Sons de Nós con Lidia India 28 de marzo de 2025

Na escolla deste título para a súa última canción, Lidia India fainos un convite a bailar e gozar da vida, compartindo a enerxía solta dos nosos corpos, “ata que o corpiño aghuante”. Lidia India é Lidia Castrillón, ou Lidia Castrillón é Lidia India, unha ferrolá que leva na súa música a mestizaxe por bandeira e a conexión co público como intención última en todo o que fai. Lidia é médica de profesión e música de corazón. Unha compositora que, seguramente estaba aí dentro dende sempre pero que medrou despois dunha experiencia vital transoceánica que a marcou de moitos xeitos.