زه‌بوره‌كان ١٤٠: ١ - ١٤٣: ١٢

زه‌بوره‌كان ١٤٠: ١ - ١٤٣: ١٢

• 1ئەی یەزدان، لە کەسی بەدکار دەربازم بکە،
• لە پیاوی توندوتیژ بمپارێزە،
• 2ئەوانەی لە دڵەوە بیر لە خراپە دەکەنەوە و
• هەموو ڕۆژێک خەریکی شەڕانگێزین.
• 3زمانیان وەک زمانی مار تیژکردووە،
• ژەهری تیرەمار لەژێر لێویانە.
• 4ئەی یەزدان، لە دەست بەدکار ئاگادارم بە،
• لە پیاوی توندوتیژ بمپارێزە،
• ئەوانەی پیلانیان داناوە بۆ ئەوەی قاچم بخلیسکێنن.
• 5لووتبەرزان تەڵەیان بۆم ناوەتەوە،
• پەت و تۆڕیان بڵاو کردووەتەوە،
• لە دەم ڕێگا داویان بۆم ناوەتەوە.
• 6بە یەزدانم گوت: «تۆ خودای منی!»
• ئەی یەزدان، گوێ لە دەنگی پاڕانەوەم بگرە.
• 7ئەی یەزدانی پەروەردگار، هێزی ڕزگاریم،
• لە ڕۆژی شەڕدا سەری منت داپۆشی.
• 8ئەی یەزدان، ئارەزووەکانی بەدکار مەهێنە دی،
• لێمەگەڕێ پیلانەکانی سەربگرێت،
• بۆ ئەوەی لووتبەرز نەبن.
• 9با سەری ئەوانەی دەوریان داوم
• بە خراپەی لێویان بپۆشرێن،
• 10با پشکۆیان بەسەردا ببارێت،
• بکەونە ناو ئاگرەوە،
• بکەونە ناو چاڵەوە، ڕاست نەبنەوە.
• 11با بوختانکەر لەسەر زەوی جێگیر نەبێت،
• با کەسی توندوتیژ ببێتە نێچیری خراپە.
• 12دەزانم یەزدان دادپەروەری دەکات بۆ هەژاران،
• ماف دەدات بە نەداران.
• 13بێگومان ڕاستودروستان ستایشی ناوت دەکەن،
• سەرڕاستان لە ئامادەبوونت دادەنیشن.

زه‌بوره‌كان ١٤١

• 1ئەی یەزدان، هاوارم بۆ تۆ کرد، خێرابە بۆ لام!
• گوێ لە دەنگم بگرە کە هاوارت بۆ دەکەم.
• 2با نوێژم وەک بخوور لەبەردەمت پەسەند بێت،
• دەست بەرزکردنەوەم وەک قوربانی ئێوارە بێت.
• 3ئەی یەزدان، پاسەوانێک دابنێ بۆ دەمم،
• دەرگای لێوەکانم بپارێزە.
• 4وا مەکە دڵم بەلای خراپەدا بچێت،
• نەوەک خۆم بە کردەوەی بەد خەریک بکەم،
• لەگەڵ ئەوانەی بەدکاری دەکەن؛
• با لە شتە خۆشەکانی ئەوان نەخۆم.
• 5با پیاوچاک لێم بدات، ئەمە خۆشەویستییە،
• با سەرزەنشتم بکات، ئەمە وەک ڕۆنی بۆنخۆشی سەرە،
• سەرم لاری نییە،
• چونکە بەردەوام نوێژەکانم لە دژی خراپەکانیانە.
• 6ڕابەرانیان لە خەرەند فڕێدەدرێنە خوارێ،
• ئەوسا گوێ لە قسەم دەگرن چونکە ڕاستە.
• 7وەک کێڵان و شەقکردنی زەوی،
• ئاوا ئێسقانەکانیان لە دەمی گۆڕ پەرت دەکرێن.
• 8بەڵام چاوەکانم سەرنجیان لەسەر تۆیە، ئەی یەزدانی پەروەردگار،
• پەنا دێنمە بەر تۆ، با گیانم نەفەوتێت.
• 9بمپارێزە لەو داوەی بۆیان ناومەتەوە،
• لە تەڵەی بەدکاران.
• 10با بەدکاران پێکەوە بکەونە تۆڕی خۆیانەوە،
• لەو کاتەدا من بە ئاسوودەیی بپەڕمەوە.

زه‌بوره‌كان ١٤٢

• 1پڕ بە دەنگم هاوار بۆ یەزدان دەکەم،
• بە دەنگی بەرز لە یەزدان دەپاڕێمەوە.
• 2سکاڵای خۆمی لەبەردەم هەڵدەڕێژم،
• لەبەردەمی باسی تەنگانەکانی خۆم دەکەم.
• 3لە کاتی ورەبەردانی ڕۆحم،
• تۆ شارەزای ڕێڕەوی منی.
• لەو ڕێگایەی پێیدا دەڕۆم،
• خەڵک تەڵەیان بۆم ناوەتەوە.
• 4ئاوڕ بەلای ڕاستدا بدەوە و ببینە،
• کوا ناسیاوی من؟
• پەناگا بۆ من قڕبووە،
• کوا پرسیارکەر لە ئەحواڵی من؟
• 5ئەی یەزدان، هاوارم بۆ تۆ کرد،
• گوتم: «تۆ پەناگای منی،
• لە خاکی زیندووان تۆ بەشی منی.»
• 6بە وردی گوێ لە لاوانەوەم بگرە،
• چونکە زۆر زەلیلم،
• لە دەست ڕاونەرانم دەربازم بکە،
• چونکە لە من بەهێزترن.
• 7گیانم لە بەندیخانە دەربهێنە،
• بۆ ئەوەی ستایشی ناوت بکەم.
• ئینجا ڕاستودروستان دەورم دەگرن،
• چونکە چاکەم لەگەڵ دەکەیت.

زه‌بوره‌كان ١٤٣

• 1ئەی یەزدان، نوێژم ببیستە،
• گوێ لە پاڕانەوەم بگرە،
• بە دڵسۆزی و ڕاستودروستی خۆت
• وەڵامم بدەوە.
• 2لەگەڵ خزمەتکاری خۆت مەکەوە دادگایی،
• چونکە کەس نییە لەبەردەم تۆ بێتاوان دەربچێت.
• 3دوژمن ڕاوم دەنێت،
• ژیانمی بەرەو زەوی پێپەست کردووە،
• لەناو تاریکی داینیشاندووم
• وەک ئەوانەی دەمێکە مردوون.
• 4ڕۆحم بێ ورە دەبێت،
• لە ناخمەوە دڵم دەبەسترێت.
• 5ڕۆژگاری دێرین دێتەوە یادم،
• لە هەموو کارەکانت ورد دەبمەوە،
• سەرنج دەدەمە کردارەکانی دەستت.
• 6دەستم بۆ تۆ پاندەکەمەوە،
• گیانم بۆ تۆ وەک خاکێکی وشکە.
• 7ئەی یەزدان، زوو وەڵامم بدەوە،
• ڕۆحم لەناودەچێت،
• ڕووی خۆتم لێ مەشارەوە،
• ئەگینا لەوانە دەچم کە دەچنە نێو جیهانی مردووان.
• 8با بەیانییان گوێم لە خۆشەویستییە نەگۆڕەکەت بێت،
• چونکە من پشت بە تۆ دەبەستم.
• ئەو ڕێگایەم پێ بناسێنە کە دەیگرمەبەر،
• چونکە گیانی خۆم بە تۆ دەسپێرم.
• 9ئەی یەزدان، لە دوژمنەکانم دەربازم بکە،
• هانا بۆ تۆ دەهێنم.
• 10فێرم بکە بە ڕەزامەندیی تۆ کار بکەم،
• چونکە تۆ خودای منی.
• با ڕۆحە چاکەکەت ڕێنماییم بکات
• لە زەوییەکی ڕاست.
• 11ئەی یەزدان، لەبەر ناوی خۆت بمژیێنەوە،
• بە ڕاستودروستی خۆت گیانم لە تەنگانە دەربهێنە.
• 12بە خۆشەویستییە نەگۆڕەکەت دوژمنانم دەمکوت بکە،
• هەموو ئەوانە لەناوببە کە تەنگم پێ هەڵدەچنن،
• چونکە من خزمەتکاری تۆم.