後備Server，然後比佢地控制到server同遊戲，咁你做乜都無用啦！ K：呢個類比推論...好似有道理。 *訊息聲識 達：總之你盡你能力搵有關方面嘅消息！然後通知我！ K：你唔同我一齊搵？ 達：呢一刻...我有更緊要嘅人要見啊！ K：係邊個？ 達：Gigi佢醒咗啦！ *電子聲效 玩家- 阿達 現已登出。Hope you enjoy yr time in Eden。 *呼吸機聲效 莫十三：心跳、脈膊、呼吸、腦電波都正常。你有無覺得邊度唔舒服？ Sa：頭有少少痛...手腳無乜力...其他都無特別問題... 莫十三：OK。咁我舉起咗幾多隻手指？ Sa：3隻... 莫十三：OK。知唔知今日係幾多號？ Sa：唔知... 莫十三：知唔知自己點解入咗嚟？ Sa：唔...知... 莫十三：記唔記得入嚟之前發生過啲咩事？ Sa：唔係好記得... 莫十三：諗真啲，真係乜都唔記得？ Sa：莫十三醫生...我個頭有少少痛... *大力䦕門聲 達：Gigi！你醒啦！ 莫十三：喂阿達！佢啱啱醒咋！唔好攬到佢咁實啊！ 達：唔好意思...我...太興奮... Sa：我...叫Gigi...? 達：你之前話已經諗到醒返之後第一句同我講嘅說話...就係呢句？ Sa：莫十三醫生，我真名叫Gigi...? 莫十三：呢一層... 達：哦！我知啦！你地夾埋玩我，係度扮失憶，然後嚇我意識轉移手術失敗！ Sa：你...係邊個？ 達：好，你地想玩即興劇，我就陪你地玩下。（扮認真）Gigi，我係你準老公阿達，我地原本喺草地行禮...點知...我跣親，一手推咗你落棵樹度...點知樹上面有個雀巢，你一撞，雀巢上面隻雀蛋就跌落你個頭度...啱啱撞中你頭骨嘅罅位...跟住...（扮喊）你就昏迷到依家啦！ Sa：唔好意思啊...我真係一啲印象都無啊... 莫十三：阿達...唔好玩啦... 達：你地唔好玩就真啦！Gigi，係我啊，阿達啊！係Game of Eden陪你睇王家衞電影節，然後同你行曬電影場景嘅阿達啊！我用戲飛座位同你暗示我英文名嘅阿達啊！ Sa：王家衞...? 阿達...? Game of Eden...？ 達：Ok，我chok返啲電影對白比你聽，你一定記得嘅！Er...呢句！「如果有多張船飛，你會唔會同我一齊走啊？」 Sa：食... 達：（細聲）Yes！ Sa：食野...我想食野... 達：唔係！你唔應該講呢句架！ Sa：但我真係好肚餓... 達：唔係！你之前講過，當有人扮《花樣年華》嘅周慕雲講有呢句對白，你就會扮烏蠅哥，講食屎啦你！ 莫十三：阿達...你冷靜啲先啦！ 達：（捉住Sa隻手）Gigi，你諗真啲啊！ Sa：好痛啊...你整到我隻手好痛！ 莫十三：（嚴肅）阿達！不如我地比少少空間佢先啦！ *閂門聲 達：莫十三！點解Gigi會變成咁架！ 莫十三：手術嘅野無話一定會成功架嘛，你知架。 達：你之前話呢個接受移植嘅人，同Gigi嘅生日、血型係一樣，DNA好類似，係最適合做Gigi意識轉移手術嘅人！又話成功率好高！你又呃我地！ 莫十三：咁佢同Gigi嘅DNA、腦電波頻率真係好相近...但理論還理論...結果還結果... 達：結果係Gigi死咗啦！ 莫十三：未必嘅...可能Gigi嘅意識係佢腦入面，遲啲會甦醒呢... 達：咁如果呢一世都唔醒呢！ 莫十三：咁...難得呢個Sabrina嘅外貌同Gigi似到咁...佢又疑似失憶...你咪當佢係Gigi，重新追過佢一次囉！ *打臉聲效 莫十三：阿達！你癲架！ 達：係啊！我癲在真係信你啊！ *沉重Bgm Sa：呢間白色嘅病房...好凍...我隱約聽到嗰兩個男人喺病房出面嗌緊交...好嘈...望住鏡，見到鏡嘅自己，好迷網...嗰個叫阿達嘅男人不斷叫我Gigi...我係佢口中嘅Gigi?我係佢女朋友？但我真係一啲印象都無...每當我想諗返發生咩事...我個頭就有少少痛...我照鏡再望真啲...隱約見到鎖骨位有疤痕...我除咗件衫，見到自己左邊身體有一條好長嘅疤痕...跟住係腰嘅位置...有一個S & G嘅紋身...邊個係S？邊個係G？我究竟係邊個? (TBC) 張蔓莎 飾演 Sabrina 阿攝 飾演 阿達 彬臣 飾演 莫十三醫生 CFun 飾演 阿K 編劇及製作 阿攝 音樂 BEATFRIDAY 歌：張蔓莎《未算壞》 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

*警報聲效 管理員：現在係NC180年8月31日晚上11時45分。Area 15 server 將於15分鐘後重啟。請玩家盡快登出。 達：就喺Reboot 之前最後15分鐘，我同Gigi趕得切搵到莫十三醫生進行意識轉移手術。我仲好記佢臨登出前好用力咁攬實我，就好似《旺角卡門》阿娥攬實阿華咁，然後錫咗我一啖… 歌：張蔓姿《關於纏綿》 達：呢個…係我喺Game of Eden 第一次kiss…亦喺我人生嘅初吻…嗰下太快…太突然…我完全唔識反應…我淨係聽到莫十三講咗句：「嘩，你哋錫到咁，唔駛15分鐘個server 就會hang 機架！喂！你哋仲唔停？係咪唔做意識轉移手術啦？」 我同Gigi 聽完就對望然後大笑。跟住莫十三就帶走Gigi去佢做意識轉移嘅地方。我就登出Game of Eden *電子聲效 玩家-阿達 現已登出。Hope you enjoy yr time in Eden。 達：（讀白）我返到現實世界，身處喺莫十三位於墓島嘅實驗室，我望一望個鐘，仲有1分鐘就會Reboot。我除咗擔心Gigi 嘅手術之外…仲擔心阿K、Jesse同一眾兔仔會嘅人…Reboot 之後佢哋仲存唔存在呢？如果管理員選擇性篩選要留嘅人、物同事…Game of Eden會變成點？180年嚟…第一次嘅Reboot…雖然我只係玩咗呢個遊戲一段好少嘅時間…但竟然會見證到呢一個歷史時刻… *時計倒數聲效 達：5,4,3,2,1 *熄機聲效 達：過咗12點，即係現實世界2202年兼遊戲世界NC180年嘅9月1號。因為我無熄到Game of Eden 登入裝置嘅電源，所以我見證住佢嘅顯示器由有訊號變成無訊號…一個時代就咁終結…要3日之後先可以登入Game of Eden … *開機聲效 達： (驚訝)明明應該3日之後先會重啟先會有返訊號架…點解過咗唔夠1分鐘…就好似可以再登入嘅 ? 真係F5都無咁快喎… 莫十三：唔好望啦，你登入咪得發生咩事囉 達：嘩！比你嚇死啦！你入嚟可唔可以敲門先啊？ 莫十三：喂傻達，你係咪錫到矇咗？唔記得你喺我實驗室啊？呢度係我嘅地方，我鍾意敲就敲，唔敲就唔敲啦！ 達：你咁快出返嚟嘅? Gigi 嘅意識轉移實驗呢？得咗啦？ 莫十三：得咗啦，佢係度啊。同佢say 個 hi啦。 達：Hard disk? Gigi 係嗰hard disk 度？ 莫十三：係咪好想摸下佢鍚下佢呢？呢個超薄嘅Hard disk 有流線型嘅設計，正唔正啊？ 達：喂！你捉實啲啊！一陣跌爆咗我殺咗你啊！ 莫十三：傻達你唔係真係信啊！ 達：咁一個人嘅意識可以留喺Game of Eden…我以為都可以放入一個hard disk 度… 莫十三：咁我放落把遮度，比你擔住周圍行好無啊？ 達：好似倩女幽魂咁？ 莫十三：我講笑咋，你份人比啲幽默感好唔好？ 達：我有幽默感，不過唔係對住你啫。 莫十三：知啦，對住Gigi 嘛。得啦，佢轉移成功，我會話你知架啦。 達：我想問…你會將佢轉移落邊一個身體度啊？ 莫十三：其實邊個身體重要咩？最緊要腦入面嗰個係Gigi 咪得囉。 達：我都係好奇想知邊個咁不幸…成為咗植物人…比你拎你做實驗… 莫十三：你咁鍾意關心人，不如入Game 關心下阿K、Jesse 佢哋啦。 達：你意思係依家入得Game?  莫十三：得架啦，一啲事都無。 達：你咁肯定？你啱啱無登出到？ 莫十三：用下個腦都知Game of Eden創造者阿康咁辛苦整隻Game 出嚟，會唔會咁易比管理員reboot 個server 啊？ 達：吓…點會唔會啊? 管理員喎…權限咁大? 莫十三：管理員係管理呢個server 嘅人，唔係創造呢個server 嘅人嘛。即係無論管理員權限幾大，都大唔過Game of Eden創造者。雖然創造者都係人，但喺遊戲世界佢係神。 達：咁只要搵到Game of Eden 嘅server，撳咗reboot 掣，就算創造者點勁都無用啦！而頭先真係有30秒無咗訊號喎！ 莫十三：咁你有無試過停電啊？停完好快有返電，點解啊？ 達：因為有後備電囉…咦…咁即係…有後備Server ? 莫十三：如果整Game of Eden 嘅阿康好似你咁蠢，轉數咁慢，隻Game 肯定一早被人騎劫咗控制咗啦。 達：但頭先無咗一下訊號…即係Game of Eden 嘅管理員喺現實世界搵到伺服器…撳咗reboot掣…佢哋話重啟需要3日，但頭先後備server 唔駛1分鐘就運行到…即係班管理員唔知有後備server 嘅事？ 莫十三：神有神嘅安排。神想人知幾多就知幾多。 達：但依家佢哋知道有後備server 嘅事，如果比佢哋搵到嘅話…咁淨網行動…只係時間嘅問題？ 莫十三：真正嘅答案呢... 達：唔係問出嚟係搵出嚟嘛！我知...但如果比佢哋早一步搵到，佢地就會控制到Game of Eden… 莫十三：嘩嘩嘩，我feel 到達哥進入英雄mode 啊！ 達：只係我一諗到666嘅阿J…呢啲遊走現實同遊戲世界嘅賤人存在緊生存緊…我就覺得… 莫十三：嗱嗱嗱講明先！我呢就負責搞大腦嘅，而打大佬呢，你鍾意嘅就自己打飽佢啦。 達：我依家就入Game of Eden 睇下阿K有無事。如果Gigi 一醒返，麻煩你即刻通知我！ 莫十三：得啦，英雄達。 (TBC) #zip噏劇場 Game of Eden #張蔓姿 後篇 "The Server of Game of Eden" 阿攝 飾演 阿達 彬臣 飾演 莫十三 編劇及製作 阿攝 歌：張蔓莎《到時見》 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting