Audio is streamed directly from the publisher (m.cdn.firstory.me) as published in their RSS feed. Play Podcasts does not host this file. Rights-holders can request removal through the copyright & takedown page.
Show Notes
時間：180年9月23日
地點：封閉區域Area DB Island 啞鈴殿
上回題要 - 阿達眾人去到島之盡處，被九頭海蛇吞噬之後，進入啞鈴殿，除咗見到今敏之外，更見到被困嘅盧婷，今敏更將盧婷及獨角獸打散，吸入黃紙之中...今敏其後用火同時燒兩張黃紙...盧婷嘅身體重現大家眼前...
盧綠：婷婷...你...無事嘛...
盧婷：綠哥哥...我無事...不過...
盧綠：不過咩啊！
盧婷：綠哥哥，我第一世原來係...盧如...
盧零/葦：婷婷...你第一世...係Fish…?
黑烏鴉盧天：盧婷...你第一世...係我媽媽...盧如？
白烏鴉盧地：家姐，可唔可以解釋發生咩事...佢點解會係我地嘅阿媽啊？
今敏：你地兩位作為渡靈者，好清楚靈魂轉世嘅過程。當年你地媽媽過世，盧零嘅遺願就係想你地媽媽協助看守整個啞鈴洲，而你地媽媽就揀咗將自己嘅靈魂一分為二，一半成為獨角獸，看守所有擁有靈魂嘅動、植物，成為百獸之王；而另一半嘅靈魂就繼續轉世，喺呢度生活。不過由於只有一半嘅靈魂，所以壽命會比較短，轉生嘅時候可能有智慧就無體術，又或者有體術但無外貌，總之比其他靈魂無咁完整，總係有啲缺陷咁啦。不過因為係盧天、盧地你地成為渡靈者之前發生嘅事，所以你地唔知都好正常嘅～
盧綠：（苦笑）哈哈...我咁辛苦出海...咁難得搵到阿葦...點知阿葦第一世係盧零...依家重遇返婷婷，點知佢第一世係盧如...即係第一代嘅村長夫人...
今敏：盧綠～你做咩嗱口嗱面啊～你應該要多謝我～因為盧婷原本活唔過25歲，依家我除咗幫你喺Area 15 救返你細妹之外，仲幫佢嘅靈魂同獨角獸合二為一，變返完整，咁就可以長命啲～
達：但佢地第一世係戀人，而今世係兄妹...唔好講話係盧綠...我呢個外人...都覺得好亂啊...
今敏：唔係亂～係緣份～即係我地現實世界當年嗰句俗語，好似係咩前世五百次嘅回眸，先換嚟今生嘅一次擦肩而過～
黑烏鴉盧天：雖然咁樣重遇有少少奇怪，但我地一家四口終於都可以再次一家團聚啦...
白烏鴉盧地：阿爸...阿媽...我同家姐...按照你地嘅教誨努力做好村長以及渡靈者嘅角色...希望無令你地兩位失望啦...
盧婷/如：小天、地仔，我依家除咗擁有獨角獸嘅記憶，仲有盧婷前幾世轉生為人嘅記憶，我前嗰幾世分別經歷過小天同地仔做村長以及你地成為渡靈者嘅階段，我可以好肯定咁講，你地做得好好。作為媽媽嘅我，好欣慰。
盧葦/零：無錯，根據我前幾世嘅記憶，你地兩個都得比我同Fish更好。多謝你地兩個令到呢個封閉區域可以好好咁運作。
盧婷/如：啊～Zero，你又唔多謝我嘅？話晒我都幫你做咗過百年獨角獸，看管咁多動物，仲攰過以前喺666組織做Agent嘅時候啊！
盧葦/零：如果以盧零嘅身份，我超級多謝你接納我嘅苦差同任性嘅安排，但如果以盧葦，即係盧婷哥哥嘅角度呢～就～
盧婷/如：綠哥哥！葦哥哥佢蝦我啊！
盧綠：阿葦...唔係...盧零...唔係...唉...我...一時之間唔知點面對你地...我好似有返細佬同妹...但又好似失去咗佢地咁...
盧葦/零：阿哥，喺大凶日之後，要由你臨急臨忙接任做第6任村長...除咗要出海搵我地，仲要處理阿達由Area 15入嚟嘅問題...呢段時間，辛苦你啦...
盧綠：我...一啲都唔辛苦...只係...有啲迷惘啫...
今敏：嘩～真係好耐都無試過咁毛管戙啊～～～十足十百幾二百年前嘅乜情、愛回乜嗰啲家庭劇咁啊～之、但、係！我要阻一阻你地重聚～因為有更緊要嘅事去做～
黑烏鴉盧天：今敏，你終於肯認真處理返啞鈴洲嘅問題啦咩！
白烏鴉盧地：係啊！今敏！你叫埋人工智能K Area DB Island出嚟！我地一次過解決所有問題！
今敏：其實所有問題都只係得一個問題，就係你地想點～即係你地想點編寫呢個封閉區域嘅未來啊？
盧葦/零：我諗住交比小天同地仔佢地兩個去管理呢度。Fish，你覺得點啊？
盧婷/如：Zero，我知你想由呢度出生成長嘅佢地去接任今敏嗰位，但係你都無問過對囝囡嘅意願...
今敏：盧天同盧地佢地做過人，成為過村長；之後渡靈者嘅崗位，就類似「仙」嘅角色，但做我呢個位呢～就係「神」，係「主」，係「天尊」，盧天、盧地，你地準備好未先？
白烏鴉盧地：阿爸...阿媽...我同家姐...
今敏：OKOK～比啲野大家睇睇先～
*撻手指聲效
達：（讀白）今敏佢一撻手指，我地身處嘅啞鈴殿由原本全白嘅空間變成全透明！我地正正就喺啞鈴洲嘅嘅一千米嘅高處！雲霧喺我地旁邊飄過...至於啲村民就細到好似粒豆咁...
盧綠：乜...我地唔係被九頭海蛇吞咗落肚...應該喺海底架...點解我哋會喺高空度嘅...?
今敏：盧綠，我知你仲好後生，喺二十日內知道呢度嘅創世資料，又上過天堂落過地獄，但嚟到呢一刻，你要慢慢學識到唔可以再用「人」嘅思維去睇呢家嘅情況～
達：（讀白）而唔駛一瞬間，我地就喺啞鈴洲嘅上空，除住雲霧飄到去百草園。食人花同有翼猩猩繼續喺巨型蘇木旁邊嬉戲緊...而本身好敏感嘅佢地好似感覺到天上面有異樣，抬頭望咗上嚟。
今敏：呢個封閉區域可以有好多可能性，140年前盧零就按佢意願去創建呢個世界。依家就到盧天、盧地或者盧綠你地啦。
達：（讀白）今敏一邊講，我地繼續喺高空度飄浮，經過生死中途島，半黑半白烏鴉繼續協助靈魂轉世。跟住我地向上升，略過半天堂，再飛到 α 島上面，然後突然急降！快速落到去 α 島嘅地面！
今敏：啞鈴殿空間解除！
*機關聲效
達：（讀白）今敏講完之後，我地就去返 α 島嘅地面，頭先好似快速咁環繞咗啞鈴洲咁。
白烏鴉盧地：家姐，你有咩想法啊？
黑烏鴉盧天：60年前，K Area DB Island問我做咗渡靈者之後嘅感受，當時我閃過一個假如喺現實世界出生會過成點嘅念頭...
盧葦/零：小天，你唔係唔想去現實世界生活啊嘛？
黑烏鴉盧天：唔係...只係有小小想去睇下阿爸阿媽你地曾經生活過嘅世界...究竟係點啫...
盧婷/如：阿達，呢度得你喺現實世界嘅人，依家嗰度變成點啊？
達：我...唔知140年前你地當時嘅世界喺點...最多喺電影睇到當時嘅世界...我只可以話呢個封閉區域好寧靜，好舒服，我其實好享受呢個久違嘅大自然...呢度，係真正屬於你地啲Game of Eden…
盧葦/零：只係差在有大凶日，Server一停，我地就會消失。
達：我喺查緊後備server位置嘅時候先得到全知狀態同你地啲存在...
今敏：創造者康喺Area 15安排可以入嚟嘅機關有張保仔洞同北帝神象兩個。當然我可以隨時整出入口連接兩個區域啦。若果你地想公開你地嘅存在，或者去Area 15生活，我撳幾個掣就得～如果想去現實世界生活，就要靠阿達左手「D」嘅能力，以及莫十三醫生嘅意識轉移技術啦～
盧婷/如：呢個就係K Area DB Island講啲 D 代表 Die，B 代表 Birth。創造者康同莫菲斯嘅後人可以為Area DB Island提供另一個選擇嘅意思？
達：但我嘅左手唔係破壞架咩？
今敏：由你左手消滅嘅事物會去到回收區，特定時間內，莫十三醫生可以將被你消滅嘅數碼靈魂，用意識轉移技術傳入現實世界嘅身體度。我相信到咗NC 181年，即係現實世界嘅2203年，莫十三一定做到。如果唔係，阿達你又點會喺阿康嘅後人得到左手嘅能力呢？
白烏鴉盧地：家姐，我其實由細到大都冇特別想法，我只係想阿爸阿媽仲有你開心，所以就按照你地嘅吩咐，盡力去做好。所以，只要你地講一句，我就會盡忠職守，直到永遠。
黑烏鴉盧天：我...其實未有咩特別想法...
盧綠：我...只係唔想再有大凶日出現...因為我唔想再有任何一位村民出事...
達：盧綠，我應承你，我喺Area 15同現實世界會盡力保護你地！
今敏：果然係阿康後人睇中嘅人！不過～見埋佢地兩個之後，你地先再做決擇啊～
盧葦/零：今敏，仲有邊個人要見？
今敏：咪就係佢地兩個，啊，唔係，係三個先啱～佢地到啦～
達：（讀白）今敏一講完，佢指住 α 島附近嘅海域，我地咁多個人一齊望過去...原本平靜嘅海面湧起一陣陣波浪...隔咗一陣，有一個物體由海水入面跳上嚟！全身濕晒企喺我地面前！嗰個物體...十足十我喺張保仔洞見到嘅半人半魚怪物！
盧葦/零：全身都係魚鱗...成個外型...同阿K嘅魚人型態係一樣架嘅！？
凱安：喂～兩個星期無見，咁快就唔認得我啦？
盧綠：係凱安！點解你會變成咁架？
達：（讀白）魚人型態嘅凱安沖咗上岸之後，再有另一個身體由海入面跳咗上嚟地面！佢全身著住好似太空身嘅衫...而佢係裘雪！
裘雪：除咗我之外，K Area DB Island都係度。
K Area DB Island：今敏，蛇變嘅兩位村民集齊喺度。可以進行最終嘅決擇啦。
Zip噏劇場 Game of Eden 第二季 小島篇 第100回「決擇」
阿攝 飾演 阿達
Ant 飾演 今敏
Crystal 飾演 盧婷及盧如
鄧添樂 飾演 盧零及盧葦
CFun 飾演 盧綠
Kity 飾演 黑烏鴉盧天
小白 飾演 白烏鴉盧地
Potter 飾演 凱安
Harry 飾演 裘雪
Alton 飾演 人工智能 K Area DB Island
編劇及製作 阿攝
音樂 BEAT FRIDAY (Accent, Cross, Lone, Minty, Phase, Stuk, thing)
封面設計 Followmelikeblack
Leave a comment and share your thoughts:
Powered by Firstory Hosting